ഇന്ത്യ x ഇംഗ്ലണ്ട് മൂന്നാം ട്വന്‍റി-20 ഇന്ന്
Tuesday, January 28, 2025 1:32 AM IST
രാജ്കോട്ട്: ഇംഗ്ലണ്ടിനെതിരായ ട്വന്‍റി-20 ക്രിക്കറ്റ് പരന്പരയുടെ രാജകീയ കോട്ട് ധരിക്കാൻ ഇന്ത്യൻ ടീം ഇന്നു കളത്തിൽ. പരന്പരയിലെ മൂന്നാം മത്സരം ഇന്നു രാത്രി ഏഴിന് രാജ്കോട്ടിൽ അരങ്ങേറും.
ആദ്യ രണ്ടു മത്സരങ്ങളിലും ജയിച്ച ഇന്ത്യ പരന്പര സ്വന്തമാക്കാനുള്ള തയാറെടുപ്പിലാണ്. അതേസമയം, പരന്പര സജീവമാക്കി നിർത്താൻ ഇംഗ്ലണ്ടിന് ഇന്നു ജയിച്ചേ മതിയാകൂ.
ബ്രണ്ടൻ മക്കല്ലത്തിന്‍റെ ശിക്ഷണത്തിലെ ആദ്യ ട്വന്‍റി-20 പരന്പര കൈവിടുന്ന വക്കിലാണ് ജോസ് ബട്‌ലർ നയിക്കുന്ന ഇംഗ്ലണ്ട്. മറുവശത്ത് സൂര്യകുമാർ യാദവിന്‍റെ നേതൃത്വത്തിൽ മറ്റൊരു പരന്പര നേട്ടത്തിലേക്കുള്ള കുതിപ്പിലാണ് നീലപ്പട.
തിലക് വർമയുടെ ഒറ്റയാൾ പോരാട്ടത്തിലൂടെ രണ്ടാം ട്വന്‍റി-20 ജയിച്ച ഇന്ത്യ ആത്മവിശ്വാസത്തിലാണ്. ചെന്നൈയിൽ നടന്ന രണ്ടാം ട്വന്‍റി-20ക്ക് ഇറങ്ങിയ പ്ലേയിംഗ് ഇലവനെ നിലനിർത്തിയാണ് ഇംഗ്ലണ്ട് ഇറങ്ങുന്നത്.