മികച്ച എന്‍എസ്എസ് യൂണിറ്റിനുള്ള പുരസ്‌കാരം അല്‍ഫോന്‍സ കോളജിന്
1478936
Thursday, November 14, 2024 5:30 AM IST
കോട്ടയം: എംജി യൂണിവേഴ്‌സിറ്റിയിലെ 2023-24 വര്‍ഷത്തെ ഏറ്റവും മികച്ച നാഷണല്‍ സര്‍വീസ് സ്‌കീം യൂണിറ്റിനുള്ള എവറോളിംഗ് ട്രോഫി പാലാ അല്‍ഫോന്‍സ കോളജിന്. ഇതേ കോളജിലെ പ്രിന്‍സിപ്പല്‍ റവ.ഡോ. ഷാജി ജോണ്‍ പുന്നത്താനത്തുകുന്നേല്‍ മികച്ച എന്‍എസ്എസ് സൗഹൃദ പ്രിന്‍സിപ്പലും ഡോ. സിമിമോള്‍ സെബാസ്റ്റ്യന്‍ മികച്ച പ്രോഗ്രാം ഓഫീസറുമായി തെരഞ്ഞെടുക്കപ്പെട്ടു.
വൈസ് ചാന്‍സലര്‍ ഡോ.സി.ടി. അരവിന്ദകുമാര്‍ അധ്യക്ഷനായ സമിതിയാണ് പുരസ്‌കാര ജേതാക്കളെ തെരഞ്ഞെടുത്തത്. തൊടുപുഴ ന്യൂമാന്‍ കോളജിനാണ് രണ്ടാം സ്ഥാനം. ഈ കോളജിലെ ഡോ. എം.പി. ബിജിയാണ് മികച്ച രണ്ടാമത്തെ പ്രോഗ്രാം ഓഫീസര്‍. എറണാകുളം കുറുപ്പുംപടി സെന്‍റ് കുര്യാക്കോസ് കോളജ് ഓഫ് മാനേജ്‌മെന്‍റ് ആന്‍ഡ് സയന്‍സും പത്തനംതിട്ടയിലെ സ്‌കൂള്‍ ഓഫ് ടെക്‌നോളജി ആന്‍ഡ് അപ്ലൈഡ് സയന്‍സസുമാണ് മികച്ച എമേര്‍ജിംഗ് യൂണിറ്റുകള്‍.
196 അഫിലിയേറ്റഡ് കോളജുകളിലായി 282 യൂണിറ്റുകളും 282 പ്രോഗ്രാം ഓഫീസര്‍മാരും 28200 വോളണ്ടിയര്‍മാരുമാണ് സര്‍വകലാശാലയിലെ നാഷണല്‍ സര്‍വീസ് സ്‌കീമിനുള്ളത്. പുരസ്‌കാരങ്ങള്‍ പിന്നീട് എന്‍എസ്എസ് സംഗമത്തില്‍ സമ്മാനിക്കുമെന്ന് കോ ഓർഡിനേറ്റര്‍ ഡോ. ഇ. എന്‍. ശിവദാസന്‍ അറിയിച്ചു.