ബജറ്റിലെ കണക്കു പാളി; മിണ്ടാട്ടമില്ലാതെ കേന്ദ്രം : Deepika.com Business News |

Click here for detailed news of all items

ബജറ്റിലെ കണക്കു പാളി; മിണ്ടാട്ടമില്ലാതെ കേന്ദ്രം

Wednesday, July 10, 2019 11:26 PM IST

ന്യൂഡൽഹി: രണ്ടാം മോദിസർക്കാരിന്‍റെ പ്രഥമ ബജറ്റിലെ കണക്കു പിശകുകൾ സർക്കാരിനു നാണക്കേടായി. ബജറ്റിൽ പറയുന്ന 2018-19 സാന്പത്തിക വർഷത്തിലെ പുതുക്കിയ കണക്കും തൊട്ടുമുമ്പു പുറത്തുവിട്ട സാന്പത്തിക സർവേ റിപ്പോർട്ടിലെ കണക്കും തമ്മിലുള്ള പൊരുത്തമില്ലായ്മകളാണ് സാന്പത്തിക വിദഗ്ധർ തുറന്നു കാട്ടുന്നത്.

ബജറ്റ് പ്രകാരം 2018-19ലെ വരുമാനം 17.3 ലക്ഷം കോടിയാണ്. എന്നാൽ, സാന്പത്തിക സർവേ പ്രകാരം ഇതേ കാലയളവിലെ വരുമാനം 15.6 ലക്ഷം കോടിയാണ്. ഈ രണ്ടു തുകകൾ തമ്മിലുള്ള 1.7 ലക്ഷം കോടി രൂപയുടെ വ്യത്യാസം എങ്ങനെയുണ്ടായി എന്നാണു സാന്പത്തിക വിദഗ്ധരുടെ ചോദ്യം.

ചെലവു കണക്കിലുമുണ്ട് പാകപ്പിഴ. ബജറ്റ് പ്രകാരം 2018-19ലെ ആകെ ചെലവ് 24.6 ലക്ഷം കോടിയാണ്. എന്നാൽ, സാന്പത്തിക സർവേയിലെ ചെലവ് 23.1 ലക്ഷം കോടി രൂപ. 1.5 ലക്ഷം കോടിയുടെ അന്തരമാണ് ഈ കണക്കിലുള്ളത്. 2018-19 കാലയളവിലെ നികുതി വരുമാനം സംബന്ധിച്ച കണക്കിലും വിവിധ പദ്ധതികളിൽ സർക്കാർ ചെലവിട്ട തുകയുടെ കണക്കിലും ഇത്തരത്തിൽ പൊരുത്തക്കേടുകളുണ്ട്.

ജെഎൻയു അധ്യാപിക ജയന്തി ഘോഷ്, പ്രധാനമന്ത്രിയുടെ സാന്പത്തിക ഉപദേശ കൗണ്‍സിൽ അംഗം രതിൻ റോയി തുടങ്ങിയവരാണ് ഈ പൊരുത്തക്കേടുകൾ ശ്രദ്ധയിൽപ്പെടുത്തിയത്. എന്നാൽ, ബജറ്റ് കണക്കിലെ പൊരുത്തക്കേടുകൾ സംബന്ധിച്ച് ഇതുവരെ കേന്ദ്രസർക്കാർ പ്രതികരിച്ചിട്ടില്ല.

Follow deepika.com on Twitter , Facebook and on YouTube , and stay in the know with what's happening in the world around you – in real time.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.