കള്ളപ്പണക്കേസിൽ ഹേമന്ത് സോറനു ജാമ്യം : Deepika.com National News |

Click here for detailed news of all items

കള്ളപ്പണക്കേസിൽ ഹേമന്ത് സോറനു ജാമ്യം

Saturday, June 29, 2024 1:34 AM IST

റാഞ്ചി: ഭൂമിയിടപാടുമായി ബന്ധപ്പെട്ട കള്ളപ്പണക്കേസിൽ മുൻ ജാർഖണ്ഡ് മുഖ്യമന്ത്രി ഹേമന്ത് സോറനു ജാർഖണ്ഡ് ഹൈക്കോടതി ജാമ്യം അനുവദിച്ചു. ഇദ്ദേഹം ഇന്നലെ വൈകുന്നേരം നാലോടെ ബിർസ മുണ്ട ജയിലിൽനിന്നു മോചിതനായി. അറസ്റ്റിലായി അഞ്ചു മാസത്തിനുശേഷമാണ് സോറനു ജാമ്യം കിട്ടിയത്.

ജനുവരി 31നാണ് ഹേമന്ത് സോറനെ എൻഫോഴ്സ്മെന്‍റ് ഡയറക്ടറേറ്റ്(ഇഡി) അറസ്റ്റ് ചെയ്തത്. അറസ്റ്റ് രേഖപ്പെടുത്തുന്നതിനു തൊട്ടു മുന്പ് ഇദ്ദേഹം മുഖ്യമന്ത്രിസ്ഥാനം രാജിവച്ചു. നിയമവിരുദ്ധമായി 8.36 കോടി രൂപയുടെ ഭൂമി കൈക്കലാക്കിയെന്നാണു സോറനെതിരേയുള്ള കേസ്.

ഹേമന്ത് സോറനെ കേസിൽ കുടുക്കിയതാണെന്ന്, സോറനു വേണ്ടി ഹാജരായ അഭിഭാഷകരായ മീനാക്ഷി അറോറയും കപിൽ സിബലും വാദിച്ചു. സോറനു ജാമ്യം നല്കരുതെന്ന് ഇഡി അഭിഭാഷകൻ ആവശ്യപ്പെട്ടു.

ഹേമന്ത് സോറന്‍റെ അറസ്റ്റ് രാഷ്‌ട്രീയ പകപോക്കലാണെന്ന് ഇന്ത്യ മുന്നണി നേതാക്കൾ ആരോപിച്ചിരുന്നു. സത്യത്തിന്‍റെ വിജയമെന്നാണു ഹേമന്ത് സോറന്‍റെ ജാമ്യത്തെ ജാർഖണ്ഡ് മുഖ്യമന്ത്രി ചംപയ് സോറൻ വിശേഷിപ്പിച്ചത്.

ഹേമന്തിന്‍റെ ഭാര്യയും ജെഎംഎം എംഎൽഎയുമായ കൽപ്പന സോറൻ ജുഡീഷറിക്കു നന്ദി രേഖപ്പെടുത്തി. ജെഎംഎം, കോൺഗ്രസ് പ്രവർത്തകർ സംസ്ഥാനത്ത് വിവിധയിടങ്ങളിൽ മധുരപലഹാരം വിതരണം ചെയ്തു.ജാർഖണ്ഡ് നിയമസഭാ തെരഞ്ഞെടുപ്പിനു മാസങ്ങൾ മാത്രം ശേഷിക്കേ സോറനു ജാമ്യം കിട്ടിയത് ജെഎംഎം-കോൺഗ്രസ് സഖ്യത്തിനു കരുത്തു പകരും.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.