ADVERTISEMENT

ADVERTISEMENT

വീടിന്‍റെ ശിലാസ്ഥാപനം

മൂവാറ്റുപുഴ: കാരക്കുന്നം ഫാത്തിമ മാതാ എൽപി സ്കൂളിന്‍റെ പ്ലാറ്റിനം ജൂബിലിയുടെ ഭാഗമായി നിർമിച്ചു നൽകുന്ന സ്നേഹ വീടിന്‍റെ ശിലാസ്ഥാപനം സ്കൂൾ മാനേജർ ഫാ. ജോർജ് വള്ളോംകുന്നേൽ നിർവഹിച്ചു.

വാർഡ് അംഗം പ്രവീണ ഹരീഷ്, പ്രധാനാധ്യാപകൻ വിൻസെന്‍റ് ജോസഫ്, പ്ലാറ്റിനം ജൂബിലി കമ്മിറ്റി കൺവീനർ ജിന്‍റോ സെബാസ്റ്റ്യൻ, പി.വി. അരുൺ, ജിൻസി സോണി, ജിൻസ് ആന്‍റണി, ജോസ് കാവുംപുറം, പി. വിനീത, റമ്മി മാണിച്ചൻ, ജയ്മി മാത്യു, നിൻസി പി. ജോളി, എൽന എൽദോസ്, വി.കെ. ലൈല തുടങ്ങിയവർ പ്രസംഗിച്ചു.

ADVERTISEMENT

അനധികൃതമായി കടത്താൻ ശ്രമിച്ച സിഗരറ്റും ഐ ഫോണുകളും പിടികൂടി

നെടുമ്പാശേരി: വിദേശത്തുനിന്ന് അനധികൃതമായി കടത്താൻ ശ്രമിച്ച സിഗരറ്റ്, ഐ ഫോൺ, സ്വർണം എന്നിവ കൊച്ചി രാജ്യാന്തര വിമാനത്താവളത്തിൽ പിടികൂടി. രണ്ട് യാത്രക്കാരിൽ നിന്നായി പിടിച്ചെടുത്ത സാമഗ്രികൾക്ക് 25.44 ലക്ഷം രൂപ വില വരും. ഇന്നലെ എയർഇന്ത്യ എക്‌സ്പ്രസ് വിമാനത്തിൽ അബുദാബിയിൽ നിന്നെത്തിയ കോഴിക്കോട് സ്വദേശികളായ ഫസൽ റഹ്മാൻ, നാസർ എന്നിവരിൽ നിന്നാണ് കസ്റ്റംസ് പരിശോധനയിൽ സിഗരറ്റും മറ്റും പിടികൂടിയത്. ഇരുവരും ബാഗേജിൽ ഒളിപ്പിച്ചാണ് സിഗരറ്റും ഐ ഫോണുകളുമൊക്കെ കടത്തികൊണ്ടുവന്നത്. ഫസർ റഹ്മാന്‍റെ പക്കൽ സിഗരറ്റിനോടൊപ്പം 13 ഐ ഫോണുകളും രണ്ട് സ്വർണനാണയങ്ങളുമുണ്ടായിരുന്നു. നാസറിന്‍റെ പക്കൽ സിഗരറ്റ് കൂടാതെ ആറ് ഐ ഫോണുകളാണുണ്ടായിരുന്നത്.

പശ്ചിമബംഗാള്‍ സ്വദേശികള്‍ കഞ്ചാവുമായി അറസ്റ്റില്‍

കൊച്ചി: വിതരണക്കാര്‍ക്കായി ഒഡീഷയില്‍ നിന്നും കഞ്ചാവ് എത്തിച്ച രണ്ട് ഇതരസംസ്ഥാനക്കാര്‍ പിടിയില്‍. വെസ്റ്റ് ബംഗാള്‍ സ്വദേശികളായ അഫ്‌സല്‍ ഹുസൈന്‍ (24), റോണി സേഖ്(19) എന്നിവരെ ഡാന്‍സാഫ് സംഘമാണ് അറസ്റ്റ് ചെയ്തത്. ഇവരുടെ പക്കല്‍നിന്നും 16.678 കിലോ കഞ്ചാവ് പിടിച്ചെടുത്തു. രണ്ട് ട്രാവല്‍ ബാഗുകളിലായി കുത്തിനിറച്ച നിലയിലായിരുന്നു കഞ്ചാവ് ഒളിപ്പിച്ചിരുന്നത്. വെസ്റ്റ് ബംഗാള്‍ നിന്നും വരികയായിരുന്ന പ്രതികള്‍ ഒഡീഷയില്‍ നിന്നും കഞ്ചാവെടുത്തു അങ്കമാലിയില്‍ എത്തിച്ചു അവിടെ നിന്നും എലൂര്‍ ഫാക്ട് ഭാഗത്തേക്ക് എത്തിക്കുന്നതിനിടെയാണ് പിടിയിലായത്. കഞ്ചാവ് കടത്തികൊണ്ടുവന്നു എലൂര്‍, കളമശേരി, ഫോര്‍ട്ട്‌കൊച്ചി, എറണാകുളം നോര്‍ത്ത് ഭാഗങ്ങളില്‍ വിതരണക്കാര്‍ക്ക് കൊടുക്കുകയാണ് പ്രതികള്‍ ചെയ്തിരുന്നത്. കഞ്ചാവിന്‍റെ ഉറവിടത്തെക്കുറിച്ചടക്കം പോലീസ് അന്വേഷണം ആരംഭിച്ചു.

കടമക്കുടിയിലെ കുടിവെള്ള വിതരണം പൂര്‍ണതോതിലാകാന്‍ വൈകും

കൊച്ചി: കടമക്കുടി പഞ്ചായത്തില്‍ വാട്ടര്‍ അഥോറിറ്റിയുടെ പൈപ്പ് പുഴയില്‍ പൊട്ടിയതിനെ തുടര്‍ന്ന് കോതാട്, മൂലമ്പിള്ളി ഭാഗങ്ങളില്‍ ഉണ്ടായ കുടിവെള്ള ക്ഷാമം പൂര്‍ണതോതില്‍ പരിഹരിക്കാന്‍ സമയമെടുക്കും. ജലവിതരണം സാധാരണ നിലയിലാകാന്‍ ഏതാനും ദിവസങ്ങള്‍ കൂടി എടുക്കുമെന്ന് അധികൃതര്‍ വ്യക്തമാക്കി. അറ്റകുറ്റപ്പണികള്‍ പുരോഗമിക്കുകയാണ്. കുടിവെള്ള ക്ഷാമത്തില്‍ കുറവ് വന്നിട്ടുള്ളതായി ഉദ്യോഗസ്ഥര്‍ വ്യക്തമാക്കി. ദുഷ്‌കരമായ ജോലിയാണ് നടക്കുന്നത്. അതിനടെ കുടിവെള്ള ക്ഷാമത്തിന്‍റെ സ്ഥിതി നേരിട്ടറിയാന്‍ കെ.എന്‍. ഉണ്ണിക്കൃഷ്ണന്‍ എംഎല്‍എ സ്ഥലം സന്ദര്‍ശിച്ചു. പ്രദേശത്ത് ക്യാമ്പ് ചെയ്തു പൈപ്പിന്‍റെ അറ്റകുറ്റപ്പണികള്‍ക്കു നേതൃത്വം നല്‍കുന്ന വാട്ടര്‍ അഥോറിറ്റി ജീവനക്കാരെ കണ്ട് വിവരങ്ങള്‍ തിരക്കി. വിഷയത്തില്‍ ജലവിഭവമന്ത്രിക്കു എംഎല്‍എ നേരിട്ടു നിവേദനം നല്‍കുകയും വാട്ടര്‍ അഥോറിറ്റി എംഡിയുമായി സംസാരിക്കുകയും ചെയ്തിരുന്നു. ഡെപ്യൂട്ടി എക്‌സിക്യൂട്ടീവ് എന്‍ജിനീയര്‍ അനില്‍ ആഗസ്റ്റിന്‍, അസിസ്റ്റന്‍റ് എക്‌സിക്യൂട്ടീവ് എന്‍ജിനീയര്‍ നീതു മോഹന്‍, അസിസ്റ്റന്‍റ് എന്‍ജിനീയര്‍ കെ.എസ്. ഉത്തര, എം. രാജീവ്, കെ.എം. വൈഷ്ണ എന്നിവരുടെ നേതൃത്വത്തിലാണ് അറ്റകുറ്റപ്പണികള്‍ പുരോഗമിക്കുന്നത്.

ആരോഗ്യരംഗത്തെ കെടുകാര്യസ്ഥത കോണ്‍ഗ്രസ് ധര്‍ണ നാളെ

കൊച്ചി: സംസ്ഥാനത്തെ ആരോഗ്യമേഖല വെന്‍ററിലേറ്ററിലാണെന്ന മെഡിക്കൽ കോളജ് ഡോക്ടറുടെ വെളിപ്പെടുത്തലിന് പിന്നാലെ സര്‍ക്കാരിന്‍റെ ആരോഗ്യരംഗത്തോടുള്ള കെടുകാര്യസ്ഥതയ്‌ക്കെതിരെ ജില്ലാ കോണ്‍ഗ്രസ് കമ്മിറ്റി മെഡിക്കല്‍ കോളജിനു മുന്നില്‍ നാളെ ധര്‍ണ നടത്തും. രാവിലെ 10.30ന് കളമശേരി മെഡിക്കല്‍ കോളജിന് മുന്നില്‍ പ്രതിപക്ഷ നേതാവ് വി.ഡി. സതീശന്‍ ധര്‍ണ ഉദ്ഘാടനം ചെയ്യും. സംസ്ഥാന വ്യാപകമായി കോണ്‍ഗ്രസ് പ്രതിഷേധത്തിന്‍റെ ഭാഗാമായാണ് ധര്‍ണയെന്ന് ഡിസിസി അധ്യക്ഷന്‍ മുഹമ്മദ് ഷിയാസ് അറിയിച്ചു.

ഡിജെ പാര്‍ട്ടിക്കിടെ കടന്നുപിടിച്ച യുവാവിനെ യുവതി വൈന്‍ ഗ്ലാസ് കൊണ്ട് അടിച്ച് പരിക്കേല്‍പ്പിച്ചു

കേസെടുത്ത് പോലീസും എക്‌സൈസും കൊച്ചി: ഡിജെ പാര്‍ട്ടിക്കിടെ കടന്നുപിടിച്ച യുവാവിനെ യുവതി വൈന്‍ ഗ്ലാസ് കൊണ്ട് അടിച്ച് പരിക്കേല്‍പ്പിച്ചു. ശനിയാഴ്ച രാത്രി 10.30ഓടെ കതൃക്കടവിലെ മില്ലേനിയല്‍സ് (ഇടശേരി) ബാറില്‍ ആയിരുന്നു സംഭവം. സംഭവത്തില്‍ എറണാകുളം നോര്‍ത്ത് പോലീസ് രണ്ട് കേസുകള്‍ രജിസ്റ്റര്‍ ചെയ്തു. ഇതിനുപുറമേ ബാര്‍ ഉടമയ്‌ക്കെതിരെ എക്‌സൈസും കേസ് എടുത്തു. സംഭവത്തില്‍ എറണാകുളത്ത് ജോലി ചെയ്യുന്ന ഉദയംപേരൂര്‍ സ്വദേശിനിയായ 29കാരിക്കെതിരെയാണ് പോലീസിന്‍റെ ആദ്യകേസ്. ലൈംഗിക ഉദ്ദേശത്തോടെ ഇവരെ കടന്നുപിടിച്ചതിന് ഇടുക്കി തൊടുപുഴ സ്വദേശിക്കെതിരെയാണ് രണ്ടാമത്തെ കേസ്. ആദ്യ കേസില്‍ യുവതിയുടെ അറസ്റ്റ് രേഖപ്പെടുത്തി ജാമ്യത്തില്‍ വിട്ടു. യുവാവിന്‍റെ അറസ്റ്റ് ഇതുവരെ രേഖപ്പെടുത്തിയിട്ടില്ല. ഉദയംപേരൂര്‍ സ്വദേശിനിയും സുഹൃത്തുക്കളും തൊടുപുഴ സ്വദേശിയായ യുവാവിന്‍റെ സുഹൃത്തുക്കളുടെ സംഘവുമാണ് ഡിജെ പാര്‍ട്ടിക്ക് എത്തിയത്. പരിപാടിക്കിടെ യുവാവ് യുവതിയോട് മോശമായി പെരുമാറി. ഒരു തവണ താക്കീത് ചെയ്‌തെങ്കിലും ദുരുദ്ദേശത്തോടെ വീണ്ടും കടന്നുപിടിച്ചതോടെ യുവതി വൈന്‍ ഗ്ലാസ് കൊണ്ട് അടിക്കുകയായിരുന്നു. ഇതോടെ ഡിജെ പാർട്ടി നിർത്തിവച്ചു. പരിക്കേറ്റ യുവാവിനെ ഉടന്‍ ആശുപത്രിയിലേക്ക് മാറ്റി. യുവാവിന്‍റെ ചെവിക്ക് പിന്നിലാണ് അടിയേറ്റത്. പ്രാഥമിക ചികിത്സതേടിയ ഇയാള്‍ ആശുപത്രിവിട്ടു. ഇരുവരെയും ഇന്നലെ സ്റ്റേഷനിലേക്ക് വിളിച്ചുവരുത്തി മൊഴി രേഖപ്പെടുത്തിയ ശേഷമാണ് തൊടുപുഴ സ്വദേശിക്കെതിരെ കേസ് എടുത്ത്. ഇതിനിടെ സിസിടിവി ദൃശ്യം പരിശോധിച്ച പോലീസ് യുവതിയുടെ മൊഴിയില്‍ കഴമ്പുണ്ടെന്ന് കണ്ടെത്തി. അനുമതിയില്ലാത്ത മദ്യം വിളന്പിയതിനാണ് എക്സൈസ് കേസെടുത്തത്.

മരണത്തിലും മാതൃകയായി വി.കെ. ജോസഫ്

കൊച്ചി: മരണശേഷം തന്‍റെ മൃതദേഹം വൈദ്യപഠനത്തിന് വിട്ടുനല്‍കണമെന്നതായിരുന്നു വി.കെ. ജോസഫിന്‍റെ ആഗ്രഹം. മരണം അവശേഷിപ്പിച്ച തീരാവേദനയിലും ജോസഫിന്‍റെ അന്ത്യാഭിലാഷം നിറവേറ്റാനായതിന്‍റെ ചാരിതാര്‍ഥ്യത്തിലാണ് കുടുംബാംഗങ്ങള്‍. ഇന്ത്യന്‍ നേവിയില്‍ വര്‍ഷങ്ങളുടെ സേവനത്തിനുശേഷം സാമൂഹികസന്നദ്ധ പ്രവര്‍ത്തനങ്ങളിലേക്ക് വഴിമാറി നടന്ന വാഴക്കാല സ്വദേശി വി.കെ. ജോസഫ് (79) ആണ് മരണശേഷവും വേറിട്ട വഴിയിലൂടെ മാതൃകയായത്. വാഴക്കാല സെന്‍റ് കുര്യാക്കോസ് ക്‌നാനായ കത്തോലിക്കാ പള്ളിയില്‍ ഇന്നലെ വൈകുന്നേരം മൂന്നിനു നടന്ന സംസ്‌കാര ശുശ്രൂഷകള്‍ക്കുശേഷം ബന്ധുക്കള്‍ മൃതദേഹം അമൃത മെഡിക്കല്‍ കോളജിന് കൈമാറി. ഇങ്ങനെയൊരു ആഗ്രഹം മൂന്നുമാസം മുമ്പേ പിതാവ് അറിയിച്ചിരുന്നു. അച്ഛന്‍റെ മരണശേഷം ആ ആഗ്രഹം തങ്ങള്‍ സഫലമാക്കുകയായിരുന്നുവെന്ന് മകന്‍ ക്യാപ്റ്റന്‍ ജോര്‍ജ് സോണി പറഞ്ഞു. ഇന്നലെ രാവിലെ ഒമ്പതിന് വാഴക്കാലയിലെ വീട്ടില്‍ പൊതുദര്‍ശനത്തിനുവച്ച മൃതദേഹത്തില്‍ നിരവധിപേര്‍ അന്തിമോപചാരം അര്‍പ്പിച്ചു. ഇന്ത്യന്‍ നേവിയില്‍ ഏവിയേഷന്‍ സേഫ്റ്റി എക്യുപ്‌മെന്‍റ് വിഭാഗത്തില്‍ 15 വര്‍ഷം പ്രവര്‍ത്തിച്ച അദ്ദേഹം 1965, 1971 യുദ്ധങ്ങളില്‍ ഐഎന്‍എസ് വിക്രാന്ത് യുദ്ധക്കപ്പലില്‍ സേവനമനുഷ്ഠിച്ചു. രാജ്യസേവനത്തിന് സമര്‍ സേവാ സ്റ്റാര്‍, പൂര്‍വി സ്റ്റാര്‍, പശ്ചിമി സ്റ്റാര്‍ എന്നീ അംഗീകാരങ്ങള്‍ ലഭിച്ചിട്ടുണ്ട്. കെല്‍സയില്‍ അംഗമായിരുന്ന വി.കെ. ജോസഫ് കൗണ്‍സലിംഗ് സൈക്കോളജിസ്റ്റ്, സാമൂഹിക പ്രവര്‍ത്തകന്‍, സഭയുടെ ലിറ്റര്‍ജിക്കല്‍ കമ്മീഷന്‍ അംഗം എന്നീ നിലകളിലും പ്രവര്‍ത്തിച്ചു. ദീര്‍ഘനാള്‍ സണ്‍ഡേ സ്‌കൂള്‍ അധ്യാപകനുമായിരുന്നു. അറിവ് നേടുന്നതിനും പകര്‍ന്നു കൊടുക്കുന്നതിലും ഏറെ ഉൽസുകനായിരുന്ന അദ്ദേഹം സര്‍വീസില്‍ നിന്നു വിരമിച്ച ശേഷം കുട്ടികള്‍ക്ക് മോട്ടിവേഷൻ ക്ലാസുകളും കൗണ്‍സിലിംഗും മറ്റും നല്‍കുന്നതിലും സജീവമായിരുന്നു. 70 വയസിനുശേഷം എംഫില്‍, എംഎസ്‌സി സൈക്കോളജി ബിരുദങ്ങള്‍ നേടിയ അദ്ദേഹത്തിന്‍റെ കഠിനാധ്വാനവും അറിവ് നേടാനും സേവനം ചെയ്യാനുമുള്ള താല്പര്യവും തലമുറകള്‍ക്ക് മാതൃകയാണ്. ഉഴവൂര്‍ സ്വദേശിനി മേരി ജോസഫാണ് ഭാര്യ. മറ്റു മക്കള്‍: സോയ ബാബു (ഫിസിയോതെറാപ്പിസ്റ്റ്, യുഎസ്എ), സോളി ജോസഫ് (അധ്യാപിക, യുഎഇ). മരുമക്കള്‍: ബാബു (യുഎസ്എ), അന്‍റു (യുഎഇ), ജിജി (ഇന്ത്യ പോസ്റ്റ്‌സ്).

വെല്ലുവിളികളെ അവസരങ്ങളാക്കി മുന്നേറണം: രമേശ് ചെന്നിത്തല

കൊച്ചി: വെല്ലുവിളികളില്‍ തളരാതെ അത് അവസരങ്ങളായി എടുത്ത് മുന്നേറണമെന്നും ഇത്തരക്കാരാണ് ജീവിതത്തില്‍ വിജയിച്ചിട്ടുള്ളതെന്നും രമേശ് ചെന്നിത്തല എംഎൽഎ. എറണാകുളം നിയോജകമണ്ഡലത്തില്‍ എസ്എസ്എല്‍സി, പ്ലസ് ടു പരീക്ഷകളില്‍ മുഴുവന്‍ വിഷയങ്ങള്‍ക്കും എ പ്ലസ് നേടിയ വിദ്യാര്‍ഥികളെ ആദരിക്കുന്നതിനായി ടി.ജെ. വിനോദ് എംഎല്‍എ സംഘടിപ്പിച്ച മികവ് 2025 അവാര്‍ഡ് ദാന ചടങ്ങ് ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. എറണാകുളം സെന്‍റ് തെരേസാസ് കോളജ് ഓഡിറ്റോറിയത്തില്‍ നടന്ന പരിപാടിയില്‍ ടി.ജെ. വിനോദ് എംഎല്‍എ അധ്യക്ഷത വഹിച്ചു. 1512 വിദ്യാര്‍ഥികളെ ചടങ്ങില്‍ ആദരിച്ചു. അസിസ്റ്റന്‍റ് കളക്ടര്‍ പാര്‍വതി ഗോപകുമാര്‍ ഉന്നതവിജയം നേടിയ വിദ്യാര്‍ഥികളുമായി സംവദിച്ചു. ജില്ലാ കളക്ടര്‍ എന്‍.എസ്.കെ. ഉമേഷ്, സിനിമാതാരം സലിം ഹസന്‍ തുടങ്ങിയവരും പങ്കെടുത്തു. ലക്ഷ്യ ഇന്‍സ്റ്റിറ്റ്യൂട്ടിന്‍റെ സഹകരണത്തോടെയാണ് പരിപാടി സംഘടിപ്പിച്ചത്.

പത്താം ക്ലാസുകാരനെ സംഘം ചേർന്ന് മർദിച്ചതായി പരാതി

വൈപ്പിൻ: ഫുട്ബോൾ കളിയിലെ തർക്കത്തെ തുടർന്ന് പട്ടികജാതിക്കാരനായ പത്താം ക്ലാസ് വിദ്യാർഥിയെ പതിനഞ്ചോളം വരുന്ന യുവസംഘം വീട്ടിൽ നിന്ന് വിളിച്ചിറക്കിക്കൊണ്ടുപോയി മർദിച്ച് അവശനാക്കിയെന്ന് പരാതി. ഞാറക്കൽ മാരാത്തറ സാജുവിന്‍റെ മകൻ ആദിത്യനെയാണ് (15) കണ്ടാലറിയാവുന്ന മൂന്നു പേരുടെ നേതൃത്വത്തിൽ വിളിച്ചു കൊണ്ടുപോയി പെരുമ്പിള്ളി പടിഞ്ഞാറു ഭാഗത്തുള്ള ടർഫിൽ ഇട്ട് മർദിച്ചത്. ചികിത്സ തേടിയശേഷം ആദിത്യൻ ആശുപത്രി വിട്ടു. ആദിത്യന്‍റെ പിതാവ് ഞാറക്കൽ പോലീസിൽ പരാതി നൽകിയിട്ടുണ്ട്. എന്നാൽ പ്രതികൾ പ്രായപൂർത്തിയാകാത്തവരായതിനാൽ ജുവനൈൽ ബോർഡിനു റിപ്പോർട്ട് നൽകിയതായി പോലീസ് അറിയിച്ചു.

കാട്ടാനക്കൂട്ടം എണ്ണപ്പന മറിച്ചിട്ടു; പ്ലാന്‍റേഷൻ റോഡിൽ ഗതാഗതം മുടങ്ങി

കാലടി: കാലടി പ്ലാന്‍റേഷൻ റോഡിൽ കാട്ടാനകൂട്ടം എണ്ണപ്പന റോഡിലേക്ക് മറിച്ചിട്ട് റോഡിൽ നിലയുറപ്പിച്ചതിനാൽ മണിക്കൂറുകളോളം ഗതാഗതം തടസപ്പെട്ടു. കാലടി പ്ലാന്‍റേഷൻ 17-ാം ബ്ലോക്കിലാണ് 12-ഓളം വരുന്ന കാട്ടാനകൾ കഴിഞ്ഞദിവസം രാത്രി മുതൽ റോഡിലേക്ക് എണ്ണപ്പന മറിച്ചിട്ട് റോഡിലും സമീപത്തുമായി നിലയുറപ്പിച്ചത്. ഇന്നലെ രാവിലെ ഇത് വഴി എത്തിയ നാട്ടുകാരുടെയും വിനോദ സഞ്ചാരികളുടെയും നിരവധി വാഹനങ്ങൾ മണിക്കൂറുകളോളം റോഡിൽ കുടുങ്ങി. തുടർന്ന് നാട്ടുകാരും സഞ്ചാരികളും ചേർന്ന് ആനകളെ തുരത്തിയതിനു ശേഷം പനമുറിച്ച് മാറ്റി ഗതാഗതം പുനഃസ്ഥാപിച്ചു. കാട്ടാനകൾ പതിവായി ഇറങ്ങുന്ന പ്ലാന്‍റേഷൻ എണ്ണപ്പന, റബ്ബർ തോട്ടങ്ങങ്ങളിൽ തൊഴിലാളികൾ ഭീതിയോടെയാണ് കഴിയുന്നത്. പലപ്പോഴും രാത്രി ഇതു വഴി പോകുന്ന ആളുകൾ കാട്ടനയുടെ മുന്പിൽ പെടുന്നതും പതിവാണ്. ഭാഗ്യം കൊണ്ട് മാത്രമാണ് നിന്നും രക്ഷപ്പെടുന്നത്.

പരിശോധനകള്‍ കര്‍ശനമാക്കി ഭക്ഷ്യസുരക്ഷാ വിഭാഗം : പിഴ ഈടാക്കിയത് 10.6 ലക്ഷം

കൊച്ചി: കൊച്ചിയില്‍ മൂന്നുപേര്‍ക്ക് ഭക്ഷ്യവിഷബാധയേറ്റ സംഭവത്തിന് പിന്നാലെ നഗരത്തിലും ജില്ലയുടെ വിവിധ ഭാഗങ്ങളിലും പരിശോധനകള്‍ കര്‍ശനമാക്കി ഭക്ഷ്യസുരക്ഷാ വിഭാഗം. ഉദ്യോഗസ്ഥരുടെ വിവിധ സംഘങ്ങള്‍ മേഖല തിരിച്ചാണ് പരിശോധനകള്‍ നടത്തി വരുന്നത്. ഇതിനുപുറമേ തദ്ദേശ സ്ഥാപനങ്ങളുടെ ആരോഗ്യവിഭാഗവും പരിശോധനകള്‍ തുടരുകയാണ്. ശുചിത്വമില്ലായ്മ മുതല്‍ ഭക്ഷണ സാധനങ്ങള്‍ കൈകാര്യം ചെയ്യുന്ന ജീവനക്കാര്‍ക്ക് ഹെല്‍ത്ത് കാര്‍ഡിന്‍റെ അഭാവം വരെയുള്ള പിഴവുകളും പരിശോധനകളില്‍ കണ്ടെത്തിയിട്ടുണ്ട്. ഇവയില്‍ നടപടികള്‍ സ്വീകരിക്കുകയാണ്. ഭക്ഷ്യവിഷബാധ നിത്യസംഭവമാകുന്ന സാഹചര്യത്തില്‍ അനധികൃതവും വീഴ്ചവരുത്തുന്നതുമായ സ്ഥാപനങ്ങള്‍ക്കെതിരെ ശക്തമായ നടപടി സ്വീകരിക്കണമെന്ന നിലപാടാണ് മേഖലയിലെ അസോസിയേഷനുകളടക്കം ആവശ്യപ്പെടുന്നത്. നാലു മാസത്തിനിടെ 10.69 ലക്ഷം പിഴ മാര്‍ച്ച് ഒന്നുമുതല്‍ വിവിധയിടങ്ങളില്‍ നടത്തിയ പരിശോധനകളില്‍ ഭക്ഷ്യസുരക്ഷാവിഭാഗം ഈടാക്കിയത് 10.69 ലക്ഷം രൂപ. ഹോട്ടലുകളിലെ അടുക്കളകളിലെ ശുചിത്വക്കുറവ്, ജീവനക്കാരുടെ ആരോഗ്യ പരിശോധനയിലുണ്ടാകുന്ന വീഴ്ച, ഗുണനിലവാരമില്ലാത്ത കുടിവെള്ളം, അനുവദനീയമല്ലാത്ത കൃത്രിമ നിറങ്ങള്‍ ഭക്ഷ്യവസ്തുക്കളില്‍ ചേര്‍ക്കല്‍ തുടങ്ങിയ കര്യങ്ങളൊക്കെ പിഴ ഈടാക്കുന്നതിന് കാരണമായിട്ടുണ്ട്. ഇക്കാലയളവില്‍ 286 സ്ഥാപനങ്ങള്‍ക്കാണ് ഇതിനായി നോട്ടീസ് നല്‍കിയത്. 401 സ്ഥാപനങ്ങള്‍ക്ക് ക്രമക്കേടുകള്‍ തിരുത്തുന്നതിനുള്ള നോട്ടീസും നല്‍കി. 2327 പരിശോധനകള്‍ ഇക്കാലയളവില്‍ 2327 പരിശോധനകളാണ് ജില്ലയില്‍ അധികൃതര്‍ നടത്തിയത്. 565 സാമ്പിളുകള്‍ പരിശോധനയ്ക്കെടുത്തു. നിരീക്ഷണത്തിന്‍റെ ഭാഗമായി 1167 സാമ്പിളുകളുമെടുത്തു. സാമ്പിളുകള്‍ ശേഖരിച്ച് കാക്കനാട് റീജണല്‍ ലബോറട്ടറിയിലെത്തിച്ച് പരിശോധന നടത്തിയാണ് ഗുണനിലവാരം വിലയിരുത്തുന്നത്. പുതുതായി 749 സ്ഥാപനങ്ങള്‍ക്ക് ലൈസന്‍സും 4045 സ്ഥാപനങ്ങള്‍ക്ക് രജിസ്‌ട്രേഷനും നല്‍കിയിട്ടുണ്ട്.

ആശാ പ്രവർത്തകർക്ക് കൈത്താങ്ങായി അമേരിക്കൻ പ്രവാസി

കൂത്താട്ടുകുളം: മാസങ്ങളായി സമര പോരാട്ടം നടത്തുന്ന ആശമാർക്ക് കൈത്താങ്ങായി അമേരിക്കൻ പ്രവാസി. കണ്ണൂർ അഴീക്കോട് നിലയം എം. പത്മനാദാണ് ആശമാർക്ക് സഹായ ഹസ്തവുമായി എത്തിയത്. സുഹൃത്തായ പിറവം ബ്ലോക്ക് കോൺഗ്രസ് കമ്മിറ്റി എക്സിക്യൂട്ടീവ് അംഗവും കൂത്താട്ടുകുളം കരിമ്പന കോഴിക്കാട്ടേൽ ബെന്നി കെ. മാത്യുവിൽ നിന്നാണ് പത്മനാദ് ആശമാരുടെ അവസ്ഥ അറിഞ്ഞത്. തുടർന്ന് ഒരു ലക്ഷം രൂപയുടെ സഹായധനം സുഹൃത്ത് ബെന്നി മുഖേന കെപിസിസി പ്രസിഡന്‍റ് സണ്ണി ജോസഫിന് കൈമാറി. ഇന്ത്യൻ നാഷണൽ കോൺഗ്രസ് പിറവം മുൻ ബ്ലോക്ക് പ്രസിഡന്‍റ് വിൽസൺ കെ. ജോൺ, കോൺഗ്രസ് ബ്ലോക്ക് പ്രസിഡന്‍റ് പി.സി. ജോസ്, കൂത്താട്ടുകുളം കോൺഗ്രസ് മണ്ഡലം കമ്മിറ്റി പ്രസിഡന്‍റ് റെജി ജോൺ എന്നിവരുടെ സാന്നിധ്യത്തിലാണ് ഒരു ലക്ഷം രൂപയുടെ ചെക്ക് ബെന്നി കെ. മാത്യു പ്രസിഡന്‍റിനു കൈമാറിയത്.

സ്ഥാനാരോഹണം

വാഴക്കുളം: വാഴക്കുളം ചാവറ ഇന്‍റർനാഷണൽ അക്കാഡമിയിൽ സ്കൂൾ പാർലമെന്‍റിന്‍റെ സ്ഥാനാരോഹണം നടത്തി. സ്കൂൾ മാനേജർ ഫാ. തോമസ് മഞ്ഞക്കുന്നേൽ അധ്യക്ഷത വഹിച്ചു. മുൻ സുപ്രീംകോടതി ജഡ്ജി ജസ്റ്റീസ് കുര്യൻ ജോസഫ് മുഖ്യാതിഥിയായി. വിവിധ സ്ഥാനങ്ങളിലേക്ക് തെരഞ്ഞെടുക്കപ്പെട്ട സ്കൂൾ ലീഡേഴ്സിന് ബാഡ്ജസ് നൽകി ആദരിച്ചു. സ്കൂൾ പ്രിൻസിപ്പൽ ഫാ. ഡിനോ കള്ളിക്കാട് ലീഡേഴ്സിന് സത്യപ്രതിജ്ഞ ചൊല്ലിക്കൊടുത്തു. ചടങ്ങിൽ വൈസ് പ്രിൻസിപ്പൽ ഫാ. ജിത്തു ജോർജ് തൊട്ടിയിൽ പ്രസംഗിച്ചു. അധ്യാപക രക്ഷാകർതൃ സംഘടനയുടെ വാർഷിക പൊതുയോഗവും പ്രതിനിധികളുടെ തെരഞ്ഞെടുപ്പും ഇതോടനുബന്ധിച്ച് നടത്തി.

വെറ്റിലപ്പാറയില്‍ വീടിന്‍റെ പിന്‍ഭാഗം തകര്‍ന്നു

കോതമംഗലം: പിണ്ടിമന വെറ്റിലപ്പാറയില്‍ രാജീവ്ഗാന്ധി ദശലക്ഷം നഗറില്‍ വീടിന്‍റെ പിന്‍ഭാഗം തകര്‍ന്ന് നിലംപതിച്ചു. ആളപായമില്ല. അപകടഭീഷണിയിലായ അഞ്ച് വീടുകളില്‍ മൂന്ന് വീടുകള്‍ ഇന്ന് പൊളിച്ച് നീക്കും. നഗറിന്‍റെ തുടക്ക ഭാഗത്തുള്ള വെട്ടുകാട്ടില്‍ ശോശാമ്മയുടെ വീടിന്‍റെ പിന്‍ഭാഗത്തെ ശൗചാലയ മുറിയുടെ പുറംഭിത്തിയാണ് നിലംപതിച്ചത്. ഇന്നെലെ രാവിലെ 10നാണ് സംഭവം. വീട് തകര്‍ച്ചയിലായതോടെ വീട്ടുകാര്‍ മറ്റൊരു സ്ഥലത്താണ് താമസിക്കുന്നത്. വീടിന്‍റെ ഭിത്തി തകര്‍ന്ന് വീഴുന്ന ശബ്ദംകേട്ട് സമീപ വീട്ടുകാര്‍ ഓടിച്ചെന്ന് നോക്കിയപ്പോഴാണ് സംഭവം അറിയുന്നത്. 30 വര്‍ഷം മുമ്പ് ഭവന നിര്‍മാണ ബോര്‍ഡ് നിര്‍മിച്ച് നല്‍കിയ വീടുകളാണ് ഇവ. സിമന്‍റ് തേയ്ക്കാതെ കെട്ടിപ്പൊക്കിയ ഭിത്തികളും കനം കുറഞ്ഞ മേല്‍്ക്കൂര സ്ലാബും കാലാനുസൃതമായി അറ്റകുറ്റപ്പണി നടത്താന്‍ അധികൃതര്‍ ആവശ്യമായ ഫണ്ട് അനുവദിക്കാതെ വന്നതാണ് വീടുകള്‍ അപകടാവസ്ഥയിലായതെന്ന് ആരോപണമുണ്ട്. ശോശാമ്മയുടെ വീടിനൊപ്പം അപകടാവസ്ഥയിലായ മനയത്തുകുടി രമണി വിജയന്‍, വട്ടപ്പറമ്പില്‍ ബേബി എന്നിവരുടെ വീടുകളാണ് ഇന്ന് പൊളിച്ച് നീക്കുന്നത്. ഇതുസംബന്ധിച്ച് വീട്ടുകാര്‍ പഞ്ചായത്ത് അധികൃതരെ സമ്മതം അറിയിച്ചിട്ടുണ്ട്. പുത്തന്‍പുരയ്ക്കല്‍ രാധാ രാജു, പുന്നയ്ക്കല്‍ ശാന്ത, പുത്തയത്ത് വേലായുധന്‍ തുടങ്ങി 10 പേരുടെ വീടുകളുടെ വെട്ടുകല്ലില്‍ പണിത് സിമന്‍റ് തേയ്ക്കാത്ത ഭിത്തി നനഞ്ഞുകുതിര്‍ന്ന് നിലംപൊത്താവുന്ന അവസ്ഥയിലാണ്. ഇതില്‍ രാധാ രാജുവിന്‍റെ വീടിന്‍റെ സ്ലാബും ഭിത്തിയും പൊളിഞ്ഞ് അപകടത്തിലാണ്. ഈ അവസ്ഥയിലാണ് കഴിഞ്ഞ ദിവസം പുത്തന്‍പുരയ്ക്കല്‍ കൃഷ്ണന്‍കുട്ടി-അമ്മിണി ദമ്പതികള്‍ വീടിന്‍റെ മേല്‍ക്കൂര തകര്‍ന്ന് അടിയില്‍പ്പെട്ടത്. ഈ സംഭവത്തോടെ നഗറിലെ പല കുടുംബങ്ങളും ഭീതിയോടെയാണ് വീടുകളില്‍ കഴിയുന്നത്. നാല് വീട്ടുകാരെ നഗറിലെ എസ്‌സി കമ്യൂണിറ്റി ഹാളിലേക്ക് മാറ്റി പാര്‍പ്പിച്ചിരിക്കുകയാണ്.

വ്യാപാരി വ്യവസായി ഏകോപന സമിതി പൊതുയോഗം

മൂവാറ്റുപുഴ: കേരള വ്യാപാരി വ്യവസായി ഏകോപന സമിതി പേഴയ്ക്കാപ്പിള്ളി യൂണിറ്റിന്‍റെ 15-ാമത് അര്‍ധവാര്‍ഷിക പൊതുയോഗം പേഴയ്ക്കാപ്പിള്ളി വ്യാപാര ഭവനില്‍ നടന്നു. ജില്ലാ ജനറല്‍ സെക്രട്ടറി എ.ജെ. റിയാസ് ഉദ്ഘാടനം ചെയ്തു. ആദ്യകാല അംഗവും യൂണിറ്റ് ഭാരവാഹിയും ജില്ലാ കൗണ്‍സില്‍ അംഗവുമായിരുന്ന ടി.പി. മൈതീന്‍ ഹാജിയുടെ ഫോട്ടോ അനാച്ഛാദനം ചെയ്തു. പായിപ്ര പഞ്ചായത്തില്‍ മുഴുവന്‍ വിഷയങ്ങള്‍ക്കും എ പ്ലസ് ലഭിച്ച നൂറോളം വിദ്യാര്‍ഥികള്‍ക്ക് ബ്ലോക്ക് പഞ്ചായത്ത് പ്രസിഡന്‍റ് കെ.ജി. രാധാകൃഷ്ണന്‍ ക്യാഷ് അവാര്‍ഡും പ്രശസ്തിപത്രവും വിതരണം ചെയ്തു. 2025-26 വര്‍ഷത്തേക്കുള്ള 2.50 കോടി രൂപ വരവും 2.25 കോടി രൂപ ചെലവും വരുന്ന ബജറ്റ് യൂണിറ്റ് ട്രഷറര്‍ എം.എ. നാസര്‍ അവതരിപ്പിച്ചു. പായിപ്ര കവലയിലെ ട്രാഫിക് പരിഷ്‌കരണവും അനധികൃത വഴിയോരക്കച്ചവടവും നിയന്ത്രിക്കാത്ത പോലീസിന്‍റെയും മറ്റു ഡിപ്പാര്‍ട്ട്‌മെന്‍റുകളുടെയും നടപടികളില്‍ യോഗം പ്രതിഷേധിച്ചു.

മണികണ്ഠന്‍ചാലില്‍ കാണാതായ യുവാവിനാ‍യി അഞ്ചാം ദിവസത്തെ തെരച്ചിലും വിഫലം

കോതമംഗലം: മണികണ്ഠന്‍ചാല്‍ ചപ്പാത്തിലൂടെ നടന്നുനീങ്ങുന്നതിനിടെ ഒഴുക്കില്‍പ്പെട്ട് കാണാതായ രാധാകൃഷ്ണനായി അഞ്ചാം ദിവസം നടത്തിയ തെരച്ചിലും വിഫലമായി. മണികണ്ഠൻചാൽ വർക്കൂട്ടുമാവിള രാധാകൃഷ്ണനാണ് (ബിജു-37) ബുധനാഴ്ച രാവിലെ ആറരയോടെ ഒഴുക്കിൽപ്പെട്ടത്. സ്വകാര്യ ബസ് തൊഴിലാളിയായ ബിജു ജോലിക്കായി പൂയംകുട്ടിക്കു പോയതായിരുന്നു. കഴിഞ്ഞ നാല് ദിവസങ്ങളിൽ നേവിയുടെയും അഗ്നിരക്ഷാസേന സ്കൂബ, എൻഡിആ എഫ് ടീമിന്‍റെയും നേതൃത്വത്തിൽ മേഖലയിൽ വ്യാപകമായി തെരച്ചിൽ നടത്തിയിരുന്നു. അഞ്ചാം ദിവസമായ ഇന്നെലെ രാവിലെ 7.30 മുതൽ കുട്ടമ്പുഴ, ആനക്കയം, ബ്ലാവന, മണികണ്ഠൻചാൽ ചപ്പാത്ത് ഭാഗങ്ങളിലായി അഗ്നിരക്ഷാസേനയുടെ നേതൃത്വത്തിൽ തെരച്ചിൽ നടത്തി. വന മേഖലയിൽ കുട്ടമ്പുഴ റേഞ്ച് ഓഫീസറുടെ നേതൃത്വത്തിലുള്ള സംഘം തെരച്ചിലിന് നേതൃത്വം നൽകി. പാണിയേലി പോര് ഭാഗത്ത് കോടനാട് ഫോറസ്റ്റ് റേഞ്ച് ഓഫീസറുടെ നേതൃത്വത്തിൽ വനമേഖലയിലും ആലുവ, കൊടുങ്ങല്ലൂർ മേഖലകളിലും അഗ്നിരക്ഷാസേനയുടെ നേതൃത്വത്തിലും തെരച്ചിൽ നടത്തി. കോസ്റ്റൽ പോലീസ് സ്റ്റേഷൻ പരിധികളിൽ ബന്ധപ്പെട്ട എസ്എച്ച്ഒമാരുടെ നേതൃത്വത്തിലും ബിജുവിനായി തെരച്ചിൽ നടത്തി. ആന്‍റണി ജോൺ എംഎൽഎ, കുട്ടമ്പുഴ പഞ്ചായത്ത് പ്രസിഡന്‍റ് കാന്തി വെള്ളക്കയ്യൻ, കോതമംഗലം തഹസിൽദാർ എം. അനിൽകുമാർ എന്നിവർ പ്രവർത്തനങ്ങൾ ഏകോപിപ്പിച്ചു.

ബിഎഐ ഭാരവാഹികള്‍ സ്ഥാനമേറ്റു

മൂവാറ്റുപുഴ: കോണ്‍ട്രാക്ടര്‍മാര്‍, ബില്‍ഡര്‍മാര്‍ എന്നിവരുടെ സംഘടനയായ ബില്‍ഡേഴ്‌സ് അസോസിയേഷന്‍ ഓഫ് ഇന്ത്യ (ബിഎഐ) മൂവാറ്റുപുഴ സെന്‍ററിന്‍റെ പുതിയ ഭാരവാഹികളുടെ സ്ഥാനാരോഹണം നടത്തി. മൂവാറ്റുപുഴ വൈഎംസിഎ സെന്‍ററില്‍ നടന്ന പരിപാടി മന്ത്രി വി.എന്‍. വാസവന്‍ ഉദ്ഘാടനം ചെയ്തു. ബിഎഐ മൂവാറ്റുപുഴ സെന്‍റര്‍ ചെയര്‍മാന്‍ ജോര്‍ഡി കെ. ഏബ്രഹാം അധ്യക്ഷത വഹിച്ചു. ഫ്രാന്‍സിസ് ജോര്‍ജ് എംപി മുഖ്യപ്രഭാഷണം നടത്തി. സ്ഥാനാരോഹണ ച്ചടങ്ങുകള്‍ക്ക് ബിഎഐ സംസ്ഥാന ചെയര്‍മാന്‍ കെ.എ. ജോണ്‍സണ്‍ നേതൃത്വം നല്‍കി. ജോസഫ് ജോണ്‍ (ചെയര്‍മാന്‍), രാജു ജോസഫ് (വൈസ് ചെയര്‍മാന്‍), അബി കെ. മാത്യു (സെക്രട്ടറി), ജഗന്‍ ജെയിംസ് (ജോയിന്‍റ് സെക്രട്ടറി), ഷാജി കെ. മാത്യു (ട്രഷറര്‍) എന്നിവര്‍ പുതിയ ഭാരവാഹികളായി ചുമതലയേറ്റു. ബിഎഐ മൂവാറ്റുപുഴ സെന്‍റര്‍ യുത്ത് ഫോറത്തിന്‍റെ ഉദ്ഘാടനം മുന്‍ സംസ്ഥാന ചെയര്‍മാന്‍ നജീബ് മണ്ണേല്‍ നിര്‍വഹിച്ചു. അംഗത്വ കാമ്പയിന്‍ മുന്‍ സംസ്ഥാന ചെയര്‍മാന്‍ അലക്‌സ് പെരുമാലില്‍ ഉദ്ഘാടനം ചെയ്തു.

ഹൃദ്രോഗ പരിശോധന ക്യാമ്പ്

മൂവാറ്റുപുഴ: മൂവാറ്റുപുഴ പ്രസ് ക്ലബിന്‍റെയും നിര്‍മല മെഡിക്കല്‍ സെന്‍ററിന്‍റെയും നേതൃത്വത്തില്‍ സമ്പൂര്‍ണ ഹൃദ്രോഗ പരിശോധന ക്യാമ്പ് സംഘടിപ്പിച്ചു. വെള്ളൂര്‍ക്കുന്നത്ത് പ്രസ് ക്ലബ് ഹാളില്‍ നടത്തിയ ക്യാമ്പ് മാത്യു കുഴല്‍നാടന്‍ എംഎല്‍എ ഉദ്ഘാടനം ചെയ്തു. പ്രസ് ക്ലബ് പ്രസിഡന്‍റ് പി.ജി. ബിജു അധ്യക്ഷത വഹിച്ചു. ഈ വര്‍ഷത്തെ പ്രവര്‍ത്തനങ്ങളുടെ ഉദ്ഘാടനം നഗരസഭ ചെയര്‍മാന്‍ പി.പി. എല്‍ദോസ് നിര്‍വഹിച്ചു. സിസ്റ്റര്‍ ജെസി ജോസ്, അനൂപ് സത്യന്‍, മുഹമ്മദ് ഷഫീഖ്, പാട്രിക് എം. കല്ലട എന്നിവര്‍ പ്രസംഗിച്ചു. ക്യാന്പില്‍ പങ്കെടുത്തവര്‍ക്ക് രക്തസമ്മര്‍ദം, തൈറോയ്ഡ്, ലിപ്പിഡ് പ്രൊഫൈല്‍, ഇസിജി, കാര്‍ഡിയോ, ശ്വാസകോശ നിര്‍ണയ പരിശോധനകള്‍ സൗജന്യമായിയിരുന്നു. കൂടാതെ ആവശ്യമുള്ളവര്‍ക്ക് സൗജന്യമായി മരുന്നുകളും വിതരണം ചെയ്തു.

കുടിവെള്ള പൈപ്പ് പൊട്ടി ശുദ്ധജലം പാഴാകുന്നു

മൂവാറ്റുപുഴ: നഗരത്തിലെ കാവുംപടി റോഡില്‍ ജല അതോറിറ്റിയുടെ കുടിവെള്ള പൈപ്പ് പൊട്ടി ശുദ്ധജലം പാഴാകുന്നു. മൂവാറ്റുപുഴ കാവുംപടി റോഡില്‍ പുഴക്കരക്കാവിന് സമീപത്താണ് പൈപ്പ് പൊട്ടി ലക്ഷക്കണക്കിന് ലിറ്റര്‍ കുടിവെള്ളം പാഴകുന്നത്. വാട്ടര്‍ അഥോറിറ്റിയുടെ പ്രധാന ടാങ്കിന് സമീപത്തെ റോഡിലാണ് പൈപ്പ് തകര്‍ന്നിരിക്കുന്നത്. ഇതോടെ കാവുംപടി റോഡില്‍ വലിയ കുഴി രൂപപ്പെട്ടു. എന്നാൽ ഉദ്യോഗസ്ഥര്‍ ഇതുവരെയും സ്ഥലത്തെത്തി നടപടി സ്വീകരിച്ചിട്ടില്ലെന്ന് പ്രദേശവാസികള്‍ പറഞ്ഞു. നഗരവികസനത്തിന്‍റെ ഭാഗമായി വണ്‍വേ സംവിധനം ഒരുക്കിയിരിക്കുന്ന കാവുംപടി റോഡിലൂടെ ഇരുചക്ര വാഹനങ്ങള്‍ ഉള്‍പ്പെടെ നിരവധി വാഹനങ്ങളാണ് കടന്നുപോകുന്നത്. റോഡില്‍ കുഴി രൂപപ്പെട്ടത് ഇരുചക്രവാഹന യാത്രക്കാര്‍ക്ക് ഉള്‍പ്പടെ അപകസാധ്യത വാര്‍ധിപ്പിക്കുന്നുണ്ട്.

കാഞ്ഞൂരിൽ "ഓണം നമ്മുടെ പൂക്കൾക്കൊപ്പം'

കാലടി: കാഞ്ഞൂർ ചർച്ച് നഗർ റെസിഡന്‍റ്സ് അസോസിയേഷന്‍റെ ആഭിമുഖ്യത്തിൽ "ഈ തവണ ഓണം നമ്മുടെ പൂക്കൾക്കൊപ്പം' എന്ന പ്രവർത്തന പരിപാടിയുടെ ഭാഗമായി ചെണ്ടുമല്ലിക്കൃഷി ആരംഭിച്ചു. അസോസിയേഷൻ പ്രസിഡന്‍റ് അഡ്വ. വർഗീസ് കോയിക്കര ഉദ്ഘാടനം ചെയ്തു. അസോസിയേഷന്‍റെ കീഴിൽ വരുന്ന മുഴുവൻ കുടുംബങ്ങളിലും ഈ തവണ ഓണത്തിന് പൂക്കളം ഇടുന്നത് ഈ പൂക്കൾ ഉപയോഗിച്ചായിരിക്കും. 13 സെന്‍റ് സ്ഥലത്താണ് പൂക്ക‌ൃഷി ചെയ്യുന്നത്. ജോസഫ് പാറക്ക, ജോസ് കാഞ്ഞിരത്തിങ്കൽ, രാധാമണി സുരേഷ്, ജോസ് മൂഞ്ഞേലി, സാജു മുഞ്ഞേലി, സാജു വടക്കൻ, സജി കൂട്ടുങ്ങൽ, സജി ചിറക്കൽ, ജോണി പടയാട്ടി, ജിബി പയ്യപ്പിള്ളി, സ്റ്റീഫൻ കാഞ്ഞ രത്തിങ്കൽ, പി. കെ. ഫ്രാൻസീസ്, ജോസ് പാലാട്ടി, ഡേവീസ് മാസ്റ്റർ, ടി.കെ. ദേവസിക്കുട്ടി, ഡേവീസ് പാലാട്ടി, ഇ.ഡി. പോളച്ചൻ എന്നിവർ പങ്കെടുത്തു.

പൂക്കൃഷിയുമായി മഹിളാ അസോ.

നെടുമ്പാശേരി: കർഷകഭേരി ആറാംഘട്ടത്തിന്‍റെ ഭാഗമായി ഓണത്തിന് പൂക്കളം ഒരുക്കാൻ പുഷ്പക്കൃഷിയുമായി ജനാധിപത്യ മഹിളാ അസോസിയേഷൻ അങ്കമാലി ഏരിയ കമ്മിറ്റി. പാറക്കടവ് പഞ്ചായത്തിലെ കുറുമശേരിയിൽ ഏരിയ തല ഉദ്ഘാടനം ജനാധിപത്യ മഹിളാ അസോസിയേഷൻ സംസ്ഥാന സെക്രട്ടറി സി.എസ്. സുജാത നിർവഹിച്ചു. ജില്ലാ കമ്മിറ്റി അംഗം രംഗമണി വേലായുധൻ അധ്യക്ഷയായി. ജില്ലാ സെക്രട്ടറി അഡ്വ. പുഷ്പാ ദാസ്, സിപിഎം ജില്ലാ കമ്മിറ്റി അംഗം അഡ്വ. കെ.കെ. ഷിബു, സിപിഎം ഏരിയ സെക്രട്ടറി കെ.പി. റെജീഷ്, കെ.പി. ബിനോയ്‌, സി.എൻ. മോഹനൻ, ജിഷ ശ്യാം, റോജിസ്മുണ്ടപ്ലാക്കൽ, ജിബിൻ വർഗീസ്, റീന രാജൻ, താരാ സജീവ് എന്നിവർ സംസാരിച്ചു. കർഷക ഭേരി അഞ്ചാം ഘട്ടത്തിൽ മികച്ച അടുക്കളത്തോട്ടം സംഘടിപ്പിച്ച കറുകുറ്റി, മലയാറ്റൂർ, കാഞ്ഞൂർ കമ്മിറ്റികൾക്കുള്ള ഉപഹാരം ജില്ലാ സെക്രട്ടറി പുഷ്പദാസ് നൽകി.

കെഎൽസിഎ ജനറൽ കൗൺസിലും ആദരിക്കലും നടത്തി

തോപ്പുംപടി: കേരള ലാറ്റിൻ കാത്തലിക് അസോസിയേഷൻ കൊച്ചി രൂപത ജനറൽ കൗൺസിലും വിവിധ മേഖലകളിൽ പ്രാഗത്ഭ്യം തെളിയിച്ചവരെ ആദരിക്കലും നടത്തി. തോപ്പുംപടി കാത്തലിക്ക് സെന്‍ററിൽ നടന്ന ചടങ്ങ് കുമ്പളങ്ങി കോ ഓപ്പറേറ്റീവ് ബാങ്ക് പ്രസിഡന്‍റും കെഎൽസിഎ മുൻ സംസ്ഥാന ജന. സെക്രട്ടറിയുമായ നെൽസൻ കോച്ചേരി ഉദ്ഘാടനം ചെയ്തു. രൂപത പ്രസിഡന്‍റ് പൈലി ആലുങ്കൽ അധ്യക്ഷത വഹിച്ചു. യോഗത്തിൽ സിന്ധു ജസ്റ്റസ്, ജോയി സി. കമ്പക്കാരൻ , സേവ്യർ രാജു, എൻ.എൽ. ജെയിംസ്, പി.പി. ജേക്കബ്ബ്, ജേക്കബ് പോൾ, റിഡ്ജൻ റിബെല്ലോ, ജോസ്മോൻ ഇടപ്പറമ്പിൽ, സുജ അനിൽ എന്നിവരെ ആദരിച്ചു. ഫാ. ആന്‍റണി കുഴിവേലിൽ, ബാബു കാളിപ്പറമ്പിൽ, ജോബ് പുളിക്കൽ, സാബു കാനക്കാപ്പള്ളി, അലക്സാണ്ടർ ഷാജു ആനന്ദശേരി, ഹെൻസൺ പോത്തൻപള്ളി, കെ.ജെ. സെബാസ്റ്റ്യൻ, ജെസി കണ്ടനാം പറമ്പിൽ, വിദ്യ ജോജി എന്നിവർ സംസാരിച്ചു.

ഓണം മുന്നിൽക്കണ്ട് ചെണ്ടുമല്ലിക്കൃഷിയുമായി മരട് നഗരസഭ

കൊച്ചി: ഓണത്തിന് പൂക്കളമൊരുക്കാന്‍ ചെണ്ടുമല്ലിയുമായി മരട് നഗരസഭ. ഇതിന്‍റെ ഭാഗമായി നഗരസഭയിലെ ഗ്രൂപ്പു കര്‍ഷകര്‍ക്ക് ചെണ്ടുമല്ലി തൈകള്‍ വിതരണം ചെയ്തു. ഓണക്കാലത്ത് പൂക്കളമൊരുക്കാന്‍ പാകമാകുന്ന തരത്തി ലുള്ള തൈകള്‍ സൗജന്യമായാണ് കര്‍ഷകര്‍ക്ക് നല്‍കിയത്. ഒാണക്കാലത്ത് പൂക്കളമൊരുക്കാനും പൂക്കൾ വിൽക്കാനും കൃഷിയിലൂടെ സാധിക്കും. നഗരസഭാ ചെയര്‍മാന്‍ ആന്‍റണി ആശാംപറമ്പില്‍ ഉദ്ഘാടനം നിര്‍വഹിച്ചു. വൈസ് ചെയര്‍പേഴ്‌സണ്‍ അഡ്വ. രശ്മി സനില്‍, സ്ഥിരംസമിതി അധ്യക്ഷന്‍മാരായ റിയാസ് കെ. മുഹമ്മദ്, റിനി തോമസ്, ശോഭ ചന്ദ്രന്‍, ബേബി പോള്‍ പി.ഡി.രാജേഷ്, ബെൻഷാദ് നടുവിലവീട്, മിനി ഷാജി, എ.കെ. അഫ്സൽ, ഷീജ സാൻകുമാർ, തുടങ്ങിയവർ പ്രസംഗിച്ചു.

പട്ടിമറ്റത്ത് കിണറ്റിൽ വീണ പോത്തിനെ രക്ഷിച്ചു

കിഴക്കമ്പലം: കിണറ്റിൽ വീണ പോത്തിനെ അഗ്നിരക്ഷാസേന പ്രവർത്തകരെത്തി രക്ഷിച്ചു. പട്ടിമറ്റം അറക്കപ്പടി ഓണംവേലിയിൽ കൈലാപുറത്ത് തങ്കച്ചന്‍റെ പോത്താണ് 40 അടി താഴ്ചയും രണ്ടാൾ വെള്ളവുമുള്ള കിണറ്റിൽ ഇന്നലെ ഉച്ചയോടെ വീണത്. 300 കിലോയോളം ഭാരമുള്ള പോത്തായതിനാൽ വീട്ടുകാരും നാട്ടുകാരും ചേർന്ന് കിണഞ്ഞു പരിശ്രമിച്ചെങ്കിലും അതിനെ കരയ്ക്കുകയറ്റാനായില്ല. തുടർന്ന് പട്ടിമറ്റം അഗ്നി രക്ഷാനിലയം സ്റ്റേഷൻ ഓഫീസിൽ വിവരം അറിയിക്കുകയായിരുന്നു. എൻ. എച്ച്. അസൈനാരുടെ നേതൃതത്തിൽ സേനാംഗങ്ങളായ ഇ. സതീഷ് ചന്ദ്രൻ , ആർ.യു. റെജുമോൻ , വി.പി. ഗഫൂർ , ജെ.എം. ജയേഷ്, ആർ.രതീഷ്, പി.പി. ഷിജിൻ , പ്രദീപ് കുമാർ,രാമചന്ദ്രൻ നായർ എന്നിവരും നാട്ടുകാരും ചേർന്ന് പോത്തിനെ കിണറ്റിൽനിന്ന് രക്ഷപ്പെടുത്തുകയായിരുന്നു. വീഴ്ചയിൽ പോത്തിന് ശരീരമാസകലം മുറിവേറ്റിട്ടുണ്ട്.

കരിങ്ങാച്ചിറ കത്തീഡ്രലിൽ ലഹരി വിരുദ്ധ പ്രതിജ്ഞ

തൃപ്പൂണിത്തുറ: കരിങ്ങാച്ചിറ സെന്‍റ് ജോർജ് യാക്കോബായ സുറിയാനി കത്തീഡ്രലിൽ ശ്രേഷ്ഠ കാതോലിക്ക ബസേലിയോസ് ജോസഫ് ബാവയുടെ ആഹ്വാനമനുസരിച്ച് ലഹരി വിരുദ്ധ പ്രതിജ്ഞയെടുത്തു. ഫാ. റിജോ ജോർജ് ലഹരി വിരുദ്ധ പ്രതിജ്ഞ ചൊല്ലിക്കൊടുത്തു. ഫാ. റ്റിജോ മർക്കോസ്, ഫാ. ബേസിൽ ഷാജു, ജീവൻ മാലായിൽ, എം.പി. പോൾ, ഐ.കെ. ജോർജ് തുടങ്ങിയവർ പ്രസംഗിച്ചു. വിദ്യാർഥികൾ അവതരിപ്പിച്ച ഫ്ലാഷ് മോബും നടന്നു.

ഞാറക്കൽ താലൂക്കാശുപത്രിയിൽ ഡോക്ടർമാരെ നിയമിക്കാൻ ആരോഗ്യമന്ത്രിക്ക് നിവേദനം

വൈപ്പിൻ : വൈപ്പിൻ ബ്ലോക്ക് പഞ്ചായത്തിന്‍റെ കീഴിലുള്ള ഞാറക്കൽ താലൂക്ക് ആശുപത്രിയിൽ ആവശ്യത്തിനു ഡോക്ടർ മാരില്ലാത്തതിനാൽ ചികിത്സതേടിയെത്തുന്ന സാധാരണക്കാർ ദുരിതത്തിൽ. എട്ട് ഡോക്ട‌ർമാർ നിലവിൽ ഉണ്ട് എന്നു പറയുന്നുണ്ടെങ്കിലും ഇവിടെ ഒ.പി.യിൽ പലപ്പോഴും ഒരു ഡോക്‌ടറുടെ സേവനം മാത്രമാണ് ലഭിക്കുന്നത്. ഇതുമൂലം ഡോക്ടറെ കാണാൻ രോഗികൾ മണിക്കൂറുകളോളം കാത്ത് നിൽക്കേണ്ട സാഹചര്യമാണവിടെ. കൂടാതെ ആശുപത്രിയിൽ ഗൈനക്കോളജി വിഭാഗം വർഷങ്ങളായി പ്രവർത്തനരഹിതമാണ്. സാഹചര്യങ്ങൾ ഈ വിധമായതിനെ തുടർന്ന് കൂടുതൽ ഡോക്ടർമാരെനിയമിക്കണമെന്നാവശ്യപ്പെട്ട് ഞാറക്കൽ പഞ്ചായത്ത് പ്രസിഡന്‍റ് മിനിരാജു ആരോഗ്യ മന്തി വീണാ ജോർജിനെ നേരിൽ കണ്ട് നിവേദനം നൽകി. ഞാറക്കൽ നായരമ്പലം, എടവനക്കാട്, എളങ്കുന്നപ്പുഴ എന്നീ മേഖലകളിലെ സാധാരണക്കാർ ചികിത്സ തേടി എത്തുന്ന ഇവിടെ കിടത്തി ചികിത്സയ്ക്കും മറ്റുമായി എല്ലാവിധ ആധുനിക സൗകര്യങ്ങളുമുള്ള കെട്ടിടവും മറ്റും ഉണ്ടെങ്കിലും ഡോക്‌ടർമാരുടെ അപര്യാപ്‌തതമൂലം രോഗികൾക്ക് യഥാവിധം ചികിത്സ ലഭിക്കാതെ വരുന്ന സാഹചര്യവും പ്രസിഡന്‍റ് നിവേദനത്തിൽ വ്യക്തമാക്കിയിട്ടുണ്ട്.

ആട്ടുകല്ലിൽ ഒളിച്ചിരുന്ന മൂർഖനെ പിടികൂടി

അലുവ: വീടിനകത്ത് അടുക്കളയിലെ ആട്ടുകല്ലിൽ ഒളിച്ചിരുന്ന മൂർഖൻ പാമ്പിനെ പിടികൂടി. തോട്ടയ്ക്കാട്ടുകരയിൽ റിട്ട. പ്രധാന അധ്യാപിക ഉഷാകുമാരി ടീച്ചറുടെ വീട്ടിലാണ് മൂർഖൻ പാമ്പിനെ കണ്ടെത്തിയത്. പാമ്പുപിടുത്തക്കാരൻ ഷൈൻ എത്തി പാമ്പിനെ പിടികൂടി വനം വകുപ്പിന് കൈമാറി. വീടിന്‍റെ മുൻവാതിലിലും പിൻവാതിലിലും നെറ്റ് ഘടിപ്പിച്ചിട്ടും അത് മറികടന്നാണ് പാമ്പ് കയറിയത്. കാലവർഷമായതോടെ ഇഴ ജന്തുക്കളുടെ ശല്യം വീടുകളിൽ വർധിച്ചിരിക്കുകയാണെന്ന് പെരിയാർ തീരവാസികൾ പറഞ്ഞു.

തെരുവുനായ ആക്രമണം; ഹ്യൂമൻ റൈറ്റ്സ് ഫോറം ഒപ്പുശേഖരണം നടത്തി

കളമശേരി: തെരുവുനായ അക്രമത്തിനെതിരെ ഹ്യൂമൻ റൈറ്റ്സ് ഫോറം ഒപ്പുശേഖരണം നടത്തി. കളമശേരി ഓർത്തഡോക്‌സ് പള്ളിയിൽ നടന്ന ചടങ്ങിൽ ഫാ. മാത്യു അറയ്ക്കൽ ആദ്യഒപ്പിട്ട് ഉദ്ഘാടനം നിർവ്വഹിച്ചു. ഫാ. സ്റ്റാൻലി അലക്സ് വിഷയാവതരണം നടത്തി. ഫോറം സംസ്ഥാന പ്രസിഡന്‍റ് ടി.കെ. അബ്ദു‌ൾ അസീസ് മുഖ്യ പ്രഭാഷണം നടത്തി. സംസ്ഥാന ഭാരവാഹികളായ കെ.‌എ. ആന്‍റണി, സജി നമ്പൂതിരി, കെ.കെ. അബ്‌ദുൽ റഹ്മാൻ, വി. ഖാദർ മാവേലി, മേരിക്കുട്ടി ജോർജ്, ഓമന തോമസ്, ജെ.ജെ. കുറ്റിക്കാട്ട്, കെ.ഡി. ഫ്രാൻസിസ് , കെ.എസ്. അബ്‌ദുൾസലാം, മെൽവിൻ മിനോയ്, രമേശ് ആലുവ, ഉണ്ണികൃഷ്‌ണൻ കളമശേരി എന്നിവർ സംബന്ധിച്ചു. മുഖ്യമന്ത്രിക്കും പ്രധാനമന്ത്രിക്കും ഹൈക്കോടതി-സുപ്രീംകോടതി ചീഫ് ജസ്റ്റിസുമാർക്കും ഭീമഹർജ്ജി നൽകുമെന്ന് ഫോറം ഭാരവാഹികൾ അറിയിച്ചു.

അങ്കമാലിയിലെ ലൈബ്രറികളിലേക്കു പുസ്തക വിതരണം ഇന്ന്

അങ്കമാലി: വായനയുടെ വിസ്മയ ലോകം തീര്‍ക്കാന്‍ അങ്കമാലി നിയോജകമണ്ഡലത്തിലെ സംസ്ഥാന ലൈബ്രറി കൗണ്‍സിലിന്‍റെ അംഗീകാരമുള്ള മുഴുവന്‍ ലൈബ്രറികള്‍ക്കും റോജി എം. ജോണ്‍ എംഎല്‍എയുടെ പ്രാദേശിക വികസന ഫണ്ട് വിനിയോഗിച്ച് വാങ്ങിയ പുസ്തകങ്ങളുടെ വിതരണോദ്ഘാടനം ഇന്ന് വൈകിട്ട് നാലിന് അങ്കമാലി ബ്ലോക്ക് പഞ്ചായത്ത് ഹാളില്‍നടക്കും. ചടങ്ങ് ഡോ. സുനില്‍ പി. ഇളയിടം ഉദ്ഘാടനം ചെയ്യും. റോജി എം. ജോണ്‍ എംഎൽഎ അധ്യക്ഷത വഹിക്കും. ലൈബ്രറി പ്രസ്ഥാനത്തെ ശക്തിപ്പെടുത്തി നാടിന്‍റെ മുക്കിലും മൂലയിലും വിദ്യാഭ്യാസ, സാംസ്കാരിക, സാമൂഹിക വളര്‍ച്ച സാധ്യമാക്കുക എന്ന ലക്ഷ്യത്തോടെ നിയമസഭാ സാമാജികരുടെ പ്രത്യേക വികസന നിധിയില്‍ നിന്ന് തുക ചിലവഴിച്ച് 51 വായനശാലകള്‍ക്കാണ് പുസ്തകങ്ങള്‍ നല്‍കുന്നത്. സംസ്ഥാന ലൈബ്രറി കൗണ്‍സില്‍ അംഗീകാരം ഉള്ള ഗ്രന്ഥശാലകള്‍ക്ക് ഒരു ചെറിയ കൈത്താങ്ങ് എന്ന നിലയില്‍ മുമ്പ് 48 ലൈബ്രറികള്‍ക്ക് എംഎല്‍എ ഫണ്ടില്‍ നിന്നും പുസ്തകങ്ങള്‍ വിതരണം ചെയ്തിരുന്നു. ചടങ്ങില്‍ ത്രിതല പഞ്ചായത്ത് ജനപ്രതിനിധികള്‍, കലാ-സാംസ്കാരിക രംഗത്തെ പ്രമുഖര്‍, ലൈബ്രറി കൗണ്‍സില്‍ അംഗങ്ങള്‍ തുടങ്ങിയവര്‍ പങ്കെടുക്കും.

വൈസ്മെൻ ഇന്‍റർനാഷണൽ ഏരിയാ കൺവൻഷനും ഭാരവാഹികളുടെ സ്ഥാനാരോഹണവും

നെടുമ്പാശേരി: വൈസ്മെൻ ഇന്‍റർനാഷണൽ 43-ാം ഇന്ത്യ ഏരിയാ കൺവൻഷനും ഭാരവാഹികളുടെ സ്ഥാനാരോഹണവും സേവനപദ്ധതികളുടെ ഉദ്ഘാടനവും അവാർഡ് നൈറ്റും നടന്നു. വൈസ്മെൻ ഇന്‍റർനാഷണൽ പ്രസിഡന്‍റ് അഡ്വ. എ. ഷാനവാസ്ഖാൻ ഉദ്ഘാടനം ചെയ്തു. ഏരിയാ പ്രസിഡന്‍റ് വി.എസ്. രാധാകൃഷ്ണൻ അധ്യക്ഷനായി. അഡ്വ. ബാബു ജോർജ് (പ്രസിഡന്‍റ്)ന്‍റെ നേതൃത്വത്തിലുള്ള ഭാരവാഹികളാണ് ചുമതലയേറ്റത്. ജോസഫ് വർഗീസ് (ഏരിയാ സെക്രട്ടറി), സി.എം. കയസ് (എക്സിക്യൂട്ടീവ് സെക്രട്ടറി), സുനിൽ ജോൺ (ട്രഷറർ), ജോബി ജോഷ്വാ (ബുള്ളറ്റിൻ എഡിറ്റർ), അജിത്ബാബു (വെബ്‌മാസ്റ്റർ), ബിനോയി പൗലോസ് (കാബിനറ്റ് സെക്രട്ടറി), പ്രഫ. കോശി തോമസ്(ചീഫ് കോ ഓർഡിനേറ്റർ), സിന്ധു തോമസ് (മെനറ്റ്സ് കോ ഓർഡിനേറ്റർ), ബി. പവിത്രൻ, ലൈജു ഫിലിപ്പ് (എഡിറ്റർമാർ), ഡോ. ബിജു മാന്തറയ്ക്കൽ (മീഡിയാ ആൻഡ് കമ്യൂണിക്കേഷൻ എരിയാ സെക്രട്ടറി), വർഗീസ്‌ പീറ്റർ (പിആർഒ) എന്നിവരാണ് ചുമതലയേറ്റ മറ്റ് ഭാരവാഹികൾ. ഇന്‍റർനാഷണൽ പ്രസിഡന്‍റ് എഡ്വാർഡ് ഓംഗ് (സിംഗപ്പൂർ) സ്ഥാനാരോഹണത്തിന് നേതൃത്വം നൽകി. ഇന്‍റർനാഷണൽ സെക്രട്ടറി ജനറൽ ജോസ് വർഗീസ്‌ മുഖ്യപ്രഭാഷണം നടത്തി. സേവന പദ്ധതിയായ റിനൽകെയർ ആൻഡ് ഡയാലിസിസ്‌ പദ്ധതി വൈഎംസിഎ ദേശീയ സെക്രട്ടറി എൻ.വി. എൽദോ ഉദ്ഘാടനം ചെയ്യും. പദ്ധതിയുടെ ഭാഗമായി 50 ആശുപത്രികളിൽ ഡയാലിസിസ് ‌യൂണിറ്റുകൾ സ്ഥാപിക്കുമെന്ന് ഭാരവാഹികൾ അറിയിച്ചു. 10,000 രോഗികൾക്ക് സൗജന്യ ഡയാലിസിസ് കൂപ്പണകളും നൽകും.

പുരസ്കാരമായി ലഭിച്ച പുസ്തകങ്ങൾ നാട്ടിലെ വായനശാലയ്ക്കു നൽകി അധ്യാപകൻ

ചെറായി: വായനാ ദിനത്തോടനുബന്ധിച്ച് നടന്ന പുസ്തക ആസ്വാദന മത്സരത്തിൽ സമ്മാനമായി ലഭിച്ച പുസ്തകങ്ങൾ എടവനക്കാട് എസ്ഡിപിവൈ കെപിഎം ഹൈസ്കൂളിലെ അധ്യാപകനായ കെ.ജി. ഹരികുമാർ നാട്ടിലെ വായനശാലക്ക് നൽകി. എടവനക്കാട് ഇക്ബാൽ സ്മാരക വായനശാലക്കാണ് പുസ്തകങ്ങൾ നൽകിയത്. വായനശാലാ പ്രസിഡന്‍റ് ബേസിൽ മുക്കത്ത്, ജോയിന്‍റ് സെക്രട്ടറി പി.പി. സജീവ് എന്നിവർ ചേർന്ന് ഏറ്റുവാങ്ങി.

കടൽ ഭിത്തിക്കായി കാട്ടിപ്പറന്പിൽ നാളെ നിരാഹാര സമരം

ഫോർട്ടുകൊച്ചി: പുത്തൻതോട് മുതൽ ബീച്ച് റോഡ് വരെ യുദ്ധകാലാടിസ്ഥാനത്തിൽ ഒറ്റ ഘട്ടമായി ടെട്രാപ്പോട് കടൽ ഭിത്തി നിർമാണം പൂർത്തിയാക്കണമെന്നാവശ്യപ്പട്ട് നാളെ നിരാഹാര സമരം സംഘടിപ്പിക്കുമെന്ന് ചെല്ലാനം - കൊച്ചി ജനകീയവേദി കൺവീനർ വി.ടി. സെബാസ്റ്റ്യനും വർക്കിംഗ് ചെയർമാൻ അഡ്വ. തുഷാർ നിർമലും അറിയിച്ചു. ചെല്ലാനം - കൊച്ചി തീരത്തെ കടൽ കയറ്റം പരിഹരിക്കാൻ തീര സംരക്ഷണ പദ്ധതിയെ സംബന്ധിച്ച് ജൂലൈ രണ്ടിനു ചേരുന്ന മന്ത്രിസഭാ യോഗം ചർച്ച ചെയ്യുമെന്ന് മന്ത്രി പി. രാജീവ് പത്ര സമ്മേളനത്തിൽ അറിയിച്ചിരുന്നു. ഈ പശ്ചാത്തലത്തിലാണ് തീര സംരക്ഷണത്തിനായി നടപ്പിലാക്കുന്ന പദ്ധതി പുത്തൻ തോട് മുതൽ ബീച്ച് റോഡ് വരെ ഒറ്റ ഘട്ടമായി നടപ്പിലാക്കണമെന്ന് ആവശ്യപ്പെട്ട് കൊണ്ട് കാട്ടിപ്പറമ്പ് സമരപ്പന്തലിൽ നിരാഹാര സമരം സംഘടിപ്പിക്കുന്നതെന്ന് ജനകീയവേദി കൺവീനർ വി.ടി.സെബാസ്റ്റ്യൻ, അഡ്വ. തുഷാർ നിർമൽ എന്നിവർ അറിയിച്ചു.

ബൈക്കും പിക്കപ്പും കൂട്ടിയിടിച്ച് യുവാവ് മരിച്ചു

തൃപ്പൂണിത്തുറ: ബൈക്കും പിക്കപ്പും കൂട്ടിയിടിച്ച് ബൈക്ക് യാത്രികനായ യുവാവ് തത്ക്ഷണം മരിച്ചു. ഉദയംപേരൂർ മാങ്കായിക്കവല പേരേപ്പറന്പിൽ ആന്‍റണിയുടെ മകൻ മനു ആന്‍റണി (32) ആണ് മരിച്ചത്. ശനിയാഴ്ച രാത്രി 9.30ഓടെ മാർക്കറ്റ് റോഡിൽ മേക്കര ഭാഗത്തായിരുന്നു അപകടം. സംസ്കാരം നടത്തി. മാർക്കറ്റിംഗ് ജീവനക്കാരനായിരുന്നു. മാതാവ്: ശോഭന. സഹോദരങ്ങൾ: സാം ആന്‍റണി, ജൂബി ജിനു.

ലഹരി വിരുദ്ധ ക്ലബ് ഉദ്ഘാടനം

വാഴക്കുളം: വെള്ളാരംകല്ല് ഹോളി ഫാമിലി പബ്ലിക് സ്കൂളിൽ ലഹരിവിരുദ്ധ ക്ലബ് ഉദ്ഘാടനവും ബോധവത്കരണ ക്ലാസും നടത്തി. മൂവാറ്റുപുഴ അസി. എക്സൈസ് ഇൻസ്പെക്ടർ എം.എ.കെ. ഫൈസൽ ഉദ്ഘാടനം ചെയ്തു. സി. ജ്യോതി അധ്യക്ഷത വഹിച്ചു. മാനേജർ സാലസ് കല്ലുപ്പുരയ്ക്കൽ മുഖ്യപ്രഭാഷണം നടത്തി. എം.എ.കെ. ഫൈസൽ ലഹരി വിരുദ്ധ ബോധവത്കരണ ക്ലാസ് നയിച്ചു. അധ്യാപകരായ പി.എ. സബീന, സി.കെ. റംസിമോൾ, സിബി മാനുവൽ, ഷൈജി ജോണ്‍, വിദ്യാർഥികളായ അഞ്ജന രാജേഷ്, റാം മാധവ് തുടങ്ങിയവർ പ്രസംഗിച്ചു.

കെഎച്ച്ആർഎ വിദ്യാഭ്യാസ പുരസ്കാരങ്ങൾ നൽകി

കൂത്താട്ടുകുളം: ഉന്നത വിജയം നേടിയ വിദ്യാർഥികളെ കേരള ഹോട്ടൽ ആൻഡ് റസ്റ്റോറന്‍റ് അസോസിയേഷൻ(കെഎച്ച്ആർഎ) കൂത്താട്ടുകുളം യൂണിറ്റിന്‍റെ ആഭിമുഖ്യത്തിൽ പുരസ്കാരങ്ങൾ നൽകി ആദരിച്ചു. നഗരസഭാ അധ്യക്ഷ വിജയ ശിവൻ ഉദ്ഘാടനം നിർവഹിച്ചു. കെഎച്ച്ആർഎ കൂത്താട്ടുകുളം യൂണിറ്റ് പ്രസിഡന്‍റ് പി.പി. ജോണി അധ്യക്ഷത വഹിച്ചു. സംസ്ഥാന പ്രസിഡന്‍റ് ജി. ജയപാൽ സമ്മാനവിതരണം നടത്തി. നഗരസഭാ വൈസ് ചെയർമാൻ സണ്ണി കുര്യാക്കോസ് പുരസ്കാരങ്ങൾ വിതരണം ചെയ്തു. കെഎച്ച്ആർഎ കൂത്താട്ടുകുളം യൂണിറ്റ് സെക്രട്ടറി ടി.കെ. മോഹൻ, ജില്ലാ പ്രസിഡന്‍റ് ടി.കെ. മനോഹരൻ, സെക്രട്ടറി കെ.ടി. റഹീം, ജില്ലാ വർക്കിംഗ് പ്രസിഡന്‍റ് കെ. പാർത്ഥസാരഥി, യൂണിറ്റ് ട്രഷറർ പീർ മുഹമ്മദ് തുടങ്ങിയവർ പ്രസംഗിച്ചു.

കോതമംഗലത്ത് സ്റ്റേഡിയത്തിനായി ബസ്‌സ്റ്റാൻഡിൽ ഫുട്ബോൾ കളിച്ച് യൂത്ത് ഫ്രണ്ട് പ്രതിഷേധം

കോതമംഗലം: യുഡിഎഫ് സർക്കാർ തുടക്കംകുറിച്ച ചേലാട് അന്താരാഷ്ട്ര സ്റ്റേഡിയം പദ്ധതി അട്ടമറിച്ചെന്ന് ആരോപിച്ച് കേരള കോണ്‍ഗ്രസ് ജില്ലാ കമ്മിറ്റിയുടെ ആഭിമുഖ്യത്തിൽ സ്വകാര്യ ബസ് സ്റ്റാൻഡിൽ ഫുട്ബോൾ കളിച്ച് പ്രതിഷേധിച്ചു. കോതമംഗലത്തിന് ഒരു അന്താരാഷ്ട്ര സ്റ്റേഡിയം എന്ന ആവശ്യവുമായി നടത്തിയ പ്രതിഷേധം ജില്ലാ പ്രസിഡന്‍റ് ഷിബു തെക്കുംപുറം ഉദ്ഘാടനം ചെയ്തു. എംഎൽഎയുടെ അനാസ്ഥയാണ് യുഡിഎഫിന്‍റെ സ്വപ്ന പദ്ധതിയായ സ്റ്റേഡിയ നിർമ്മാണം തടസപ്പെടാൻ കാരണമെന്ന് അദ്ദേഹം പറഞ്ഞു. യൂത്ത് ഫ്രണ്ട് ജില്ലാ പ്രസിഡന്‍റ് ജോഷ്വാ തായങ്കേരി അധ്യക്ഷത വഹിച്ചു. എ.ടി. പൗലോസ്, ജോമി തെക്കേക്കര, റോയി സ്കറിയ, സി.കെ. സത്യൻ, മാത്യു പുല്ലാട്ടേൽ, ബിജേഷ് പോൾ, ജോസ് കുര്യാക്കോസ്, ജേക്കബ് തോമസ്, ലെവിൻ ചുള്ളിയാടൻ, ജെറിൻ മാറാടി, എ. കിരണ്‍, മാത്യൂസ് ഔസേപ്പ്, ജോസ് മൂവാറ്റുപുഴ, ആദിത്യൻ കുട്ടൻ എന്നിവർ പങ്കെടുത്തു.

തൃപ്പൂണിത്തുറ-കരിമുകൾ റോഡിലെ ഡിടിപി സ്കീം പരിഷ്കരിച്ച് ഉത്തരവായി

കോലഞ്ചേരി: തൃപ്പൂണിത്തുറ-കരിമുകൾ റോഡിലെ ഡീറ്റയിൽഡ് ടൗൺ പ്ലാനിംഗ് സ്കീം പരിഷ്കരിച്ച് ഉത്തരവായതായി പി.വി. ശ്രീനിജിൻ എംഎൽഎ അറിയിച്ചു. കുന്നത്തുനാട് മണ്ഡലത്തിൽ ഉൾപ്പെടുന്ന പ്രസ്തുത റോഡിലെ ഡിടിപി വേരിയേഷൻ നടപടികൾ പൂർത്തിയാകാത്തതിനാൽ റോഡിനു സമീപം താമസിക്കുന്നവർക്ക് വീട് വയ്ക്കുന്നതിനോ മറ്റ് നിർമാണ പ്രവർത്തനങ്ങൾക്കോ പെർമിറ്റ് ലഭിക്കാത്തതടക്കം നിരവധി പ്രശ്നങ്ങൾ നാളുകളായി പ്രദേശവാസികൾ നേരിട്ടിരുന്നു. നിലവിലുള്ള സ്കീം വളരെ പഴക്കം ചെന്നതായതിനാൽ കാലാനുസൃതമായി ഇത് പരിഷ്കരിക്കണമെന്നും ഇതിനു വേണ്ടി തദ്ദേശ സ്വയംഭരണ വകുപ്പിലെ ഫയലിൽ വേഗത്തിൽ തീരുമാനമെടുക്കണമെന്നും ആവശ്യപ്പെട്ട് നിയമസഭയിൽ ചോദ്യമടക്കമുന്നയിച്ച് വിഷയം സർക്കാരിന്‍റെ ശ്രദ്ധയിൽ പെടുത്തിയിരുന്നു.

വൈഎംസിഎ ഗോൾഡൻ ജൂബിലി: ഓഡിറ്റോറിയത്തിന്‍റെ ഉദ്ഘാടനം നിർവഹിച്ചു

മൂവാറ്റുപുഴ: വൈഎംസിഎ ഗോൾഡൻ ജൂബിലി ആഘോഷവും പുതിയ ഓഡിറ്റോറിയത്തിന്‍റെ ഉദ്ഘാടനവും നടത്തി. മൂവാറ്റുപുഴ കോട്ടയം റോഡിൽ കബനി പാലസിനു സമീപം അത്യാധുനിക സംവിധാനങ്ങളോടെ ഗോൾഡൻ ജൂബിലി ആഘോഷത്തിന്‍റെ ഭാഗമായി നിർമിച്ചിരിക്കുന്ന ആധുനീക രീതിയിലുള്ള ഓഡിറ്റോറിയത്തിന്‍റെ ഉദ്ഘാടനം വൈഎംസിഎ സൗത്ത് വെസ്റ്റ് ഇന്ത്യ റീജിയണ്‍ ചെയർമാൻ പ്രഫ. അലക്സ് തോമസ് നിർവഹിച്ചു. തുടർന്ന് പൊതുസമ്മേളനം ഡീൻ കുര്യാക്കോസ് എംപി ഉദ്ഘാടനം ചെയ്തു. വെബ്സൈറ്റിന്‍റെ ഉദ്ഘാടനം ഫ്രാൻസിസ് ജോർജ് എംപിയും, കോണ്‍ഫറൻസ് ഹാൾ ഉദ്ഘാടനം മാറാടി പഞ്ചായത്ത് പ്രസിഡന്‍റ് ഒ.പി. ബേബിയും, ഡയറക്ടറിയുടെ ഉദ്ഘാടനം നഗരസഭാധ്യക്ഷൻ പി.പി. എൽദോസും നിർവഹിച്ചു. അംഗത്വ കാർഡ് വിതരണം സബ് റീജിയണ്‍ ചെയർമാൻ ബൈജു കുര്യാക്കോസ് നിർവഹിച്ചു. ചടങ്ങിൽ മുൻ പ്രസിഡന്‍റ് സി.എ ഡാനിയേൽ സ്കറിയയുടെ ഫോട്ടോ അനാച്ഛാദനം സ്ഥാപക പ്രസിഡന്‍റ് പ്രഫ. പി.ഐ. ഡാനിയേലും, അനുസ്മരണ പ്രഭാഷണം ഡോ. ജെയിംസ് മണിത്തോട്ടവും നിർവഹിച്ചു. ഡെന്‍റ് കെയർ മാനേജിംഗ് ഡയറക്ടർ ജോണ്‍ കുര്യാക്കോസ്, സാബു ജോണ്‍ തുടങ്ങിയവർ പ്രസംഗിച്ചു.

‘ഞാനും എന്‍റെ നാടിനൊപ്പം’ പങ്കാളികളായി വിദ്യാർഥികളും

വാഴക്കുളം: വാഴക്കുളത്ത് ആരംഭിക്കുന്ന സൗജന്യ ഡയാലിസിസ് സെന്‍ററിന്‍റെ നിർമാണ പ്രവർത്തനങ്ങൾക്കായി തങ്ങൾ സ്വരുക്കൂട്ടിയ കൊച്ചു സന്പാദ്യങ്ങളും നൽകി ആനിക്കാട് സെന്‍റ് ആന്‍റണീസ് എൽപി സ്കൂളിലെ വിദ്യാർഥികളും ‘ഞാനും എന്‍റെ നാടിനൊപ്പം’ പദ്ധതിയിൽ പങ്കാളികളായി. സ്കൂൾ അങ്കണത്തിൽ നടന്ന ചടങ്ങിൽ മാതാപിതാക്കൾക്കൊപ്പമെത്തിയാണ് വിദ്യാർഥികൾ തങ്ങളുടെ കൊച്ചു സന്പാദ്യങ്ങൾ കൈമാറിയത്. തുക സ്കൂൾ പ്രധാനാധ്യാപിക പ്രീമ സിമിക്സ് വാഴക്കുളം ചാരിറ്റബിൾ ട്രസ്റ്റ് ചെയർമാൻ സിജു സെബാസ്റ്റ്യനു കൈമാറി. യോഗത്തിൽ ഡയാലിസിസ് യൂണിറ്റുകളുടെ പ്രസക്തിയെക്കുറിച്ച് ജോണി മെതിപ്പാറ സംസാരിച്ചു. ആനിക്കാട് സെന്‍റ് ആന്‍റണീസ് പള്ളി അസിസ്റ്റന്‍റ് വികാരി ഫാ. തോമസ് മക്കോളിൽ, തോമസ് വർഗീസ് താണിക്കൽ എന്നിവർ പ്രസംഗിച്ചു.

ടി.എം. ജേക്കബ് എക്സലൻസ് അവാർഡ് വിതരണം ചെയ്തു

പിറവം: മുൻ മന്ത്രി ടി.എം. ജേക്കബിന്‍റെ പേരിൽ ടി.എം. ജേക്കബ് ചാരിറ്റബിൾ എക്സലൻസ് അവാർഡ് സൊസൈറ്റി ഏർപ്പെടുത്തിയ എക്സലൻസ് എംഎൽഎ അവാർഡ് വിതരണം ചെയ്തു. പിറവം നിയോജ മണ്ഡലത്തിലെ വിവിധ സർക്കാർ, എയ്ഡഡ്, അൺ എയ്ഡഡ് സ്കൂളുകളിൽ നിന്നും 10,12 ക്ലാസുകളിൾ എ പ്ലസ്, എ വൺ നേടിയ വിദ്യാര്‍ഥികളും, സര്‍വകലാശാലകളില്‍ ഉന്നത വിജയം കരസ്ഥമാക്കിയ വിദ്യാര്‍ഥികള്‍ക്കും ഉള്‍പ്പെടെ 775 വിദ്യാര്‍ഥികളെയാണ് പുരസ്കാരം നൽകി ആദരിച്ചത്. അനൂപ് ജേക്കബ് എംഎൽഎ ചടങ്ങ് ഉദ്ഘാടനം ചെയ്ത് പുരസ്കാരങ്ങൾ വിതരണം ചെയ്തു. പിറവം നഗരസഭാ ചെയര്‍പേഴ്സണ്‍ അഡ്വ. ജൂലി സാബു അധ്യക്ഷത വഹിച്ചു. വൈസ് ചെയർമാൻ കെ.പി. സലിം, വിസാറ്റ് കോളേജ് പ്രിൻസിപ്പൽ രാജു മാവുങ്കൽ, ഗുഡ് ഷെപ്പേർഡ് നഴ്സിംഗ് കോളജ് എംഡി ടോജോ ജോൺ, സുനില്‍ ഇടപ്പലക്കാട്ട്, കെ.ആര്‍. ജയകുമാര്‍ തുടങ്ങിയവർ പ്രസംഗിച്ചു.

വിശ്വാസ പൈതൃകം വിളിച്ചോതി രൂപത ദിനാഘോഷം

കാളിയാർ: വിശ്വാസ പൈതൃകം വിളിച്ചോതി കൃതജ്ഞതാ സ്തോത്രം ആലപിച്ച് കൂട്ടായ്മയുടെ ഇഴകൾ നെയ്ത് കാളിയാർ സെന്‍റ് റീത്താസ് ഫൊറോന പള്ളി പാരിഷ് ഹാളിൽ നടന്ന കോതമംഗലം രൂപത ദിനാഘോഷം പ്രൗഢ ഗംഭീരമായി. ബിഷപ് മാർ ജോർജ് മഠത്തിക്കണ്ടത്തിലിന്‍റെ മുഖ്യ കാർമികത്വത്തിൽ നടന്ന വിശുദ്ധ കുർബാനയോടെയായിരുന്നു ദിനാഘോഷത്തിന് തുടക്കം കുറിച്ചത്. തുടർന്ന് പ്രാർഥനാ മന്ത്രങ്ങളോടെ ചടങ്ങ് ആരംഭിച്ചു. മാർ ജോർജ് മഠത്തിക്കണ്ടത്തിൽ അധ്യക്ഷത വഹിച്ച യോഗത്തിൽ കാഞ്ഞിരപ്പള്ളി ബിഷപ് മാർ ജോസ് പുളിക്കൽ രൂപതദിന സന്ദേശം നൽകി. രൂപത വികാരി ജനറാൾ മോണ്‍. വിൻസെന്‍റ് നെടുങ്ങാട്ട് അവാർഡ് ജേതാക്കളെ പരിചയപ്പെടുത്തി. ഫാ. ആന്‍റണി ഉരുളിയാനിക്കൽ, സിസ്റ്റർ ആർക്ക് എയ്ഞ്ചൽ, ഡോ. ഇ.വി. ജോർജ് എന്നിവരെ മാർ ജോർജ് മഠത്തിക്കണ്ടത്തിൽ ആദരിച്ചു. ഡോ. ഇ.വി. ജോർജിനു വേണ്ടി ഭാര്യ വൽസമ്മ ജോർജ് മെമന്‍റോ ഏറ്റുവാങ്ങി. രൂപത വികാരി ജനറാൾ മോണ്‍. പയസ് മലേക്കണ്ടത്തിൽ, ഡീൻ കുര്യാക്കോസ് എംപി, ആന്‍റണി ജോണ്‍ എംഎൽഎ എന്നിവർ പ്രസംഗിച്ചു. വികാരി ഫാ. ജോസഫ് മുണ്ടുനടയിൽ സ്വാഗതവും പിആർഒ ജോർജ് കേളകം നന്ദിയും പറഞ്ഞു. ഫാ. മാത്യു മഞ്ഞക്കുന്നേൽ, കത്തോലിക്കാ കോണ്‍ഗ്രസ് രൂപത പ്രസിഡന്‍റ് സണ്ണി കടൂത്താഴെ, മാതൃവേദി രൂപത പ്രസിഡന്‍റ് ജാൻസി മാത്യു, കെസിവൈഎം രൂപത പ്രസിഡന്‍റ് സാവിയോ ജിജി, സിഎംഎൽ രൂപത പ്രസിഡന്‍റ് സജിൽ ജോർജ് എന്നിവർ നേതൃത്വം നൽകി. പ്രത്യാശയിൽ ഒരുമയോടെ മുന്നേറാം എന്ന ആപ്ത വാക്യം അനുസ്മരിച്ചായിരുന്നു സമ്മേളനം ആരംഭിച്ചത്. രൂപതയുടെ വിവിധ ഇടവകകളിൽ നിന്നുള്ള വൈദികർ, മിഷണറി വൈദികർ, കന്യാസ്ത്രീകൾ, ഭക്ത സംഘടനാ ഭാരവാഹികൾ, വിശ്വാസ പരിശീലകർ ഉൾപ്പെടെ നൂറുകണക്കിന് വിശ്വാസികൾ ദിനാഘോഷത്തിൽ അണിചേരാനെത്തി. പാരീഷ് ഹാളും പരിസരവും നിറഞ്ഞ സദസിനെ സാക്ഷി നിർത്തിയാണ് സമ്മേളനം നടന്നത്. തിന്മയ്ക്കെതിരെ പോരാടണം: മാർ മഠത്തിക്കണ്ടത്തിൽ കാളിയാർ: സമൂഹത്തിൽ വർധിച്ചു വരുന്ന ലഹരി വസ്തുക്കളുടെ ഉപയോഗത്തിനെതിരെയും അരാജകത്വത്തിനെതിരെയും ഒന്നിച്ചു പോരാടണമെന്ന് കോതമംഗലം ബിഷപ് മാർ ജോർജ് മഠത്തിക്കണ്ടത്തിൽ. കാടിറങ്ങി വരുന്നു, കടൽ കയറി വരുന്നു എന്ന ഗുരുതരമായ സ്ഥിതിയാണ് ഇന്ന് നാട്ടിലുള്ളത്. തൊമ്മൻകുത്തിൽ കുരിശു തകർത്ത സംഭവം എല്ലാവരും ഒരുമിച്ചു നിൽക്കേണ്ടതിന്‍റെ ആവശ്യകതയാണ് വ്യക്തമാക്കുന്നത്. തിന്മ നിറഞ്ഞ സമൂഹത്തിൽ യഥാർഥ സാക്ഷ്യം നൽകാൻ വിശ്വാസികൾ മുന്നോട്ടു വരണമെന്നും അദ്ദേഹം ആഹ്വാനം ചെയ്തു. സമൂഹത്തിൽ അവഗണിക്കപ്പെട്ടവർക്കും അശരണർക്കും കാവലും കരുതലുമാകണമെന്ന് കാഞ്ഞിരപ്പള്ളി രൂപത ബിഷപ് മാർ ജോസ് പുളിക്കൽ പറഞ്ഞു. സാമൂഹിക മാറ്റത്തിന്‍റെ ചാലക ശക്തിയായി നാം മാറണം. വർഗീയതയും ലഹരി വസ്തുക്കളുടെ ഉപയോഗവും വർധിച്ചുവരുന്ന കാലഘട്ടത്തിൽ ഇതിനെതിരെ ഒന്നിച്ചുനിന്ന് പോരാടണമെന്നും വിശുദ്ധ കുർബാനയിൽ നിന്നും ശക്തി സ്വീകരിച്ച് കൂട്ടായ്മയിൽ വളർന്നാലെ ഇതിനു കഴിയൂവെന്നും ബിഷപ് കൂട്ടിച്ചേർത്തു.

ഇഞ്ചിപ്പാറയിൽ ഇടിമിന്നലേറ്റ് വീട് ഭാഗികമായി തകർന്നു

കോതമംഗലം: കവളങ്ങാട് ഇഞ്ചിപ്പാറയിൽ ഇടിമിന്നലേറ്റ് വീട് ഭാഗികമായി തകർന്നു. ഗൃഹനാഥനും മാതാവിനും പരിക്ക്. ഇഞ്ചിപ്പാറ മോളത്തുകുടി വർഗീസിന്‍റെ വീടാണ് ഇടിമിന്നലേറ്റു ഭാഗികമായി തകർന്നത്. വർഗീസിനും മാതാവ് അന്നമ്മയ്ക്കും നിസാര പരിക്കേറ്റു. ഇവർ താലൂക്കു ആശുപത്രിയിൽ ചികിത്സ തേടി. മിന്നലിൽ വീടിന്‍റെ അടുക്കള ഭാഗത്തെ ഭിത്തിയുടെ സിമന്‍റെ ഇഷ്ടികകൾ തെറിച്ചുപോയി. വീടിന്‍റെ മുൻവശത്തെ കോൺക്രീറ്റ് തൂൺ ഭാഗികമായി തകർന്നു. വൈദ്യുതിബന്ധവും തകരാറിലായി. വീടിന് ബലക്ഷയവും ഉണ്ടായിട്ടുണ്ട്.

മാറാടിയിൽ പ്ലൈവുഡ് കന്പനികൾക്ക് അനുമതി നിഷേധിച്ചു

മൂവാറ്റുപുഴ: മാറാടിയിൽ പ്ലൈവുഡ് കന്പനിക്ക് പഞ്ചായത്ത് കമ്മിറ്റി അനുമതി നിഷേധിച്ചു. 13-ാം വാർഡിൽ രണ്ടു പ്ലൈവുഡ് നിർമാണ യൂണിറ്റുകൾ ആരംഭിക്കുന്നതിനുള്ള അനുമതിക്കായി ഹാജരാക്കിയിരുന്ന അപേക്ഷകളാണ് പഞ്ചായത്ത് കമ്മിറ്റി നിരസിച്ചത്. പ്രദേശത്തെ ജനങ്ങളുടെ സ്വൈര്യ ജീവിതത്തെയും ആരോഗ്യത്തെയും ഹാനികരമായി ബാധിക്കുമെന്നുള്ളതിനാലും പ്രദേശത്തെ ജനങ്ങളുടെ ശക്തമായ പ്രതിഷേധത്തെത്തുടർന്നുമാണ് പഞ്ചായത്ത് കമ്മിറ്റി അനുമതി നിരസിച്ചതെന്ന് പ്രസിഡന്‍റ് ഒ.പി. ബേബി, സ്ഥിരംസമിതി അധ്യക്ഷൻ ബിജു കുര്യാക്കോസ് എന്നിവർ അറിയിച്ചു.

മഴക്കെടുതി: നഷ്ടപരിഹാരം നൽകണമെന്ന്

മൂവാറ്റുപുഴ: മഴക്കെടുതികളിൽ ആശ്വാസ നടപടികളും, ജീവനും സ്വത്തും നഷ്ടപ്പെട്ടവർക്ക് അടിയന്തിരമായി നഷ്ടപരിഹാരം നൽകുവാനും തീരുമാനമുണ്ടാകണമെന്ന് ആർഎംപിഐ എറണാകുളം ജില്ലാ കമ്മിറ്റി സർക്കാരിനോട് ആവശ്യപ്പെട്ടു. യോഗത്തിൽ ആർഎംപിഐ എറണാകുളം ജില്ലാ പ്രസിഡന്‍റ് വിനോയ് താണികൂന്നേൽ അധ്യക്ഷത വഹിച്ചു. സെക്രട്ടറി ജയ്സണ്‍ പൂക്കുന്നേൽ, പി.ടി മോഹനൻ, തങ്കൻ നേര്യമംഗലം, എൽദോസ് പറന്പാത്ത്, ഷിബു വെളിയന്നൂർകാരൻ, ബേബി കാരക്കാട്ട്, സിറിൽ ബസ്റ്റിൻ കുരിശിങ്കൽ എന്നിവർ പ്രസംഗിച്ചു.

തനിമ കലാ സാംസ്കാരിക വേദി ഉദ്ഘാടനം നാളെ

കളമശേരി: വട്ടേക്കുന്നം തനിമ കലാസാംസ്കാരിക വേദിയുടെ ഉദ്ഘാടനം നാളെ ഇടപ്പള്ളി ചങ്ങമ്പുഴ പാർക്കിൽ തിരക്കഥാകൃത്ത് ബാബു പള്ളാശേരി നിർവഹിക്കും. തനിമ പ്രസിഡന്‍റ് കെ.എ. റഫീക്ക് അധ്യക്ഷത വഹിക്കും. നഗരസഭാ കൗൺസിലർമാരും കല, സാഹിത്യ രംഗത്തെ പ്രമുഖരും പങ്കെടുക്കും. കളമശേരിയിൽ നടന്ന വാർത്താസമ്മേളനത്തിൽ ഭാരവാഹികളായ വേണുഗോപാൽ, ഗോപകുമാർ രാജൻ, പ്രഭ ആർ.എസ്, അജിത്, പ്രമോദ്, ജിജി അജിത് എന്നിവർ പങ്കെടുത്തു.

മികവ് 2025 അവാര്‍ഡ് വിതരണം ഇന്ന്

കൊച്ചി: ടി.ജെ. വിനോദ് എംഎല്‍എയുടെ നേതൃത്വത്തില്‍ നടത്തുന്ന മികവ് 2025 അവാര്‍ഡ് വിതരണം ഇന്ന് എറണാകുളത്ത് നടക്കും. സെന്‍റ് തെരേസാസ് കോളജ് ഓഡിറ്റോറിയത്തില്‍ നടക്കുന്ന ചടങ്ങ് മുന്‍ പ്രതിപക്ഷനേതാവ് രമേശ് ചെന്നിത്തല ഉദ്ഘാടനം ചെയ്യും. അവാര്‍ഡിന് അര്‍ഹതയുള്ള എറണാകുളം നിയമസഭ നിയോജക മണ്ഡല പരിധിയിലുള്ള സ്‌കൂളുകളിലെ വിദ്യാര്‍ഥികള്‍, മണ്ഡലത്തില്‍ താമസിക്കുന്ന മറ്റ് സ്‌കൂളുകളിലെ വിദ്യാര്‍ഥികള്‍ തുടങ്ങിയവര്‍ക്ക് ചടങ്ങില്‍ പങ്കെടുക്കാം. പങ്കെടുക്കുന്നവര്‍ക്കുള്ള രജിസ്‌ട്രേഷന്‍ രാവിലെ 7.30 ന് ആരംഭിക്കും.

ആലുവയിൽ സ്പർശനോദ്യാനം തുറന്നു

ആലുവ: കാഴ്ചവെല്ലുവിളികൾ നേരിടുന്നവർക്ക് പ്രകൃതി പാഠങ്ങൾ അനുഭവിച്ചറിയാൻ ആലുവ സ്കൂൾ ഫോർ ദി ബ്ലൈൻഡിൽ സ്പർശനോദ്യാനം തുറന്നു. വർണക്കാഴ്ചകൾ അന്യമാണെങ്കിലും പൂക്കളെ സ്പർശിച്ചും സുഗന്ധം ആവാഹിച്ചും പക്ഷികളുടെ കലപില ശബ്ദങ്ങളും കേട്ടും ഇവിടെ അന്ധ വിദ്യാർഥികൾക്ക് ആസ്വദിക്കാം. ലയൺസ് ക്ലബ്ബ് ഡിസ്ട്രിക്ട് ഗവർണർ ലയൺ രാജൻ എൻ. നമ്പൂതിരി പാർക്ക് ഉദ്ഘാടനം ചെയ്തു. സ്കൂൾ മാനേജർ ടി.ജെ. ജോൺ അധ്യക്ഷത വഹിച്ചു. കുര്യൻ ജോൺ, വിനിത നിബു, ഫാ. ജോൺ കെ. ജേക്കബ്, പ്രധാനാധ്യാപിക ജിജി വർഗീസ് എന്നിവർ പ്രസംഗിച്ചു. ഹെലൻ കെല്ലറുടെ 146-ാമത് ജന്മദിനാചരണത്തിന്‍റെ ഭാഗമായാണ് ഈ സെൻസറി ഗാർഡൻ നിർമിച്ചത്. വൈവിധ്യമാർന്ന ഔഷധ സസ്യങ്ങൾ, പൂച്ചെടികൾ, ശലഭോദ്യാനം, പച്ചക്കറിത്തോട്ടം, ജലധാര, സ്പർശന നടപ്പാത എന്നിവ ഉൾപ്പെടുന്നതാണ് സ്പർശനോദ്യാനം.

കണ്ണമാലിയിലേക്ക് അരിയും പലവ്യഞ്ജനങ്ങളും നല്കി ബിസിസി കൊച്ചി രൂപത

ഫോർട്ടുകൊച്ചി: കടൽകയറ്റം മൂലം ദുരിതമനുഭവിക്കുന്ന കണ്ണമാലി- ചെറിയ കടവിലേക്ക് 15 ചാക്ക് അരിയും നിത്യോപയോഗ സാധനങ്ങളും നല്കി ബിസിസി കൊച്ചി രൂപത. കണ്ണമാലി സെന്‍റ് ആന്‍റണീസ് പള്ളിയിൽ വികാരി ഫാ. ജോപ്പൻ അണ്ടിശേരിയും ചെറിയകടവിൽ വികാരി ഫാ. സെബാസ്റ്റ്യൻ പനച്ചിക്കലും ഭക്ഷ്യകിറ്റുകൾ ഏറ്റുവാങ്ങി. രൂപത കൺവീനർ പോൾ ബെന്നി പുളിക്കൽ, സെക്രട്ടറി പീറ്റർ പി. ജോർജ്, ഖജാൻജി മാർഗരേറ്റ് ലോറൻസ്, ജോ അമ്പലത്തുങ്കൽ, ലാലു നീണ്ടകര,സോണി ആലുങ്കൽ തുടങ്ങിയവർ വിതരണത്തിന് നേതൃത്വം നല്കി.

റൂറൽ ജില്ലയിൽ 10 പോലീസ് ഉദ്യോഗസ്ഥർക്ക് ബാഡ്ജ് ഓഫ് ഓണർ

ആലുവ: റൂറൽ ജില്ലയിൽ നിന്നുള്ള പത്ത് പോലീസുദ്യോഗസ്ഥർ മികച്ച സേവനത്തിനുള്ള ബാഡ്ജ്ഓഫ് ഓണർ ഡിജിപി ഡോ. ഷെയ്ക്ക് ദർവേഷ് സാഹിബിൽ നിന്ന് ഏറ്റുവാങ്ങി. വിവേക് കുമാർ (മുൻ റൂറൽ എസ്പി) എം.എം. മഞ്ജുദാസ് (ഇൻസ്പെക്ടർ) എസ്.എസ്. ശ്രീലാൽ (എസ്ഐ) എ.കെ. സന്തോഷ് കുമാർ (എസ്ഐ), ജി.എസ്. അരുൺ (എസ്ഐ), ബോബി കുര്യാക്കോസ് (എഎസ്ഐ), കെ.ബി. പ്രസാദ്' (എഎസ്ഐ), എൻ.എം. മുഹമ്മദ് അമീർ (സിപിഒ), മാഹിൻ ഷാ അബൂബക്കർ (സിപിഒ), കെ.എം. മനോജ് (സിപിഒ) എന്നിവരാണ് ബഹുമതി ഏറ്റുവാങ്ങിയത്.

പെൻഷൻ വിതരണോദ്ഘാടനവും വിദ്യാഭ്യാസ അവാർഡ് ദാനവും

നെടുമ്പാശേരി : നെടുമ്പാശേരി സഹകരണ ബാങ്കിന്‍റെ സഹകാരി പെൻഷൻ വിതരണോദ്ഘാടനവും വിദ്യാഭ്യാസ അവാർഡ് ദാനവും നടത്തി. മുൻ എംഎൽഎ എം.എ. ചന്ദ്രശേഖരൻ യോഗം ഉദ്ഘാടനം ചെയ്തു. ബാങ്ക് പ്രസിഡന്‍റ് പി.പി. ഐസക് അധ്യക്ഷത വഹിച്ചു. ബാങ്ക് വൈസ് പ്രസിഡന്‍റ് ബിജി ഗോപി, പഞ്ചായത്ത് സ്റ്റാൻഡിംഗ് കമ്മിറ്റി ചെയർപേഴ്സൺ ബിജി സുരേഷ്, പഞ്ചായത്ത് മെമ്പർ കെ.എ. വറിയത്, എയർപോർട്ട് വെൽഫയർ സൊസൈറ്റി പ്രസിഡന്‍റ് പി.ജെ. ജോയ് തുടങ്ങിയവർ സംസാരിച്ചു.

നവീകരിച്ച അങ്കണവാടി ഉദ്ഘാടനം ഇന്ന്

പെരുമ്പാവൂര്‍: രണ്ടര പതിറ്റാണ്ട് കാത്തിരിപ്പിനൊടുവില്‍ കൂവപ്പടി പഞ്ചായത്തിലെ 11-ാം വാര്‍ഡില്‍ ഐമുറി കൊട്ടമ്പിള്ളിക്കുടി അങ്കണവാടി മന്ദിരം ഉദ്ഘാടനം ഇന്നു രാവിലെ 10.30 ന് നടക്കും. ജില്ലാ പഞ്ചായത്ത് പ്രസിഡന്‍റ് മനോജ് മൂത്തേടന്‍റെ വികസന ഫണ്ടില്‍ നിന്ന് അനുവദിച്ച 23 ലക്ഷം രൂപ ചെലവഴിച്ചാണ് ശീതികരിച്ച അങ്കണവാടി മന്ദിരം നിര്‍മിച്ചത്. 25 വര്‍ഷം മുന്‍പ് ആരംഭിച്ച അങ്കണവാടിക്ക് സ്വന്തമായി സ്ഥലമില്ലാതിരുന്നതിനാല്‍ വിവിധ വാടകക്കെട്ടിടങ്ങളിലാണ് പ്രവര്‍ത്തിച്ചിരുന്നത്. വര്‍ഷങ്ങളായി സ്വന്തമായി സ്ഥലം ലഭ്യമാക്കുന്നതിന് പല വിധത്തിലുള്ള ശ്രമങ്ങള്‍ നടത്തിയതിനൊടുവില്‍ അഞ്ച് വര്‍ഷം മുന്‍പ് മനോജ് മൂത്തേടന്‍ ബ്ലോക്ക് പഞ്ചായത്ത് അംഗമായിരുന്നപ്പോഴാണ് കോന്നന്‍കുടി ഷൈജ ജോണിയുടെ കുടുംബവുമായി ചര്‍ച്ച നടത്തിയതിന്‍റെ അടിസ്ഥാനത്തില്‍ മൂന്ന് സെന്‍റ് സ്ഥലം സൗജന്യമായി അവര്‍ വിട്ടു നല്‍കിയത്. ചടങ്ങിൽ ജില്ലാ പഞ്ചായത്ത് പ്രസിഡന്‍റ് അധ്യക്ഷത വഹിക്കും. എല്‍ദോസ് കുന്നപ്പിള്ളി മുഖ്യാതിഥയായി പങ്കെടുക്കും. പഞ്ചായത്ത് പ്രസിഡന്‍റ് മായ കൃഷ്ണകുമാര്‍, വൈസ് പ്രസിഡന്‍റ് എം.ഒ. ജോസ്, പഞ്ചായത്ത് സ്ഥിരം സമിതി ചെയര്‍മാന്‍ കെ.പി. ചാര്‍ളി, ബ്ലോക്ക് പഞ്ചായത്തംഗം മോളി തോമസ്, ത്രിതല പഞ്ചായത്ത് ജനപ്രതിനിധികള്‍, വാര്‍ഡ് വികസന സമിതിയംഗങ്ങള്‍ തുടങ്ങിയവര്‍ പങ്കെടുക്കും.

കേസരി ഗവൺമെന്‍റ് കോളജിൽ 70 വിദ്യാർഥികൾക്ക് പ്രവേശനം

പറവൂർ: സർക്കാർ കോളജ് എന്ന നിലയിൽ ജൂലൈ ഒന്നിന് ആദ്യ അധ്യയന വർഷം തുടങ്ങുന്ന കേസരി ഗവ. കോളജിൽ മൂന്നു ഡിഗ്രി ഒന്നാം കോഴ്‌സുകളിലായി 70 വിദ്യാർഥികൾ പ്രവേശനം നേടി. ബികോം, ബിഎസ്‌സി സൈബർ ഫൊറൻസിക്, ബിഎ ജേണലിസം ആൻഡ് മാസ് കമ്യൂണിക്കേഷൻ എന്നീ കോഴ്‌സുകളിലായി ആകെ 85 സീറ്റുകളുണ്ട്. ഒഴിവുള്ള സീറ്റുകളിൽ പ്രവേശനം ആഗ്രഹിക്കുന്നവർക്കു ജൂലൈ ഒന്നു മുതൽ മൂന്നു വരെ തീയതികളിൽ എംജി യൂണിവേഴ്‌സിറ്റി പ്രവേശന പോർട്ടലായ cap.mgu.ac.in റജിസ്‌റ്റർ ചെയ്യാം. രണ്ടിനും മൂന്നിനും മൂന്നിനും കോളജ് അഡ്മ‌ിഷൻ ഹെൽപ് ഡെസ്കിന്‍റെ സഹായവും തേടാം. കോളജിൽ നേരിട്ടു ഹാജരാകുന്നവർ റജിസ്ട്രേഷന് ആവശ്യമായ അസൽ രേഖകൾ കൊണ്ടുവരണം. ഇതുവരെ അപേക്ഷിക്കാൻ സാധിക്കാതിരുന്നവർക്കും മുൻപ് അപേക്ഷിച്ചവർക്കും മറ്റു കോളജുകളിൽ സ്‌ഥിര പ്രവേശമെടുത്തവർക്കും ഇതുവരെ അലോട്മെന്‍റ് ലഭിക്കാത്തവർക്കും അലോട്‌മെന്‍റ് റദ്ദായവർക്കും പുതുതായി ഓപ്ഷനുകൾ നൽകാമെന്നു പ്രിൻസിപ്പൽ അറിയിച്ചു.

കറുകുറ്റി പഞ്ചായത്തിൽ 53 തെരുവ് കാമറകൾ സ്ഥാപിച്ചു

അങ്കമാലി: കറുകുറ്റി പഞ്ചായത്തിൽ വിവിധ വാർഡുകളിലായി 53 തെരുവ് കാമറകളിൽ സ്ഥാപിച്ചു. കാമറകളുടെ സ്വിച്ച് ഓൺ കർമം റോജി എം. ജോൺ എംഎൽ എ നിർവഹിച്ചു. പഞ്ചായത്ത് പ്രസിഡന്‍റ് ലതിക ശശികുമാർ അധ്യക്ഷത വഹിച്ചു. ബെന്നി ബഹനാൻ എംപി മുഖ്യാതിഥിയായിരുന്നു. ഭാഗമായി പഞ്ചായത്തിന്‍റെ പൊതു ഇടങ്ങളിൽ മാലിന്യങ്ങൾ വലിച്ചെറിയുന്നത് തടയുന്നതിനും ലഹരി വ്യാപനത്തിന് തടയുന്നതിനും, കുറ്റകൃത്യങ്ങൾ ചെയ്തവരെ കണ്ടെത്തുന്നതിനും ഈ തെരുവ് കാമറകൾ ഉപകരിക്കും. പഞ്ചായത്തിലും, പോലീസ് സ്റ്റേഷനിലേക്കും കാമറകളെ ബന്ധപ്പെടുത്തിയിട്ടുണ്ട്. ജില്ലയിൽ ഇത്രയധികം തെരുവുകാമറകൾ സ്ഥാപിച്ച പഞ്ചായത്ത് കറുകുറ്റിയാണ്. പഞ്ചായത്ത് വൈസ് പ്രസിഡന്‍റ് ഷൈജോ പറമ്പി, ജില്ലാ പഞ്ചായത്തംഗം ഷൈനി ജോർജ്, ബ്ലോക്ക് പഞ്ചായത്ത് സ്ഥിരംസമിതി അധ്യക്ഷന്മാരായ റാണി പോളി, മേരി പൈലി, കെ.പി. അയ്യപ്പൻ, മേരി ആന്‍റണി, ബ്ലോക്ക് പഞ്ചായത്തംഗം ഷിജി ജോയി, പഞ്ചായത്തംഗങ്ങളായ റോസിലി മൈക്കിൾ, ടോണി പറപ്പിള്ളി, ജോണി മൈപ്പാൻ, രനിത ഷാബു, ജിജോ പോൾ, റോസി പോൾ, മിനി ഡേവിസ്, ജിഷ സുനിൽകുമാർ, ആൽബി വർഗീസ്, റോയ് ഗോപുരത്തിങ്കൽ, ജോളി ജോർജ്, കരയാംപറമ്പ് സഹകരണ ബാങ്ക് പ്രസിഡന്‍റ് ജോണി പള്ളിപ്പാടൻ, ശാന്താദേവി ടീച്ചർ, ജോജി പീറ്റർ, ജോസ് ചക്യത്ത്, ഡേവിഡ് ജെ. പൈനാടത്ത് എന്നിവർ പ്രസംഗിച്ചു.

മരട്,നെട്ടൂർ മേഖലയിൽ കുടിവെള്ള ക്ഷാമം : വാട്ടർ അഥോറിറ്റി ചീഫ് എൻജിനീയറെ ഉപരോധിച്ചു

മരട്: മരട്, നെട്ടൂർ മേഖലയിൽ അനുഭവപ്പെടുന്ന അതിരൂക്ഷമായ കുടിവെള്ളക്ഷാമം പരിഹരിക്കണമെന്നാവശ്യപ്പെട്ട് മരട് നഗരസഭ ചെയർമാൻ ആന്‍റണി ആശാംപറമ്പിലിന്‍റെ നേതൃത്വത്തിൽ നഗരസഭയിലെ ഭരണ, പ്രതിപക്ഷ അംഗങ്ങൾ വാട്ടർ അഥോറിറ്റി ചീഫ് എൻജിനീയറെ ഉപരോധിച്ചു. നെട്ടൂർ, മരട് മേഖലയിലെ 15 ഓളം വാർഡുകളിലാണ് കുടിവെള്ളക്ഷാമം രൂക്ഷമായിരിക്കുന്നത്. ചില വാർഡുകളിൽ 15 ദിവസത്തോളം കുടിവെള്ളം ലഭിക്കാത്ത സാഹചര്യമുണ്ടായതിനെ തുടർന്ന് തൃപ്പൂണിത്തുറ അസിസ്റ്റന്‍റ് എക്സിക്യൂട്ടീവ് എൻജിനീയറുടെ കാര്യാലയത്തിൽ നഗരസഭ ചെയർമാന്‍റെയും കൗൺസിലർമാരുടെയും നേതൃത്വത്തിൽ പ്രതിഷേധ പരിപാടികൾ നടത്തിയിരുന്നു. ഇതേ തുടർന്ന് എക്സിക്യൂട്ടീവ് എൻജിനീയർ സ്ഥലം സന്ദർശിച്ചെങ്കിലും പ്രശ്നങ്ങൾക്ക് പരിഹാരമുണ്ടാകാത്തതിനെ തുടർന്നാണ് ശനിയാഴ്ച ചീഫ് എൻജിനീയറെ ഉപരോധിച്ചത്. 19 ഓളം ലീക്കുകളാണ് മരട് നഗരസഭയിലുള്ളതെന്നും നിലവിൽ ലീക്ക് മാറ്റുന്നതിനായി നിയോഗിച്ചിട്ടുള്ള ആളുകളെ കൂടാതെ കൂടുതൽ പേരെ ഇതിനായി നിയോഗിക്കാമെന്നും ചീഫ് എൻജിനീയർ വി.കെ. പ്രദീപ് അറിയിച്ചു. ഏഴു ഗ്രൂപ്പുകളായി തിരിഞ്ഞ് രണ്ട് ദിവസത്തിനകം പ്രശ്നം പരിഹരിക്കാമെന്ന ഉറപ്പ് എൻജിനീയർ നൽകിയതോടെയാണ് ഉച്ചയോടെ ഉപരോധം അവസാനിപ്പിച്ചത്. നഗരസഭാ സ്റ്റാൻഡിംഗ് കമ്മിറ്റി ചെയർമാൻമാരായ ബേബി പോൾ, ശോഭ ചന്ദ്രൻ, കൗൺസിലർമാരായ സി.ആർ.ഷാനവാസ്, പി.ഡി.രാജേഷ്, ചന്ദ്രകലാധരൻ, ദിഷ പ്രതാപൻ, ജയ ജോസഫ്, മിനി ഷാജി, സി.വി. സന്തോഷ്, ശാലിനി അനിൽരാജ്, ഉഷ സഹദേവൻ, ഇ.പി. ബിന്ദു തുടങ്ങിവരും പങ്കെടുത്തു.

കിഴക്കന്പലത്തെ മൃഗാശുപത്രി കെട്ടിടത്തിന്‍റെ ഭിത്തി അടർന്നുവീണ് ജീവനക്കാരിക്കു പരിക്ക്

കിഴക്കന്പലം: കിഴക്കമ്പലം ഗ്രാമപഞ്ചായത്ത് കോന്പൗണ്ടിനോട് ചേർന്ന് പ്രവർത്തിക്കുന്ന മൃഗാശുപത്രി ശോച്യാവസ്ഥയിൽ. ഇന്നലെ വൈകുന്നേരം ആശുപത്രിയിലെ ജീവനക്കാരി അറ്റൻഡർക്ക് ഭിത്തിയുടെ ഒരു ഭാഗം അടർന്നുവീണ് തലയ്ക്കും തോളിനും പരിക്കേറ്റു. സംഭവം ഡോക്ടർ പഞ്ചായത്തു സെക്രട്ടറിയെ അറിയിച്ചതിനെത്തുടർന്ന് സെക്രട്ടറി മൃഗാശുപത്രിയിൽ അന്വേഷണം നടത്തി മടങ്ങി. ശക്തമായ മഴയിൽ മേൽക്കൂരയിൽ നിന്ന് വെള്ളം ഭിത്തിയിലൂടെ ചോർന്നൊലിച്ച് ഭിത്തിയുടെയും മുകൾ ഭാഗത്തെ വാർക്കയുടെയും ഭാഗങ്ങൾ അടർന്നുവീണുകൊണ്ടിരിക്കുകയാണ്. കെട്ടിടം ഏതു സമയവും നിലംപൊത്താവുന്ന അസ്ഥയിലാണ്. ശക്തമായ മഴയിൽ മഴവെള്ളം അകത്തു കയറുന്നതും പതിവാണ്. സ്റ്റോറിൽ സൂക്ഷിച്ചിരിക്കുന്ന ലക്ഷക്കണക്കിന് വിലയുളള മരുന്നുകളെയും സുരക്ഷാ പ്രശ്നം ബാധിക്കുന്നുണ്ട്. ഭിത്തികളിലെ തേപ്പ് അടർന്നു വീഴുന്നതും പതിവായി. ആശുപത്രിയുടെ അപകടാവസ്ഥയും പുതിയ കെട്ടിടത്തിന്‍റെ ആവശ്യകതയും അടിയന്തിര നിർമിതിയും ആവശ്യമാണെന്ന് ത്യണമുൽ കോൺഗ്രസ് സംസ്ഥാന ജനറൽ സെക്രട്ടറി എൽദോ എബ്രഹാം പത്രകുറിപ്പിൽ അറിയിച്ചു. 24 മണിക്കൂറും ഡോക്ടർ ഉൾപ്പടെ നാലു പേരാണ് ഇവിടെ ജോലി ചെയ്യുന്നത്. ആശുപത്രിയുടെ ശോച്യാവസ്ഥ മൂലം ജീവനക്കാരുടെ ജീവൻ അപകടത്തിലാണെന്നും പ്രസ്താവനയിൽ പറഞ്ഞു. അത്യാവശ്യഘട്ടങ്ങളിൽ സഹായമെത്തിക്കാനായി രാത്രിയും ഒരു ഡോക്ടറും ഒരു അറ്റൻഡറും ഇവിടെ ഉണ്ടാകാറുണ്ട്.

ഓണത്തിന് "മുറ്റം നിറയെ പച്ചക്കറി'യുമായി വ്യാപാരികൾ

ഏലൂർ: ഓണത്തിന് മുറ്റം നിറയെ പച്ചക്കറിയുമായി വ്യാപാരി വ്യവസായി ഏകോപന സമിതി ഏലൂർ യൂണിറ്റ്. ഞാറ്റുവേലയിൽ വനിതാ വിംഗ് പ്രസിഡന്‍റ് സുബൈദാ നൂറുദ്ദീന് പച്ചക്കറി വിത്ത്നൽകി യൂണിറ്റ് പ്രസിഡന്‍റ് ഏലൂർ ഗോപിനാഥ് തുടക്കം കുറിച്ചു. ജൈവ കൃഷി പ്രോത്സാഹിപ്പിക്കുമെന്നും ഉപയോഗശേഷം മിച്ചം വരുന്ന പച്ചക്കറികൾ കടകളിലൂടെ വിൽക്കുമെന്നും ഗോപിനാഥ് പറഞ്ഞു. എസ്. രംഗൻ, കെ.കെ. നസീർ, എം.എക്സ്. സിസോ, കെ.ബി. സക്കീർ, ടി.പി. നന്ദകുമാർ, നെൽസൺ ഇമേജ്, കെ.എ. ജോഷി സുബൈദാ നൂറുദ്ദീൻ, കെ.എം. കല, രേണുക എന്നിവർ പങ്കെടുത്തു.

നെടുങ്ങാട് മയക്കുമരുന്ന് ഉപയോഗവും വിൽപ്പനയും വ്യാപകം

വൈപ്പിൻ : നെടുങ്ങാട് ബോട്ട് ജെട്ടിയിലും, പള്ളിപ്പാലത്തിന് സമീപത്തും, രാവും പകലും ലഹരി വിൽപ്പനയും ഉപയോഗവും വ്യാപക മെന്ന് നാട്ടുകാർ പരാതിപ്പെട്ടു. വൈപ്പിൻ മേഖലയ്ക്ക് പുറത്തുനിന്നും ഉള്ള നിരവധി ആളുകൾ നെടുങ്ങാടു പ്രദേശത്ത് തമ്പടിച്ചാണ് ലഹരി സേവയും വിൽപ്പനയും നടത്തുന്നത്. പ്രദേശവാസികൾ നിരവധി പ്രാവശ്യം പരാതികൾ നൽകിയിട്ടും യാതൊരു നടപടിയും ഇതുവരെ ഉണ്ടായിട്ടില്ലെന്നാണ് ആക്ഷേപം. എക്സൈസ്-പോലീസ് ഉദ്യോഗസ്ഥർ രാത്രിയിലും പകലും പട്രോളിംഗ് നടത്തണമെന്ന് വൈപ്പിൻ ബ്ലോക്ക് പഞ്ചായത്ത് പ്രതിപക്ഷ നേതാവ് അഗസ്റ്റിൻ മണ്ടോത്ത് ആവശ്യപ്പെട്ടു.

വെളിച്ചം പദ്ധതിയിൽ മൂന്ന് വീടുകൾ വൈദ്യുതീകരിച്ചു നൽകി

കാലടി: ആദിശങ്കര ഇൻസ്റ്റിറ്റ്യൂട്ട് ഓഫ് എൻജിനീയറിംഗ് ആൻഡ് ടെക്നോളജിയിലെ നാഷണൽ സർവീസ് സ്കീമും റോട്ടറി ക്ലബ്ബ് കൊച്ചിൻ എയർപോർട്ടും സംയുക്തമായി നടപ്പിലാക്കുന്ന വെളിച്ചം പദ്ധതിയുടെ ഭാഗമായി കാലടി പഞ്ചായത്തിലെ മൂന്നു വീടുകൾ വൈദ്യുതീകരിച്ചു. വീടുകൾ വൈദ്യുതീകരിക്കാൻ ബുദ്ധിമുട്ട് അനുഭവിക്കുന്നവരെ കണ്ടെത്തി വിദ്യാർഥികളുടെ നേതൃത്വത്തിൽ വീടുകൾ വൈദ്യുതീകരിച്ചു നൽകുന്നതാണ് വെളിച്ചം പദ്ധതി. സാങ്കേതിക വിദഗ്ധരുടെയും കോളജിലെ അധ്യാപകരുടെയും മേൽനോട്ടത്തിലാണ് വിദ്യാർഥികൾ വീടുകൾ വൈദ്യുതീകരിക്കുന്നത്. തുടർന്നുള്ള വർഷങ്ങളിലും എൻഎസ്എസ് യൂണിറ്റും റോട്ടറി ക്ലബ്ബ് കൊച്ചിൻ എയർപോർട്ടുമായി ചേർന്ന് കൂടുതൽ വീടുകൾ വൈദ്യുതീകരിച്ചു നൽകും. കോളജിലെ എൻഎസ്എസ് പ്രോഗ്രാം ഓഫീസർ സിജോ ജോർജ്, റോട്ടറി ക്ലബ്ബ് പ്രസിഡന്‍റ് ഡോ. സുനിൽ ജെ. ഇളംതട്ട് എന്നിവർ ആണ് നേതൃത്വം നൽകുന്നത്.

ആലുവ മാർക്കറ്റ് മേഖലയിൽ കടകളിലും പള്ളിയിലും മോഷണം

ആലുവ: ആലുവയിലെ സെന്‍റ് ഡൊമിനിക് ചർച്ച്, മാർക്കറ്റിലെ അഞ്ചോളം കടകൾ എന്നിവിടങ്ങളിൽ മോഷണം. പള്ളിയിൽ നിന്ന് 5,000 രൂപയും കടകളിൽ നിന്ന് ചില്ലറത്തുട്ടുകളും ഒരു മൊബൈലും തുടങ്ങിയ സാധനങ്ങളാണ് നഷ്ടപ്പെട്ടത്. പള്ളിയിൽ കയറിയ മോഷ്ടാവിന്‍റെ സിസിടിവി ദൃശ്യങ്ങളടക്കം ആലുവ പോലീസിൽ വികാരി ഫാ. ജോസഫ് കരുമത്തി പരാതി നൽകി. കഴിഞ്ഞ രാത്രി 12.45 നാണ് മോഷ്ടാവ് പള്ളിയുടെ അകത്ത് കയറിയത്. പള്ളിയുടെ ഒരു വശത്തെ വാതിലാണ് കുത്തിതുറന്നത്. അൾത്താരയ്ക്ക് പിന്നിലെ സങ്കീർത്തി മുറി കമ്പിപ്പാര കൊണ്ട് തല്ലിതകർത്തിട്ടുണ്ട്. പള്ളിക്ക് മുന്നിലെ കപ്പേളയിലെ പൂട്ട് തകർത്താണ് 5,000 രൂപയോളം പണം അപഹരിച്ചത്. തുണി മറച്ചെത്തിയ മോഷ്ടാവിന്‍റെ മുഖം ഒരു കാമറയിൽ മാത്രമാണ് വ്യക്തമായി പതിഞ്ഞത്. പള്ളിയുടെ മുന്നിലുള്ള എംകെ ട്രേഡേഴ്സ് എന്ന പലചരക്ക് മൊത്തവ്യാപാര സ്ഥാപനം, പൂക്കട, ചില്ലറ വിൽപന കടകൾ എന്നിവിടങ്ങളിലാണ് മോഷ്ടാവ് കയറിയത്. മേശയിലുണ്ടായിരുന്ന അൽപ്പം തുക, മൊബൈൽ എന്നിവയാണ് നഷ്ടമായതെന്ന് വ്യാപാരി സംഘടനാ നേതാക്കൾ പറഞ്ഞു. ആലുവ സെന്‍റ് ഡൊമിനിക് പള്ളിയുടെ കീഴിലുള്ള കപ്പേളകളിൽ കഴിഞ്ഞ ഒരു മാസത്തിനുള്ളിൽ മൂന്നാം വട്ടമാണ് മോഷണം നടക്കുന്നത്. നസ്രത്ത് സെന്‍റ് മാർട്ടിൻ കപ്പേള, ദേശം കുന്നുംപുറം സെന്‍റ് ജോസഫ് കപ്പേള എന്നിവിടങ്ങളിൽ പൂട്ട് തകർത്തതായി ഫാമിലി യൂണിറ്റ് വൈസ് ചെയർമാൻ ഡൊമിനിക് കാവുങ്കൽ പറഞ്ഞു. പോലീസ് പെട്രോളിംഗ് ശക്തമാക്കണമെന്ന് വ്യാപാരികളും പ്രദേശവാസികളും ആവശ്യപ്പെട്ടു.

കൊച്ചി കോര്‍പറേഷനിലെ വാര്‍ഡ് വിഭജനത്തില്‍ അപാകത; ഹൈക്കോടതി വിശദീകരണം തേടി

കൊച്ചി: സംസ്ഥാന ഡീലിമിറ്റേഷന്‍ കമ്മീഷന്‍ കൊച്ചി കോര്‍പറേഷന്‍ പരിധിയില്‍ നടപ്പാക്കിയ വാര്‍ഡ് വിഭജനത്തില്‍ അപാകതയുണ്ടെന്ന് ചൂണ്ടിക്കാട്ടി ഹൈക്കോടതിയില്‍ ഹര്‍ജി. കൊച്ചി കോര്‍പറേഷന്‍ ആരോഗ്യകാര്യ സ്ഥിരം സമിതി അധ്യക്ഷനും രണ്ടാം ഡിവിഷന്‍ കൗണ്‍സിലറുമായ ടി.കെ. അഷ്‌റഫാണ് ഹര്‍ജി നല്‍കിയത്. ഹര്‍ജിയില്‍ ഡീലിമിറ്റേഷന്‍ കമ്മീഷനോടും കൊച്ചി മുനിസിപ്പല്‍ കോര്‍പറേഷനോടും ജസ്റ്റീസ് സി.എസ്. ഡയസ് വിശദീകരണം തേടി. കൊച്ചി മുനിസിപ്പല്‍ കോര്‍പറേഷനിലെ വാര്‍ഡ് വിഭജന ഉത്തരവ് ഹൈക്കോടതിയുടെ അന്തിമ വിധിക്ക് വിധേയമായിരിക്കുമെന്നും കോടതി വ്യക്തമാക്കി. 2011ലെ സെന്‍സസ് അനുസരിച്ച് വാര്‍ഡ് വിഭജനം നടത്തണമെന്നും, സെന്‍സസ് പ്രകാരമുള്ള ജനസംഖ്യയെ വാര്‍ഡുകളുടെ മൊത്തം എണ്ണം കൊണ്ട് ഹരിച്ച് വാര്‍ഡുകള്‍ നിര്‍ണയിക്കണമെന്നുമാണ് ഹര്‍ജിയിലെ ആവശ്യം. 2011 സെന്‍സസ് അനുസരിച്ച് കൊച്ചിന്‍ കോര്‍പറേഷനിലെ ജനസംഖ്യ 6,33,000 ആണ്. എന്നാല്‍ ഡീലിമിറ്റേഷന്‍ കമ്മീഷന്‍ മാനദണ്ഡമായി എടുത്തിട്ടുള്ളത് 6.2 ലക്ഷം ജനസംഖ്യ മാത്രമാണെന്നും ഹര്‍ജിയില്‍ ആരോപിക്കുന്നു. ഇതുമൂലം കൊച്ചി കോര്‍പറേഷന്‍ പരിധിയില്‍ മൊത്തത്തിലായി 31,000 ജനസംഖ്യ ഡീലിമിറ്റേഷന്‍ നടപടിക്രമങ്ങളില്‍ ഉള്‍പ്പെട്ടിട്ടില്ല. മാത്രമല്ല ഡിവിഷന്‍ അഞ്ച് പഴയ മട്ടാഞ്ചേരിയില്‍ മാത്രം 8144 ജനസംഖ്യ വിഭജന നടപടിക്രമങ്ങള്‍ ഉള്‍പ്പെട്ടിട്ടില്ലെന്നും, മാനദണ്ഡമനുസരിച്ച് 8000ത്തിലധികം വരുന്ന ജനസംഖ്യയുള്ള ഒരു ഡിവിഷനോ, വാര്‍ഡോ നിലനിര്‍ത്തണമെന്നാണ്. ഈ മാനദണ്ഡങ്ങള്‍ എല്ലാം മറികടന്നാണ് വിഭജനം നടപടികള്‍ നടത്തിയിട്ടുള്ളതെന്നും ആയതിനാല്‍ വാര്‍ഡ് വിഭജനം റദ്ദാക്കണമെന്നും ഹര്‍ജിയില്‍ ആവശ്യപ്പെടുന്നു. അഡ്വ. സജല്‍ ഇബ്രാഹിം മുഖേനയാണ് ഹര്‍ജി ഫയല്‍ ചെയ്തിരിക്കുന്നത്.

മത്സ്യത്തൊഴിലാളികളുടെ മക്കള്‍ക്ക് സൗജന്യ ഉന്നത വിദ്യാഭ്യാസം ഉറപ്പാക്കും: മന്ത്രി

കൊച്ചി: മത്സ്യത്തൊഴിലാളികളുടെ മക്കള്‍ക്ക് ഉന്നത വിദ്യാഭ്യാസം നേടാന്‍ ഒരു രൂപ പോലും ചിലവഴിക്കേണ്ടി വരില്ലെന്ന് മന്ത്രി സജി ചെറിയാന്‍. ഇഷ്ടമുള്ള അത്രയും പഠിക്കാമെന്നും സഹായവുമായി സര്‍ക്കാര്‍ ഉണ്ടാകുമെന്നും മന്ത്രി ഉറപ്പ് നല്‍കി. കുഴുപ്പിള്ളിയില്‍ മത്സ്യഫെഡിന്‍റെ മികവ് 2025 വിദ്യാഭ്യാസ അവാര്‍ഡ് വിതരണത്തിന്‍റെ സംസ്ഥാനതല ഉദ്ഘാടനം നിര്‍വഹിച്ച് സംസാരിക്കുകയായിരുന്നു അദ്ദേഹം. മത്സ്യത്തൊഴിലാളി മേഖലയില്‍ നിന്ന് ഈ വര്‍ഷം 26 കുട്ടികളാണ് മെഡിക്കല്‍ വിദ്യാഭ്യാസത്തിന് പ്രവേശനം നേടിയത്. കഴിഞ്ഞ രണ്ടു വര്‍ഷത്തിനിടെ മത്സ്യത്തൊഴിലാളികളുടെ മക്കള്‍ക്ക് പ്രഫഷണല്‍ വിദ്യാഭ്യാസം നല്‍കുന്നതിനായി 56 കോടി രൂപ ചെലവഴിച്ചിട്ടുണ്ട്. വിദേശത്ത് പോയി ഉന്നത വിദ്യാഭ്യാസം നേടുന്നതിന് ഉള്‍പ്പെടെ സര്‍ക്കാര്‍ സഹായിക്കും. അതേസമയം മത്സ്യബന്ധന വകുപ്പ് നടത്തിയ സര്‍വേയില്‍ നിന്ന് വലിയൊരു ശതമാനം വിദ്യാര്‍ഥികളും പഠനം പൂര്‍ത്തിയാക്കാത്ത സാഹചര്യം ശ്രദ്ധയില്‍പ്പെട്ടിട്ടുണ്ട്. ഇതിനെ മറികടക്കുന്നതിന്‍റെ ഭാഗമായി ഫിഷറീസ് വകുപ്പിന് കീഴിലുള്ള 10 ടെക്‌നിക്കല്‍ സ്‌കൂളുകളിലും പ്രമോട്ടര്‍മാരെ നിയമിച്ചു. പുനര്‍ഗേഹം പദ്ധതിയുടെ ഭാഗമായി 6000 വീടുകള്‍ പൂര്‍ത്തിയായി. 1300 ഫ്‌ളാറ്റുകളുടെ താക്കോല്‍ദാനം അടുത്ത മാസം മുഖ്യമന്ത്രി നിര്‍വഹിക്കുമെന്നും മന്ത്രി പറഞ്ഞു. ചടങ്ങില്‍ സംയോജിത ആധുനിക നായരമ്പലം മത്സ്യഗ്രാമം പദ്ധതിയുടെ നിര്‍മാണോദ്ഘാടനവും ഓട്ടോ കിയോസ്‌കുകളുടെ വിതരണവും ദേശീയതലത്തില്‍ മികച്ച എഫ്എഫ്പിഒയ്ക്കുള്ള അവാര്‍ഡ് ലഭിച്ച ഞാറക്കല്‍ നായരമ്പലം മത്സ്യത്തൊഴിലാളി വികസന ക്ഷേമ സംഘത്തെ ആദരിക്കലും ഇൻഷ്വറന്‍സ് ധനസഹായ വിതരണവും നിര്‍വഹിച്ചു. കുഴുപ്പിള്ളി അയ്യമ്പിള്ളി സഹകരണ നിലയത്തില്‍ നടന്ന ചടങ്ങില്‍ കെ.എന്‍. ഉണ്ണിക്കൃഷ്ണന്‍ എംഎല്‍എ അധ്യക്ഷത വഹിച്ചു. മത്സ്യഫെഡ് എംഡി ഡോ. പി. സഹദേവന്‍, വൈപ്പിന്‍ ബ്ലോക്ക് പഞ്ചായത്ത് പ്രസിഡന്‍റ് തുളസി സോമന്‍, മത്സ്യഫെഡ് ചെയര്‍മാന്‍ ടി. മനോഹരന്‍ തുടങ്ങിയവരും പങ്കെടുത്തു.

പീച്ചിങ്ങച്ചിറയിൽ കുളിക്കാനിറങ്ങിയ യുവാവ് മുങ്ങിമരിച്ചു

കോലഞ്ചേരി: കരിമുകൾ പീച്ചിങ്ങച്ചിറയിൽ സുഹൃത്തുക്കളോടൊപ്പം കുളിക്കാനിറങ്ങിയ യുവാവ് മുങ്ങിമരിച്ചു. കാക്കനാട് തുതിയൂർ തുക്കടയിൽ സൈജുവിന്‍റെ മകൻ ജോയലാ(20)ണ് മരിച്ചത്. ഇന്നലെ വൈകിട്ട് 4.30നായിരുന്നു അപകടം. സുഹൃത്തുക്കളായ ഹാരിസ്, ഡോണൽ എന്നിവരോടൊപ്പമാണ് കുളിക്കാനിറങ്ങിയത്. ജോയൽ നീന്തുന്നതിനിടെ മുങ്ങിപ്പോകുകയായിരുന്നു. കൂട്ടുകാർ രക്ഷിക്കാൻ ശ്രമിച്ചെങ്കിലും നടന്നില്ല. പട്ടിമറ്റം അഗ്നി രക്ഷാസേനാംഗങ്ങളും ഗാന്ധിനഗർ സ്കൂബ ഡൈവേഴ്സ് സേനാംഗങ്ങളും നടത്തിയ തെരച്ചിലിലാണ് ജോയലിനെ കണ്ടെത്തിയത്. ഉടൻ സിപിആർ നൽകി കാക്കനാട് സ്വകാര്യ ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല. അമ്മ: ജിലു.

മന്ത്രി സജി ചെറിയാനു നേരെ കരിങ്കൊടി പ്രതിഷേധം

തോപ്പുപടി: കണ്ണമാലിയിൽ കടലേറ്റം രൂക്ഷമായിട്ടും സര്‍ക്കാര്‍ സംരക്ഷണ ഭിത്തി ഉൾപ്പെടെയുള്ള സുരക്ഷ ഒരുക്കുന്നില്ലെന്ന് ആരോപിച്ച് ചെല്ലാനത്ത് ഫിഷറീസ് മന്ത്രി സജി ചെറിയാനു നേരെ യൂത്ത് കോൺഗ്രസ് പ്രവർത്തകരുടെ കരിങ്കൊടി പ്രതിഷേധം. പ്രതിഷേധത്തിനെത്തിയ യൂത്ത് കോൺഗ്രസ് ജില്ലാ സെക്രട്ടറി ഷെബിൻ ജോർജ്, ബ്ലോക്ക് സെക്രട്ടറി ജിനു കെ. വിൻസെന്‍റ്, മണ്ഡലം പ്രസിഡന്‍റ് നിക്സൻ കണ്ണമാലി എന്നിവരെ പോലീസ് അറസ്റ്റ് ചെയ്തു നീക്കി. ചെല്ലാനത്ത് മത്സ്യഗ്രാമം പദ്ധതിയുടെ ഉദ്ഘാടനത്തിലെത്തിയപ്പോഴാണ് യൂത്ത് കോൺഗ്രസ് പ്രവർത്തകർ പ്രതിഷേധിച്ചത്. മന്ത്രി ഓഡിറ്റോറിയത്തിൽ എത്തിയപ്പോഴായിരുന്നു സംഭവം. കേന്ദ്രാവിഷ്കൃത പദ്ധതിയായതിനാൽ ചടങ്ങിൽ പങ്കെടുക്കുന്നതിന് കേന്ദ്ര ഫിഷറീസ് സഹമന്ത്രി ജോര്‍ജ് കുര്യന്‍ എത്തുന്നതിന് മുൻപ് സംഘാടകരുമായി സംസാരിച്ചുകൊണ്ടിരിക്കുന്നതിനിടെ ഓഡിറ്റോറിയത്തിൽ നേരത്തെ തന്നെ നിലയുറപ്പിച്ചിരുന്ന പ്രതിഷേധക്കാർ കരിങ്കൊടിയുമായി മന്ത്രിയുടെ നേരെ പാഞ്ഞടുക്കുകയായിരുന്നു. മന്ത്രിയുടെ മുന്നിൽ എത്തിയ പ്രതിഷേധക്കാർ വളഞ്ഞുനിന്ന് കടലേറ്റം അനുഭവിക്കുന്ന പ്രദേശം സന്ദർശിക്കണമെന്ന് ആവശ്യപ്പെട്ടെങ്കിലും മന്ത്രി ചെവിക്കൊണ്ടില്ല. ഇതിനിടെ ചെല്ലാനം പഞ്ചായത്ത് പ്രസിഡന്‍റ് കെ.ഡി. പ്രസാദ് പ്രതിഷേധക്കാരുടെ നേരെ കൈയേറ്റവുമായെത്തിയതോടെ പ്രതിഷേധം രൂക്ഷമാകുകയായിരുന്നു. സംഭവം നടക്കുമ്പോൾ കെ.ജെ. മാക്സി എംഎൽഎ മന്ത്രിയുടെ സമീപത്തുണ്ടായിരുന്നു. കേന്ദ്രമന്ത്രി പങ്കെടുക്കുന്ന ചടങ്ങായതിനാൽ വൻ പോലീസ് സന്നാഹം പ്രദേശത്ത് നിലയുറപ്പിച്ചിരുന്നെങ്കിലും ഹാളിലുണ്ടായിരുന്ന പ്രതിഷേധക്കാരെ പോലീസിന് തിരിച്ചറിയാനായില്ല. മന്ത്രിയെ വളഞ്ഞ് ഒരു മിനിറ്റോളം പ്രതിഷേധക്കാർ തർക്കത്തിൽ ഏർപ്പെട്ടപ്പോഴാണ് സംഘാടകർ പ്രതിഷേധക്കാരെ ശ്രദ്ധിക്കുന്നത്. സംഭവം അറിഞ്ഞെത്തിയ പോലീസ് പ്രതിഷേധക്കാരെ ബലം പ്രയോഗിച്ച് നീക്കുകയായിരുന്നു. അറസ്റ്റ് ചെയ്ത പ്രവർത്തകരെ പോലീസ് പിന്നീട് ജാമ്യത്തിൽ വിട്ടയച്ചു.

ദേശീയ പഞ്ചഗുസ്തിയിലെ പെൺപെരുമ

മൂവാറ്റുപുഴ: തൃശൂരിൽ നടക്കുന്ന ദേശീയ പഞ്ചഗുസ്തി മത്സരം വീട്ടുകാര്യമെന്ന മട്ടിൽ ഒരു കുടുംബത്തിലെ നാലു വനിതകൾ പങ്കെടുക്കുന്നു. റീജ സുരേഷ് എന്ന മൂവാറ്റുപുഴക്കാരി അമ്മയും ആർദ്ര സുരേഷ്, അമയ സുരേഷ്, ആരാധ്യ സുരേഷ് എന്നീ മക്കളുമാണിവർ. പീപ്പിൾ ആം റസ്‌ലിംഗ് ഫെഡറേഷൻ ഇന്ത്യ കേരള, ആം റസ്‌ലിംഗ് അസോസിയേഷൻ എന്നിവർ സംയുക്തമായി തൃശൂർ വി.കെ.എൻ. മേനോൻ ഇൻഡോർ സ്റ്റേഡിയത്തിലാണ് ദേശീയ പഞ്ചഗുസ്തി മത്സരം നടക്കുന്നത്. വിവിധ സംസ്ഥാനങ്ങളിൽ നിന്നായി 2500ൽ അധികം കായിക താരങ്ങൾ പങ്കെടുക്കുന്ന മത്സരത്തിൽ കേരള വനിതാ ടീംമിന്‍റെ വൈസ് ക്യാപ്റ്റനാണ് റീജ സുരേഷ്. മക്കളായ ആർദ്ര സുരേഷ് കോട്ടയം മെഡിക്കൽ കോളജ് ബിപിടി വിദ്യാർഥിനിയും, അമയ സുരേഷ് മൂവാറ്റുപുഴ സെന്‍റ് അഗസ്റ്റിൻസ് ഹയർ സെക്കൻഡറി സ്കൂൾ പ്ലസ്ടു വിദ്യാർഥിനിയും, ആരാധ്യ സുരേഷ് മൂവാറ്റുപുഴ എസ്എൻഡിപി ഹൈസ്കൂൾ എട്ടാം ക്ലാസ് വിദ്യാർഥിനിയുമാണ്. മുൻ വർഷങ്ങളിലെ ദേശീയ, അന്തർദേശീയ താരങ്ങളാണ് ഇവർ. സബ് ജൂണിയർ, ജൂണിയർ, യൂത്ത് വിഭാഗങ്ങളിലാണ് പങ്കെടുക്കുന്നത്. ഇന്നലെ ആരംഭിച്ച മത്സരങ്ങൾ രണ്ടിന് സമാപിക്കും.

പുന്നേക്കാട് കാട്ടാനക്കൂട്ടം കൃഷി നശിപ്പിച്ചു

കോതമംഗലം: കീരംപാറ പഞ്ചായത്തിലൈ പുന്നേക്കാട് കാട്ടാനക്കുട്ടം നിരവധി കർഷകരുടെ കൃഷി നശിപ്പിച്ചു. പുന്നേക്കാട് കളപ്പാറ മേഖലയിൽ വെള്ളിയാഴ്ച രാത്രി 8.45ഓടെയാണ് കാട്ടാനക്കൂട്ടമെത്തിയത്. കൃഷി നശിപ്പിച്ച ശേഷം ചിന്നംവിളിച്ച് പ്രദേശവാസികളെ ഭീതിയിലാഴ്ത്തിയ ആനകൾ ഇന്നലെ രാവിലെ 6.30ഓടെയാണ് കാടുകയറിയത്. പുത്തേത്ത് ഏലിയാസ്, കവുങ്ങുംപിള്ളി എൽദോസ്, കക്കാട്ടുകുടി മോളി തോമസ്, പ്ലാങ്കുടി സജി, പനിച്ചിക്കുടി ജോബി എന്നിവർ ഓണവിപണി ലക്ഷ്യമിട്ട് കൃഷിചെയ്ത വാഴകളും, തെങ്ങ്, കമുക് എന്നിവയുമാണ് നശിപ്പിച്ചത്. കാട്ടാനകൾ എത്തിയ വിവരം വനം വകുപ്പ് അധികൃതരെ അറിയിച്ചിട്ടും ഒരു രാത്രി മുഴുവൻ ഉദ്യോഗസ്ഥരോ, ആർആർടിയോ എത്തിയില്ലെന്ന് നാട്ടുകാർ ആരോപിച്ചു. ദിവസവേതനക്കാരായ രണ്ട് ഫോറസ്റ്റ് വാച്ചർമാർ മാത്രമാണ് അവിടെ എത്തിയത്. ഇവരും പ്രദേശവാസികളും ചേർന്ന് രാത്രി മുഴുവൻ കാട്ടാനയെ തുരത്താൻ ശ്രമം നടത്തിയെങ്കിലും രാവിലെയാണ് ആനക്കൂട്ടം കാട്ടിലേക്ക് പോയത്. കാട്ടാന ശല്യത്തിന് ശാശ്വത പരിഹാരം വേണമെന്ന് കർഷക കോണ്‍ഗ്രസ് സംസ്ഥാന ജനറൽ സെക്രട്ടറി പി.സി. ജോർജ്, നിയോജക മണ്ഡലം പ്രസിഡന്‍റ് ജയിംസ് കോറബേൽ എന്നിവർ ആവശ്യപ്പെട്ടു.

ചെല്ലാനം മത്സ്യഗ്രാമം പദ്ധതി ഉദ്ഘാടനം ചെയ്തു

കൊച്ചി: കേന്ദ്ര, സംസ്ഥാന സര്‍ക്കാരുകളുടെ പങ്കാളിത്തത്തോടെ ആവിഷ്‌കരിച്ച് നടപ്പാക്കുന്ന സംയോജിത ആധുനിക തീരദേശ മത്സ്യഗ്രാമം പദ്ധതിയുടെ ഭാഗമായുള്ള ചെല്ലാനം മത്സ്യഗ്രാമം പദ്ധതിക്ക് തുടക്കമായി. കേന്ദ്രമന്ത്രി ജോര്‍ജ് കുര്യന്‍ ഉദ്ഘാടനം ചെയ്തു. കേന്ദ്ര, സംസ്ഥാന സര്‍ക്കാരുകളുടെ സംയുക്ത ശ്രമങ്ങളുടെ ഫലമായാണ് തീരദേശ മേഖലയില്‍ മാറ്റങ്ങള്‍ കൊണ്ടുവരാന്‍ കഴിഞ്ഞിട്ടുള്ളതെന്ന് അദ്ദേഹം പറഞ്ഞു. മന്ത്രി സജി ചെറിയാന്‍ അധ്യക്ഷത വഹിച്ചു. പദ്ധതിയുടെ ഭാഗമായി ചെല്ലാനത്ത് മത്സ്യത്തൊഴിലാളി വനിതകള്‍ക്ക് ഇലക്ട്രിക് ഓട്ടോ ഫിഷ് വെന്‍ഡിംഗ് കിയോസ്‌ക് വിതരണവും എമര്‍ജന്‍സി ട്രീറ്റ്‌മെന്‍റ് ആന്‍ഡ് റെസ്‌ക്യൂ ബ്ലോക്ക് കെട്ടിടത്തിന്‍റെയും പബ്ലിക് ടോയ്‌ലറ്റ് ബ്ലോക്കിന്‍റെയും നിർമാണ ഉദ്ഘാടനവും നടന്നു. ഒമ്പത് മത്സ്യഗ്രാമങ്ങളെയാണ് ആധുനിക മത്സ്യഗ്രാമങ്ങളായി പ്രഖ്യാപിക്കുന്നത്. ജില്ലയില്‍ ചെല്ലാനം, നായരമ്പലം, ആലപ്പുഴ ജില്ലയില്‍ ആറാട്ടുപുഴ, തൃശൂര്‍ ജില്ലയില്‍ എടക്കഴിയൂര്‍, മലപ്പുറം ജില്ലയില്‍ പൊന്നാനി, കോഴിക്കോട് ജില്ലയില്‍ ചാലിയം, കണ്ണൂര്‍ ജില്ലയില്‍ ചാലില്‍ ഗോപാലപേട്ട, കാസര്‍ഗോഡ് ജില്ലയില്‍ ഷിരിയ എന്നീ ഒമ്പത് ഗ്രാമങ്ങളാണ് ആധുനിക മത്സ്യ ഗ്രാമങ്ങളായി തെരഞ്ഞെടുത്തിട്ടുള്ളത്. കെ.ജെ. മാക്‌സി എംഎല്‍എ, ചെല്ലാനം പഞ്ചായത്ത് പ്രസിഡന്‍റ് കെ.എല്‍. ജോസഫ്, വൈസ് പ്രസിഡന്‍റ് മേരി സിംല, മത്സ്യത്തൊഴിലാളി സംഘടനാ നേതാക്കള്‍ എന്നിവരും പങ്കെടുത്തു.

നൈട്രോസെപാം ഗുളികയുമായി യുവാവ് പിടിയില്‍

കൊച്ചി: കാക്കനാട് നൈട്രോസെപാം ഗുളികയുമായി യുവാവ് പിടിയില്‍. എറണാകുളം കുസുമഗിരി സ്വദേശി കെ.എന്‍. ഉമറുള്‍ ഫാറൂഖാണ് കൊച്ചി സിറ്റി ഡാന്‍സാഫ് സംഘത്തിന്‍റെ പിടിയിലായത്. രഹസ്യവിവരത്തെ തുടര്‍ന്ന് കാക്കനാട് ഭാഗത്ത് നടത്തിയ പരിശോധനയിലാണ് പ്രതി കുടു ങ്ങിയത്. ഇയാളുടെ പക്കല്‍നിന്ന് 121.42 ഗ്രാം (198 എണ്ണം) നെട്രോസെപാം ഗുളിക കണ്ടെത്തി.

ലക്ഷദ്വീപില്‍ സബ്‌സിഡി നിരക്കില്‍ ലഭിച്ച ഡീസല്‍ മറിച്ചുവിറ്റ കേസ്: പ്രതികളെ വെറുതെവിട്ടു

കൊച്ചി: ലക്ഷദ്വീപില്‍ വിതരണം ചെയ്യുന്നതിന് ഭാരത് പെട്രോളിയത്തില്‍ നിന്ന് സബ്‌സിഡി നിരക്കില്‍ ലഭ്യമാക്കിയ ഡീസല്‍ മറിച്ചുവില്പന നടത്തിയെന്നാരോപിച്ച് സിബിഐ രജിസ്റ്റര്‍ ചെയ്ത കേസിലെ മുഴുവന്‍ പ്രതികളെയും വെറുതെ വിട്ടു. ദ്വീപിലെ മുന്‍ എംപിയും എന്‍സിപി സി ദേശീയ ജനറല്‍ സെക്രട്ടറിയുമായ മുഹമ്മദ് ഫൈസല്‍ ഉള്‍പ്പെടെയുള്ള പ്രതികളെയാണ് സിബിഐ കോടതി വെറുതെ വിട്ടത്. കുറ്റം തെളിയിക്കാന്‍ സിബിഐയ്ക്ക് കഴിഞ്ഞിട്ടില്ലെന്ന് വിലയിരുത്തിയാണ്പ്രത്യേക ജഡ്ജി എന്‍. ശേഷാദ്രിനാഥന്‍റെ വിധി. അന്വേഷണം പൂര്‍ത്തിയാക്കി 2011 സിബിഐ കുറ്റപത്രം സമര്‍പ്പിച്ചു. ആകെ ഒമ്പതു പേര്‍ക്കെതിരേ കുറ്റപത്രം നല്‍കിയെങ്കിലും ബിപിസിഎല്‍ ഉദ്യോഗസ്ഥരടക്കം ആറു പേരെ കോടതി നേരത്തെ കേസില്‍ നിന്ന് ഒഴിവാക്കിയിരുന്നു. വിചാരണ നേരിടേണ്ടി വന്ന ഒന്നാം പ്രതി പി.പി. ഹുസൈന്‍ തങ്ങളും, അഞ്ചാം പ്രതിയും ബേപ്പുര്‍ പോര്‍ട്ടിലെ ഹെഡ് ക്ലര്‍ക്കുമായിരുന്ന അബ്ദുള്‍ മനാഫും ഒമ്പതാം പ്രതിയായ മുഹമ്മദ് ഫൈസലുമാണ് ഇപ്പോള്‍ കുറ്റവിമുക്തരാക്കപ്പെട്ടത്. പി.പി. ഹുസൈന്‍ തങ്ങളും മുഹമ്മദ് ഫൈസലും പാര്‍ട്ണര്‍മാരായ ഷെബ്‌ന എന്‍റര്‍പ്രൈസസ് എന്ന സ്ഥാപനം ലക്ഷദ്വീപിലേക്ക് വിവിധ വസ്തുക്കള്‍ ഇറക്കുമതി ചെയ്യാനുള്ള തങ്ങളുടെ ലൈസന്‍സ് ദുരുപയോഗം ചെയ്ത് സബ്‌സിഡിയില്‍ ഭാരത് പെട്രോളിയം കോര്‍പറേഷനില്‍ നിന്ന് ഡീസല്‍ ലഭ്യമാക്കി അതു മറിച്ചു വിറ്റെന്നാണ് കേസ്. ഇതിലൂടെ ബിപിസിഎല്ലിന് ഒരു കോടി നാല് ലക്ഷം നഷ്ടം വരുത്തിയെന്ന് ആരോപിച്ച് 2009ലാണ് സിബിഐ കേസ് രജിസ്റ്റര്‍ ചെയ്തത്.

സാരിയുടെ നിറം മങ്ങി : സ്ഥാപനത്തിന് 36,500 രൂപ പിഴ

കൊച്ചി: സാരിയുടെ നിറം മങ്ങിയത് പരാതിപ്പെട്ടതില്‍ നടപടി സ്വീകരിക്കാതിരുന്ന സ്ഥാപനത്തിനെതിരെ എറണാകുളം ജില്ലാ ഉപഭോക്തൃ തര്‍ക്കപരിഹാര കോടതി 36,500 രൂപ പിഴ ചുമത്തി. എറണാകുളം കൂവപ്പടി സ്വദേശി ജോസഫ് നിക്‌ളാവോസ് ആലപ്പുഴയിലെ ഇഹാ ഡിസൈന്‍സ് എന്ന സ്ഥാപനത്തിനെതിരെ സമര്‍പ്പിച്ച പരാതിയിലാണ് നടപടി. സഹോദരിയുടെ വിവാഹ നിശ്ചയത്തിനായി ഭാര്യക്കും മറ്റു ബന്ധുക്കള്‍ക്കും 89,199 രൂപയ്ക്ക് 14 സാരികളാണ് പരാതിക്കാരന്‍ വാങ്ങിയത്. മികച്ച ഗുണമേന്മയുള്ളവയെന്ന് എതിര്‍കക്ഷി വിശ്വസിപ്പിച്ചെന്ന് പരാതിക്കാരന്‍ പറഞ്ഞു. അതില്‍ 16,500 രൂപ വിലയുള്ള സാരിയുടെ നിറം ഉടുത്ത ആദ്യ ദിവസംതന്നെ നഷ്ടമായി. ഇ-മെയില്‍, വക്കീല്‍ നോട്ടീസ് മുഖാന്തരം സാരിയുടെ ന്യൂനത സ്ഥാപനത്തെ അറിയിച്ചെങ്കിലും പരിഹാരം ഉണ്ടായില്ല. സാരിയുടെ നിറം പോയി എന്ന പരാതി പരിഹരിച്ചില്ലെന്ന എതിര്‍കക്ഷിയുടെ നടപടി സേവനത്തിലെ ന്യൂനതയും അധാര്‍മികമായ വ്യാപാര രീതിയുമാണെന്ന് കോടതി അഭിപ്രായപ്പെട്ടു. സാരിയുടെ വിലയായ 16,500 രൂപ പരാതിക്കാരന് തിരിച്ചു നല്‍കണം. ഇതിനുപുറമേ നഷ്ടപരിഹാരം, കോടതി ചെലവ് എന്നീ വകയില്‍ 20,000 രൂപയും 45 ദിവസത്തിനകം നല്‍കണമെന്ന് ഡി.ബി. ബിനു അധ്യക്ഷനും വി. രാമചന്ദ്രന്‍, ടി.എന്‍. ശ്രീവിദ്യ എന്നിവരും ഉൾപ്പെട്ട ബെഞ്ച് ഉത്തരവ് നല്‍കി.

കാർ ഷോറൂമിലെ അപകടം മാനുഷിക പിഴവെന്ന് എംവിഡി

കൊച്ചി: ട്രെയ്‌ലറില്‍ നിന്നു ഷോറൂമിലേക്ക് ഇറക്കുന്നതിനിടെ നിയന്ത്രണംവിട്ട കാര്‍ ഇടിച്ച് ജീവനക്കാരന്‍ മരിച്ച സംഭവത്തില്‍ മാനുഷിക പിഴവ് മൂലമാണ് അപകടം ഉണ്ടായതെന്ന് മോട്ടോര്‍ വാഹന വകുപ്പ് (എംവിഡി). സംഭവത്തില്‍ പാലാരിവട്ടം പോലീസിന്‍റെ ആവശ്യപ്രകാരം അപകടത്തില്‍പ്പെട്ട റേഞ്ച് റോവര്‍ വോഗ് വാഹനം എംവിഡി പരിശോധിച്ചു. തുടർന്ന് നല്‍കിയ റിപ്പോര്‍ട്ടിലാണ് ഇക്കാര്യം വ്യക്ത മാക്കിയത്. വാഹനത്തിന് യന്ത്രത്തകരാറോ, സാങ്കതിക തകരാറോ ഇല്ല. ട്രെയ്‌ലറില്‍ നിന്ന് വാഹനം ഇറക്കിയ ഡ്രൈവര്‍ക്ക് സംഭവിച്ച പിഴവാണ് അപകടത്തിലേക്ക് വഴിവച്ചതെന്നും ഇതില്‍ വ്യക്തമാക്കുന്നു. സംഭവത്തില്‍ ജില്ലാ കാര്‍ ഡ്രൈവേഴ്‌സ് യൂണിയന്‍ അംഗവും പാലാരിവട്ടം സ്വദേശിയുമായ ആന്‍ഷാദിനെ പോലീസ് അറസ്റ്റ് ചെയ്ത് ജാമ്യത്തില്‍ വിട്ടിരുന്നു. ഇയാളുടെ ഡ്രൈവിംഗ് ലൈസന്‍സ് സസ്‌പെന്‍ഡ് ചെയ്‌തേക്കും. മനപൂര്‍വമല്ലാത്ത നരഹത്യ, അശ്രദ്ധമായി വാഹനമോടിക്കന്‍ എന്നീ വകുപ്പുകൾ ചുമത്തിയാണ് ഇയാള്‍ക്കെതിരെ കേസെടുത്തിട്ടുള്ളത്. കുണ്ടന്നൂരില്‍ പ്രവര്‍ത്തിക്കുന്ന ജാഗ്വാര്‍ റേഞ്ചര്‍ റോവര്‍ കാറുകളുടെ വിതരണ കമ്പനിയിയുടെ പാലാരിവട്ടം ചളിക്കവട്ടത്തെ ഗോഡൗണില്‍ 22ന് രാത്രി 11.30 നായിരുന്നു അപകടം. വിതരണ കമ്പനിയിലെ ഷോറൂം ഡെമോ കോ-ഓര്‍ഡിനേറ്റര്‍ മട്ടാഞ്ചേരി പാണ്ടിക്കുടി സ്വദേശി റോഷന്‍ ആന്‍റണി സേവ്യറാണ് (36) അപകടത്തില്‍ മരിച്ചത്. ജില്ലാ കാര്‍ ഡ്രൈവേഴ്‌സ് യൂണിയന്‍ അംഗമായ അനീഷിനും പരിക്കേറ്റിരുന്നു.

പീച്ചിങ്ങച്ചിറയിൽ കുളിക്കാനിറങ്ങിയ യുവാവ് മുങ്ങി മരിച്ചു

കോലഞ്ചേരി: കരിമുകൾ പീച്ചിങ്ങച്ചിറയിൽ സുഹൃത്തുക്കളോടൊപ്പം കുളിക്കാനിറങ്ങിയ യുവാവ് മുങ്ങി മരിച്ചു. കാക്കനാട് തുതിയൂർ തുക്കടയിൽ സൈജുവിന്‍റെ മകൻ ജോയലാ(20)ണ് മരിച്ചത്. ഇന്നലെ വൈകിട്ട് 4.30 നായിരുന്നു അപകടം. സുഹൃത്തുക്കളായ ഹാരിസ്, ഡോണൽ എന്നിവരോടൊപ്പമാണ് കുളിക്കാനിറങ്ങിയത്. ജോയൽ നീന്തുന്നതിനിടെ മുങ്ങിപ്പോകുകയായിരുന്നു. കൂട്ടുകാർ രക്ഷിക്കാൻ ശ്രമിച്ചെങ്കിലും നടന്നില്ല. പട്ടിമറ്റം അഗ്നി രക്ഷാസേനാംഗങ്ങളും ഗാന്ധിനഗർ സ്കൂബ ഡൈവേഴ്സ് സേനാംഗങ്ങളും നടത്തിയ തെരച്ചിലിലാണ് കണ്ടെത്തിയത്. സി.പി.ആർ നൽകി കാക്കനാട് സണ്‍റൈസ് ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല. അമ്മ: ജിലു.

സെന്‍റ് പീറ്റേഴ്സ് ആൻഡ് സെന്‍റ് പോൾസ് ഫൊറോന പള്ളിയില്‍ തിരുനാൾ

ഇലഞ്ഞി: സെന്‍റ് പീറ്റേഴ്സ് ആൻഡ് സെന്‍റ് പോൾസ് ഫൊറോന പള്ളിയില്‍ വിശുദ്ധ പത്രോസ്, പൗലോസ് ശ്ലീഹന്മാരുടെ തിരുനാള്‍ ഇന്നും നാളെയുമായി ആഘോഷിക്കുമെന്ന് വികാരി ഫാ. ജോസഫ് ഇടത്തുംപറമ്പില്‍, സഹവികാരി ഫാ. ജോസഫ് ആലാനിക്കല്‍ എന്നിവര്‍ അറിയിച്ചു. ഫാ. ജോസഫ് ഇടത്തുംപറമ്പിൽ കൊടിയേറ്റി. ഇന്ന് രാവിലെ 5.30ന് വിശുദ്ധ കുര്‍ബാന, നൊവേന, ഏഴിന് ആഘോഷമായ വിശുദ്ധ കുര്‍ബാന, നൊവേന, വൈകിട്ട് അഞ്ചിന് തിരുനാള്‍ കുര്‍ബാന, സന്ദേശം, നൊവേന, ലദീഞ്ഞ്, പ്രദക്ഷിണം, 7.30ന് സമാപനം. നാളെ രാവിലെ 5.30ന് വിശുദ്ധ കുര്‍ബാന, 8നും, 8.30നും ആഘോഷമായ വിശുദ്ധ കുര്‍ബാന, 10ന് തിരുനാള്‍ കുര്‍ബാന, സന്ദേശം, ലദീഞ്ഞ്- മാര്‍ സെബാസ്റ്റ്യന്‍ വാണിയപ്പുരക്കല്‍, പ്രദക്ഷിണം, ഉച്ചയ്ക്ക് ഒന്നിന് സമാപനാശീര്‍വാദം.

പൈനാപ്പിൾ ദിനാചരണം നടത്തി

വാഴക്കുളം: ഓൾ കേരള പൈനാപ്പിൾ മർച്ചന്‍റ്സ് അസോസിയേഷന്‍റെ നേതൃത്വത്തിൽ അന്തർദേശീയ പൈനാപ്പിൾ ദിനാചരണം നടത്തി. അസോസിയേഷൻ പ്രസിഡന്‍റ് ജോസ് പെരുമ്പിള്ളിക്കുന്നേൽ പൈനാപ്പിൾ കേക്ക് മുറിച്ച് ദിനാചരണം ഉദ്ഘാടനം ചെയ്തു. മഞ്ഞള്ളൂർ പഞ്ചായത്ത് പ്രസിഡന്‍റ് ആൻസി ജോസ്, വൈസ് പ്രസിഡന്‍റ് ടോമി തന്നിട്ടാമാക്കൽ, പഞ്ചായത്തംഗം പി.എസ്. സുധാകരൻ, ഫാർമർ പ്രൊഡ്യൂസർ കമ്പനി ഡയറക്ടർമാരായ ഡിവിൻ ജോസ്, എംപി തോമസ്, സിജോ ജോർജ് എന്നിവർ പ്രസംഗിച്ചു. അസോസിയേഷൻ സെക്രട്ടറി ജോസ് വർഗീസ്, വൈസ് പ്രസിഡന്‍റ് ജിമ്മി തോമസ്, ട്രഷറർ ജോസ് മാത്യു മോനിപ്പിള്ളിൽ, ജോയിന്‍റ് സെക്രട്ടറി ഷൈജി ജോസഫ്, കമ്മിറ്റി അംഗങ്ങളായ ജെയ്സൻ ജോസ്, സാലസ് അലക്സ്, ഷൈൻ ജോൺ, മാത്യു ജോസഫ്, ജിമ്മി ജോർജ് എന്നിവർ നേതൃത്വം നൽകി.

കോതമംഗലം വെറ്റിലപ്പാറയിൽ വീട് നിലംപൊത്തി

കോതമംഗലം: കനത്ത മഴയിൽ കോതമംഗലം വെറ്റിലപ്പാറയിൽ വീട് നിലംപൊത്തി. ഗൃഹനാഥനും ഭാര്യയും ഉൾപ്പെടെ രണ്ടുപേർക്ക് പരിക്ക്. ഇന്നെലെ പുലർച്ചെ അഞ്ചോടെയായിരുന്നു സംഭവം. വെറ്റിലപ്പാറയില്‍ രാജീവ്ഗാന്ധി ദശലക്ഷം കോളനിയിലെ പട്ടരുകണ്ടത്തില്‍ കൃഷ്ണന്‍കുട്ടിയും അമ്മിണിയും താമസിച്ചിരുന്ന വീടാണ് വെള്ളിയാഴ്ച പുലര്‍ച്ചെ തകര്‍ന്നുവീണത്. ഭിത്തി തകര്‍ന്നതിനേതുടര്‍ന്ന് കോണ്‍ക്രീറ്റ് മേല്‍ക്കൂര താഴേക്ക് പതിക്കുകയായിരുന്നു. ഉറങ്ങികിടക്കുകയായിരുന്ന കൃഷ്ണന്‍കുട്ടിയും അമ്മിണിയും അവശിഷ്ടങ്ങള്‍ക്കിടയില്‍ കുടുങ്ങി.നിലവിളി കേട്ട് ഓടിയെത്തിയ അയല്‍വാസികള്‍ ഏറെ ശ്രമകരമായാണ് ഇരുവരെയും പുറത്തെടുത്തത്. പരിക്കേറ്റ രണ്ടുപേരേയും ഉടന്‍ ആശുപത്രിയിലെത്തിച്ചു. അപകടത്തിൽ ഗുരുതര പരിക്കേറ്റ് കളമശേരി മെഡിക്കല്‍ കോളജില്‍ ചികിത്സയിലുള്ള അമ്മിണി അപകടനില തരണം ചെയ്തതായി ബന്ധുക്കൾ പറഞ്ഞു. കൃഷ്ണൻകുട്ടിക്ക് സാരമായ പരിക്കില്ല. 35 വര്‍ഷം മുമ്പ് ഹൗസിംഗ് ബോര്‍ഡ് നിര്‍മിച്ചുനല്‍കിയ വീടാണ് തകര്‍ന്നത്. വെട്ടുകല്ലുകൊണ്ടുള്ള ഭിത്തിക്ക് കാലപ്പഴക്കംമൂലം ബലക്ഷയം സംഭവിച്ചതാണ് കാരണം. തകര്‍ന്ന വീട് റവന്യുവകുപ്പ് ഉദ്യോഗസ്ഥരും ജനപ്രതിനിധികളും സന്ദര്‍ശിച്ചു.

പിറവത്ത് ജലനിരപ്പ് ഉയരുന്നു

പിറവം: പിറവം പുഴയിൽ ജലനിരപ്പ് ഉയർന്നത് മേഖലയിൽ ആശങ്കപരത്തി. താഴ്ന്ന പ്രദേശങ്ങളിൽ നിരവധി ഭാഗങ്ങളിൽ കൃഷിയിടങ്ങൾ വെള്ളത്തിലാണ്. പാഴൂർ ആറ്റുതീരം പാർക്ക് വെള്ളത്തിൽ മുങ്ങിയ നിലയിലാണ്. പുഴയുടെ തീരത്തുള്ള കളമ്പൂർ മത്സ്യക്കോളനിയിൽ വെള്ളം കയറിത്തുടങ്ങിയിട്ടുണ്ട്. ഈ രീതിയിൽ ജല നിരപ്പ് ഉയരുകയാണങ്കിൽ ഇന്ന് കോളനിയിലെ വീടുകളിൽ വെള്ളം കയറിത്തുടങ്ങും. ഉഴവൂർ തോട് കരകവിഞ്ഞ് ഒഴുകുന്നതിനെത്തുടർന്ന് ഓണക്കൂർ, കക്കാട് മേഖലകളിൽ പച്ചക്കറി കൃഷികളെല്ലാം വെള്ളത്തിലായിരിക്കുകയാണ്. കർഷകർക്ക് വലിയ നാശമാണ് സംഭവിച്ചിരിക്കുന്നത്. മരച്ചീനിയും, പാവലും, പടവലും തുടങ്ങിയ കൃഷിയെല്ലാം വെള്ളത്തിൽ മുങ്ങി. അടിയന്തരമായി ദുരിതാശ്വാസ ക്യാമ്പുകൾ തുറക്കാനുള്ള നടപടികൾ നഗരസഭ സ്വീകരിച്ചിട്ടുണ്ടെന്ന് അധികൃതർ അറിയിച്ചു.

മൂവാറ്റുപുഴയാറിലെ ജലനിരപ്പ് താഴ്ന്നു

മൂവാറ്റുപുഴ: നഗരത്തില്‍ മഴയുടെ ശക്തികുറയുകയും മലങ്കര ഡാമില്‍നിന്നുള്ള നീരെഴുക്കിന്‍റെ അളവ് കുറയ്ക്കുകയും ചെയ്തതോടെ മൂവാറ്റുപുഴയാറിലെ ജലനിരപ്പ് താഴ്ന്നു. ബുധനാഴ്ച രാത്രിയിലും വ്യാഴാഴ്ചയും പെയ്ത ശക്തമായ മഴയെ തുടര്‍ന്ന് മൂവാറ്റുപുഴയിലെ താഴന്ന പ്രദേശങ്ങളില്‍ വെള്ളം കയറിയിരുന്നു. ഇന്നലെ രാവിലെ മുതല്‍ മഴയുടെ ശക്തികുറഞ്ഞതും, മലങ്കര ഡാമിലെ ആറ് ഷട്ടുകളില്‍ നിന്നുള്ള വെള്ളത്തിന്‍റെ നീരെഴുക്ക് കുറച്ചതും മൂവാറ്റുപുഴയിലെ തീരവാസികള്‍ക്കും താഴ്ന്ന പ്രദേശങ്ങളിലെ താമസക്കാര്‍ക്കും ആശ്വാസമായി. മലങ്കര ഡാമിന്‍റെ ആറു ഷട്ടറുകളില്‍ നിന്ന് 50 സെന്‍റീ മീറ്റര്‍ വെള്ളം വീതമാണ് ഒഴുക്കുന്നത്. ഇതോടെയാണ് മൂവാറ്റുപുഴയാറിലെ ജലനിരപ്പ് അപകടനിരപ്പില്‍ നിന്ന് മുന്നറിയിപ്പ് നിരക്കിലേക്ക് താഴ്ന്നത്. ഇലാഹിയ കോളനി, ആനിക്കകുടി കോളനി, കാളച്ചന്ത എന്നിവിടങ്ങളിലാണ് വെള്ളം കയറിയത്. നിലവില്‍ രണ്ട് ദുരിതാശ്വാസക്യാമ്പുകളിലായി 25 കുടുംബങ്ങളാണുള്ളത്. വാളപ്പിള്ളി ജെബി സ്‌കൂളിലെ ക്യാമ്പില്‍ 17 കുടുംബങ്ങളും, കടാതി എന്‍എസ്എസ് കരയോഗം ക്യാമ്പില്‍ എട്ടു കുടുംബങ്ങളുമാണ് ഉള്ളത്. ഇന്നും മഴയിൽ കുറവാണെങ്കിൽ ഇവർ വീടുകളിലേക്ക് മടങ്ങും.

ഭവൻസ് മുൻഷി വിദ്യാശ്രം രജതജൂബിലിക്ക് തുടക്കമായി

കൊച്ചി: തൃപ്പൂണിത്തുറ ഭവൻസ് മുൻഷി വിദ്യാശ്രമത്തിന്‍റെ ഒരു വർഷം നീണ്ടുനിൽക്കുന്ന രജതജൂബിലി ആഘോഷങ്ങൾക്ക് തിരിതെളിഞ്ഞു. വിദ്യാലയാങ്കണത്തിലെ ലീലാവതി മുൻഷി സഭാഗൃഹത്തിൽ മുംബൈയിലെ ഭാരതീയ വിദ്യാഭവൻ എക്സിക്യൂട്ടീവ് സെക്രട്ടറിയും ഡയറക്ടർ ജനറലുമായ ജഗദീഷ് ലഖാനി ഉദ്ഘാടനം ചെയ്തു. രജതജൂബിലി ലോഗോയും അദ്ദേഹം പ്രകാശിപ്പിച്ചു. അനൂപ് ജേക്കബ് എംഎൽഎ, മുനിസിപ്പൽ ചെയർപേഴ്സൺ രമ സന്തോഷ്, കെ.വി. സാജു, വേണുഗോപാൽ സി ഗോവിന്ദ്, ഇ. രാമൻകുട്ടി, കെ.സുരേഷ്, ഡോ.പി.ശ്രീകുമാർ എന്നിവർ ചടങ്ങിൽ സംബന്ധിച്ചു. എസ്. ലത സ്വാഗതവും രമ്യ ദാസ് നന്ദിയും പറഞ്ഞു.

കോതമംഗലം രൂപതദിന ആഘോഷം ഇന്നു കാളിയാറില്‍

കാളിയാര്‍: കോതമംഗലം രൂപത ദിനാഘോഷം ഇന്നു കാളിയാര്‍ സെന്‍റ് റീത്താസ് ഫൊറോനാ പള്ളിയില്‍ നടക്കും. ഉച്ചകഴിഞ്ഞ് 2.30നു സമൂഹബലിയോടെ ആഘോഷപരിപാടികള്‍ ആരംഭിക്കും. കോതമംഗലം ബിഷപ് മാര്‍ ജോര്‍ജ് മഠത്തിക്കണ്ടത്തില്‍ മുഖ്യകാര്‍മികത്വം വഹിക്കും. തുടര്‍ന്നു പാരിഷ്ഹാളില്‍ നടക്കുന്ന സമ്മേളനത്തില്‍ മാര്‍ ജോര്‍ജ് മഠത്തിക്കണ്ടത്തില്‍ അധ്യക്ഷനാകും. കാഞ്ഞിരപ്പള്ളി ബിഷപ് മാര്‍ ജോസ് പുളിക്കല്‍ രൂപത ദിന സന്ദേശം നല്‍കും. മാര്‍ ജോര്‍ജ് പുന്നക്കോട്ടില്‍ അനുഗ്രഹ പ്രഭാഷണം നടത്തും. രൂപത വികാരി ജനറാള്‍ മോണ്‍. വിന്‍സെന്‍റ് നെടുങ്ങാട്ട് അവാര്‍ഡ് ജേതാക്കളെ പരിചയപ്പെടുത്തും. ഡീന്‍ കുര്യാക്കോസ് എംപി, ആന്‍റണി ജോണ്‍ എംഎല്‍എ എന്നിവര്‍ പ്രസംഗിക്കും. വിവിധ രംഗങ്ങളില്‍ പ്രാഗല്‍ഭ്യം തെളിയിച്ച ഫാ. ആന്‍റണി ഉരുളിയാനിക്കല്‍, മുതലക്കോടം ഹോളിഫാമിലി ആശുപത്രി മുന്‍ സൂപ്രണ്ട് ഡോ. ഇ.വി. ജോര്‍ജ്, സിസ്റ്റര്‍ ആര്‍ക്കെയ്ഞ്ചല്‍ എന്നിവരെ ചടങ്ങില്‍ ആദരിക്കും. കാളിയാര്‍ സെന്‍റ് റീത്താസ് ഫൊറോന പള്ളി വികാരി ഫാ. ജോസഫ് മുണ്ടുനടയില്‍ സ്വാഗതവും, കോതമംഗലം രൂപത പിആര്‍ഒ ജോര്‍ജ് ജോസഫ് കേളകം നന്ദിയും പറയും. രൂപതയിലെ വൈദികര്‍, കൈക്കാരന്മാര്‍, ഭക്തസംഘടനാ പ്രതിനിധികള്‍, സന്യസ്തര്‍ ഉള്‍പ്പെടെയുള്ളവര്‍ പങ്കെടുക്കും.

കെസിബിസി മദ്യവിരുദ്ധസമിതി : കൊച്ചി രൂപത ലഹരിവിരുദ്ധ ദിനാചരണം സംഘടിപ്പിച്ചു

ഫോർട്ടുകൊച്ചി: കെസിബിസി മദ്യവിരുദ്ധസമിതി കൊച്ചി രൂപതയുടെ നേതൃത്വത്തിൻ ഫോർട്ട്കൊച്ചി മെത്രാസന മന്ദിരത്തിൽ ലഹരിവിരുദ്ധ ദിനം ആചരിച്ചു. കൊച്ചി രൂപത അപ്പസ്തോലിക് അഡ്മിനിസ്ടേറ്റർ ഡോ. ജെയിംസ് ആനാപറമ്പിൽ ഉദ്ഘാടനം ചെയ്തു. സംസ്ഥാന സെക്രട്ടറി സി.എക്സ്. ബോണി അധ്യക്ഷത വഹിച്ചു. കൊച്ചി രൂപത ചാൻസലർ ഫാ. ജോണി പുതുക്കാട്ട്, രൂപത ഡയറക്ടർ ഫാ. ആന്‍റണി അറക്കൽ, പീറ്റർ റൂഫസ്, ജോബ് പുളിക്കിൽ, റാഫേൽ തടിത്തറ, എം.എസ്. ജൂഡ്‌സൻ, സിസ്റ്റർ ജിസ്ന, സിസ്റ്റർ എൽസി ജെയിൻ, സിസ്റ്റർ ബെറ്റി, ഡിക്സൻ മനീക്, ജാർവിൻ, അലക്സ് പുള്ളോശേരി എന്നിവർ പ്രസംഗിച്ചു.

പുളിയനം സ്കൂളിൽ പ്രതിഭകളെ അനുമോദിച്ചു

നെടുമ്പാശേരി: പുളിയനം ഗവ. ഹയർ സെക്കൻഡറി സ്കൂളിൽ നിന്നും ഈ വർഷം എസ്എസ്എൽസി, പ്ലസ് ടു പരീക്ഷകളിൽ മുഴുവൻ വിഷയങ്ങൾക്കും എ പ്ലസ് നേടിയ വിദ്യാർഥികളെയും, പൂർവ വിദ്യാർഥിയും കേന്ദ്ര, സംസ്ഥാന പുരസ്കാര ജേതാവുമായ ഫയർ ആൻഡ് റസ്ക്യൂ ഉദ്യോഗസ്ഥൻ അനിൽ മോഹനെയും പൂർവ വിദ്യാർഥി സംഘടന ആദരിച്ചു. ചാലക്കുടി അഗ്നിരക്ഷാ നിലയത്തിലെ ഉദ്യോഗസ്ഥനായ അനിൽ മോഹന് ഈ വർഷത്തെ കേന്ദ്ര ആഭ്യന്തര മന്ത്രാലയത്തിന്‍റെ ഡയറക്ടറേറ്റ് ജനറൽ ഫയർ സർവീസ് ഡിസ്ക് ആൻഡ് കമന്‍റേഷൻ സർട്ടിഫിക്കറ്റും സംസ്ഥാന ഫയർ ആൻഡ് റെസ്ക്യൂ ഡിപ്പാർട്ട്മെന്‍റ് ബാഡ്ജ് ഓഫ് ഓണർ പുരസ്കാരവും ലഭിച്ചിരുന്നു. അങ്കമാലി പൊലീസ് സബ് ഇൻസ്പെക്ടർ ബിജുബേബി അനിൽ മോഹന് ഉപഹാരം നൽകി. ഉന്നത വിജയം നേടിയ വിദ്യാർഥികളെയും അവരുടെ രക്ഷിതാക്കളേയും ജില്ലാ പഞ്ചായത്തംഗം ഷൈനി ജോർജ് മെമന്‍റോയും കാഷ് അവാർഡും നൽകി ആദരിച്ചു. പൂർവ വിദ്യാർഥി സംഘടന പ്രസിഡന്‍റ് പി.എൻ. നന്ദകുമാർ അധ്യക്ഷനായി. സ്കൂൾ ഓഡിറ്റോറിയത്തിൽ ചേർന്ന യോഗത്തിൽ സെക്രട്ടറി പി.വി. അയ്യപ്പൻ, ബ്ലോക്ക് പഞ്ചായത്ത് വൈസ് പ്രസിഡന്‍റ് താരാസജീവ്, വാർഡ് മെമ്പർ പി.ആർ. രാജേഷ്, പ്രിൻസിപ്പൽ എം.എം. റിയാമോൾ, ഹെഡ്മിസ്ട്രസ് പി. ഡി. ലീമ, പിടിഎ പ്രസിഡന്‍റ് ബിബിൻ ബാലകൃഷ്ണൻ എന്നിവർ പ്രസംഗിച്ചു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]