ലഹരി ഉപയോഗത്തിനെതിരേ കാമ്പയിനുമായി സോണി സ്‌പോര്‍ട്‌സ്
Saturday, August 10, 2024 11:44 PM IST
കൊച്ചി: ഇന്ത്യന്‍ യുവാക്കള്‍ക്കിടയിലെ മയക്കുമരുന്നിന്‍റെ ഉപയോഗം തടയാന്‍ ഇസ് ബാര്‍ ഡ്രഗ്‌സ് കി ഹാര്‍ എന്നപേരില്‍ പുതിയ കാമ്പയിന്‍ അവതരിപ്പിച്ച് പ്രമുഖ സ്‌പോര്‍ട്‌സ് ബ്രോഡ്കാസ്റ്ററായ സോണി സ്‌പോര്‍ട്‌സ് നെറ്റ്‌വര്‍ക്ക്.
യുവാക്കളെ പ്രചോദിപ്പിക്കുന്നതിനും മയക്കുമരുന്നിന് അടിമപ്പെടുന്നതിനു പകരം സ്‌പോര്‍ട്‌സിലൂടെ ആരോഗ്യകരവും സംതൃപ്തവുമായ ജീവിതം നയിക്കുന്നതിന് ഊന്നല്‍ നല്‍കുന്നതിനുമാണ് കാമ്പയിന്‍ ലക്ഷ്യമിടുന്നത്.
ഇന്ത്യന്‍ ക്രിക്കറ്റ് ടീം പരിശീലകന്‍ ഗൗതം ഗംഭീര്‍, സുനില്‍ ഛേത്രി, ബൈച്ചുംഗ് ബുടിയ, ടെന്നീസ് താരം സാനിയ മിര്‍സ, സൈന നെഹ്‌വാള്‍, സ്മൃതി മന്ദാന, പി.ആര്‍. ശ്രീജേഷ്, മന്‍പ്രീത് സിംഗ്, നിഖാത് സരീന്‍ എന്നീ പ്രമുഖ കായികതാരങ്ങള്‍ കാമ്പയിന്‍റെ ഭാഗമാകും.
യുവാക്കള്‍ക്കിടയില്‍ മാറ്റമുണ്ടാക്കാന്‍ കഴിയുമെന്നും ആ മാറ്റത്തിനുള്ള ശക്തി സ്‌പോര്‍ട്‌സിനുണ്ടെന്ന് ആത്മാര്‍ഥമായി വിശ്വസിക്കുന്നുവെന്നും സോണി പിക്‌ചേഴ്‌സ് നെറ്റ്‌വര്‍ക്സ് ഇന്ത്യയുടെ സ്‌പോര്‍ട്‌സ് ബിസിനസ് ഡിസ്ട്രിബ്യൂഷന്‍ ആന്‍ഡ് ഇന്‍റര്‍നാഷണല്‍ ബിസിനസ് ഹെഡും ചീഫ് റവന്യൂ ഓഫീസറുമായ രാജേഷ് കൗള്‍ പറഞ്ഞു.