ആലപ്പുഴ കളർകോട്ട് അഞ്ച് മെഡിക്കൽ വിദ്യാര്‍ഥികളുടെ മരണത്തിനിടയാക്കിയ അപകടത്തിന്‍റെ കാരണം സെന്‍ട്രി ഫ്യൂഗല്‍ ഫോഴ്‌സ് മൂലമുണ്ടാകുന്ന ഷിഫ്റ്റിംഗ് ഓഫ് സെന്‍റര്‍ ഓഫ് ഗ്രാവിറ്റിയാണ്. ഒരു കല്ല് ചരടില്‍ കെട്ടി കറക്കിയാല്‍ കല്ല് ഒരു വൃത്തപരിധിയിലൂടെ സഞ്ചരിക്കും. ചരട് പൊട്ടിയാല്‍ കല്ല് വൃത്തപരിധിക്കു വെളിയിലേക്ക് തെറിച്ചുപോകും. ഇതാണ് സെന്‍ട്രിഫ്യൂഗല്‍ ഫോഴ്‌സ്. കറക്കുമ്പോള്‍ കൈയില്‍ അനുഭവിക്കുന്ന ബലം സെന്‍ട്രിപെറ്റല്‍ ഫോഴ്‌സാണ്.
വൃത്തത്തിലൂടെ വാഹനം സഞ്ചരിക്കുന്നത് വളവുകളിലും ഓവര്‍ടേക്ക് ചെയ്യുമ്പോഴുമാണ്. ഒരു ബസ് ഇടതുവശത്തേക്കുള്ള വളവ് സ്പീഡില്‍ എടുക്കുമ്പോള്‍ യാത്രക്കാര്‍ വലതുവശത്തേക്ക് ചരിയുന്നു. മറ്റൊന്നിനെ ഓവര്‍ടേക്ക് ചെയ്യുമ്പോഴും ഇതു സംഭവിക്കുന്നു. ഭാരം വലതുവശത്തെ ടയറുകളില്‍ കൂടുന്നു. എട്ട് ടണ്‍ ഭാരമുള്ള വാഹനം സമതലത്തില്‍ കിടക്കുമ്പോള്‍ ഓരോ ടയറിലും രണ്ടു ടണ്‍ ഭാരം വരുന്നു. ഇടതുവശത്തെ വളവ് എടുക്കുമ്പോള്‍ ക്രമേണ വലതുവശത്തെ ടയറുകളില്‍ മൂന്നു ടണ്‍ വീതവും ഇടതുവശത്തെ ടയറുകളില്‍ ഒരു ടണ്‍ വീതവും വരാം. ഇതില്‍ കൂടുതലും വലതുവശത്തെ ടയറുകളില്‍ കേന്ദ്രീകരിക്കാം. ഇതാണ് ഷിഫ്റ്റിംഗ് ഓഫ് സെന്‍റര്‍ ഓഫ് ഗ്രാവിറ്റി.
ഇങ്ങനെ വലതുവശത്തെ ടയറുകളില്‍ ഭാരം കൂടുതല്‍ കേന്ദ്രീകരിക്കുമ്പോള്‍ സഡന്‍ ബ്രേക്ക് ചെയ്താല്‍ ബ്രേക്കിന്‍റെ ആപ്ലിക്കേഷന്‍ വലതുവശത്തെ ടയറുകളില്‍ കൂടുതല്‍ കേന്ദ്രീകരിക്കും. കാരണം, ബ്രേക്കിന്‍റെ ആപ്ലിക്കേഷന്‍ ടയറിന്‍റെ ഭൂമിയുമായുള്ള ഫ്രിക്‌ഷന്‍ മൂലമാണ് പൂര്‍ത്തീകരിക്കുന്നത്. അപ്പോള്‍ വാഹനം ഡ്രൈവറുടെ നിയന്ത്രണത്തിലല്ല. 90 ഡിഗ്രിയോ അതില്‍ കൂടുതലോ വാഹനം വലതുവശത്തേക്ക് വെട്ടിത്തിരിയും.
ഷിഫ്റ്റിംഗ് ഓഫ് സെന്‍റര്‍ ഓഫ് ഗ്രാവിറ്റി നടക്കാന്‍ കാരണങ്ങള്‍
1) വളവ് ഒരു വൃത്തമായി വരച്ചാല്‍ കിട്ടുന്ന റേഡിയസ് (അര്‍ഥവ്യാസാര്‍ഥം) കുറവാണെങ്കില്‍ (അതായത് ഷാര്‍പ്പ് കേര്‍വ്).
2) വാഹനത്തിന്‍റെ ഭാരം കൂടുമ്പോള്‍.
3) വാഹനത്തിന്‍റെ പൊക്കം കൂട്ടുന്ന മേക്ക്.
4) റോഡിന്‍റെ ചരിവ്.
5) പ്രധാനമായത് വാഹനത്തിന്‍റെ സ്പീഡ്.
6) ദ്രാവകരൂപത്തിലുള്ള ടാങ്കറില്‍ പകുതി ദ്രാവകം ഉള്ളപ്പോള്‍ ഉണ്ടാകുന്ന ഓളം.
7) തടി കയറ്റിയ വാഹനത്തില്‍ തടിയുടെ ഭാരം തുല്യമായിരിക്കണമെന്നില്ല.
ശ്രദ്ധിക്കുക...
കാല്‍നടക്കാരോ ഇരുചക്ര വാഹനക്കാരോ ചെറിയ വാഹനക്കാരോ ഒരു കാരണവശാലും വലിയ വാഹനക്കാര്‍ക്ക് സഡന്‍ ബ്രേക്ക് ചെയ്യാന്‍ ഇടയാക്കരുത്.
സിസിടിവി ദൃശ്യങ്ങളില്‍ ഓവര്‍ടേക്ക് ചെയ്ത കാര്‍ 90 ഡിഗ്രി ആംഗിളില്‍ വെട്ടിത്തിരിയുന്നത് വ്യക്തമാണ്. സ്‌കിഡ് ചെയ്താല്‍ സംഭവിക്കുന്ന ദൃശ്യമല്ല ഇത്. സഡന്‍ ബ്രേക്ക് ചെയ്തപ്പോള്‍, ഓവര്‍ടേക്കിംഗും, 11 പേര്‍ അടങ്ങുന്ന കുട്ടികളുടെ ഭാരവും വാഹനത്തിന്‍റെ സ്പീഡും ഷിഫ്റ്റിംഗ് ഓഫ് സെന്‍റര്‍ ഓഫ് ഗ്രാവിറ്റിക്ക് കാരണമായി അപകടം ഉണ്ടായി.
ചിലപ്പോഴൊക്കെ വലിയ വാഹനങ്ങൾ തെന്നിയോ മറിഞ്ഞോ അപകടം വരും.
തോമസ് ജോര്‍ജ് റിട്ട. പോലീസ് സൂപ്രണ്ട്