പഞ്ചായത്ത് ഫണ്ടിന് താമസം : നാട്ടുകാരുടെ ഒരുമയിൽ റോഡ് സഞ്ചാരയോഗ്യമായി : Deepika.com Nattu Visesham

KOTTAYAM

പഞ്ചായത്ത് ഫണ്ടിന് താമസം : നാട്ടുകാരുടെ ഒരുമയിൽ റോഡ് സഞ്ചാരയോഗ്യമായി

Monday, July 29, 2024 7:18 AM IST

ഏറ്റുമാനൂർ: റോഡിലാകെ കുഴികൾ. അനുവദിച്ച പഞ്ചായത്ത് ഫണ്ട് ലഭിക്കാൻ കാലതാമസം. സഹികെട്ട നാട്ടുകാർ റെസിഡന്‍റ്സ് അസോസിയേഷന്‍റെ നേതൃത്വത്തിൽ ഒരു ലക്ഷത്തോളം രൂപ ചെലവഴിച്ച് റോഡ് സഞ്ചാരയോഗ്യമാക്കി.

എംസി റോഡിൽ ഏറ്റുമാനൂർ തവളക്കുഴിയിൽനിന്നാരംഭിച്ച് റെയിൽവേ സ്റ്റേഷൻ വരെയുള്ള റോഡിന്‍റെ വികാസ് ഭവൻ വരെയുള്ള 750 മീറ്ററിനുള്ളിലെ കുഴികളാണ് ചൂരക്കുളങ്ങര റസിഡന്‍റ്സ് അസോസിയേഷന്‍റെ നേതൃത്വത്തിൽ കോൺക്രീറ്റ് ചെയ്ത് അടച്ചത്. അതിരമ്പുഴ പഞ്ചായത്ത് നാലാം വാർഡിൽ ഉൾപ്പെടുന്നതാണ് റോഡ്. പൂർണമായും തകർന്നാണെങ്കിലും റോഡിൽ വികാസ് ഭവൻ വരെയുള്ള ഭാഗത്തായിരുന്നു സഞ്ചാരം തീർത്തും അസാധ്യമായിരുന്നത്.

വർഷങ്ങളായി തകർന്നു കിടക്കുന്ന റോഡ് ടാർ ചെയ്ത് സഞ്ചാരയോഗ്യമാക്കണമെന്ന് ചൂരക്കുളങ്ങര റസിഡന്‍റ്സ് അസോസിയേഷൻ നിരവധി തവണ പഞ്ചായത്ത് അധികൃതരോട് ആവശ്യപ്പെട്ടിരുന്നു. ഈ വർഷം പഞ്ചായത്ത് ഫണ്ട് അനുവദിച്ചെങ്കിലും തുക ലഭ്യമാകാൻ കാലതാമസം ഉണ്ടാകുമെന്നു വന്നതോടെ റോഡ് താൽക്കാലികമായി സഞ്ചാരയോഗ്യമാക്കാൻ ചൂരക്കുളങ്ങര റസിഡന്‍റ്സ് അസോസിയേഷൻ തന്നെ രംഗത്തെത്തുകയായിരുന്നു. പഞ്ചായത്ത് മെംബർ രജിത ഹരികുമാറും നാട്ടുകാരുടെ യജ്ഞത്തിൽ പങ്കാളിയായി.

മൂന്നു ദിവസങ്ങളിലായി നടന്ന കുഴിയടയ്ക്കൽ ഇന്നലെയാണ് പൂർത്തിയായത്. ഒരു ലക്ഷത്തോളം രൂപ ചെലവായി. റസിഡന്‍റ്സ് അസോസിയേഷൻ അംഗങ്ങളിൽനിന്ന് ഈ തുക സംഭരിച്ചു.

ചൂരക്കുളങ്ങര റസിഡന്‍റ്സ് അസോസിയേഷൻ പ്രസിഡന്‍റ് ഒ.ആർ. ശ്രീകുമാർ, സെക്രട്ടറി സുജ എസ്. നായർ, ട്രഷറർ കെ.എസ്. സുകുമാരൻ, വൈസ് പ്രസിഡന്‍റ് ബിജോ കൃഷ്ണൻ, ജോയിന്‍റ് സെക്രട്ടറിമാരായ രാജപ്പൻ മുത്തുച്ചിപ്പി, അലക്സ്, കമ്മിറ്റി അംഗങ്ങളായ സന്തോഷ് വിക്രമൻ, ജി. പ്രദീപ്കുമാർ, ഗോപാലകൃഷ്ണൻ നായർ, സുശീല കരുണാകരൻ, രമാദേവി, പ്രവാസി മലയാളി സുബിൻ മഠത്തിൽ എന്നിവർ നേതൃത്വം നൽകി .