ഭരണങ്ങാനത്ത് ജപമാല പ്രദക്ഷിണം ഭക്തിസാന്ദ്രമായി : Deepika.com Nattu Visesham

KOTTAYAM

ഭരണങ്ങാനത്ത് ജപമാല പ്രദക്ഷിണം ഭക്തിസാന്ദ്രമായി

Sunday, July 28, 2024 4:41 AM IST

ഭരണങ്ങാനം: വിശുദ്ധ അല്‍ഫോന്‍സാമ്മയുടെ തിരുനാളിന്‍റെ പ്രധാന ദിനമായ ഇന്ന് ആയിരക്കണക്കിന് വിശ്വാസികളുടെ സാന്നിധ്യത്താല്‍ ഭരണങ്ങാനം ഭക്തിസാന്ദ്രമാകും.

തിരുനാള്‍ ആരംഭിച്ചതുമുതല്‍ നാടിന്‍റെ നാനാഭാഗങ്ങളില്‍നിന്നും അല്‍ഫോന്‍സാ കബറിടത്തിങ്കലേക്ക് വിശ്വാസികളുടെ പ്രവാഹമായിരുന്നു. അല്‍ഫോന്‍സാമ്മ ജീവിച്ചുമരിച്ച ക്ലാരമഠത്തിലേക്ക് ഇന്നലെ വൈകുന്നേരം നടന്ന ജപമാല റാലിയില്‍ കത്തിച്ച മെഴുകുതിരിയുമായി അനേകായിരങ്ങളാണ് പങ്കെടുത്തത്.

അല്‍ഫോന്‍സാമ്മയുടെ സംസ്‌കാരവേളയില്‍ പങ്കെടുത്തത് ഏതാനും ആളുകളായിരുന്നെങ്കില്‍ ഇന്നലെ ആ വിശുദ്ധയുടെ സന്നിധിയിലേക്ക് എത്തിയത് ജനസമുദ്രമാണ്. കൊടിതോരണങ്ങളാലും പേപ്പല്‍ പതാകകളാലും ദീപാലങ്കാരങ്ങളാലും മനോഹരമായ വീഥിയിലൂടെയാണ് മഠത്തിലേക്ക് പ്രദക്ഷിണമായി നീങ്ങിയത്. മഠത്തിലേക്ക് അല്‍ഫോന്‍സാമ്മയുടെ തിരുസ്വരൂപം എത്തിച്ചപ്പോള്‍ സന്യാസിനികള്‍ കത്തിച്ച മെഴുകുതിരികളേന്തി സ്വീകരിച്ചു. ഫാ. തോമസ് മധുരപ്പുഴ കാര്‍മികത്വം വഹിച്ചു. ഫാ. ജില്‍സൺ മാത്യു കക്കാട്ടുപിള്ളില്‍ വിസി സന്ദേശം നല്‍കി. ജപമാല പ്രദക്ഷിണം രാത്രി എട്ടരയോടെ കബറിടപ്പള്ളിയില്‍ സമാപിച്ചു.

ഭരണങ്ങാനത്ത് ഇന്ന് പ്രധാന തിരുനാൾ

പുലര്‍ച്ചെ 4.45ന് വിശുദ്ധ കുര്‍ബാന, നൊവേന- തീര്‍ഥാടന കേന്ദ്രത്തിലെ വൈദികര്‍. ആറിന് വിശുദ്ധ കുര്‍ബാന- ഫാ. സഖറിയാസ് ആട്ടപ്പാട്ട്. 6.45 നേര്‍ച്ചയപ്പം വെഞ്ചരിപ്പ് -മാര്‍ ജോസഫ് പള്ളിക്കാപറമ്പില്‍. ഏഴിന് വിശുദ്ധ കുര്‍ബാന, സന്ദേശം- മാര്‍ ജോസഫ് കല്ലറങ്ങാട്ട്. 8.30ന് വിശുദ്ധ കുര്‍ബാന- മോണ്‍. ജോസഫ് തടത്തില്‍. 9.30ന് വിശുദ്ധ കുര്‍ബാന- ഫാ. സെബാസ്റ്റ്യന്‍ കുറ്റിയാനിക്കല്‍. 10.30ന് തിരുനാള്‍ കുര്‍ബാന, സന്ദേശം (ഇടവക ദേവാലയത്തില്‍)- കര്‍ദിനാള്‍ മാര്‍ ജോര്‍ജ് ആലഞ്ചേരി. 12.30ന് തിരുനാള്‍ പ്രദക്ഷിണം. ഉച്ചകഴിഞ്ഞ് 2.30ന് വിശുദ്ധ കുര്‍ബാന- ഫാ. തോമസ് കുറ്റിക്കാട്ട്. 3.30ന് വിശുദ്ധ കുര്‍ബാന- ഫാ. അജോ കളത്തില്‍ സിആര്‍എം. 4.30ന് വിശുദ്ധ കുര്‍ബാന- ഫാ.ജോസഫ് തെങ്ങുംപള്ളി. 5.30ന് വിശുദ്ധ കുര്‍ബാന- ഫാ. ജോണ്‍ ചാവേലില്‍. 6.30ന് വിശുദ്ധ കുര്‍ബാന ഫാ. തോമസ് ഓലായത്തില്‍. 7.30ന് വിശുദ്ധ കുര്‍ബാന- ഫാ. ജോണ്‍ കണ്ണന്താനം. 8.30ന് വിശുദ്ധ കുര്‍ബാന- ഫാ. കുര്യാക്കോസ് വടക്കേത്തകിടിയേല്‍. 9.30ന് വിശുദ്ധ കുര്‍ബാന - ഫാ. തോമസ് കിഴക്കേക്കര.