ഹാട്രിക്കിൽ മെസി മുന്നേറ്റം പുരുഷ വിഭാഗത്തിൽ രാജ്യാന്തര ഹാട്രിക്ക് എണ്ണത്തിൽ ക്രിസ്റ്റ്യാനോ റൊണാൾഡോയും ലയണൽ മെസിയും റിക്കാർഡ് പങ്കിടുകയാണെങ്കിലും കഴിഞ്ഞ വർഷങ്ങളിലെ കണക്കനുസരിച്ച് അർജന്റൈൻ താരത്തിന്റെ മുന്നേറ്റമാണ് കണ്ടുവരുന്നത്.
2013 സെപ്റ്റംബറിൽ നോർത്തേണ് അയർലൻഡിന് എതിരേയായിരുന്നു ക്രിസ്റ്റ്യാനോ റൊണാൾഡോയുടെ ആദ്യ രാജ്യാന്തര ഹാട്രിക്ക്. അപ്പോഴേക്കും ലയണൽ മെസിയുടെ പേരിൽ മൂന്നു ഹാട്രിക്ക് ഉണ്ടായിരുന്നു.
2012 ഫെബ്രുവരിയിൽ സ്വിറ്റ്സർലൻഡ്, 2012 ജൂണിൽ ബ്രസീൽ, 2013 ജൂണിൽ ഗ്വാട്ടിമാല എന്നീ ടീമുകൾക്കെതിരേയായിരുന്നു മെസിയുടെ ആദ്യ മൂന്നു ഹാട്രിക്കുകൾ.
എന്നാൽ, പിന്നീട് മെസിയെ പിന്തള്ളി റൊണാൾഡോ ഹാട്രിക്കിൽ കുതിപ്പുനടത്തി. 2021 ഒക്ടോബറിൽ ലെക്സംബർഗിനെതിരായ മൂന്നു ഗോൾ പ്രകടനത്തോടെ രാജ്യാന്തര ഫുട്ബോളിൽ 10 ഹാട്രിക് നേടുന്ന ആദ്യ പുരുഷ താരം എന്ന റിക്കാർഡ് റൊണാൾഡോ സ്വന്തമാക്കി. പിന്നീട് റൊണാൾഡോയുടെ ഭാഗത്തുനിന്ന് ഹാട്രിക്ക് പിറന്നില്ല.
അതേസമയം, 2021, 2022, 2023, 2024 എന്നിങ്ങനെ തുടർന്ന് എല്ലാ വർഷവും മെസി ഹാട്രിക് നേടുകയും ചെയ്തു. അതോടെ രാജ്യാന്തര ഹാട്രിക് എണ്ണത്തിൽ ഇരു സൂപ്പർ താരങ്ങളും ടൈയിലെത്തിനിൽക്കുന്നു.
രാജ്യാന്തര ഫുട്ബോളിൽ റൊണാൾഡോയും (133) മെസിയുമാണ് (112) ഏറ്റവും കൂടുതൽ ഗോൾ എന്ന റിക്കാർഡിൽ ആദ്യരണ്ടു സ്ഥാനങ്ങളിൽ.