മലപ്പുറം: വയനാട് ലോക്സഭാ ഉപതെരഞ്ഞെടുപ്പിന് ജില്ലയിലെ ഒരുക്കങ്ങളും സുരക്ഷാ ക്രമീകരണങ്ങളും പൂര്‍ത്തിയായതായി ജില്ലാ തെരഞ്ഞെടുപ്പ് ഓഫീസര്‍ കൂടിയായ കളക്ടര്‍ വി.ആര്‍. വിനോദ്, ജില്ലാ പോലീസ് മേധാവി ആര്‍. വിശ്വനാഥ് എന്നിവര്‍ കളക്ടറേറ്റ് കോണ്‍ഫറന്‍സ് ഹാളില്‍ നടത്തിയ വാര്‍ത്താ സമ്മേളനത്തില്‍ അറിയിച്ചു.
ജില്ലയില്‍ ഉപതെരഞ്ഞെടുപ്പുള്ള ഏറനാട്, നിലമ്പൂര്‍, വണ്ടൂര്‍ എന്നീ മൂന്ന് മണ്ഡലങ്ങളിലായി ആകെ 6,45,755 പേര്‍ക്കാണ് സമ്മതിദാനാവകാശമുള്ളത്. ഇവരില്‍ 3,20,214 പേര്‍ പുരുഷന്‍മാരും 3,25,535 പേര്‍ സ്ത്രീകളും ആറ് പേര്‍ ട്രാന്‍സ്ജെന്‍ഡര്‍ വിഭാഗക്കാരുമാണ്.
13ന് രാവിലെ ഏഴ് മുതല്‍ വോട്ടെടുപ്പ് ആരംഭിക്കും. 25 ഓക്സിലറി ബൂത്തുകള്‍ ഉള്‍പ്പെടെ ആകെ 595 പോളിംഗ് സ്റ്റേഷനുകളാണ് ജില്ലയില്‍ സജ്ജീകരിച്ചിട്ടുള്ളത്. എല്ലാ ബൂത്തുകളിലും റാംപ്, ടോയ്‌ലറ്റ്, കുടിവെള്ള സൗകര്യങ്ങള്‍ എന്നിവ ഉറപ്പാക്കിയിട്ടുണ്ട്. വനിതാ ഓഫീസര്‍മാരുടെ മാത്രം മേല്‍നോട്ടത്തില്‍ ഒമ്പത് പോളിംഗ് സ്റ്റേഷനുകള്‍ പ്രവര്‍ത്തിക്കും. ഒമ്പത് മാതൃകാ പോളിംഗ് ബൂത്തുകളും സജ്ജീകരിച്ചിട്ടുണ്ട്. ഓരോ മണ്ഡലത്തിലും ഇത്തരത്തില്‍ മൂന്ന് വീതം പോളിംഗ് സ്റ്റേഷനുകളാണ് ഉണ്ടാവുക. 595 പോളിംഗ് സ്റ്റേഷനുകളിലും വോട്ടെടുപ്പ് നടപടികള്‍ വെബ്കാസ്റ്റിംഗ് നടത്തുന്നുണ്ട്. 16 മേഖലകളിലായി 26 പ്രശ്ന സാധ്യതാ ബൂത്തുകളാണ് കണ്ടെത്തിയിട്ടുള്ളത്. ഇവിടങ്ങളില്‍ അധിക സുരക്ഷ ഒരുക്കും. ഏറനാട് അഞ്ചും നിലമ്പൂരില്‍ 17 ഉം വണ്ടൂരില്‍ നാലും പ്രശ്ന സാധ്യതാ ബൂത്തുകളാണുള്ളത്.
മൂന്ന് മണ്ഡലങ്ങളിലുമായി റിസര്‍വ് ഉള്‍പ്പെടെ 1424 ബാലറ്റ് യൂണിറ്റുകളും (ഏറനാട്-416, നിലമ്പൂര്‍-500, വണ്ടൂര്‍-508) 712 കണ്ട്രോള് യൂണിറ്റുകളും (ഏറനാട്-208, നിലമ്പൂര്‍-250, വണ്ടൂര്‍-254), 772 വിവി പാറ്റുകളും (ഏറനാട്-226, നിലമ്പൂര്‍-271, വണ്ടൂര്‍-275) വോട്ടുപ്പിന് ഉപയോഗിക്കും.
റിസര്‍വിലുള്ളവര്‍ ഉള്‍പ്പെടെ 2975 ഉദ്യോഗസ്ഥരെയാണ് പോളിംഗ് ചുമതലകള്‍ക്ക് നിയോഗിച്ചിട്ടുള്ളത്. ഓരോ പോളിംഗ് സ്റ്റേഷനിലും നാല് വീതം ഉദ്യോഗസ്ഥരാണ് ഉണ്ടാവുക. 1300 ലധികം വോട്ടര്‍മാരുള്ള ബൂത്തുകളില്‍ ഒരു പോളിംഗ് ഓഫീസറെ അധികമായി നിയോഗിക്കും. ഇതിന് പുറമെ 67 സെക്ടര്‍ ഓഫീസര്‍മാര്‍, 26 മൈക്രോ ഒബ്സര്‍വര്‍മാര്‍, 570 ബിഎല്‍ഒമാര്‍, 182 റൂട്ട് ഓഫീസര്‍മാര്‍, 54 സ്ക്വാഡ് ലീഡര്‍മാര്‍ എന്നിവരും ചുമതലകളിലുണ്ടാകുമെന്ന് ജില്ലാ കളക്ടര്‍ അറിയിച്ചു.