പാലാ: പ്ലാറ്റിനം ജൂബിലി ആഘോഷങ്ങളുടെ നിറവിലാണ് സീറോ മലബാര് സഭയുടെ മേജര് ആര്ക്കിഎപ്പിസ്കോപ്പല് അസംബ്ലിക്ക് ആതിഥ്യമരുളുന്നതെന്നത് പാലാ രൂപതയ്ക്ക് ഇരട്ടി സന്തോഷമാണ് സമ്മാനിച്ചിട്ടുള്ളത്. ഭാരത കത്തോലിക്കാസഭയിലെ മെത്രാന്മാരുടെ (സിബിസിഐ) ഒന്നാകെയുള്ള സമ്മേളനം കുറ്റമറ്റവിധം നടത്തിയ പാലാ രൂപതയ്ക്ക് ലഭിച്ച പുതിയ ഉത്തരവാദിത്തമാണ് ആഗോള സീറോമലബാര് സഭയുടെ അസംബ്ലി വേദിയെന്നും ബിഷപ് മാര് ജോസഫ് കല്ലറങ്ങാട്ട് പറഞ്ഞു.
ബിഷപ് മാര് ജോസഫ് കല്ലറങ്ങാട്ടിന്റെ നേതൃത്വത്തില് വിപുലമായ കമ്മിറ്റികള് രൂപീകരിച്ചാണ് മാസങ്ങള്ക്കു മുമ്പേ ഒരുക്കങ്ങള് ആരംഭിച്ചത്. മുഖ്യ വികാരി ജനറാള് മോണ്. ജോസഫ് തടത്തില്, വികാരി ജനറാള്മാരായ മോണ്. ജോസഫ് മലേപറമ്പില്, മോണ്. സെബാസ്റ്റ്യന് വേത്താനത്ത്, മോണ്. ജോസഫ് കണിയോടിക്കല്, ചാന്സലര് റവ.ഡോ. ജോസഫ് കുറ്റിയാങ്കല്, പ്രൊക്കുറേറ്റര് റവ. ഡോ. ജോസഫ് മുത്തനാട്ട്, ഫാ. ജോസ് തറപ്പേല്, ഫാ. ജയിംസ് പനച്ചിക്കല്കരോട്ട്, ഫാ. തോമസ് മണ്ണൂര്, ഫാ. മാത്യു പുല്ലുകാലായില് തുടങ്ങിയവര് വിവിധ കമ്മിറ്റികളുടെ കണ്വീനര്മാരാണ്. ചര്ച്ചകള്ക്ക് അടിസ്ഥാനമായ രേഖയുമായി ബന്ധപ്പെട്ട കമ്മിറ്റികള് കാക്കനാട് കൂരിയായില്നിന്നു പവര്ത്തിച്ചുകൊണ്ടിരിക്കുന്നു. രൂപത പാസ്റ്ററല് കൗണ്സില് ചെയര്മാന് ഡോ. കെ.കെ ജോസ്, സെക്രട്ടറി സിജു സെബാസ്റ്റ്യന് എന്നിവര് പൊതുവില് നേതൃത്വം നല്കുന്നു.
പ്രോഗ്രാം, രജിസ്ട്രേഷന്, റിസപ്ഷന്, അക്കോമഡേഷന്, ട്രാന്സ്പോര്ട്ടേഷന്, ഫുഡ്, ലിറ്റര്ജി, കള്ച്ചറല് പ്രോഗ്രാം, മീഡിയ, സ്റ്റേജ്, ഡോക്കുമെന്റേഷന് ആൻഡ് ഡ്രാഫ്റ്റിംഗ് എന്നിങ്ങനെയാണ് വിവിധ കമ്മിറ്റികള് പ്രവര്ത്തനം നടത്തുന്നത്. അസംബ്ലിയുടെ ഭാഗമായുള്ള വിശുദ്ധ കുര്ബാന, മറ്റ് പ്രാര്ഥനകള് എന്നിവയുമായി ബന്ധപ്പെട്ട് പ്രത്യേക ഗായകസംഘവും ക്രമീകരിച്ചിട്ടുണ്ട്. മാര്ത്തോമ്മാ നസ്രാണി പാരമ്പര്യങ്ങളോട് ചേര്ന്നുനില്ക്കുന്ന കലാപരിപാടികളുടെ അവതരണത്തിനുള്ള തയാറെടുപ്പുകളും നടത്തിക്കഴിഞ്ഞു.
അസംബ്ലിക്കെത്തുന്നവരുടെ വാഹനപാര്ക്കിംഗിന് സെന്റ് തോമസ് കോളജ് മൈതാനം ഒരുക്കിക്കഴിഞ്ഞു. ലോകത്തിന്റെ വിവിധ ഭാഗങ്ങളില് നിന്നെത്തുന്ന പ്രതിനിധികളെന്ന നിലയില് പ്രാര്ഥനകളടക്കം വിവിധ ഭാഷകളില് ഒരുക്കിയിട്ടുണ്ട്. ക്രമീകരണങ്ങള് ഇതിനോടകം പലതവണ യോഗം ചേര്ന്ന് വിലയിരുത്തുകയും ചെയ്തിട്ടുണ്ട്.