ADVERTISEMENT

ADVERTISEMENT

പ്ലസ് ടു വിദ്യാര്‍ഥിനി കിടപ്പുമുറിയില്‍ മരിച്ചനിലയില്‍

കോഴിക്കോട്: പ്ലസ് ടു വിദ്യാര്‍ഥിനിയെ കിടപ്പുമുറിയില്‍ മരിച്ചനിലയില്‍ കണ്ടെത്തി. മുക്കം കാരശേരി പഞ്ചായത്തിലെ കൊടിയത്തൂര്‍ ഗോതമ്പ് റോഡ് സ്വദേശിയായ ജയപ്രകാശിന്‍റെ മകള്‍ അനന്യ(17)യാണ് മരിച്ചത്. മുറിയില്‍ തൂങ്ങിയ നിലയിലായിരുന്നു മൃതദേഹം. ആത്മഹത്യയാണെന്നു സംശയിക്കുന്നു. തോട്ടുമുക്കം സെന്‍റ്തോമസ് ഹയര്‍സെക്കന്‍ഡറി സ്‌കൂളിലെ വിദ്യാര്‍ഥിനിയായിരുന്നു. മുക്കം പോലീസ് അസ്വാഭാവിക മരണത്തിന് കേസെടുത്തു.

ADVERTISEMENT

കാലവര്‍ഷം വിനയായി; കല്ലായി പുഴയുടെ ചളി നീക്കല്‍ പ്രവൃത്തികള്‍ നീണ്ടുപോകും

കോഴിക്കോട്: കാലവര്‍ഷം നേരത്തെ എത്തുകയും പുഴകളില്‍ വെള്ളം നിറയുകയും ചെയ്തതോടെ കല്ലായി പുഴയുടെ ചളി നീക്കല്‍ പ്രവര്‍ത്തികള്‍ നീണ്ടുപോകും.ഇനി സെപ്റ്റംബർ 15 നു ശേഷമേ പ്രവൃത്തി പുനരാരംഭിക്കുകയുള്ളൂ. നേരത്തേ പ്രഖ്യാപിച്ചിരുന്നതു പോലെ കരാർ ഒപ്പിട്ട് ഒരു വർഷത്തിനകം പ്രവൃത്തി പൂർത്തിയാക്കാനാകാത്ത അവസ്ഥയിലാണ്.കാലവർഷം കാരണം മേയ് 15 മുതൽ സെപ്റ്റംബർ 15 വരെ ഇത്തരത്തിലുള്ള പ്രവൃത്തികൾ എടുക്കുന്നത് നിരോധിച്ചതാണ്. എന്നാൽ ഇതു വകവയ്ക്കാതെ മേയ് 15 നു ശേഷവും പ്രവൃത്തി തുടർന്നിരുന്നെങ്കിലും മഴ ശക്തമായതോടെയാണ് പ്രവൃത്തി നിർത്തിവച്ച് ബാർജ് ബേപ്പൂർ തുറമുഖത്തേക്ക് മാറ്റിയത്.അതേസമയം പ്രവൃത്തി ഇഴഞ്ഞു നീങ്ങുകയായിരുന്നെന്ന് കല്ലായ് പുഴ സംരക്ഷണ സമിതി കുറ്റപ്പെടുത്തി. പ്രവൃത്തി തുടങ്ങി 3 മാസം പിന്നിട്ടിട്ടും 200 മീറ്റർ പോലും ചെളിയും മാലിന്യങ്ങളും നീക്കം ചെയ്യാൻ കരാറുകാരനു സാധിച്ചിട്ടില്ല. തുടക്കം മുതലേ കല്ലായി പുഴ ആഴം കൂട്ടലുമായി ബന്ധപ്പെട്ട് തടസങ്ങള്‍ ഏറെയായിരുന്നു.ഒന്നര മാസത്തിനകം സർവേ പൂർത്തിയാക്കാനായിരുന്നു ഉദ്ദേശിച്ചതെങ്കിലും ചെളി കെട്ടിക്കിടക്കുന്ന പുഴയിൽ സർവേ നടത്തുകയെന്നത് ഏറെ ശ്രമകരമായിരുന്നു. ഏതാണ്ട് രണ്ടര മാസമെടുത്താണ് സർവേ പൂർത്തിയായത്. എസ്റ്റിമേറ്റ് പ്രകാരം 3.29 ലക്ഷം ക്യുബിക് മീറ്റർ ചെളിയാണ് നീക്കേണ്ടത്. രണ്ട് പ്രളയങ്ങൾക്കു മുൻപുള്ള കണക്കായതിനാലാണ് വീണ്ടും ഇറിഗേഷന്റെ നേതൃത്വത്തിൽ സർവേ നടത്തിയത്. അതിനേക്കാൾ കൂടുതൽ ചെളി മാറ്റാനുണ്ടാകുമെന്നാണ് കരുതുന്നത്. ചെളി നീക്കി മൂന്നര മുതൽ 5 കിലോമീറ്റർ വരെ അകലെ കടലിൽ തള്ളാനായിരുന്നു തീരുമാനം. സ്വന്തം ലേഖകന്‍

യുവാവിനെ തട്ടിക്കൊണ്ടുപോയ കേസ് രണ്ടുപേർ കൂടി അറസ്റ്റില്‍

കോഴിക്കോട്: കൊടുവള്ളിയില്‍നിന്ന് അന്നൂസ് റോഷന്‍ എന്ന യുവാവിനെ തട്ടിക്കൊണ്ടുപോയി മൂന്ന് ദിവസത്തിനുശേഷം കാറില്‍ ഇറക്കിവിട്ട കേസില്‍ സംഘത്തിലെ രണ്ടുപേര്‍ പിടിയില്‍. യുവാവിനെ തട്ടിക്കൊണ്ടുപോകാനായി വീട്ടില്‍ ബൈക്കിലെത്തെിയ രണ്ടുപേരില്‍ ഒരാളായ കൊണ്ടോട്ടി സ്വദേശി മുഹമ്മദ് നിയാസ്, പ്രതികള്‍ക്ക് ഒളിവില്‍ കഴിയാന്‍ സൗകര്യമൊരുക്കിയ നിയാസിന്‍റെ സഹോദരി ഭര്‍ത്താവ് ഷഫീഖ് എന്നിവരാണ് പിടിയിലായത്. ഇതോടെകേസില്‍ അറസ്റ്റിലായവരുടെ എണ്ണം അഞ്ചായി.കര്‍ണാടകയില്‍നിന്ന് കോഴിക്കോട്ടേക്ക് വരുന്ന വഴി കല്‍പറ്റയില്‍ നിന്നുമാണ് മുഹമ്മദ് നിയാസിനെ പോലീസ് പിടികൂടിയത്. കൊടുവള്ളി ഇന്‍സ്പെക്ടര്‍ അഭിലാഷിന്‍റെ നേതൃത്വത്തിലുള്ള സംഘമാണ് പ്രതിയെ പിടികൂടിയത്.ഇയാളില്‍ നിന്നും ലഭിച്ച വിവരത്തിന്‍റെ അടിസ്ഥാനത്തിലാണ് ഷഫീഖ് പിടിയിലായത്. ജ്യേഷ്ഠന്‍റെ വിദേശത്തെ സാമ്പത്തിക ഇടപാടിന്‍റെ പേരിലുള്ള തര്‍ക്കത്തെത്തുടര്‍ന്നാണ് കൊടുവള്ളിക്കടുത്ത് കിഴക്കോത്ത് പരപ്പാറ ആയിക്കോട്ടില്‍ അബ്ദുല്‍ റഷീദിന്‍റെ മകന്‍ അന്നൂസ് റോഷനെ (21) അഞ്ചുദിവസം ബന്ദിയാക്കിയത്. തട്ടിക്കൊണ്ടുപോയ അന്നൂസിനെ ആദ്യം കൊണ്ടോട്ടിയിലെത്തിക്കുകയും പിന്നീട് രണ്ടാംദിവസം മൈസൂരുവിലെ ഉള്‍പ്രദേശത്തെ ഒരു കെട്ടിടമുറിയില്‍ തടങ്കലിലാക്കുകയുമായിരുന്നു.പിന്നീട് അന്നൂസിനെ മുറിയില്‍നിന്ന് പുറത്തിറക്കി മൈസൂരുവില്‍നിന്ന് പെരിന്തല്‍മണ്ണയിലേക്ക് ടാക്‌സിയില്‍ കൊണ്ടുന്നു.രണ്ടുപേര്‍ കാറില്‍ ഒപ്പമുണ്ടായിരുന്നു. കോയമ്പത്തൂര്‍ കഴിഞ്ഞ് കേരള അതിര്‍ത്തിയെത്തുന്നതിനു മുന്‍പേ ഇവർ ഇരുവരും കാറില്‍നിന്നിറങ്ങി. കാര്‍ കോയമ്പത്തൂരിലെത്തിയപ്പോഴേക്കും സൂചന ലഭിച്ച പ്രത്യേക അന്വേഷണസംഘം കൊണ്ടോട്ടിക്കും മോങ്ങത്തിനുമിടയില്‍വെച്ച് കാര്‍ തടഞ്ഞ് അന്നൂസിനെ കണ്ടെത്തുകയായിരുന്നു. കാറോടിച്ച കര്‍ണാടക സ്വദേശിക്ക് സംഭവത്തില്‍ പങ്കില്ലെന്നുകണ്ടതോടെ ചോദ്യംചെയ്തശേഷം വിട്ടയച്ചിരുന്നു.

വൻമരം കടപുഴകി വാഹനത്തിന് മുകളിലേക്ക് വീണു

കൊയിലാണ്ടി: ദേശീയ പാതയിൽ അരങ്ങാടത്ത് വൻമരം കടപുഴകി കാറിനും സ്‌കൂട്ടറിനും മുകളിലേക്ക് വീണു. യാത്രക്കാര്‍ സാരമായി പരിക്കേല്‍ക്കാതെ രക്ഷപ്പെട്ടു. ഇന്നലെ രാവിലെ 7.30 ഓടെ ആന്തട്ട സ്കൂളിനു സമീപമായിരുന്നു സംഭവം. രാവിലെ മരം അൽപം ചരിഞ്ഞ് നിൽക്കുന്നത് നാട്ടുകാരുടെശ്രദ്ധയിൽപ്പെട്ടിരുന്നു. തുടർന്ന് പെട്ടെന്നാണ് കൊമ്പ് പൊട്ടിവീണത്. അത് വഴി മറ്റ് വാഹനങ്ങൾ ഇല്ലാത്തതിനാൽ വൻ അപകടം ഒഴിവായി. മരത്തിനടിയിൽപ്പെട്ട കാറിലെ യാത്രകാരനെ നാട്ടുകാരാണ് യാതൊരു പരിക്കുമില്ലാതെ പുറത്തെടുത്തത്. പരിക്കേറ്റ സ്കൂട്ടർ യാത്രകാരൻ വിയ്യൂർ സ്വദേശി പ്രബീഷിനെ താലുക്ക് ആശുപത്രിയിൽ പ്രവേശിപ്പിച്ചു. ദേശീയ പാതയിലെ ഗതാഗതം ബൈപാസിലൂടെ തിരിച്ചു വിട്ടു. നാട്ടുകാരും അഗ്നി രക്ഷാ സേന യും ചേർന്ന് 10 മണിയോടെ. മരം മുറിച്ചു നീക്കി. പോലീസും സ്ഥലത്തുണ്ടായിരുന്നു.

ദേശീയപാത നിര്‍മാണം: സര്‍വീസ് റോഡിനും വേണം സുരക്ഷ

കോഴിക്കോട്: രാമനാട്ടുകര-വെങ്ങളം ദേശീയപാതയില്‍ നവീകരണത്തിന്‍റെ ഭാഗമായുള്ള സര്‍വീസ് റോഡുകളുടെ നിര്‍മാണത്തില്‍ വ്യാപക പരാതി. പലയിടത്തും ദേശീയപാതയില്‍ നിന്നും കുത്തി ഒലിച്ചുവരുന്ന വെള്ളം സര്‍വീസ് റോഡിലേക്ക് പതിക്കുന്ന അവസ്ഥയാണ്. ദേശീയപാതയുടെ നിർമാണ പ്രവൃത്തി നടക്കുന്നതിനാൽ നിലവിൽ വാഹനങ്ങൾ കടത്തിവിടുന്നത് സര്‍വീസ് റോഡുകള്‍ വഴിയാണ്. കോഴിക്കോട്, കണ്ണൂർ ഭാഗത്തേക്കുള്ള സർവിസ് റോഡിൽ പലയിടത്തും കാലവർഷത്തിൽ വെള്ളം കെട്ടിക്കിടക്കുന്നതിനാൽ അപകടം പതിയിരിക്കുകയാണ്. സർവിസ് റോഡും ഡ്രെയിനേജും തമ്മിലുള്ള ഉയരവ്യത്യാസം മൂലം പലയിടത്തും അപകടകരമായ സാഹചര്യമാണ്. താഴ്ന്ന പ്രദേശങ്ങളോട് ചേര്‍ന്നാണ് പലയിടത്തും അപ്രോച്ച് റോഡ് നിര്‍മിച്ചിരിക്കുന്നത്.ഇതില്‍ പന്തീരാങ്കാവ് ഭാഗത്ത് തന്നെ നാട്ടുകാരുടെ എതിര്‍പ്പിനെ തുടര്‍ന്ന് രണ്ടുഭാഗത്തേക്കും ഗതാഗതം അനുവദിച്ചിട്ടുണ്ട്. ചെറിയ വീതിയുള്ള റോഡില്‍ രണ്ടുഭാഗത്തേക്കും ഗതാഗതം അനുവദിച്ചത് അപകടത്തിന് കാരണമാകുന്നുണ്ട്.നിർമാണസ്ഥലങ്ങളിൽ വേണ്ടത്ര വെളിച്ചവും മുന്നറിയിപ്പും ഇല്ലാത്തതാണ് അപകടത്തിലേക്കു നയിക്കുന്നത്. ദേശീയപാതയില്‍ പ്രധാനമായും അഞ്ചിടങ്ങളിലാണ് അപ്രോച്ച് റോഡുള്ളത്. ഇവിടങ്ങളില്‍ പലയിടത്തും തിരക്കേറെയാണ്. ആവശ്യത്തിന് സൈന്‍ ബോര്‍ഡുകളും ഇല്ല.പലയിടത്തും അപ്രോച്ച് റോഡ് നിര്‍മാണം അപാകതളെ തുടര്‍ന്നത് തകര്‍ന്നതും വലിയ പ്രതിസന്ധി സൃഷ്ടിച്ചിട്ടുണ്ട്.

മയക്കുമരുന്നുവിറ്റ് വാങ്ങിയ മോട്ടോര്‍ ബൈക്ക് കണ്ടുകെട്ടി

കോഴിക്കോട്: മയക്കുമരുന്ന് വിറ്റ് ലഭിച്ച പണം ഉപയോഗിച്ച് വാങ്ങിയ മോട്ടോര്‍ ബൈക്ക് പിടികൂടി. എറണാകുളം കളമശ്ശേരി സ്വദേശി ചാമപ്പറമ്പിൽ സി.എം. ഷാജിയുടെ വാഹനമാണ് പിടികുടിയത്. കോഴിക്കോട്, എറണാകുളം കേന്ദ്രീകരിച്ച് പ്രവർത്തിക്കുന്ന ലഹരി മാഫിയ സംഘത്തിലെ മുഖ്യ കണ്ണിയാണ് പിടിയിലായ ഷാജി. ആന്ധ്രയിൽ നിന്നും ലഹരി മരുന്ന് കൊണ്ട് വന്ന് ജില്ലയിലെ വിവിധ ഭാഗങ്ങളിലാണ് പ്രതി കഞ്ചാവ് വില്പന നടത്തിയിരുന്നത്. മറ്റു വരുമാനമാർഗങ്ങൾ ഒന്നുമില്ലാത്ത പ്രതി വാഹനം വാങ്ങിയതും ആഡംബരപൂർണമായ ജീവിതം നയിച്ചതും ലഹരി പദാര്‍ഥങ്ങള്‍ വിറ്റുലഭിക്കുന്ന പണം ഉപയോഗിച്ചാണെന്ന് പോലീസ് പറയുന്നു.

കയാക്കിംഗ് പരിശീലനം തുടങ്ങി

കോടഞ്ചേരി: തുഷാരഗിരി അഡ്വഞ്ചർ കയാക്കിംഗ് അക്കാഡമിയുടെ നേതൃത്വത്തിൽ ഈ വർഷത്തെ വൈറ്റ് വാട്ടർ കയാക്കിംഗ് പരിശീലനം ആരംഭിച്ചു. ഇരുവഞ്ഞിപ്പുഴയിൽ ആരംഭിച്ച പരിശീലന ക്യാമ്പ് കോടഞ്ചേരി പഞ്ചായത്ത് പ്രസിഡന്‍റ് അലക്സ് തോമസ് ചെമ്പകശേരി കോച്ച് നിസ്തുൽ ജോസിന് തുഴ നൽകി ഉദ്ഘാടനം ചെയ്തു. തുഷാരഗിരി അഡ്വഞ്ചർ കയാക്കിംഗ് അക്കാഡമി പ്രസിസന്‍റ് പോൾസൺ അറയ്ക്കൽ അധ്യക്ഷത വഹിച്ചു.

കാറും സ്കൂട്ടറും കൂട്ടിയിടിച്ച് മധ്യവയസ്കൻ മരിച്ചു

താമരശേരി: ദേശീയപാതയില്‍ കൈതപ്പൊയിലില്‍ കാറും സ്കൂട്ടറും കൂട്ടിയിടിച്ച് മധ്യവയസ്കൻ മരിച്ചു. കന്നൂട്ടിപ്പാറ പെരിങ്ങോട് മാനു എന്ന കൃഷ്ണൻകുട്ടി (55) ആണ് മരിച്ചത്. നിർമാണ തൊഴിലാളിയായ കൃഷ്ണൻകുട്ടി ബൈക്കിൽ സുഹൃത്തിനൊപ്പം വയനാട്ടിലേക്ക് ജോലിക്ക് പോകവെ ഇന്നലെ രാവിലെയാണ് അപകടം. കാറുമായി കൂട്ടിയിടിച്ച ബൈക്ക് നിയന്ത്രണം വിട്ട് തോട്ടിലേയ്ക്ക് വീഴുകയായിരുന്നു. കൂടെയുണ്ടായിരുന്ന സുഹൃത്ത് ചിങ്ങനാംപൊയിൽ കൂമ്പാറയിൽ മുഹമ്മദലിയെ പരിക്കുകളോടെ കോഴിക്കോട് മെഡിക്കൽ കോളജ് ആശുപത്രിയിൽ പ്രവേശിപ്പിച്ചു. വിജയകുമാരിയാണ് കൃഷ്ണൻകുട്ടിയുടെ ഭാര്യ. മക്കൾ: ഷാനി, ശാഖി. മരുമകൻ: നിധിൻ അടിവാരം. പിതാവ്: പരേതനായ കണ്ടൻ. മാതാവ്: ഉപ്പായി.

ചൂരൽമല നിവാസികൾ വെള്ളാർമല വില്ലേജ് ഓഫീസ് ഉപരോധിച്ചു

മേപ്പാടി: ചൂരൽമല നിവാസികൾ വെള്ളാർമല വില്ലേജ് ഓഫീസ് ഉപരോധിച്ചു. മുണ്ടക്കൈ ഉരുൾപൊട്ടൽ ദുരന്തത്തിന് ശേഷവും ദുരന്ത മേഖലയിൽ താമസിക്കുന്നവരാണ് വില്ലേജ് ഓഫീസ് മണിക്കൂറുകളോളം ഉപരോധിച്ചത്. റീ ബിൽഡ് ചൂരൽമലയുടെ നേതൃത്വത്തിലായിരുന്നു സമരം. സർക്കാർ പ്രഖ്യാപിച്ച ആനുകൂല്യങ്ങൾ ലഭിക്കണമെന്ന ആവശ്യം ഉന്നയിച്ചായിരുന്നു സമരം. ഉരുൾപൊട്ടൽ ദുരന്തം നടന്ന ഉടനെ മേപ്പാടി പഞ്ചായത്തിലെ 10, 11, 12 വാർഡുകൾ ദുരന്ത മേഖലയായി പ്രഖ്യാപിച്ചിരുന്നു. ഓരോ കുടുംബങ്ങൾക്കും മാസം ഒന്പതിനായിരം രൂപ പ്രഖ്യാപിച്ചു. എന്നാൽ ദുരന്തത്തെ തുടർന്ന് പലതരത്തിലുള്ള നഷ്ടങ്ങൾ നേരിട്ട തങ്ങൾക്ക് ഒരു രൂപയുടെ സഹായം പോലും സർക്കാരിൽ നിന്നും ലഭിച്ചിട്ടില്ലെന്നാണ് റീ ബിൽഡ് ചൂരൽമല ആരോപിക്കുന്നത്. പുനരധിവാസ പദ്ധതി നടപ്പാക്കുന്നതിന് ഡോ. ജോണ്‍ മത്തായി അടയാളപ്പെടുത്തിയതിന് പുറത്തായ കുടുംബങ്ങളാണ് സമരവുമായി രംഗത്തെത്തിയത്. ദുരന്തമേഖലയിൽ കഴിയുന്നതിനാൽ ആശങ്കയോടെയാണ് കഴിയുന്നത്. മഴ ശക്തമാകുന്പോൾ വീണ്ടും ഉരുൾപൊട്ടുമോ എന്ന ഭയത്താലാണ് ഇവിടെ താമസിക്കുന്നത്. ദുരന്തത്തെ തുടർന്ന് മൂന്നുമാസത്തോളം ജോലിക്ക് പോലും പോകാൻ കഴിഞ്ഞിരുന്നില്ല. പലർക്കും ജോലി നഷ്ടപ്പെട്ടു. ദുരന്തത്തിനുശേഷം വന്യമൃഗശല്യം രൂക്ഷമാണ്. വാഹന ഗതാഗത സൗകര്യം കുറഞ്ഞു. തങ്ങളെ കൂടി പുനരധിവസിപ്പിക്കാൻ തയാറാകണമെന്നും പ്രദേശവാസികൾ ആവശ്യപ്പെട്ടു. രാവിലെ 10ഓടെ ആരംഭിച്ച സമരം വൈകുന്നേരമാണ് അവസാനിച്ചത്. പ്രശ്നപരിഹാരമായില്ലെങ്കിൽ ശക്തമായ സമരം ആരംഭിക്കുമെന്ന് പ്രദേശവാസികൾ പറഞ്ഞു.

കുരുന്നുകളെ വരവേറ്റ്... വിദ്യാലയങ്ങൾ

സ്വന്തം ലേഖകന്‍ കോഴിക്കോട്: മധുര പലഹാരങ്ങള്‍, വര്‍ണബലുണുകള്‍, തോരണങ്ങള്‍ , ജില്ലയില്‍ അക്ഷരമുറ്റത്തെത്തിയ കുരുന്നുകളെ വരവേറ്റ് സ്‌കൂളുകള്‍... മഴ മാറി നിന്നപ്പോള്‍ ജില്ലയില്‍ പ്രവേശനോല്‍സവത്തിന് വര്‍ണാഭമായ തുടക്കം.പെരിങ്ങൊളം ഗവ. ഹയര്‍ സെക്കന്‍ഡറി സ്‌കൂളിലായിരുന്നു ജില്ലാതല പ്രവേശനോല്‍സവം. മാനവികതയും പൗരബോധവും ഉള്‍പ്പെടുത്തിയുള്ള പാഠ്യപദ്ധതിയാണ് സംസ്ഥാനത്ത് ഇത്തവണ നടപ്പാക്കുന്നതെന്ന് പ്രവേശനോല്‍സവം ഉദ്ഘാടനം ചെയ്ത മന്ത്രി പി.എ. മുഹമ്മദ് റിയാസ് പറഞ്ഞു. വിദ്യാലയങ്ങളില്‍ രണ്ടാഴ്ചത്തേക്ക് ഒരു ദിവസം ഒരു മണിക്കൂര്‍ പൗരബോധം വളര്‍ത്തുന്ന ക്ലാസുകള്‍ നല്‍കാന്‍ സര്‍ക്കാര്‍ തീരുമാനിച്ചിരിക്കുകയാണ്. അതിനൊപ്പം സൂംബ ഡാന്‍സ് സ്‌കൂള്‍ പഠനത്തിന്‍റെ ഭാഗമാക്കും. കായികക്ഷമത വര്‍ധിപ്പിക്കുക, മാനസികോല്ലാസം നല്‍കുക എന്നീ ലക്ഷ്യത്തോടെ സൂംബ ഡാന്‍സും പഠനത്തിന്‍റെ ഭാഗമാകുമ്പോള്‍ ലഹരിക്കെതിരായ പോരാട്ടം കൂടുതല്‍ ശക്തമാകും. സമഗ്ര ഗുണമേന്മാ വര്‍ഷമായി ഇത്തവണത്ത അധ്യയന വര്‍ഷത്തെ പരിഗണിക്കുന്നുണ്ട്. ഓരോ ക്ലാസിലെയും കുട്ടികള്‍ നേടേണ്ട അറിവും കഴിവും അതത് ക്ലാസില്‍ വെച്ച് നേടിയെന്ന് ഇതിലൂടെ ഉറപ്പാക്കും. ഓരോ ഘട്ടത്തിലും കുട്ടിയുടെ പഠനനില മനസ്സിലാക്കുകയും ആവശ്യമായ പിന്തുണ നല്‍കി കുട്ടികളെ പഠനത്തില്‍ മുന്നേറാന്‍ പ്രാപ്തരാക്കുകയുമാണ് പദ്ധതികൊണ്ട് ലക്ഷ്യമിടുന്നതെന്നും മന്ത്രി പറഞ്ഞു. കൂടെയുള്ളവരെ ബഹുമാനിക്കാനും സ്‌നേഹിക്കാനും അവര്‍ക്ക് കൈത്താങ്ങാകാനും അവരെ ഇഷ്ടപ്പെടാനും ഐക്യപ്പെടാനുമെല്ലാം മനസ്സിനെ പരുവപ്പെടുത്തുകയെന്ന വലിയ ഉത്തരവാദിത്തം വിദ്യാലയങ്ങളും വിദ്യാഭ്യാസവും നമുക്ക് നല്‍കുന്നതായും അദ്ദേഹം കൂട്ടിച്ചേര്‍ത്തു. പി.ടി,എ. റഹീം എംഎല്‍എ അധ്യക്ഷത വഹിച്ചു. നവാഗതരായ വിദ്യാര്‍ഥികളെ ജില്ലാ പഞ്ചായത്ത് പ്രസിഡന്‍റ് ഷീജ ശശി വരവേറ്റു. വിദ്യാഭ്യാസ സ്റ്റാന്‍ഡിങ് കമ്മിറ്റി ചെയര്‍പേഴ്‌സണ്‍ നിഷ പുത്തന്‍പുരയില്‍, ഡിഡിഇ സി മനോജ് കുമാര്‍, ജില്ലാ-ബ്ലോക്ക്-ഗ്രാമ പഞ്ചായത്ത് അംഗങ്ങള്‍, മറ്റു ജനപ്രതിനിധികള്‍, ഉദ്യോഗസ്ഥര്‍, അധ്യാപകര്‍ തുടങ്ങിയവര്‍ പങ്കെടുത്തു. പ്രവേശനോത്സവം കളറായി മുക്കം: വൈവിധ്യമാർന്ന പരിപാടികളും സമ്മാനങ്ങളുമായി കൊടിയത്തൂർ പഞ്ചായത്ത് തല പ്രവേശനോത്സവം തോട്ടുമുക്കം ഗവ. യുപി സ്കൂളിൽ നടന്നു. കുഞ്ഞു കൈകളിൽ ബലൂണുകളും തലയിൽ തൊപ്പിയും ധരിച്ച് മധുര പലഹാരങ്ങളും നൽകിയാണ് പുതുതായി സ്കൂളിൽ എത്തിയ കുഞ്ഞുമക്കളെ സ്വീകരിച്ചത്. വിദ്യാർത്ഥികളുടെ വെൽകം ഡാൻസും പരിപാടിക്ക് കൊഴുപ്പേകി.സ്കൂൾ ഓഡിറ്റോറിയത്തിൽ നടന്ന ചടങ്ങിൽ പഞ്ചായത്ത് പ്രസിഡന്‍റ് ദിവ്യ ഷിബു ഉദ്ഘാടനം ചെയ്തു. വിദ്യാഭ്യാസ സ്റ്റാൻഡിംഗ് കമ്മിറ്റി ചെയർപേഴ്സൺ മറിയം കുട്ടി ഹസൻ അധ്യക്ഷയായി. പ്രവേശനോത്സവം വേറിട്ട അനുഭവമായി താമരശേരി: ചമൽ നിർമ്മല എൽപി സ്കൂൾ പ്രവേശനോത്സവം വിദ്യാർഥികൾക്ക് വേറിട്ട അനുഭവമായി. നവാഗതരെ കിരീടം അണിയിച്ച് സമ്മാനങ്ങൾ നൽകി സ്വീകരിച്ചു. കുട്ടികളുടെ വിവിധ കലാപരിപാടികളും നടത്തി.സ്കൂൾ മാനേജർ ഫാ. ജിന്‍റോ വരകിൽ പരിപാടി ഉദ്ഘാടനം ചെയ്തു. പ്രധാനാധ്യാപിക റിൻസി ഷാജു അധ്യക്ഷത വഹിച്ചു. പിടിഎ പ്രസിഡന്‍റ് അഡ്വ. ബിജു കണ്ണന്തറ, രാജിഷ രാജൻ, അലിൻ ലിസ്ബത്ത്, ഗോൾഡ ബിജു, ജദീറ റൗഷൽ, ക്രിസ്റ്റീന വർഗീസ് എന്നിവർ പ്രസംഗിച്ചു. പ്രവേശനോത്സവം നടത്തി ചക്കിട്ടപാറ: നവാഗതരായ കുട്ടികളെ ആനയിച്ച് ചക്കിട്ടപാറ സെന്‍റ് ആന്‍റണീസ് എൽപി സ്കൂളിൽ ഘോഷയാത്ര നടത്തി. തുടർന്നു മാനേജർ ഫാ. പ്രിയേഷ് തേവടിയിൽ പ്രവേശനോത്സവം ഉദ്ഘാടനം ചെയ്തു. വാർഡ് മെമ്പർ ജിതേഷ് മുതുകാട് അധ്യക്ഷത വഹിച്ചു. പ്രധാനാധ്യാപകൻ കെ.ജെ. റോയ് മോൻ, പിടിഎ പ്രസിഡന്‍റ് ജോബി ചുണ്ടയിൽ, എംപിടിഎ പ്രസിഡന്‍റ് മായാ റോബി, അധ്യാപിക പ്രതിനിധി അതുല്യ ജോർജ് എന്നിവർ പ്രസംഗിച്ചു. സ്റ്റാഫ് സെക്രട്ടറി ആൽഫിൻ സി. ബാസ്റ്റ്യൻ, അധ്യാപകരായ അജയ് മാത്യു, അലൻ റോയ്, ഫ്രെഡീന സെബാസ്റ്റ്യൻ, സിസ്റ്റർ ദീപ കെ. മാത്യു, പി. ശിൽപ്പ, ദീപ മാത്യു, മർഫി മാത്യു, ഇ.പി. നുസ്റത്ത് എന്നിവർ നേതൃത്വം നൽകി. അക്ഷരദീപം തെളിയിക്കലും പായസ വിതരണവും ഉണ്ടായിരുന്നു. പ്രവേശനോത്സവം ആഘോഷിച്ചു കൂടരഞ്ഞി: കൂടരഞ്ഞി സെന്‍റ് സെബാസ്റ്റ്യൻസ് എൽപി സ്കൂളിൽ പ്രവേശനോത്സവം വർണാഭമായി ആഘോഷിച്ചു. കളർ ബലൂണുകളും, വർണ്ണ തൊപ്പിയും അണിയിച്ചാണ് വിദ്യാർഥികളെ സ്വീകരിച്ചത്. വാർഡ് മെമ്പർ ജോസ് മോൻ മാവറ ഉദ്ഘാടനം ചെയ്തു. ചടങ്ങിൽ സ്കൂൾ മാനേജർ ഫാ. സെബാസ്റ്റ്യൻ പുരയിടത്തിൽ, സ്കൂൾ ഹെഡ്മിസ്ട്രസ് സോഫിയ, പിടിഎ പ്രസിഡന്‍റ് ബോബി ജോർജ്, എംപിടിഎ പ്രസിഡന്‍റ് ഷബ്ന തേജസ്, അധ്യാപകരായ ഷൈനി, ജസ്റ്റിൻ, സെബിൻ എന്നിവർ പ്രസംഗിച്ചു. കൊച്ചുമിടുക്കികളെ സ്വീകരിച്ച് ഐപാല്‍ കോഴിക്കോട് ∙ നടക്കാവ് ഗവ. ജിഎച്ച്എസ്എസിലേക്ക് ഇന്നു പടികടന്നെത്തുന്ന കൊച്ചുമിടുക്കികളെ സ്വീകരിച്ച് ഐപാല്‍. പ്രവേശനോത്സവത്തിനെത്തിയ കുഞ്ഞുങ്ങളെയെല്ലാം കൈകൊടുത്ത് സ്വീകരിച്ചത് ‘ഐപാൽ’ റോബോട്ടാണ്. തമിഴ്നാട്ടിലെ നീലഗിരി കോളജിലെ കുട്ടികൾ നിർമിച്ച റോബോട്ട് ഇതിനോടകം ശ്രദ്ധേയമാണ്. വയനാട്ടിലെ അമ്പലവയലിൽ നടക്കുന്ന ഫ്ലവർഷോയിൽ കാണികൾക്കൊപ്പം ചുറ്റിക്കറങ്ങി പൂക്കളെക്കുറിച്ച് വിശദീകരിച്ചത് ‘ഐപാൽ’ ആയിരുന്നു.ആവേശം സിനിമയിലെ ‘കലി തുള്ളിയ കാളിതൻ കാലിൽ’ എന്ന പാട്ടിനൊപ്പിച്ച് ആടിക്കളിച്ച് ‘ഐപാൽ’ എടുത്ത റീൽസ് ഇൻസ്റ്റഗ്രാമിൽ വൈറലായിരുന്നു.

ട്രോളിംഗ് നിരോധനത്തിന് ഒരാഴ്ച മാത്രം ; മത്സ്യത്തൊഴിലാളി കുടുംബങ്ങള്‍ കടുത്ത ആശങ്കയിൽ

കോഴിക്കോട്: ട്രോളിംഗ് നിരോധനത്തിന് ഒരാഴ്ച മാത്രം ശേഷിക്കെ തീരപ്രദേശവും മത്സ്യത്തൊഴിലാളി കുടുംബങ്ങളും കടുത്ത ആശങ്കയിൽ. ഒന്നരയാഴ്ചയായി തുടരുന്ന കനത്ത മഴയിൽ കടക്ഷോഭത്തെ തുടർന്ന് മത്സ്യബന്ധനത്തിന് വിലക്കുണ്ടായിരുന്നു. കടൽ ശാന്തമായി തുടങ്ങുമ്പോഴേക്കും ട്രോളിംഗ് നിരോധനവും വരും. രണ്ടുമാസക്കാലം എങ്ങനെ തള്ളിനീക്കുമെന്ന ചോദ്യമാണ് മത്സ്യത്തൊഴിലാളികൾ ഉയർത്തുന്നത്.ജൂൺ ഒൻപതുമുതലാണ് സംസ്ഥാനത്ത് ട്രോളിംഗ് നിരോധനം നിലവിൽവരുന്നത്. 52 ദിവസത്തേക്കുള്ള നിരോധനം ജൂലായ്‌ 31 വരെ തുടരും. കാലാവസ്ഥ മോശമായതിനാൽ വളരെ കുറച്ച് ബോട്ടുകൾ മാത്രമേ കഴിഞ്ഞ ദിവസങ്ങളിൽ കടലിൽ പോയിട്ടുള്ളൂ. ഒരാഴ്ചയിലേറെയായി മത്സ്യത്തൊഴിലാളി കുടുംബങ്ങൾ സാമ്പത്തിക പ്രയാസത്തിലാണ്. ട്രോളിംഗ് കാലത്ത് സംസ്ഥാനത്ത് 3,700-ഓളം പരം ബോട്ടുകളാണ് കരയ്ക്കു കയറ്റുക. ബോട്ടുകളിൽ പോകുന്ന അൻപതിനായിരത്തോളം തൊഴിലാളികൾ തൊഴിൽരഹിതരാകും. അനുബന്ധത്തൊഴിലാളികൾ ഇതിന്റെ നാലിരട്ടി വരും. നിരോധനകാലയളവിനുശേഷം ബോട്ട് കടലിൽ ഇറക്കണമെങ്കിൽ മൂന്നുലക്ഷംമുതൽ നാലുലക്ഷം രൂപവരെ ചെലവുവരും. പുതിയ വല, വല വലിക്കാൻ പുതിയ ബോർഡ്, ബോട്ടിന്റെ പെയിന്റിങ്, അറ്റകുറ്റപ്പണികൾ എന്നിവ ഈ കാലയളവിൽ നടത്തണം. ട്രോളിങ് നിരോധനത്തിനു തൊട്ടുമുൻപുള്ള ദിവസങ്ങളിൽ കിട്ടുന്ന വരുമാനം കരുതിവെച്ചാണ് ഇവർ ഈ ജോലികൾ ചെയ്തിരുന്നത്. എന്നാൽ വരുമാനമില്ലാതെയായത് മത്സ്യത്തൊഴിലാളികളെ വലിയ പ്രതിസന്ധിയിലെത്തിച്ചിട്ടുണ്ട്.ട്രോളിംഗ് നിരോധന കാലയളവ് ശാസ്ത്രീയമായി പരിഷ്കരിക്കണമെന്ന ആവശ്യവും മത്സ്യത്തൊഴിലാളികൾ കാലങ്ങളായി ഉന്നയിക്കുന്നുണ്ട്. നിരോധനകാലം ഡിസംബർ, ജനുവരി, ഫെബ്രുവരി മാസങ്ങളിലേക്ക് മാറ്റണമെന്നാണ് ആവശ്യം. ട്രോൾ ബോട്ടുകളിൽ ഏറ്റവും കൂടുതൽ ചെറുമത്സ്യങ്ങൾ വലയിൽ കുടുങ്ങുന്നത് ഈ കാലയളവിലാണെന്ന് ബോട്ടുടമകൾ പറയുന്നു.ജില്ലയിലെ ആയിരക്കണക്കിന് മത്സ്യത്തൊഴിലാളികളാണുള്ളത്. അനുബന്ധ മേഖലയിലെ തൊഴിലാളികള്‍ വേറെയും. പരമ്പരാഗത വള്ളങ്ങളിലെ മീന്‍പിടിത്തം മാത്രമാണ് ഏക ആശ്രയം. എന്നാൽ കാലവർഷം നേരത്തെ വന്നതോടെ കടലേറ്റം കൂടാനുള്ള സാധ്യത ഏറെയാണ്. പരമ്പരാഗത വള്ളങ്ങള്‍ കടലിലിറക്കാനാവാത്തത് ദുരിതം വര്‍ധിപ്പിക്കും.വറുതിയുടെ നാളുകളിൽ ലഭിക്കേണ്ട പന്നകാല അലവസും ഭൂരിഭാഗം പേർക്കും കിട്ടാറില്ലെന്ന പരാതി വർഷങ്ങളായി ഉയരുന്നുണ്ട്. നാമമാത്രമായ തൊഴിലാളികൾക്ക് മാത്രമാണ് ഇത് ലഭിക്കുന്നത്. യാനങ്ങളിൽ ഉപയോഗിക്കേണ്ട മണ്ണെണ്ണ വില കുതിച്ചുയർന്നതും മത്സ്യബന്ധന മേഖലയ്ക്ക് തിരിച്ചടിയാണ്. മത്സ്യ മേഖലയിലെ പ്രശ്നങ്ങൾ പരിഹരിക്കാൻ സർക്കാർ സത്വര ശ്രദ്ധ ചെലുത്തണമെന്ന് മത്സ്യത്തൊഴിലാളികൾ ആവശ്യപ്പെടുന്നു.

മാവൂരിലെ റോഡ് പുനർനിർമാണം പഞ്ചായത്ത് ഏറ്റെടുക്കണമെന്ന്

കോഴിക്കോട്: മാവുർ പഞ്ചായത്തിലെ 13-ാം വാർഡിൽ മീമുള്ളൻ പാറയ്ക്ക് എതിർവശമുള്ള പഞ്ചായത്ത് റോഡ്, മാവൂർ പഞ്ചായത്ത് രണ്ടുമാസത്തിനകം പുനർനിർമാണം നടത്തി ഗതാഗതയോഗ്യമാക്കണമെന്ന് മനുഷ്യാവകാശ കമ്മീഷൻ ജുഡീഷ്യൽ അംഗം കെ. ബൈജുനാഥ് ഉത്തരവിട്ടു. ജലജീവൻമിഷൻ പദ്ധതി പ്രകാരം കുടിവെള്ളം ലഭിക്കുന്നതിന് വേണ്ടിയാണ് റോഡ് വെട്ടിപൊളിച്ചത്. എന്നാൽ റോഡ് നന്നാക്കിയില്ലെന്നും കുടിവെള്ളം കിട്ടിയില്ലെന്നും നാട്ടുകാർ പരാതിപ്പെട്ടു. ജല അഥോറിറ്റി എക്സിക്യൂട്ടീവ് എൻജിനീയറിൽ നിന്നും കമ്മീഷൻ റിപ്പോർട്ട് വാങ്ങി. മാവൂർ പഞ്ചായത്ത് പ്രസിഡന്‍റിന്‍റെ നിർദ്ദേശപ്രകാരമാണ് പൈപ്പ് ലൈൻ സ്ഥാപിച്ചതെന്നും കൊടിയത്തൂർ പഞ്ചായത്തിൽ നിന്നും ബാക്കി വന്ന പൈപ്പ് ഉപയോഗിച്ച് നടത്തിയ പ്രവൃത്തിയായതിനാൽ റോഡിന്‍റെ പുനർനിർമാണം പഞ്ചായത്ത് തന്നെ ചെയ്യണമെന്ന് അറിയിച്ചതാണെന്നും റിപ്പോർട്ടിൽ പറഞ്ഞു. മാവൂർ കണ്ണിപറമ്പ് പൊതുമരാമത്ത് റോഡിൽ സ്ഥാപിച്ചിട്ടുള്ള മെയിൻ വിതരണ പൈപ്പ് ലൈനിൽ നിന്നും പരാതിയിൽ പരാമർശിച്ച റോഡിൽ സ്ഥാപിച്ച പൈപ്പ് ലൈനുമായി ഇന്‍റർ കണക്ഷൻ നൽകിയിട്ടുണ്ടെന്നും കുടിവെള്ളവിതരണം നടത്തുന്നുണ്ടെന്നും റിപ്പോർട്ടിൽ പറയുന്നു. ജല അഥോറിറ്റിയുടെ റിപ്പോർട്ടിൽ മാവൂർ പഞ്ചായത്തിന്‍റെ നിർദ്ദേശപ്രകാരമാണ് പൈപ്പ് സ്ഥാപിച്ചതെന്ന് പരാമർശമുള്ള സാഹചര്യത്തിൽ റോഡ് നിർമാണം പഞ്ചായത്ത് തന്നെ നടത്തണമെന്ന് ഉത്തരവിൽ പറഞ്ഞു. മാവൂർ സ്വദേശി കെ.പി. രാജശേഖരൻ സമർപ്പിച്ച പരാതിയിലാണ് നടപടി.

റോഡ് നന്നാക്കാനായി ഒറ്റയാൾ സമരം

പെരുവണ്ണാമൂഴി: ചക്കിട്ടപാറ - പെരുവണ്ണാമൂഴി റൂട്ടിൽ ബസ് സർവീസ് പകുതി ദൂരം മാത്രം. മലയോര ഹൈവേയുടെ പണി കാരണം പെരുവണ്ണാമൂഴി ആശുപത്രി ഭാഗത്ത് റോഡിൽ 100 മീറ്ററോളം മൊത്തം ചെളിയാണ്. തുടർന്ന് "നാഥിനില്ലാത്ത ചക്കിട്ടപാറ - ഈ ചെളിക്കുഴിയിൽ നിന്ന് യാത്രക്കാരെ ആര് രക്ഷിക്കും' എന്ന പ്ലക്കാർഡുമായി ഇന്നലെ വൈകുന്നേരം നാലോടെ ചക്കിട്ടപാറയിലെ പൊതു പ്രവർത്തകൻ രാജൻ വർക്കി ചെളിക്കെട്ടിൽ സമരം നടത്തി. അരമണിക്കൂറിനുള്ളിൽ അര ലോഡ് ക്വാറി വേസ്റ്റുമായി ടിപ്പർ ലോറി എത്തി. പിന്നാലെ ജെസിബിയും. തുടർന്ന് ക്വാറി വേസ്റ്റ് നിരത്തി ലോറി പോയി. കടലിൽ കായം കലക്കുന്നത് പോലെയുള്ള പ്രവർത്തിയാണ് നടന്നത്.

കാട്ടാന നശിപ്പിച്ച കൃഷിയിടം സന്ദർശിച്ചു

തിരുവമ്പാടി: മേലേപൊന്നാങ്കയത്ത് കാട്ടാന നശിപ്പിച്ച കൃഷിയിടം തിരുവമ്പാടി മണ്ഡലം കോൺഗ്രസ് കമ്മിറ്റിയുടെ നേതൃത്വത്തിൽ സന്ദർശിച്ചു. മുരിങ്ങയിൽ മൈക്കിൾ, ആഗസ്തി പ്ലാത്തോട്ടത്തിൽ, കുഞ്ഞുണ്ണി നായർ, ഗോപിനാഥൻ പുത്തൻ പുരയിൽ, ഷാജി അനന്തശേരി എന്നിവരുടെ കൃഷിയിടത്തിലെ തെങ്ങ്, കമുങ്ങ്, ജാതി, കൊക്കൊ, വാഴ, കപ്പ മുതലായവയാണ് നശിപ്പിച്ചത്. വന്യമൃഗങ്ങൾ ജനവാസ മേഖലയിലേക്ക് കടന്നു കയറുന്നത് തടയുന്നതിന് വനം വകുപ്പ് അടിയന്തരമായി ശാശ്വത പരിഹാരം കാണണമെന്ന് നേതാക്കൾ ആവശ്യപ്പെട്ടു. മനോജ് സെബാസ്റ്റ്യൻ വാഴേപ്പറമ്പിൽ, കർഷക കോൺഗ്രസ് സംസ്ഥാന ജനറൽ സെക്രട്ടറി ബോസ് ജേക്കബ്, പഞ്ചായത്ത് പ്രസിഡന്‍റ് ബിന്ദു ജോൺസൺ, വികസന കാര്യ സ്റ്റാൻഡിംഗ് കമ്മിറ്റി ചെയർപേഴ്സൺ ലിസി മാളിയേക്കൽ, മണ്ഡലം വൈസ് പ്രസിഡന്‍റ് ജിതിൻ പല്ലാട്ട്, മണ്ഡലം സെക്രട്ടറിമാരായ ഷിജു ചെമ്പനാനി, ബിനു പുതുപ്പറമ്പിൽ, ബൂത്ത് പ്രസിഡന്‍റ് സോണി മണ്ഡപത്തിൽ എന്നിവർ നേതൃത്വം നൽകി.

യുവക്ഷീര കർഷകനെ ആദരിച്ചു

കൂരാച്ചുണ്ട്: ലോകക്ഷീര ദിനത്തിന്‍റെ ഭാഗമായി യൂത്ത് കോൺഗ്രസ്‌ കൂരാച്ചുണ്ട് മണ്ഡലം കമ്മിറ്റി സംഘടിപ്പിച്ച സൗഹൃദ സായാഹ്നത്തിൽ ബാലുശേരി ബ്ലോക്കിലെ മികച്ച യുവ ക്ഷീര കർഷകനായി തെരഞ്ഞെടുക്കപ്പെട്ട ദീപു കിഴക്കേനകത്തിനെ ഉപഹാരം നൽകി ആദരിച്ചു. യുവ ക്ഷീര കർഷകനുള്ള അവാർഡ് ലഭിച്ച കർഷകൻ ദീപു എട്ട് വർഷത്തോളമുള്ള പ്രവാസജീവിതം അവസാനിപ്പിച്ചാണ് ക്ഷീര മേഖലയിലേക്ക് കടന്നത്. ചടങ്ങിൽ യൂത്ത് കോൺഗ്രസ്‌ മണ്ഡലം പ്രസിഡന്‍റ് നിസാം കക്കയം അധ്യക്ഷത വഹിച്ചു. കൂരാച്ചുണ്ട് ക്ഷീരോത്പാദക സഹകരണ സംഘം പ്രസിഡന്‍റ് ജോർജ് പൊട്ടുകുളത്തിൽ ഉപഹാരം കൈമാറി. യൂത്ത് കോൺഗ്രസ്‌ ബാലുശേരി നിയോജക മണ്ഡലം ജനറൽ സെക്രട്ടറി വിഷ്ണു തണ്ടോറ, കോൺഗ്രസ്‌ മണ്ഡലം വൈസ് പ്രസിഡന്‍റ് ജെറിൻ കുര്യാക്കോസ്, ജാക്സ് കരിമ്പനക്കുഴി, ബെസ്‌ലിൻ മഠത്തിനാൽ, സന്ദീപ് കളപ്പുരയ്ക്കൽ, അജ്മൽ ചാലിടം, ലിബിൻ പാവത്തികുന്നേൽ, അനീഷ് മറ്റത്തിൽ എന്നിവർ പ്രസംഗിച്ചു.

സുരക്ഷ ഉറപ്പാക്കാന്‍ സ്‌കൂളുകളില്‍ പരിശോധനയുമായി വനം വകുപ്പ്

കോഴിക്കോട്: സ്‌കൂളുകളില്‍ കുട്ടികളുടെയും അധ്യാപകരുടെയും സുരക്ഷ ഉറപ്പാക്കാന്‍ ഉരഗ പരിശോധനയുമായി വനം വകുപ്പിന്‍റെ സര്‍പ്പ വോളന്‍റിയര്‍മാര്‍. കഴിഞ്ഞ ആഴ്ച ആരംഭിച്ച പരിശോധന ഈ ആഴ്ചയും തുടരും. സ്‌കൂള്‍ അധികൃതരോ പിടിഎ ഭാരവാഹികളോ അറിയിക്കുന്നത് പ്രകാരമാണ് പരിശോധന. സ്‌കൂളുകളിലും പരിസരങ്ങളിലും വിഷപ്പാമ്പുകളുടെ സാന്നിധ്യം ഒഴിവാക്കി സുരക്ഷ ഉറപ്പാക്കുകയെന്ന ലക്ഷ്യത്തോടെ വനം വകുപ്പ് നല്‍കുന്ന സുപ്രധാന സേവനമാണിതെന്ന് വനം വകുപ്പ് മന്ത്രി എ.കെ. ശശീന്ദ്രന്‍ പറഞ്ഞു. പരിശോധനാ പ്രവര്‍ത്തനങ്ങള്‍ ഏകോപിപ്പിക്കാന്‍ ഓരോ ജില്ലയിലെയും സാമൂഹിക വനവത്കരണ വിഭാഗം അസി. ഫോറസ്റ്റ് കണ്‍സര്‍വേറ്റര്‍മാര്‍ക്ക് ചീഫ് വൈല്‍ഡ് ലൈഫ് വാര്‍ഡന്‍ പ്രമോദ് ജി. കൃഷ്ണന്‍ നിര്‍ദേശം നല്‍കിയിട്ടുണ്ട്. സര്‍പ്പ വോളന്‍റിയര്‍മാരുടെ സഹായം ആവശ്യമുള്ള സ്‌കൂള്‍ അധികൃതര്‍ അതത് ജില്ലയിലെ സാമൂഹിക വനവത്കരണ വിഭാഗവുമായി ബന്ധപ്പെടണം. സഹായങ്ങള്‍ക്കും അന്വേഷണങ്ങള്‍ക്കും വനംവകുപ്പിന്‍റെ ടോള്‍ ഫ്രീ നമ്പറായ 1800 425 4733ല്‍ വിളിക്കാം.

മുന്‍ഗണനാ റേഷന്‍ കാര്‍ഡ്: 15 വരെ അപേക്ഷിക്കാം

കോഴിക്കോട്: പൊതുവിഭാഗം റേഷന്‍ കാര്‍ഡുകള്‍ മുന്‍ഗണനാ വിഭാഗത്തിലേക്ക് മാറ്റുന്നതിനുള്ള അപേക്ഷ 15 വരെ സ്വീകരിക്കുമെന്ന് ജില്ലാ സപ്ലൈ ഓഫീസര്‍ അറിയിച്ചു. അക്ഷയ കേന്ദ്രം, സിവില്‍ സപ്ലൈസ് വകുപ്പ് വെബ്‌സൈറ്റിലെ സിറ്റിസണ്‍ ലോഗിന്‍ എന്നിവ വഴി അപേക്ഷ സമര്‍പ്പിക്കാം. തദ്ദേശ സ്വയംഭരണ സെക്രട്ടറി നല്‍കുന്ന ബിപിഎല്‍ സര്‍ട്ടിഫിക്കറ്റുള്ളവര്‍, മാരക രോഗമുള്ളവര്‍, പട്ടികജാതിക്കാര്‍, പരമ്പരാഗത മേഖലയില്‍ തൊഴിലെടുക്കുന്നവര്‍, നിര്‍ധന ഭൂരഹിത-ഭവനരഹിതര്‍, സര്‍ക്കാര്‍ ധനസഹായത്തോടെ ലഭ്യമായ വീടുള്ളവര്‍, ഭിന്നശേഷിക്കാര്‍ എന്നിവര്‍ക്ക് മുന്‍ഗണന ലഭിക്കും. ഇവര്‍ അപേക്ഷയില്‍ ബന്ധപ്പെട്ട രേഖകള്‍ കൂടി സമര്‍പ്പിക്കണം. ആയിരം ചതുരശ്ര അടിയിലധികം വിസ്തീര്‍ണമുള്ള വീടുള്ളവര്‍, ഒരേക്കറിലധികം ഭൂമിയുള്ളവര്‍, സര്‍ക്കാര്‍/അര്‍ധ സര്‍ക്കാര്‍/പൊതുമേഖല/സഹകരണ സ്ഥാപനങ്ങളിലെ ജീവനക്കാര്‍, സര്‍വീസ് പെന്‍ഷന്‍കാര്‍ (പാര്‍ട്ട് ടൈം ജീവനക്കാര്‍, താല്‍ക്കാലിക ജീവനക്കാര്‍, ക്ലാസ് ഫോര്‍ തസ്തികയില്‍ പെന്‍ഷനായവര്‍, 5000 രൂപയില്‍ താഴെ പെന്‍ഷന്‍ വാങ്ങുന്നവര്‍, 10,000 രൂപയില്‍ താഴെ സ്വാതന്ത്ര്യസമര പെന്‍ഷന്‍ വാങ്ങുന്നവര്‍ ഒഴികെ), ആദായനികുതി ദാതാക്കള്‍, കുടുംബത്തിന്‍റെ പ്രതിമാസ വരുമാനം 25,000 രൂപയിലധികമുള്ളവര്‍, നാലുചക്ര വാഹനം സ്വന്തമായുള്ളവര്‍ കുടുംബത്തില്‍ ആര്‍ക്കെങ്കിലും വിദേശ ജോലിയില്‍ നിന്നോ സ്വകാര്യ സ്ഥാപനത്തിലെ ജോലിയില്‍ നിന്നോ പ്രതിമാസം 25,000 രൂപയിലധികം വരുമാനമുള്ളവര്‍ എന്നിവര്‍ക്ക് മുന്‍ഗണനാ റേഷന്‍കാര്‍ഡിന് അര്‍ഹത ഉണ്ടാകില്ല.

മത്സ്യബന്ധനത്തിനിടെ വയോധികൻ കുഴഞ്ഞുവീണു മരിച്ചു

കൊയിലാണ്ടി: മത്സ്യബന്ധനത്തിനിടെ തൊഴിലാളി മരിച്ചു. ചാലിൽപറമ്പിൽ താമസിക്കും കോയാന്‍റെ വളപ്പിൽ കെ.കെ.വി. ഹംസ (65) ആണ് മരിച്ചത്. ഹാർബറിൽ നിന്നും ബദർ എന്ന തോണിയിൽ മത്സ്യബന്ധനത്തിനിടെ അസ്വാസ്ഥ്യം തോന്നുകയും കുഴഞ്ഞു വീഴുകയുമായിരുന്നു. തുടർന്ന് താലൂക്ക് ആശുപത്രിയിൽ എത്തിച്ച് ചികിത്സ നൽകുന്നതിനിടെ മരിച്ചു. ഭാര്യ: ആയിഷ. മക്കൾ: ഷംസുദ്ദീൻ, ഷബീർ. സഹോദരങ്ങൾ: മുഹമ്മദ്, പാത്തുമ്മ, പരേതനായ മൊയ്തീൻ. പിതാവ്: പരേതനായ അബ്ദുള്ളക്കുട്ടി. മാതാവ്: പരേതയായ അലീമ.

മധ്യവയസ്‌കനെ തോട്ടില്‍ മരിച്ചനിലയില്‍ കണ്ടെത്തി

കോഴിക്കോട്: ഉള്ള്യേരിയില്‍ മധ്യവയസ്‌കനെ തോട്ടില്‍ മരിച്ചനിലയില്‍ കണ്ടെത്തി. ബാലുശേരി എരമംഗലം സ്വദേശി ആലുള്ളതില്‍ ലോഹിതാക്ഷന്‍ (55) ആണ് മരിച്ചത്. ഞായറാഴ്ച രാത്രി മാമ്പൊയിലിലുള്ള വിവാഹ സല്‍ക്കാരവീട്ടിലേക്കെന്ന് പറഞ്ഞ് വീട്ടില്‍ നിന്നിറങ്ങിയെങ്കിലും തിരിച്ചെത്തിയിരുന്നില്ല. ഇന്നലെ രാവിലെയാണ് നാട്ടുകാര്‍ പഞ്ചായത്ത് ഗ്രൗണ്ടിനടുത്തുള്ള മാമ്പൊയില്‍ മാതാംതോട്ടില്‍ മൃതദേഹം കണ്ടത്. പരിശോധനയില്‍ മരിച്ചത് ലോഹിതാക്ഷനാണെന്ന് തിരിച്ചറിയുകയായിരുന്നു. തോട്ടിലെ ചെളിയില്‍ മുഖം പൂണ്ടുപോയ അവസ്ഥയിലായിരുന്നു മൃതദേഹം. അത്തോളി പോലീസ് സ്ഥലത്തെത്തി തുടര്‍ നടപടികള്‍ സ്വീകരിച്ചു.

ജില്ലയിൽ 23 നൈപുണി വികസന കേന്ദ്രങ്ങൾക്ക് തുടക്കം

കോഴിക്കോട്: പുതിയ കാലത്ത് തങ്ങളുടെ അഭിരുചിക്കും ശേഷിക്കും ഇണങ്ങിയ തൊഴിൽ പരിശീലനമാണ് വിദ്യാർഥികൾക്ക് ലഭ്യമാക്കേണ്ടതെന്ന് മന്ത്രി പി.എ. മുഹമ്മദ് റിയാസ്. ഫറോക്ക് ഗവ. ഗണപത് എച്ച്എസ്എസിൽ നടന്ന നൈപുണി വികസന കേന്ദ്രങ്ങളുടെ ജില്ലാതല ഉദ്ഘാടനം നിർവഹിക്കുകയായിരുന്നു മന്ത്രി. അടിസ്ഥാന വിദ്യാഭ്യാസം ഉറപ്പാക്കുന്നതിൽ വിട്ടുവീഴ്ചയില്ലാത്ത നിലപാട് സ്വീകരിക്കുന്നതിനൊപ്പം ഏറ്റവും നൂതനവും അന്താരാഷ്ട്ര നിലവാരത്തിലുള്ളതുമായ തൊഴിൽ പരിശീലനം സാധ്യമാക്കാനാണ് സർക്കാർ പ്രയത്‌നിക്കുന്നത്. പൊതു വിദ്യാഭ്യാസ രംഗത്തും പാഠ്യപദ്ധതിയുടെ ഗുണനിലവാരത്തിലും സമാനതകളില്ലാത്ത മുന്നേറ്റമാണ് സംസ്ഥാനം നടത്തുന്നത്. പഠന മേഖലകളുടെ വൈവിധ്യത്തിലും അക്കാദമിക നേട്ടത്തിലും സംസ്ഥാനം രാജ്യത്തിന് മാതൃകയാണെന്നും നൈപുണ്യ വികസനത്തിന് വിവിധ സർക്കാർ ഉദ്യമങ്ങൾ പ്രത്യേക ശ്രദ്ധ നൽകുന്നുണ്ടെന്നും മന്ത്രി പറഞ്ഞു. തൊഴിൽ മേഖലയിൽ ഉയർന്ന നിലവാരം പുലർത്താൻ പ്രാപ്തമാക്കാവുന്ന വിധത്തിലുള്ള പരിശീലനങ്ങൾക്കാണ് സർക്കാർ നേതൃത്വം നൽകുന്നത്. മാറുന്ന കാലത്തിനനുസരിച്ചു കാലോചിതമായ മുന്നേറ്റമാണ്‌ ഈ രംഗത്തും നടത്തുന്നതെന്നും മന്ത്രി കൂട്ടിച്ചേർത്തു. ഓരോ ബ്ലോക്കിലും രണ്ട് വീതം സെന്‍ററുകൾ എന്ന തോതിൽ ജില്ലയിൽ 23 നൈപുണ്യ വികസന കേന്ദ്രങ്ങൾക്കാണ്‌ തുടക്കമാകുന്നത്. ഒരു സെന്‍ററിൽ ഒരു കോർഡിനേറ്റർ, രണ്ട് സ്കിൽ ട്രെയിനർമാർ, ഒരു സ്കിൽ അസിസ്റ്റന്‍റ് എന്നിങ്ങനെ ജീവനക്കാരുടെ സേവനം ലഭ്യമാകും. 29 ഇനം പുതുതലമുറ നൈപുണ്യ കോഴ്സുകളാണ്‌ ഈ കേന്ദ്രങ്ങളിലായി ഒരുക്കിയിട്ടുള്ളത്. ഒഴിവു ദിവസങ്ങളിൽ നടക്കുന്ന‌ ക്ലാസുകളിൽ 15 മുതൽ 25 വയസ് വരെയുള്ളവർക്ക് ഭാഗമാകാം. ഓരോ കോഴ്സിലും 25 പേർക്കാണ്‌ പ്രവേശനം. 100‌ വിദേശ രാജ്യങ്ങളിൽ അംഗീകാരമുള്ള സർട്ടിഫിക്കറ്റാണ്‌ കോഴ്സ് പൂർത്തീകരണത്തോടെ ലഭിക്കുക. ഓൺ ദി ജോബ് ട്രയിനിംഗ്, വ്യവസായ രംഗത്തെ അനുഭവസ്ഥരുമായുള്ള സംവാദങ്ങൾ, വ്യവസായ കേന്ദ്രങ്ങളിലെ സന്ദർശനങ്ങൾ തുടങ്ങിയവക്കുള്ള അവസരങ്ങളും പദ്ധതിയുടെ ഭാഗമാകുന്നവർക്ക് ലഭിക്കും. പ്രത്യേക പരിഗണന അർഹിക്കുന്ന കുട്ടികളും അധ്യപാകരും പദ്ധതിയിൽ പങ്കാളികളാകും. സംസ്ഥാനത്താകെയുള്ള 210 കേന്ദ്രങ്ങൾ വഴി 10500 വിദ്യാർഥികളാണ് ഗുണഭോക്താക്കളാകുക. 21.5 ലക്ഷം രൂപ വകയിരുത്തിയാണ്‌ ഫറോക്ക് ഗവ. ഗണപത് വൊക്കേഷണൽ ഹയർ സെക്കൻഡറി സ്കൂളിൽ നൈപുണ്യ കേന്ദ്രം ഒരുക്കിയത്. സ്ഥലത്തെ ജനപ്രതിനിധികളുടെയും വകുപ്പ് ഉദ്യോഗസ്ഥരുടെയും സ്കൂൾ അധികൃതരുടെയും നേതൃത്വത്തിൽ 2024 സെപ്റ്റംബറിൽ ചേർന്ന യോഗത്തിലാണ്‌ സ്കൂളിനെ സെന്റർ ഫോർ സ്കിൽ എക്സലൻസ് ആക്കാനുള്ള തീരുമാനവും തുടർ നടപടികളും കൈക്കൊള്ളുന്നത്. എമർജൻസി മെഡിക്കൽ ടെക്നീഷ്യൻ, റോബോട്ടിക്സ് ടെക്നീഷ്യൻ എന്നീ കോഴ്സുകളാണ്‌ ഫറോക്ക് കേന്ദ്രത്തിൽ ഒരുക്കിയിട്ടുള്ളത്. പരിപാടിയിൽ ഫറോക്ക് നഗരസഭ ചെയർമാൻ എൻ.സി. അബ്ദുൽ റസാഖ് അധ്യക്ഷത വഹിച്ചു.

ചെറുപുഷ്പ മിഷൻ ലീഗ് പ്രേഷിതഭേരി പ്രവർത്തന വർഷ ഉദ്ഘാടനം

കോടഞ്ചേരി: ചെറുപുഷ്പ മിഷൻ ലീഗിന്‍റെ കേരള സംസ്ഥാന സമിതിയുടെയും താമരശേരി രൂപതയുടെയും പ്രേഷിതഭേരി പ്രവർത്തന വർഷ ഉദ്ഘാടനം താമരശേരി രൂപത വികാരി ജനറാൾ മോൺ. ഏബ്രാഹാം വയലിൽ നിർവഹിച്ചു. ചെറുപുഷ്പ മിഷൻലീഗ് സംസ്ഥാന പ്രസിഡന്‍റ് രഞ്ജിത്ത് മുതുപ്ലാക്കൽ അധ്യക്ഷത വഹിച്ചു. ചെറുപുഷ്പ മിഷൻലീഗ് സംസ്ഥാന വൈസ് ഡയറക്ടർ ഫാ. ജിതിൻ വേലിക്കകത്ത് മുഖ്യസന്ദേശം നൽകി. ചെറുപുഷ്പ മിഷൻലീഗ് താമരശേരി രൂപത ഡയറക്ടർ ഫാ. ജോർജ് വെള്ളാരംകാലായിൽ ആമുഖ പ്രഭാഷണം നടത്തി. സംസ്ഥാന സെക്രട്ടറി ജെയ്സൺ പുളിച്ചുമാക്കൽ, താമരശേരി രൂപത വൈസ് ഡയറക്ടർ സിസ്റ്റർ പ്രിൻസി സിഎംസി, രൂപത സീനിയർ വൈസ് പ്രസിഡന്‍റ് ആൻമേരി കൊച്ചുതൊട്ടിയിൽ, രൂപത ജൂനിയർ വൈസ് പ്രസിഡന്‍റ് ആൻലിയ സജി മെഴുകനാല്‍, കോടഞ്ചേരി ഫൊറോന വികാരി ഫാ. കുര്യാക്കോസ് ഐക്കൊളമ്പിൽ എന്നിവർ പ്രസംഗിച്ചു.കോടഞ്ചേരി ഫൊറോന അസിസ്റ്റന്‍റ് വികാരി ഫാ. ജിയോ കടുകമാക്കൽ, കോടഞ്ചേരി മേഖല പ്രസിഡന്‍റ് ആന്‍റണി ചൂരപൈകയിൽ, ശാഖ വൈസ് ഡയറക്ടർ സിസ്റ്റർ ഹെലൻ എഫ്സിസി എന്നിവർ നേതൃത്വം നൽകി.

ഉന്നത വിജയികളെ അനുമോദിച്ചു

കൂടരഞ്ഞി: പഞ്ചായത്തിന്‍റെ നേതൃത്വത്തിൽ എസ്എസ്എൽസി, പ്ലസ് ടു ഉന്നത വിജയികളെയും എൽഎസ്എസ്, യു‌എസ്എസ് സ്കോളർഷിപ് ലഭിച്ച വിദ്യാർഥികളെയും അനുമോദിച്ചു. പഞ്ചായത് കമ്മ്യൂണിറ്റി ഹാളിൽ നടന്ന പരിപാടി ലിന്‍റോ ജോസഫ് എംഎൽഎ ഉദ്ഘാടനം ചെയ്തു. പഞ്ചായത് പ്രസിഡന്‍റ് ആദർശ് ജോസഫ് അധ്യക്ഷത വഹിച്ചു. കൂടരഞ്ഞി സ്കൂൾ മാനേജർ ഫാ. ബിനോയ് പുരയിടത്തിൽ മുഖ്യാതിഥിയായി. പഞ്ചായത് വൈസ് പ്രസിഡന്‍റ് മേരി തങ്കച്ചൻ, ആരോഗ്യ സ്റ്റാൻഡിംഗ് കമ്മിറ്റി അധ്യക്ഷൻ വി.എസ്. രവീന്ദ്രൻ, പഞ്ചായത് മെമ്പർമാർ, പ്രധാനാധ്യാപകർ, വിദ്യാർഥികൾ, ഉദ്യോഗസ്ഥർ എന്നിവർ പങ്കെടുത്തു.

പട്ടികജാതിക്കാരുടെ വിവിധ ആനുകൂല്യങ്ങൾ വർധിപ്പിക്കണമെന്ന്

മുക്കം: പട്ടികജാതിക്കാർക്കുള്ള ഭവന നിർമാണം, വിദ്യാഭ്യാസം, ചികിത്സാ ആനുകൂല്യങ്ങൾ കാലോചിതമായി പരിഷ്കരിക്കണമെന്ന് പികെഎസ് മുക്കം ലോക്കൽ സമ്മേളനം ആവശ്യപ്പെട്ടു. സമ്മേളനം പികെഎസ് ജില്ലാ സെക്രട്ടറി ഒ.എം ഭരദ്വാജ് ഉദ്ഘാടനം ചെയ്തു. പി. നിലീന അധ്യക്ഷത വഹിച്ചു. ജില്ലാ വൈസ് പ്രസിഡന്‍റ് പി.ടി. ബാബു സംഘടനാ റിപ്പോർട്ടും ഒ.കെ. സാമി പ്രവർത്തന റിപ്പോർട്ടും അവതരിപ്പിച്ചു. സി.എൻ. വിശ്വൻ, കെ.പി. ചെറുനാഗൻ, ഒ. സുബിഷ്, കെ.പി. ബിന്ദു എന്നിവർ പ്രസംഗിച്ചു. സെക്രട്ടറിയായി ഒ.കെ. സാമിയെയും, പ്രസിഡന്‍റായി പി. ജയദീപനെയും, ട്രഷറായി കെ. ബിന്ദുനെയും തെരഞ്ഞെടുത്തു.

അസറ്റ് പ്രതിഭാ സംഗമം പേരാമ്പ്രയുടെ വിജയാഘോഷമായി മാറി

പേരാമ്പ്ര: നിയോജക മണ്ഡലത്തിലെ മുഴുവൻ എൽഎസ്എസ്, യുഎസ്എസ്, എൻഎംഎംഎസ് ജേതാക്കളെയും എസ്എസ്എൽസി, പ്ലസ് ടു ഫുൾ എ പ്ലസ് വിജയികളെയും സിബിഎസ്ഇ ഫുൾ എ വൺ ജേതാക്കളെയും അസറ്റ് പേരാമ്പ്ര അനുമോദിച്ചു. പേരാമ്പ്ര കമ്മ്യൂണിറ്റി ഹാളിൽ മുൻ കേരള ചീഫ് സെക്രട്ടറി ജിജി തോംസൺ ഐഎഎസ് ഉദ്ഘാടന കർമ്മം നിർവഹിച്ചു. പ്രശസ്ത മജീഷ്യനും മോട്ടിവേഷണൽ സ്പീക്കറുമായ ഗോപിനാഥ് മുതുകാട് മുഖ്യാതിഥിയായി. അസറ്റ് ചെയർമാൻ സി. എച്ച്. ഇബ്രാഹിംകുട്ടി അധ്യക്ഷത വഹിച്ച ചടങ്ങിൽ രണ്ടായിരത്തോളം പ്രതിഭകളെ അനുമോദിച്ചു. ജീവിത വിജയത്തിന് കുറുക്കുവഴികൾ ഇല്ലെന്നും സ്വന്തം കഴിവിൽ ആത്മവിശ്വാസം ഉണ്ടെങ്കിൽ ഏതു പ്രതിസന്ധികളെയും അതിജീവിക്കാം എന്നും ജീവിതവിജയം നേടാമെന്നും സ്വാനുഭവങ്ങൾ ഉദാഹരിച്ച് അദ്ദേഹം കുട്ടികളെ പ്രചോദിപ്പിച്ചു. ഗോപിനാഥ് മുതുകാട് മുഖ്യ പ്രഭാഷണം നടത്തി. കാണുന്നതും കേൾക്കുന്നതും അറിയുന്നതും എല്ലാം അരുതാത്തതായി മാറുന്ന കാലത്ത് നല്ലത് കേൾക്കാനും പറയാനും ചെയ്യാനും കഴിയണമെന്ന് അദ്ദേഹം കുട്ടികളെ ഉദ് ബോധിപ്പിച്ചു. എസ്.പി. കുഞ്ഞമ്മദ്, പി. മുഹമ്മദ്‌, എസ്.കെ. അസൈനാർ, എ.കെ. തറുവൈ ഹാജി, പി.സി. മുഹമ്മദ് സിറാജ്, എൻ.പി. അസീസ്, ആവള ഹമീദ്, പി.വി. ലീന, സൗഫി താഴെക്കണ്ടി, സി.എച്ച്. രാജീവൻ,ടി.പി. മുഹമ്മദ്, വി.കെ. മൊയ്തു പി. ബിന്ദു, വി.സി. ഷാജി, കെ.എം. മുഹമ്മദ്, അസറ്റ് ജനറൽ സെക്രട്ടറി നസീർ നൊച്ചാട്, സെക്രട്ടറി ചിത്ര രാജൻ എന്നിവർ പ്രസംഗിച്ചു. മാതാ പേരാമ്പ്രയുടെ കലാകാരന്മാർ ലഹരിക്കെതിരേയുള്ള ജ്യോതിർഗമയ നൃത്ത സംഗീത നാടകാവിഷ്കാരവും സ്വാഗത നൃത്തവും അവതരിപ്പിച്ചു.

ജില്ലാതല പ്രവേശനോത്സവം ഇന്ന് പെരിങ്ങൊളം ജിഎച്ച്എസ്എസിൽ

കോഴിക്കോട്: പുതിയ അധ്യയന വര്‍ഷത്തെ ജില്ലാതല പ്രവേശനോത്സവം ഇന്ന് രാവിലെ ഒമ്പതിന് പെരിങ്ങൊളം ജിഎച്ച്എസ്എസില്‍ മന്ത്രി പി.എ. മുഹമ്മദ് റിയാസ് ഉദ്ഘാടനം ചെയ്യും. ചടങ്ങിൽ പി.ടി.എ. റഹീം എംഎൽഎ അധ്യക്ഷത വഹിക്കും. ജില്ലാ പഞ്ചായത്ത് പ്രസിഡന്‍റ് ഷീജ ശശി നവാഗതരെ വരവേൽക്കും. ജില്ലാ കളക്ടർ സ്നേഹിൽ കുമാർ സിംഗ് പ്രതിഭകളെ ആദരിക്കും. അധ്യയന വര്‍ഷാരംഭത്തിന്‍റ ഭാഗമായി ജില്ലയിലെ എല്ലാ സ്‌കൂളുകളിലും ഇന്ന് പ്രവേശനോത്സവം നടത്തും. പുതിയ അധ്യയന വര്‍ഷം ജില്ലയില്‍ 60,000ത്തോളം വിദ്യാര്‍ഥികളാണ് സ്കൂളുകളിൽ നവാഗതരായി എത്തിച്ചേരുക. ഇവരെ അധ്യാപകരും വിദ്യാർഥികളും രക്ഷിതാക്കളും ഉദ്യോഗസ്ഥരും മാനേജ്മെന്‍റ് പ്രതിനിധികളും ചേർന്ന് മധുരവും മറ്റും നൽകി വരവേൽക്കും. ഇതിനായി സ്കൂളുകളും പരിസരങ്ങളും അണിഞ്ഞൊരുങ്ങി. ജില്ലയിലെ വിദ്യാലയങ്ങളിൽ പാഠപുസ്തകങ്ങളുടെ വിതരണം ഇതിനകം 98.7 ശതമാനം പൂർത്തിയായി. 90 ശതമാനം സ്കൂൾ കെട്ടിടങ്ങളുടെയും വാഹനങ്ങളുടെയും അനുബന്ധ സൗകര്യങ്ങളുടെയും ഫിറ്റ്നസ് പരിശോധിച്ചു ഉറപ്പുവരുത്തി. ജില്ലയിലെ മുഴുവൻ സ്കൂളുകളിലും പുതിയ അധ്യയന വർഷാരംഭത്തിന്‍റെ ഭാഗമായി ശുചീകരണ പ്രവൃത്തികൾ പൂർത്തിയാക്കി. എല്ലാ സ്കൂളുകളിലെയും ജല പരിശോധനയും സുരക്ഷ ഓഡിറ്റും പൂർത്തിയാക്കിയതായും ഡിഡിഇ അറിയിച്ചു.

ഗൃഹപ്രവേശന ദിവസം യുവാവ് മരിച്ചു

കൊയിലാണ്ടി: ഗൃഹപ്രവേശന ദിവസം യുവാവ് മരിച്ചു. മുഹ്‌യുദ്ദീൻ പള്ളിക്ക് സമീപം റസീനയിൽ ആലി ഹാജിയുടെയും സഫിയയുടെയും മകൻ ഫാരിസ് (44) ആണ് ഗൃഹപ്രവേശന ദിവസമായ ഇന്നലെ മരിച്ചത്. കൊയിലാണ്ടി പുതിയ മാർക്കറ്റിൽ ടേസ്റ്റി ബേക്കറി ഉടമയാണ്. പുതിയ വീടായ "അൽ ബദറിൽ' താമസം മാറി മണിക്കൂറുകൾക്കകം ഹ്യദയാഘാതത്തെ തുടർന്ന് മരിക്കുകയായിരുന്നു. ഭാര്യ: ഹർഷ. മക്കൾ: ഖദീജ ഫർഹ, മുഹമ്മദലി എമിൻ. സഹോദരങ്ങൾ: സാജിദ് (ഷാജി), ആഷിഖ്, ഫെമിന, റസീന, അസ്മത്.

മലയോര ഹൈവേ പ്രവൃത്തി നേരായ രീതിയിൽ നടത്തണം: ജനകീയ കമ്മറ്റി

ചക്കിട്ടപാറ: നാടിന്‍റെ യഥാർഥ വികസനമാണ് അധികാരികൾ ലക്ഷ്യമിടുന്നതെങ്കിൽ ചക്കിട്ടപാറ ടൗണിലെ മലയോര ഹൈവേ നിർമാണം സുതാര്യമായി നടത്തണമെന്ന് വ്യാപാര ഭവനിൽ ചേർന്ന ജനകീയ കമ്മിറ്റി രൂപീകരണ യോഗം ആവശ്യപ്പെട്ടു. ഒരേ റോഡിൽ വ്യത്യസ്ത അളവ് നടത്തി പാതയുടെ വീതി നിർണയിക്കുന്ന പരിപാടി അനുവദിക്കില്ല. ജനം എല്ലാം മനസിലാക്കിയിട്ടുണ്ട്. അശാസ്ത്രീയമായി റോഡ് നിർമാണം നടത്തിയാൽ ശക്തമായി പ്രതിരോധിക്കും. പ്രശ്നത്തിൽ ഒരു സംഘടനയും രംഗത്തു വരാത്ത സാഹചര്യത്തിൽ ബിജെപി നേതൃത്വമാണ് എല്ലാവരെയും ബന്ധപ്പെട്ട് ജനകീയ യോഗം വിളിച്ചത്. ബാബു പുതുപ്പറമ്പിൽ ഉദ്ഘാടനം ചെയ്തു. പി.ബി.സന്തോഷ് അധ്യക്ഷത വഹിച്ചു. പി.പി.പ്രദീപ് കുമാർ, രാജൻ വർക്കി, പത്മനാഭൻ കോറോത്ത്, കെ.കെ. രാജേഷ്, ശ്രീനിവാസൻ മനക്കൽ, വി.വി. രാജൻ, പി. ശ്രീധരൻ, ടി.സി.സന്തോഷ്, പി.വിവേക്, ശിവദാസൻ കക്കുടുമ്പിൽ എന്നിവർ പ്രസംഗിച്ചു. ഭാരവാഹികൾ: ബാബു പുതുപ്പറമ്പിൽ (ചെയർമാൻ), വി.വി.രാജൻ (വൈസ് ചെയർമാൻ), രാജൻ വർക്കി (കൺവീനർ), പി.ബി.സന്തോഷ് (ജോ.കൺവീനർ), പി.പി.പ്രദീപൻ(ട്രഷറർ).

തോട്ടിലെ വെള്ളത്തിൽ പാൽനിറം കണ്ടത് ആശങ്ക പടർത്തി

കൂരാച്ചുണ്ട്: കൂരാച്ചുണ്ട് അങ്ങാടിയോട് ചേർന്ന് ഒഴുകുന്ന തോട്ടിൽ വെള്ളത്തിൽ പാൽ നിറം കണ്ടത് ആശങ്ക പടർത്തി. ഇന്നലെ രാവിലെ 11 ന്നോടു കൂടിയാണ് കൂരാച്ചുണ്ട് അങ്ങാടിയിലെ ബാലുശേരി റോഡിന് സമീപമുള്ള മത്സ്യ മാർക്കറ്റിന്‍റെ ഭാഗത്താണ് വെള്ളത്തിൽ നിറമാറ്റം കണ്ടത്. പലരും ഓവുചാലിലും മറ്റും പരിശോധന നടത്തിയെങ്കിലും എവിടെ നിന്നാണ് ഇത് ഉത്ഭവിച്ചതെന്ന് കണ്ടെത്താൻ കഴിഞ്ഞില്ല. പിന്നീട് ആരോഗ്യവകുപ്പ് ഉദ്യോഗസ്ഥരായ ഹെൽത്ത് ഇൻസ്പെക്ടർ എ.സി. അരവിന്ദ്, ജൂനിയർ ഹെൽത്ത് ഇൻസ്പെക്ടർ ജോൺസൺ ജോസഫ് എന്നിവർ സ്ഥലത്തെത്തി പരിശോധന നടത്തി. തോട്ടിൽ നിന്നുള്ള വെള്ളം കോഴിക്കോട് കുന്നമംഗലത്തുള്ള കെമിക്കൽ ലാബിലേക്ക് പരിശോധനയ്ക്കായി നൽകാൻ ശേഖരിച്ചിട്ടുണ്ട്.

കക്കയം - തലയാട് റോഡിൽ ഗതാഗതം പുനസ്ഥാപിച്ചു

കൂരാച്ചുണ്ട്: ശക്തമായ മഴയെ തുടർന്ന് മണ്ണിടിച്ചിലുണ്ടായ മലയോര ഹൈവേ നിർമാണ റോഡിലെ ഇരുപത്തെട്ടാംമൈൽ - തലയാട് റോഡിൽ ഗതാഗതം നിരോധിച്ചിരുന്നത് നിയന്ത്രണങ്ങളോടെ പുനസ്ഥാപിച്ചു. റോഡിന്‍റെ ഇരുപത്താറാം മൈൽ മേഖലയിലാണ് വൻ തോതിൽ മണ്ണിടിഞ്ഞത്. അഞ്ചുദിവസമായി റോഡിൽ കല്ലും മണ്ണും നിറഞ്ഞത് ഭാഗീകമായി നീക്കി ഗതാഗതം നിയന്ത്രണങ്ങളോടെ പുനസ്ഥാപിച്ചതായി അധികൃതർ അറിയിച്ചു. ഇതുവഴി വാഹനങ്ങൾ കടന്നു പോകുന്നുണ്ടെങ്കിലും മഴ തുടർന്നാൽ മണ്ണിടിയാൻ വീണ്ടും സാധ്യതയുള്ളതിനാൽ ജാഗ്രത പാലിക്കണമെന്നും യാത്രാ നിരോധനം തുടരാനിടയുണ്ടെന്നും അറിയിച്ചു.

അനധികൃത നിർമാണ പ്രവർത്തനങ്ങൾ നിർത്തിവയ്ക്കണമെന്ന്

താമരശേരി: പുതുപ്പാടി പഞ്ചായത്തിലെ മൈലള്ളാംപാറ പ്രദേശത്ത് മലയോര മേഖലയിലെ വനാതിർത്തിയോട് ചേർന്ന് കിടക്കുന്ന സ്വകാര്യ വ്യക്തിയുടെ പറമ്പിലെ അനധികൃത നിർമാണ പ്രവർത്തനങ്ങൾ നിർത്തിവയ്ക്കണമെന്ന് മണ്ഡലം കോൺഗ്രസ്‌ കമ്മിറ്റി ആവശ്യപ്പെട്ടു. മാലിന്യ പ്ലാന്‍റാണ് നിർമിക്കുന്നതെന്ന പരിസരവാസികളുടെ ആശങ്കയുടെയും പരാതിയുടേയും അടിസ്ഥാനത്തിൽ ജില്ലാ പഞ്ചായത്ത് മെമ്പർ അംബിക മംഗലത്ത്, പഞ്ചായത്ത് മെമ്പർമാരായ ബീന തങ്കച്ചൻ, ആയിഷ കുട്ടി സുൽത്താൻ, ജാസിൽ പെരുമ്പള്ളി കോൺഗ്രസ്‌ നേതാക്കളായ കമറുദ്ധീൻ അടിവാരം, സജോ വർഗീസ്, ജോർജ് തോമസ് തുടങ്ങിയവർ നാട്ടുകാർക്കൊപ്പം സ്ഥലം സന്ദർശിച്ചു. പരിസ്ഥിതി ലോല പ്രദേശമായ മൈലള്ളാംപാറയിൽ പഞ്ചായത്തിന്‍റെ അനുമതി ഇല്ലാതെയാണ് നിർമാണ പ്രവർത്തനങ്ങൾ നടത്തുന്നതെന്നും ഉടമസ്ഥന് പഞ്ചായത്ത് സ്റ്റോപ്പ് മെമ്മോ നൽകിയിട്ടുണ്ടെന്നും പഞ്ചായത്ത് വൈസ് പ്രസിഡന്‍റ് ഷിജു ഐസക് പറഞ്ഞു.

ജില്ലയിലെ സ്ഥാപനങ്ങളില്‍ അഗ്നിസുരക്ഷ പരിശോധന നടത്തണം: ജില്ലാ വികസന സമിതി

കോഴിക്കോട്: മൊഫ്യൂസില്‍ ബസ്റ്റാന്‍ഡ് കെട്ടിടത്തിലുണ്ടായ അഗ്നിബാധയുടെ പശ്ചാത്തലത്തില്‍ അത്തരം സംഭവങ്ങള്‍ ആവര്‍ത്തിക്കാതിരിക്കാന്‍ ആവശ്യമായ നടപടികള്‍ കൈക്കൊള്ളാന്‍ ജില്ലാ ഭരണകൂടത്തിന്‍റെ ഭാഗത്ത് നിന്നും നടപടിയുണ്ടാവണമെന്ന് ജില്ല വികസന സമിതി യോഗം. സംഭവത്തില്‍ ജില്ലാ ഭരണകൂടത്തിന്‍റെ ഭാഗത്തു നിന്ന് സമഗ്രമായ അന്വേഷണം യോഗം ആവശ്യപ്പെട്ടു. നഗരത്തിലെ തീപിടുത്ത സാധ്യത തടയാന്‍ ആവശ്യമായ നടപടി സ്വീകരിക്കുന്നതിന്റെ ഭാഗമായി സ്ഥാപനങ്ങളില്‍ ഇതിനായി പരിശോധനകള്‍ നടക്കത്തണമെന്നും യോഗത്തില്‍ ടി.പി. രാമകൃഷ്ണന്‍ എംഎല്‍എ ആവശ്യപ്പെട്ടു. പുതിയസ്റ്റാന്‍ഡിലെ തീപ്പിടുത്തത്തില്‍ സമയോചിതമായും കാര്യക്ഷമമായും ഇടപെട്ട ചുമട്ടു തൊഴിലാളികള്‍, മോട്ടോര്‍ തൊഴിലാളികള്‍, ഫയര്‍ ഫോഴ്‌സ്, പോലീസ്, ജില്ലാ ഭരണകൂടം എന്നിവരെ ജില്ലാ വികസന സമിതി അഭിനന്ദിച്ചു. കനാല്‍ സിറ്റി പ്രവൃത്തി പുരോഗതി സംബന്ധിച്ച തടസ്സങ്ങള്‍ പരിശോധിക്കണമെന്ന് തോട്ടത്തില്‍ രവീന്ദ്രന്‍ എംഎല്‍എ ആവശ്യപ്പെട്ടു. 2026 ജനുവരിയോടെ പ്രവൃത്തി അരംഭിക്കാന്‍ കഴിയുമെന്ന് യോഗം വിലയിരുത്തി. ഭൂമി തരം മാറ്റവുമായി ബന്ധപ്പെട്ട് കോഴിക്കോട് താലൂക്കിലാണ് ഏറ്റവും കൂടുതല്‍ ഫയലുകള്‍ കെട്ടി കിടക്കുന്നതെന്നും ഇത് പരിഹരിക്കാന്‍ ആവശ്യമായനടപടികള്‍ ഉണ്ടാവണമെന്നും എംഎല്‍എ പറഞ്ഞു.

60 കുടുംബങ്ങളുടെ നികുതി സ്വീകരിക്കാൻ റവന്യൂ വകുപ്പ് ഉത്തരവിട്ടു

പേരാമ്പ്ര: നെച്ചാട് പഞ്ചായത്തിലെ നൊച്ചാട് വില്ലേജിൽ നികുതി സ്വീകരിക്കാത്തത് മൂലം ഏറെ കഷ്ടതകൾ അനുഭവിച്ചിരുന്ന 60 കുടുംബങ്ങളുടെ നികുതി സ്വീകരിക്കാൻ വകുപ്പ് മന്ത്രിയുടെ അടിയന്തിര ഇടപെടലിന്‍റെ ഭാഗമായി റവന്യൂ വകുപ്പ് ഉത്തരവ് പുറപ്പെടുവിച്ചു. 18.88 ഏക്കർ ഭൂമിയുടെ 69 കുടുംബങ്ങളുടെ അവകാശികൾക്കാണ് ഇതിന്‍റെ ഗുണം ലഭിച്ചിട്ടുള്ളത്. ഏറെ വർഷങ്ങളായി വില്ലേജിൽ നികുതി അടക്കാൻ കഴിയാതിരുന്നത് മൂലം തൊഴിലാളികളും, കർഷകരുമായിട്ടുള്ള കുടുംബങ്ങൾ ദുരിതങ്ങൾ അനുഭവിക്കുകയായിരുന്നു. വിവാഹം, വീട് നിർമാണം തുടങ്ങിയ അത്യാവശ്യങ്ങൾക്ക് ബാങ്ക് വായപ ലഭിക്കുന്നതിനോ, നികുതിശീട്ട് ഹാജരാക്കാനോ കഴിയാതിരുന്നത് ഏറെ പ്രയാസത്തിലാക്കിയിരുന്നു. സിപിഐ മണ്ഡലം കമ്മിറ്റി അംഗം ശശി അമ്പാളി, കിസാൻ സഭ ഭാരവാഹികൾ എന്നിവർ റവന്യു വകുപ്പ് മന്ത്രിയെ നേരിൽ കണ്ട് കാര്യങ്ങൾ ബോധിപ്പിച്ചതിനെ തുടർന്നാണ് വകുപ്പ് കാര്യങ്ങൾ പരിശോധിച്ച് റിപ്പോർട്ട് തയാറാക്കിയത്. ഇതിനെ തുടർന്ന് കൊയിലാണ്ടി താലൂക്കിൽ റവന്യൂ വകുപ്പ് നടത്തിയ അദാലത്തിൽ ഒന്പത് പേരുടെ നികുതി സ്വീകരിക്കാൻ ആദ്യം അനുമതി ലഭിച്ചിരുന്നു. തുടർന്നും സംഘടനാ ഭാരവാഹികൾ നിരന്തരം ഇടപെട്ടാണ് 60 കുടുംബങ്ങളുടെ ജീവിത പ്രശ്നങ്ങളുടെ കുരുക്കഴിക്കാൻ കഴിഞ്ഞത്.

നാലുവരിപ്പാതയുടെ നിർമ്മാണം ഉടൻ തുടങ്ങണമെന്ന്

തിരുവമ്പാടി : ആനക്കാംപൊയിൽ മേപ്പാടി തുരങ്ക പാതയിലേക്ക് കോഴിക്കോട് നിന്നും എളുപ്പത്തിൽ എത്തിച്ചേരാൻ കഴിയുന്ന രൂപത്തിൽ ടണൽ റോഡിന്‍റെ കവാടമായ മറിപ്പുഴയിലേക്ക് നാലുവരിപ്പാതയുടെ നിർമ്മാണവും ആരംഭിക്കണമെന്ന് കേരള വ്യാപാരി വ്യവസായി ഏകോപന സമിതി ആനക്കാംപൊയിൽ യൂണിറ്റ് ആവശ്യപ്പെട്ടു. സെന്‍റ് മേരിസ് പാരീഷ് ഹാളിൽ ചേർന്ന വാർഷിക പൊതുയോഗത്തിൽ വ്യാപാരി വ്യവസായി ഏകോപനസമിതി യൂണിറ്റ് പ്രസിഡന്‍റ് ജോൺസൺ വയലിൽ അധ്യക്ഷത വഹിച്ചു. ജില്ലാ വൈസ് പ്രസിഡന്‍റ് റഫീഖ് മാളിക പൊതുസമ്മേളനം ഉദ്ഘാടനം ചെയ്തു. ആനക്കാംപൊയിൽ ഗ്രാമീണ ബാങ്ക് മാനേജർ ബാബു മുണ്ടക്കനി അസി. മാനേജർ അമൽ ദേവിനും യാത്രയയപ്പ് നൽകി. വനിതാ വിങ്ങ് ആനക്കാംപൊയിൽ യൂണിറ്റ് പ്രസിഡന്‍റ് ദീപ ഷൈജോയെ യോഗത്തിൽ ആദരിച്ചു. വ്യാപാരികളുടെ മക്കളിൽ ഫുൾ എ പ്ലസ് വാങ്ങിയ വിദ്യാർഥികളെ അനുമോദിക്കുകയും ക്യാഷ് അവാർഡുകൾ നൽകുകയും ചെയ്തു.

ഇരുവഴിഞ്ഞി പുഴയിൽ വൻതോതിൽ അറവുമാലിന്യം തള്ളി

മുക്കം: നിരവധി പേർ വിവിധ ആവശ്യങ്ങൾക്കായി ഉപയോഗിക്കുന്ന ഇരുവഴിഞ്ഞി പുഴയിൽ വൻതോതിൽ അറവുമാലിന്യം തള്ളി. കൊയിലാണ്ടി - എടവണ്ണ സംസ്ഥാന പാതയോരത്ത മുക്കം അരീക്കോട് റോഡിലെ പാലത്തിന് സമീപത്തുനിന്നും ചോണാട് പോവുന്ന റോഡരികിൽ നിന്നാണ് രാത്രിയുടെ മറവിൽ പെട്ടികണക്കിന് കോഴിയുടെ പഴകിയ അറവു മാലിന്യം തള്ളിയത്. നിരവധി പേർ കുടിവെള്ളത്തിനായി ഉപയോഗിക്കുന്ന കുടിവെള്ള പദ്ധതിയുടെ പമ്പ് ഹൗസിന് സമീപമാണ് മാലിന്യം തള്ളിയത്.പുഴയിലെ വെള്ളത്തിൽ പരന്നു കിടക്കുന്ന നിലയിലാണ് മാലിന്യം ഉള്ളത്.അസഹ്യമായ ദുർഗന്ധം കാരണം തൊട്ടടുത്ത നിരവധി വീട്ടുകാർക്കും റോഡിലൂടെ യാത്രചെയ്യുന്നവർക്കും. വീടുകളിൽ നിൽക്കാനോ യാത്ര ചെയ്യാനോ കഴിയാത്ത അവസ്ഥയാണുള്ളത്.നാട്ടുകാരുടെ നേതൃത്വത്തിൽ നടത്തിയ പരിശോധനയിൽ മാലിന്യം കൊണ്ടുവന്ന വാഹനത്തിന്റെ ദൃശ്യം ലഭ്യമായിട്ടുണ്ട്. ശനിയാഴ്ച പുലർച്ചെ 3:37 ഓടെ സ്കൂട്ടറിൽ ഒരു സ്ത്രീയും പുരുഷനും. മുക്കം പാലത്തിന് സമീപമെത്തുകയും തൊട്ടുപുറകേ മാലിന്യവുമായി ഒരു ലോറി വരുന്നതും ദൃശ്യങ്ങളിൽ വ്യക്തമാണ്. സ്ത്രീയെ അവിടെ നിർത്തി സ്കൂട്ടറിൽ വന്ന ആൾ മാലിന്യവുമായി വന്ന ലോറിയിൽ കയറി പോയി മാലിന്യം തട്ടിയതിന് ശേഷം 4:20 ത്തോടെ തിരിച്ചു വന്ന് സ്കൂട്ടറിൽ കയറി പോവുന്നതും ദൃശ്യങ്ങളിലുണ്ട്. മുക്കം പോലീസ്, കാരശ്ശേരി പഞ്ചായത് സ്ക്രട്ടറി എന്നിവർ സ്ഥലത്തെത്തി പരിശോധിച്ച് മാലിന്യം തള്ളിയവരെ കണ്ടെത്താനുള്ളനടപടികൾ ആരംഭിച്ചു.

തണ്ണീര്‍ത്തട കയ്യേറ്റത്തില്‍ നൂറോളം വീടുകള്‍ വെള്ളക്കെട്ട് ഭീതിയില്‍

കോഴിക്കോട്: സരോവരം, കോട്ടൂളി മേഖലയിലെ തണ്ണീര്‍ത്തട കയ്യേറ്റത്തില്‍ നൂറോളം വീടുകള്‍ വെള്ളക്കെട്ട് ഭീതിയില്‍. സ്വകാര്യ വ്യക്തികള്‍ തണ്ണീര്‍ത്തടം മണ്ണിട്ട് നികത്തിയതോടെ മഴ പെയ്താല്‍ വെള്ളം വീടുകളിലേക്ക് കയറുകയാണ്. കിടപ്പുരോഗികളും പ്രായമായവരുമുള്‍പ്പെടെ ഭീതിയോടെയാണ് കഴിയുന്നത്.സ്വകാര്യ സ്ഥാപനങ്ങള്‍ തണ്ണീര്‍ത്തടം കയ്യേറിയതിനെതിരെ നാട്ടുകാരുടെ നേതൃത്വത്തില്‍ പ്രക്ഷോഭങ്ങള്‍ സംഘടിപ്പിച്ചെങ്കിലും അധികാരികള്‍ തിരിഞ്ഞു നോക്കുന്നില്ല. സംഭവത്തില്‍ റിപ്പോര്‍ട്ട് സമര്‍പ്പിക്കാന്‍ ജില്ലാ കളക്ടറോട് മനുഷ്യവകാശ കമ്മീഷന്‍ ആവശ്യപ്പെട്ടിട്ടുണ്ട്.

കെഎസ്ആര്‍ടിസി സ്‌റ്റേ റൂമിന് ചോര്‍ച്ച : ജീവനക്കാര്‍ക്ക് ദുരിതം

കോഴിക്കോട് : പാവങ്ങാട് കെഎസ്ആര്‍ടിസി ഡിപ്പോയില്‍ ഡ്രൈവര്‍മാര്‍ക്കും കണ്ടക്ടര്‍മാര്‍ക്കും ഉറങ്ങാനുള്ള സ്‌റ്റേ റൂമില്‍ ചോര്‍ച്ച. മഴക്കാലമായതോടെ പഴയ കെട്ടിടം മുഴുവന്‍ ചോരുകയാണ്. ജീവനക്കാര്‍ക്ക് വിശ്രമിക്കാനുള്ള കേന്ദ്രമാണ് മഴയില്‍ വെള്ളത്തില്‍ മുങ്ങി നില്‍ക്കുന്നത്. സ്‌റ്റേ റൂമിലെ കട്ടില്‍ വരെ പൊട്ടി കിടക്കുകയാണ്. റൂമില്‍ രണ്ട് ഫാനുകള്‍ ഉണ്ടെങ്കിലും പ്രവര്‍ത്തനരഹിതമാണ്. പുലര്‍ച്ചേ ഡ്യൂട്ടിയുള്ളവര്‍ തലേന്ന് വന്ന് താമസിക്കുന്ന മുറിയാണിത്. ഈ മുറിയില്‍ വന്ന് കിടന്നാല്‍ ഉറക്കം നഷ്ടപ്പെട്ട് ഡ്യൂട്ടി തന്നെ അവതാളത്തിലാകുമെന്നാണ് ജീവനക്കാര്‍ പരാതിപ്പെടുന്നു. നിലവില്‍ മുറിയില്‍ വെള്ളം കെട്ടികിടന്ന് നടക്കാനാവാത്ത സാഹചര്യമാണുള്ളത്. അഞ്ച് കട്ടിലുകളാണ് മുറിയില്‍ ആകെ അനുവദിച്ചിരുന്നത്. മഴയില്‍ ഇവയില്‍ പലതും നനഞ്ഞ് നശിക്കുകയാണ്. ചോര്‍ച്ച അടച്ചില്ലെങ്കില്‍ പിന്നെ റൂമിന് പുറത്ത് കിടക്കുന്നതിന് തുല്യമാണ് അകത്തുള്ള അവസ്ഥയെന്നും ഇവര്‍ പറയുന്നു.

എന്നു വരും പൂനൂർ പുഴയ്ക്കു കുറുകെ പാലം

പടനിലം: പുതിയ അധ്യയന വർഷം തുടങ്ങാൻ ദിവസങ്ങൾ മാത്രം ബാക്കിയിരിക്കെ, പടനിലത്തെ ഗതാഗതക്കുരുക്കിനു പരിഹാരമാകുമെന്നു കരുതുന്ന പുതിയ പാലം ഇത്തവണയും പൂർത്തിയായില്ല പടനിലം– സിഎം– മഖാം നരിക്കുനി റൂട്ടിൽ പൂനൂർ പുഴയ്ക്കു കുറുകെ 50 വർഷത്തോളം പഴക്കമുള്ള പാലത്തിന് സമീപമാണ് പുതിയ പാലം നിർമിക്കുന്നത്. ഒന്നര വർഷം മുൻപ് തുടങ്ങിയ പ്രവൃത്തി പാതി പോലും പൂർത്തിയായിട്ടില്ല. എട്ട് കോടിയോളം ചെലവഴിച്ച് പൊതുമരാമത്ത് വകുപ്പിന്‍റെ മേൽനോട്ടത്തിൽ ഊരാളുങ്കൽ സൊസൈറ്റി ആണ് പാലം നിർമാണം നടത്തുന്നത്. പുഴയിലെ രണ്ട് തൂണുകളും അപ്രോച്ച് റോഡ് ഭാഗത്തെ രണ്ട് തൂണുകളും സ്പാൻ സ്ലാബുകളിൽ 4 എണ്ണവും മാത്രമാണ് പൂർത്തിയായത്. പുഴയുടെ പ്രധാന ഭാഗത്ത് നിർമാണം ഇതുവരെ തുടങ്ങിയിട്ടില്ല. മഴ തുടങ്ങി പുഴയിൽ ജലനിരപ്പ് ഉയർന്നതോടെ പ്രവൃത്തി പൂർണമായി തടസ്സപ്പെട്ട നിലയിലാണ്. സ്പാൻ നിർമാണത്തിനുള്ള കമ്പിയും മറ്റും തയാറാക്കി വച്ചത് മഴയിൽ തുരുമ്പെടുത്ത് നിർമാണത്തകരാറിന് ഇടയാക്കുമോ എന്ന ആശങ്കയിലാണ് നാട്ടുകാർ. പാലം പൂർത്തിയായാലും അപ്രോച്ച് റോഡും ടാറിങ്ങും പൂർത്തിയാക്കാൻ പിന്നെയും സമയമെടുക്കും.

കോഴിക്കോട് കോര്‍പറേഷനില്‍ നടക്കുന്നത് കൊള്ളയടി: രമേശ് ചെന്നിത്തല

കോൺഗ്രസ് കോർപറേഷന്‍ ഓഫീസ് ഉപരോധിച്ചു കോഴിക്കോട് : മേയറും ഡെപ്യൂട്ടി മേയറും സിപിഎമ്മും ചേര്‍ന്ന കോക്കസിന്‍റെ കൊള്ളയടിയാണ് കോഴിക്കോട് കോര്‍പറേഷനില്‍ നടക്കുന്നതെന്ന് കോണ്‍ഗ്രസ് പ്രവര്‍ത്തക സമിതി അംഗം രമേശ് ചെന്നിത്തല. കോഴിക്കോട് കോര്‍പ്പറേഷന്‍റെ കമ്മീഷന്‍ കൊള്ളക്കും അഴിമതിക്കുമെതിരെ ജില്ല കോണ്‍ഗ്രസ് കമ്മിറ്റിയുടെ നേതൃത്വത്തില്‍ നടത്തിയ കോര്‍പറേഷന്‍ ഓഫീസ് ഉപരോധം ഉദ്ഘാടനം ചെയ്യുകയായിരുന്നു അദ്ദേഹം. കോര്‍പറേഷന്‍റെ കൊള്ള പണം എങ്ങോട്ടു പോകുന്നുവെന്നതിന്‍റെ മറുപടിയാണ് കോര്‍പറേഷന്‍ സൂപ്രണ്ടിങ് എന്‍ജിനിയറുടെ വീട്ടില്‍ നടന്ന വിജിലന്‍സ് റെയ്ഡ്. കോര്‍പറേഷന്‍ അഴിമതി മഞ്ഞുമലയുടെ ഒരറ്റം മാത്രമാണിത്. മേയര്‍ക്കും ഡെപ്യൂട്ടി മേയര്‍ക്കും വൈകാതെ രാജി വെയ്‌ക്കേണ്ടി വരുമെന്നും ചെന്നിത്തല പറഞ്ഞു. സംസ്ഥാനത്തെ ഒന്‍പത് വര്‍ഷം കട്ടു മുടിച്ച പിണറായി ഭരണത്തിന്റെ അഴിമതി തുടര്‍ച്ചയുടെ ഭാഗമാണ് കോഴിക്കോട് കോര്‍പറേഷനിലും നടക്കുന്നത്. കോര്‍പറേഷനില്‍ കഴിഞ്ഞ അന്‍പത് വര്‍ഷം ഭരിച്ചിട്ട് കോഴിക്കോടിന് വേണ്ടി എന്ത് ചെയ്തതെന്ന് പറയാനുള്ള ബാധ്യത സിപിഎമ്മിനുണ്ട്. കമ്മീഷന്‍ ഭരണമാണ് കോര്‍പ്പറേഷന്‍ നടത്തുന്നത്. കമ്മീഷന്‍ ഉറപ്പിച്ചാണ് പാളയത്ത് നിന്നും പച്ചക്കറി മാര്‍ക്കറ്റ് മാറ്റുന്നത്. കമ്മീഷന്‍ ഉറപ്പിക്കാത്തതിനാലാണ് മെഡിക്കല്‍ കോളേജ് ബസ് ടെര്‍മിനല്‍ ഉള്‍പ്പെടെ നടപ്പിലാകാത്തത്. കമ്മീഷനും കൊള്ളയടിയും തുടരുന്നവര്‍ വാര്‍ഡ് വിഭജിച്ച് വീണ്ടും ഭരണം പിടിക്കാന്‍ ശ്രമിക്കുകയാണ്. പ്രബുധരായ ജനത്തെ ഇനിയും വിഡ്ഢികളാക്കാനാകില്ലെന്നും ഇതുവരെ കൊള്ളയടിച്ച ഒരോ രൂപക്കും കോര്‍പറേഷന്‍ മറുപടി നല്‍കേണ്ടി വരുമെന്നും അദ്ദേഹം കൂട്ടിചേര്‍ത്തൂ. രാവിലെ 6.30ന് കോര്‍പ്പറേഷന്‍ ഓഫീസ് പരിസരത്ത് എത്തിയ കോണ്‍ഗ്രസ് നേതാക്കളും പ്രവര്‍ത്തകരുടെ ഓഫീസിന്‍റെ പ്രധാന കവാടം ഉള്‍പ്പെടെ മൂന്ന് ഗേറ്റുകളും വളഞ്ഞു. ഗേറ്റിന് മുന്നില്‍ പ്രതിഷേധിച്ച പ്രവര്‍ത്തകരെ മാറ്റാന്‍ പോലീസ് ശ്രമിച്ചത് നേരിയ ഉന്തും തള്ളിനും ഇടയാക്കി. ഓഫീസിലേക്ക് കടക്കാനുള്ള ജീവനക്കാരുടെ ശ്രമത്തെ പ്രവര്‍ത്തകര്‍ ശക്തമായി തടഞ്ഞതോടെ ജീവനക്കാര്‍ ബീച്ച് പരിസരത്തേക്ക് മടങ്ങി. രാവിലെ ആരംഭിച്ച കനത്ത മഴയെ പോലും അവഗണിച്ച് സ്ത്രീകളുള്‍പ്പെടെയുള്ള ആയിരകണക്കിന് പ്രവര്‍ത്തകരാണ് ഉപരോധസമരത്തില്‍ പങ്കെടുത്തത്. പത്തുമണിയോടെ എത്തിയ രമേശ് ചെന്നിത്തല മൂന്നു ഗേറ്റിലുമായി തമ്പടിച്ച പ്രവര്‍ത്തകരെ നേരിട്ട് കണ്ട് അഭിവാദ്യമര്‍പ്പിച്ചതിന് ശേഷമാണ് ഉദ്ഘാടന വേദിയിലേക്ക് എത്തിയത്. ഉച്ചക്ക് 12മണിയോട് കൂടിയാണ് ഉപരോധം അവസാനിപ്പിച്ച് പ്രവര്‍ത്തകര്‍ മടങ്ങിയത്. ഡിസിസി പ്രസിഡന്‍റ് അഡ്വ. കെ. പ്രവീണ്‍കുമാര്‍ അധ്യക്ഷത വഹിച്ചു. എം.കെ രാഘവന്‍ എംപി, അഡ്വ. ടി. സിദ്ദിഖ് എംഎല്‍എ, മുസ്ലീം ലീഗ് ജില്ല പ്രസിഡന്‍റ് എം.എ റസാഖ്, കെപിസിസി ജനറല്‍ സെക്രട്ടറിമാരായ അഡ്വ. കെ. ജയന്ത്, പി.എം നിയാസ് ഉള്‍പ്പെടെയുള്ളവര്‍ പ്രസംഗിച്ചു.

യുവാവിനെ മരിച്ച നിലയിൽ കണ്ടെത്തി

‌കോഴിക്കോട്: ചാലപ്പുറത്ത്‌ നിന്ന് കഴിഞ്ഞ ദിവസം കാണാതായ യുവാവിനെ മാവൂർ റോഡിൽ മരിച്ച നിലയിൽ കണ്ടെത്തി. ചാലപ്പുറം അച്യുതൻ ഗേൾസ് സ്‌കൂളിന് സമീപം പിവിഎസ് ടവേർസിൽ 7ഡിയിൽ താമസിക്കുന്ന കോട്ടയം ചങ്ങനാശേരി വാഴപ്പള്ളി സ്വദേശി മഹേഷ് ഗോപാല കൃഷ്ണൻ (45) ആണ് മരിച്ചത്. ശനിയാഴ്ച രാവിലെ 8.45ന് മാവൂർ റോഡിൽ റാവിസ് ഹോട്ടലിനും ഹിറാ സെന്‍ററിനുമിടിയിലാണ് മൃതദേഹം കണ്ടെത്തിയത്. സ്ഥിരമായി നടക്കാൻ പോകുന്നയാളാണ് മഹേഷ്. വെള്ളിയാഴ്ച വൈകിട്ട് നടക്കാനിറങ്ങിയ മഹേഷ് ഏറെ കഴിഞ്ഞിട്ടും തിരിച്ചെത്തിയില്ല. തുടർന്ന് വീട്ടുകാരും സുഹൃത്തുക്കളും കസബ പോലീസിൽ പരാതി നൽകുകയായിരുന്നു. എല്ലാദിവസവും പോകുന്ന വഴിയിൽ പോലീസും സുഹൃത്തുക്കളും തെരഞ്ഞെങ്കിലും കണ്ടെത്തിയില്ല. ഇന്നലെ രാവിലെ റോഡിന് സമീപം മൃതദേഹം കണ്ട നാട്ടുകാരാണ് പോലീസിൽ അറിയിച്ചത്. ഹൃദയാഘാദമാണ് മരണകാരണമെന്നാണ് പ്രാഥമിക പോസ്റ്റ് മോർട്ടം റിപ്പോർട്ട്. മഹേഷ് ഷിപ്പിൽ ക്യാപ്റ്റാണ്. അച്ഛൻ: ഗോപാല കൃഷ്ണൻ. അമ്മ: രാജലക്ഷ്മി. ഭാര്യ: മേഘ്‌ന മഹേഷ്. മകൾ: മഞ്ജു മഹേഷ്. സഹോദരൻ: രാംപ്രകാശ്. സംസ്‌കാരം ഇന്ന് പത്തിന് പുതിയപാലം ബ്രാഹ്‌മണ ശ്മശാനത്തിൽ.

കോടഞ്ചേരി പഞ്ചായത്തിനെ അതിദാരിദ്ര്യ മുക്ത പഞ്ചായത്തായി പ്രഖ്യാപിച്ചു

കോടഞ്ചേരി: കോടഞ്ചേരി പഞ്ചായത്ത് അതിദരിദ്രരായി കണ്ടെത്തിയ 77 പേർക്കായി വിവിധങ്ങളായ പദ്ധതികളുടെ സഹായത്തോടുകൂടി ആവശ്യമായ 60 ലക്ഷം രൂപയുടെ സഹായങ്ങൾ നൽകി അതി ദാരിദ്ര്യ മുക്ത പഞ്ചായത്തായി കോടഞ്ചേരി പഞ്ചായത്തിനെ പ്രസിഡന്‍റ് അലക്സ് തോമസ് ചെമ്പകശേരി പ്രഖ്യാപിച്ചു. വൈസ് പ്രസിഡന്‍റ് ജമീല അസീസിന്‍റെ അധ്യക്ഷതയിൽ ചേർന്ന യോഗത്തിൽ ക്ഷേമകാര്യ സ്റ്റാൻഡിംഗ് കമ്മിറ്റി ചെയർപേഴ്സൺ സൂസൻ വർഗീസ്, ആരോഗ്യ വിദ്യാഭ്യാസ സ്റ്റാൻഡിംഗ് കമ്മിറ്റി ചെയർമാൻ സിബി ചിരണ്ടായത്ത്, പഞ്ചായത്ത് മെമ്പർമാരായ ജോർജുകുട്ടി വിളക്കുന്നൽ, റോസിലി മാത്യു, റിയാനസ് സുബൈർ, വനജാ വിജയൻ, ലീലാമ്മ കണ്ടത്തിൽ, റോസമ്മ കയത്തുങ്കൽ, ലിസി ചാക്കോ, ഷാജി മുട്ടത്ത്, ബിന്ദു ജോർജ്, ചിന്നാ അശോകൻ തുടങ്ങിയവർ ചടങ്ങിൽ സംബന്ധിച്ചു.

ടാര്‍സന്‍ ജോസ് ആര്‍ജെഡി മണ്ഡലം പ്രസിഡന്‍റ്

കോഴിക്കോട്: ആര്‍ജെഡി തിരുവമ്പാടി നിയോജകമണ്ഡലം പ്രസിഡന്‍റായി ടാര്‍സന്‍ ജോസ് കോക്കാപ്പിള്ളിയെ തിരഞ്ഞെടുത്തു. അബ്രാഹം മാനുവല്‍, ഇളമന ഹരിദാസ്.ജോണ്‍സണ്‍ കുളത്തുങ്കല്‍, അന്നമ്മ മംഗയില്‍ ,സുബൈര്‍ അത്തുളി, മുഹമ്മദ് കുട്ടി പുളിക്കല്‍, നിസ്താര്‍, മനോജ് മൂത്തേടത്ത്, രാജേഷ് പൊട്ടിയില്‍, റഷീദ് തോട്ടപ്പാളി, ജോര്‍ജ് പ്ലാക്കാട്ട്, ജില്‍സ് ഇടമനശ്ശേരി മാത്യു മഗര, സത്യന്‍ പനക്കച്ചാല്‍ എന്നിവരെ നിയോജക മണ്ഡലം കമ്മിറ്റി അംഗങ്ങളായി തിരഞ്ഞെടുത്തു. തിരഞ്ഞെടുപ്പ് നടപടികള്‍ റീട്ടേണിംഗ് ഓഫിസര്‍ വി.എ. ജോസ് വരകാപ്പള്ളി നിയന്ത്രിച്ചു. വിജയിച്ചവരെ ദേശീയ കണ്‍സില്‍ അംഗം പി.എം. തോമസ് , ജില്ലാ സെക്രട്ടറി വില്‍സന്‍ പുല്ലുവേലി, ജോര്‍ജ് മംഗര എന്നിവര്‍ അനുമോദിച്ചു.

വാർഷികാഘോഷവും കുടുംബസംഗമവും

കൂടരഞ്ഞി: ബത്തേരി രൂപതയുടെ സാമൂഹ്യക്ഷേമ പ്രസ്ഥാനമായ സോഷ്യൽ സർവീസ് സെന്‍റർ കൂടരഞ്ഞി യൂണിറ്റിന്‍റെ ഒന്നാം വാർഷികവും കുടുംബ സംഗമവും നടത്തി. കോഴിക്കോട് മേഖല ഡയറക്ടർ ഫാ. തോമസ് മണ്ണിത്തോട്ടത്തിൽ അധ്യക്ഷനായിരുന്ന പൊതുയോഗം ലിന്‍റോ ജോസഫ് എംഎൽഎ ഉദ്ഘാടനം ചെയ്തു. കൂടരഞ്ഞി പഞ്ചായത്ത് പ്രസിഡന്‍റ് ആദർശ് ജോസഫ് മുഖ്യാതിഥിയായിരുന്നു. കൂടരഞ്ഞി സെന്‍റ് സെബാസ്റ്റ്യൻസ് പള്ളി വികാരി ഫാ. ബിനോയ് പുരയിടത്തിൽ അനുഗ്രഹ പ്രഭാഷണം നടത്തി. ജനപ്രതിനിധികളായ ജെറീന റോയ്, ബിന്ദു ജയൻ എന്നിവരെ പൊന്നാടയണിയിച്ച് ആദരിച്ചു. കൂടാതെ എസ്എസ്എൽസി, പ്ലസ് ടു പരീക്ഷകളിൽ ഉന്നത വിജയം നേടിയ ശ്രേയസ് കുടുംബാംഗങ്ങളായ 19 കുട്ടികൾക്ക് മൊമെന്‍റോ നൽകി. ശ്രേയസ് കോഴിക്കോട് മേഖല കോഡിനേറ്റർ ലിസി റെജി മുഖ്യപ്രഭാഷണം നടത്തി. മേഖല ആനിമേറ്റർ ഐസക്ക് മനക്കത്തോട്ടം, യൂണിറ്റ് സെക്രട്ടറി സജി പുളിക്കണ്ടം, കമ്മിറ്റി അംഗമായ ജോമ സുരേഷ് എന്നിവർ പ്രസംഗിച്ചു.

സിഒഡിയുടെ ആശാകിരൺ പദ്ധതി ഉദ്ഘാടനം ചെയ്തു

കോടഞ്ചേരി: താമരശേരി രൂപതയുടെ സാമൂഹ്യ സേവന വിഭാഗമായ സിഒഡിയുടെ കീഴിലുള്ള ഗ്രാമ വികസന സമിതിയുടെ (ജിവിഎസ്) 24-ാം വാർഷികാഘോഷം നടത്തി. ചടങ്ങിൽ വിദ്യാർഥികൾക്ക് പഠനോപകരണ വിതരണം ചെയ്തു. കോടഞ്ചേരി സെന്‍റ് മേരീസ് ഫൊറോന വികാരി ഫാ. കുര്യാക്കോസ് ഐക്കുളമ്പിൽ സിഒഡിയുടെ ആശാകിരൺ പദ്ധതി ഉദ്ഘാടനം ചെയ്തു. ജിവിഎസ് പ്രസിഡന്‍റ് കെ.സി റോസമ്മയുടെ അധ്യക്ഷത വഹിച്ചു. സിഒഡി ഡയറക്ടർ ഫാ. സായി പാറൻകുളങ്ങര ആമുഖ പ്രഭാഷണം നടത്തി. ഏരിയ കോഡിനേറ്റർ ഷീജ ടോബി, വാർഡ് മെമ്പർ സിസിലി കോട്ടുപ്പള്ളി, സിഒഡി പ്രോഗ്രാം കോഡിനേറ്റർ കെ.സി. ജോയ്, ജിവിഎസ് സെക്രട്ടറി ആലീസ് തോമസ് എന്നിവർ പ്രസംഗിച്ചു.

വികസിത് കൃഷി സങ്കൽപ് അഭിയാൻ പദ്ധതിയ്ക്ക് ജില്ലയിൽ തുടക്കമായി

കോഴിക്കോട്: രാജ്യത്തെ ഒന്നരകോടി കർഷകരുമായി കാർഷിക ശാസ്ത്രജ്ഞരും വിദഗ്ധരും നേരിട്ടു സംവദിക്കുന്ന ‘വികസിത് കൃഷി സങ്കൽപ് അഭിയാൻ’ പദ്ധതിക്ക് ജില്ലയിൽ തുടക്കമായി. കോഴിക്കോട് ജില്ലയിൽ ഐസിഎആർ - ഭാരതീയ സുഗന്ധവിള ഗവേഷണ സ്ഥാപനവും കൃഷി വിജ്ഞാന കേന്ദ്രവും സംയുക്തമായി സംഘടിപ്പിക്കുന്ന കാമ്പയിനിന്‍റെ പര്യടന വാഹനം ഗവേഷണ സ്ഥാപനത്തിൽ നടന്ന ചടങ്ങിൽ ഡയറക്ടർ ഡോ. ആർ. ദിനേശ് ഫ്ലാഗ് ഓഫ് ചെയ്തു. ജൂൺ 12 വരെ ജില്ലയുടെ വിവിധ പ്രദേശങ്ങളിൽ ഇതിന്‍റെ ഭാഗമായി ശാസ്ത്രജ്ഞരും ഉദ്യോഗസ്ഥരുമടങ്ങുന്ന സംഘം കർഷകരെ നേരിൽ കണ്ട് സംവദിക്കും. ഗവേഷണവും പ്രായോഗിക പ്രയോഗവും തമ്മിലുള്ള വിടവ് നികത്താനും, സമഗ്രവും സുസ്ഥിരവുമായ വളർച്ചയ്ക്കായി കർഷക നേതൃത്വത്തിലുള്ള നവീകരണങ്ങളെ പ്രോത്സാഹിപ്പിക്കാനും വികസിപ്പിക്കാനും ലക്ഷ്യമിട്ടാണ് വികസിത കൃഷി സങ്കൽപ് കാമ്പയിന് തുടക്കമിട്ടിരിക്കുന്നത്. ജില്ലയിൽ ആദ്യദിനം എലത്തൂർ, ഒളവണ്ണ, നല്ലളം എന്നിവിടങ്ങളിലായാണ് കർഷകരുമായുള്ള സംവാദം സംഘടിപ്പിച്ചത്. ഇതിനോടൊപ്പം കെവികെയുടെ നേതൃത്വത്തിൽ സുവർണ്ണ സമൃദ്ധി സുഗന്ധവിള യാത്രയും ജില്ലയിൽ പര്യടനം നടത്തി.

ചക്കിട്ടപാറയിൽ ചുഴലിക്കാറ്റ്: വൻ നാശനഷ്ടം

പേരാമ്പ്ര: ചക്കിട്ടപാറ പഞ്ചായത്തിലെ 9, 12.13, 14 വാർഡ് പ്രദേശങ്ങളിൽ വ്യാഴാഴ്ച രാത്രി പത്തരയോടെയുണ്ടായ ചുഴലിക്കാറ്റിൽ വ്യാപക നാശ നഷ്ടം. നിരവധി വീടുകൾക്കുമേൽ മരങ്ങൾ കടപുഴകി വീണു. റോഡിൽ ഗതാഗത തടസമുണ്ടായി. അനേകം വൈദ്യുതി തൂണുകളും കമ്പിയും തകർന്നു. വ്യാപകമായ കൃഷി നശിച്ചു. നരിനട പനമറ്റത്തിൽ ജിന്‍റോയ്ക്ക് വലിയ കൃഷി നാശമാണ് സംഭവിച്ചിരിക്കുന്നത്. വല്ലനാട്ട് അന്നമ്മ, തങ്കച്ചൻ, സിജോ, ജോയി എന്നിവർക്കും കൃഷി നാശമുണ്ടായി. പറക്കൽ ബെന്നിയുടെ കോഴിഫാമിനു തകരാർ പറ്റി. ഷൈജൻ പാറുകുന്നേൽ, കനവ് സുരേഷ്, അത്തിക്കോളിൽ അസീസ്, സജി പുളിക്കൽ, വിജയൻ കണയങ്കൽ, പൊതിക്കനാട്ട് ജോസഫ്, ബിജു പനമറ്റം, പ്രകാശ്‌ തലച്ചിറ, ചക്കാലയിൽ ജോസ്, ശ്രീനി കുറ്റിപ്ലായി, റോബി കുരിശൃം മൂട്ടിൽ, ഫിലിപ്പ് പാറപ്പുറത്ത്, ആനീസ് പാറപ്പുറത്ത്, സിബി പനമറ്റത്തിൽ, തോട്ടുപുറം ജെയിംസ് എന്നിവർക്കും കൃഷി നാശമുണ്ടായി. റിസോർട്ട് ഉടമ കോമത്ത് സവിതക്കും നഷ്ടം നേരിട്ടു. ടോം പനമറ്റം, സുജിത്ത്, രാജൻ കുളത്തുവയൽ, നാരായണൻ, ബഷീർ കുരിട്ടിയത്ത്, ലിസി കിഴക്കേടത്ത്, ബിനു വട്ടക്കണ്ടി, രജ്ഞിത്ത് ഇലവന്തിക്കൽ, സുരേഷ് കരുമാം തടത്തിൽ എന്നിവർക്കും കാറ്റിൽ നാശനഷ്ടമുണ്ടായി. ചക്കിട്ടപാറ കൂടക്കൊല്ലിയിൽ വിരണപ്പുറത്ത് മൂസയുടെ വീടിനു മേൽ മരം വീണു. എടാട്ട് ഷിബുവിന്‍റെ വീടിന്‍റെ മതിൽ മരം വീണ് തകർന്നു. കണിയാങ്കണ്ടി ആണ്ടി, ദാമോദരൻ കിഴക്കേപറമ്പിൽ എന്നിവർക്കും നാശമുണ്ടായി. മാളിയേക്കൽ വർക്കി (ബേബി) ക്കും റബർ ഉൾപ്പടെ വൻ കൃഷി നാശമുണ്ടായി. കൂത്രപ്പള്ളിൽ വിജയകുമാർ, ജോസഫ് കാരിമറ്റം, രമാ മണി ആലോകൂട്ടത്തിൽ, വിജയൻ ചെറിയ കോട്ടച്ചാലിൽ എന്നിവർക്കും നാശനഷ്ടം നേരിട്ടു. ചക്കിട്ടപാറ അമ്പലം ഭാഗത്ത് വിനയ പുരി അനിയന്‍റെ ഇരുനില വീടിനു മീതെ തെങ്ങും വലിയ മരങ്ങളും പതിച്ച് മേൽ കൂര തകർന്നു. സമീപവാസി കണിയാങ്കണ്ടി അശോകന്‍റെ കൃഷിയിടം നശിച്ചു. ഡോ. ലീല രാമകൃഷ്ണനും, പാറക്കൽ രഘുവരനും കൃഷി നാശ നഷ്ടം നേരിട്ടു. ചെമ്പ്ര റോഡിൽ ചെരിയം പുറത്ത് തോമസിന്‍റെ വീടിനു മീതെ വലിയ തെങ്ങ് കടപുഴകി വീണ് തകരാർ സംഭവിച്ചു. ജോസ്‌ തോണക്കര, സജി കാരിമറ്റം എന്നിവർക്കും കൃഷി നാശമുണ്ടായി. മറുമണ്ണ് ഭാഗത്ത് ചെറുവുള്ളാട്ട് അപ്പച്ചൻ, വിജയകുമാർ മുക്കള്ളിൽ എന്നിവർക്കും ചക്കിട്ടപാറയിൽ കാപ്പുകാട്ടിൽ ബേബിക്കും കൃഷി നാശമുണ്ടായി. വാർഡ് 9, 12 വാർഡുകളിലാണ് നഷ്ടങ്ങൾ ഏറെയും.

കൂറ്റൻ പരസ്യബോർഡുകൾ: ജനങ്ങളുടെ സുരക്ഷ ഉറപ്പാക്കണമെന്ന്

കോഴിക്കോട്: മലാപറമ്പ്-വെങ്ങളം ബൈപാസിൽ മൊകവൂർ-പൂളാടിക്കുന്ന് സർവീസ് റോഡിൽ കൂറ്റൻ പരസ്യബോർഡ് കാറ്റിൽ നിലംപതിച്ച സാഹചര്യത്തിൽ പൊതുജനങ്ങളുടെ സുരക്ഷക്കായി കർശന നടപടികൾ സ്വീകരിക്കണമെന്ന് മനുഷ്യാവകാശ കമ്മീഷൻ ജുഡീഷ്യൽ അംഗം കെ. ബൈജുനാഥ് ഉത്തരവിട്ടു. കോഴിക്കോട് കോർപറേഷൻ സെക്രട്ടറിക്കാണ് കമ്മീഷൻ നിർദേശം നൽകിയത്. 15 ദിവസത്തിനകം റിപ്പോർട്ട് സമർപ്പിക്കണം. ജൂൺ 26ന് കോഴിക്കോട് ഗവ. ഗസ്റ്റ് ഹൗസിൽ നടക്കുന്ന സിറ്റിംഗിൽ കേസ് പരിഗണിക്കും. പത്രവാർത്തയുടെ അടിസ്ഥാനത്തിലാണ് കമ്മീഷൻ സ്വമേധയാ കേസെടുത്തത്. സ്വകാര്യ വ്യക്തികളുടെ സ്ഥലം വാടകയ്ക്കെടുത്താണ് കൂറ്റൻ പരസ്യഹോർഡിംഗുകൾ സ്ഥാപിക്കുന്നത്. വേങ്ങേരി, ചേവരമ്പലം തുടങ്ങിയ സ്ഥലങ്ങളിലുള്ള കൂറ്റൻ ഹോർഡിംഗുകളും അപകടാവസ്ഥയിലാണ്. ഇവ മാറ്റണമെന്ന് ദേശീയപാതാ അഥോറിറ്റി കോർപറേഷൻ സെക്രട്ടറിക്ക് നോട്ടീസ് നൽകിയിരുന്നതായും മനസിലാക്കുന്നു. നഗരത്തിൽ വിവിധ സ്ഥലങ്ങളിലായി സ്ഥാപിച്ചിട്ടുള്ള 43 ബോർഡുകൾ അപകടാവസ്ഥയിലാണെന്ന് സിറ്റി പോലീസ് ജില്ലാ ദുരന്തനിവാരണ വകുപ്പിന് കത്ത് നൽകിയതായും മനസിലാക്കുന്നു.

മാലിന്യം വലിച്ചെറിയല്‍; നടപടി കടുപ്പിച്ച് ശുചിത്വമിഷന്‍

കോഴിക്കോട്: പൊതു ഇടങ്ങളില്‍ മാലിന്യങ്ങള്‍ വലിച്ചെറിയുന്ന സംഭവങ്ങളില്‍ കര്‍ശന നടപടിയുമായി ശുചിത്വമിഷന്‍. അലക്ഷ്യമായി മാലിന്യങ്ങള്‍ വലിച്ചെറിഞ്ഞ സംഭവങ്ങളില്‍ ഇതുവരെ ലഭിച്ച 4772 പരാതികളില്‍ 30.67 ലക്ഷം രൂപ പിഴ ഈടാക്കിയതായി അധികൃതര്‍ അറിയിച്ചു. പൊതുജനങ്ങള്‍ക്ക് പരാതി നല്‍കാനുള്ള സിംഗിള്‍ വാട്സപ്പ് നമ്പറില്‍ 7921 പരാതികളാണ് ഇതുവരെ വന്നത്. പൊതു ഇടങ്ങളിലും മറ്റും മാലിന്യ കൂമ്പാരങ്ങളും മാലിന്യം നിറഞ്ഞ വെള്ളക്കെട്ടുകളും ശ്രദ്ധയില്‍ പെട്ടാല്‍ 9446 700 800 എന്ന നമ്പറില്‍ ഫോട്ടോയെടുത്ത് അയക്കാനുള്ള നിര്‍ദേശമാണ് ശുചിത്വമിഷന്‍ നല്‍കിയിരിക്കുന്നത്. തദ്ദേശ സ്വയം ഭരണ സ്ഥാപനങ്ങളുടെ നേതൃത്വത്തില്‍ ശുചീകരണ പ്രവര്‍ത്തനങ്ങള്‍ നടക്കുന്നുണ്ടെങ്കിലും കാണാതെ പോകുന്ന മാലിന്യക്കൂമ്പാരങ്ങള്‍ പൊതുജനങ്ങള്‍ അറിയിക്കുന്നത് മൂലം നീക്കാന്‍ സാധിക്കുമെന്നാണ് ഈ പദ്ധതിയിലൂടെ ലക്ഷ്യമിടുന്നതെന്നും അധികൃതര്‍ അറിയിച്ചു. പരാതി അറിയിക്കുന്നവര്‍ക്ക് 25,000 രൂപ വരെ പാരിതോഷികമായി നല്‍കും. അതേസമയം, തദ്ദേശസ്ഥാപനങ്ങളുടെ നേതൃത്വത്തില്‍ മഴക്കാല പൂര്‍വ ശുചീകരണ പ്രവര്‍ത്തനങ്ങള്‍ നടത്തിയതായും ജില്ലയില്‍ ഹോട്ട്സ്പോട്ടുകളായി കണക്കാക്കിയിരിക്കുന്ന ഇടങ്ങളെല്ലാം കണ്ടെത്തി വൃത്തിയാക്കിയതായും ജില്ലാ ശുചിത്വ മിഷന്‍ കോ-ഓര്‍ഡിനേറ്റര്‍ കെ.ടി.രാകേഷ് അറിയിച്ചു. ജില്ലയില്‍ വാര്‍ഡ് തലത്തില്‍ കമ്മിറ്റികള്‍ രൂപീകരിച്ചുള്ള പ്രവര്‍ത്തനങ്ങളില്‍ 2091 സ്ഥലങ്ങളില്‍ ശുചീകരണ പ്രവര്‍ത്തികള്‍ നടന്നു. സന്നദ്ധ സംഘടനകള്‍ വഴി 569 സ്ഥലങ്ങളിലും, ഓടകളും അഴുക്കുചാലുകളുമടക്കം 4652 ജലസ്രോതസ്സുകള്‍ ശുചീകരിച്ചതായും അദ്ദേഹം പറഞ്ഞു.

ജില്ലയില്‍ മഴക്കെടുതികള്‍ തുടരുന്നു : മൂന്നു ക്യാമ്പുകളിലായി കഴിയുന്നത് 130 പേർ

കോഴിക്കോട്: മഴക്കെടുതികളെ തുടര്‍ന്ന് ജില്ലയില്‍ ആരംഭിച്ച മൂന്ന് ദുരിതാശ്വാസ ക്യാമ്പുകളിലായി നിലവില്‍ കഴിയുന്നത് 43 കുടുംബങ്ങളില്‍ നിന്നുള്ള 130 പേര്‍. വടകര താലൂക്കിലെ വിലങ്ങാട് വില്ലേജില്‍ ഒന്നും കോഴിക്കോട് താലൂക്കിൽ കസബ, ചേവായൂര്‍ വില്ലേജുകളിലായി ഓരോന്നും ക്യാമ്പുകളാണ് നിലവിലുള്ളത്. വിലങ്ങാട് വില്ലേജിലെ ക്യാമ്പില്‍ 44 കുടുംബങ്ങളില്‍ നിന്നുള്ള 50 പുരുഷന്മാരും 37 സ്ത്രീകളും 21 കുട്ടികളുമായി 108 പേരാണ് കഴിയുന്നത്. വിലങ്ങാട് ഉരുള്‍പൊട്ടല്‍ ഭീഷണി നിലനില്‍ക്കുന്ന പ്രദേശങ്ങളിലെ താമസക്കാരെയാണ് ക്യാമ്പിലേക്ക് മാറ്റിയിരിക്കുന്നത്. കോഴിക്കോട് താലൂക്കിലെ രണ്ട് ക്യാമ്പുകളിൽ 6 കുടുംബങ്ങളില്‍നിന്നായി 6 പുരുഷന്മാരും 9 സ്ത്രീകളും 7 കുട്ടികളും അടക്കം 22 പേരെ മാറ്റിപ്പാര്‍പ്പിച്ചിട്ടുണ്ട്. വീടുകളില്‍ വെള്ളം കയറിയതിനെ തുടര്‍ന്നാണ് ഇവരെ ക്യാമ്പുകളിലേക്ക് മാറ്റിയത്. ഇതിനു പുറമെ, ജില്ലയുടെ വിവിധ ഭാഗങ്ങളില്‍ വീടുകളില്‍ വെള്ളം കയറുകയും മരവും മറ്റും വീണ് വീടുകള്‍ക്ക് ഭാഗികമായി കേടുപാടുകള്‍ സംഭവിക്കുകയും ചെയ്തതിനെ തുടര്‍ന്ന് നിരവധി കുടുംബങ്ങള്‍ ബന്ധുവീടുകളിലേക്ക് മാറിത്താമസിച്ചിട്ടുണ്ട്. അഴിയൂര്‍ വില്ലേജില്‍ വീടുകളില്‍ വെള്ളം കയറിയതിനാല്‍ 9 കുടുംബങ്ങളാണ് ഈ രീതിയില്‍ ബന്ധുവീട്ടുകളിലേക്ക് മാറിയത്. ശക്തമായ മഴയില്‍ പലയിടങ്ങളിലും റോഡുകളും താഴ്ന്ന പ്രദേശങ്ങളും വെള്ളത്തിനടിയിലായി. പലയിടങ്ങളിലും ഗതാഗതം മുടങ്ങി. കൊയിലാണ്ടി ദേശീയപാതയില്‍ മൂരാട് പാലത്തിനടുത്ത് വെള്ളം കെട്ടിക്കിടന്നതിനെ തുടര്‍ന്ന് ഗതാഗത തടസം അനുഭവപ്പെട്ടു. ഇവിടെ ഓട്ടോ കുഴിയില്‍ വീണ് മറിഞ്ഞു. അവിടനല്ലൂര്‍ വില്ലേജില്‍ പടിഞ്ഞാറെ അണിയോത്ത് ഗംഗാധരന്‍റെ വീട്ടിന് ശക്തമായ മഴയില്‍ ഭാഗിക നാശനഷ്ടം സംഭവിച്ചു. ഇതേ വില്ലേജില്‍ വാഴയിലകത്തൂട്ട് രാമകൃഷ്ണന്‍റെ വീടിന് മുകളില്‍ മരം വീണ് ഭാഗികമായി നാശനഷ്ടമുണ്ടായി. കോട്ടൂര്‍ വില്ലേജ് തിരുവോട് പീറ്റക്കണ്ടി രാമന്‍കുട്ടിയുടെ വീടിനോട് ചേര്‍ന്നുള്ള ഷെഡ്, ശുചിമുറി എന്നിവ തകര്‍ന്നു. കുറ്റ്യാടി ജലവൈദ്യുത പദ്ധതിയുടെ ഭാഗമായുള്ള കക്കയം ഡാമിലെ ജലനിരപ്പ് 756.7 മീറ്ററായി ഉയര്‍ന്ന സാഹചര്യത്തില്‍ രണ്ടാംഘട്ട മുന്നറിയിപ്പായ ഓറഞ്ച് അലര്‍ട്ട് പ്രഖ്യാപിച്ചു. ജലനിരപ്പ് റെഡ് അലര്‍ട്ട് ലെവല്‍ ആയ 758 മീറ്ററില്‍ എത്തിയാല്‍ ഡാമിലെ അധികജലം തുറന്നു വിടേണ്ടതുള്ളതിനാല്‍ കുറ്റ്യാടി പുഴയുടെ തീരനിവാസികള്‍ ജാഗ്രത പാലിക്കണമെന്ന് ജില്ലാ കലക്ടര്‍ അറിയിച്ചു. ശക്തമായ മഴയെതുടര്‍ന്ന് പൂനൂര്‍ പുഴയിലെ ജലനിരപ്പ് വലിയ തോതില്‍ ഉയര്‍ന്നിട്ടുണ്ട്. കുന്ദമംഗലം ഭാഗത്ത് ജലനിരപ്പ് അപകട നിരപ്പായ എട്ട് മീറ്ററിനേക്കാള്‍ ഉയര്‍ന്നു. കോളിക്കല്‍ ഭാഗത്തും ജലനിരപ്പ് മുന്നറിയിപ്പ് നിരപ്പിനേക്കാള്‍ മുകളിലാണ് - 20.434 മീറ്റര്‍. തീരങ്ങളിലുള്ളവര്‍ക്ക് ജാഗ്രതാ നിര്‍ദ്ദേശം നല്‍കിയിട്ടുണ്ട്. കൊയിലാണ്ടി: കഴിഞ്ഞ ദിവസമുണ്ടായ കാറ്റിലും മഴയിലും തെങ്ങ് വീണ് വീടു തകർന്നു. കൊരയങ്ങാട് തെരു പുത്തൻപുരയിൽ ശൈലജയുടെ വീടാണ് സ്വകാര്യ വ്യക്തിയുടെ പറമ്പിലെ തെങ്ങ് വീണ് തകർന്നത്. വീട്ടിൽ ആരും ഇല്ലാത്തതിനാൽ ദുരന്തം ഒഴിവായി. ലക്ഷങ്ങളുടെ നഷ്ടം കണക്കാക്കുന്നു. വില്ലേജിൽ പരാതി നൽകിയിട്ടുണ്ട്. സംസ്ഥാന പാതയില്‍ പെരിങ്ങത്തൂര്‍ പാലത്തിന് സമീപത്തെ വന്‍മരം കടപുഴകി. മരം വീണത് പുലര്‍െച്ചയായതിനാല്‍ വന്‍ ദുരന്തം ഒഴിവായി. കണ്ണൂര്‍ ജില്ലാ അതിര്‍ത്തിയിലെ കായപ്പനച്ചിയിലാണ് ഇന്നലെ പുലര്‍ച്ചെ മൂന്നുമണിയോടെ വന്‍മരം റോഡിന് കുറുകെ കടപുഴകി വീണത്. മരം വീണതിനെ തുടര്‍ന്ന് നാദാപുരം - തലശ്ശേരി റൂട്ടില്‍ വാഹന ഗതാഗതം നിലച്ചു.

മുതിർന്ന സിപിഐ നേതാവ് സി.എം. കേശവൻ അന്തരിച്ചു

കോഴിക്കോട്: മുതിർന്ന സിപിഐ നേതാവും എഴുത്തുകാരനും സാമൂഹിക-സാംസ്ക്കാരിക രംഗത്തെ നിറസാന്നിധ്യവുമായിരുന്ന വേങ്ങേരി 'സുസനിയി'ൽ സി.എം. കേശവൻ (84-റിട്ട. സൂപ്രണ്ട്, സോയിൽ കൺസർവേഷൻ വകുപ്പ്) അന്തരിച്ചു. ഭാര്യ: പഴേടത്ത് സൗമിനി. മക്കൾ: സുകേഷ് (ഇഷ ക്രിയേഷൻസ് നടക്കാവ്), നികേഷ് (കെൽട്രോൺ, കോഴിക്കോട്), സവീന (അധ്യാപിക, ഗവ. ഹയർ സെക്കൻഡറി സ്കൂൾ, ചേളാരി). മരുമക്കൾ: ഷൈജ (ഇഷ ക്രിയേഷൻസ് നടക്കാവ്), സബിത (കെഎസ്എഫ്ഇ നരിക്കുനി), രാജൻ (സെക്ഷൻ ഓഫീസർ, കാലിക്കട്ട് യൂണിവേഴ്സിറ്റി). സഹോദരങ്ങൾ: കാർത്ത്യായനി, അംബുജാക്ഷി, രാധ, പരേതരായ സി.എം. വേലായുധൻ, സി.എം. ശങ്കരൻ. സിപിഐ കോഴിക്കോട് സിറ്റി കമ്മിറ്റി അംഗം, ജോയിന്‍റ് കൗൺസിൽ ജില്ലാ സെക്രട്ടറി, സംസ്ഥാന കമ്മിറ്റി അംഗം, യുവകലാസാഹിതി ജില്ലാ സെക്രട്ടറി, പ്രസിഡന്‍റ്, സംസ്ഥാന എക്സി. കമ്മിറ്റി അംഗം എന്നീ നിലകളിൽ ദീർഘകാലം പ്രവർത്തിച്ചു. ഇപ്റ്റ, ഐപ് സോ, കെഎ കേരളീയൻ സ്മാരക സമിതി തുടങ്ങിയ സാംസ്ക്കാരിക പ്രസ്ഥാനങ്ങളിലും സജീവ സാന്നിധ്യമായിരുന്നു. കവി, ബാലസാഹിത്യകാരൻ, ഗ്രന്ഥകാരൻ എന്നീ നിലകളിലും ശ്രദ്ധേയനായിരുന്നു. "അക്കുത്തിക്കുത്ത്' എന്ന ബാലസാഹിത്യകൃതി പ്രസിദ്ധീകരിച്ചിട്ടുണ്ട്. സംസ്ക്കാരം മാവൂർ റോഡ് ശ്മശാനത്തിൽ നടന്നു. തുടർന്ന് അനുശോചന യോഗവും ചേർന്നു.

മലയോര ഹൈവേ: ചക്കിട്ടപാറ ടൗണിൽ അളവെടുത്തു

ചക്കിട്ടപാറ: റോഡിന്‍റെ വീതി സംബന്ധിച്ച് തർക്കം നിലനിൽക്കുന്നതിനാൽ മലയോര ഹൈവേയുടെ പണി ആഴ്ചകളായി മുടങ്ങി കിടക്കുന്ന ചക്കിട്ടപാറ ടൗണിൽ സർക്കാരിന്‍റെ സർവേ ടീം ഇന്നലെ അളവെടുപ്പ് നടത്തി. അളവെടുപ്പിൽ ടൗണിൽ എവിടെയും 12 മീറ്റർ വീതിയില്ല. പെരുവണ്ണാമൂഴി മുതൽ ഈ വീതിയിലാണ് ഹൈവേ നിർമിച്ചു വരുന്നത്. ഏഴ് മുതൽ പത്ത് മീറ്ററാണ് പുതിയ അളവിൽ കണ്ടെത്തിയത്. പല ഭാഗത്തും പല അളവ്. അതു കൊണ്ട് തന്നെ ഒരാളുടെ ഒഴിച്ച് ആരുടേയും കെട്ടിടങ്ങൾക്ക് പ്രശ്നവുമില്ല. സിംഹ ഭാഗ മാർക്കിംഗ് നടത്തിയത് റോഡിലുമാണ്. 12 മീറ്റർ വീതിയില്ലാതെ കേരള റോഡ് ഫണ്ട് ബോർഡിനു ഹൈവേ നിർമിക്കാൻ സാധ്യമല്ല. പഴയ ടീം അളന്നപ്പോൾ കടകൾക്കുള്ളിലാണ് മാർക്കിംഗ് നടത്തിയിരുന്നത്. ആരുടേയൊക്കെയോ ഇടപെടൽ കൊണ്ട് ഇവരിൽ പലരും ഇതിൽ നിന്നു പിന്നീട് ഒഴിവായി. ഇതോടെയാണ് ഒരു പറ്റം ആളുകൾ ടൗണിലെ ഹൈവേ പ്രവർത്തി തടഞ്ഞത്. പുതിയ ടീമിന്‍റെ ഇന്നലത്തെ വിചിത്ര അളവോടു കൂടി ആർക്കും വിഷമമില്ലാതായി. കെആർഎഫ്ബിക്കാർക്ക് റോഡ് പണിയാൻ എവിടെ നിന്നു 12 മീറ്റർ സ്ഥലം കിട്ടുമെന്നതാണ് പുതിയ ചോദ്യം.1981ൽ പെരുവണ്ണാമൂഴി - ചക്കിട്ടപാറ - ചെമ്പ്ര പിഡബ്ല്യുഡി റോഡ്‌ വികസനത്തിനു വേണ്ടി സ്ഥലം സർക്കാർ പണം നൽകി അക്വയർ ചെയ്തിരുന്നു. ഇതനുസരിച്ച് പാതക്ക് 12 മുതൽ 16 വരെ മീറ്റർ വീതിയിൽ സ്ഥലമുണ്ട്. ഇതെവിടെ പോയി എന്ന ജനത്തിന്‍റെ ചോദ്യത്തിനു ഉദ്യോഗസ്ഥർക്ക് മറുപടിയില്ല. റോഡ്‌ കയ്യേറ്റക്കാരെ അന്യായമായി സംരംക്ഷിക്കാൻ പിന്നിൽ കളിക്കുന്നവർക്കും. ഈ അനീതിക്കെതിരേ സംഘടിക്കാൻ നാട്ടുകാർ തയാറെടുപ്പിലാണ്.

എലിപ്പനി: പ്രതിരോധ മാര്‍ഗങ്ങള്‍ സ്വീകരിക്കണം

കോഴിക്കോട്: മഴയെ തുടര്‍ന്ന് ജില്ലയിലെ ചില പ്രദേശങ്ങളില്‍ വെള്ളക്കെട്ടുകള്‍ രൂപപ്പെടുകയും ദുരിതാശ്വാസ ക്യാമ്പുകള്‍ ആരംഭിക്കുകയും ചെയ്ത സാഹചര്യത്തില്‍ മലിനജലവുമായി സമ്പര്‍ക്കത്തിലാകുന്ന എല്ലാവരും എലിപ്പനി പ്രതിരോധ മാര്‍ഗങ്ങള്‍ സ്വീകരിക്കണമെന്ന് ജില്ലാ മെഡിക്കല്‍ ഓഫീസര്‍ അറിയിച്ചു. ദുരിതാശ്വാസ ക്യാമ്പുകളില്‍ കഴിയുന്നവരും ക്യാമ്പുകളുമായി ബന്ധപ്പെട്ട് പ്രവര്‍ത്തിക്കുന്നവരും വീട്ടുപരിസരങ്ങളിലും വഴികളിലും മലിനജലത്തില്‍ ചവിട്ടി സഞ്ചരിക്കേണ്ടി വരുന്നവരും തൊഴില്‍ സാഹചര്യങ്ങളുമായി ബന്ധപ്പെട്ട് മലിനജല സമ്പര്‍ക്കമുണ്ടാകുന്നവരും ശുചീകരണ പ്രവര്‍ത്തനങ്ങളില്‍ ഏര്‍പ്പെടുന്നവരും എലിപ്പനിക്കെതിരായ പ്രതിരോധ ഗുളികയായ "ഡോക്സിസൈക്ലിന്‍' ആരോഗ്യപ്രവര്‍ത്തകരുടെ നിര്‍ദേശപ്രകാരം കഴിക്കണം.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]