കരുവന്നൂരിൽ പരിഹാരക്രിയ : Deepika.com Kerala News |

Click here for detailed news of all items

കരുവന്നൂരിൽ പരിഹാരക്രിയ

Wednesday, October 4, 2023 1:47 AM IST

കൊച്ചി: കരുവന്നൂര്‍ സഹകരണ ബാങ്കിലെ നിക്ഷേപകരുടെ പണം പരമാവധി വേഗത്തില്‍ തിരിച്ചു നല്‍കുമെന്ന് സഹകരണ മന്ത്രി വി.എന്‍. വാസവന്‍. ഇതിനായി 50.75 കോടി രൂപ സമാഹരിക്കും.

നേരത്തേ പ്രഖ്യാപിച്ച പാക്കേജ് പ്രകാരം നിക്ഷേപകര്‍ക്ക് ഏകദേശം 73 കോടി രൂപ തിരിച്ചു നൽകിയതായും, കരുവന്നൂര്‍ ബാങ്കിലെ പ്രശ്നപരിഹാരവുമായി ബന്ധപ്പെട്ട് കൊച്ചിയില്‍ വിളിച്ചുചേര്‍ത്ത പ്രത്യേക യോഗത്തിനുശേഷം മന്ത്രി പറഞ്ഞു.

പുതുക്കിയ പാക്കേജ് വഴിയാകും 50.75 കോടി രൂപ സമാഹരിച്ചു നിക്ഷേപകര്‍ക്ക് ലഭ്യമാക്കുക. കേരള ബാങ്കില്‍നിന്ന് പിന്‍വലിക്കാവുന്ന തുക, കണ്‍സ്യൂമര്‍ ഫെഡ്, സഹകരണ ആശുപത്രി എന്നിവിടങ്ങളില്‍നിന്ന് ലഭിക്കേണ്ടത്, സംഘങ്ങളില്‍നിന്ന് നിലവിലെ അനുമതി അനുസരിച്ച് ഇനിയും സംഭരിക്കാവുന്നത്, ഫണ്ട് ബോര്‍ഡില്‍നിന്ന് നിലവിലെ ഉത്തരവു പ്രകാരം ലഭിക്കാവുന്നത്, പ്രാഥമിക സംഘങ്ങളില്‍നിന്ന് പുതുതായി സംഭരിക്കുന്നത് എന്നീ തുകകൾ ചേര്‍ത്താണ് ഈ ഫണ്ട് സമാഹരിക്കുക. സ്ഥിരനിക്ഷേപകര്‍ക്കും സേവിംഗ്സ് നിക്ഷേപകര്‍ക്കുമായി ഇത്തരത്തില്‍ സമാഹരിക്കുന്ന തുക കൈമാറും. നേരത്തേ പ്രഖ്യാപിച്ച പാക്കേജിൽ ബാക്കിയുള്ള തുക കഴിയുന്നതും വേഗത്തില്‍ നിക്ഷേപകര്‍ക്ക് നല്‍കും.

സഹകരണ മേഖലയെ മോശമാക്കുന്നതിനുള്ള ആസൂത്രിത ശ്രമങ്ങളൊന്നും വിലപ്പോകില്ല. സാമൂഹ്യ പ്രതിബദ്ധതയില്‍ ഊന്നിയ പ്രവര്‍ത്തനമാണ് സഹകരണ പ്രസ്ഥാനങ്ങള്‍ നടത്തുന്നത്.
ഈ മേഖലയുടെ നിലനില്പ് നാടിന്‍റെ ആവശ്യമാണ്.

സഹകരണ രംഗത്തെ കുറ്റമറ്റമാക്കാനുള്ള വിപുലമായ നടപടികളും സര്‍ക്കാര്‍ സ്വീകരിക്കും. സഹകരണ സംരക്ഷണ നിധി നടപ്പിലാക്കുന്നത് വഴി പ്രതിസന്ധിയിലായ എല്ലാ ബാങ്കുകളെയും സംരക്ഷിക്കാന്‍ കഴിയും. സമഗ്ര സഹകരണ നിയമ ഭേദഗതിയിലൂടെ പൂര്‍ണ സുതാര്യത ഉറപ്പാക്കി മുന്നോട്ടുപോകാന്‍ കഴിയുമെന്നും മന്ത്രി പറഞ്ഞു.

എറണാകുളം ഗസ്റ്റ് ഗൗസില്‍ ചേര്‍ന്ന യോഗത്തില്‍ കേരള ബാങ്ക് പ്രസിഡന്‍റ് ഗോപി കോട്ടമുറിക്കല്‍, സഹകരണ വകുപ്പ് സെക്രട്ടറി മിനി ആന്‍റണി, രജിസ്ട്രാര്‍ ടി.വി. സുഭാഷ്, കേരള ബാങ്ക് സിഇഒ പി.എസ്. രാജന്‍, എക്‌സിക്യൂട്ടീവ് ഡയറക്ടര്‍ കെ.സി. സഹദേവന്‍ തുടങ്ങിയവര്‍ യോഗത്തില്‍ പങ്കെടുത്തു.

പ്രശ്നപരിഹാരത്തിന് ചീഫ് എക്സിക്യൂട്ടീവ്

കരുവന്നൂര്‍ ബാങ്കിലെ പ്രശ്നപരിഹാരത്തിനായി കേരള ബാങ്കില്‍നിന്ന് പ്രവൃത്തിപരിചയമുള്ള ഉദ്യോഗസ്ഥനെ ചീഫ് എക്സിക്യൂട്ടീവ് ആയി നിയമിക്കും. ആര്‍ബിട്രേഷന്‍ റിക്കവറി നടപടികള്‍ ശക്തമാക്കും.

ക്രമക്കേട് പുറത്തുവന്നപ്പോള്‍ത്തന്നെ സംസ്ഥാന സര്‍ക്കാരും സഹകരണ വകുപ്പും കര്‍ശന നപടികളാണ് സ്വീകരിച്ചത്. 18 കേസുകള്‍ രജിസ്റ്റര്‍ ചെയ്തു. വിജിലന്‍സ് അന്വേഷണവും ഒമ്പതംഗ സംഘത്തിന്‍റെ പ്രത്യേക അന്വേഷണവും ആരംഭിച്ചു.

എന്‍ഫോഴ്സമെന്‍റ് ഡയറക്ടറേറ്റ് 184.6 കോടി രൂപ മൂല്യം വരുന്ന 162 ആധാരങ്ങളും മറ്റു രേഖകളും ബാങ്കില്‍നിന്നു പിടിച്ചെടുത്തു കൊണ്ടുപോയതിനാൽ, തിരിച്ചടവ് സ്വീകരിക്കാനുള്ള തടസമുണ്ട്. ഈ രേഖകള്‍ തിരികെ ലഭിക്കുന്നതിന് നിയമനടപടികള്‍ സ്വീകരിക്കുമെന്നും മന്ത്രി പറഞ്ഞു.

Follow deepika.com on Twitter , Facebook and on YouTube , and stay in the know with what's happening in the world around you – in real time.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.