സര്‍ക്കാരിന് രണ്ടു ലക്ഷം രൂപ പിഴ ചുമത്തി ഹൈക്കോടതി
Thursday, August 15, 2024 1:25 AM IST
കൊച്ചി: സ്‌കൂള്‍ കെട്ടിടനിര്‍മാണത്തിനു ഫണ്ട് അനുവദിക്കണമെന്ന കോടതി ഉത്തരവിനെതിരേ അപ്പീല്‍ നല്‍കിയതിനു സര്‍ക്കാരിനു രണ്ടു ലക്ഷം പിഴ ചുമത്തി ഹൈക്കോടതി.
എയ്ഡഡ് സ്‌കൂള്‍ കെട്ടിട നിര്‍മാണത്തിനായി ചാലഞ്ച് ഫണ്ടില്‍നിന്നു തുക അനുവദിക്കാനുള്ള സിംഗിള്‍ ബെഞ്ച് ഉത്തരവിനെത്തുടര്‍ന്ന് ഹര്‍ജിക്കാരുമായി ചര്‍ച്ച നടത്തിയ ശേഷം അപ്പീലുമായി എത്തിയ നടപടി ചൂണ്ടിക്കാട്ടിയാണ് ജസ്റ്റീസ് അമിത് റാവല്‍, ജസ്റ്റീസ് എസ്. ഇശ്വരന്‍ എന്നിവരടങ്ങുന്ന ഡിവിഷന്‍ ബെഞ്ചിന്‍റെ ഉത്തരവ്.
അപ്പീല്‍ നല്‍കാന്‍ തീരുമാനിച്ച ഉദ്യോഗസ്ഥരില്നിന്നു തുക ഈടാക്കാനും ഉത്തരവില്‍ പറയുന്നു.
നെല്ലാട് എബനേസര്‍ ഹയര്‍ സെക്കന്‍ഡറി സ്‌കൂള്‍ മാനേജര്‍ നല്‍കിയ ഹര്‍ജിയിലായിരുന്നു ഫണ്ട് നല്‍കാന്‍ ഹൈക്കോടതി ഉത്തരവുണ്ടായത്.
2018 മാര്‍ച്ച് ഒന്നിന് നടപ്പാക്കിയ എയ്ഡഡ് സ്‌കൂള്‍ കെട്ടിട നിര്‍മാണത്തിന്‍റെ ചെലവിന്‍റെ പകുതി സര്‍ക്കാര്‍ വഹിക്കുന്ന ചാലഞ്ച് ഫണ്ട് വ്യവസ്ഥ പ്രകാരം 50 ലക്ഷം രൂപ മാനേജ്‌മെന്‍റ് മുന്‍കൂര്‍ അടച്ചിരുന്നു.
എന്നാല്‍, സ്‌കൂള്‍ സമര്‍പ്പിച്ച ബില്ലില്‍ ചിലത് പദ്ധതി നിലവില്‍ വരുന്നതിനു മുമ്പുള്ളതാണെന്ന പേരില്‍ സര്‍ക്കാര്‍ ഫണ്ട് അനുവദിച്ചില്ല. തുടര്‍ന്നാണ് ഹൈക്കോടതിയെ സമീപിച്ചത്.