മാലിന്യം തരംതിരിക്കൽ ഇനി വേഗത്തിലാകും; മുക്കത്ത് എംസിഎഫിൽ കൺവേർ ബെൽറ്റ് സ്ഥാപിച്ചു : Deepika.com Nattu Visesham

കരിയാത്തുംപാറയിലേക്ക് വിനോദ സഞ്ചാരികളുടെ ഒഴുക്ക്

കൂരാച്ചുണ്ട്: അവധിക്കാലമായതോടെ കൂരാച്ചുണ്ട് പഞ്ചായത്തിൽ ജലസേചന വകുപ്പിന്‍റെ അധീനതയിലുള്ള വിനോദസഞ്ചാര കേന്ദ്രങ്ങളായ തോണിക്കടവ്, കരിയാത്തുംപാറ എന്നിവിടങ്ങളിലേക്കുള്ള സന്ദർശകരുടെ എണ്ണത്തിൽ ഗണ്യമായ വർധനവ്. കഴിഞ്ഞ രണ്ട് ദിവസങ്ങളിലായി നാലായിരത്തി അഞ്ഞൂറിലധികം പേരാണ് വിവിധ പ്രദേശങ്ങളിൽ നിന്നായി ഇവിടെയെത്തിച്ചേർന്നത്. ഇതിൽ കുടുംബങ്ങളോടൊത്ത് സമയം ചെലവഴിക്കാൻ എത്തുന്നവരാണ് അധികവും. കരിയാത്തുംപാറയിൽ പെരുവണ്ണാമൂഴി ഡാം റിസർവോയറിന്‍റെ ഭാഗമായി ഇവിടെ വെള്ളത്താൽ ചുറ്റപ്പെട്ടുകിടക്കുന്നതിന്‍റെ മനോഹാരിത ആസ്വദിക്കുന്നതിനും ഇവിടുത്തെ ഭൂപ്രകൃതിയുടെ ഭംഗിയുമാണ് ഏവരെയും ആകൃഷ്ടരാക്കുന്നത്. എന്നാൽ കുട്ടികൾക്കായും മറ്റുമുള്ള വിനോദങ്ങൾക്കുള്ള സംവിധാനങ്ങൾ ഇവിടെ ഒരുക്കാത്തത് പലരേയും നിരാശരാക്കുന്നുണ്ട്. ജില്ലയുടെ പുറത്തു നിന്നെത്തുന്നവരും ഏറെയാണ്. ജലസേചന വകുപ്പിന്‍റെ കീഴിലായി ഏക്കറുകണക്കിന് വിശാലമായി കിടക്കുന്ന പ്രദേശമാണിത്. ഇവിടെയെത്തിച്ചേരുന്ന വിനോദ സഞ്ചാരികൾക്കായി കൂടുതൽ വിനോദത്തിനുള്ള സൗകര്യങ്ങൾ ഒരുക്കണമെന്ന ആവശ്യമാണ് ഉയരുന്നത്.

44 തദ്ദേശസ്വയംഭരണ സ്ഥാപനങ്ങളുടെ വാർഷിക പദ്ധതികൾക്ക് അംഗീകാരം

കോഴിക്കോട്: ജില്ലാ ആസൂത്രണ സമിതിയുടെ 2025-26 വാര്‍ഷിക പദ്ധതി അംഗീകരിക്കുന്നതിനായുള്ള യോഗം കളക്ടറേറ്റ് കോൺഫറൻസ് ഹാളിൽ ചേർന്നു. 44 തദ്ദേശസ്വയംഭരണ സ്ഥാപനങ്ങളുടെ വാര്‍ഷിക പദ്ധതികൾക്ക് കൂടി യോഗം അംഗീകാരം നല്‍കി. നേരത്തെ നൽകിയ 41 തദ്ദേശസ്വയംഭരണ സ്ഥാപനങ്ങളുടെ വാർഷിക പദ്ധതിക്ക് പുറമെയാണിത്. യോഗത്തിൽ ജില്ലാ ആസൂത്രണ സമിതി ചെയര്‍പേഴ്‌സണ്‍ ഷീജ ശശി അധ്യക്ഷത വഹിച്ചു. ജില്ലാ ആസൂത്രണ സമിതി സര്‍ക്കാര്‍ നോമിനി എ. സുധാകരന്‍, ജില്ലാ പ്ലാനിംഗ് ഓഫീസര്‍ ഏലിയാമ്മ നൈനാന്‍, ജില്ലാ ആസൂത്രണ സമിതി അംഗങ്ങള്‍, തദ്ദേശ സ്വയംഭരണ സ്ഥാപന അധ്യക്ഷന്‍മാര്‍ തുടങ്ങിയവർ പങ്കെടുത്തു.

വളയത്ത് വീട് നിർമാണത്തിന് സൂക്ഷിച്ച മര ഉരുപ്പടികൾ തീവച്ച് നശിപ്പിച്ചു

നാദാപുരം: വളയത്ത് വീട് നിർമാണത്തിന് സൂക്ഷിച്ച മര ഉരുപ്പടികൾ തീവച്ച് നശിപ്പിച്ചു. വളയം ചെക്കോറ്റയിലെ കോറോത്ത്താഴെ ഷീജയുടെ ഉടമസ്ഥതയിലുള്ള നിർമാണത്തിലിരിക്കുന്ന വീട്ടിനകത്ത് സൂക്ഷിച്ച തേക്കുമര ഉരുപ്പടികളാണ് അജ്ഞാതർ തീവച്ച് നശിപ്പിച്ചത്. ഒരു ലക്ഷത്തിലധികം രൂപയുടെ നാശനഷ്ടം സംഭവിച്ചു. ശനിയാഴ്ച പുലർച്ചെ നാലിനാണ് സംഭവം. വീട്ടിനകത്ത് നിന്ന് തീ ഉയരുന്നത് കണ്ട് അയൽവാസികളെത്തുക‍യും തുടർന്ന് തീ അണയ്ക്കുകയുമായിരുന്നു. വളയം പോലീസ് കേസെടുത്ത് അന്വേഷണം ആരംഭിച്ചിട്ടുണ്ട്. വിരലടയാള വിദഗ്ധർ, കെ 9 സ്ക്വാഡും സംഭവസ്ഥലത്ത് പരിശോധന നടത്തി.

സര്‍ക്കാര്‍ വാര്‍ഷികം; ‘എന്‍റെ കേരളം’ പ്രദര്‍ശന വിപണന മേളയുടെ പോസ്റ്റര്‍ പ്രകാശനം ചെയ്തു

കോഴിക്കോട്: രണ്ടാം പിണറായി വിജയന്‍ സര്‍ക്കാരിന്‍റെ നാലാം വാര്‍ഷികത്തോടനുബന്ധിച്ച് മേയ് മൂന്ന് മുതല്‍ 12 വരെ കോഴിക്കോട് ബീച്ചില്‍ സംഘടിപ്പിക്കുന്ന എന്‍റെ കേരളം പ്രദര്‍ശന വിപണന മേളയുടെ പ്രചാരണ പോസ്റ്ററും പ്രൊമോ വീഡിയോയും മന്ത്രി പി.എ. മുഹമ്മദ് റിയാസ് പ്രകാശനം ചെയ്തു. "വികസന തീരമണഞ്ഞ് കോഴിക്കോട്' എന്ന ടാഗ്‌ലൈനോടെയാണ് പോസ്റ്റര്‍ തയാറാക്കിയത്. എന്‍റെ കേരളം മേളയ്ക്കൊപ്പം നടക്കുന്ന കുടുംബശ്രീ ദേശീയ സരസ് മേളയുടെ ലോഗോ മന്ത്രി, മേയര്‍ ഡോ. ബീനാ ഫിലിപ്പിനു നല്‍കി പ്രകാശനം ചെയ്തു. സര്‍ക്കാരിന്‍റെ നാല് വര്‍ഷത്തെ വികസന കാഴ്ചകളുടെ പ്രതിഫലനമാകണം മേളയെന്ന് മന്ത്രി പറഞ്ഞു. നഗരത്തില്‍ മാത്രം ഒതുങ്ങാതെ ജില്ലയുടെ എല്ലാ ഭാഗങ്ങളിലേക്കും പ്രചാരണം വ്യാപിപ്പിക്കണം. എല്ലാവിധ ജനവിഭാഗങ്ങളെയും മേളയുടെ ഭാഗമാക്കണം. വിവിധ സര്‍ക്കാര്‍ വകുപ്പുകളുടെ ഏകോപനത്തോടെ വ്യത്യസ്തവും പുതുമയുള്ളതുമായ പരിപാടികള്‍ ഉള്‍പ്പെടുത്തി ഏറ്റവും നല്ല രീതിയില്‍ മേള സംഘടിപ്പിക്കാന്‍ സബ് കമ്മിറ്റികള്‍ ശ്രദ്ധിക്കണം. വിവിധ കമ്മിറ്റികളുടെ പ്രവര്‍ത്തനം യോഗം വിലയിരുത്തി. മേളയുടെ മുന്നോടിയായി നഗരത്തില്‍ വര്‍ണാഭമായ ഘോഷയാത്ര സംഘടിപ്പിക്കും. ജില്ലയിലെ തദ്ദേശസ്ഥാപന തലത്തില്‍ വിദ്യാഭ്യാസം, കരിയര്‍, കല, കായികം, ശാസ്ത്രം, സംരംഭകത്വം തുടങ്ങി വിവിധ മേഖലകളില്‍ കഴിവ് തെളിയിച്ച 25 വയസിന് താഴെ പ്രായമുള്ള പ്രതിഭകളെ മേളയില്‍ ആദരിക്കും. പ്രതിഭാ സംഗമത്തില്‍ പങ്കെടുക്കേണ്ടവരുടെ പേരുവിവരങ്ങള്‍ തദ്ദേശസ്ഥാപനങ്ങള്‍ എല്‍എസ്ജിഡി വകുപ്പിന് നല്‍കും. തെരഞ്ഞെടുക്കപ്പെടുന്ന പ്രതിഭകള്‍ക്ക് അനുഭവങ്ങള്‍ പങ്ക് വയ്ക്കാനുള്ള അവസരവും സംഗമത്തിലുണ്ടാകും. മേളയുടെ പ്രചാരണത്തിന്‍റെ ഭാഗമായി തദ്ദേശ തലത്തില്‍ വിദ്യാര്‍ഥികള്‍, ചിത്രകല അധ്യാപകര്‍, പ്രാദേശിക കലാകാരൻമാർ തുടങ്ങിയവരെ പങ്കെടുപ്പിച്ച് വികസന വരകള്‍ എന്ന പേരില്‍ ചിത്രരചനാ മത്സരം സംഘടിപ്പിക്കും. ജില്ലാതലത്തില്‍ സമൂഹ ചിത്രരചനയും സംഘടിപ്പിക്കും. സെലിബ്രിറ്റി ഫുട്‌ബോള്‍ മാച്ച്, സൈക്ലിംഗ്, സ്‌കേറ്റിംഗ്, ബീച്ച് റണ്‍ തുടങ്ങി വിവിധ പരിപാടികള്‍ പ്രചരണത്തിന്‍റെ ഭാഗമായി സംഘടിപ്പിക്കും. കളക്ടറേറ്റ് കോണ്‍ഫറന്‍സ് ഹാളില്‍ ചേര്‍ന്ന യോഗത്തില്‍ അഹമ്മദ് ദേവര്‍കോവില്‍ എംഎല്‍എ അധ്യക്ഷത വഹിച്ചു.

മിന്നൽ ചുഴലിയിൽ വീട് തകർന്നു

തിരുവമ്പാടി: കഴിഞ്ഞദിവസം ആഞ്ഞുവീശിയ മിന്നൽ ചുഴലിയിൽ വീടിന് മുകളിൽ തെങ്ങ് വീണ് നാശനഷ്ടം. പുല്ലൂരാംപാറ മേലേ പൊന്നാങ്കയത്ത് കുറ്റിയാങ്കൽ ജയേഷിന്‍റെ വീടിന്‍റെ മുകളിലേക്കാണ് തെങ്ങ് വീണത്. വീട് ഭാഗികമായി തകർന്നു. ഭാര്യ ശാന്തി നിസാര പരിക്കുകളോടെ രക്ഷപ്പെട്ടു.

മലബാർ ഗോൾഡിൽ അക്ഷയതൃതീയയോടനുബന്ധിച്ച് ആകർഷകമായ ഓഫറുകൾ

കോഴിക്കോട്: അക്ഷയ തൃതീയ പ്രമാണിച്ച് മലബാർ ഗോൾഡ് ആൻഡ് ഡയമണ്ട്സ് ഉപഭോക്താക്കൾക്കായി ആകർഷകമായ വിവിധ ഓഫറുകൾ പ്രഖ്യാപിച്ചു. സ്വർണാഭരണ പണിക്കൂലിയിലും ഡയമണ്ട് വാല്യൂവിലും 25 ശതമാനം വരെ കിഴിവും ജെം സ്റ്റോൺ, അൺകട്ട് ഡയമണ്ട് തുടങ്ങിയവയ്ക്ക് പണിക്കൂലിയിൽ ഫ്ലാറ്റ് 25ശതമാനം ഡിസ്‌കൗണ്ടും മലബാർ വാഗ്ദാനം ചെയ്യുന്നു. കൂടാതെ അഡ്വാൻസ് ബുക്കിംഗ് ചെയ്യുന്നവർക്ക് വെള്ളിനാണയങ്ങൾ സൗജന്യമായി നേടാനും അവസരമുണ്ട്. അഡ്വാൻസ് ബുക്കിംഗിലൂടെ വർധിച്ചുവരുന്ന സ്വർണവിലയിൽ നിന്നും രക്ഷനേടാം. വിലയുടെ മൂന്ന് ശതമാനം നൽകി ബുക്ക് ചെയ്യുന്നതിലൂടെ ബുക്ക് ചെയ്യുന്ന ദിവസത്തെ വിലയോ, ആഭരണം വാങ്ങുന്ന ദിവസത്തെ വിലയോ, ഏതാണോ കുറവ് ആ വിലയ്ക്ക് ആഭരണങ്ങൾ സ്വന്തമാക്കാം. അക്ഷയ തൃതീയയോടനുബന്ധിച്ച് മലബാർ ഗോൾഡ് ആൻഡ് ഡയമണ്ട്സ് തങ്ങളുടെ എക്‌സ്ക്ലൂസീവ് ബ്രാൻഡായ ഡിവൈൻ കളക്ഷൻസിലെ പുതിയ കളക്ഷനായ "തൻവിക' കളക്ഷൻ അവതരിപ്പിക്കുന്നു. പരമ്പരാഗത ശില്പചാരുതയിൽ നിർമിച്ച, പവിത്രതയും കലാവൈഭവവും സമന്വയിക്കുന്ന ആഭരണങ്ങളുടെ അമൂല്യമായ ശേഖരമാണ് "തൻവിക' കളക്ഷൻസിൽ ഒരുക്കിയിരിക്കുന്നത്.

വിലങ്ങാട് വില്ലേജ് ഓഫീസിലേക്ക് കോൺഗ്രസ്‌ മാർച്ച്‌ നടത്തി

നാദാപുരം: വാണിമേൽ പഞ്ചായത്തിലെ 9,10,11 വാർഡുകളിലെ കെട്ടിട നിർമാണ വിലക്ക് പിൻവലിക്കുക, എൻഐടിയുടെ സർവേ റിപ്പോർട്ട്‌ പുറത്തുവിടുക, ദുരന്തബാധിതർക്ക് സർക്കാർ പ്രഖ്യാപിച്ച 15ലക്ഷം രൂപ ഉടനെ വിതരണം ചെയ്യുക, വിലങ്ങാട്ടെ ജനങ്ങളുടെ ആശങ്ക അകറ്റുക തുടങ്ങിയ ആവശ്യങ്ങൾ ഉന്നയിച്ച് പ്രദേശത്തെ ദുരന്ത ബാധിതരെ പങ്കെടുപ്പിച്ചുകൊണ്ട് വാണിമേൽ മണ്ഡലം കോൺഗ്രസ്‌ കമ്മിറ്റിയുടെ നേതൃത്വത്തിൽ വിലങ്ങാട് വില്ലേജ് ഓഫീസിലേക്ക് മാർച്ച് നടത്തി. സർക്കാരിന്‍റെ നിഷ്‌ക്രിയത്വത്തിനെതിരേ അനിശ്ചിതകാല സമരം ആരംഭിക്കുമെന്ന് മാർച്ച്‌ ഉദ്ഘാടനം ചെയ്ത ഡിസിസി ജനറൽ സെക്രട്ടറി പ്രമോദ് കക്കട്ടിൽ പറഞ്ഞു. മണ്ഡലം പ്രസിഡന്‍റ് എൻ.കെ. മുത്തലീബ് അധ്യക്ഷത വഹിച്ചു. പി.എ. ആന്‍റണി, ജോസ് ഇരുപ്പക്കാട്ട്, ഷെബി സെബാസ്റ്റ്യൻ, പി. ബാലകൃഷ്ണൻ, പി.എസ്. ശശി, തോമസ് മാത്യു, സാബു ജോസഫ്, മോളി ജോണി, രവീന്ദ്രൻ വയലിൽ, കെ.പി. അബ്ദുള്ള, ബോബി തോക്കനാട്ട് തുടങ്ങിയവർ പ്രസംഗിച്ചു. മാർച്ചിന് ജോൺസൻ ഓലിക്കൽ, സിജിൽ തോമസ്, ബോബി ലൂക്കോസ്, ഔസേപ്പച്ചൻ മണിമല, ഡോമിനിക് കുഴിപ്പള്ളി, മാർട്ടിൻ ടോംസ്, എ.പി. കുമാരൻ, കെ.ശിവൻകുട്ടി എന്നിവർ നേതൃത്വം നൽകി.

ഒരാഴ്ച നീണ്ടുനിൽക്കുന്ന പെരുവണ്ണാമൂഴി ടൂറിസം ഫെസ്റ്റ് തുടങ്ങി

പേരാമ്പ്ര: ചക്കിട്ടപാറ പഞ്ചായത്ത് നാലാം വാർഷികാഘോഷത്തിനും ടൂറിസം ഫെസ്റ്റിനും പെരുവണ്ണാമൂഴിയിൽ തുടക്കമായി. ഒരാഴ്ച നീണ്ടുനിൽക്കുന്ന ആഘോഷ പരിപാടികൾ മന്ത്രി പി.എ. മുഹമ്മദ് റിയാസ് ഉദ്ഘാടനം ചെയ്തു. മലമ്പുഴ മാതൃകയിൽ കാരവൻ പാർക്ക് ഉൾപ്പടെയുള്ള വികസന പദ്ധതികൾ പെരുവണ്ണാമൂഴിയിലും സ്ഥാപിക്കുന്നതിനെക്കുറിച്ച് ടൂറിസം വകുപ്പ് പരിഗണന നൽകും. കോവിഡിനു ശേഷം വിനോദ സഞ്ചാരത്തിനു ജനങ്ങൾ കൂടുതൽ താൽപ്പര്യം പുലർത്തുന്നുണ്ട്. ഇതനുസരിച്ച് 2024 ൽ ടൂറിസം രംഗത്ത് വൻ കുതിച്ചുചാട്ടമാണ് കേരളത്തിലുണ്ടായിരിക്കുന്നത്. ഭൂഘടനയ്ക്കനുസരിച്ച് ഓരോ മേഖലക്കും അനുയോജ്യമായ ടൂറിസം വികസന പദ്ധതികൾ നടപ്പാക്കുമെന്നും മന്ത്രി പറഞ്ഞു. ചക്കിട്ടപാറ പഞ്ചായത്ത് പ്രസിഡന്‍റ് കെ. സുനിൽ അധ്യക്ഷത വഹിച്ചു. ഷാഫി പറമ്പിൽ എംപി മുഖ്യാതിഥിയായി. ഷീജ ശശി, കെ.ഇ. ബൈജു ഐപിഎസ്, എൻ.പി. ബാബു, ചിപ്പി മനോജ്, സി.കെ. ശശി, വി.കെ. ബിന്ദു, ഇ.എം. ശ്രീജിത്ത്, കെ.എ. ജോസ്‌കുട്ടി, ശോഭ പട്ടാണിക്കുന്നുമ്മൽ, എ.ജി. ഭാസ്‌കരൻ, ബോബി ഓസ്റ്റിൻ, ആവള ഹമീദ്, പി.എം. ജോസഫ്, ബിജു ചെറുവത്തൂർ, രാജീവ് തോമസ്, പി.പി. രഘുനാഥ്, പി.സി. സുരാജൻ എന്നിവർ പ്രസംഗിച്ചു.

വിഷു ദിനത്തിൽ കെ. ലോഹ്യ പോലീസ് സ്റ്റേഷന് മുന്നിൽ ഉപവസിച്ചു

മേപ്പയ്യൂർ: മേപ്പയ്യൂർ പോലീസിന്‍റെ ജനദ്രോഹ നടപടികൾക്കെതിരേ വിഷു ദിനത്തിൽ ആർജെഡി സംസ്ഥാന സെക്രട്ടറി കെ. ലോഹ്യ മേപ്പയ്യൂർ പോലീസ് സ്റ്റേഷന് മുന്നിൽ ഉപവസിച്ചു. പുറക്കാമല സമരത്തിന്‍റെ പേരിൽ മേപ്പയ്യൂർ പോലീസ് ഒറ്റതിരിഞ്ഞ് അക്രമിക്കുന്ന സമീപനം സ്വീകരിക്കുന്നുവെന്നും ഒമ്പതോളം കള്ളക്കേസുകളിൽ ഉൾപ്പെടുത്തി ജയിലിലടച്ച പോലീസ് 11 ദിവസത്തെ ജയിൽവാസത്തിന് ശേഷം ലഭിച്ച ജാമ്യം റദ്ദ്‌ ചെയ്യാൻ നിരന്തരം കോടതിയെ സമീപിക്കുകയാണെന്നും ഇതിൽ പ്രതിഷേധിച്ചാണ് ഉപവസിച്ചതെന്നും അദ്ദേഹം പറഞ്ഞു. ആർജെഡി സംസ്ഥാന ജന. സെക്രട്ടറി എൻ.കെ. വത്സൻ ഉദ്ഘാടനം ചെയ്തു. നിയോജക മണ്ഡലം പ്രസിഡന്‍റ് പി. മോനിഷ അധ്യക്ഷത വഹിച്ചു. നേതാക്കളായ ഭാസ്കര കൊഴുക്കല്ലൂർ, നിഷാദ് പൊന്നങ്കണ്ടി, സി. സുജിത്ത്, സുനിൽ ഓടയിൽ എന്നിവർ പ്രസംഗിച്ചു.

പ്രീമെട്രിക് ഹോസ്റ്റല്‍ കെട്ടിട നിര്‍മാണോദ്ഘാടനം നാളെ

കോഴിക്കോട്: പട്ടികവര്‍ഗ വികസന വകുപ്പിനു കീഴില്‍ കോഴിക്കോട് ജില്ലയിലെ പ്രീമെട്രിക് ഹോസ്റ്റലിന്‍റെ (ആണ്‍) പുതിയ കെട്ടിടത്തിന്‍റെ നിര്‍മാണോദ്ഘാടനം നാളെ പട്ടികജാതി പട്ടികവര്‍ഗ പിന്നാക്കക്ഷേമ മന്ത്രി ഒ.ആര്‍. കേളു നിര്‍വഹിക്കും. വടകര പുതുപ്പണത്ത് രാവിലെ 11ന് നടക്കുന്ന ചടങ്ങില്‍ കെ.കെ. രമ എംഎല്‍എ അധ്യക്ഷത വഹിക്കും. ഷാഫി പറമ്പില്‍ എംപി മുഖ്യാതിഥിയാകും. വടകര മുനിസിപ്പാലിറ്റി ചെയര്‍പേഴ്സണ്‍ കെ.പി. ബിന്ദു, ജില്ലാ കളക്ടര്‍ സ്നേഹില്‍ കുമാര്‍ സിംഗ്, പട്ടികവര്‍ഗ വികസന വകുപ്പ് ഡയറക്ടര്‍ ഡോ. രേണുരാജ്, ജനപ്രതിനിധികള്‍, വിവിധ രാഷ്ട്രീയ പാര്‍ട്ടി പ്രതിനിധികള്‍, സംസ്ഥാന പട്ടികവര്‍ഗ ഉപദേശക സമിതി അംഗങ്ങള്‍, വകുപ്പ് ജീവനക്കാര്‍, വിവിധ വകുപ്പ് ഉദ്യോസ്ഥര്‍, പ്രദേശവാസികള്‍ തുടങ്ങിയവര്‍ പങ്കെടുക്കും.

"വീട്ടമ്മമാര്‍ക്ക് നല്‍കിയ വാഗ്ദാനം പാലിക്കണം'

തിരുവമ്പാടി: കേരളത്തിലെ വീട്ടമ്മമാര്‍ക്ക് പെന്‍ഷന്‍ നല്‍കുമെന്ന ഇടതുപക്ഷ ജനാധിപത്യ മുന്നണിയുടെ തെരഞ്ഞെടുപ്പ് വാഗ്ദാനം ഉടന്‍ നടപ്പിലാക്കണമെന്ന് കേരള വനിതാ കോണ്‍ഗ്രസ്-എം തിരുവമ്പാടി നിയോജക മണ്ഡലം കണ്‍വന്‍ഷന്‍ ആവശ്യപ്പെട്ടു. പാര്‍ട്ടി ജില്ലാ പ്രസിഡന്‍റ് ടി.എം. ജോസഫ് ഉദ്ഘാടനം ചെയ്തു. കെ.എം പോള്‍സണ്‍, വിനോദ് കിഴക്കയില്‍, ഗ്രേസി ജോര്‍ജ്, മേരി തങ്കച്ചന്‍, ചിന്നമ്മ മാത്യു, മേഴ്‌സി ആന്‍റണി, ആന്‍സി സെബാസ്റ്റ്യന്‍, മോളി സണ്ണി, മോളി കുന്നുംപുറത്ത് എന്നിവര്‍ പ്രസംഗിച്ചു. ഭാരവാഹികളായി മേഴ്‌സി ആന്‍റണി(പ്രസിഡന്‍റ് ), ഡെനി ഫ്രാന്‍സീസ്, ഷിജി ജിമ്മി(വൈസ് പ്രസിഡന്‍റുമാര്‍), മോളി സണ്ണി, ആലീസ് ബെന്നി, റാണി ജിജി(ജനറല്‍ സെക്രട്ടറിമാര്‍) ചിന്നമ്മ മാത്യു(ട്രഷറര്‍), മേരി തങ്കച്ചന്‍, ഗ്രേസി ജോര്‍ജ്, ആന്‍സി സെബാസ്റ്റ്യന്‍, ഷിജി സിബി(ജില്ലാ കമ്മിറ്റി അംഗങ്ങള്‍) എന്നിവരെ തെരഞ്ഞെടുത്തു.

വയോജനങ്ങള്‍ക്ക് കട്ടില്‍ വിതരണം ചെയ്തു

കൊയിലാണ്ടി: നഗരസഭയില്‍ 2024-25 വാര്‍ഷിക പദ്ധതിയില്‍ ഉള്‍പ്പെടുത്തി വയോജനങ്ങള്‍ക്ക് കട്ടില്‍ വിതരണം ചെയ്തു. നഗരസഭാ ചെയര്‍പേഴ്‌സണ്‍ സുധ കിഴക്കേപ്പാട്ട് വിതരണോദ്ഘാടനം നിര്‍വഹിച്ചു. പരിപാടിയില്‍ ക്ഷേമകാര്യ സ്റ്റാന്‍ഡിംഗ് കമ്മറ്റി ചെയര്‍മാന്‍ കെ. ഷിജു അധ്യക്ഷത വഹിച്ചു. ഐസിഡിഎസ് സൂപ്പര്‍വൈസര്‍ കെ. ഷബില പദ്ധതി വിശദീകരണം നടത്തി. വികസനകാര്യ സ്റ്റാൻഡിംഗ് കമ്മിറ്റി ചെയര്‍പേഴ്‌സണ്‍ ഇന്ദിര, പൊതുമരാമത്ത് സ്റ്റാൻഡിംഗ് കമ്മിറ്റി ചെയര്‍മാന്‍ ഇ.കെ. അജിത്ത്, ആരോഗ്യ സ്റ്റാൻഡിംഗ് കമ്മിറ്റി ചെയര്‍പേഴ്‌സണ്‍ സി. പ്രജില, വിദ്യാഭ്യാസ സ്റ്റാൻഡിംഗ് കമ്മിറ്റി ചെയര്‍പേഴ്‌സണ്‍ നിജില പറവക്കൊടി, കൗണ്‍സിലര്‍മാരായ കെ.കെ. വൈശാഖ്, വത്സരാജ് കേളോത്ത്, റഹ്മത്ത്, ആര്‍.കെ. കുമാരന്‍, സുധാകരന്‍, ഐസിഡിഎസ് സൂപ്പര്‍വൈസര്‍ ടി.കെ. റുഫീല തുടങ്ങിയവര്‍ പ്രസംഗിച്ചു.

കാലിക്കട്ട് എഫ്സി ജില്ലാ ലീഗ് ചാമ്പ്യൻഷിപ്പ് തുടങ്ങുന്നു

കോഴിക്കോട്: ജില്ലാ ഫുട്ബോൾ അസോസിയേഷനും കാലിക്കട്ട് ഫുട്ബോൾ ക്ലബും സംയുക്തമായി നടത്തുന്ന ജില്ലാ ലീഗ് ഫുട്ബോൾ ചന്പ്യൻഷിപ്പ് ആരംഭിക്കുന്നു. വനിതാ ലീഗ് അടക്കം 70 ക്ലബുകൾ 11 ഡിവിഷനുകളിലായി മത്സരിക്കും. മത്സരക്രമങ്ങള്‍ പീന്നീട് അറിയിക്കുമെന്ന് അധികൃതര്‍ വാര്‍ത്താസമ്മേളനത്തില്‍ അറിയിച്ചു.നഗരത്തിലെ വിവിധ മൈതാനങ്ങളിലാണ് മത്സരങ്ങള്‍ നടത്തുക. ജില്ലാ ലീഗ് മത്സരങ്ങള്‍ എഫ് ഡിവിഷന്‍ മുതല്‍ കൊയിലാണ്ടി സ്‌പോര്‍ട്‌സ് കൗണ്‍സില്‍ സ്‌റ്റേഡിയത്തിലാണ് നടക്കുക. ഓരോഡിവിഷനുകളിലും ആവേശം നിറഞ്ഞ മത്സരങ്ങൾ നടക്കുന്ന ഈ വർഷത്തെ ജില്ലാ ലീഗ് ചാന്പ്യൻഷിപ്പ് സ്പോൺസർ ചെയ്‌തിരിക്കുന്നത് പ്രഥമ കേരള സൂപ്പർ ലീഗ് ചാമ്പ്യന്മാരായ കാലിക്കട്ട് ഫുട്ബോൾ ക്ലബാണ്. ഈ വർഷത്തെ ലീഗ് ചാമ്പ്യൻഷിപ്പ് "കാലിക്കട്ട് എഫ്സി ജില്ലാ ലീഗ് ചാമ്പ്യൻഷിപ്പ് 2025' എന്ന പേരിലാണ് നടത്തുന്നതെന്ന് സംഘാടകര്‍ അറിയിച്ചു. ചാമ്പ്യൻഷിപ്പിന്‍റെ ലോഗോ പ്രകാശനം കാലിക്കട്ട് എഫ്സിയുടെ സിഇഒ മാത്യു കോരത്ത് ജില്ലാ ഫുട്‌ബോൾ അസോസിയേഷൻ സെക്രട്ടറി കെ. ഷാജേഷ് കുമാറിന് നൽകി നിർവഹിച്ചു.

വേളത്ത് യുഡിഎഫിൽ പൊട്ടിത്തെറി; പഞ്ചായത്ത് വൈസ് പ്രസിഡന്‍റ് രാജിവച്ചു

വേളം: വേളം പഞ്ചായത്ത് പ്രസിഡന്‍റ് സ്ഥാനം പങ്കിടുന്നതുമായി ബന്ധപ്പെട്ട് യുഡിഎഫിൽ പൊട്ടിത്തെറി. പഞ്ചായത്ത് വൈസ് പ്രസിഡന്‍റ് കെ.സി. ബാബു രാജിവച്ചു. അവസാനത്തെ ഒരുവർഷം പഞ്ചായത്ത് പ്രസിഡന്‍റ് സ്ഥാനം കോൺഗ്രസിന് കൈമാറാൻ നേരത്തേ തന്നെ മുസ്‌ലിംലീഗും കോൺഗ്രസും തമ്മിൽ ധാരണയായിരുന്നു. ഈ ധാരണ പ്രകാരം 2024 ഡിസംബർ മാസം അവസാനത്തോടെ അധികാരക്കൈമാറ്റം നടക്കേണ്ടതായിരുന്നു. എന്നാൽ ഇത് നടപ്പിലാവാതെ വന്നപ്പോൾ യുഡിഎഫ് ജില്ലാ നേതൃത്വം ഉൾപ്പെടെ വിഷയത്തിൽ ഇടപെടുകയും ഏപ്രിൽ മാസം അധികാരം കൈമാറാൻ തീരുമാനമായതുമാണ്. എന്നാൽ ഈ തീരുമാനവും നടപ്പിലാകാത്തതിനെ തുടർന്ന് അവസാനം മുസ്‌ലിംലീഗ് സംസ്ഥാന നേതൃത്വം വിഷയത്തിൽ ഇടപെട്ടു. എന്നിട്ടും വ്യക്തമായ തീരുമാനത്തിൽ എത്താത്തതിന്‍റെ പശ്ചാത്തലത്തിലാണ് വൈസ് പ്രസിഡന്‍റ് രാജിവച്ചത്.

വാഹനാപകടത്തിൽ യുവതി മരിച്ചു

മുക്കം: എടവണ്ണ-കൊയിലാണ്ടി സംസ്ഥാനപാതയിൽ എരഞ്ഞിമാവിലുണ്ടായ വാഹനാപകടത്തിൽ യുവതി മരിച്ചു. ഗോതമ്പറോഡ് താമസിക്കുന്ന കെ.എസ്. ഇസ്മായിലിന്‍റെ മകളും കൊടിയത്തൂർ വടക്ക് വീട്ടിൽ അബ്ദു റഊഫിന്‍റെ ഭാര്യയുമായ നസീറ (39) ആണ് മരിച്ചത്. അപകടത്തിൽ റഊഫിനും മകൾ ഫിദക്കും പരിക്കേറ്റു. തിങ്കളാഴ്ച ഉച്ചയോടെയാണ് സംഭവം. മകളെ അരിക്കോട് ഡോക്ടറെ കാണിച്ച് ഭർത്താവിനൊപ്പം ബൈക്കിൽ വരുന്നതിനിടയിൽ കാറിടിച്ചാണ് അപകടം. അപകടത്തിൽപ്പെട്ടവരെ നാട്ടുകാരുടെ നേതൃത്വത്തിൽ അരിക്കോട് സ്വകാര്യ ആശുപത്രിയിലെത്തിച്ചെങ്കിലും നസീറയുടെ ജീവൻ രക്ഷിക്കാനായില്ല. അപകടത്തിനിടയാക്കിയ കാർ തിരുവനന്തപുരം സ്വദേശിയുടേതാണ്. ഫഹ്‌മയാണ് നസീറയുടെ മറ്റൊരു മകൾ. മാതാവ്: സൈനബ.

പ്രവർത്തക സംഗമം നടത്തി

മുക്കം: കലാ-സാഹിത്യ-സാംസ്കാരിക രംഗത്തെ കേരളത്തിലുള്ള മികച്ച കൂട്ടായ്മയായ തനിമ കലാ സാഹിത്യ വേദിയുടെ മുക്കം ചാപ്റ്ററിന് പുതിയ ഭാരവാഹികളെ തെരഞ്ഞെടുത്തു. വാക്കും വരയും വരിയും - നമുക്കൊരുമിച്ചിരിക്കാം എന്ന തലക്കെട്ടിൽ മുക്കം ഹൗസിൽ നടന്ന പ്രവർത്തക സംഗമം തനിമ ജില്ല സെക്രട്ടറിയേറ്റ് അംഗം ഇ ബഷീർ ഉദ്ഘാടനം ചെയ്തു. എസ്. കമറുദ്ദീൻ അധ്യക്ഷത വഹിച്ചു. കലാപരിപാടികളുടെ അവതരണവും നടന്നു. ഭാരവാഹികൾ: ദാമോദരൻ കോഴഞ്ചേരി (പ്രസിഡന്‍റ്), അമീൻ ജൗഹർ (സെക്രട്ടറി), ലൈലാബി മുസ്തഫ (ട്രഷറർ), ടി.കെ. ജുമാൻ (വൈസ് പ്രസിഡന്‍റ്).

റോഡ് പ്രവൃത്തിക്കായി എടുത്ത കുഴിയിൽ ബൈക്ക് വീണു

മുക്കം: റോഡ് പ്രവൃത്തിക്കായി എടുത്ത കുഴിയിൽ വീണ് ബൈക്ക് യാത്രക്കാരന് പരിക്ക്. മുക്കം - മാമ്പറ്റ ബൈപ്പാസിൽ ടെലിഫോൺ എക്സൈഞ്ചിന് അടുത്ത് ഡ്രൈനേജ് നിർമാണത്തിന് എടുത്ത കുഴിയിലാണ് ബൈക്ക് വീണത്. ശനിയാഴ്ച രാത്രിയാണ് സംഭവം. മുക്കം പൊറ്റശേരി സ്വദേശി അനൂപിന് പരിക്കേറ്റു. കൈക്കും കാലിന്‍റെ തുടയെല്ലിനും പരിക്കുണ്ട്. ഇയാളെ ആശുപത്രിയിൽ പ്രവേശിപ്പിച്ചു.അപകടം നടക്കുന്ന സമയത്ത് രാത്രി കാലങ്ങളിൽ കാണുന്ന തരത്തിലുള്ള യാതൊരു മുന്നറിയിപ്പ് ബോഡുകളും വെച്ചിട്ടില്ല എന്നും അപകടം നടന്നത്തിന് ശേഷമാണ് കരാർ കമ്പനിക്കാർ പ്ലാസ്റ്റിക്ക് ഡ്രമ്മുകൾ കൊണ്ട് വച്ചതെന്നും നാട്ടുകാർ പറഞ്ഞു.

കഞ്ചാവുമായി പിടിയിൽ

കോഴിക്കോട് : വിൽപനയ്ക്കായി കൊണ്ടുവന്ന നിരോധിത മയക്കുമരുന്നായ കഞ്ചാവുമായി യുവാവ് പിടിയില്‍.കാവിലുംപാറ പലകാരശിയിൽ നിബിൻ (29 )നെയാണ് ചേവായൂർ പോലീസ് പിടികൂടിയത് . പോലീസ് പെട്രോളിങ്ങിനിടയിൽ ചേവായൂർ പോലീസ് സ്റ്റേഷൻ പരിധിയിലെ ദേശീയപാത ബൈപാസിൽ നേതാജി ജംഗ്ഷനു സമീപം സംശയാസ്പദമായി കണ്ട പ്രതിയെ ദേഹപരിശോധന നടത്തിയപ്പോഴാണ് കഞ്ചാവ് കണ്ടെത്തിയത്.

മാലിന്യ മുക്ത നവകേരളം : സംസ്ഥാന പുരസ്കാരം ലഭിച്ചു

മുക്കം: കേരള സംസ്ഥാന തദ്ദേശസ്വയംഭരണ വകുപ്പിന്‍റെ നേതൃത്വത്തിൽ നടത്തിയ മാലിന്യമുക്ത നവകേരളം ക്യാമ്പയിന്‍റെ മികച്ച എൻഎസ്എസ് യൂണിറ്റിനുള്ള സംസ്ഥാന അവാർഡിന് തെച്ചിയാട് അൽ ഇർഷാദ് ആർട്സ് ആന്‍റ് സയൻസ് വിമൻസ് കോളജ് എൻഎസ്എസ് യൂണിറ്റ് അർഹരായി. തിരുവനന്തപുരം നിശാഗന്ധി ഓഡിറ്റോറിയത്തിൽ കേരള ഗവർണർ രാജേന്ദ്ര വിശ്വനാഥ് അർലേക്കർ ചടങ്ങ് ഉദ്ഘാടനം ചെയ്തു. മന്ത്രി എം.ബി. രാജേഷിൽ നിന്ന് എൻഎസ്എസ് പ്രോഗ്രാം ഓഫീസർ ലിജോ ജോസഫ് , വി.നിതാര എന്നിവർ അവാർഡ് ഏറ്റുവാങ്ങി.ബീച്ചുകൾ, റെയിൽ സ്റ്റേഷൻ, കെ എസ് ആർ ടി സി എന്നിവ ശുചീകരണം. വിവിധ സൗന്ദര്യ വൽക്കരണ പ്രവർത്തനങ്ങൾ, ബോധവൽക്കരണ ക്യാമ്പയിനുകൾ എന്നി പ്രവർത്തനങ്ങൾക്കാണ് അവാർഡ് ലഭിച്ചത്.

കാൽനടയാത്രക്കാരൻ ബൈക്ക് ഇടിച്ചു മരിച്ച സംഭവം; ബൈക്ക് യാത്രികര്‍ പോലീസ് സ്റ്റേഷനിൽ കീഴടങ്ങി

കോഴിക്കോട്: കോഴിക്കോട് ബാലുശേരിയില്‍ കാൽനടയാത്രക്കാരൻ ബൈക്ക് ഇടിച്ചു മരിച്ച സംഭവത്തിൽ ബൈക്ക് യാത്രികര്‍ പോലീസ് സ്റ്റേഷനിൽ കീഴടങ്ങി. ഏപ്രിൽ മൂന്നിന് രാത്രി ബാലുശ്ശേരി മുക്കിലായിരുന്നു അപകടം നടന്നത്. മെഡിക്കൽ ഷോപ്പ് ഉടമയായ അബ്ദുൽ കബീർ ആണ് ബൈക്ക് ഇടിച്ചതിനെ തുടർന്ന് മരിച്ചത്. പരിക്കേറ്റ കബീറിനെ ആശുപത്രിയിലാക്കിയ ശേഷം യുവാക്കൾ കടന്നു കളയുകയായിരുന്നു. യുവാക്കളുടെ സിസിടിവി ദൃശ്യങ്ങൾ പോലീസ് പുറത്തുവിട്ടതിനു പിന്നാലെയാണ് ഇരുവരും കീഴടങ്ങിയത്. താമരശ്ശേരി സ്വദേശികളായ യുവാക്കളാണ് കീഴടങ്ങിയത്. ബൈക്ക് ഓടിച്ചിരുന്ന യുവാവിന് പ്രായപൂർത്തിയായിട്ടില്ലെന്ന് പോലീസ് വ്യക്തമാക്കി.

15ന് വിലങ്ങാട് വില്ലേജ് ഓഫീസ് ഉപരോധിക്കും : കോൺഗ്രസ്‌

നാദാപുരം : വാണിമേൽ പഞ്ചായത്തിലെ 9,10,11 വാർഡുകളിൽ നിർമാണ പ്രവർത്തനങ്ങൾ നിർത്തി വയ്ക്കാനുള്ള ജില്ല കളക്ടറുടെ ഉത്തരവ് പുന പരിശോധിക്കണമെന്നും എൻഐടി യുടെ സർവ്വേ റിപ്പോർട്ട്‌ പുറത്ത് വിടണമെന്നും ദുരന്ത ബാധിതർക്ക് സർക്കാർ പ്രഖ്യാപിച്ച 15 ലക്ഷം രൂപ ഉടനെ വിതരണം ചെയ്യണമെന്നും ആവശ്യപ്പെട്ട് വാണിമേൽ മണ്ഡലം കോൺഗ്രസ്‌ കമ്മിറ്റിയുടെ നേതൃത്വത്തിൽ 15ന് രാവിലെ വിലങ്ങാട് വില്ലേജ് ഓഫീസ് ഉപരോധിക്കാൻ തീരുമാനിച്ചു. വിലങ്ങാട് ചേർന്ന മണ്ഡലം കമ്മിറ്റി യോഗത്തിൽ പ്രസിഡന്‍റ് എൻ.കെ. മുത്തലീബ് അധ്യക്ഷത വഹിച്ചു. ബ്ലോക്ക്‌ ഭാരവാഹികളായ ജോസ് ഇരുപ്പക്കാട്ട്, ഷെബി സെബാസ്റ്റ്യൻ, പി.ബാലകൃഷ്ണൻ,ബിപിൻ തോമസ്, കെ.പി. അബ്ദുള്ള തുടങ്ങിയവർ പ്രസംഗിച്ചു.

വോളിബോൾ ടീമിലേക്കു സെലക്ഷൻ ലഭിച്ച യാദവ് കൃഷ്ണയെ അനുമോദിച്ചു

മേപ്പയ്യൂർ: പേരാമ്പ്ര ആസ്ഥാനമായി പ്രവർത്തിക്കുന്ന കോത്തമ്പ്ര ഫൗണ്ടേഷൻ ദേശീയ വോളിബോൾ ടീമിലേക്കു സെലക്ഷൻ ലഭിച്ച മേപ്പയ്യൂർ എടത്തിൽ മുക്കിലെ യാദവ് കൃഷ്ണയെ ആദരിച്ചു. എം.എം. അഷ്‌റഫ്‌ അധ്യക്ഷനായി. മണ്ഡലം മുസ്‌ലിം ലീഗ് ജനറൽ സെക്രട്ടറി ടി.കെ. എ ലത്തീഫ് ഉദ്ഘാടനം ചെയ്തു. ചടങ്ങിൽ കോത്തമ്പ്ര ഫൗണ്ടേഷൻ ചെയർമാൻ മൂസ കോത്തമ്പ്ര ഉപഹാര സമർപ്പണവും ക്യാഷ് അവാർഡ് വിതരണവും നടത്തി. മുനീർ കുളങ്ങര, മുജീബ് കോമത്ത്, ഹുസൈൻ കമ്മന, അമ്മത് കീപ്പോട്ട്, പി.കെ. കുഞ്ഞബ്ദുല്ല, എം. പ്രസന്ന, കെ. ജിഷ, അജ്നാസ് കാരയിൽ, പി.കെ. അനിൽ കുമാർ, അൻവർ കുന്നങ്ങാത്ത് എന്നിവർ പ്രസംഗിച്ചു.

കേരസുരക്ഷാ ഇൻഷുറൻസിന് അപേക്ഷിക്കാം

കോഴിക്കോട്: ജില്ലയിലെ തെങ്ങുകയറ്റ തൊഴിലാളികൾക്ക് നാളികേരവികസന ബോർഡ് നടപ്പാക്കുന്ന കേരസുരക്ഷാ ഇൻഷുറൻസിന് അപേക്ഷിക്കാം. അപേക്ഷ സിവിൽ സ്റ്റേഷനിലെ സ്വാഭിമാൻ സോഷ്യൽ സർവീസ് ആൻഡ് ചാരിറ്റബിൾ സൊസൈറ്റിയിൽ ലഭിക്കും. കടന്നൽക്കുത്ത്, താൽക്കാലിക അപകടങ്ങൾ, മരണാനന്തര സഹായം, പൂർണ അംഗവൈകല്യം എന്നീ പദ്ധതികളും ഇതിൽ ഉൾപ്പെടും. പൊതുജനങ്ങൾക്കും തൊഴിലാളികൾക്കും അപകട ഇൻഷുറൻസ്, ഹെൽത്ത് ഇൻഷുറൻസ് എന്നിവ വാർഷിക പ്രീമിയം അടച്ച് ചേരുന്ന ഇന്ത്യ പോസ്റ്റ് പേമെന്‍റ് ബാങ്കിന്‍റെ സേവനങ്ങളും ലഭ്യമാണ്. ഇൻഷുറൻസിൽ ചേരാൻ താൽപ്പര്യമുള്ള തൊഴിലാളികൾക്ക് ഓഫീസുമായി ബന്ധപ്പെട്ട് അപേക്ഷ കൈപ്പറ്റാം. ഫോൺ: 8891889720, 0495 2372666, 9446252689.

ഫുട്ബോൾ: യുവ എഫ്സി കക്കയം ജേതാക്കൾ

കൂരാച്ചുണ്ട്: ഡിവൈഎഫ്ഐ കൂരാച്ചുണ്ട് മേഖല കമ്മിറ്റി സംഘടിപ്പിച്ച ഏകദിന ഫൈവ്സ് ഫുട്‌ബോൾ ടൂർണമെന്‍റിൽ യുവ എഫ്സി കക്കയം ജേതാക്കളായി. "ലഹരിയാവാം കളിയിടങ്ങളോട്' എന്ന മുദ്രാവാക്യമുയർത്തി സംഘടിപ്പിച്ച ടൂർണമെന്‍റിൽ ഫ്രണ്ട് ലൈൻ വട്ടച്ചിറയെ പരാജയപ്പെടുത്തിയാണ് കക്കയം ജേതാക്കളായത്. ഗോൾഡ്‌സിഗ്ഗേഴ്സ് പൂവത്തുംചോല, എഫ്സി തലയാട് ടീമുകൾ മൂന്ന്, നാല് സ്ഥാനങ്ങൾ കരസ്ഥമാക്കി. ഡിവൈഎഫ്ഐ കൂരാച്ചുണ്ട് മേഖല സെക്രട്ടറി ജസ്റ്റിൻ ജോൺ, പ്രസിഡന്‍റ് വി.എസ്. സോണറ്റ്, കെ.ജെ. ബെറ്റ്സൺ, എ.എം. അശ്വിൻ എന്നിവർ വിജയികൾക്ക് ട്രോഫികൾ കൈമാറി.

നിരവധി കേസുകളിൽ ഉൾപ്പെട്ട പ്രതിയെ കാപ്പ ചുമത്തി ജയിലിൽ അടച്ചു

കോഴിക്കോട് : കേരളത്തിലെ വിവിധ സ്റ്റേഷനുകളിലായി നിരവധി കേസുകളിൽ ഉൾപ്പെട്ട പ്രതിയെ കാപ്പ ചുമത്തി ജയിലിൽ അടച്ചു. തിരുവനന്തപുരം നെയ്യാർ ഡാം സ്വദേശി യൂസഫ് നിവാസിൽ ബെൻസ് യൂസഫ് (51 )നെതിരേയാണ് കാപ്പചുമത്തിയത്.കോഴിക്കോട് സിറ്റി പോലീസ് ജില്ലയിലെയും, തിരുവനന്തപുരം ജില്ലയിലെയും വിവിധ പോലീസ് സ്റ്റേഷനിൽ മാരകായുധങ്ങളുമായി ആളുകളെ അക്രമിച്ചതിന് കേസുകളുണ്ട്. കിണാശ്ശേരിയിൽ വീടിന്‍റെ പണിയ്ക്കായി വീട്ടുടമസ്ഥൻ സൂക്ഷിച്ച് വെച്ചിരുന്ന 40,000 രൂപയോളം വിലവരുന്ന ഇലക്ട്രിക്, പ്ലംബിങ്ങ് സാധനങ്ങൾ മോഷണം നടത്തിയതിന് യൂസഫ്റിമാന്‍ഡിലായിരുന്നു. പ്രതിക്കെതിരെ കസബ പോലീസ് സ്റ്റേഷൻ ഇൻസ്പെക്ടർ നൽകിയ പ്രാഥമിക റിപ്പോർട്ട് പ്രകാരം ഡെപ്യൂട്ടി പോലീസ് കമ്മിഷണർ, കോഴിക്കോട് സിറ്റി സമർപ്പിച്ച ശുപാർശയിലാണ് കോഴിക്കോട് ജില്ലാ കളക്ടര്‍ പ്രതിയെ കണ്ണൂർ സെൻട്രൽ ജയിലിൽ പാർപ്പിക്കാൻ ഉത്തരവിട്ടത്.

മലാപ്പറമ്പ് ഓവർപാസ് ജം‌ഗ്ഷന്‍ ദേശീയപാതയിൽ മൂന്നുവരി തുറന്നു

കോഴിക്കോട്: രാമനാട്ടുകര – വെങ്ങളം ദേശീയപാതയിൽ മലാപ്പറമ്പ് ഓവർപാസ് ജംഗ്ഷനില്‍ മൂന്നുവരി ടാറിംഗ് പൂർത്തിയായതോടെ ഗതാഗതത്തിനു പൂര്‍ണമായും തുറന്നു. പാച്ചാക്കിൽ ജംഗ്ഷനിലും മലാപ്പറമ്പ് ഓവർപാസിനു സമീപവും ജപ്പാൻ കുടിവെള്ള പൈപ്പ് മാറ്റി സ്ഥാപിക്കുന്ന പ്രവൃത്തി നടക്കുന്നതിനാലാണ് ഈ ഭാഗത്തു റോഡ് നിർമാണം തടസ്സപ്പെട്ടത്. കഴിഞ്ഞ ആഴ്ചയാണ് പൈപ്പ് മാറ്റി സ്ഥാപിച്ചത്. പിന്നീട് ദേശീയപാതയിൽ ഒരു ഭാഗം മൂന്നുവരി മണ്ണു മാറ്റിയാണ് രാത്രി ടാറിംഗ് പൂർത്തീകരിച്ചത്. വിഷുവിനു ശേഷം മലാപ്പറമ്പ് – ഫ്ലോറിക്കൻ റോഡ് സർവീസ് റോഡ് നിർമാണത്തിനായി മണ്ണെടുത്തു മാറ്റൽ ആരംഭിക്കുമെന്നു എൻഎച്ച്എഐ ഉദ്യോഗസ്ഥർ പറഞ്ഞു.

ജഡ്ജിയില്ല, തീർപ്പാവാതെ കിടക്കുന്നത് മൂവായിരത്തിലേറെ കേസുകൾ

കോഴിക്കോട്: കോഴിക്കോട് വടകരയിലെ മോട്ടോർ വാഹന നഷ്ടപരിഹാര ട്രൈബ്യൂണലിൽ ജഡ്ജിയില്ലാത്തതിനാൽ തീർപ്പാവാതെ കിടക്കുന്നത് മൂവായിരത്തിലേറെ കേസുകൾ. നാല് മാസക്കാലമായി ജഡ്ജി ഇല്ലാത്ത അവസ്ഥയിലാണ് കോടതി. ഇതിനാൽ വാഹനാപകടത്തിൽ മരിച്ചവരുടെയും പരിക്കേറ്റ് ചികിത്സയിൽ കഴിയുന്നവരുടെയും നഷ്ടപരിഹാര തുകയടക്കം വൈകുകയാണ്.വടകരയിലെ വാഹനാപകട നഷ്ടപരിഹാര ട്രൈബ്യൂണലിലെ ജഡ്ജി അന്വേഷണ വിധേയമായി സസ്പെൻഷനിൽ ആയതോടെയാണ് കോടതി പ്രവർത്തനം തടസപ്പെട്ടത്. പുതിയ ജഡ്ജിയെ പിന്നീട് നിയമിച്ചില്ല. ഇതോടെ വടകര കൊയിലാണ്ടി താലൂക്കുകളിലെ മൂവായിരത്തിലേറെ കേസുകൾ വിചാരണയുടെ ഘട്ടത്തിൽ തടസ്സപ്പെട്ടു. കേസുകളിൽ അധികവും വാഹന പകടത്തിൽ മരിച്ചവരുടെയും പരിക്ക് പറ്റിയവരുടെയും ആശ്രിതതരുടെ കേസുകളാണ്. പരിക്കേറ്റവരുടെചികിത്സകൾപോലും മുടങ്ങുന്ന സ്ഥിതിയുണ്ട്. പുതിയ ജഡ്ജി എപ്പോഴെത്തുമെന്ന കാര്യത്തിൽ അവ്യക്തത തുടരുകയാണ്.

വിശ്വാസ നിറവില്‍ ഓശാന ഞായര്‍

ചെറുവാടി ഫെസ്റ്റ് 2025

മുക്കം: കൊടിയത്തൂർ ഗ്രാമപഞ്ചായത്തിന്‍റെ, സഹകരണത്തോടെ വ്യാപാരി വ്യവസായി ഏകോപന സമിതി ചെറുവാടി യൂനിറ്റ് സംഘടിപ്പിക്കുന്നകൊടിയത്തൂരിന്‍റെ കലാ-സാംസ്കാരിക-വൈജ്ഞാനികോൽസവമായ ചെറുവാടി ഫെസ്റ്റ് 2025 കാർണിവൽ ഗസൽ സംഗീതത്തിൽ മുങ്ങി. സാംസ്കാരിക സമ്മേളനം അഭിനേതാവും സംവിധായകനുമായ സിദ്ധീഖ് കൊടിയത്തൂർ ഉദ്ഘാടനം ചെയ്തു.സിദ്ധീഖ് കൊടിയത്തൂരിന്‍റെ ഷോർട്ട് ഫിലിം ഞാനാരാ മോൻ യൂ ടുബ് റിലീസ് ഷമീർ ബിൻസി നിർവഹിച്ചു.

ദേശീയപാത വികസനം; കുന്ദമംഗലത്ത് ബൈപാസ് നിർമിക്കണമെന്ന് വ്യാപാരികൾ

കുന്ദമംഗലം: ദേശീയപാത 766 വികസിപ്പിക്കുമ്പോൾ കാരന്തൂർ, കുന്ദമംഗലം, അങ്ങാടികൾ ഒഴിവാക്കി കാരന്തൂർ മുതൽ പടനിലം വരെയുള്ള ഭാഗത്ത് ബൈപാസ് നിർമിക്കണമെന്നാവശ്യപ്പെട്ട് വ്യാപാരികൾ രംഗത്ത്. നിരവധി വ്യാപാര സ്ഥാപനങ്ങളും മറ്റും തിങ്ങിനിറഞ്ഞ ഇടമാണ് പ്രദേശം. എന്നാൽ, കുന്ദമംഗലത്ത് ബൈപാസ് നിർമാണം അനിശ്ചിതത്വത്തിലായതിൽ വ്യാപാരികൾ ആശങ്കയിലാണ്. വ്യാപാര കേന്ദ്രവും വിദ്യാഭ്യാസ ഹബുമായ കുന്ദമംഗലത്ത് ബൈപാസ് നിർമാണം അനിവാര്യമാണ് എന്നും അടുത്ത ഘട്ടത്തിൽ വ്യാപാരികളെയും പൊതുജനങ്ങളെയും ഉൾപ്പെടുത്തി പ്രക്ഷോഭം ആരംഭിക്കുമെന്നും വ്യാപാരികൾ പറഞ്ഞു. ദേശീയപാത 766ൽ കൊടുവള്ളിയിലും താമരശ്ശേരിയിലുമാണ് ദേശീയപാത അധികൃതരുടെ പദ്ധതിയിൽ ബൈപാസ് വിഭാവനം ചെയ്തിട്ടുള്ളത്. അതിനേക്കാൾ കൂടുതൽ പ്രാധാന്യത്തോടെ കുന്ദമംഗലത്ത് ബൈപാസ് നിർമിക്കേണ്ടതിന്‍റെ ജനങ്ങളുടെയും വ്യാപാരികളുടെയും ആവശ്യകത പരിഗണിച്ച് പി.ടി.എ. റഹീം എംഎൽഎയുടെ നേതൃത്വത്തിൽ കിഫ്ബി പദ്ധതിയിൽ ഉൾപ്പെടുത്തി ബൈപാസ് നിർമിക്കാൻ ആവശ്യം ഉയർത്തിയിരുന്നു.

സാമൂഹിക വിരുദ്ധരുടെ വിളയാട്ടം : ലഹരിക്ക് അടിമപ്പെട്ടവരെ ചികിത്സിക്കുന്ന കേന്ദ്രം മാറ്റി സ്ഥാപിക്കണമെന്ന ആവശ്യം

കോഴിക്കോട്: ബീച്ച് ആശുപത്രിവളപ്പിൽ ലഹരിക്കടിപ്പെട്ടവരെ ചികിത്സിക്കുന്ന ഒഎസ്ടി (ഓറല്‍ സബ്സ്റ്റിറ്റ്യൂഷന്‍ തെറപ്പി) സെന്‍റർ മാറ്റി സ്ഥാപിക്കണമെന്ന ആവശ്യം ശക്തം.കെട്ടിടത്തിന്‍റെ ബലക്ഷയവും ഭീഷണിയാവുന്നു. നാഷനൽ എയ്ഡ്സ് കൺട്രോൾ സൊസൈറ്റിയുടെ നേതൃത്വത്തിൽ പ്രവർത്തിക്കുന്ന കേന്ദ്രത്തിൽ ചികിത്സയുടെ മറവില്‍ സാമൂഹിക വിരുദ്ധരുടെ വിളയാട്ടം നടക്കുന്നതായി ആശുപത്രി അധികൃതര്‍ നേരത്തെ കളക്ടര്‍ക്ക്പരാതി നല്‍കിയിരുന്നു. ഇതിന്‍റെ അടിസ്ഥാനത്തിൽ കേന്ദ്രം ആശുപത്രി വളപ്പിൽനിന്ന് മാറ്റാൻ ജൂലൈ15ന് നടന്ന ആശുപത്രി വികസന സമിതി യോഗം തീരുമാനിച്ചിരുന്നു. ഇതിന് പിഡബ്ല്യുഡി എൻജിനീയർക്ക് നിർദേശം നൽകുകയും ചെയ്തിരുന്നു. എന്നാൽ അധികൃതർ കെട്ടിടം പരിശോധിച്ചുപോയതല്ലാതെ കേന്ദ്രം ആശുപത്രി വളപ്പിൽനിന്ന് മാറ്റാൻ നടപടിയൊന്നും ആയിട്ടില്ല. കെട്ടിടം ഏത് നിമിഷവും തകർന്നു വീഴുന്ന അവസ്ഥയിലാണ് എന്നത് അപകട ഭീഷണിയും ഉയർത്തുന്നു. ആശുപത്രി വളപ്പിൽ അപകടകരമായ രീതിയിൽ വാഹനങ്ങൾ ഓടിച്ചു കയറ്റുന്നതും ജീനവക്കാരെയും രോഗികളുടെ കൂട്ടിരിപ്പുകാരെ അസഭ്യം പറയുന്നതും അടക്കം നിരവധി സംഭവങ്ങളും ഇവിടെനിന്ന് റിപ്പോർട്ട് ചെയ്യപ്പെടാറുണ്ട്. അയൽ ജില്ലകളിൽനിന്നുള്ള വിദ്യാർഥികൾ വരെ മയക്കുമരുന്ന് ഉപയോഗത്തിന് ഇവിടെ എത്തുന്നുണ്ട്. ഒഎസ്ടി ക്ലിനിക്ക് ആയതിനാൽ ഇവിടെ മയക്കുമരുന്ന് ഉപയോഗിക്കുന്നത് ചോദ്യം ചെയ്യാൻ ആരും ഇല്ലെന്നതാണ് ഇവർക്ക് സഹായകമാവുന്നത്. മാത്രമല്ല കെട്ടിടം ബലക്ഷയം കാരണം ഉപയോഗയോഗ്യമല്ലെന്ന് നേരത്ത തന്നെ അധികൃതർ കണ്ടെത്തിയിരുന്നു. ഇതിന്‍റെ അടിസ്ഥാനത്തിൽ ക്ലിനിക്കിന്‍റെ തൊട്ടടുത്ത മുറിയിൽ അങ്കണവാടി പ്രവൃത്തി കോർപറേഷൻ അധികൃതർ മാറ്റിസ്ഥാപിച്ചിരുന്നു. ഏതുസയമത്തും ഈ കേന്ദ്രത്തിൽ ആളുകൾ ഉണ്ടാവും. പാടേ ദ്രവിച്ച കെട്ടിടം ശക്തമായ മഴയിൽ ഏത് നിമിഷവും നിലം പൊത്തുന്ന അവസ്ഥയിലാണ്.

ട്രെയിൻ ഇടിച്ച് വയോധികൻ മരിച്ചു

കൊയിലാണ്ടി: മൂടാടി വെള്ളറക്കാട് ട്രെയിൻ ഇടിച്ച് വയോധികൻ മരിച്ചു. വെള്ളറക്കാട് ചെവിചെത്തിപൊയിൽ നാണു (72) ആണ് മരിച്ചത്. ഞായറാഴ്ച രാവിലെ അഞ്ചോടയാണ് അപകടം ഉണ്ടായതെന്ന് കരുതുന്നു. ഇയാളെ രാവിലെ 4.30ന് വീട്ടില്‍ നിന്ന് കാണാതാവുകയായിരുന്നു. മൃതദേഹം കൊയിലാണ്ടി പോലീസ് ഇൻക്വസ്റ്റ് നടത്തി. ഭാര്യ: സുധ. മകൾ: നിഷ്ണ. മരുമകൻ: അജീഷ്.

റോഡ്‌ ഉദ്ഘാടനം ചെയ്തു

താമരശേരി: അമ്പലക്കണ്ടി എട്ടാം വാർഡിലെ കാടാംകുനി-തുവ്വക്കുഴി-തടത്തുമ്മൽ റോഡ്‌ ഉദ്ഘാടനം ചെയ്തു. ജില്ലാ പഞ്ചായത്ത്‌ ക്ഷേമകാര്യ സ്റ്റാൻഡിംഗ്‌ കമ്മിറ്റി ചെയർമാൻ പി. സുരേന്ദ്രൻ ഉദ്ഘാടനകർമ്മം നിർവഹിച്ചു. ജില്ലാ പഞ്ചായത്ത്‌ മെമ്പർ നാസർ എസ്റ്റേറ്റ്മുക്ക്‌ അധ്യക്ഷത വഹിച്ചു. ഗ്രാമപഞ്ചായത്ത്‌ വികസന സ്റ്റാൻഡിംഗ്‌ കമ്മിറ്റി ചെയർമാൻ യൂനുസ്‌ അമ്പലക്കണ്ടി പദ്ധതി വിശദീകരിച്ചു. റോഡ്‌ നിർമാണത്തിന്‌ മേൽനോട്ടം വഹിച്ച ഓമശേരി ഗ്രാമപഞ്ചായത്ത്‌ അസിസ്റ്റന്‍റ് എൻജിനിയർ ടി.പി. രാജേഷിന്‌ വാർഡ്‌ മെമ്പർ യൂനുസ്‌ ഉപഹാരം നൽകി. പഞ്ചായത്ത്‌ മുൻ പ്രസിഡന്‍റ് പി.കെ. ഗംഗാധരൻ, പഞ്ചായത്തംഗങ്ങളായ സി.എ. ആയിഷ ടീച്ചർ, അശോകൻ പുനത്തിൽ, ഇബ്രാഹീം ഹാജി പാറങ്ങോട്ടിൽ, വാർഡ്‌ വികസന സമിതി കൺവീനർ അബു മൗലവി അമ്പലക്കണ്ടി, പഞ്ചായത്ത്‌ അസിസ്റ്റന്‍റ് സെക്രട്ടറി പി. ബ്രജീഷ്‌ കുമാർ എന്നിവർ പ്രസംഗിച്ചു.

എൽഡിഎഫ് പ്രകടനം നടത്തി

താമരശേരി: പാചകവാതകത്തിനും പെട്രോളിയം ഉൽപന്നങ്ങൾക്കും വില കുത്തനെ വർധിപ്പിച്ച കേന്ദ്ര സർക്കാറിന്‍റെ പകൽകൊള്ളക്കെതിരേ എൽഡിഎഫ് കൊടുവള്ളി മുനിസിപ്പൽ കമ്മിറ്റിയുടെ നേതൃത്വത്തിൽ പ്രതിഷേധ പ്രകടനം നടത്തി. കെ. ഷറഫുദ്ദീൻ, ഒ. പുഷ്പൻ, കെ. സുരേന്ദ്രൻ, ഒ.ടി. സുലൈമാൻ, മാതോലത്ത് അബ്ദുള്ള, എം.പി. മൊയ്തീൻ, കെ. അസയിൻ, പി. ടി. അസൈൻകുട്ടി എന്നിവർ പ്രസംഗിച്ചു.

ഓട്ടോയും കാറും കൂട്ടിയിടിച്ചു

കൊയിലാണ്ടി: കൊയിലാണ്ടി പഴയകൃഷ്ണ തിയറ്ററിനു സമീപം ഓട്ടോയും കാറും കൂട്ടിയിടിച്ചു. ഇന്നലെ രാവിലെ പത്തരയോടെയാണ് അപകടം. ഓട്ടോ ഡ്രൈവർ കോതമംഗലം കണ്ടോത്ത് മീത്തൽ ശിവദാസന് പരിക്കേറ്റു. കൊയിലാണ്ടിയിൽ നിന്നും അഗ്നിരക്ഷാസേന എത്തി സേനയുടെ ആംബുലൻസിൽ താലൂക്ക് ആശുപത്രിയിൽ പ്രവേശിപ്പിച്ചു.

വിദ്യാർഥിനിയുടെ നഗ്നചിത്രം പ്രചരിപ്പിച്ച കേസിൽ ഒരാൾകൂടി അറസ്റ്റിൽ

തിരുവമ്പാടി: വിദ്യാർഥിനിയുടെ നഗ്നചിത്രം പ്രചരിപ്പിച്ച കേസിൽ ഒരാൾകൂടി അറസ്റ്റിൽ. തിരുവമ്പാടി ഗവ. ഐടിഐ വിദ്യാർഥി ആനക്കാംപൊയിൽ ഓലിയാങ്കൽ വീട്ടിൽ സഫിൻ ജോസഫിനെയാണ് (23) തിരുവമ്പാടി ഇൻസ്പെക്ടർ കെ. പ്രജീഷ് അറസ്റ്റുചെയ്തത്. കേസിൽ നേരത്തേ അത്‌ലറ്റിക് കോച്ച് ടോമി ചെറിയാൻ (59), സഹപരിശീലകനായിരുന്ന കെ.ആർ. സുജിത് (27) എന്നിവർ അറസ്റ്റിലായിരുന്നു. ടോമിക്ക് ചിത്രങ്ങൾ അയച്ചുകൊടുത്ത സുജിത്തിന് ചിത്രങ്ങൾ അയച്ചുകൊടുത്തത് പെൺകുട്ടിയുടെ സുഹൃത്തായിരുന്ന സഫിൻ ജോസഫാണെന്ന്‌ കണ്ടെത്തിയതിനെ തുടർന്നാണ് ഇയാളെയും അറസ്റ്റു ചെയ്തത്. പ്രതിയെ താമരശേരി ജുഡീഷൽ മജിസ്‌ട്രേറ്റ്‌ കോടതി റിമാൻഡ് ചെയ്തു.

ജില്ലയിലെ ആദ്യ പ്രീമിയം കഫേ കൊയിലാണ്ടിയിൽ തുടങ്ങി

കോഴിക്കോട്: കുടുംബശ്രീ ജില്ലാ മിഷന്‍റെ നേതൃത്വത്തിൽ ആരംഭിച്ച കുടുംബശ്രീ പ്രീമിയം കഫേ റസ്റ്റോറന്‍റ് മന്ത്രി എ.കെ. ശശീന്ദ്രൻ ഉദ്ഘാടനം ചെയ്തു. ജില്ലയിൽ കുടുബശ്രീ ആരംഭിക്കുന്ന ആദ്യത്തെ പ്രീമിയം കഫേയാണ് കൊയിലാണ്ടിയിലേത്. തനത് ഭക്ഷണ രീതിക്കൊപ്പം ജനങ്ങൾക്കിഷ്ടപ്പെട്ട രുചിയിൽ ഇഷ്ടപ്പെട്ട വിഭവങ്ങളും ലഭ്യമാക്കുകയാണ് പ്രീമിയം റസ്റ്റോറന്‍റ് വഴി ലക്ഷ്യമിടുന്നത്. കുടുംബശ്രീയുടെ സ്വന്തം ബ്രാൻഡ് പരിചയപ്പെടുത്തുകയെന്ന ലക്ഷ്യത്തോടെ സംസ്ഥാന സർക്കാരിന്‍റെ പിന്തുണയോടെയാണ് കഫേ കുടുംബശ്രീ റസ്റ്റോറന്‍റുകൾക്ക് തുടക്കം കുറിച്ചിരിക്കുന്നത്. കൊയിലാണ്ടി പുതിയ ബസ് സ്റ്റാന്‍ഡിന് എതിർവശത്തുള്ള പിഎംആർ കോംപ്ലക്സിലാണ് റസ്റ്റോറന്‍ഡ് പ്രവർത്തിക്കുന്നത്. രാവിലെ ഏഴ് മുതൽ രാത്രി 11 വരെ തുറന്ന് പ്രവർത്തിക്കും.

പെരുവണ്ണാമൂഴി ടൂറിസം ഫെസ്റ്റ് സ്വാഗത സംഘം ഓഫീസ് ഉദ്ഘാടനം ചെയ്തു

ചക്കിട്ടപാറ: പെരുവണ്ണാമൂഴി ടൂറിസം ഫെസ്റ്റും ചക്കിട്ടപാറ പഞ്ചായത്ത് ഭരണസമിതി നാലാം വാർഷികവും 15 മുതൽ 22 വരെ പെരുവണ്ണാമൂഴിയിൽ നടക്കും. ഇതിന്‍റെ സ്വാഗത സംഘം ഓഫീസ് പഞ്ചായത്ത് പ്രസിഡന്‍റ് കെ. സുനിൽ ഉദ്ഘാടനം ചെയ്തു. ജനറൽ കൺവീനർ ഇ.എം. ശ്രീജിത്ത്‌ അധ്യക്ഷത വഹിച്ചു. കെ.എ. ജോസ്കുട്ടി, പി.സി. സുരാജൻ, എ.ജി. ഭാസ്കരൻ, വി.വി. കുഞ്ഞിക്കണ്ണൻ, ആവള ഹമീദ്, ബോബി ഓസ്റ്റിൻ, ബിജു ചെറുവത്തൂർ, പി.പി. രഘുനാഥ്‌, പി.കെ. ഷിനിത്ത്, സൂരജ് മുതുകാട്, സെമിൻ ആസ്മിൻ എന്നിവർ സംബന്ധിച്ചു.

എംഡിഎംഎയുമായി രണ്ടുപേർ പോലീസ് പിടിയിൽ

കുറ്റ്യാടി: കടിയങ്ങാട് ടൗണിൽ എംഡിഎംഎയുമായി കുറ്റ്യാടി സ്വദേശികളായ യുവാക്കളെ പേരാമ്പ്ര പോലീസ് പിടികൂടി. തൂവോട്ട് പൊയിൽ അജ്നാസ് (33), മീത്തലെ നരിക്കോട്ടുകണ്ടി അൻസാർ (38) എന്നിവരാണ് അറസ്റ്റിലായത്. ഇവരിൽ നിന്നും രണ്ടു ഗ്രാം എംഡിഎംഎ പോലീസ് കണ്ടെടുത്തു. കുറ്റ്യാടിയിലെ ലഹരി വില്പന സംഘത്തിലെ പ്രധാനികളാണ് ഇവരെന്നു പോലീസ് പറഞ്ഞു. കടിയങ്ങാട്ടെ ലഹരി വിൽപനക്കാരനിൽ നിന്നും ലഹരിവസ്തു വാങ്ങാൻ പണം അയച്ചു കാത്ത് നിൽക്കുമ്പോൾ നാട്ടുകാർക്കു സംശയം തോന്നി പോലീസിൽ വിവരമറിക്കുകയായിരുന്നു. പേരാമ്പ്ര പോലീസ് ഇൻസ്പെക്ടർ പി. ജംഷീദിന്‍റെ നേതൃത്വത്തിൽ പോലീസും ഡിവൈഎസ്പിയുടെ കീഴിലുള്ള ഡാൻസഫ് സ്ക്വാഡും ചേർന്നാണ് പ്രതികളെ അറസ്റ്റ് ചെയ്തത്.

തൊഴിലുറപ്പ് പദ്ധതി; ഹാട്രിക്കടിച്ച് മണിയൂര്‍ പഞ്ചായത്ത്

കോഴിക്കോട്: തൊഴിലുറപ്പ് പദ്ധതിയില്‍ തുടര്‍ച്ചയായി മൂന്നാം തവണയും ജില്ലയില്‍ ഒന്നാമതായി മണിയൂര്‍ പഞ്ചായത്ത്. 2024-25 സാമ്പത്തിക വര്‍ഷത്തില്‍ മഹാത്മാഗാന്ധി ദേശീയ ഗ്രാമീണ തൊഴിലുറപ്പ് പദ്ധതി പ്രവര്‍ത്തനങ്ങള്‍ക്കാണ് മണിയൂര്‍ പഞ്ചായത്ത് ജില്ലയില്‍ ഒന്നാം സ്ഥാനം കരസ്ഥമാക്കിയത്. 13.71 കോടി രൂപ ചെലവഴിച്ച് 2500 കുടുംബങ്ങള്‍ക്ക് നൂറ് തൊഴില്‍ ദിനങ്ങള്‍ നല്‍കിയാണ് പഞ്ചായത്ത് ഈ നേട്ടത്തിന് അര്‍ഹമായത്. നൂറ് തൊഴില്‍ ദിനം നല്‍കിയതില്‍ സംസ്ഥാന തലത്തില്‍ അന്‍പതാം സ്ഥാനത്താണ് മണിയൂര്‍ പഞ്ചായത്ത്. 67 ഗ്രാമീണ റോഡുകള്‍, കോഴിക്കൂടുകള്‍, മലിനജല കുഴികള്‍, കംപോസ്റ്റ് കുഴികള്‍, തൊഴുത്തുകള്‍, ആട്ടിന്‍ കൂടുകള്‍, അസോള ടാങ്കുകള്‍, ഫാം പോണ്ടുകള്‍ എന്നിവയുടെ നിര്‍മാണവും 3,01,195 അവിദഗ്ദ്ധ തൊഴില്‍ ദിനങ്ങളുമാണ് തൊഴിലുറപ്പിന്‍റെ ഭാഗമായി പഞ്ചായത്ത് ഏറ്റെടുത്ത് നടത്തിയ പ്രധാന പ്രവൃത്തികള്‍.

ചുഴലിക്കാറ്റ് മുന്നൊരുക്കം: തയാറെടുപ്പുകള്‍ വിലയിരുത്തി മോക് ഡ്രില്‍

കോഴിക്കോട്: ദേശീയ ദുരന്ത നിവാരണ അഥോറിറ്റിയും കേരള സംസ്ഥാന ദുരന്ത നിവാരണ അഥോറിറ്റിയും സംയുക്തമായി ചുഴലിക്കാറ്റും അനുബന്ധ ദുരന്തങ്ങളുടെയും തയാറെടുപ്പുകള്‍ വിലയിരുത്തുന്നതിന് ബേപ്പൂര്‍ തുറമുഖം, ഫറോക്ക് ഐഒസിഎല്‍ എന്നിവിടങ്ങളില്‍ മോക്ഡ്രില്‍ സംഘടിപ്പിച്ചു. പൊതുസമൂഹവും ബന്ധപ്പെട്ട വകുപ്പുകളും ദുരന്തസമയത്ത് പ്രവര്‍ത്തിക്കേണ്ടത് എങ്ങനെയെന്ന് പഠിപ്പിക്കുകയായിരുന്നു പരിശീലനത്തിന്‍റെ പ്രധാന ഉദ്ദേശ്യം. സമയബന്ധിതവും ചിട്ടയായതുമായ മുന്നറിയിപ്പ് സംവിധാനം, വിവര വിനിമയം, മത്സ്യബന്ധന നിരോധനം, ആളുകളെ മാറ്റി പാര്‍പ്പിക്കല്‍, വാസ യോഗ്യമല്ലാത്ത വീടുകളില്‍ നിന്ന് സുരക്ഷിത വീടുകളിലേക്ക് മാറ്റുക, അപകട നിലയിലുള്ള മരങ്ങള്‍ മുറിച്ച് മാറ്റുക, ആവശ്യമായ ആരോഗ്യ പരിരക്ഷയും ചികിത്സയും ഉറപ്പാക്കുക, ഗുരുതരാവസ്ഥയിലും പരിക്കുകളുമുള്ള രോഗികള്‍ക്ക് തുടര്‍ ചികിത്സയും പരിശോധനയും നല്‍കുക, ദുര്‍ബലമായ മേല്‍ക്കൂരകള്‍, പരസ്യ ബോര്‍ഡുകള്‍, ഇലക്ട്രിക് പോസ്റ്റുകള്‍ തുടങ്ങിയവ ഉറപ്പിക്കുക, ദുരിതാശ്വാസ ക്യാമ്പുകളില്‍ മെഡിക്കല്‍ എയ്ഡ്, ഭക്ഷണ ക്രമീകരണങ്ങള്‍ ഉറപ്പാക്കുക തുടങ്ങിയ കാര്യങ്ങളാണ് പ്രധാനമായും പരിശോധിച്ചത്. കളക്ടറേറ്റില്‍ ജില്ലാ കളക്ടര്‍ സ്‌നേഹില്‍ കുമാര്‍ സിംഗിന്‍റെ അധ്യക്ഷതയില്‍ പ്രവര്‍ത്തിച്ച ജില്ലാ എമര്‍ജന്‍സി സെന്‍ററില്‍ ചുഴലിക്കാറ്റ് ദുരന്തവുമായി ബന്ധപ്പെട്ട വിവരങ്ങള്‍ തത്സമയം കൈമാറുകയും ഏകോപിപ്പിക്കുകയും ചെയ്തു.

കൂടുതൽ സുന്ദരിയാവാനൊരുങ്ങി മുക്കം; രണ്ടാം ഘട്ട സൗന്ദര്യവത്കരണ പ്രവൃത്തി ടെൻഡർ ചെയ്തു

മുക്കം: മലയോര മേഖലയുടെ ആസ്ഥാനമായ മുക്കം ടൗൺ പരിഷ്ക്കരണത്തിന്‍റെ രണ്ടാം ഘട്ടത്തിന് തുടക്കമാവുന്നു. 4.8 കോടി രൂപയുടെ പ്രവൃത്തി ടെണ്ടർ ചെയ്തു. ദിവസേന നൂറ് കണക്കിന് യാത്രക്കാർ വിവിധ ആവശ്യങ്ങൾക്കായി എത്തുന്ന മുക്കത്ത് രണ്ടാം ഘട്ട പ്രവൃത്തി പൂർത്തിയാവുന്നതോടെ കൂടുതൽ സൗകര്യങ്ങളും വർധിക്കും. രണ്ടാം ഘട്ട പരിഷ്ക്കരണത്തിന്‍റെ ഭാഗമായി തൃക്കുടമണ്ണ ക്ഷേത്രം റോഡ്, ഓർഫനേജ് റോഡ്, മുക്കം കടവ് പാലം റോഡ്, മാർക്കറ്റ് റോഡ്, ബൈപാസ് റോഡ്, പുതിയ സ്റ്റാൻഡ് റോഡ് എന്നിവ ഇന്‍റർലോക്ക് ചെയ്തു മനോഹരമാക്കും. ഇതോടെ മുക്കം ടൗണിന്‍റെ മുഖഛായ തന്നെ മാറും. മുക്കത്തെ ഏക പൊതു ഇടമായ എസ്കെ പാർക്ക് നവീകരിക്കുന്നതിനും ഡ്രൈനേജ്, ഫുട്പാത്ത് എന്നിവ സ്ഥാപിക്കുന്നതിനും വഴിവിളക്കുകൾ സ്ഥാപിക്കുന്നതിനും പദ്ധതിയുണ്ട്. ഒന്നാം ഘട്ടത്തിൽ അഭിലാഷ് ജംഗ്ഷൻ മുതൽ മുക്കം പാലം വരെ നാലു വരിപാതയാക്കി മാറ്റിയിരുന്നു. മിനി പാർക്ക്, ആലിൻ ചുവട്, പിസി റോഡ് എന്നിവയുടെ നിർമാണവും ലൈറ്റുകൾ, ഡ്രൈനേജ്, ഫുട്പാത്ത് എന്നിവയും യാഥാർഥ്യമാക്കിയിരുന്നു. രണ്ടാം ഘട്ടം കൂടി പൂർത്തിയാവുന്നതോടെ മുക്കം കൂടുതൽ സുന്ദരിയാവും.

അജ്ഞാത വാഹനം ഇടിച്ച് യാത്രക്കാർക്ക് പരിക്ക്

തിരുവമ്പാടി: ആനക്കാംപൊയിൽ അങ്ങാടിയിൽ ഇന്നലെ രാവിലെ നാലിന് കടയുടെ വരാന്തയിൽ ബസ് കാത്തുനിന്ന യാത്രക്കാരെ മുത്തപ്പൻ പുഴ ഭാഗത്തുനിന്ന് വന്ന അജ്ഞാതവാഹനം ഇടിച്ചു തെറിപ്പിച്ചു. അപകടത്തിൽ ആനക്കാംപൊയിൽ പാറുന്നേൽ ജോയ് (67), ഭാര്യ ഓമന (65) എന്നിവർക്ക് പരിക്കേറ്റു. ഇവരെ ഓമശേരി സ്വകാര്യ ആശുപത്രിയിൽ പ്രവേശിപ്പിച്ചു. ആനക്കാംപൊയിൽ താഴെ അങ്ങാടിയിൽ പ്രവർത്തിക്കുന്ന കിംഗ്സ് ബേക്കറിയുടെ ഒരു ഭാഗവും അപകടത്തിൽ തകർന്നു. ഇടിച്ചതിനുശേഷം വാഹനം നിർത്താതെ പോയി. സിസിടിവി ദൃശ്യങ്ങൾ പരിശോധിച്ച് വാഹനം കണ്ടെത്താനുള്ള ശ്രമത്തിലാണ് തിരുവന്പാടി പോലീസ്.

എംഡിഎംഎയുമായി അഞ്ച് യുവാക്കൾ പോലീസ് പിടിയിൽ; രണ്ട് വാഹനങ്ങൾ കസ്റ്റഡിയിൽ

നാദാപുരം: മേഖലയിൽ പോലീസും സ്പെഷൽ സ്ക്വാഡും നടത്തിയ പരിശോധനയിൽ നിരോധിത മയക്കുമരുന്നുമായി അഞ്ച് യുവാക്കൾ അറസ്റ്റിൽ. കോട്ടപ്പള്ളി സ്വദേശി മഠത്തിൽ കണ്ടി എം.കെ. മുഹമ്മദ് (29), ഒഞ്ചിയം സ്വദേശി പുതിയോട്ടും കണ്ടി നാവത്ത് പീടിക എൻ.പി. ഫർഷീദ് (39), കടമേരി സ്വദേശി പുതുക്കുടി വീട്ടിൽ കെ.സി. ജിജിൻ ലാൽ (31) എന്നിവരെ കടമേരിയിൽ നിന്നും വിഷ്ണുമംഗലം കിഴക്കെ പറമ്പത്ത് കെ.പി. റഹീസ് (27), കല്ലാച്ചിയിലെ ടാക്സി ഡ്രൈവർ വിഷ്ണുമംഗലം സ്വദേശി ചമ്പോട്ടുമ്മൽ കെ. മുഹമ്മദ് സായിദ് (27) എന്നിവരെ കല്ലാച്ചിയിൽ നിന്നുമാണ് നാദാപുരം എസ്ഐ എം.പി. വിഷ്ണു, നാദാപുരം ഡിവൈഎസ്പിയുടെ സ്ക്വാഡ് അംഗങ്ങളും ചേർന്ന് പിടികൂടിയത്. പ്രതികളിൽ നിന്ന് 0.09 ഗ്രാം എംഡിഎംഎ പോലീസ് പിട കൂടി. കടമേരിയിൽ വാഹന പരിശോധനക്കിടെ കെഎൽ 11 സി ബി 0647 നമ്പർ കാറിൽ നടത്തിയ പരിശോധനയിലാണ് മയക്ക് മരുന്ന് കണ്ടെത്തിയത്. കാർ പോലീസ് കസ്റ്റഡിയിലെടുത്തു. മുഹമ്മദ് സയിദിൽനിന്ന് 0.11 ഗ്രാം എംഡിഎംഎയും ഇയാൾ സഞ്ചരിച്ച കെഎൽ 18 എസി 8424 നമ്പർ സ്കൂട്ടറും പോലീസ് കസ്റ്റഡിയിൽ എടുത്തു. തെരുവൻ പറമ്പ് ഗവ. കോളജ് റോഡിൽ നിന്നാണ് റഹീസ് പിടിയിലായത്. പ്രതിയിൽനിന്ന് 0.05 ഗ്രാം എംഡിഎംഎ പോലീസ് പിടികൂടി.

നരിനടയിൽ ലഹരിക്കെതിരേ ജാഗ്രതാ സമിതി രൂപീകരിച്ചു

കൂരാച്ചുണ്ട്: ചക്കിട്ടപാറ പഞ്ചായത്ത് ഒൻമ്പതാം വാർഡ് നരിനട അങ്ങാടിയിലും മറ്റും പരസ്യമായി രാത്രികാലങ്ങളിൽ മദ്യം, മയക്കുമരുന്ന് തുടങ്ങിയ ലഹരിയുടെ വില്പനയും ഉപയോഗവും നടത്തുന്നതിനെതിരേ പ്രദേശത്ത് ജന ജാഗ്രതാ സമിതി രൂപീകരിച്ചു. വാർഡ് മെംബർ ബിന്ദു സജി അധ്യക്ഷത വഹിച്ചു. പെരുവണ്ണാമൂഴി പോലീസ് സബ് ഇൻസ്പെക്ടർ കെ. ജിതിൻവാസ് മുഖ്യാതിഥിയായിരുന്നു. എൻ.കെ സജി കൺവീനറായും വി.കെ ഗംഗാധരൻ, അയ്യപ്പൻ ചേലപ്പുറം, ബിന്ദു സുജൻ, സിന്ധു പൂവത്തിങ്കൽ, അഖിൽരാജ്, ഷൈജു കാപ്പുമ്മൽ, രാജൻ കറ്റോടി എന്നിവരടക്കുന്ന കമ്മിറ്റിക്ക് രൂപം നൽകി.

അശാസ്ത്രീയ സമീപനങ്ങൾക്കെതിരേ‌ ശക്തമായ നിയമ നടപടി: മന്ത്രി വീണാ ജോർജ്

കോഴിക്കോട്: പ്രസവുമുൾപ്പെടെയുള്ള ആരോഗ്യ സാഹചര്യങ്ങളിൽ അശാസ്ത്രീയവും തെറ്റായതുമായ സമീപനങ്ങൾ കൈകൊണ്ടാൽ കർശന നിയമ നടപടികൾ സ്വീകരിക്കുമെന്ന് മന്ത്രി വീണ ജോർജ് പറഞ്ഞു. കോഴിക്കോട് സ്ത്രീകളുടെയും കുട്ടികളുടെയും സർക്കാർ ആശുപത്രിയിൽ സ്ഥാപിച്ച ഓക്സിജൻ പ്ലാന്‍റ്, ലാക്റ്റേഷൻ മാനേജ്മെന്‍റ് യൂണിറ്റിന്‍റെ ഉദ്ഘാടനം നിർവഹിക്കുകയായിരുന്നു മന്ത്രി. പ്രസവത്തിലെ മാതൃമരണ നിരക്കിൽ ദേശീയ ശരാശരി 27 ആണ്. ഏതാനും വർഷങ്ങൾ കൊണ്ട് അത് ആറ് ആകണമെന്ന് ലോകാരോഗ്യ സംഘടന ആവശ്യപ്പെട്ടു കൊണ്ടിരിക്കുകയാണ്. ഈ ഘട്ടത്തിലും കേരളത്തിൽ 4.3 എന്ന അഭിമാന നേട്ടമാണ് സാധ്യമാക്കിയത്. ഇതിനെതിരേ നിലകൊള്ളുന്ന പിന്തിരിപ്പൻ നയങ്ങളെ ഗൗരവത്തിലെടുക്കും മന്ത്രി പറഞ്ഞു. ഇത്തരം പ്രവണതകളെ കുറ്റകൃത്യമായി തന്നെ കണക്കാക്കുമെന്നും ആ നിലയിലുള്ള നിയമ നടപടികൾ കൈക്കൊള്ളും. മലപ്പുറത്തെ സംഭവത്തിൽ മണിക്കൂറുകളോളം ചോര വാർന്ന് കിടന്നിട്ടും ആവശ്യമായ പരിരക്ഷ നിഷേധിച്ചത് മനപ്പൂർവമുള്ള നരഹത്യയായി കണക്കിലെടുക്കും. അമ്മയുടെയും കുഞ്ഞിന്‍റെയും ജീവൻ സംരക്ഷിക്കുക പരമപ്രധാനമാണെന്നും മന്ത്രി പറഞ്ഞു. അഹമ്മദ് ദേവർകോവിൽ എംഎൽഎ അധ്യക്ഷനായി.

അജ്ഞാതൻ വൈദ്യുതി കണക്ഷന്‍റെ ഫ്യൂസ് ഊരി; ഐസ്ക്രീമുകൾ അലിഞ്ഞു നശിച്ചു

മുക്കം: അജ്ഞാതൻ വൈദ്യുതി കണക്ഷന്‍റെ ഫ്യൂസ് ഊരിയതോടെ ഐസ്ക്രീം ഏജൻസിയിലെ ഐസ്ക്രീമുകൾ അലിഞ്ഞു നശിച്ചു . കാരശേരി പഞ്ചായത്തിലെ ആക്കോട്ട് ചാലിലെ ദിവ്യയുടെ ഉടമസ്ഥതയിലുള്ള മിറാക്കിൾ ഐസ്ക്രീം ഏജൻസിയിലാണ് വൈദ്യുതി കണക്ഷന്‍റെ ഫ്യൂസ് ഊരിയതോടെ ഐസ്ക്രീം അലിഞ്ഞു നശിച്ചത്. കഴിഞ്ഞ ദിവസം ദിവ്യ ഐസ്ക്രീം വിതരണത്തിനായി പുറത്ത് പോയി വൈകീട്ട് 6.45 ഓടെ കടയിൽ തിരിച്ചു വന്നപ്പോഴാണ് വൈദ്യുതി ഇല്ലാത്തത് കണ്ടത്. തുടർന്ന് നടത്തിയ പരിശോധനയിലാണ് ഐസ്ക്രീം കേടായതും വൈദ്യുതി മീറ്ററിന് അടുത്തുള്ള ഫ്യുസ് ഊരി വച്ചനിലയിലും കണ്ടെത്തിയത്. ഉടനെ കെഎസ്‌ഇബി അധികൃതരെ അറിയിച്ചെങ്കിലും ഉദ്യോഗസ്ഥർ ശനിയാഴ്ച രാവിലെ 11 ഓടെയാണ് എത്തി ഫ്യൂസ് പുനഃസ്ഥാപിച്ചത്. വെള്ളിയാഴ്ച രാത്രി മുഴുവനും ജനറേറ്ററിലാണ് ഐസ്ക്രീം സൂക്ഷിച്ച ഫ്രീസറുകൾ പ്രവർത്തിച്ചത്. 30,000 ത്തോളം രൂപയുടെ നഷ്ടം കണക്കാകുന്നുണ്ട്. ദിവ്യ മുക്കം പോലീസിലും പരാതി നൽകിയിട്ടുണ്ട്‌.

വിലങ്ങാട് ഉരുൾപൊട്ടൽ മേഖലയിലെ നിർമാണ പ്രവൃത്തികൾക്ക് നിയന്ത്രണം: ആശങ്കയകറ്റണമെന്ന് സിപിഎം

നാദാപുരം: വിലങ്ങാട് ഉരുൾപൊട്ടൽ ദുരന്തമുണ്ടായ 9,10,11 വാർഡുകളിലെ നിർമാണ പ്രവൃത്തികൾക്ക് നിയന്ത്രണമേർപ്പെടുത്തണമെന്ന ജില്ലാ കളക്ടറുടെ വാക്കാലുള്ള നിർദ്ദേശം പുനഃപരിശോധിക്കണമെന്നും ജനങ്ങളുടെ ആശങ്കയകറ്റണമെന്നും സിപിഎം വിലങ്ങാട് ലോക്കൽ കമ്മിറ്റി ആവശ്യപ്പെട്ടു. കഴിഞ്ഞ ദിവസം കളക്ടറേറ്റിൽ ചേർന്ന അവലോകന യോഗത്തിലാണ് ദുരന്തമേഖലയിൽ നിർമാണ പ്രവർത്തനങ്ങൾക്ക് നിയന്ത്രണമേർപ്പെടുത്തണമെന്ന നിർദ്ദേശം മുന്നോട്ട് വച്ചത്. എന്നാൽ ഇത് സംബന്ധിച്ച ഉത്തരവൊന്നും പുറപ്പെടുവിച്ചിട്ടില്ലെങ്കിലും വാണിമേൽ പഞ്ചായത്ത് ഉൾപെടെ നിർമാണ പ്രവർത്തനങ്ങൾക്ക് നിയന്ത്രണമേർപ്പെടുത്തിയതായി ശ്രദ്ധയിൽ പെട്ടിട്ടുണ്ട്. ഉരുൾപൊട്ടൽ ദുരന്ത സാധ്യതയില്ലാത്ത ഈ മേഖലയിലെ മൂന്ന് വാർഡുകളിലെ എല്ലാ പ്രദേശങ്ങളിലും വീട് നിർമാണമുൾപ്പെടെയുള്ള നിർമാണ പ്രവർത്തനങ്ങൾക്കും പെർമിറ്റ് അനുവദിക്കുന്നതിനും മറ്റ് വികസന പ്രവർത്തനങ്ങൾക്കും ഈ നിർദ്ദേശം തടസമാകരുത്. ഇക്കാര്യത്തിൽ ജനങ്ങളുടെ ആശങ്കയകറ്റാൻ പഞ്ചായത്തും ജില്ലാ ഭരണകൂടവും തയാറാകണമെന്ന് സിപിഎം വിലങ്ങാട് ലോക്കൽ കമ്മിറ്റി ആവശ്യപ്പെട്ടു. യോഗം ഏരിയാ സെക്രട്ടറി എ. മോഹൻദാസ് ഉദ്ഘാടനം ചെയ്തു. കെ.പി. രാജീവൻ അധ്യക്ഷത വഹിച്ചു.

എംഡിഎംഎയുമായി മൂന്ന് യുവാക്കൾ പിടിയിൽ

കോഴിക്കോട്: വലിയങ്ങാടി ഭാഗത്ത് വിൽപനയ്ക്കായി കൊണ്ടുവന്ന എംഡിഎംഎയുമായി മൂന്ന് പേർ പിടിയിൽ. ബേപ്പൂർ പെരച്ചനങ്ങാടി സ്വദേശി അദീപ് മഹലിൽ അദീപ് മുഹമദ്ദ് സാലി ( 36 ) അരക്കിണർ സ്വദേശി മാത്തോട്ടം വലിയകത്ത് ഹൗസിൽ സർജിത്ത് (34), പയ്യാനക്കൽ സ്വദേശി കുറ്റിക്കാട് നിലം പറമ്പ് ഷിഫാസ് ഹൗസിൽ മുഹമദ്ദ് നഹൽ (30) എന്നിവരെ കോഴിക്കോട് സിറ്റി നാർക്കോട്ടിക് സെൽ അസിസ്റ്റന്‍റ് കമ്മീഷണർ കെ.എ. ബോസിന്‍റെ നേതൃത്വത്തിലുള്ള ഡാൻസാഫ് ടീമും ടൗൺ എസ്ഐ സുലൈമാന്‍റെ നേതൃത്വത്തിലുള്ള ടൗൺ പോലീസും ചേർന്ന് പിടികൂടി. വിഷു, ഈസ്റ്റർ ആഘോഷങ്ങളുടെ ഭാഗമായി ബീച്ച് ഭാഗങ്ങൾ കേന്ദ്രീകരിച്ച് ലഹരി മാഫിയ പ്രവർത്തിക്കുന്നുണ്ടെന്ന വിവരത്തിൽ നടത്തിയ പരിശോധനയിലാണ് കാറിൽ വിൽപനയ്ക്കായി കൊണ്ടുവന്ന 41 ഗ്രാം എംഡിഎംഎ പിടികൂടിയത്. പിടികൂടിയ അദീപിന് മുമ്പ് കുന്നമംഗലം, മെഡിക്കൽ കോളജ് സ്റ്റേഷനിൽ മോഷണ കേസുണ്ട്.

സജീവമായി വിഷു വിപണി

കോഴിക്കോട്: വിഷു അടുത്തെത്തിയതോടെ വിപണിയും സജീവമായി. പച്ചക്കറി വിപണിയും പടക്കവിപണിയും ഇന്നലെ മുതല്‍ തിരക്കിലമര്‍ന്നു. പൊതുവേ കഴിഞ്ഞ ദിവസങ്ങളിലെല്ലാം അനുഭവപ്പെട്ട ഗതാഗത കുരുക്ക് ഇന്നലെയും തുടര്‍ന്നു. അടുത്ത ദിവസങ്ങളില്‍ തിരക്ക് കൂടുമെന്നുറപ്പാണ്. ഇത്തവണ വഴിയോര കച്ചവടക്കാരുടെ എണ്ണത്തില്‍ കുറവുണ്ടെങ്കിലും ഉള്ളിടത്ത് തിരക്കുണ്ട്. പാളയത്ത് പച്ചക്കറി കടകളിലും വസ്ത്ര വ്യാപാര കടകളിലും അടുത്ത ദിവസങ്ങളില്‍ വില്‍പ്പന പൊടിപൊടിക്കും. കണിവെള്ളരിയാണ് വിഷു ആഘോഷങ്ങളില്‍ സൂപ്പര്‍ സ്റ്റാര്‍. വേനൽമഴ ഉണ്ടെങ്കിലും ഇത്തവണത്തെ വിഷുവിനെ വലിയ പ്രതീക്ഷയോടെയാണ് വ്യാപാരി സമൂഹം കാണുന്നത്. ചെറിയ പെരുന്നാൾ കഴിഞ്ഞ് രണ്ടാഴ്ചയ്ക്കകം തന്നെ എത്തുന്ന വിഷു ആഘോഷം വിപണിയെ സജീവമാക്കി.വാഹന വിപണിയും ഇലക്ട്രോണിക്സ് വിപണിയും സജീവമായിട്ടുണ്ടെന്നാണ് വ്യാപാരികൾ പറയുന്നത്. ഓണം വിപണിയെ പോലെ തന്നെ വലിയ ഓഫറുകളുമായി ഇലക്ട്രോണിക്സ്, ഓട്ടമൊബീൽ മേഖലകൾ വിഷു വിപണിയെ വരവേൽക്കാൻ എത്തിയിട്ടുണ്ട്. ടെക്സ്റ്റൈൽ വിപണിയും പടക്ക വിപണിയും ഉണർന്നു കഴിഞ്ഞു. പടക്ക വിപണിയിലേക്ക് ശിവകാശി പടക്കങ്ങൾ തിരിച്ചെത്തിയെന്ന പ്രത്യേകത കൂടിയുണ്ട് ഈ വിഷുവിന്. ചൈനീസ് പടക്കങ്ങളും സജീവമാണ്. പടക്കങ്ങൾക്ക് വില കൂടിയിട്ടുണ്ട്.

Deepika.com

The Largest Read Malayalam Internet Daily

Quick Links

Rashtra Deepika LTD

Deepika.com

The Largest Read Malayalam Internet Daily

Local News

Quick Links

Rashtra Deepika LTD