റെയിൽവേ സ്റ്റേഷൻ പ്ലാറ്റ്ഫോമുകളിൽ നായ്ക്കൾ കൂട്ടമായി വിലസുന്നത് യാത്രക്കാർക്ക് ഭീഷണിയാണ്. സ്ത്രീകളും കുട്ടികളുമടക്കം റെയിൽവേ സ്റ്റേഷൻ പ്ലാറ്റ്ഫോമുകളിൽ ട്രെയിൻ കാത്തുനിൽക്കുന്നത് ഭയന്നാണ്.
പ്ലാറ്റ്ഫോമുകളിൽ അലഞ്ഞുതിരിഞ്ഞു നടക്കുന്ന നായ്ക്കൾ യാത്രക്കാർക്ക് ഉയർത്തുന്ന ഭീഷണി വളരെ വലുതാണ്. നായ്ക്കളുടെ സാന്നിധ്യം ഇല്ലാതാക്കാൻ റെയിൽവേ തയാറാകണം.
റെയിൽവേ പ്ലാറ്റ് ഫോമിൽ നായ്ക്കൾ കടന്നുകൂടാൻ അവസരം നൽകാത്തവിധം കവാടങ്ങളിൽ റെയിൽവേ പോലീസ് സേവനം ഉറപ്പാക്കുകയും കവാടങ്ങളിലൂടെ നായ്ക്കളുടെയും മറ്റ് വന്യജീവികളുടെയും യാചകരുടെയും പ്രവേശനം തടയുകയും ചെയ്യണം.
ഇല്ലെങ്കിൽ യാത്രക്കാർക്ക് നായ്ക്കളുടെ കടിയേൽക്കാൻ ഇടയാകും. നായ്ക്കളുടെ നിയന്ത്രണത്തിന് കോർപറേഷൻ, മുൻസിപ്പൽ അധികൃതരുടെ സേവനവും തേടണം. ഇക്കാര്യത്തിൽ റെയിൽവേ അധികൃതരും തദ്ദേശ സ്വയംഭരണ സ്ഥാപനങ്ങളും അടിയന്തര ഇടപെടൽ നടത്തണം .
റോയി വർഗീസ് ഇലവുങ്കൽ, മുണ്ടിയപ്പള്ളി