ADVERTISEMENT

ADVERTISEMENT

ഇൻഫാം കട്ടപ്പന കാർഷിക താലൂക്ക് ശില്പശാല

കട്ടപ്പന: ഇൻഫാം കട്ടപ്പന കാർഷിക താലൂക്ക് ശില്പശാല അണക്കരയിൽ നടന്നു. ഇൻഫാം ദേശീയ ചെയർമാൻ ഫാ. തോമസ് മറ്റമുണ്ടയിൽ ഉദ്ഘാടനം ചെയ്തു. അണക്കര ചില്ലിംഗ് പ്ലാന്‍റ് കോൺഫറൻസ് ഹാളിൽ നടന്ന ശില്പശാലയിൽ കട്ടപ്പന കാർഷിക താലൂക്ക് ഡയറക്ടർ ഫാ. വർഗീസ് കുളമ്പള്ളിൽ അധ്യക്ഷത വഹിച്ചു.

കട്ടപ്പന കാർഷിക താലൂക്ക് ജോയിന്‍റ്് ഡയറക്ടർ ഫാ. വർഗീസ് കാക്കല്ലിൽ, ഫാ. കുര്യക്കോസ് മുഞ്ഞോലിൽ, താലൂക്ക് പ്രസിഡന്‍റ്് ബേബി ജോസഫ് പുത്തൻപറമ്പിൽ, ബാബു തോമസ്, സണ്ണി ഐലുമാലിൽ, സാജൻ ജോസഫ് തുടങ്ങിയവർ പ്രസംഗിച്ചു.

ADVERTISEMENT

ബലക്ഷയമുള്ള കെട്ടിടത്തിലെ പ്രസവമുറി മാറ്റാൻ നടപടിയില്ല

അടിമാലി: അടിമാലി താലൂക്കാശുപത്രിയിലെ ബലക്ഷയമുള്ളമുള്ള കെട്ടിടത്തില്‍നിന്നു പ്രസവ വാര്‍ഡും പ്രസവ മുറിയും ബലക്ഷമതയുള്ള കെട്ടിടത്തിലേക്ക് മാറ്റുമെന്ന പ്രഖ്യാപനം നടപടിയായില്ല. ഒന്നര മാസം മുമ്പാണ് ഇതു സംബന്ധിച്ച പ്രഖ്യാപനം ഉണ്ടായത്. നിലവില്‍ കാഷ്വാലിറ്റി കെട്ടിടത്തിന് സമീപമുള്ള പഴയ കെട്ടിടത്തിലാണ് പ്രസവ വാര്‍ഡും മുറിയും പ്രവര്‍ത്തിക്കുന്നത്. ഈ കെട്ടിടത്തിന്‍റെ പല ഭാഗത്തും വിള്ളല്‍ സംഭവിച്ചിട്ടുണ്ട്. കെട്ടിടഭാഗങ്ങള്‍ അടര്‍ന്നുവീഴുന്ന സാഹചര്യവുമുണ്ട്. ഇത്തരം സാഹചര്യങ്ങള്‍ പരിഗണിച്ചായിരുന്നു പഴയ കെട്ടിടത്തില്‍നിന്നു ബലക്ഷമതയുള്ള കെട്ടിടത്തിലേക്ക് മാറ്റാന്‍ തീരുമാനിച്ചത്.

ആലുവ-മൂന്നാർ രാജപാത തുറക്കണം ; കണ്ണു തുറപ്പിക്കാൻ മാങ്കുളത്ത് പ്രത്യേക ഗ്രാമസഭ ഇന്ന്

മാങ്കുളം: ആലുവ-മൂന്നാർ രാജപാത തുറക്കാൻ അനുകൂല നടപടി സ്വീകരിക്കണമെന്നാവശ്യപ്പെട്ടു മാങ്കുളം പഞ്ചായത്തിൽ ഇന്നു പ്രത്യേക ഗ്രാമസഭ ചേരും. യോഗത്തിൽ ഇതിനായി പ്രമേയം അവതരിപ്പിച്ച് ഏകകണ്ഠമായി പാസാക്കും. വികസനമെന്നത് ഒരു പ്രദേശത്തെ ജനതയ്ക്ക് ആധുനിക സൗകര്യത്തോടെ ജീവിക്കാനുളള അവകാശമാണ്. എന്നാൽ, അടുത്ത കാലത്തെ ചില പരിസ്ഥിതി നിയമങ്ങളും അവയെ വ്യാഖ്യാനിക്കുന്ന രീതിയും മലയോര മേഖലയിലെ സാധാരണക്കാർ, ആദിവാസികൾ, തോട്ടംതൊഴിലാളികൾ എന്നിവരുടെ ജീവിതം വഴിമുട്ടിക്കുന്നതാണ്. ഈ സാഹചര്യത്തിലാണ് പ്രത്യേക ഗ്രാമസഭ ചേരാൻ തീരുമാനിച്ചത്. ജനങ്ങളുടെ ദുരിതം അധികൃതരുടെ ശ്രദ്ധയിൽകൊണ്ടുവരാനാണ് പ്രത്യേക ഗ്രാമസഭ. എങ്ങനെ വനമാകും? ആലുവ-മൂന്നാർ രാജപാത നൂറ്റാണ്ടുകൾ പഴക്കമുള്ളതും മധുരയിൽനിന്നു പഴയ തുറമുഖമായ മുസിരസിൽ എത്താൻ ഉപയോഗിച്ചുവന്നിരുന്നതുമാണ്. ഇതു പിന്നീട് കുതിര, കാളവണ്ടികൾ ഓടുന്ന പാതയായി മാറി. എന്നാൽ, 1924ലെ പ്രളയത്തിൽ ഒരു ഭാഗം തകർന്നടിഞ്ഞ പാത പിന്നീടു പുനരുദ്ധരിച്ചില്ല. റവന്യു രേഖകളിലും പൊതുമരാമത്ത് വകുപ്പ് രേഖകളിലും ഈ റോഡ് വനമായി വിജ്ഞാപനം ചെയ്തിട്ടില്ല. 1980ലെ വനനിയമത്തിലെ വനം എന്ന പദത്തിനു കോടതി നൽകിയ നിർവചനം മൂലം ഉണ്ടായിട്ടുള്ള നിയമോപദേശം മറികടക്കാൻ കേന്ദ്രസർക്കാർ 2023ൽ ഈ നിയമം ഭേദഗതി ചെയ്തിരുന്നു. 110 കിലോമീറ്ററോളം ദൈർഘ്യമുള്ള ഈ റോഡിന്‍റെ 25 കിലോമീറ്റർ മാത്രമാണ് ഗതാഗതയോഗ്യമല്ലാത്തത്. ഇത് ഈ റോഡ് നിലവിലില്ലെന്ന വനംവകുപ്പിന്‍റെ വാദത്തിന്‍റെ മുനയൊടിക്കുന്നു. ഇടമലക്കുടിക്കും നേട്ടമാകും ആലുവ-മൂന്നാർ രാജപാത തുറന്നുനൽകിയാൽ അതു രാജ്യത്തെ ആദ്യത്തെ ഗോത്ര പഞ്ചായത്തായ ഇടമലക്കുടിയുടെ വികസനത്തിലും വലിയ കുതിച്ചുചാട്ടമുണ്ടാകും. കഴിഞ്ഞ ഒരുമാസത്തിനിടെ മൂന്നു രോഗികളെ ഇടമലക്കുടിയിൽനിന്നു കിലോമീറ്ററുകളോളം ചുമന്ന് ആശുപത്രിയിൽ എത്തിക്കേണ്ടിവന്നു. ചികിത്സ വൈകി ഒരാളുടെ ജീവൻ നഷ്ടമായി. ദുർഘട പാതയിലൂടെ മാങ്കുളത്ത് എത്തിച്ച ശേഷം അടിമാലി താലൂക്ക് ആശുപത്രിയിലേക്കു കൊണ്ടുപോവുകയായിരുന്നു. എന്നാൽ, രാജപാത തുറന്നു നൽകിയാൽ ഇടമലക്കുടിക്കു പുറമെ അടിമാലി പഞ്ചായത്തിൽ ഉൾപ്പെടുന്ന കുറത്തിക്കുടിയുടെയും കുട്ടന്പുഴ പഞ്ചായത്തുകളിലെ അവികസിത പ്രദേശങ്ങളുടെയും വികസനത്തിന് ഇതു വഴിയൊരുക്കും. നാട് ഒരുമിക്കുന്നു ഇടമലക്കുടിയിൽനിന്നു കാൽനടയായി മാങ്കുളത്ത് റോഡ് സൗകര്യമുള്ള സ്ഥലത്ത് എത്താൻ കുഞ്ഞദൂരം മതി. എന്നാൽ, മൂന്നാർ വഴി അടിമാലിയിൽ എത്തണമെങ്കിൽ കിലോമീറ്ററുകൾ ചുറ്റി സഞ്ചരിക്കണം. റോഡില്ലാത്തതു മൂലം പതിറ്റാണ്ടുകളായി യാതന അനുഭവിക്കുന്ന ജനതയ്ക്ക് ആലുവ- മൂന്നാർ രാജപാതയുടെ വികസനം വൻ നേട്ടമാകും. ഇതിനായിട്ടാണ് നാട് ഒരുമിക്കുന്നത്. പാതയുടെ വികസനവുമായി ബന്ധപ്പെട്ടുള്ള ഹർജി അടുത്ത ദിവസം ഹൈക്കോടതി പരിഗണിക്കും. ഈ സാഹചര്യത്തിലാണ് ഇന്ത്യൻ ഭരണഘടനയിലെ 243 എ വകുപ്പ് പ്രകാരമുള്ള അധികാരം ഉപയോഗിച്ചും കേരള പഞ്ചായത്ത് രാജ് നിയമം 1994ലെ 3(3) വകുപ്പിലെ അവകാശം ഉപയോഗിച്ചുമാണ് പ്രത്യേക ഗ്രാമസഭായോഗം വിളിച്ചിരിക്കുന്നത്.

മകളുടെ വിവാഹദിനം നിര്‍ധന കുടുംബത്തിന് വീടൊരുക്കി ദമ്പതികള്‍

നെടുങ്കണ്ടം: മകളുടെ വിവാഹം ആര്‍ഭാടരഹിതമാക്കി ആ തുക ഉപയോഗിച്ച് നിര്‍ധന കുടുംബത്തിന് വീട് നിര്‍മിച്ച് നല്‍കി ദമ്പതികള്‍. നെടുങ്കണ്ടം വൈപ്പേല്‍ അശോകന്‍ - ബിജി ദമ്പതികളാണ് മകള്‍ അമൃതയുടെ വിവാഹത്തിനായി കരുതിയ പണം നിര്‍ധന കുടുംബത്തിന് വീടെന്ന സ്വപ്നം യാഥാര്‍ഥ്യമാക്കാന്‍ സംഭാവന ചെയ്തത്. മകളുടെ വിവാഹം ആഡംബര രഹിതമായി നടത്താന്‍ അശോകനും ബിജിയും നേരത്തേ തന്നെ തീരുമാനിച്ചിരുന്നു. വിവാഹത്തിനു മാറ്റിവച്ച അഞ്ച് ലക്ഷം രൂപയാണ് നിർധന കുടുംബത്തിനു വീടു നിർമിച്ചുനൽകാനായി എസ്എന്‍ഡിപി നെടുങ്കണ്ടം ശാഖയില്‍ ഏല്‍പ്പിച്ചത്. ശാഖാ നേതൃത്വം കട്ടക്കാലാ സ്വദേശിയായ വീട്ടമ്മയും മൂന്ന് പെണ്‍മക്കളുമടങ്ങുന്ന ഭവനരഹിതരായ കുടുംബത്തിന് വീടു പണിതു നൽകാൻ തീരുമാനിച്ചു. ശാഖാ അംഗങ്ങള്‍ തങ്ങളുടെ വിഹിതം അധ്വാനമായും സംഭാവന ചെയ്തു. എല്ലാവരുടെയും കൂട്ടായ പരിശ്രമത്തെത്തുടര്‍ന്ന് 61 ദിവസം കൊണ്ട് വീടുപണി പൂര്‍ത്തിയായി. അശോകന്‍ - ബിജി ദമ്പതികളുടെ മകൾ അമൃതയുടെ കഴുത്തില്‍ കുഞ്ചിത്തണ്ണി സ്വദേശി അനന്ദു രാജന്‍ താലി ചാര്‍ത്തിയ ദിവസംതന്നെ പുതിയ വീടിന്‍റെ ഗൃഹപ്രവേശനവും നടന്നു. ഗൃഹപ്രവേശനച്ചടങ്ങില്‍ എസ്എന്‍ഡിപി യൂണിയന്‍ ഭാരവാഹികള്‍, ശാഖാ ഭരണസമിതി അംഗങ്ങള്‍, മേഖലാ ഭാരവാഹികള്‍, കുടുംബയോഗം ഭാരവാഹികള്‍ തുടങ്ങിയവര്‍ പങ്കെടുത്തു. യൂണിയന്‍ പ്രസിഡന്‍റ് സജി പറമ്പത്ത് ഭദ്രദീപം തെളിച്ച് വീട് കൈമാറി. അശോകന്‍ - ബിജി ദമ്പതികളുടെ തീരുമാനം അറിഞ്ഞ് സമാനമായ രീതിയില്‍ വീട് നിര്‍മിച്ച് നല്‍കാന്‍ തയാറായി മൂന്നുപേര്‍ തങ്ങളെ സമീപിച്ചിട്ടുണ്ടെന്ന് എസ്എന്‍ഡിപി ഭാരവാഹികള്‍ പറഞ്ഞു.

കാഴ്ചയുടെ വസന്തം തീർത്ത് മൈക്രോവേവ് വ്യൂ പോയിന്‍റ്

ഇടുക്കി: അധികം സഞ്ചാരികൾ എത്തിച്ചേരാത്ത പ്രകൃതി ഒരുക്കിയ ദൃശ്യവിസ്മയവുമായി ഇടുക്കി പൈനാവിലെ മൈക്രോവേവ് വ്യൂ പോയിന്‍റ് സഞ്ചാരികളെ മാടി വിളിക്കുന്നു. ഇവിടെനിന്നാൽ കോടമഞ്ഞ് അരിച്ചിറങ്ങുന്ന പച്ചപുതച്ച മലനിരകളിലെ കുളിരേകുന്ന കാഴ്ചകൾ കാണാം. വനംവകുപ്പിന്‍റെ നേതൃത്വത്തിലുള്ള ജില്ലയിലെ മറ്റൊരു വിനോദസഞ്ചാരകേന്ദ്രമാണിത്. വിനോദസഞ്ചാരികൾ മാത്രമല്ല, സേവ് ദ ഡേറ്റ് പോലുള്ള ഫോട്ടോ ഷൂട്ടിനായും മറ്റും ഒട്ടേറെ പേർ ഇവിടം തേടിയെത്തുന്നുണ്ട്. മൈക്രോവേവ് വ്യൂ പോയിന്‍റിൽനിന്നാൽ കണ്ണെത്താദൂരത്തോളം പരന്നുകിടക്കുന്ന മനോഹര കാഴ്ചകളാണ് സഞ്ചാരികളെ കാത്തിരിക്കുന്നത്. മലയിടുക്കിലേക്ക് മറയുന്ന സൂര്യന്‍റെ അസ്തമയക്കാഴ്ചയാണ് ഏറെ ചേതോഹരം. മേഘങ്ങൾക്കിടയിലൂടെ പതിയെ താഴ്‌വരകളിലേക്ക് ഇറങ്ങിച്ചെല്ലുന്ന സൂര്യനും പഞ്ഞിക്കെട്ടുകൾ പോലെ ഒഴുകിനീങ്ങുന്ന മേഘങ്ങളും കാഴ്ചയുടെ പുത്തൻ അനുഭവം തീർക്കും. ആർച്ച് ഡാമായ ഇടുക്കി ജലാശയം ഇവിടെനിന്നാൽ കാണാം. കേരളത്തിലെ ഏറ്റവും ഉയരം കൂടിയ കൊടുമുടിയായ ആനമുടി, ചൊക്രമുടി, പാൽക്കുളം മേട്, തോപ്രാംകുടി ഉദയഗിരി, കാൽവരിമൗണ്ട് മലനിരകളുടെ കാഴ്ചകൾ സഞ്ചാരികൾക്ക് ഹൃദ്യമായ അനുഭവമാണ്. കൂടാതെ ഗ്യാപ് റോഡ്, പള്ളിവാസൽ, വെള്ളത്തൂവൽ സർജ്, പൂപ്പാറ, കള്ളിപ്പാറ തുടങ്ങിയ സ്ഥലങ്ങളുടെ ദൃശ്യഭംഗിയും ആസ്വദിക്കാനാകും. ഇതിനു പുറമേ ചുറ്റുമുള്ള പച്ചപ്പിന്‍റെ വന്യസൗന്ദര്യം സന്ദർശകരെ വിസ്മയിപ്പിക്കും. ചിലപ്പോൾ കാട്ടിൽ മേഞ്ഞു നടക്കുന്ന ആന, കുരങ്ങ്, കേഴ, കാട്ടുപോത്ത് തുടങ്ങിയ വന്യമൃഗങ്ങളെയും കാണാനാകും. സന്ദർശന സമയം രാവിലെ ഒൻപതു മുതൽ വൈകുന്നേരം ആറു വരെയാണ് ഇവിടെ പ്രവേശനം അനുവദിച്ചിരിക്കുന്നത്. മുതിർന്നവർക്ക് 40 രൂപയും കുട്ടികൾക്ക് 20 രൂപയുമാണ് പ്രവേശനനിരക്ക്. സഞ്ചാരികൾക്ക് ആവശ്യമായ സൗകര്യങ്ങളും ഇവിടെ ഒരുക്കിയിട്ടുണ്ട്. സുരക്ഷാ മുന്നൊരുക്കങ്ങളുടെ ഭാഗമായി വേലിയും നിർമിച്ചിട്ടുണ്ട്. 15 പേരടങ്ങിയ ജീവനക്കാരുടെ സംഘമാണ് ഈ സ്ഥലം പരിപാലിക്കുന്നത്. അവരിൽ മൂന്നു പേർ വീതം ഓരോ ദിവസവും സഞ്ചാരികളെ സഹായിക്കാൻ ഇവിടെയുണ്ടാകും. എത്തിച്ചേരാൻ തൊടുപുഴ - ചെറുതോണി സംസ്ഥാനപാതയിൽ കുയിലിമല സിവിൽ സ്റ്റേഷനും പൈനാവിനും ഇടയിലുള്ള ജില്ലാ പഞ്ചായത്ത് ജംഗ്ഷനിൽനിന്ന് ഇടത്തോട്ട് തിരിഞ്ഞ് എംആർഎസ് സ്കൂളിന്‍റെയും കേന്ദ്രീയ വിദ്യാലയത്തിന്‍റെയും ഇടയിലുള്ള ഓഫ് റോഡിനു സമാനമായ പാതയിലൂടെ സഞ്ചരിച്ചാൽ ഇവിടെയെത്താം. സാഹസികയാത്രികർക്ക് നവ്യാനുഭവം പകരുന്നതാണ് ഈ യാത്ര.

വന്യജീവി സംഘർഷം: ഹെൽപ് ഡെസ്ക് തുടങ്ങി

തൊടുപുഴ: വന്യജീവിശല്യം രൂക്ഷമായ തദ്ദേശ സ്ഥാപനങ്ങളിൽ ഇത്തരം പ്രശ്നങ്ങൾ പരിഹരിക്കുന്ന തിന്‍റെ ഭാഗമായി വനംവകുപ്പ് നടപ്പാക്കുന്ന തീവ്രയജ്ഞ പരിപാടിക്കു ജില്ലയിൽ തുടക്കമായി. ആദ്യഘട്ടമായി തദ്ദേശ സ്ഥാപനങ്ങളിലും റേഞ്ച് ഓഫീസുകളിലും വനംവകുപ്പിന്‍റെ ഹെൽപ് ഡെസ്കുകൾ ആരംഭിച്ചു. ഇതോടൊപ്പം വനംവകുപ്പുമായി ബന്ധപ്പെട്ട പരാതികൾ, നിർദേശങ്ങൾ, കർഷകർ അഭീമുഖീകരിക്കുന്ന പ്രശ്നങ്ങൾ എന്നിവ സമർപ്പിക്കാനായി പരാതിപ്പെട്ടികളും സ്ഥാപിച്ചു. 31 വരെ ഇതുവഴി പരാതികളും നിർദേശങ്ങളും നൽകാം. 30 ഹോട്ട് സ്പോട്ടുകൾ ഹെൽപ് ഡെസ്ക് വഴി പരാതികളും പ്രശ്നങ്ങളും സ്വീകരിച്ചു പരിഹാരം കണ്ടെത്തുകയാണ് ലക്ഷ്യം. വനം ഉദ്യോഗസ്ഥരും ജനപ്രതിനിധികളുംഅടങ്ങുന്ന ടീമുകൾ ഹെൽപ് ഡെസ്കുകൾ മുഖേന പരാതി സ്വീകരിക്കും. ഓരോ പഞ്ചായത്തിലും ഇതിനായി ഫെസിലിറ്റേറ്ററെ ചുമതലപ്പെടുത്തി. പ്രാദേശികമായി പരിഹരിക്കാൻ കഴിയുന്ന പ്രശ്നങ്ങളിൽ ആദ്യഘട്ടത്തിൽത്തന്നെ പരിഹാരം കാണും. സംസ്ഥാനത്ത് 273 പഞ്ചായത്തുകളിലാണ് ഒക്ടോബർ 30 വരെ തീവ്രയജ്ഞ പരിപാടി. ഇതിൽ മുപ്പതോളം പഞ്ചായത്തുകളിൽ വന്യജീവി ആക്രമണം മൂലം ജനങ്ങൾ ഏറെ ബുദ്ധിമുട്ടുന്നതിനാൽ ഇവ ഹോട്ട്സ്പോട്ടുകളായി പരിഗണിച്ചായിരിക്കും പ്രവർത്തനം. രണ്ട്, മൂന്നു ഘട്ടങ്ങൾ ജില്ലാ ഭരണകൂടത്തിന്‍റെ നേതൃത്വത്തിൽ എല്ലാ വകുപ്പുകളുടെയും സഹകരണത്തോടെ ജില്ലയുടെ ചുമതലയുള്ള മന്ത്രിയുടെ നേതൃത്വത്തിലാണ് രണ്ടാം ഘട്ട പ്രവർത്തനം. എംഎൽഎമാർ ഉൾപ്പെടെ ഇതിൽ പങ്കാളികളാകും. മനുഷ്യ -വന്യജീവി സംഘർഷ ലഘൂകരണ സമിതി കണ്‍വീനറായ ഡിഎഫ്ഒമാർക്കായിരിക്കും നിർവഹണ ചുമതല. ജില്ലാ തലത്തിൽ പരിഹരിക്കാൻ കഴിയാത്ത സങ്കീർണമായ പ്രശ്നങ്ങൾ മൂന്നാം ഘട്ടത്തിൽ പരിഗണിക്കും. ഇതിനായി മന്ത്രിമാർ, എംഎൽഎമാർ, വകുപ്പ് മേധാവികൾ എന്നിവർ ഉൾപ്പെടെ ചർച്ചകൾ നടത്തി പരിഹാര മാർഗം കണ്ടെത്തുകയാണ് ലക്ഷ്യം. വന്യജീവി ആക്രമണമുള്ള മേഖലകൾ പ്രത്യേക ക്ലസ്റ്ററുകൾ ആയി തിരിച്ചായിരിക്കും പരിഹാര മാർഗം കണ്ടെത്തുക. ഇവിടെയും പരിഹാരം കണ്ടെത്താൻ കഴിഞ്ഞില്ലെങ്കിൽ കേന്ദ്രസഹായത്തോടെ പരിഹരിക്കാൻ ശ്രമം നടത്തും. പരാതിപ്പെട്ടികളുള്ള പഞ്ചായത്തുകൾ കാഞ്ചിയാർ, ഉപ്പുതറ, കാമാക്ഷി, പീരുമേട്, പെരുവന്താനം, വാഴത്തോപ്പ്, കുമളി,വണ്ടിപ്പെരിയാർ, ചക്കുപള്ളം, നെടുങ്കണ്ടം, കരിങ്കുന്നം, മുട്ടം, കുമാരമംഗലം, ഉടുന്പന്നൂർ, വണ്ണപ്പുറം, മൂന്നാർ, ഇടമലക്കുടി, ദേവികുളം, ചിന്നക്കനാൽ, ശാന്തൻപാറ, അടിമാലി, വെള്ളത്തൂവൽ, കൊന്നത്തടി, കഞ്ഞിക്കുഴി, മാങ്കുളം, മറയൂർ, കാന്തല്ലൂർ, വട്ടവട പഞ്ചായത്തുകളിലും കട്ടപ്പന നഗരസഭയിലും പരാതിപ്പെട്ടിയും ഹെൽപ്പ് ഡെസ്കും ആരംഭിച്ചു. ഇതിനു പുറമെ ഇടുക്കി അതിർത്തിയിൽ എറണാകുളം ജില്ലയിൽപെട്ട പൈങ്ങോട്ടൂർ, കവളങ്ങാട്, കീരംപാറ പഞ്ചായത്തുകളിലുമാണ് പരാതിപ്പെട്ടികൾ സ്ഥാപിച്ചത്.

ബംഗളൂരുവിലേക്ക് കെഎസ്ആർടിസി സർവീസ് ആരംഭിക്കണം

തിരുവനന്തപുരം: കട്ടപ്പനയിൽനിന്ന് കുമളി വഴി ബംഗളൂരുവിലേക്ക് കെഎസ്ആർടിസി ബസ് സർവീസ് അനുവദിക്കണമെന്നാവശ്യപ്പെട്ട് ജില്ലാ പഞ്ചായത്ത് പ്രസിഡന്‍റ് രാരിച്ചൻ നീർണാക്കുന്നേൽ വകുപ്പ് മന്ത്രി കെ.ബി. ഗണേഷ്കുമാറിനു നിവേദനം നൽകി. ഇടുക്കി ജില്ലയിലെ വ്യാപാരികൾക്കും വിദ്യാർഥികൾക്കും വളരെ പ്രയോജനം ലഭിക്കുമെന്ന് നിവേദനത്തിൽ ചൂണ്ടിക്കാട്ടി. വിഷയം അനുഭാവപൂർവം പരിഗണിക്കുമെന്നും അവധി ദിവസങ്ങളിൽ പ്രത്യേക സർവീസ് നടത്തുന്ന കാര്യം പരിശോധിച്ച് നടപടി സ്വീകരിക്കുമെന്നും മന്ത്രി ഉറപ്പുനൽകിയതായി രാരിച്ചൻ അറിയിച്ചു.

സെക്യൂരിറ്റി ജീവനക്കാരന്‍റെ കൊലപാതകം: അന്വേഷണം എങ്ങുമെത്തിയില്ല

മൂന്നാർ: മൂന്നാറിലെ സെക്യൂരിറ്റി ജീവനക്കാരൻ കൊല്ലപ്പെട്ട സംഭവത്തിൽ ഒരു മാസം പിന്നിട്ടിട്ടും തുന്പ് കണ്ടെത്താനാവാതെ പോലീസ്. മൂന്നാർ ഡിവൈഎസ്പിയുടെ നേതൃത്വത്തിൽ വിപുലമായ സംഘം രൂപീകരിച്ച് അന്വേഷണം നടത്തുന്നുണ്ടെങ്കിലും കൊലപാതകം സംബന്ധിച്ച് സൂചനകളൊന്നും ലഭിച്ചിട്ടില്ലെന്നാണ് അറിയുന്നത്. ചൊക്കനാട് എസ്റ്റേറ്റ് സ്വദേശിയും ചൊക്കനാട് ഫാക്ടറിയിലെ സെക്യൂരിറ്റി ജീവനക്കാരനുമായ രാജപാണ്ടി കുത്തേറ്റു മരിച്ച സംഭവവുമായി ബന്ധപ്പെട്ട് നൂറിലധികം പേരെ ചോദ്യം ചെയ്തെങ്കിലും ഫലമുണ്ടായിട്ടില്ല. എസ്റ്റേറ്റ് കേന്ദ്രീകരിച്ച് നടത്തിയ അന്വേഷണവും വിഫലമായി. സംഭവദിവസം രാവിലെ ഏഴിനു ഫാക്ടറിയിൽനിന്ന് ഇറങ്ങിപ്പോകുന്നത് സിസി കാമറകളിൽ തെളിഞ്ഞെങ്കിലും മരിച്ച നിലയിൽ കണ്ടെത്തിയ ക്വാർട്ടേഴ്സിനു സമീപത്തെങ്ങും കാമറകൾ ഇല്ലാതിരുന്നത് തിരിച്ചടിയായി. സംഭവം നടന്ന് ദിവസങ്ങൾ കഴിഞ്ഞിട്ടും പ്രതികളെക്കുറിച്ചുള്ള സൂചനകൾ ലഭിക്കാതെ വന്നതോടെ പ്രതികളെക്കുറിച്ച് വിവരം നൽകുന്നവർക്ക് 25,000 രൂപ പാരിതോഷികം നൽകുമെന്ന് അന്വേഷണം സംഘം അറിയിച്ചിരുന്നു. എസ്റ്റേറ്റിലുള്ള ആരെങ്കിലും വിവരം നൽകുമെന്നായിരുന്നു പോലീസ് കണക്കുകൂട്ടിയിരുന്നത്. കഴിഞ്ഞ ഓഗസ്റ്റ് 16നാണ് എസ്റ്റേറ്റിലെ ക്വാർട്ടേഴ്സിൽ രാജപാണ്ടി മരിച്ച നിലയിൽ കണ്ടെത്തിയത്. തലയിലും കഴുത്തിലും കുത്തേറ്റ നിലയിലായിരുന്നു. ക്വാർട്ടേഴ്സിലേക്ക് മടങ്ങിയിട്ട് ഏറെ നേരമായിട്ടും മടങ്ങി വരാതിരുന്നതോടെ സഹപ്രവർത്തകർ അന്വേഷിച്ചു ചെന്നപ്പോഴാണ് രക്തംവാർന്ന നിലയിൽ ജീവനക്കാരനെ കണ്ടെത്തിയത്.

വിദേശജോലി വാഗ്ദാനം: പണം തട്ടിയ പ്രതി പിടിയിൽ

തൊടുപുഴ: വിദേശ ജോലി വാഗ്ദാനം ചെയ്ത് പണം തട്ടിയെടുത്ത കേസിൽ പ്രതി പിടിയിൽ. കോട്ടയം മീനച്ചിൽ കരൂർ കരിങ്ങാട്ട് ഐ.വി. രാജേഷി (52) നെയാണ് തൊടുപുഴ പോലീസ് അറസ്റ്റ് ചെയ്തത്. കൊറിയയിൽ ജോലി വാഗ്ദാനം ചെയ്ത് അഞ്ച് ലക്ഷം രൂപ തട്ടിയെടുത്തെന്ന തൊടുപുഴ കുമാരമംഗലം സ്വദേശിയുടെ പരാതിയിലാണ് പ്രതിയെ അറസ്റ്റു ചെയ്തത്. കഴിഞ്ഞ വർഷമാണ് രാജേഷിനെതിരേ കേസെടുത്തത്. ഇയാൾ സംസ്ഥാനത്തുടനീളം സമാനരീതിയിൽ തട്ടിപ്പ് നടത്തിയിട്ടുണ്ടെന്നും പോലീസ് പറഞ്ഞു. കരിങ്കുന്നം, രാമപുരം, ഏനാത്ത്, കുറുവിലങ്ങാട് തുടങ്ങി നിരവധി പോലീസ് സ്റ്റേഷനിൽ രാജേഷിനെതിരേ കേസുള്ളതായും പോലീസ് അറിയിച്ചു. 300ഓളം പേരിൽനിന്ന് നാലരക്കോടി രൂപ തട്ടിയെടുത്തതായാണ് വിവരംലഭിച്ചത്. തട്ടിപ്പിനിരയായവർ ആക്‌ഷൻ കൗൺ സിൽ രൂപീകരിച്ച് സമരം നടത്തിയിരുന്നു. ഒളിവിൽ കഴിയുകയായിരുന്ന രാജേഷിനെ പട്ടിമറ്റത്തുനിന്നാണ് ഇന്നലെ പോലീസ് പിടികൂടിയത്. ഇയാളെ ഇന്നു കോടതിയിൽ ഹാജരാക്കും. ഇയാൾക്കൊപ്പം തട്ടിപ്പ് നടത്തിയ കരിങ്കുന്നം സ്വദേശി മനുവിനെ തൊടുപുഴ പോലീസ് നേരത്തേ അറസ്റ്റ് ചെയ്തിരുന്നു.

തൊടുപുഴ താലൂക്ക് വികസനസമിതിയോഗം

തൊടുപുഴ: താലൂക്ക് വികസനസമിതി യോഗം നടത്തി. മുനിസിപ്പൽ ചെയർമാൻ കെ. ദീപക് അധ്യക്ഷത വഹിച്ചു. ഭൂരേഖ തഹസിൽദാർ എ.ആർ. അനീഷ്, ഡെപ്യൂട്ടി തഹസിൽദാർ എസ്. ഷൈനിമോൾ എന്നിവർ പ്രസംഗിച്ചു. ഒട്ടേറെ പരാതികൾ യോഗത്തിൽ ഉന്നയിക്കപ്പെട്ടു. വണ്ണപ്പുറം പഞ്ചായത്തിലെ മോഷ്ടാക്കളുടെ വിളയാട്ടത്തിനും തൊടുപുഴയിലെ തെരുവുനായ ശല്യത്തിനും പരിഹാരം കാണണമെന്ന് ആർഎസ്പി (ലെനിനിസ്റ്റ്) ജില്ലാസെക്രട്ടറി എ.ആർ. രതീഷ് ആവശ്യപ്പെട്ടു. താലൂക്ക്‌ വികസനസമിതിയിൽ സ്ഥിരമായി ഹാജരാകാത്ത വകുപ്പുകളുടെ വിവരങ്ങൾ ജില്ലാകളക്ടർക്ക് റിപ്പോർട്ട് ചെയ്യണമെന്ന മുനിസിപ്പൽ ചെയർമാൻ ആവശ്യപ്പെട്ടു. ജില്ലാ ആശുപത്രിയിൽ ആശുപത്രി വികസന സമിതി യോഗം വിളിക്കാത്തതിനെ സംബന്ധിച്ചും ആക്ഷേപമുയർന്നു. ബ്ലോക്ക് പഞ്ചായത്ത് പ്രസിഡന്‍റ് സുനി സാബു, ഇടവെട്ടി പഞ്ചായത്ത് പ്രസിഡന്‍റ് ബിൻസി മാർട്ടിൻ, മുട്ടം പഞ്ചായത്ത് പ്രസിഡന്‍റ് മേഴ്സി ദേവസ്യ, ആലക്കോട് പഞ്ചായത്ത് പ്രസിഡന്‍റ് ജാൻസി മാത്യു, ദിലീപ് മൈതീൻ, ജോർജ് അഗസ്റ്റിൻ, ജോണ്‍ നെടിയപാല, മുഹമ്മദ് ഷെരീഫ്, ടോമി ജോർജ് എന്നിവർ പ്രസംഗിച്ചു.

കുട്ടിക്കാനം മരിയൻ കോളജിൽ രാജ്യാന്തര ശില്പശാല

കുട്ടിക്കാനം: മരിയൻ കോളജിലെ മാധ്യമ പഠന വിഭാഗം, മൈൽ സ്റ്റുഡിയോസുമായി സഹകരിച്ച് പുതുതലമുറ ചലച്ചിത്രനിർമാണത്തിൽ രാജ്യാന്തര ശില്പശാല നടത്തും. എസ്ഡി കോളജ് കാഞ്ഞിരപ്പള്ളി, എസ്ബി കോളജ് ചങ്ങനാശേരി, സെന്‍റ് ജോർജ് കോളജ് അരുവിത്തുറ, സെന്‍റ് ആന്‍റണീസ് കോളജ് പെരുവന്താനം എന്നിവരുടെ പങ്കാളിത്തത്തോടെ നാളെ രാവിലെ ഒൻപതു മുതൽ വൈകുന്നേരം നാലുവരെ യാണ് ശില്പശാല. കുട്ടിക്കാനം മരിയൻ കോളജ് ഓഡിറ്റോറിയത്തിൽ സംഘടിപ്പിക്കപ്പെടുന്ന ശില്പശാല കോളജ് പ്രിൻസിപ്പൽ പ്രഫ. ഡോ. അജിമോൻ ജോർജ് ഉദ്ഘാടനം ചെയ്യും. ചലച്ചിത്രനിർമാണത്തിലെ പോസ്റ്റ് പ്രൊഡക്‌ഷൻ, സൗണ്ട് ഡിസൈൻ, കളർ ഗ്രേഡിംഗ്, വിഎഫ്എക്സ്, സിനിമയിൽ നിർമിതബുദ്ധിയുടെ സാധ്യതകൾ എന്നീ വിഷയങ്ങൾ കേന്ദ്രീകരിച്ചുള്ള ക്ലാസുകൾ ശില്പശാലയിൽ ഉൾപ്പെടുന്നു. മൈൽ സ്റ്റുഡിയോയുടെ ടെക്നിക്കൽ ഡയറക്ടറും സൗണ്ട് എൻജിനിയറും ആപ്പിൾ സർട്ടിഫൈഡ് ട്രെയിനറും നെറ്റ്ഫ്ലിക്സ് പ്രൊജക്ടുകളിൽ പ്രവൃത്തിപരിചയമുള്ള വ്യക്തിയുമായ ജോണ്‍ എം. കൊച്ചൻസിക്, എക്സിക്യൂട്ടീവ് പ്രൊഡ്യൂസർ ലിയോ ജോസഫ് തുടങ്ങിയവർ ശില്പശാല നയിക്കും. മരിയൻ കോളജ് മാധ്യമ പഠന വിഭാഗം ഡയറക്ടർ പ്രഫ. എം. വിജയകുമാർ, വിഭാഗം തലവൻ ഫാ. സോബി തോമസ്, പ്രോഗ്രാം സ്റ്റാഫ് കോ-ഓർഡിനേറ്റർ നന്ദന കൃഷ്ണമൂർത്തി, ഡോ. നിധിൻ വർഗീസ് (എസ് ബി കോളജ് ചങ്ങനാശേരി), ജൂണോ ജോസ് (എസ്ഡി കോളജ് കാഞ്ഞിരപ്പള്ളി), യു.പി. മഹിത (സെന്‍റ്് ജോർജ് കോളജ് അരുവിത്തുറ), ആഷിൻ ജോസ് (സെന്‍റ് ആന്‍റണീസ് കോളജ് പെരുവന്താനം), സ്റ്റുഡന്‍റ്് കോ-ഓർഡിനേറ്റർമാരായ ഏണസ്റ്റ് ജോയൽ സുജിമോൻ, വി.എസ്. അതുല്യമോൾ എന്നിവർ ശില്പശാലയ്ക്ക് നേതൃത്വം നൽകും.

ഗ്രാമീണ പഠനശിബിരം

കട്ടപ്പന: കാഞ്ചിയാർ ലബ്ബക്കട ജെപിഎം ആർട്സ് ആൻഡ് സയൻസ് കോളജ് എം എസ് ഡബ്ല്യു ഒന്നാംവർഷ വിദ്യാർഥികളുടെ നേതൃത്വത്തിൽ വാഗമണ്‍ പുള്ളിക്കാനത്ത് പ്രവാഹ എന്ന പേരിൽ ഗ്രാമീണ പഠനശിബിരം സംഘടിപ്പിച്ചു. ഏലപ്പാറ പഞ്ചായത്ത് പ്രസിഡന്‍റ് മറിയാമ്മ തോമസ് ഉദ്ഘാടനം ചെയ്തു. വിദ്യാർഥികളുടെ നേതൃത്വത്തിൽ വാഗമണ്‍ ടൗണിൽ ഫ്ലാഷ് മോബ് നടത്തി. ഏഴു ദിവസങ്ങളിലായാണ് ക്യാന്പ് നടക്കുന്നത് . മാലിന്യ ശേഖരണം, ബോധവത്കരണ ക്ലാസുകൾ, പച്ചക്കറിത്തോട്ട നിർമാണം, അങ്കണവാടി ക്ലീനിംഗ്, സ്കൂൾ വിദ്യാർഥികൾക്കായി കായികദിന കോ-ഓർഡിനേഷൻ, ഫുട്ബോൾ ടൂർണമെന്‍റ്, പണ ഇടപാടിലെ ന്യൂനത സാങ്കേതിക വിദ്യകളെ ആളുകൾക്ക് വീടുകളിൽച്ചെന്ന് പരിചയപ്പെടുത്തൽ, സുചനാബോർഡ് ശുചീകരണം തുടങ്ങിയ വിവിധ പ്രവർത്തനങ്ങളും ക്യാന്പിന്‍റെ ഭാഗമായി നടത്തി. ഉദ്ഘാടന യോഗത്തിൽ വിവിധ ആളുകളെ ഉപഹാരങ്ങൾ നൽകി ആദരിച്ചു. ജെപിഎം ആർട്സ് ആൻഡ് സയൻസ് കോളജ് പ്രിൻസിപ്പൽ ഡോ. വി. ജോണ്‍സണ്‍ അധ്യക്ഷത വഹിച്ചു. പുള്ളിക്കാനം സെന്‍റ് തോമസ് പള്ളി വികാരി ഫാ. ഷിനോയി കിഴക്കേൽ ഒഎസ്ബി, സിസ്റ്റർ എമിലി എസ്എബിഎസ്, സോഷ്യൽ വർക്ക് ഡിപ്പാർട്ട്മെന്‍റ് അസിസ്റ്റന്‍റ് പ്രൊഫസർ ഡോ. ഫാ. റെജി കെ. ഈപ്പൻ, ഹെഡ് ഓഫ് ഡിപ്പാർട്ട്മെന്‍റ് രേഷ്മ എലിസബത്ത് ചെറിയാൻ, കൊമേഴ്സ് വിഭാഗം അധ്യാപകൻ ജോജിൻ ജോസഫ്, ഡിപ്പാർട്ട്മെന്‍റ് കോ-ഓർഡിനേറ്റർ ആശിഷ് ജോർജ് മാത്യു, ഫീൽഡ് വർക്ക് കോ-ഓർഡിനേറ്റർ അഖില മാത്യു എന്നിവർ പ്രസംഗിച്ചു.

തിരുപ്പൂരിൽ ട്രെയിൻ തട്ടി മരിച്ചത് ചപ്പാത്ത് സ്വദേശിയെന്ന് സംശയം

ഉപ്പുതറ: തിരുപ്പൂരിൽ ട്രെയിൻ തട്ടി മരിച്ചത് ചപ്പാത്ത് സ്വദേശിയെന്ന് സംശയം. അവിടെനിന്നുള്ള സിസിടിവി ദൃശ്യങ്ങൾ കിട്ടിയതോടെയാണ് ചപ്പാത്ത് കോക്കാംപാടത്ത് ഷൺമുഖൻ (85) ആണ് മരിച്ചതെന്ന സംശയമുണ്ടായത്. ബന്ധുക്കൾ തിരുപ്പൂർക്ക് തിരിച്ചിട്ടുണ്ട്. ഈ മാസം എട്ടു മുതൽ ഷൺമുഖനെ കാണാനില്ലായിരുന്നു. പോലീസും ബന്ധുക്കളും പല യിടങ്ങളിലും അന്വഷിച്ചിരുന്നു. അതിനിടെയാണ് തിരുപ്പൂരിൽ അജ്ഞാതൻ ട്രെയിൻ തട്ടി മരിച്ചെന്ന പത്രവാർത്ത ശ്രദ്ധയിൽപ്പെട്ടത്. ഉപ്പുതറ പോലീസ് തിരുപ്പൂർ റെയിൽവേ പോലീസുമായി ബന്ധപ്പെട്ട് വിവരങ്ങൾ ശേഖരിച്ചു. സിസിടിവി ദൃശ്യങ്ങളും ലഭ്യമാക്കി. ഇതോടെയാണ് മരിച്ചത് ഷൺമുഖനാണെന്ന സംശയം ബലപ്പെട്ടത്.

മറയൂർ-കാന്തല്ലൂർ മേഖലയിൽ രേഖകൾ നൽകാൻ സഫാരി ജീപ്പുകൾക്ക് മടി

മറയൂർ: സഫാരി ജീപ്പുകൾ സർവീസ് നടത്താൻ ആവശ്യമായ രേഖകൾ സമർപ്പിക്കണമെന്നു നിർദേശിച്ചിട്ട് മറയൂർ, കാന്തല്ലൂർ മേഖലകളിൽ വലിയൊരു വിഭാഗം ജീപ്പുകൾ ഇതു പാലിക്കുന്നില്ലെന്നു പരാതി. 25 ശതമാനം വാഹനങ്ങൾ മാത്രമാണ് ആവശ്യമായ രേഖകൾ സമർപ്പിച്ചിട്ടുള്ളത്. ഇരുനൂറിലേറെ ജീപ്പുകളാണ് ഈ മേഖലയിൽ സർവീസ് നടത്തുന്നത്. എന്നാൽ, 50 വാഹനങ്ങൾ മാത്രമാണ് ആവശ്യമായ രേഖകൾ ഹാജരാക്കിയിട്ടുള്ളത്. രേഖകൾ ഹാജരാക്കാത്ത വാഹനങ്ങളിൽ ആവശ്യമായ രേഖകളോ ലൈസൻസോ ഇല്ലാത്തവയും ഒാടുന്നതായി സംശയം ഉയർന്നിട്ടുണ്ട്. അപകടവും കൂടുന്നു ഇതിനിടെ, അനധികൃതമായി സർവീസ് നടത്തുന്ന സഫാരി ജീപ്പുകൾ അപകടം സൃഷ്ടിക്കുന്നതായും പരാതി ഉയർന്നിട്ടുണ്ട്. കഴിഞ്ഞ ദിവസം സഹായ ഗിരിയിൽ അമിതവേഗത്തിൽ കൂട്ടിയിടിച്ച രണ്ട് ജീപ്പുകൾ പോലീസ് പിടികൂടിയിരുന്നു. മുൻ ജില്ലാ കളക്ടർ വി. വിഘ്നേശ്വരി പോലീസ് ക്ലിയറൻസ്, ഡ്രൈവിംഗ് ലൈസൻസ്, വാഹന രേഖകൾ എന്നിവ പരിശോധിച്ച ശേഷം മാത്രം സഫാരി അനുവദിക്കണമെന്നും സുരക്ഷിതമായ പ്രദേശങ്ങളിൽ മാത്രം സഫാരി നടത്തണമെന്നും അവർ നിർദേശിച്ചിരുന്നു. പഞ്ചായത്ത്, പോലീസ്, മോട്ടോർ വാഹന വകുപ്പ് എന്നിവർക്ക് ഇതിന്‍റെ ചുമതല നൽകിയിരുന്നെങ്കിലും ഇടപെടൽ വേണ്ടത്ര ഫലപ്രദമല്ല. അമിതവേഗം ഭീഷണി വിവിധ രാഷ്‌ട്രീയ പാർട്ടികളുടെ പിന്തുണയോടെ പ്രവർത്തിക്കുന്ന അനധികൃത സർവീസുകാർ രാഷ്‌ട്രീയസ്വാധീനം മറയാക്കി രേഖകളും മറ്റും ഹാജരാക്കുന്നതിൽനിന്ന് ഒഴിഞ്ഞുനിൽക്കു കയാണെന്നാണ് ആരോപണം. കഴിഞ്ഞ ഒരു മാസത്തിനിടെ അഞ്ച് അപകടങ്ങൾ ഈ മേഖലയിൽ റിപ്പോർട്ട് ചെയ്തു. അടുത്തിടെ കാന്തല്ലൂർ പെരടി പള്ളം ഒന്നാം വളവിൽ തമിഴ്നാട്ടിൽനിന്നെത്തിയ സഞ്ചാരികളുമായി പോയ ഒരു സഫാരി ജീപ്പ് നിയന്ത്രണം വിട്ട് മറിഞ്ഞ് അഞ്ചു പേർക്കു ഗുരുതര പരിക്കേറ്റു. അനധികൃത വാഹനങ്ങൾ പിടികൂടി നിയമ നടപടി സ്വീകരിക്കണമെന്നും അമിതവേഗം നിയന്ത്രിക്കണമെന്നുമാണ് നാട്ടുകാരുടെ ആവശ്യം.

രാജകുമാരി ദൈവമാതാ പള്ളിയിൽ തിരുനാൾ സമാപിച്ചു

രാജകുമാരി: മരിയൻ തീർഥാടനകേന്ദ്രമായ രാജകുമാരി ദൈവമാതാ പള്ളിയിൽ പരിശുദ്ധ കന്യകമറിയത്തിന്‍റെ പിറവിത്തിരുനാളിന്‍റെ ഭാഗമായുള്ള എട്ടാമിടം തിരുനാൾ സമാപിച്ചു. വികാരി മോൺ. ജോസ് നരിതൂക്കിൽ, സഹവികാരിമാരായ ഫാ.ജോബി മാതാളിക്കുന്നേൽ, ഫാ. അലക്സ് ചേന്നംകുളം എന്നിവർ നേതൃത്വം നൽകി.

റോഡിൽ ഒറ്റയാൻ: യാത്രക്കാർ ജാഗ്രത പാലിക്കുക

മറയൂർ: മറയൂർ-ഉദുമൽപേട്ട അന്തർസംസ്ഥാന പാതയിലെ ചിന്നാർ വന്യജീവി സങ്കേതത്തിനുള്ളിൽ ഒറ്റയാൻ റോഡിൽ നിലയുറപ്പിക്കുന്നത് യാത്രക്കാർക്ക് ഭീഷണിയാകുന്നു. വിനോദസഞ്ചാരികളാണ് ഒറ്റയാന്‍റെ സാന്നിധ്യം മൂലം ഏറ്റവും കൂടുതൽ ഭീഷണിയിലായിരിക്കുന്നത്. കഴിഞ്ഞ ദിവസം റോഡരികിൽനിന്നിരുന്ന കൊന്പന്‍റെ മുന്നിൽ സെൽഫി എടുക്കാൻ ശ്രമിച്ച ഒരു യുവാവിനെ കൊന്പൻ വിരട്ടിയതിനെത്തുടർന്ന് തലനാരിഴയ്ക്കാണ് അപകടത്തിൽനിന്ന് രക്ഷപ്പെട്ടത്. വാഹനങ്ങളുടെ വേഗത കുറയ്ക്കുകയും ശ്രദ്ധയോടെ യാത്ര ചെയ്യുകയും വേണമെന്നാണ് അധികൃതർ അറിയിച്ചിരിക്കുന്നത്.

തക്കാളി കൃഷിയിൽ വിജയംകൊയ്ത് മറയൂരിലെ യുവകർഷകൻ

മറയൂർ: പതിറ്റാണ്ടുകളായി മൾബറി കൃഷിയിൽ മുഴുകിയിരുന്ന മറയൂരിലെ യുവകർഷകൻ എസ്. ശിവകുമാർ, കാലാവസ്ഥാ വ്യതിയാനങ്ങളെത്തുടർന്ന് പട്ടുനൂൽ കൃഷി ഉപേക്ഷിച്ച് നാടൻ തക്കാളി കൃഷിയിലേക്ക് മാറി വിജയഗാഥ രചിച്ചു. കാന്തല്ലൂർ പഞ്ചായത്തിലെ കാരയൂർ ഗ്രാമം സ്വദേശിയായ ശിവകുമാർ ചുരക്കുളം പഞ്ചവയലിൽ രണ്ടേക്കർ സ്ഥലം പാട്ടത്തിനെടുത്താണ് തക്കാളി കൃഷി ആരംഭിച്ചത്. 12 വർഷത്തോളം മൾബറി കൃഷിയിലൂടെ പട്ടുനൂൽ ഉത്പാദനത്തിനുള്ള കൊക്കൂണ്‍ വിളവെടുത്ത ശിവകുമാർ, അപ്രതീക്ഷിത മഴയും മഞ്ഞും മൂലം മൾബറി കൃഷി തുടരാൻ പ്രയാസമായതിനെത്തുടർന്നാണ് പുതിയ പരീക്ഷണത്തിന് തയ്യാറായത്. സാധാരണയായി മറയൂർ, കാന്തല്ലൂർ പ്രദേശങ്ങളിൽ തക്കാളി കൃഷി വ്യാപകമല്ല. എന്നാൽ, എട്ട് മാസം മുന്പ് ശിവകുമാർ ഈ വെല്ലുവിളി ഏറ്റെടുത്തു. ഉടുമൽപേട്ടയിൽനിന്ന് ഒരു രൂപ നിരക്കിൽ 9,000 തക്കാളി തൈകൾ വാങ്ങി നിലമൊരുക്കി പന്തലൊരുക്കി കൃഷി ആരംഭിച്ചു. ഇപ്പോൾ വിളവെടുപ്പ് കാലത്ത് 1,000 കിലോ തക്കാളി വിറ്റു. തമിഴ്നാട് ചന്തകളിൽ 15 രൂപയിൽ താഴെ വില ലഭിക്കുന്പോൾ, മറയൂർ, കാന്തല്ലൂർ പഞ്ചായത്തുകളിലെ പ്രാദേശിക പച്ചക്കറി വിപണികളിൽ ഒരു കിലോ തക്കാളിക്ക് 25 രൂപ വില ശിവകുമാറിന് ലഭിച്ചു. ഭാര്യ നവ്യയുടെ പിന്തുണയോടെ കൃഷിയിൽ മികവ് തെളിയിച്ച ശിവകുമാർ മികച്ച കർഷകനുള്ള നിരവധി പുരസ്കാരങ്ങളും നേടിയിട്ടുണ്ട്. ഈ യുവകർഷകൻ തക്കാളി കൃഷി കൂടുതൽ സ്ഥലത്തേക്ക് വ്യാപിപ്പിക്കാൻ ഒരുങ്ങുകയാണ്.

അഭിവാദ്യ പ്രകടനവും പൊതുയോഗവും 17ന്

കട്ടപ്പന: ഭൂനിയമ ഭേദഗതി-2023നെ തുടർന്നുള്ള ചട്ടരൂപീകരണം യാഥാർഥ്യമാക്കിയ എൽഡിഎഫ് സർക്കാരിന് അഭിവാദ്യമർപ്പിച്ച് ജില്ലയിലെ മുഴുവൻ പഞ്ചായത്ത്, മുനിസിപ്പാലിറ്റി കേന്ദ്രങ്ങളിലും 17ന് വൈകുന്നേരം അഞ്ചിന് പ്രകടനവും പൊതുയോഗവും നടത്തുമെന്നു സംയുക്ത കർഷക സംഘം നേതാക്കൾ പത്രസമ്മേളനത്തിൽ അറിയിച്ചു. ഇടുക്കിയിലെ നിർമാണങ്ങൾ പട്ടയ വ്യവസ്ഥയുടെ ലംഘനമാണെന്നു കാണിച്ചു ഹൈക്കോടതിയിൽ കേസ് നൽകിയത് കോണ്‍ഗ്രസ് നേതാവ് അഡ്വ. മാത്യു കുഴൽനാടന്‍റെ നേതൃത്വത്തിലുള്ള കോണ്‍ഗ്രസ്‌സ് നേതാക്കളാണെന്നു സംയുക്ത കർഷക സംഘം ഭാരവാഹികൾ ആരോപിച്ചു. ഇതേത്തുടർന്നുണ്ടായ ഹൈക്കോടതി ഉത്തരവിന്‍റെ അടിസ്ഥാനത്തിലാണ് 2018ൽ നിർമാണ നിരോധനം ഏർപ്പെടുത്തിയത്. ഇതിനെതിരെ സംസ്ഥാന സർക്കാർ സുപ്രീം കോടതിയിൽ അപ്പീൽ നൽകിയെങ്കിലും മുതിർന്ന അഭിഭാഷകനായ കോണ്‍ഗ്രസ് നേതാവ് പി. ചിദംബരം കേരളത്തിനെതിരെ വാദിക്കുകയും സുപ്രീം കോടതി, ഹൈക്കോടതി വിധി ശരിവയ്ക്കുകയുമായിരുന്നു. ഈ വിധിയെ മറികടക്കാനാണ് എൽഡിഎഫ് സർക്കാർ 2023 സെപ്റ്റംബർ 14ന് ഭൂനിയമ ഭേദഗതി ബിൽ 2023 പാസാക്കിയത്. നിയമ ഭേദഗതികളിലൂടെ, പതിച്ചു നൽകിയ ഭൂമിയിൽ നിർമിച്ചിട്ടുള്ള ചട്ട വിരുദ്ധ നിർമിതികൾ ക്രമവത്കരിക്കാൻ ഗവണ്‍മെന്‍റിന് അധികാരം നൽകി, ഇതു നടപ്പാക്കാൻ 7 ഒഎ പ്രകാരം ചട്ടങ്ങൾ മന്ത്രിസഭ അംഗീകരിച്ചു. സർക്കാർ തീരുമാനത്തെ അട്ടിമറിക്കാൻ നിക്ഷിപ്തതാത്പര്യക്കാരും യുഡിഎഫും നടത്തുന്ന ഗൂഢനീക്കങ്ങൾ തിരിച്ചറിയണമെന്നു സംയുക്ത കർഷക സമിതി ചെയർമാൻ മാത്യു വർഗീസ്, കണ്‍വീനർ റോമിയോ സെബാസ്റ്റ്യൻ, ജോയി വടക്കേടത്ത്, ബിജു ഐക്കര, മാത്യു ജോർജ്, കെ.എൻ. വിനീഷ് കുമാർ തുടങ്ങിയവർ ആവശ്യപ്പെട്ടു.

വന്യജീവി ആക്രമണം ; കരട് ബില്ല് മലയോരമേഖലയ്ക്ക് ആശ്വാസം: കേരള കർഷകസംഘം

കട്ടപ്പന: ജനവാസമേഖലയിലിറങ്ങുന്ന വന്യമൃഗം ഒരാളെ ആക്രമിച്ച് പരിക്കേൽപ്പിച്ചാൽ ഉടൻതന്നെ ആ വന്യമൃഗത്തെ കൊല്ലാൻ ഉത്തരവിടാൻ ചീഫ് വൈൽഡ് ലൈഫ് വാർഡന് അധികാരം നൽകുന്ന വന്യജീവി സംരക്ഷണ നിയമം (കേരളം) ഭേദഗതിയുടെ കരട് ബില്ലിന് സംസ്ഥാന മന്ത്രിസഭ അംഗീകാരം നൽകിയതോടെ മലയോര കർഷകരുടെ വലിയ പ്രശ്നത്തിന് പരിഹാരമായെന്ന് കേരള കർഷക സംഘം ജില്ലാ സെക്രട്ടറി റോമിയോ സെബാസ്റ്റ്യൻ, പ്രസിഡന്‍റ് എൻ.വി. ബേബി എന്നിവർ പത്രസമ്മേളനത്തിൽ അവകാശപ്പെട്ടു. നിലവിലുള്ള കേന്ദ്ര നിയമത്തിലെയും കേന്ദ്രസർക്കാർ പുറപ്പെടുവിച്ച സ്റ്റാൻഡേർഡ് ഓപറേറ്റിംഗ് പ്രൊസീജിയറിലെയും അപ്രായോഗികവും കാലതാമസം വരുത്തുന്നതുമായ നടപടിക്രമങ്ങൾ ഒഴിവാക്കി അടിയന്തരനടപടി സ്വീകരിക്കാൻ സാധ്യമാക്കുന്നതാണ് ഈ ബില്ലിലെ വ്യവസ്ഥകൾ. പട്ടിക രണ്ടിലെ വന്യമൃഗങ്ങളുടെ എണ്ണം വർധിച്ചാൽ അവയുടെ ജനനനിയന്ത്രണം നടത്തൽ, മറ്റ് സ്ഥലങ്ങളിലേക്ക് നാടുകടത്തൽ എന്നിവയ്ക്കും ബില്ലിൽ വ്യവസ്ഥയുണ്ട്. ഇങ്ങനെ ചെയ്യുന്നതിന് കേന്ദ്ര സർക്കാരിന്‍റെ അനുമതി വാങ്ങണമെന്ന വ്യവസ്ഥ ഒഴിവായി. പട്ടിക രണ്ടിലെ ഏത് വന്യമൃഗത്തെയും അവയുടെ എണ്ണം അനിയന്ത്രിതമായി വർധിച്ചുവെന്ന് കണ്ടാൽ അവയെ ക്ഷുദ്രജീവി ആയി പ്രഖ്യാപിക്കാൻ ഇപ്പോൾ കേന്ദ്ര സർക്കാരിനാണ് അധികാരം. ഇതിനു പകരം സംസ്ഥാന സർക്കാരിന് ഈ അധികാരം നൽകുന്നതിനും ബില്ലിൽ വ്യവസ്ഥ ചേർത്തിട്ടുണ്ട്. ഇപ്രകാരം ക്ഷുദ്രജീവിയായി പ്രഖ്യാപിച്ചു കഴിഞ്ഞാൽ അത്തരം വന്യജീവിയെ ആർക്ക് വേണെമെങ്കിലും ഏതുവിധത്തിലും കൊല്ലാം. അതിന്‍റെ ഇറച്ചി കഴിക്കുന്നതിനും തട‌സമുണ്ടാകില്ല. നാടൻ കുരങ്ങുകളെ പട്ടിക ഒന്നിൽനിന്നു പട്ടിക രണ്ടിലേക്ക് മാറ്റുന്നതിനും ബില്ലിൽ വ്യവസ്ഥയുണ്ട്. ഇപ്പോഴത്തെ കേന്ദ്ര നിയമത്തിലെ ഓപ്പറേറ്റിംഗ് പ്രൊസീജിയർ കോഡ് പ്രകാരം ഒരു വന്യമൃഗത്തെയും കൊല്ലാൻ ഇന്ത്യയിലൊരിടത്തും കഴിയില്ല. ബില്ലിലെ വ്യവസ്ഥകളോട് എംപിക്കും യുഡിഎഫിനും വിയോജിപ്പുണ്ടോ എന്ന് അവർ വ്യക്തമാക്കണമെന്നും കർഷക സംഘം ജില്ലാ സെക്രട്ടറി റോമിയോ സെബാസ്റ്റ്യൻ, ജില്ലാ ജോയിന്‍റ് സെക്രട്ടറി മാത്യു ജോർജ്, കട്ടപ്പന ഏരിയാ സെക്രട്ടറി കെ.എൻ. വിനീഷ്കുമാർ എന്നിവർ പറഞ്ഞു.

പച്ചത്തുരുത്തുകൾക്ക് മുഖ്യമന്ത്രിയുടെ പുരസ്കാരം

തൊടുപുഴ: ജില്ലയിലെ മികച്ച 12 ഹരിതകേരളം പച്ചത്തുരുത്തുകൾക്ക് മുഖ്യമന്ത്രിയുടെ പുരസ്കാരം. ഇന്നു വൈകുന്നേരം തിരുവനന്തപുരത്ത് നടക്കുന്ന ചടങ്ങിൽ മുഖ്യമന്ത്രി പിണറായി വിജയൻ പുരസ്കാര ദാനം നടത്തും. തദ്ദേശഭരണ സ്ഥാപനങ്ങൾ, ഹരിതസ്ഥാപനങ്ങൾ, ഹരിത കോളജുകൾ, വിദ്യാലയങ്ങൾ എന്നീ വിഭാഗത്തിൽനിന്നു ജില്ലാതല സ്ക്രീനിംഗ് കമ്മിറ്റി തെരഞ്ഞെടുത്ത പച്ചത്തുരുത്തുകൾക്കാണ് പുരസ്കാരം നൽകുന്നത്. മുട്ടം ജില്ലാ കോടതിയുടെ പച്ചത്തുരുത്തിനാണ് മികച്ച ഹരിതസ്ഥാപനത്തിനുള്ള പുരസ്കാരം. സഹ്യദർശിനി -നെടുങ്കണ്ടം പഞ്ചായത്ത്, കാഞ്ഞാർ-വെള്ളിയാമറ്റം, അമൃതവാടി- അറക്കുളം, പുഴയോരം കൈപ്പ- കുടയത്തൂർ, കൊച്ചുതോവാള അങ്കണവാടി പച്ചത്തുരുത്ത് -കട്ടപ്പന മുനിസിപ്പാലിറ്റി എന്നിവയാണ് മികച്ച തദ്ദേശസ്ഥാപന പച്ചത്തുരുത്തുകൾ. തൊടുപുഴ ന്യൂമാൻ കോളജ്, മുരിക്കാശേരി പാവനാത്മ കോളജ്, നാടുകാണി ട്രൈബൽ ആർട്സ് ആൻഡ് സയൻസ് കോളജ് എന്നിവയാണ് മികച്ച കലാലയ പച്ചത്തുരുത്തുകൾ. മുണ്ടിയെരുമ ഗവ. എച്ച്എസ്എസ്, ചിത്തിരപുരം ഗവ.എച്ച്എസ്, കൊന്നത്തടി ഗവ. എൽപിഎസ് എന്നീ ഹരിത വിദ്യാലയ പച്ചത്തുരുത്തുകൾക്കും മികവിനുള്ള അംഗീകരം ലഭിച്ചു. ജില്ലയിലാകെ 109 പച്ചത്തുരുത്തുകളാണുള്ളത്. ഫലവൃക്ഷങ്ങളും മറ്റും നട്ട് സ്വാഭാവിക ചെറുവനങ്ങൾ രൂപപ്പെടുത്തുകയാണ് ഹരിതകേരളം പച്ചത്തുരുത്ത് പദ്ധതിയിലൂടെ ലക്ഷ്യമിടുന്നത്. 2019ൽ തുടക്കമിട്ട പദ്ധതിയിലാകെ വിവിധ തദ്ദേശ സ്ഥാപനങ്ങളിലായി 43 ഏക്കർ ഭൂമിയിലാണ് പച്ചത്തുരുത്തുള്ളതെന്ന് ഹരിത കേരളം മിഷൻ ജില്ലാ കോ-ഓർഡിനേറ്റർ ഡോ. അജയ് പി. കൃഷ്ണ അറിയിച്ചു.

ബിജെപിയുടെ പോലീസ് സ്റ്റേഷൻ മാർച്ച്

തൊടുപുഴ: പോലീസ് മർദനങ്ങൾ അവസാനിപ്പിക്കണമെന്ന് ആവശ്യപ്പെട്ട് ബിജെപി ഇടുക്കി നോർത്ത് ജില്ലാ കമ്മിറ്റിയുടെ നേതൃത്വത്തിൽ തൊടുപുഴ ഡിവൈഎസ്പി ഓഫീസിലേക്ക് മാർച്ച് നടത്തി. നോർത്ത് ജില്ലാ പ്രസിഡന്‍റ് പി.പി. സാനു വി.എൻ. സുരേഷ്, കെ.എൻ. ഗീതാകുമാരി, പി.ജി. രാജശേഖരൻ, എൻ.കെ. അബു, ജോർജ് പൗലോസ്, ബെന്നി ജോസഫ്, മനോജ് അടിമാലി, വിഷ്ണു പുതിയേടത്ത്, പി.വി. ഷിൻമോൻ, വിജയപാൽ, ശ്രീകാന്ത് കാഞ്ഞിരമറ്റം എന്നിവർ പ്രസംഗിച്ചു.

നാകപ്പുഴ പള്ളിക്ക് ഇല്ലിക്കുംഭ നേർച്ച കൈമാറി

നാകപ്പുഴ: കുട്ടന്പുഴ കൊച്ചുനാകപ്പുഴ പള്ളിയിൽനിന്ന് ഇടവക ജനങ്ങളും തീർഥാടകരും ഇല്ലിക്കുംഭത്തിൽ നിക്ഷേപിച്ച നേർച്ചപ്പണം വികാരി അരുണ്‍ വലിയതാഴത്തിന്‍റെ നേതൃത്വത്തിൽ നാകപ്പുഴ പള്ളിക്ക് കൈമാറി. വികാരി ഫാ. പോൾ നെടുന്പുറത്ത് ഏറ്റുവാങ്ങി. 1957ൽ കുട്ടന്പുഴ മേഖലയിൽ കുടിയേറ്റ ജനതയുടെ താമസമുണ്ടായിരുന്നതായി ചരിത്രരേഖകളിലുണ്ട്. വന്യമൃഗശല്യം മാറുന്നതിന് മാതാവിനോട് പ്രാർഥിക്കുന്നതിനായി ഒത്തുചേർന്ന സ്ഥലമാണ് നാകപ്പുഴ കവല എന്നറിയപ്പെടുന്ന അട്ടിക്കളം. ഇല്ലികൊണ്ട് കുരിശുണ്ടാക്കി മുള ഉപയോഗിച്ച് ഭണ്ഡാരവും നാകപ്പുഴ കുരിശും സ്ഥാപിക്കുകയും ഇല്ലിക്കുംഭത്തിലെ നേർച്ച നാകപ്പുഴ പള്ളിയിൽ എട്ട് നോന്പ് തിരുനാളിന് വഴിപാടായി എത്തിച്ചുകൊടുക്കുകയുമായിരുന്നു പതിവ്. ഇത്തവണയും പതിവ് തെറ്റിക്കാതെ നേർച്ച നാകപ്പുഴയ്ക്ക് കൈമാറുകയായിരുന്നു.

വിദ്യാർഥിയെ മർദിച്ച സീനിയർ വിദ്യാർഥി അറസ്റ്റിൽ

തൊടുപുഴ: ഒന്നാംവർഷ വിഎച്ച്എസ്ഇ വിദ്യാർഥിയെ ക്ലാസിൽ കയറി മർദിച്ച സംഭവത്തിൽ സീനിയർ വിദ്യാർഥിയെ പോലീസ് അറസ്റ്റ് ചെയ്തു. രണ്ടാം വർഷ വിദ്യാർഥിയായ അൽ അമീനെ(18)യാണ് അറസ്റ്റ് ചെയ്തത്. വിദ്യാർഥിയെ പിന്നീട് ജാമ്യത്തിൽ വിട്ടയച്ചു. മർദനം നടത്തിയ അൽ അമീന് മർദനം നടത്താൻ സഹായം ചെയ്ത മറ്റ് രണ്ട് വിദ്യാർഥികൾക്ക് പ്രായപൂർത്തി ആയിട്ടില്ലെന്നാണ് അന്വേഷണത്തിൽ കണ്ടെത്തിയതെന്ന് പൊലീസ് പറഞ്ഞു. മൂന്നു വർഷത്തിൽ താഴെ ശിക്ഷ ലഭിക്കാവുന്ന വകുപ്പാണ് ചുമത്തിയിരിക്കുന്നത്. കഴിഞ്ഞ വ്യാഴാഴ്ച തൊടുപുഴ നഗരത്തിലെ സർക്കാർ സ്കൂളിലാണ് ഇടവെട്ടി സ്വദേശിയായ ഒന്നാം വർഷ വിദ്യാർഥിക്ക് മർദനമേറ്റത്. ഇന്‍റർവെൽ സമയം ക്ലാസിലെത്തിയ രണ്ടാം വർഷ വിദ്യാർഥിയുടെ നേതൃത്വത്തിൽ അകാരണമായി മർദിച്ചെന്നാണ് പരാതി. അമ്മ നൽകിയ പരാതിയെ തുടർന്നാണ് പോലീസ് കേസെടുത്ത് അന്വേഷണം ആരംഭിച്ചത്. മർദനം നടത്തിയ അൽ അമീനെ 15 ദിവസത്തേക്ക് സ്കൂളിൽനിന്ന് സസ്പെൻഡ് ചെയ്തിരിക്കുകയാണ്.

ഭൂമിതർക്കം മുഖ്യമന്ത്രിയുടെ മുന്നിലേക്ക് ; അവകാശവാദം 476 ഹെക്ടറിന്

തൊടുപുഴ: ജില്ലാ ആസ്ഥാനത്തെ ഭൂമി സംബന്ധിച്ച് ജില്ലാ പഞ്ചായത്തും കെഎസ്ഇബിയും തമ്മിലുള്ള തർക്കത്തിൽ അഡിഷണൽ ചീഫ് സെക്രട്ടറി വിളിച്ചുചേർത്ത യോഗത്തിൽ പരിഹാരമായില്ല. ഇന്നലെയാണ് അഡീഷണൽ ചീഫ് സെക്രട്ടറി പുനീത് കുമാറിന്‍റെ സാന്നിധ്യത്തിൽ ഉന്നതതല യോഗം നടന്നത്. ചർച്ചയിൽ പങ്കെടുത്ത ജില്ലാ പഞ്ചായത്ത് പ്രസിഡന്‍റ് രാരിച്ചൻ നീറണാകുന്നേലിന്‍റെ നേതൃത്വത്തിൽ മതിയായ രേഖകൾ യോഗത്തിൽ സമർപ്പിച്ചെങ്കിലും ഭൂമി വിട്ടു നൽകാനാവില്ലെന്ന് കെഎസ്ഇബി നിലപാടെടുത്തതോടെയാണ് യോഗം തീരുമാനമാകാതെ പിരിഞ്ഞത്. ഇനി മുഖ്യമന്ത്രി, റവന്യു മന്ത്രി എന്നിവരുടെ സാന്നിധ്യത്തിൽ യോഗം വിളിക്കാനാണ് തീരുമാനം. ജില്ലാ ആസ്ഥാനത്തെ 476 ഹെക്ടർ ഭൂമി സംബന്ധിച്ചാണ് തർക്കം. കൈമാറ്റം ഇങ്ങനെ സർക്കാർ ഉത്തരവ് പ്രകാരമാണ് 1964ൽ ജില്ലാ ആസ്ഥാനത്തെ 476 ഹെക്ടർ സ്ഥലം കെഎസ്ഇബിക്ക് അനുവദിച്ചത്. ഇടുക്കി ഡാം നിർമാണവുമായി ബന്ധപ്പെട്ടും ജീവനക്കാർക്കു ക്വാർട്ടേഴ്സുകൾ നിർമിക്കുന്നതിനുമായാണ് ഭൂമി നൽകിയത്. 1972ൽ ഇടുക്കി ജില്ലയുടെ രൂപീകരണത്തിനു ശേഷം സർക്കാർ ഓഫീസുകൾ ജില്ലാ ആസ്ഥാനത്തു നിർമിക്കാനായി ചീഫ് സെക്രട്ടറി, അഡീഷണൽ ചീഫ് സെക്രട്ടറി മുഖേന ഈ ഭൂമി 1980ൽ ഇടുക്കി വികസന അഥോറിറ്റി രൂപീകരിച്ച് അവർക്കു കൈമാറി. ജില്ലാ കളക്ടറാണ് ഐഡിഎയുടെ കണ്‍വീനർ. 2007ൽ ജില്ലാ വികസന അഥോറിറ്റി പിരിച്ചുവിട്ടതോടെ 476 ഹെക്ടർ വരുന്ന സ്ഥലം ജില്ലാ പഞ്ചായത്തിനു നൽകി സർക്കാർ ഉത്തരവിറക്കി. തർക്കത്തിനു തുടക്കം ഭൂമി ജില്ലാ പഞ്ചായത്തിനു കൈമാറിക്കൊണ്ടുള്ള ഉത്തരവ് ഇറങ്ങിയതു മുതലാണ് കെഎസ്ഇബിയും ജില്ലാ പഞ്ചായത്തും തമ്മിലുള്ള തർക്കം തുടങ്ങിയത്. ഇതിന്‍റെ ഭാഗമായി ഇടുക്കി, ചെറുതോണി, പൈനാവ് തുടങ്ങിയ സ്ഥലത്തു കെഎസ്ഇബി നിർമിച്ച കെട്ടിടങ്ങൾക്കു പണം ആവശ്യപ്പെട്ടു കെഎസ്ഇബി ജില്ലാ പഞ്ചായത്ത് സെക്രട്ടറിക്കു കത്തു നൽകി. ഇതിന്‍റെ അടിസ്ഥാനത്തിൽ ജില്ലാ കളക്ടർ ഇടപെട്ട് നടത്തിയ പരിശോധനയിൽ കെട്ടിടങ്ങളുടെ വിലയായ 29 ലക്ഷം രൂപ ആറു വർഷം മുന്പ് കെഎസ്ഇബിക്കു ജില്ലാ പഞ്ചായത്ത് ഫണ്ടിൽനിന്ന് അടച്ചു. തുടർന്നും ഭൂമി വിട്ടുകൊടുക്കാൻ നടപടിയുണ്ടായില്ല. ഇതേത്തുടർന്നു സ്ഥലവും കെട്ടിടങ്ങളും വിട്ടു കിട്ടണമെന്ന് ആവശ്യപ്പെട്ടു ജില്ലാ പഞ്ചായത്ത് പ്രസിഡന്‍റ് സർക്കാരിനു പരാതി നൽകി. ഈ പരാതിയുടെ അടിസ്ഥാനത്തിലാണ് പ്രശ്നപരിഹാരത്തിന് ഉന്നതതല യോഗം ചേർന്നത്. ജില്ലാ പഞ്ചായത്ത് പ്രസിഡന്‍റ്, സെക്രട്ടറി എന്നിവർക്കു പുറമെ കെഎസ്ഇബി, വനം വകുപ്പ് ഉദ്യോഗസ്ഥരും യോഗത്തിൽ പങ്കെടുത്തു. കെട്ടിടങ്ങൾ നശിക്കുന്നു ഭൂമിയുടെ ഉടമസ്ഥാവകാശത്തിൽ തർക്കം തുടരുന്നതിനാൽ ജില്ലാ ആസ്ഥാന മേഖലയിലെ കെട്ടിടങ്ങൾ നാശത്തിലേക്കു നീങ്ങുകയാണ്. കൃത്യമായ അറ്റകുറ്റപ്പണിയും സംരക്ഷണവുമില്ലാത്തതിനാൽ ചെറുതോണി, വാഴത്തോപ്പ്, പൈനാവ് തുടങ്ങിയ പ്രദേശങ്ങളിൽ നിരവധി കെട്ടിടങ്ങൾ നശിച്ചു കൊണ്ടിരിക്കുകയാണ്. പല കെട്ടിടങ്ങളുടെയും മേൽക്കൂര ജീർണിച്ചു നിലംപൊത്താറായ നിലയിലാണ്. ഭൂമി വിട്ടു കിട്ടിയാൽ ഇതൊക്കെ സംരക്ഷിക്കുകയും പുതിയ നിർമാണങ്ങൾ നടത്തുകയും ചെയ്യാമെന്നാണ് ജില്ലാ പഞ്ചായത്തിന്‍റെ കണക്കുകൂട്ടൽ. ജില്ലയുടെ പലഭാഗത്തു പ്രവർത്തിച്ച ജില്ലാ ഓഫീസുകളും പൈനാവിലേക്ക് എത്തിയപ്പോൾ അവ സ്ഥാപിക്കാനായി സ്ഥലം വിട്ടു നൽകിയത് ജില്ലാ പഞ്ചായത്താണ്. കളക്ടറുടെ വസതി, പോലീസ് ക്യാന്പ്, പോളിടെക്നിക്, ഇടുക്കി മെഡിക്കൽ കോളജ് എന്നീ സ്ഥാപനങ്ങൾക്കു ഭൂമി വിട്ടുനൽകിയത് ജില്ലാ പഞ്ചായത്താണ്. ഇപ്പോൾ നിർമാണം നടന്നുവരുന്ന എബിസി സെന്‍ററിനു സ്ഥലം വിട്ടു നൽകിയതും ജില്ലാ പഞ്ചായത്താണ്.

ഇടുക്കിയെ ടൂറിസത്തിന്‍റെ ആഗോള ഹബ്ബാക്കും: മന്ത്രി റോഷി

മൂലമറ്റം: അടിസ്ഥാന സൗകര്യങ്ങൾ വികസിപ്പിച്ച് ഇടുക്കിയെ ടൂറിസത്തിന്‍റെ ആഗോള ഹബ്ബാക്കിമാറ്റുകയാണ് ലക്ഷ്യമെന്ന് മന്ത്രി റോഷി അഗസ്റ്റിൻ. കേരള കോണ്‍ഗ്രസ് - എം മണ്ഡലം കണ്‍വൻഷൻ ഉദ്ഘാടനം ചെയ്യുകയായിരുന്നു അദ്ദേഹം. നിലവിലുള്ള നിർമാണത്തിനു പുറമേ ഇലവീഴാപൂഞ്ചിറ റോഡിനായി 1.15 കോടിയുടെ പദ്ധതി തയാറാക്കി വരികയാണെന്നും കുടയത്തൂർ, അറക്കുളം മേഖല കേന്ദ്രീകരിച്ച് വലിയ ടൂറിസം പ്രോജക്ട് യാഥാർഥ്യമാക്കുമെന്നും അദ്ദേഹം പറഞ്ഞു. മണ്ഡലം പ്രസിഡന്‍റ് ടോമി നാട്ടുനിലം അധ്യക്ഷത വഹിച്ചു. നിയോജക മണ്ഡലം പ്രസിഡന്‍റ് ഷാജി കാഞ്ഞമല, ജില്ലാ പഞ്ചായത്ത് പ്രസിഡന്‍റ് രാരിച്ചൻ നീറണാക്കുന്നേൽ, ടോമി ജോസഫ് കുന്നേൽ, ഫ്രാൻസിസ് കരിന്പാനി, സിബി മാളിയേക്കൽ, ജോസ് ഇടക്കര, ജിയോ കുന്നപ്പിള്ളിൽ, അജിൽ പനച്ചിക്കൽ, അമൽ കുഴിക്കാട്ട്കുന്നേൽ തുടങ്ങിയവർ പ്രസംഗിച്ചു. ചടങ്ങിൽ നിയമസഭാ സാമാജികനായി 25 വർഷം പൂർത്തിയാക്കുന്ന മന്ത്രി റോഷി അഗസ്റ്റിനെ ഉപഹാരം നൽകി ആദരിച്ചു. വിവിധ മേഖലകളിൽ മികവു തെളിയിച്ച ജോജോ കുരിശുംമൂട്ടിൽ, ബേബിച്ചൻ തട്ടാപറന്പിൽ, ബേബി കുഴിഞ്ഞാലിൽ, ബേബി വെട്ടുകാട്ടിൽ, ജിബിൻ എസ്. ഇടക്കര, ബിബിൻ കൊല്ലപ്പിള്ളിൽ, കുര്യാച്ചൻ മുതുകാട്ടിൽ, വത്സ സതീശൻ എന്നിവരെ ആദരിച്ചു.

സംസ്ഥാന ആർദ്രകേരളം പുരസ്കാരം: ഇടുക്കി ജില്ലാ പഞ്ചായത്തിന്

തൊടുപുഴ: ആരോഗ്യമേഖലയിൽ മികച്ച പ്രവർത്തനങ്ങൾ നടത്തിയ തദ്ദേശസ്വയംഭരണ സ്ഥാപനങ്ങൾക്കുള്ള ആർദ്രകേരളം പുരസ്കാരത്തിന് സംസ്ഥാനതലത്തിൽ ഒന്നാംസ്ഥാനം കരസ്ഥമാക്കി ഇടുക്കി ജില്ലാ പഞ്ചായത്ത്. തിരുവനന്തപുരം കോർപറേഷനുമായാണ് ജില്ലാ പഞ്ചായത്ത് പുരസ്കാരം പങ്കിട്ടത്. ജില്ലാ തലത്തിൽ രാജകുമാരി പഞ്ചായത്ത് ഒന്നാം സ്ഥാനത്തിന് അർഹരായി. കരിങ്കുന്നം, കുടയത്തൂർ പഞ്ചായത്തുകൾക്കാണ് രണ്ടും മൂന്നും സ്ഥാനങ്ങൾ. തൊടുപുഴ ജില്ലാ ആശുപത്രി, തൊടുപുഴ ആയുർവേദ ജില്ലാ ആശുപത്രി, മുട്ടം ഹോമിയോപ്പതി ജില്ലാ ആശുപത്രി, പാറേമാവ് ആയുർവേദ അനസ് ആശുപത്രി എന്നിവിടങ്ങളിൽ നടത്തിയ മികച്ച പ്രവർത്തനങ്ങൾക്കാണ് ജില്ലാ പഞ്ചായത്തിന് പുരസ്കാരം ലഭിച്ചത്. 2023 - 24 സാന്പത്തിക വർഷത്തിൽ ജില്ലാ പഞ്ചായത്ത് അലോപ്പതി മരുന്നുകൾക്ക് 1.71 കോടി രൂപ ചെലവഴിക്കുകയും ആയുർവേദം, ഹോമിയോ വകുപ്പുകൾക്കും ആരോഗ്യ അനുബന്ധ പ്രവർത്തനങ്ങൾക്കായി തുക വകയിരുത്തുകയും ചെയ്തു. സംസ്ഥാനതലത്തിൽ പുരസ്കാരത്തിന് ഒന്നാം സ്ഥാനം നേടിയ ജില്ലാ പഞ്ചായത്തിന് പത്തുലക്ഷം രൂപയും ജില്ലാതലത്തിൽ വിവിധ സ്ഥാനങ്ങൾ നേടിയ പഞ്ചായത്തുകൾക്ക് അഞ്ചുലക്ഷം, മൂന്നുലക്ഷം, രണ്ടുലക്ഷം എന്നിങ്ങനെയാണ് അവാർഡ് തുക ലഭിക്കുക. തദ്ദേശ സ്വയംഭരണ സ്ഥാപനങ്ങൾ ആരോഗ്യമേഖലയിൽ ചെലവഴിച്ച തുക, സാന്ത്വന പരിചരണ പരിപാടികൾ, കായകൽപ്പ സ്കോർ, ഹെൽത്ത് ഗ്രാന്‍ഡ് വിനിയോഗം, ആരോഗ്യമേഖലയുമായി ബന്ധപ്പെട്ട മറ്റ് പ്രവർത്തനങ്ങൾ, പ്രതിരോധ കുത്തിവയ്പ്, വാർഡുതല പ്രവർത്തനങ്ങൾ, പ്രാദേശിക ആരോഗ്യആവശ്യങ്ങൾക്ക് അനുസൃതമായ നൂതന ഇടപെടലുകൾ, ശുചിത്വം, മാലിന്യ പരിപാലനം, പ്രാണി നിയന്ത്രണം, ജീവിത ശൈലി ക്രമീകരണത്തിനുള്ള ഭൗതികസാഹചര്യങ്ങൾ ഒരുക്കൽ, മോഡേണ്‍ മെഡിസിൻ, ആയുർവേദ, ഹോമിയോ മേഖലകളിലുള്ള ദേശീയ സംസ്ഥാന ആരോഗ്യപദ്ധതിയുടെ ഫലപ്രദമായ നടത്തിപ്പ് തുടങ്ങിയ മികച്ച ആരോഗ്യ പ്രവർത്തനത്തിനാണ് അംഗീകാരം.

ആർമി റിക്രൂട്ട്മെന്‍റ് റാലി: കായിക ക്ഷമതാ പരീക്ഷയ്ക്ക് സമാപനം

ഇടുക്കി: നെടുങ്കണ്ടം പഞ്ചായത്ത് സിന്തറ്റിക് സ്റ്റേഡിയത്തിൽ നടന്ന ആർമി റിക്രൂട്ട്മെന്‍റ് റാലിയുടെ ഭാഗമായുള്ള കായികക്ഷമതാ പരീക്ഷ സമാപിച്ചു. ഇന്നലെ പാരാറെജിമന്‍റ് വിഭാഗത്തിലെ ഉദ്യോഗാർഥികൾക്കായി അഞ്ച് കിലോമീറ്റർ റണ്‍ ചേസ് നടന്നു. തൂക്കുപാലം രാമക്കൽമേട് റോഡിൽ നടന്ന റണ്‍ചേസിൽ ജനറൽ ഡ്യൂട്ടി വിഭാഗത്തിൽനിന്ന് പാരാ റെജിമെന്‍റിലേക്ക് പോകാൻ താത്പര്യമുള്ള 26 ഉദ്യോഗാർഥികൾ പങ്കെടുത്തു. ഇതിന് പുറമേ സിന്തറ്റിക് സ്റ്റേഡിയത്തിൽ പുൾ അപ്സ്, പുഷ് അപ്സ് തുടങ്ങി നാലിനം കായികക്ഷമതാ പരീക്ഷയും ഉണ്ടായിരുന്നു. ശനിയാഴ്ച ടെക്നിക്കൽ വിഭാഗത്തിൽ കായികക്ഷമതാ പരീക്ഷ വിജയിച്ചവർക്ക് ഇന്നലെ മെഡിക്കൽ പരിശോധന നടത്തി. റിക്രൂട്ട്മെന്‍റ് റാലിയിൽ അഞ്ച് ദിവസത്തിനുള്ളിൽ പങ്കെടുത്ത മുഴുവൻ ഉദ്യോഗാർഥികളുടെയും ഫിസിക്കൽ, മെഡിക്കൽ ടെസ്റ്റുകൾ പൂർത്തിയായി. ഏഴ് ജില്ലകളിൽ എഴുത്ത് പരീക്ഷ വിജയിച്ച് റാങ്ക് ലിസ്റ്റിൽ ഇടംനേടിയ 3102 ഉദ്യോഗാർഥികൾക്കായാണ് ആർമി റിക്രൂട്ട്മെന്‍റ് റാലി നടത്തിയത്. 1600 മീറ്റർ റണ്‍ റേസ്, സിഗ് സാഗ് ബാലൻസ്, പുൾ അപ്സ്, 9 ഫീറ്റ് ഡിച്ച് തുടങ്ങി നാലിനം കായികക്ഷമത പരീക്ഷയും ശാരീരിക അളവ് പരിശോധനയുമാണ് നടത്തിയത്. ഇവയ്ക്ക് പുറമേ സർട്ടിഫിക്കറ്റ് പരിശോധനയും മെഡിക്കൽ പരിശോധനയും നടന്നു. 120 ആർമി ഉദ്യോഗസ്ഥരുടെ നേതൃത്വത്തിലാണ് റിക്രൂട്ട്മെന്‍റ് റാലി നടന്നത്.

കെസിവൈഎം രൂപത കലോത്സവത്തിന് തുടക്കം

മുവാറ്റുപുഴ: യുവദീപ്തി - കോതമംഗലം രൂപതയുടെ ആഭിമുഖ്യത്തിൽ സംഘടിപ്പിക്കുന്ന രൂപത കലോത്സവം അരങ്ങ് -2025ന് മുവാറ്റുപുഴ നിർമല കോളജിൽ തുടക്കമായി. പ്രിൻസിപ്പൽ റവ.ഡോ. ജസ്റ്റിൻ കണ്ണാടൻ ഉദ്ഘാടനം ചെയ്തു. രൂപത പ്രസിഡന്‍റ് സാവിയോ തോട്ടുപുറം അധ്യക്ഷത വഹിച്ചു. രൂപത ഡയറക്ടർ ഫാ. സെബാസ്റ്റ്യൻ വള്ളോപ്പിള്ളിൽ ആമുഖപ്രഭാഷണം നടത്തി. കോളജ് ബർസാർ ഫാ. പോൾ കളത്തൂർ, രൂപത അസി. ഡയറക്ടർ ഫാ. ആന്‍റണി വിളയപ്പിള്ളിൽ, അനിമേറ്റർ സിസ്റ്റർ റെറ്റി എഫ്സിസി, വൈസ് പ്രസിഡന്‍റ് ആൻമരിയ ജോസഫ് എന്നിവർ പ്രസംഗിച്ചു. പതിനാല് വേദികളിലായി നടക്കുന്ന 17 മത്സര ഇനങ്ങളിൽ 3000ത്തോളം യുവജനങ്ങളാണ് മാറ്റുരയ്ക്കുന്നത്.

അന്നം സുഭിക്ഷം പദ്ധതിക്ക് തുടക്കം

തൊടുപുഴ: ഈസ്റ്റ് ലയണ്‍സ് ക്ലബ് നടപ്പാക്കുന്ന അന്നം, സുഭിക്ഷം. പദ്ധതിക്ക് തുടക്കം കുറിച്ചു. മടക്കത്താനം സ്നേഹവീട്ടിലെ അന്തേവാസികളോടൊപ്പം ഭക്ഷണം കഴിച്ചാണ് ലയണ്‍സ് ക്ലബ് കുടുംബാംഗങ്ങൾ ഒരു വർഷം നീണ്ടുനിൽക്കുന്ന പദ്ധതിക്ക് തുടക്കമിട്ടത്. പദ്ധതിയുടെ ഉദ്ഘാടനം കാഡ്സ് ചെയർമാൻ ആന്‍റണി കണ്ടിരിക്കൽ നിർവഹിച്ചു. പ്രസിഡന്‍റ് സാബു എ. മാത്യു, സിസ്റ്റർ നിർമല എഫ്എസ്ഡി, പി.വി. ഷാജു, ബെൻസിൽ പി. ജോണ്‍, ടെൻസിംഗ് പോൾ, കെ.വി. ബൈജു, എൻ.പി. പോൾ, അമൽ ജോസ്, അലോഷി ജോസഫ് എന്നിവർ പ്രസംഗിച്ചു.

നിയമഭേദഗതി സർക്കാർ വിഴ്ച മറയ്ക്കാൻ: എംപി

തൊടുപുഴ: നാട്ടിലിറങ്ങുന്ന വന്യമൃഗങ്ങളെ കൊല്ലാൻ നിലവിലുള്ള കേന്ദ്ര നിയമത്തിൽ വകുപ്പുകൾ നിലനിൽക്കേതന്നെ പുതിയ നിയമനിർമാണത്തിന് സംസ്ഥാനം തുനിയുന്നത് സർക്കാരിന്‍റെ വീഴ്ചകൾ മറച്ചുവയ്ക്കാനാണെന്ന് ഡീൻ കുര്യാക്കോസ് എംപി. നിലവിലുള്ള നിയമത്തിൽ വിവിധ വകുപ്പുകളനുസരിച്ച് മൃഗങ്ങളെ കൊല്ലാൻ ചീഫ് വൈൽഡ് ലൈഫ് വാർഡന് അധികാരമുണ്ട്. പീരുമേട്ടിൽ കടുവയെ വെടിവെച്ചുകൊന്ന ഉദ്യോഗസ്ഥർക്കെതിരേ നടപടി സ്വീകരിക്കാത്തത് ഈ നിയമത്തിന്‍റെ പരിരക്ഷയിലാണ്. എന്നാൽ മറ്റൊരിടത്തും അത് നടപ്പാക്കാൻ സർക്കാർ തയാറായില്ല. ഈ ഘട്ടത്തിൽ ഉണ്ടായ വിമർശനങ്ങൾ തണുപ്പിക്കാൻ വേണ്ടിയാണ് നടപടികൾ ലഘൂകരിക്കാൻ എന്ന പേരിൽ പുതിയ നിയമത്തിന് സർക്കാർ നേതൃത്വം നൽകുന്നത്. ഇക്കാര്യത്തിൽ സർക്കാർ പ്രകടിപ്പിച്ച മെല്ലെപ്പോക്കു നയം ജനങ്ങൾക്കിടയിൽ വലിയ അവമതിപ്പ് ഉണ്ടാക്കിയിട്ടുണ്ട്. വീണ്ടും ജനങ്ങളെ ബുദ്ധിമുട്ടിക്കാനാണ് നീക്കമെങ്കിൽ ശക്തമായ പ്രതിഷേധം ഉയരുമെന്നും എംപി പറഞ്ഞു. ജനങ്ങളുടെ കണ്ണില്‍പ്പൊടിയിടാൻ: ഡിസിസി രാജാക്കാട്: വന്യജീവി സംരക്ഷണം (കേരള ഭേദഗതി) ബില്‍ തദ്ദേശസ്വയംഭരണ തെരഞ്ഞെടുപ്പ് മുന്നില്‍ക്കണ്ട് ജനങ്ങളുടെ കണ്ണില്‍ പൊടിയിടാനുള്ള നീക്കം മാത്രമാണെന്ന് ഡിസിസി വൈസ് പ്രസിഡന്‍റ്് കെ.എസ്. അരുണ്‍ ആരോപിച്ചു. രാഷ്‌ട്രപതിയുടെ അംഗീകാരത്തോടെ ബില്‍ നിയമമാക്കാമെന്ന് സര്‍ക്കാര്‍ പ്രതീക്ഷിക്കുന്നുണ്ടെങ്കിലും പാര്‍ലമെന്‍റിന്‍റെ അധികാരത്തെ ചോദ്യംചെയ്യാന്‍ രാഷ്‌ട്രപതി തയാറാകില്ല. മാത്രമല്ല രാഷ്‌ട്രപതി അംഗീകാരം നല്‍കിയാലും പാര്‍ലമെന്‍റില്‍ പുതിയൊരു ഭേദഗതി കൊണ്ടുവന്ന് ഈ നീക്കത്തെ തടുക്കാന്‍ കേന്ദ്ര സര്‍ക്കാരിന് ഭരണഘടന അവസരം നല്‍കുന്നുണ്ട്. മനുഷ്യ-വന്യജീവി സംഘര്‍ഷ ലഘൂകരണത്തിന് സംസ്ഥാന സര്‍ക്കാരിന്‍റെ അധികാരപരിധിയില്‍ വരുന്ന കാര്യങ്ങള്‍ അടിയന്തരമായി ചെയ്തുതീര്‍ക്കാനാണ് സർക്കാർ ആത്മാര്‍ഥത കാട്ടേണ്ടത്. കേന്ദ്ര ലിസ്റ്റിലുള്ള നിയമത്തില്‍ ഭേദഗതി വരുത്താനോ വെള്ളം ചേര്‍ക്കാനോ സംസ്ഥാന സര്‍ക്കാരിന് അധികാരമില്ല. വനം, വന്യമൃഗങ്ങള്‍, പക്ഷികള്‍ എന്നിവയുടെ സംരക്ഷണം ഭരണഘടനയുടെ ഏഴാം ഷെഡ്യൂളില്‍ ഉള്‍പ്പെടുന്ന കണ്‍കറന്‍റ്് ലിസ്റ്റിലെ 17ബിയില്‍ വരുന്ന കാര്യങ്ങളാണെങ്കിലും വന്യജീവി സംരക്ഷണ ആക്ട് ഭേദഗതിചെയ്യാൻ സംസ്ഥാനത്തിന് അധികാരമില്ല. ഈ വിഷയത്തില്‍ സംസ്ഥാനത്തിനും കേന്ദ്രത്തിനും നിയമരൂപീകരണം സാധ്യമാണെങ്കിലും അവ തമ്മില്‍ നയവ്യത്യാസം ഉണ്ടായാല്‍ ഭരണഘടനയുടെ ആര്‍ട്ടിക്കിള്‍ 254 പ്രകാരം സംസ്ഥാന നിയമത്തിന് മുകളില്‍ കേന്ദ്ര നിയമത്തിനാകും സാധുത. കാട്ടുപന്നിയെ ക്ഷുദ്രജീവിയായി പ്രഖ്യാപിക്കാനും നാടന്‍ കുരങ്ങുകളെ നിയന്ത്രിക്കാനും ഉള്‍പ്പെടെ സംസ്ഥാനം നല്‍കിയ നിവേദനങ്ങള്‍ കേന്ദ്രം ഇതുവരെ പരിഗണിക്കുകപോലും ചെയ്തിട്ടില്ല. സര്‍ക്കാരിന് സാധ്യമായ കാര്യങ്ങള്‍ ചെയ്യാതെ വോട്ട് ലക്ഷ്യമാക്കിയുള്ള പ്രഖ്യാപനങ്ങളും നിയമസാധുതയില്ലാത്ത വാഗ്ദാനങ്ങളും നല്‍കി ഇടത് സര്‍ക്കാര്‍ മലയോരജനതയെ വഞ്ചിക്കുകയാണെന്ന് അരുണ്‍ ആരോപിച്ചു. ഭേദഗതിയുടെ കോപ്പി കത്തിച്ച് പ്രതിഷേധിക്കും കട്ടപ്പന: ഭൂപതിവ് ചട്ട ഭേദഗതിയുടെ മറവിൽ ജില്ലയിലെ ഭൂപ്രശ്നങ്ങൾ സങ്കീർണമാക്കിയ ഇടതുസർക്കാരിന്‍റെ കർഷക വഞ്ചനക്കെതിരേ ജില്ലാ കോണ്‍ഗ്രസ് നടത്തിവരുന്ന സമരത്തിന്‍റെ ഭാഗമായി കോണ്‍ഗ്രസ് കട്ടപ്പന ബ്ലോക്ക് കമ്മിറ്റിക്ക് കീഴിലുള്ള മണ്ഡലങ്ങളിൽ വാർഡ് കോണ്‍ഗ്രസ് കമ്മിറ്റികളുടെ നേതൃത്വത്തിൽ ചട്ട ഭേദഗതിയുടെ പകർപ്പ് കാത്തിച്ച് പ്രതിഷേധിക്കുമെന്ന് കോണ്‍ഗ്രസ് കട്ടപ്പന ബ്ലോക്ക് കമ്മിറ്റി പ്രസിഡന്‍റ് തോമസ് മൈക്കിൾ അറിയിച്ചു. പതിറ്റാണ്ടുകളായി ആളുകൾ താമസിക്കുന്ന വീടുകളും ഉപയോഗിക്കുന്ന കടമുറികളും അപേക്ഷഫീസും പിഴത്തുകയും ഈടാക്കി ക്രമവത്കരിക്കുമെന്ന സർക്കാർ പ്രഖ്യാപനം ജില്ലയിലെ ജനങ്ങളെ കബളിപ്പിക്കലാണ്. നിർമാണ നിരോധനം, പട്ടയം ഉൾപ്പെടെയുള്ള വിഷയങ്ങളൊന്നും പരിഹരിക്കാൻ ഒരു നടപടിയും ഇല്ലാതെയാണ് ആറ് പതിറ്റാണ്ടായി ജില്ലയിൽ നിലനിൽക്കുന്ന ഭൂപ്രശ്നങ്ങൾ പരിഹരിച്ചുവെന്ന അവകാശവാദവുമായി ജില്ലയിൽനിന്നുള്ള മന്ത്രി ഉൾപ്പെടെയുള്ള ഇടതുനേതാക്കൾ രംഗത്തിറങ്ങിയിരിക്കുന്നത്. കട്ടപ്പന, കാഞ്ചിയാർ, കാമാക്ഷി, കൊന്നത്തടി, വാത്തിക്കുടി മണ്ഡലങ്ങളിലെ 105 വാർഡുകളിലും വൈകുന്നേരം ആറിന് ചട്ടഭേദഗതി കത്തിച്ച് പ്രതിഷേധിക്കുമെന്നും തോമസ് മൈക്കിൾ അറിയിച്ചു.

ആനക്കുളം റോഡിന്‍റെ സാധ്യത പരിശോധിക്കും: എംഎല്‍എ

അടിമാലി: ഇടമലക്കുടി ഗ്രാമപഞ്ചായത്തിന്‍റെ ഭാഗമായ കൂടല്ലാര്‍കുടിയില്‍നിന്ന് എളുപ്പത്തില്‍ പുറംലോകത്തേക്കുള്ള യാത്രയ്ക്ക് സഹായിക്കുന്ന മാങ്കുളം ആനക്കുളത്തേക്കുള്ള റോഡിന്‍റെ നിര്‍മാണ സാധ്യത പരിശോധിക്കുമെന്ന് അഡ്വ. എ. രാജ എംഎല്‍എ അറിയിച്ചു. സംസ്ഥാനത്തെ ഏക ഗോത്രവര്‍ഗ പഞ്ചായത്തായ ഇടമലക്കുടിയിലേക്ക് പെട്ടിമുടിയില്‍ നിന്നു റോഡിന്‍റെ നവീകരണം നടക്കുന്നുണ്ട്. ഇതിനൊപ്പമാണിപ്പോള്‍ കൂടല്ലാര്‍കുടിയില്‍നിന്നുള്ള റോഡിന്‍റെ നിര്‍മാണം കൂടി പരിശോധിക്കുന്നത്. യാത്രാ ക്ലേശം രൂക്ഷമായ കൂടല്ലാര്‍ കുടിയില്‍നിന്നു നിലവില്‍ ആനക്കുളത്തേക്ക് കാല്‍നട മാത്രം സാധ്യമാകുന്ന ദുര്‍ഘട പാതയാണുള്ളത്. ഇതു വഴി പനി ബാധിതരെയടക്കം കഴിഞ്ഞ ദിവസം പ്രദേശവാസികള്‍ തുണിമഞ്ചല്‍ കെട്ടി ചുമന്ന് പുറംലോകത്തെത്തിക്കേണ്ടി വന്നിരുന്നു. ഈ സാഹചര്യത്തില്‍ കൂടിയാണ് എംഎല്‍എയുടെ പ്രതികരണം ഉണ്ടായിട്ടുള്ളത്. ഏതാനും കിലോമീറ്റര്‍ ദൂരം മാത്രമുള്ള ഈ പാത യാത്രാ യോഗ്യമായാല്‍ ഇടമലക്കുടിയുടെ വികസനത്തിന് കരുത്താകുമെന്നാണ് പ്രതീക്ഷ.

കുരുമുളക് കൃഷിയിൽ "പോലീസ് മുറ’

ബെന്നി മുക്കുങ്കൽ നെടുങ്കണ്ടം: കാര്‍ഷികരംഗത്ത് പുതുമാതൃകകള്‍ സൃഷ്ടിക്കുകയാണ് നെടുങ്കണ്ടം കല്ലാര്‍ സ്വദേശിയായ രാധാകൃഷ്ണന്‍ എന്ന പോലീസ് ഉദ്യോഗസ്ഥന്‍. കുരുമുളക് ചെടിയുടെ താങ്ങുമരങ്ങള്‍ക്ക് പകരം പിവിസി പൈപ്പിലാണ് ഇദ്ദേഹത്തിന്‍റെ കൃഷി. കട്ടപ്പന ട്രാഫിക് പോലീസിലെ അഡീഷണല്‍ എസ്ഐയായ രാധകൃഷ്ണന്‍ മണ്ണ് അറിയുന്ന ഒരു കര്‍ഷകന്‍ കൂടിയാണ്. ഔദ്യോഗിക ജീവിതത്തിന്‍റെ തിരക്കുകള്‍ക്കിടയില്‍ ഒഴിവ് കിട്ടുമ്പോള്‍ ഇദ്ദേഹം കൃഷിയിടത്തിലേക്ക് എത്തും. കാര്‍ഷിക രംഗത്തെ നൂതന പരീക്ഷണങ്ങളുടെ വേദിയാണ് ഇദ്ദേഹത്തിന്‍റെ കൃഷിയിടം. 40 സെന്‍റ് ഭൂമിയിലാണ് പിവിസി പൈപ്പിൽ ഇദ്ദേഹം കുരുമുളക് കൃഷി ചെയ്യുന്നത്. പരമാവധി എട്ട് അടി ഉയര്‍ത്തില്‍ മുറിച്ച പൈപ്പുകള്‍ ഒന്നര അടി മണ്ണില്‍ താഴ്ത്തി അഞ്ചടി അകലത്തിലാണ് നാട്ടിയിരിക്കുന്നത്. ആകെ 400 ഓളം ചെടികള്‍ ഇത്തരത്തില്‍ പരിപാലിക്കുന്നുണ്ട്. തൊഴിലാളികള്‍ ഇല്ലാതെ കൃഷി പരിപാലനവും വിളവെടുപ്പും സ്വയം ചെയ്യാം എന്നതാണ് ഈ കൃഷിരീതിയുടെ പ്രധാന പ്രത്യേകത. കുരുമുളക് കൂടാതെ കാപ്പിയും ഏലവും വിവിധ ഇനം ഫല വൃക്ഷങ്ങളും മീന്‍ വളര്‍ത്തലും എല്ലാം അടങ്ങിയ സമ്മിശ്ര കൃഷി രീതിയാണ് രാധാകൃഷ്ണന്‍ പിന്തുടരുന്നത്. രാധാകൃഷ്ണന്‍റെ ഭാര്യ ശ്രീകലയും പോലീസ് ഉദ്യോഗസ്ഥയാണ്. വണ്ടന്‍മേട് സ്റ്റേഷനിലെ എഎസ്ഐ ആണ് ശ്രീകല. ഒഴിവുസമയങ്ങള്‍ ഈ പോലീസ് ദമ്പതികള്‍ ചിലവിടുന്നത് കൃഷിയിടത്തിലാണ്. നൂതന കൃഷിരീതികള്‍ പരീക്ഷിക്കുന്നതിനൊപ്പം അറിവുകള്‍ കര്‍ഷകര്‍ക്ക് പകര്‍ന്നുനല്‍കാനും ഔദ്യോഗിക ജീവിതത്തിന്‍റെ തിരക്കുകള്‍ക്കിടയില്‍ ഈ പോലീസുകാരന്‍ സമയം കണ്ടെത്തുന്നുണ്ട്.

കുട്ടികർഷകന്‍റെ കോവയ്ക്ക സ്കൂളിനു രുചി കൂട്ടി

നെടുങ്കണ്ടം: വീട്ടിൽ കൃഷി ചെയ്ത് ഉത്പാദിപ്പിച്ച കോവയ്ക്ക സ്കൂളിനെത്തിച്ചുനൽകി ജെറോം പോൾ എന്ന മൂന്നാം ക്ലാസുകാരൻ കുട്ടികർഷകൻ. കമ്പംമെട്ട് മഡോണ എൽപിഎസിലെ വിദ്യാർഥിയാണ് സ്കൂളിന്‍റെ രുചിക്കൂട്ടിലേക്ക് സ്വന്തം കോവയ്ക്ക എത്തിച്ചത്. ജെറോമിന്‍റെ കൈയൊപ്പു വീണ പച്ചക്കറികൾ മുന്പും ജറോം സ്കൂളിൽ എത്തിച്ചുനല്കിയിട്ടുണ്ട്. വീട്ടിൽ ജെറോമിന് സ്വന്തമായി അടുക്കളത്തോട്ടമുണ്ട്. അവിടെ ഉത്്പാദിപ്പിക്കുന്ന പച്ചക്കറികളാണ് സ്കൂളിലെത്തിക്കുന്നത്. കഴിഞ്ഞ വർഷം ഈ കുട്ടി തന്നോളാം വലിപ്പമുള്ള ഒരു മത്തങ്ങ സ്വന്തമായി കൃഷി ചെയ്ത് ഉത്പാദിപ്പിച്ച് സ്കൂളിന് സമ്മാനിച്ചതാണ്. കരുണാപുരം ആയിലൂക്കുന്നേൽ സാജു - സുമ ദമ്പതികളുടെ ഇളയ മകനാണ് ഈ കുട്ടികർഷകൻ.

പ്രതിസന്ധിയിൽ തളർന്ന് ജില്ലയിലെ ക്ഷീരകർഷകർ

തൊടുപുഴ: ക്ഷീര ജില്ലയായ ഇടുക്കിയിൽ ക്ഷീരകർഷകർ കടുത്ത ദുരിതത്തിൽ. ക്ഷീരകർഷകരോടുള്ള അധികൃതരുടെ അവഗണന തുടരുന്നതിലും പുലർച്ചെ മുതൽ അന്തിയോളം ജോലിയെടുത്താലും കാര്യമായ വരുമാനം നേടാൻ കഴിയാത്ത സാഹചര്യവും കണക്കിലെടുത്ത് ഒട്ടേറെ പേർ ഈ മേഖലയിൽനിന്നു പിൻവാങ്ങി. ഇതോടെ ജില്ലയിൽനിന്നുള്ള പാൽ ഉത്പാദനത്തിലും വലിയ തോതിൽ കുറവുണ്ടായി. നല്ല രീതിയിൽ പ്രവർത്തിച്ചിരുന്ന പല ക്ഷീര സംഘങ്ങളും പ്രതിസന്ധിയെത്തുടർന്ന് അടച്ചുപൂട്ടി. ഒട്ടേറെ സംഘങ്ങൾ അടച്ചുപൂട്ടൽ ഭീഷണിയിലാണെന്നും ഭാരവാഹികൾ പറയുന്നു. അടിയന്തരമായി പാൽവില വർധിപ്പിച്ചില്ലെങ്കിൽ ക്ഷീരമേഖലയിൽ പിടിച്ചുനിൽക്കാൻ കഴിയില്ലെന്നും കർഷകർ ചൂണ്ടിക്കാട്ടി. കാർഷിക ജില്ലയായ ഇടുക്കിയിൽ കൃഷിയോടൊപ്പമാണ് പല കർഷകരും അധിക വരുമാനമെന്ന നിലയിൽ കന്നുകാലി വളർത്തൽ നടത്തുന്നത്. ക്ഷീരകർഷകരുടെ ഒരു ദിവസം കടന്നുപോകുന്നത് പുലർച്ചെ മുതൽ രാത്രി വൈകുവോളമുള്ള അധ്വാനത്തിലൂടെയാണ്. എന്നാൽ ഇത്തരത്തിൽ രാപകലോളം കഠിനാധ്വാനം നടത്തിയിട്ടും ക്ഷീരമേഖലയിൽനിന്നു ലഭിക്കുന്ന വരുമാനം ഉപയോഗിച്ച് പശുപരിപാലനവും ജീവിതവും മുന്നോട്ടു കൊണ്ടുപോകാൻ കഴിയില്ലെന്നാണ് കർഷകരുടെ അഭിപ്രായം. ജില്ലയിൽ 190 ക്ഷീര സംഘങ്ങളാണ് രജിസ്റ്റർ ചെയ്ത് പ്രവർത്തിക്കുന്നത്. നേരത്തേ 10000നുമേൽ കർഷകർ ഈ സംഘങ്ങളിൽ പാൽ അളന്നിരുന്നു. എന്നാൽ ഇവരിൽനിന്നു നല്ലൊരു വിഭാഗം കർഷകരും മേഖല ഉപേക്ഷിച്ച് മറ്റു മേച്ചിൽപ്പുറങ്ങൾ തേടിപ്പോയി. പാൽ വില കൂട്ടണം ഉത്പാദനച്ചെലവിന് ആനുപാതികമായി പാലിന് വില ലഭിക്കുന്നില്ലെന്നതാണ് ഇവരുടെ പ്രധാന പരാതി. കൂടുതൽ കർഷകർ പാൽ വിറ്റഴിക്കുന്നത് പ്രാദേശിക ക്ഷീരസംഘങ്ങൾ വഴിയാണ്. പാലിന്‍റെ കൊഴുപ്പും കൊഴുപ്പിതര ഘടകങ്ങളുടെയും അടിസ്ഥാനത്തിലാണ് വില നിശ്ചയിക്കുന്നത്. ഉയർന്ന അളവിൽ ഉത്പാദനശേഷിയുള്ള എച്ച്എഫ് വിഭാഗം പോലെയുള്ള പശുക്കളുടെ പാലിൽ പൊതുവെ കൊഴുപ്പിന്‍റെ അളവ് കുറവായിരിക്കും. കുറഞ്ഞ അളവിൽ ഉത്പാദനമുള്ള ജേഴ്സി പോലെയുള്ള പശുക്കളുടെ പാലിൽ കൊഴുപ്പ് കൂടുതലായിരിക്കും. നിലവിൽ ക്ഷീരസംഘങ്ങളിൽ അളക്കുന്ന ഒരു ലിറ്റർ പാലിന് 43-45 നിരക്കിലാണ് വില ലഭിക്കുന്നത്. എന്നാൽ ഒരു ലിറ്റർ പാൽ ഉത്പാദിപ്പിക്കണമെങ്കിൽ കർഷകന് 48.50 രൂപ ചെലവു വരുമെന്ന് കർഷകർ പറയുന്നു. അതിനാൽ അടിയന്തരമായി പാൽ വില വർധിപ്പിക്കണമെന്നാണ് കർഷകരുടെ ആവശ്യം. ഈ ആവശ്യവുമായി ക്ഷീരകർഷകർ അടുത്ത ദിവസം പാൽ കമഴ്ത്തൽ സമരം നടത്തുന്നുണ്ട്. കാലിത്തീറ്റ വില കുതിച്ചുയർന്നു കാലിത്തീറ്റ വില ഉയർന്നതാണ് കർഷകരെ പ്രധാനമായും പ്രതിസന്ധിയിലാക്കിയത്. 50 കിലോ ചാക്ക് കാലിത്തീറ്റയ്ക്ക് 1400 രൂപയ്ക്കു മുകളിലാണ് വില. പച്ചപ്പുല്ല് ലഭ്യമല്ലാത്ത സാഹചര്യത്തിൽ കാലിത്തീറ്റയാണ് പശുക്കൾക്ക് പ്രധാനമായും നൽകുന്നത്. ഇതിനു പുറമേ തവിട്, പിണ്ണാക്ക്, വൈക്കോൽ എന്നിവയും നൽകണം. ഇവയുടെയും വില ക്രമാതീതമായി വർധിച്ചു. ഇതിനു പുറമേ പശുക്കൾക്ക് രോഗം ഉണ്ടായാൽ ചികിൽസയ്ക്കായും പണം മുടക്കണം. പതിവായി പശുക്കൾക്ക് ഉണ്ടാകുന്ന രോഗമാണ് അകിടു വീക്കം. ഇതിനു ചികിത്സ നൽകുന്നതിനു പുറമേ ഏതാനും ദിവസത്തേക്ക് പാൽ കൊടുക്കാനുമാകില്ല. ഉത്പാദനത്തിൽ കുറവ് ഓരോ വർഷവും ജില്ലയിൽ പാൽ ഉത്പാദനത്തിൽ കുറവുവരുന്നതായാണ് കണക്കുകൾ സൂചിപ്പിക്കുന്നത്. ക്ഷീരമേഖലയിൽനിന്നു കർഷകർ കൊഴിഞ്ഞുപോകുന്നതാണ് പാൽ ഉത്പാദനത്തിൽ കുറവുവരാൻ കാരണമെന്നാണ് വിലയിരുത്തൽ. ക്ഷീരസംഘങ്ങളിൽ കർഷകർ അളന്ന കണക്കനുസരിച്ച് 2021 മുതൽ 2025 വരെയുള്ള വർഷങ്ങളിൽ ഉത്പാദനം വലിയ തോതിൽ കുറഞ്ഞതായാണ് വ്യക്തമാകുന്നത്. 2021-22 വർഷം ക്ഷീരസംഘങ്ങളിൽ കർഷകർ അളന്നത് 22,33,720 ലിറ്റർ പാലാണ്. എന്നാൽ 2022-23 ൽ എത്തിയപ്പോൾ 20,61,393 ലിറ്ററായി കുറഞ്ഞു. 2023-24 ൽ 18,86,273 ലിറ്ററായിരുന്നു ഉത്പാദനം. 2024-25 വർഷം 17,81,660 ലിറ്റർ പാലാണ് ക്ഷീര സംഘങ്ങൾ വഴി അളന്നത്. ഒരു വർഷത്തിനിടെ 1,04,613 ലിറ്റർ പാലിന്‍റെ കുറവാണ് രേഖപ്പെടുത്തിയത്. ക്ഷീര സംഘങ്ങൾക്കു പുറമേ പ്രാദേശിക വിപണികളിലും സ്വകാര്യ ഏജൻസികൾക്കും കർഷകർ പാൽ വിൽപ്പന നടത്തുന്നുണ്ട്. ഇതിന്‍റെ കണക്കുകൾ ലഭ്യമല്ലെങ്കിലും പ്രാദേശിക വിൽപ്പനയിലും കുറവു വന്നതായി കർഷകർ വ്യക്തമാക്കി. കന്നുകാലികൾ കുറഞ്ഞു ജില്ലയിൽ ക്ഷീരമേഖലയിൽനിന്നു കർഷകർ പിൻമാറുന്നതു കൂടാതെ കന്നുകാലികളുടെ എണ്ണത്തിലും കുറവുവന്നതായി അധികൃതർ പറഞ്ഞു. 2020-ൽ നടന്ന മൃഗങ്ങളുടെ കണക്കെടുപ്പിൽ 55,318 ആയിരുന്നു കന്നുകാലികളുടെ എണ്ണം. ഈ വർഷമാണ് വീണ്ടും കണക്കെടുപ്പു നടത്തിയത.് ഇതിന്‍റെ കണക്കുകൾ മൃഗസംരക്ഷണ വകുപ്പ് പുറത്തുവിട്ടില്ലെങ്കിലും കന്നുകാലികളുടെ എണ്ണത്തിൽ വലിയ തോതിൽ കുറവു വന്നിട്ടുണ്ടെന്നാണ് സൂചന. നേരത്തേ തമിഴ്നാട്ടിൽനിന്നു മറ്റും ഉത്പാദന ശേഷി കൂടിയ കന്നുകാലികളെ കർഷകർ ജില്ലയിലേക്ക് വാങ്ങിക്കൊണ്ടു വരുന്ന പതിവുണ്ടായിരുന്നു. ഇപ്പോൾ അന്യസംസ്ഥാനങ്ങളിൽനിന്നു വളർത്തുപശുക്കൾ കാര്യമായി കടന്നുവരുന്നില്ല. പലരും പശുക്കളെ വിറ്റാണ് മറ്റ് തൊഴിൽ മേഖലകളിലേയ്ക്ക് കടന്നത്. പല വീടുകളോടു ചേർന്നും പശുക്കളില്ലാതെ കാലിയായ തൊഴുത്തുകൾ കാണാമെന്നതാണ് അവസ്ഥ.

ഉന്നതികളിൽ സോളാർ വിളക്കുകൾ

മറയൂർ: ഗ്രീൻ ഇന്ത്യാ മിഷന്‍റെ സഹായത്തോടെ മൂന്നാർ വന്യജീവി ഡിവിഷനിലെ ആനമുടി വനവികസന ഏജൻസിയുടെ നേതൃത്വത്തിൽ ചിന്നാർ വന്യജീവി സങ്കേതത്തിലെ 11 ഉന്നതികളിൽ സോളാർ വിളക്കുകൾ സ്ഥാപിക്കുന്ന പ്രവൃത്തി ആരംഭിച്ചു. ആറു ലക്ഷത്തോളം രൂപ ഇതിനായി ചെലവഴിക്കും. ഇരവികുളം, ഷോല ദേശീയോദ്യാനങ്ങളിലെ എല്ലാ ഉന്നതികളിലും ഇത്തരം വിളക്കുകൾ സ്ഥാപിക്കുമെന്ന് മൂന്നാർ വൈൽഡ് ലൈഫ് വാർഡൻ കെ.വി. ഹരികൃഷ്ണൻ അറിയിച്ചു. പദ്ധതി പ്രദേശത്തെ മനുഷ്യ-വന്യജീവി സംഘർഷം കുറയ്ക്കുന്നതിനും സുസ്ഥിര വികസനത്തിനും വഴിയൊരുക്കുമെന്ന് ചിന്നാർ അസി. വൈൽഡ് ലൈഫ് വാർഡൻ ജി. അജികുമാർ പറഞ്ഞു.

ഭൂപതിവു ഭേദഗതി: കട്ടപ്പനയിൽ കണ്‍വൻഷൻ

കട്ടപ്പന: ഭൂ പതിവു ഭേദഗതി നിയമവുമായി ബന്ധപ്പെട്ട് രൂപീകരിച്ച ചട്ടത്തിലെ അപാകതകൾ പരിഹരിക്കണമെന്നാവാശ്യപ്പെട്ട് വ്യാപാരി വ്യവസായി ഏകോപന സമിതി നടത്തുന്ന സമരത്തിന്‍റെ ഭാഗമായി കട്ടപ്പന മർച്ചന്‍റ്സ് അസോസിയേഷൻ കട്ടപ്പനയിൽ സമര പ്രഖ്യാപന കണ്‍വൻഷൻ നടത്തി. ഹിൽ ടൗണ്‍ ഓഡിറ്റോറിയത്തിൽ നടന്ന കണ്‍വൻഷൻ ഏകോപന സമിതി ജില്ലാ പ്രസിഡന്‍റ് സണ്ണി പൈന്പിള്ളിൽ ഉദ്ഘാടനം ചെയ്തു. അസോസിയേഷൻ പ്രസിഡന്‍റ് സാജൻ ജോർജ്, ജില്ലാ വർക്കിംഗ് പ്രസിഡന്‍റ് കെ.ആർ. വിനോദ്, ജില്ലാ വൈസ് പ്രസിഡന്‍റ് പി.എം. ബേബി, എസ്എൻഡിപി യൂണിയൻ പ്രസിഡന്‍റ് ബിജു മാധവൻ, ഹൈറേഞ്ച് എൻഎസ്എസ് യൂണിയൻ ചെയർമാൻ കെ.എസ്. അനിൽകുമാർ, ഫാ. ബിജു ആഡ്രൂസ്, ഫാ. ജിതിൻ വർഗീസ്, ഫാ. ജോസ് മലയാറ്റിൽ, അഡ്വ. ജോമോൻ കെ. ചാക്കോ, അസോസിയേഷൻ ജനറൽ സെക്രട്ടറി പി.കെ. ജോഷി, വർക്കിംഗ് പ്രസിഡന്‍റ് സിജോമോൻ ജോസ് തുടങ്ങിയവർ പ്രസംഗിച്ചു.

വൈദ്യുതിപോസ്റ്റിന് അനുമതി നൽകിയില്ല; ഇരുട്ടിലായി ഒരു കുടുംബം

വണ്ടിപ്പെരിയാർ: വൈദ്യുതിപോസ്റ്റ് സ്ഥാപിക്കാൻ അനുമതി നിഷേധിച്ചതിനെത്തുടർന്ന് രണ്ടര മാസമായി വൈദ്യുതി ഇല്ലാതെ ഇരുട്ടിൽ കഴിയുകയാണ് വണ്ടിപ്പെരിയാർ ഇഞ്ചിക്കാട് എസ്റ്റേറ്റിലെ വിജയനും കുടുംബവും. പോബ്സ് എസ്റ്റേറ്റ് മാനേജ്മെന്‍റാണ് വൈദ്യുതി പോസ്റ്റ് സ്ഥാപിക്കാൻ തടസം നിൽക്കുന്നത്. 48 വർഷമായി ഇഞ്ചിക്കാട് മാനേജേഴ്സ് ക്ലബ്ബിലെ വാച്ച്മാനായി ജോലിചെയ്യുന്ന വിജയന്‍റെ വീട്ടിലേക്ക് വൈദ്യുതി എത്തിയിരുന്നത് ക്ലബിലേക്ക് വൈദ്യുതി എത്തിച്ചിരുന്ന തടികൊണ്ടുള്ള വൈദ്യുതി പോസ്റ്റിൽനിന്നായിരുന്നു. തടികൊണ്ടുള്ള ഇലക‌്ട്രിക് പോസ്റ്റ് ജീർണിച്ചതിനാൽ ഏതാനും മാസം മുൻപ് പോസ്റ്റ് ഒടിഞ്ഞുപോയി. ഇതോടെയാണ് വിജയന്‍റെ വീട്ടിലേക്കുള്ള വൈദ്യുതിയും നിലച്ചത്. പുതിയ വൈദ്യുതി പോസ്റ്റ് സ്ഥാപിക്കാൻ വിജയൻ ശ്രമിച്ചപ്പോഴാണ് പോപ്സ് മാനേജ്മെന്‍റ് വൈദ്യുതി പോസ്റ്റു സ്ഥാപിക്കുന്നതിനെതിരേ രംഗത്തെത്തിയത്. വിജയന്‍റെ മകൻ ഓട്ടോറിക്ഷാ തൊഴിലാളി മോഹനനും അഞ്ചാം ക്ലാസ് വിദ്യാർഥിനിയായ ഹാഷ്നിയും ഒന്നാം ക്ലാസിൽ പഠിക്കുന്ന ഹർഷിനിയും വൈദ്യുതിയില്ലാതെ മെഴുകുതിരി വെളിച്ചത്തിലാണ് കഴിയുന്നത്.

"ഉടുമ്പന്‍ചോല പഞ്ചായത്തിൽ അരളിത്തൈയിലും അഴിമതി'

നെടുങ്കണ്ടം: ഉടുമ്പന്‍ചോല പഞ്ചായത്ത് ആവിഷ്‌കരിച്ച സൗന്ദര്യവത്്കരണ പദ്ധതിയായ ഹരിതചോലയുടെ താളംതെറ്റി. പദ്ധതിയുടെ പേരില്‍ നടന്നത് ലക്ഷങ്ങളുടെ അഴിമതിയാണെന്ന് ആരോപണം. 2019 - 20 ലാണ് ഉടുമ്പന്‍ചോലയില്‍ ഹരിതചോല എന്ന പേരില്‍ പദ്ധതി ആവിഷ്‌കരിച്ചത്. പഞ്ചായത്തിലൂടെ കുമളി - മൂന്നാര്‍ റോഡ് കടന്നുപോകുന്ന ഭാഗങ്ങളില്‍ റോഡിന് ഇരുവശത്തും അരളിച്ചെടികള്‍ നട്ട് പരിപാലിക്കുക, വിവിധ ഇടങ്ങളില്‍ വേസ്റ്റ് ബിന്നുകള്‍, തുമ്പൂര്‍മൂഴി മോഡല്‍ മാലിന്യ സംസ്‌കരണം തുടങ്ങിയ വിവിധ പദ്ധതികളാണ് പ്രഖ്യാപിച്ചത്. 20 ലക്ഷം രൂപയാണ് പദ്ധതിക്കായി വകയിരുത്തിയത്. 10,000ത്തിലധികം അരളിത്തൈകള്‍ വാങ്ങി റോഡിന് ഇരുവശവും നടുകയും ചെയ്തു. എന്നാല്‍, കൃത്യമായ സംരക്ഷണമില്ലാതെ എല്ലാം നശിച്ചു. ലക്ഷങ്ങള്‍ മുടക്കിയ പദ്ധതിയില്‍ അഴിമതി നടന്നിട്ടും അന്വേഷണം നടക്കുന്നില്ലെന്ന് കോണ്‍ഗ്രസ് പഞ്ചായത്ത് മെംബറും യുഡിഎഫ് കണ്‍വീനറുമായി ബെന്നി തുണ്ടത്തില്‍ ആരോപിച്ചു. ചെടികള്‍ക്ക് വെള്ളം നനയ്ക്കുന്നതിനും ചകിരിച്ചോറിനുമൊക്കെയായി പണം വകയിരുത്തിയിരുന്നു. പണം നഷ്ടമായതല്ലാതെ സൗന്ദര്യം ഉണ്ടായില്ല. ഏയ്ഞ്ചല്‍ ട്രംപറ്റ് പോലുള്ള വിവിധയിനം ചെടികള്‍ മേഖലയിലെ കര്‍ഷകര്‍ വേലിയായി പരിപാലിക്കാറുണ്ട്. ഇവ നട്ടുപിടിപ്പിച്ച് പാതയോരം മനോഹരമാക്കാം എന്നിരിക്കെയാണ് ഇത്തരം പദ്ധതികളിലൂടെ ലക്ഷങ്ങള്‍ നഷ്ടമാക്കിയതെന്നും ബെന്നി ആരോപിച്ചു.

വിശുദ്ധ പ്രഖ്യാപന ചടങ്ങിൽ പാപ്പയ്ക്കൊപ്പം സഹകാർമികനായി മലയാളി വൈദികൻ എഫ്രേം അച്ചൻ

ടി.പി. സന്തോഷ്കുമാർ തൊടുപുഴ: വിശുദ്ധ കാർലോ അക്കുത്തിസിന്‍റെ ജീവ ചരിത്രകാരനായ മലയാളി വൈദികൻ ഫാ. എഫ്രേം കുന്നപ്പള്ളിക്ക് വത്തിക്കാനിലെ വിശുദ്ധ പ്രഖ്യാപനച്ചടങ്ങിൽ ലെയോ പതിനാലാമൻ മാർപ്പാപ്പക്കൊപ്പം സഹകാർമികനാകാൻ കഴിഞ്ഞതിന്‍റെ ആത്മ നിർവൃതി വാക്കുകൾക്കതീതം. കഴിഞ്ഞ ഏഴിനാണ് കാർലോ അക്കുത്തിസിനെയും പിയർ ജോർജോ ഫ്രസാത്തിയെയും മാർപ്പാപ്പ വിശുദ്ധരായി പ്രഖ്യാപിച്ചത്. കാർലോ അക്കുത്തിസിന്‍റെ അമ്മയും പിയർ ജിയോർജിയോ ഫ്രസാത്തിയുടെ കുടുംബവും നൽകിയ പ്രത്യേക ക്ഷണം സ്വീകരിച്ചായിരുന്നു വത്തിക്കാനിലെത്തിയത്. 2007-ൽ കാർലോയുടെ അമ്മയുമായി പരിചയപ്പെട്ട ഫാ. എഫ്രേം 12 വയസുള്ളപ്പോഴാണ് ജീവ ചരിത്ര രചന നടത്തിയത്. 2011-ലാണ് ഇംഗ്ലീഷിലുള്ള ഈ ഗ്രന്ഥം പൂർത്തിയാക്കിയത്. സ്കൈപ്പ് മുഖാന്തരം കാർലോയുടെ മാതാപിതാക്കളുമായി സംഭാഷണം നടത്തിയാണ് ഗ്രന്ഥം തയാറാക്കിയത്. ഈ ഗ്രന്ഥമാണ് കാർലോയുടെ നാമകരണ നടപടികൾക്ക് വിത്തു പാകിയത്. 2013ൽ കാർലോ ദൈവദാസനായപ്പോൾ, ഏഷ്യൻ അസോസിയേഷൻ ഓഫ് കാർലോ അക്കുത്തിസിന്‍റെ നേതൃത്വവും ഫാ.എഫ്രേമിനായിരുന്നു. ബ്രസീൽ, ഫിലിപ്പീൻസ്, അർജന്‍റീന, ചൈന, ഇന്ത്യ തുടങ്ങി വിവിധ രാജ്യങ്ങളിൽ ഇദ്ദേഹം കാർലോയുടെ സന്ദേശം പ്രചരിപ്പിച്ചു. ഇടുക്കി ജില്ലയിൽ ഉപ്പുതറ സ്വദേശികളായ റിട്ട.എസ്ഐ ജോയിസിന്‍റെയും പരേതയായ ജെസിയുടെയും മകനാണ് എഫ്രേം അച്ചൻ. കാർലോ വാഴ്ത്തപ്പെട്ടവരുടെ നിരയിലേക്ക് ഉയർത്തപ്പെട്ടപ്പോൾ അദ്ദേഹത്തിന്‍റെ ടീ ഷർട്ടും അഴുകാത്ത ഹൃദയത്തിന്‍റെ ഭാഗവും ഉൾപ്പെടുത്തി ഇന്ത്യയിൽ നടന്ന പ്രദർശനങ്ങൾക്ക് നേതൃത്വം നൽകിയതും അച്ചനായിരുന്നു. ഇതിനു പുറമേ 1500 വിശുദ്ധരുടെ തിരുശേഷിപ്പുകളുമായി നടത്തിയ പ്രയാണത്തിന് തുടക്കമിടാൻ കഴിഞ്ഞത് അച്ചന്‍റെ മനസിൽനിന്ന് ഇന്നും മാഞ്ഞിട്ടില്ല. കാർലോ വോയിസ് മാഗസിനും ഹൈവേ ഓഫ് ഹെവൻ എന്ന ഗ്രന്ഥവും അച്ചൻ പുറത്തിറക്കിയിട്ടുണ്ട്. ഭാരതത്തിൽ കാർലോ അക്കുത്തിസ് മ്യൂസിയത്തിന്‍റെ നിർമാണത്തിനുള്ള ശിലാഫലകം പാപ്പ വെഞ്ചരിച്ച് നൽകിയിരുന്നു. 2007 -ൽ പിയർ ജോർജോ ഫ്രസാത്തിയെക്കുറിച്ചുള്ള പുസ്തകം അദ്ദേഹത്തിന്‍റെ സഹോദരീപുത്രിയുടെ സഹായത്തോടെയാണ് എഫ്രേം അച്ചൻ രചിച്ചത്. കാർലോയുടെ ലാപ്ടോപ്പ്, കാൽക്കുലേറ്റർ, ടെന്നീസ് ബാറ്റ് തുടങ്ങിയവ തന്‍റെ കൈവശമുണ്ടെന്നും, അവയെല്ലാം ഇന്ത്യയിലേക്ക് എത്തിക്കാനായതിൽ ഏറെ സന്തോഷമുണ്ടെന്നും അച്ചൻ പറഞ്ഞു. ഫ്രാൻസിസ് മാർപാപ്പ, മാർ ജോർജ് ആലഞ്ചേരി, മാർ ജോർജ് പള്ളിപ്പറന്പിൽ, കർദിനാൾ പിസബല്ല, കർദിനാൾ ക്ലീമിസ് മാർ ബസേലിയോസ് ബാവ, കർദിനാൾ ലുയിസ് റഫേൽ സാക്കോ, മാർ റഫേൽ തട്ടിൽ എന്നിവരുടെ അകമഴിഞ്ഞ പിന്തുണ തന്‍റെ പ്രവർത്തനങ്ങൾക്ക് ലഭിച്ചിട്ടുണ്ടെന്ന് അദ്ദേഹം പറഞ്ഞു. വിശുദ്ധപദവി പ്രഖ്യാപനത്തിൽ പങ്കെടുക്കാൻ ക്ഷണം ലഭിച്ചത് അപൂർവ അനുഭവമാണെന്നാണ് എഫ്രേം അച്ചൻ പറയുന്നത്.

സമുദായ ശക്തീകരണം രാഷ്‌ട്രപുരോഗതിക്ക്: മാര്‍ ജോസ് പുളിക്കല്‍

കാഞ്ഞിരപ്പള്ളി: രാജ്യത്തിന്‍റെ മതേതരത്വം സംരക്ഷിക്കാനും സാധാരണക്കാര്‍ക്ക് നീതി ലഭിക്കാനും കര്‍ഷകര്‍ക്ക് ജീവിക്കാനുള്ള സാഹചര്യം ഒരുക്കാനും മൂല്യബോധമുള്ള തലമുറയെ ഭരണ രാഷ‌്ട്രീയ രംഗത്തിറക്കാനുമുള്ള ഇടപെടലുകള്‍ ഉണ്ടാകണമെന്ന് കാഞ്ഞിരപ്പള്ളി ബിഷപ് മാർ ജോസ് പുളിക്കൽ. കാഞ്ഞിരപ്പള്ളി രൂപതയുടെ പന്ത്രണ്ടാമത് പാസ്റ്ററല്‍ കൗണ്‍സിലിന്‍റെ എട്ടാമത് സമ്മേളനം ഉദ്ഘാടനം ചെയ്ത് പ്രസംഗിക്കുകയായിരുന്നു മാര്‍ ജോസ് പുളിക്കല്‍. സഭ എന്ന കാഴ്ചപ്പാട് നമ്മുടെ നെഞ്ചിടപ്പായി മാറുന്നുവെന്ന് ഉറപ്പു വരുത്താന്‍ നമ്മള്‍ ശ്രദ്ധിക്കണം. കരുത്തും കര്‍മശേഷിയുമുള്ള സമൂഹമായി സഭാമക്കള്‍ മാറണമെന്ന് മാര്‍ ജോസ് പുളിക്കല്‍ ഉദ്‌ബോധിപ്പിച്ചു. ശ്ലീഹന്മാരാകുന്ന അടിത്തറയില്‍ പണിയപ്പെട്ടിരിക്കുന്ന സഭയോടു ചേര്‍ന്നുനിന്നുകൊണ്ട് നമ്മുടെ ജീവിതം മുന്പോട്ടു കൊണ്ടുപോകണം. സീറോ മലബാര്‍ സഭയുടെ സമുദായ സംഘടനയായ കത്തോലിക്ക കോണ്‍ഗ്രസ് കൂടുതല്‍ ശക്തിപ്പെടേണ്ടത് കാലഘട്ടത്തിന്‍റെ ആവശ്യമാണെന്ന് മാര്‍ ജോസ് പുളിക്കല്‍ കൂട്ടിച്ചേർത്തു. സമുദായ ശക്തീകരണം ആധുനിക കാലഘട്ടത്തില്‍ എന്ന വിഷയത്തെ ആസ്പദമാക്കി ഫാ. ജസ്റ്റിന്‍ മതിയത്ത് ക്ലാസ് നയിച്ചു. പ്രോട്ടോസിഞ്ചെല്ലൂസ് റവ. ഡോ. ജോസഫ് വെള്ളമറ്റം, വികാരി ജനറാള്‍മാരായ ഫാ. ബോബി അലക്‌സ് മണ്ണംപ്ലാക്കല്‍, റവ. ഡോ. സെബാസ്റ്റ്യന്‍ കൊല്ലംകുന്നേല്‍, ഷെവലിയര്‍ അഡ്വ. വി.സി. സെബാസ്റ്റ്യന്‍ തുടങ്ങിയവര്‍ പ്രസംഗിച്ചു. ചാന്‍സലര്‍ റവ. ഡോ. മാത്യു ശൗര്യാംകുഴി, പ്രൊക്യുറേറ്റര്‍ ഫാ. ഫിലിപ്പ് തടത്തില്‍, പാസ്റ്ററല്‍ കൗണ്‍സില്‍ സെക്രട്ടറി ഡോ. ജൂബി മാത്യു എന്നിവര്‍ നേതൃത്വം നല്‍കി.

ക്ഷീരമേഖല മാറ്റത്തിന്‍റെ പാതയിൽ: മന്ത്രി ചിഞ്ചുറാണി

ഇടുക്കി: ക്ഷീരമേഖലയിൽ വലിയ മാറ്റത്തിന് വഴി തെളിക്കുന്ന നിരവധി പദ്ധതികളാണ് വകുപ്പ് നടപ്പാക്കിവരുന്നതെന്ന് മന്ത്രി ജെ. ചിഞ്ചു റാണി. പെരുവന്താനം വെറ്ററിനറി ആശുപത്രിക്കായി നിർമിച്ച പുതിയ കെട്ടിടം ഉദ്ഘാടനം ചെയ്യുകയായിരുന്നു അവർ. മൃഗാശുപത്രികളുടെ പ്രവർത്തന സമയത്തിന് ശേഷമുള്ള അടിയന്തര ചികിത്സാ ആവശ്യങ്ങൾക്കായി കേരളത്തിലെ മുഴുവൻ ജില്ലകളിലും 1962 എന്ന ടോൾ ഫ്രീ നന്പർ മുഖാന്തിരം മൊബൈൽ വെറ്ററിനറി യൂണിറ്റുകളും സർജറി യൂണിറ്റുകളും പ്രവർത്തനം ആരംഭിച്ചിട്ടുണ്ട്. കൂടാതെ ജനങ്ങൾക്ക് മൃഗചികിത്സാ വിവരങ്ങളും വാക്സിനേഷൻ സർട്ടിഫിക്കറ്റുകളും മൊബൈൽ ആപ്ലിക്കേഷൻ വഴി വിരൽത്തുന്പിൽ ലഭ്യമാകുന്ന രീതിയിൽ ഇ - സമൃദ്ധ എന്ന പേരിൽ മൃഗസംരക്ഷണ വകുപ്പിൽ ഡിജിറ്റൽ പ്ലാറ്റ് ഫോം തയാറായിട്ടുണ്ടെന്നും മന്ത്രി പറഞ്ഞു. ആഫ്രിക്കൻ പന്നിപ്പനി ബാധിച്ച് വളർത്തുമൃഗങ്ങളെ നഷ്ടമായ കർഷകർക്ക് മന്ത്രി നഷ്ടപരിഹാരം വിതരണം ചെയ്തു. പഞ്ചായത്ത് പ്രസിഡന്‍റ് നിജിനി ഷംസുദ്ദീൻ അധ്യക്ഷത വഹിച്ചു. ബ്ലോക്ക് പഞ്ചായത്ത് പ്രസിഡന്‍റ് ഒ.വി. ജോസഫ് ഇ-സമൃദ്ധി പദ്ധതിയുടെ ലോഗിൻ നിർവഹിച്ചു. പഞ്ചായത്ത് വികസന സ്ഥിരം സമിതി അധ്യക്ഷ വി.എൻ. ഝാൻസി മൊബൈൽ സർജറി ആങ്കറിംഗ് യൂണിറ്റ് ഉദ്ഘാടനം ചെയ്തു. ജില്ലാ മൃഗസംരക്ഷണ ഓഫീസർ ഇൻ-ചാർജ് ഡോ. മിനി ജോസഫ് പ്ലാങ്കാല, ഡോ. ജെയിസണ്‍ ജോർജ്, കൊക്കയാർ പഞ്ചായത്ത് പ്രസിഡന്‍റ് മോളി ഡൊമിനിക്, ത്രിതല പഞ്ചായത്തംഗങ്ങളായ ഇ.ആർ. ബൈജു, കെ.ആർ. വിജയൻ, സാലിക്കുട്ടി ജോസഫ്, ഷാജി പുല്ലാട്ട്, എബിൻ വർക്കി, മേരിക്കുട്ടി ഓലിക്കൽ എന്നിവർ പ്രസംഗിച്ചു.

നിർത്തിയിട്ട ലോറിയിൽ ബൈക്കിടിച്ച് യുവാവ് മരിച്ചു

കുമളി: നിയന്ത്രണം വിട്ട ബൈക്ക് റോഡരികിൽ പാർക്ക് ചെയ്തിരുന്ന ലോറിയിലിടിച്ച് യുവാവ് മരിച്ചു. കുമളി പൊട്ടംപറന്പിൽ ജോയി-ട്രീസ ദന്പതി കളുടെ മകൻ ബിബിൻ (37) ആണ് മരിച്ചത്. വെള്ളിയാഴ്ച രാത്രി കുമളിക്ക് സമീപം വലിയകണ്ടത്ത് വളവിലാണ് അപകടം. ഗുരതരമായി പരിക്കേറ്റ യുവാവിനെ കുമളിയിലെ സ്വകാര്യ ആശുപത്രിയിൽ പ്രാഥമിക ചികിത്സ നൽകി പാലായിലെ ആശുപത്രിയിൽ പ്രവേശിപ്പിച്ചു. ഇന്നലെ ഉച്ചയോടെയാണ് മരച്ചു. ഭാര്യ: രമ്യ. മക്കൾ: അമിലിയ, ആദം. സഹോദരൻ ജോസഫ്.

മറയൂർ സ്കൂളിന് ശോഭയായി ചെണ്ടുമല്ലി വസന്തം

മറയൂർ: മറയൂർ സെന്‍റ് മേരീസ് യുപി സ്കൂളിലെ കുട്ടികളും അധ്യാപകരും അക്ഷരമുറ്റത്തിന് വർണശോഭയേകാൻ ചെണ്ടുമല്ലിപ്പൂക്കൾ കൊണ്ട് വിസ്മയം തീർത്തു. ഓണവിപണിയിൽ ചെണ്ടുമല്ലിക്ക് ഉയർന്ന വില ലഭിച്ചിട്ടും പൂക്കൾ വിൽക്കാതെ സ്കൂൾ മുറ്റം അലങ്കരിക്കാൻ ഇവർ തീരുമാനിച്ചു. തൊടുപുഴയിൽനിന്ന് 300 ചെണ്ടുമല്ലിത്തൈകൾ വാങ്ങി അധ്യാപകരുടെയും കുട്ടികളുടെയും കൂട്ടായ പരിശ്രമത്തോടെ പരിപാലിച്ചാണ് ഈ വർണക്കാഴ്ച ഒരുക്കിയത്. ഹെഡ്മിസ്ട്രസ് സിസ്റ്റർ ബീനാ സെബാസ്റ്റ്യനും മാനേജർ സിസ്റ്റർഎൽസി ഫ്രാൻസിസും മുൻനിന്ന് നയിച്ച സംരംഭം സ്കൂളിന് അഭിമാനമായി.

കുടുംബ വഴക്ക്: ഭർത്താവ് ഭാര്യയെ വെട്ടി

ഉപ്പുതറ: കുടുംബ വഴക്കിനെത്തുടർന്ന് ഭർത്താവ് ഭാര്യയെ വെട്ടിപ്പരിക്കേൽപ്പിച്ചു. അയ്യപ്പൻകോവിൽ ചിന്ന സുൽത്താനിയ കോളനിയിൽ മണികണ്ഠന്‍റെ മകൾ ശരണ്യ (23) യ്ക്കാണ് വെട്ടേറ്റത്. സംഭവത്തിൽ ആണ്ടിപ്പെട്ടി സ്വദേശി മാരിമുത്തുവിന്‍റെ മകൻ മദൻകുമാറിനെ ഉപ്പുതറ പോലീസ് അറസ്റ്റ് ചെയ്തു. ശനിയാഴ്ച 12 ഓടെയാണ് സംഭവം. ആണ്ടിപ്പെട്ടിയിലാണ് മദൻ കുമാറും ശരണ്യയും താമസിക്കുന്നത്. ബാറിൽ ജീവനക്കാരനായ മദൻകുമാർ നിരന്തരം ശരണ്യയോട് വഴക്കിടുമായിരുന്നു. ഉപദ്രവം സഹിക്കാൻ കഴിയാതെ വന്നതോടെ ശരണ്യ വീട്ടിൽ വിവരമറിയിച്ചു. നാലുദിവസം പിതാവ് മണികണ്ഠൻ ശരണ്യയെ വീട്ടിലേയ്ക്ക് കൂട്ടിക്കൊണ്ടുവന്നു. ശനിയാഴ്ച രാവിലെ സുൽത്താനിയായിൽ എത്തിയ മദൻകുമാർ കൂടെ വരണം എന്ന് ശരണ്യയോട് ആവശ്യപ്പെട്ടു. ഇതുസംബന്ധിച്ച് ഇരുവരും തമ്മിൽ തർക്കമുണ്ടായി. തുടർന്ന് മദൻകുമാർ അരിവാൾ ഉപയോഗിച്ച് ശരണ്യയെ വെട്ടുകയായിരുന്നു. തലയ്ക്കും കൈയ്ക്കും വെട്ടേറ്റ ശരണ്യ അയൽവീട്ടിൽ അഭയം തേടി. അവിടെച്ചെന്നും മദൻകുമാർ ബഹളമുണ്ടാക്കി. ഓടിക്കൂടിയ നാട്ടുകാർ ഇയാളെ തടഞ്ഞുവച്ചു. വിവരം ഉപ്പുതറ സ്റ്റേഷനിൽ അറിയിച്ചതിനെത്തുടർന്ന് പോലീസ് എത്തി ഇയാളെ കസ്റ്റഡിയിലെട്ടുത്തു. പരിക്കേറ്റ ശരണ്യയെ കട്ടപ്പന താലൂക്ക് ആശുപത്രിയിൽ പ്രവേശിപ്പിച്ചു.

പാൽ കമഴ്ത്തൽ സമരവും കരിദിനാചരണവും

തൊടുപുഴ: സംസ്ഥാനത്ത് പാൽ ഉത്പാദനച്ചെലവിന് ആനുപാതികമായി പാൽ വില ലഭ്യമാക്കണമെന്നാവശ്യപ്പട്ട് തിരുവന്തപുരം മിൽമ ഫെഡറേഷൻ ഓഫീസിനു മുന്പിൽ കേരള സ്റ്റേറ്റ് മിൽക്ക് സൊസൈറ്റിസ് അസോസിയേഷന്‍റെ നേതൃത്വത്തിൽ പാൽ കമഴ്ത്തൽ സമരവും കരിദിനാചരണവും നടത്തും. പാൽവില ലിറ്ററിന് 70 രൂപയാക്കണം എന്നാവശ്യപ്പെട്ടാണ് സമരം. ഒരു ലിറ്റർ പാൽ ഉത്പാദിപ്പിക്കുന്നതിന് 48 രൂപ ചെലവ് വരുമെന്ന് സർക്കാർ നടത്തിയ പഠനത്തിൽ കണ്ടെത്തിയിട്ടും പാൽവില വർധിപ്പിക്കാതെ ക്ഷീരകർഷകരെ അവഗണിക്കുന്ന സർക്കാർ നയത്തിലും മിൽമ ഫെഡറേഷന്‍റെ നിസംഗതയിലും പ്രതിഷേധിച്ച് 16ന് രാവിലെ 11ന് മിൽമ ഫെഡറേഷൻ ഓഫീസിനു മുന്നിലാണ് സമരം സംഘടിപ്പിക്കുന്നത്. സംസ്ഥാനത്തെ വിവിധ കേന്ദ്രങ്ങളിലെ ക്ഷീരസംഘം പ്രസിഡന്‍റുമാർ, സെക്രട്ടറിമാർ, ക്ഷീരസംഘം ജീവനക്കാർ ക്ഷീര കർഷകർ എന്നിവർ പങ്കെടുക്കും. സമരത്തിന് പിന്തുണ പ്രഖ്യാപിച്ച് രണ്ടുമാസം മുന്പ് ക്ഷീര വികസന വകുപ്പ് മന്ത്രി പാൽ വില ഉടൻ വർധിപ്പിക്കുമെന്ന് പറഞ്ഞുവെങ്കിലും തീരുമാനമായിട്ടില്ല. ഫെഡറേഷൻഓഫീസിനു മുന്നിൽ സമരം നടക്കുന്ന സമയത്ത് സമരത്തിന് പിന്തുണ പ്രഖ്യാപിച്ച് കേരളത്തിലെ മുഴുവൻ ക്ഷീര സഹകരണ സംഘങ്ങളിലും പാൽകമഴ്ത്തൽ സമരവും കരിദിനവും ആചരിക്കുമെന്ന് കെഎസ്എംഎസ്എ സംസ്ഥാന പ്രസിഡന്‍റ് പി.ആർ. സലിംകുമാർ, ജനറൽ സെക്രട്ടറി എം.ആർ. അനിൽകുമാർ, ജില്ലാ പ്രസിഡന്‍റ് സോണി ചൊള്ളാമഠം എന്നിവർ അറിയിച്ചു.

അവഗണന അവസാനിപ്പിക്കണം: മോണ്‍. ജോസ് കരിവേലിക്കൽ

ചെറുതോണി: എയിഡഡ് സ്കൂൾ അധ്യാപകരോടുള്ള സർക്കാർ അവഗണന അവസാനിപ്പിക്കണമെന്ന് ഇടുക്കി രൂപത മുഖ്യ വികാരി ജനറാൾ മോണ്‍. ജോസ് കരിവേലിക്കൽ ആവശ്യപ്പെട്ടു. ഭിന്നശേഷി സംവരണ വിഷയത്തിൽ ക്രൈസ്തവ മാനേജ്മെന്‍റുകളോട് സർക്കാർ കാണിക്കുന്ന വിവേചനത്തിലും നീതിനിഷേധത്തിലും പ്രതിഷേധിച്ച് ഇടുക്കി എഡ്യുക്കേഷണൽ ഏജൻസിയിലെ അധ്യാപകർ നടത്തിയ പ്രതിഷേധ സംഗമം മുരിക്കാശേരിയിൽ ഉദ്ഘാടനം ചെയ്യുകയായിരുന്നു അദ്ദേഹം. ന്യൂനപക്ഷ അവകാശങ്ങൾ നിലനിൽക്കുന്പോൾ തന്നെ ഭിന്നശേഷി ഉദ്യോഗാർഥികൾക്കായി സർക്കാർ ആവശ്യപ്പെട്ട പ്രകാരമുള്ള പോസ്റ്റുകൾ നീക്കിവച്ചിട്ടും ഇങ്ങനെ പോസ്റ്റുകൾ നീക്കിവയ്ക്കുന്ന മാനേജ്മെന്‍റുകളുടെ അധ്യാപകനിയമനം പാസാക്കി നൽകണമെന്ന വ്യക്തമായ ഹൈക്കോടതി ഉത്തരവ് നിലവിൽ വന്നിട്ടും ഇത് ക്രൈസ്തവ മാനേജ്മെന്‍റുകൾക്ക് ബാധകമല്ലെന്ന സർക്കാരിന്‍റെ നിഷേധാത്മക നിലപാട് ന്യായീകരിക്കാനാവുന്നതല്ല. 2009 മുതൽ ജോലി ചെയ്യുന്ന പതിനാറായിരത്തോളം അധ്യാപകർക്ക് നിയമന അംഗീകാരം ലഭിച്ചിട്ടില്ല. മൂവായിരത്തോളം അധ്യാപക തസ്തികകൾ ഭിന്നശേഷി സംവരണത്തിനായി നീക്കിവയ്ക്കുന്പോഴും 500 ഓളം ഉദ്യോഗാർഥികൾ മാത്രമേ ഭിന്നശേഷി വിഭാഗത്തിൽ അധ്യാപക യോഗ്യത നേടി നിയമനം കാത്തിരിക്കുന്നുള്ളൂനെന്ന് അദ്ദേഹം പറഞ്ഞു. ക്രൈസ്തവ മാനേജ്മെന്‍റുകൾക്കെതിരേയുള്ള സർക്കാർ നയത്തിനെതിരേ 26ന് സെക്രട്ടേറിയേറ്റിലേക്ക് നടത്തുന്ന പ്രതിഷേധ റാലിക്കും സംഗമത്തിനും മുന്നോടിയായാണ് മുരിക്കാശേരിയിൽ പ്രതിഷേധ റാലിയും സംഗമവും കാത്തലിക് ടീച്ചേഴ്സ് ഗിൽഡിന്‍റെ നേതൃത്വത്തിൽ നടത്തിയത്. ആയിരത്തോളം അധ്യാപകർ പങ്കെടുത്ത പ്രതിഷേധ റാലി പാവനാത്മ കോളജ് ഗ്രൗണ്ടിൽനിന്നു രൂപത വിദ്യാഭ്യാസ സെക്രട്ടറി റവ. ഡോ. ജോർജ് തകിടിയേൽ ഫ്ലാഗ് ഓഫ് ചെയ്തു. ടൗണ്‍ ചുറ്റി നടത്തിയ പ്രകടനത്തിനു ശേഷം മുരിക്കാശേരി ബസ് സ്റ്റാൻഡിൽ പ്രതിഷേധസംഗമം ചേർന്നു. രൂപത ടീച്ചേഴ്സ് ഗിൽഡ് പ്രസിഡന്‍റ് നോബിൾ മാത്യു അധ്യക്ഷത വഹിച്ചു. രൂപത എകെസിസി പ്രസിഡന്‍റ് ജോർജ് കോയിക്കൽ, ടീച്ചേഴ്സ് ഗിൽഡ് രൂപത സെക്രട്ടറി ബോബി തോമസ്, മുരിക്കോശരി സെന്‍റ് മേരീസ് ഹയർ സെക്കൻഡറി സ്കൂൾ പ്രിൻസിപ്പൽ സിബിച്ചൻ തോമസ്, സിബി വലിയമറ്റം തുടങ്ങിയവർ പ്രസംഗിച്ചു.

അധ്യാപകദിനത്തിൽ ചിത്രങ്ങൾ വരച്ചുനൽകി വിദ്യാർഥികൾ

കരിങ്കുന്നം: സെന്‍റ് അഗസ്റ്റിൻസ് സ്കൂളിലെ വിദ്യാർഥികളുടെയും അധ്യാപകരുടെയും നേതൃത്വത്തിൽ ഗുരുവന്ദനം എന്ന പേരിൽ അധ്യാപകദിനാഘോഷം സംഘടിപ്പിച്ചു. അധ്യാപകരുടെ ചിത്രങ്ങൾ വരച്ചുനൽകിയാണ് പരിപാടി സംഘടിപ്പിച്ചത്. സ്കൂളിലെ 29 അധ്യാപകരുടെയും അനധ്യാപകരുടെയും ഉൾപ്പെടെ ചിത്രങ്ങളാണ് 15 കുട്ടിക്കലാകാരൻമാർ ചേർന്ന് വരച്ചുനൽകിയത്. പ്രധാന അധ്യാപിക സിസ്റ്റർ നമിത ചിത്രങ്ങൾ ഏറ്റുവാങ്ങി. വിദ്യാർഥി പ്രതിനിധികളായ ടീന മരിയ ഷിൻസ്, ജേക്കബ് ജിമ്മി, എസ്തർ എലിസബത്ത് വിജയ്, അഭിജിത്ത് അനീഷ്, ഹരികൃഷ്ണൻ, അൽജോ, ശങ്കരി പ്രസാദ് എന്നിവർ നേതൃത്വം നൽകി.

മൂലമറ്റം ഡിപ്പോ നിർമാണത്തിന് അഞ്ചു കോടി: മന്ത്രി റോഷി

മൂലമറ്റം: കെഎസ്ആർടിസി സബ് ഡിപ്പോയുടെ നവീകരണ പ്രവർത്തങ്ങൾക്കും പുതിയ കെട്ടിടവും ബസ്‌ബേയും നിർമിക്കുന്നതിന് അഞ്ചു കോടിയുടെ പദ്ധതി തയാറാക്കി അംഗീകാരത്തിനായി സമർപ്പിച്ചതായി മന്ത്രി റോഷി അഗസ്റ്റിൻ പറഞ്ഞു. പൊതുമരാമത്ത് കെട്ടിടവിഭാഗത്തിനാണ് നിർമാണ ചുമതല. രൂപരേഖ തയാറാക്കുന്നതിന്‍റെ ഭാഗമായി ഇന്നലെ ടോപോഗ്രഫിക്കൽ സർവേ നടത്തി. യാത്രക്കാർ കയറിയിറങ്ങുന്ന ഇടങ്ങളിൽ ആവശ്യമായ സുരക്ഷാക്രമീകരണങ്ങൾ, ബസ്‌ബേ നിർമാണം, വെയ്റ്റിംഗ് ഏരിയ, ടോയ്‌ലറ്റ് ബ്ലോക്കുകൾ, ഓഫീസ്, ചുറ്റുമതിൽ നിർമാണം, ബസ് സ്റ്റാൻഡ് കോണ്‍ക്രീറ്റിംഗ് എന്നിവയ്ക്കു പുറമേ കെട്ടിടത്തിന്‍റെ മുകൾനിലയിൽ ഇതര ഓഫീസുകളുംസജ്ജീകരിക്കും. മൂലമറ്റത്തുനിന്നു കൂടുതൽ സർവീസുകൾ ആരംഭിക്കുന്നതിനാവശ്യമായ ക്രമീകരണങ്ങൾ നടത്തിവരികയാണെന്നും വാഗമണ്‍ ഉൾപ്പെടെയുള്ള മേഖലകളിലേക്ക് പുതിയ സർവീസ് ആരംഭിക്കുന്നത് പരിഗണനയിലുണ്ടെന്നും മന്ത്രി പറഞ്ഞു

മൂലമറ്റം-കോട്ടമല റോഡ് നിർമാണ ഉദ്ഘാടനം

മൂലമറ്റം: കോട്ടമല റോഡിന്‍റെയും മൂലമറ്റം പവർഹൗസ് വരെയുള്ള പിഡബ്ല്യുഡി റോഡ് ബിഎംബിസി നിലവാരത്തിലേയ്ക്ക് ഉയർത്തുന്നതിന്‍റെയും നിർമാണ ഉദ്ഘാടനം മന്ത്രി പി.എ. മുഹമ്മദ് റിയാസ് ഓണ്‍ ലൈനിൽ നിർവഹിച്ചു. സംസ്ഥാനത്തെ പശ്ചാത്തല വികസനമേഖലയിൽ കഴിഞ്ഞ ഒൻപത് വർഷത്തിനിടെ വലിയ കുതിപ്പാണ് ഉണ്ടായതെന്ന് അദ്ദേഹം പറഞ്ഞു. ഉദ്ഘാടനം ഓണ്‍ലൈനായി നിർവഹിക്കുകയായിരുന്നു മന്ത്രി. കഴിഞ്ഞ നാല് വർഷത്തിൽ മാത്രം 8000 കിലോമീറ്ററോളം റോഡ് നവീകരിച്ചു. മലയോര ഹൈവേ യാഥാർഥ്യമാക്കാൻ ശ്രമിച്ചുകൊണ്ടിരിക്കുകയാണ്. 13 ജില്ലകളിലൂടെ കടന്നുപോകുന്ന മലയോര ഹൈവേ 1200ഓളം കിലോമീറ്ററാണ്. കേരളത്തിലെ കാർഷിക ടൂറിസംമേഖലയിൽ വലിയ കുതിപ്പ് സാധ്യമാക്കാൻ മലയോര ഹൈവേ യാഥാർഥ്യമാകുന്നതോടെ കഴിയുമെന്നും മന്ത്രി പറഞ്ഞു. മൂലമറ്റം - കോട്ടമല റോഡ് യാഥാർഥ്യമാകുന്നതോടെ പ്രദേശവാസികളുടെ ചിരകാല ആഗ്രഹമാണ് സാക്ഷാത്കരിക്കപ്പെടുന്നതെന്ന് അദ്ദേഹം പറഞ്ഞു. മൂലമറ്റം നാടുകാണി കേബിൾ കാർ പദ്ധതിക്കായി പ്രാഥമിക പഠനം ആരംഭിച്ചിട്ടുണ്ടെന്നും മന്ത്രി പറഞ്ഞു. 2023-24 സാന്പത്തിക വർഷത്തിലെ ശബരിമല പ്രവൃത്തിയിൽ ഉൾപ്പെടുത്തി 6.80 കോടി ചെലവഴിച്ചാണ് റോഡ് ആധുനിക നിലവാരത്തിൽ പുനർനിർമിക്കുന്നത്. ഡീൻ കുര്യാക്കോസ് എംപി മുഖ്യപ്രഭാഷണം നടത്തി. ജില്ലാ പഞ്ചായത്ത് പ്രസിഡന്‍റ് രാരിച്ചൻ നീറണാകുന്നേൽ, പഞ്ചായത്ത് പ്രസിഡന്‍റ് കെ.എസ്. വിനോദ്, വൈസ് പ്രസിഡന്‍റ് സുബി ജോമോൻ, ജില്ലാ പഞ്ചായത്തംഗം പ്രഫ. എം.ജെ ജേക്കബ്, അറക്കുളം പഞ്ചായത്ത് സ്റ്റാന്‍ഡിംഗ് കമ്മിറ്റി ചെയർപേഴ്സണ്‍ കെ.എൽ. ജോസഫ്, പഞ്ചായത്ത് അംഗങ്ങളായ ഷിബു ജോസഫ്, സുശീല ഗോപി, കൊച്ചുറാണി ജോസ്, ഗീത തുളസീധരൻ, സിന്ധു, വിനീഷ് വിജയൻ, പി.എ വേലുക്കുട്ടൻ, എലിസബത്ത് ജോണ്‍സണ്‍, സിനി തോമസ്, ഓമന ജോണ്‍സണ്‍ എന്നിവർ പ്രസംഗിച്ചു.

എൽഡിഎഫിനെ വെല്ലുവിളിച്ച് പോരാട്ടവേദി

അടിമാലി: എൽഡിഎഫ് ജില്ലാ കമ്മിറ്റി അതിജീവന പോരാട്ടവേദിക്കെതിരേ ഉന്നയിച്ചിട്ടുള്ള ആരോപണങ്ങളിൽ സമഗ്ര അന്വേഷണം നടത്താൻ അതിജീവന പോരാട്ടവേദി എൽഡിഎഫിനെ വെല്ലുവിളിച്ചു. അതിജീവന പോരാട്ടവേദിയുടെ സാന്പത്തിക സ്രോതസ് അന്വേഷിക്കണമെന്ന എൽഡിഎഫിന്‍റെ ആവശ്യം സ്വാഗതം ചെയ്യുന്നു. ജില്ലയിലെ ഇടതുപക്ഷ ജനാധിപത്യമുന്നണിയുടെ പ്രധാന നേതാക്കളുടെ സാന്പത്തിക സ്രോതസും ബിനാമി ഇടപാടുകളും സഹകരണ സംഘങ്ങളിലെ തട്ടിപ്പുകളും വൻകിട കോർപറേറ്റ് കന്പനികളെ തോൽപ്പിക്കുന്ന ബിസിനസ് ഇടപാടുകളും ഇതിനോടൊപ്പം സമഗ്രമായി അന്വേഷിക്കണം. അന്വേഷണം നടക്കുകയാണെങ്കിൽ ആവശ്യമായ തെളിവുകൾ അന്വേഷണ ഏജൻസിക്ക് നൽകാൻ അതിജീവന പോരാട്ടവേദി തയാറാണ്. ഭൂപതിവ് നിയമ ഭേദഗതിയും ചട്ടങ്ങളും ജനദ്രോഹപരമാണെന്നു തന്നെയാണ് പോരാട്ടവേദിയുടെ അഭിപ്രായം. ഭേദഗതികൾ ജനദ്രോഹമാണെന്നു സമ്മതിക്കുന്ന പ്രസ്താവനകളാണ് എൽഡിഎഫ് നടത്തുന്നത്. ആശങ്ക പ്രകടിപ്പിക്കുന്നവരെ കൈകാര്യം ചെയ്യുമെന്നു പറയുന്നത് ജാള്യം മറയ്ക്കാനാണ്. പോരാട്ടവേദിയെ രാഷ‌്ട്രീയവും നിയമപരവുമായി നേരിടും എന്ന് പറഞ്ഞതിനെ സ്വാഗതം ചെയ്യുന്നു. എന്നാൽ, ചെയർമാനെ തെരുവിൽ നേരിടും എന്ന ഇടതുപക്ഷ ജനാധിപത്യമുന്നണിയുടെ പ്രഖ്യാപനത്തെ അപലപിക്കുകയും ജീവനും സ്വത്തിനും സംരക്ഷണം നൽകേണ്ട പോലീസിനു പരാതി നൽകുന്നതിനും പോലീസ് സംരക്ഷണം ആവശ്യപ്പെട്ട് കേരള ഹൈക്കോടതിയെ സമീപിക്കുമെന്നും അതിജീവന പോരാട്ട വേദിയുടെ എക്സിക്യൂട്ടീവ് കമ്മിറ്റി യോഗം അറിയിച്ചു. ഈ വിഷയത്തിലും എൽഡിഎഫ് പ്രതിനിധികളുമായി പരസ്യ സംവാദത്തിന് തയാറാണ്. ജില്ലയ്ക്കു പുറത്തുനിന്നുള്ള അഭിഭാഷകരെ നിയോഗിച്ച് കേസുകൾ നടത്തുന്നുവെന്നുള്ള ആക്ഷേപം അടിസ്ഥാന രഹിതമാണ്. ഇടുക്കി അപകടത്തിലാണെന്നു മനസ്‌സിലാക്കി വസ്തു എല്ലാം വിറ്റ് ഇപ്പോൾ എറണാകുളത്ത് താമസമാക്കിയ പ്രമുഖ എൽഡിഎഫ് നേതാവായ അഭിഭാഷകൻ ഇടുക്കി ജില്ലയിലെ നിരവധി പഞ്ചായത്തുകളുടെ സ്റ്റാൻഡിംഗ് കൗണ്‍സിലായി ഹൈക്കോടതിയിൽ പ്രവർത്തിക്കുന്നുണ്ട്. ഇടുക്കി ജില്ലയിലെ നിരവധി പ്രശ്നങ്ങൾക്ക് കോടതിയിൽ നിന്ന് പരിഹാരം ഉണ്ടാക്കുന്നതിന് ഈ അഭിഭാഷകന് സാധിച്ചിട്ടുണ്ടെന്നും വേദി ജനറൽ കണ്‍വീനർ അഡ്വ. മഞ്ചേഷ് കുമാർ അറിയിച്ചു.

ജില്ലയിൽ കാറുകൾ കത്തിയമരുന്നു

തൊടുപുഴ: ജില്ലയിൽ ഓട്ടത്തിനിടെ കാറുകൾക്ക് തീ പിടിക്കുന്നത് തുടർക്കഥയാകുന്നു. അപ്രതീക്ഷിതമായാണ് കാറുകൾ കത്തിയമരുന്നത്. കത്തിപ്പടരുന്ന വാഹനത്തിൽനിന്നു യാത്രക്കാർ പലപ്പോഴും തലനാരിഴയ്ക്കാണ് രക്ഷപ്പെടുന്നത്. ഈ വർഷം ജില്ലയുടെ വിവിധ മേഖലകളിലായി പത്തോളം കാറുകളാണ് അഗ്നിക്കിരയായത്. വെള്ളിയാഴ്ച വണ്ണപ്പുറത്തും ഇന്നലെ എഴുകുംവയലിലും കാറുകൾ കത്തിനശിച്ചിരുന്നു. വണ്ണപ്പുറത്ത് പെട്രോൾ പന്പിനു സമീപമാണ് കാർ കത്തിയത്. തലനാരിഴയ്ക്കാണ് ഇവിടെ വലിയ അപകടം ഒഴിവായത്. കത്തിയതിൽ കൂടുതലും ഒരേ കന്പനിയുടെ വാഹനങ്ങളാണെന്ന പ്രത്യേകതയുമുണ്ട്. വണ്ണപ്പുറത്തിനും എഴുകുംവയലിനും പുറമേ മുട്ടം, തൊടുപുഴ -ഇടുക്കി റൂട്ടിൽ കുരുതിക്കളം, കാഞ്ഞാർ -വാഗമണ്‍ റൂട്ടിൽ പുളിക്കാനം എന്നിവിടങ്ങളിലും ഓട്ടത്തിനിടെ കാറുകൾക്ക് തീ പിടിച്ചിരുന്നു. പുള്ളിക്കാനത്തിന് ഒരു കിലോമീറ്റർ ചുറ്റളവിൽ ഒരേ കന്പനിയുടെ മൂന്നു കാറുകളാണ് കത്തിനശിച്ചത്. പലപ്പോഴും വാഹനങ്ങൾ തീപിടിച്ച് സ്ഫോടനത്തോടെ പൊട്ടിത്തെറിക്കുന്ന സംഭവങ്ങളുമുണ്ട്. വാഹനങ്ങൾ തീ പിടിക്കുന്പോൾ ഫയർഫോഴ്സ് എത്താറുണ്ടെങ്കിലും ഇതിനോടകം വാഹനം പൂർണമായി കത്തിയിട്ടുണ്ടാകും. വാഹനങ്ങൾ തീപിടിക്കുന്ന സംഭവങ്ങൾ വ്യാപാകമായതോടെ മുൻകരുതലും സുരക്ഷാനിർദേശങ്ങളുമായി മോട്ടോർവാഹന വകുപ്പ് രംഗത്തെത്തിയിരുന്നു. ഷോർട്ട് സർക്യൂട്ടും ഇന്ധനച്ചോർച്ചയും ഇന്ധനച്ചോർച്ചയും ഷോർട്ട് സർക്യൂട്ടുമാണ് വാഹനങ്ങൾക്ക് തീ പിടിക്കാനുള്ള പ്രധാന കാരണമായി പറയുന്നത്. കത്തിനശിച്ചതിലേറെയും പഴയ വാഹനങ്ങളാണ്. ഇവയുടെ അറ്റകുറ്റപ്പണികളും സർവീസും സമയാസമയങ്ങളിൽ നടത്താത്തതും തീ പിടിത്തത്തിന് കാരണമാകാറുണ്ടെന്ന് വിദഗ്ധർ പറയുന്നു. റോഡ് അപകടങ്ങൾക്കു പിന്നാലെയും കാറിൽ തീപടരാറുണ്ട്. ഇടിയുടെ ആഘാതത്തിൽ കാറിന്‍റെ ഫ്യുവൽ ലൈൻ തകർന്ന് ഇന്ധനം ചോരുന്നത് കാറിൽ തീപടരാൻ ഇടയാക്കും. എൻജിൻ ഓയിൽ, ഇന്ധനം പോലുള്ളവ ചോരുന്നതും അപകടത്തിന് വഴിയൊരുക്കാം. കൂടാതെ ഫ്യുവൽ പ്രഷർറെഗുലേറ്റർ, ഫ്യുവൽ ഇൻജെക്ടർ എന്നിവയിലുണ്ടാകുന്ന തകരാർ മൂലവും ഇന്ധനം ചോരാം. ഇന്ധനവും ഓയിലും പ്രവഹിക്കുന്ന ട്യൂബുകൾ പ്രാണികളും മറ്റും കടിച്ചാണ് പലപ്പോഴും ലീക്കുണ്ടാകുന്നത്. തീപിടിത്തത്തിന് മറ്റൊരു പ്രധാന കാരണമാണ് ഷോർട്ട് സർക്ക്യൂട്ട്. മിക്ക സന്ദർഭങ്ങളിലും ഫ്യൂസ് എരിയുന്നത് തീപിടുത്തത്തിലേക്ക് നയിക്കുന്നു. കൂടാതെ വാഹനങ്ങളുടെ ഇലക‌്ട്രിക് ഭാഗങ്ങളിൽ വരുത്തുന്ന മോഡിഫിക്കേഷനുകൾ അപകടങ്ങൾക്ക് വഴിവയ്ക്കാം. ആഫ്ടർമാർക്കറ്റ് ആക്സസറികൾ വാഹനങ്ങളിൽ ഘടിപ്പിക്കുന്പോൾ വയറിംഗ് ശരിയായ രീതിയിലല്ലെങ്കിൽ ഷോർട്ട് സർക്ക്യൂട്ടിന് കാരണമാകും. കൂടാതെ ശരിയായി കണക്ഷൻ നൽകാത്ത ബാറ്ററി, സ്റ്റാർട്ടർ എന്നിവയും തീപിടിക്കാനിടയാക്കും. വാഹനത്തിൽനിന്നു റബറോ പ്ലാസ്റ്റിക്കോ കത്തുന്നതോ പോലെയുള്ള ഗന്ധം അനുഭവപ്പെട്ടാൽ വാഹനം നിർത്തണം. എൻജിൻ ഓഫാക്കി നിർത്തി. വാഹനത്തിൽനിന്നിറങ്ങി ദൂരെമാറി നിൽക്കണം. പിന്നീട് അംഗീകൃത സർവീസ് സെന്‍ററുമായി ബന്ധപ്പെട്ട് ആവശ്യമായ സഹായം തേടണം. തീപിടിക്കാതിരിക്കാൻ കൃത്യമായി വാഹനത്തിന്‍റെ മെയിന്‍റനൻസ് നടത്തണം. എളുപ്പത്തിൽ തീപിടിക്കാവുന്ന വസ്തുക്കൾ വാഹനത്തിൽ കരുതരുത്. വാഹനത്തിൽ ഇരുന്ന് പുകവലിക്കരുത്. ഫ്യൂസ് കത്തിയെന്നു മനസിലായാൽ അത് മാറ്റി വാഹനം ഓടിക്കാൻ ശ്രമിക്കരുത്. അതിനായി മെക്കാനിക്കുകളെ തന്നെ ആശ്രയിക്കുക. അംഗീകൃത സർവീസ് സെന്‍ററുകളിൽ നൽകി വാഹനത്തിന്‍റെ അറ്റകുറ്റപ്പണികളും ഇലക്ട്രിക് ജോലികളും ചെയ്യുക. അനാവശ്യ മോഡിഫിക്കേഷൻ ഒഴിവാക്കുക. തീപിടിച്ചാൽ എന്തുചെയ്യണം വാഹനത്തിൽനിന്നു പുകയും തീയും ഉയർന്നാൽ ഓഫ് ചെയ്ത് ഇതിൽനിന്നിറങ്ങി സുരക്ഷിത അകലത്തിലേക്കു മാറുകയാണ് ആദ്യം ചെയ്യേണ്ടതെന്ന് ജില്ലാ ഫയർ ഓഫീസർ കെ. ആർഷിനോയി പറഞ്ഞു. സ്വയം തീ അണയ്ക്കാൻ ശ്രമിക്കരുത്. തീപിടിക്കുന്പോൾ വാഹനത്തിലെ ഘടകങ്ങളിൽനിന്നും വിഷവായു പുറത്തേക്കുവരാം. ഇത് ജീവന് ഭീഷണി ആകാം. ബോണറ്റിലാണ് തീപിടിക്കുന്നതെങ്കിൽ ഇത് ഉയർത്താൻ ശ്രമിക്കരുത്. എൻജിൻ ഭാഗത്തും തീ പിടിക്കാനുള്ള സാധ്യതയേറെയാണ്. ഇന്ധനം ചോർന്ന് വാഹനത്തിന് തീപിടിച്ചാൽ വെള്ളം ഒഴിച്ച് കെടുത്താൻ ശ്രമിക്കരുത്. ഇത് കൂടുതൽ ഭാഗത്തേക്ക് തീ പടരാൻ കാരണമാകും. വീണ്ടും കാർ കത്തിനശിച്ചു: ആറംഗ കുടുംബം രക്ഷപ്പെട്ടു നെടുങ്കണ്ടം: എഴുകുംവയലിൽ ഓടിക്കൊണ്ടിരുന്ന കാർ കത്തിനശിച്ചു. രണ്ടു യാത്രക്കാർക്ക് പൊള്ളലേറ്റു. ഇന്നലെ രാവിലെ അഞ്ചരയോടെയാണ് ആറംഗ കുടുംബം സഞ്ചരിച്ചിരുന്ന കാറിനു തീപിടിച്ചത്. എഴുകുംവയൽ തോലാനിയിൽ ജിയോ ജോർജിന്‍റെ കാറാണ് കത്തിനശിച്ചത്. വാഹനം ഓടിച്ചിരുന്ന ജിയോ (47), മകൾ ഓഷിൻ (16) എന്നിവർക്കാണ് പൊള്ളലേറ്റത്. ഇവർക്കൊപ്പം ജിയോയുടെ ഭാര്യ അനു (44), മക്കളായ മിഷേൽ (15), ജോർജുകുട്ടി (12), അനുവിന്‍റെ മാതാവ് ആലീസ് ജോസഫ് (65) എന്നിവരും കാറിലുണ്ടായിരുന്നു. എഴുകുംവയൽ പള്ളിയിലേക്ക് പോകുന്നതിനിടെയായിരുന്നു അപകടം. കീച്ചേരിപ്പടി - കോടാലിക്കവല റോഡിൽ കീച്ചേരിപ്പടിക്ക് സമീപം കയറ്റം കയറുന്നതിനിടെ നിന്നുപോയ വാഹനം പിന്നിലേക്ക് ഉരുളാൻ തുടങ്ങിയതോടെ വഴിയരികിൽ നിർത്താൻ ശ്രമിച്ചു. ഇതിനിടെ കാറിന്‍റെ മുൻഭാഗത്തുനിന്നു തീ ഉയരുകയായിരുന്നു. ഉടൻതന്നെ കാറിലുണ്ടായിരുന്നവർ പുറത്തിറങ്ങി. രക്ഷപ്പെടാൻ ശ്രമിക്കുന്നതിനിടെ നിലത്തുവീണ് രണ്ട് കുട്ടികൾക്ക് പരിക്കേറ്റു. ഇവരെ കട്ടപ്പനയിലെ സ്വകാര്യ ആശുപത്രിയിൽ പ്രവേശിപ്പിച്ചു. നാട്ടുകാർ വിവരമറിയിച്ചതിനെത്തുടർന്ന് സ്ഥലത്തെത്തിയ നെടുങ്കണ്ടം അഗ്നിരക്ഷാസേനയാണ് തീയണച്ചത്. കാർ പൂർണമായും കത്തിനശിച്ചു. അപകടകാരണം ഷോർട്ട് സർക്യൂട്ടാണ് ന്നാണ് പ്രാഥമിക നിഗമനം. അപകടമുണ്ടായാൽ പോലീസ്, അഗ്നിരക്ഷാസേന വകുപ്പുകളെ അറിയിക്കുക. വാഹനങ്ങൾ കൃത്യമായ ഇടവേളകളിൽ സർവീസ് സെന്‍ററുകളിൽ എത്തിച്ച് ഇന്ധനവും ഓയിലും പ്രവഹിക്കുന്ന ട്യൂബുകൾ ഉൾപ്പെടെയുള്ള സ്പെയർപാർട്സുകൾ പരിശോധിക്കണം. പഴയ വാഹനങ്ങളുടെ അറ്റകുറ്റപ്പണികളും മറ്റും കൃത്യമായി നടത്തി സുരക്ഷ ഉറപ്പാക്കണമെന്നും അദ്ദേഹം പറഞ്ഞു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]