കുട്ടിയെ ആശ്രാമം മൈതാനിയിൽ ഉപേക്ഷിക്കുന്നതിന് മുമ്പ് സംഘം കൊല്ലം നഗരത്തിൽ എത്തിയത് ഈ കാറിലാണ്. പോലീസ് പിന്തുടരുന്നു എന്നു സൂചനകൾ ലഭിച്ചതിന്‍റെ അടിസ്ഥാനത്തിൽ ഇയാൾ കുടുംബസമേതം തെങ്കാശിക്ക് കടന്നതും നീല കാറിലാണ്.
അപ്പോഴും ആരിലും സംശയം ജനിപ്പിക്കാതെ വെളുത്ത കാർ വീട്ടിൽതന്നെ ഉണ്ടായിരുന്നു. തട്ടിക്കൊണ്ടുപോകലിൽ പദ്മകുമാർ മുഖ്യപ്രതി ആകുന്നതോടെ ഈ രണ്ട് കാറുകളും കേസിലെ പ്രധാന തൊണ്ടിമുതലുകളാകും.
പദ്മകുമാറിന്‍റെ ഭാര്യക്കും മകൾക്കും പങ്കുണ്ടെന്ന് തട്ടിക്കൊണ്ടു പോകലിൽ പദ്മകുമാറിന്‍റെ ഭാര്യ അനിതയ്ക്കും മകൾ അനുപമയ്ക്കും പങ്കുണ്ടെന്ന് പോലീസ്. ഇവരും കുറ്റകൃത്യത്തിൽ പങ്കെടുത്തതിനാൽ പ്രതികളാണ്.
തട്ടിക്കൊണ്ടു പോകലിനു ഒരു വർഷത്തെ ആസൂത്രണം ഉണ്ടായിരുന്നെന്നും പദ്മകുമാർ മൊഴി നൽകിയിട്ടുണ്ട്. 10 ലക്ഷം രൂപയുടെ സാമ്പത്തിക ബാധ്യത ഉണ്ടായിരുന്നു. അത് പരിഹരിക്കാനാണ് തട്ടിക്കൊണ്ടു പോകൽ നടത്തിയത്. സംഭവ ദിവസം 10 ലക്ഷം രൂപ നൽകിയാൽ കുട്ടിയെ വിട്ടു നൽകാമെന്ന കത്ത് എഴുതി വച്ചിരുന്നു. അത് കുട്ടിയുടെ സഹോദരന് കൈമാറാൻ ശ്രമിച്ചങ്കിലും സാധിച്ചില്ല എന്നും പദ്മകുമാർ മൊഴി നൽകി.
കുട്ടിയുടെ പിതാവുമായി വൈരാഗ്യമുണ്ടെന്ന് മൊഴി കൊല്ലം: കുട്ടിയുടെ പിതാവുമായി വൈരാഗ്യമുണ്ടെന്ന് പദ്മകുമാർ അന്വേഷണ ഉദ്യോഗസ്ഥർ മുമ്പാകെ മൊഴി നൽകി. മകളുടെ നഴ്സിംഗ് പ്രവേശന ആവശ്യത്തിന് റെജിക്ക് പണം നൽകിയിരുന്നു. അഞ്ചു ലക്ഷം രൂപയാണ് കൊടുത്തത്. എന്നാൽ, കാര്യം നടന്നില്ല.
പണം തിരികെ ചോദിച്ചപ്പോൾ അയാൾ ധിക്കാരപരമായാണ് സംസാരിച്ചത്. പണം തിരികെ ലഭിക്കാത്തതു കാരണമാണ് കുട്ടിയെ തട്ടിക്കൊണ്ടു പോയതെന്നും പദ്മകുമാർ പറയുന്നു. ഇത് പൂർണമായും അന്വേഷണ ഉദ്യോഗസ്ഥർ മുഖവിലയ്ക്കെടുത്തിട്ടില്ല.
തട്ടിക്കൊണ്ടുപോയത് ക്വട്ടേഷൻ സംഘം? 
കൊല്ലം: കുട്ടിയെ തട്ടിക്കൊണ്ടുപോകാൻ പദ്മകുമാർ ക്വട്ടേഷൻ സംഘത്തെ ഏർപ്പാടാക്കിയതായി സംശയം. അവരുടെ നിർദേശാനുസരണമാണ് ഇയാൾ കരുക്കൾ നീക്കിയതെന്ന് അന്വേഷണ സംഘം കരുതുന്നു. എന്നാൽ തട്ടിക്കൊണ്ടുപോകൽ വിജയകരമായി നടപ്പിലാക്കിയ ഈ സംഘത്തക്കുറിച്ച് ഇയാൾ ഒന്നും വെളിപ്പെടുത്തിയിട്ടില്ല.
ചാത്തന്നൂരിലും ചിറക്കരയിലും രണ്ട് വീടുകൾ, ചിറക്കരയിൽ വിശാലമായ ഫാം ഹൗസ്, സ്വന്തമായി മൂന്ന് വാഹനങ്ങൾ എന്നിവയും കൂടാതെ മറ്റ് സൗകര്യങ്ങളുമുള്ള വ്യക്തി കേവലം അഞ്ച് ലക്ഷം രൂപയ്ക്കായി കുട്ടിയെ തട്ടിക്കൊണ്ട് പോകാൻ ശ്രമിക്കില്ല എന്നാണ് പോലീസ് നിഗമനം.
അതിനപ്പുറം സാമ്പത്തികം അടക്കമുള്ള മറ്റ് ഇടപാടുകൾ നടന്നിട്ടുണ്ടാകുമെന്നാണ് അന്വേഷണ ഉദ്യോഗസ്ഥർ കരുതുന്നത്. ഇതിന് വ്യക്തമായ ഉത്തരം നൽകേണ്ടത് കുട്ടിയുടെ പിതാവാണ്. തനിക്ക് ശത്രുക്കളോ ആരോടും വിരോധമോ ഇല്ലന്നാണ് പിതാവ് പോലീസിനോട് പറഞ്ഞിട്ടുള്ളത്. പദ്മകുമാറിന്‍റെ മൊഴിയുടെ അടിസ്ഥാനത്തിൽ കുട്ടിയുടെ പിതാവിൽ നിന്ന് പോലീസ് വീണ്ടും മൊഴിയെടുക്കും.
ഓട്ടോറിക്ഷ കസ്റ്റഡിയിലെടുത്തു ചാത്തന്നൂർ: ഓയൂരിൽനിന്ന് ആറു വയസുകാരിയെ തട്ടിക്കൊണ്ടുവന്ന സംഘം സഞ്ചരിച്ചിരുന്ന ഓട്ടോറിക്ഷ അന്വേഷണ സംഘം കസ്റ്റഡിയിലെടുത്തു. ഡ്രൈവർ കല്ലുവാതുക്കൽ മണ്ണയം സ്വദേശി സലാവുദീനും പോലീസ് കസ്റ്റഡിയിലാണ്.
സലാവുദീനെ പോലീസ് ചോദ്യംചെയ്തു വരികയാണ്. ഇന്നലെ രാവിലെ 11 ഓടെ ചിറക്കര ക്ഷേത്രത്തിനു സമീപത്തുനിന്നാണ് ഓട്ടോറിക്ഷ കസ്റ്റഡിയിലെടുത്തത്.സംഭവം അറിഞ്ഞിട്ടും പോലീസിനോടോ മറ്റ് ആരോടെങ്കിലുമോ പറയാതിരുന്നത് ഭയന്നിട്ടാണെന്നാണ് സലാവുദീൻ മൊഴി നല്കിയിരിക്കുന്നത്.
കല്ലുവാതുക്കലിലും പരിസരത്തുമുള്ള ഇറച്ചിവില്പന കേന്ദ്രങ്ങളിൽ ഇറച്ചി എത്തിക്കുന്നത് സലാവുദീനാണ്. ചിറക്കരയിൽ ഇറച്ചി എത്തിച്ചപ്പോഴാണ് ഓട്ടോ പോലീസ് കസ്റ്റഡിയിലെടുത്തത്.