ലോക റോബോട്ട് ഒളിമ്പ്യാഡ് : ചരിത്രം സൃഷ്ടിച്ച് കേരള സ്റ്റാര്‍ട്ടപ് യുണീക്ക് വേള്‍ഡ് റോബോട്ടിക്സ്
Saturday, December 14, 2024 1:18 AM IST
തിരുവനന്തപുരം: തുര്‍ക്കിയില്‍ നടന്ന വേള്‍ഡ് റോബോട്ട് ഒളിമ്പ്യാഡില്‍ (ഡബ്ല്യുആര്‍ഒ-2024) ചരിത്രം സൃഷ്ടിച്ച് എഐ, റോബോട്ടിക്സ്, സ്‌റ്റെം എജ്യുക്കേഷന്‍ എന്നിവയിലെ മുന്‍നിരക്കാരായ യുണീക്ക് വേള്‍ഡ് റോബോട്ടിക്സ് (യുഡബ്ല്യുആര്‍) ഫ്യൂച്ചര്‍ ഇന്നൊവേറ്റേഴ്‌സ് എലിമെന്‍ററി വിഭാഗത്തിലാണ് ടീം വിജയം നേടിയത്.
ഒളിമ്പ്യാഡിന്‍റെ രണ്ട് പതിറ്റാണ്ടിന്‍റെ ചരിത്രത്തില്‍ ആദ്യമായാണ് കേരളത്തില്‍ നിന്ന് ഒരു ടീം ഇന്‍റര്‍നാഷണല്‍ വിഭാഗത്തില്‍ എത്തുന്നതും വിജയിക്കുന്നതും.
മത്സരത്തില്‍ യുഡബ്ല്യുആറിന്‍റെ ടീമായ റെസ്‌ക്യൂ ടെക് അലൈസ് മൂന്നാം സ്ഥാനമാണ് നേടിയത്. 85 രാജ്യങ്ങളില്‍ നിന്നുള്ള 450-ലധികം ടീമുകളുമായി മത്സരിച്ചാണ് ഈ നേട്ടം.
മാളയിലെ ഹോളി ഗ്രേസ് അക്കാദമിയില്‍ നിന്നുള്ള കാത്‌‌ലിന്‍ മേരി ജീസന്‍ (12), ക്ലെയര്‍ റോസ് ജീസന്‍ (9) സഖ്യമാണ് ആഗോള വേദിയില്‍ യുഡബ്ല്യുആറിനെ പ്രതിനിധീകരിച്ചത്. ഇരുവരും സഹോദരിമാരാണ്. ഇന്ത്യയെ പ്രതിനിധീകരിച്ച് ഈ വര്‍ഷം മത്സരവേദിയിലെത്തിയ ഏക ടീമും യുഡബ്ല്യുആറിന്‍റെത് ആയിരുന്നു.