മറയൂര്: മറയൂര്, കാന്തല്ലൂര് മേഖലയില് വന്യമൃഗശല്യം രൂക്ഷമായിട്ടും ഉദ്യോഗസ്ഥര് നടപടികള് സ്വീകരിക്കാത്തതില് പ്രതിഷേധിച്ച് കര്ഷക സംഘം, കര്ഷകത്തൊഴിലാളി യൂണിയന്, സിഐടിയു എന്നിവയുടെ നേതൃത്വത്തില് മറയൂർ ഡിഎഫ്ഒ ഓഫീസിലേക്കു മാര്ച്ച് നടത്തി. മറയൂരിലും കാന്തല്ലൂരിലുമായുള്ള ഹെക്ടര് കണ്ക്കിന് ഓണക്കാല കൃഷിയാണ് കാട്ടാനകള് നശിപ്പിച്ചത്. കഴിഞ്ഞ രണ്ടു മാസമായി കാന്തല്ലൂരിലെ കൃഷിയിടങ്ങളില് തമ്പടിച്ചിരിക്കുന്ന കാട്ടാനക്കൂട്ടത്തെ ഇതേവരെ കാടിനുള്ളിലേക്കു തുരത്താന് സാധിച്ചിട്ടില്ല. ഇതിനുപുറമേ കാട്ടുപോത്ത്, മാന്, മയില്, കാട്ടുപന്നികള് എന്നിവയുടെ ശല്യം കാരണം നിരവധി കര്ഷകരാണ് കൃഷി തന്നെ പൂര്ണമായും ഉപേക്ഷിച്ചിരുന്നത്.
ഓണക്കാലത്ത് ടണ്കണക്കിനു പച്ചക്കറി ഉത്പാദിപ്പിച്ചിരുന്ന മേഖലയാണ് മറയൂര്, കാന്തല്ലൂര്, വട്ടവട മേഖല. വന്യമൃഗശല്യം രൂക്ഷമായതോടെ ഈ പ്രദേശങ്ങളിലെ ഉത്പാദനം നാലിലൊന്നായി കുറഞ്ഞിരിക്കുകയാണ്. വനാതിര്ത്തികളിലെ കര്ഷകര്ക്ക് സോളാര് ഫെന്സിംഗ് സ്ഥാപിക്കൂന്നതിനായി സര്ക്കാര് തുക അനുവദിക്കുകയും നിര്ദേശം നല്കുകയും ചെയ്തെങ്കിലും ഇതേവരെ നടപടികള് ആരംഭിക്കാത്തതിനാലാണ് വിവിധ സംഘടനകളുടെ നേതൃത്വത്തില് പ്രതിഷേധം ആംഭിച്ചത്. മറയൂര് ഡിഎഫ്ഒ ഓഫീസിലേക്കു നടന്ന പ്രതിഷേധ മാര്ച്ച് അഡ്വ. എ. രാജ എംഎല് എ ഉദ്ഘാടനം ചെയ്തു.
കര്ഷക സംഘം ഏരിയ പ്രസിഡന്റ് എസ്. നാഗയ്യ അധ്യക്ഷത വഹിച്ചു. സിഐടിയു ജില്ലാ ജോയിന്റ് സെക്രട്ടറി എം. ലക്ഷ്മണന്, സിപിഎം മറയൂര് ഏരിയാ സെക്രട്ടറി എ.എസ്. ശ്രീനിവാസന്, ഫോറസ്റ്റ് വാച്ചേഴ്സ് അസോസിയേഷന് സംസ്ഥാന കമ്മിറ്റിയഗം ജെയിംസ് മാത്യു, കാന്തല്ലൂര് ഗ്രാമപഞ്ചായത്ത് പ്രസിഡന്റ് പി.ടി. തങ്കച്ചന്, കെഎസ്കെടിയു ഏരിയാ സെക്രട്ടറി എസ്. ചന്ദ്രന്, സിപിഎം കാന്തല്ലൂര് ലോക്കല് സെക്രട്ടറി കെ. മോഹനന്, സിഐടിയു ജില്ലാ കമ്മിറ്റിയഗം എസ്. മണികണ്ഠന്, സിപിഎം ടൗണ് ലോക്കല് കമ്മിറ്റി സെക്രട്ടറി എസ്. അണ്ണാദുരൈ, എസ്. ചന്ദ്രന് എന്നിവര് പ്രസംഗിച്ചു.