ക്രീപ ഗ്രീന്‍ പവര്‍ എക്‌സ്‌പോയ്ക്ക് തുടക്കം
Thursday, November 28, 2024 11:56 PM IST
കൊച്ചി: കേരള റിന്യൂവബിള്‍ എനര്‍ജി ഓൺട്രപ്രണേഴ്‌സ് ആന്‍ഡ് പ്രമോട്ടേഴ്‌സ് അസോസിയേഷന്‍ (ക്രീപ) സംഘടിപ്പിക്കുന്ന ഗ്രീന്‍ പവര്‍ എക്‌സ്‌പോയുടെ ഏഴാമത് പതിപ്പിന് അങ്കമാലി അഡ്‌ലക്‌സ് കണ്‍വന്‍ഷന്‍ സെന്‍ററില്‍ തുടക്കമായി. അനര്‍ട്ട് സിഇഒ നരേന്ദ്രനാഥ് വേളൂരി ഉദ്ഘാടനം ചെയ്തു.
എക്‌സ്‌പോ ഭാരവാഹികളായ ചെയര്‍മാന്‍ സി. ജോസ് കലൂക്കാരന്‍, പ്രസിഡന്‍റ് ജി. ശിവരാമകൃഷ്ണന്‍, രക്ഷാധികാരി റവ. ഡോ. ജോര്‍ജ് പീറ്റര്‍ പിട്ടാപ്പിള്ളില്‍, ഡയറക്ടര്‍ ഓഫ് ദ എനര്‍ജി മാനേജ്‌മെന്‍റ് സെന്‍റര്‍ ഡോ. ആര്‍. ഹരികുമാര്‍, ക്രീപ സെക്രട്ടറി ആന്‍ഡ് ഡെപ്യൂട്ടി ചെയര്‍മാന്‍ മുഹമ്മദ് ഷഫീഖ്, ജി.എസ്. പ്രകാശ് എന്നിവര്‍ സന്നിഹിതരായിരുന്നു.
എക്‌സ്‌പോയില്‍ സോളാര്‍, കാറ്റില്‍നിന്നുള്ള ഊര്‍ജം, ബയോ എനര്‍ജി തുടങ്ങിയ മേഖലകളില്‍ ഏറ്റവും പുതിയ പരിഹാരങ്ങള്‍ അവതരിപ്പിക്കുന്ന 250ല്‍ അധികം പ്രദര്‍ശകര്‍ പങ്കെടുക്കും.
തൊഴില്‍മേഖല, യുവ ഇന്നൊവേറ്റേഴ്‌സ് പ്രോഗ്രാം, ചര്‍ച്ചകള്‍, സാങ്കേതികപ്രദര്‍ശനങ്ങള്‍, ലക്കി ഡ്രോ സമ്മാനങ്ങള്‍ എന്നിവയും എക്‌സ്‌പോയിലുണ്ടാകും. രാവിലെ 10 മുതല്‍ രാത്രി ഏഴു വരെ നടക്കുന്ന എക്‌സ്‌പോയിൽ പ്രവേശനം സൗജന്യമാണ്.