പൂച്ചാക്കൽ സികെവിയിൽ നേത്രരോഗ വിഭാഗം തുറന്നു
1430951
Sunday, June 23, 2024 5:04 AM IST
പൂച്ചാക്കൽ: സികെവി ആയുർവേദ ആശുപത്രിയിൽ നേത്രരോഗ ചികിത്സാ വിഭാഗത്തിന്റെയും സൗജന്യ നേത്ര പരിശോധനാ ക്യാമ്പിന്റെയും ഉദ്ഘാടനം നടന്നു. തൃപ്പൂണിത്തുറ ആയുർവദ കോളജ് വൈസ് പ്രിൻസിപ്പൽ പ്രഫ. ഡോ. ശ്രീജ സുകേശൻ ഉദ്ഘാടനം നിർവഹിച്ചു. അജിത്ത് കുമാർ അധ്യക്ഷത വഹിച്ചു. പാണാവള്ളി കൃഷ്ണൻ വൈദ്യരുടെ സ്മരണാർഥം 1952 ൽ സി.കെ. രാഘവൻ വൈദ്യൻ സ്ഥാപിച്ചതാണ് സികെവി ആയുർവേദ ആശുപത്രി.
തൃപ്പൂണിത്തുറ ഗവ. ആയുർവേദ കോളജിൽനിന്ന് നേത്രചികിത്സ ബിരുദാനന്തര കോഴ്സിൽ യൂണിവേഴ്സിറ്റി റാങ്കോടെ പാസായ ഡോ. നിഖില സുരേഷാണ് നേത്രരോഗ വിഭാഗത്തിനു നേതൃത്വം നൽകുന്നത്. റിഫ്രാക്ടിവ് എറേഴ്സ്, റെറ്റിനൽ ഡിസീസസ്, മാക്കുലർ ഡിസീസസ്, കോർണിയൽ ഡിസീസസ്, സ്ക്ലീറൈറ്റീസ്, യുവൈറ്റിസ് തുടങ്ങിയ രോഗങ്ങൾക്ക് വിദഗ്ധ ചികിത്സ ലഭ്യമാക്കും. ഇതിനുള്ള അത്യാധുനിക സാങ്കേതിക ചികിത്സാ ഉപകരണങ്ങൾ സജ്ജമാക്കിയിട്ടുണ്ട്. ഡോ. സന്തോഷ്, ഡോ. റസീല കരുണാകരൻ, ഡോ. അനൂപ് അജിത്ത്, ശ്രീകണ്ഠേശ്വരം സ്ക്കൂൾ റിട്ട. ഹെഡ്മാസ്റ്റർ വി.എ. മോഹനൻ തുടങ്ങിയവർ പങ്കെടുത്തു.