ഇരിട്ടി: നവകേരളം കർമ പദ്ധതിയുടെ ഭാഗമായി ഹരിതകേരളം മിഷന്റെ നേതൃത്വത്തിൽ സംസ്ഥാനത്തെ സ്കൂളുകൾ ഹരിത വിദ്യാലയങ്ങളാക്കി മാറ്റുന്നതിന്റെ ഭാഗമായി പച്ചത്തുരുത്തുകൾ ഒരുക്കുന്ന പ്രവർത്തനങ്ങൾക്ക് പായം പഞ്ചായത്തിൽ തുടക്കം കുറിച്ചു. പായത്തെ 12 സ്കൂളുകളിലാണ് ആദ്യം പച്ചത്തുരുത്തുകൾ സ്ഥാപിക്കുക.
ഇതിനായി ചേർന്ന ഹരിത പോലീസ് കേഡറ്റ് ഉപദേശക സമിതി രൂപീകരണ യോഗം പഞ്ചായത്ത് പ്രസിഡന്റ് പി. രജനി ഉദ്ഘാടനം ചെയ്തു. ആരോഗ്യ വിദ്യാഭ്യാസ സ്ഥിരം സമിതി ചെയർപേഴ്സൺ വി. പ്രമീള അധ്യക്ഷത വഹിച്ചു. ഹരിതകേരളം മിഷൻ ജില്ലാ റിസോഴ്സ് പേഴ്സൺ ജയപ്രകാശ് പന്തക്ക പദ്ധതി വിശദീകരണം നടത്തി.
പായം ഗവ. യുപി സ്കൂൾ, വട്ട്യറ യുപി സ്കൂൾ, കോളിക്കടവ് ഡോൺ ബോസ്കോ എൽപി സ്കൂൾ, മാടത്തിൽ എൽപി സ്കൂൾ, കുന്നോത്ത് യുപി സ്കൂൾ, കുന്നോത്ത് ഹൈസ്കൂൾ, കിളിയന്തറ ഹൈ സ്കൂൾ, പേരട്ട ഗവ. യുപി സ്കൂൾ, പെരിങ്കരി ഗവ. ഹൈസ്കൂൾ, വിളമന ഗവ. എൽപി സ്കൂൾ, പെരുപറമ്പ് യുപി സ്കൂൾ, കിളിയന്തറ എൽപി സ്കൂൾ എന്നിവിടങ്ങളിലാണു പച്ചത്തുരുത്തുകൾ ഒരുക്കുന്നത്. ചടങ്ങിൽ വാർഡംഗം ബിജു കോങ്ങാടൻ, അധ്യാപകരായ മാത്യു ജോസഫ്, വി.കെ. രമണി, സിസ്റ്റർ ജെസി ആന്റണി, താര കുര്യൻ, ഷൈനിമോൾ സിറിയക്ക്, ഷീല തോമസ്, ബിആർസി കോ-ഓഡിനേറ്റർ റുബീന എം. അശ്വതി, ആർ.ജെ. മുകുന്ദൻ തുടങ്ങിയവർ പ്രസംഗിച്ചു.