ആശാ വര്‍ക്കര്‍മാരോട് സര്‍ക്കാര്‍ കാട്ടുന്നത് കടുത്ത അനീതി: ജോസഫ് എം. പുതുശേരി
1564868
Wednesday, June 4, 2025 7:55 AM IST
ചങ്ങനാശേരി: മര്യാദയോ മനുഷ്യപ്പറ്റോ ലവലേശം പോലുമില്ലാതെ വൈരനിര്യാതന ബുദ്ധിയോടുകൂടിയാണ് സര്‍ക്കാര്‍ ആശവര്‍ക്കര്‍മാരോട് പെരുമാറുന്നതെന്നും അതിന്‍റെ ഒടുവിലത്തെ ഉദാഹരണമാണ് പരിമിതമായ ഓണറേറിയം പോലും വെട്ടിക്കുറയ്ക്കുന്നതരത്തിലുള്ള നിബന്ധനകളെന്നും കേരള കോണ്‍ഗ്രസ് വൈസ് ചെയര്‍മാന്‍ ജോസഫ് എം. പുതുശേരി.
ആശ ഹെല്‍ത്ത് വര്‍ക്കേഴ്‌സ് അസോസിയേഷന്‍ ജനറല്‍ സെക്രട്ടറി എം.എ. ബിന്ദു നയിക്കുന്ന രാപകല്‍ സമര യാത്രയ്ക്ക് ചങ്ങനാശേരിയില്‍ നല്കിയ സ്വീകരണ സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം. സ്വാഗത സംഘം ചെയര്‍മാന്‍ ബാബു കുട്ടന്‍ചിറ അധ്യക്ഷത വഹിച്ചു.
കെഎസ്ആര്‍ടിസി ജംഗ്ഷനില്‍നിന്നാരംഭിച്ച റാലി കേരള കോണ്‍ഗ്രസ് ഉന്നതാധികാരിസമിതി അംഗം വി.ജെ. ലാലി ഉദ്ഘാടനം ചെയ്തു. ബി. രാധാകൃഷ്ണമേനോന്‍, സലിം പി. മാത്യു, പി.എച്ച്. നാസര്‍, പി.എന്‍. നൗഷാദ്, സാബു മുല്ലശേരി, പ്രഫ. ഗോപാലകൃഷ്ണപണിക്കര്‍, തോമസ് അക്കര, തോമസ് കെ. മാറാട്ടുകളം എന്നിവര്‍ പ്രസംഗിച്ചു.