ചെന്പേരി: വിമൽ ജ്യോതി എൻജിനിയറിംഗ് കോളജ്, അഡെൽഫി യൂണിവേഴ്സിറ്റിയിലെ റൂത്ത് എസ്. അമ്മോൺ കോളജ് ഓഫ് എഡ്യുക്കേഷൻ ആൻഡ് ഹെൽത്ത് സയൻസസ് (ന്യൂയോർക്ക്, യുഎസ്എ), കേന്ദ്ര സാമൂഹ്യനീതി-ശാക്തീകരണ മന്ത്രാലയത്തിന് കീഴിലുള്ള കോഴിക്കോട് സിആർസി എന്നിവയുടെ സംയുക്താഭിമുഖ്യത്തിൽ "എൻഹാൻസിംഗ് ലൈവ്സ്: ഇൻക്ലൂഷൻ, ഹയർ എഡ്യൂക്കേഷൻ, ആൻഡ് എംപ്ലോയ്മെന്‍റ് ഫോർ ന്യൂറോഡൈവേർജന്‍റ് ഇൻഡിവിജ്വൽസ്' എന്ന വിഷയത്തിൽ ഒരു അന്താരാഷ്‌ട്ര സെമിനാർ സംഘടിപ്പിക്കുന്നു. നാളെ വിമൽ ജ്യോതി എൻജിനിയറിംഗ് കോളജിലാണ് സെമിനാർ.
സെമിനാറിൽ ഉന്നതവിദ്യാഭ്യാസ മേഖലയിലും തൊഴിൽ രംഗത്തും ന്യൂറോഡൈവേർജന്‍റ് വ്യക്തികൾക്ക് കൂടുതൽ അവസരങ്ങൾ സൃഷ്ടിക്കുന്നതിനുള്ള തന്ത്രങ്ങൾ, വിജയകഥകൾ, നൂതന സമീപനങ്ങൾ എന്നിവ ചർച്ച ചെയ്യപ്പെടും. ഇന്ത്യൻ-അമേരിക്കൻ സ്ഥാപനങ്ങളുടെ വൈദഗ്ധ്യവും ഇന്ത്യാ ഗവൺമെന്‍റിന്‍റെ കാഴ്ചപ്പാടും സംയോജിപ്പിച്ച് ലോകമെമ്പാടുമുള്ള ന്യൂറോഡൈവേർജന്‍റ് വ്യക്തികൾക്ക് കൂടുതൽ സാധ്യതകളും ശാക്തീകരണപരവുമായ ഭാവി കെട്ടിപ്പടുക്കുന്നതിനുള്ള പ്രയത്നമാണ് ഈ സെമിനാർ. സ്റ്റീഫൻ ഷോർ (അഡൽഫി യൂണിവേഴ്സിറ്റി, ന്യൂയോർക്ക്), അഡ്വ. ഡാനിയേൽ ടെറൽ (ന്യൂയോർക്ക്), വില്യം പീറ്റേഴ്സ് (അസർബൈജാൻ), പ്രഫസർ ഡോ. സുനീഷ് (സിആർസി കോഴിക്കോട്), അലിയ റെസി (റെസിസ്‌ഡോർഫർ, ബ്രസീൽ), സ്റ്റുവർട്ട് ജി. ബെന്നറ്റ് (സൈക്കോതെറാപ്പിസ്റ്റ്, യുഎസ്എ), ജിന പോൾസൺ (ന്യൂയോർക്ക്) എന്നിവർ സെമിനാറിൽ ക്ലാസുകൾ നയിക്കും.വിവിധ സ്ഥലങ്ങളിൽ നിന്നായി നിരവധി വിദ്യാർഥികളും അധ്യാപകരും സെമിനാറിൽ പങ്കെടുക്കും. സെമിനാർ നടത്തിപ്പുമായി ബന്ധപ്പെട്ട എല്ലാ ഒരുക്കങ്ങളും പൂർത്തിയായതായി മാനേജർ ഫാ.ജയിംസ് ചെല്ലങ്കോട്ട്, പ്രിൻസിപ്പൽ ഡോ.ബെന്നി ജോസഫ് എന്നിവർ അറിയിച്ചു.