ADVERTISEMENT

ADVERTISEMENT

താലൂക്ക് വായനപക്ഷാചരണ സമാപനം നടത്തി

അടൂർ: താലൂക്ക് ലൈബ്രറി കൗണ്‍സില്‍ സംഘടിപ്പിച്ച വായനപക്ഷാചരണ സമാപനവും ഐ.വി. ദാസ് അനുസ്മരണവും സര്‍ക്കാര്‍ ബോയ്സ് ഹയര്‍ സെക്കന്‍ഡറി സ്‌കൂളില്‍ ഡെപ്യൂട്ടി സ്പീക്കര്‍ ചിറ്റയം ഗോപകുമാര്‍ ഉദ്ഘാടനം ചെയ്തു.

താലൂക്ക് ലൈബ്രറി കൗണ്‍സില്‍ പ്രസിഡന്‍റ് മുണ്ടപ്പള്ളി തോമസ് അധ്യക്ഷത വഹിച്ചു. സംസ്ഥാന ലൈബ്രറി കൗണ്‍സില്‍ വൈസ് പ്രസിഡന്‍റ് എ.പി. ജയന്‍ ഐ.വി. ദാസ് അനുസ്മരണ പ്രഭാഷണം നടത്തി.

ജില്ലാ ലൈബ്രറി കൗണ്‍സില്‍ വൈസ് പ്രസിഡന്‍റ് ബി. സതികുമാരി, താലൂക്ക് സെക്രട്ടറി വിജു രാധാകൃഷ്ണൻ, വൈസ് പ്രസിഡന്‍റ് കെ.ജി. വാസുദേവന്‍, ജോയിന്‍റ് സെക്രട്ടറി വിനോദ് മുളമ്പുഴ,എക്സിക്യൂട്ടീവ് അംഗങ്ങളായ സിംലകുമാരി മീരാ സാഹിബ്, തെങ്ങമം ഗോപകുമാർ, ബിനു വെള്ളച്ചിറ, പ്രിന്‍സിപ്പല്‍ സജി വര്‍ഗീസ് എന്നിവര്‍ പ്രസംഗിച്ചു.

ADVERTISEMENT

ആംബുലൻസ് ഓട്ടോറിക്ഷയിൽ ഇടിച്ച് ഒരാൾക്ക് പരിക്ക്

തിരുവല്ല: രോഗിയുമായി പോയ ആംബുലൻസ് ഓട്ടോറിക്ഷയുമായി കൂട്ടിയിടിച്ചു ഉണ്ടായ അപകടത്തിൽ ഒരാൾക്ക് പരിക്ക്. ഓട്ടോറിക്ഷ യാത്രക്കാരൻ പരിക്കേൽക്കാതെ രക്ഷപ്പെട്ടു. ഓട്ടോറിക്ഷ ഡ്രൈവറായ കുരിശുകവല ശങ്കരത്തുംങ്കൽ താഴ്ചയിൽ ശരത്തിനാണ് (36) പരിക്കേറ്റത്. തിങ്കളാഴ്ച രാത്രി പത്തോടെ തിരുവല്ല കുരിശുകവല ജംഗ്ഷനിൽ ആയിരുന്നു അപകടം. ചെങ്ങന്നൂർ ഭാഗത്തുനിന്നും രോഗിയുമായി കോട്ടയം മെഡിക്കൽ കോളജ് ആശുപത്രിയിലേക്ക് പോകുകയായിരുന്ന ആംബുലൻസും കാവുംഭാഗം റോഡിലേക്ക് തിരിയുകയായിരുന്ന ഓട്ടോറിക്ഷയും തമ്മിലാണ് കൂട്ടിയിടിച്ചത്. തലകീഴായി മറിഞ്ഞ ഓട്ടോറിക്ഷയിൽ നിന്നും ശരത് റോഡിലേക്ക് തെറിച്ചു വീണു. ശരത്തിനെ തിരുവല്ല താലൂക്ക് ആശുപത്രിയിൽ പ്രവേശിപ്പിച്ചു. ആംബുലൻസിന്‍റെ മുൻവശത്തെ ടയർ പൊട്ടിയതിനേതുടർന്ന് രോഗിയെ മറ്റൊരു ആംബുലൻസിൽആശുപത്രിയിലേക്ക് അയച്ചു.

സ്കൂൾ സമയത്ത് ചരക്കുലോറികൾ നിയന്ത്രിക്കണം

പത്തനംതിട്ട: പുനലൂർ - മൂവാറ്റുപുഴ റോഡിൽ സ്കൂൾ സമയത്ത് ഓടുന്ന ചരക്ക് ലോറികൾക്കെതിരേ നടപി വേണമെന്ന് കോഴഞ്ചേരി താലൂക്ക് വികസന സമിതി ആവശ്യപ്പെട്ടു. ഓമല്ലൂര്‍ ഗ്രാമപഞ്ചായത്ത് പ്രസിഡന്‍റ് ജോണ്‍സണ്‍ വിളവിനാല്‍ അധ്യക്ഷത വഹിച്ചു. കേടുകൂടാതെ സുരക്ഷിതമായി ഉപയോഗിക്കാവുന്ന ആന്‍റി റാബിസ് വാക്‌സിനുകളായ എച്ച്ആര്‍ഐജി, റാബിഷില്‍ഡ്, ഈആര്‍ഐജി തുടങ്ങിയവ സര്‍ക്കാര്‍ ആശുപത്രികളില്‍ ഉറപ്പാക്കണം. പത്തനംതിട്ട, കോഴഞ്ചേരി ജില്ലാ ആശുപത്രിയിലെ ടിബി സെന്‍റര്‍ പ്രവര്‍ത്തിക്കുന്ന കെട്ടിടം, കെഎച്ച്ആര്‍ഡബ്ലുസിയുടെ പേവാര്‍ഡ് എന്നിവയുടെ ശോചനീയവസ്ഥ അടിയന്തിരമായി പരിഹരിക്കണമെന്നും യോഗം ആവശ്യപ്പെട്ടു. കോഴഞ്ചേരി തഹസില്‍ദാര്‍ ടി.കെ.നൗഷാദ്, ഡെപ്യൂട്ടി തഹസില്‍ദാര്‍ എൽ.സന്ധ്യാറാണി, വിവിധ രാഷ്‌ട്രീയ പാര്‍ട്ടി പ്രതിനിധികള്‍, താലൂക്ക്തല ഉദ്യോഗസ്ഥര്‍ തുടങ്ങിയവര്‍ പങ്കെടുത്തു.

ബാലികയെ വെട്ടി പരിക്കേല്പിച്ച കേസിൽ പ്രതിക്ക് ജീവപര്യന്തം

വെട്ടേറ്റത് അമ്മയ്ക്കു നേരേയുള്ള ആക്രമണം തടയുന്നതിനിടെ പത്തനംതിട്ട: 12 വയസുള്ള പെണ്‍കുട്ടിയുടെ കൈപ്പത്തിക്ക് വെട്ടി ഗുരുതരമായി പരിക്കേല്പിച്ച കേസില്‍ പ്രതിക്ക് ജീവപര്യന്തം കഠിന തടവും ലക്ഷം രൂപ പിഴയും. കൂടല്‍ അതിരുങ്കല്‍ അഞ്ചുമുക്ക് പറങ്കാം തോട്ടത്തില്‍ ഗീവര്‍ഗീസ് തോമസി (അനിയൻകുഞ്ഞ്, 42) നെയാണ് പത്തനംതിട്ട അഡീഷണല്‍ ഡിസ്ട്രിക്ട് ആന്‍ഡ് സെഷന്‍സ് കോടതി ഒന്ന് ജഡ്ജി ജി.പി. ജയകൃഷ്ണന്‍ കുറ്റക്കാരനെന്ന് കണ്ടെത്തി ശിക്ഷ വിധിച്ചത്. പട്ടികജാതി,വര്‍ഗവിഭാഗങ്ങള്‍ക്കെതിരായ അതിക്രമങ്ങള്‍ തടയല്‍ നിയമത്തിലെ വകുപ്പ് പ്രകാരമാണ് ജീവപര്യന്തം ശിക്ഷിച്ചത്. ഗുരുതരമായി പരിക്കുകള്‍ ഏല്പിച്ചതിനു അഞ്ച് വര്‍ഷം കഠിന തടവും 50,000 രൂപയും, വീട്ടില്‍ അതിക്രമിച്ചുകടന്നതിനു മൂന്നു വർഷം കഠിന തടവും 25,000 രൂപ പിഴയും ശിക്ഷിച്ചു. ശിക്ഷാകാലയളവ് ഒരുമിച്ചു അനുഭവിച്ചാല്‍ മതിയാകും. പിഴത്തുക കുട്ടിക്ക് നല്‍കാനും, ഒടുക്കിയില്ലെങ്കില്‍ വസ്തുക്കളില്‍ നിന്നും കണ്ടുകെട്ടി നല്‍കാനുള്ള നടപടി സ്വീകരിക്കാനും വിധിയില്‍ പറയുന്നു. 2016 മാര്‍ച്ച് 18നാണ് കേസിനാസ്പദമായ സംഭവം. സ്ഥലത്ത് സ്ഥിരമായി മദ്യപിച്ച് ബഹളമുണ്ടാക്കുന്ന ഇയാ‌ളെ സംബന്ധിച്ചു കൂടല്‍ പോലീസില്‍ വിളിച്ചറിയിക്കുമെന്ന് പറഞ്ഞ അയല്‍വാസി മേടക്കര വീട്ടില്‍ പ്രിയ ദിലീപിനെയാണ് വെട്ടുകത്തിയുമായി ആക്രമിച്ചത്. ഈസമയം വീട്ടില്‍ യുവതിക്കൊപ്പം ഉണ്ടായിരുന്ന 12 കാരിയായ മകള്‍ കൈകള്‍ കൊണ്ട് തടഞ്ഞു. കൈകള്‍ക്ക് വെട്ടേറ്റു, ഇടതുകൈപ്പത്തിക്ക് താഴെ റിസ്റ്റിന്‍റെ ഭാഗത്ത് പ്രധാന ഞരമ്പ് മുറിഞ്ഞു മാറി. അതിന് താഴെയുള്ള അസ്ഥിക്ക് മുറിവും സംഭവിച്ചു. വലതു കൈവെള്ളഭാഗത്ത് ആഴത്തില്‍ മുറിവേല്‍ക്കുകയും ചെയ്തു. കൂടാതെ, പ്രിയയും കുടുംബവും വീട് വിറ്റ് പോകാത്തതിലുള്ള മുന്‍വിരോധവും ആക്രമണകാരണമായി. ഗുരുതര പരിക്കുകളോടെ കോട്ടയം മെഡിക്കല്‍ കോളജ് ആശുപത്രിയില്‍ ചികില്‍സ തേടി. കൂടല്‍ അഡിഷണല്‍ എസ്ഐ ആയിരുന്ന വി.ടി.രാജു കേസ് അന്വേഷണം നടത്തി. കോടതിയില്‍ കുറ്റപത്രം സമര്‍പ്പിച്ചത് അന്നത്തെ അടൂര്‍ ഡിവൈഎസ്പി റഫീഖ് ആയിരുന്നു. പ്രോസിക്യൂട്ടര്‍മാരായ ടി ഹരികൃഷ്ണന്‍, ഹരി ശങ്കര്‍ പ്രസാദ് എന്നിവര്‍ കോടതിയില്‍ ഹാജരായായി.

കുട്ടികളുടെ യാത്രയ്ക്ക് ഡബിൾ ബെൽ മുഴക്കി എംഎൽഎ

റാന്നി: വെച്ചൂച്ചിറ കോളനി ഗവൺമെന്‍റ് ഹയർ സെക്കൻഡറി സ്കൂളിലെ വിദ്യാർഥികളുടെ യാത്രാക്ലേശം പരിഹരിക്കാനായി പുതിയ ബസ് സർവീസ്. മുക്കൂട്ടുതറ ഭാഗത്തുനിന്നും കോളനി സ്കൂളിലേക്ക് വരുന്ന കുട്ടികൾക്ക് യാത്രാ സൗകര്യം ഒരുക്കുന്നതിന്‍റെ ഭാഗമായാണ് നവോദയ ജംഗ്ഷൻ വരെ എത്തി സർവീസ് നടത്തിയിരുന്ന കെഎസ്ആർടിസി ബസ് ചാത്തൻതറയിലേക്ക് നീട്ടിയത്. ബസ് സർവീസ് ഉദ്ഘാടനം ചെയ്തശേഷം യാത്ര ചെയ്തെത്തിയ പ്രമോദ് നാരായൺ എംഎൽഎയെ സ്വീകരിക്കാൻ നാട്ടുകാർ ഒന്നടങ്കം എത്തിയിരുന്നു. എംഎൽഎയെ അഭിനന്ദിക്കാൻ കുട്ടികൾ ഒത്തുകൂടുകയും ചെയ്തു. രാവിലെ 8.10 ന് ചാത്തൻതറയിൽ നിന്നും നവോദയയിലേക്ക് ആരംഭിക്കുന്ന സർവീസിന്‍റെ ഫ്ലാഗ് ഓഫ് എംഎൽഎ നിർവഹിച്ചു. ദിവസം 100 രൂപയിൽ അധികം മുടക്കി ഓട്ടോറിക്ഷയും മറ്റും പിടിച്ചായിരുന്നു ഇതുവരെ കുട്ടികൾ സ്കൂളിൽ പോയിരുന്നത്. ചാത്തൻതറയിൽ നിന്നും രാവിലെ ബസ് സർവീസ് ഇല്ലാത്തതിനാൽ ഇവിടെയുള്ള വിദ്യാർഥികളും ഉദ്യോഗസ്ഥരും എരുമേലി വഴി ഇരട്ടി ദൂരം സഞ്ചരിച്ച് ചുറ്റിയാണ് ഇപ്പോൾ റാന്നി എത്തിയിരുന്നത്. ഇതിനും ഇതോടെ പരിഹാരമാവുകയാണ്. കുട്ടികളും യാത്രക്കാരും അനുഭവപ്പെടുന്ന യാത്രാക്ലേശം ശ്രദ്ധയിൽപെടുത്തിയപ്പോഴാണ് എംഎൽഎ തന്നെ ഇടപെട്ട് പത്തനംതിട്ട ഡിടിഒയുടെ സാന്നിധ്യത്തിൽ സ്കൂൾ അധികൃതരുടെയും നാട്ടുകാരുടെയും യോഗം വിളിച്ചുചേർത്ത് ബസ് സർവീസ് നീട്ടാൻ തീരുമാനിച്ചത്. ഇതുനോടൊപ്പം മണ്ണടിശാലയിൽ നിന്നും കടുമീൻചിറ ഗവ. ഹയർ സെക്കൻഡറി സ്കൂളിലേക്ക് നീട്ടിയ കെഎസ്ആർടിസി ബസ് സർവീസിന്‍റെ ഉദ്ഘാടനവും എംഎൽഎ നിർവഹിച്ചു. മധുരപരഹാരങ്ങൾ നൽകിയാണ് കുട്ടികൾ എംഎൽഎ സ്വീകരിച്ചത്.

ഡോ.എം.എസ്. സുനിലിന്‍റെ ഭവനം രാധാമണിക്കും കുടുംബത്തിനും നൽകി

പത്തനംതിട്ട: സാമൂഹിക പ്രവർത്തക ഡോ. എം.എസ്. സുനിൽ സുരക്ഷിതമല്ലാത്ത കുടിലുകളിൽ കഴിയുന്ന ഭവനരഹിതരായ നിരാലംബർക്ക് പണിതു നൽകുന്ന 357 -ാമത് സ്നേഹഭവനം പന്തളം സ്വദേശിയായ എം.സി. ജോസ് - ലാലി ദമ്പതികളുടെ വിവാഹവാർഷിക സമ്മാനമായി വടക്കടത്തുകാവ് നെടിയകാലായിൽ വിധവയായ രാധാമണിക്കും കുടുംബത്തിനുമായി നിർമിച്ചു നൽകി. വർഷങ്ങൾക്കു മുമ്പ് മകൻ കെട്ടിടത്തിനു മുകളിൽ നിന്നും വീണ് ചലനശേഷിയും സംസാരശേഷിയും നഷ്ടപ്പെട്ട അവസ്ഥയിലാകുകയും ഭർത്താവ് മരണപ്പെടുകയും ചെയ്തപ്പോൾ വീട് പൂർത്തീകരിക്കാൻ കഴിയാതെ പുറമ്പോക്കിൽ സുരക്ഷിതമല്ലാത്ത ഒരു ചെറിയ കുടിലിൽ ആയിയ്തിരുന്നു രാധാമണി അസുഖബാധിതയായ അമ്മയോടും മകനോടും ഒപ്പം താമസിച്ചിരുന്നത്. വീട്ടുജോലിയിൽ നിന്നും കിട്ടുന്ന തുച്ഛമായ വരുമാനത്തിൽ മകന്‍റെ ചികിത്സയും അമ്മയുടെ ചികിത്സയും ദൈനംദിന ചെലവുകളും നടത്തുവാൻ ബുദ്ധിമുട്ടിയിരുന്ന രാധാമണിക്ക് സ്വന്തമായി ഒരു ഭവനം പണിയുവാൻ യാതൊരു നിവൃത്തിയുമില്ലായിരുന്നു. ഇവരുടെ ദയനീയ അവസ്ഥ നേരിൽ കണ്ട് മനസിലാക്കിയ ഡോ. സുനിൽ ജോസിന്‍റെയും ലാലിയുടെയും വിവാഹ വാർഷിക സമ്മാനമായി രണ്ട് മുറികളും അടുക്കളയും ഹാളും ശുചിമുറിയും സിറ്റൗട്ടുമടങ്ങിയ വീട് പൂർത്തീകരിച്ചു നൽകുകയായിരുന്നു. ചടങ്ങിൽ വാർഡ് മെംബർ ശ്രീലേഖ ഹരികുമാർ, പ്രോജക്ട് കോഓഡിനേറ്റർ കെ .പി .ജയലാൽ, കെ. പ്രസന്നൻ, പൊന്നച്ചൻ വടക്കടത്തുകാവ് എന്നിവർ പ്രസംഗിച്ചു.

താലൂക്ക് ആശുപത്രിക്ക് പുതിയ റോഡും കവാടവും നിർമാണം ആരംഭിച്ചു

കോന്നി: ബ്ലോക്ക് പഞ്ചായത്ത് 2023 -24 വാർഷിക പദ്ധതിയിൽ ഉൾപ്പെടുത്തി താലൂക്ക് ആശുപത്രിയുടെ മുഖച്ഛായ മാറ്റുന്ന തരത്തിൽ പുതിയ റോഡ് നിർമിക്കുന്നതിനായി 21 ലക്ഷം രൂപയും 2024-25 വാർഷിക പദ്ധതിയിൽ കവാടവും അനുബന്ധമായി വെയിറ്റിംഗ് ഏരിയയും നിർമിക്കുന്നതിന് 23 ലക്ഷം രൂപയും വകയിരുത്തി. പുതിയ കെട്ടിടത്തിലേക്ക് നേരിട്ടു പ്രവേശിക്കുന്ന തരത്തിലാണ് റോഡ് നിർമിക്കുന്നത്. അഗ്നിശമന സേനയുടെ വാഹനം ആംബുലൻസ് ഉൾപ്പെടെ ആശുപത്രിയിലേക്ക് തടസം കൂടാതെ കടന്നു വരുന്നതിന് റോഡിന്‍റെ നിർമാണം പൂർത്തീകരിക്കുന്നതോടെ സാധിക്കും. അത്യാഹിത വിഭാഗം പുതിയ കെട്ടിടത്തിലേക്ക് മാറ്റപ്പെടുമ്പോൾ അത്യാസന്ന നിലയിലുള്ള രോഗികളെ വേഗത്തിൽ എത്തിക്കുന്നതിന് പുതിയ റോഡ് ഉപകരിക്കും. കൂടാതെ ആശുപത്രി ചുറ്റി ഇരുവശത്തുകൂടിയും സഞ്ചാരം സാധ്യമാകുമെന്നതിനാൽ ആശുപത്രിയെ ആശ്രയിക്കുന്ന രോഗികൾക്ക് ബുദ്ധിമുട്ട് ഇല്ലാതെ കടന്നു വരുന്നതിനും സാധ്യമാക്കും. റോഡ് കടന്നു പോകുന്ന സ്ഥലത്തെ മരം മുറിക്കുന്നതുൾപ്പെടെയുള്ള തടസങ്ങൾ പരിഹരിച്ചാണ് നിർമാണം ആരംഭിച്ചത്. കൂടാതെ പ്രധാന പാത രണ്ടായി തിരിയുന്ന സ്ഥലത്ത് അഗ്നിശമന സേനയുടെ വാഹനം ഉൾപ്പെടെ കടന്നുപോകുന്നതിനായി കവാടവും അനുബന്ധമായി വെയിറ്റിംഗ് ഏരിയയും നിർമിക്കുന്നതിന് 23 ലക്ഷം രൂപ 2024-25 വാർഷിക പദ്ധതിയിൽ അനുവദിച്ചിരുന്നു. ഇതിന്‍റെ നിർമാണ പ്രവർത്തനങ്ങൾക്ക് തുടക്കമായി. ബ്ലോക്ക് പഞ്ചായത്ത് പ്രസിഡന്‍റ് എം.വി. അമ്പിളി, വൈസ് പ്രസിഡന്‍റ് ആർ. ദേവകുമാർ, ആരോഗ്യ വിദ്യാഭ്യാസ സ്ഥിരം സമിതി ചെയർപേഴ്സൺ തുളസീമണിയമ്മ, ബ്ലോക്ക് പഞ്ചായത്ത് അംഗം പ്രവീൺ പ്ലാവിളയിൽ, അസിസ്റ്റന്‍റ് എൻജിനിയർ ശ്രീജ കുഞ്ഞമ്മ, ആശുപത്രി സൂപ്രണ്ട് സ്മിത ആൻ സാം എന്നിവർ നിർമാണ പ്രവർത്തനങ്ങൾ വിലയിരുത്തി.

കൃഷിവകുപ്പിന്‍റെ എതിർപ്പ് മറികടന്ന് ആറന്മുള ഇലക്‌ട്രോണിക്സ് ക്ലസ്റ്റർ പദ്ധതിയുമായി ഐടി വകുപ്പ്

പത്തനംതിട്ട: സംസ്ഥാന സർക്കാർ ഉപേക്ഷിച്ച ആറൻമുള വിമാനത്താവള പദ്ധതി പ്രദേശത്ത് ഇലക്ട്രോണിക്സ് ക്ലസ്റ്റർ പദ്ധതിയുമായി ഐടി വകുപ്പ്. വിമാനത്താവള കമ്പനിയായ കെജിഎസ് ഗ്രൂപ്പ് ടിഒഎഫ്എൽ എന്ന പേരിൽ പുതിയ കമ്പനി രൂപീകരിച്ച് ഇലക്ട്രോണിക്സ് ക്ലസ്റ്റർ പാർക്ക് സ്ഥാപിക്കാൻ നൽകിയ അപേക്ഷയിൽ, പദ്ധതി പ്രദേശത്തിന്‍റെ സമ്പൂർണ വിവരങ്ങൾ ആവശ്യപ്പെട്ട് ഐടി വകുപ്പ് സ്പെഷൽ സെക്രട്ടറി പത്തനംതിട്ട ജില്ലാ കളക്ടർക്ക് കത്തു നൽകി. പദ്ധതിയുടെ സാധ്യതകളും ജില്ലാ കളക്ടറിൽ നിന്നു ആരാഞ്ഞിട്ടുണ്ട്. കേന്ദ്രസർക്കാരിന്‍റെ കൂടി പിന്തുണയിലാണ് ഇലക്ട്രോണിക്സ് ക്ലസ്റ്റർ പദ്ധതിക്ക് കന്പനി മുന്നിട്ടിറങ്ങിയിട്ടുള്ളതെന്നും പറയുന്നു. രാജീവ് ചന്ദ്രശേഖർ കേന്ദ്രമന്ത്രിയായിരുന്ന ഘട്ടത്തിൽ ഇതുമായി ബന്ധപ്പെട്ട ചില അനുമതികൾ ടിഒഎഫ്എൽ കന്പനി സ്വന്തമാക്കിയിരുന്നതായാണ് സൂചന. ആറന്മുളയിൽ ലഭ്യമായ ഭൂമി, പുരയിടം എത്ര, ഡേറ്റാ ബാങ്കിൽ ഉൾപ്പെട്ട ഭൂമി, 2008ന് മുൻപുള്ള സ്ഥിതി, നെൽപ്പാടം, കരഭൂമി, തണ്ണീർത്തടം തുടങ്ങിയ വിവരങ്ങളാണ് കളക്ടറോടു ചോദിച്ചിരിക്കുന്നത്. 335 ഏക്കർ ഭൂമിയിൽ മെഗാ ഇലക്ട്രോണിക്സ് ക്ലസ്റ്റർ പദ്ധതിക്കാണ് ഐടി വകുപ്പ് മുഖേന അനുമതി തേടിയിട്ടുള്ളത്. പദ്ധതിക്കെതിരേ സിപിഐയും മന്ത്രി പി. പ്രസാദും രംഗത്തു വന്നതിനേതുടർന്ന് പ്രാഥമികഘട്ടത്തിൽ തന്നെ പദ്ധതി വേണ്ടെന്നുവയ്ക്കാൻ മന്ത്രിസഭ നിർദേശിച്ചിരുന്നു. തണ്ണീർത്തടങ്ങൾ നികത്തിയെടുത്ത സ്ഥലത്ത് ഏതുതരത്തിലുള്ള സംരംഭവും അനുവദിക്കാനാകില്ലെന്നായിരുന്നു കൃഷിവകുപ്പിന്‍റെയും മന്ത്രിയുടെയും നിലപാട്. ഇതിനിടെ ആറന്മുളയിലെ സ്ഥലത്തെ സംബന്ധിച്ചു തർക്കം ഉന്നയിച്ച് മൗണ്ട് സിയോൺ എഡ്യുക്കേഷണൽ ട്രസ്റ്റ് ചെയർമാൻ ഏബ്രഹാം കലമണ്ണിലും രംഗത്തെത്തിയിരുന്നു. മൗണ്ട് സിയോൺ എഡ്യുക്കേഷൻ ഗ്രൂപ്പിനു എയർസ്ട്രിപ്പ് നിർമിക്കാൻ വാങ്ങിയ സ്ഥലമാണിതെന്നും കെജിഎസ് നിയന്ത്രിത കന്പനിക്ക് മറ്റൊരു സംരംഭം നൽകാനാകില്ലെന്നും ഏബ്രഹാം കലമണ്ണിൽ വ്യക്തമാക്കിയിരുന്നു. പദ്ധതി പ്രദേശത്ത് കുടിൽകെട്ടി താമസിക്കുന്നവരെ ഒഴിവാക്കിയാൽ എയർസ്ട്രിപ്പ് നിർമാണം ആരംഭിക്കാമെന്നും അദ്ദേഹം വ്യക്തമാക്കി. എന്നാൽ ഉദ്യോഗസ്ഥതലത്തിലെ നീക്കങ്ങളുടെ ഫലമാണ് മെഗാ ഇലക്ട്രോണിക്സ് ക്ലസറ്റർ പദ്ധതിക്ക് വീണ്ടും ജീവൻവച്ചിട്ടുള്ളത്. തണ്ണീർത്തടവും നിലവും നികത്തി വിമാനത്തവളം നിർമിക്കുന്നതിനെതിരേ വൻ പ്രതിഷേധമുയർന്നതിനെ തുടർന്ന് വിമാനത്താവളത്തിനുള്ള എല്ലാ അനുമതികളും 2016ൽ സംസ്ഥാന സർക്കാർ റദ്ദാക്കിയിരുന്നു. 2018ലെ പ്രളയത്തിൽ പമ്പാ നദി കരകവിഞ്ഞൊഴുകിയപ്പോൾ പ്രധാന ജലസംഭരണിയായത് പദ്ധതി പ്രദേശമായിരുന്നു. ഐടി സെക്രട്ടറിയുടെ കത്തിനു മറുപടി നൽകുന്നതിലേക്ക് വിശദമായ റിപ്പോർട്ട് നൽകാൻ തഹസിൽദാരോടും കൃഷി ഓഫീസർമാരോടും ആവശ്യപ്പെട്ടിട്ടുണ്ടെന്ന് പത്തനംതിട്ട ജില്ലാ കളക്ടർ എസ്. പ്രേംകൃഷ്ണൻ പറഞ്ഞു. സെക്രട്ടറി നടത്തിയത് കേവലം വിവര ശേഖരണം മാത്രമായിരിക്കുമെന്നും കാബിനറ്റ് അറിയാതെ ഒരു പദ്ധതിയും ആറന്മുളയിൽ തുടങ്ങാനാകില്ലെന്നും മന്ത്രി പി. പ്രസാദ് പറഞ്ഞു. നിലവിലെ നിയമവും ചട്ടവും ലംഘിച്ച് പദ്ധതി തുടങ്ങുന്നതിനെ പിന്തുണയ്ക്കാനാകില്ലെന്നും കൃഷി വകുപ്പ് വ്യക്തമാക്കിയിട്ടുണ്ട്.

തിരുവല്ലയില്‍ കഞ്ചാവ് പിടികൂടി

തിരുവല്ല: തിരുവല്ലയിൽ 1.240 കിലോഗ്രാം കഞ്ചാവും 1.25 ഗ്രാം ഹാഷിഷ് ഓയിലും എക്സൈസ് സംഘം കണ്ടെടുത്തു. സംഭവുമായി ബന്ധപ്പെട്ട് തിരുവല്ല കുറ്റൂര്‍ ഗവണ്‍മെന്‍റ് ഹയര്‍ സെക്കന്‍ഡറി സ്‌കൂളിന് സമീപം വാടകയ്ക്ക് താമസിക്കുന്ന പശ്ചിമബംഗാൾ മാല്‍ഡ ജില്ലയില്‍ സാംസി ഗ്രാമത്തില്‍ മജ്‌നുള്‍ ഇസ്ലാമിനെ (27) എക്‌സൈസ് അറസ്റ്റ് ചെയ്തു. എക്സൈസ് സംഘം നടത്തിയ മിന്നല്‍ പരിശോധനയിലാണ് ഇയാള്‍ പിടിയിലായത്. നിർമാണ തൊഴിലാളി എന്ന വ്യാജേനെ കുറ്റൂര്‍ ജംഗ്ഷനു സമീപത്തെ മൂന്നുനില കെട്ടിടത്തിന്റെ താഴത്തെ ഫ്ളാറ്റില്‍ കുടുംബത്തോടൊപ്പം താമസിച്ചായിരുന്നു കഞ്ചാവ് കച്ചവടം. ബംഗാള്‍, ആസാം, ഒറീസ എന്നിവിടങ്ങളില്‍ നിന്നും ട്രെയിന്‍ മാര്‍ഗ്ഗം എത്തിക്കുന്ന കഞ്ചാവ് പൊതികളിലാക്കി ചെറുകിട കച്ചവടക്കാര്‍ക്കും വിദ്യാര്‍ഥികള്‍ അടക്കമുള്ളവര്‍ക്കും വില്പന നടത്തുന്നതായിരുന്നു ഇയാളുടെ രീതിയെന്ന് എക്‌സൈസ് ഉദ്യോഗസ്ഥര്‍ പറഞ്ഞു. തിരുവല്ല റേഞ്ച് ഇന്‍സ്‌പെക്ടര്‍ മിഥുന്‍ മോഹന്‍, അസിസ്റ്റന്റ് എക്‌സൈസ് ഇന്‍സ്‌പെക്ടര്‍ എം. കെ. വേണുഗോപാല്‍, പ്രിവന്‍റീവ് ഓഫീസര്‍ ഇ. ജി. സുശീല്‍ കുമാര്‍, സിവില്‍ എക്‌സൈസ് ഓഫീസര്‍മാരായ രാഹുല്‍ സാഗര്‍, വി. ഷിജു, വി.എസ്. രാഹുല്‍, വനിത സിവില്‍ എക്‌സൈസ് ഓഫീസര്‍ മിനിമോള്‍ തുടങ്ങിയവരുടെ നേതൃത്വത്തിലായിരുന്നു പരിശോധന.

പ്രതിഷേധ ധർണ നടത്തി

അടൂർ: പൊതുജനാരോഗ്യ മേഖലയോടു സർക്കാരും വകുപ്പ് മന്ത്രിയും കാട്ടുന്ന കടുത്ത അവഗണനയ്‌ക്കെതിരേ ശക്തമായ ബഹുജന പ്രക്ഷോഭം ആരംഭിക്കുമെന്ന് ഡിസിസി പ്രസിഡന്‍റ് സതീഷ് കൊച്ചുപറമ്പിൽ. കോൺഗ്രസ് അടൂർ, പന്തളം ബ്ലോക്ക്‌ കമ്മിറ്റികളുടെ നേതൃത്വത്തിൽ അടൂർ ജനറൽ ആശുപത്രി പടിക്കൽ നടത്തിയ പ്രതിഷേധ ധർണ ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ബ്ലോക്ക് കോൺഗ്രസ് പ്രസിഡന്റ് ഇൻ ചാർജ് ബിജു വർഗീസ് അധ്യക്ഷത വഹിച്ചു. തോപ്പിൽ ഗോപകുമാർ, ഏഴംകുളം അജു, പഴകുളം ശിവദാസൻ, ബിനു എസ്. ചക്കലയിൽ, രമ ജോഗിന്ദർ, ബിജു ഫിലിപ്പ്, എം. ആർ. ജയപ്രസാദ്, ജെ. എസ്. അടൂർ, നൗഷാദ് റാവുത്തർ, പന്തളം ഷെരീഫ്, ജി. മനോജ്‌,മഞ്ജു വിശ്വാനാഥ്‌, നിസാർ കാവിളയിൽ, ബാബു ദിവാകരൻ, ഉമ്മൻ തോമസ്, ഡി. ശശികുമാർ, മുണ്ടപ്പള്ളി സുഭാഷ്, ജോസ് തോമസ്, സുരേഷ് കുഴുവേലി,അനന്ദു ബാലൻ, റിനോ പി. രാജൻ, സജി ദേവി, ജയകൃഷ്ണൻ പള്ളിക്കൽ, ഫെന്നി നൈനാൻ, ശിവപ്രസാദ് മൗട്ടത്, കോശി മാണി, കുഞ്ഞുഞ്ഞമ്മ ജോസഫ്, സുധാ നായർ, ഇ. എ. ലത്തീഫ് എന്നിവർ പ്രസംഗിച്ചു.

പിഎം റോഡിൽ ഡീസൽ വീണ് വീണ്ടും അപകടം

റാന്നി: പുനലൂർ - മൂവാറ്റുപുഴ റോഡിലെ തോട്ടമൺ വളവിൽ റോഡിൽ ഡീസൽ വീണ് വീണ്ടും അപകടം. കുട്ടിയെ സ്കൂളിൽ വിട്ടു മടങ്ങിയ സ്കൂട്ടർ യാത്രക്കാരി റാന്നി മന്ദിരം പടി കൂടത്തുമണ്ണിൽ ആര്യയ്ക്കാണ് (34) പരിക്കേറ്റത്. റോഡിൽ പെട്ടെന്നു സ്കൂട്ടർ തെന്നി മാറുകയായിരുന്നു. പരിക്കേറ്റ യാത്രക്കാരിയെ നാട്ടുകാർ ചേർന്ന് താലൂക്കാശുപത്രിയിലെത്തിച്ചു. കെഎസ്ആർടിസി ബസിൽ നിന്നാണ് ഡീസൽ ചോർച്ചയുണ്ടായതെന്ത് നാട്ടുകാർ പറയുന്നു. ഫയർഫോഴ്സും പോലീസും സ്ഥലത്തെത്തിയരുന്നു. ഡീസൽ വീണ റോഡുഭാഗത്ത് ഫയർ ഫോഴ്സ് അറക്കപ്പൊടി കൊണ്ടുവന്ന് വിതറുകയും വാഹനങ്ങളെ ഗതി മാറ്റി വവിടുകയും ചെയ്തു. മുമ്പു പല തവണ കെഎസ്ആർടിസി ബസിൽ നിന്നും ഡീസൽ ചോർച്ച മൂലം വാഹനങ്ങൾ അപകടത്തിൽപ്പെട്ടിരുന്നു.

മല്ലപ്പള്ളി താലൂക്ക് ആശുപത്രിയിലേക്ക് കോൺഗ്രസ് മാർച്ച്

മല്ലപ്പള്ളി: രാജാഭരണകാലം മുതൽ മുൻപന്തിയിൽ നിന്നിരുന്ന കേരളത്തിന്‍റെ ആരോഗ്യരംഗം തകർന്നടിഞ്ഞിരിക്കുകയാണെന്ന് മുൻ എംഎൽഎ കെ. ശിവദാസൻ നായർ ആരോപിച്ചു. ആരോഗ്യ മേഖലയോടുള്ള അവഗണനയ്ക്കെതിരേ മല്ലപ്പള്ളി താലൂക്ക് ആശുപത്രിയിലേക്ക് ബ്ലോക്ക് കോൺഗ്രസ് കമ്മിറ്റിയുടെ ആഭിമുഖ്യത്തിൽ നടന്ന മാർച്ചും ധർണയും ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. സിസ്റ്റത്തിന്‍റെ തകരാണെന്ന് തുറന്ന് സമ്മതിച്ച മന്ത്രിക്ക് ഒരു നിമിഷം പോലും തൽസ്ഥാനത്ത് തുടരാൻ അർഹതയില്ലെന്ന് ശിവദാസൻ നായർ പറഞ്ഞു. കോൺഗ്രസ്‌ ബ്ലോക്ക് പ്രസിഡന്‍റ് എബി മേക്കരിങ്ങാട്ട് അധ്യക്ഷത വഹിച്ചു. ഡിസിസി ജനറൽ സെക്രട്ടറി കോശി പി.സക്കറിയ, യുഡിഎഫ് നിയോജക മണ്ഡലം ചെയർമാൻ ലാലു തോമസ്, സുരേഷ് ബാബു പാലാഴി, സി.പി.ഓമനകുമാരി, അഖിൽ ഓമനക്കുട്ടൻ, എ.ഡി.ജോൺ, പ്രസാദ്‌ ജോർജ്, മാലതി സുരേന്ദ്രൻ, സാം പട്ടേരി, രാജേഷ് സുരഭി, റെജി പണിക്കമുറി, ഗ്രേസി മാത്യു, മാന്താനം ലാലൻ, മണിരാജ് പുന്നിലം, ചെറിയാൻ മണ്ണഞ്ചേരി, ലിൻസൺ പറോലിക്കൽ, തോമസ് തമ്പി, കെ.ജി.സാബു, ഡോ. ബിജു റ്റി.ജോർജ്, വിനീത് കുമാർ, പി.എം .ജിമോൻ, റ്റി.ജി.രഘുനാഥപിള്ള, സജു മാത്യു, ബെൻസി അലക്സ്‌, സിന്ധു സുബാഷ്, ജ്ഞാനമണി മോഹനൻ, ഷൈബി ചെറിയാൻ തുടങ്ങിയവർ പ്രസംഗിച്ചു.

ധന്യൻ മാർ ഈവാനിയോസ് അനുസ്മരണ പദയാത്ര നാളെ

തിരുവല്ല: പുനരൈക്യ ശില്പിയും മലങ്കര സുറിയാനി കത്തോലിക്കാസഭയുടെ പ്രഥമ മെത്രാപ്പോലീത്തൻ ആർച്ച്ബിഷപ്പുമായിരുന്ന ധന്യൻ മാർ ഈവാനിയോസ് മെത്രാപ്പോലീത്തയുടെ 72ാമത് ഓർമപ്പെരുന്നാളിനോടനുബന്ധിച്ചുള്ള തീർഥാടന പദയാത്രയ്ക്ക് നാളെ തിരുവല്ലയിൽ നിന്നു തുടക്കമാകും. നാളെ മുതൽ 14 വരെ മലങ്കര കത്തോലിക്ക യുവജന പ്രസ്ഥാനം തിരുവല്ല അതിഭദ്രാസനത്തിന്റെ നേതൃത്വത്തിലാണ് പദയാത്ര തിരുവല്ല സെന്റ് ജോൺസ് മെത്രാപ്പോലീത്തൻ കത്തീഡ്രൽ ദേവാലയത്തിൽ നിന്നാരംഭിക്കുന്ന പദയാത്ര പട്ടം സെന്റ് മേരീസ് മേജർ ആർക്കി എപ്പാർക്കിയൽ കത്തീഡ്രൽ ദേവാലയത്തിലാണ് സമാപിക്കുന്നത്. നാളെ രാവിലെ എട്ടിന് തിരുവല്ല സെന്‍റ് ജോൺസ് മെത്രാപ്പോലീത്തൻ കത്തീഡ്രലിൽ തിരുവല്ല അതിരൂപതാധ്യക്ഷൻ ഡോ.തോമസ് മാർ കൂറിലോസ് മെത്രാപ്പോലീത്തയുടെ മുഖ്യ കാർമികത്വത്തിൽ വി.കുർബാനയോടും ധൂപ പ്രാർഥനയോടും കൂടി പദയാത്ര ആരംഭിക്കും. ആർച്ച് ബിഷപ് ഡോ. തോമസ് മാർ കൂറിലോസ് മെത്രാപ്പോലീത്ത എംസിവൈഎം തിരുവല്ല അതിഭദ്രാസന പ്രസിഡന്‍റ് സിറിയക് വി. ജോണിന് വള്ളിക്കുരിശ് നൽകി കൊണ്ടു തീർഥാടനയാത്രയ്ക്കു തുടക്കം കുറിക്കും. അതിഭദ്രാസന വികാരി ജനറാൾ ഫാ. ഐസക് പറപ്പള്ളിൽ , എംസിവൈഎം അതിഭദ്രാസന പ്രസിഡന്റ് സിറിയക് വി. ജോൺ , ഡയറക്ടർ ഫാ. ചെറിയാൻ കുരിശുമൂട്ടൽ , ജനറൽ സെക്രട്ടറി സച്ചിൻ രാജു സക്കറിയ എന്നിവർ നേതൃത്വം നൽകും. മേരിഗിരി അരമന , ചെറുപുഷ്പഗിരി അരമന , ബഥാനിയ , തോട്ടഭാഗം സെന്റ് മേരീസ്, ഇരവിപേരൂർ സെന്‍റ് ആൻസ്, കുമ്പനാട് സെന്‍റ് പോൾസ് ദേവാലയങ്ങളിലൂടെ പുല്ലാട് സെന്‍റ് ആന്‍റണീസ് ദേവാലയത്തിലെത്തും. അവിടെ നിന്നും വെണ്ണിക്കുളം, റാന്നി, എരുമേലി, മല്ലപ്പള്ളി മേഖലയിൽ നിന്നുള്ള പദയാത്രികരും സംഗമിക്കും. വെണ്ണിക്കുളം മേഖല ഡയറക്ടർ ഫാ. മാത്യു പൊട്ടുക്കുളത്തിൽ, പ്രസിഡന്റ് ജോബിൻ ജോയ് , മല്ലപ്പള്ളി മേഖല ഡയറക്ടർ ഫാ. വർഗീസ് കണ്ടത്തിൽ, പ്രസിഡന്‍റ് ഷിലു എം. ലൂക്ക്, റാന്നി മേഖല ഡയറക്ടർ ഫാ. ജിബു കരപ്പനശേരിമലയിൽ , പ്രസിഡന്‍റ് ജെറിൻ പ്ലാച്ചേരി, എരുമേലി മേഖലാ ഡയറക്ടർ ഫാ. തോമസ് കല്ലുപ്പുരയ്ക്കൽ, പ്രസിഡന്‍റ് ജിജോ ജോർജ് എന്നിവർ നേതൃത്വം നൽകും. 11 ന് രാവിലെ 6.30 ന് ചീക്കനാൽ സെന്‍റ് പീറ്റേഴ്സ് ദേവാലയത്തിൽ കുർബാനയേ തുടർന്ന് ഓമല്ലൂരിൽ എത്തിച്ചേർന്ന് റാന്നി- പെരുന്നാട്ടിൽ നിന്നെത്തുന്ന പദയാത്രാ സംഘവുമായി സംഗമിക്കും. 14 നു വൈകുന്നേരം തീർഥാടകസംഘം തിരുവനന്തപുരം പട്ടം ദേവാലയത്തിൽ ധന്യൻ മാർ ഈവാനിയോസ് മെത്രാപ്പോലീത്തയുടെ കബറിങ്കലെത്തി പ്രാർഥന നടത്തും.

സംയുക്ത ട്രേഡ് യൂണിയൻ പണിമുടക്ക്; ജംഗ്ഷനുകളിൽ സമര കേന്ദ്രങ്ങൾ

പത്തനംതിട്ട: വിവിധ ആവശ്യങ്ങൾ ഉന്നയിച്ച് സംയുക്ത ട്രേഡ് യൂണിയൻ പണിമുടക്ക് ആരംഭിച്ചു. സ്വകാര്യ വാഹനങ്ങൾ നിർത്തിവച്ചും വ്യാപാര വ്യവസായ സ്ഥാപനങ്ങൾ അടച്ചും പണിമുടക്കിനോടു സഹകരിക്കാനാണ് ആഹ്വാനം. സ്വകാര്യ, കെഎസ്ആർടിസി ബസുകൾ, ടൂറിസ്റ്റ് വാഹനങ്ങൾ, ഓട്ടോറിക്ഷകൾ എന്നിവ ഓടില്ല. സ്കൂൾ വാഹനങ്ങൾ നിരത്തിലിറങ്ങാൻ സാധ്യതയില്ലാത്തതിനാൽ വിദ്യാലയങ്ങളുടെ പ്രവർത്തനവും തടസപ്പെടും. ജീവനക്കാരിൽ ഒരു വിഭാഗം പണിമുടക്കിനു പിന്തുണ അറിയിച്ചിട്ടുള്ളതിനാൽ ഓഫീസുകളുടെയും ബാങ്കുകളുടെയും പ്രവർത്തനവും തടസപ്പെടാനിടയുണ്ട്. പ്രധാന നിരത്തുകളിൽ സമരകേന്ദ്രങ്ങൾ തുറക്കുമെങ്കിലും വാഹനങ്ങൾ തടയില്ലെന്ന് നേതാക്കൾ അറിയിച്ചു. ജില്ലയിൽ 12 സമരകേന്ദ്രങ്ങളാണ് തുറക്കുന്നത്. രാവിലെ പ്രകടനങ്ങളും തുടർന്ന് വിശദീകരണ യോഗങ്ങളും ഉണ്ടാകുമെന്ന് സംയുക്ത ട്രേഡ് യൂണിയൻ നേതാക്കളായ പി.ബി. ഹർഷകുമാർ, എസ്. ഹരിദാസ്, കെ. സി. രാജഗോപാൽ, ശ്യാമ ശിവൻ (സിഐടിയു), ബെൻസി തോമസ് (എഐടിയുസി), കെ. ഐ. ജോസഫ് (ടിയുസിഐ) എന്നിവർ പറഞ്ഞു. അവശ്യ സർവീസുകളെ ഒഴിവാക്കും പത്തനംതിട്ട: കേന്ദ്ര സർക്കാരിന്‍റെ തൊഴിലാളി, കർഷക വിരുദ്ധ നയങ്ങൾ ക്കെതിരേ കേന്ദ്ര ട്രേഡ് യൂണിയനുകളും ജീവനക്കാരുടെ ഫെഡറേഷനുകളും ചേർന്ന് ആഹ്വാനം ചെയ്ത അഖിലേന്ത്യാ പണിമുടക്ക് ജില്ലയിൽ സമ്പൂർണമാകുമെന്നു യുഡിഎഫ് അനുകൂല സംഘടനകളുടെ ഫെഡറേഷൻ ചെയർമാൻ ജ്യോതിഷ് കുമാർ മലയാലപ്പുഴ അറിയിച്ചു. പാൽ, പത്രം, ആശുപത്രി തുടങ്ങി അവശ്യ സർവീസു കളെ പണിമുടക്കിൽനിന്ന് ഒഴിവാക്കി. രാജ്യത്തെ 64 കോടിയോളം തൊഴിലാളികളുടെ ജീവിതം നരകതുല്യമാണെന്നു അദ്ദേഹം ആരോപിച്ചു. തൊഴിൽ വകുപ്പിനെ കേന്ദ്ര സർക്കാർ നിർജീവമാക്കി. കേന്ദ്രവും സംസ്ഥാനവും ഒരേപോലെ തൊഴിലാളികളെ ചൂഷണം ചെയ്യുകയാണെന്നും അദ്ദേഹം കുറ്റപ്പെടുത്തി. സമരകേന്ദ്രങ്ങളുടെ ജില്ലാതല ഉദ്ഘാടനം കോന്നിയിൽ ജ്യോതിഷ് കുമാർ മലയാലപ്പുഴ നിർവഹിക്കും. തിരുവല്ലയിൽ തോട്ടുവാ മുരളി, മല്ലപ്പള്ളിയിൽ എ.ഡി.ജോൺ, അടൂരിൽ ഹരികുമാർ പൂതങ്കര, പത്തനംതിട്ടയിൽ പി.കെ.ഗോപി, റാന്നിയിൽ തോമസ് ജോസഫ് എന്നിവരും സമരകേന്ദ്രങ്ങൾ ഉദ്ഘാടനം ചെയ്യും. സെറ്റോ സംഘടനകൾ വിട്ടുനിൽക്കും പത്തനംതിട്ട: അഖിലേന്ത്യ തലത്തിൽ ട്രേഡ് യൂണിയൻ സംഘടനകൾ കേന്ദ്ര സർക്കാരിനെതിരേ പ്രഖ്യാപിച്ചിരിക്കുന്ന ദേശീയ പണിമുടക്കിൽ നിന്ന് വിട്ട് നിൽക്കുമെന്ന് സ്റ്റേറ്റ് എംപ്ലോയീസ് ആൻഡ് ടീച്ചേഴ്സ് ഓർഗനൈസേഷൻസ് ജില്ലാ ചെയർമാൻ പി.എസ്. വിനോദ് കുമാർ, കൺവീനർ എസ്. പ്രേം എന്നിവർ അറിയിച്ചു. മോദി സർക്കാരിന്‍റെ തൊഴിലാളിവിരുദ്ധ നയങ്ങളിൽ ശക്തമായ പ്രതിഷേധം ഉണ്ടെങ്കിലും അതിന്‍റെ പത്തിരട്ടി തൊഴിലാളി വിരുദ്ധത കാണിക്കുന്ന സംസ്ഥാന സർക്കാരിനെതിരേള്ള ഡിമാൻഡുകൾ ഉയർത്താത്ത പണിമുടക്കിൽ അണിചേരണ്ടതില്ലെന്ന നിലപാടാണ് സംഘടനയ്ക്കുള്ളതെന്നും സംസ്ഥാനത്ത് സർക്കാർ സ്പോൺസേർഡ് പണിമുടക്കായി ദേശീയ പണിമുടക്കിനെ മാറ്റുകയാണെന്നും സെറ്റോ ഭാരവാഹികൾ കുറ്റപ്പെടുത്തി. പണിമുടക്ക് രാഷ്‌ട്രീയപ്രേരിതം: എൻജിഒ സംഘ് പത്തനംതിട്ട: ഒരു വിഭാഗം ട്രേഡ് യൂണിയനുകളും സർവീസ് സംഘടനകളും നടത്തുന്ന പണിമുടക്കില്‍ എൻജിഒ സംഘ് പങ്കെടുക്കില്ലെന്ന് ഭാരവാഹികൾ അറിയിച്ചു. ദേശീയ പണിമുടക്ക് അനവസരത്തിലുള്ളതുംരാഷ്‌ട്രീയ പ്രേരിതവുമാണ്. സംസ്ഥാനത്ത് ശമ്പളപരിഷ്കരണം മുടങ്ങി ഒരു വർഷം കഴിഞ്ഞിട്ടും ഒരു ശമ്പള കമ്മീഷനെ പോലും നിയമിക്കാതെ അഞ്ചു വർഷതത്വം അട്ടിമറിക്കുകയും 18 ശതമാനം ക്ഷാമബത്തയും ലീവ് സറണ്ടര്‍ ഉള്‍പ്പെടെയുള്ള ആനുകൂല്യങ്ങളും തടഞ്ഞുവച്ച കേരളത്തിലെ ഇടതുമുന്നണി സര്‍ക്കാരിന്‍റെ തൊഴിലാളി വിരുദ്ധ ദുർഭരണത്തിനെതിരേ ഒരു ചെറുവിരലനക്കാത്ത ഇടതു സർവീ സ് സംഘടനകൾ കേന്ദ്ര സർക്കാരിനെതിരെയുള്ള പണിമുടക്കിൽ ജീവനക്കാരെ ഭീഷണിപ്പെടുത്തി പങ്കെടുപ്പിക്കാൻ ശ്രമിക്കുന്നത് അപഹാസ്യമാണെന്ന് കേരള എൻജിഒ സംഘ് സംസ്ഥാന പ്രസിഡന്‍റ് ടി. ദേവാനന്ദൻ, ജനറൽ സെക്രട്ടറി എസ്. രാജേഷ് എന്നിവർ അഭിപ്രായപ്പെട്ടു. കെയുഡബ്ല്യുജെ ഐക്യദാർഢ്യം പ്രഖ്യാപിച്ചു പത്തനംതിട്ട: സംയുക്ത ട്രേഡ് യൂണിയനുകൾ ഇന്നു നടത്തുന്ന ദേശീയ പണിമുടക്കിന് കേരള പത്രപ്രവർത്തക യൂണിയൻ (കെയുഡബ്ല്യുജെ) ഐക്യദാർഢ്യം പ്രഖ്യാപിച്ചു. കേന്ദ്ര സർക്കാർ കൊണ്ടുവന്ന നാല് ലേബർ കോഡുകൾ മാധ്യമ പ്രവർത്തകരുടെ എല്ലാ അവകാശങ്ങളും ഇല്ലാതാക്കുന്നതാണെന്ന് കെയുഡബ്ല്യുജെ ജില്ലാ പ്രസിഡന്‍റ് ബിജു കുര്യനും സെക്രട്ടറി ജി. വിശാഖനും ചൂണ്ടിക്കാട്ടി. സംഘടിക്കാനും പ്രതിഷേധിക്കാനും ഉള്ള അവകാശം പോലും നഷ്ടമാക്കുന്ന തരത്തിലേക്കാണ് കേന്ദ്രസർക്കാരിന്‍റെ തൊഴിൽ പരിഷ്കാരങ്ങൾ. പണിമുടക്കിന് പിന്തുണ അറിയിച്ച് പ്രസ്ക്ലബ് പരിസരത്ത് ഐക്യദാർഢ്യ സമ്മേളനം ചേരും.

സ്വകാര്യബസുകൾ നിരത്തിലിറങ്ങിയില്ല, യാത്രക്കാർ വലഞ്ഞു

പത്തനംതിട്ട: സ്വകാര്യ ബസുടമ സംയുക്ത സമിതി ആഹ്വാനം ചെയ്ത പണിമുടക്കിൽ ജില്ലയിൽ യാത്രക്കാർ വലഞ്ഞു. സ്വകാര്യ ബസുകൾ പൂർണമായി ഇന്നലെ നിരത്തുകളിൽ നിന്നും വിട്ടുനിന്നു. അധ്യയനദിനമായിരുന്നതിനാൽ വിദ്യാർഥികളാണ് ഏറെ ബുദ്ധിമുട്ടിയത്. വിദ്യാർഥികളുടെ കൺസഷൻ നിരക്ക് കൂട്ടുക, വ്യാജ കൺസഷൻ കാർഡ് തടയുക, 140 കിലോമീറ്റർ അധികം ഓടുന്ന ബസുകളുടെ പെർമിറ്റ് പുതുക്കി നൽകുക, അനാവശ്യമായി പിഴയീടാക്കുന്നത് തടയുക തുടങ്ങിയ ആവശ്യങ്ങൾ ഉന്നയിച്ചാണ് പണിമുടക്ക്. ഒരാഴ്ചയ്ക്കുള്ളിൽ പരിഹാരമുണ്ടായില്ലെങ്കിൽ 22 മുതൽ അനിശ്ചിതകാല സമരത്തിലേക്ക് നീങ്ങാനാണ് തീരുമാനം. ജില്ലയിൽ കോന്നി, ചിറ്റാർ,സീതത്തോട്, റാന്നി, മല്ലപ്പള്ളി തുടങ്ങിയ മലയോര മേഖലകളിൽ യാത്രാക്ലേശം രൂക്ഷമായിരുന്നു. കെഎസ്ആർടിസി അധിക സർവീസ് നടത്തുമെന്ന്അറിയിച്ചിട്ടും പല റൂട്ടുകളിലും ബസില്ലായിരുന്നു. കെഎസ്ആർടിസി ഡിപ്പോകളിൽ രാവിലെയും വൈകുന്നേരവും യാത്രക്കാരുടെ വലിയ തിരക്കാണ് അനുഭവപ്പെട്ടത്. കൂടുതൽ യാത്രക്കാരുള്ള റൂട്ടുകളിലേക്ക് ബസ് അയച്ചാണ് പരിഹാരം കണ്ടത്. എന്നാൽ സ്വകാര്യ ബസുകളെ മാത്രം ആശ്രയിക്കുന്ന മേഖലകളിൽ യാത്രക്കാർ നന്നേ വിഷമിച്ചു. ഗ്രാമീണ മേഖലയിലാണ് യാത്രാക്ലേശം ഏറെയും രൂക്ഷമായത്. പത്തനംതിട്ടയിൽ നിന്നും കടമ്മനിട്ട, മലയാലപ്പുഴ, കുളനട ഭാഗങ്ങളിലേക്ക് ബസ് സൗകര്യം ഉണ്ടായില്ല. റാന്നിയിൽ നിന്നും മല്ലപ്പള്ളി, അത്തിക്കയം, വലിയകുളം ഭാഗങ്ങളിലേക്കും യാത്രക്കാർ ബുദ്ധിമുട്ടി. മല്ലപ്പള്ളിയിൽ നിന്നും ആനിക്കാട്, ചങ്ങനാശേരി റൂട്ടുകളിലും ബസുകളുണ്ടായില്ല. ഇരുചക്രവാഹനങ്ങളിലും ഓട്ടോറിക്ഷകളിലുമാണ് ജീവനക്കാരും അധ്യാപകരും യാത്ര ചെയ്തത്. സ്കൂൾ ബസുകൾ ഓടിയെങ്കിലും സ്വകാര്യ ബസുകളിൽ എത്തുന്ന കുട്ടികളെ രക്ഷിതാക്കൾ സ്കൂളുകളിൽ എത്തിക്കുകയും മടക്കിക്കൊണ്ടുപോകുകയുമാണ് ചെയ്തത്. ട്രേഡ് യൂണിയനുകൾ ആഹ്വാനം ചെയ്ത 24 മണിക്കൂർ അഖിലേന്ത്യാ പണിമുടക്കു നടക്കുന്നതിനാൽ ഇന്നും ബസ് സർവീസുകൾ ഉണ്ടാകില്ല.

ഭീമൻ ഹിറ്റാച്ചി എത്തിച്ചു, രക്ഷാദൗത്യം തുടരും

കോന്നി: പയ്യനാമൺ ചെങ്കുളത്ത് പാറമട അപകടത്തിൽ രക്ഷാപ്രവർത്തനം പുനരാരംഭിക്കുന്നതിലേക്ക് ഭീമൻ ഹിറ്റാച്ചി എത്തി. ദൗത്യത്തിന് ആവശ്യമായ ലോംഗ് ബൂം ഹിറ്റാച്ചി ആലപ്പുഴയിൽ നിന്നുമാണ് ഇന്നലെ വൈകുന്നേരം എത്തിച്ചത്. ഇതുപയോഗിച്ചുള്ള രക്ഷാദൗത്യമാണ് ഇനി നടക്കുന്നത്. ഭീമൻ ഹിറ്റാച്ചി ഉപയോഗിച്ച് പാറമടയിൽ കുടുങ്ങിക്കിടക്കുന്ന ഹിറ്റാച്ചി നീക്കുകയാണ് ലക്ഷ്യം. ഇതിനുള്ളിൽ ഇതു നിയന്ത്രിച്ചിരുന്ന അജയ് റായി കുടുങ്ങിയിട്ടുണ്ടാകാമെന്നാണ് നിഗമനം. ജില്ലാ കളക്ടർ എസ്. പ്രേം കൃഷ്ണൻ, ജില്ലാ പോലീസ് മേധാവി വി. ജി. വിനോദ് കുമാർ, എഡിഎം ബി. ജ്യോതി, ഡെപ്യൂട്ടി കളക്ടർ ആർ. രാജലക്ഷ്മി എന്നിവർ സംഭവ സ്ഥലത്തുണ്ട്.

പാറമട തൊഴിലാളികളുടെ സുരക്ഷിതത്വം ഉറപ്പാക്കണം: സിഐടിയു

കോന്നി: പത്തനംതിട്ട ജില്ലയിലെ പാറമടകളിൽ ജോലി ചെയ്യുന്ന തൊഴിലാളികളുടെ തൊഴിൽ സുരക്ഷ ഉറപ്പാക്കാൻ കർശന നടപടികൾ ഉണ്ടാകണമെന്ന് സിഐടിയു ജില്ലാ സെക്രട്ടറി പി.ബി.ഹർഷകുമാർ, പ്രസിഡന്‍റ് എസ്.ഹരിദാസ് എന്നിവർ ആവശ്യപ്പെട്ടു. രണ്ട് തൊഴിലാളികളുടെ മരണത്തിനിടയാക്കിയകോന്നി പയ്യനാമണ്ണിലെ ചെങ്കുളം പാറമടയിലെ അപകടസ്ഥലം സന്ദർശിച്ച ശേഷം മാധ്യമ പ്രവർത്തകരോട് സംസാരിക്കുകയായിരുന്നു ഇരുവരും. വൻതോതിൽ പാറ ഖനനം നടത്തുന്ന ക്വാറികളിൽ യാതൊരു സുരക്ഷാ ക്രമീകരണങ്ങളും നടത്താതെയാണ് ഖനനം നടത്തി വരുന്നത്. പാറയുടെ ഉയരത്തിന് അനുസരിച്ച് കൃത്യ അളവിൽ ബഞ്ചുകൾ നിർമിച്ച് ഖനനം നടത്തണമെന്ന നിയമം ലംഘിക്കപ്പെട്ടതാണ് അപകടത്തിന് ആക്കം കൂട്ടിയത്.അപകട സ്ഥിതിയിലായിട്ടും ഖനനം തുടരുകയായിരുന്നു. അതിഥി തൊഴിലാളികളാണ് ബഹുഭൂരിപക്ഷം ക്വാറികളിലും പണിയെടുക്കുന്നത്. നിയമലംഘനങ്ങൾ പുറംലോകത്ത് അറിയാതിരിക്കാനാണ് അതിഥി തൊഴിലാളികളെ നിയോഗിച്ചിരിക്കുന്നതെന്നു സംശയിക്കേണ്ടിയിരിക്കുന്നുവെന്നും സിഐടിയു നേതാക്കൾ പറഞ്ഞു. ഉദ്യോഗസ്ഥരുടെ ഭാഗത്തു നിന്നും ഇക്കാര്യത്തിൽ അലംഭാവമുണ്ടാകാൻ പാടില്ലെന്നും ഹർഷകുമാർ, ഹരിദാസ് എന്നിവർ പറഞ്ഞു. കേസെടുക്കണമെന്ന് പശ്ചിമഘട്ട സംരക്ഷണസമിതി പത്തനംതിട്ട: കോന്നി പയനാമൺ ചെങ്കളം ക്രഷർ യൂണിറ്റിലുണ്ടായ ദുരന്തത്തിൽ ജില്ലാ ജിയോളജിസ്റ്റ്, മലിനീകരണ നിയന്ത്രണ ബോർഡ്, കോന്നി തഹസിൽദാർ, പഞ്ചായത്ത് സെക്രട്ടറി, ക്വാറി ഉടമ എന്നിവർക്കെതിരെ നരഹത്യക്ക് കേസ് എടുക്കണമെന്നും മരണപ്പെട്ട തൊഴിലാളികളുടെ കുടുംബത്തിന് ഒരുകോടി രൂപ വീതം നഷ്ടപരിഹാരം നൽകണമെന്നും പശ്ചിമഘട്ട സംരക്ഷണസമിതി ആവശ്യപ്പെട്ടു. പാരിസ്ഥിതിക നിയമലംഘനങ്ങളുടെ ഭാഗമാണ് കോന്നിയിലുണ്ടായ അപകടം. ക്വാറിക്ക് അനുമതി നൽകിയ ഉദ്യോഗസ്ഥർ തുടർ പ്രവർത്തനങ്ങളിൽ നിയമങ്ങൾ പാലിക്കുന്നുണ്ടോയെന്ന് ഉറപ്പാക്കാറില്ലെന്നും രക്ഷാപ്രവർത്തനം വൈകിയതിൽ ഇവർ ഉത്തരവാദികളാണെന്നും സമിതി അഭിപ്രായപ്പെട്ടു.

ആംബുലൻസ് വേണം, വഴി വേണം; ക്വാറി അനുമതി വ്യവസ്ഥകൾ കടലാസിൽ

പത്തനംതിട്ട: ക്വാറികൾക്ക് അനുമതി തേടുന്പോൾ പാലിക്കപ്പെടുമെന്ന് ഉറപ്പു നൽകുന്ന വ്യവസ്ഥകളുടെ നഗ്നമായ ലംഘനമാണ് കോന്നി പയ്യനാമൺ ചെങ്കുളത്ത് പാറമട ദുരന്തത്തിനു കാരണം. ക്വാറികളിൽ പാറ പൊട്ടിക്കുന്പോൾ പാലിക്കപ്പെടേണ്ട വ്യവസ്ഥകളൊന്നും പാലിച്ചിരുന്നില്ല. സുരക്ഷാ ക്രമീകരണങ്ങളുമുണ്ടായില്ല. പാറമടയുടെ ഉയരത്തിന് അനുസരിച്ച് കൃത്യ അളവുകളിൽ ബഞ്ചുകൾ ഉണ്ടാകണമെന്നും ഇതിലൂടെ വാഹനസൗകര്യം ഉറപ്പാക്കണമെന്നും വ്യവസ്ഥയുണ്ട്. എന്നാൽ അപകടമുണ്ടായ പാറമടയിലേക്ക് എത്തപ്പെടാൻ പോലും ബുദ്ധിമുട്ടായിരുന്നു. ഖനനസമയത്തു പാലിക്കേണ്ട വ്യവസ്ഥകളും ലംഘിക്കപ്പെട്ടു. ഏറ്റവുമടുത്ത് ആംബുലൻസ് സൗകര്യം ഉൾപ്പെടെ ഉറപ്പാക്കണമെന്ന് വ്യവസ്ഥയുണ്ട്. ചെങ്കുളത്ത് ക്വാറിയിലെ അപകടം പോലും പുറംലോകത്തെത്തിയത് വൈകിയാണ്. അപകടമുണ്ടായാൽ രക്ഷാപ്രവർത്തനത്തിനാവശ്യമായ ഉപകരണങ്ങൾ അടക്കം കരുതണം. നിർമാണ സ്ഥലത്തു കരുതേണ്ട ജീവൻരക്ഷാ ഉപകരണങ്ങൾ ഒന്നും സ്ഥലത്തുണ്ടായില്ല. പൊലിഞ്ഞത് നിത്യവൃത്തിക്കുവേണ്ടി എത്തിയ രണ്ട് ജീവിതങ്ങൾ ജാർക്കണ്ടിൽ നിന്നും ഒഡീഷയിൽ നിന്നുമെത്തി ജോലി ചെയ്തു കുടുംബം പുലർത്തിവന്ന രണ്ടു പേരുടെ ജീവനാണ് പയ്യനാമൺ പാറമട ദുരന്തത്തിൽ പൊലിഞ്ഞത്. ഇരുവരുടെയും കുടുംബം അതാത് നാടുകളിലാണെന്ന് പറയുന്നു. അടുത്ത സമയത്താണ് ഇവർ ക്വാറിയിൽ ജോലിക്കെത്തിയത്. ഇവരെപ്പോലെ നിരവധി ഇതര സംസ്ഥാനക്കാരാണ് കോന്നിയിലെ നിരവധി ക്വാറികളിൽ ജോലിയെടുക്കുന്നത്. ദിവസക്കൂലിക്കാരായ ഇവരെ നിയമിക്കുന്നതിനു പിന്നിലും ക്വാറി ഉടമകളുടെ ലാഭക്കൊതിയുണ്ട്. നാട്ടുകാരായ തൊഴിലാളികൾക്ക് നല്കുന്ന കൂലി ഇവർക്കു നല്കാറില്ല. ക്വാറികളിലെ നിയമലംഘനങ്ങൾ ചോദ്യം ചെയ്യപ്പെടുകയുമില്ല. എന്നാൽ ക്വാറികളിലെ ജോലികളിൽ വൈദഗ്ധ്യമുള്ളവരല്ല ഏറെയും എത്തുന്നത്. അപകടകരമായ സാഹചര്യത്തിൽ ജോലിയെടുക്കുന്ന ഇവർക്ക് യാതൊരു സുരക്ഷയും ക്വാറി ഉടമകളും ഉറപ്പാക്കാറില്ല.

സമാനതകളില്ലാത്ത ദുരന്തം; രക്ഷാദൗത്യവും തടസപ്പെട്ടു

കോന്നി: സമാനതകളില്ലാത്ത രക്ഷാദൗത്യമാണ് കോന്നി പയ്യനാമൺ ചെങ്കുളത്ത് ക്വാറിയിൽ ഫയർഫോഴ്സും എൻഡിആർഎഫും രണ്ടുദിവസമായി നടത്തുന്നത്. തിങ്കളാഴ്ച ഉച്ചകഴിഞ്ഞ് പാറമട ഇടിഞ്ഞുണ്ടായ അപകടത്തിൽപെട്ട ഇതര സംസ്ഥാന തൊഴിലാളികളിൽ ഒരാളെ കണ്ടെത്തുകയെന്ന ലക്ഷ്യത്തോടെയാണ് രക്ഷാദൗത്യം. തിങ്കളാഴ്ച രാത്രി 7.30 ഓടെ നിർത്തിയ രക്ഷാപ്രവർത്തനം ഇന്നലെ രാവിലെ തുടങ്ങുകയായിരുന്നു. എൻഡിആർഎഫ്, ഫയർഫോഴ്സ് സംഘാംഗങ്ങൾ രാവിലെ ഏഴിനു തന്നെ സ്ഥലത്തെത്തിയെങ്കിലും ഉന്നത ഉദ്യോഗസ്ഥരെത്തി മാസ്റ്റർപ്ലാൻ തയാറാക്കിയാണ് ദൗത്യം തുടങ്ങിയത്. രക്ഷാപ്രവർത്തകരുടെ ജീവനു തന്നെ ഭീഷണിയുണ്ടായേക്കാവുന്ന സാഹചര്യത്തിൽ അതീവ സുരക്ഷാ നിരീക്ഷണങ്ങളോടെയാണ് ദൗത്യം പുനരാരംഭിച്ചത്. പാറമടയിലേക്ക് ആളുകളെ നിയന്ത്രിച്ചുകൊണ്ട് ഉദ്യോഗസ്ഥ സംഘം ഒരുഭാഗത്തായി നിലയുറപ്പിച്ചു. രക്ഷാദൗത്യത്തിനുള്ള സംഘത്തെ നിശ്ചയിച്ച് അവർക്കുവേണ്ട നിർദേശങ്ങൾ നൽകി. സ്ഥലത്തെത്തിച്ച ക്രെയിനിൽ വടം കുരുക്കി അതിൽ സംഘാംഗങ്ങളെ ബന്ധിപ്പിച്ച് താഴേക്ക് ഇറക്കുകയും കുടുങ്ങിക്കിടക്കുന്ന പാറക്കഷണങ്ങൾ നീക്കി അപകടത്തിൽപെട്ട ഹിറ്റാച്ചി ഉയർത്തുകയോ തള്ളിയിടുകയോ ചെയ്യുകയെന്ന ലക്ഷ്യവുമായാണ് നടപടികൾ തുടങ്ങിയത്. നാലുപേർ ഇതിനിടെ ക്വാറിയിലേക്ക് ഇറക്കി. പാറക്കല്ലുകൾ അടർന്നു വീഴാൻ തുടങ്ങിയതോടെ രക്ഷാദൗത്യം നിർത്തിവയ്ക്കേണ്ടി വന്നു. വലിയ ക്രെയിനുകളും മറ്റ് മെഷീനുകളും എത്തിച്ച് ദൗത്യം പുനരാരംഭിക്കാനുള്ള ശ്രമമാണ് വൈകുന്നേരവും നടക്കുന്നത്. ഇന്നലെ ഇതു സാധ്യമായില്ലെങ്കിൽ ഇന്നു രാവിലെ ദൗത്യം തുടരുമെന്ന് അധികൃതർ പറഞ്ഞു. എൻഡിആർഎഫ് സംഘം സ്ഥലത്തു ക്യാന്പ് ചെയ്യുകയാണ്. പാറക്കൂട്ടം ഇളകിയ നിലയിൽ വർഷങ്ങളായി പ്രവർത്തിക്കുന്ന ക്വാറിയിലെ പാറക്കെട്ടുകൾക്ക് വൻതോതിൽ ഇളക്കം സംഭവിച്ചിട്ടുണ്ടെന്നാണ് നിഗമനം. തിങ്കളാഴ്ചയുണ്ടായ അപകടത്തിനുശേഷം വൻതോതിൽ പാറ ഇടിഞ്ഞുവീണു. വലിയ പാറക്കഷണങ്ങൾ താഴേക്കു പതിച്ചുകൊണ്ടിരിക്കുകയാണ്. ഇത് അപകടകരമായ സാഹചര്യമാണ് സൃഷ്ടിച്ചിരിക്കുന്നത്. രക്ഷാദൗത്യ സംഘങ്ങളുടെ ജീവനു തന്നെ ഭീഷണിയാകുന്ന തരത്തിലാണ് രണ്ടുദിവസമായി പാറക്കൂട്ടങ്ങൾ ഇടിഞ്ഞുവീഴുന്നത്. ക്വാറിയിൽ സമീപകാലത്തു നടത്തിവന്ന സ്ഫോടനങ്ങളാണ് ഇത്തരം ഒരു അവസ്ഥയ്ക്കു സംജാതമായതെന്ന് പറയുന്നു. അനുവദനീയമായ അളവിലും കൂടുതൽ പാറ പൊട്ടിച്ചു നീക്കിയിരുന്നു. ഇതുമായി ബന്ധപ്പട്ടു പ്രദേശവാസികൾ നൽകിയ പരാതികളിൽ പോലും അന്വേഷണമുണ്ടായില്ല. ക്വാറികളുടെ പ്രവർത്തനങ്ങൾ സംബന്ധിച്ചു നിരവധി പരാതികളാണ് അധികൃതർക്കു ലഭിക്കുന്നത്. ഉഗ്രശേഷിയുള്ള സ്ഫോടക വസ്തുക്കൾ ഉപയോഗിച്ചാണ് പാറ പൊട്ടിക്കുന്നത്. സ്ഫോടനം നടക്കുന്പോൾ ഇിൽ വൈദഗ്ധ്യമുള്ള എൻജിനിയർ സ്ഥലത്തുണ്ടാകണമെന്നതടക്കമുള്ള വ്യവസ്ഥകൾ ലംഘിച്ചാണ് പ്രവർത്തനം. ജലബോംബ്; നിയന്ത്രണങ്ങൾ പേരിനു മാത്രം പത്തനംതിട്ട ജില്ലയിലെ പാറമടകൾ പലതും ജലബോംബുകളാണ്. പാറ പൊട്ടിച്ചുനീക്കിയ കുളങ്ങളിൽ ദശലക്ഷകണക്കിനു ലിറ്റർ വെള്ളമാണ് സംഭരിക്കപ്പെടുന്നത്. ഇതിനൊപ്പം മഴക്കാലത്ത് ജലസമ്മർദം ഏറും. പാറമട ഇടിയാനും പാറക്കുളങ്ങൾ പൊട്ടി ഒഴുകാനും സാധ്യതയുണ്ട്. ഇത്തരം അപകടകരമായ സാഹചര്യം പല തവണ ചൂണ്ടിക്കാണിക്കപ്പെട്ടെങ്കിലും നടപടികളുണ്ടായില്ല. മഴ ശക്തമാകുന്പോൾ ക്വാറികളുടെ പ്രവർത്തനം നിർത്തിവയ്ക്കാൻ ഉത്തരവ് നൽകുമെങ്കിലും മഴ ദുർബാലമാകുന്പോൾ ഉത്തരവ് പിൻവലിച്ചോയെന്നു പോലും നോക്കാതെ പണികൾ ആരംഭിക്കുകയാണ് രീതി. നിയന്ത്രണങ്ങളോടെ നേടുന്ന അനുമതിയുടെ പിൻബലത്തിൽ യാതാരു മാനദണ്ഡങ്ങളും പാലിക്കാതെയാണ് പല പാറമടകളും പ്രവർത്തിച്ചുവരുന്നത്. പത്തനംതിട്ട ജില്ലയിലെ ക്വാറികളിൽ ഇതിനു മുനപ് കല്ലിടിഞ്ഞും വെള്ളം പൊട്ടി ഒഴുകിയും അപകടങ്ങളുണ്ടായിട്ടുണ്ട്.

പയ്യനാമൺ ചെങ്കുളത്ത് ക്വാറിയിൽ അപകടം : ദുർഘട സാഹചര്യം രക്ഷാപ്രവർത്തനത്തെയും ബാധിച്ചു

കോന്നി: ഇടിഞ്ഞുവീണത് വലിയ പാറക്കെട്ടുകൾ, ഇടയ്ക്കൊക്കെ താഴേക്കു പതിച്ചുകൊണ്ടേയിരിക്കുന്ന പാറക്കല്ലുകൾ. അഗാധമായ പാറമടയിലേക്ക് ഇറങ്ങാൻ തന്നെ രക്ഷാ പ്രവർത്തകർക്ക് ആദ്യം കഴിഞ്ഞില്ല. കോന്നിയിൽ നിന്നും പത്തനംതിട്ടയിൽ നിന്നും ഫയർഫോഴ്സ് സംഘം സ്ഥലത്തെത്തിയെങ്കിലും രക്ഷാപ്രവർത്തനം ആരംഭിക്കാൻ കാത്തുനിൽക്കേണ്ടിവന്നു. ഇത്തരത്തിലൊരു ദുരന്തം ഫയർഫോഴ്സ് സംഘത്തിനും ആദ്യമായിരുന്നു. കോന്നി ചെങ്കുളത്ത് പാറമടയിൽ കല്ല് ഇടിഞ്ഞുവീണ് തൊഴിലാളികൾ അപകടത്തിൽപെട്ട വിവരം അറിഞ്ഞെത്തിയ ഫയർഫോഴ്സ് സംഘം പിന്നീട് ക്രെയിനും മറ്റ് ഉപകരണങ്ങളും സ്ഥലത്തെത്തിച്ചാണ് പാറക്കല്ലുകൾ നീക്കിത്തുടങ്ങിയത്. അപ്പോഴും കല്ല് ഇടിച്ചിൽ തുടർന്നതോടെ തുടർന്നുള്ള രക്ഷാപ്രവ‌ർത്തനം നിർത്തിവയ്ക്കേണ്ടിവന്നു. അടർന്നു വീണ പാറക്കെട്ടുകൾക്കിടയിൽ ഒരു തൊഴിലാളിയെ കണ്ടിരുന്നു. മൃതദേഹം പുറത്തെടുക്കാൻ തന്നെ ഏറെ പണിപ്പെടേണ്ടിവന്നു. വീണ്ടും അതേസ്ഥാനത്തേക്ക് കല്ലുകൾ അടർന്നു വീണതോടെ തുടർ പ്രവർത്തനം നിർത്തിവച്ചു. സമാനമായ അപകടങ്ങൾ മുന്പും കോന്നിയിലെ ക്രഷർ, ക്വാറി യൂണിറ്റുകളിൽ സംഭവിച്ചിട്ടുണ്ടെങ്കിലും ശക്തമായ നടപടികളോ പരിശോധയോ ഇല്ലാത്തതാണ് ദുരന്തം ആവർത്തിക്കാൻ കാരണമെന്ന് ആക്ഷേപമുണ്ട്. നിയമങ്ങൾ കാറ്റിൽ പറത്തി കോന്നി: പല ക്രഷറുകളുടെയും പ്രവർത്തനങ്ങൾ നിയന്ത്രണങ്ങളും നിയമങ്ങളും കാറ്റിൽ പറത്തിയാണ്. നിലവിലുള്ള ചട്ടങ്ങൾ ബാധകമല്ലെന്ന രീതിയിലാണ് പ്രവർത്തനം. മൈനിംഗ് ആൻഡ് ജിയോളജി വകുപ്പാണ് പ്രധാനമായി ഇവരുടെ പ്രവർത്തനങ്ങൾ വിലയിരുത്തുന്നതും അനുമതികൾ നൽകുന്നതുമെങ്കിലും കൃത്യമായി ഇടപെടൽ ഇവർ നടത്താറില്ല. റവന്യൂ, പോലീസ്, ഫയർ ഫോഴ്സ് വകുപ്പുകൾ, വനം വകുപ്പുകൾക്കും അനുമതി നൽകുന്നതിൽ പങ്കുണ്ടെങ്കിലും പിന്നീടുള്ള നടപടികളിൽ കണ്ണടയ്ക്കും. ചെറിയ തോതിൽ പാറ പൊട്ടിച്ചു തുടങ്ങുന്ന ക്രഷർ ലോബി പിന്നീട് വലിയ ക്വാറികളായി മാറുകയാണ് പതിവ്. കൂടുതൽ അളവിൽ പാറ പൊട്ടിച്ചു നീക്കുന്പോഴും അധികൃതർ അനങ്ങാറില്ല. പാറമടകളോട് ചേർന്ന സ്വകാര്യ വ്യക്തികളുടെ ഭൂമികൾ ഖനന കരാർ കമ്പിനിയുടെ ബ്രോക്കർമാർ വലിയ വിലയ്ക്ക് ഏറ്റെടുത്ത് പരിസരവാസികളെയും നിശബ്ദരാക്കും. അപകടം നടന്ന ക്രഷർ ഉൾപ്പെടെ പ്രദേശത്തെ നിരവധി പാറമടകളും ക്രഷർ യൂണിറ്റുകളും ഗുരുതരമായ നിയമലംഘനങ്ങൾ നടത്തിയാണ് പ്രവർത്തിക്കുന്നതെന്ന വിവരങ്ങളാണ്പുറത്തുവരുന്നത്. ഇന്നലത്തെ രണ്ട് ഇതര സംസ്ഥാന തൊഴിലാളികളാണ് അപകടത്തിൽപ്പെട്ടത്. പാറ ഇളക്കിയെടുക്കുന്നതിനിടെയുണ്ടായ മണ്ണിടിച്ചിലാണ് അപകടകാരണമെന്നാണ് പ്രാഥമിക നിഗമനം. സംഭവസ്ഥലത്ത് അഗ്നിശമന സേനയും പോലീസും എത്തി രക്ഷാപ്രവർത്തനങ്ങൾ നടത്തിയെങ്കിലും ജീവൻ രക്ഷിക്കാനായില്ല. നിയമങ്ങൾ മറികടക്കുന്നു പല പാറമടകളും യാതൊരുവിധ ലൈസൻസുകളോ സുരക്ഷാ മാനദണ്ഡങ്ങളോ പാലിക്കാതെയാണ് പ്രവർത്തിക്കുന്നത്. ബന്ധപ്പെട്ട വകുപ്പുകളിലെ ഉദ്യോഗസ്ഥർ പരിശോധനയ്‌ക്കെത്തുന്നത് പോലും ക്രഷർ ഉടമകളെ മുൻകൂട്ടി അറിയിച്ച ശേഷമാണ്. ഇത് നിയമലംഘനങ്ങൾക്ക് ഒത്താശ ചെയ്യുന്നതിന് തുല്യമാണെന്ന ആക്ഷേപം ശക്തമാണ്. മൈനിംഗുമായി ബന്ധപ്പെട്ട എൻജിനിയർമാരുടെ അഭാവം ഉണ്ട്. പല ക്രഷർ യൂണിറ്റുകളിലും ഖനന പ്രവർത്തനങ്ങൾ നിരീക്ഷിക്കാൻ യോഗ്യരായ മൈനിംഗ് എൻജിനിയർമാർ ഇല്ല. സുരക്ഷാ വീഴ്ചകൾ കണ്ടാലും അധികൃതരും നടപടിയെടുക്കാറില്ല. ഖനന പ്രവർത്തനങ്ങൾ നിശ്ചയിച്ച രീതിയിലല്ല പലയിടത്തും നടക്കുന്നത്. ഇത് ഉഗ്രശബ്ദങ്ങൾക്കും പരിസ്ഥിതി പ്രശ്‌നങ്ങൾക്കും കാരണമാകുന്നു. സ്ഫോടനങ്ങൾ നടത്തുമ്പോൾ ഉണ്ടാകുന്ന ശബ്ദവും പ്രകമ്പനവും സമീപവാസികളുടെ ജിവിതം ദുഃസഹമാക്കുകയാണെന്ന് പയ്യനാമൺ സ്വദേശിയായ ജേക്കബ് മാത്യു പറഞ്ഞു. മഴക്കാലത്തു പോലും പല ക്രഷറുകളും പ്രവർത്തിക്കാറുണ്ട്. സർക്കാർ വികസന പദ്ധതികളുടെ പേരു പറഞ്ഞാണ് പാറ പൊട്ടിക്കൽ നടത്തുന്നത്. അപകടത്തിന്‍റെ പശ്ചാത്തലത്തിൽ, അനധികൃതമായി പ്രവർത്തിക്കുന്ന പാറമടകൾക്കും ക്രഷർ യൂണിറ്റുകൾക്കുമെതിരേ കർശന നടപടി സ്വീകരിക്കണമെന്നും, സുരക്ഷാ മാനദണ്ഡങ്ങൾ പാലിക്കുന്നുണ്ടെന്ന് ഉറപ്പാക്കണമെന്നും ജനങ്ങളിൽ നിന്ന് ശക്തമായ ആവശ്യം ഉയർന്നിട്ടുണ്ട്. അധികൃതരുടെ ഭാഗത്തുനിന്നുണ്ടായ അനാസ്ഥയാണ് ഈ ദുരന്തത്തിന് കാരണമെന്നും ഇത് സംബന്ധിച്ച് വിശദമായ അന്വേഷണം നടത്തണമെന്നും വിവിധ കോണുകളിൽ നിന്ന് ആവശ്യമുയരുന്നുണ്ട്. രക്ഷാപ്രവർത്തനം ഏകോപിപ്പിച്ച് കളക്ടറും എൻഡിആർഎഫും കോന്നി പയ്യനാമണ്ണിൽ പാറമട ഇടിഞ്ഞുണ്ടായ അപകടത്തേ തുടർന്ന് രക്ഷാപ്രവർത്തനത്തിനായി 27 അംഗ എൻഡിആർഎഫ് സംഘത്തെ ജില്ലാ കളക്ടർ നിയോഗിക്കുകയായിരുന്നു. കാലവർഷത്തോടനുബന്ധിച്ച് ജില്ലയിലേക്ക് നിയോഗിച്ച സംഘം തിരുവല്ലയിലാണ് ക്യാന്പ് ചെയ്തിരുന്നത്. ദേശീയ ദുരന്ത നിവാരണ സേന നാലാം ബറ്റാലിയൻ ടീം കമാൻഡന്‍റ് സഞ്ജയ് സിംഗ് മൽസുനിയുടെ നേതൃത്വത്തിലാണ് സംഘം കോന്നിയിലെത്തിയത്. പിന്നാലെ ജില്ലാ കളക്ടർ എസ്. പ്രേംകൃഷ്ണനും സ്ഥലത്തെത്തി പ്രവർത്തനങ്ങൾ ഏകോപിപ്പിച്ചു. എൻഡിആർഎഫ് സംഘത്തോടൊപ്പം ഫയർഫോഴ്സും പോലീസും രക്ഷാ പ്രവർത്തനങ്ങളിൽ പങ്കാളികളായി. രാത്രി ഏഴോടെ ഒരു മൃതദേഹം പുറത്തെത്തിച്ചു. ഒരാൾ കൂടി പാറയ്ക്കടിയിൽ കുടുങ്ങിയിട്ടുള്ളതിനാൽ പുറത്തെടുക്കാൻ രാത്രി വൈകിയും ശ്രമം നടത്തിയെങ്കിലും നിർത്തിവയ്ക്കേണ്ടിവന്നു. പ്രതികൂല കാലാവസ്ഥയും പാറ വീണ്ടും ഇടിയുന്നതുമാണ് രക്ഷാപ്രവർത്തനത്തിനു തടസമായത്. തെരച്ചിൽ ഇന്നു രാവിലെ ഏഴിന് പുനരാരംഭിക്കാൻ കളക്ടർ നിർദേശം നൽകി. മൃതദേഹം എടുത്തതിനു പിന്നാലെ വീണ്ടും പാറ ഇടിഞ്ഞു ചെങ്കുളത്ത് ക്വാറിയിൽനിന്ന് ഒരു മൃതദേഹം കണ്ടെടുത്തതിനു പിന്നാലെ വീണ്ടും പാറ ഇടിഞ്ഞതോടെ തുടർ രക്ഷാപ്രവർത്തനം പൊടുന്നനെ നിർത്തുകയായിരുന്നു. മൃതദേഹം എടുക്കാനായി രക്ഷാപ്രവർത്തകർ നിന്ന ഭാഗത്തേക്കാണ് പാറ ഇടിഞ്ഞുവീണത്. ഇവർ കരയ്ക്കു കയറിയശേഷമാണ് പാറ ഇടിച്ചിലുണ്ടായതെന്നതിനാൽ മറ്റൊരു ദുരന്തം ഒഴിവായി. തുടർന്ന് രക്ഷാപ്രവർത്തനം നിർത്തിവയ്ക്കാൻ കളക്ടർ നിർദേശിക്കുകയായിരുന്നു.

അപകടകരമായ സാഹചര്യം മറച്ചുവച്ചതായി ആക്ഷേപം

കോന്നി: അത്യന്തം അപകടകരമായ സാഹചര്യത്തിലാണ് പയ്യനാമൺ ചെങ്കുളത്ത് ക്വാറിയിൽ ഇന്നലെ രണ്ട് ഇതര സംസ്ഥാന തൊഴിലാളികളെ ഉപയോഗിച്ച് ജോലിയെടുപ്പിച്ചതെന്ന് പ്രാഥമിക നിഗമനം. അപകടത്തേ തുടർന്ന് സ്ഥലം സന്ദർശിച്ച റവന്യൂ, ജിയോളജി, പോലീസ്, ഫയർഫോഴ്സ് ഉദ്യോഗസ്ഥർ ഇതു വിലയിരുത്തി. ജില്ലാ കളക്ടർ എസ്. പ്രേംകൃഷ്ണൻ സ്ഥലം സന്ദർശിച്ച് രക്ഷാപ്രവർത്തനം ഏകോപിപ്പിക്കുകയും പ്രാഥമികമായ അന്വേഷണം നടത്തുകയും ചെയ്തു. കോന്നി താഴം വില്ലേജിലാണ് അപകടമുണ്ടായ ക്വാറി വർഷങ്ങളായി പ്രവർത്തിക്കുന്നത്. പൊട്ടിച്ചു മാറ്റിയ പാറമടയുടെ ഇടുക്കുകളിൽ ഹിറ്റാച്ചി ഉപയോഗിച്ചാണ് ഇവർ ജോലിയെടുത്തിരുന്നത്. യാതൊരുവിധ സുരക്ഷാ മാനദണ്ഡങ്ങളോ പാലിച്ചിരുന്നില്ല. അപകടത്തേ തുടർന്ന് പാറമടയിലെ മറ്റു ജീവനക്കാർ രക്ഷാപ്രവർത്തനം നടത്താൻ ശ്രമിച്ചെങ്കിലും ഫലമുണ്ടായില്ല. ഉടമയുമായി ബന്ധപ്പെട്ടവർ സ്ഥലത്തെത്തിയശേഷമാണ് ഫയർഫ്സിൽ വിവരം അറിയിച്ചത്. വെടിമരുന്ന് ഉപയോഗിച്ചുള്ള സ്ഫോടനം അതീവ അപകടകരമായതിനാൽ, കർശനമായ സുരക്ഷാ മാനദണ്ഡങ്ങളും സർക്കാർ നിയമങ്ങളും പാലിക്കണമെന്ന നിർദേശമുള്ളതാണ്. സ്ഫോടനങ്ങൾ നടത്താൻ ലൈസൻസുള്ള വിദഗ്ധരെ മാത്രമേ ഇതിന് അനുവദിക്കാവൂവെന്നും ജിയോളജി വകുപ്പ് പറയുന്നു. ചെങ്കളം പാറമടയിൽ സ്ഫോടനങ്ങൾ കാരണം ശബ്ദം, പൊടി, ഭൂകമ്പ പ്രകമ്പനങ്ങൾ എന്നിവ പതിവാണെന്നു പരിസരവാസികൾ പറയുന്നു. സുരക്ഷാ മാനദണ്ഡങ്ങൾ പാലിക്കാതെ കുറഞ്ഞ ചെലവിൽ കൂടുതൽ അളവിൽ പാറ പൊട്ടിച്ചുമാറ്റുകയെന്നതാണ് രീതി. കോന്നിയിലെ പല സ്വകാര്യ പ‌ാറമടകളുടെയും പ്രവർത്തനം ഈ രീതിയിലാണ്. അനുമതി നൽകുന്ന ബന്ധപ്പെട്ട വകുപ്പുകൾ പിന്നീട് ഇവിടേക്ക് തിരിഞ്ഞു നോക്കാറില്ല. മൈനിംഗ് ആൻഡ് ജിയോളജി വകുപ്പാണ് പ്രധാനമായി ഇവരുടെ പ്രവർത്തനങ്ങൾ വിലയിരുത്തുന്നതും അനുമതികൾ നൽകുന്നതുമെങ്കിലും കൃത്യമായി ഇടപെടൽ ഇവർ നടത്താറില്ലെന്നും പറയുന്നു. ക്വാറിയുടെ പ്രവർത്തനം നിരോധിച്ചു പത്തനംതിട്ട: പയ്യനാമൺ ചെങ്കുളത്ത് ക്വാറിയുടെ പ്രവർത്തനം നിരോധിച്ച് ജില്ലാ കളക്ടറുടെ ഉത്തരവ്. ചെങ്കുളത്ത് തോമസ് മത്തായിയുടെ ഉടമസ്ഥതയിലുള്ള ക്വാറിയിൽ ഇന്നലെയുണ്ടായ അപകടത്തേ തുടർന്നാണ് നടപടി. ക്വാറിയിൽ നടന്നുവരുന്ന രക്ഷാപ്രവർത്തനത്തിനിടെ ഉണ്ടായേക്കാവുന്ന ദുരന്ത സാധ്യത ഒഴിവാക്കാനാണ് ഖനന, അനുബന്ധ പ്രവർത്തനങ്ങൾ നിരോധിച്ചുകൊണ്ട് ജില്ലാ കളക്ടർ ഉത്തരവ് പുറപ്പെടുവിച്ചത്. രക്ഷാപ്രവർത്തനം നടക്കുന്ന സാഹചര്യത്തിലും ക്വാറിയിൽ അപകടകരമായി പാറ ഇളകി വീഴുന്നതിനാൽ പൊതുജനങ്ങളുടെ സുരക്ഷ ഉറപ്പാക്കാനായി രക്ഷാപ്രവർത്തകർ, ഉദ്യോഗസ്ഥർ എന്നിവർ ഒഴികെ മറ്റുള്ളവർ ക്വാറിയിൽ പ്രവേശിക്കുന്നതും നിരോധിച്ചു. മെഡിക്കൽ കോളജ് മോർച്ചറി തകരാറിൽ; മൃതദേഹം ജനറൽ ആശുപത്രിയിൽ കോന്നി: കോന്നി മെഡിക്കൽ കോളജ് മോർച്ചറിയുടെ ഫ്രീസർ തകരാറിലായതിനേതുടർന്ന് പയ്യനാമൺ ക്വാറി അപകടത്തിൽ മരിച്ച ഇതര സംസ്ഥാന തൊഴിലാളിയുടെ മൃതദേഹം പത്തനംതിട്ട ജനറൽ ആശുപത്രിയിലെ മോർച്ചറിയിലേക്ക് മാറ്റി. മോർച്ചറി ഫ്രീസറിന്‍റെ കൂളിംഗ് തകരാർ കാരണമാണ് മൃതദേഹം പത്തനംതിട്ടയിലേക്ക് മാറ്റിയതെന്ന് മെഡിക്കൽ കോളജ് അധികൃതർ അറിയിച്ചു. മെഡിക്കൽ കോളജിലെ മോർച്ചറി മൂന്നുമാസം മുന്പാണ് പ്രവർത്തനക്ഷമമായത്.

ജനറൽ ആശുപത്രിയിലേക്ക് ബിജെപി നടത്തിയ മാർച്ചിൽ സംഘർഷം

പത്തനംതിട്ട: കോട്ടയം മെഡിക്കൽ കോളജ് ആശുപത്രിയിൽ കെട്ടിടം തകർന്ന് ഒരു വീട്ടമ്മ മരിച്ച സംഭവത്തിന്‍റെ ഉത്തരവാദിത്വം ഏറ്റെടുത്ത് ആരോഗ്യ മന്ത്രി വീണാ ജോർജ് രാജിവയ്ക്കണമെന്ന് ആവശ്യപ്പെട്ട് ബിജെപി നേത്യത്വത്തിൽ പത്തനംതിട്ട ജനറൽ ആശുപത്രിയിലേക്ക് നടത്തിയ മാർച്ചിൽ സംഘർഷം. പ്രവർത്തകർ ആശുപത്രിയോടു ചേർന്ന വഴിയലൂടെ ഗേറ്റ് ചാടിക്കടന്ന് ഉള്ളിലേക്ക് കടക്കാൻ ശ്രമിച്ചതാണ് സംഘർഷത്തിന് ഇടയാക്കിയത്. ആശുപത്രി പടിക്കൽ പോലീസ് ബാരിക്കേഡ് മാർച്ച് തടഞ്ഞു. ബാരിക്കേഡ് മറിച്ചിടാൻ പ്രവർത്തകൾ ശ്രമിച്ചു. പിന്നീട് മാർച്ച് ഉദ്ഘാടനത്തിനു ശേഷമാണ് സമീപത്തെ ഇടവഴിയിലെ ഗേറ്റ് ചാടിക്കടന്ന് ആശുപത്രി മുറ്റത്തേക്ക് കടക്കാൻ ശ്രമിച്ചത്. ഉടനെ പോലീസ് പിന്നാലെ എത്തി ഇതു തടഞ്ഞു. തുടർന്ന് പോലീസുമായി ഏറെ സമയം ഉന്തും തള്ളും വാക്കേറ്റവും നടന്നു. ഇതിനു ശേഷം ബാരിക്കേഡിന് മുന്നിൽറോഡിൽകുത്തിയിരുന്ന് പ്രവർത്തകർ മുദ്രാവാക്യം വിളിച്ച് പ്രതിഷേധിച്ചു. റോഡിൽ കുത്തിയിരുന്നവരെ പോലീസ് ബലം പ്രയോഗിച്ച് അറസ്റ്റു ചെയ്തു നീക്കി. തുടർന്ന് പോലീസ് സ്റ്റേഷനു മുന്നിലേക്ക് പ്രകടനമായി പ്രവർത്തകർ നീങ്ങി. അബാൻ ജംഗ്ഷനിൽ നിന്നുമാണ് മാർച്ച് ആരംഭിച്ചത്. ബിജെപി ദേശീയ നിർവാഹക സമിതി അംഗം കുമ്മനം രാജശേഖരൻ മാർച്ച് ഉദ്ഘാടനം ചെയ്തു. പാവപ്പെട്ടവരുടെ ചികിത്സയ്ക്ക് സൗകര്യമൊരുക്കാനായി ആരോഗ്യ വകുപ്പിന് ബജറ്റിൽ നീക്കിവയ്ക്കുന്ന തുകയുടെ നാലിൽ ഒന്ന് പോലും ചെലവഴിക്കുന്നില്ലെന്ന് കുമ്മനം രാജശേഖരൻ കുറ്റപ്പെടുത്തി. കേരളം അനാസ്ഥയുടെയും അഴിമതിയുടെയും കാര്യത്തിൽ നമ്പർ വണ്ണാണ്. പ്രതിഷേധങ്ങളെ തടയുമെന്നു പറഞ്ഞ ഡിവൈഎഫ്ഐ മനുഷ്യത്വമില്ലാത്ത സംഘടനയാണ്. അവർ മുതലാളിത്വത്തിന്‍റെ കൂടെയാണ്. പാവപ്പെട്ട രോഗികൾ ചികിത്സ ലഭിക്കാതെ നട്ടം തിരിയുന്ന സാഹചര്യമാണ് സംസ്ഥാനത്തുള്ളതെന്നും കുമ്മനം പറഞ്ഞു. ജില്ലാ പ്രസിഡന്‍റ് വി. എ. സൂരജ് അധ്യക്ഷതവഹിച്ചു. ജില്ലാ ജനറൽ സെക്രട്ടറിമാരായ പ്രദീപ്‌ ആയിരൂർ, കെ. ബിനുമോൻ, വിജയകുമാർ മണിപ്പുഴ, ദേശീയ കൗൺസിൽ അംഗം വിക്ടർ ടി. തോമസ്, കർഷക മോർച്ച സംസ്ഥാന അധ്യക്ഷൻ ഷാജി ആർ. നായർ,ജില്ലാ വൈസ് പ്രസിഡന്‍റുമാരായ അനിൽ നെടുമ്പള്ളിൽ, ഷൈൻ ജി. കുറുപ്പ്, ബിന്ദു പ്രസാദ് , ബിന്ദു പ്രകാശ്, പി. ആർ. ഷാജി, റോയ് മാത്യു, ജില്ലാ സെക്രട്ടറിമാരായ നിതിൻ എസ്. ശിവ, രൂപേഷ് അടൂർ, ജില്ലാ ട്രഷറർ ഗോപാകൃഷ്ണൻ കർത്താ, മഹിളാ മോർച്ച ജില്ലാ പ്രസിഡന്‍റ് ചന്ദ്രലേഖ തുടങ്ങിയവർ പ്രസംഗിച്ചു.

വിശുദ്ധ തോമ്മാശ്ലീഹായുടെ ധീരമാതൃക അനുകരിക്കണം: മാര്‍ തോമസ് തറയില്‍

നിരണം: ക്രിസ്തുശിഷ്യനായ മാര്‍ തോമ്മാശ്ലീഹായുടെ പാദസ്പര്‍ശത്താല്‍ പവിത്രമായ നിരണത്തേക്കുള്ള തീര്‍ഥാടനം ഭക്തജനപ്രവാഹമായി. ചങ്ങനാശേരി അതിരൂപത യുവദീപ്തി എസ്എംവൈഎമ്മിന്‍റെ നേതൃത്വത്തില്‍ പത്തൊമ്പതാമത് നിരണം തീര്‍ഥാടനമാണ് ഭക്തജനനിബിഡമായത്. അതിരൂപതയുടെ 18 ഫൊറോനകളില്‍ നിന്നുള്ള യുവജനങ്ങളും മുതിര്‍ന്നവരുമായ വിശാസികളാണ് കോരിച്ചൊരിഞ്ഞ മഴയെ അവഗണിച്ച് പ്രാര്‍ഥനാപൂര്‍വം തീര്‍ഥാടനത്തില്‍ അണിചേര്‍ന്നത്. രാവിലെ ഏഴിന് ചങ്ങനാശേരി സെന്‍റ് മേരീസ് മെത്രാപ്പോലീത്തന്‍പള്ളിയിലെ അഭിവന്ദ്യ പിതാക്കന്മാരുടെ കബറിട പള്ളിയില്‍ അര്‍പ്പിച്ച വിശുദ്ധ കുര്‍ബാനയ്ക്കുശേഷം തീര്‍ഥാടനത്തിനു തുടക്കംകുറിച്ചു. അതിരൂപത വികാരി ജനറാൾ മോണ്‍. ആന്‍റണി എത്തയ്ക്കാട്ട് കത്തിച്ചതിരി പ്രസിഡന്‍റ് അരുണ്‍ ടോം തോപ്പിലിനും യുവദീപ്തി പതാക ഡെപ്യൂട്ടി പ്രസിഡന്‍റ് എലിസബത്ത് വര്‍ഗീസിനും കൈമാറി തീര്‍ഥാടനം ഉദ്ഘാടനം ചെയ്തു. അതിരൂപത ഡയറക്ടര്‍ ഫാ. സാവിയോ മാനാട്ട് ആമുഖപ്രസംഗവും കത്തീഡ്രല്‍ വികാരി ഫാ. ജോസഫ് വാണിയപ്പുരയ്ക്കല്‍ അനുഗ്രഹ പ്രഭാഷണവും നടത്തി. ചങ്ങനാശേരി സെന്‍ട്രല്‍ ജംഗ്ഷന്‍, ളായിക്കാട്, ഇടിഞ്ഞില്ലം, വേങ്ങല്‍, കാവുംഭാഗം, പൊടിയാടിവഴിയാണ് തീര്‍ഥാടകര്‍ നിരണത്ത് എത്തിച്ചേര്‍ന്നത്. ആര്‍ച്ച്ബിഷപ് മാര്‍ തോമസ് തറയില്‍ പൊടിയാടിമുതല്‍ തീര്‍ഥാടകരോടൊപ്പം ചേര്‍ന്നത് യുവജനങ്ങള്‍ക്ക് ആവേശമായി. നിരണം തീര്‍ഥാടന കേന്ദ്രത്തില്‍ തീര്‍ഥാടനം എത്തിയശേഷം മാര്‍ തോമസ് തറയില്‍ കല്‍വിളക്കില്‍ തിരി തെളിച്ചു. ക്രിസ്തുശിഷ്യനായ ഭാരതത്തിന്‍റെ അപ്പസ്‌തോലന്‍ വിശുദ്ധ തോമ്മാശ്ലീഹായുടെ ധീരതയും മാതൃകയും വിശ്വാസ തീര്‍ഥാടനത്തില്‍ യുവജനങ്ങള്‍ മാതൃകയാക്കണമെന്ന് മാര്‍ തോമസ് തറയില്‍ സന്ദേശത്തില്‍ പറഞ്ഞു. മാര്‍ത്തോമ്മാ ശ്ലീഹായുടെ തിരുശേഷിപ്പ് കൂടാരത്തിലെ പ്രാര്‍ഥനയ്ക്ക് ശേഷം തീര്‍ഥാടകര്‍ക്ക് നേര്‍ച്ചഭക്ഷണം വിതരണം ചെയ്തു. അതിരൂപത ഡയറക്ടര്‍ ഫാ. സാവിയോ മാനാട്ട് പ്രാര്‍ഥന നയിച്ചു. ഫാ.ടോണി പുതുവീട്ടില്‍ക്കളം, ക്രിസ്റ്റി കെ. കുഞ്ഞുമോന്‍, അലക്സ് മഞ്ഞുമേല്‍, ലാലിച്ചന്‍ മറ്റത്തില്‍, സിസ്റ്റര്‍ തെരസീന, ക്രിസ്റ്റിന്‍ സേവ്യര്‍, ജോയല്‍ ജോണ്‍ റോയി, ലൂസി ഫിലിപ്പോസ്, ഡെന്നി തോമസ്, റിയ പുന്നശേരി എന്നിവര്‍ നേതൃത്വം നല്‍കി. തീര്‍ഥാടനകേന്ദ്രത്തില്‍ രാവിലെ ആര്‍ച്ച്ബിഷപ് മാര്‍ ജോസഫ് പെരുന്തോട്ടം വിശുദ്ധകുര്‍ബാന അര്‍പ്പിച്ച് സന്ദേശം നല്‍കി. തീര്‍ഥാടനകേന്ദ്രം റെക്ടര്‍ ഫാ.ജോര്‍ജ് മൂലംകുന്നം, സ്പിരിച്വല്‍ ഡയറക്ടര്‍ ഫാ.ജോര്‍ജ് വല്ലയില്‍ എന്നിവര്‍ തീര്‍ഥാടകരെ സ്വീകരിച്ചു. കൊടിയിറക്കോടെ തീര്‍ഥാടനത്തിനു പ്രൗഢ സമാപനമായി.

ജനറല്‍ ആശുപത്രി സംവിധാനങ്ങള്‍ മാറ്റാനുള്ള ഉത്തരവ് ഇനിയുമായില്ല

പത്തനംതിട്ട: തകര്‍ച്ചയിലായ ജനറല്‍ ആശുപത്രി കെട്ടിടത്തിന്‍റെ പ്രവര്‍ത്തനം നിര്‍ത്തിവച്ച് സംവിധാനങ്ങള്‍ കോന്നി സര്‍ക്കാര്‍ മെഡിക്കല്‍ കോളജിലേക്ക് മാറ്റാനുള്ള ഉത്തരവ് വൈകുന്നു. ജനറല്‍ ആശുപത്രിയിലെ ബി ആന്‍ഡ് സി ബ്ലോക്ക് നവീകരണത്തിനുള്ള ഉത്തരവിനുവേണ്ടി കാത്തിരിക്കാന്‍ തുടങ്ങിയിട്ട് നാലു മാസത്തോളമായി. ജനറല്‍ ആശുപത്രി ആരോഗ്യ വകുപ്പിന്‍റെ നേരിട്ടുള്ള നിയന്ത്രണത്തിലും മെഡിക്കല്‍ കോളജ് ആരോഗ്യ വിദ്യാഭ്യാസ വകുപ്പിനു കീഴിലും ഉള്ള സ്ഥാപനങ്ങളായതിനാല്‍ ഉത്തരവിറക്കുന്നതിനു സാങ്കേതിക തടസങ്ങള്‍ നിലനില്‍ക്കുകയാണെന്ന് പറയുന്നു. രണ്ടിടങ്ങളിലെയും ഡോക്ടര്‍മാര്‍ മാറ്റത്തോടു യോജിക്കുന്നുമില്ല. പ്രശ്‌ന പരിഹാരത്തിന് നിരവധി കൂടിക്കാഴ്ചകള്‍ നടന്നെങ്കിലും എച്ച്എംസി തീരുമാനം ഉണ്ടായില്ലെന്ന സാങ്കേതികത്വം പറഞ്ഞു തലയൂരാനാണ് സിപിഎം ശ്രമിക്കുന്നത്. സര്‍ക്കാര്‍ ഏജന്‍സിയായ ഇന്‍കെലിനെയാണ് കെട്ടിടത്തിന്‍റെ നവീകരണ ജോലികള്‍ക്ക് ചുമതലപ്പെടുത്തിയിരിക്കുന്നത്. ഊരാളുങ്കല്‍ ലേബര്‍ സൊസൈറ്റിയെയാണ് പണികള്‍ ഏല്പിച്ചിരിക്കുകയാണ്. 21 ന് പണികള്‍ ആരംഭിക്കാനുള്ള ക്രമീകരണമാണ് ചെയ്തിരിക്കുന്നതെന്ന് പറയുന്നു. ഇതിനു മുമ്പായി ആശുപത്രി ഉപകരണങ്ങള്‍ അടക്കം താഴെ എത്തിക്കേണ്ടതുണ്ട്. സാധനങ്ങൾ താഴെയിറക്കാൻ ടെൻഡർ നൽകി കഴിഞ്ഞു. 30 ലക്ഷം രൂപ ഇതിനായി എൻഎച്ച്എം ഫണ്ടിൽ നിന്ന് അനുവദിച്ചിട്ടുണ്ട്. താഴെ ഇറക്കിയ ഉപകരണങ്ങൾ കോന്നി മെഡിക്കൽ കോളജിലേക്കു മാറ്റാൻ അടുത്ത ടെൻഡർ വേണ്ടിവരും. 17 വര്‍ഷം മുമ്പ് നിര്‍മിച്ച ബി ആന്‍ഡ് സി ബ്ലോക്ക് ഗുരുതരമായ പ്രശ്നങ്ങളാണ് നേരിടുന്നത്. നിര്‍മാണം പൂര്‍ത്തിയായി അധികകാലം കഴിയുന്നതിനു മുന്പേ പ്രശ്നങ്ങള്‍ ഉടലെടുത്തിരുന്നു. ചോര്‍ച്ചയും ഡ്രെയിനേജ് വിഷയങ്ങളും ശൗചാലയത്തിന്‍റെ തകരാറുകളുമെല്ലാം പ്രശ്നങ്ങളായി. ഏറ്റവുമൊടുവില്‍ ചോര്‍ച്ച അസഹ്യമാകുകയും വാര്‍ഡുകള്‍ പ്രവര്‍ത്തിക്കാന്‍ തന്നെ ബുദ്ധിമുട്ടാകുകയും ചെയ്ത സാഹചര്യത്തിലാണ് അടിയന്തര അറ്റകുറ്റപ്പണി നിര്‍ദേശിച്ചത്. നിലവിലെ ആശുപത്രി സംവിധാനങ്ങള്‍ പ്രധാനമായും സ്ഥിതി ചെയ്യുന്നത് ഈ കെട്ടിടത്തിലാണ്. കെട്ടിടത്തിന്‍റെ ലിഫ്റ്റ് മാസങ്ങളായി തകരാറിലാണ്. ഇതു പ്രവര്‍ത്തിക്കുന്പോള്‍ കെട്ടിടം കുലുങ്ങുന്നതും കോണ്‍ക്രീറ്റ് അടര്‍ന്നു വീഴുന്നതുമായ പ്രശ്നങ്ങളുണ്ടായി. ആശുപത്രി വളപ്പില്‍ പുതിയ ഒപി ബ്ലോക്കിനായി പൈലിംഗ് ജോലികള്‍ ആരംഭിച്ചതോടെ ബി ആന്‍ഡ് സി ബ്ലോക്കിന്‍റെ സ്ഥിതി കൂടുതല്‍ ശോചനീയമായി. അപകടകരമായ സാഹചര്യം ബോധ്യപ്പെട്ടിട്ടും ബ്ലോക്കിലെ സംവിധാനങ്ങള്‍ നിര്‍ത്തിവയ്ക്കാനുള്ള ഉത്തരവ് പുറത്തിറങ്ങാന്‍ ഇപ്പോഴും കാലതാമസം നേരിടുകയാണ്. ബ്ലോക്കിൽ പ്രവർത്തിച്ചുവന്ന ശസ്ത്രക്രിയ സംവിധാനങ്ങളും ഐപി വിഭാഗവും ഏതാനും ദിവസങ്ങളായി നിർത്തിവച്ചിരിക്കുകയാണ്. വാക്കാലുള്ള നിർദേശത്തേ തുടർന്ന് ശസ്ത്രക്രിയകൾ നിർത്തിയത്. എന്നാൽ ഡോക്ടർമാരുടെ മാറ്റം ഇനിയുമാകാത്തതിനാൽ അടിയന്തര ചികിത്സ ആവശ്യത്തിനു വരുന്ന രോഗികളെ എന്തു ചെയ്യണമെന്നറിയാതെ അവരും ബുദ്ധിമുട്ടുകയാണ്.

മാർ അപ്രേം മെത്രാപ്പോലീത്ത മാരാമൺ കൺവൻഷൻ നഗറിൽ സ്ഥിര സാന്നിധ്യം

പത്തനംതിട്ട: കൽദായ സുറിയാനി സഭയുടെ ആർച്ച് ബിഷപ് കാലം ചെയ്ത ഡോ. മാർ അപ്രേം മെത്രാപ്പോലീത്ത മാരാമൺകൺവൻഷനിൽ ഏറെ വർഷങ്ങൾ സ്ഥിര സാന്നിധ്യം ആയിരുന്നു. ഫെബ്രുവരിയിൽ നടക്കുന്ന മാരാമൺ കൺവൻഷനിൽ ഒരു ദിവസമെങ്കിലും അദ്ദേഹം സ്ഥിരമായി പങ്കെടുക്കുമായിരുന്നു. തൃശൂരിൽ നിന്നു യാത്ര ചെയ്ത് മാരാമണ്ണിലെത്തി ഒരു ദിവസമെങ്കിലും ഇവിടെ തങ്ങി മടങ്ങുകയെന്നതായിരുന്നു അദ്ദേഹത്തിന്‍റെ രീതി. ശാരീരിക അസ്വാസ്ഥ്യങ്ങൾ ഏറെ രൂക്ഷമാകുന്നതുവരെയും അദ്ദേഹം ഈ പതിവ് മുടക്കിയില്ല. പിന്നീട് തന്‍റെ പിൻഗാമി യൗനാൻ യോസഫ് മെത്രാപ്പോലീത്തയെ അദ്ദേഹം മാരാമൺ കൺവൻഷനിലേക്ക് തന്‍റെ ആശംസകളുമായി അയച്ചുവന്നു. മാരാമണ്‍ കണ്‍വന്‍ഷനില്‍ ഏറ്റവും കൂടൂതല്‍ കാലം പങ്കെടുത്തിട്ടുള്ള സഹോദരീ സഭയിലെ ബിഷപ്പാണ് മാർ അപ്രേം. മാരാമൺ മണൽപ്പുറത്തെ എക്യൂമെനിക്കല്‍ സമ്മേളനം, സാമൂഹ്യ തിന്മകൾക്കെതിരേയുള്ള സമ്മേളനം എന്നിവ ഉള്‍പ്പെടെ വിവിധ യോഗങ്ങൾക്കു നേതൃത്വം നൽകിയിട്ടുമുണ്ട്. ലളിതവും സരസവുമായ പ്രസംഗശൈലി കൊണ്ടും പ്രാർഥന കൊണ്ടും അദ്ദേഹം വിശ്വാസികൾക്കിടയിലും പ്രിയങ്കരനായിരുന്നു. നല്ല ഒരു സംഗീത ആസ്വാദകനും ഗാന രചയിതാവും കേരള ക്രൈസ്തവ സഭാ വിഭാഗങ്ങളെ ഒരുമിച്ച് നിര്‍ത്തുന്നതില്‍ തല്പരനുമായിരുന്നു മെത്രാപ്പോലീത്ത. കൽദായ സഭയുടെ വേഷവിധാനങ്ങളും തൊപ്പിയും മണൽപ്പുറത്തിനു പരിചിതമാക്കി നൽകിയതും മാർ അപ്രേമാണ്. മാര്‍ത്തോമ്മ മെത്രാപ്പോലീത്താമാരായിരുന്ന ഡോ. അലക്സാണ്ടര്‍ മാര്‍ത്തോമ്മ, ഡോ ഫിലിപ്പോസ് മാര്‍ ക്രിസോസ്റ്റം മാര്‍ത്തോമ്മ, ഡോ. ജോസഫ് മാര്‍ത്തോമ്മ എന്നിവരുമായി ഹൃദ്യമായ അടുപ്പം സൂക്ഷിച്ചിരുന്ന അദ്ദേഹം ജബല്‍പൂര്‍ ലിയൊനാര്‍ഡ് തിയളോജിക്കല്‍ കോളജിലെ പൂര്‍വ വിദ്യാർഥി എന്ന നിലയില്‍ എല്ലാ വര്‍ഷവും പൂര്‍വ വിദ്യാർ‌ഥി സംഗമം മാരാമണ്‍ മണല്‍പ്പുറത്ത് ക്രമീകരിക്കുകയും നേതൃത്വം നല്കുകയും ചെയ്തിരുന്നു. കേരളത്തിലുടനീളം എക്യൂമെനിക്കല്‍ പ്രവര്‍ത്തനങ്ങളിലും മദ്യവര്‍ജന പ്രസ്ഥാനത്തിലും അദ്ദേഹം സജീവ സാന്നിധ്യമായി. 2017ൽ അടൂരിൽ വൈഎംസിഎ ദേശീയ സമ്മേളനം ഉദ്ഘാടനം ചെയ്തത് മാർ അപ്രേം മെത്രാപ്പോലീത്തയായിരുന്നു.

ബൈക്കിന് തീപിടിച്ച് ബൈക്ക് യാത്രികന് പൊള്ളലേറ്റു

അടൂർ: ബൈക്കിന് തീപിടിച്ച് ബൈക്ക് യാത്രികന് പൊള്ളലേറ്റു. കൊടുമൺ അങ്ങാടിക്കൽ തെക്ക് പ്രീതാഭവനത്തിൽ രാജനാണ് (58)പൊള്ളലേറ്റത്. അന്പത് ശതമാനത്തോളം പൊള്ളലേറ്റിട്ടുണ്ട്. ഇന്നലെ ഉച്ചകഴിഞ്ഞ് മൂന്നിന് പറക്കോട് ബ്ലോക്ക് പഞ്ചായത്ത് ഓഫീസിന് സമീപത്താണ് സംഭവം. കൊടുമണ്ണിൽ നിന്നും പറക്കോട് ഭാഗത്തുള്ള ഇരുചക്രവാഹനം നന്നാക്കുന്ന വർക് ഷോപ്പിലേക്ക് ബൈക്കിന്‍റെ അറ്റകുറ്റപ്പണികൾ നടത്തുന്നതിനു വേണ്ടി പോകുകയായിരുന്നു രാജൻ. ബൈക്കിന് പെട്ടെന്ന് തീപിടിച്ചതിനാൽ രാജന് ബൈക്കിൽ നിന്ന് ഉടൻ ഇറങ്ങാൻ സാധിച്ചില്ല. ഇതാണ് രാജന് പൊള്ളലേക്കാൻ കാരണമെന്ന് ദൃസാക്ഷികൾ പറഞ്ഞു. പൊള്ളലേറ്റ രാജനെ പറക്കോട് ബ്ലോക്ക് പഞ്ചായത്ത് പ്രസിഡന്‍റ് എം.പി. മണിയമ്മയുടെ നേതൃത്വത്തിൽ ബ്ലോക്ക് പഞ്ചായത്തിന്‍റെ വാഹനത്തിലാണ് അടൂർ ജനറൽ ആശുപത്രിയിൽ എത്തിച്ചത്. പരിക്ക് ഗുരുതരമായതിനേ തുടർന്ന് കോട്ടയം മെഡിക്കൽ കോളജിലേക്ക് മാറ്റി.

ആറന്മുള വള്ളസദ്യ: അടിസ്ഥാന സൗകര്യങ്ങള്‍ ഉറപ്പാക്കുമെന്ന് ജില്ലാ കളക്ടര്‍

പത്തനംതിട്ട: ആറന്മുള വള്ളസദ്യ വഴിപാടുകൾ, ഉത്രട്ടാതി ജലമേള എന്നിവയ്ക്ക് അടിസ്ഥാന സൗകര്യങ്ങള്‍ ഉറപ്പാക്കുമെന്ന് ജില്ലാ കളക്ടർ എസ്. പ്രേം കൃഷ്ണൻ. ഇതുമായി ബന്ധപ്പെട്ട് കളക്ടറേറ്റ് കോണ്‍ഫറന്‍സ് ഹാളില്‍ ചേര്‍ന്ന ആലോചനായോഗത്തിൽ അധ്യക്ഷത വഹിച്ചു പ്രസംഗിക്കുകയായിരുന്നു അദ്ദേഹം. കുടിവെള്ളത്തിന്‍റെയും ഭക്ഷണത്തിന്‍റെയും ഗുണനിലവാരം ഉറപ്പാക്കും. മാലിന്യം ശാസ്ത്രീയമായി സംസ്‌കരിക്കും. വള്ളസദ്യയ്ക്കായി എത്തുന്ന പള്ളിയോടങ്ങളുടെ സുഗമ സഞ്ചാരത്തിന് നടപടി സ്വീകരിക്കും. അടിയന്തര വൈദ്യസഹായത്തിനായി ആരോഗ്യവകുപ്പ് ക്രമീകരണം ഏര്‍പ്പെടുത്തും. ക്ഷേത്ര പരിസരത്ത് അണുനശീകരണവും ശുചീകരണ പ്രവര്‍ത്തനങ്ങളും ഉറപ്പാക്കും. ഭക്ഷണം പാകം ചെയ്യുന്നവര്‍ക്കും കൈകാര്യം ചെയ്യുന്നവര്‍ക്കും ഹെല്‍ത്ത് കാര്‍ഡ് ഉണ്ടാകും. ക്രമസമാധാനവും സുരക്ഷയും ഉറപ്പാക്കാൻ പോലീസിനു നിർദേശം നൽകും. വനിതാ പോലീസിനെ ഉള്‍പ്പെടെ മഫ്തിയില്‍ നിയോഗിക്കും. വാഹന പാര്‍ക്കിംഗിന് വ്യക്തമായ പദ്ധതി തയാറാക്കും. അത്യാധുനിക സൗകര്യങ്ങളോടെ ഫയര്‍ യൂണിറ്റ് ക്രമീകരിക്കും. അപകടരഹിതമായും തര്‍ക്കങ്ങള്‍ ഒഴിവാക്കിയും വള്ളംകളി നടത്തുമെന്നും കളക്ടര്‍ പറഞ്ഞു. വള്ളസദ്യ വഴിപാടുകള്‍ 13 മുതല്‍ ഒക്ടോബര്‍ രണ്ട് വരെ നടക്കും. അഷ്ടമിരോഹിണി വള്ളസദ്യ സെപ്റ്റംബര്‍ 14നും ഉത്രട്ടാതി ജലമേള സെപ്റ്റംബര്‍ ഒമ്പതിനും നടക്കും.തിരുവല്ല സബ് കളക്ടര്‍ സുമിത് കുമാര്‍ ഠാക്കൂര്‍, ഡെപ്യൂട്ടി കളക്ടര്‍ ആര്‍ രാജലക്ഷ്മി, ബലോക്ക്- ഗ്രാമപഞ്ചായത്ത് പ്രതിനിധികൾ, വകുപ്പ് ഉദ്യോഗസ്ഥര്‍ തുടങ്ങിയവര്‍ പങ്കെടുത്തു.

ഭരണകൂട ഭീകരയ്ക്കു പോലീസ് ശ്രമിക്കുന്നു: ഡിസിസി പ്രസിഡന്‍റ്

പത്തനംതിട്ട: കോട്ടയം മെഡിക്കൽ കോളജിൽ കെട്ടിടം തകർന്ന് വീട്ടമ്മ മരിച്ച സംഭവത്തിൽ രക്ഷാപ്രവർത്തനം വൈകിപ്പിച്ച ആരോഗ്യ മന്ത്രി വീണാ ജോർജിന്‍റെ രാജി ആവശ്യപ്പെട്ട് സമാധാനപരമായി സമരം ചെയ്ത യൂത്ത് കോൺഗ്രസ് ജില്ലാ സെക്രട്ടറി ജിതിൻ റ്റി. നൈനാൻ, ആറന്മുള മണ്ഡലം പ്രസിഡന്‍റ് ഏദൻ ജോർജ് എന്നിവരെ കള്ളക്കേസ് ചുമത്തി വീട്ടിൽ നിന്നും അറസ്റ്റ് ചെയ്ത് റിമാൻഡു ചെയ്ത പോലീസിന്‍റെ നടപടി ജനാധിപത്യ വിരുദ്ധവും ഭരണകൂട ഭീകരതയുമാണെന്ന് ഡിസിസി പ്രസിഡന്‍റ് പ്രഫ. സതീഷ് കൊച്ചുപറമ്പിൽ. ആരോഗ്യ വകുപ്പിനെ അഴിമതിയുടേയും കെടുകാര്യസ്ഥതയുടേയും കേളീരംഗമായി മാറ്റിയ മന്ത്രി രാജിവയ്ക്കേണ്ടതിനു പകരം പോലീസിനെ ഉപയോഗിച്ച് ജനാധിപത്യ സമരങ്ങളെ അടിച്ചമർത്തുവാനാണ് ശ്രമിക്കുന്നത്. ജില്ലയിൽ മന്ത്രിക്കെതിരായി ഡിസിസി യും യൂത്ത് കോൺഗ്രസും നടത്തിയ സമരത്തിന് നേതൃത്വം നല്കി എന്നതിന്‍റെ പേരിൽ കെപിസിസി ജനറൽ സെക്രട്ടറി പഴകുളം മധു അടക്കമുള്ള നേതാക്കൾക്കെതിരേ സിപിഎം നേതാക്കൾ നടത്തിയ കൊലവിളി പ്രസംഗം ഉന്മൂലന സിദ്ധാന്ത വാദികളായ ഇവരുടെ യഥാർഥ മുഖം വെളിച്ചത്തു കൊണ്ടുവരുന്നതാണെന്ന് സതീഷ് കൊച്ചുപറന്പിൽ പറഞ്ഞു. ഉമ്മൻചാണ്ടി സർക്കാരിന്‍റെ ഭരണകാലത്ത് അനുവദിച്ച കോന്നി മെഡിക്കൽ കോളജ് ഉൾപ്പെടെ ജില്ലയിലെ സർക്കാർ ആശുപത്രികൾ ആരോഗ്യമന്ത്രിയുടെ കഴിവുകേടിന്‍റെ ബാക്കിപത്രമായി നിലനില്ക്കുമ്പോൾ ആന്‍റോ ആന്‍റണി എംപിയുടെ ശ്രമഫലമായി അനുവദിച്ച പത്തനംതിട്ട ജനറൽ ആശുപത്രി നവീകരണ ഫണ്ട് ഉൾപ്പെടെ കേന്ദ്ര ഫണ്ട് ഉപയോഗിച്ച് നടത്തുന്ന പ്രവർത്തനങ്ങൾ കൂടി ഉൾപ്പെടുത്തി ആരോഗ്യ വകുപ്പ് ജില്ലയിൽ 970 കോടി രൂപയുടെ വികസന പ്രവർത്തനങ്ങൾ നടത്തി എന്ന സിപിഎം ജില്ലാ സെക്രട്ടറിയുടെ അവകാശവാദം ആരാന്‍റെ കുഞ്ഞിന്‍റെ പിതൃത്വം ഏറ്റെടുക്കുന്നതിന് തുല്യമാണെന്ന് ഡിസിസി പ്രസിഡന്‍റ് അഭിപ്രായപ്പെട്ടു.

അടൂര്‍ കെഎസ്ആര്‍ടിസി ഇനി ഇ ഓഫീസ്

അടൂർ: കെഎസ്ആര്‍ടിസി ഡിപ്പോയുടെ ഇ ഓഫീസ് പ്രഖ്യാപനം ഡെപ്യൂട്ടി സ്പീക്കര്‍ ചിറ്റയം ഗോപകുമാര്‍ നിര്‍വഹിച്ചു. എംഎല്‍എയുടെ ആസ്തി വികസന ഫണ്ടില്‍ നിന്നും 4.83 ലക്ഷം രൂപ വിനിയോഗിച്ചാണ് സമ്പൂര്‍ണ കംപ്യൂട്ടർവത്കരണം നടപ്പാക്കിയത്. സംസ്ഥാനത്തെ മുഴുവന്‍ ഓഫീസുകളും ഇ ഓഫീസ് സംവിധാനത്തിലേക്ക് മാറുകയാണ്. കെഎസ്ആര്‍ടിസി ഓഫീസ് നടപടിക്രമങ്ങള്‍ സുതാര്യമാക്കുന്നതിനും താമസം ഒഴിവാക്കുന്നതിനും പൊതുജനങ്ങള്‍ക്ക് ലഭ്യമാക്കേണ്ട സേവനങ്ങള്‍ സമയബന്ധിതമായി ലഭ്യമാക്കുന്നതിനും ഇതിലൂടെ സാധ്യമാകുമെന്ന് ഡെപ്യൂട്ടി സ്പീക്കര്‍ പറഞ്ഞു. നഗരസഭാ ചെയര്‍പേഴ്‌സന്‍ കെ.മഹേഷ്‌കുമാര്‍ അധ്യക്ഷത വഹിച്ചു. കെഎസ്ആര്‍ടിസി മാനേജിംഗ് ഡയറക്ടര്‍ പി.എസ്. പ്രമോദ് ശങ്കര്‍, നഗരസഭാ വൈസ് ചെയര്‍പേഴ്സണ്‍ രാജി ചെറിയാന്‍, കെഎസ്ആര്‍ടിസി സംഘടനാ പ്രതിനിധികളായ ടി.കെ.അരവിന്ദ്, ജി.അരുണ്‍, ഡി പ്രശാന്ത്, ജി.അനില്‍കുമാർ, സി.അഭിലാഷ്, എടിഒ .അജിത് കുമാര്‍ എന്നിവര്‍ പങ്കെടുത്തു.

വയോധികനെ മര്‍ദിച്ച മകന്‍ അറസ്റ്റില്‍

പന്തളം: അച്ഛനെ ക്രൂരമായി മര്‍ദ്ദിച്ച കേസില്‍ മകന്‍ അറസ്റ്റിൽ. പനതളം തെക്കേക്കര പറന്തല്‍ കൈരളി ജംഗ്ഷന്‍ പ്രശാന്തി വീട്ടില്‍ പൊടിയനു (73) മര്‍ദനമേറ്റ കേസിലാണ് ഇയാളുടെ മകന്‍ പന്തളം തെക്കേക്കര മന്നം നഗര്‍ പെരുമ്പുളിക്കല്‍ ധ്വനി(പ്രശാന്തി)വീട്ടില്‍ പി. പ്രദീപ്കുമാറിനെ (40) നെ പന്തളം പോലീസ് അറസ്റ്റ് ചെയ്തത്. കഴിഞ്ഞ നാലിനാണ് പരാതിക്കാസ്പദമായ സംഭവം നടക്കുന്നത്. പന്തളം എസ്എച്ച്ഒ ടി.ഡി.പ്രജീഷിന്‍റെ മേല്‍നോട്ടത്തിലാണ് അന്വേഷണം നടക്കുന്നത്.

പൊതുജനാരോഗ്യ മേഖല തകർത്തതിന് സർക്കാർ മറുപടി പറയണം: വിചാർ വിഭാഗ്

പത്തനംതിട്ട: ജില്ലയുടെ പൊതുജനാരോഗ്യ മേഖല തകർത്തതിന് സർക്കാരും ജില്ലാ ഭരണകൂടവും മറുപടി പറയണമെന്ന് കെപിസിസി വിചാർ വിഭാഗ് ജില്ലാ സമ്മേളനം ആവശ്യപ്പെട്ടു. സാധാരണക്കാരന്‍റെ ആരോഗ്യവും ചികിത്സയും സംരക്ഷിക്കുക സർക്കാരിന്‍റെ വലിയ ഉത്തരവാദിത്വമാണ്. ആശുപത്രി കെട്ടിടങ്ങൾ തകർന്ന് സുരക്ഷിതത്വം ഇല്ലാതെയായി. സർക്കാർ മെഡിക്കൽ കോളജുകളിൽ പോലും അത്യാവശ്യ മെഡിക്കൽ സാമഗ്രികളും മരുന്നുകളും ലഭ്യമല്ല. ആരോഗ്യ സംരക്ഷണത്തിനായി ജനങ്ങൾ തെരുവിലിറങ്ങി സമരം ചെയ്യേണ്ടുന്ന സ്ഥിതി ലജ്ജാകരമാണെന്ന് സമ്മേളനം അഭിപ്രായപ്പെട്ടു. ജില്ലാ ചെയർമാൻ ഡോ റോയ്സ് മല്ലശേരി അധ്യക്ഷത വഹിച്ച സമ്മേളനം ഡിസിസി പ്രസിഡന്‍റ് പ്രഫ. സതീഷ് കൊച്ചുപറമ്പിൽ ഉദ്ഘാടനം ചെയ്തു. കെപിസിസി ജനറൽ സെക്രട്ടറി പഴകുളം മധു, വിചാർ വിഭാഗ് സംസ്ഥാന സെക്രട്ടറി സഞ്ജീവ് അമ്പലപ്പാട്, ജില്ലാ ജനറൽ സെക്രട്ടറി സാം ചെമ്പകത്തിൽ, ഡിസിസി വൈസ് പ്രസിഡന്‍റ് എ. സുരേഷ് കുമാർ, മറ്റ് നേതാക്കളായ ജി. രഘുനാഥ്, വെട്ടൂർ ജ്യോതി പ്രസാദ്, ജോൺസൺ വിളവിനാൽ, പ്രഫ. പി. കെ. മോഹൻ രാജ്, അജിത് മണ്ണിൽ, ജെറി മാത്യു സാം, എം. ബി. സത്യൻ, വിചാർ വിഭാഗ് ഭാരവാഹികളായ ബി. രാജശ്രീ, എ. ജി. ഏബ്രഹാം, അബ്ദുൽ കലാം ആസാദ് , ഡോ. എം. എം. ബി. ഹസൻ, ബിജു മോൻ കെ. സാമുവൽ, സജി കെ. സൈൺ, വർഗീസ് പൂവൻ പാറ, മനോജ്‌ കടമ്മനിട്ട, പ്രീത ബി. നായർ, ഒ. കെ. നായർ , ഫ്രെഡി ഉമ്മൻ, ഷിനു അലക്സ്‌, ഷീബാ വർഗീസ്, സ്വാമി നാഥൻ എന്നിവർ പ്രസംഗിച്ചു.

സംയുക്ത ട്രേഡ് യൂണിയൻ പണിമുടക്ക് പൂർണമാകും

പത്തനംതിട്ട: വിവിധ ആവശ്യങ്ങൾ ഉന്നയിച്ച് നാളെ നടക്കുന്ന ദേശീയ പണിമുടക്ക് ജില്ലയിലും പൂർണമാകുമെന്ന് സംയുക്ത ട്രേഡ് യൂണിയൻ ഭാരവാഹികൾ പത്രസമ്മേളനത്തിൽ പറഞ്ഞു. എല്ലാ വിഭാഗം മേഖലയിലും തൊഴിലാളികൾ പണിമുടക്കിനു സന്നദ്ധമായിട്ടുണ്ട്. സർവീസ് സംഘടനകളും പണിമുടക്കും. സ്വകാര്യ വാഹനങ്ങൾ നിർത്തിവച്ചു വ്യാപാര വ്യവസായ സ്ഥാപനങ്ങൾ അടച്ചും പണിമുടക്കിനോടു സഹകരിക്കാനാണ് ആഹ്വാനം. തൊഴിലാളി വിരുദ്ധമായ ലേബർ കോഡുകൾ ഉപേക്ഷിക്കുക, എല്ലാ അസംഘടിത തൊഴിലാളികൾക്കും കരാർ തൊഴിലാളികൾക്കും സ്കീം വർക്കർമാർക്കും പ്രതിമാസം 36,000 രൂപ മിനിമം വേതനം നിശ്ചയിക്കുക, തൊഴിലിന്‍റെ പുറംകരാർവൽക്കരണവും നിശ്ചിതകാല തൊഴിലും ഇൻസെന്‍റീവ് വർക്കും ഏർപ്പെടുത്താതിരിക്കുക, എല്ലാ വിഭാഗം കരാർ തൊഴിലാളികൾക്കും തുല്യജോലിക്ക് തുല്യവേതനം നൽകുക, ഇപിഎഫ് പെൻഷൻ മിനിമം 9,000 രൂപയാക്കുക, കർഷക തൊഴിലാളികൾക്കുൾപ്പെടെ സാമൂഹ്യസുരക്ഷ ഉറപ്പാക്കുക, പൊതുമേഖലയും സർക്കാർ സ്ഥാപനങ്ങളും സ്വകാര്യമേഖലയ്ക്ക് കൈമാറുന്നത് അവസാനിപ്പിക്കുക, ദേശീയ ആസ്തി വിൽപന ഉപേക്ഷിക്കുക, രാജ്യത്തിന്‍റെ ഫെഡറൽ പരിരക്ഷ തകർക്കുന്നഎല്ലാ നടപടികളും കേന്ദ്രസർക്കാർ അവസാനിപ്പിക്കുക തുടങ്ങിയ ആവശ്യങ്ങൾ ഉന്നയിച്ചാണ് പണിമുടക്ക്. ഇന്ന് വൈകുന്നേരം വാർഡ് അടിസ്ഥാനത്തിൽ പന്തം കൊളുത്തി പ്രകടനം നടത്തും. പണിമുടക്ക് ദിവസം രാവിലെ പഞ്ചായത്ത്, മുനിസിപ്പൽ അടിസ്ഥാനത്തിൽ പ്രകടനവും പ്രധാന കേന്ദ്രങ്ങളിൽ കാത്തിരിപ്പ് കേന്ദ്രവും ഉണ്ടാകും. സംയുക്ത ട്രേഡ്യൂണിയൻ നേതാക്കളായ കെ. സി. രാജഗോപാൽ, ബെൻസി തോമസ്, കെ. ഐ. ജോസഫ്, പി. ബി. ഹർഷകുമാർ, എ.സ് ഹരിദാസ്, ശ്യാമ ശിവൻ എന്നിവർ പത്രസമ്മേളനത്തിൽ പങ്കെടുത്തു.

മന്ത്രിയുടെ പ്രോഗ്രസ് റിപ്പോർട്ട് സിപിഎം പുറത്തുവിടണമെന്ന് എസ്ഡിപിഐ

പത്തനംതിട്ട: ആരോഗ്യമന്ത്രി വീണാ ജോർജ് ജില്ലയിൽ പൂർത്തിയാക്കിയ വികസന പദ്ധതികളുടെ പ്രോഗ്രസ് റിപ്പോർട്ട് പുറത്തുവിടാൻ സിപിഎം പത്തനംതിട്ട ജില്ല നേതൃത്വത്തിന് ആർജ്ജവമുണ്ടോയെന്ന് എസ്ഡിപിഐ ജില്ലാ പ്രസിഡന്‍റ് എസ്. മുഹമ്മദ് അനീഷ്. കഴിഞ്ഞ ഒമ്പതു വർഷത്തിനിടെ ആരോഗ്യ മേഖലയിൽ 970 കോടിയുടെ വികസനമാണ് മന്ത്രി വീണാ ജോർജ് കൊണ്ടുവന്നതെന്നാണ് സിപിഎമ്മിന്‍റെ അവകാശവാദം. പത്തനംതിട്ട ജില്ലാ ആസ്ഥാനം ഉൾപ്പെടുന്ന സ്വന്തം മണ്ഡലമായ ആറന്മുളയിൽ എത്ര പദ്ധതികളാണ് മന്ത്രിക്ക് പൂർത്തീകരിക്കാൻ കഴിഞ്ഞത്. ജില്ലാ ആസ്ഥാനത്തെ വികസന മുരടിപ്പിലേക്ക് തള്ളിവിട്ടതിന്‍റെ ഉത്തരവാദിത്തത്തിൽ നിന്നും വീണാ ജോർജിന് ഒഴിഞ്ഞുമാറാനാകില്ലെന്ന് മുഹമ്മദ് അനീഷ് പറഞ്ഞു.

മന്ത്രി രാജിവയ്ക്കണം

റാന്നി: കേരളത്തിലെ ആരോഗ്യ മേഖലയെ മുഴുവന്‍ മരണക്കെണിയിലേക്ക് തള്ളിവിട്ട് സര്‍ക്കാരിനെ പോലും പ്രതിരോധത്തിലാക്കിയ മന്ത്രി വീണാ ജോര്‍ജ് രാജിവയ്ക്കണമെന്ന് ക്രിസ്ത്യന്‍ പ്രസ് അസോസിയേഷന്‍ ആവശ്യപ്പെട്ടു. മന്ത്രിയുടെ പ്രവര്‍ത്തനശൈലി സര്‍ക്കാരിനു തന്നെ അവമതിപ്പ് ഉളവാക്കിയെന്ന് അസോസിയേഷന്‍ യോഗം അഭിപ്രായപ്പെട്ടു. പ്രസിഡന്‍റ് തോമസ് കുട്ടി പുന്നൂസിന്‍റെ അധ്യക്ഷതയില്‍ ചേര്‍ന്ന യോഗം റവ. ഡോ. കെ. പി. വി. ഏബ്രഹാം ഉദ്ഘാടനം ചെയ്തു. എ എം വര്‍ഗീസ്, പി. ജെ. ചാക്കോ കുമളി, റെജി വര്‍ഗീസ്,മോഹന്‍ മുണ്ടക്കയം തുടങ്ങിയവര്‍ പ്രസംഗിച്ചു.

മൈലപ്രയില്‍ കോണ്‍ഗ്രസ് പ്രതിഷേധം

മൈലപ്ര: ആരോഗ്യ വകുപ്പിനെ നാഥനില്ലാ കളരിയാക്കിയ മന്ത്രി വീണാ ജോര്‍ജ് രാജിവയ്ക്കണമെന്നാവശ്യപ്പെട്ട് മണ്ഡലം കോണ്‍ഗ്രസ് കമ്മിറ്റിയുടെ നേതൃത്വത്തില്‍ മൈലപ്രയില്‍ പ്രതിഷേധ പ്രകടനവും യോഗവും നടത്തി. ഡിസിസി ജനറല്‍ സെക്രട്ടറി സാമുവല്‍ കിഴക്കുപുറം ഉദ്ഘാടനം ചെയ്തു. മണ്ഡലം പ്രസിഡന്‍റ് വിത്സണ്‍ തുണ്ടിയത്ത് അധ്യക്ഷത വഹിച്ചു. ഡിസിസി അംഗങ്ങളായ പി.കെ.ഗോപി, ജയിംസ് കീക്കരിക്കാട്ട്, ബ്ലോക്ക് ഭാരവാഹികളായ ലിബു മാത്യു, ആര്‍. പ്രകാശ്, ബിജു സാമുവല്‍, ജോര്‍ജ് യോഹന്നാന്‍, എല്‍സി ഈശോ, എസ്.സുനില്‍കുമാര്‍ ജെസി വര്‍ഗീസ് എ.ഓമന വര്‍ഗീസ്, രാജു പുല്ലൂര്‍, ജോബില്‍ മൈലപ്ര, ശോശാമ്മ ജോണ്‍സണ്‍, ജനകമ്മ ശ്രീധരന്‍, എം.കെ സുരേന്ദ്രന്‍ തുടങ്ങിയവര്‍ പ്രസംഗിച്ചു.

സഹകരണ ദിനാഘോഷം ഉദ്ഘാടനം ചെയ്തു

റാന്നി: റാന്നി സർക്കിൾ സഹകരണ യൂണിയൻ നേതൃത്വത്തിൽ നടത്തിയ അന്തർദേശീയ സഹകരണ ദിനം പ്രമോദ് നാരായൺ എംഎൽഎ ഉദ്ഘാടനം ചെയ്തു. സർക്കിൾ സഹകരണ യൂണിയൻ ചെയർമാൻ പി.ആർ. പ്രസാദ് അധ്യക്ഷത വഹിച്ചു. അസിസ്റ്റന്‍റ് രജിസ്ട്രാ ർ ഡിനീഷ് ജോസഫ്, റാന്നി സഹകരണ ബാങ്ക് പ്രസിഡന്‍റ് കെ.വി. ലാൽ, ജോജോ കോവൂർ, ഉണ്ണി പ്ലാച്ചേരി, ബെന്നി പുത്തൻപറമ്പിൽ, റോബിൻ കെ. തോമസ്, ടി.ജി. ഷാജി എന്നിവർ പ്രസംഗിച്ചു.

ചിറ്റാർ ഗ്രാമപഞ്ചായത്ത്: തുടർച്ചയായ ഏഴാമത്തെ സെക്രട്ടറിക്കും സ്ഥലംമാറ്റം

ചിറ്റാർ: അഞ്ചു വർഷത്തെ ഭരണസമിതി കാലയളവിൽ സെക്രട്ടറിമാരുടെ മാറ്റംകൊണ്ട് ഭരണസ്തംഭനത്തിലായിരിക്കുകയാണ് ചിറ്റാർ ഗ്രാമപഞ്ചായത്ത്. ഇപ്പോഴത്തെ ഭരണസമിതി അധികാരമേറ്റശേഷം എത്തിയ ഏഴാമത്തെ സെക്രട്ടറിയും സ്ഥലംമാറി. എട്ടാമത്തെ ആളിനായി കസേര കാത്തുകിടക്കുകയാണ്. ഉദ്യോഗസ്ഥരുടെ കുറവു കാരണം പഞ്ചായത്തിൽ ഭരണം സ്തംഭനത്തിലാണ്. നേരത്തേ സെക്രട്ടറി, ഓവർസിയർ, വിഇഒ, എഇ തുടങ്ങിയ തസ്തികകളിലും മാസങ്ങളായി ആളില്ലാതെ കിടന്നിരുന്നു. പഞ്ചായത്തിന്‍റെ പ്രവർത്തനത്തിൽ പ്രധാന ഉദ്യോഗസ്ഥനായ സെക്രട്ടറിയെ മാറ്റി ഉത്തരവ് ഇറങ്ങിയപ്പോഴും പകരം നിയമനം നടത്തിയിട്ടില്ല. വർഷങ്ങളായി അസിസ്റ്റന്‍റ് എൻജിനിയർ ഇല്ലാതിരുന്നു. ഒരു മാസത്തിനിടെ നിയമനം നടന്നു. എന്നാൽ രണ്ട് ഓവർസീയർമാർ ഉണ്ടായിരുന്നിടുത്ത് ഒരു വർഷം മുമ്പ് ഒരാൾ സ്ഥലം മാറിപ്പോയി. നിലവിലുള്ളയാൾക്കും സ്ഥലം മാറ്റം ഉത്തരവ് വന്നു. രണ്ട് ഓവർസീയർമാരും സ്ഥലംമാറിയതോടെ ആ തസ്തികയും ഒഴിഞ്ഞു. നിർവഹണ ഉദ്യോഗസ്ഥരുടെ കുറവു മൂലം പഞ്ചായത്തിന്‍റെ പല പദ്ധതികളും സമയ ബന്ധിതമായി തീർക്കാൻ കഴിയാതെ ഫണ്ടുകൾ ലാപ്‌സായിപ്പോയിട്ടുണ്ട്. ഈ വിഷയം സംബന്ധിച്ച് ബന്ധപ്പെട്ട വകുപ്പ് മന്ത്രിക്കും അധികാരികൾക്കും പല തവണ നേരിട്ട് നിവേദനം നൽകിയിട്ടും യാതൊരു നടപടിയും ഉണ്ടായില്ലെന്ന് ഗ്രാമപഞ്ചായത്ത് പ്രസിഡന്‍റ് എ. ബഷീർ അറിയിച്ചു. പ്രശ്‌നത്തിന് പരിഹാരം ഉണ്ടായില്ലെങ്കിൽ സമരപരിപാടികൾ ആരംഭിക്കുമെന്നും പ്രസിഡന്‍റ് പറഞ്ഞു.

ഓക്‌സിജന്‍ പ്ലാന്‍റിനു പിന്നിലെ അഴിമതി അന്വേഷിക്കണമെന്ന് കോണ്‍ഗ്രസ്

കോഴഞ്ചേരി: കോവിഡ് കാലഘട്ടത്തില്‍ ആശുപത്രികളില്‍ ഓക്സിജന്‍ ക്ഷാമം നേരിട്ടപ്പോള്‍ സംസ്ഥാന ആരോഗ്യ വകുപ്പ് മുന്‍കൈ എടുത്ത് ജില്ലാ പഞ്ചായത്ത് ഫണ്ട് ഉപയോഗപ്പെടുത്തി നിര്‍മിച്ച ഓക്‌സിജന്‍ പ്ലാന്‍റിനു പിന്നിലെ അഴിമതി അന്വേഷിക്കണമെന്ന് കോണ്‍ഗ്രസ് ബ്ലോക്ക് പ്രസിഡന്‍റ് ജെറി മാത്യു സാം. എ ഗുണനിലവാരം കുറഞ്ഞ കമ്പനികളുടെ നേത്യത്വത്തില്‍ നിര്‍മിച്ച പ്ലാന്‍റ് വളരെ വേഗം പൊട്ടിത്തെറിക്കുകയും പിന്നീട് ഇത് പ്രവര്‍ത്തനക്ഷമമാക്കാതിരിക്കുകയുമാണ്. പ്ലാന്‍റ് നഷ്ടമാണെന്ന ആശുപത്രി സൂപ്രണ്ടിന്‌റെ നിഗമനം വിചിത്രമാണെന്നും ഇതുമായി ബന്ധപ്പെട്ട് വിജിലന്‍സ്, ഓംബുഡസ്മാന്‍ എന്നിവര്‍ക്ക് പരാതി നല്‍കുമെന്നും ആശുപത്രി വികസന സമിതിയംഗം കൂടിയായ ജെറി മാത്യു സാം പറഞ്ഞു. വികസന സമിതി യോഗത്തില്‍ സര്‍ക്കാര്‍ അന്വേഷണം നടത്തിയത് റിപ്പോര്‍ട്ട് വച്ചിട്ടില്ല. കേരളത്തില്‍ കോവിഡ് കാലയളവില്‍ നടന്ന ഓക്സിജന്‍ പ്ലാന്‍റുകള്‍ തകരാറിലായി. ഇതുമായ ബന്ധപ്പെട്ട രേഖകള്‍ വിവരവകാശ പ്രകാരം ഉള്ളത് പുറത്തുവിട്ടിട്ടില്ല. സംസ്ഥാനത്ത് കോടിക്കണക്കിന് രൂപയുടെ ഫണ്ട് ഇതുമായി ബന്ധപ്പെട്ടു പാഴായി. കോഴഞ്ചേരി ജില്ലാ ആശുപത്രി വികസന സമിതിയില്‍ തട്ടിപ്പ് കമ്പനിയാണ് ഓക്സിജന്‍ പ്ലാന്‍റിന്‍റെ പിന്നിലെന്ന് തെളിഞ്ഞതായും ജെറി പറഞ്ഞു.

റേഡിയോ സെന്‍റ് മേരീസ് വോയിസ് പ്രക്ഷേപണം ആരംഭിച്ചു

ആനിക്കാട്: സെന്‍റ് മേരീസ് ഹൈസ്‌കൂളില്‍ സെന്‍റ് മേരീസ് വോയിസ് എന്ന പേരില്‍ കുട്ടികളുടെ അറിവിനും വിനോദത്തിനുമായി കേള്‍ക്കൂ, ചിരിക്കൂ, ചിന്തിക്കൂ എന്ന ആപ്തവാക്യവുമായി റേഡിയോ സംപ്രേഷണം ആരംഭിച്ചു. ആനിക്കാട് ഗ്രാമപഞ്ചായത്ത് പ്രസിഡന്‍റ് സൂസന്‍ ഡാനിയേല്‍ റേഡിയോ പ്രവര്‍ത്തനം ഉദ്ഘാടനം ചെയ്തു. വാര്‍ഡ് മെംബര്‍ മോളിക്കുട്ടി സിബി, ഹെഡ്മാസ്റ്റര്‍ പി. ബിനുമോന്‍, ജിജി വര്‍ഗീസ്, ഫാ. വര്‍ഗീസ് കണ്ടത്തില്‍, പ്രമോദ് പി. മര്‍ക്കോസ്, മാത്യു വര്‍ഗീസ്, സ്‌നേഹ നെബു വര്‍ഗീസ്, വന്ദന ജോണ്‍, റെന്‍വിന്‍ രതീഷ്, അന്‍സു സുനു തോമസ് എന്നിവര്‍ പ്രസംഗിച്ചു.

അരുവാപ്പുലം ഊട്ടുപാറയില്‍ പുലിയുടെ ആക്രമണത്തില്‍ ആട് ചത്തു

പത്തനംതിട്ട: കോന്നി പാടം ഫോറസ്റ്റ് സ്റ്റേഷന്‍ പരിധിയില്‍ അരുവാപ്പുലം ഊട്ടുപാറ കോഴഞ്ചേരി മുരുപ്പില്‍ പുലിയുടെ ആക്രമണത്തില്‍ ആട് ചത്തു. കഴിഞ്ഞ ദിവസം പുലര്‍ച്ചെയായിരുന്നു സംഭവം. ഊട്ടുപാറ കാഞ്ഞിരത്തുംമൂട്ടില്‍ സന്തോഷ് ബാബുവിന്‍റെ ആടിനെയാണ് പുലി പിടിച്ചത്. സന്തോഷ് ബാബുവും സമീപവാസിയായ മോനച്ചനും ചേര്‍ന്ന് ഇവരുടെ വീടിനു സമീപത്തെ കൃഷിയിടത്തില്‍ കൂട്ട് കൃഷി നടത്തിയിരുന്നു. കഴിഞ്ഞ ദിവസം നായയുടെ കുര കേട്ട് ഉണര്‍ന്ന മോനച്ചന്‍ പന്നി കയറിയതാണെന്നു കരുതി കൃഷിയിടത്തിലേക്ക് ടോര്‍ച്ച് തെളിച്ചപ്പോള്‍ പുലി ഓടിപ്പോകുന്നതാണ് കണ്ടതെന്ന് പറയുന്നു. തുടര്‍ന്ന് ഉറക്കത്തില്‍ ആയിരുന്ന സന്തോഷ് ബാബുവിനെയും കുടുംബത്തെയും മോനച്ചന്‍ വിവരം ധരിപ്പിച്ചു. തുടര്‍ന്ന് ആട്ടിന്‍ കൂട്ടില്‍ നോക്കുമ്പോള്‍ ആട് പുലിയുടെ ആക്രമണത്തില്‍ ചത്തു കിടക്കുന്നതാണ് കണ്ടത്. ആടിനെ കെട്ടി ഇട്ടിരുന്നതിനാല്‍ വലിച്ചു കൊണ്ടുപോകാന്‍ കഴിഞ്ഞില്ല. പാടം ഫോറസ്റ്റ് ഡെപ്യൂട്ടി റേഞ്ച് ഓഫീസര്‍ അനില്‍ കുമാറിന്‍റെ നേതൃത്വത്തില്‍ ഉള്ള വനപാലക സംഘം സ്ഥലത്തെത്തി തുടര്‍ നടപടികള്‍ സ്വീകരിച്ചു. പുലിയുടെ കാല്‍പാദങ്ങള്‍ വനപാലകസംഘം സ്ഥിരീകരിച്ചു. വനം വകുപ്പില്‍ നിന്നും ആടിന് ആവശ്യമായ നഷടപരിഹാരം നല്‍കുവാനുള്ള നടപടികള്‍ സ്വീകരിക്കുമെന്ന് അദ്ദേഹം അറിയിച്ചു. പ്രദേശത്ത് പുലി ഭീതി നിലനില്‍ക്കുന്നതിനാല്‍ വനപാലകര്‍ പ്രദേശത്ത് കാമറ സ്ഥാപിച്ചു.

സിപിഎം നേതാവ് ഭീഷണിപ്പെടുത്തിയെന്ന്; പഞ്ചായത്ത് ഹെഡ്ക്ലാർക്ക് പോലീസിൽ പരാതി നൽകി

പത്തനംതിട്ട: മെഴുവേലി ഗ്രാമപഞ്ചായത്ത് സെക്രട്ടറിയുടെ ചുമതല വഹിക്കുന്ന ഹെഡ് ക്ലാർക്കിനെ സിപിഎം നേതാവും മുൻ എംഎൽഎയുമായ കെ.സി. രാജഗോപാലൻ ഭീഷണിപ്പെടുത്തിയെന്ന് പരാതി. കൈയും കാലും തല്ലിയൊടിക്കുമെന്നും വേണ്ടി വന്നാൽ കൊല്ലുമെന്നും മുൻ എംഎൽഎ ഭീഷണി മുഴക്കിയെന്ന് ആറന്മുള പോലീസിൽ ഹെഡ് ക്ലാർക്ക് എസ്. ഷാജി നൽകിയ പരാതിയിൽ പറയുന്നു. എന്നാൽ ഷാജിയുടെ പരാതിയിൽ കേസെടുക്കാനാകില്ലെന്ന നിലപാടിലാണ് പോലീസ്. സംഭവത്തിൽ പ്രതിഷേധിച്ചു കോൺഗ്രസ് സമരരംഗത്തുമെത്തി. പഞ്ചായത്തിലെ തൊഴിലുറപ്പ് പദ്ധതിയുമായി ബന്ധപ്പെട്ട് യൂത്ത് കോൺഗ്രസ് നേതാവ് വിവരാവകാശം നൽകിയിരുന്നു. അഞ്ചു ചോദ്യങ്ങളാണ് ഉന്നയിച്ചിരുന്നത്. ഇത് ഷാജി തയാറാക്കി നൽകിയതാണെന്ന് ആരോപിച്ചാണ് ഭീഷണി. കഴിഞ്ഞ ഒന്നിന് തൊഴിലുറപ്പ് വിഭാഗം കരാർ ജീവനക്കാരൻ മഹേഷ് ഹെഡ് ക്ലാർക്കിനെ ചോദ്യം ചെയ്യുകയും അസഭ്യം വിളിക്കുകയും ചെയ്തിരുന്നു. രണ്ടിനാണ് മുൻ എംഎൽഎ രാജഗോപാലൻ ഫോണിൽ വിളിച്ച് ഭീഷണി മുഴക്കിയതെന്ന് പറയുന്നു. നിന്നെ കൊന്നാലും ആരും ചോദിക്കില്ലെന്നായിരുന്നു ഭീഷണിയെന്ന് പരാതിയിൽ പറയുന്നു. ജോലി ചെയ്യാൻ സംരക്ഷണം ആവശ്യപ്പെട്ടുള്ള പരാതിയിൽ നടപടി എടുക്കാൻ പോലീസ് തയാറാകാത്തതിൽ ഒരുവിഭാഗം ജീവനക്കാരും പ്രതിഷേധത്തിലാണ്. സംഭവത്തിൽ പ്രതിഷേധിച്ച് കോൺഗ്രസ് മെഴുവേലി മണ്ഡലം കമ്മിറ്റിയുടെ നേതൃത്വത്തിൽ പഞ്ചായത്ത് പടിക്കൽ ധർണ നടത്തി. മുൻ എംഎൽഎ കെ. ശിവദാസൻ നായർ ഉദ്ഘാടനം ചെയ്തു. മണ്ഡലം പ്രസിഡന്‍റ് സജി വട്ടമോടിയിൽ അധ്യക്ഷത വഹിച്ചു. പഞ്ചായത്തംഗം ഹരികുമാർ, ജയിൻ, എൻ.സി. മനോജ്, വിനീത അനിൽ, കെ.കെ. ജയിൻ, ആര്യ മുടവനാൽ, രാജു കുളക്കട എന്നിവർ പ്രസംഗിച്ചു.

എംസിഎ പത്തനംതിട്ട ഭദ്രാസന അര്‍ധവാര്‍ഷിക അസംബ്ലി

പത്തനംതിട്ട: മലങ്കര കാത്തലിക് അസോസിയേഷന്‍ പത്തനംതിട്ട ഭദ്രാസന അര്‍ധവാര്‍ഷിക അസംബ്ലി ളാക്കൂര്‍ സെന്‍റ് ജോര്‍ജ് മലങ്കര കത്തോലിക്കാ പള്ളിയില്‍ നടന്നു. യോഗത്തില്‍ ജില്ലാ വികാരി ഫാ. വര്‍ഗീസ് കൈതോണ്‍ ഉദ്ഘാടനം ചെയ്തു. ഭദ്രാസന പ്രസിഡന്‍റ് ജോസ് മാത്യൂ അധ്യക്ഷത വഹിച്ചു. ഭദ്രാസന ആത്മീയ ഉപദേഷ്ടാവ് ഫാ. ഏബ്രഹാം മണ്ണില്‍ മുഖ്യസന്ദേശം നല്കി. ജില്ലാ ആത്മീയ ഉപദേഷ്ടാവ് ഫാ. ബിജോയ് തുണ്ടിയത്ത്, ഇടവക വികാരി ഫാ. ഫെലിക്‌സ് പത്യാല, രൂപത ജനറല്‍ സെക്രട്ടറി എം. എം. തോമസ്, സഭാതല സെക്രട്ടറി ബെറ്റ്‌സി വര്‍ഗീസ്, ട്രഷറാര്‍ ജോര്‍ജ് യോഹന്നാൻ, വൈസ പ്രസിഡന്‍റ് എം. എസ്. ശമുവേൽ, വൈ. അന്നമ്മ, വിത്സന്‍ പട്ടേരി, ലിജോ ബിനു, മാത്യൂ കെ. തോമസ്, സജി പീടികയിൽ, അഡ്വ. പി. ജെ. ഏബ്രഹാം, രാജു ഏബ്രഹാം, രാജൂ ശമുവേല്‍ എന്നിവര്‍ പ്രസംഗിച്ചു.

ആരോഗ്യമന്ത്രി രാജിവയ്ക്കണം; ആര്‍എസ്പി പ്രതിഷേധസംഗമം പത്തിന്

പത്തനംതിട്ട: ആരോഗ്യമേഖലയുടെ സമ്പൂര്‍ണ പരാജയത്തിന്‍റെ ഉത്തരവാദിത്വം ഏറ്റെടുത്ത് ആരോഗ്യമന്ത്രി രാജിവയ്ക്കണമെന്നാവശ്യപ്പെട്ട് ആര്‍എസ്പി നേതൃത്വത്തില്‍ പത്തിന് പത്തനംതിട്ടയില്‍ പ്രതിഷേധ സംഗമംനടക്കും. അഭിമാനാര്‍ഹമായ നേട്ടങ്ങള്‍ കൈവരിച്ചിട്ടുള്ള കേരളത്തിലെ ആരോഗ്യ മേഖല ഇന്ന് സമ്പൂര്‍ണ തകര്‍ച്ചയിലാണെന്ന് ആര്‍എസ്പി യോഗം വിലയിരുത്തി. ലക്ഷക്കണക്കിനു സാധാരണക്കാര്‍ ആശ്രയിക്കുന്ന സര്‍ക്കാര്‍ ആശുപത്രികളില്‍ ആവശ്യത്തിന് ഉപകരണങ്ങളോ, മരുന്നുകളോ ഇല്ലാത്ത അവസ്ഥയാണ്. ഗുരുതരമായ സാഹചര്യങ്ങള്‍ നിലനില്‍ക്കുപ്പോഴും പിആര്‍ വര്‍ക്ക് നടത്തി രക്ഷപ്പെണ് ആരോഗ്യ മന്ത്രി ശ്രമിക്കുന്നതെന്നും യോഗം കുറ്റപ്പെടുത്തി. പത്തിനു രാവിലെ പത്തിന് പത്തനംതിട്ട ഗാന്ധി സ്‌ക്വയറിലാണ് പ്രതിഷേധ സംഗമം സംഘടിപ്പിക്കുന്നതെന്ന് ജില്ലാ സെക്രട്ടറി കെ. എസ്. ശിവകുമാര്‍ അറിയിച്ചു.

സഭയെക്കുറിച്ച് ആഴത്തിൽ പഠിക്കണം: മാർ ജോസഫ് പണ്ടാരശേരിൽ

കല്ലിശേരി: ക്നാനായ കൂട്ടായ്മകളിൽ നമ്മുടെ സമുദായ അംഗങ്ങൾ സഭയെക്കുറിച്ച് ആഴത്തിൽ പഠിക്കാനുള്ള വേദികൾ കൂടിയാക്കണമെന്ന് കോട്ടയം അതിരൂപത സഹായമെത്രാൻ മാർ ജോസഫ് പണ്ടാരശേരിൽ പറഞ്ഞു. ക്നാനായ മലങ്കര പുനരൈക്യത്തിന്‍റെയും കേരള കത്തോലിക്കാ സഭയിൽ അന്ത്യോക്യൻ സുറിയാനി റീത്ത് (മലങ്കര റീത്ത്) അനുവദിച്ചതിന്‍റെയും 104-ാമത് വാർഷികാഘോഷം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. പ്രേഷിത സന്ദേശവുമായി ക് നാനായ സമുദായം ലോകത്തിന്‍റെ മിക്ക ഭാഗങ്ങളിലും എത്തിച്ചേർന്നിട്ടുണ്ടെന്ന് അധ്യക്ഷത വഹിച്ചുകൊണ്ട് ഗീവർഗീസ് മാർ അപ്രേം പറഞ്ഞു. ഉമയാറ്റുകര ഓർത്തഡോക്സ് ഇടവക കുരിശടിയിൽ നിന്നാരംഭിച്ച പുനരൈക്യ റാലിയോടെയാണ് പരിപാടികൾക്കു തുടക്കമായത്. പ്രൊ-പ്രോട്ടോസിഞ്ചലൂസ് ഫാ. തോമസ് ആനിമുട്ടിൽ, ഫാ. റെന്നി കട്ടേൽ, സാബു പാറാനിക്കൽ, സൽവി തയ്യിൽ, ഏയ്ബു നെടിയുഴത്തിൽ, ജെസി ചെറുമണത്ത് എന്നിവർ പ്രസംഗിച്ചു. മലങ്കര ഫൊറോനയിലെ വിവിധ മേഖലകളിൽ പ്രാഗത്ഭ്യം തെളിയിച്ചവരെ സമ്മേളനത്തിൽ ആദരിച്ചു. 1921 ജൂലൈ 5നാണ് കേരള കത്തോലിക്കാസഭയിൽ പുനരൈക്യപ്പെടുന്നവർക്ക് മലങ്കര റീത്ത് അനുവദിച്ചുകൊണ്ടുള്ള കൽപ്പന റോമിൽ നിന്നുണ്ടായത്.

ആഷ്‌നിയുടെ അഭിലാഷം സഫലമാക്കി കളക്ടര്‍

പത്തനംതിട്ട: ആദരം സ്വീകരിക്കണം, ജില്ലാ കളക്ടര്‍ക്കൊപ്പമുള്ള ഫോട്ടോ സ്റ്റാറ്റസ് ഇടണം - അമ്മ ഷൈനിയോട് ആഗ്രഹം പറഞ്ഞുറപ്പിച്ചായിരുന്നു കുന്നന്താനത്തു നിന്ന് ഓമല്ലൂരിലേക്ക് ആഷ്നി എത്തിയത്. പത്താം ക്ലാസില്‍ മികച്ച വിജയം കൈവരിച്ച ഭിന്നശേഷി കുട്ടികളെ ആദരിക്കാന്‍ ഓമല്ലൂര്‍ ദര്‍ശന ഓഡിറ്റോറിയത്തില്‍ സംഘടിപ്പിച്ച ജില്ലാ കളക്ടറുടെ റസിലിയന്‍സ് ആന്‍ഡ് എക്‌സലന്‍സ് അവാര്‍ഡ് വാങ്ങാന്‍ എത്തിയ 200 ഓളം കുട്ടികളില്‍ ഒരാളായിരുന്നു ആഷ്നി. ആഗ്രഹം പറഞ്ഞ ഉടന്‍ ആഷ്‌നിക്കും കൂട്ടുകാരന്‍ ഹരി കൃഷ്ണനുമൊപ്പം ഫോട്ടോയ്ക്ക് ജില്ലാ കളക്ടര്‍ എസ് പ്രേംകൃഷ്ണനും കൂടി. ഏറെ നാളായുള്ള ആഗ്രഹം സഫലമായതിന്‍റെ സന്തോഷത്തിലാണ് ആഷ്‌നി. കുന്നന്താനം എന്‍എസ്എസ് എച്ച്എസ്എസില്‍ നിന്ന് 93 ശതമാനം മാര്‍ക്ക് നേടിയാണ് ആഷ്നി പത്താംക്ലാസില്‍ ഉന്നത വിജയം കരസ്ഥമാക്കിയത്. ഇവിടെത്തന്നെ പ്ലസ് വണ്‍ ഹ്യുമാനിറ്റീസ് വിദ്യാര്‍ഥിയാണിപ്പോൾ. മൂന്നര വയസിലാണ് കുട്ടിക്ക് വളര്‍ച്ചയില്‍ വ്യത്യാസമുള്ളത് മനസിലക്കുന്നത്. പ്രവാസിയായിരുന്ന അച്ഛന്‍ അഭിലാഷ് അഞ്ചു വര്‍ഷം മുന്നേ മരണപ്പെട്ടിരുന്നു. സഹോദരി ആഷ്ലി പ്ലസ് ടു വിദ്യാര്‍ഥിയാണ്. സെറിബ്രല്‍ പാഴ്‌സിയുമായി മല്ലിടുമ്പോഴും പഠിക്കാന്‍ ഏറെ ഇഷ്ടം കാണിക്കുന്ന കുട്ടിയാണ് ആഷ്നിയെന്ന് അമ്മ ഷൈനി പറഞ്ഞു. കളക്ടര്‍ ആകാനാണ് ആഗ്രഹം. ഭിന്നശേഷി കുട്ടികളെ മുഖ്യധാരയിലേക്ക് കൊണ്ടുവരുന്നതിനും പ്രോത്സാഹനം നല്‍കുന്നതിനും വേദി ഒരുക്കിയ കളക്ടറോട് ഉള്ള നന്ദിയും അവര്‍ കൂട്ടിച്ചേര്‍ത്തു.

ഉന്നത വിജയം നേടിയ ഭിന്നശേഷി കുട്ടികള്‍ക്ക് ആദരം

പത്തനംതിട്ട: 2024-25 അധ്യയന വര്‍ഷം പത്താം ക്ലാസില്‍ മികച്ച വിജയം കൈവരിച്ച ഭിന്നശേഷി കുട്ടികള്‍ക്ക് ആദരം അര്‍പ്പിക്കാന്‍ കളക്ടറേഴ്‌സ് റസിലിയന്‍സ് ആന്‍ഡ് എക്‌സലന്‍സ് അവാര്‍ഡ്. ഓമല്ലൂര്‍ ദര്‍ശന ഓഡിറ്റോറിയത്തില്‍ നടന്ന ചടങ്ങ് ജില്ലാ പഞ്ചായത്ത് പ്രസിഡന്‍റ് ജോര്‍ജ് ഏബ്രഹാം ഉദ്ഘാടനം ചെയ്തു. ഓരോ വിദ്യാര്‍ഥിയ്ക്കും വ്യത്യസ്തമായ അഭിരുചിയുണ്ട്. ഭിന്നശേഷി കുട്ടികളെ വിദ്യാഭ്യാസത്തിലും കലയിലും മുന്‍പന്തിയില്‍ എത്തിക്കാന്‍ പ്രയത്‌നിക്കുന്ന മാതാപിതാക്കളും അധ്യാപകരും അഭിനന്ദനം അര്‍ഹിക്കുന്നുവെന്നും പ്രസിഡന്‍റ് പറഞ്ഞു. ഇക്കാര്യത്തില്‍ ബഡ്‌സ് വിദ്യാലയങ്ങളുടെ പങ്കിനെയും അദ്ദേഹം പ്രശംസിച്ചു. ജില്ലാ കളക്ടര്‍ എസ് പ്രേം കൃഷ്ണന്‍ അധ്യക്ഷത വഹിച്ചു. പരിമിതിക്കുള്ളില്‍ നിന്ന് ഉന്നത വിജയം നേടിയ കുട്ടികളെ ചേര്‍ത്തു പിടിക്കണമെന്ന ആശയത്തില്‍ നിന്നാണ് അവാര്‍ഡിന് തുടക്കമായതെന്ന് അദ്ദേഹം പറഞ്ഞു. പൊതുവിദ്യാഭ്യാസ, സാമൂഹിക നീതി വകുപ്പുകള്‍ ചേര്‍ന്നാണ് പരിപാടി സംഘടിപ്പിച്ചത്. ഓമല്ലൂര്‍ ഗ്രാമപഞ്ചായത്ത് പ്രസിഡന്‍റ് ജോണ്‍സണ്‍ വിളവിനാൽ, തിരുവല്ല സബ് കളക്ടര്‍ സുമിത് കുമാര്‍ ഠാക്കൂർ, ജില്ലാ വിദ്യാഭ്യാസ ഉപഡയറക്ടര്‍ ബി. ആർ. അനില, ജില്ലാ സാമൂഹിക നീതി ഓഫീസര്‍ ജെ. ഷംലാബീഗം തുടങ്ങിയവര്‍ പ്രസംഗിച്ചു.

ആരോഗ്യ മേഖലയുടെ കരുത്ത് എന്‍എച്ച്എം ഫണ്ട്

പത്തനംതിട്ട: കോടി കണക്കിനു രൂപയുടെ വികസന നേട്ടങ്ങള്‍ അവകാശപ്പെടുമ്പോഴും ആരോഗ്യ മേഖലയുടെ കരുത്ത് എന്‍എച്ച്എം ഫണ്ട്. പത്തനംതിട്ട ജനറല്‍ ആശുപത്രി, കോന്നി മെഡിക്കല്‍ കോളജ് എന്നിവിടങ്ങളിലെ നിര്‍മാണ പ്രവര്‍ത്തനങ്ങള്‍ ദേശീയാരോഗ്യ ദൗത്യം മുഖേനയുള്ള കേന്ദ്രഫണ്ട് ഉപയോഗപ്പെടുത്തിയാണ്. കേന്ദ്രഫണ്ട് ലഭ്യതയ്ക്കായി ആശുപത്രിയുടെ ബോര്‍ഡുകള്‍ മാറ്റണമെന്നതടക്കമുള്ള നിര്‍ദേശം പാലിക്കപ്പെടാതെ വന്നതോടെ ഇടയ്ക്കു ഫണ്ടിന്‍റെ ലഭ്യതയില്‍ കുറവുണ്ടായെങ്കിലും ഇപ്പോള്‍ ഗ്രാമീണ മേഖല തൊട്ട് പൊതുജനാരോഗ്യ പ്രവര്‍ത്തനത്തിനു പണം ലഭ്യമാകുന്നുണ്ട്. സിഎച്ച്‌സികളുടെയടക്കം നവീകരണം ഇതുപയോഗപ്പെടുത്തി നടന്നുവരികയാണ്. പത്തനംതിട്ട ജനറല്‍ ആശുപത്രിയിലെ ക്രിട്ടിക്കല്‍ കെയര്‍ യൂണിറ്റ് നിര്‍മാണം പൂര്‍ണമായി എന്‍എച്ച്എം ഫണ്ടില്‍ നിന്നാണ്. ബി ആന്‍ഡ് സി ബ്ലോക്കിന്‍റെ അറ്റകുറ്റപ്പണികള്‍ക്ക് 5.5 കോടി രൂപയുടെ ഫണ്ടും എന്‍എച്ച്എമ്മിന്‍റെതാണ്. ബി ആന്‍ഡ് സി ബ്ലോക്കില്‍ സാധനങ്ങള്‍ താഴെയിറക്കാന്‍ എട്ടുലക്ഷം രൂപയും എന്‍എച്ച്എം നല്‍കും. 970 കോടി രൂപ ജില്ലയില്‍ കഴിഞ്ഞ ഒമ്പതു വര്‍ഷത്തിനുള്ളില്‍ ജില്ലയിലെ ആരോഗ്യമേഖലയില്‍ ചെലവഴിച്ചതായാണ് സിപിഎം കണക്ക്. ഇതില്‍ 60 ശതമാനത്തിലേറെ തുകയും കേന്ദ്രഫണ്ടില്‍ നിന്നാണ്. കോന്നി മെഡിക്കല്‍ കോളജിലെ ഒന്നും രണ്ടും ഘട്ട നിര്‍മാണാവശ്യത്തിനു ചെലവഴിച്ച തുകയില്‍ ഏറിയ പങ്കും എന്‍എച്ച്എം ഫണ്ടില്‍ നിന്നായിരുന്നു. ബി ആന്‍ഡ് സി ബ്ലോക്ക് നവീകരണം ഡിസംബറോടെ പൂര്‍ത്തിയാകും ജനറല്‍ ആശുപത്രിയിലെ ബി ആന്‍ഡ് സി ബ്ലോക്ക് നവീകരണം ഡിസംബറോടെ പൂര്‍ത്തിയാക്കണമെന്നാണ് കരാർ. സര്‍ക്കാര്‍ ഏജന്‍സിയായ ഇന്‍കെലിനെയാണ് നവീകരണ ജോലികള്‍ക്ക് ചുമതലപ്പെടുത്തിയിരിക്കുന്നത്. ഊരാളുങ്കല്‍ ലേബര്‍ സൊസൈറ്റിയെയാണ് പണികള്‍ ഏല്പിച്ചിരിക്കുകയാണ്. 21 ന് പണികള്‍ ആരംഭിക്കാനുള്ള ക്രമീകരണമാണ് ചെയ്തിരിക്കുന്നതെന്ന് പറയുന്നു. ഇതിനു മുമ്പായി ആശുപത്രി ഉപകരണങ്ങള്‍ അടക്കം താഴെ എത്തിക്കേണ്ടതുണ്ട്. ഇതിനായി തകരാറിലായിരുന്ന ലിഫ്റ്റ് പ്രവര്‍ത്തന സജ്ജമാക്കി വരികയാണ്. 17 വര്‍ഷം മുമ്പ് നിര്‍മിച്ച ബി ആന്‍ഡ് സി ബ്ലോക്ക് ഗുരുതരമായ പ്രശ്നങ്ങളാണ് നേരിടുന്നത്. നിര്‍മാണം പൂര്‍ത്തിയായി അധികകാലം കഴിയുന്നതിനു മുന്പേ പ്രശ്നങ്ങള്‍ ഉടലെടുത്തിരുന്നു. ചോര്‍ച്ചയും ഡ്രെയിനേജ് വിഷയങ്ങളും ശൗചാലയത്തിന്‍റെ തകരാറുകളുമെല്ലാം പ്രശ്നങ്ങളായി. ഏറ്റവുമൊടുവില്‍ ചോര്‍ച്ച അസഹ്യമാകുകയും വാര്‍ഡുകള്‍ പ്രവര്‍ത്തിക്കാന്‍ തന്നെ ബുദ്ധിമുട്ടാകുകയും ചെയ്ത സാഹചര്യത്തിലാണ് അടിയന്തര അറ്റകുറ്റപ്പണി നിര്‍ദേശിച്ചത്. നിലവിലെ ആശുപത്രി സംവിധാനങ്ങള്‍ പ്രധാനമായും സ്ഥിതി ചെയ്യുന്നത് ഈ കെട്ടിടത്തിലാണ്. കെട്ടിടത്തിന്‍റെ ലിഫ്റ്റ് മാസങ്ങളായി തകരാറിലാണ്. ഇതു പ്രവര്‍ത്തിക്കുന്പോള്‍ കെട്ടിടം കുലുങ്ങുന്നതും കോണ്‍ക്രീറ്റ് അടര്‍ന്നു വീഴുന്നതുമായ പ്രശ്നങ്ങളുണ്ടായി. ആശുപത്രി വളപ്പില്‍ പുതിയ ഒപി ബ്ലോക്കിനായി പൈലിംഗ് ജോലികള്‍ ആരംഭിച്ചതോടെ ബി ആന്‍ഡ് സി ബ്ലോക്കിന്‍റെ സ്ഥിതി കൂടുതല്‍ ശോചനീയമായി. അപകടകരമായ സാഹചര്യം ബോധ്യപ്പെട്ടിട്ടും ബ്ലോക്കിലെ സംവിധാനങ്ങള്‍ നിര്‍ത്തിവയ്ക്കാനുള്ള ഉത്തരവ് പുറത്തിറങ്ങാന്‍ ഇപ്പോഴും കാലതാമസം നേരിടുകയാണ്. നിര്‍മാണത്തിലെ പിഴവുകളാണ് കെട്ടിടത്തിന്‍റെ തകര്‍ച്ചയ്ക്കു കാരണമായത്. കെട്ടിടത്തിനു ചോര്‍ച്ച ഉണ്ടാകാന്‍ തുടങ്ങിയിട്ട് വര്‍ഷങ്ങളായി. ഇടയ്ക്ക് അറ്റകുറ്റപ്പണികള്‍ നടത്തിയെങ്കിലും ഫലപ്രദമായില്ല. മലിനജലം രോഗികളെ കിടത്തിയിരിക്കുന്ന വാര്‍ഡുകളിലേക്കാണ് വീണിരുന്നത്.

വിഷാംശമുള്ള കാലിത്തീറ്റ ഇറക്കുമതി ചെയ്താൽ കർശന നടപടി: മന്ത്രി ചിഞ്ചുറാണി

കുന്നന്താനം: കാലിത്തീറ്റയുടെ ഗുണനിലവാരം ഉറപ്പാക്കാനുള്ള ചട്ടം ഉടൻ പ്രസിദ്ധികരിക്കുമെന്നും വിഷാംശമുള്ള കാലിത്തീറ്റ ഇറക്കുമതി ചെയ്യുന്നവർക്കെതിരേ കർശന നടപടി ഉണ്ടാകുമെന്നും മന്ത്രി ജെ. ചിഞ്ചുറാണി. കുന്നന്താനം മൃഗാശുപത്രിയുടെ പുതിയ കെട്ടിടത്തിന്‍റെ നിർമാണോദ്ഘാടനം നിർവഹിച്ചു പ്രസംഗിക്കുകയായിരുന്നു മന്ത്രി. മൃഗാശുപത്രിക്ക് സ്വന്തം കെട്ടിടമില്ലാത്തയിടത്ത് പഞ്ചായത്തുകൾ സ്ഥലം കണ്ടെത്തിയാൽ നിർമാണത്തിന് വകുപ്പ് ഫണ്ട് നൽകും. ക്ഷീരകർഷകരുടെ വികസനത്തിനായി നിരവധി പദ്ധതികളാണ് സംസ്ഥാന സർക്കാർ നടപ്പാക്കുന്നതെന്ന് മന്ത്രി പറഞ്ഞു. സംസ്ഥാനത്ത് പാലിന്‍റെ ആഭ്യന്തര ഉത്പാദനത്തിൽ വലിയ വർധനയുണ്ട്. മിൽമയ്ക്ക് ലഭിക്കുന്ന ലാഭത്തിൽനിന്ന് ക്ഷീരസംഘങ്ങൾവഴി വ്യത്യസ്തമായ ആനുകുല്യങ്ങൾ കർഷകർക്ക് നൽകുന്നുണ്ടെന്നും ചിഞ്ചുറാണി ചൂണ്ടിക്കാട്ടി. മാത്യു ടി. തോമസ് എംഎൽഎ അധ്യക്ഷത വഹിച്ചു. ജില്ലാ മൃഗസംരക്ഷണ ഓഫീസർ ഡോ. എസ് സന്തോഷ്‌ പദ്ധതി വിശദീകരിച്ചു. മൃഗസംരക്ഷണ വകുപ്പ് അനുവദിച്ച 60 ലക്ഷം രൂപയിലാണ് പുതിയ കെട്ടിടത്തിന്‍റെ നിർമാണം. മല്ലപ്പള്ളി ബ്ലോക്ക് പഞ്ചായത്ത് പ്രസിഡന്‍റ് ബാബു കൂടത്തിൽ, കുന്നന്താനം ഗ്രാമപഞ്ചായത്ത് പ്രസിഡന്‍റ് ശ്രീദേവി സതീഷ് ബാബു, ജില്ലാ പഞ്ചായത്തംഗം സി.കെ. ലതാകുമാരി, മല്ലപ്പള്ളി ബ്ലോക്ക് പഞ്ചായത്ത് ആരോഗ്യ വിദ്യാഭ്യാസ സ്ഥിരം സമിതി അധ്യക്ഷൻ സി.എൻ. മോഹനൻ, കുന്നന്താനം ഗ്രാമപഞ്ചായത്ത് വൈസ് പ്രസിഡന്‍റ് പ്രഫ. എം.കെ. മധുസൂദനൻ നായർ, സ്ഥിരം സമിതി അധ്യക്ഷരായ വി.എസ്. ഈശ്വരി, വി.സി. മാത്യു, മിനി ജനാർദനൻ, കുന്നന്താനം മൃഗാശുപത്രി സർജൻ ഡോ. പ്രീതി മേരി ഏബ്രഹാം തുടങ്ങിയവർ പ്രസംഗിച്ചു.

പെരുന്തേനരുവിയുടെ മനോഹാരിത അടുത്തറിയാൻ ഗ്ലാസ് ബ്രിഡ്ജ് സ്ഥാപിക്കും

റാന്നി: പെരുന്തേനരുവി ടൂറിസം പദ്ധതിക്ക് പുതിയ മാനം നൽകുന്ന ഗ്ലാസ് ബ്രിഡ്ജിനുള്ള വിശദമായ പദ്ധതി രൂപരേഖ തയാറായി വരികയാണെന്ന് പ്രമോദ് നാരായൺ എംഎൽഎ. പുതിയ ഗ്ലാസ് പാലം ഉൾപ്പെടെയുള്ള ടൂറിസം പദ്ധതികൾക്ക് ഏഴുകോടി രൂപയാണ് സംസ്ഥാന സർക്കാർ നീക്കി‌വച്ചിരിക്കുന്നത്. നവകേരള സദസിൽ പ്രമോദ് നാരായൺ എംഎൽഎ മുഖ്യമന്ത്രി പിണറായി വിജയനു നൽകിയ ശിപാർശയുടെ അടിസ്ഥാനത്തിലാണ് പുതിയ പദ്ധതിക്ക് തുക അനുവദിച്ചിരിക്കുന്നത്. വെള്ളച്ചാട്ടത്തിന്‍റെയും പാറക്കെട്ടുകളിൽ തല്ലിയലച്ചെത്തുന്ന വെള്ളത്തിന്‍റെയും മനോഹാരിത ഭംഗി അടുത്തുനിന്ന് കണ്ട് ആസ്വദിക്കുന്നതിന് പുതിയ ഗ്ലാസ് ബ്രിഡ്ജ് ഏറെ സഹായകമാകും. വെള്ളച്ചാട്ടം കാണാൻ അടുത്തുപോയി പാറക്കെട്ടുകളിൽ വഴുതി വീണ് ഉണ്ടാകുന്ന അപകട മരണങ്ങളും ഇതുവഴി ഒഴിവാക്കാനാകും. ഗ്ലാസ് ബ്രിഡ്ജിലൂടെ വെള്ളച്ചാട്ടത്തിന് മുകളിലൂടെ പമ്പാനദിക്ക് മറുകരയിലേക്കുളള യാത്ര സാഹസികവും നവ്യവുമാകും. ഇത് അനുഭവിച്ചറിയാൻ ധാരാളം പേർ പെരുന്തേനരുവിയിലേക്ക് ഒഴുകി എത്തും. ഇത് നാറാണംമൂഴി, വെച്ചൂച്ചിറ പഞ്ചായത്തുകളുടെ ടൂറിസം പദ്ധതികൾക്ക് പുതിയ മാനം സൃഷ്ടിക്കുമെന്ന് എംഎൽഎ പറഞ്ഞു. ഇതോടൊപ്പം വെച്ചൂച്ചിറ, നാറാണംമൂഴി പഞ്ചായത്തുകളുടെ കരകളിൽ കുട്ടികളുടെ പാർക്ക്, സവിശേഷതയുള്ള ശില്പങ്ങൾ, കഫ്റ്റേരിയ എന്നിവ സജ്ജമാക്കും. ഇതിനായി സ്ഥലം ലഭ്യമാക്കുന്നതിന് പഞ്ചായത്തിനോടും മേജർ ഇറിഗേഷൻ റവന്യൂ വകുപ്പ് അധികൃതരോടും ആവശ്യപ്പെട്ടിട്ടുണ്ട്. ഇവിടെയെത്തുന്ന സഞ്ചാരികളുടെ സുരക്ഷിതത്വത്തിനുള്ള നടപടികളും പദ്ധതി വിഭാവനം ചെയ്തിട്ടുണ്ട്. നദിയുടെ മധ്യത്തിലുള്ള തുരുത്ത് റവന്യൂ വകുപ്പ് വിട്ടു നൽകുകയാണെങ്കിൽ അവിടെയും മനോഹരമായ പാർക്ക് നിർമിക്കും. രണ്ടാംഘട്ടത്തിൽ ലൈറ്റ് ആൻഡ് സൗണ്ട് ഉൾപ്പെടെയുള്ള വിനോദോപാധികൾ ഏർപ്പെടുത്താനും ആലോചനയുണ്ട്. ടൂറിസം വകുപ്പിന്‍റെ ആർക്കിടെക്കിന്‍റെ നേതൃത്വത്തിലാണ് ഡിപിആർ തയാറാക്കുന്നത്. പഞ്ചായത്ത് പ്രസിഡന്‍റുമാരായ ഇ.വി. വർക്കി, സോണിയ മനോജ്, വൈസ് പ്രസിഡന്‍റ് പൊന്നമ്മ ചാക്കോ, ഗ്രേസി തോമസ്, സിറിയക് തോമസ്, എസ്. രമാദേവി, ടി. കെ. ജയിംസ്, ആർ .വരദരാജൻ എന്നിവരും ഉദ്യോഗസ്ഥരോടൊപ്പം ചർച്ചയിൽ പങ്കെടുത്തു.

കെഐപി കനാലില്‍ ശൗചാലയ മാലിന്യം തള്ളി

ഏഴംകുളം: ഏഴംകുളം - കൈപ്പട്ടൂര്‍ റോഡില്‍ പുതുതായി പണികഴിപ്പിച്ച പാലത്തിനു സമീപം കക്കൂസ് മാലിന്യം കെഐപി കനാലിലേക്ക് നിക്ഷേപിച്ചു. ഇന്നലെ പുലര്‍ച്ചെ മൂന്നോടെ ടാങ്കര്‍ ലോറിയിലാണ് മാലിന്യം കൊണ്ടുവന്നത്. കക്കൂസ് മാലിന്യം കനാലിലേക്ക് പമ്പ് ചെയ്യുകയാണുണ്ടായത്. ശബ്ദം കേട്ട് സമീപവാസി ഗേറ്റ് തുറന്നു റോഡിലേക്ക് ഇറങ്ങാന്‍ ശ്രമിക്കുന്നതിനിടയില്‍ ലോറിയുമായി കടന്നുകളഞ്ഞു. റോഡിലുള്ള സിസിടിവി ദൃശ്യങ്ങളില്‍ മാലിന്യവുമായി വന്ന ലോറിയും കാണാം. കക്കൂസ് മാലിന്യത്തിന്‍റെ രൂക്ഷമായ ദുര്‍ഗന്ധം മൂലം സമീപവാസികള്‍ വലയുകയാണ്. സംഭവവുമായി ബന്ധപ്പെട്ട് വിശദമായ അന്വേഷണത്തിനു പോലീസില്‍ പരാതി നല്‍കുമെന്ന് വാര്‍ഡ് മെംബര്‍ എസ്. ഷീജ അറിയിച്ചു.

68 ലക്ഷം രൂപയുടെ ഭരണാനുമതി

തിരുവല്ല: നിയോജകമണ്ഡലത്തിലെ വിവിധ പദ്ധതികള്‍ക്കായി എംഎല്‍എ ഫണ്ടില്‍ നിന്ന് 68 ലക്ഷം രൂപയുടെ ഭരണാനുമതി ലഭിച്ചതായി മാത്യു ടി. തോമസ് എംഎല്‍എ അറിയിച്ചു. കുന്നന്താനം പഞ്ചായത്തിലെ കനകക്കുന്ന് - ഇളംകുറ്റില്‍പടി റോഡ് (രണ്ട് ലക്ഷം), വേലൂര്‍ - ചക്കുംമൂട്ടില്‍ റോഡ് (ഒമ്പത് ലക്ഷം), കല്ലൂപ്പാറ പഞ്ചായത്തിലെ പതിനൊന്നാം വാര്‍ഡിലെ 28 നമ്പര്‍ അങ്കണവാടിക്ക് പുതിയ കെട്ടിടം നിര്‍മിക്കുന്നതിന് 20 ലക്ഷം, ചിറയില്‍പ്പടി നാല്‍പ്പനാ റോഡ് (അഞ്ച്‌ലക്ഷം, പുറമറ്റം പഞ്ചായത്തിലെ കോഴിമുള്ളില്‍ കരിമ്പനാല്‍ റോഡ് (12 ലക്ഷം), കവിയൂര്‍ പഞ്ചായത്തിലെ കോട്ടമുണ്ടകം ചക്കാലപ്പടി റോഡ് (് 15 ലക്ഷം) മല്ലപ്പള്ളി പഞ്ചായത്തിലെ കോലമല കുന്നേല്‍പ്പടി റോഡ് (അഞ്ച്‌ലക്ഷം) എന്നീ പ്രവൃത്തികള്‍ക്കാണ് ഭരണാനുമതി ലഭിച്ചിട്ടുള്ളത്.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]