ADVERTISEMENT

ADVERTISEMENT

നിർമിത ബുദ്ധിയുടെ അനന്ത സാധ്യതകൾ; ബോധവത്കരണ ക്ലാസ് നടത്തി

മണിക്കടവ്: സെന്‍റ് തോമസ് ഹയർ സെക്കൻഡറി സ്കൂൾ എൻഎസ്എസ് യൂണിറ്റിന്‍റെ ആഭിമുഖ്യത്തിൽ കരിയർ ഗൈഡൻസിന്‍റെ ഭാഗമായി 'റോബോട്ടിക്സ്- ആർട്ടിഫിഷ്യൽ ഇന്‍റലിജെന്‍റ്സിന്‍റെ അനന്തസാധ്യതകൾ' എന്ന വിഷയത്തിൽ ബോധവത്കരണ ക്ലാസ് സംഘടിപ്പിച്ചു.

ഇരിങ്ങാലക്കുട ക്രൈസ്റ്റ് സെന്‍റർ ഫോർ ഓപ്പൺ ലേണിംഗ് ഡയറക്ടറും സൃഷ്ടി റോബോട്ടിക്സ് സിഇഒയുമായ സുനിൽ പോൾ വിദ്യാർഥികൾക്ക് ക്ലാസെടുത്തു. വിവിധയിനം റോബോട്ടുകളെ പ്രദർശിപ്പിച്ച് സംശയ നിവാരണം നടത്തുകയും ചെയ്തു. സ്കൂൾ പ്രിൻസിപ്പൽ ഷാജി വർഗീസ് ആമുഖഭാഷണം നടത്തി. സീനിയർ അസിസ്റ്റന്‍റ് റിജോ ചാക്കോ പ്രസംഗിച്ചു. എൻഎസ്എസ് പ്രോഗ്രാം ഓഫീസർ കെ.ആർ. സുധീഷ്, സിബി ജോസഫ്, ജിഷ പ്രേംസ് എന്നിവർ നേതൃത്വം നൽകി.

ADVERTISEMENT

തൊടീക്കളത്ത് ബസ് കാത്തിരിപ്പ് കേന്ദ്രത്തിനു നേരേ ആക്രമണം

കൂത്തുപറമ്പ്: ചിറ്റാരിപ്പറമ്പ് പഞ്ചായത്തിലെ തൊടീക്കളത്ത് സിപിഎം പ്രവർത്തകർ സ്ഥാപിച്ച ബസ് കാത്തിരിപ്പ് കേന്ദ്രത്തിന് നേരെ ആക്രമണം. കൊല്ലപ്പെട്ട സിപിഎം പ്രവർത്തകൻ ജി. പവിത്രന്‍റെ സ്മരണക്കായി ജിപി നഗറിൽ സ്ഥാപിച്ച ബസ് കാത്തിരിപ്പ് കേന്ദ്രത്തിന്‍റെ ഫ്ലക്സ് ബോർഡ് കീറി നശിപ്പിച്ചതോടൊപ്പം കാവി പെയിന്‍റും അടിച്ചു. വ്യാഴാഴ്ച രാത്രിയോടെയാണ് സംഭവം. തൊടീക്കളത്തെ ആർഎസ്എസ് സംഘമാണ് ബസ് കാത്തിരിപ്പ് കേന്ദ്രത്തിന് നേരെ അതിക്രമം കാണിച്ചതെന്നാണ് പരാതി. കണ്ണവം പോലീസിൽ പരാതി നൽകിയതിനെ തുടർന്ന് പൊലീസ് സ്ഥലത്തെത്തി പരിശോധന നടത്തി. സമാധാനം നിലനിൽക്കുന്ന പ്രദേശത്ത് പ്രശ്നങ്ങൾ സൃഷ്ടിക്കാനുള്ള ആർഎസ്എസ് നീക്കത്തിൽ സിപിഎം ചിറ്റാരിപ്പറമ്പ് ലോക്കൽ കമ്മറ്റി പ്രതിഷേധിച്ചു. സംഭവത്തിൽ പ്രതിഷേധിച്ച് ഇന്ന് വൈകുന്നേരം തൊടിക്കളത്ത് പ്രകടനവും പ്രതിഷേധയോഗവും നടക്കും.

വേതനം മുടങ്ങിയതിനെതിരേ തൊഴിലാളികൾ സമരത്തിൽ; മേഘ കമ്പനിക്ക് പുതിയ പ്രതിസന്ധി

കാസർഗോഡ്: ദേശീയപാത ചെങ്കള-നീലേശ്വരം റീച്ചിലെ പ്രവൃത്തി നടത്തുന്ന മേഘ എന്‍ജിനിയറിംഗ് ആന്‍ഡ് ഇന്‍ഫ്രാസ്ട്രക്‌ചേഴ്‌സ് ലിമിറ്റഡിന്‍റെ ഇരുപത്തഞ്ചോളം സബ് കോണ്‍ട്രാക്ടര്‍മാരുടെ കീഴിലുള്ള തൊഴിലാളികള്‍ നാലു മാസമായി കുടിശികയുള്ള വേതനം ആവശ്യപ്പെട്ട് പണിമുടക്കി. മൈലാട്ടിയിലെ മേഘയുടെ ക്യാമ്പ് ഓഫീസിന് പുറത്ത് പ്രതിഷേധിച്ച തൊഴിലാളികള്‍ കുടിശിക തീര്‍ക്കുന്നതുവരെ ജോലിയില്‍ പ്രവേശിക്കില്ലെന്ന് പറഞ്ഞു. 25നകം പേയ്മെന്‍റുകള്‍ തീര്‍ക്കുമെന്ന് കമ്പനി വാഗ്ദാനം ചെയ്തിട്ടുണ്ടെന്ന് എംഇഐഎല്ലിന്‍റെ ലെയ്സണും വിജിലന്‍സ് ഓഫീസറുമായ അബ്ദുള്‍ നിസാര്‍ പറഞ്ഞു. "അവര്‍ ഞങ്ങളുടെ നേരിട്ടുള്ള ജീവനക്കാരല്ല, പക്ഷേ അവരുടെ കുടിശിക തീര്‍ക്കാന്‍ ഞങ്ങള്‍ സമ്മതിച്ചിട്ടുണ്ട്'- അദ്ദേഹം പറഞ്ഞു. ലോജിസ്റ്റിക്‌സ്, മണ്ണുനീക്കം, കോണ്‍ക്രീറ്റ്, റോഡ് നിര്‍മാണം തുടങ്ങിയ വിവിധ ജോലികള്‍ സബ് കോണ്‍ട്രാക്ടര്‍മാരാണ് ചെയ്യുന്നത്. മേഘയുടെ സ്വന്തം തൊഴിലാളികള്‍ ജോലി തുടരുന്നതിനാല്‍ ഈ മേഖലയിലെ മൊത്തത്തിലുള്ള പുരോഗതിയെ ഇതു ബാധിക്കുന്നില്ലെന്നും നിസാര്‍ കൂട്ടിച്ചേര്‍ത്തു. തൊഴിലാളികളുടെ പ്രതിഷേധത്തെ സബ് കോണ്‍ട്രാക്ടര്‍മാര്‍ സ്വന്തം പരാതികള്‍ ഉന്നയിക്കാന്‍ ഉപയോഗിക്കുകയാണെന്ന് മറ്റൊരു മേഘയുടെ ഉദ്യോഗസ്ഥന്‍ അവകാശപ്പെട്ടു. മേഘ കണ്‍സ്ട്രക്ഷന്‍സ് സബ്‌കോണ്‍ട്രാക്ടര്‍മാരുടെ ബില്ലുകള്‍ തീര്‍പ്പാക്കാത്തതിനാല്‍ തൊഴിലാളികള്‍ക്കുള്ള വേതനവിതരണത്തെ ബാധിച്ചു.അതേസമയം ഊരാളുങ്കല്‍ ലേബര്‍ കോണ്‍ട്രാക്ട് കോ-ഓപ്പറേറ്റീവ് സൊസൈറ്റി ലിമിറ്റഡ് 1,704.12 കോടി രൂപയ്ക്ക് വികസിപ്പിച്ച തലപ്പാടി-ചെങ്കള 39 കിലോമീറ്റര്‍ റീച്ച് ഏതാണ്ട് പൂര്‍ത്തിയായതായും 31നു മുമ്പ് ഉദ്ഘാടനം ചെയ്യുമെന്നും ഒരു എക്‌സിക്യൂട്ടീവ് പറഞ്ഞു. എന്നാല്‍ മേഘയുടെ ചെങ്കള മുതല്‍ നീലേശ്വരം വരെയും (37 കിലോമീറ്റര്‍) നീലേശ്വരം മുതല്‍ തളിപ്പറമ്പ് വരെയും (40 കിലോമീറ്റര്‍) വരെയുള്ള പാതകള്‍ ഷെഡ്യൂളില്‍ വളരെ പിന്നിലാണ്. എംഇഐഎല്ലിന് 1,697.55 കോടി രൂപയ്ക്ക് നല്‍കിയ ചെങ്കള-നീലേശ്വരം റീച്ച് തുടക്കത്തില്‍ 2024 ഏപ്രില്‍ 15നു പൂര്‍ത്തിയാക്കാന്‍ നിശ്ചയിച്ചിരുന്നു. പുതുക്കിയ സമയപരിധി ഇപ്പോള്‍ 2026 മാര്‍ച്ച് 31 ആണ്. അതുപോലെ, 2,251 കോടി രൂപയ്ക്ക് നിര്‍മിക്കുന്ന നീലേശ്വരം-തളിപ്പറമ്പ് പാത 2024 ജനുവരി 11നു പൂര്‍ത്തിയാകേണ്ടതായിരുന്നു. അതിന്‍റെ പുതിയ സമയപരിധി 2026 മാര്‍ച്ചാണ്. നിലവിലുണ്ടാകുന്ന വേതന പ്രതിഷേധം സമയപരിധ കൂടുതല്‍ നീട്ടാന്‍ കാരണമാകും. ചെങ്കള-നീലേശ്വരം റീച്ചിലെ പാര്‍ശ്വഭിത്തി തകര്‍ന്നതിനെതുടര്‍ന്ന് പുതുതായി ടെന്‍ഡര്‍ നടപടികളില്‍ പങ്കെടുക്കുന്നതില്‍ നിന്നും ദേശീയപാത അഥോറിറ്റി മേഘയെ വിലക്കിയിട്ടുണ്ട്.

പയ്യാമ്പലത്ത് ഉമ്മന്‍ചാണ്ടിയുടെ പേരുള്ള ശിലാഫലകം പുനഃസ്ഥാപിച്ച് കോണ്‍ഗ്രസ്

കണ്ണൂര്‍: ഉമ്മന്‍ചാണ്ടി മുഖ്യമന്ത്രിയായിരിക്കെ പയ്യാമ്പലത്ത് ഉദ്ഘാടനം ചെയ്ത കുട്ടികളുടെ പാര്‍ക്കിന്‍റെയും സീ പാത്ത്‌വേയുടെയും ശിലാഫലകം നീക്കം ചെയ്തത് പുനഃസ്ഥാപിച്ച് കോണ്‍ഗ്രസ്. ഡിസിസി പ്രസിഡന്‍റ് മാര്‍ട്ടിന്‍ ജോര്‍ജിന്‍റെ നേതൃത്വത്തിലാണ് ശിലാഫലകം പയ്യാമ്പലം പാത്ത് വേ കവാടത്തില്‍ സിമന്‍റിട്ടുറപ്പിച്ചത്. ഇതേ പദ്ധതിയുടെ നവീകരണം നടത്തിയത് ടൂറിസം മന്ത്രി പി.എ. മുഹമ്മദ് റിയാസ് ഉദ്ഘാടനം ചെയ്തതായി കാണിച്ച് പുതിയ ശിലാഫലകം സ്ഥാപിച്ചിരുന്നു. ഉമ്മന്‍ചാണ്ടിയുടെ പേരുള്ള ശിലാഫലകം അടര്‍ത്തിമാറ്റി അതേസ്ഥലത്ത് പുതിയ ശിലാഫലകം സ്ഥാപിക്കുകയായിരുന്നു. സംസ്ഥാന ടൂറിസം സെക്രട്ടറിക്കും, ഡിടിപിസി ചെയർമാനായ ജില്ലാ കളക്ടർക്കും ഡിടിപിസിക്കും പരാതി നൽകിയിട്ടും ഇത് പുനഃസ്ഥാപിക്കാന്‍ ടൂറിസം വകുപ്പില്‍ നിന്ന് നടപടിയുണ്ടാകാത്ത സാഹചര്യത്തിലാണ് ഡിസിസി പ്രസിഡന്‍റ് മാർട്ടിൻ ജോർന്‍റെ നേതൃത്വത്തില്‍ ശിലാഫലകം സിമന്‍റിട്ടുറപ്പിച്ചത്. ഉമ്മന്‍ചാണ്ടിയുടെ പേരുള്ള ശിലാഫലകം കുപ്പത്തൊട്ടിയില്‍ തള്ളി അതിന്മേല്‍ ചൂലെടുത്തുവച്ചതായാണ് കണ്ടത്. സംഭവമറിഞ്ഞയുടന്‍ കോണ്‍ഗ്രസ് പ്രവര്‍ത്തകര്‍ പ്രതിഷേധവുമായി രംഗത്തു വരികയും ശിലാഫലകം കവാടത്തില്‍ എടുത്തുവയ്ക്കുകയും ചെയ്തിരുന്നു. നേതാക്കളായ ടി.ഒ. മോഹനൻ, എം.കെ. മോഹനൻ, പി. മുഹമ്മദ് ഷമ്മാസ്, കായക്കൽ രാഹുൽ, വിജിൽ മോഹനൻ, കൂക്കിരി രാജേഷ്, പി.ഇന്ദിര, സി.എം. ഗോപിനാഥ്, റോബർട്ട് വെള്ളാംവെള്ളി, ഫർഹാൻ മുണ്ടേരി, കെ.കെ. ഷിബിൽ, ഷിബു ഫെർണാണ്ടസ്, പി.എ. ഹരി , വി.സി. നാരായണൻ, വിഹാസ് അത്താഴക്കുന്ന്,ആഷിത്ത് അശോകൻ തുടങ്ങിയവർ പങ്കെടുത്തു. മന്ത്രി റിപ്പോർട്ട് തേടി കണ്ണൂർ: സീ വ്യൂ പാർക്കിൽ മുൻ സർക്കാരിന്‍റെ കാലത്തെ നവീകരണ പ്രവർത്തനത്തിന്‍റെ ശിലാഫലകം മാറ്റിവച്ചു എന്ന വിഷയത്തിൽ അന്വേഷണം നടത്തുമെന്ന് മന്ത്രി പി.എ. മുഹമ്മദ് റിയാസ്. വിഷയം പരിശോധിച്ച് റിപ്പോര്‍ട്ട് നല്‍കാന്‍ ടൂറിസം സെക്രട്ടറിയെ ചുമതലപ്പെടുത്തിയതായി മന്ത്രി പറഞ്ഞു. 2022 മാര്‍ച്ച് ആറിനാണ് വീണ്ടും നവീകരിച്ച സീ വ്യൂ പാര്‍ക്കിന്‍റെ ഉദ്ഘാടനം നടന്നത്. ടൂറിസം മന്ത്രി എന്ന നിലയില്‍ ഉദ്ഘാടന ചടങ്ങില്‍ പങ്കെടുക്കുകയും ചെയ്തിരുന്നു. മുന്‍ സര്‍ക്കാരുകളുടെ കാലത്തു നടന്ന വികസനപ്രവര്‍ത്തനങ്ങള്‍ തമസ്കരിക്കുന്ന രീതി ഇടതുസർക്കാർ സ്വീകരിക്കാറില്ല. ഇക്കാര്യം പരിശോധിച്ച് ഉചിതമായ നടപടി സ്വീകരിക്കുമെന്നും മന്ത്രി അറിയിച്ചു.

പാലക്കയംതട്ടിലെ ഭൂമി ഉടമസ്ഥാവകാശം: 5.44 ഏക്കർ ഭൂമി ദേവസ്വത്തിന്‍റേതെന്ന് വിധി

നടുവിൽ: വിനോദസഞ്ചാര കേന്ദ്രമായ പാലക്കയം തട്ടിൽ വെള്ളാട്-നടുവിൽ ദേവസ്വത്തിന് ഭൂമിയുണ്ടെന്ന കേസിൽ ദേവസ്വത്തിനനുകൂലമായി കോടതിവിധി. തളിപ്പറമ്പ് മുൻസിഫ് കോടതിയാണ് വിധി പ്രഖ്യാപിച്ചത്. 292/14 സർവേ നമ്പറിൽപ്പെടുന്ന 5.44 ഏക്കർ ഭൂമിയുടെ ഉടമസ്ഥാവകാശമാണ് വിധിയിലൂടെ ദേവസ്വത്തിന് ലഭിച്ചത്. ഡിടിപിസി നടത്തുന്ന ടൂറിസം കേന്ദ്രത്തോട് ചേർന്നാണ് ഭൂമിയുള്ളത്. 2017ൽ അന്നത്തെ വെള്ളാട്-നടുവിൽ ദേവസ്വം ചെയർമാൻ ടി.എൻ. ബാലകൃഷ്ണനാണ് കോടതിയെ സമീപിച്ചത്. ടി. രാജേഷായിരുന്നു അന്ന് ദേവസ്വം എക്സിക്യൂട്ടീവ് ഓഫീസർ. ക്ഷേത്രരേഖകൾ പ്രകാരം ഇവിടെ കൈയേറ്റം നടുന്നിട്ടുണ്ടെന്ന കണ്ടെത്തലിനെത്തുടർന്നായിരുന്നു അഡ്വ. കെ.ജി.സുനിൽകുമാർ വഴി കേസ് ഫയൽ ചെയ്തത്. തുടർന്ന് വന്ന ദേവസ്വം ചെയർമാൻ വി. ബിനുവും ദേവസ്വം എക്സിക്യൂട്ടീവ് ഓഫീസർ സി.എ. അജീഷും കേസ് തുടർന്ന് നടത്തുകയായിരുന്നു. കോടതി നിയോഗിച്ച കമ്മീഷണറുടെ റിപ്പോർട്ടിന്‍റെ അടിസ്ഥാനത്തിലാണ് കോടതി വിധി. പാലക്കയത്തെ ഭൂമി കൈയേറ്റവുമായി ബന്ധപ്പെട്ട് ഒന്പതു കേസുകളാണ് ദേവസ്വം കൊടുത്തിട്ടുള്ളത്. അതിലൊന്നിലാണ് ഇപ്പോൾ വിധി വന്നത്.

കണ്ണൂർ സർവകലാശാലയിലെ പ്രൈവറ്റ് രജിസ്ട്രേഷൻ: നാക് ഡയറക്ടർ അന്വേഷണം തുടങ്ങി

സ്വന്തം ലേഖകൻ കണ്ണൂർ: കണ്ണൂർ സർവകലാശാലയിലെ കോഴ്സുകൾ പഠിക്കാനുള്ള പ്രൈവറ്റ് രജിസ്ട്രേഷനുമായി ബന്ധപ്പെട്ട് നാക് ഡയറക്‌ടറുടെ നേതൃത്വത്തിൽ അന്വേഷണം തുടങ്ങി. സെനറ്റംഗം ഷിനോ പി.ജോസ് യുജിസിക്ക് കൊടുത്ത പരാതിയുടെ അടിസ്ഥാനത്തിലാണ് അന്വേഷണം. നിലവിൽ, കണ്ണൂർ യൂണിവേഴ്സിറ്റിക്ക് വിദൂര വിദ്യാഭ്യാസ കോഴ്സുകൾ നടത്താനുള്ള അംഗീകാരമില്ല. നാകിന്‍റെ നിശ്ചിത ഗ്രേഡ് ലഭിച്ചാൽ മാത്രമാണ് വിദൂര വിദ്യാഭ്യാസ കോഴ്സുകൾ നടത്താനുള്ള അംഗീകാരം ലഭിക്കുകയുള്ളൂ. ഇതിനിടെയിലാണ് ബദൽ സംവിധാനമായി പ്രൈവറ്റ് രജിസ്ട്രേഷൻ യൂണിവേഴ്സിറ്റി നടത്തുന്നത്. സർവകലാശാലയുടെ കീഴിലുള്ള കോളജുകളിൽ വിവിധ കോഴ്സുകളിലായി പതിനായിരത്തോളം സീറ്റുകൾ ഒഴിവുണ്ട്. വിദ്യാർഥികൾക്ക് ഫീസ് പോലും ഇല്ലാതെ കോഴ്സുകളിൽ ചേർന്ന് പഠിക്കാൻ സാധിക്കും.എന്നാൽ, കണ്ണൂർ യൂണിവേഴ്സിറ്റി കഴിഞ്ഞ അഞ്ചുവർഷമായി പ്രൈവറ്റ് രജിസ്ട്രേഷൻ നിർബാധം തുടരുകയാണെന്നാണ് യുജിസിക്ക് നല്കിയ പരാതിയിൽ പറയുന്നത്. തുടർന്നാണ്, അന്വേഷണത്തിന് നാക് ഡയറക്ടറെ ചുമതലപ്പെടുത്തിയത്.

എടക്കാനം റിവർവ്യൂ പോയിന്‍റ് ആക്രമണം: പ്രതികൾക്കെതിരേ കാപ്പ ചുമത്തിയേക്കും

ഇരിട്ടി: എടക്കാനം റിവർ വ്യൂ പോയിന്‍റിൽ കഴിഞ്ഞ ദിവസം നടന്ന ആക്രമണ കേസിലെ പ്രതികൾക്കെതിരേ കാപ്പ ചുമത്താനുള്ള നടപടി ആരംഭിച്ചതായി സൂചന. റിമാൻഡിൽ കഴിയുന്ന സിപിഎം കാക്കയങ്ങാട് ലോക്കൽ കമ്മറ്റി അംഗവും പാലപ്പുഴ കൂടലാട് ബ്രാഞ്ച് സെക്രട്ടറിയുമായ ദേവാർ ഹൗസിൽ എ. രഞ്ജിത്ത് (32), സിപിഎം പ്രവർത്തകരായ മുഴക്കുന്ന് ഗ്രാമം ഗുണ്ടികയിലെ കൈമടയൻ ഹൗസിൽ അക്ഷയ് (25), കാക്കയങ്ങാട് പടിഞ്ഞാറെക്കണ്ടി പിടാങ്ങോട് സ്വദേശി അരൂട്ടി എന്ന അരുൺ (33) എന്നിവർക്കെതിരെയാണ് കാപ്പ നിയമപ്രകാരം കേസെടുക്കാനുള്ള നടപടി ആരംഭിച്ചത്. ഇതു സംബന്ധിച്ച്‌ പോലീസ് കോടതിയിൽ റിപ്പോർട്ട് നൽകിയതായാണ് അറിയുന്നത്. ശുഹൈബ് വധക്കേസിലെ രണ്ടാം പ്രതി കാക്കയങ്ങാട് പാലപ്പുഴ സ്വദേശി ദീപ്ചന്ദ് (34) ആണ് എടക്കാനം കേസിലെ ഒന്നാം പ്രതി. മുഴക്കുന്ന് കായപ്പനച്ചി സ്വദേശിയും സിപിഎം പ്രവർത്തകനുമായ അട്ടാപ്പി എന്ന ശ്രീലാൽ (24), കാക്കയങ്ങാട് പാലപ്പുഴ കൂടലാട് സ്വദേശിയും സിപിഎം പ്രവർത്തകനുമായ സുജീഷ് (23) എന്നിവരാണ് രണ്ടും മൂന്നും പ്രതികൾ. കാപ്പ കേസ് ചുമത്തുന്നതിനൊപ്പം കൊലക്കേസിൽ ഉൾപ്പെടെ പ്രതിയായ ദീപ് ചന്ദ്രന്‍റെ നിലവിലുള്ള ജാമ്യം റദ്ദാക്കുന്നതുൾപ്പെടെയുള്ള നടപടികളിലേക്കും പോലീസ് നീക്കം ആരംഭിച്ചിട്ടുണ്ട്. ഒന്നാംപ്രതി ദീപ്ചന്ദ് ഉൾപ്പെടെയുള്ള 11 പ്രതികൾ ഒളിവിലാണ്. ഇവർ കർണാടകയിലേക്ക് കടന്നതായാണ് പോലീസിന്‍റെ നിഗമനം. കർണാടക പോലീസിന്‍റെ സഹകരണത്തോടെ അന്വേഷണം ശക്തമാക്കിയതായും പ്രതികൾ ഉടൻ വലയിലാകുമെന്നും ഇരിട്ടി സിഐ എ. കുട്ടികൃഷണൻ പറഞ്ഞു.

സ്കൂൾ കോന്പൗണ്ടിലെ കെട്ടിടത്തിന്‍റെ മേല്‍ക്കൂര തകര്‍ന്നു വീണു

പയ്യന്നൂര്‍: പയ്യന്നൂര്‍ ഉപജില്ലാ വിദ്യാഭ്യാസ ഓഫീസ് കോമ്പൗണ്ടില്‍ പ്രവര്‍ത്തിക്കുന്ന ബിആര്‍സി കെട്ടിടത്തിന്‍റെ മേല്‍ക്കൂര തകര്‍ന്നു. എസ്എസ്‌കെ ഓഫീസും ഓട്ടിസം സെന്‍ററും പ്രവര്‍ത്തിക്കുന്ന കെട്ടിടത്തിന്‍റെ മുകളിലെ കോണ്‍ഫറന്‍സ് ഹാളിന്‍റെ മേല്‍ക്കൂരയാണ് ഇന്നലെ പുലർച്ചെ ശക്തമായ കാറ്റിലും മഴയിലും പൂര്‍ണമായും തകര്‍ന്നത്. മേല്‍ക്കൂരയുടെ ഷീറ്റുകളിൽ പലതും താഴെക്ക് വീണു. മേല്‍ക്കൂരയിലെ മറ്റ് ഷീറ്റുകൾ ഏതു സമയമത്തും താഴേക്ക് പതിക്കാമെന്ന നിലയിലാണ്. ഈ കെട്ടിടത്തിനു താഴെ ഭിന്നശേഷിക്കുട്ടികള്‍ക്കായുള്ള പരിശീലന കേന്ദ്രവും പ്രവർത്തിക്കുന്നുണ്ട്. പയ്യന്നൂര്‍ ബോയസ് ഹൈസ്‌കൂള്‍ വിദ്യാര്‍ഥികളുടെ സൈക്കിള്‍ പാര്‍ക്കിംഗ് കേന്ദ്രവും ഇവിടെയാണ്. എഇഒ ഓഫീസും ബിആര്‍സിയും സ്‌കൂളുകളും പ്രവര്‍ത്തിക്കുന്ന കോമ്പൗണ്ട് ആയതിനാല്‍ നിരവധി പേര്‍ എത്തുന്ന സ്ഥലം കൂടിയാണിത്. റെഡ് അലര്‍ട്ടിന്‍റെ ഭാഗമായി സ്‌കൂളിന് അവധിയായതിനാലാണ് അനിഷ്ട സംഭവങ്ങൾ ഒഴിവായത്. നിരവധി വിദ്യാഭ്യാസതല പരിശീലനങ്ങളും മറ്റും നടക്കുന്ന പ്രധാന ഹാളിന്‍റെ മേല്‍ക്കൂരയാണ് തകര്‍ന്നത്. ദിവസങ്ങള്‍ക്കുമുമ്പേ മേല്‍ക്കൂരയുടെ ഷീറ്റില്‍ പലതും ഇളകിയ നിലയിലായിരുന്നു. അധികാരികളുടെ ശ്രദ്ധയില്‍പ്പെടുത്തിയെങ്കിലും യാതൊരു നടപടിയും ഇതുവരെയും ഉണ്ടായില്ലെന്നും ആക്ഷേപമുണ്ട്. ഇതിനിടെയാണ് മേൽക്കൂര തകർന്നത്. ഇന്ന് അധ്യാപകര്‍ക്കായുള്ള പരിശീലനം ഇവിടെയായിരുന്നു നിശ്ചയിച്ചിരുന്നത്. മേല്‍ക്കൂര തകര്‍ന്നതിനെത്തുടർന്ന് പരിശീലന പരിപാടി മറ്റൊരിടത്തേക്ക് മാറ്റി. മേൽക്കൂര തകർന്ന് ചുവരുകള്‍ നനഞ്ഞ് തറയില്‍ വെള്ളം കെട്ടിക്കിടക്കുന്നത് കെട്ടിടത്തിന്‍റെ തകർച്ചയിലേക്ക് നീങ്ങുമോ എന്ന ആശങ്കയും ഉയരുന്നുണ്ട്.

ഹൈടെക് സൗകര്യങ്ങളുമായി ചെറുതാഴം കൃഷിഭവൻ

കണ്ണൂർ: സസ്യങ്ങൾക്ക് രോഗം വന്നാൽ അവയുടെ കാരണങ്ങളും പരിഹാരവും വിശദമായി അറിയണ മെങ്കിൽ ചെറുതാഴം പഞ്ചായത്ത് കൃഷിഭവൻ വരെ വന്നാൽ മതി. ഇവിടെയുള്ള സസ്യക്ലിനിക്കിൽ എല്ലാ സൗകര്യവും ഒരുക്കിയിട്ടുണ്ട്. രോഗകാരികൾ, ലക്ഷണങ്ങൾ, രോഗനിയന്ത്രണം തുടങ്ങി കർഷകർക്ക് ആവശ്യമുള്ള എല്ലാ അറിവുകളും ക്ലിനിക്കിൽ ലഭിക്കും. കൂടാതെ കീടനാശിനികൾ, അവയുടെ പ്രയോഗരീതി, കീടനിയന്ത്രണം തുടങ്ങിയ കൃഷി സംബന്ധമായ അറിവുകൾ സജ്ജമാക്കിയ സ്മാർട്ട് ക്ലാസ് റൂം സേവനവും ലഭിക്കും. സസ്യ ക്ലിനിക്കിൽ എല്ലാവിധ സസ്യരോഗങ്ങളുമായി ബന്ധപ്പെട്ട സ്‌പെസിമനുകൾ പ്രദർശിപ്പിച്ചിട്ടുണ്ട്. കർഷകർക്ക് ഇവ നേരിട്ടുകണ്ട് സസ്യങ്ങൾക്കുണ്ടാകുന്ന കീടബാധ, രോഗങ്ങൾ, ലക്ഷണങ്ങൾ എന്നിവ മനസിലാക്കാൻ കഴിയും. ഇവയുടെ വീഡിയോ, ചിത്രങ്ങൾ എന്നിവയും ഇവിടെ സജ്ജമാക്കിയ പ്രദർശന ബോർഡിൽ കാണാനാകും. വിവിധ കീടനാശിനികൾ, കുമിൾ നാശിനികൾ എന്നിവയും പ്രദർശിപ്പിച്ചിട്ടുണ്ട്. കൃഷിവകുപ്പിന്‍റെ 25 ലക്ഷം രൂപയും പഞ്ചായത്തിന്‍റെ 6.7 ലക്ഷം രൂപയും ചെലവഴിച്ചാണ് കൃഷിഭവന്‍റെ ഹൈടെക് വത്കരണം സാധ്യമായത്.

കനത്ത മഴയിൽ മതിൽലിടിഞ്ഞ് വീട് അപകടാവസ്ഥയിൽ

മട്ടന്നൂർ: കളറോഡിൽ കനത്ത മഴയിൽ മതിൽ ഇടിഞ്ഞ് വീട് അപകടാവസ്ഥയിലായി. വീടിന്‍റെ മുറ്റം അടക്കം തോട്ടിലേക്ക് പതിച്ചു. മട്ടന്നൂർ നഗരസഭയിലെ കളറോഡ് വാർഡിലെ ഒടിയത്തിൽ ഭാഗത്ത് താമസിക്കുന്ന നടുവനാട് സ്വദേശി കെ. ഷമീറിന്‍റെ വീടാണ് അപകടാവസ്ഥയിലായത്. വ്യാഴാഴ്ച്ച രാത്രി പെയ്ത കനത്ത മഴയിലായത് ചുറ്റുമതിൽ അടക്കം തകർന്നു തോട്ടിലേക്ക് പതിച്ചത്. വീടിനോട് ചേർന്നു ചെങ്കല്ലുകൊണ്ട് നിർമിച്ച മതിലാണ് തോട്ടിലേക്ക് ഇടിഞ്ഞു വീണത്. മതിൽ ഇടിഞ്ഞതോടെ വീടിന്‍റെ അടുക്കളയുടെയും കുളിമുറിയുടെയും ഭാഗം അപകടാവസ്ഥയിലായി. മുറ്റം വീണ്ടു കീറി തോട്ടിലേക്ക് ഏതുനിമിഷവും പതിക്കാമെന്ന അവസ്ഥയിലാണ്. വീടിന് ഭീഷണി നിലനിൽക്കുന്നതിനാൽ വീട്ടുകാരെ ബന്ധു വീട്ടിലേക്ക് മാറ്റി പാർപ്പിച്ചു. സംഭവ സ്ഥലം വാർഡ് കൗൺസിലർ പി.പി. അബ്ദുൾ ജലീൽ, ഇ.സി. മുഹമ്മദ് ഷഫീക്ക് എന്നിവർ സന്ദർശിച്ചു.

ഉമ്മൻചാണ്ടി അനുസ്മരണ ബോർഡ് നീക്കം ചെയ്തു; തർക്കത്തിനൊടുവിൽ പുനഃസ്ഥാപിച്ചു

കണ്ണൂർ: മുൻ മുഖ്യമന്ത്രിയും കോൺഗ്രസ് നേതാവുമായിരുന്ന ഉമ്മൻചാണ്ടിയുടെ രണ്ടാം ചരമവാർഷികത്തോടനുബന്ധിച്ചുള്ള അനുസ്മരണ സമ്മേളനത്തിന്‍റെ ബോർഡ് കോർപറേഷൻ ജീവനക്കാർ എടുത്തുമാറ്റി. സംഘാടകർ ചോദ്യം ചെയ്തതോടെ പുനഃസ്ഥാപിച്ചു. ഇന്നലെ രാവിലെ കണ്ണൂർ സ്റ്റേഡിയം കോർണറിലാണ് നാടകീയമായ സംഭവങ്ങൾ അരങ്ങേറിയത്. മുൻ കോൺഗ്രസ് നേതാവും കോർപറേഷൻ സ്റ്റാൻഡിംഗ് കമ്മിറ്റി ചെയർമാനുമായ പി.കെ. രാഗേഷ് നേതൃത്വം നൽകുന്ന രാജീവ്ജി കൾച്ചറൽ ഫോറം സംഘടിപ്പിച്ച ഉമ്മൻചാണ്ടി അനുസ്മരണ പരിപാടിയുടെ ബോർഡാണ് നീക്കം ചെയ്തത്. തുടർന്ന് പി.കെ. രാഗേഷ് ബോർഡ് മാറ്റിയവരെ കൊണ്ടുതന്നെ ബോർഡ് തിരികെ എത്തിച്ച് മാറ്റിയ സ്ഥലത്ത് പുനഃസ്ഥാപിച്ചു. ബോർഡുകൾ നീക്കം ചെയ്യണമെന്ന കോർപറേഷൻ അധികൃതരുടെ നിർദേശത്തെ തുടർന്നാണ് തങ്ങൾ ബോർഡുകൾ മാറ്റിയതെന്നാണ് ജീവനക്കാർ പറഞ്ഞത്. ഇന്നലെ രാവിലെ സ്റ്റേഡിയം കോർണറിൽ രാജീവ്ജി കൾച്ചറൽ ഫോറം സംഘടിപ്പിച്ച ഉമ്മൻചാണ്ടി അനുസ്മരണ പരിപാടി ആരംഭിക്കാനിരിക്കെയായിരുന്നു ബോർഡ് നീക്കം ചെയ്തത്. ഇതോടൊപ്പം മുൻ കെപിസിസി പ്രസിഡന്‍റ് കെ. സുധാകരൻ എംപിയുടെ അനുയായികൾ സ്റ്റേഡിയം കോർണറിൽ സ്ഥാപിച്ച കൂറ്റൻ ബോർഡും നീക്കം ചെയ്തു. കോൺഗ്രസ് കഴിഞ്ഞ ദിവസം കണ്ണൂരിൽ സംഘടിപ്പിച്ച സമരസംഗമത്തിന്‍റെ പോസ്റ്ററിൽ കെ. സുധാകരനെ ഒഴിവാക്കിയതിൽ പ്രതിഷേധിച്ച്സ്ഥാപിച്ച ബോർഡാണിത്. കെ. സുധാകരൻ തുടരും, കെ. സുധാകരന്‍റെ സ്ഥാനം പ്രവർത്തകരുടെ നെഞ്ചിലാണ് എന്ന വാചകത്തോടെ ഫോട്ടോയോടു കൂടി സ്ഥാപിച്ച കൂറ്റൻ ബോർഡാണ് നീക്കം ചെയ്തത്. മുൻ കെപിസിസി പ്രസിഡന്‍റും കണ്ണൂർ എംപിയുമായ കെ. സുധാകരന്‍റെ ബോർഡ് യുഡിഎഫ് ഭരിക്കുന്ന കണ്ണൂർ കോർപറേഷൻ മാറ്റിയത് ഇതിനകം ചർച്ചയായിട്ടുണ്ട്. നേരത്തെ സുധാകരനൊപ്പം നിൽക്കുകയും പിന്നീട് ഗ്രൂപ്പ് മാറുകയും ചെയ്ത കോർപറേഷൻ ഭരണസമിതിയിലെ ചില നേതാക്കാളാണ് ബോർഡുകൾ മാറ്റിച്ചതെന്നും ആരോപണം ഉയരുന്നുണ്ട്. അതേസമയം, അനധികൃതമായി സ്ഥാപിച്ച എല്ലാ ബോർഡുകൾ മാറ്റാനുള്ള തീരുമാന പ്രകാരമാണ് നടപടികളെന്നാണ് കോർപറേഷൻ അധികൃതർ നൽകുന്ന വിശദീകരണം.

എടൂർ മരിയൻ തീർഥാടന പള്ളിയിൽ കവാടം വെഞ്ചരിപ്പും തീർഥാടന കുർബാന ആരംഭവും ഇന്ന്

എടൂർ: ആർക്കി എപ്പിസ്കോപ്പൽ മരിയൻ തീർഥാടന കേന്ദ്രമായി ഉയർത്തിയ എടൂർ സെന്‍റ് മേരീസ് ഫൊറോന പള്ളിയിൽ പുതിയതായി നിർമിച്ച കവാടം വെഞ്ചരിപ്പും തീർഥാടന കുർബാന ആരംഭവും ഇന്ന് 4.30 ന് തലശsരി ആർച്ച്ബിഷപ് മാർ ജോസഫ് പാംപ്ലാനി ഉദ്ഘാടനം ചെയ്യും. വികാരി ഫാ. തോമസ് വടക്കേമുറിയിൽ, അസി. വികാരി ഫാ. അഭിലാഷ് ചെല്ലങ്കോട്ട് എന്നിവർ സഹകാർമികത്വം വഹിക്കും. 28 വരെ നടക്കുന്ന വിശുദ്ധ അൽഫോൻസാമ്മയുടെ തിരുനാളിനും ആർച്ച്ബിഷപ് കൊടിയുയർത്തും. ആധ്യാത്മിക മേഖലയിൽ തീർഥാടന പദവി അനുശാസിക്കുന്ന തിരുക്കർമങ്ങൾ ഏർപ്പെടുത്തുന്നതിന്‍റെ ഭാഗമായി എല്ലാ ശനിയാഴ്ചയും പ്രത്യേകം വൈകുന്നേരം ആറിന് കുർബാനയും മാതാവിന്‍റെ നൊവേനയും ദണ്ഡ വിമോചന ആശീർവാദവും നടത്തും. കുമ്പസാരത്തിനും സൗകര്യം ഉണ്ടാകും. വിശുദ്ധ അൽഫോൻസാമ്മയുടെ തിരുനാൾ ദിനങ്ങളിൽ 4.30 ന്‍റെ വിശുദ്ധബലിക്ക് ഒപ്പമായിരിക്കും ശനിയാഴ്ചകളിലെ പ്രത്യേക പ്രാർഥനകൾ നടക്കുക. 20 മുതൽ 28 വരെ വിശുദ്ധ അൽഫോൻസാമ്മയുടെ തിരുനാൾ ദിനങ്ങളിൽ വൈകുന്നേരം 4.30 ന് കുർബാന, വചനസന്ദേശം, നൊവേന എന്നിവ ഉണ്ടാകും. തിരുക്കർമങ്ങൾക്ക് യഥാക്രമം ഫാ. ജിന്‍റോ മൂന്നനാൽ, ഫാ. അലക്‌സ് നിരപ്പേൽ, ഫാ. മനോജ് കൊച്ചുപുരയ്ക്കൽ, ഫാ. ജോസഫ് ഒരപ്പാംകുഴിമറ്റത്തിൽ, ഫാ. റിബിൻ കളപ്പുരയ്ക്കൽ, ഫാ. ജോസഫ് കരിങ്ങാലിക്കാട്ടിൽ, ഫാ. നിധിൻ, ഫാ. ഷാരോൺ, തലശേരി വികാരി ജനറാൾ റവ.ഡോ. ജോസഫ് മുട്ടത്തുകുന്നേൽ എന്നിവർ മുഖ്യകാർമികത്വം വഹിക്കും.

കണ്ണൂർ നിയോജക മണ്ഡലത്തിൽ 146 പട്ടയങ്ങൾ വിതരണം ചെയ്തു

കണ്ണൂർ: ബോധപൂർവമായ ഭൂമി കൈയേറ്റങ്ങൾ ഒഴിപ്പിച്ച് അത് സാധാരണക്കാരന് നല്കുമെന്ന് റവന്യൂ മന്ത്രി കെ.രാജൻ. കുടിയേറ്റത്തെയും കൈയേറ്റത്തെയും സർക്കാർ ഒരുപോലെയല്ല കാണുന്നത്. കണ്ണൂർ നിയോജക മണ്ഡലം പട്ടയമേള കണ്ണൂരിൽ ഓൺലൈനായി ഉദ്ഘാടനം ചെയ്തു പ്രസംഗിക്കുകയായിരുന്നു മന്ത്രി. ഭൂരഹിതരായ മുഴുവൻ പേരേയും ഭൂമിക്ക് അവകാശികൾ ആക്കുന്നതിനുള്ള ശ്രമങ്ങളുമായി സർക്കാർ മുന്നോട്ട് പോകുകയാണ്. ഇതിനായി പട്ടയം നൽകുന്നതിനുള്ള വരുമാനപരിധി 2.5 ലക്ഷമായി ഉയർത്തും. ഇതുവരെ ഇത് ഒരുലക്ഷമായിരുന്നു. ഓരോ ആളുകളുടെയും പേരുള്ള വിശദാംശങ്ങൾ ഡിജിലോക്കറിൽ സൂക്ഷിച്ച് വിവിധ സർട്ടിഫിക്കറ്റുകൾ നല്കുന്നതിനുള്ള നടപടികൾ വേഗത്തിലാക്കുമെന്നും മന്ത്രി പറഞ്ഞു. നിയോജക മണ്ഡലത്തിൽ 146 പട്ടയങ്ങൾ വിതരണം ചെയ്തു. കണ്ണൂർ മേയർ മുസ്‌ലിഹ് മഠത്തിൽ അധ്യക്ഷത വഹിച്ചു. മന്ത്രി കടന്നപ്പള്ളി രാമചന്ദൻ ഓൺലൈനായി സംസാരിച്ചു. ജില്ലാ കളക്ടർ അരുൺ കെ. വിജയൻ പട്ടയങ്ങൾ വിതരണം ചെയ്തു. രണ്ടു ലക്ഷംവീട് പട്ടയങ്ങളും 144 എൽടി പട്ടയങ്ങളുമാണ് മേളയിൽ വിതരണം ചെയ്തത്. പി.കെ. പ്രമീള, എ. അനീഷ, വി.കെ. സുരേഷ്ബാബു, കണ്ണൂർ എഡിഎം കല ഭാസ്‌കർ, കണ്ണൂർ തഹസിൽദാർ ആഷിക് തോട്ടോൻ, ഭൂരേഖ തഹസിൽദാർ എം.കെ. മനോജ്കുമാർ, വിവിധ രാഷ്‌ട്രീയ പാർട്ടി പ്രതിനിധികൾ എന്നിവർ പ്രസംഗിച്ചു.

ഇനിയെങ്കിലും കണ്ണു തുറക്കൂ..!

ഉളിക്കൽ: കൊല്ലത്ത് വിദ്യാർഥി ഷോക്കേറ്റു മരിച്ച സാഹചര്യത്തിൽ പരിക്കളം ശാരദാവിലാസം എയുപി സ്കൂളിന് സമീപത്തെ ട്രാൻസ്‌ഫോർമറും, ഇലക്‌ട്രിക് പോസ്റ്റും മാറ്റി സ്ഥാപിക്കണമെന്ന ആവശ്യം ശക്തം. ഇക്കാര്യം ചൂണ്ടിക്കാട്ടി വൈദ്യുതി മന്ത്രി, വിദ്യാഭ്യാസ മന്ത്രി, ഉളിക്കൽ കെഎസ്‌ഇബി സെക്‌ഷൻ ഓഫീസ് എന്നിവർക്ക് സ്കൂൾ അധികൃതർ കത്തയച്ചു. സ്കൂളിനോടു ചേർന്ന് അപകടകരമായ നിലയിൽ സ്ഥാപിച്ചിട്ടുള്ള ട്രാൻസ്‌ഫോർമർ, സമീപത്തെ മറിഞ്ഞു വീഴാറായ വൈദ്യുത തൂൺ എന്നിവ മാറ്റി സ്ഥാപിക്കണമെന്നാണ് ആവശ്യം. നേരത്തെയും ഇക്കാര്യം ചൂണ്ടിക്കാട്ടി കെഎസ്‌ഇബി ഉളിക്കൽ സെക്‌ഷൻ ഓഫീസിൽ പരാതി നല്കിരുന്നതാണ്. ഇനിയെങ്കിലും ഉചിതമായ തീരുമാനം ഉണ്ടാകുമെന്ന പ്രതിക്ഷയിലാണ് സ്കൂൾ അധികൃതരും രക്ഷിതാക്കളും

അന്താരാഷ്‌ട്ര കോൺഫറൻസ്

തളിപ്പറമ്പ്: സർ സയ്യിദ് കോളജിൽ ബോട്ടണി വിഭാഗം സുവർണജൂബിലി ആഘോഷങ്ങളുടെ ഭാഗമായി 21 മുതൽ 23 വരെ മൂന്നാമത് അന്താരാഷ്‌ട്ര കോൺഫറൻസ് സംഘടിപ്പിക്കുന്നു. ഡോ. അലി കുംബ്ലേ ഉദ്ഘാടനം നിർവഹിക്കും. കോളജിലെ പൂർവ വിദ്യാർഥികളായ ഡോ. സുജിത് പുതിയപുരയിൽ (പെർഡ്യൂ യൂണിവേഴ്സിറ്റി, യുഎസ്), ഡോ. അജിത് ആനന്ദ് (കാലിഫോർണിയ, യുഎസ്എ), ഡോ. ബിന്ദു നമ്പ്യാർ (യുഎസ്എ), ഡോ. എ.കെ. വിജയൻ (മുൻ സീനിയർ ശാസ്ത്രജ്ഞൻ, സുഗന്ധവിള ഗവേഷണ കേന്ദ്രം, കോഴിക്കോട്) കൂടാതെ ഡോ. സുബ്രഹ്മണ്യൻ (ഐഐടി ഗാന്ധിനഗർ, ഗുജറാത്ത്), ഡോ. ജോസ് ടി. പുത്തൂർ (പ്രഫസർ, കാലിക്കറ്റ് സർവകലാശാല) എന്നിവരും സെമിനാറിൽ പങ്കെടുക്കും. 250 പേർ കോൺഫറൻസിൽ പങ്കെടുക്കും. നാല്പതോളം ഗവേഷണ പ്രബന്ധങ്ങൾ അവതരിപ്പിക്കും. ഉദ്ഘാടന ചടങ്ങിൽ കോളജ് പ്രിൻസിപ്പൽ ഡോ. ഇസ്മായിൽ ഓലയിക്കര, കോളജ് മാനേജർ പി. മഹമൂദ്, അള്ളാംകളം മഹമ്മൂദ്, കോളജ് കോ-ഓർഡിനേറ്റർ ഡോ. എസ്.എം. ഷാനവാസ്, പ്രഫ. സി. കെ. വാണി ദേവി, ഡോ. കെ.എം. ഖലീൽ എന്നിവർ പ്രസംഗിക്കും. പത്രസമ്മേളനത്തിൽ ബോട്ടണി വകുപ്പ് മേധാവി ഡോ. പി. ശ്രീജ, ഗായത്രി ആർ. നമ്പ്യാർ, ഡോ. എ.കെ. അബ്ദുസലാം, കോൺഫറൻസ് കൺവീനർ ഡോ. എ.എം. ഷാക്കിറ എന്നിവർ പങ്കെടുത്തു.

കനത്ത മഴയിൽ വീട് തകർന്നു

രയറോം: കഴിഞ്ഞ ദിവസം രാത്രിയിൽ ഉണ്ടായ കനത്ത മഴയിൽ വീട് തകർന്നു. രയറോം പുളിയിലംകുണ്ടിലെ കാരിവേലിൽ ലൂക്കയുടെ വീടിന്‍റെ അടുക്കള ഭാഗമാണ് പൂർണമായി തകർന്നു വീണത്. വീട്ടമ്മ അത്ഭുതകരമായി രക്ഷപെട്ടു. അവർ അടുക്കളയിൽ നിന്ന് അടുത്ത റൂമിലേക്ക് പോയ സമയത്താണ് തകർന്ന് വീണത്. ഈ സമയം വീട്ടിൽ പ്രായമായ ദമ്പതിമാർ മാത്രമാണ് ഉണ്ടായിരുന്നത്.

ഉമ്മൻചാണ്ടി അനുസ്മരണ ബോർഡ് നീക്കം ചെയ്തു; തർക്കത്തിനൊടുവിൽ പുനഃസ്ഥാപിച്ചു

കണ്ണൂർ: മുൻ മുഖ്യമന്ത്രിയും കോൺഗ്രസ് നേതാവുമായിരുന്ന ഉമ്മൻചാണ്ടിയുടെ രണ്ടാം ചരമവാർഷികത്തോടനുബന്ധിച്ചുള്ള അനുസ്മരണ സമ്മേളനത്തിന്‍റെ ബോർഡ് കോർപറേഷൻ ജീവനക്കാർ എടുത്തുമാറ്റി. സംഘാടകർ ചോദ്യം ചെയ്തതോടെ പുനഃസ്ഥാപിച്ചു. ഇന്നലെ രാവിലെ കണ്ണൂർ സ്റ്റേഡിയം കോർണറിലാണ് നാടകീയമായ സംഭവങ്ങൾ അരങ്ങേറിയത്. മുൻ കോൺഗ്രസ് നേതാവും കോർപറേഷൻ സ്റ്റാൻഡിംഗ് കമ്മിറ്റി ചെയർമാനുമായ പി.കെ. രാഗേഷ് നേതൃത്വം നൽകുന്ന രാജീവ്ജി കൾച്ചറൽ ഫോറം സംഘടിപ്പിച്ച ഉമ്മൻചാണ്ടി അനുസ്മരണ പരിപാടിയുടെ ബോർഡാണ് നീക്കം ചെയ്തത്. തുടർന്ന് പി.കെ. രാഗേഷ് ബോർഡ് മാറ്റിയവരെ കൊണ്ടുതന്നെ ബോർഡ് തിരികെ എത്തിച്ച് മാറ്റിയ സ്ഥലത്ത് പുനഃസ്ഥാപിച്ചു. ബോർഡുകൾ നീക്കം ചെയ്യണമെന്ന കോർപറേഷൻ അധികൃതരുടെ നിർദേശത്തെ തുടർന്നാണ് തങ്ങൾ ബോർഡുകൾ മാറ്റിയതെന്നാണ് ജീവനക്കാർ പറഞ്ഞത്. ഇന്നലെ രാവിലെ സ്റ്റേഡിയം കോർണറിൽ രാജീവ്ജി കൾച്ചറൽ ഫോറം സംഘടിപ്പിച്ച ഉമ്മൻചാണ്ടി അനുസ്മരണ പരിപാടി ആരംഭിക്കാനിരിക്കെയായിരുന്നു ബോർഡ് നീക്കം ചെയ്തത്. ഇതോടൊപ്പം മുൻ കെപിസിസി പ്രസിഡന്‍റ് കെ. സുധാകരൻ എംപിയുടെ അനുയായികൾ സ്റ്റേഡിയം കോർണറിൽ സ്ഥാപിച്ച കൂറ്റൻ ബോർഡും നീക്കം ചെയ്തു. കോൺഗ്രസ് കഴിഞ്ഞ ദിവസം കണ്ണൂരിൽ സംഘടിപ്പിച്ച സമരസംഗമത്തിന്‍റെ പോസ്റ്ററിൽ കെ. സുധാകരനെ ഒഴിവാക്കിയതിൽ പ്രതിഷേധിച്ച്സ്ഥാപിച്ച ബോർഡാണിത്. കെ. സുധാകരൻ തുടരും, കെ. സുധാകരന്‍റെ സ്ഥാനം പ്രവർത്തകരുടെ നെഞ്ചിലാണ് എന്ന വാചകത്തോടെ ഫോട്ടോയോടു കൂടി സ്ഥാപിച്ച കൂറ്റൻ ബോർഡാണ് നീക്കം ചെയ്തത്. മുൻ കെപിസിസി പ്രസിഡന്‍റും കണ്ണൂർ എംപിയുമായ കെ. സുധാകരന്‍റെ ബോർഡ് യുഡിഎഫ് ഭരിക്കുന്ന കണ്ണൂർ കോർപറേഷൻ മാറ്റിയത് ഇതിനകം ചർച്ചയായിട്ടുണ്ട്. നേരത്തെ സുധാകരനൊപ്പം നിൽക്കുകയും പിന്നീട് ഗ്രൂപ്പ് മാറുകയും ചെയ്ത കോർപറേഷൻ ഭരണസമിതിയിലെ ചില നേതാക്കാളാണ് ബോർഡുകൾ മാറ്റിച്ചതെന്നും ആരോപണം ഉയരുന്നുണ്ട്. അതേസമയം, അനധികൃതമായി സ്ഥാപിച്ച എല്ലാ ബോർഡുകൾ മാറ്റാനുള്ള തീരുമാന പ്രകാരമാണ് നടപടികളെന്നാണ് കോർപറേഷൻ അധികൃതർ നൽകുന്ന വിശദീകരണം.

വിശുദ്ധ അൽഫോൻസാമ്മയുടെ തിരുനാൾ ഇന്നു മുതൽ

ഏറ്റുപാറ സെന്‍റ് അൽഫോൻസ തീർഥാടന പളളിയിൽ ചെമ്പേരി: ഏറ്റുപാറ സെന്‍റ് അൽഫോൻസ തീർഥാടന പള്ളിയിൽ 10 ദിവസത്തെ തിരുനാൾ ആഘോഷങ്ങൾക്ക് ഇന്ന് തുടക്കമാകും. വൈകുന്നേരം 3.45ന് ഇടവക വികാരി ഫാ. ജോസഫ് ചെരിയംകുന്നേൽ കൊടിയേറ്റും. തുടർന്ന് തിരുസ്വരൂപ പ്രതിഷ്ഠ, ആരാധന, വിശുദ്ധ കുർബാന, വചന സന്ദേശം, നൊവേന എന്നിവക്ക് ഫാ. മാത്യു വേങ്ങക്കുന്നേൽ കാർമികത്വം വഹിക്കും. 27 വരെ എല്ലാ ദിവസവും വൈകുന്നേരം നാലു മുതൽ ആരാധന, വിശുദ്ധ കുർബാന, വചന സന്ദേശം, നൊവേന എന്നിവയുണ്ടായിരിക്കും. ഫാ. നോബിൾ ഓണംകുളം, ഫാ. ജോൺ നൂറമ്മാക്കൽ, ഫാ. ജെയ്സൺ വാഴകാട്ട്, ഫാ. ക്രിസ് കടക്കുഴയിൽ, ഫാ. ജയിംസ് ചെല്ലങ്കോട്ട്, ഫാ. ഷോജിൻ കണിയാംകുന്നേൽ, ഫാ. മാത്യു കുന്നേൽ, ഫാ. തോമസ് മേനപ്പാട്ട്പടിയ്ക്കൽ, മോൺ. മാത്യു ഇളംതുരുത്തിപ്പടവിൽ എന്നിവർ വിവിധ ദിവസങ്ങളിൽ തിരുക്കർമങ്ങൾക്ക് നേതൃത്വം നൽകും. സമാപന ദിനമായ 28ന് രാവിലെ 10ന് ആഘോഷമായ തിരുനാൾ കുർബാന, വചന സന്ദേശം, ലദീഞ്ഞ് എന്നിവക്ക് മാനന്തവാടി രൂപത സഹായമെത്രാൻ മാർ അലക്സ് താരാമംഗലം മുഖ്യകാർമികത്വം വഹിക്കും. ഉച്ചക്ക് 12.30ന് വിശുദ്ധ അൽഫോൻസാമ്മയുടെ രൂപം വാഴിക്കൽ. തുടർന്ന് സമാപനാശീർവാദം, പാച്ചോർ നേർച്ച എന്നിവയുണ്ടായിരിക്കും. തേർമല അൽഫോൻസാഗിരി പള്ളിയിൽ ആലക്കോട്: തേർമല അൽഫോൻസാഗിരി പള്ളിയിൽ 10 ദിവസം നീണ്ടു നിൽക്കുന്ന തിരുനാൾ ആഘോഷങ്ങൾക്ക് ഇന്നു തുടക്കമാകും. വൈകുന്നേരം 4.30ന് തിരുനാൾ കൊടിയേറ്റ്. തുടർന്ന് വിശുദ്ധ കുർബാനയും നൊവേനയും നടക്കും. തിരുകർമങ്ങൾക്ക് ഫാ. റോയി കുഴിപ്പാക്കൽ കാർമികത്വം വഹിക്കും. നാളെ ഉച്ചകഴിഞ്ഞു 3.30ന് ജപമാലയും തുടർന്ന് നാലിന് വിശുദ്ധ കുർബാന, വചന സന്ദേശം, നൊവേന ഫാ. തോമസ് ആമക്കാട്ട് കാർമികത്വം വഹിക്കും. 21 മുതൽ 27 വരെ എല്ലാ ദിവസവും വൈകുന്നേരം നാലിന് ജപമാലയും 4.30ന് വിശുദ്ധ കുർബാന, വചന സന്ദേശം, നൊവേന എന്നിവയും നടക്കും. ഈ ദിവസങ്ങളിലെ തിരുകർമങ്ങൾക്ക് ഫാ. മാത്യു ശാസ്‌താംപടവിൽ, ഫാ. ജോമി തൊട്ടിയിൽ, ഫാ. സെബാസ്റ്റ്യൻ പുതുപ്പള്ളിൽ, ഫാ. തോമസ് മണവത്ത്, ഫാ. തോമസ് ചെരുവിൽ, റവ. ഡോ. തോമസ് തെങ്ങുംപള്ളിൽ, ഫാ. സാബു പുതുശേരി എന്നിവർ കാർമികത്വം വഹിക്കും. പ്രധാന തിരുനാൾ ദിനമായ 28ന്‌ രാവിലെ 9.30ന് ജപമാല,10ന് തിരുനാൾ കുർബാന, വചനസന്ദേശം റവ. ഡോ. മാത്യു പട്ടമന കാർമികത്വം വഹിക്കും. തുടർന്ന് ലദീഞ്ഞ്, പ്രദക്ഷിണം, സമാപനാശീർവാദം, പാച്ചോർ നേർച്ചയോടെ തിരുനാൾ സമാപിക്കും.

പ്രിയ നേതാവിനെ അനുസ്മരിച്ച് നാട്

കണ്ണൂർ: മുൻ മുഖ്യമന്ത്രി ഉമ്മൻചാണ്ടിയുടെ രണ്ടാം ചരമവാർഷികദിനത്തിൽ ഡിസിസി ഓഫീസിൽ പുഷ്പാർച്ചനയും അനുസ്‌മരണവും നടന്നു. ഡിസിസി പ്രസിഡന്‍റ് മാർട്ടിൻ ജോർജ് പുഷ്പാർച്ചനയ്ക്ക് നേതൃത്വം നൽകി. കെപിസിസി ജനറൽ സെക്രട്ടറി സോണി സെബാസ്റ്റ്യൻ അനുസ്‌മരണ സമ്മേളനം ഉദ്‌ഘാടനം ചെയ്തു. കക്ഷി രാഷ‌ട്രീയത്തിനതീതമായി ജനങ്ങളുടെ പ്രയാസങ്ങളും ബുദ്ധിമുട്ടുകളും പരിഹരിക്കാൻ തന്‍റെ ജീവിതം ഉഴിഞ്ഞുവച്ച മനുഷ്യസ്നേഹിയായിരുന്നു ഉമ്മൻ ചാണ്ടിയെന്ന് സോണി സെബാസ്റ്റ്യൻ പറഞ്ഞു. ഒരു ഭരണാധികാരി എങ്ങിനെയായിരിക്കണമെന്ന് തന്‍റെ ജീവിതത്തിലൂടെ സമൂഹത്തിന് കാണിച്ചു കൊടുത്ത നേതാവായിരുന്നു ഉമ്മൻചാണ്ടിയെന്നും അദ്ദേഹം പറഞ്ഞു. നേതാക്കളായ പ്രഫ. എ.ഡി. മുസ്തഫ, പി.ടി. മാത്യു, മുൻ മേയർ ടി.ഒ. മോഹനൻ, ഐഎൻടിയുസി ജില്ലാ പ്രസിഡന്‍റ് ജോസ് ജോർജ് പ്ലാത്തോട്ടം, യൂത്ത് കോൺഗ്രസ് ജില്ലാ പ്രസിഡന്‍റ് വിജിൽ മോഹനൻ, മഹിളാ കോൺഗ്രസ് ജില്ലാ പ്രസിഡന്‍റ് ശ്രീജ മഠത്തിൽ, എം.പി. വേലായുധൻ, കെ. പ്രമോദ്, റിജിൽ മാക്കുറ്റി, വി.വി. പുരുഷോത്തമൻ, രാജീവൻ എളയാവൂർ, അമൃത രാമകൃഷ്ണൻ, സുരേഷ് ബാബു എളയാവൂർ, വി.പി. അബ്ദുൾ റഷീദ്, ടി. ജയകൃഷ്ണൻ, എം.കെ. മോഹനൻ, റഷീദ് കവ്വായി, കെ.പി. സാജു, പി. മുഹമ്മദ് ഷമ്മാസ്, കെ. ബാലകൃഷ്ണൻ, ലിഷ ദീപക്, നൗഷാദ് ബ്ലാത്തൂർ, സി.വി. സന്തോഷ്, ടി. ജനാർദ്ദനൻ, സി.ടി. ഗിരിജ, കാട്ടാമ്പള്ളി രാമചന്ദ്രൻ, കായക്കൽ രാഹുൽ, കൂക്കിരി രാജേഷ്, സി.എം. ഗോപിനാഥ്, കെഎസ്‌യു ജില്ലാ പ്രസിഡന്‍റ് എം.സി. അതുൽ, ഫർഹാൻ മുണ്ടേരി, കെ. ഉഷ കുമാരി, പി. അനൂപ്, ഹംസ ഹാജി എന്നിവർ പങ്കെടുത്തു. ഉമ്മൻചാണ്ടിയുടെ ഓർമദിനത്തിൽ അൺഓർഗനൈസ്ഡ് വർക്കേഴ്സ് ആൻഡ് എംപ്ലോയീസ് കോൺഗ്രസ് ജില്ലാ കമ്മിറ്റിയുടെ നേതൃത്വത്തിൽ ജില്ലാ ആശുപത്രിയിൽ നടത്തിയ രക്തദാന ക്യാമ്പ് ജില്ലാ പ്രസിഡന്‍റ് നൗഷാദ് ബ്ലാത്തൂർ രക്തദാനം നടത്തി ഉദ്ഘാടനം ചെയ്തു. ജില്ലാ വൈസ് പ്രസിഡന്‍റ് ജി. ബാബു അധ്യക്ഷത വഹിച്ചു. തലശേരി ജനറൽ ആശുപത്രിയിൽ നിയോജകമണ്ഡലം പ്രസിഡന്‍റ് വി.പി. പ്രമോദ്, കണ്ണൂർ ഗവ. മെഡിക്കൽ കോളജിൽ കെ. രമേശൻ എന്നിവർ രക്തദാനത്തിന് നേതൃത്വം നൽകി. ഉമ്മൻചാണ്ടി സ്മൃതി ദിനത്തോടനുബന്ധിച്ച് ഫെഡറേഷൻ ഓഫ് ഓൾ കേരളാ യൂണിവേഴ്സിറ്റി എംപ്ലോയീസ് ഓർഗനൈസേഷന്‍റെ (എഫ്‌യുഇഒ) ആഭിമുഖ്യത്തിൽ കേരളത്തിലെ സർവകലാ ശാല കാന്പസുകളിൽ അനുസ്മരണ സമ്മേളനങ്ങൾ സംഘടിപ്പിച്ചു. താവക്കര കാമ്പസിൽ സംഘടിപ്പിച്ച സമ്മേളനം ഡിസിസി ജനറൽ സെക്രട്ടറി ബ്രിജേഷ്കുമാർ ഉദ്ഘാടനം ചെയ്തു. രാവിലെ ഛായാചിത്ര ത്തിനു മുന്നിൽ പുഷ്പാർച്ചനയും നടത്തി. കൂടാതെ ജീവകാരുണ്യ പ്രവർത്തനങ്ങളുടെ ഭാഗമായി കുട്ടികളുടെ സ്ഥാപനത്തിൽ ഭക്ഷ ണവും നൽകി. സംഘടന പ്രസിഡന്‍റ് വി.ഒ. പ്രിയ അധ്യക്ഷത വഹിച്ചു. കേരള എൻജിഒ അസോസിയേഷൻ ജില്ലാ കമ്മിറ്റിയുടെ ആഭിമുഖ്യത്തിൽ കളക്ടറേറ്റ് വളപ്പിൽ ഉമ്മൻ‌ചാണ്ടിയുടെ ഫോട്ടോയ്ക്ക് മുന്നിൽ പുഷ്പാർച്ചനയും അനുസ്മരണവും നടത്തി. ജില്ലാ പ്രസിഡന്‍റ് കെ.വി. മഹേഷ് യോഗം ഉദ്ഘാടനം ചെയ്തു. വൈസ് പ്രസിഡന്‍റ് ഇ.പി. അബ്ദുള്ള അധ്യക്ഷത വഹിച്ചു. ജില്ലയിലെ വിവിധ ബ്രാഞ്ച് കമ്മിറ്റികളുടെ നേതൃത്വത്തിൽ വിവിധ സ്ഥലങ്ങളിൽ അനുസ്മരണവും പുഷ്പാർച്ചനയും നടത്തി. തളിപ്പറമ്പിൽ സംസ്ഥാന സെക്രട്ടേറിയറ്റ് അംഗം കെ.വി. അബ്ദുൾ റഷീദ് ഉദ്ഘാടനം ചെയ്തു. എം. സനീഷ് അധ്യക്ഷത വഹിച്ചു. പരിയാരം മെഡിക്കൽ കോളജിൽ ജില്ലാ ജോയിന്‍റ് സെക്രട്ടറി പി. പ്രദീപ് ഉദ്ഘാടനം ചെയ്തു. യു.കെ. മനോഹരൻ അധ്യക്ഷത വഹിച്ചു. പയ്യന്നൂരിൽ എം.കെ. മധുസൂദനൻ ഉദ്ഘാടനം ചെയ്തു. എസ്. ഷെറിൻ, എം.കെ. ഷിജിത്ത് തുടങ്ങിയവർ പ്രസംഗിച്ചു. തലശേരിയിൽ സജീവൻ മണപ്പാട്ടി, സതീശൻ നാൽപ്പാടി, കെ. ഉണ്ണികൃഷ്ണൻ തുടങ്ങിയവർ നേതൃത്വം നല്കി. ചെമ്പേരി: കേരള എൻജിഒ അസോസിയേഷൻ ശ്രീകണ്ഠപുരം ബ്രാഞ്ചിന്‍റെ ആഭിമുഖ്യത്തിൽ സംഘടിപ്പിച്ച ഉമ്മൻ ചാണ്ടി അനുസ്മരണം ഏരുവേശി പഞ്ചായത്ത്‌ കോമ്പൗണ്ടിൽ നടന്നു. പഞ്ചായത്ത്‌ പ്രസിഡന്‍റ് മിനി ഷൈബി ഉദ്ഘാടനം ചെയ്തു. അസോസിയേഷൻ സംസ്ഥാന കമ്മിറ്റി അംഗം കെ. രാജേഷ് ബാബു അനുസ്മരണ പ്രഭാഷണം നടത്തി. ഏരുവേശി പിഎച്ച്സിയിൽ നടന്ന അനുസ്മരണച്ചടങ്ങ് പഞ്ചായത്ത്‌ വൈസ് പ്രസിഡന്‍റ് മധു തൊട്ടിയിൽ ഉദ്ഘാടനം ചെയ്തു. എൻജിഒ അസോസിയേഷൻ സംസ്ഥാന കമ്മിറ്റി അംഗം കെ. രാജേഷ് ബാബു, സംസ്ഥാന കൗൺസിലർ സി.എം. പവിത്രൻ എന്നിവർ പ്രസംഗിച്ചു. തടിക്കടവ്: ബാലപുരം വാർഡ് കോൺഗ്രസ് കമ്മിറ്റിയുടെ ആഭിമുഖ്യത്തിൽ ബാലപുരം ടൗണിൽ ഉമ്മൻചാണ്ടി അനുസ്മരണവും പുഷ്പാർച്ചനയും ഭക്ഷ്യ കിറ്റ് വിതരണവും ചപ്പാരപ്പടവ് പഞ്ചായത്ത് മുൻ പ്രസിഡന്‍റ് സജി ഓതറ ഉത്ഘാടനം ചെയ്തു. വാർഡ് കോൺഗ്രസ് പ്രസിഡന്‍റ് സോജൻ വയലാമണ്ണിൽ അധ്യക്ഷത വഹിച്ചു. ചെറുപുഴ: ചെറുപുഴ മണ്ഡലം കോൺഗ്രസ് കമ്മിറ്റിയുടെ ആഭിമുഖ്യത്തിൽ ഉമ്മൻചാണ്ടി അനുസ്മരണവും പുഷ്പാർച്ചനയും നടത്തി. ചെറുപുഴ ബ്ലോക്ക് പ്രസിഡന്‍റ് മഹേഷ് കുന്നുമ്മൽ ഉദ്ഘാടനം ചെയ്തു. മണ്ഡലം പ്രസിഡന്‍റ് ടി.പി. ചന്ദ്രൻ അധ്യക്ഷത വഹിച്ചു. ഡിസിസി നിർവാഹക സമിതി അംഗം ആലയിൽ ബാലകൃഷ്ണൻ മുഖ്യപ്രഭാഷണം നടത്തി. ആലക്കോട്: മുൻ മുഖ്യമന്ത്രി ഉമ്മൻചാണ്ടിയുടെ രണ്ടാംചരമവാർഷിക ദിനത്തോടനുബന്ധിച്ച് ആലക്കോട് മണ്ഡലം കോൺഗ്രസ് കമ്മിറ്റിയുടെ നേതൃത്വത്തിൽ പുഷ്പാർച്ചനയും അനുസ്മരണ സമ്മേളനവും നടത്തി. മണ്ഡലം കോൺഗ്രസ് കമ്മിറ്റി പ്രസിഡന്‍റ് ബാബു പള്ളിപ്പുറം അധ്യക്ഷത വഹിച്ചു. തേർത്തല്ലി: മണ്ഡലം കോൺഗ്രസ് കമ്മിറ്റിയുടെ ആഭിമുഖ്യത്തിൽ മുൻ മുഖ്യമന്ത്രി ഉമ്മൻചാണ്ടിയുടെ രണ്ടാം ചരമവാർഷിക ദിനത്തിൽ പുഷ്പാർച്ചനയും അനുസ്മരണ സമ്മേളനവും നടത്തി. ആലക്കോട് പഞ്ചായത്ത് പ്രസിഡന്‍റ് ജോജി കന്നിക്കാട്ട് സമ്മേളനം ഉദ്ഘാടനം ചെയ്തു. മണ്ഡലം പ്രസിഡന്‍റ് റോയി ചക്കാനിക്കുന്നേൽ അധ്യക്ഷത വഹിച്ചു. ഡിസിസി ജനറൽ സെക്രട്ടറി ബിജു പുളിയൻതൊട്ടി അനുസ്മരണ സന്ദേശം നൽകി. ഉദയഗിരി: മണ്ഡലം കോൺഗ്രസ് കമ്മറ്റിയുടെ നേതൃത്വത്തിൽ മുൻ മുഖ്യമന്ത്രി ഉമ്മൻചാണ്ടി അനുസ്മരണവും പുഷ്പാർച്ചനയും നടത്തി. ഇന്ദിരാ ഭവനിൽ നടത്തിയ പുഷ്പാർച്ചനയും അനുസ്മരണവും ഡിസിസി സെക്രട്ടറി തോമസ് വെക്കത്താനം ഉദ്ഘാടനം ചെയ്തു. മണ്ഡലം പ്രസിഡന്‍റ് ജോയിച്ചൻ പള്ളിയാലിൽ അധ്യക്ഷത വഹിച്ചു. പുളിങ്ങോം: പുളിങ്ങോം മണ്ഡലം കോൺഗ്രസ്‌ കമ്മിറ്റിയുടെ ആഭിമുഖ്യത്തിൽ ഉമ്മൻ‌ചാണ്ടിയുടെ ഛായചിത്രത്തിൽ പുഷ്പാർച്ചനയും, അനുസ്മരണ സമ്മേളനവും, നടത്തി. ബ്ലോക്ക് കോൺഗ്രസ് കമ്മിറ്റി പ്രസിഡന്‍റ് മഹേഷ് കുന്നുമ്മൽ ഉദ്ഘാടനം ചെയ്തു. മണ്ഡലം കോൺഗ്രസ്‌ കമ്മറ്റി പ്രസിഡന്‍റ് മനോജ് വടക്കേൽ അധ്യക്ഷത വഹിച്ചു. ശ്രീകണ്ഠപുരം: ബ്ലോക്ക് കോൺഗ്രസ് കമ്മിറ്റിയുടെ നേതൃത്വത്തിൽ അനുസ്മരണവും പുഷ്പാർച്ചനയും നടത്തി. കെപിസിസി സെക്രട്ടറി കെ.വി. ഫിലോമിന ഉദ്ഘാടനം ചെയ്തു. ബ്ലോക്ക് പ്രസിഡന്‍റ് ഇ.വി. രാമകൃഷ്ണൻ അധ്യക്ഷത വഹിച്ചു. ഡിസിസി സെക്രട്ടറി മുഹമ്മദ് ബ്ലാത്തൂർ മുഖ്യപ്രഭാഷണം നടത്തി. പയ്യാവൂർ: പയ്യാവൂർ മണ്ഡലം കോൺഗ്രസ് കമ്മിറ്റിയുടെ ആഭിമുഖ്യത്തിൽ ഇന്ദിരാഭവനിൽ അനുസ്മരണവും പുഷ്പാർച്ചനയും നടന്നു. മണ്ഡലം കോൺഗ്രസ് പ്രസിഡന്‍റ് ഇ.കെ. കുര്യൻ അധ്യക്ഷത വഹിച്ചു. ആലക്കോട്: കരുവഞ്ചാൽ മണ്ഡലം കോൺഗ്രസ് കമ്മിറ്റിയുടെ നേതൃത്വത്തിൽ ഉമ്മൻചാണ്ടിയുടെ രണ്ടാം ചരമവാർഷികത്തോടനുബന്ധിച്ച് അനുസ്മരണ സമ്മേളനവും പുഷ്പാർച്ചനയും നടത്തി. സമ്മേളനം കെപിസിസി ജനറൽ സെക്രട്ടറി സോണി സെബാസ്റ്റ്യൻ ഉദ്ഘാടനം ചെയ്തു. മണ്ഡലം പ്രസിഡന്‍റ് ടോമി കുമ്പിടിയമാക്കൽ അധ്യക്ഷത വഹിച്ചു.

ബാരാപോൾ കനാലിലെ വിള്ളൽ; ഇരുട്ടിൽ തപ്പി കെഎസ്ഇബി

ഇരിട്ടി: ബാരാപോൾ ചെറുകിട ജലവൈദ്യുത പദ്ധതിയുടെ കനാലിൽ ഗർത്തം രൂപപ്പെട്ട് ഒരു മാസമാകുമ്പോഴും എന്തുചെയ്യണമെന്നറിയാതെ ഇരുട്ടിൽ തപ്പി കെഎസ്ഇബി. വൈദ്യുതി മന്ത്രി ഉൾപ്പെടെ സ്ഥലം സന്ദർശിച്ചിട്ടും യാതൊരു നടപടിയുമായിട്ടില്ല. ഒരാഴ്ചയ്ക്കുള്ളിൽ ഉന്നതസംഘം സ്ഥലം സന്ദർശിക്കുമെന്ന് അധികൃതർ അറിയിച്ചെങ്കിലും എത്തിയത് ചീഫ് എൻജിനിയർ (പ്രോജക്ട്) മാത്രം. തീരുമാനം വൈകുന്നതോടെ കോടികളുടെ വരുമാനം ലഭിക്കുന്ന പദ്ധതിയിൽ ഈ വർഷം ഉത്പാദനം നടക്കില്ലെന്ന് മാത്രമല്ല അടുത്ത സീസണിലെ പ്രവർത്തനത്തിന്‍റെ കാര്യത്തിലും ആശങ്കയുമുണ്ട്. അതിനിടെ, കനാലിന് പകരം പൈപ്പിലൂടെ വെള്ളം എത്തിക്കുന്നതിന്‍റെ സാധ്യത പരിശോധിക്കാൻ തമിഴ്നാട്ടിൽ നിന്നുള്ള ഏജൻസി ഇന്നലെയെത്തിയിരുന്നു. നേരത്തെ സ്ഥലം സന്ദർശിച്ച മന്ത്രി ഇതുസംബന്ധിച്ച സാധ്യതയെക്കുറിച്ച് ഉദ്യോഗസ്ഥരോട് ചോദിച്ചിരുന്നു. എന്നാൽ, പൈപ്പ് പ്രായോഗികമല്ലെന്ന സൂചനയാണ് ഉദ്യോഗസ്ഥർ നൽകുന്നത്. കനാലിലൂടെ ഒഴുകിയെത്തുന്നയത്രയും വെള്ളം പൈപ്പിലൂടെ എത്തിക്കാൻ കഴിയില്ലെന്നാണ് ഉദ്യോഗസ്ഥർ പറയുന്നത്. വെള്ളത്തിന്‍റെ അളവ് കുറഞ്ഞാൽ വൈദ്യുതി ഉത്പാദനത്തിൽ കാര്യമായ കുറവ് സംഭവിക്കുമെന്നും ഇവർ പറയുന്നു.നിലവിൽ കോൺക്രീറ്റ് ചെയ്യാത്ത 1.400 കിലോമീറ്റർ കനാൽ പുനർനിർമിക്കുകയാണ് ഏറ്റവും ഉചിതമായ തീരുമാനം. കേരളത്തിൽ ലക്ഷ്യത്തിന് മുകളിൽ ഉത്പാദനം നടക്കുന്നതും ലാഭകരമായി പ്രവർത്തിക്കുന്നതുമായി പദ്ധതികളിലൊന്നാണ് ബാരാപോൾ. മൂന്ന് ജനറേറ്ററുകളും പ്രവർത്തിക്കുമ്പോൾ 3,60, 000 യൂണിറ്റ് വൈദ്യുതിയാണ് ഉത്പാദിപ്പിക്കുന്നത്. പ്രതിദിനം 11 ലക്ഷം രൂപയുടെ ഉത്പാദനം. ഉത്പാദനം നിലച്ചതോടെ 25 കോടിയുടെ നഷ്ടമാണ് ബോർഡിന് സംഭവിച്ചത്. ജൂൺ 26ന് പ്രദേശവാസികളാണ് കനാലിൽ ഗർത്തം രൂപപ്പെട്ടത് കണ്ടെത്തിയത്. ആറുമീറ്റർ ആഴവും നാലുമീറ്റർ വീതിയും ഏഴു മീറ്റർ നീളവുമുള്ള അഗാധ ഗർത്തമാണ് രൂപപ്പെട്ടത്. ഗർത്തം രൂപപെട്ടതിന്‍റെ താഴ്ഭാഗത്ത് താമസിക്കുന്ന എട്ടോളം കുടുംബങ്ങൾക്ക് ഭീഷണിയായിരിക്കുകയാണ്. കനാലിൽ വർഷങ്ങളായി തുടരുന്ന ചോർച്ച പരിഹരിക്കാതെ ഉത്പാദനം നടത്താൻ അനുവദിക്കില്ലെന്ന് പ്രദേശവാസികൾ അറിയിച്ചിട്ടുണ്ട്. കനാലിന്‍റെ താഴെ താമസിക്കുന്ന രണ്ട് കുടുംബങ്ങളെ മാറ്റി പാർപ്പിച്ചിട്ടും ചോർച്ച ഗൗരവത്തിലെടുക്കാതിരുന്നത് കാരണമാണ് ഗർത്തം രൂപപ്പെട്ട് ഉത്പാദനം നിർത്തിവയ്ക്കേണ്ടി വന്നതെന്നും അവർ ചൂണ്ടിക്കാണിക്കുന്നു.

ശിലാഫലകത്തിൽ രാഷ്‌ട്രീയപ്പോര്

കണ്ണൂർ: മുൻ മുഖ്യമന്ത്രി ഉമ്മൻ ചാണ്ടി ഉദ്ഘാടനം ചെയ്ത് സ്ഥാപിച്ച ശിലാഫലകം മാറ്റിയത് വിവാദത്തിലേക്ക്. കണ്ണൂർ പയ്യാമ്പലം ഗസ്റ്റ് ഹൗസ് പരിസരത്തെ വാക്ക് വേയിലെ ശിലാഫലകമാണ് മാറ്റിയത്. ഉമ്മൻ‌ചാണ്ടിയുടെ പേരുള്ള ഫലകം മാറ്റി മുഹമ്മദ്‌ റിയാസിന്‍റെ പേരുള്ളത് സ്ഥാപിച്ചിരുന്നു. സംഭവമറിഞ്ഞ് സ്ഥലത്തെത്തിയ ഡിസിസി പ്രസിഡന്‍റ് മാർട്ടിൻ ജോർജിന്‍റെ നേതൃത്വത്തിൽ പ്രവർത്തകർ പ്രതിഷേധിച്ചു. നേതാക്കളും പ്രവർത്തകരും ചേർന്ന് ശിലാഫലകം മാറ്റിയ സ്ഥലത്ത് പുനഃസ്ഥാപിച്ചു. പയ്യാമ്പലം ഗസ്റ്റ് ഹൗസ് പരിസരത്തെ കുട്ടികളുടെ പാർക്കിന്‍റെയും നവീകരിച്ച സീ പാത്ത് വേയുടെയും ഉദ്ഘാടനം 2015 മേയ് 15ന് മുഖ്യമന്ത്രിയായിരുന്ന ഉമ്മൻ ചാണ്ടിയാണ് നിർവഹിച്ചത്. ഉദ്ഘാടന ശിലാഫലകം അവിടെ സ്ഥാപിക്കുകയും ചെയ്തിരുന്നു. തുടർന്ന് 2022 മാർച്ച് ആറിന് സീ പാത്ത് വേ ആൻഡ് സീ വ്യൂ പാർക്ക്, നവീകരികരിച്ച പദ്ധതിയുടെ ഉദ്ഘാടനം പൊതുമരാമത്ത് മന്ത്രി പി.എം. മുഹമ്മദ് റിയാസ് നിർവഹിച്ചു. ഇതിന്‍റെയും ശിലാഫലകം ഗസ്റ്റ് ഹൗസ് പരിസരത്ത് സ്ഥാപിച്ചിരുന്നു. എന്നാൽ ഉമ്മൻ ചാണ്ടി ഉദ്ഘാടനം ചെയ്ത് സ്ഥാപിച്ച ശിലാഫലകം മാറ്റിയതാണ് വിവാദത്തിലായത്. ശിലാഫലകം നീക്കി ആരും ശ്രദ്ധിക്കപ്പെടാത്തെ നിലയിൽ മാറ്റിവയ്ക്കുകയായിരുന്നു. സംഭവം ശ്രദ്ധയിൽപ്പെട്ടതോടെയാണ് തുടർന്ന് ഡിസിസി പ്രസിഡന്‍റ് മാർട്ടിൻ ജോർജിന്‍റെ നേതൃത്വത്തിൽ കോൺഗ്രസ് പ്രവർത്തകർ പ്രതിഷേധിച്ചത്. മാറ്റിവച്ച ശിലാഫലകം ഡിസിസി പ്രസിഡന്‍റിന്‍റെ നേതൃത്വത്തിൽ പുനഃസ്ഥാപിക്കുകയായിരുന്നു. ഇത് അല്പത്തരം: മാര്‍ട്ടിന്‍ ജോര്‍ജ് കണ്ണൂര്‍: ഉമ്മന്‍ചാണ്ടി മുഖ്യമന്ത്രിയായിരിക്കെ പയ്യാമ്പലത്ത് ഉദ്ഘാടനം ചെയ്ത കുട്ടികളുടെ പാര്‍ക്കിന്‍റേയും സീ പാത്ത് വേയുടേയും ശിലാഫലകം മാറ്റി പകരം അതേ പദ്ധതി മന്ത്രി മുഹമ്മദ് റിയാസ് ഉദ്ഘാടനം ചെയ്തതായി കാണിച്ച് പുതിയ ശിലാഫലകം സ്ഥാപിച്ചത് അല്പത്തരത്തിന്‍റെ അങ്ങേയറ്റമെന്ന് ഡിസിസി പ്രസിഡന്‍റ് മാര്‍ട്ടിന്‍ ജോര്‍ജ്. ഉമ്മന്‍ചാണ്ടിയുടെ പേരുള്ള ശിലാഫലകം കുപ്പത്തൊട്ടിയില്‍ തള്ളി അതിന്മേല്‍ ചൂലെടുത്തു വച്ചതായാണ് കണ്ടത്. ആരുടെ നിര്‍ദേശപ്രകാരമാണ് ഇതു ചെയ്തതെന്ന് വ്യക്തമാക്കണം. ഉമ്മന്‍ചാണ്ടി ഉദ്ഘാടനം ചെയ്തതിന്‍റെ ശിലാഫലകം കോണ്‍ഗ്രസ് പ്രവര്‍ത്തകര്‍ പാര്‍ക്കിന്‍റെ കവാടത്തില്‍ വച്ചിട്ടുണ്ട്. ഇതു തകര്‍ക്കുകയോ എടുത്തുമാറ്റുകയോ ചെയതാല്‍ ഇവിടെ തന്നെ പുനസ്ഥാപിക്കും.ഏതു വിവരദോഷിയായ ഉദ്യോഗസ്ഥനാണ് ഇതിനു പിന്നിലെന്ന് അന്വേഷിക്കണ മെന്നും അദ്ദേഹം ആവശ്യപ്പെട്ടു.

മൂർഖനുമായി കുട്ടിക്കളി; ദുരന്തമൊഴിഞ്ഞത്‌ തലനാരിഴ‍യ്ക്ക്

സ്വന്തം ലേഖകൻ ഇരിട്ടി: മഴ അവധിക്കിടയിൽ കുട്ടികൾ മൂർഖനുമായി നടത്തിയ കുട്ടിക്കളിയിൽ അപകടമൊഴിഞ്ഞത് തലനാരിഴയ്ക്ക്. മഴ കാരണം അവധി പ്രഖ്യാപിച്ച ഇന്നലെ കുട്ടികൾ കൂട്ടം ചേർന്ന് കളിക്കുന്നതിനിടയിലാണ് പാമ്പ് ഇഴഞ്ഞുപോകുന്നത് ഒരാളുടെ ശ്രദ്ധയിൽപ്പെട്ടത്. ഇതോടെ കളി നിർത്തിയ കുട്ടികൾ പ്ലാസറ്റിക് ഭരണിയുമായെത്തി യുട്യൂബിൽ കണ്ട പാന്പു പിടിത്തം പ്രാവർത്തികമാക്കി. ഒരാൾ പാമ്പിനെ വാലിൽ പിടിച്ചു തൂക്കി ഭരണിയിലാക്കി അടച്ചു. പാന്പു പിടിത്തം ആവേശത്തിലാക്കിയ കുട്ടികളിലൊരാൾ ഫോട്ടോയെടുത്ത് അമ്മയ്ക്ക് അയച്ചുകൊടുത്തു. പത്തി വിടർത്തി നിൽക്കുന്ന മൂർഖൻ പാമ്പിന്‍റെ ഫോട്ടോ കണ്ടതോടെ ഭയന്ന അമ്മ ടൗണിലെ ജോലി സ്ഥലത്തുനിന്ന് വീട്ടിലേക്കു പാഞ്ഞെത്തി. ആർക്കും അപകടം സംഭവിച്ചിട്ടില്ലെന്ന് നേരിൽ കണ്ടറിഞ്ഞതോടെയാണ് അവർക്ക് ശ്വാസം നേരേ വീണത്. മാതാപിതാക്കൾ അറിയിച്ചതിനെ തുടർന്ന് അധികൃതർ എത്തി ഭരണിയിൽ അടച്ച മൂർഖൻ പാമ്പിനെ ആവാസ വ്യവസ്ഥയിൽ തുറന്നുവിട്ടു. പാന്പു കടിയുടെ ഗൗരവം മനസിലാക്കാതെ കുട്ടികൾ നടത്തിയ പാന്പു പിടിത്തത്തിനിടയിൽ കടിയേൽക്കാത്തതിനാൽ വലിയൊരു ദുരന്തമാണ് ഒഴിവായത്.

മഴപ്പെയ്ത്തിൽ കണ്ണൂർ; തെക്കൻ ജില്ലകളിൽ മഴ കുറഞ്ഞു

സ്വന്തം ലേഖകൻ കണ്ണൂർ: സംസ്ഥാനത്ത് ഏറ്റവും കൂടുതല്‍ മഴപ്പെയ്ത്ത് കണ്ണൂര്‍ ജില്ലയില്‍. കേന്ദ്ര കാലാവസ്ഥാ വകുപ്പിന്‍റെ ജൂൺ ഒന്നു മുതല്‍ ജൂലൈ17 വരെയുള്ള കണക്ക് പ്രകാരം 1637.2 മില്ലിമീറ്റര്‍ മഴയാണ് കണ്ണൂരിൽ ലഭിച്ചത്. കണ്ണൂരിൽ സാധാരണ ലഭിക്കേണ്ട വര്‍ഷപാതം 1387.9 മില്ലിമീറ്റര്‍ ആണ്. എന്നാല്‍ ഇതിനകം ലഭിച്ചതാകട്ടെ നിലവിലുള്ളതിനെക്കാൾ 21 ശതമാനം അധിക മഴ. ജൂലൈ 16 ന് മാത്രം കണ്ണൂർ ജില്ലയിൽ 130.9 മില്ലിമീറ്റര്‍ മഴ ലഭിച്ചു. കേരളത്തിലെ മറ്റു ജില്ലകളെല്ലാം മഴപ്പെയ്ത്തിൽ കുറവ് രേഖപ്പെടുത്തിയപ്പോൾ കണ്ണൂർ ജില്ലയിലും കേന്ദ്രഭരണ പ്രദേശമായ മാഹിയിലുമാണ് കൂടുതൽ മഴ പെയ്തത്. മാഹിയിൽ 1279.1 മില്ലിമീറ്റര്‍ ആണ് ശരാശരി മഴയെങ്കിൽ ഇന്നലെ വരെ ലഭിച്ചതാകട്ടെ 1443.2 എംഎം മഴയാണ്. 13 ശതമാനത്തിന്‍റെ വർധന. കാസർഗോഡ് ജില്ലയിലാകട്ടെ മഴയിൽ വലിയ കുറവ് ഉണ്ടായിട്ടില്ല. ശരാശരി 1532.6 മില്ലിമീറ്റര്‍ മഴ ലഭിച്ചിരുന്ന സ്ഥാനത്ത് ഇത്തവണ ലഭിച്ചത് 1511.1 മില്ലിമീറ്റര്‍ മഴയാണ്. ഒരു ശതമാനത്തിന്‍റെ കുറവാണ് ഇതുവരെ രേഖപ്പെടുത്തിയത്. വയനാട്, ഇടുക്കി, കോട്ടയം, മലപ്പുറം കേന്ദ്രഭരണ പ്രദേശമായ ലക്ഷദ്വീപ് എന്നിവിടങ്ങളിൽ മഴയിൽ ഗണ്യമായ കുറവ് രേഖപ്പെടുത്തി. തിരുവനന്തപുരത്ത് 370.6 മില്ലിമീറ്റര്‍ മഴയാണ് ഇന്നലെ വരെ ലഭിച്ചത്. സാധാരണ 426.5 മില്ലിമീറ്റര്‍ മഴ ലഭിച്ചിരുന്നതാണ്.എറണാകുളത്ത് 958 മില്ലിമീറ്റര്‍ മഴ ലഭിച്ച പ്പോൾ നിലവിൽ 12 ശതമാനത്തിന്‍റെ കുറവുണ്ടായി.

തലശേരിയിൽ ലഹരിവേട്ട: രണ്ടുപേർ അറസ്റ്റിൽ

തലശേരി: നഗരമധ്യത്തിൽ പോലീസ് നടത്തിയ മിന്നൽ റെയ്ഡിൽ ലോഡ്ജിൽനിന്ന് ലക്ഷങ്ങളുടെ ലഹരിമരുന്നുകളുമായി രണ്ടു പേർ അറസ്റ്റിൽ. തലശേരി സെയ്ദാർ പള്ളി അച്ചാരത്ത് റോഡിലെ നദീം (51), എറണാകളും പള്ളുരുത്തിയിലെ റിഷാദ് (30) എന്നിവരെയാണ് എസ്ഐ ഷമീലും സംഘവും അറസ്റ്റ് ചെയ്തത്. ഇവരിൽനിന്ന് 15.49 ഗ്രാം എംഡിഎംഎ, 5.61 ഗ്രാം കഞ്ചാവ്, 3.07 ഗ്രാം ഹാഷിഷ് ഓയിൽ എന്നിവ പിടിച്ചെടുത്തു. ഇവയ്ക്ക് വിപണിയിൽ ലക്ഷങ്ങൾ വില വരും. തലശേരി എസിപിക്ക് ലഭിച്ച രഹസ്യ വിവരത്തെ തുടർന്ന് ടൗൺ പോലീസും ലഹരി വിരുദ്ധ പ്രത്യേക സ്ക്വാഡും നടത്തിയ പരിശോധനയിൽ പഴയ ബസ് സ്റ്റാൻഡിലെ ഒരുലോഡ്ജിൽ വച്ചാണ് ഇരുവരും പിടിയിലാകുന്നത്. പോലീസ് ലോഡ്ജിലെത്തി വാതിൽ തുറക്കാൻ ആവശ്യപ്പെട്ടപ്പോൾ വാതിൽ തുറന്നില്ല. തുടർന്ന് ബലമായി വാതിൽ തുറന്ന് നടത്തിയ പരിശോധനയിലാണ് ലഹരി വസ്തുക്കൾ കണ്ടെത്തിയത്. ബുധനാഴ്ച രാത്രി എട്ടോടെയായിരുന്നു നഗരത്തിലെ ലോഡ്ജുകൾ ഉൾപ്പെടെ കേന്ദ്രീകരിച്ച് പോലീസ് പരിശോധന ആരംഭിച്ചത്. പരിശോധന ഇന്നലെ പുലർച്ചെ വരെ നീണ്ടു. അറസ്റ്റിലായവരെ കൂടാതെ കൂടുതൽ പേർ ലഹരിക്കേസിൽ ഉൾപ്പട്ടിട്ടുണ്ടെന്നാണ് പോലീസ് കണ്ടെത്തിയത്. ഇതുമായി ബന്ധപ്പെട്ട അന്വേഷണം ബഗളൂരു ഉൾപ്പടെയുള്ള അയൽ സംസ്ഥാനങ്ങളിലേക്കും വ്യാപിപ്പിച്ചതായി പോലീസ് അറിയിച്ചു. പ്രതികളെ റിമാൻഡ് ചെയ്തു.

മട്ടന്നൂർ നഗരസഭയ്ക്ക് ദേശീയ അംഗീകാരം

മട്ടന്നൂർ: ശുചിത്വ മാലിന്യ സംസ്കരണം പ്രവർത്തനങ്ങൾ ഏറ്റവും മികച്ച രീതിയിൽ നടത്തിയതിന് മട്ടന്നൂർ നഗരസഭയ്ക്ക് ദേശീയ അംഗീകാരം. ഡൽഹി വിജ്ഞാൻ ഭവനിൽ നടന്ന ചടങ്ങിൽ തദ്ദേശ മന്ത്രി എം.ബി. രാജേഷ്, മട്ടന്നൂർ നഗരസഭാ ചെയർമാൻ എൻ. ഷാജിത്ത് എന്നിവർ ചേർന്ന് കേന്ദ്ര നഗരകാര്യ മന്ത്രി മനോഹർലാലിൽനിന്ന് പ്രോമിസിംഗ് സ്വച്ഛ് ഷെഹർ അവാർഡ് ഏറ്റുവാങ്ങി. ആയിരങ്ങളെ പങ്കെടുപ്പിച്ചു നഗരസഭ സംഘടിപ്പിക്കുന്ന മെഗാ ശുചീകരണ കാമ്പയിനുകൾ, മാലിന്യ സംസ്കരണ കേന്ദ്രത്തിൽ തന്നെ കുട്ടികളെ പങ്കെടുപ്പിച്ച് നടത്തിയ ഹരിത സഭകൾ, ജലസ്രോതസുകളെ വീണ്ടെടുക്കുന്നതിന് നടത്തിയ മെഗാ കാമ്പയിനുകൾ, നഗര സഞ്ചയത്തിൽ ഉൾപ്പെടുത്തി നടത്തിയ ജലസംരക്ഷണ പ്രവർത്തനങ്ങൾ, ഹരിത കർമസേനയെ ശക്തിപ്പെടുത്തി നടത്തിയ മാലിന്യ സംസ്കരണ പ്രവർത്തനങ്ങൾ, ജൈവമാലിന്യ സംസ്കരണത്തിനായി ഏർപ്പെടുത്തിയ പദ്ധതികൾ, ഹരിത പ്രോട്ടോകോൾ യൂണിറ്റുകൾ ആരംഭിച്ച് നടത്തിയ മാലിന്യ ലഘൂകരണ പ്രവർത്തനങ്ങൾ, വിദ്യാലയങ്ങൾ കേന്ദ്രീകരിച്ചു നടത്തുന്ന ഹരിത വിദ്യാലയം പദ്ധതികൾ, വ്യാപാര സ്ഥാപനങ്ങൾ കേന്ദ്രീകരിച്ചുള്ള പ്രത്യേക ബോധവത്കരണ പ്രവർത്തനങ്ങൾ, മതസ്ഥാപനങ്ങൾ കേന്ദ്രീകരിച്ച് നടത്തിയ പ്രവർത്തനങ്ങൾ, തൊഴിലുറപ്പ് തൊഴിലാളികൾ പ്രത്യേകമായി നടത്തിയ പ്രവൃത്തികൾ, നഗരസൗന്ദര്യവൽകരണപ്രവർത്തനങ്ങൾ, ഹെൽത്ത് വിഭാഗം ജീവനക്കാർ തയാറാക്കിയ ആക്‌ഷൻ പ്ലാൻ, ശുചീകരണ വിഭാഗം തൊഴിലാളികൾ നടത്തിയ കഠിന പ്രയത്നങ്ങൾ, ജനപ്രതിനിധികൾ നടത്തിയ മത്സരാധിഷ്ഠിതമായ ശുചീകരണ പ്രവർത്തനങ്ങൾ എന്നിവയെ വിലയിരുത്തിയാണ് പുരസ്കാര നിർണയം നടത്തിയത്. 2016ലാണ് ഇത്തരമൊരു അവാർഡ് കേന്ദ്ര സർക്കാർ നൽകിവരുന്നത്. കഴിഞ്ഞ വർഷംവരെ മട്ടന്നൂർ നഗരസഭ രാജ്യത്ത് 153ാമത്തെ സ്ഥാനത്തായിരുന്നു. ഇത്തവണ 53ാമത്തെ സ്ഥാനം നേടി പ്രോമിസിംഗ് സ്വച്ഛ് ഷെഹർ അവാർഡ് സ്വന്തമാക്കിയത്. ആദ്യമായാണ് മട്ടന്നൂർ നഗരസഭയിലൂടെ കേരളത്തിന് ഈ അവാർഡ് ലഭിക്കുന്നത്.

ലഹരിക്കെതിരേ എഡിഎസ്‌യു സംഗമം

ചെമ്പേരി: തലശേരി അതിരൂപത കോർപറേറ്റ് എഡ്യൂക്കേഷണൽ ഏജൻസിയുടെ സ്കൂളുകളിലെ അധ്യാപകരുടെ സംഗമം, പ്രവർത്തനവർഷ ഉദ്ഘാടനം, ബെസ്റ്റ് സ്കൂളുകൾക്കുള്ള അവാർഡ് വിതരണം എന്നിവയോടൊപ്പം ലഹരിക്കെതിരെ എഡിഎസ്‌യു അതിരൂപത സംഗമവും ചെമ്പേരി വിമൽ ജ്യോതി എൻജിനീയറിംഗ് കോളജ് ഹാളിൽ നടന്നു. അതിരൂപത കോർപറേറ്റ് മാനേജർ ഫാ.സോണി വടശേരിൽ ഉദ്ഘാടനം ചെയ്തു. എഡിഎസ്‌യു അതിരൂപത ഡയറക്ടർ ഫാ. ജിതിൻ വയലുങ്കൽ അധ്യക്ഷത വഹിച്ചു. തലശേരി അതിരൂപത കോർപ്പറേറ്റ് എഡ്യൂക്കേഷണൽ ഏജൻസിയുടെ ആഭിമുഖ്യത്തിലുള്ള മുഴുവൻ സ്കൂളുകളിലെയും എഡിഎസ്‌യു ആനിമേറ്റർമാരുടെ ശില്പശാലയും നടന്നു. സ്കൂളുകളിൽ എഡിഎസ് യു സംഘടന ശക്തിപ്പെടുത്തേണ്ടതിന്‍റെ ആവശ്യം കോർപ്പറേറ്റ് മാനേജർ ഫാ. സോണി വടശേരിൽ അധ്യാപകരെ ബോധ്യപ്പെടുത്തി. ലഹരിക്കെതിരെ വിദ്യാർഥികളുടെ ഇടയിൽ അധ്യാപകർ ഏതെല്ലാം വിധത്തിൽ പ്രവർത്തിക്കണമെന്നത് സംബന്ധിച്ചായിരുന്നു ശില്പശാല. കഴിഞ്ഞവർഷത്തെ മികച്ച എഡിഎസ് യു പ്രവർത്തന യൂണിറ്റുകൾക്കുള്ള അവാർഡുകൾ വെള്ളരിക്കുണ്ട് നിർമലഗിരി എൽപി സ്കൂൾ, കരിക്കോട്ടക്കരി സെന്‍റ് തോമസ് യുപി സ്കൂൾ, മണിക്കടവ് സെന്‍റ് തോമസ് ഹൈസ്കൂൾ, എടൂർ സെന്‍റ് മേരീസ് ഹയർ സെക്കൻഡറി സ്കൂൾ എന്നിവ കരസ്ഥമാക്കി. മാഗസിൻ അവാർഡ് യുപി വിഭാഗത്തിൽ കരിക്കോട്ടക്കരി സെന്‍റ് തോമസ് യുപി സ്കൂൾ, ഹൈസ്കൂൾ വിഭാഗത്തിൽ മണിക്കടവ് സെന്‍റ് തോമസ് ഹൈസ്കൂൾ, ഹയർസെക്കൻഡറി വിഭാഗത്തിൽ പാലാവയൽ സെന്‍റ് ജോൺസ് ഹയർ സെക്കൻഡറി സ്കൂൾ എന്നിവയും കരസ്ഥമാക്കി. കോർപ്പറേറ്റ് മാനേജർ ഫാ. സോണി വടശേരിൽ അവാർഡ് വിതരണം ചെയ്തു. ചടങ്ങിൽ പുതിയ വർഷത്തെ മാർഗരേഖ പ്രകാശനവും, "ലഹരിക്ക് നോ പറഞ്ഞവർ" എന്ന പരമ്പരയുടെ ഉദ്ഘാടനവും നടത്തി. എഡിഎസ് യു അതിരൂപത ചീഫ് ഓർഗനൈസർ ടോണിസ് ജോർജ്, അതിരൂപത പ്രസിഡന്‍റ് ഡൽവിൻ സാബു ജോർജ്, വൈസ് പ്രസിഡന്‍റ് ഡാനി സെബാസ്റ്റ്യൻ, അതിരൂപത ആനിമേറ്റർ ശോഭ ടോം എന്നിവർ പ്രസംഗിച്ചു.

പാലക്കോട് വീണ്ടും മണൽത്തിട്ടയിലിടിച്ച് തോണി മറിഞ്ഞു

പയ്യന്നൂർ: കഴിഞ്ഞ രണ്ടു ദിവസങ്ങളിലായി വള്ളങ്ങൾ മണൽത്തിട്ടയിൽ ഇടിച്ച് അപകടമുണ്ടായ പാലക്കോട് വലിയ കടപ്പുറം അഴിമുഖത്ത് ഇന്നലെയും തോണിയപകടം. രാവിലെ ഒന്പതരയോടെയാണ് സംഭവം. ഒഴുക്കുവല ഉപയോഗിച്ച് മീൻ പിടിച്ച് തിരിച്ചുവരുന്ന തോണിയാണ് അപകടത്തിൽപ്പെട്ടത്. ഇടിയുടെ ആഘാതത്തിൽ തോണിയിലുണ്ടായിരുന്ന മത്സ്യത്തൊഴിലാളികൾ കടലിലേക്ക് തെറിച്ചു വീണെങ്കിലും പരിക്കേൽക്കാതെ നീന്തി രക്ഷപ്പെട്ടു. മണല്‍ത്തിട്ടയുടെ അടുത്ത് നിർമാണം നടക്കുന്ന പുലിമുട്ടിലെ കരിങ്കല്ലുകളില്‍ ഇടിക്കാതിരുന്നതിനാലാണ് തൊഴിലാളികൾ പരിക്കേൽക്കാതെ രക്ഷപ്പെട്ടത്. കഴിഞ്ഞ ദിവസങ്ങളില്‍ അപകടമുണ്ടായ അതേ സ്ഥലത്താണ് ഇന്നലെയും അപകടമുണ്ടായത്. പൂര്‍ത്തീകരണത്തിലെത്താത്ത പുലിമുട്ടിനരികില്‍ രൂപപ്പെട്ട മണല്‍ത്തിട്ടയാണ് മത്സ്യത്തൊഴിലാളികള്‍ക്ക് ഭീഷണിയായി മാറിയത്. അടിയന്തര പ്രാധാന്യമുള്ള ഈ പ്രശ്‌നം ശ്രദ്ധയില്‍പെട്ടിട്ടും അധികൃതരുടെ ഭാഗത്തുനിന്നും പരിഹാര നടപടികള്‍ കാണാത്തതിനെത്തുടർന്ന് മത്സ്യത്തൊഴിലാളികള്‍തന്നെ ഹിറ്റാച്ചി കൊണ്ടുവന്ന് മണല്‍ത്തിട്ട നീക്കം ചെയ്യുന്ന പ്രവര്‍ത്തി ആരംഭിച്ചിരിക്കുകയാണ്.

ട്രാഫിക് പോലീസിനെ അപായപ്പെടുത്താൻ ശ്രമിച്ചതിന് കാർ ഡ്രൈവർക്കെതിരേ കേസ്

കണ്ണൂർ: ഗതാഗതനിയമം ലംഘിച്ചതിന് വാഹനം നിർത്താൻ ആവശ്യപ്പെട്ട ട്രാഫിക് ഡ്യൂട്ടിയിലായിരുന്ന പോലീസുദ്യോഗസ്ഥനെ കാറിടിച്ച് അപായപ്പെടുത്താൻ ശ്രമിച്ച കേസിൽ ഡ്രൈവർക്കെതിരെ കേസ്. കണ്ണൂർ ട്രാഫിക് എൻഫോഴ്സ്മെന്‍റ് യൂണിറ്റിലെ സിവിൽ പോലീസ് ഓഫീസർ യു. അക്ഷയിന്‍റെ പരാതിയിൽ ടൗൺ പോലീസ് കെഎൽ 17 ക്യു 1471 കാർ ഡ്രൈവർക്കെതിരെയാണ് കേസെടുത്തത്. ഇക്കഴിഞ്ഞ 15ന് താഴെചൊവ്വ റെയിൽവേ ഗേറ്റിനടുത്ത് വച്ചായിരുന്നു കേസിനാസ്പദമായ സംഭവം. ട്രാഫിക് ലൈൻ തെറ്റിച്ച് വന്ന കാർ നിർത്താൻ ആവശ്യപ്പെട്ടപ്പോൾ അക്ഷയിന്‍റെ നേർക്ക് വാഹനം ഓടിച്ചു കയറ്റുകയായിരുന്നു. വാഹനം തട്ടി അക്ഷയ്ക്ക് പരിക്കേറ്റിരുന്നു.

കൊല്ലത്ത് വിദ്യാര്‍ഥി മരിച്ച സംഭവം സര്‍ക്കാര്‍ കഴിവുകേട്: പി.കെ. കുഞ്ഞാലിക്കുട്ടി

കണ്ണൂര്‍: കൊല്ലത്ത് വിദ്യാര്‍ഥി ഷോക്കേറ്റു മരിച്ച സംഭവം സര്‍ക്കാരിന്‍റെ പൊതുകഴിവുകേടിന്‍റെ ഭാഗമാണെന്ന് മുസ്‌ലിം ലീഗ് ദേശീയ ജനറല്‍ സെക്രട്ടറി പി.കെ. കുഞ്ഞാലിക്കുട്ടി. ഇത്തരം അപകടങ്ങളില്‍ നമ്മള്‍ കാണുന്നത് ഡിപ്പാര്‍ട്ട്‌മെന്‍റുകളുടെ അനാസ്ഥയാണ്. പിണറായി ഭരണത്തില്‍ ഇത് മൂര്‍ധന്യത്തിലെത്തിയെന്നും അദ്ദേഹം പറഞ്ഞു. കണ്ണൂരിൽ മാധ്യമങ്ങളോട് പ്രതികരിക്കുകയായി രുന്നു കുഞ്ഞാലിക്കുട്ടി. ലൈന്‍ ഇത്രയും താഴ്ന്ന നിലയില്‍ വിദ്യാലയത്തിനു മുകളിലൂടെ പോകുന്നത് കണ്ടില്ലെന്ന് പറയാൻ വൈദ്യുതി വകുപ്പിനു കഴിയില്ല. കേരളം കണ്ടിട്ടില്ലാത്ത അനാസ്ഥയാണ് ഓരോ വകുപ്പിലും ഇപ്പോള്‍ കാണുന്നത്. സർക്കാരിന്‍റെ മേല്‍നോട്ടക്കുറവു തന്നെയാണ് ഇത് വെളിവാക്കുന്നത്.വാര്‍ഡ് വിഭജനത്തില്‍ നിയമപരമായി ലഭ്യമായ എല്ലാ അവസരങ്ങളും യുഡിഎഫും മുസ്‌ലിം ലീഗും ഉപയോഗപ്പെടുത്തും.വാര്‍ഡ് വിഭജനം കൊണ്ടൊന്നും എല്‍ഡിഎഫ് രക്ഷപ്പെടില്ല. ഭരണവിരുദ്ധ വികാരം ശക്തമായി നില്ക്കുമ്പോള്‍ അതിനെതിരേ ജനം വിധിയെ ഴുതും. സ്‌കൂള്‍ സമയ മാറ്റം ചര്‍ച്ചയിലൂടെ പരിഹരിക്കണമെന്നും കുഞ്ഞാലിക്കുട്ടി ആവശ്യപ്പെട്ടു.

വള്ളിത്തോട് ടൗണിൽ പഞ്ചായത്ത് നിർദേശിച്ചിട്ടും പൊളിച്ചുമാറ്റാതെ 75 വർഷം പഴക്കംചെന്ന കെട്ടിടം

ഇരിട്ടി: അന്തർസംസ്ഥാന പാതയിൽ വള്ളിത്തോട് ടൗണിൽ പായം പഞ്ചായത്ത് നിർദേശിച്ചിട്ടും പൊളിച്ചുമാറ്റാത്ത 75 വർഷം പഴക്കം ചെന്ന കെട്ടിടം ഭീഷണിയാകുന്നു. കാലപ്പഴക്കം കൊണ്ട് കോൺക്രീറ്റ് അടർന്നുവീഴുന്ന കെട്ടിടത്തിൽ നിന്ന് മൂന്ന് വർഷം മുൻപ് കച്ചവടക്കാരെ മാറ്റിയെങ്കിലും കെട്ടിടം പൊളിച്ചുമാറ്റിയില്ല. ശക്തമായ മഴകൂടി പെയ്യുന്നതോടെ കെട്ടിടം ഏതുനിമിഷവും നിലം പൊത്താവുന്ന അവസ്ഥയിലാണ്. തിരക്കേറിയ വള്ളിത്തോട് ടൗണിൽ വാഹനങ്ങൾക്കും കാൽനട യാത്രക്കാർക്കും സമീപത്തെ കച്ചവടക്കാർക്കും ഒരേപോലെ ഭീഷണിയാണ് കെട്ടിടം. പഞ്ചായത്തും വാർഡ് അംഗവും വ്യാപാരികളും കെട്ടിടം പൊളിച്ചുമാറ്റാൻ ആവശ്യപ്പെട്ടെങ്കിലും മൂന്ന് വർഷമായി ഉടമ യാതൊരു നടപടിയും സ്വീകരിച്ചിട്ടില്ല. കെട്ടിടം പൊളിച്ചുമാറ്റാതെ ഉടമയുടെ നിസഹകരണം തുടർന്നാൽ നിയമ നടപടികൾ സ്വീകരിക്കുമെന്നാണ് വ്യാപാരികളും യാത്രക്കാരും വാർഡ് അംഗവും ഉൾപ്പെടുന്ന ജനകീയ കമ്മറ്റി പറയുന്നത്. അപകടം സംഭവിച്ച ശേഷം ഓടിയെത്തിയിട്ട് കാര്യമില്ലെന്നും ജനങളുടെ സുരക്ഷയാണ് പ്രാധാന്യമെന്നും പഞ്ചായത്ത് അംഗം മിനി പ്രസാദ് പറഞ്ഞു. പഞ്ചായത്ത് നോട്ടീസ് നൽകിയിട്ടും പൊളിച്ചുമാറ്റാത്ത കെട്ടിടം ഉളിക്കൽ ടൗണിൽ കഴിഞ്ഞ മാസം തകർന്നു വീണിരുന്നു. ഭാഗ്യം കൊണ്ടാണ് വലിയ ദുരന്തം അന്ന് ഒഴിവായത്. ജനങ്ങൾക്ക് ഭീഷണിയാകുന്ന കെട്ടിടം പൊളിച്ചുമാറ്റാനായുള്ള അടിയന്തര നടപടി പഞ്ചായത്ത് സ്വീകരിക്കണമെന്നാണ് നാട്ടുകാരുടെ ആവശ്യം.

പേരാവൂർ താലൂക്ക് ആശുപത്രി കെട്ടിട സമുച്ചയ നിർമാണം തുടങ്ങിയിടത്തു തന്നെ

പേരാവൂർ: സർക്കാർ അവഗണനയുടെ ബാക്കിപത്രമായി പേരാവൂർ താലൂക്ക് ആശുപത്രി. ഉണ്ടായി രുന്ന കെട്ടിടം പൊളിച്ചിട്ട് വർഷങ്ങൾ കഴിഞ്ഞിട്ടും പേരാവൂർ താലൂക്ക് ആശുപത്രി കെട്ടിട സമുച്ചയ നിർമാണം തുടങ്ങിയിടത്ത് തന്നെ. അനിശ്ചിതാവസ്ഥ തുടരുന്നതിനിടയിലും ആശുപത്രിയിലെത്തുന്ന രോഗികളുടെ ദുരിതത്തിന് അറുതിയില്ല. ആറു നിലകളുള്ള കെട്ടിട സമുച്ചയമാണ് മാസ്റ്റർ പ്ലാനിലുള്ളത്. കിഫ്ബിയിൽ നിന്ന് ആദ്യഘട്ടമായി 22.16 കോടി അനുവദിച്ച് കെട്ടിട നിർമാണ പ്രവൃത്തി ആരംഭിച്ചിരുന്നു. ഇതിനായിരുന്നു പഴയ കെട്ടിടങ്ങൾ പൊളിച്ച് നീക്കിയത്‌. പഴയ കെട്ടിടങ്ങൾ പൊളിച്ച് നീക്കിയതോടെ നിലവിലുള്ള സ്ഥലങ്ങളിൽ രോഗികൾ ഞെരുങ്ങേണ്ട അവസ്ഥയായി. ഒപി ഉൾപ്പെടെ തിങ്ങി ഞെരുങ്ങി പ്രവ ർത്തിക്കുന്നു. സമീപവാസികളായ രണ്ട് പേർ നൽകിയ കേസുകളാണ് ആദ്യഘട്ടത്തിൽ പ്രതിബ ന്ധമായത്. ഇപ്പോൾ പഴയതുമില്ല പുതിയതുമില്ല എന്ന അവസ്ഥയിലാണ് താലൂക്ക് ആശുപത്രിയുടെ ദുരിതാവസ്ഥ.

ആനമതിലിന്‍റെയും വേലികളുടെയും അറ്റകുറ്റപ്പണികൾ നടത്തി

ആറളം: ആറളം വന്യജീവി സങ്കേതത്തിൽ "മിഷൻ ഫെൻസിംഗ് ഡേ’യിലൂടെ ആനമതിലും ഫെൻസിംഗുകളും അറ്റകുറ്റപ്പണികളിലൂടെ താത്കാലികമായി ബലപ്പെടുത്തി. കൊട്ടിയൂർ റേഞ്ച് ജീവനക്കാരും ആറളം വൈൽഡ്‌ലൈഫ് ജീവനക്കാരും ചേർന്നായിരുന്നു മിഷൻ ഫെൻസിംഗ് ഡേയിലൂടെ താത്കാലിക അറ്റകുറ്റപണികൾ നടത്തിയത്. വർഷങ്ങളായി മേഖലയിലെ പ്രധാന വെല്ലുവിളിയായ കാട്ടാന ശല്യത്തിന് പരിഹാരം കാണുക എന്ന ലക്ഷ്യത്തിന്‍റെ ആദ്യഘട്ടമായാണു പദ്ധതി നടപ്പിലാക്കുന്നത്. ആനമതിൽ പൂർത്തിയാകാത്ത ഭാഗങ്ങളിലും നിലവിൽ ഫെൻസിംഗ് ഇല്ലാത്തതും കാട്ടാനകൾ വെളിയിലേക്ക് ഇറങ്ങുന്ന പ്രദേശങ്ങളിൽ അതിവേഗം താത്കാലിക ഫെൻസിംഗ് നിർമിച്ചു. ഒപ്പം നിലവിലുള്ള ഫെൻസിംഗിന്‍റെ ബലക്ഷയമുള്ള ഭാഗങ്ങൾ കണ്ടെത്തി അറ്റകുറ്റപ്പണികളും നടത്തുകയായിരുന്നു. പ്രവൃത്തിക്കായി "മിഷൻ സോളാർ ഫെൻസിംഗ്' ടൂൾ റൂമിൽ സൂക്ഷിച്ചിരുന്ന വസ്തുക്കളാണ് ഉപയോഗിച്ചത്.മനുഷ്യന്‍റെ ജീവനും സ്വത്തിനും ഉറപ്പാക്കുന്നതിനായി ഇത്തരം പ്രവർത്തനങ്ങൾ തുടരുമെന്ന് വനം വകുപ്പ് അധികൃതർ അറിയിച്ചു.

സ്വച്ഛ് സർവേക്‌ഷൺ 2024: ഗാർബേജ് ഫ്രീ സിറ്റി സ്റ്റാർ റേറ്റിംഗിൽ ഇരിട്ടി നഗരസഭയ്ക്ക് 1 സ്റ്റാർ പദവി

ഇരിട്ടി: സ്വച്ഛ് സർവേക്‌ഷൺ 2024 പ്രവർത്തനങ്ങളിൽ ഇരിട്ടി നഗരസഭയുടെ നാഷണൽ റാങ്കിംഗ് 1736ൽ നിന്ന് 250 ആയി ഉയർന്നു. കേരളത്തിൽ ആദ്യമായി ഗാർബേജ് ഫ്രീ സിറ്റി സ്റ്റാർ റേറ്റിംഗിൽ ഇരിട്ടി നഗരസഭ 1 സ്റ്റാർ പദവിയും ഒഡിഎഫ് + സർട്ടിഫിക്കറ്റും നിലനിർത്തി. കൃത്യമായ ആസൂത്രണം, കൂട്ടായ പ്രവർത്തനങ്ങൾ, മാലിന്യ മുക്ത നവകേരളം കാമ്പയിൻ, ഐഇസി പ്രവർത്തനങ്ങള്‍, കപ്പാസിറ്റി ബിള്‍ഡിംഗ്, ആവശ്യമായ അടിസ്ഥാന സൗകര്യങ്ങള്‍ എന്നിവ നേട്ടത്തിലേക്ക് എത്താൻ സഹായിച്ചു. മാലിന്യ സംസ്കരണ സംവിധാനങ്ങളിൽ അത്തിത്തട്ടില്‍ സ്ഥിതി ചെയ്യുന്ന എംസിഎഫ്, ആർആർഎഫ്, വിൻഡ്രോ കമ്പോസ്റ്റ്, തുമ്പൂർമൂഴി, സി ആൻഡ് ഡി പ്രൊസസിംഗ് പ്ലാന്‍റ് എന്നിവയുടെ പ്രവർത്തനം മികച്ചതാണ്. മാർക്കറ്റുകളിൽ നിന്ന് ശേഖരിക്കുന്ന ജൈവ മാലിന്യങ്ങൾ നഗരസഭയുടെ വിൻഡ്രോ കമ്പോസ്റ്റിലും തുമ്പൂർമൂഴി യൂണിറ്റിലും സംസ്ക്കരിച്ച് ജൈവാമൃതം എന്ന പേരില്‍ വളമാക്കി കർഷകർക്ക് വില്പന നടത്തിവരുന്നു. ജൈവ മാലിന്യ സംസ്ക്കരണത്തിനായി പദ്ധതി നടപ്പാക്കി വരുന്നു. ബോധവത്കരണ പ്രവർത്തനങ്ങള്‍, ക്ലീനിംഗ് ഡ്രൈവുകള്‍, ചെറുപട്ടണങ്ങളിലടക്കം നഗരസൗന്ദര്യവത്കരണം തുടങ്ങി ഹരിത കർമസേനയുടെ സഹായത്തോടെ കേന്ദ്ര സംസ്ഥാന സർക്കാരുകളുടെ മാലിന്യ ശേഖരണ സംസ്കരണ പ്രവർത്തനങ്ങൾ ചിട്ടയോടെ നടപ്പാക്കിയതാണ് നേട്ടങ്ങൾക്ക് കാരണം. അനധികൃത മാലിന്യ നിക്ഷേപം തടയുന്നതിനും നടപടി സ്വീകരിക്കുന്നതിനും സിസിടിവി കാമറകൾ സ്ഥാപിച്ചു. നഗര ശുചിത്വം മെച്ചപ്പെടുത്തുന്നതിൽ ഇരിട്ടി നഗരസഭയുടെ പൊതുജന പങ്കാളിത്തത്തോടെ ഉള്ള പ്രവർത്തങ്ങളും വലിയ പങ്ക് വഹിച്ചു.

കാലവർഷം: ജില്ലയിൽ വ്യാപക നാശം

സ്വന്തം ലേഖകൻ കണ്ണൂർ: കാലവർഷം തിമിർത്തതോടെ മഴയിലും കനത്ത കാറ്റിലും കാർഷിക വിളകൾക്കുണ്ടായത് കോടികളുടെ നാശനഷ്ടം. ഇക്കഴിഞ്ഞ മാർച്ച് 15 മുതൽ ഇന്നലെ വരെ ജില്ലാ കൃഷി വകുപ്പിന് ലഭിച്ച കണക്ക് പ്രകാരം ഏറ്റവും കൂടുതൽ നാശനഷ്ടം ഉണ്ടായത് വാഴകൾക്കാണ്. സ്ഥലം പാട്ടത്തിനെടുത്തും ബാങ്കിൽനിന്ന് വായ്പയെടുത്തും ഏറെ പ്രതീക്ഷയോടെ നട്ട് നനച്ചുണ്ടാക്കിയ വിളകളാണ് കാലവർ ഷത്തിന്‍റെ കലിതുള്ളലിൽ ഇല്ലാതായത്. ജില്ലയിൽ ഇന്നലെ വരെ 2,12,335 കുലച്ച വാഴകളും 96,720 കുലക്കാത്ത വാഴകളും നശിച്ചു. കുലച്ച വാഴകൾക്ക് 12.74 കോടിയുടെയും കുലയ്ക്കാത്തതിന് 3.87 കോടി രൂപയുടെയും നഷ്ടമാണ് കണക്കാ ക്കിയിരിക്കുന്നത്. 4755 തെങ്ങുകളും അപ്രത്യക്ഷമായി. ഇതുവഴി 2.37 കോടിയുടെ നഷ്ടമുണ്ടായി. ടാപ്പിംഗ് നടത്തുന്ന 8122 റബർ മരങ്ങൾ നശിച്ചതിൽ 1.63 കോടിയും, ടാപ്പിംഗ് തുടങ്ങാ ത്ത 1430 മരങ്ങൾ നശിച്ചതിൽ 21.5 ലക്ഷത്തിന്‍റേയും നഷ്ടം സംഭവിച്ചു. ജില്ലയിൽ 10,834 കുലച്ച കമുകുകളും 2433 കുലയില്ലാത്ത കമുകുകളും നശിച്ചു. ഇവയ്ക്ക് യഥാക്രമം 32 ലക്ഷം, ആറ് ലക്ഷം എന്നിങ്ങനെ നഷ്ടം കണക്കാക്കുന്നു. 1.70 ഹെക്ടർ സ്ഥലത്തെ നെല്ല് നശിച്ചു. ഇതു വഴി 2- 5 ലക്ഷം രൂപയുടെ നഷ്ടം സംഭവിച്ചു. 718 കശുമാവും (നഷ്ടം ഏഴ് ലക്ഷം), 1380 കുരുമുളക് ചെടികളും, 175 കൊക്കോ മരങ്ങളും നശിച്ചു. കുരുമുളകിന് 10 ലക്ഷവും കൊക്കോയ്ക്ക് 61,000 രൂപയുടെയും നഷ്ടമാണ് കണക്കാക്കിയത്. വിളകൾക്ക് നാശനഷ്ടം സംഭവിച്ച 1524 പേർ ഇതിനകം കൃഷിവകുപ്പിന് അപേക്ഷ നല്കിയതായി കൃഷിവകുപ്പ് ഡെപ്യൂട്ടി ഡയറക്ടർ വിഷ്ണു പറഞ്ഞു. ഇതിൽ 1000 പരുടെ ശിപാർശ ഇതിനകം അംഗീകരിച്ചു. അവർക്ക് തുക ഉടൻ നല്കും. മറ്റുള്ളവരുടെ അപേക്ഷകൾ പരിശോധിച്ചു വരികയാണ്. കാർഷിക നഷ്ട പരിഹാരം നല്കുന്നതിനായി ജില്ലയ്ക്ക് 48,40,079 രൂപ സംസ്ഥാന സർക്കാർ അനുവദിച്ചു. ഇതിൽ 4,94,704 രൂപ കേന്ദ്ര വിഹിതമാണ്. തുകയുടെ വിതരണം ഉടൻ ആരംഭിക്കുമെന്ന് ഡെപ്യൂട്ടി ഡയറക്ടർ അറിയിച്ചു. വ്യാപക മണ്ണിടിച്ചില്‍ കണ്ണൂർ: തളിപ്പറമ്പ് താലൂക്കിലുണ്ടായ ശക്തമായ മഴയില്‍ വളപട്ടണം പുഴയുടെ കരയില്‍ ചെക്കിക്കടവ് മുതല്‍ എരഞ്ഞിക്കടവ് വരെയുള്ള ഭാഗങ്ങളില്‍ വ്യാപകമായ മണ്ണിടിച്ചില്‍ ഉണ്ടായതായി കയരളം വില്ലേജ് ഓഫീസര്‍ അറിയിച്ചു. വ്യാഴാഴ്ച പുലര്‍ച്ചെയുണ്ടായ കനത്ത മഴയില്‍ കമ്പില്‍ ദേശത്തെ വി. രാജേഷ്, വി. ഓമന എന്നിവരുടെ വീട്ടിനിടയിലുള്ള മതിലിടിഞ്ഞ് ഇരുവരുടെയും വീടിന് ചെറിയ നാശനഷ്ടങ്ങള്‍ സംഭവിച്ചു. കാവുമ്പായി റേഷന്‍ കടയ്ക്ക് സമീപത്തെ വാസുദേവന്‍റെ വീടിന് മുകളില്‍ തെങ്ങ് കടപുഴകിവീണ് നാശനഷ്ടം സംഭവിച്ചു. നിടിയേങ്ങ വില്ലേജ് പരിധിയിലെ കാവുമ്പായില്‍ കോണ്‍ക്രീറ്റ് വീടിന് മുകളിലേക്ക് തെങ്ങു വീണ് നാശനഷ്ടമുണ്ടായതായി വില്ലേജ് ഓഫീസര്‍ അറിയിച്ചു. ആളപായങ്ങളില്ല. ശ്രീകണ്ഠാപുരം പഴയങ്ങാടിയില്‍ മണ്ണിടിഞ്ഞ് മരം ഇലക്ട്രിക് ലൈനിന് മുകളിലേക്ക് വീണതിനെ തുടര്‍ന്ന് മൂന്ന് പോസ്റ്റുകള്‍ റോഡിലേക്ക് പൊട്ടി വീണ് വാഹന ഗതാഗതം തടസപ്പെട്ടു. ഫയര്‍ഫോഴ്‌സും കെഎസ്ഇബിയും തടസം നീക്കിയിട്ടുണ്ട്. പട്ടുവം കൂത്താട്ട് കുന്നില്‍ വീണ്ടും മണ്ണിടിച്ചില്‍ ഉണ്ടായതായി കൊളച്ചേരി വില്ലേജ് ഓഫീസര്‍ അറിയിച്ചു. അപകടകരമായ മരങ്ങളും മരച്ചില്ലകളും മുറിച്ചു നീക്കാൻ നിര്‍ദേശം കണ്ണൂർ: ജില്ലയില്‍ അപകടാവസ്ഥയില്‍ നില്‍ക്കുന്ന മരം/മരച്ചില്ലകള്‍ മുറിച്ചു നീക്കുന്നത് സംബന്ധിച്ച് ജില്ലാ ദുരന്തനിവാരണ അഥോറിറ്റി ചെയര്‍മാന്‍ കൂടിയായ ജില്ലാ കളക്ടര്‍ അരുണ്‍ കെ വിജയന്‍ തദ്ദേശ സ്വയംഭരണ സ്ഥാപന സെക്രട്ടറിമാര്‍ക്കും വിവിധ വകുപ്പുകള്‍ക്കും മാര്‍ഗനിര്‍ദേശം നല്കി. മഴക്കാലത്ത് അപകടങ്ങള്‍ ഒഴിവാക്കുന്നതിനായി സംസ്ഥാന ദുരന്തനിവാരണ അഥോറിറ്റിയുടെ ഓറഞ്ച് ബുക്ക് പ്രകാരമാണ് നിര്‍ദേശം. മരങ്ങള്‍ മരച്ചില്ലകള്‍ വീണ് അപകടം, നാശനഷ്ടം എന്നിവ ഉണ്ടാകുന്നി ല്ലെന്ന് തദ്ദേശസ്ഥാപന സെക്രട്ടറിമാര്‍ ഉറപ്പുവരുത്തണം. അപകടകരമായ രീതിയില്‍ നില്‍ക്കുന്ന മരങ്ങളും മരച്ചില്ലകളും കണ്ടെത്തി മുറിച്ചു മാറ്റുന്നത് സംബന്ധിച്ച നിര്‍ദ്ദേശങ്ങള്‍ അനുസരിക്കാത്ത വ്യക്തികള്‍ക്കും സ്ഥാപനങ്ങള്‍ക്കുമായിരിക്കും അവരവരുടെ ഭൂമിയിലുള്ള മരം വീണുണ്ടാകാവുന്ന എല്ലാ അപകടങ്ങള്‍ക്കം നഷ്ട പരിഹാരം നല്‍കേണ്ട ബാധ്യത. അടിയന്തര സാഹചര്യങ്ങളില്‍ മരങ്ങള്‍/ചില്ലകള്‍ മുറിച്ചു മാറ്റുന്നതിന് തദ്ദേശ സ്ഥാപനങ്ങള്‍ക്കും മറ്റു വകുപ്പുകള്‍ക്കും ആവശ്യമായ സഹായ - സഹകരണം ഫയര്‍ ആന്‍ഡ് റെസ്‌ക്യൂ, പോലീസ്, കെഎസ് ഇബി തുടങ്ങിയ വകുപ്പുകള്‍/ഏജന്‍സികള്‍ കൃത്യമായി ലഭ്യമാക്കേണ്ടതാണെന്നും ജില്ലാ കളക്ടര്‍ നിര്‍ദേശിച്ചു. കണ്ണൂരിൽ ഒന്പത് വീടുകൾ പൂർണമായും 252 വീടുകൾ ഭാഗികമായും തകർന്നു ശക്തമായ കാലവർഷപെയ്ത്തിൽ വീടുകൾക്കും വ്യാപക നാശനഷ്ടം. മേയ് 15 മുതൽ ജൂലൈ 17 വരെ ജില്ലയിൽ ഒന്പതു വീടുകൾ പൂർണമായും 252 വീടുകൾ ഭാഗികമായും തകർന്നു. പൂർണമായി തകർന്ന അഞ്ചു വീടുകൾ കണ്ണൂർ താലൂക്കിലാണ്. വെള്ളത്തിൽ വീണും മറ്റും അഞ്ചു മനുഷ്യ ജീവനുകളാണ് പൊലിഞ്ഞത്. അഞ്ചു വളർത്തുമൃഗങ്ങളും ചത്തു. ജില്ലയിൽ മാർച്ച് 13 മുതൽ ജൂലൈ 17 വരെ വൈദ്യുതി വകുപ്പിനുണ്ടായ നഷ്ടം 14. 33 കോടി രൂപയാണ്. വൈദ്യുത പോസ്റ്റ്, വൈദ്യുത ലൈൻ, ട്രാൻസ്ഫോർമർ എന്നിവയ്ക്കുണ്ടായ നാശനഷ്ടമാണിത്. മാർച്ച് 13 മുതൽ ജൂൺ 11 വരെ 12. 04 കോടിയുടെയും ജൂൺ 11 മുതൽ ജൂലൈ 17 വരെ 2.29 കോടിയു ടെയും നഷ്ടമാണ് കണക്കാക്കിയിരിക്കുന്നത്.

ആദിവാസികളെ കള്ളക്കേസിൽ കുടുക്കിയതായി ആരോപണം; മാർച്ച് നടത്തി

ആലക്കോട്: ഫർലോംഗ്‌കരയിൽ വ്യാജമദ്യ റെയ്‌ഡിനെത്തിയ എക്സൈസ് അതിക്രമം നടത്തിയെന്നും ആദിവാസികളെ കള്ളക്കേസിൽ കുടുക്കിയതായും ആരോപിച്ച് ആദിവാസി ക്ഷേമസമിതി ആലക്കോട് ഏരിയാ കമ്മിറ്റി ആഭിമുഖ്യത്തിൽ ആലക്കോട് എക്സൈസ് ഓഫീസിലേക്ക് മാർച്ച് നടത്തി. മാർച്ചിൽ സ്ത്രീകൾ ഉൾപ്പെടെ നിരവധി പേർ പങ്കെടുത്തു. എക്സൈസ് ഓഫീസിന് മുന്നിൽ ആലക്കോട് എസ്എച്ച്ഒ മഹേഷ് കെ. നായർ, കുടിയാന്മല എസ്എച്ച്ഒ എം.എൻ. ബിജോയി, എസ്ഐമാരായ എൻ.ജെ. ജോസ്, കെ.വി. സത്യനാഥൻ എന്നിവരുടെ നേതൃത്വത്തിൽ പോലീസ് മാർച്ച് തടഞ്ഞു. പ്രതിഷേധ മാർച്ച് എകെഎസ് ജില്ലാ സെക്രട്ടറി കെ. മോഹനൻ ഉദ്ഘാടനം ചെയ്‌തു. പി. കുമാരൻ അധ്യക്ഷത വഹിച്ചു. സിപിഎം ഏരിയാ കമ്മിറ്റിയംഗം സി.എൻ. ഷൈൻകുമാർ, ബ്ലോക്ക് പഞ്ചായത്ത് വൈസ് പ്രസിഡന്‍റ് പി. പ്രേമലത, കെ.ബി. ചന്ദ്രൻ, ഇ.സി. കുഞ്ഞിരാമൻ, ഫർലോംഗ്‌കര ഉന്നതി ഊര്‌മൂപ്പൻ രമേശൻ , പി.കെ. രവി എന്നിവർ പ്രസംഗിച്ചു.

നാലു ദിവസം റെഡ് അലർട്ട്: വിനോദ സഞ്ചാര കേന്ദ്രങ്ങളിലേക്കുള്ള പ്രവേശനം നിർത്തിവച്ചു

കണ്ണൂർ: കേന്ദ്ര കാലാവസ്ഥാ വകുപ്പ് കണ്ണൂർ ജില്ലയിൽ 17, 18, 19, 20 തീയതികളിൽ റെഡ് അലർട്ട് പ്രഖ്യാപിച്ച സാഹചര്യത്തിൽ ജില്ല ടൂറിസം പ്രമോഷൻ കൗൺസിലിന്‍റെ കീഴിലുള്ള വിനോദ സഞ്ചാര കേന്ദ്രങ്ങളിലേക്കുള്ള പ്രവേശനം താത്കാലികമായി നിർത്തിവച്ചു. സഞ്ചാരികളുടെ സുരക്ഷ മുൻ നിർത്തി ജില്ലയിലെ ബീച്ചുകളിൽ അടക്കം പ്രവേശനം ഉണ്ടായിരിക്കുന്നതല്ല. ശക്തമായ കടൽ ക്ഷോഭം കാരണം വെള്ളം കേറുന്നതിനാൽ വാഹനങ്ങൾ താഴ്ന്ന് പോകുന്നതുൾപ്പെടെയുള്ള അപകടങ്ങൾ ഒഴിവാക്കാൻ മുഴപ്പിലങ്ങാട് ബീച്ചിലേക്ക് ഉള്ള വാഹനങ്ങളുടെ പ്രവേശനം നേരത്തെ നിർത്തിയിട്ടുണ്ട്. കയാക്കിംഗ്, റാഫ്റ്റിംഗ്, ട്രെക്കിംഗ് തുടങ്ങിയ സാഹസിക വിനോദ സഞ്ചാര പ്രവർത്തനങ്ങൾക്കും നിരോധനം ബാധകമാണ്. നിയന്ത്രണം ലംഘിച്ച് ബീച്ചുകളിൽ അടക്കം പോകുന്നത് അപകടം വിളിച്ചു വരുത്തുമെന്നതിനാൽ മേൽ കാര്യങ്ങളിൽ ജാഗ്രത പാലിക്കണമെന്ന് ഡിടിപിസി അറിയിച്ചു. ജില്ലയിൽ റെഡ് അലർട്ട് പിൻവലിക്കുന്നത് വരെ നിയന്ത്രണങ്ങൾ തുടരും. എന്നാൽ മുഴപ്പിലങ്ങാട് ബീച്ചിലേക്ക് വാഹനങ്ങൾ പ്രവേശിക്കുന്നതിനുള്ള നിയന്ത്രണം മറ്റൊരു അറിയിപ്പ് ഉണ്ടാവുന്നത് വരെ തുടരും. അതിതീവ്ര മഴയ്ക്ക് സാധ്യതയുള്ളതിനാൽ കേന്ദ്ര കാലാവസ്ഥ വകുപ്പ് കണ്ണൂർ, കാസർഗോ ഡ് ജില്ലകളിൽ ജൂലൈ 17 മുതൽ 20 വരെയാണ് റെഡ് അലർട്ട് പ്രഖ്യാപിച്ചത്.

ചെറുപുഴ നവജ്യോതി കോളജിൽ ദീക്ഷാരംഭ്

ചെറുപുഴ: നവജ്യോതി കോളജിൽ ഒന്നാം വർഷ ഡിഗ്രി വിദ്യാർഥികളുടെ അധ്യയന വർഷം ഉദ്ഘാടനം ചെയ്തു. ഇതോടൊപ്പം അഞ്ചു ദിവസം നീളുന്ന ദീക്ഷാരംഭ് സംഘടിപ്പിച്ചു. ഒന്നാം വർഷ വിദ്യാർഥികളുടെ സമ്മേളനത്തിൽ കോളജ് മാനേജർ ഫാ. ജോസഫ് ചാത്തനാട്ട് അധ്യയന വർഷം ഉദ്ഘാടനം ചെയ്തു. കോളജ് പ്രിൻസിപ്പൽ ഡോ. കെ.കെ. സോമശേഖരൻ അധ്യക്ഷത വഹിച്ചു. ഫാ. അരുൺ, ഫാ. സിജോയ് പോൾ എന്നിവർ പ്രസംഗിച്ചു. അഞ്ചു ദിവസം നീണ്ടുനിന്ന ദീക്ഷാരംഭിൽ ഇന്‍റർ നാഷണൽ ട്രെയിനർ ടി.എൻ. ബാലചന്ദ്രൻ ഐസ് ബ്രേക്കിംഗ് സെഷൻ നടത്തി. ഫാ. സിജോയ് പോൾ ഇൻസ്റിറ്റ്യൂഷണൽ ഓറിയന്‍റേഷൻ നടത്തി. ലഹരിയുടെ ലോകവും സൈബർ നിയമങ്ങളും എന്ന വിഷയത്തെക്കുറിച്ച് പെരിങ്ങോം എഎസ്ഐ. ഹബീബ് റഹ്മാൻ ക്ലാസ് നയിച്ചു. വ്യക്തിത്വ വികസനത്തെക്കുറിച്ച് കെ.ആർ. കൺസ്ട്രക്ഷൻ എംഡി ഷിജു കൊന്നക്കൽ ക്ലാസ് നയിച്ചു. ഗായിക എലിസബത്ത് എസ്. മാത്യു, പൂർവ വിദ്യാർഥികളായ മുഹമ്മദ് മിൻഹാജ് , ആദർശ് മാത്യു എന്നിവർ വിദ്യാർഥികളുമായി സംവദിച്ചു. അഞ്ച് ദിവസങ്ങൾ വിവിധ ഗെയിമുകൾ നടത്തിയും, ഓടക്കൊല്ലി നേച്ചറൽ ഗുഹയിൽ സാഹസിക യാത്ര നടത്തിയും പെരുമ്പടവ് തലവിൽ പ്രവർത്തിക്കുന്ന ജിഎസ്ആർടിസി റിഹാബിലിറ്റെഷൻ കേന്ദ്രത്തിലെ അന്തേവാസികളെ സന്ദർശിച്ച് വിവിധ പ്രോഗ്രാമുകൾ നടത്തിയും ചെലവഴിച്ചു.

പട്ടയമേള: ഇരിക്കൂറിൽ 123 പട്ടയങ്ങൾ വിതരണം ചെയ്തു

കണ്ണൂർ: ഇരിക്കൂർ നിയോജക മണ്ഡല പട്ടയ മേളയിൽ 26 എൽഎ പട്ടയങ്ങളും 97 ലാൻഡ് ട്രൈബ്യൂണൽ പട്ടയങ്ങളുമുൾപ്പടെ 123 പട്ടയങ്ങൾ വിതരണം ചെയ്തു. പട്ടയ വിതരണത്തിന്‍റെ ഉദ്ഘാടനം മന്ത്രി കെ. രാജൻ ഓൺലൈനായി നിർവഹിച്ചു. ഭൂരഹിതരില്ലാത്ത കേരളം എന്ന സ്വപ്നത്തിലേക്ക് അതിവേഗം സഞ്ചരിക്കുന്ന ഈ ഘട്ടത്തിൽ ഡിജിറ്റൽ റവന്യു കാർഡ് എല്ലാവരുടെയും കൈകളിൽ ഈ സാമ്പത്തിക വർഷം തന്നെ എത്തുമെന്ന് മന്ത്രി പറഞ്ഞു. 50 വർഷത്തിലധികമായി നിലനിൽക്കുന്ന പട്ടയ പ്രശ്‌നങ്ങളാണ് പട്ടയ ഡാഷ്‌ബോർഡിൽ ഉൾപ്പെടുത്തി പരിഹരിക്കാൻ സാധിച്ചത്. കഴിഞ്ഞ ഒന്പത് വർഷത്തിനുള്ളിൽ സംസ്ഥാനത്ത് നാല് ലക്ഷത്തി ഒന്പതിനായിരത്തോളം പട്ടയങ്ങൾ വിതരണം ചെയ്യാൻ സാധിച്ചത് ശ്രദ്ധേയമായ കാര്യമാണെന്നും അദ്ദേഹം കൂട്ടിച്ചേർത്തു. ഇരിക്കൂർ ബ്ലോക്ക് പഞ്ചായത്ത് ഹാളിൽ നടന്ന പരിപാടിയിൽ സജീവ് ജോസഫ് എംഎൽഎ അധ്യക്ഷത വഹിച്ചു. അർഹരായവർക്കുള്ള പട്ടയങ്ങൾ എംഎൽഎ വിതരണം ചെയ്തു. ശ്രീകണ്ഠാപുരം നഗരസഭ ചെയർപേഴ്‌സൺ ഡോ. കെ.വി. ഫിലോമിന, ടി.പി. ഫാത്തിമ, സി.എം കൃഷ്ണൻ, ബേബി ഒടമ്പള്ളിൽ, സാജു സേവ്യർ, കെ.എസ്. ചന്ദ്രശേഖരൻ, വി.പി. മോഹനൻ, ജോജി കന്നിക്കാട്ട്, മിനി ഷൈബി, പി.സി ഷാജി, പി. ശ്രീധരൻ, സി.വി.എൻ. യാസിറ, ഡെപ്യൂട്ടി കളക്ടർ സി. എം. ലത, തളിപ്പറമ്പ ആർഡിഒ സി.കെ. ഷാജി, വിവിധ രാഷ്ട്രീയ പാർട്ടി പ്രതിനിധികൾ എന്നിവർ പങ്കെടുത്തു.

ടിഎസ്എസ്എസ് ചെമ്പേരി ട്രസ്റ്റിന്‍റെയും മഹിളാ സേവാസംഘത്തിന്‍റെയും വാർഷിക സമ്മേളനം

ചെമ്പേരി: തലശേരി സോഷ്യൽ സർവീസ് സൊസൈറ്റിയുടെ (ടിഎസ്എസ്എസ്) ആഭിമുഖ്യത്തിലുള്ള ചെമ്പേരി ട്രസ്റ്റിന്‍റെയും ചെമ്പേരി മഹിളാ സേവാസംഘത്തിന്‍റെയും (എംഎസ്എസ്) സംയുക്ത വാർഷിക സമ്മേളനം ചെമ്പേരി മദർ തെരേസ ഓഡിറ്റോറിയത്തിൽ നടന്നു. ടിഎസ്എസ്എസ് തലശേരി അതിരൂപത പ്രസിഡന്‍റ് ജോഷി കുന്നത്ത് ഉദ്ഘാടനം ചെയ്തു. ടിഎസ്എസ്എസ് ചെമ്പേരി ട്രസ്റ്റ്, എംഎസ്എസ് എന്നിവയുടെ ഡയറക്‌ടറും ചെമ്പേരി ലൂർദ് മാതാ ബസിലിക്ക റെക്‌ടറുമായ റവ. ഡോ.ജോർജ് കാഞ്ഞിരക്കാട്ട് അധ്യക്ഷത വഹിച്ചു. ചെമ്പേരി ട്രസ്റ്റ് പ്രസിഡന്‍റ് ജോയ്സി കുറ്റിവേലിൽ ആമുഖ പ്രഭാഷണവും ഏരുവേശി ഗ്രാമപഞ്ചായത്ത് സ്ഥിരം സമിതി അധ്യക്ഷ പൗളിൻ തോമസ് മുഖ്യപ്രഭാഷണവും നടത്തി. ടിഎസ്എസ്എസ് ചെമ്പേരി ട്രസ്റ്റ് സെക്രട്ടറി സൗമ്യ ഇല്ലിക്കൽ, ചെമ്പേരി എംഎസ്എസ് ട്രസ്റ്റ് സെക്രട്ടറി ഡൈനമ്മ തോമസ് എന്നിവർ വാർഷിക റിപ്പോർട്ടുകൾ അവതരിപ്പിച്ചു. ട്രസ്റ്റ് അസിസ്റ്റന്‍റ് ഡയറക്‌ടർ ഫാ. അജേഷ് തുരുത്തേൽ, ചെമ്പേരി മേഖലാ കോ-ഓഡിനേറ്റർ സിസ്റ്റർ ആലീസ് മാത്യു, പ്രോഗ്രാം മാനേജർ ലിസി ജിജി, റീജണൽ കോ-ഓഡിനേഷൻ കമ്മിറ്റി എക്സിക്യൂട്ടീവ് അംഗം ജെയ്സൺ മേക്കലാത്ത്, ചെമ്പേരി എംഎസ്എസ് പ്രസിഡന്‍റ് ദേവി സുരേന്ദ്രൻ എന്നിവർ പ്രസംഗിച്ചു.

എക്സ്പ്ലോസീവ് മാഗസിൻ: ആർഡിഒക്ക് പരാതി നല്കി

പയ്യാവൂർ: ശ്രീകണ്ഠപുരം നഗരസഭാ പരിധിയിലെ കംബ്ലാരിയിൽ എക്സ്പ്ലോസീവ് മാഗസിൻ സ്ഥാപിക്കാൻ അനുമതി നൽകാനുള്ള നഗരസഭ തീരുമാനത്തിനെതിരേ ആർഡിഒക്ക് കംബ്ലാരിയിലെ പരിസരവാസികളായ പതിനൊന്നു പേർ ഒപ്പിട്ട പരാതി നൽകി. തങ്ങൾ നഗരസഭാ അധികൃതർക്ക് ഇതുസംബന്ധിച്ച് നൽകിയ പരാതി പരിഗണിക്കാതെയും തങ്ങളെ കേൾക്കാതെയുമാണ് നഗരസഭാ ഭരണ സമിതി ഇക്കാര്യത്തിൽ തീരുമാനമെടുത്തതെന്ന് പരാതിയിൽ പറയുന്നു. ആയതിനാൽ ആർഡിഒ നേരിട്ട് തങ്ങളെ കേട്ടതിനുശേഷം തീരുമാനം പുനപരിശോധിക്കണമെന്നാണു പരാതിക്കാരുടെ ആവശ്യം.

കോളിത്തട്ട് സഹകരണ ബാങ്ക് : നിക്ഷേപകരുടെ പണം തിരികെ നല്‍കണം: സജീവ് ജോസഫ്

ഉളിക്കൽ: കോളിത്തട്ട് സർവീസ് സഹകരണ ബാങ്കിൽ നടന്ന ക്രമക്കേടുകളെ സംബന്ധിച്ച് അന്വേഷണം നടത്തി ഉത്തരവാദികൾക്കെതിരെ നടപടി സ്വീകരിക്കുകയും നിക്ഷേപങ്ങൾ തിരികെ നൽകുകയും വേണമെന്ന് ആവശ്യപ്പെട്ട് സജീവ് ജോസഫ് എംഎൽഎ സഹകരണ മന്ത്രി വി.എൻ. വാസവന് കത്ത് നൽകി. സിപിഎം ഭരണത്തിലായിരുന്ന ബാങ്കിൽ ഭരണ സമിതിയംഗങ്ങളും ജീവനക്കാരും ചേർന്ന് കോടികളുടെ അഴിമതി നടത്തിയതായി കണ്ടെത്തുകയും ഭരണ സമിതി പിരിച്ച് വിടുകയും ചെയ്‌തിരുന്നു. അഡ്‌മിനിസ്ട്രേറ്റർ ഭരണം ഏർപ്പെടുത്തിയെങ്കിലും തുക തിരിച്ച് നൽകുന്നതിനോ പുതിയ ഭരണ സമിതിയെ തിരഞ്ഞെടുക്കുന്നതിനൊ സാധിച്ചില്ല. ഈ സാഹചര്യത്തിൽ നിക്ഷേപകരുടെ ആശങ്ക പരിഹരിക്കുന്നതിന് നിക്ഷേപത്തുക അടിയന്തരമായി തിരികെ നൽകാൻ നടപടി വേണമെന്നാവശ്യപ്പെട്ടാണ് കത്ത് നൽകിയത്.

ടി.പി വധക്കേസ് പ്രതി തടവ് ശിക്ഷയ്ക്കിടെ ആശുപത്രിയിൽ മരിച്ചു

കണ്ണൂർ: ടി.പി. ചന്ദ്രശേഖരൻ വധക്കേസിൽ കോടതി ശിക്ഷിച്ചതിനെതുടർന്ന് കണ്ണൂർ സെൻട്രൽ ജയിലിൽ‌ ശിക്ഷ അനുഭവിച്ചു വരുന്ന പത്താം പ്രതിയും സിപിഎം നേതാവുമായിരുന്ന കെ.കെ. കൃഷ്ണൻ (84)അസുഖത്തെതുടർന്നു മരിച്ചു. സംസ്കാരം വടകര ചോന്പാലയിലെ തട്ടോളിക്കരയിലെ വീട്ടുവളപ്പിൽ നടത്തി. ഹൃദയ സംബന്ധമായ അസുഖത്തിനൊപ്പം ന്യുമോണിയ ബാധിച്ചതിനെ തുടർന്ന് പരിയാരത്തെ കണ്ണൂർ ഗവ. മെഡിക്കൽ കോളജിൽ ചികിത്സയിലായിരുന്നു. ഇന്നലെ രാവിലെയാണ് മരിച്ചത്. വടകര ബ്ലോക്ക് പഞ്ചായത്ത് മുൻ പ്രസിഡന്‍റും സിപിഎം ഒഞ്ചിയം മുൻ ഏരിയ കമ്മിറ്റിയംഗവുമായിരുന്നു. ഭാര്യ: യശോദ. മക്കൾ: സുസ്മിത ( കോ-ഓപ്പ് ഡിപ്പാർട്ട്മെന്‍റ് ജീവനക്കാരി, വടകര), സുമേഷ് (അസി. മാനേജർ കെഎസ്എഫ്ഇ, വടകര), സുജീഷ് (സോഫ്റ്റ്‌വേർ എൻജിനിയർ). മരുമക്കൾ: പി.പി. മനോജൻ (കേരള ബാങ്ക്, നാദാപുരം), രനിഷ , പ്രിയ. സഹോദരങ്ങൾ: മാത, പരേതരായ കുഞ്ഞിക്കണ്ണൻ, ചാത്തു,ഗോപാലൻ, കണാരൻ.

കുളത്തിൽ മുങ്ങിത്താഴ്ന്ന് അബോധാവസ്ഥയിലായ യുവാവിനെ ജീവിതത്തിലേക്ക് കരകയറ്റി ടെക്കി

കണ്ണൂർ: സുഹൃത്തുക്കൾക്കൊപ്പം കുളത്തിൽ കുളിക്കുന്നതിനിടെ മുങ്ങിത്താഴ്ന്ന് അബോധാവസ്ഥയിലായ യുവാവിനെ ജീവിതത്തിലേക്ക് അതിസാഹസികമായി പിടിച്ചുകയറ്റി ഐടി പ്രഫഷണലായ യുവാവ്. ഇന്നലെ രാവിലെ പതിനൊന്നോടെ പള്ളിക്കുന്ന് തയ്യിൽ തറവാട് കുളത്തിലായിരുന്നു സംഭവം. കണ്ണൂർ ഹൈറ്റ്സിലെ താമസക്കാരനായ ശ്രീകാർത്തിക് സനോജിനാണ് (22) കുളത്തിനു സമീപത്തെ താമസക്കാരനും ബംഗളൂരുവിലെ ഐടി സ്ഥാപനത്തിലെ ജീവനക്കാരനുമായ അഷിനിന്‍റെ (32) സമയോചിതമായ ഇടപെടലിലൂടെ ജീവൻ തിരിച്ചുകിട്ടിയത്. പതിവായി നീന്തൽ പരിശീലനം നടക്കാറുള്ള കുളത്തിൽ ഇന്നലെ ആരുമില്ലാതിരുന്ന സമയത്താണ് ശ്രീകാർത്തിക് സനോജും രണ്ടു സുഹൃത്തുക്കളും നീന്താനെത്തിയത്. നീന്തുന്നതിനിടെ പേശീവലിവ് അനുഭവപ്പെട്ട് വെള്ളത്തിനടിയിലേക്ക് താഴ്ന്നുപോകുകയായിരുന്നു. കൂടെയുണ്ടായിരുന്നവർ ബഹളം വയ്ക്കുന്നതു കേട്ട് ഓടിയെത്തിയ തൊട്ടടുത്ത വീട്ടിലെ അഷിൻ വെള്ളത്തിനടിയിൽ അബോധാവസ്ഥയിൽ കിടക്കുന്ന ശ്രീകാർത്തികിനെ ഞൊടിയിടയിൽ പൊക്കിയെടുത്ത് കരയ്ക്കെത്തിക്കുകയായിരുന്നു. ഇതിനിടെ സമീപത്തെ വീട്ടുകാരി ശുഭ അഗ്നിരക്ഷാസേനയെയും വിവരമറിയിച്ചിരുന്നു. എന്നാൽ അഗ്നിരക്ഷാ സേനയെത്തുന്പോഴേക്കും അഷിൻ യുവാവിനെ കരയ്ക്കെത്തിച്ച് സിപിആർ ഉൾപ്പടെയുള്ള പ്രഥമ ശുശ്രൂഷ നൽകി ജീവിതത്തിലേക്ക് തിരിച്ചെത്തിച്ചിരുന്നു. ""ഏറെ നേരം സിപിആർ നൽകിയിട്ടും പ്രതികരണമുണ്ടാകാതിരുന്നപ്പോൾ ഭയന്നു പോയെങ്കിലും സിപിആർ ചെയ്യുന്നത് തുടർന്നതോടെ ചെറിയ ചലനമുണ്ടായത് പ്രതീക്ഷയ്ക്ക് വക നൽകി. ഇതിനിടെ അഗ്നിരക്ഷാസേന കൂടിയെത്തിയത് ആശ്വാസമായി. അഗ്നിരക്ഷാ സേനാംഗങ്ങളും പ്രഥമ ശുശ്രൂഷ നൽകുകയും ഉടൻ ആശുപത്രിയിലെത്തിക്കുകയും ചെയ്തു.'' കണ്ണൂർ അഗ്നിരക്ഷാ നിലയത്തിലെ സ്റ്റേഷൻ ഓഫീസർ പി.വി. പവിത്രന്‍റെ നേതൃത്വത്തിലുള്ള സംഘമാണ് യുവാവിനെ ആശുപത്രിയിലെത്തിച്ചത്.എകെജി ആശുപത്രിയിൽ പ്രവേശിപ്പിച്ച യുവാവ് അപകടനില തരണം ചെയ്തതായി ആശുപത്രി വൃത്തങ്ങൾ അറിയിച്ചു. അഷിന്‍റെ സമയോചിതമായ ഇടപെടലാണ് യുവാവിന്‍റെ ജീവൻ രക്ഷിച്ചതെന്നും അഷിനെ അഭിനന്ദിക്കുന്നതായും അഗ്നിരക്ഷാ സേനാംഗങ്ങൾ പറഞ്ഞു. അഷിനെ കെ.വി. സുമേഷ് എംഎൽഎ വീട്ടിലെത്തി ഉപഹാരം നൽകി അനുമോദിച്ചു.

വീണ്ടും ഫൈബര്‍ ഓടം മറിഞ്ഞു; മണല്‍ത്തിട്ട നീക്കാന്‍ മത്സ്യത്തൊഴിലാളികള്‍

പയ്യന്നൂര്‍: പാലക്കോട് അഴിമുഖത്തെ മണല്‍ത്തിട്ടയിലിടിച്ച് ഇന്നലെയും ഫൈബര്‍ ഓടം മറിഞ്ഞ് അപകടം. എട്ടിക്കുളം സ്വദേശി മുഹമ്മദ് ഹാജിയുടെ ഫൈബര്‍ ഓടമാണ് മറിഞ്ഞത്. ഭീഷണിയായി മാറിയ മണല്‍ത്തിട്ട നീക്കാന്‍ അധികൃതര്‍ നടപടി സ്വീകരിക്കാത്തതിനെ തുടര്‍ന്ന് മത്സ്യത്തൊഴിലാളികള്‍ സ്വന്തം ചെലവിൽ മണല്‍ത്തിട്ട നീക്കം ചെയ്യൽ തുടങ്ങി. ഇന്നലെ രാവിലെ എട്ടേമുക്കാലോടെയാണ് മണല്‍ത്തിട്ടയിലിടിച്ച് വീണ്ടും ഫൈബര്‍ ഓടം മറിഞ്ഞ് അപകടമുണ്ടായത്. പാലക്കോട് ഹാര്‍ബറില്‍നിന്നും മത്സ്യബന്ധനത്തിനായി പോകുന്നതിനിടെ മണൽതിട്ടയിലിടിച്ച് ഹാജിയുടെ അല്‍ മിന്ന എന്ന ഫൈബര്‍ ഓടം മറിയുകയായിരുന്നു. പത്തോളം തൊഴിലാളികളാണ് ഓടത്തിലുണ്ടായിരുന്നത്. ഇവരില്‍ എട്ടിക്കുളം പള്ളിക്കോളനിയിലെ അബ്ദുള്‍ റഹ്മാന്‍, ചിറ്റടിയിലെ രതീഷ് എന്നിവര്‍ക്ക് സിസാര പരിക്കേറ്റു. മറ്റുള്ളവര്‍ പരിക്കേല്‍ക്കാതെ രക്ഷപ്പെട്ടു. പരിക്കേറ്റവരെ പയ്യന്നൂരിലെ സ്വകാര്യ ആശുപത്രിയില്‍ പ്രവേശിപ്പിച്ചു. അന്പതടിയോളം നീളമുള്ള ഫൈബര്‍ ഓടം വടംകെട്ടി വലിച്ചുകയറ്റാനുള്ള തൊഴിലാളികളുടെ ആദ്യശ്രമങ്ങള്‍ പരാജയപ്പെട്ടപ്പോള്‍ മണല്‍ നീക്കുന്നതിനായി കൊണ്ടുവന്ന ഹിറ്റാച്ചിയില്‍ ബന്ധിപ്പിച്ച് വലിച്ചു കയറ്റുകയറ്റാന്‍ ശ്രമിച്ചിട്ടും ഫലമുണ്ടായില്ല. വിവരമറിഞ്ഞെത്തിയ നാട്ടുകാരുള്‍പ്പെടെയുള്ള മുന്നൂറോളം പേര്‍ കൂടുതല്‍ വടങ്ങള്‍ കെട്ടിയാണ് പത്തേകാലോടെ ഓടം വലിച്ച് കരയ്ക്കടുപ്പിച്ചത്. കടലില്‍വീണ ഓടത്തിലുണ്ടായിരുന്ന ലക്ഷങ്ങള്‍ വിലവരുന്ന മൂന്ന് എൻജിനുകളും വല വലിച്ചുകയറ്റുന്നതിനുള്ള വീഞ്ചും വലകളും മറ്റുപകരണങ്ങളും മത്സ്യത്തൊഴിലാളികള്‍ വീണ്ടെടുത്തെങ്കിലും എല്ലാം തകര്‍ന്ന നിലയിലാണുള്ളത്. തകര്‍ന്ന ഓടം ശരിയാക്കുന്നതിനും ലക്ഷങ്ങള്‍ ചെലവിടേണ്ടിവരുമെന്നതാണ് അവസ്ഥ. ചൊവ്വാഴ്ച വൈകുന്നരം മറ്റൊരു ഓടം അപകടത്തില്‍പ്പെട്ടിരുന്നു. പുതിയങ്ങാടിയിലെ അലോഷ്യസിന്‍റെ വള്ളം മണല്‍ത്തിട്ടയിലിടിച്ച് അടിഭാഗം തകര്‍ന്ന് വെള്ളം കയറുകയായിരുന്നു. കടലില്‍ മുങ്ങിത്താഴുന്നതിന് മുമ്പായി സമീപത്തുണ്ടായിരുന്ന സൈന്‍ എന്ന വള്ളത്തിലെ തൊഴിലാളികള്‍ അപകടത്തില്‍പ്പെട്ട തൊഴിലാളികളേയും തൊഴിലുപകരണങ്ങളും രക്ഷപ്പെടുത്തുകയായിരുന്നു. കോസ്റ്റല്‍ പോലീസാണ് ഓടം കെട്ടിവലിച്ച് കരയ്ക്കെത്തിച്ചത്. അധികൃതര്‍ കനിഞ്ഞില്ല; ഒടുവില്‍ മത്സ്യത്തൊഴിലാളികള്‍ രംഗത്ത് റീബില്‍ഡ് കേരള ഇനിഷ്യേറ്റീവില്‍ ഉള്‍പ്പെടുത്തി 26.60 കോടി രൂപ ചെലവില്‍ പണിതിട്ടും പണിതിട്ടും പൂര്‍ത്തീകരിക്കാത്ത പാലക്കോട് വലിയകടപ്പുറം അഴിമുഖത്തെ പുലിമുട്ടിനരികില്‍ രൂപപ്പെട്ട മണല്‍ത്തിട്ടയാണ് രണ്ട് ദിവസങ്ങളിലായി അപകടങ്ങൾക്കിടയാക്കിയത്. വേലിയേറ്റത്തില്‍ മണല്‍ത്തിട്ട വെള്ളത്തില്‍ മൂടുമ്പോള്‍ എവിടെയാണ് അപകടം പതിയിരിക്കുന്നതെന്ന് തിരിച്ചറിയാന്‍ പറ്റാത്ത അവസ്ഥയായിരുന്നു. പുഴയില്‍നിന്നു വെള്ളമൊഴുകി പോകാനുള്ള വഴി മാത്രമാണ് അവശേഷിച്ചിരുന്നത്. വേലിയറക്കത്തില്‍ മാത്രമേ ആഴമുള്ള സ്ഥലം തിരിച്ചറിയാന്‍ പറ്റുമായിരുന്നുള്ളൂ. മത്സ്യത്തൊഴിലാളികള്‍ ജില്ലാ കളക്ടറുടെ ശ്രദ്ധയില്‍ ഇക്കാര്യമുന്നയിച്ചിട്ടും പരിഹാരമുണ്ടായില്ലെന്ന് ആക്ഷേപമുണ്ട്. അധികൃതരുടെ കനിവ് കാണാതെ വന്നപ്പോള്‍ മത്സ്യത്തൊഴിലാളികള്‍തന്നെ ഇതിനൊരു പരിഹാരം കാണാന്‍ മുന്നോട്ടുവരികയായിരുന്നു. പുതിയങ്ങാടിയിലേയും പാലക്കോട്ടേയും മത്സ്യത്തൊഴിലാളികളുടെ കൂട്ടായ്മയായ കടക്കോടതികള്‍ ഇരിട്ടിയില്‍നിന്നും കൊണ്ടുവന്ന വലിയ ഹിറ്റാച്ചികളുപയോഗിച്ച് മണല്‍ത്തിട്ട നീക്കം ചെയ്യുന്ന പ്രവര്‍ത്തി ഇന്നലെ മുതല്‍ ആരംഭിച്ചിട്ടുണ്ട്. രണ്ടുദിവസത്തെ മണല്‍ നീക്കുന്ന പ്രവര്‍ത്തിക്ക് മാത്രമായി ഒരുലക്ഷത്തിലേറെ രൂപയാണ് ചെലവഴിക്കേണ്ടി വന്നത്.

പഴയങ്ങാടിയിൽ ബസുകൾ കൂട്ടിയിടിച്ച് 38 പേർക്ക് പരിക്ക്

പഴയങ്ങാടി: റെയിൽവേ സ്റ്റേഷന് സമീപം സ്വകാര്യ ബസുകൾ കൂട്ടിയിടിച്ച് 38 യാത്രക്കാർക്കു പരിക്ക്. ഇന്നലെ രാവിലെ പത്തരയോടെയാണ് അപകടം. പുതിയങ്ങാടി മൊട്ടാമ്പ്രത്തെ സ്വകാര്യ ആശുപത്രിയിൽ 32 പേർ ചികിത്സ തേടി. ഏറെ പേരെ പ്രാഥമിക ശുശ്രൂഷ നൽകി പറഞ്ഞയച്ചു. പരിക്കേറ്റവരിൽ അധികവും സ്ത്രീകളാണ് കെ. ശുഭ (37) മാട്ടൂൽ സൗത്ത്, എം. ഷൈമ (38) എട്ടിക്കുളം, കെ.വി. രചന (39) മാട്ടൂൽ നോർത്ത്, മാട്ടൂൽ സ്വദേശികളായ മുഹമ്മദലി (50), അബ്ദുൾ റഹ്മാൻ (50), ജിൻസി (30), ഫർസാന (23), നിത (20), സൂര്യ (24), റയാൻ റയാദ് (ആറ്), ടി. ശശി (54), അഭിലാഷ് (45), ഖദീജ (45), ഹസ്ന സുനാദ് (25), ദിൽ ഫത്ത് (12) റിയാസ്, മുഹ്സിൻ, ഹന്നത്ത് (15) ഫാദിൽ ഫൈസൽ (14), മുഹമ്മദ് റയാൻ (13), ബജീഷ് (38), വാടിക്കലിലെ ദീപ (52), പുതിയങ്ങാടിയിലെ സജിനി (40), മാടായിലെ സി. ജോയ് (48) എന്നിവരാണ് മൊട്ടാമ്പ്രത്തെ ക്രസ്റ്റന്‍റ് ആശുപത്രിയിൽ ചികിത്സ തേടിയത്. ഇവരിൽ ചിലരെ നിരീക്ഷണത്തിനു ശേഷം വൈകുന്നേരത്തോടെ വിട്ടയച്ചു. മാട്ടൂൽ സൗത്ത് സ്വദേശിനി ആബിദ ( 38 )യെ പരിയാരത്തെ കണ്ണൂർ ഗവ. മെഡിക്കൽ കോളജ് ആശുപത്രിയിൽ പ്രവേശിപ്പിച്ചു. മാട്ടൂൽ സൗത്തിലെ ഫാത്തിമത്തുൽ മർവ(34), ഹസ്ന ഹമിദ് (27) എന്നിവരെ കണ്ണൂർ കിംസ് ആശുപത്രിയിൽ പ്രവേശിപ്പിച്ചു. ഇരുവരും കിംസ് ആശുപത്രിയിലെ ജീവനക്കാരാണ്. കഴിഞ്ഞദിവസം പഴയങ്ങാടി ബീവി റോഡ് അടിപ്പാതക്ക് സമീപം ഗതാഗതം നിയന്ത്രിക്കുകയായിരുന്ന ഹോം ഗാർഡ് രാജേഷിനെ അപായപ്പെടുത്താൻ ശ്രമിച്ച ബ്രീസ് ബസാണ് അപകടമുണ്ടാക്കിയത്. രണ്ടു ദിവസം പോലീസ് കസ്റ്റഡിയിലായിരുന്ന ബസ് ഇന്നലെയാണ് വീണ്ടും സർവീസ് ആരംഭിച്ചത്. പഴയങ്ങാടി ഭാഗത്തുനിന്ന് മാട്ടൂലിലേക്ക് പോകുന്ന ഫെമി ഗ്രൂപ്പിന്‍റെ ബസും മാട്ടൂലിൽ നിന്ന് പഴയങ്ങാടി ഭാഗത്തേക്ക് പോകുന്ന ബ്രീസ് ബസും തമ്മിലാണ് കൂട്ടിയിടിച്ചത്. ഇടിയുടെ ആഘാതത്തിൽ ഇരുബസുകളുടെയും മുൻഭാഗം പൂർണമായും തകർന്നു. അപകടം വരുത്തും വിധം ബസ് ഓടിച്ചതിന് ബ്രീസ് ബസ് ഡ്രൈവർ മാട്ടൂലെ എം. ആഷിഖി(35) നെതിരെ പഴയങ്ങാടി പോലീസ് കേസെടുത്തു. അപകടത്തെ തുർന്ന് ഏറെ നേരം ഇതുവഴിയുള്ള ഗതാഗതം തടസപ്പെട്ടു. പഴയങ്ങാടി പോലീസ് എത്തിയാണ് ഗതാഗതം നിയന്ത്രിച്ച് വാഹനങ്ങളെ കടത്തിവിട്ടത്.

എടക്കാനം ആക്രമണ കേസിൽ ഒരാൾകൂടി അറസ്റ്റിൽ

ഇരിട്ടി: എടക്കാനം റിവർ വ്യൂ പോയിന്‍റിൽ ഞായറാഴ്ച നടന്ന ആക്രമണത്തിൽ ഒരാൾ കൂടി അറസ്റ്റിൽ. കാക്കയങ്ങാട് പടിഞ്ഞാറെകണ്ടി പിടങ്ങോട് സ്വദേശി അരുൺ എന്ന അരൂട്ടിയെയാണ്(33) ഇരിട്ടി സിഐ എ. കുട്ടിക്കൃഷ്ണന്‍റെ നേതൃത്വത്തിലുള്ള പോലീസ് സംഘം അറസ്റ്റ് ചെയ്തത്. എടക്കാനത്ത് എത്തിച്ച് തിരിച്ചറിയൽ നടപടികൾ പൂർത്തിയാക്കിയ ശേഷം പ്രതിയെ കോടതിയിൽ ഹാജരാക്കി. പോക്സോ ഉൾപ്പെടെ ആറോളം കേസുകളിലെ പ്രതിയാണ് അറസ്റ്റിലായ അരുൺ. സംഭവത്തിൽ കഴിഞ്ഞ ദിവസം സിപിഎം കാക്കയങ്ങാട് ലോക്കൽ കമ്മറ്റിയംഗം പാലപ്പുഴ സ്വദേശി എ. രഞ്ജിത്ത് (32), മുഴക്കുന്ന് സ്വദേശി അക്ഷയ് (25) എന്നിവരെഅറസ്റ്റ് ചെയ്തിരുന്നു.

ഫാ. ഏബ്രഹാം പറമ്പേട്ട് കോട്ടയം അതിരൂപത പ്രിസ്ബിറ്ററല്‍ കൗണ്‍സില്‍ സെക്രട്ടറി

കോട്ടയം: ഫാ. ഏബ്രഹാം പറമ്പേട്ടിനെ കോട്ടയം അതിരൂപത പ്രിസ്ബിറ്ററല്‍ കൗണ്‍സില്‍ സെക്രട്ടറിയായി വീണ്ടും തെരഞ്ഞെടുത്തു. നിലവില്‍ കോട്ടയം അതിരൂപതാ പ്രൊക്കുറേറ്ററായി സേവനമനുഷ്ഠിക്കുകയാണ്. മടമ്പം ഇടവക പറമ്പേട്ട് കുര്യാക്കോസ്-ഏലിയാമ്മ ദമ്പതികളുടെ മകനാണ്. കോട്ടയം അതിരൂപത ആര്‍ച്ച്ബിഷപ് മാര്‍ മാത്യു മൂലക്കാട്ടിന്‍റെ അധ്യക്ഷതയില്‍ തെള്ളകം ചൈതന്യ പാസ്റ്ററല്‍ സെന്‍ററില്‍ ചേര്‍ന്ന അതിരൂപതയുടെ പുതുതായി രൂപീകരിച്ച പ്രിസ്ബിറ്ററല്‍ കൗണ്‍സിലിന്‍റെ ആദ്യയോഗത്തിലാണ് തെരഞ്ഞെടുപ്പ് നടന്നത്. ഫാ. ലൂക്ക് കരിമ്പില്‍, ഫാ. തോമസ് പ്രാലേല്‍, ഫാ. റെന്നി കട്ടേല്‍ എന്നിവരെ പ്രിസ്ബിറ്ററല്‍ കൗണ്‍സില്‍ എക്സിക്യുട്ടീവ് അംഗങ്ങളായും, ഫാ. മാത്യു കൊച്ചാദംപള്ളിലിനെ അതിരൂപതാ പാസ്റ്ററല്‍ കൗണ്‍സില്‍ പ്രതിനിധിയായും തെരഞ്ഞെടുത്തു.

സഹ. സംഘത്തിലെ കോടികളുടെ തട്ടിപ്പ്: സെക്രട്ടറി അറസ്റ്റിൽ

ചക്കരക്കൽ: കോൺഗ്രസ് നിയന്ത്രണത്തിലുള്ള സഹകരണ സംഘത്തിൽനിന്നു കോടികൾ തട്ടിയ സംഭവത്തിൽ സൊസൈറ്റി സെക്രട്ടറി അറസ്റ്റിൽ. പാനേരിച്ചാൽ കക്കോത്ത് സ്വദേശി ഇ.കെ. ഷാജിയെയാണ് ചക്കരക്കൽ സിഐ എം.പി. ഷാജിയുടെ നേതൃത്വത്തിലുള്ള പോലീസ് സംഘം എറണാകുളത്ത് നിന്നും അറസ്റ്റ് ചെയ്ത്. കണ്ണൂർ ജില്ലാ ബിൽഡിംഗ് മെറ്റീരിയൽ കോ-ഓപ്പറേറ്റീവ് സൊസൈറ്റിയിലെ നിക്ഷേപത്തുകയിൽ തിരിമറി നടത്തിയ കേസിലാണു അറസ്റ്റ്. അറ്റൻഡർ പാതിരിയാട് പടുവിലായിലെ കെ.കെ. ഷൈലജയ്ക്കെതിരെയും ജില്ലാ കോ-ഓപ്പറേറ്റീവ് ഓഡിറ്റ് വിഭാഗം ജോയിന്‍റ് ഡയറക്‌ടർ പി.വി. വത്സരാജിന്‍റെ പരാതിയിൽ ചക്കരക്കൽ പോലീസ് നേരത്തെ കേസെടുത്തിരുന്നു. 2023-24 സാമ്പത്തിക വർഷത്തിലെ ഓഡിറ്റിംഗിൽ സൊസൈറ്റി അംഗങ്ങളിൽനിന്നു സ്വീകരിച്ച നിക്ഷേപത്തുകയിൽനിന്ന് സെക്രട്ടറിയുടെ ചുമതല വഹിച്ച ഒന്നാം പ്രതി 7,83,98,121 രൂപയും രണ്ടാം പ്രതി അറ്റൻഡർ 21,00,530 രൂപയും കൈവശപ്പെടുത്തുകയും നിക്ഷേപകർക്ക് പണം തിരിച്ചു നൽകാതെ വിശ്വാസവഞ്ചന ചെയ്തുവെന്നായിരുന്നു പരാതി. നിക്ഷേപകർ സംഘം ചേർന്നു മറ്റൊരു പരാതിയും പോലീസിൽ നൽകിയിരുന്നു. കേസെടുത്തതിന് പിന്നാലെ സെക്രട്ടറി ഒളിവിലായിരുന്നു.

കോർപറേഷന്‍ സെക്രട്ടറിയെ കോൺഗ്രസ് പ്രവർത്തകർ ഉപരോധിച്ചു

കണ്ണൂർ: കണ്ണൂർ പുതിയ ബസ് സ്റ്റാൻഡിൽ തോട് കൈയറി അനധികൃതമായി കെട്ടിടം നിർമിച്ച് ജനങ്ങളുടെ സഞ്ചാര സ്വാതന്ത്ര്യം തടസപ്പെടുത്തിയിട്ടും നടപടികൾ ഉണ്ടാകുന്നില്ലെന്നാരോപിച്ച് കോൺഗ്രസ് പ്രവർത്തകർ സെക്രട്ടറിയെ ഉപരോധിച്ചു. സെക്രട്ടറി വിനു സി. കുഞ്ഞപ്പനെയാണ് ഡിസിസി സെക്രട്ടറി ടി. ജയകൃഷ്ണൻ , കണ്ണൂർ ബ്ലോക്ക് പ്രസിഡന്‍റ് രാഹുൽ കായക്കൽ, വൈസ് പ്രസിഡന്‍റ് ഷിബു ഫെർണാണ്ടസ്, രാഗേഷ് ആയിക്കര, ഷിബിൻ തുടങ്ങിയവരുടെ നേതൃത്വത്തിൽ ഓഫീസിൽ ഉപരോധിച്ചത്. ഒരു വർഷം മുന്പ് വാർഡ് കൗൺസിലർ വിഷയം കോർപറേഷന്‍റെ ശ്രദ്ധയിൽ പെടുത്തിയിട്ടും നടപടി ഉണ്ടായില്ലെന്നും സമരക്കാർ പറഞ്ഞു. വിവരമറിഞ്ഞ് സ്ഥലത്തെത്തിയ ടൗൺ എസ്ഐ വി.വി.ദീപ്തിയുടെ നേതൃത്വത്തിലുള്ള പോലീസ് സംഘം ഇരുവരുമായി ചർച്ച ചെയ്യുകയും അനധികൃത കെട്ടിടം പൊളിക്കാമെന്ന് സെക്രട്ടറി ഉറപ്പ് നൽകുകയും ചെയ്തതിനെ തുടർന്ന് ഉപരോധം അവസാനിപ്പിച്ചു. അനധകൃത കെട്ടിട വിഷയവുമായി ബന്ധപ്പെട്ട് ഇന്നലെ സിപിഎം ജില്ലാ സെക്രട്ടറിയുടെ നേതൃത്വത്തിൽ പ്രദേശവാസികളും സമരം നടത്തിയിരുന്നു.

വിദ്യാരംഗം കലാസാഹിത്യ വേദിയുടെയും വിവിധ ‌ക്ലബുകളുടെയും ഉദ്ഘാടനം

കൊളക്കാട്: കാപ്പാട് സെന്‍റ് സെബാസ്റ്റ്യൻസ് യുപി സ്കൂളിൽ വിദ്യാരംഗം കലാസാഹിത്യവേദിയുടെയും വിവിധ ക്ലബുകളുടെയും ഉദ്ഘാടനം നടത്തി. വിസിലിംഗ് ഗിന്നസ് വേൾഡ് റിക്കാർഡ് ജേതാവ് ബാബു കൊടോളിപ്രം ഉദ്ഘാടനം ചെയ്തു. സ്കൂൾ മാനേജർ ഫാ. തോമസ് പട്ടാംകുളം അധ്യക്ഷത വഹിച്ചു. ഉദ്ഘാടനം ചെയ്ത ബാബു കൊടോളിപ്രം അവതരിപ്പിച്ച വിസിലിംഗ്, മിമിക്രി, മോണോ ആക്‌ട് തുടങ്ങിയവ കുട്ടികൾക്ക് വേറിട്ട അനുഭവമായിരുന്നു. സ്കൂൾ മുഖ്യാധ്യാപിക ജാൻസി തോമസ്, പിടിഎ പ്രസിഡന്‍റ് സന്തോഷ് പെരേപ്പാടൻ, മദർ പിടിഎ പ്രസിഡന്‍റ് ജിസ്ന ടോബിൻ, സ്കൂൾ ലീഡർ ഏയ്ഞ്ചൽ മരിയ റെന്നി, അധ്യാപക പ്രതിനിധി റീന ചെറിയാൻ തുടങ്ങിയവർ പ്രസംഗിച്ചു. അധ്യാപകരായ പി.എ. ജെയ്സൺ, പി.ജെ. ജസ്റ്റിൻ, ദീപ്തി കുര്യാക്കോസ് എന്നിവർ പരിപാടികൾക്കു നേതൃത്വം നൽകി. കുട്ടികളുടെ വിവിധ കലാപരിപാടികളും അരങ്ങേറി.

ക്വട്ടേഷന്‍ സംഘങ്ങള്‍ക്കെതിരേ നാട് ഒന്നിക്കണം: മാര്‍ട്ടിന്‍ ജോര്‍ജ്

ഇരിട്ടി: നാട്ടില്‍ വര്‍ധിച്ച് വരുന്ന ക്വട്ടേഷന്‍ സംഘങ്ങളുടെ ആക്രമണങ്ങള്‍ക്കെതിരേ രാഷ്ട്രീയ ഭേദമില്ലാതെ നാട് ഒറ്റക്കെട്ടായി നില്‍ക്കണമെന്നും നിരവധി കൊലക്കേസുകളില്‍ പ്രതികളായവര്‍ നാട്ടിലിറങ്ങി വീണ്ടും അക്രമം നടത്തുകയാണന്നും ഡിസിസി പ്രസിഡന്‍റ് മാര്‍ട്ടിന്‍ ജോര്‍ജ്. എടക്കാനം റിവര്‍വ്യൂ പൊയന്‍റില്‍ നടന്ന ക്വട്ടേഷന്‍ സംഘത്തിന്‍റെ അക്രമത്തില്‍ പ്രതിഷേധിച്ച് കോണ്‍ഗ്രസ് എടക്കാനം ബൂത്ത് കമ്മിറ്റി സംഘടിപ്പിച്ച പ്രതിഷേധ കൂട്ടായ്മ ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം. ബൂത്ത് പ്രസിഡന്‍റ് കെ.കെ. ഉണ്ണിക്കൃഷ്ണന്‍ അധ്യക്ഷത വഹിച്ചു. കെപിസിസി സെക്രട്ടറി ചന്ദ്രന്‍ തില്ലങ്കേരി,ഡിസിസി സെക്രട്ടറി പി.കെ. ജനാര്‍ദനന്‍, ബ്ലോക്ക് കോണ്‍ഗ്രസ് പ്രസിഡന്‍റ് പി.എ. നസീര്‍ മണ്ഡലം പ്രസിഡന്‍റുമാരായ സി.കെ. ശശിധരന്‍, കെ.വി. രാമചന്ദ്രന്‍, മുന്‍ ബ്ലോക്ക് പ്രസിഡന്‍റ് തോമസ് വര്‍ഗീസ്, മഹിള കോണ്‍ഗ്രസ് ബ്ലോക്ക് പ്രസിഡന്‍റ് മിനി പ്രസാദ്, ബ്ലോക്ക് കോണ്‍ഗ്രസ് വൈസ് പ്രസിഡന്‍റ് കുടൃപ്പ, സെക്രട്ടറിമാരായ, എം. ശ്രീനിവാസൻ, പി.എസ്. സുരേഷ്കുമാര്‍, സുമേഷ് നടുവനാട്, ഷാനിദ് പുന്നാട്. കെ. രാമകൃഷ്ണന്‍, വി. പ്രകാശന്‍ തുടങ്ങിയവർ പ്രസംഗിച്ചു.

സ്വകാര്യ ബസിടിച്ച് കാൽനടയാത്രക്കാരനു പരിക്ക്

മട്ടന്നൂർ: ചാവശേരി ഇരുപത്തിയൊന്നാംമൈലിൽ സ്വകാര്യ ബസിടിച്ച് കാൽനടയാത്രക്കാരന് പരിക്കേറ്റു. നരയമ്പാറ സ്വദേശി ടി.പി. അഹമ്മദ് കുട്ടിക്കാണ് (87) പരിക്കേറ്റത്. ഇന്നലെ ഉച്ചയോടെ ഇരുപത്തിയൊന്നാംമൈൽ ബസ് വെയിറ്റിംഗ് ഷെൽട്ടറിന് മുന്നിൽ വച്ചായിരുന്നു അപകടം. ഇരിട്ടിയിൽ നിന്ന് മട്ടന്നൂരിലേക്ക് വരികയായിരുന്ന സോൾജിയർ ബസ് അഹമ്മദ് കുട്ടിയെ ഇടിക്കുകയായിരുന്നു. ടി.പി. അഹമ്മദ് കുട്ടി റോഡ് മുറിച്ചുകടക്കാൻ ശ്രമിക്കുന്നതിനിടെയായിരുന്നു അപകടം. കാലിന് ഗുരുതരമായി പരിക്കേറ്റ വയോധികനെ മട്ടന്നൂരിലെ സ്വകാര്യ ആശുപത്രിയിൽ എത്തിച്ച് പ്രഥമ ശുശ്രൂഷ നൽകിയ ശേഷം കണ്ണൂരിലെ സ്വകാര്യ ആശുപത്രിയിലേക്ക് മാറ്റി. അപകടത്തിനിടയാക്കിയ ബസ് മട്ടന്നൂർ പോലീസ് സ്റ്റേഷൻ കോമ്പൗണ്ടിലേക്ക് മാറ്റി.

നവംബറോടെ എല്ലാവർക്കും റവന്യു ഡിജിറ്റൽ കാർഡ്: മന്ത്രി കെ. രാജൻ

തലശേരി: നവംബർ മാസത്തോടെ റവന്യു ഡിജിറ്റൽ കാർഡ് എല്ലാവരുടെയും കൈകളിലേക്ക് എത്തുമെന്ന് മന്ത്രി കെ.രാജൻ പറഞ്ഞു. തലശേരി സബ് കളക്ടർ ഓഫീസിൽ പുതുതായി നിർമിച്ച വീഡിയോ കോൺഫറൻസ് ഹാൾ ഓൺലൈനായി ഉദ്ഘാടനം ചെയ്തു പ്രസംഗിക്കുകയായിരുന്നു മന്ത്രി. സംസ്ഥാനത്ത് റവന്യു വകുപ്പിന്‍റെ പ്രവർത്തനങ്ങൾ അതിവേഗതയിൽ നടക്കുമ്പോൾ ആധുനിക സംവിധാനങ്ങൾ ഉണ്ടാവണമെന്നത് കാലഘട്ടത്തിന്‍റെ ആവശ്യമാണ്. റവന്യു വകുപ്പിന്‍റെ പ്രവർത്തനങ്ങളെ ഏകോപിപ്പിക്കുക മാത്രമല്ല വകുപ്പിന്‍റെ പ്രവർത്തനങ്ങൾ ഏറ്റവും വേഗതയിലും ഏറ്റവും കൂടുതൽ ജനങ്ങളിലേക്കും എത്തിക്കാനുള്ള ശ്രമമാണ് നടക്കുന്നതെന്നും മന്ത്രി പറഞ്ഞു. സംസ്ഥാന സർക്കാരിന്‍റെ സ്മാർട്ട് റവന്യൂ ഓഫീസ് പദ്ധതിയിൽ ഉൾപ്പെടുത്തിയാണ് കോൺഫറൻസ് ഹാൾ നിർമിച്ചത്. സ്പീക്കർ എ.എൻ. ഷംസീർ അധ്യക്ഷത വഹിച്ചു.ശിലാഫലകം സ്പീക്കർ നിർവഹിച്ചു. ജില്ലാ നിർമിതി കേന്ദ്ര പ്രൊജക്ട് മാനേജർ കെ. സജിത്ത് റിപ്പോർട്ട് അവതരിപ്പിച്ചു. നഗരസഭാധ്യക്ഷ കെ.എം. ജമുനാ റാണി, സബ് കളക്ടർ കാർത്തിക് പാണിഗ്രഹി, കണ്ണൂർ എഡിഎം. കല ഭാസ്‌കർ, തലശേരി തഹസിൽദാർ എം.വിജേഷ്, ഇരിട്ടി തഹസിൽദാർ സി.വി. പ്രകാശൻ, സബ് കളക്ടർ ഓഫീസ് സീനിയർ സൂപ്രണ്ട് പി പ്രേംരാജ് എന്നിവർ പങ്കെടുത്തു.

‘ഒപ്പരം' പ്രകാശനം ചെയ്തു

തലശേരി: സമഗ്ര ശിക്ഷാ കേരളം കണ്ണൂര്‍, തലശേരി സൗത്ത് ബി.ആര്‍.സി എന്നിവയുടെ നേതൃത്വത്തിൽ തലശേരിയിലെ പ്രാദേശിക ഭാഷാ പ്രയോഗങ്ങളെ കുറിച്ചുള്ള പുസ്തകം പ്രകാശനം ചെയ്തു. എഴുത്തുകാരൻ എം. മുകുന്ദൻ പ്രകാശനം നിർവഹിച്ചു. വിദ്യാർഥികളുടെ നേതൃത്വത്തിൽ 'ഒപ്പരം' എന്ന പേരിലാണ് പുസ്തകം തയാറാക്കിയത്. തലശേരി മുനിസിപ്പൽ ചെയർപേഴ്സൺ കെ.എം.ജമുനാറാണിക്ക് പുസ്തകം നൽകിയാണ് എം.മുകുന്ദൻ പ്രകാശനം നിർവഹിച്ചത്. തലശേരി സേക്രഡ് ഹാര്‍ട്ട്, തിരുവങ്ങാട് ഗവ. ഹയര്‍ സെക്കന്‍ഡറി, ന്യൂമാഹിഎംഎംഎച്ച്എസ്എസ് ന്യൂ മാഹി, പാലയാട് ഗവ. ഹയര്‍ സെക്കന്‍ഡറി, കൊടുവള്ളി ജിവിഎച്ച്എസ്എസ് കൊടുവള്ളി എന്നീ വിദ്യാലയങ്ങളില്‍ നിന്നും ആറ് വീതം കുട്ടികളെ ഉള്‍പ്പെടുന്ന 30 അംഗ സംഘമാണ് പ്രോജക്ട് പൂര്‍ത്തിയാക്കിയത്. നാട്ടുഭാഷാ പൈതൃകത്തിന്‍റെ ചരിത്ര പശ്ചാത്തലത്തെക്കുറിച്ച് പ്രമുഖ ചരിത്ര പണ്ഡിതതരായഡോ എ. വത്സലന്‍, ഞാറ്റിയാല ശ്രീധരന്‍ എന്നിവരുമായി വിദ്യാര്‍ഥികള്‍ അഭിമുഖം നടത്തി. തലശേരി മുനിസിപ്പൽ കോണ്‍ഫറന്‍സ് ഹാളില്‍ നടന്ന പരിപാടിയില്‍ തലശേരിസൗത്ത് ബി പിസി ടി.വി സഖീഷ് അധ്യക്ഷത വഹിച്ചു.

മലയോരത്ത് അപകടങ്ങൾ പെരുകുന്നു

ഇരിട്ടി: മഴ ശക്തമായതിനൊപ്പം വാഹനങ്ങളുടെ അമിത വേഗതയും അശ്രദ്ധയും മലയോരത്ത് വാഹനാപകടങ്ങൾക്കിടയാക്കുന്നു. ഇരിട്ടി കൂട്ടുപുഴ അന്തർസംസ്ഥാന പാതയിൽ റോഡിലെ വെള്ളക്കെട്ടും അപകടത്തിനിടയാക്കുന്നുണ്ട്. കഴിഞ്ഞ ദിവസം ഇരിട്ടി-കൂട്ടുപുഴ റോഡിൽ കല്ലുമുട്ടിയിൽ കർണാടക രജിസ്ട്രേഷൻ ലോറി ഇടിച്ച് ‌കെഎസ്ആർടിസി ബസിനും കാറിനും കേടുപാടുകൾ സംഭവിച്ചു. ഇരിട്ടി ഭാഗത്തു നിന്ന് കൂട്ടുപുഴ ഭാഗത്തേക്ക് വന്ന ലോറി ആദ്യം കാറിൽ ഇടിക്കുകയായിരുന്നു. ഇടിയുടെ ആഘാതത്തിൽ നിയന്ത്രണം വിട്ട കാർ കെഎസ്ആർടിസി ബസിലേക്ക് ഇടിച്ചു കയറുകയായിരുന്നു. ‍അപകടത്തിൽ പെട്ട വാഹനങ്ങളിലുള്ളവർ അത്ഭുതകരമായി രക്ഷപ്പെട്ടു.

ആറളം ഫാമിൽ കാട്ടാന തെങ്ങ് നശിപ്പിച്ചു

ഇരിട്ടി: ആറളം ഫാമിലെ ഒന്ന്, രണ്ട് ബ്ലോക്കുകളിൽ കാട്ടാനകൾ വ്യാപകമായി കൃഷി നശിപ്പിച്ചു. നിറയെ കായ്ഫലമുള്ള തെങ്ങുകളാണ് കാട്ടാന നശിപ്പിച്ചത്. ഒരാഴ്ചക്കുള്ളിൽ കാട്ടാനകൾ 25 ൽ അധികം തെങ്ങുകളെ ചുവടെ മറിച്ചിട്ട് നശിപ്പിച്ചു. ബ്ലോക്ക് ഒന്നിലും രണ്ടിലും തമ്പടിച്ചിരുന്ന കാട്ടാനകളാണ് കൃഷികൾ നശിപ്പിച്ചത്. മേഖലയിൽ നിന്ന് കാട്ടാനകളെ തുരത്തണമെന്ന് ഫാമിംഗ് കോർപ്പറേഷൻ ആവശ്യപെടുന്നെങ്കിലും യാതൊരു നടപടിയും വനംവകുപ്പിന്‍റെ ഭാഗത്തു നിന്ന് ഉണ്ടാകുന്നില്ലെന്നാണ് പരാതി. ഇതോടെ ഫാമിന്‍റെ കൃഷിയിടത്തിൽ നിലയുറപ്പിച്ചിരിക്കുന്ന ആനകൾ കൂട്ടമായി വന്ന് കൃഷികൾ നശിപ്പിക്കുകയാണ്. ഫാമിന് ലഭിക്കേണ്ടത് 91 കോടി ആറളം ഫാമിലെ കൃഷികൾ നശിപ്പിച്ച വകയിൽ വനം വകുപ്പ് ആറളം ഫാമിംഗ് കോർപറേഷന് നഷ്ടപരിഹാര ഇനത്തിൽ നൽകാനുള്ളത് 91 കോടിയോളം രൂപ വരുമെന്നാണ് ഫാമിംഗ് കോർപ്പറേഷന്‍റെ കണക്കുകൾ സൂചിപ്പിക്കുന്നത്. എന്നാൽ ഇതിനെകുറിച്ച് വനംവകുപ്പിന്‍റെ പ്രതികരണം ലഭ്യമല്ല. ഫാമിൽ പുതിയതായി ആരംഭിക്കുന്ന കൃഷികൾ ഉൾപ്പെടെ കാട്ടാനകൾ നശിപ്പിക്കുകയാണ്. ഫാമിൽ നിന്നും പുനരധിവാസ മേഖലയിൽ നിന്നും ആനകളെ പൂർണമായും തുരത്തിയാൽ മാത്രമേ ഇവിടെ ജനജീവിതവും കൃഷിയും സാധാരണ ഗതിയിലേക്ക് എത്തുകയുള്ളൂ. അതിനുള്ള പോംവഴി ആനമതിൽ നിർമാണം അടിയന്തരമായി പൂർത്തിയാക്കുക മാത്രമാണ്.

മാർ വള്ളോപ്പിള്ളി പ്രതിമ നിർമാണം: വെങ്കല വസ്തുക്കൾ കൈമാറി

വെണ്ണക്കല്ല്: ചെമ്പന്തൊട്ടിയിൽ നിർമാണം പൂർത്തിയാക്കിയ ബിഷപ് മാർ സെബാസ്റ്റ്യൻ വള്ളോപ്പിള്ളി സ്മാരക കുടിയേറ്റ മ്യൂസിയത്തിന്‍റെ മുന്നിൽ സ്ഥാപിക്കാനുള്ള വെങ്കല പ്രതിമ നിർമാണത്തിനായി വെങ്കല വസ്തുക്കൾ കൈമാറി. ആർച്ച്ബിഷപ് മാർ ജോസഫ് പാംപ്ലാനിയുടെ ആഹ്വാന പ്രകാരം കത്തോലിക്ക കോൺഗ്രസ് പ്രവർത്തകരുടെ നേതൃത്വത്തിലാണ് പഴയ വെങ്കല വസ്തുക്കളുടെ ശേഖരണം തുടങ്ങിയത്. ചെമ്പന്തൊട്ടി ഫൊറോന തലത്തിലുള്ള ശേഖരണം വെണ്ണക്കല്ല് സെന്‍റ് ആന്‍റണീസ് പള്ളിയിൽ നടന്ന ചടങ്ങിൽ വികാരി ഫാ. മാത്യു കുറുമ്പുറത്ത് ഉദ്ഘാടനം ചെയ്തു. കത്തോലിക്ക കോൺഗ്രസ് വെണ്ണക്കല്ല് യൂണിറ്റ് പ്രസിഡന്‍റ് അനിൽ മണ്ണാപറമ്പിലും പ്രവർത്തകരും സംഭരിച്ച 20 കിലോ വെങ്കല വസ്തുക്കൾ കത്തോലിക്ക കോൺഗ്രസ് ഫൊറോന പ്രസിഡന്‍റ് ജോസഫ് മാത്യു കൈതമറ്റത്തിന് കൈമാറി. ഫൊറോന സെക്രട്ടറി ഷാജിമോൻ കളപ്പുരയ്ക്കൽ, തോമസ് കരയിടത്ത്, പൗലോസ് തോട്ടപ്പള്ളി, ബിന്ദു മണ്ണാപറമ്പിൽ, മിനി പയ്യമ്പള്ളി എന്നിവർ പ്രസംഗിച്ചു.

നൂറുദിന കർമ പരിപാടികളുമായി പയ്യാവൂർ പഞ്ചായത്ത്

പയ്യാവൂർ: പഞ്ചായത്ത് ഭരണ സമിതിയുടെ കാലാവധി അവസാനിക്കാൻ നാല് മാസം മാത്രം ബാക്കി ശേഷിക്കേ വികസനത്തിന് വേഗത കൂട്ടാൻ നൂറുദിന കർമ പരിപാടിയിലൂടെ 40 പദ്ധതികൾ സമയ ബന്ധിതമായി നടപ്പാക്കാൻ പയ്യാവൂർ പഞ്ചായത്ത് . 21 മുതൽ ഒക്ടോബർ 30 വരെയുള്ള കാലയളവാണ് ഇതിനായി ഉദ്ദേശിക്കുന്നത്. സമ്പൂർണ ഭവന പദ്ധതി നടപ്പാക്കൽ, സൗരോർജ തൂക്കുവേലി രണ്ടാം ഘട്ട പ്രവൃത്തികൾ പൂർത്തിയാക്കി ചാർജ് ചെയ്യുക. ബഡ്സ് സ്കൂൾ കെട്ടിടങ്ങളുടെ നിർമാണ പൂർത്തീകരണം, ബഡ്സ് സ്കൂൾ കുട്ടികളുടെ അമ്മമാരുടെ ചപ്പാത്തി നിർമാണ യൂണിറ്റ് ആരംഭിക്കൽ, ബഡ്സ് സ്കൂളിന് സ്കൂൾ ബസ് വാങ്ങൽ, പൊന്നുംപറമ്പ്, ചന്ദനക്കാംപാറ സ്റ്റേഡിയങ്ങളുടെ ആധുനികവൽകരണ പ്രവർത്തനങ്ങൾ, ചന്ദനക്കാംപാറ, വഞ്ചിയം പി എച്ച്സി കെട്ടിടങ്ങളുടെ നിർമാണ പ്രവൃത്തികൾ, സ്ത്രീകൾക്ക് യോഗ പരിശീലനം, സീറോ അനീമിക് പഞ്ചായത്ത് പ്രവർത്തനങ്ങൾ, കൃഷിനാശമുണ്ടാക്കുന്ന കാട്ടുപന്നികളെ നിയമ വിധേയമായി നിഗ്രഹിക്കാൻ തോക്കുടമകൾക്ക് ഷൂട്ടർ ലൈസൻസും അനുമതിയും നൽകൽ, കണ്ടകശേരി പാലത്തിന് കൈവരി സ്ഥാപിക്കൽ, കാഞ്ഞിരക്കൊല്ലിയിൽ വന സംരക്ഷണ സമിതി രൂപീകരണം എന്നിവയടക്കം 40 പദ്ധതികളാണ് ലക്ഷ്യമാക്കുന്നത്. പയ്യാവൂർ പട്ടയമേളയുടെ ഭാഗമായി പഞ്ചായത്ത് ഏർപ്പെടുത്തിയ ഹെൽപ് ഡെസ്കിലൂടെ നിരവധി അപേക്ഷകൾ സുതാര്യമായി ലാൻഡ് ട്രിബ്യൂണലിലേക്ക് എത്തിച്ച് വരികയാണ്. ജില്ലയിലെ ഏകസ്ഥരുടെ സംഘടനയുടെ സഹകരണത്തോടെ "പയ്യാവൂർ മാംഗല്യം' എന്ന പേരിൽ സമൂഹ വിവാഹം സംഘടിപ്പിക്കുമെന്നും പഞ്ചായത്ത് പ്രസിഡന്‍റ് സാജു സേവ്യർ അറിയിച്ചു.

രാജരാജേശ്വര ക്ഷേത്രത്തിൽ ഭക്തജനത്തിരക്ക്

തളിപ്പറമ്പ്: രാജരാജേശ്വര ക്ഷേത്രത്തിൽ ഇന്നലെ കർക്കടക സംക്രമത്തിന് ഭക്തജനങ്ങളുടെ തിരക്ക്. ശക്തമായ മഴയിൽ പോലും നൂറുകണക്കിന് ഭക്തജനങ്ങളാണ് ഇന്നലെ പുലർച്ചെ നാലിന് കണിക്ക് തുറക്കൽ ദർശിക്കാൻ ദൂരെ സ്ഥലങ്ങളിൽ നിന്നു പോലും എത്തിച്ചേർന്നത്.ക്ഷേത്രത്തിൽ നെയ്യമൃത് സമർപ്പിച്ച് തൊഴാൻ രാവിലെ തന്നെ സ്ത്രീകളുടെ ഉൾപ്പെടെ നീണ്ട നിര തന്നെ ഉണ്ടായിരുന്നു. തിരക്ക് നിയന്ത്രിക്കുന്നതിന് തളിപ്പറമ്പ് എസ്ഐ ദിനേശൻ കൊതേരിയുടെ നേതൃത്വത്തിൽ പോലീസുകാരെയും വിന്യസിച്ചിരുന്നു.

വികസിത ഭാരതത്തിനായി പ്രവര്‍ത്തിക്കും: സി. സദാനന്ദന്‍

കണ്ണൂര്‍: എല്ലാ മേഖലയിലും വികസനം എന്ന പ്രധാനമന്ത്രിയുടെ ആഗ്രഹം പൂർത്തീകരിക്കാൻ താൻ പ്രവർത്തിക്കുമെന്ന് ബിജെപി സംസ്ഥാന വൈസ് പ്രസിഡന്‍റും നിയുക്ത രാജ്യസഭാംഗവുമായ സി. സദാനന്ദൻ. പയ്യാന്പലത്തെ മാരാർജി സ്മൃതി മണ്ഡപത്തിൽ പുഷ്പാർച്ചന നടത്തിയ ബിജെപി കണ്ണൂർ നോർത്ത് ജില്ലാ കമ്മിറ്റി നൽകിയ സ്വീകരണത്തിൽ പ്രസംഗിക്കുകയായിരുന്നു അദ്ദേഹം. തന്‍റെ നാമനിർദേശവുമായി ബന്ധപ്പെട്ട് വിവാദങ്ങളുണ്ടാക്കുന്നവർക്ക് നല്ല നമസ്കാരമെന്നും മ‍റക്കാൻ ശ്രമിക്കുന്ന കാര്യങ്ങൾ വീണ്ടും കീറി പരിശോധിക്കുന്നതിൽ നിന്ന് മാധ്യമങ്ങൾ പിൻമാറണമെന്നും സി. സദാനന്ദൻ പറഞ്ഞു. പുഷ്പാര്‍ച്ചനയിലും സ്വീകരണ ചടങ്ങിലും ബിജെപി മുന്‍ സംസ്ഥാന പ്രസിഡന്‍റ് സി.കെ. പദ്മനാഭന്‍, ദേശീയ നിര്‍വാഹക സമിതിയംഗം പി.കെ. കൃഷ്ണദാസ്, സംസ്ഥാന സെക്രട്ടറി കെ. രഞ്ജിത്ത്, ദേശീയ സമിതിയംഗങ്ങളായ സി. രഘുനാഥ്, പി.കെ. വേലായുധന്‍, ബിജെപി കണ്ണൂർ നോര്‍ത്ത് ജില്ലാ പ്രസിഡന്‍റ് കെ.കെ. വിനോദ്കുമാര്‍ എന്നിവര്‍ പങ്കെടുത്തു.

പെൻഷൻ പരിഷ്കരണം നടപ്പിലാക്കണം: കെഎസ്എസ്പിഎ

ശ്രീകണ്ഠപുരം: പെൻഷൻ പരിഷ്കരണം നടപ്പിലാക്കണമെന്നും കുടിശികയായ 20 ശതമാനം ക്ഷാമാശ്വാസം മുൻകാല പ്രാബല്യത്തോടെ മുഴുവനായും അനുവദിക്കണമെന്നും വിലക്കയറ്റം നിയന്ത്രിക്കണമെന്നും കേരള സ്റ്റേറ്റ് സർവീസ് പെൻഷനേഴ്സ് അസോസിയേഷൻ (കെഎസ്എസ്പിഎ) ഇരിക്കൂർ നിയോജക മണ്ഡലം കമ്മിറ്റിയോഗം ആവശ്യപ്പെട്ടു. പെൻഷൻകാരുടെ വിവിധ ആവശ്യങ്ങൾ ഉന്നയിച്ച് ഓഗസ്റ്റ് ആറ്, ഏഴ് തീയതികളിൽ നടക്കുന്ന കളക്‌ടറേറ്റ് ധർണയിൽ നിയോജക മണ്ഡലത്തിൽ നിന്നും 150 പേരെ പങ്കെടുപ്പിക്കുവാനും തീരുമാനിച്ചു.യോഗത്തിൽ പ്രസിഡന്‍റ് ജോസഫ് സഖറിയാസ് അധ്യക്ഷത വഹിച്ചു. പി.പി. ചന്ദ്രാംഗതൻ, എം.പി. കുഞ്ഞിമൊയ്തീൻ, പി.ടി. കുര്യാക്കോസ്, അപ്പു കണ്ണാവിൽ, പി. ദിനേശൻ, കെ.സി. ജോൺ, ഡോ. വി.എ. അഗസ്റ്റിൻ, കെ.വി. പത്മനാഭൻ, കെ.വി. കുഞ്ഞിരാമൻ, സി.എം. മാത്യു, പി.ജെ. സ്കറിയ, വിൽസൺ മാത്യു, വർഗീസ് ജോൺ, ടി.ടി. സെബാസ്റ്റ്യൻ, വി.വി. കുഞ്ഞികൃഷ്ണൻ, ഏബ്രഹാം തോമസ്, വി.ടി. മാത്യു, കെ. മോഹനൻ എന്നിവർ പ്രസംഗിച്ചു.

ഭൂഗര്‍ഭ ജലനിരപ്പ് ഉയർത്താൻ വിപുലമായ പദ്ധതികള്‍ നടപ്പാക്കും

കണ്ണൂർ: ജില്ലയിലെ ഭൂഗര്‍ഭ ജലനിരപ്പ് ഉയര്‍ത്തുന്നതിനായി കിണര്‍ റീചാര്‍ജിംഗ് ഉള്‍പ്പെടെയുള്ള വിപുലമായ പ്രവര്‍ത്തനങ്ങള്‍ക്ക് രൂപം നല്‍കാന്‍ ജില്ലാ പഞ്ചായത്ത് പ്രസിഡന്‍റ് കെ.കെ. രത്‌നകുമാരിയുടെ അധ്യക്ഷതയില്‍ കളക്ടറേറ്റ് കോണ്‍ഫറന്‍സ് ഹാളില്‍ ചേര്‍ന്ന നവകേരളം കര്‍മ്മപദ്ധതി ജില്ലാ മിഷന്‍ യോഗം തീരുമാനിച്ചു. ജില്ലയിലെ പാനൂര്‍, തലശേരി, കണ്ണൂര്‍, മട്ടന്നൂര്‍ ബ്ലോക്ക് പഞ്ചായത്ത് പ്രദേശങ്ങളിലും നഗരസഭകളിലും ജല ചൂഷണം വര്‍ധിക്കുന്നുവെന്നും ഈ പ്രദേശങ്ങളെ കേന്ദ്ര സര്‍ക്കാര്‍ നിര്‍ണായക വിഭാഗമായി പ്രഖ്യാപിക്കാന്‍ ഇടയുണ്ടെന്ന നാഷണല്‍ കോംപാലിയേഷന്‍ ഓണ്‍ ഡൈനാമിക് ഗ്രൗണ്ട് വാട്ടര്‍ റിസോഴ്സ്സ് ഓഫ് ഇന്ത്യയുടെ റിപ്പോര്‍ട്ടിനെ തുടര്‍ന്നാണ് നടപടി. ജില്ലാതല ജല ബജറ്റ് ഉടനെ തയാറാക്കാനും നവകേരളം കർമ പദ്ധതി യോഗം തീരുമാനിച്ചു. മാപ്പത്തോണ്‍ മാപ്പിംഗ് പൂര്‍ത്തീകരിച്ച ജില്ലയിലെ തദ്ദേശ ഭരണ സ്ഥാപനങ്ങളിലെ നീര്‍ച്ചാലുകള്‍ പുനരുദ്ധരിക്കാന്‍ പദ്ധതി ആവിഷ്‌കരിക്കാനും ധാരണയായി. യോഗത്തില്‍ ജില്ലാ കളക്ടര്‍ അരുണ്‍ കെ. വിജയന്‍, കല്യാശേരി ബ്ലോക്ക് പഞ്ചായത്ത് പ്രസിഡന്‍റ് പി.പി ഷാജിര്‍, തദ്ദേശ സ്വയംഭരണ വകുപ്പ് ജോയിന്‍റ് ഡയറക്ടര്‍ ടി.ജെ അരുണ്‍, ജില്ലാ പ്ലാനിംഗ് ഓഫീസര്‍ നെനോജ് മേപ്പടിയത്ത് എന്നിവര്‍ പങ്കെടുത്തു.

കാട്ടാനക്കൂട്ടം കൃഷി നശിപ്പിച്ചു

ഉദയഗിരി: ഉദയഗിരി പഞ്ചായത്തിലെ വായിക്കമ്പ പ്രദേശത്ത് ഭീതി പരത്തി കാട്ടാനക്കൂട്ടം. വായിക്കമ്പയിൽ അമ്പലത്തിങ്കൻ വാസുദേവന്‍റെ വീട്ടുമുറ്റത്തു വരെയാണ് കഴിഞ്ഞ ദിവസം കാട്ടാന കൂട്ടമായി എത്തിയത്. വീട്ടുകാർ അദ്ഭുതകരമായി രക്ഷപെടുകയായിരുന്നു. നിരവധി കർഷകരുടെ തെങ്ങ്, വാഴ, കമുക് തുടങ്ങിയ കൃഷികൾ വ്യാപകമായി നശിപ്പിച്ചു. നശിപ്പിച്ച കൃഷിയിടങ്ങൾ ഉദയഗിരി പഞ്ചായത്ത് പ്രസിഡന്‍റ് കെ.എസ്. ചന്ദ്രശേഖരൻ, വൈസ് പ്രസിഡന്‍റ് ബിന്ദു ഷാജു, ക്ഷേമ കാര്യസ്റ്റാൻഡിംഗ് കമ്മിറ്റി ചെയർമാൻ ഷീജ വിനോദ്, പഞ്ചായത്തംഗങ്ങളായ സിനി, ബിന്ദു രാജേഷ്, വി.സി. പ്രകാശ് എന്നിവർ സന്ദർശിച്ചു. കൃഷി നാശം സംഭവിച്ചവർക്ക് കഴിഞ്ഞ വർഷത്തൈതടക്കം നഷ്ടപരിഹാരം അടിയന്തരമായി നൽകണമെന്ന് കെ.എസ്. ചന്ദ്രശേഖരൻ ആവശ്യപ്പെട്ടു.

സ്ഥാനാരോഹണം നടത്തി

കുടിയാന്മല: വൈസ്മെൻ ഇന്‍റർനാഷണൽ കുടിയാന്മല ക്ലബിന്‍റെ 2025-26വർഷത്തെ ഭാരവാഹികളുടെ സ്ഥാനാരോഹണവും പുതിയ അംഗങ്ങളുടെ സത്യപ്രതിജ്ഞയും കുടിയാന്മല വൈസ്മെൻ ക്ലബ് ഹാളിൽ നടന്നു. വൈസ്മെൻ സോൺ രണ്ടിന്‍റെ എൽആർഡി മധു പണിക്കർ ഉദ്ഘാടനം ചെയ്തു. ഡിസ്ട്രിക്‌ട് ഗവർണർ ടാജി ടോം പൂന്തോട്ടം ഭാരവാഹികളുടെ സത്യപ്രതിജ്ഞ നടത്തി സ്ഥാനാരോഹണം നിർവഹിച്ചു. ഡിസ്ട്രിക്‌ട് സെക്രട്ടറി ജോൺ പടിഞ്ഞാത്ത് ക്ലബിൽ ചേർന്ന പുതിയ അംഗങ്ങൾക്ക് സത്യവാചകം ചൊല്ലിക്കൊടുത്തു. ഡിസ്ട്രിക്‌ട് ട്രഷറർ സണ്ണി മനാടിയിൽ കമ്യൂണിറ്റി പ്രോജക്‌ട് ഉദ്ഘാടനം ചെയ്തു. ജിമ്മി ആയിത്തമറ്റം, സെബാസ്റ്റ്യൻ കുരിശുംമൂട്ടിൽ, ജാൻസമ്മ ജോയ്, വിനോദ് കാപ്പിൽ, നിവിൻ വിനോദ് കാപ്പിൽ എന്നിവർ പ്രസംഗിച്ചു. ബാബു കണ്ണമ്പുഴ, ഷീബ വിനോദ് കാപ്പിൽ, സൈമൺ കണ്ണംപ്ലാക്കൽ, ജോബിന്‍സ് കണ്ണേഴത്ത്, നിവേദ്യ ജോസ് മുണ്ടാമ്പള്ളി, ബിനു അനന്തക്കാട്ട് എന്നിവർ നേതൃത്വം നൽകി. ഭാരവാഹികൾ: ജോയ് ജോൺ കുറിച്ചേൽ -പ്രസിഡന്‍റ്, സിജോ കണ്ണേഴത്ത്-സെക്രട്ടറി, ജോസഫ് നെടുംപുറത്ത്- ട്രഷറർ.

മലയോര ഹൈവേയിൽ ചെറുപുഴ പാക്കഞ്ഞിക്കാടും കല്ലങ്കോട് ബോംബെ മുക്കിലും വാഹനാപകടം

ചെറുപുഴ: മലയോര ഹൈവേയിൽ ചെറുപുഴ പാക്കഞ്ഞിക്കാടും കല്ലങ്കോട് ബോംബെ മുക്കിലും വാഹനാപകടം. അപകടത്തിൽ ആർക്കും പരിക്കില്ല. ഇന്നലെ ഉച്ചകഴിഞ്ഞ് രണ്ടേകാലോടെയാണ് മലയോര ഹൈവേയിലെ സ്ഥിരം അപകടമേഖലയായ ചെറുപുഴ പാക്കഞ്ഞിക്കാട് നിയന്ത്രണം വിട്ട കാർ റോഡിന് താഴേയ്ക്ക് വീണത്. റോഡിന് താഴെ വീഴുന്ന വാഹനങ്ങൾ തെങ്ങിൽ തട്ടി നിൽക്കുകയായിരുന്നു. ഇല്ലെങ്കിൽ തൊട്ടടുത്ത തോട്ടിലേയ്ക്ക് വീണ് വൻ അപകടത്തിലേക്കു നയിക്കുമായിരുന്നു.ഇന്നലെ ഉച്ചകഴിഞ്ഞ് ഒന്നരയോടെയാണ് കല്ലങ്കോട് ബോംബെ മുക്കിൽ പിക്കപ്പ് വാൻ നിയന്ത്രണം വിട്ട് തോട്ടിലേയ്ക്ക് മറിഞ്ഞത്. ചെറുപുഴ ഭാഗത്തു നിന്നു തേർത്തല്ലി ഭാഗത്തേയ്ക്ക് പോയ വാൻ നിയന്ത്രണം വിട്ട് റോഡരികിലെ മതിലിലിടിച്ച് എതിർവശത്തേയ്ക്ക് നീങ്ങി തോട്ടിലേയ്ക്ക് വീഴുകയായിരുന്നു. ഡ്രൈവർക്ക് നിസാര പരിക്കുപറ്റി. ആലക്കോട് പോലീസ് എത്തി പരിശോധന നടത്തി.അപകടത്തിൽപ്പെട്ട എല്ലാ വാഹനങ്ങളും ഈ തെങ്ങിൽ തട്ടി നിൽക്കുകയാണ് ചെയ്യുന്നത്. ഇതേ സ്ഥലത്ത് കുറച്ചു നാളായി നിരവധി വാഹനങ്ങളാണ് അപകടത്തിൽപ്പെട്ടത്.

ചീങ്കണ്ണിപ്പുഴയുടെ അവകാശ തർക്കം, വന്യമൃഗ ശല്യം: നിവേദനം നല്കി

കേളകം: ചീങ്കണ്ണിപ്പുഴയുടെ അവകാശ തർക്കം, വന്യമൃഗ ശല്യം എന്നീ വിഷയങ്ങളിൽ ആറളം വന്യജീവി സങ്കേതത്തിന്‍റെ അതിർത്തിയിലെ പ്രദേശവാസികളുടെ ജനകീയ കൂട്ടായ്മയുടെ ആഭിമുഖ്യത്തിൽ ആയിരത്തിലധികം കർഷകരുടെ ഒപ്പുശേഖരണം നടത്തി മുഖ്യമന്ത്രിക്ക് നിവേദനം സമർപ്പിക്കുകയും കോപ്പി പഞ്ചായത്ത് പ്രസിഡന്‍റിന് കൈമാറുകയും ചെയ്തു. ചീങ്കണ്ണിപ്പുഴയുടെ ഉടമസ്ഥാവകാശം കേളകം പഞ്ചായത്തിൽ നിലനിർത്തുക, പ്രദേശവാസികളുടെ ജീവനും സ്വത്തിനും സംരക്ഷണം നൽകുന്ന ആന പ്രതിരോധ മതിലിന്‍റെ ഉയരവും ദൈർഘ്യവും വർധിപ്പിക്കുക, അതുവരേക്കും ഹാങ്ങിംഗ് ഫെൻസിംഗ് ഏർപ്പെടുത്തുക എന്നീ വിഷയങ്ങളാണ് നിവേദനത്തിൽ ഉള്ളത്. ജനകീയ കമ്മിറ്റി ചെയർമാൻ ചെട്ടിയാംപറമ്പ് പള്ളി വികാരി ഫാ. സെബാസ്റ്റ്യൻ പൊടിമറ്റത്തിന്‍റെ നേതൃത്വത്തിലാണ് നിവേദനം കൈമാറിയത്. ജനകീയ കമ്മിറ്റി കൺവീനർ കബീർ പുത്തൻപുരയ്ക്കൽ, കോ-ഓർഡിനേറ്റർ ഗ്രേസൺ ഉള്ളാഹയിൽ, ടോമി സി.കെ. ചാത്തൻപാറ, ബെന്നി മണിമല കരോട്ട്, പ്രവീൺ താഴത്തെ മുറിയിൽ എന്നിവർ സന്നിഹിതരായിരുന്നു.

വിജയോത്സവം ഉദ്ഘാടനം ചെയ്തു

കണ്ണൂർ: തലശേരി മണ്ഡലത്തിൽ ഹയർ സെക്കൻഡറി പരീക്ഷയിൽ ഉന്നത വിജയം നേടിയ വിദ്യാർഥികളെ ആദരിക്കുന്ന 'തലശേരിയിലെ താരങ്ങൾ' പരിപാടി കോടിയേരി ബാലകൃഷ്ണൻ സ്മാരക ടൗൺഹാളിൽ പൊതു വിദ്യാഭ്യാസമന്ത്രി വി. ശിവൻകുട്ടി ഉദ്ഘാടനം ചെയ്തു. ഉന്നത വിജയം നേടിയ സ്‌കൂളുകളെയും ചടങ്ങിൽ അനുമോദിച്ചു. കാഴ്ച്ച പരിമിതയും എട്ടാം ക്ലാസ് ഉപപാഠ പുസ്തകത്തിൽ പഠന വിഷയമായ മലയാളിയുടെ ഹെലൻ കെല്ലർ എന്നറിയപ്പെടുന്ന തലശേരി സ്വദേശിയുമായ സിഷ്ന ആനന്ദ് വരച്ച മന്ത്രി വി. ശിവൻകുട്ടിയുടെ ചിത്രം വേദിയിൽ കൈമാറി. നിയമസഭാ സ്പീക്കർ എ.എൻ. ഷംസീർ അധ്യക്ഷത വഹിച്ചു. ഫിഷറീസ് സ്പെഷൽ സെക്രട്ടറി ബി. അബ്ദുൾ നാസർ, സബ് കളക്ടർ കാർത്തിക് പാണിഗ്രഹി, ഡോ. ടോം ജോസഫ് എന്നിവർ മുഖ്യാതിഥികളായിരുന്നു. തലശേരി നഗരസഭാധ്യക്ഷ കെ.എം. ജമുനാ റാണി, സഗരസഭ വിദ്യാഭ്യാസ സ്റ്റാൻഡിംഗ് കമ്മിറ്റി അധ്യക്ഷ ഷബാന ഷാനവാസ് തുടങ്ങിയവർ പ്രസംഗിച്ചു.

കടാശ്വാസ കമ്മീഷന് കർഷകർ അപേക്ഷ സമർപ്പിച്ചു

ഇരിട്ടി: കർഷക കോൺഗ്രസ് അയ്യൻകുന്ന് മണ്ഡലം കമ്മിറ്റിയുടെ ആഭിമുഖ്യത്തിൽ കർഷകരുടെ സഹകരണ ബാങ്കുകളിലെ വായ്പകൾ ഒഴിവാക്കി കിട്ടുന്നതിനുവേണ്ടി സംസ്ഥാന കടാശ്വാസ കമ്മീഷന് കർഷകർ അപേക്ഷ കൈമാറി. അപേക്ഷ സമർപ്പിക്കുന്നതിന്‍റെ പഞ്ചായത്ത് തല ഉദ്ഘാടനം സംസ്ഥാന കടാശ്വാസ കമ്മീഷൻ അംഗം കെ.സി. വിജയൻ നിർവഹിച്ചു. സംസ്ഥാനത്ത് തന്നെ ആദ്യമായാണ് ഇത്തരത്തിൽ വായ്പകൾ ഒഴിവാക്കി കിട്ടുന്നതിനായി കർഷകർ അപേക്ഷ സമർപ്പിക്കുന്നതെന്ന് കെ.സി. വിജയൻ പറഞ്ഞു. കർഷക കോൺഗ്രസ് മണ്ഡലം പ്രസിഡന്‍റ് സിനോജ് കളരുപാറ അധ്യക്ഷത വഹിച്ചു. കർഷക കോൺഗ്രസ് ജില്ലാ പ്രസിഡന്‍റ് ജോസ് പൂമല മുഖ്യപ്രഭാഷണം നടത്തി. പഞ്ചായത്തംഗങ്ങളായ ജോസഫ് വട്ടുകുളം, മിനി വിശ്വനാഥൻ, പി.സി. ജോസ്, ജെയിംസ് ടി. മാത്യു, ജോർജ് വടക്കുംകര, റോസിലി വിൽസൺ, കെ.സി. ചാക്കോ, മണ്ഡലം ഭാരവാഹികളായ ബിജോയ് വട്ടുകുളം, ഷാജി മടയംകുന്നേൽ, ബേബി ചിറ്റേത്ത്, ഷാജു എടശേരി, ജിമ്മി വാഴാംപ്ലാക്കൽ, അജയ് സെബാസ്റ്റ്യൻ എന്നിവർ പ്രസംഗിച്ചു.

ഹോപ്പ് ഗ്രാമ പത്താംഘട്ടം ഉദ്ഘാടനം ചെയ്തു

ഇരിട്ടി: ഇരിട്ടി ഐജിഎഫ്ജി കൂട്ടായ്മയും സോബിൻസ് ഗ്രീൻസ് ചാരിറ്റബിൾ ട്രസ്റ്റും സംയുക്തമായി നടത്തുന്ന കിടപ്പുരോഗികൾക്കുള്ള ഹോപ്പ് ഗ്രാമ പത്താംഘട്ട കിറ്റ് വിതരണോദ്ഘാടനം തലശേരി ആർച്ച്ബിഷപ് മാർ ജോസഫ് പാംപ്ലാനി വികാരി ജനറാൾ മോൺ. സെബാസ്റ്റ്യൻ പാലക്കുഴിക്ക് ലോഗോ നൽകി നിർവഹിച്ചു. നിർധനരായ കിടപ്പുരോഗികൾക്ക് ഒരുമാസത്തേക്ക് ആവശ്യമായ ഡയപ്പെർ, കോട്ടൺ, ഗ്ലൗസ്, പാഡ്, യൂറിൻ ബാഗ് തുടങ്ങി അത്യാവശ്യ സാധനകൾ അടങ്ങിയ കിറ്റുകളാണ് പ്രവർത്തകർ നേരിട്ട് എത്തിക്കുന്നത്. സുമനസുകളായ ആളുകൾ നൽകുന്ന സംഭാവനകളിലൂടെയാണ് ഹോപ്പ് ഗ്രാമ പത്താംഘട്ടം പിന്നിടുന്നത്. ഓരോ മാസവും അന്പതിലധികം കുടുംബങ്ങളിൽ ഹോപ്പ് ഗ്രാമ കിറ്റുകൾ എത്തുന്നുണ്ട്. സോബിൻസ് ഗ്രീൻസ് ചാരിറ്റബിൾ ട്രസ്റ്റിയായ ജ്യോതി ജോൺ, ഐജിഎഫ്ജി ഗ്രാമദീപം കൂട്ടായ്മയുടെ എക്സിക്യുട്ടീവ് കമ്മിറ്റി അംഗങ്ങളായ സോഫിയ ഫ്രെഡറിക്ക്, വിമൽ മാത്യു ഉപ്പുകണ്ടത്തിൽ, ഷിന്‍റോ മൂക്കനോലി, കെ.വി. ബേബി എന്നിവർ ചടങ്ങിൽ പങ്കെടുത്തു.

പേരാവൂരിൽ 278 കുടുംബങ്ങളുടെ ഭൂമിക്ക് പട്ടയമായി

ഇരിട്ടി: പേരാവൂർ നിയോജക മണ്ഡലത്തിലെ 278 കുടുംബങ്ങളുടെ ഭൂമിക്ക് കൂടി പട്ടയമായി. ഇരിട്ടിയിൽ നടന്ന മണ്ഡലം തല പട്ടയമേള മന്ത്രി കെ. രാജൻ ഓൺലൈനായി ഉദ്ഘാടനം ചെയ്തു. 50 വർഷമായി നിലനിന്ന പല പട്ടയ പ്രശ്നങ്ങൾക്കും പട്ടയ മിഷന്‍റെ ഭാഗമായി പരിഹാരം കാണാൻ സാധിച്ചതായി മന്ത്രി പറഞ്ഞു. പരമാവധി ആൾക്കാരെ ഭൂമിയുടെ യഥാർഥ ഉടമകളാക്കി മാറ്റുകയാണ് ദൗത്യമെന്നും ഇതിനായി നിയമങ്ങളും ചട്ടങ്ങളും ഭേദഗതി വരുത്താൻ സർക്കാർ പ്രതിജ്ഞാബദ്ധമാണെന്നും മന്ത്രി പറഞ്ഞു. ഇരിട്ടി നഗരസഭയിൽ - 65, പേരാവൂരിൽ - 61, അയ്യൻകുന്നിൽ -12, ആറളത്ത് - 98, മുഴക്കുന്നിൽ - 20, പായത്ത് - 5, കേളകം -2 , കൊട്ടിയൂരിൽ - 1, ദേവസ്വം ഭൂമി പട്ടയം - 10, ലക്ഷം വീട് - 2, ടിഇ - 2 പട്ടയവുമാണ് ചടങ്ങിൽ വിതരണം ചെയ്തത്. ജില്ലാ പഞ്ചായത്ത് വെെസ് പ്രസിഡന്‍റ് ബിനോയ് കുര്യൻ അധ്യക്ഷത വഹിച്ചു. ബ്ലോക്ക് പഞ്ചായത്ത് പ്രസിഡന്‍റുമാരായ കെ. വേലായുധൻ, കെ. സുധാകരൻ, നഗരസഭ അധ്യക്ഷ കെ. ശ്രീലത, പേരാവൂർ പഞ്ചായത്ത് പ്രസിഡന്‍റ് പി.പി. വേണുഗോപാലൻ, നഗരസഭാ കൗൺസിലർ വി.പി. റഷീദ്, ഡെപ്യൂട്ടി കളക്ടർ മാരായ കെ.വി. ശ്രുതി, ഷെർലി, തഹസിൽദാർ സി.വി. പ്രകാശൻ, എൽആർ തഹസിൽദാർ വിജയൻ ചെല്ലട്ടൻ, എൽടി തഹസിൽദാർ എം.സി. സീനത്ത്, പി.പി. അശോകൻ, എം.വി. രവീന്ദ്രൻ, എം.എം. മജീദ്, കെ. മുഹമ്മദലി, വി.എം. പ്രശോഭ് എന്നിവർ പ്രസംഗിച്ചു.

മാത്തില്‍ ഗുരുദേവ് കോളജില്‍ ജോബ്‌ ഫെയര്‍ 19ന്

പയ്യന്നൂര്‍: മാത്തില്‍ ഗുരുദേവ് ആര്‍ട്‌സ് ആൻഡ് സയന്‍സ് കോളജും ജിടെക് കംപ്യൂട്ടര്‍ എഡ്യൂക്കേഷനും ചേര്‍ന്ന് 19ന് കോളജില്‍ സൗജന്യ ജോബ്‌ ഫെയര്‍ സംഘടിപ്പിക്കുന്നു. മള്‍ട്ടിമീഡിയ, ഐടി, ബാങ്കിംഗ്, എഡ്യൂക്കേഷന്‍, ഇന്‍ഷ്വറന്‍സ്, അക്കൗണ്ടിംഗ്, ബില്ലിംഗ്, സെയില്‍സ് ആൻഡ് മാനേജിംഗ് സര്‍വീസ് തുടങ്ങി ആയിരത്തിലധികം ഒഴിവുകളിലേക്ക് ഉദ്യോഗാര്‍ഥികളെ നേരിട്ട് തെരഞ്ഞെടുക്കും. രാവിലെ 9.30 മുതല്‍ വൈകുന്നേരം നാലുവരെ നടക്കുന്ന മേളയില്‍ പാരിസണ്‍സ്, അഫ്ജാന്‍ ഡേറ്റ്‌സ്, ബര്‍ജര്‍ പെയിന്‍റ്സ്, കല്യാണ്‍ ജ്വല്ലേഴ്‌സ് തുടങ്ങി മുപ്പതോളം കമ്പനികള്‍ പങ്കെടുക്കും. കമ്പനികള്‍ക്കും ഉദ്യോഗാര്‍ഥികള്‍ക്കും രജിസ്ട്രേഷനും അനുബന്ധ സേവനങ്ങളും തികച്ചും സൗജന്യമാണ്. ഒരാള്‍ക്ക് നാല് അഭിമുഖങ്ങളില്‍ പങ്കെടുക്കാം. ഉദ്യോഗാര്‍ഥികള്‍ ബയോഡാറ്റയുടെ അഞ്ച് പകര്‍പ്പുകളും രണ്ട് പാസ്പോര്‍ട്ട് സൈസ് ഫോട്ടോകളും യോഗ്യത തെളിയിക്കുന്ന രേഖകളും ഹാജരാക്കണം. രജിസ്ട്രേഷന് 9447767962, 7356000620 എന്നീ നമ്പറുകളില്‍ ബന്ധപ്പെടണം. ഓണ്‍ലൈന്‍ രജിസ്ട്രേഷന് http://g5.gobsbank.com.jobfair2/candidate.php എന്ന ലിങ്കില്‍ ക്ലിക്ക് ചെയ്യണമെന്ന് ഫാ. സാമുവല്‍ പുതുപ്പാടി, കെ.വി. ചന്ദ്രശേഖരന്‍, സനല്‍ലാല്‍, അന്‍വര്‍ സാദിഖ് തുടങ്ങിയവര്‍ പത്രസമ്മേളനത്തില്‍ അറിയിച്ചു.

അനധികൃത പാർക്കിംഗ്; ആലക്കോട്ട് ഗതാഗതക്കുരുക്ക് രൂക്ഷമാകുന്നു

ആലക്കോട്: ആലക്കോട് ടൗണിൽ വാഹനങ്ങൾ തോന്നിയത് പോലെ നിർത്തിയിടാൻ തുടങ്ങിയതോടെ ഗതാഗത സ്തംഭനം പതിവാകുന്നു. മലയോര ഹൈവേയും തളിപ്പറമ്പ് കുർഗ് ടിസിബി റോഡും കൂടിച്ചേരുന്ന പ്ര‌ധാന ടൗൺ ആയതിനാൽ ഏത് നേരവും ഇവിടെ വാഹനത്തിരക്കാണ്. ഇരുഭാഗങ്ങളിലെ നടപ്പാത കൈയേറിയും കുറുകേയും വഴിയടച്ച് ചിലർ വാഹനങ്ങൾ നിർത്തിയിടുന്നത് കാൽനട യാത്രക്കാരെയും വലയ്ക്കുന്നുണ്ട്. ഇതുമൂലം വയോധികരും സ്ത്രീകളും കുട്ടികളും അടക്കമുള്ള കാൽനടയാത്രക്കാർ അപകടാവസ്ഥ നേരിടുന്നുണ്ട്. സമീപകാലത്ത് നിരവധി അപകടങ്ങൾ ഇതുമായി ബന്ധപ്പെട്ട് ടൗണിൽ സംഭവിച്ചിട്ടുണ്ട്. പോസ്റ്റ് ഓഫീസ്, ബാങ്കുകൾ തുടങ്ങി നിരവധി സർക്കാർ സ്ഥാപനങ്ങളിലേക്ക് പോകാനായി റോഡ് മുറിച്ച് കടക്കാനായി പ്രായമായവർ മറ്റുള്ളവരെ ആശ്രയിക്കേണ്ടി വരുന്നു. ചിലർ വാഹനങ്ങളിലെത്തി റോഡരികിൽ നിർത്തിയിട്ടശേഷം ബസിൽ ദൂരയാത്രയ്ക്കു പോകുകയും വൈകുന്നേരമെത്തി വാഹനങ്ങളുമായി മടങ്ങുകയും ചെയ്യുന്നു. മൂന്നു സ്കൂളുകളും കോളജും പള്ളിയും മസ്ജിദും ഉൾപ്പെടെയുള്ള സ്ഥലത്ത് കാൽനടക്കാർ ഏറെയുണ്ട്. നോ പാർക്കിംഗ് ബോർഡിന്‍റെ കീഴിൽവരെ വാഹനങ്ങൾ പാർക്ക് ചെയ്യുകയാണ്. പാർക്കിംഗ് സൗകര്യമില്ലാത്തതിനാൽ ദൂരെ സ്ഥലങ്ങളിൽ നിന്ന് സ്വകാര്യവാഹനങ്ങളിൽ വരുന്നവർ ഹോട്ടലിൽ ഭക്ഷണം കഴിക്കാനും കടകളിൽ കയറി സാധനങ്ങൾ വാങ്ങാനും കഴിയാതെ മറ്റു സ്ഥലത്തേക്ക് പോവുകയാണെന്ന് വ്യാപാരികൾ പറയുന്നു. അനധികൃത പാർക്കിംഗ് ഒഴിവാക്കാൻ നടപടി സ്വീകരിക്കണമെന്നാണ് നാട്ടുകരുടെ ആവശ്യം.

കിഡ്സ്‌ പാർക്ക് ഉദ്ഘാടനം ചെയ്തു

ശ്രീകണ്ഠപുരം: നിടിയേങ്ങ ശിശുമന്ദിരത്തിൽ സ്ഥാപിച്ച കിഡ്സ്‌ പാർക്കിന്‍റം ഉദ്ഘാടനം നഗരസഭാധ്യക്ഷ ഡോ. കെ.വി. ഫിലോമിന നിർവഹിച്ചു. നഗരസഭയുടെ 2024 - 25 വാർഷിക പദ്ധതിയിൽ ഉൾപ്പെടുത്തി 10 ലക്ഷം ചെലവിട്ടാണ് പാർക്ക് തുറന്നത്. വൈസ് ചെയർമാൻ കെ. ശിവദാസൻ അധ്യക്ഷത വഹിച്ചു. വാർഡ് കൗൺസിലറും നഗരസഭാ വികസന കാര്യ സ്റ്റാൻഡിംഗ് കമ്മിറ്റി ചെയർപേഴ്സനുമായ ജോസഫിന വർഗീസ്, നഗരസഭസ്ഥിരം സമിതി അധ്യക്ഷന്മാരായ കെ.സി. ജോസഫ് കൊന്നക്കൽ, പി.പി. ചന്ദ്രാംഗദൻ, വി. പി. നസീമ, കൗൺസിലർ കെ.വി. കുഞ്ഞിരാമൻ, സെക്രട്ടറി ടി.വി. നാരായണൻ, ഇമ്പ്ലിമെന്‍റിംഗ് ഓഫീസർ വി. പ്രേമരാജൻ, പിഎച്ച് ഐ, പി.വി. സതീശൻ, സിഡിപിഒ, ശ്യാമള, ഐസിഡിഎസ് സൂപ്പർവൈസർ പി. ജയലക്ഷ്മി, ടി.എൻ. പ്രമോദ്, ഐസിഡിഎസ് സൂപ്പർവൈസർ വി.സി. ശ്രീജ എന്നിവർ പ്രസംഗിച്ചു.

മാന്പൊയിലിൽ കാട്ടാനക്കൂട്ടം കൃഷി നശിപ്പിച്ചു

ആലക്കോട്: ഉദയഗിരി പഞ്ചായത്തിൽ മാന്പൊയിൽ പ്രദേശത്ത് കാട്ടാനക്കൂട്ടം വ്യാപകമായി കൃഷി നശിപ്പിച്ചു. മാന്പൊയിലിലെ തുരുത്തേൽ ഏബ്രഹാം, കവളംമാക്കൽ അലക്സാണ്ടർ, തൊമ്മിത്താഴത്ത് ജോസുകുട്ടി, തുരുത്തേൽ ദേവസ്യ എന്നിവരുടെ കൃഷിയിടത്തിലാണ് കാട്ടാന ഇറങ്ങിയത്. തെങ്ങ്, കമുക്, വാഴ ഉൾപ്പെടെയുള്ള കൃഷികളാണ് മൂന്ന് ദിവസങ്ങളിലായി നശിപ്പിച്ചത്. ഇവിടെ അര കിലോമീറ്ററോളം ഭാഗത്ത് സോളർവേലി നിർമിച്ചിട്ടില്ല. വേലി ഉള്ളയിടങ്ങളിൽ ഇടയ്ക്കിടയ്ക്കിടെ പ്രവർത്തന രഹിതമാകുന്നു. ഇതു മൂലമാണ് കാട്ടാനകൾ കൃഷിയിടങ്ങളിലേക്കും ജനവാസ മേഖലയിലേക്കും ഇറങ്ങുന്നത്. പാട്ട കൊട്ടിയും പടക്കം പൊട്ടിച്ചുമാണ് കർഷകർ അവയെ തുരത്തുന്നത്. വന്യമൃഗ ശല്യം തടയാൻ നടപടി ഉണ്ടാകണമെന്നാണ് ജനങ്ങളുടെ ആവശ്യം. കഴിഞ്ഞ ആഴ്ചയും അപ്പർ ചീക്കാട്‌ കൃഷി നശിപ്പിച്ചിരുന്നു. കർണാടക വനാതിർത്തിയോട് ചേർന്നുള്ള പ്രദേശങ്ങളിൽ കാട്ടാനക്കൂട്ടം ഇറങ്ങി വ്യാപകമായി കൃഷിനശിപ്പിക്കുന്നത് പതിവാകുകയാണ്.

തളിപ്പറമ്പ് നഗരസഭാ കൗണ്‍സില്‍ യോഗത്തില്‍ ഭരണ-പ്രതിപക്ഷ കയ്യാങ്കളി

തളിപ്പറമ്പ്: മാലിന്യപ്രശ്‌നത്തെക്കുറിച്ചുള്ള ചര്‍ച്ച നഗരസഭാ കൗണ്‍സില്‍ യോഗത്തില്‍ ഭരണ-പ്രതിപക്ഷങ്ങള്‍ തമ്മിലുള്ള കൈയാങ്കളിയില്‍ കലാശിച്ചു. ഇന്നലെ രാവിലെ നടന്ന യോഗത്തിലാണ് സംഭവം. ബാബുഫ്രഷ് റസ്റ്റോറന്‍റില്‍ നിന്ന് കക്കൂസ് മാലിന്യങ്ങള്‍ തോട്ടിലൂടെ ജനവാസ കേന്ദ്രത്തില്‍ ഒഴുക്കിവിട്ടതുമായി ബന്ധപ്പെട്ട ചര്‍ച്ച തുടങ്ങിവച്ച പ്രതിപക്ഷ കൗണ്‍സിലര്‍ സി.വി. ഗിരീശന്‍ ഭരണപക്ഷത്തെ രൂക്ഷമായി വിമര്‍ശിച്ചു. നഗരത്തിലെ ഒട്ടുമിക്ക സ്ഥാപനങ്ങളുടെയും മലിനജലം പൈപ്പിലൂടെ പൊതു ഓടയിലേക്ക് ഒഴുക്കിവിടുകയാണെന്നും കക്കൂസ് മാലിന്യങ്ങള്‍വരെ ഇത്തരത്തില്‍ ഓടയിലേക്ക് വിടുന്നുണ്ടെന്നും അദ്ദേഹം പറഞ്ഞു. വി. വിജയന്‍, കെ.എം. ലത്തീഫ്, ഡി. വനജ, പി. വല്‍സല എന്നിവര്‍ ഭരണപക്ഷത്തിനെതിരെ രൂക്ഷമായ വിമര്‍ശനങ്ങളാണ് ഉയര്‍ത്തതി വിട്ടത്. ഈ സമയത്ത് ഭരണപക്ഷത്തുനിന്ന് എഴുന്നേറ്റ യൂത്ത്‌ലീഗ് ജില്ലാ ജനറൽ സെക്രട്ടറി കൂടിയായ പി.സി. നസീര്‍ മാലിന്യമുക്ത കേരളത്തിലല്ലേ മാലിന്യമുക്ത തളിപ്പറമ്പ് എന്ന് ചോദിച്ചതോടെയാണ് പ്രതിപക്ഷം പ്രകോപിതരായത്. തളിപ്പറമ്പിലെ മാലിന്യ പ്രശ്‌നത്തേക്കുറിച്ച് പറയുമ്പോള്‍ സംസ്ഥാനത്തെ മാലിന്യത്തെക്കുറിച്ച് പറയേണ്ട കാര്യമില്ലെന്ന് പറഞ്ഞാണ് പ്രതിപക്ഷം ചാടിയെഴുന്നേറ്റത്. ഇതോടെ ഇരുവിഭാഗവും സീറ്റുകളില്‍ നിന്ന് എഴുന്നേറ്റ് പോരിനൊരുങ്ങി. ഇതിനിടയില്‍ സുപ്രധാനമായ പ്രശ്‌നങ്ങള്‍ ചര്‍ച്ചക്കെടുക്കുമ്പോള്‍ ഭരണ-പ്രതിപക്ഷങ്ങള്‍ തമ്മില്‍ ഒത്തുകളിച്ച് ഏറ്റുമുട്ടല്‍ നാടകം നടത്തുകയാണെന്ന് ബിജെപി കൗണ്‍സിലര്‍ പി.വി. സുരേഷ് ഇരുപക്ഷത്തെയും വിമര്‍ശിച്ചു. ഇത് കേട്ടതോടെ കെ.എം. ലത്തീഫ് ഓടിയെത്തി സുരേഷിനെ കൈയേറ്റം ചെയ്യാന്‍ മുതിര്‍ന്നു. പ്രകോപിതനായ സുരേഷിനെ മുതിര്‍ന്ന അംഗങ്ങള്‍ അനുനയിപ്പിച്ച് കൗണ്‍സില്‍ ഹാളിന് പുറത്തെത്തിച്ചതോടെയാണ് രംഗം ശാന്തമായത്. ചെയര്‍പേഴ്‌സന്‍ മുര്‍ഷിദ കൊങ്ങായിയുടെ അധ്യക്ഷതയില്‍ നടന്ന യോഗത്തില്‍ വൈസ് ചെയര്‍മാന്‍ കല്ലിങ്കീല്‍ പത്മനാഭന്‍, കെ.നബീസ ബീവി, ഒ.സുഭാഗ്യം എന്നിവര്‍ ചര്‍ച്ചകളില്‍ പങ്കെടുത്തു. നഗരസഭാ ഓഫീസിലേക്ക് സിപിഎം മാര്‍ച്ച് ഇന്ന് തളിപ്പറമ്പ്: തളിപ്പറമ്പ് നഗരത്തിലെ മാലിന്യപ്രശ്‌നത്തിന് പരിഹാരം കാണണമെന്നാവശ്യപ്പെട്ട് സിപിഎം ഇന്ന് നഗരസഭാ ഓഫീസിലേക്ക് പ്രതിഷേധ മാര്‍ച്ച് നടത്തും. രാവിലെ പത്തരക്ക് നടക്കുന്ന മാര്‍ച്ച് സിപിഎം ജില്ലാ സെക്രട്ടറി കെ.കെ. രാഗേഷ് ഉദ്ഘാടനം ചെയ്യും.

കർമപദ്ധതികൾ ആവിഷ്കരിച്ചു; പഞ്ചായത്തുതല യോഗങ്ങൾ 20ന്

കണ്ണൂർ: തദ്ദേശ ഭരണ തെരഞ്ഞെടുപ്പിനുള്ള മുന്നൊരുക്കങ്ങളുടെ ഭാഗമായി പ്രവർത്തനം സജീവവും കുറ്റമറ്റതുമാക്കാൻ യുഡിഎഫ്. ജില്ലാ കമ്മറ്റി കർമ പദ്ധതികൾ ആവിഷ്കരിച്ചു. അതിന്‍റെ ഭാഗമായി ജില്ലയിലെ എല്ലാ മുനിസിപ്പൽ,മേഖലാ പഞ്ചായത്ത് തലങ്ങളിലും 20 ന് യുഡിഎഫിന്‍റെ പ്രത്യേക യോഗങ്ങൾ വിളിച്ചു ചേർക്കാൻ നിർദേശിച്ചു. നിയോജക മണ്ഡലം നേതാക്കൾ പ്രസ്തുത യോഗങ്ങളിൽ പങ്കെടുക്കും.ജൂലൈ 31 നകം മുനിസിപ്പൽ, പഞ്ചായത്ത് കമ്മറ്റികളും ഓഗസ്റ്റ് 15 നകം വാർഡ് കമ്മറ്റികളും രൂപീകരിക്കാൻ തീരുമാനിച്ചു. ആരോഗ്യ വിദ്യാഭ്യാസ മേഖലകളിലെ കെടുകാര്യസ്ഥതയ്ക്കും അനാസ്ഥയ്ക്കുമെതിരേ 23 ന് കണ്ണൂർ കളക്ടറേറ്റിന് മുന്നിൽ പ്രതിഷേധ സംഗമം നടത്തും. അതിന് മുന്നോടിയായി 18, 19 തിയതികളിൽ എല്ലാ നിയോജക മണ്ഡലം യോഗങ്ങളും ചേരും. ജില്ലാ നേതാക്കൾ പ്രസ്തുത യോഗങ്ങളിൽ പങ്കെടുക്കും. ഡിസിസി പ്രസിഡന്‍റ് മാർട്ടിൻ ജോർജ് യോഗത്തിൽ അധ്യക്ഷത വഹിച്ചു. യുഡിഎഫ് നേതാക്കളായ അബ്ദുൾ കരീം ചേലേരി, കെ.ടി .സഹദുള്ള, എ.ഡി. മുസ്തഫ, സി.എ. അജീർ, എസ്. മുഹമ്മദ്, ജോൺസൺ പി തോമസ്, ചന്ദ്രൻ തില്ലങ്കേരി, ടി.ഒ. മോഹനൻ, സഹജൻ, സജീവ് മാറോളി , വി.എ. നാരായണൻ തുടങ്ങിയവർ പങ്കെടുത്തു.

വായ്പ നല്കിയ പണം തിരികെ ചോദിച്ചപ്പോൾ അമ്മയ്ക്കും മകൾക്കും മർദനം; യുവാവിനെതിരേ കേസ്

കണ്ണൂർ: വായ്പ നൽകിയ പണം തിരികെ ചോദിച്ചതിന് വീട്ടിൽ അതിക്രമിച്ച് കയറി അമ്മയെയും മകളെയും മർദിച്ചുവെന്ന പരാതിയിൽ യുവാവിനെതിരെ ടൗൺ പോലീസ് കേസെടുത്തു. മേലെ ചൊവ്വ സ്വദേശിനിയായ 29 കാരിയുടെ പരാതിയിലാണ് ചൊവ്വ സ്വദേശി സൂരജ് നിവാസിൽ കെ.വി. സനകിനെതിരെ പോലീസ് കേസെടുത്തത്. 2022 നവംബർ 13 നാണ് പരാതിക്കാസ്പദമായ സംഭവങ്ങൾക്ക് തുടക്കം. പരാതിക്കാരിക്ക് പ്രതി വിവാഹവാഗ്ദാനം നൽകിയിരുന്നു. ആറുമാസത്തിനുള്ളിൽ പരാതിക്കാരിയെ വിവാഹം കഴിക്കാമെന്നും പ്രതിയുടെ വീടിന്‍റെ നിർമാണം പൂർത്തിയാക്കിയാൽ മാത്രമെ വിവാഹം നടത്താൻ സാധിക്കുകയുള്ളൂവെന്നും പറഞ്ഞ് 45 ലക്ഷം രൂപ കൈപ്പറ്റി. വിവാഹം കഴിഞ്ഞാൽ പ്രതിയുടെ സ്വത്ത് വിറ്റ് പണം തിരികെ തരാമെന്നും വിശ്വസിപ്പിച്ചു. എന്നാൽ പരാതിക്കാരിയുടെ വീടിന്‍റെ ജപ്തി നടപടികൾ ഒഴിവാക്കുന്നതിന് പ്രതി കൈപ്പറ്റിയ പണം തിരികെ ചോദിച്ചപ്പോൾ വീട്ടിൽ അതിക്രമിച്ച് കയറി തടഞ്ഞുവച്ച് മർദിക്കുകയും തടയാൻ ചെന്ന അമ്മയെയും അടിച്ചു പരിക്കേൽപ്പിച്ചുവെന്ന പരാതിയിലാണ് കേസെടുത്തത്.

ഭാര്യയെയും മകളെയും ഡാമിൽ തള്ളിയിടുകയും മകൾ മരിക്കുകയും ചെയ്ത കേസിൽ വിചാരണ ഇന്ന് തുടങ്ങും

തലശേരി: പുഴയിൽ വെള്ളം കയറിയത് കാണിച്ചു തരാമെന്ന് പറഞ്ഞ് ഭാര്യയേയും ഒന്നര വയസുകാരിയായ ഏകമകളേയും കൂട്ടിക്കൊണ്ടു പോയി ഡാമിൽ തള്ളിയിടുകയും മകൾ മരിക്കുകയും ചെയ്ത കേസിൽ അഡീഷണൽ ജില്ലാ സെഷൻസ് കോടതിയിൽ (ഫാസ്റ്റ് ട്രാക്ക്-ഒന്ന്) ഇന്ന് വിചാരണ ആരംഭിക്കും. പാട്യം പത്തായകുന്നിലെ കുപ്പിയാട്ട് മടപ്പുര വീട്ടിൽ കെ.പി. ഷിനു എന്ന ഷിജുവാണ് (46) കേസിലെ പ്രതി. ഷിജുവിന്‍റെ ഭാര്യ ചോയ്യാടത്തെ എം.പി. സോന സുരേഷിനേയും (35), മകൾ അൻവിതയേയും ബൈക്കിൽ കയറ്റി മൊകേരി പാത്തിപ്പാലത്തെ വാട്ടർ അഥോറിറ്റിയുടെ ചെക്ക്ഡാമിനടുത്തായി കൊണ്ടുപോയ ശേഷം കൊല്ലുകയെന്ന ലക്ഷ്യത്തോടെ ഡാമിലേക്ക് തള്ളിയിട്ടുവെന്നാണ് കേസ്. ഒഴുക്കിൽപ്പെട്ട സോനയെ രക്ഷിക്കാൻ ആവശ്യപ്പെട്ടപ്പോൾ പ്രതി ചെരിപ്പുകൊണ്ട് അടിച്ച് വീണ്ടും വെള്ളത്തിലേക്കിട്ടു. ഒഴുക്കിൽപ്പെട്ട സോന കുറച്ചകലെയുള്ള കൈതച്ചെടിയിൽ പിടിക്കുകയും ബഹളം കേട്ട് ഓടിയെത്തിയ നാട്ടുകാർ രക്ഷിക്കുകയുമായിരുന്നു. സംഭവദിവസം രാത്രി ഏഴരയോടെ കുറച്ചകലെനിന്നും അൻവിതയുടെ മൃതദേഹം കണ്ടെത്തുകയായിരുന്നു. സംഭവസ്ഥലത്തുനിന്നു രക്ഷപ്പെട്ട പ്രതിയെ പിറ്റേ ദിവസം മട്ടന്നൂരിൽനിന്നു പോലീസ് പിടികൂടുകയായിരുന്നു. 2021 ഒക്ടോബർ 15 നായിരുന്നു കേസിനാസ്പദമായ സംഭവം . 122 സാക്ഷികളാണ് ഈ കേസിലുള്ളത്. കതിരൂർ പോലീസാണ് ആദ്യം കേസ് രജിസ്റ്റർ ചെയ്തത്. പിന്നീട് പാനൂർ പോലീസിന് കൈമാറി. കതിരൂർ സിഐയായിരുന്ന കെ.വി. മഹേഷാണ് പ്രതിയെ അറസ്റ്റ് ചെയ്തത്.

യുവജനങ്ങൾക്ക് നൈപുണ്യോത്സവങ്ങൾ സംഘടിപ്പിക്കും: മന്ത്രി വി. ശിവൻകുട്ടി

കണ്ണൂർ: സംസ്ഥാനത്തെ യുവജനങ്ങളെ ആഗോള മത്സരക്ഷമതയുള്ള മികച്ച മാനവവിഭവശേഷി ആക്കുന്നതിന് സംസ്ഥാനത്ത് ആദ്യമായി നൈപുണ്യോത്സവങ്ങൾ സംഘടിപ്പിക്കുമെന്ന് മന്ത്രി വി. ശിവൻകുട്ടി. കേരള അക്കാദമി ഫോർ സ്‌കിൽ എക്‌സലൻസ് (കെയ്‌സ്) ടാലി എഡ്യുക്കേഷൻ പ്രൈവറ്റ് ലിമിറ്റഡുമായി (ടിഇപിഎൽ) ചേർന്ന് സംഘടിപ്പിച്ച ലോക യുവജന നൈപുണ്യ ദിനാചരണവും ടാലി ട്രെയിനിംഗ് സെന്‍ററുകളുടെ അക്രഡിറ്റേഷനും കണ്ണൂർ കൃഷ്ണ ബീച്ച് റിസോർട്ടിൽ ഉദ്ഘാടനം ചെയ്ത് പ്രസംഗിക്കുകയായിരുന്നു മന്ത്രി. ദേശീയ-അന്തർദേശീയ വ്യവസായ രംഗങ്ങളിലെ മികച്ച തൊഴിൽ മേഖലകൾ നമ്മുടെ യുവതലമുറയ്ക്ക് പരിചയപ്പെടുത്തുക, തൊഴിൽ വൈദഗ്ധ്യം കൈവരിക്കേണ്ടതിന്‍റെ പ്രാധാന്യം യുവതലമുറയെ ബോധ്യപ്പെടുത്തുക എന്നീ ഉദ്ദേശ്യലക്ഷ്യങ്ങളോടെയാണ് നൈപുണ്യോത്സവങ്ങൾ സംഘടിപ്പിക്കുന്നതെന്ന് മന്ത്രി പറഞ്ഞു. 22 വയസിൽ താഴെയുള്ള യുവാക്കൾക്ക് ആഗോള പ്രാധാന്യമുള്ള അറുപതോളം ട്രേഡുകൾ പരിചയപ്പെടുത്താനും വൈദഗ്ധ്യം മാറ്റുരയ്ക്കാനുമുള്ള അവസരമാണ് ലഭ്യമാക്കുന്നത്. സ്‌കൂൾ-കോളജ് വിദ്യാർഥികൾക്കും 22 വയസിൽ താഴെയുള്ള അഭ്യസ്ത വിദ്യർക്കും അവസരം ലഭ്യമാക്കും. വിജയികൾക്ക് " ഇന്ത്യ സ്‌കിൽസ് ' മത്സരങ്ങളിലൂടെ ദേശീയതലത്തിലും അന്തർദേശീയ തലത്തിലും മാറ്റുരയ്ക്കുന്നതിന് അവസരം സൃഷ്ടിക്കും. സെപ്റ്റംബറിൽ ആരംഭിച്ച് ഫെബ്രുവരിയിൽ മത്സരങ്ങൾ പൂർത്തിയാക്കും. വികേന്ദ്രീകൃത നൈപുണ്യ വികസനത്തിന്‍റെ ഭാഗമായി ടാലി എജുക്കേഷൻ പ്രൈവറ്റ് ലിമിറ്റഡുമായി സഹകരിച്ച് കേരളത്തിൽ അക്കൗണ്ടിംഗ് രംഗത്ത് നല്ല രീതിയിൽ പരിശീലനം ലഭ്യമാക്കുന്ന പരിശീലന സ്ഥാപനങ്ങളെ കെയ്സിലേയ്ക്ക് അക്രഡിറ്റേഷൻ നൽകുന്നതിനാണ് തുടക്കമാവുന്നത്. പുതുതായി തയാറാക്കിയ "മാസ്റ്റർ അക്കൗണ്ടന്‍റ്' എന്ന കോഴ്‌സിന്‍റെ രജിസ്‌ട്രേഷനും മന്ത്രി ഉദ്ഘാടനം ചെയ്തു. കെയ്‌സ് എംഡി സൂഫിയാൻ അഹമ്മദ് അധ്യക്ഷത വഹിച്ചു. ടിഇപിഎൽ ഗവ. പ്രൊജക്ട്‌സ് അക്രഡിറ്റേഷൻ ഹെഡ് രാകേഷ് ചന്ദ്രശേഖർ മുഖ്യപ്രഭാഷണം നടത്തി. അസി. കളക്ടർ എഹ്‌തെദ മുഫസിർ, ജില്ലാ പ്ലാനിംഗ് ഓഫീസർ നെനോജ് മേപ്പടിയത്ത്, ടിഇപിഎൽ സൗത്ത് സോൺ, ഇന്‍റർനാഷനൽ എജിഎം എൻ ജിജി കുമാർ, കെയ്‌സ് സിഇഒ ടി വി. വിനോദ് എന്നിവർ പ്രസംഗിച്ചു.

സിപിഎം നേതാവ് ഉൾപ്പെടെ രണ്ടുപേർ അറസ്റ്റിൽ

ഇരിട്ടി: എടക്കാനം റിവർ വ്യൂ പോയിന്‍റിലെ ആക്രമണവുമായി ബന്ധപ്പെട്ട് സിപിഎം നേതാവ് ഉൾപ്പെടെ രണ്ടുപേർ അറസ്റ്റിൽ. സിപിഎം കാക്കയങ്ങാട് ലോക്കൽ കമ്മിറ്റിയംഗം പാലപ്പുഴ സ്വദേശി എ. രഞ്ജിത്ത് (32), മുഴക്കുന്ന് സ്വദേശി അക്ഷയ് (25) എന്നിവരെയാണ് തിങ്കളാഴ്ച രാത്രിയോടെ പോലീസ് കസ്റ്റഡിയിലെടുത്തത്. ഇവരുടെ അറസ്റ്റ് രേഖപ്പെടുത്തി കോടതിയിൽ ഹാജരാക്കി റിമാൻഡ് ചെയ്തു. ഒരാളെ വീട്ടിൽനിന്നും മറ്റൊരാളെ രാത്രി വൈകി റോഡിൽ നിന്നുമാണ് പോലീസ് പിടികൂടിയത്. അക്ഷയ് നിരവധി കേസുകളിലെ പ്രതിയാണ്. കൂത്തുപറമ്പിലെ കുഴൽപ്പണ കേസ്, നാടൻ തോക്ക് കൈവശം വച്ചതുൾപ്പെടെ കേസുകൾ പ്രതിക്കെതിരേ വിവിധ സ്റ്റേഷനുകളിൽ നിലവിലുണ്ട്. 15 പ്രതികളാണ് സംഭവത്തിലുള്ളത്. കേസിലെ ഒന്നാം പ്രതിയും ശുഹൈബ് വധക്കേസിലെ രണ്ടാം പ്രതിയുമായ ദീപ് ചന്ദ് ഉൾപ്പെടെയുള്ള 13 പ്രതികൾ ഒളിവിലാണ്. ഇവർക്കായുള്ള അന്വേഷണം തുടരുന്നതായി ഇരിട്ടി സിഐ എ. കുട്ടികൃഷ്ണൻ പറഞ്ഞു. അക്രമികൾ ഉപയോഗിച്ച മൂന്നു വാഹനങ്ങളും തിരിച്ചറിഞ്ഞിട്ടുണ്ട്.

ഇരിട്ടിയിലെ ബാഗ് കടയിൽ കുരങ്ങന്‍റെ ‘മിന്നൽ റെയ്ഡ് ’

ഇരിട്ടി: ഇരിട്ടി പഴയ സ്റ്റാൻഡിലെ ബാഗ് കടയിൽ കുരങ്ങൻ കയറി ബാഗുകൾ വലിച്ചു നിലത്തിട്ടു. ബാഗ് വേൾഡ് എന്ന കടയിലാണു കുരങ്ങൻ എത്തിയത്. കഴിഞ്ഞ ദിവസം പകൽ സമയത്താണ് കുരങ്ങ് കടയ്ക്കുള്ളിൽ കയറിയത്. ബാഗുകൾ വലിച്ചു താഴെയിട്ടശേഷം കുരങ്ങൻ പുറത്തേക്ക് ഓടി സമീപത്തെ കെട്ടിടത്തിനു മുകളിൽ കയറി. കുരങ്ങൻ നാശനഷ്‌ടമൊന്നും വരുത്തിയില്ലെന്നാണു കടയുടമ പറയുന്നത്. സമീപത്തെ പഴം-പച്ചക്കറി കടയിൽ ഭക്ഷണത്തിനായി വന്ന കുരങ്ങൻ ബാഗ് കടയ്ക്കുള്ളിൽ അബദ്ധത്തിൽ കയറിയതാണ്. കടയ്ക്കുള്ളിൽ കയറി ബാഗ് വലിച്ചിടുന്ന കുരങ്ങന്‍റെ വീഡിയോ കടയുടമ മൊബൈൽ ഫോണിൽ പകർത്തിയത് ഇപ്പോൾ സമൂഹമാധ്യമങ്ങളിൽ വൈറലാണ്. കുരങ്ങുകൾ കൂട്ടമായി ടൗൺ പരിസരങ്ങളിൽ എത്താറുണ്ടെങ്കിലും ആദ്യമായാണ് കടയ്ക്കുള്ളിൽ കയറുന്നത്.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]