ഇന്‍റർസ്കൂൾ ബാസ്കറ്റ്ബോൾ ടൂർണമെന്‍റ് നാളെ മുതൽ
Thursday, January 30, 2025 1:27 AM IST
തിരുവനന്തപുരം: തിരുവല്ലം ക്രൈസ്റ്റ് നഗർ സീനിയർ സെക്കൻഡറി സ്കൂളിന്‍റെ ആഭിമുഖ്യത്തിൽ പ്രഥമ ഫാ. തോമസ് വെന്പാല സിഎംഐ മെമ്മോറിയൽ ഇന്‍റർസ്കൂൾ ബാസ്കറ്റ്ബോൾ ടൂർണമെന്‍റ് ക്രൈസ്റ്റ് നഗർ തിരുവല്ലം ബാസ്കറ്റ്ബോൾ കോർട്ടിൽ വെള്ളി, ശനി ദിവസങ്ങളിൽ നടക്കും. അന്താരാഷ്‌ട്ര ബാസ്കറ്റ് ബോൾ താരം അനീഷ ക്ലീറ്റസ് ഉദ്ഘാടനം ചെയ്യും.
നോക്കൗട്ട് അടിസ്ഥാനത്തിൽ നടക്കുന്ന ദ്വിദിന ടൂർണമെന്‍റിൽ സെന്‍റ് എഫ്രേംസ് എച്ച്എസ്എസ് മാന്നാനം, സെന്‍റ് ജോസഫ്സ് എച്ച്എസ്എസ് പുളിങ്കുന്ന്, ഗിരിദീപം ബഥനി കോട്ടയം, സെന്‍റ് ജോസഫ്സ് എച്ച്എസ്എസ് തിരുവനന്തപുരം ഉൾപ്പെടെ എട്ടു ടീമുകൾ മാറ്റുരയ്ക്കും.
ഉദ്ഘാടന ദിവസം സെന്‍റ് എഫ്രേംസ് എച്ച്എസ്എസ് മാന്നാനം സെന്‍റ് ജോണ്സ് എച്ച്എസ്എസ് നാലാഞ്ചിറയുമായും സെന്‍റ് ജോസഫ്സ് എച്ച്എസ്എസ് പുളിങ്കുന്ന് ഭാരതീയ വിദ്യാഭവൻ കൊടുങ്ങന്നൂരുമായും തിരുവനന്തപുരം സെന്‍റ് ജോസഫ്സ് എച്ച്എസ്എസ് കാട്ടാക്കട വിശ്വദീപ്തി ഇംഗ്ലീഷ് മീഡിയം സ്കൂളുമായും ഗിരിദീപം ബഥനി തിരുവനന്തപുരം ഗവ. മോഡൽ എച്ച്എസ്എസുമായും മത്സരിക്കും.