അങ്ങാടിപ്പുറം: യേശുക്രിസ്തു രാജകീയമായി ജറുസലേമിലേക്ക് പ്രവേശിച്ചതിന്‍റെ ഓര്‍മയില്‍ ക്രൈസ്തവ ദേവാലയങ്ങളില്‍ ഓശാന ഞായര്‍ ആചരിച്ചു. ഇതോടെ വിശുദ്ധവാരത്തിനു തുടക്കമായി. പരിയാപുരം ഫാത്തിമ മാതാ ഫൊറോന ദേവാലയത്തില്‍ നടന്ന ഓശാനയുടെ തിരുക്കര്‍മങ്ങളില്‍ നൂറുക്കണക്കിനു വിശ്വാസികള്‍ പങ്കാളികളായി. കുരുത്തോലയുടെ വെഞ്ചരിപ്പിനു ശേഷം ഫാത്തിമ യുപി സ്കൂള്‍ അങ്കണത്തില്‍ നിന്നു ദേവാലയത്തിലേക്ക് പ്രദക്ഷിണവും തുടര്‍ന്ന് ആഘോഷമായ വിശുദ്ധ കുര്‍ബാനയുമുണ്ടായി. വികാരി ഫാ.ജെയിംസ് വാമറ്റത്തില്‍, ഫാ.പയസ് നെല്ലിയാനിയില്‍, അസിസ്റ്റന്‍റ് വികാരി ഫാ.സിറിള്‍ ഇലക്കുടിക്കല്‍ എന്നിവര്‍ കാര്‍മികത്വം വഹിച്ചു. ഇന്നു മുതല്‍ ബുധന്‍ വരെ രാവിലെ 6.30നും വൈകിട്ട് അഞ്ചിനും വിശുദ്ധ കുര്‍ബാന ഉണ്ടായിരിക്കും. 28ന് പെസഹവ്യാഴം തിരുകര്‍മങ്ങള്‍ കാലുകഴുകല്‍ ശുശ്രൂഷയോടെ രാവിലെ ഏഴിനു തുടങ്ങും. തുടര്‍ന്ന് വിശുദ്ധ കുര്‍ബാനയും പൊതുആരാധനയും നടക്കും.
ദുഃഖവെള്ളി തിരുകര്‍മങ്ങള്‍ 29ന് രാവിലെ ഏഴിനു ആരംഭിക്കും. വൈകിട്ട് നാലിനു ചീരട്ടാമല ക്രിസ്തുരാജ ദേവാലയത്തിലേക്ക് കുരിശിന്‍റെ വഴി. 30ന് ദുഃഖശനി ആചരണത്തിന്‍റെ ഭാഗമായി രാവിലെ ഏഴിനു പുത്തന്‍ തീ പുത്തന്‍ വെള്ളം വെഞ്ചരിപ്പ്, ജ്ഞാനസ്നാന വ്രത നവീകരണം, വിശുദ്ധ കുര്‍ബാന എന്നിവയുണ്ടാകും. ഉയിര്‍പ്പു തിരുനാള്‍ ആഘോഷങ്ങള്‍ 30ന് രാത്രി 10.30ന് തുടങ്ങും. 31ന് രാവിലെ ഏഴിനു വിശുദ്ധ കുര്‍ബാനയുണ്ടാകും. ഈസ്റ്റര്‍ ആഘോഷത്തോടെ വിശുദ്ധവാരത്തിനു സമാപനമാകും.
അടയ്ക്കാക്കുണ്ട്: അടയ്ക്കാക്കുണ്ട് സെന്‍റ് ജോര്‍ജ് ദേവാലയത്തില്‍ വികാരി ഫാ. സന്തോഷ് ഇരുപ്പക്കാട്ട് (ഒഎഫ്എം), കാളികാവ് സെന്‍റ് സേവ്യേഴ്സ് ദേവാലയത്തില്‍ വികാരി ഫാ. ഡൊമനിക്് മുട്ടത്തുകുഴി എന്നിവര്‍ ഓശാന ഞായര്‍ തിരുകര്‍മങ്ങള്‍ക്ക് കാര്‍മികത്വം വഹിച്ചു.
തേഞ്ഞിപ്പലം: തേഞ്ഞിപ്പലം സെന്‍റ് മേരീസ് പള്ളിയിലെ വിശ്വാസികള്‍ കൈയില്‍ കുരുത്തോലകളേന്തി പ്രദക്ഷിണം നടത്തി ഓശാന തിരുനാള്‍ ആഘോഷിച്ചു. പള്ളി വികാരി ഫാ. ഏബ്രഹാം സ്രാമ്പിക്കല്‍ ദിവ്യബലി അര്‍പ്പിച്ചു. കൈക്കാരന്‍മാരായ തോമസ് ഓടയ്ക്കല്‍, ജോണ്‍സന്‍ കളത്തൂര്‍, സണ്ണി പാമ്പാടിയില്‍, ഡാന്‍റിസ് മാണിക്കത്താഴത്ത്, മൗണ്ട് കാര്‍മല്‍ കോണ്‍വെന്‍റിലെ മദര്‍ സിസ്റ്റര്‍ മേഴ്സിലിന്‍, കാറ്റക്കിസം ഹെഡ്മാസ്റ്റര്‍ മനോജ് വാരമ്പില്‍ എന്നിവര്‍ നേതൃത്വം നല്‍കി.
താഴെക്കോട്: താഴെക്കോട് സെന്‍റ് സെബാസ്റ്റ്യന്‍സ് പള്ളിയില്‍ നടത്തിയ ഓശാന തിരുനാളിനു വികാരി ഫാ. ജോസഫ് ഏഴാനിക്കാട്ട് നേതൃത്വം വഹിച്ചു. നൂറുക്കണക്കിനു വിശ്വാസികള്‍ കുരുത്തോലകളുമായി പ്രദക്ഷിണം നടത്തി.
മണിമൂളി: ഓശാന ഞായറിനോടനുബന്ധിച്ച് മണിമൂളി ക്രിസ്തുരാജ ഫൊറോന ദേവാലയത്തില്‍ കുരുത്തോല പ്രദക്ഷിണം നടത്തി. തുടര്‍ന്ന് ദേവാലയത്തില്‍ നടന്ന വിശുദ്ധ കുര്‍ബാനയ്ക്ക് ഇടവക വികാരി ഫാ. തോമസ് മണക്കുന്നേല്‍, അസിസ്റ്റന്‍റ് വികാരി ഫാ. അരുണ്‍ പൊയ്കയില്‍ എന്നിവര്‍ നേതൃത്വം നല്‍കി.
നിലമ്പൂര്‍: നിലമ്പൂര്‍ മേഖലയില്‍ നടന്ന ഓശാന ഞായര്‍ ശുശ്രൂഷകളിലും കുരുത്തോല പ്രദക്ഷണത്തിലും സ്ത്രീകളും കുട്ടികളും ഉള്‍പ്പെടെ ആയിരക്കണക്കിന് വിശ്വാസികള്‍ പങ്കെടുത്തു. ഇടിവണ്ണ സെന്‍റ് തോമസ് ദേവാലയത്തിലെ ഓശാന ശുശ്രൂഷകള്‍ക്ക് ഇടവക വികാരി ഫാ. കുര്യാക്കോസ് കൂബക്കില്‍ നേതൃത്വം നല്‍കി. ഇടിവണ്ണ അങ്ങാടിയിലെ പരിശുദ്ധ കന്യകാമറിയത്തിന്‍റെ കപ്പേളയിലാണ് കുരുത്തോല വെഞ്ചിരിപ്പും കുരുത്തോല വിതരണവും നടന്നത്.
തുടര്‍ന്ന് കുരുത്തോലുകളുമായി വിശ്വാസികള്‍ ദേവാലയത്തിലേക്ക് പ്രദക്ഷിണം നടത്തി. നിലമ്പൂര്‍ ലിറ്റില്‍ ഫ്ളവര്‍ ഫൊറോന ദേവാലയത്തില്‍ നടന്ന ഓശാന ശുശ്രൂഷകള്‍ക്ക് ഫൊറോന വികാരി ഫാ. ജെയ്സന്‍ കുഴിക്കണ്ടത്തില്‍ നേതൃത്വം നല്‍കി. ചുങ്കത്തറ സെന്‍റ് മേരീസ് മലങ്കര ദേവാലയത്തില്‍ നടന്ന ഓശാന ശുശ്രൂഷകള്‍ക്ക് ബത്തേരി രൂപതാധ്യക്ഷന്‍ ജോസഫ് മാര്‍തോമസ് മെത്രാപ്പോലീത്ത നേതൃത്വം നല്‍കി. വടപുറം സെന്‍റ് ഫ്രാന്‍സിസ് ഓഫ് അസീസി ദേവാലയത്തില്‍ നടന്ന ശുശ്രൂഷകള്‍ക്ക് ഇടവക വികാരി ഫാ. ബിജു ജോസഫ് നിലംതറയില്‍, അസിസ്റ്റന്‍റ് വികാരി ഫാ. അജീഷ് ഐലാറ്റില്‍ എന്നിവര്‍ നേതൃത്വം നല്‍കി.
ദേവാലയങ്ങളില്‍ ഇടവക വികാരിമാരുടെ നേതൃത്വത്തിലായിരുന്നു കുരുത്തോല പ്രദക്ഷിണവും ഓശാന ശുശ്രൂഷകളും നടന്നത്. യേശുദേവന്‍റെ പീഡാനുഭവ സ്മരണകളിലൂടെയാണ് വിശുദ്ധവാരം കടന്നു പോവുക. ശിഷ്യമാരുമൊത്ത് യേശു ദേവന്‍ തന്‍റെ അന്ത്യഅത്താഴം പങ്കിട്ടതിന്‍റെ ഓര്‍മയില്‍ 28 ന് പെസഹ വ്യാഴം ആചരിക്കും.
ദേവാലയങ്ങളില്‍ പ്രത്യേക ശുശ്രൂഷകളും ഭവനങ്ങളില്‍ അപ്പം മുറിക്കല്‍ ശുശ്രൂഷകളും നടക്കും. മനുഷ്യവര്‍ഗത്തിന്‍റെ വീണ്ടെടുപ്പിനായി കാല്‍വരിയിലെ മരക്കുരിശില്‍ യേശുദേവന്‍ തന്‍റെ ജീവന്‍ ബലിയര്‍പ്പിച്ചതിന്‍റെ ഓര്‍മ പുതുക്കി ദേവാലയങ്ങളില്‍ 29 ന് ദുഃഖവെള്ളി ആചരിക്കും. നൂറുക്കണക്കിന് വിശ്വാസികള്‍ പങ്കെടുക്കുന്ന കുരിശിന്‍റെ വഴികള്‍ നടക്കും. ഇടിവണ്ണ സെന്‍റെ തോമസ് ദേവാലയത്തില്‍ നിന്നു പെരുവമ്പാടം കുരിശടിയിലേക്കാണ് കുരിശിന്‍റെ വഴി നടത്തുക. മരണത്തെ കീഴടക്കി യേശുദേവന്‍ ഉയിര്‍ത്തെഴുന്നേറ്റതിന്‍റെ ഓര്‍മയില്‍ 31 ന് ക്രൈസ്തവര്‍ ഈസ്റ്റര്‍ ആഘോഷിക്കും. വന്യമൃഗശല്യം രൂക്ഷമായ സാഹചര്യത്തില്‍ മാനന്തവാടി രൂപതക്ക് കീഴിലുള്ള മണിമൂളി, നിലമ്പൂര്‍ ഫൊറോനകളിലെ ദേവാലയങ്ങളില്‍ ഉള്‍പ്പെടെ 30 ന് രാത്രി 10 ന് മുമ്പ് ഉയിര്‍പ്പ് ശുശ്രൂഷകള്‍ നടക്കും.
നിലമ്പൂര്‍: സെന്‍റ് ജോസഫ് മലങ്കര കത്തോലിക്ക പള്ളിയില്‍ ഓശാന തിരുനാള്‍ ആഘോഷിച്ചു. ഫാ. മാത്യു പെരുമ്പള്ളി കുന്നേലിന്‍റെ നേതൃത്വത്തില്‍ ഓശാന കുര്‍ബാന നടത്തി. തുടര്‍ന്നു കുരുത്തോലകളുമായി വിശ്വാസികള്‍ പ്രദക്ഷിണം നടത്തുകയും പൂക്കള്‍ വിതറുകയും ചെയ്തു. നേര്‍ച്ചക്കഞ്ഞി വിതരണവും നടത്തി.
എടക്കര: ചുങ്കത്തറ സെന്‍റ് ജോര്‍ജ് ഓര്‍ത്തഡോക്സ് വലിയ പള്ളിയില്‍ പ്രദക്ഷിണവും കുരുത്തോല വാഴ്വിന്‍റെ ശുശ്രൂഷയും കുര്‍ബാനയും നടന്നു. വികാരി ഫാ. വിനോദ് ജോസഫ് ചടങ്ങുകള്‍ക്ക് കാര്‍മികത്വം വഹിച്ചു. പനമണ്ണ സെന്‍റ മേരീസ് ഓര്‍ത്തഡോക്സ് പള്ളിയില്‍ വികാരി ഫാ. മാത്യൂസ് വട്ടിയാനിക്കല്‍ ഓശാന ശുശ്രൂഷകള്‍ക്ക് കാര്‍മികത്വം വഹിച്ചു.
അറന്നാടംപാടം സെന്‍റ് ജോര്‍ജ് യാക്കോബായ സിറിയന്‍ ചര്‍ച്ചില്‍ ഓശാനയുടെ ഭാഗമായി വിവിധ ചടങ്ങുകള്‍ നടന്നു. ശുശ്രൂഷകള്‍ക്കും കുര്‍ബാനക്കും ഫാ. ബിനോ ഫിലിപ്പ് കാര്‍മികത്വം വഹിച്ചു.
സെക്രട്ടറി അനീഷ്, ട്രസ്റ്റി ചെറിയാന്‍, നിലമ്പൂര്‍ മേഖല സെക്രട്ടറി ജോണ്‍സണ്‍, യൂത്ത് സെക്രട്ടറി വിപിന്‍ എന്നിവര്‍ നേതൃത്വം നല്‍കി.