എല്‍ഐസി ഏജന്‍റുമാരുടെ ധര്‍ണ ഇന്ന്
Wednesday, November 20, 2024 12:53 AM IST
കൊച്ചി: എല്‍ഐസിയില്‍ പഴയ പോളിസികള്‍ പിന്‍വലിച്ച് റീഫയലിംഗ് നടത്തി പുതിയ പദ്ധതികള്‍ നടപ്പാക്കിയതിനെത്തുടര്‍ന്ന് ഏജന്‍റുമാരടക്കം നേരിടുന്ന പ്രശ്‌നങ്ങള്‍ പരിഹരിക്കണമെന്നാവശ്യപ്പെട്ട് ഓള്‍ ഇന്ത്യ എല്‍ഐസി ഏജന്‍റ്സ് ഫെഡറേഷന്‍ എറണാകുളം ഡിവിഷന്‍ തലത്തില്‍ ഇന്നു ധര്‍ണ നടത്തും.
ഫെഡറേഷന്‍ രാജ്യവ്യാപകമായി നടത്തുന്ന സമരങ്ങളുടെ തുടര്‍ച്ചയായാണു ധര്‍ണ സംഘടിപ്പിക്കുന്നതെന്ന് ദേശീയ സെക്രട്ടറി പി.അനില്‍കുമാര്‍, ഡിവിഷന്‍ പ്രസിഡന്‍റ് ടി.ഡി. സെല്‍വന്‍ എന്നിവര്‍ വാര്‍ത്താസമ്മേളനത്തില്‍ പറഞ്ഞു.
എറണാകുളം രാജാജി റോഡില്‍നിന്ന് ഇന്നു രാവിലെ 9.30 ന് പ്രകടനമായി എത്തിച്ചേര്‍ന്ന് എല്‍ഐസി ഡിവിഷന്‍ ഓഫീസിനു മുന്നില്‍ നടക്കുന്ന ധര്‍ണ ബെന്നി ബെഹനാന്‍ എംപി ഉദ്ഘാടനം ചെയ്യും.
പത്രസമ്മേളനത്തില്‍ ജനറല്‍ സെക്രട്ടറി വിനയ് തിലക്, ട്രഷറര്‍ ജോസ് ആന്‍ഡ്രൂസ്, വി.എന്‍. പുരുഷോത്തമന്‍ എന്നിവരും പങ്കെടുത്തു.