ADVERTISEMENT

ADVERTISEMENT

സെന്‍റ് ജോസഫ്‌സ് പബ്ലിക് സ്‌കൂളിൽ മെരിറ്റ് ഡേ ആഘോഷിച്ചു

കാഞ്ഞിരപ്പള്ളി: കുന്നുംഭാഗം സെന്‍റ് ജോസഫ്‌സ് പബ്ലിക് സ്‌കൂളിലെ മെരിറ്റ് ഡേ ദിനാഘോഷം ചീഫ് വിപ്പ് ഡോ.എൻ. ജയരാജ് ഉദ്ഘാടനം ചെയ്തു. സ്‌കൂള്‍ മാനേജര്‍ സിസ്റ്റർ അമല കിടങ്ങത്താഴെ എസ്എബിഎസ് അധ്യക്ഷത വഹിച്ചു. പ്രിന്‍സിപ്പല്‍ സിസ്റ്റർ ലിറ്റില്‍ റോസ് എസ്എബിഎസ്, വൈസ് പ്രിന്‍സിപ്പല്‍ സിസ്റ്റർ റോസ്‌ബെല്‍ എസ്എബിഎസ്, പിടിഎ പ്രസിഡന്‍റ് ആന്‍റണി മാര്‍ട്ടിന്‍, പിടിഎ വൈസ് പ്രസിഡന്‍റ് സോമി സെബാസ്റ്റ്യന്‍ എന്നിവര്‍ പ്രസംഗിച്ചു. യോഗത്തിൽ മികച്ച വിജയം കൈവരിച്ച കുട്ടികളെ ആദരിച്ചു.

ADVERTISEMENT

ഓൺലൈൻ തട്ടിപ്പ്: വടവാതൂർ സ്വദേശിയുടെ 1.64 കോടി തട്ടിയ പ്രതി അറസ്റ്റിൽ

കോട്ടയം: ഓൺലൈൻ തട്ടിപ്പുവഴി വടവാതൂർ സ്വദേശിയുടെ ഒരു കോടി അറുപത്തിനാല് ലക്ഷം രൂപ തട്ടിയ പ്രതി വിശാഖപട്ടണത്തുനിന്നും അറസ്റ്റിലായി. വിശാഖപട്ടണം ഗാന്ധിനഗർ സ്വദേശിയായ രമേഷ് വെല്ലംകുള (33) ആണ് കോട്ടയം സൈബർ പോലീസിന്‍റെ പിടിയിലായത്. ഓൺലൈൻ ഷെയർ ട്രേഡിംഗ് ബിസിനസിലൂടെ ലാഭമുണ്ടാക്കിത്തരാമെന്ന് വിശ്വസിപ്പിച്ചശേഷം ചെറിയ തുക നിക്ഷേപിച്ച് ട്രേഡിംഗിലൂടെ എന്നു പറഞ്ഞു ലാഭംകൊടുത്ത് വിശ്വാസം ആർജിച്ചശേഷം തട്ടിപ്പ് നടത്തുകയായിരുന്നു. വലിയ തുകയുടെ ട്രേഡിംഗിലൂടെ വലിയ ലാഭം ഉണ്ടാക്കിത്തരാമെന്ന് പറഞ്ഞു വിശ്വസിപ്പിച്ച് പല പ്രാവശ്യമായി 1,64,00,141 രൂപ പല അക്കൗണ്ടുകളിൽനിന്നായി പ്രതി കൈക്കലാക്കുകയായിരുന്നു. ഏപ്രിൽ 28 മുതൽ മേയ് 20 വരെയുള്ള കാലയളവിലാണ് കേസിനാസ്പദമായ സംഭവം. ഓൺലൈനിൽ ഷെയർ ട്രേഡിംഗിനെക്കുറിച്ച് സെർച്ച് ചെയ്ത യുവാവിന് വാട്സാപ്പിൽ കങ്കണ ശർമ എന്ന പേരിൽ”ഷെയർ ട്രേഡിംഗിൽ താല്പര്യമുണ്ടോ ഞങ്ങൾ സഹായിക്കാം’’ എന്ന മെസേജ് ലഭിച്ചു. ഈ സമയം കമ്പനിയെക്കുറിച്ചും സ്റ്റാഫിനെപ്പറ്റിയും അന്വേഷിച്ചതിൽ ഇങ്ങനെ ഒരു സ്ഥാപനം നിലവിലുണ്ടെന്നും കങ്കണ ശർമ എന്ന ഒരു സ്റ്റാഫ് ഈ സ്ഥാപനത്തിൽ ഉണ്ടെന്നും യുവാവിന് ബോധ്യപ്പെട്ടു. തട്ടിപ്പുകാർ വാട്സ്ആപ്പ് വഴി അയച്ചുകൊടുത്ത ലിങ്കിൽ ക്ലിക്ക് ചെയ്ത യുവാവ് തട്ടിപ്പുകാർ തയാറാക്കിയ വ്യാജ കമ്പനിയുടെ സൈറ്റിൽ പ്രവേശിക്കുകയായിരുന്നു. തട്ടിപ്പുകാർ ആവശ്യപ്പെട്ട തുക അയച്ചുകൊടുത്തു ട്രേഡിംഗ് നടത്തിയ യുവാവ്, നിക്ഷേപിച്ച തുകയ്ക്ക് വലിയ തുക ലാഭമായി തന്‍റെ അക്കൗണ്ടിൽ വന്നതായി ബോധ്യപ്പെട്ടു. എന്നാൽ, ഈ തുക പിൻവലിക്കാൻ ശ്രമിച്ചപ്പോഴാണ് താൻ പറ്റിക്കപ്പെടുകയായിരുന്നുവെന്നും തനിക്ക് പണം നഷ്ടപ്പെട്ടെന്നും യുവാവിന് ബോധ്യമായത്. ജില്ലാ പോലീസ് ചീഫ് ഷാഹുൽ ഹമീദിന്‍റെ നിർദേശപ്രകാരം അന്വേഷണസംഘം നടത്തിയ പരിശോധനയിലാണ് പ്രതിയെ വിശാഖപട്ടണത്തുനിന്നു പിടികൂടിയത്. ഇയാളെ കോടതിയിൽ ഹാജരാക്കി.

പുതിയ പദ്ധതികള്‍ എംജി സര്‍വകലാശാലയുടെ കായികമുന്നേറ്റത്തിനു കരുത്തേകും: മന്ത്രി വാസവന്‍

കോട്ടയം: കായിക മേഖലയിലെ അടിസ്ഥാനസൗകര്യ വികസനത്തിനായി സര്‍ക്കാര്‍ നടപ്പാക്കുന്ന പദ്ധതികള്‍ എംജി സര്‍വകലാശാലയുടെ ഈ രംഗത്തെ മുന്നേറ്റത്തിനു കരുത്തുപകരുമെന്ന് മന്ത്രി വി.എന്‍. വാസവന്‍. 2023-24 വര്‍ഷത്തില്‍ കായികമേഖലയില്‍ മികവു പുലര്‍ത്തിയ കോളജുകളെയും താരങ്ങളെയും അനുമോദിക്കുന്ന ചടങ്ങ് സര്‍വകലാശാലയില്‍ ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. വൈസ് ചാന്‍സലര്‍ ഡോ. സി.ടി. അരവിന്ദകുമാര്‍ അധ്യക്ഷത വഹിച്ചു. മുന്‍ രാജ്യാന്തര കായികതാരങ്ങളായ ഷൈനി വിത്സനും വിത്സന്‍ ചെറിയാനും വിശിഷ്ടാതിഥികളായിരുന്നു. സിന്‍ഡിക്കേറ്റ് അംഗങ്ങളായ അഡ്വ. റെജി സക്കറിയ, പി. ഹരികൃഷ്ണന്‍, ഡോ. ബിജു തോമസ്, എ.എസ്. സുമേഷ്, ഡോ. ടി.വി. സുജ, സര്‍വകലാശാലാ രജിസ്ട്രാര്‍ ഡോ. ബിസ്മി ഗോപാലകൃഷ്ണന്‍, പരീക്ഷാ കണ്‍ട്രോളര്‍ ഡോ. സി.എം. ശ്രീജിത്ത്, സ്‌കൂള്‍ ഓഫ് ഫിസിക്കല്‍ എജ്യുക്കേഷന്‍ ആന്‍ഡ് സ്പോര്‍ട്സ് സയന്‍സസ് ഡയറക്ടര്‍ ഡോ. ബിനു ജോര്‍ജ് വര്‍ഗീസ്, ഫിസിക്കല്‍ എജ്യുക്കേഷന്‍ ടീച്ചേഴ്സ് അസോസിയേഷന്‍ പ്രസിഡന്‍റ് ജോസ് സേവ്യര്‍, കെ.കെ. സ്വാതി എന്നിവര്‍ പങ്കെടുത്തു.

ജീവിതവിജയത്തിന് വ്യക്തമായ ലക്ഷ്യം വേണം: ഡോ. എസ്. ശശി ആനന്ദ് ശ്രീധരന്‍

കോട്ടയം: ജീവിതത്തില്‍ വിജയം നേടണമെങ്കില്‍ വ്യക്തമായ ലക്ഷ്യം വേണമെന്നു തമിഴ്‌നാട് കലശലിംഗം യൂണിവേഴ്‌സിറ്റി വൈസ് പ്രസിഡന്‍റ് ഡോ. എസ്. ശശി ആനന്ദ് ശ്രീധരന്‍. സെയിന്‍റ്ഗിറ്റ്‌സ് കോളജ് ഓഫ് എന്‍ജിനിയറിംഗിൽ (ഓട്ടോണമസ്) നിന്നും ബാച്ചിലര്‍ ഡിഗ്രി പൂര്‍ത്തിയാക്കിയ രണ്ടാമത് ബാച്ചിന്‍റെയും മാസ്റ്റര്‍ ബിരുദങ്ങള്‍ പൂര്‍ത്തിയാക്കിയ നാലാമത് ബാച്ചിന്‍റെയും കോണ്‍വൊക്കേഷന്‍ ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ഡയറക്ടര്‍ തോമസ് ടി. ജോണ്‍ ചടങ്ങില്‍ അധ്യക്ഷത വഹിച്ചു. പ്രിന്‍സിപ്പല്‍ ഡോ. സുധ ടി., എക്‌സിക്യൂട്ടീവ് ചെയര്‍മാന്‍ പുന്നൂസ് ജോര്‍ജ്, അസോസിയേറ്റ് ഡയറക്ടര്‍ ഡോ. റീബു സക്കറിയ, വൈസ് പ്രിന്‍സിപ്പൽ ഡോ. റോജി ജോര്‍ജ്, എംസിഎ ഡയറക്ടര്‍ മിനി പുന്നൂസ്, ചീഫ് ഡിജിറ്റല്‍ ഓഫീസര്‍ ഡോ. നവീന്‍ ജോണ്‍ പുന്നൂസ്, കണ്‍ട്രോളര്‍ ഓഫ് എക്‌സാമിനേഷന്‍സ് ഡോ. റിബോയ് ചെറിയാന്‍, ഡോ. സൂസന്‍ ജോര്‍ജ്, ഡോ. ജി. ഷൈനി, ഡോ. ജോസ് ജോയി തോപ്പന്‍, ഡോ. ജയദേവി വേണുഗോപാല്‍, വിവിധ വകുപ്പ് മേധാവികള്‍ എന്നിവര്‍ ചടങ്ങില്‍ സംബന്ധിച്ചു.

പാന്പാടിയിൽ തെരുവുനായ ആക്രമണത്തിൽ മൂന്നുപേർക്കു ഗുരുതര പരിക്ക്

പാമ്പാടി: തെരുവുനായയുടെ ആക്രമണത്തിൽ ഗുരുതര പരിക്കേറ്റ മൂന്നുപേർ കോട്ടയം മെഡിക്കൽ കോളജിൽ. ഇന്നലെ ഉച്ചകഴിഞ്ഞ് 1.30ന് കുറ്റിക്കൽ സെന്‍റ് തോമസ് ഹൈസ്കൂളിന് കിഴക്കുവശം ചാത്തൻപുരയിടത്ത് അനീഷ് സി. കുര്യാക്കോസിനാണ് ആദ്യം നായയുടെ കടിയേറ്റത്.അനീഷിന്‍റെ ചുണ്ടിലും മുഖത്തും കൈയിലും കടിയേറ്റു. തുടർന്ന് അമ്പാട്ട് ജോബി കുര്യാക്കോസിന്‍റെ കാലിൽ കടിച്ച നായ ചുണ്ടിന്‍റെ ഒരു ഭാഗം കടിച്ചെടുത്ത് കിഴക്കോട്ട് ഓടി. തുടർന്ന് മുളേക്കുന്ന്‌ കിഴക്കയിൽ കെ.എസ്. ചാക്കോയെ (കുഞ്ഞൂട്ടി) കടിച്ചു. കന്നുവെട്ടി ഭാഗത്ത് കൊല്ലംപറമ്പിൽ ജോസഫ് കുര്യനെ (റ്റിറ്റു) മാന്തിയ നായ വെള്ളറയിൽ മോഹനന്‍റെ ദേഹത്ത് ചാടിക്കയറി. ചാത്തൻപുരയിടത്ത് തോമസ് കുര്യാക്കോസിന്‍റെയും വെള്ളറയിൽ മോഹനന്‍റെയും വീട്ടിലെ കോഴികളെ നായ കടിച്ചുകൊന്നു. ഗുരുതര പരിക്കുകളുള്ള അനീഷും ജോബിയും ചാക്കോയും പാമ്പാടി താലൂക്ക് ആശുപത്രിയിൽ പ്രാഥമിക ചികിത്സ നേടി. പാമ്പാടിയിൽനിന്ന് ആന്‍റി റാബീസ് വാക്സിനും ടിടിയും എടുത്തശേഷം പരിക്ക് ഗുരുതരമായതിനാലും കഴുത്തിന് മുകളിലായതിനാലും പേവിഷബാധ സംശയിക്കുന്നതിനാലും വിദഗ്ധ പരിശോധനയ്ക്കുശേഷം ഇമ്യൂണോഗ്ലോബിൻ വാക്സിൻ നൽകേണ്ടി വന്നേക്കാമെന്നതിനാൽ അവരെ കോട്ടയം മെഡിക്കൽ കോളജിലേക്ക് അയച്ചു. പാമ്പാടി പഞ്ചായത്ത് മുൻ വൈസ് പ്രസിഡന്‍റ് സിജു കെ. ഐസക്ക്, കൊല്ലംപറമ്പിൽ റ്റിജു, റ്റിറ്റു, വെള്ളറയിൽ മോഹനൻ എന്നിവരുടെ നേതൃത്വത്തിൽ നായയെ വിരട്ടിയോടിച്ചു.പഞ്ചായത്ത് മെംബർ സുനിത ദീപുവും പഞ്ചായത്ത് അധികൃതരും സ്ഥലത്തെത്തിയിരുന്നു.

വ്യാപാരി വ്യവസായികളുടെ സേവനം സമൂഹത്തിന് അനിവാര്യം: ചാണ്ടി ഉമ്മൻ

പാമ്പാടി: വ്യാപാരി വ്യവസായികളുടെ സേവനം പൊതുസമൂഹത്തിനും നാടിന്‍റെ വികസനത്തിനും അനിവാര്യമാണെന്ന് ചാണ്ടി ഉമ്മൻ എംഎൽഎ. കേരള വ്യാപാരി വ്യവസായി ഏകോപന സമിതി പാമ്പാടി യൂണിറ്റിന്‍റെ 48-ാം വാർഷികവും കുടുംബസംഗമവും ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. യൂണിറ്റ് പ്രസിഡന്‍റ് കുര്യൻ സഖറിയ അധ്യക്ഷത വഹിച്ചു. ചെറിയാൻ ഫിലിപ്പ്, അനൂപ് എന്നിവരെ യോഗത്തിൽ ആദരിച്ചു. കെവിവിഇഎസ് സംസ്ഥാന വൈസ് പ്രസിഡന്‍റ് എം.കെ. തോമസുകുട്ടി, എ.കെ.എൻ. പണിക്കർ, പഞ്ചായത്ത് പ്രസിഡന്‍റ് ഡാലി റോയി, ഷാജി പി. മാത്യു, എം.എം. ശിവബിജു എന്നിവർ പ്രസംഗിച്ചു.

പി.ജെ. ജോസഫിനെ കേരള കര്‍ഷക യൂണിയന്‍ ആദരിച്ചു

കോട്ടയം: ശതാഭിഷേക നിറവിലെത്തിയ കേരള കോണ്‍ഗ്രസ് ചെയര്‍മാന്‍ പി.ജെ. ജോസഫ് എംഎല്‍എയ്ക്ക് കേരള കര്‍ഷക യൂണിയന്‍ സംസ്ഥാന കമ്മിറ്റിയുടെ ആദരം. പുറപ്പുഴയിലെ വസതിയിലെത്തിയാണ് നേതാക്കള്‍ പി.ജെ. ജോസഫിനെ ആദരിച്ചത്. സംസ്ഥാന പ്രസിഡന്‍റ് വര്‍ഗീസ് വെട്ടിയാങ്കല്‍, സംസ്ഥാന ജനറല്‍ സെക്രട്ടറി ജോസ് ജയിംസ് എന്നിവര്‍ ചേര്‍ന്ന് പൊന്നാടയണിയിക്കുകയും മെമന്‍റോ നല്‍കുകയും ചെയ്തു. തുടര്‍ന്ന് കേക്ക് മുറിച്ചു. കേരള കോണ്‍ഗ്രസ് സംസ്ഥാന ഡെപ്യുട്ടി ചെയര്‍മാന്മാരായ ഫ്രാന്‍സിസ് ജോര്‍ജ് എംപി, തോമസ് ഉണ്ണിയാടന്‍, സംസ്ഥാന കോ-ഓര്‍ഡിനേറ്റര്‍ അപു ജോണ്‍ ജോസഫ്, സംസ്ഥാന ജനറല്‍ സെക്രട്ടറി എം. മോനിച്ചന്‍, നിയോജകമണ്ഡലം പ്രസിഡന്‍റ് ബ്ലെയിസ് ജി. വാഴയില്‍, കേരള കര്‍ഷക യൂണിയന്‍ സംസ്ഥാന ഭാരവാഹികളായ ജോയി തെക്കേടത്ത്, സി.ടി. തോമസ്, ബേബിച്ചന്‍ കൊച്ചുകരൂര്‍, ടോമി കാവാലം, ബിനു ജോണ്‍, സണ്ണി തെങ്ങുംപള്ളി, വിനോദ് ജോണ്‍, സോജന്‍ ജോര്‍ജ്, ജോണി പുളിന്തടം, ആന്‍റണി കുര്യാക്കോസ്, കുഞ്ഞ് കളപ്പുര, ജോസ് വഞ്ചിപ്പുര, വില്‍സണ്‍ മേച്ചേരി തുടങ്ങിയവര്‍ പങ്കെടുത്തു.

പേവിഷബാധ ബോധവത്കരണ കാമ്പയിന് തുടക്കം

കോട്ടയം: സ്‌കൂൾ വിദ്യാർഥികൾക്കായുള്ള പേവിഷബാധ ബോധവത്കരണ കാമ്പയിന്‍റെ ജില്ലാതല ഉദ്ഘാടനവും ലഘുലേഖ വിതരണോദ്ഘാടനവും കോട്ടയം ഗവൺമെന്‍റ് മോഡൽ ഹയർ സെക്കൻഡറി സ്‌കൂളിൽ ജില്ലാ കളക്ടർ ജോൺ വി. സാമുവൽ നിർവഹിച്ചു. പേവിഷബാധയുമായി ബന്ധപ്പെട്ട് സ്‌കൂൾ അധികൃതരും വിദ്യാർഥികളും ചെയ്യേണ്ട കാര്യങ്ങളിൽ അവബോധം സൃഷ്ടിക്കുകയാണ് കാമ്പയിനിലൂടെ ലക്ഷ്യമിടുന്നത്. ജില്ലാ മെഡിക്കൽ ഓഫീസർ ഡോ.എൻ. പ്രിയ അധ്യക്ഷത വഹിച്ചു. ആരോഗ്യകേരളം ജില്ലാ പ്രോഗ്രാം മാനേജർ ഡോ. വ്യാസ് സുകുമാരൻ, വിദ്യാഭ്യാസ വകുപ്പ് ഡെപ്യൂട്ടി ഡയറക്ടർ ഹണി ജി. അലക്സാണ്ടർ, ഗവൺമെന്‍റ് മോഡൽ ഹയർ സെക്കൻഡറി സ്‌കൂൾ പ്രിൻസിപ്പൽ സി. മഞ്ജുള, ആരോഗ്യവകുപ്പ് ഡെപ്യൂട്ടി മാസ് മീഡിയ ഓഫീസർ ആർ. ദീപ എന്നിവർ പങ്കെടുത്തു. തുടർന്ന് ഡെപ്യൂട്ടി ജില്ലാ മെഡിക്കൽ ഓഫീസർ ഡോ. ജെസി സണ്ണി ബോധവത്കരണ ക്ലാസെടുത്തു.

മുങ്ങിനടന്ന തട്ടിപ്പുകേസ് പ്രതി പിടിയിൽ

ഗാന്ധിനഗർ: ജാമ്യത്തിലിറങ്ങി 10 വർഷമായി മുങ്ങിനടന്ന തട്ടിപ്പുകേസ് പ്രതി പിടിയിൽ. കുടമാളൂർ സ്വദേശി മഹേഷ് (54 ) ആണ് വാകത്താനം പോലീസിന്‍റെ പിടിയിലായത്. വാകത്താനം ബസ് സ്റ്റാൻഡ് ബിൽഡിംഗിൽ സ്ഥിതിചെയ്യുന്ന മുത്തൂറ്റ് ബാങ്കിൽ മുക്കുപണ്ടം പണയംവച്ച് എടുത്ത തുക തിരികെ അടയ്ക്കാതെ കബളിപ്പിച്ച കേസിലെ പ്രതിയാണ് പത്തുവർഷത്തിനുശേഷം വാകത്താനം പോലീസിന്‍റെ പിടിയിലായത്.

കാപ്പാ നിയമം ലംഘിച്ചയാൾ അറസ്റ്റിൽ

കോട്ടയം: കാപ്പാ നിയമ ലംഘനം നടത്തി‍യയാൾ അറസ്റ്റിൽ. ഉത്തരവ് ലംഘിച്ചു ജില്ലയിൽ പ്രവേശിച്ച മണർകാട് പാലക്കൽശേരി ശാലു (25) എന്നയാളെയാണ് മണർകാട് പോലീസ് അറസ്റ്റ് ചെയ്തത്. ഐരാറ്റുനട ഭാഗത്തുനിന്നുമാണ് പ്രതിയെ പിടികൂടിയത്. കോടതിയിൽ ഹാജരാക്കിയ ഇയാളെ റിമാൻഡ് ചെയ്തു.

യുവാവ് മരിച്ച നിലയില്‍

കോട്ടയം: യുവാവിനെ വീടിനുള്ളില്‍ മരിച്ചനിലയില്‍ കണ്ടെത്തി. തിരുവാതുക്കല്‍ മാന്താറ്റില്‍ പുതുപ്പറമ്പില്‍ സാജുവിന്‍റെ മകന്‍ സനൂഷിനെ (പൊന്നാച്ചന്‍-36) യാണു വീടിനുള്ളില്‍ തൂങ്ങിമരിച്ചനിലയില്‍ കണ്ടെത്തിയത്. ഇന്നലെ രാവിലെയാണ് സനൂഷിന്‍റെ മൃതദേഹം വീട്ടിലെ കിടപ്പുമുറിയില്‍ കണ്ടെത്തിയത്. മാസങ്ങളോളമായി ഭാര്യയുമായി പിണങ്ങിക്കഴിയുകയാണ് ഇയാളെന്നു പോലീസ് പറഞ്ഞു. ഇതേത്തുടര്‍ന്ന് മാനസികവിഷമം നേരിട്ടിരുന്നതായാണ് ലഭിക്കുന്ന വിവരം. കോട്ടയം വെസ്റ്റ് പോലീസ് സ്ഥലത്തെത്തി ഇന്‍ക്വസ്റ്റ് അടക്കമുള്ള നടപടികള്‍ പൂര്‍ത്തിയാക്കി മൃതദേഹം ആശുപത്രി മോര്‍ച്ചറിയിലേക്കു മാറ്റി. പോസ്റ്റ്‌മോര്‍ട്ടം അടക്കമുള്ള നടപടികള്‍ പൂര്‍ത്തിയാക്കി മൃതദേഹം ബന്ധുക്കള്‍ക്ക് വിട്ടുനല്‍കും. സംസ്‌കാരം ഇന്നു വൈകുന്നേരം വീട്ടുവളപ്പില്‍ നടക്കും.

തിരുവനന്തപുരത്ത് മാത്രമല്ല, കോട്ടയം മെഡിക്കൽ കോളജിലും രോഗികൾ ദുരിതത്തിൽ

ഗാന്ധിനഗർ: തിരുവനന്തപുരം മെഡിക്കൽ കോളജിൽ മാത്രമല്ല, കോട്ടയം മെഡിക്കൽ കോളജിലും രോഗികൾക്കു ദുരിതമെന്ന് ആരോപണം. ഡോ. ഹാരിസ് ഹസനെപ്പോലെ ഡോക്ടർമാർ ജനങ്ങൾക്കുവേണ്ടി രംഗത്തുവന്നാൽ കോട്ടയം മെഡിക്കൽ കോളജ് ആശുപത്രിയിലെ രോഗികൾ നേരിടുന്ന ഗുരുതര പ്രതിസന്ധികൾക്കു പരിഹാരമാകുമെന്നു രോഗികൾ പറയുന്നു. കോട്ടയം, ഇടുക്കി, പത്തനംതിട്ട , ആലപ്പുഴ, എറണാകുളം തുടങ്ങി വിവിധ ജില്ലകളിൽനിന്നായി ആയിരക്കണക്കിന് രോഗികൾ ചികിത്സ തേടുന്ന കോട്ടയം മെഡിക്കൽ കോളജ് ആശുപത്രിയിലെ വിവിധ വിഭാഗങ്ങളിലെ അത്യാധുനിക ചികിത്സാ ഉപകരണങ്ങൾ മിക്കതും തകരാറിലാണ്. വിവിധ ഡിപ്പാർട്ട്‌മെന്‍റുകളിലേക്കാവശ്യമായ മെഷീനുകൾ ലഭ്യമാക്കാത്തതും സാധാരണക്കാരായ രോഗികളെയും ഡോക്ടർമാരെയും പ്രതിസന്ധിയിലാക്കുന്നുണ്ട്. കോടികൾ മുടക്കി പുതിയ സർജറി ബ്ലോക്ക്, കാർഡിയോളജി-കാർഡിയോ തൊറാസിക് വിഭാഗത്തിനു വേണ്ടിയുള്ള പുതിയ ബ്ലോക്ക് എന്നീ ബഹുനില കെട്ടിടങ്ങളുടെ നിർമാണം പൂർത്തീകരിച്ചു. എന്നാൽ, ആശുപത്രിയിലെ നേത്രവിഭാഗത്തിൽ ചികിത്സ തേടുന്ന രോഗികൾ വലിയ ദുരിതം നേരിടുകയാണ്. നേത്രവിഭാഗത്തിലെ ലേസർ, ഒസിടി മെഷീനുകൾ പ്രവർത്തനരഹിതമായിട്ട് ഒരു വർഷമായി. മാധ്യമങ്ങളുൾപ്പെടെ ഇക്കാര്യം പലതവണ ചൂണ്ടിക്കാട്ടിയെങ്കിലും അധികൃതർ രോഗികളെ ദുരിതക്കയത്തിൽനിന്നു കരകയറ്റാൻ ഒരു ശ്രമവും നടത്തിയിട്ടില്ല. കണ്ണ് സ്‌കാൻ ചെയ്യാൻ ഉപയോഗിക്കുന്ന ഒസിടി മെഷീന്‍റെ പ്രവർത്തനം കാര്യക്ഷമമല്ല. ഗുരുതര നേത്രരോഗം ബാധിച്ചവർക്ക് ലേസർ ചികിത്സയിലൂടെ പരിഹാരം കണ്ടെത്താം. കണ്ണിലെ പ്രഷർ, ഡയബറ്റിക് റെറ്റിനോപ്പതി തുടങ്ങി വിവിധങ്ങളായ നേത്രരോഗങ്ങൾക്ക് ലേസർ ചികിത്സ ആവശ്യമാണ്. ആശുപത്രിയിലെ ലേസർ മെഷീൻ ഒരു വർഷമായി പ്രവർത്തനരഹിതമാണ്. കോട്ടയം ജനറൽ ആശുപത്രിയിൽ ലേസർ ചികിത്സയുണ്ടെങ്കിലും എല്ലാ ലേസർ ചികിത്സയ്ക്കുമുള്ള ലെൻസ് അവിടെയില്ലെന്ന് പറയുന്നു. ഒസിടി, ലേസർ എന്നിവ ഉപയോഗിച്ചുള്ള ചികിത്സയ്ക്ക് രോഗികൾ സ്വകാര്യ ആശുപത്രികളെ സമീപിക്കേണ്ട ഗതികേടിലാണ്. സ്വകാര്യ ആശുപത്രികളിൽ ഒരു തവണ ലേസർ ചെയ്യണമെങ്കിൽ 3000 മുതൽ 4000 രൂപ വരെ നൽകണം. മെഡിക്കൽ കോളജ് നേത്രവിഭാഗത്തിൽ ഒപി പ്രവർത്തിക്കുന്നുണ്ടെങ്കിലും തുടർപരിശോധനകൾക്ക് സ്വകാര്യ ആശുപത്രിയിൽ പോകണം. ഫണ്ട് അപര്യാപ്തതയാണ് മെഷീനുകൾ നന്നാക്കാത്തതിനു കാരണമെന്നാണ് അധികൃതർ പറയുന്നത്. മെഡിക്കൽ കോളജ് ആശുപത്രി ഗൈനക്കോളജി വിഭാഗം ലാബിലെ ബയോകെമിസ്ട്രി മെഷീൻ അടുത്തിടെ തകരാറിലായിരുന്നു. ഇതേത്തുടർന്ന് വിവിധ രക്തപരിശോധനയ്ക്ക് ഗൈനക്കോളജി വിഭാഗത്തിൽ ചികിത്സയിലുള്ളവരും ബന്ധുക്കളും ആശുപത്രിയിലെ സെൻട്രലൈസ്ഡ് ലാബ് പ്രവർത്തിക്കുന്ന പൊടിപാറ ബിൽഡിംഗിൽ പോകണമായിരുന്നു. ഇത് ഗൈനക്കോളജി വിഭാഗത്തിൽ ചികിത്സയിൽ കഴിഞ്ഞിരുന്ന ഗർഭിണികളെയും മറ്റു രോഗികളെയും വലച്ചിരുന്നു. ആശുപത്രിയിലെ ലിഫ്റ്റുകൾ തകരാറിലാകുന്നതും പതിവാണ്. അത്യാധുനിക ഉപകരണം വാങ്ങാൻ 25 ലക്ഷം അനുവദിച്ചതായി ഫ്രാൻസിസ് ജോർജ് കോട്ടയം: ആധുനിക പരിശോധനാ സംവിധാനങ്ങൾ ഉള്ളതും മുഴുവൻ ഓട്ടോമാറ്റിക്കായി പ്രവർത്തിക്കുന്നതുമായ കാപ്പിലറി ഇലക്‌ട്രോഫോറസിസ് ഉപകരണം കോട്ടയം മെഡിക്കൽ കോളജിൽ വാങ്ങുന്നതിനായി 25 ലക്ഷം രൂപ അനുവദിച്ചതായി ഫ്രാൻസിസ് ജോർജ് എംപി അറിയിച്ചു. മെഡിക്കൽ കോളജിലെ ബയോകെമിസ്ട്രി വിഭാഗത്തിൽ കഴിഞ്ഞ 13 വർഷമായി ഉണ്ടായിരുന്ന ഇലക്‌ട്രോഫോറസിസ് ഉപകരണം പ്രവർത്തനരഹിതമായതിനാൽ പാവപ്പെട്ട രോഗികൾക്കു വളരെയധികം ബുദ്ധിമുട്ട് ഉണ്ടായിരുന്നു. ഇത് കണക്കിലെടുത്താണ് ആധുനിക നിലവാരത്തിലുള്ള ഉപകരണം വാങ്ങുവാൻ തുക അനുവദിച്ചത്. ഉയർന്ന നിലവാരത്തിലുള്ള ഉപകരണം വാങ്ങി സ്ഥാപിക്കുന്നതിലൂടെ സിറം ഇലക്‌ട്രോഫോറസിസ് പോലെയുള്ള പരിശോധനകൾ അതിവേഗത്തിലും അത്യന്തം കൃത്യതയോടെയും നടത്തി റിസൾട്ട് ലഭ്യമാക്കുവാൻ കഴിയും. ഈ പരിശോധന നടത്തുന്നതുവഴി രോഗികളിൽ ബോൺമാരോ, ബയോപ്സി പോലുള്ള അതീവ ബുദ്ധിമുട്ടുള്ള പരിശോധനകൾ ഒഴിവാക്കാൻ കഴിയുമെന്നും സാമ്പത്തികമായി പിന്നാക്കം നിൽക്കുന്ന രോഗികൾക്ക് ഈ ഉപകരണം ഏറെ പ്രയോജനപ്പെടുമെന്നും ഫ്രാൻസിസ് ജോർജ് എംപി പറഞ്ഞു.

വനമഹോത്സവം സംസ്ഥാനതല ഉദ്ഘാടനം മൂന്നിന്

കോട്ടയം: വനമഹോത്സവവുമായി ബന്ധപ്പെട്ട 2025-ലെ ആഘോഷ പരിപാടികളുടെ സംസ്ഥാനതല ഉദ്ഘാടനം മൂന്നിന് മന്ത്രി എ.കെ. ശശീന്ദ്രന്‍ നിര്‍വഹിക്കും. കോട്ടയം സിഎംഎസ് കോളജില്‍ ഉച്ചകഴിഞ്ഞ് 2.30ന് നടക്കുന്ന പരിപാടിയില്‍ മന്ത്രി വി.എന്‍. വാസവന്‍ അധ്യക്ഷത വഹിക്കും. തിരുവഞ്ചൂര്‍ രാധാകൃഷ്ണന്‍ എംഎല്‍എ, ജില്ലാ പഞ്ചായത്ത് പ്രസിഡന്‍റ് ഹേമലത പ്രേംസാഗര്‍, നഗരസഭാ ചെയര്‍പേഴ്‌സണ്‍ ബിന്‍സി സെബാസ്റ്റ്യന്‍, നഗരസഭാംഗം ഡോ. പി.ആര്‍. സോന, കേരള വനം വികസന കോര്‍പറേഷന്‍ ചെയര്‍പേഴ്‌സണ്‍ ലതിക സുഭാഷ്, അഡീഷണല്‍ പ്രിന്‍സിപ്പല്‍ ചീഫ് ഫോറസ്റ്റ് കണ്‍സര്‍വേറ്റര്‍ ആന്‍ഡ് ഹെഡ് ഓഫ് ഫോറസ്റ്റ് ഫോഴ്‌സ് ഡോ. പി. പുകഴേന്തി, അഡീഷണല്‍ ചീഫ് ഫോറസ്റ്റ് കണ്‍സര്‍വേറ്റര്‍ ആന്‍ഡ് ചീഫ് വൈല്‍ഡ് ലൈഫ് വാര്‍ഡന്‍ പ്രമോദ് ജി. കൃഷ്ണന്‍, അഡീഷണല്‍ പ്രിന്‍സിപ്പല്‍ ചീഫ് ഫോറസ്റ്റ് കണ്‍സര്‍വേറ്റര്‍ (ഫോറസ്റ്റ് മാനേജ്‌മെന്‍റ്) ഡോ. എല്‍. ചന്ദ്രശേഖര്‍, അഡീഷണല്‍ പ്രിന്‍സിപ്പല്‍ ചീഫ് ഫോറസ്റ്റ് കണ്‍സര്‍വേറ്റര്‍ (ഇ ആന്‍ഡ് ടി ഡബ്ല്യു) ഡോ. ജെ. ജസ്റ്റിന്‍ മോഹന്‍, ഫോറസ്റ്റ് കണ്‍സര്‍വേറ്റര്‍ (ഐ ആന്‍ഡ് ഇ) എം. നീതുലക്ഷ്മി, ഡിവിഷണല്‍ ഫോറസ്റ്റ് ഓഫീസര്‍ പ്രഭുല്‍ അഗര്‍വാള്‍, ചീഫ് ഫോറസ്റ്റ് കണ്‍സര്‍വേറ്റര്‍ പി.പി. പ്രമോദ്, ബിഷപ് റവ. മലയില്‍ സാബു കോശി ചെറിയാന്‍ എന്നിവര്‍ പങ്കെടുക്കും.

യുപി സ്‌കൂള്‍ വിദ്യാര്‍ഥികള്‍ക്കായി ക്രിയേറ്റീവ് കോര്‍ണര്‍ തുറന്നു

തൃക്കൊടിത്താനം: സമഗ്ര ഗുണമേന്മാ വിദ്യാഭ്യാസം ഉറപ്പാക്കാനായി തൃക്കൊടിത്താനം ഗവണ്‍മെന്‍റ് എച്ച്എസ്എസില്‍ യുപി വിഭാഗം കുട്ടികള്‍ക്കായി ക്രിയേറ്റീവ് കോര്‍ണര്‍ ആരംഭിച്ചു. പദ്ധതിയുടെ ഉദ്ഘാടനം സ്‌കൂള്‍ ഓഡിറ്റോറിയത്തില്‍ നടന്ന ചടങ്ങില്‍ ജില്ലാ പഞ്ചായത്ത് പ്രസിഡന്‍റ് ഹേമലത പ്രേംസാഗര്‍ നിര്‍വഹിച്ചു. മാടപ്പള്ളി ബ്ലോക്ക് പഞ്ചായത്ത് പ്രസിഡന്‍റ് എന്‍. രാജു, തൃക്കൊടിത്താനം പഞ്ചായത്ത് പ്രസിഡന്‍റ് മോളി ജോസഫ്, വൈസ് പ്രസിഡന്‍റ് ബിനോയ് ജോസഫ്, ജില്ലാ പഞ്ചായത്ത് സ്റ്റാന്‍ഡിംഗ് കമ്മിറ്റി ചെയര്‍പേഴ്‌സണ്‍ മഞ്ജു സുജിത്ത്, മാടപ്പള്ളി ബ്ലോക്ക് സ്റ്റാന്‍ഡിംഗ് കമ്മിറ്റി ചെയര്‍മാന്‍ ടി. രഞ്ജിത്, പഞ്ചായത്തംഗം ദീപ ഉണ്ണികൃഷ്ണന്‍, സ്‌കൂള്‍ ഹെഡ്മിസ്ട്രസ് ആര്‍.എസ്. രാജി, എല്‍പി സ്‌കൂള്‍ ഹെഡ്മിസ്ട്രസ് എ.എം. അജിതമ്മ, വി.കെ. സുനില്‍കുമാര്‍, ബിനു ഏബ്രഹാം, പ്രീത ടി. കുറുപ്പ് എന്നിവര്‍ പ്രസംഗിച്ചു. പാഠപുസ്തകത്തിനപ്പുറം തൊഴില്‍ പഠനവും പാഠപുസ്തകത്തിനപ്പുറം വിവിധ തൊഴില്‍ ബന്ധിത പ്രവര്‍ത്തനങ്ങളെ കോര്‍ത്തിണക്കി രസകരമായും ക്രിയാത്മകമായും പഠനത്തെ മാറ്റുകയെന്നതാണ് ക്രിയേറ്റീവ് കോര്‍ണറിന്‍റെ ലക്ഷ്യമെന്ന് പദ്ധതിയുടെ നോഡല്‍ ഓഫീസറായ കെ. സുധര്‍മ പറഞ്ഞു. സമഗ്രശിക്ഷാ കേരളയുടെ നേതൃത്വത്തില്‍ കൊച്ചി ശാസ്ത്ര സാങ്കേതിക സര്‍വകലാശാലയുമായി സഹകരിച്ച് അഞ്ചുലക്ഷം രൂപ വിനിയോഗിച്ചാണ് പദ്ധതി നടപ്പാക്കിയത്. ഈ അക്കാദമിക വര്‍ഷത്തിലെ അപ്പര്‍ പ്രൈമറി വിഭാഗത്തിലെ കുട്ടികള്‍ക്കായാണ് ക്രിയേറ്റീവ് കോര്‍ണര്‍ സജ്ജമാക്കിയിരിക്കുന്നത്. പാചകം, ഫാഷന്‍ ഡിസൈന്‍, ഇലക്‌ട്രിക്കല്‍ ജോലി, കൃഷി, ഫര്‍ണിച്ചര്‍ നിര്‍മാണം, പ്ലംബിംഗ്, എല്‍ഇഡി ബള്‍ബ് നിര്‍മാണം തുടങ്ങിയവയ്ക്കാണ് ക്രിയേറ്റീവ് കോര്‍ണറില്‍ പ്രാധാന്യം നല്‍കുന്നത്.

ചങ്ങനാശേരിയില്‍ നിയന്ത്രിത, നിരോധിത, സ്വതന്ത്ര കച്ചവടമേഖലകള്‍ പ്രഖ്യാപിച്ച് നഗരസഭ

ചങ്ങനാശേരി: നഗരത്തിലെ വഴിയോര കച്ചവടവുമായി ബന്ധപ്പെട്ട് നഗര കച്ചവടസമിതി (ടിവിഎസ്) യോഗത്തില്‍ തെരഞ്ഞെടുത്ത നിയന്ത്രിത കച്ചവടമേഖല, നിരോധിത കച്ചവടമേഖല, സ്വതന്ത്ര കച്ചവടമേഖല എന്നിവ ഉള്‍പ്പെടുന്ന പ്രദേശങ്ങള്‍ക്കും നഗരകച്ചവട സമിതി അംഗീകരിച്ച 42 പുതിയ വഴിയോരക്കച്ചവടക്കാര്‍ക്കും നഗരസഭാ കൗണ്‍സില്‍ യോഗം അംഗീകാരം നല്‍കി. ഇതോടെ കച്ചവട നിരോധിത മേഖലയില്‍ പൂര്‍ണമായും വഴിയോരക്കച്ചവടം നിരോധിക്കും. നിയന്ത്രിത കച്ചവടമേഖലയില്‍ നഗരസഭയുടെ അംഗീകാരമുള്ള തിരിച്ചറിയല്‍ കാര്‍ഡുള്ള കച്ചവടക്കാര്‍ക്ക് നിര്‍ദ്ദേശങ്ങള്‍ പാലിച്ച് കച്ചവടം അനുവദിച്ചു. സ്വതന്ത്ര കച്ചവട മേഖലയില്‍ എവിടെയും ആര്‍ക്കും കച്ചവടം നടത്തുന്നതിനുള്ള അനുമതിയാണ് നഗരസഭ നല്‍കിയത്. ചെയര്‍പേഴ്‌സണ്‍ കൃഷ്ണകുമാരി രാജശേഖരന്‍ അധ്യക്ഷത വഹിച്ചു. യാത്രക്കാര്‍ക്കും വ്യാപാരികള്‍ക്കും ബുദ്ധിമുട്ടുണ്ടാക്കാതെ അനുയോജ്യമായ സ്ഥലം കണ്ടെത്തിയാണ് വഴിയോരക്കച്ചവടത്തിന് അനുമതി നല്‍കേണ്ടതെന്ന് യുഡിഎഫ് പാര്‍ലമെന്‍ററി പാര്‍ട്ടി ലീഡര്‍ ജോമി ജോസഫ് അഭിപ്രായപ്പെട്ടു. ഇപ്പോള്‍ത്തന്നെ യാത്രക്കാര്‍ ദുരിതപ്പെടുന്ന ഒന്നാംനമ്പര്‍ ബസ് സ്റ്റാന്‍ഡിന്‍റെ കംഫര്‍ട്ട് സ്റ്റേഷനു സമീപം വഴിയോരക്കച്ചവടത്തിന് അനുമതി നല്‍കരുതെന്നും ജോമി ആവശ്യപ്പെട്ടു. ആഹാരവിതരണം നടത്തുന്ന തട്ടുകടക്കാര്‍ക്ക് ഫുഡ്‌സേഫ്റ്റി സര്‍ട്ടിഫിക്കറ്റ്, ഹെല്‍ത്ത് കാര്‍ഡ്, മുനിസിപ്പല്‍ ലൈസന്‍സ്, മാലിന്യ സംസ്‌കരണത്തിന് നടപടി എന്നിവ ഉണ്ടാകണമെന്ന് ആരോഗ്യ സ്റ്റാന്‍ഡിംഗ് കമ്മിറ്റി ചെയര്‍പേഴ്‌സണ്‍ എല്‍സമ്മ ജോബ് പറഞ്ഞു. വഴിയോരക്കച്ചവടത്തിന്‍റെ മറവില്‍ അനധികൃതമായി നഗരത്തില്‍ തട്ടുകടകള്‍ വ്യാപിക്കുന്നത് മുനിസിപ്പല്‍ ലൈസന്‍സെടുത്ത് എല്ലാ മാനദണ്ഡങ്ങളും പാലിച്ച് കച്ചവടം നടത്തുന്നവര്‍ക്ക് ബുദ്ധിമുട്ടുണ്ടാക്കുന്നതിന് കാരണമാകുമെന്ന് സിപിഎം അംഗം കെ.ആര്‍. പ്രകാശ് അഭിപ്രായപ്പെട്ടു. കേന്ദ്ര-സംസ്ഥാന സര്‍ക്കാരുകളുടെ നിബന്ധനയനുസരിച്ച് നഗരകച്ചവട സമിതിയുടെ തീരുമാനപ്രകാരമാണ് വിവിധ മേഖലകള്‍ തിരിച്ച് കച്ചവടത്തിന് അനുമതി നല്‍കിയിരിക്കുന്നതെന്ന് സിപിഎം അംഗം പി.എ. നസീര്‍ പറഞ്ഞു. വൈസ് ചെയര്‍മാന്‍ മാത്യൂസ് ജോര്‍ജ്, ശ്യാം സാംസണ്‍, റെജി കേളമ്മാട്ട്, അഡ്വ. മധുരാജ്, രാജു ചാക്കോ തുടങ്ങിയവര്‍ ചര്‍ച്ചകളില്‍ പങ്കെടുത്തു. കച്ചവട നിരോധിത മേഖല 1. പുതൂര്‍പ്പള്ളി പ്രവേശനകവാടം മുതല്‍ എസ്ബി കോളജ് ഇന്‍ഡോര്‍ സ്റ്റേഡിയം ഗേറ്റ് വരെ റോഡിനിരുവശവും. 2. സെന്‍ട്രല്‍ ജംഗ്ഷന്‍ മുതല്‍ എസ്ബി ഹൈസ്‌കൂള്‍ വരെ റോഡിനിരുവശവും. 3. മുനിസിപ്പല്‍ കാര്യാലയത്തിനു സമീപത്തു കൂടിയുള്ളഎപിജെ അബ്ദുള്‍ കലാം റോഡ് മുതല്‍ ഫാത്തിമാപുരം എസ് എച്ച് സ്‌കൂള്‍ വരെ റോഡിനിരുവശവും. 4. ടിബി റോഡില്‍ ഹെഡ് പോസ്റ്റ്ഓഫീസ് മുതല്‍ കെഎസ്ആര്‍ടിസി ബസ് ഇറങ്ങിവരുന്ന റോഡ് വരെ റോഡിനിരുവശവും. 5. പൊതുസ്ഥാപനങ്ങളുടെ പ്രവേശന ഭാഗത്ത് നിന്നു 100 മീറ്റര്‍ പരിധിയില്‍. 6. സെന്‍ട്രല്‍ ജംഗ്ഷന്‍ മുതല്‍ ബോട്ട്‌ജെട്ടി വരെ റോഡിനിരുവശവും. 7. പെരുന്ന ഗവ. എല്‍പി സ്‌കൂള്‍ മുതല്‍ പൂച്ചിമുക്ക് വരെ റോഡിനിരുവശവും. 8. മധുമൂല ജംഗ്ഷന്‍ മുതല്‍ സെന്‍റ് തെരേസാസ് സ്‌കൂള്‍വരെ റോഡിനിരുവശവും . 9. ചങ്ങനാശേരി-വാഴൂര്‍ റോഡില്‍ ഇന്ത്യന്‍ കോഫീ ഹൗസ് മുതല്‍ കുരിശുംമൂട് ജംഗ്ഷന്‍ വരെ റോഡിനിരുവശവും. 10. ചങ്ങനാശേരി-വാഴൂര്‍ റോഡില്‍ എസ്ബി ഹൈസ്‌കൂള്‍ മുതല്‍ ഇന്ത്യന്‍ കോഫീ ഹൗസ് വരെ റോഡിന്‍റെ തെക്കുവശം. 11. നഗരസഭാ പരിധിയില്‍ അപകട സാധ്യതയുള്ള എല്ലാ വളവുകളും എല്ലാ ജംഗ്ഷനുകളും എംസി റോഡില്‍ പെരുന്ന പത്മ കഫേയുടെ മുന്‍വശത്തെ വളവ്, എസ് സ്‌ക്വയർ ജംഗ്ഷന്‍, രാജേശ്വരി കോംപ്ലക്‌സ് ജംഗ്ഷന്‍, പൂച്ചിമുക്കിലേക്ക് തിരിയുന്ന റോഡ് വളവ്, പെരുന്ന ഗവൺമെന്‍റ് എല്‍പി സ്‌കൂള്‍ ജംഗ്ഷന്‍, പെരുന്ന എല്‍പിഎസ് ജംഗ്ഷന്‍, ഇരൂപ്പ ജംഗ്ഷന്‍, എംസി റോഡില്‍ വേഴയ്ക്കാട്ട്ചിറ വളവ്, വാഴൂര്‍ റോഡില്‍ റെയില്‍വേ ഓവര്‍ബ്രിഡ്ജ് അപ്രോച്ച് റോഡ് എന്നിവ കച്ചവട നിരോധിതമായ വളവുകളിലും ജംഗ്ഷനുകളിലും ഉള്‍പ്പെടുന്നു. നിയന്ത്രിത കച്ചവട മേഖല നഗരസഭയുടെ തിരിച്ചറിയല്‍ കാര്‍ഡ് ലഭിച്ച വഴിയോര കച്ചവടക്കാര്‍ക്ക് കച്ചവടം നടത്താം. 1. പുതൂര്‍പള്ളി ആര്‍ച്ച് മുതല്‍ നമ്പര്‍ 2 പ്രൈവറ്റ് ബസ് സ്റ്റാന്‍ഡ്‌ വരെ റോഡിന് കിഴക്കുവശം നിലവില്‍ കച്ചവടം ചെയ്യുന്നവര്‍ക്കു മാത്രം അനുമതി. 2. ചങ്ങനാശേരി-വാഴൂര്‍ റോഡില്‍ എസ്ബി ഹൈസ്‌കൂള്‍ മുതല്‍ ഇന്ത്യന്‍ കോഫീഹൗസ് വരെ റോഡിന്‍റെ വടക്ക് വശത്ത് അപകടരഹിതവും അനുയോജ്യവുമായ സ്ഥലങ്ങളില്‍ കാല്‍നട യാത്രക്കാര്‍ക്കും പ്രദേശവാസികള്‍ക്കും ഗതാഗതത്തിനും തടസവും ബുദ്ധിമുട്ടും ഉണ്ടാകാത്ത രീതിയില്‍. 3. നഗരസഭാ ഓഫീസിനു സമീപം എംസി റോഡരികില്‍ വൈകുന്നേരം 6.30 മുതല്‍ രാത്രി 11വരെ നിലവില്‍ കച്ചവടം ചെയ്യുന്നവര്‍ക്ക്. 4. ടിബി റോഡില്‍ അമൃത ഓഡിറ്റോറിയം (കെഎസ്ആര്‍ടിസി ബസ് ഇറങ്ങിവരുന്ന ഭാഗം) മുതല്‍ സ്റ്റേഡിയം ആര്‍ച്ച് പരിസരംവരെ അപകടരഹിതവും അനുയോജ്യവുമായ സ്ഥലങ്ങളില്‍ നിലവില്‍ കച്ചവടം ചെയ്യുന്നവര്‍ക്ക്. 5. നമ്പര്‍ 1 സ്റ്റാന്‍ഡില്‍ കംഫര്‍ട്ട് സ്റ്റേഷനു സമീപം നിലവില്‍ കച്ചവടം ചെയ്യുന്നവര്‍ക്ക് കാല്‍നട യാത്രക്കാര്‍ക്കും ഗതാഗതത്തിനും തടസവും ബുദ്ധിമുട്ടും ഉണ്ടാകാത്ത രീതിയില്‍ മാത്രം വഴിയോരക്കച്ചവടം നടത്താം. 6. എംസി റോഡില്‍ എസ്ബി കോളജ് ഇന്‍ഡോര്‍ സ്റ്റേഡിയം ഗേറ്റിനു ശേഷം മോര്‍ സൂപ്പര്‍ മാര്‍ക്കറ്റ് വരെ. 7. നിരോധിത മേഖലയിലും സ്വതന്ത്ര കച്ചവട മേഖലയിലും ഉള്‍പ്പെട്ടിട്ടില്ലാത്ത നഗരസഭയുടെ മറ്റെല്ലാ പ്രദേശങ്ങളിലും വഴിയോര കച്ചവടത്തിന് അനുമതി. സ്വതന്ത്ര കച്ചവട മേഖല 1. പാലാത്ര-ളായിക്കാട് ബൈപാസ് റോഡില്‍ (മധുമൂല റെയില്‍വേ റോഡ് പ്രവേശിക്കുന്ന ഭാഗവും ജംഗ്ഷനും എസ്എച്ച് ജംഗ്ഷന്‍, തിരുമല താഴ്ച തുടങ്ങിയ സ്ഥലങ്ങള്‍ ഒഴികെ) ജംഗ്ഷനുകളില്‍ രണ്ട് വശത്തുനിന്നും 30 മീറ്റര്‍ ഒഴിവാക്കി വരുന്ന സ്ഥലങ്ങള്‍. 2. ചങ്ങനാശേരിയില്‍നിന്നും ആലപ്പുഴയിലേക്കുള്ള എസി റോഡില്‍ മനക്കച്ചിറ മുതല്‍ കോണ്ടൂര്‍ വരെ റോഡിന്‍റെ ഇടതു വശം. 3. കാവാലം ബസാര്‍. 4. നമ്പര്‍ 2 ബസ് സ്റ്റാന്‍ഡില്‍ ഓട നിര്‍മിച്ചതില്‍ ഓടയുടെ സ്ലാബിന്‍റെ മുകളില്‍ വീതിയുള്ള ഭാഗം.

കെഎസ്ആര്‍ടിസി പെന്‍ഷന്‍കാര്‍ക്ക് ആനുകൂല്യങ്ങള്‍ നിഷേധിക്കുന്നെന്ന് വെല്‍ഫെയര്‍ അസോസിയേഷന്‍

ചങ്ങനാശേരി: സംസ്ഥാന സര്‍ക്കാര്‍ കെഎസ്ആര്‍ടിസി പെന്‍ഷന്‍കാര്‍ക്ക് തുടര്‍ച്ചയായി ആനുകൂല്യങ്ങള്‍ നിഷേധിക്കുകയാണെന്ന് ട്രാന്‍സ്‌പോര്‍ട്ട് പെന്‍ഷനേഴ്‌സ് വെല്‍ഫെയര്‍ അസോസിയേഷന്‍ ചങ്ങനാശേരി മേഖലാ സമ്മേളനം അഭിപ്രായപ്പെട്ടു. 2011ല്‍ യുഡിഎഫ് സര്‍ക്കാരിന്‍റെ കാലത്ത് നടന്ന ശമ്പള പരിഷ്‌കരണത്തോടൊപ്പം വന്ന പെന്‍ഷന്‍ പരിഷ്‌കരണത്തിനുശേഷം ഈ രംഗത്ത് ആനുകൂല്യങ്ങള്‍ ലഭിച്ചിട്ടില്ല. 2022ല്‍ ശമ്പളം പരിഷ്‌കരിച്ചപ്പോള്‍ പെന്‍ഷന്‍ പരിഷ്‌കരണം നടത്തിയില്ലെന്നും 2021നു ശേഷം ക്ഷാമാശ്വാസവും ആറുവര്‍ഷമായി ഉത്സവബത്തയും ലഭിക്കുന്നില്ലെന്നും സമ്മേളനം ചൂണ്ടിക്കാട്ടി. ഐഎന്‍ടിയുസി ജില്ലാ പ്രസിഡന്‍റ് ഫിലിപ്പ് ജോസഫ് ഉദ്ഘാടനം ചെയ്തു. അസോസിയേഷന്‍ ജില്ലാ പ്രസിഡന്‍റ് ടി.കെ. സതീശന്‍ നായര്‍ അധ്യക്ഷത വഹിച്ചു. സംസ്ഥാന ജനറല്‍ സെക്രട്ടറി വി.കെ. രാജേന്ദ്രന്‍ ആമുഖ പ്രസംഗവും വര്‍ക്കിംഗ് പ്രസിഡന്‍റ് ജോസ് വേങ്ങല്‍ അംഗത്വ വിതരണവും നടത്തി. പി.വി. ചാക്കോ അംഗത്വം ഏറ്റുവാങ്ങി. കോണ്‍ഗ്രസ് ബ്ലോക്ക് പ്രസിഡന്‍റ് ബാബു കോയിപ്പുറം, തോമസ് അക്കര, പി.എച്ച് അഷറഫ്, ജോബ് വിരുത്തിക്കരി, ബെന്നി ജോസഫ്, എ.വി ഫ്രാന്‍സിസ്, ഡിപിന്‍ ദിനേശ്, ജെബി ജോര്‍ജ്, റോയി സെബാസ്റ്റ്യന്‍ എന്നിവര്‍ പ്രസംഗിച്ചു.

ആശാ പ്രവര്‍ത്തകരെ ജെസിഐ ആദരിച്ചു

ചങ്ങനാശേരി: ജെസിഐ ഇന്ത്യയുടെ കാബില്‍ പദ്ധതിയോടനുബന്ധിച്ച് ജൈവ പച്ചക്കറികൃഷിയില്‍ മുനിസിപ്പാലിറ്റിയിലെ ആശാ പ്രവര്‍ത്തകര്‍ക്ക് പരിശീലനം നല്‍കി. ആശാ പ്രവര്‍ത്തകര്‍ സമൂഹത്തിന് നല്‍കുന്ന സേവനം പരിഗണിച്ച് ആശാ പ്രവര്‍ത്തകരെ ജെസിഐ പുരസ്‌കാരം നല്‍കി ആദരിച്ചു. മുനിസിപ്പല്‍ ചെയര്‍പേഴ്‌സണ്‍ കൃഷ്ണകുമാരി രാജശേഖരന്‍, വൈസ് ചെയര്‍മാര്‍ മാത്യൂസ് ജോര്‍ജ്, വാര്‍ഡ് മെംബര്‍ ബീന ജോബി, ജെസിഐ പ്രസിഡന്‍റ് ഡോ. ജോര്‍ജി ജോര്‍ജ് കുരുവിള, സച്ചു ലൂയിസ്, രഞ്ജിത് ആന്‍ഡ്രൂസ്, മാനുവല്‍ അലക്‌സ് എന്നിവര്‍ പ്രസംഗിച്ചു.

മഹിളാ സാഹസ് കേരളയാത്ര ഇന്ന് ചങ്ങനാശേരി മണ്ഡലത്തില്‍

ചങ്ങനാശേരി: മഹിളാ കോണ്‍ഗ്രസ് സംസ്ഥാന പ്രസിഡന്‍റ് അഡ്വ. ജെബി മേത്തര്‍ എംപി നയിക്കുന്ന മഹിളാ സാഹസ് കേരളയാത്ര ഇന്ന് ചങ്ങനാശേരിയില്‍ പര്യടനം നടത്തും. രാവിലെ 9.30ന് ചങ്ങനാശേരി ടൗണ്‍ വെസ്റ്റ് ഈസ്റ്റ് മണ്ഡലം കമ്മിറ്റികളുടെ സംയുക്താഭിമുഖ്യത്തില്‍ മുനിസിപ്പല്‍ മിനി ഓഡിറ്റോറിയത്തില്‍ സ്വീകരണം നല്‍കും. കൊടിക്കുന്നില്‍ സുരേഷ് എംപി സമ്മേളനം ഉദ്ഘാടനം ചെയ്യും. 10.30ന് പായിപ്പാട് മണ്ഡലം കമ്മിറ്റിയുടെ സ്വീകരണം നാലുകോടി ജംഗ്ഷനില്‍ കെപിസിസി രാഷ്‌ട്രീയകാര്യ സമിതിയംഗം ബിന്ദു കൃഷ്ണയും 11.30ന് തൃക്കൊടിത്താനം മണ്ഡലം കമ്മിറ്റിയുടെ സ്വീകരണം കുന്നുംപുറം ജംഗ്ഷനില്‍ കെപിസിസി ജനറല്‍ സെക്രട്ടറി അഡ്വ. ജോസി സെബാസ്റ്റ്യനും 12.30ന് മാടപ്പള്ളി മണ്ഡലം കമ്മിറ്റിയുടെ സ്വീകരണം തെങ്ങണ ജംഗ്ഷനില്‍ മുന്‍മന്ത്രി കെ.സി. ജോസഫും ഉദ്ഘാടനം ചെയ്യും. ഉച്ചകഴിഞ്ഞ് രണ്ടിനു വാഴപ്പള്ളി മണ്ഡലം കമ്മിറ്റിയുടെ സ്വീകരണം കുരിശുമൂട് ജംഗ്ഷനില്‍ കെപിസിസി അംഗം ഡോ. അജീസ് ബെന്‍ മാത്യുവും മൂന്നിന് കുറിച്ചി മണ്ഡലം കമ്മിറ്റിയുടെ നേതൃത്വത്തിലുള്ള സ്വീകരണം നാല്പതിന്‍കവല മഹാത്മ അയ്യങ്കാളി സ്മാരകമന്ദിരത്തില്‍ കെപിസിസി സെക്രട്ടറി അഡ്വ.പി.എസ്. രഘുറാമും ഉദ്ഘാടനം ചെയ്യും. മഹിളാ സാഹസ് കേരള യാത്രയുടെ സ്വീകരണവുമായി ബന്ധപ്പെട്ട ഒരുക്കങ്ങള്‍ പൂര്‍ത്തിയായതായി മഹിളാ കോണ്‍ഗ്രസ് കോട്ടയം ജില്ലാ പ്രസിഡന്‍റ് ബെറ്റി ടോജോ, ബ്ലോക്ക് പ്രസിഡന്‍റുമാരായ ആര്യാ ശ്യാം, ജയശീ പ്രഹ്‌ളാദന്‍ എന്നിവര്‍ അറിയിച്ചു.

കുറുമ്പനാടം സെന്‍റ് പീറ്റേഴ്‌സില്‍ മെറിറ്റ് ദിനാഘോഷം ഇന്ന്

കുറുമ്പനാടം: സെന്‍റ് പീറ്റേഴ്‌സ് ഹയര്‍ സെക്കന്‍ഡറി സ്‌കൂളില്‍ 2024-25 അധ്യയനവര്‍ഷം മികച്ചവിജയം കരസ്ഥമാക്കിയ വിദ്യാര്‍ഥികളെ അനുമോദിക്കുന്ന സമ്മേളനം ഇന്നു രണ്ടിനു നടക്കും. ചങ്ങനാശേരി ഡിവൈഎസ്പി കെ.പി. ടോംസണ്‍ ഉദ്ഘാടനം ചെയ്യും. സ്‌കൂള്‍ മാനേജര്‍ റവ.ഡോ. ചെറിയാന്‍ കറുകപ്പറമ്പില്‍ അധ്യക്ഷത വഹിക്കും. അസംപ്ഷന്‍ കോളജ് പ്രിന്‍സിപ്പല്‍ ഡോ. റാണി മരിയ തോമസ് മുഖ്യപ്രഭാഷണം നടത്തും. പ്രിന്‍സിപ്പല്‍ ജയിംസ് കെ. മാളിയേക്കല്‍, ഹെഡ്മാസ്റ്റര്‍ എം.സി. മാത്യു, പിടിഎ പ്രസിഡന്‍റ് ജയ്‌സണ്‍ ചെറിയാന്‍, അധ്യാപകരായ ജോണിയ ഗ്രേസ് ജോസഫ്, എം.സി. ബിനു എന്നിവര്‍ പ്രസംഗിക്കും. പ്ലസ്ടു പരീക്ഷയില്‍ ഉന്നതവിജയം നേടിയ വിദ്യാര്‍ഥികളെ ആദരിക്കും. നീറ്റ് പരീക്ഷയില്‍ ടോപ് റാങ്ക് നേടിയ പൂര്‍വവിദ്യാര്‍ഥികളായ റെയ്‌സാ മരിയ സോണി, തെരേസ് തോമസ്, ഗൗരിനന്ദ എസ്., എംജി യൂണിവേഴ്‌സിറ്റി ബികോം പരീക്ഷയില്‍ നാലാം റാങ്ക് കരസ്ഥമാക്കിയ സുബിമോള്‍ സിബിച്ചന്‍ എന്നിവരെ അനുമോദിക്കും.

വെള്ളക്കെട്ടില്‍ ഒറ്റപ്പെട്ട് എഴുമാന്തുരുത്ത്

കടുത്തുരുത്തി: മഴയ്ക്കൊപ്പം കിഴക്കന്‍ വെള്ളത്തിന്‍റെ വരവുകൂടി ശക്തമായതോടെ വെള്ളക്കെട്ടില്‍ ഒറ്റപ്പെട്ട് എഴുമാന്തുരുത്ത് ഗ്രാമം. ഇവിടേക്കുള്ള റോഡുകളിൽ വെള്ളം കയറിയതോടെ വാഹനഗതാഗതം നിലച്ച അവസ്ഥയാണ്. എഴുമാന്തുരുത്തിലെ താഴ്ന്ന പ്രദേശങ്ങളിലെ വീടുകളിലെല്ലാം വെള്ളം കയറി. കൊല്ലങ്കേരി, പത്തിപ്പാടം, മാത്താംകരി, പുലിത്തുരുത്ത് ഭാഗങ്ങളിലെ വീടുകളിലാണ് വെള്ളക്കെട്ട് പ്രധാനമായും രൂക്ഷമായിട്ടുള്ളത്. കഴിഞ്ഞ ദിവസങ്ങളില്‍ മഴ മാറിനിന്നത് നാട്ടുകാര്‍ക്ക് ആശ്വാസമായെങ്കിലും കിഴക്കന്‍ വെള്ളത്തിന്‍റെ വരവ് നിലയ്ക്കാത്തത് പ്രതിസന്ധിയാണ്. എഴുമാന്തുരുത്തില്‍നിന്ന് പുറത്തേക്കുള്ള മൂന്നു വഴികളിലും വെള്ളം കയറി. ആയാംകുടിയിലേക്കുള്ള വഴിയുടെ അരക്കിലോമീറ്റര്‍ ഭാഗവും മധുരവേലിയിലേക്കുള്ള റോഡിന്‍റെ തുരുത്ത് ഭാഗത്തും തലയോലപ്പറമ്പിലേക്കുള്ള വഴിയിലും വെള്ളം നിറഞ്ഞ സ്ഥിതിയാണ്. കെഎസ്ആര്‍ടിസി ഗ്രാമവണ്ടിയും സ്വകാര്യ ബസുകളടക്കമുള്ള വാഹനങ്ങളും രണ്ടു ദിവസമായി ഇതുവഴിയുള്ള സര്‍വീസുകള്‍ നിര്‍ത്തിവച്ചിരിക്കുകയാണ്. കടുത്തുരുത്തി വലിയതോട്, ചുള്ളിത്തോട് എന്നിവിടങ്ങളിലൂടെ എത്തുന്ന വെള്ളം എഴുമാംകായലിലൂടെ ഒഴുകിപ്പോകാനുള്ള കാലതാമസമാണ് വെള്ളക്കെട്ട് ദിവസങ്ങളോളം നീണ്ടുനില്‍ക്കാന്‍ കാരണമെന്നു പ്രദേശവാസികള്‍ പറയുന്നു. തോടുകളുടെ ആഴംകൂട്ടണമെന്നാവശ്യപ്പെട്ട് ഇറിഗേഷന്‍ വകുപ്പധികൃതരെ സമീപിച്ചെങ്കിലും നടപടിയുണ്ടായിട്ടില്ലെന്നാണ് ജനപ്രതിനിധികള്‍ വ്യക്തമാക്കുന്നത്.

ലഹരിക്ക് ബദൽ സ്പോർട്സ്: മന്ത്രി വി. അബ്ദുൾ റഹ്‌മാൻ

വൈക്കം: ലഹരിക്കു ബദലായി കുട്ടികൾക്ക് ഊർജം പകരാൻ സ്പോർട്സിനാകുമെന്നു കായിക മന്ത്രി വി. അബ്ദുൾ റഹ്‌മാൻ. സംസ്ഥാന സർക്കാരിന്‍റെ ഒരു പഞ്ചായത്തില്‍ ഒരു കളിക്കളം പദ്ധതിയില്‍പ്പെടുത്തി നിര്‍മാണം പൂര്‍ത്തീകരിച്ച ഉദയനാപുരം പഞ്ചായത്തിലെ അക്കരപ്പാടം ടര്‍ഫ് സ്റ്റേഡിയം നാടിനു സമർപ്പിച്ചു പ്രസംഗിക്കുകയായിരുന്നു അദ്ദേഹം. സംസ്ഥാനത്ത് 300 പഞ്ചായത്തുകളിലാണ് കളിക്കളമില്ലാതിരുന്നത്. ഇപ്പോഴത് 200ൽ താഴെയായി കുറഞ്ഞു. ബാക്കി ഈ സാമ്പത്തിക വർഷം പൂർത്തിയാക്കാനുള്ള ശ്രമം ദ്രുതഗതിയിൽ നടന്നുവരുന്നു. 1,400 കോടി കിഫ്ബി ഫണ്ടിൽനിന്നും 500 ലധികം കോടി പ്ലാൻ ഫണ്ടിൽനിന്നുമടക്കം 2,000 കോടി രൂപ ചെലവഴിച്ചു കായിക അടിസ്ഥാനസൗകര്യ വികസന പ്രവർത്തനങ്ങൾ കേരളത്തിൽ നടന്നുവരുന്നു. അതിനുപുറമേ 369 വലിയ കളിക്കളങ്ങൾ പൂർത്തിയായി. ജില്ലാ ആസ്ഥാനങ്ങളിലും കളിക്കളങ്ങൾ നിർമിക്കുന്നു. ഗ്രാമങ്ങളിലെ എല്ലാ പ്രായക്കാരുടെയും കായികക്ഷമത വർധിപ്പിക്കാൻ കായികകേരളം പദ്ധതി നടപ്പാക്കുമെന്നും മന്ത്രി കുട്ടിച്ചേർത്തു. സംസ്ഥാന കായിക വകുപ്പിന്‍റെ 50 ലക്ഷം രൂപയും എംഎല്‍എയുടെ ആസ്തിവികസന ഫണ്ടില്‍നിന്നുള്ള 60 ലക്ഷം രൂപയുമടക്കം 1.10 കോടി രൂപ വിനിയോഗിച്ചാണ് സ്റ്റേഡിയത്തിന്‍റെ നിര്‍മാണം പൂര്‍ത്തീകരിച്ചത്. അക്കരപ്പാടം ഗവൺമെന്‍റ് യുപി സ്‌കൂള്‍ ഗ്രൗണ്ടില്‍ നടന്ന സമ്മേളനത്തിൽ സി.കെ. ആശ എംഎല്‍എ അധ്യക്ഷത വഹിച്ചു. വൈക്കം ബ്ലോക്ക് പഞ്ചായത്ത് പ്രസിഡന്‍റ് എസ്. ബിജു, ജില്ലാ പഞ്ചായത്ത് അംഗം പി.എസ്. പുഷ്പമണി, ഉദയനാപുരം പഞ്ചായത്ത് പ്രസിഡന്‍റ് പി.കെ. ആനന്ദവല്ലി, ബ്ലോക്ക്-ഗ്രാമപഞ്ചായത്ത് അംഗങ്ങള്‍, വിവിധ രാഷ‌്‌ട്രീയ പാര്‍ട്ടി പ്രതിനിധികള്‍ എന്നിവര്‍ പങ്കെടുത്തു. വൈക്കം നിയോജക മണ്ഡലത്തില്‍ നിര്‍മാണം പൂര്‍ത്തീകരിച്ച് ഉദ്ഘാടനം ചെയ്യുന്ന ആദ്യ സ്റ്റേഡിയമാണ് അക്കരപ്പാടം ടര്‍ഫ് ഗ്രൗണ്ട്.

ടിവിപുരത്ത് സ്മാർട്ട് കൃഷിഭവൻ നിർമാണം പുരോഗമിക്കുന്നു

ടിവിപുരം: ടിവിപുരം പഞ്ചായത്തിൽ പുതുതായി ആരംഭിക്കുന്ന സ്മാർട്ട് കൃഷിഭവന്‍റെ നിർമാണ പ്രവർത്തനങ്ങൾ പുരോഗമിക്കുന്നു. രണ്ടു നിലകളിലായിട്ടാണ് സ്മാർട്ട് കൃഷി ഭവൻ നിർമിക്കുന്നത്. രണ്ടാംനിലയുടെ പണികളാണ് ഇപ്പോൾ ദ്രുതഗതിയിൽ പുരോഗമിച്ചുവരുന്നത്. ടിവിപുരം ചെമ്മനത്തു കരയിൽ പഞ്ചായത്ത് അനുവദിച്ച ആറു സെന്‍റ് സ്ഥലത്താണ് കെട്ടിടം പണിയുന്നത്. നബാർഡ് ആർഎൽഡിഎഫ് 2022 - 2023 സാമ്പത്തിക വർഷത്തിൽ അനുവദിച്ച 1.41 കോടി രൂപയാണ് പദ്ധതിക്കായി ചെലവഴിക്കുന്നത്. 151.305 ചതുരശ്ര അടിയിലായി താഴത്തെ നിലയും മുകൾനിലയിൽ 148.22 ചതുരശ്ര അടിയിലുമായാണ് കെട്ടിടം നിർമിക്കുന്നത്. കെഎൽഡിസി കമ്പനിക്കാണ് നിർമാണ ച്ചുമതല. താഴത്തെ നിലയിൽ ഫ്രണ്ട് ഓഫീസ്, ഇക്കോ ഷോപ്പ്, ബയോഫാർമസി, ഓഫീസ് മുറികളും രണ്ടാമത്തെ നിലയിൽ പ്ലാന്‍റ്, ഹെൽത്ത് ക്ലിനിക്, സെമിനാർ ഹാൾ എന്നിവയുമാണ് ഉൾപ്പെടുന്നത്. കൃഷിഭവനുകളെ നവീനവത്കരിക്കുന്നതിനും നൂതന സാങ്കേതികവിദ്യകൾ പ്രയോജനപ്പെടുത്തി സേവനങ്ങൾ കൃത്യതയോടും സമയബന്ധിതമായും കർഷകരിലേക്ക് എത്തിക്കുന്നതിനായി രൂപീകരിച്ച പദ്ധതിയാണ് സ്മാർട്ട് കൃഷിഭവൻ. കാർഷിക സേവനങ്ങൾ പൂർണമായും ഓൺലൈനാക്കി പേപ്പർലെസ് ഓഫീസ് സംവിധാനം ഏർപ്പെടുത്തുക, കർഷകർക്ക് തിരിച്ചറിയൽ കാർഡുകൾ ലഭ്യമാക്കുക, പ്ലാന്‍റ് ഹെൽത്ത് ക്ലിനിക് മുഖേന വിളപരിപാലന പരിപാടികൾ ഏകോപിപ്പിക്കുക തുടങ്ങിയ പ്രവർത്തനങ്ങൾ സ്മാർട്ട് കൃഷിഭവനിലൂടെ പ്രാഥമികമായി നടപ്പിലാക്കും.

ജൂലൈ മൂന്ന് പൊതു അവധിയായി പ്രഖ്യാപിക്കണം: കത്തോലിക്ക കോണ്‍ഗ്രസ്

കടുത്തുരുത്തി: ജൂലൈ മൂന്ന് പൊതു അവധിയായി പ്രഖ്യാപിക്കണമെന്നു കത്തോലിക്ക കോണ്‍ഗ്രസ് കടുത്തുരുത്തി മേഖലാ സമ്മേളനം ആവശ്യപ്പെട്ടു. മാന്നാര്‍ സെന്‍റ് മേരീസ് പള്ളിയങ്കണത്തില്‍ ചേര്‍ന്ന മേഖലാ സമ്മേളനം വികാരി ഫാ. സിറിയക് കൊച്ചുകൈപ്പെട്ടിയില്‍ ഉദ്ഘാടനം ചെയ്തു. മേഖലാ പ്രസിഡന്‍റ് രാജേഷ് ജയിംസ് കോട്ടായില്‍ അധ്യക്ഷത വഹിച്ച സമ്മേളനത്തില്‍ കത്തോലിക്ക കോണ്‍ഗ്രസ് രൂപതാ പ്രസിഡന്‍റ് ഇമ്മാനുവല്‍ നിധീരി മുഖ്യപ്രഭാഷണം നടത്തി. രൂപതാ ജനറല്‍ സെക്രട്ടറി ജോസ് വട്ടുകുളം, മേഖലാ സെക്രട്ടറി ജോര്‍ജ് മങ്കുഴിക്കരി, ജെറി ജോസഫ്, മനോജ് കടവന്‍റെകാല എന്നിവര്‍ പ്രസംഗിച്ചു.

ലഹരിവിരുദ്ധ ബോധവത്കരണ ക്ലാസ് നടത്തി

ഞീഴൂര്‍: ഒരുമ ചാരിറ്റബിള്‍ ആന്‍ഡ് അഗ്രിക്കള്‍ച്ചര്‍ സൊസൈറ്റിയുടെ നേതൃത്വത്തില്‍ ലഹരിവിരുദ്ധ ബോധവത്കരണ റാലിയും നിര്‍ധനരായവര്‍ക്കുള്ള ഭക്ഷ്യക്കിറ്റ് വിതരണവും നടത്തി. കടുത്തുരുത്തി എസ്‌ഐ എന്‍.എസ്. സജീവ്കുമാര്‍ ലഹരിവിരുദ്ധ ബോധവത്കരണ ക്ലാസെടുത്തു. ഒരുമ ചാരിറ്റബിള്‍ സൊസൈറ്റി നല്‍കിവരുന്ന 150 കിറ്റുകളുടെ വിതരണം, ചികിത്സാസഹായം, മരുന്ന് വിതരണം എന്നിവയുടെ ഉദ്ഘാടനം ഒരുമ പ്രസിഡന്‍റ് കെ.കെ. ജോസ്പ്രകാശ് നിര്‍വഹിച്ചു. സെക്രട്ടറി ശ്രുതി സന്തോഷ്, ട്രഷറര്‍ സിന്‍ജ ഷാജി, വൈസ് പ്രസിഡന്‍റ് ഷാജി അഖില്‍ നിവാസ്, സുധര്‍മിണി ജോസ് പ്രകാശ്, ജയന്‍ കറുകപ്പള്ളി, സുഷമ അജിപ്രകാശ്, ജോയ് മൈലംവേലില്‍, കെ.പി. വിനോദ്, അര്‍ച്ചന ഹരിദാസ് എന്നിവര്‍ പങ്കെടുത്തു.

രുഗ‌്മിണീ സ്വയംവര ഘോഷയാത്ര ഭക്തിനിർഭരമായി

വൈക്കം: ചാലപ്പറമ്പ് കാർത്യാകുളങ്ങര ശ്രീധർമശാസ്താ ക്ഷേത്രത്തിൽ ശ്രീമദ് ഭാഗവത സപ്താഹ യജ്ഞത്തോടനുബന്ധിച്ചു നടന്ന രുഗ്‌മിണീ സ്വയംവരം ഭക്തിനിർഭരമായി. ചാലപ്പറമ്പ് എൻഎസ് എസ് കരയോഗമന്ദിരത്തിൽനിന്നാണ് വർണാഭമായ സ്വയംവരഘോഷയാത്ര ക്ഷേത്രത്തിലേക്ക് എത്തിയത്. യജ്ഞാചാര്യൻ അരൂർ അപ്പുജി, ക്ഷേത്രം തന്ത്രി ബ്രഹ്മശ്രീ ആനത്താനത്ത് ഇല്ലത്ത് എ.വി. ഗോവിന്ദൻ നമ്പൂതിരി എന്നിവരുടെ കാർമികത്വത്തിലാണ് ശ്രീമദ് ഭാഗവത സപ്താഹ യജ്ഞം നടന്നു വരുന്നത്. വൈകുന്നേരം നടന്ന സർവൈശ്വര്യപൂജയിലും നൂറുകണക്കിനു ഭക്തർ പങ്കെടുത്തു. ജൂലൈ ഒന്നിന് രാവിലെ 10.30ന് കുചേലോപാഖ്യാനം.11.30ന് സന്താനഗോപാലം. വൈകുന്നേരം 5.30ന് സർവൈശ്വര്യപൂജ. രണ്ടിനു രാവിലെ ഒൻപതിന് പുനപ്രതിഷ്ഠാദിന പൂജകൾ. 10.30ന് ഭഗവാന്‍റെ സ്വധാമ പ്രാപ്തി. ക്ഷേത്രം ദേവസ്വം പ്രസിഡന്‍റ് എസ്. ഹരിദാസൻ നായർ, സെക്രട്ടറിമാരായ എം. വിജയകുമാർ, കെ.ടി. രാംകുമാർ, വനിതാ സമാജം പ്രസിഡന്‍റ് ജഗദംബിക, സെക്രട്ടറി അംബക തുടങ്ങിയവർ നേതൃത്വം നൽകി.

ഞാറ്റുവേലച്ചന്ത ഉദ്ഘാടനം ചെയ്തു

മറവൻതുരുത്ത്: മറവൻതുരുത്ത് പഞ്ചായത്ത്, കൃഷിഭവൻ എന്നിവയുടെ ആഭിമുഖ്യത്തിൽ കർഷകസഭയും ഞാറ്റുവേലച്ചന്തയും സംഘടിപ്പിച്ചു. പഞ്ചായത്ത് വൈസ് പ്രസിഡന്‍റ് വി.ടി. പ്രതാപന്‍റെ അധ്യക്ഷതയിൽ നടന്ന യോഗത്തിൽ പഞ്ചായത്ത് പ്രസിഡന്‍റ് പി. പ്രീതി ഞാറ്റുവേലച്ചന്ത ഉദ്ഘാടനം ചെയ്തു. ബ്ലോക്ക്, ഗ്രാമപഞ്ചായത്ത് അംഗങ്ങൾ, കൃഷിഭവൻ ഉദ്യോഗസ്ഥർ, കാർഷിക വികസനസമിതി അംഗങ്ങൾ, കർഷകർ തുടങ്ങിയവർ പങ്കെടുത്തു. കുരുമുളക് വള്ളികൾ, പച്ചക്കറിവിത്ത് എന്നിവയുടെ വിതരണവും നടത്തി.

സിപിഐ പ്രാദേശിക നേതാക്കള്‍ തമ്മില്‍ വാക്കേറ്റവും സംഘര്‍ഷവും

കടുത്തുരുത്തി: സിപിഐ പ്രാദേശിക നേതാക്കള്‍ തമ്മില്‍ വാക്കേറ്റവും സംഘര്‍ഷവും. സിപിഐ കടുത്തുരുത്തി മണ്ഡലം കമ്മിറ്റി ഓഫീസില്‍ ഞായറാഴ്ച വൈകുന്നേരമാണ് സംഭവം. മണ്ഡലം കമ്മിറ്റിയംഗങ്ങള്‍, ലോക്കല്‍ സെക്രട്ടറിമാര്‍, ബ്രാഞ്ച് സെക്രട്ടറിമാര്‍ എന്നിവരുടെ യോഗം കഴിഞ്ഞ ഉടനാണ് വാക്കേറ്റമുണ്ടായത്. കടുത്തുരുത്തി ടൗണ്‍ ബ്രാഞ്ച് സെക്രട്ടറി അജിന്‍ കുര്യന്‍, ആയാംകുടി ബ്രാഞ്ച് സെക്രട്ടറി രാജു തോമസ് എന്നിവര്‍ തമ്മിലാണ് സംഘര്‍ഷമുണ്ടായത്. പാര്‍ട്ടി നേതാക്കള്‍ മുകളിലുള്ള ഓഫീസിനു താഴെയെത്തിക്കഴിഞ്ഞാണ് സംഭവം. നേതാക്കള്‍ ഇടപെട്ട് ഇരുവരെയും പിടിച്ചുമാറ്റുകയായിരുന്നു. തുടര്‍ന്ന് രാജു തോമസ് മര്‍ദനമേറ്റതായിക്കാണിച്ച് കടുത്തുരുത്തി പോലീസില്‍ പരാതി നല്‍കുകയായിരുന്നു. മര്‍ദനമേറ്റ ബ്രാഞ്ച് സെക്രട്ടറിയുടെ പരാതിയില്‍ അന്വേഷണം ആരംഭിച്ചതായി കടുത്തുരുത്തി എസ്എച്ച്ഒ ടി.എസ്. റെനീഷ് പറഞ്ഞു. ഇതേസമയം ഇങ്ങനെയൊരു സംഭവം പാര്‍ട്ടി ഓഫീസില്‍ ഉണ്ടായിട്ടില്ലെന്ന് മണ്ഡലം സെക്രട്ടറി പി.ജി. ത്രിഗുണസെന്‍ പറഞ്ഞു. കടുത്തുരുത്തിയില്‍ സിപിഐക്കുള്ളില്‍ ഏറെക്കാലമായി വിഭാഗിയത നിലനില്‍ക്കുകയാണ്.

സയന്‍സ് സെന്‍റര്‍ മൂന്നിന് മുഖ്യമന്ത്രി ഉദ്ഘാടനം ചെയ്യും

കോട്ടയം: ശാസ്ത്രത്തിന്‍റെ വിസ്മയലോകത്തേക്ക് വാതിലുകള്‍ തുറന്നിട്ട് കോഴാ സയന്‍സ് സിറ്റി. ഇനി പ്രപഞ്ചസത്യങ്ങളുടെ വിശാലവിസ്മയങ്ങളിലേക്ക് കൗതുകപ്രവേശനം. ഉന്നത വിദ്യാഭ്യാസ വകുപ്പിനുകീഴിലുള്ള സംസ്ഥാന ശാസ്ത്ര സാങ്കേതിക മ്യൂസിയത്തിന്‍റെ ആഭിമുഖ്യത്തില്‍ ജില്ലയില്‍ സ്ഥാപിക്കുന്ന സയന്‍സ് സിറ്റിയുടെ ഒന്നാംഘട്ടമായ സയന്‍സ് സെന്‍റര്‍ യാഥാര്‍ഥ്യമായി. ഉദ്ഘാടനം മൂന്നിന് മുഖ്യമന്ത്രി പിണറായി വിജയന്‍ നിര്‍വഹിക്കും. ഉന്നതവിദ്യാഭ്യാസ സാമൂഹികനീതി മന്ത്രി ഡോ. ആര്‍. ബിന്ദു അധ്യക്ഷത വഹിക്കും. സമൂഹത്തില്‍ ശാസ്ത്രാവബോധം വളര്‍ത്താനും ശാസ്ത്ര വിഷയങ്ങളില്‍ കുട്ടികള്‍ക്കുള്ള ആഭിമുഖ്യം വര്‍ധിപ്പിക്കാനും ലക്ഷ്യമിട്ടാണ് കുറവിലങ്ങാട് പഞ്ചായത്തിലെ കോഴായില്‍ എംസി റോഡരില്‍ സര്‍ക്കാര്‍ അനുവദിച്ച 30 ഏക്കര്‍ ഭൂമിയില്‍ സയന്‍സ് സിറ്റി സ്ഥാപിച്ചത്. ശാസ്ത്ര ഗാലറികള്‍, തൃമാന പ്രദര്‍ശന തിയറ്റര്‍, ശാസ്ത്ര പാര്‍ക്ക്, സെമിനാര്‍ ഹാള്‍, ഇന്നവേഷന്‍ ഹബ് എന്നിവ ഉള്‍ക്കൊള്ളുന്ന സയന്‍സ് സെന്‍ററാണ് പ്രധാന ഭാഗം. പദ്ധതി പ്രദേശത്ത് 47,147 ചതുരശ്ര അടി വിസ്തീര്‍ണത്തില്‍ നിര്‍മിച്ചിരിക്കുന്ന സയന്‍സ് സെന്‍റര്‍ കെട്ടിടത്തില്‍ പല വിഭാഗങ്ങളിലായിട്ടാണ് പ്രദര്‍ശനം സജ്ജമാക്കിയിട്ടുള്ളത്. ഇതിനുപുറമേ തദ്ദേശസ്ഥാപനങ്ങളുടെ സഹകരണത്തോടെ അപൂര്‍വയിനം വനസുഗന്ധവ്യഞ്ജനങ്ങൾ ഉള്‍ക്കൊള്ളിച്ച് പൊതുജനങ്ങള്‍ക്കായി ഒരു ജൈവവൈവിധ്യ ഉദ്യാനത്തിന്‍റെ നിര്‍മാണോദ്ഘാടനം ഉടന്‍ നടക്കും. പ്രവേശനം നാലു മുതല്‍ സയന്‍സ് സിറ്റിയിലേക്ക് ഉദ്ഘാടനപ്പിറ്റേന്നു മുതല്‍ പ്രവേശനം അനുവദിക്കും. രാവിലെ 10 മുതല്‍ വൈകുന്നേരം അഞ്ചുവരെയാണ് പൊതുജനങ്ങള്‍ക്ക് സന്ദര്‍ശിക്കാവുന്നത്. തിങ്കളാഴ്ചകളില്‍ അവധിയായിരിക്കും. 30 രൂപയാണ് പ്രവേശന ഫീസ്. വിദ്യാര്‍ഥികള്‍ക്ക് 20 രൂപയും.

കുട്ടികള്‍ക്കൊപ്പം സൂംബ നൃത്തവുമായി മന്ത്രി വി.എന്‍. വാസവന്‍

കോട്ടയം: വിദ്യാര്‍ഥികള്‍ക്കൊപ്പം സൂംബ ഡാന്‍സ് കളിച്ച് മന്ത്രി വി.എന്‍. വാസവന്‍. മൗണ്ട് കാര്‍മല്‍ ഹൈസ്‌കൂളില്‍ വിദ്യാഭ്യാസ വകുപ്പിന്‍റെ നേതൃത്വത്തില്‍ നടത്തിയ ലോക ലഹരിവിരുദ്ധ ദിനാചരണത്തിന്‍റെ ജില്ലാതല ഉദ്ഘാടനത്തോടനുബന്ധിച്ചാണ് കുട്ടികള്‍ക്കൊപ്പം മന്ത്രിയും ചുവടുവച്ചത്. സ്‌കൂളിലെ ആയിരത്തോളം വരുന്ന കുട്ടികളും സൂംബയില്‍ അണിചേര്‍ന്നു. ചടങ്ങില്‍ കോട്ടയം നഗരസഭാ ചെയര്‍പേഴ്‌സണ്‍ ബിന്‍സി സെബാസ്റ്റ്യന്‍ അധ്യക്ഷത വഹിച്ചു. നഗരസഭാംഗം അജിത് പൂഴിത്തറ, പൊതുവിദ്യാഭ്യാസ വകുപ്പ് ഡെപ്യൂട്ടി ഡയറക്ടര്‍ ഹണി ജി. അലക്‌സാണ്ടര്‍, എസ്എസ്‌കെ ജില്ലാ പ്രോജക്‌ട് കോ-ഓര്‍ഡിനേറ്റര്‍ കെ.ജെ. പ്രസാദ്, ജില്ലാ വിദ്യാഭ്യാസ ഓഫീസര്‍ എം.ആര്‍. സുനിമോള്‍, സ്‌കൂള്‍ പ്രിന്‍സിപ്പല്‍ ടി.പി. മേരി, ഹെഡ്മിസ്ട്രസ് സിസ്റ്റര്‍ എ.എസ്. ജെയിന്‍, പിടിഎ. പ്രസിഡന്‍റ് പ്രവീണ്‍ കെ. രാജ് എന്നിവര്‍ പങ്കെടുത്തു.

ഇന്ന് ഡോക്‌ടേഴ്‌സ് ദിനം; പാലായിലെ ഓടുന്ന ഡോക്‌ടർ

പാലാ: ആതുരസേവനത്തില്‍ ഒട്ടേറെ ശസ്ത്രക്രിയകള്‍ നടത്തിയ ഡോ. ഖലീല്‍ ഐസക്ക് മത്തായി ഇടയ്ക്കിടെ ഓടും. ചെറിയ ഓട്ടമല്ല പത്തും നാല്‍പതും കിലോമീറ്റര്‍. ആരോഗ്യം വിലപ്പെട്ടതാണെന്ന സന്ദേശം സമൂഹത്തെ അറിയിക്കുകയാണ് മാരത്തണിലൂടെ പാലാ മാര്‍ സ്ലീവാ മെഡിസിറ്റിയിലെ ന്യൂറോസര്‍ജറി ആന്‍ഡ് സ്‌പൈന്‍ സര്‍ജറി വിഭാഗം സീനിയര്‍ കണ്‍സള്‍ട്ടന്‍റായ ഡോ. ഖലീല്‍ ഐസക്ക് മത്തായി. 66 വയസിനിടെ ഡോക്ടര്‍ പൂര്‍ത്തിയാക്കിയത് മുപ്പത്തിയഞ്ചിലേറെ മാരത്തണുകളാണ്. ഇതില്‍ പത്തെണ്ണം 42 കി.മീ ഫുള്‍ മാരത്തണുകളായിരുന്നു. മുംബൈയില്‍ മുന്‍പ് നടന്ന ഹാഫ് മാരത്തണില്‍ വെറ്ററന്‍ വിഭാഗത്തില്‍ ചാമ്പ്യനാണ് ഡോ. ഖലീല്‍ ഐസക്ക് മത്തായി. സൈന്യത്തില്‍ മൂന്നര പതിറ്റാണ്ടു നീണ്ട സേവനത്തിനിടയിലും ചിട്ടയായ വ്യായാമവും ബോധവത്കരണവും മുടക്കിയില്ല. വ്യോമസേനയുടെ കമാന്‍ഡ് ഹോസ്പിറ്റലില്‍ സര്‍ജറി ആന്‍ഡ് ന്യൂറോസര്‍ജറി വിഭാഗം മേധാവിയായിരുന്ന ഡോക്ടര്‍ പൂന യൂണിവേഴ്‌സിറ്റി നടത്തിയ ഡെക്കാത്തലണില്‍ ഒന്നാം സ്ഥാനം, വെസ്റ്റേണ്‍ നേവല്‍ കമാന്‍ഡിലെ മികച്ച അത്‌ലറ്റ് തുടങ്ങിയ അംഗീകാരങ്ങള്‍ കൈവരിച്ചു. കന്യാകുമാരിയില്‍നിന്ന് മുംബൈ വരെ സൈക്കിള്‍ ചവിട്ടിയും ആരോഗ്യസന്ദേശവുമായി മാതൃകയാകാന്‍ സാധിച്ചു. വൈദ്യവും വ്യായാമവും ഒരുമിപ്പിച്ച ഡോക്ടര്‍ വായനയിലും എഴുത്തിലും സജീവമാണ്. ഇതോടകം പത്ത് ഫിക്‌ഷന്‍ കഥകള്‍ പ്രസിദ്ധീകരിച്ചിട്ടുണ്ട്. ന്യൂറോ സര്‍ജറിയില്‍ പഠന ഗ്രന്ഥം എഴുതിയതിനു പുറമേ മുപ്പതില്‍പരം ജേര്‍ണലുകളിലും പഠന ലേഖനങ്ങള്‍ എഴുതി. തന്‍റെ ശസ്ത്രകിയയിലൂടെ ജീവിതത്തിലേക്ക് തിരിച്ചെത്തിയവരെ സന്ദര്‍ശിക്കാനും അവര്‍ക്ക് മാര്‍ഗനിര്‍ദേശം നല്‍കാനും സമയം കണ്ടെത്തുന്നതും പതിവാണ്. കോട്ടയം പാലത്തിങ്കല്‍ കുടുംബാംഗമാണ് ഡോ. ഖലീല്‍. ഭാര്യ വൈസ് അഡ്മിറല്‍ (റിട്ട) ഡോ. ഷീല മത്തായി മണിപ്പാല്‍ കസ്തൂര്‍ബാ ഗാന്ധി മെഡിക്കല്‍ കോളജ് നവജാത ശുശുവിഭാഗം മേധാവിയാണ്.

പാലായെ ‘തിരുനാൾ വൈബിലാക്കി ’ സിനിമാ ഷൂട്ടിംഗ്

കോട്ടയം: ഡിസംബറിലെ പാലാക്കാരുടെ സ്വന്തം ജൂബിലി തിരുനാളിന്‍റെ അതേ ആളും ബഹളവും. ദീപാലങ്കാരങ്ങളും വെള്ളിത്തോരണങ്ങളും മാല ബള്‍ബുകളും ഉഴുന്നാട വഴിയോരക്കടകളുമെല്ലാം അതേപടി. പാലാ വീണ്ടും ജൂബിലി തിരുനാള്‍ ആഘോഷത്തിന്‍റെ മൂഡിലാണ്. കേന്ദ്രമന്ത്രി സുരേഷ് ഗോപി നായകനാകുന്ന ‘ഒറ്റക്കൊമ്പന്‍’ സിനിമയുടെ ഷൂട്ടിംഗാണ് കഴിഞ്ഞ മൂന്നു ദിവസമായി പാലായില്‍ നടന്നുവരുന്നത്. രാത്രി ഏഴു മുതല്‍ പുലര്‍ച്ചെ വരെയാണ് ഷൂട്ട്. വാദ്യോപകരണങ്ങളുടെയും കരിമരുന്നിന്‍റെയും അകമ്പടിയോടെയുള്ള രാത്രി പ്രദക്ഷിണമാണ് രണ്ടു ദിവസമായി ചിത്രീകരിച്ചത്. സ്റ്റേഡിയം ജംഗ്ഷനില്‍നിന്നു ജൂബിലി പന്തലിലേക്കുള്ള പ്രദക്ഷിണത്തിന്‍റെ ഷൂട്ടാണ് നടന്നുവരുന്നത്. പാലായിലും പരിസര പ്രദേശങ്ങളിലുമുള്ള ആയിരത്തോളം ജൂണിയര്‍ ആര്‍ട്ടി സ്റ്റുകളാണ് മുത്തുക്കുടകളുമേന്തി പ്രദക്ഷിണത്തില്‍ വേഷമിട്ടത്. ഷൂട്ടിംഗ് കാണാനെത്തിയവര്‍ റോഡിനിരുവശത്തായി നിറഞ്ഞതോടെ കാഴ്ചക്കാര്‍ പ്രദക്ഷിണം വീക്ഷിക്കുന്നവരായി അഭ്രപാളിയിലുമായി. ജൂബിലി തിരുനാളിന്‍റെ പട്ടണപ്രദക്ഷിണം അതേപടി വീണ്ടും പുനരാവിഷ്‌കരിച്ച രീതിയിലായിരുന്നു സിനിമയുടെ സെറ്റ്. ഷൂട്ടിംഗ് കാണാനായി കഴിഞ്ഞ രണ്ടു രാത്രി പാലായില്‍ വന്‍ ജനസഞ്ചയമാണ് എത്തിയത്. വെള്ളിത്തോരണങ്ങളാല്‍ പാലാ നഗരം വീണ്ടും മേലാപ്പണിഞ്ഞിരിക്കുകയാണ്. പീപ്പിയും പടക്കവും ഉഴുന്നാടയും വറവുകടലയും കരയുന്ന ബലൂണും കൈവിട്ടാല്‍ ഊതി തെറിക്കുന്ന രസഗോളങ്ങളുമൊക്കെയായുള്ള പാലാ നഗരവും ആകാശത്തൊട്ടിലും മരണക്കിണറും ടൂവീലര്‍ ഫാന്‍സിഡ്രസും ടാബ്ലോയും ഒക്കെ പുനരാവിഷ്‌കരിക്കപ്പെടുന്ന അപൂര്‍വ കാഴ്ച കാണാനായി ദൂരദിക്കില്‍നിന്നുവരെ ആളുകള്‍ പാലായിലേക്ക് ഒഴുകിയെത്തുകയാണ്. പ്രദക്ഷിണവും കൂടി, ടൗണ്‍ മഴുവന്‍ നടന്നു ചുറ്റി ഉഴുന്നാടയും ബലൂണുമൊക്കെയായി ജൂബിലിത്തിരുനാള്‍ കൂടി പോകുന്ന അതേ പ്രതീതിയിലായിരുന്നൂ ആളുകളുടെ മടക്കം. ജൂബിലി തിരുനാളിനോടനുബന്ധിച്ച് നടത്തിവരാറുള്ള ടൂവീലര്‍ ഫാന്‍സിഡ്രസ് മത്സരവും സുരേഷ് ഗോപി അഭിനയിക്കുന്ന രംഗങ്ങളും അടുത്ത ദിവസങ്ങളില്‍ ഷൂട്ട് ചെയ്യും. പാലായിലുള്ള ദിനങ്ങളിലെല്ലാം പതിവായി പുലര്‍ച്ചെ കുരിശുപള്ളി മാതാവിന്‍റെ യടുത്തെത്തി തിരികത്തിച്ചു പ്രാര്‍ഥിച്ച് ജീവിതചര്യ ആരംഭിക്കുന്ന കഥാപാത്രമായാണ് സുരേഷ് ഗോപി ചിത്രത്തില്‍ വേഷമിടുന്നത്. സുരേഷ് ഗോപിയെ കൂടാതെ ഇന്ദ്രജിത്ത്, ലാല്‍‌, ജോണി ആന്‍റണി, ലാലു അലക്‌സ് അടക്കമുള്ള വമ്പന്‍ താരനിരയും സിനിമയിലുണ്ട്. മൂന്നു വര്‍ഷം മുമ്പ് തുടങ്ങിയതാണ് സിനിമയുടെ ഷൂട്ടിംഗ് നടപടികള്‍. കഴിഞ്ഞ രണ്ടു വര്‍ഷത്തെ ജൂബിലി തിരുനാളിന്‍റെ വീഡിയോ ഫുട്ടേജും ഷൂട്ടിംഗിന്‍റെ ഭാഗമായി എടുത്തിട്ടുണ്ട്. ജൂബിലി തിരുനാളിലെ പാലാക്കാരുടെ വീടുകളിലെ ആഘോഷവും മറ്റും തിരുവനന്തപുരത്ത് സെറ്റ് ഇട്ടാണ് ഷൂട്ട് ചെയ്തത്. പാലാ ജൂബിലി തിരുനാള്‍ ഷൂട്ടിനൊപ്പം പാലായുടെ തനിമയായ മീനച്ചിലാര്‍, പാലാ കത്തീഡ്രല്‍, പാലാ നഗരം എന്നിവയും ചേര്‍പ്പുങ്കല്‍ പള്ളി മൈതാനവും ഷൂട്ട് ചെയ്യുന്നുണ്ട്.

മോഷണക്കേസില്‍ പോലീസ് പിടികൂടിയ പ്രതി ജയില്‍ ചാടി

കോട്ടയം: മൊബൈല്‍ മോഷണക്കേസില്‍ പോലീസ് പിടികൂടിയ പ്രതി ജയില്‍ ചാടി. ആസാം നെഗോണ്‍ സ്വ ദേശി അമിനുള്‍ ഇസ്‌ലാം (ബാബു-20) ആണ് ജയില്‍ ചാടിയത്. ഇന്നലെ വൈകുന്നേരം മൂന്നോടെയാണ് സംഭവം. ജില്ലാ ജയിലിനോട് ചേര്‍ന്നുള്ള വിജിലന്‍സ് ഓഫീസ് കെട്ടിടം സ്ഥിതി ചെയ്യുന്ന ഭാഗത്തെ മതിലാണ് പ്രതി ചാടിക്കടന്നു രക്ഷപ്പെട്ടത്. കഴിഞ്ഞ ദിവസം റെയില്‍വേ പോലീസാണ് ഇയാളെ പിടികൂടിയത്. മുണ്ട് മാത്രമാണ് പ്രതി ധരിച്ചിരുന്നത്. ഇയാൾ കളക്ടറേറ്റ് ഭാഗത്തേക്ക് നടന്നുപോകുന്ന സിസിടിവി ദൃശ്യവും പോലീസിന് ലഭിച്ചിട്ടുണ്ട്. കഴിഞ്ഞ ദിവസം ചെന്നൈ തിരുവനന്തപുരം എക്സ്പ്രസ് ട്രെയിനിലെ യാത്രക്കാരുടെ മൊബൈല്‍ ഫോണ്‍ മോഷ്ടിച്ച കേസിലാണ് അമിനുള്‍ അറസ്റ്റിലായത്. ഇയാളെ കണ്ടെത്താന്‍ പോലീസ് അന്വേഷണം ഊര്‍ജിതമാക്കിയിട്ടുണ്ട്.

ദേശീയപാതയിൽ കലുങ്ക് നിർമാണം; മുണ്ടക്കയം ടൗണിൽ ഗതാഗതക്കുരുക്ക് രൂക്ഷം

മുണ്ടക്കയം: ദേശീയപാതയിൽ മുണ്ടക്കയം ടൗണിന് സമീപം നടക്കുന്ന കലുങ്കിന്‍റെ നിർമാണം ടൗണിൽ ഗതാഗതക്കുരുക്ക് രൂക്ഷമാക്കുന്നു. രാവിലെയും വൈകുന്നേരങ്ങളിലും സ്കൂൾ സമയങ്ങളിലടക്കം വലിയ ഗതാഗതക്കുരുക്കാണ് ടൗണിൽ അനുഭവപ്പെടുന്നത്. കലുങ്കിന്‍റെ നിർമാണം നടക്കുന്ന റോഡിന്‍റെ ഭാഗത്ത് കഷ്ടിച്ച് ഒരു വാഹനത്തിന് മാത്രമാണ് കടന്നുപോകുവാൻ കഴിയുന്നത്. ഇരുവശങ്ങളിൽനിന്നും ബസും ലോറിയടക്കമുള്ള വലിയ വാഹനങ്ങൾ കടന്നുവരുന്നതോടെ പ്രദേശമാകെ ഗതാഗതക്കുരുക്കിലമരും. ദേശീയപാതയിൽ നിർമാണം നടക്കുന്നുണ്ടെങ്കിലും ടൗണിൽ മതിയായ ഗതാഗത പരിഷ്കരണം നടത്താൻ അധികാരികൾ തയാറാകുന്നില്ലെന്ന ആക്ഷേപം ശക്തമാണ്. കട്ടപ്പന, കുമളി ഭാഗങ്ങളിൽനിന്നു വരുന്ന വാഹനങ്ങൾ 34-ാം മൈലിൽനിന്ന് എരുമേലി റൂട്ടിലൂടെ കോസ്‌വേ പാലത്തിലൂടെയോ അല്ലെങ്കിൽ ദേശീയപാതയിൽ കോസ്‌വേ കവലയിൽനിന്നു തിരിച്ച് ബൈപാസ് റോഡിലൂടെയോ കടത്തിവിട്ടാൽ ടൗണിലെ ഗതാഗതക്കുരുക്കിന് പരിഹാരമാകും. എന്നാൽ ചെറുതും വലുതുമായ വാഹനങ്ങളെല്ലാം ദേശീയപാതയിലൂടെ കടന്നുവരികയും വലിയ ഗതാഗതക്കുരുക്കിന് ഇടയാക്കുകയും ചെയ്യുകയാണ്. മുന്നറിയിപ്പ് ബോർഡുകൾ ഒന്നുമില്ലാത്തതിനാൽ മറ്റു സ്ഥലങ്ങളിൽനിന്നു വരുന്ന വാഹന യാത്രക്കാർ ബൈപാസ് റോഡ് ഉപയോഗിക്കാതെ ദേശീയപാതയിലൂടെ മാത്രം കടന്നു പോകുകയാണ്. ഹോം ഗാർഡുകളെ നിയോഗിച്ച് ദേശീയപാതയിൽ കോസ്‌വേ ജംഗ്ഷനിൽനിന്നു വാഹനങ്ങൾ തിരിച്ചുവിട്ടാൽ വലിയ ഗതാഗതക്കുരുക്കിന് പരിഹാരമാകും. ടൗണിൽ ഗതാഗതക്കുരുക്ക് ഉണ്ടാകുമ്പോഴും മുണ്ടക്കയം ബൈപാസ് റോഡ് വേണ്ടവിധം പ്രയോജനപ്പെടുത്താൻ അധികാരികൾക്കാകുന്നില്ലെന്ന് ആക്ഷേപവുമുണ്ട്.

സർക്കാർ അവകാശവാദം ഊതിവീർപ്പിച്ച ബലൂൺ: ആന്‍റോ ആന്‍റണി എംപി

പൊൻകുന്നം: ആരോഗ്യരംഗത്തെ നേട്ടങ്ങളെക്കുറിച്ചുള്ള സർക്കാർ അവകാശവാദം ഊതിവീർപ്പിച്ച ബലൂണാണെന്ന് ആന്‍റോ ആന്‍റണി എംപി. ത്രിതല പഞ്ചായത്ത് തെരഞ്ഞെടുപ്പിനു മുന്നോടിയായി കോൺഗ്രസ് നിയോജകമണ്ഡലം കമ്മിറ്റിയുടെ ആഭിമുഖ്യത്തിൽ നടത്തിയ നേതൃക്യാമ്പ് "വിഷൻ 2025' ഉദ്ഘാടനം ചെയ്യുകയായിരുന്നു അദ്ദേഹം. കഴിഞ്ഞ ഒന്പത് വർഷക്കാലത്തെ ഇടതുഭരണത്തിന്‍റെ യഥാർഥ വിലയിരുത്തലാണ് നിലമ്പൂർ ഉപതെരഞ്ഞെടുപ്പ് ഫലമെന്നും 2026ലെ തെരഞ്ഞെടുപ്പിൽ കോൺഗ്രസ് കൊടുങ്കാറ്റുപോലെ മടങ്ങിവരുമെന്നും അദ്ദേഹം പറഞ്ഞു. കോൺഗ്രസ് കാഞ്ഞിരപ്പള്ളി ബ്ലോക്ക് പ്രസിഡന്‍റ് പി. ജീരാജ് അധ്യക്ഷത വഹിച്ചു. ഡിസിസി പ്രസിഡന്‍റ് നാട്ടകം സുരേഷ് മുഖ്യപ്രഭാഷണം നടത്തി. കെപിസിസി അംഗം തോമസ് കല്ലാടൻ, കോൺഗ്രസ് കറുകച്ചാൽ ബ്ലോക്ക് പ്രസിഡന്‍റ് മനോജ് തോമസ്, ഡിസിസി ജനറൽ സെക്രട്ടറിമാരായ പി.എ. ഷെമീർ, പ്രഫ. റോണി കെ. ബേബി, ഷിൻസ് പീറ്റർ, സുഷമാ ശിവദാസ്, യുഡിഎഫ് കൺവീനർ ജിജി അഞ്ചാനി, കോൺഗ്രസ് മണ്ഡലം പ്രസിഡന്‍റുമാരായ ജോജി മാത്യു, ബിജു പത്യാല, സേവ്യർ മൂലകുന്ന്, എസ്.എം. സേതുരാജ്, സാലു പി. മാത്യു, അജിത അനിൽ, ഷെറിൻ സലിം, ജോൺസൺ ഇടത്തിനകം തുടങ്ങിയവർ പ്രസംഗിച്ചു.

ലോക സാമൂഹികമാധ്യമ ദിനത്തിൽ ജോർജിയൻ റേഡിയോക്കു തുടക്കം

ചുങ്കപ്പാറ: സെന്‍റ് ജോർജ് ഹൈസ്കൂളിൽ സ്കൂൾ ഗ്രീൻ സ്റ്റുഡിയോയുടെയും മീഡിയ ക്ലബ്ബിന്‍റെയും ആഭിമുഖ്യത്തിൽ ജോർജിയൻ റേഡിയോക്ക് തുടക്കമായി. സ്കൂൾ റേഡിയോ പ്രക്ഷേപണത്തിന്‍റെ ഉദ്ഘാടനം ഹെഡ്മാസ്റ്റർ വർഗീസ് ജോസഫ് റേഡിയോയിലൂടെ ആദ്യ സന്ദേശം നൽകി നിർവഹിച്ചു. സാമൂഹിക മാധ്യമങ്ങളുടെ നന്മയാർന്ന ഉപയോഗം കുട്ടികൾക്കു മനസിലാക്കാനുള്ള അവസരമാണ് സ്കൂളിൽ ക്രമീകരിക്കുന്നതെന്ന് ഹെഡ്മാസ്റ്റർ പറഞ്ഞു. കുട്ടികൾതന്നെ റേഡിയോ ജോക്കിയായി റേഡിയോ നിയന്ത്രിക്കുന്നു. സ്റ്റുഡിയോ കോ-ഓർഡിനേറ്റർ ലൈജു കോശി മാത്യു, അനി മാത്യു, ദീപ അഗസ്റ്റിൻ എന്നിവരാണ് നേതൃത്വം നൽകുന്നത്.

ചെറിയമഠത്തില്‍ വലിയ യാക്കോബ് കത്തനാർ സ്മാരക മന്ദിരം ഉദ്ഘാടനം ചെയ്തു

പുളിക്കല്‍കവല: വാഴൂര്‍ പള്ളി സ്ഥാപകനായ ചെറിയമഠത്തില്‍ വലിയ യാക്കോബ് കത്തനാര്‍ സ്മാരക മന്ദിരത്തിന്‍റെ ഉദ്ഘാടനം ബസേലിയോസ് മാര്‍ത്തോമ്മാ മാത്യൂസ് തൃതീയന്‍ കാതോലിക്കാ ബാവ നിര്‍വഹിച്ചു. കൂദാശയ്ക്ക് മാടാംകുന്നേല്‍ എം.കെ. ഫിലിപ്പ് കോര്‍ എപ്പിസ്‌കോപ്പ, ഫാ. ബിറ്റു കെ. മാണി, ഫാ. മര്‍ക്കോസ് മര്‍ക്കോസ്, ഫാ. ജേക്കബ് ഫിലിപ്പോസ്, ഫാ. ജോമോന്‍ ചെറിയാന്‍ എന്നിവര്‍ സഹകാര്‍മികത്വം വഹിച്ചു. സണ്‍ഡേസ്‌കൂള്‍ പഠനകേന്ദ്ര നിര്‍മാണത്തിന് പൂര്‍വ വിദ്യാര്‍ഥിയായ കാതോലിക്കാ ബാവ ആദ്യ സംഭാവന നല്‍കി. നിര്‍മാണത്തിന് നേതൃത്വം നല്‍കിയവരെ സമ്മേളനത്തില്‍ ബാവ ആദരിച്ചു. വികാരി ഫാ. അലക്‌സ് തോമസ്, സഹവികാരി ഫാ. ജോണ്‍ സ്‌കറിയ, ട്രസ്റ്റി എം.എ. അന്ത്രയോസ്, സെക്രട്ടറി രാജന്‍ ഐസക് എന്നിവര്‍ നേതൃത്വം നല്‍കി.

അനുവാദം നൽകിയാൽ ബസ് സ്റ്റാൻഡ് റോഡ് നവീകരിക്കാൻ തയാറെന്ന് ബസുടമകൾ

കാഞ്ഞിരപ്പള്ളി: ബസ് സ്റ്റാൻഡ് റോഡിന്‍റെ ശോച്യാവസ്ഥയെക്കുറിച്ചു പറയുന്പോൾ പഞ്ചായത്തും ദേശീയപാത വിഭാഗവും പരസ്പരം കൈയൊഴിയുകയാണെന്നും അനുവാദം നൽകിയാൽ പണം മുടക്കി കോൺക്രീറ്റ് ചെയ്തു നവീകരിക്കാൻ തയാറാണെന്നും ബസുടമകൾ. ദേശീയപാതയിൽനിന്നു കാഞ്ഞിരപ്പള്ളി ബസ് സ്റ്റാൻഡിലേക്കു പ്രവേശിക്കുന്നതും ഇറങ്ങുന്നതുമായ റോ‍ഡിലെ കോൺക്രീറ്റിംഗും ഓടയ്ക്കു മീതെയുള്ള സ്ലാബുകളും തകർന്ന് ബസുകൾക്ക് കേടുപാടുകൾ പതിവായതോടെയാണ് ബസുടമകൾ ഇക്കാര്യം അറിയിച്ചത്. കോൺക്രീറ്റ് സ്ലാബുകൾ തകർന്നു കമ്പികൾ ഉയർന്നു നിൽക്കുന്നത് കാൽനട യാത്രികർക്ക് അപകട സാധ്യതയും ബസുകൾക്കു കേടുപാടും ഉണ്ടാക്കുകയാണ്. ഇന്നലെ കാഞ്ഞിരപ്പള്ളി-ഈരാറ്റുപേട്ട റൂട്ടിലോടുന്ന "അനസ് മോൻ' എന്ന സ്വകാര്യ ബസിന്‍റെ അടിവശം ഇടിച്ച് പിൻഭാഗത്തെ ബ്രേക്ക് ലൈറ്റ് ഉൾപ്പെടെയുള്ള ഒരു ഭാഗം തകർന്നു. ഇരുപതിനായിരത്തോളം രൂപയുടെ നഷ്ടമുണ്ടായതായി ഉടമ ഹബീബി കരീം പറഞ്ഞു. കഴിഞ്ഞ ദിവസം സ്റ്റാൻഡിലെ വ്യാപാരി കടയടച്ച് സ്കൂട്ടറിൽ വീട്ടിലേക്കു പോകുന്ന വഴി ഓടയിലെ വിടവിൽ വീണ് സ്കൂട്ടറിന് കാര്യമായ കേടുപാടുണ്ടായി. പഞ്ചായത്തിൽ പരാതിപ്പെടുമ്പോൾ ദേശീയപാത വിഭാഗമാണ് ഇവിടെ നവീകരണം നടത്തേണ്ടതെന്നും, ദേശീയപാത വിഭാഗത്തിൽ പരാതിപ്പെടുമ്പോൾ പഞ്ചായത്താണ് പണികൾ നടത്തേണ്ടതെന്നും പറഞ്ഞ് അധികൃതർ പരസ്പരം കൈയൊഴിയുകയാണെന്നും ബസ് ഉടമകളും ജീവനക്കാരും ആരോപിക്കുന്നു. മുൻപ് ദിവസങ്ങളോളം ബസ് സ്റ്റാൻഡ് അടച്ചിട്ട് ചെയ്ത് നവീകരണം നടത്തിയപ്പോൾ കവാടത്തിൽ ബസ് ഉടമകൾ പണം മുടക്കി കോൺക്രീറ്റ് ചെയ്തിരുന്നതായും ഇവർ പറയുന്നു. ബസ് സ്റ്റാൻഡ് കുറച്ചു ദിവസം അടച്ചിട്ട് സഹകരിക്കുകയാണെങ്കിൽ തങ്ങൾ പണം മുടക്കി ഇവിടെ കോൺക്രീറ്റ് ചെയ്തു നവീകരിക്കാൻ തയാറാണെന്നും ബസുടമകൾ പറയുന്നു. കോൺക്രീറ്റ് ചെയ്ത ശേഷം അതിനു മുകളിലാണ് ടാറിംഗ് നടത്തിയത്. മുകളിലത്തെ ടാറിംഗും അടിയിലെ കോൺക്രീറ്റിംഗും തകർന്ന നിലയിലായി. ഇതോടെ ബസുകൾക്ക് ദേശീയപാതയിലേക്കു പ്രവേശിക്കാനും ഇറങ്ങാനും ബുദ്ധിമുട്ടായി. കഷ്ടിച്ച് ഒരു ബസിനു മാത്രം കടന്നുപോകാൻ കഴിയുന്ന ഭാഗത്തെ കോൺക്രീറ്റിംഗാണു തകർന്ന് കുഴികളായത്. ഇതോടെ ഇവിടെ അപകടസാധ്യതയും വർധിച്ചു. ബസുകൾ കടന്നുപോകുമ്പോൾ കുഴികളിൽ ചാടിയും ബസിന്‍റെ അടിവശം ഇടിച്ചും റോഡ് കൂടുതൽ തകരുന്ന സ്ഥിതിയാണ്.

തൊഴിലധിഷ്ഠിത - സംരംഭകത്വ പരിപാടികളുമായി സെന്‍റ് ഡൊമിനിക്സ് കോളജും ബ്ലോക്ക് പഞ്ചായത്തും

കാഞ്ഞിരപ്പള്ളി: സെന്‍റ് ഡൊമിനിക്സ് കോളജും കാഞ്ഞിരപ്പള്ളി ബ്ലോക്ക് പഞ്ചായത്തും സംയുക്തമായി തൊഴിലധിഷ്ഠിത - സംരംഭകത്വ പരിപാടികള്‍ നടപ്പിലാക്കാൻ തീരുമാനിച്ചു. ഒരു വിദ്യാര്‍ഥി തന്‍റെ പഠനത്തോടൊപ്പം പാര്‍ട്ട്ടൈം ജോലിചെയ്ത് പഠനത്തിനാവശ്യമായ തുക കണ്ടെത്താനുള്ള തൊഴിലധിഷ്ഠിത പദ്ധതികള്‍ ബ്ലോക്ക് പഞ്ചായത്ത് ഈ വര്‍ഷത്തെ പദ്ധതിയിലൂടെ നടപ്പിലാക്കുമെന്ന് വൈസ് പ്രസിഡന്‍റ് ജോളി മടുക്കക്കുഴി പറഞ്ഞു. വ്യവസായ വാണിജ്യവകുപ്പ് സംഘടിപ്പിച്ച എംഎസ്എംബി ദിനാഘോഷ പരിപാടികള്‍ ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം. ഒഴിവുദിവങ്ങളില്‍ ബ്ലോക്ക് പഞ്ചായത്ത് പദ്ധതിയിലൂടെ ‌കോളജ് തലത്തില്‍ ബ്യൂട്ടീഷന്‍, എംബ്രോയ്ഡറി, ഫുഡ് ടെക്നോളജി, മൊബൈല്‍ സര്‍വീസ് എന്നീ കോഴ്സുകൾ നടത്തുമെന്ന് അദ്ദേഹം പറഞ്ഞു. കോളജ് പ്രിന്‍സിപ്പൽ ഡോ. സീമോന്‍ തോമസ് അധ്യക്ഷത വഹിച്ച യോഗത്തില്‍ ട‌ഫ്കോ കമ്പനിയുടെ സിഇഒ കെ.സി. സുമോദ് മുഖ്യപ്രഭാഷണം നടത്തി. വ്യവസായവകുപ്പ് ഓഫീസര്‍ കെ.കെ. ഫൈസല്‍ പദ്ധതികള്‍ വിശദീകരിച്ചു. വനിതാ സംരംഭകരായ സഫ്ന അമല്‍, സബി ജോസഫ്, ജിജി തോമസ്, സെറീന, ഇഡി ക്ലബ് കോ-ഓര്‍ഡിനേറ്റര്‍ റാണി അല്‍ഫോന്‍സ ജോസ് തുടങ്ങിയവര്‍ പ്രസംഗിച്ചു. വിദ്യാര്‍ഥികളുമായി സംരംഭകര്‍ സംവാദം നടത്തി. വിദ്യാര്‍ഥികളുടെ പുതിയ ആശയങ്ങളും യോഗത്തില്‍ ചര്‍ച്ച ചെയ്തു.

സൂംബ പരിശീലനത്തിന്‍റെ പേരിലുള്ള വിവാദം അനാവശ്യം: കത്തോലിക്ക കോൺഗ്രസ്

പൊടിമറ്റം: ലഹരിവിരുദ്ധ കാന്പയിനിന്‍റെ ഭാഗമായി സംസ്ഥാനത്തെ പൊതുവിദ്യാലയങ്ങളിൽ സൂംബ നൃത്ത പരിശീലനം നടത്താനുള്ള വിദ്യാഭ്യാസവകുപ്പിന്‍റെ നിർദേശത്തെച്ചൊല്ലി ഉയർന്നിട്ടുള്ള വിവാദങ്ങൾ അനാവശ്യവും അപലപനീയവുമാണെന്ന് കത്തോലിക്ക കോൺഗ്രസ്‌ കാഞ്ഞിരപ്പള്ളി രൂപത ഡയറക്ടർ ഫാ. ജസ്റ്റിൻ മതിയത്ത്. കത്തോലിക്ക കോൺഗ്രസ് പൊടിമറ്റം യൂണിറ്റിന്‍റെ ആഭിമുഖ്യത്തിൽ സംഘടിപ്പിച്ച സ്നേഹാദരവ് പ്രോഗ്രാം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. സൂംബ, എയ്റോബിക്സ്, യോഗ തുടങ്ങിയ കായികഇനങ്ങളെ സദുദ്ദേശ്യപരമായി മാത്രം കണ്ടാൽ മതി. കത്തോലിക്ക കോൺഗ്രസ് പൊടിമറ്റം യൂണിറ്റിന്‍റെ നേതൃത്വത്തിൽ കഴിഞ്ഞ രണ്ടുമാസമായി സൂംബപരിശീലനം വിജയകരമായി നടത്തിവരുന്നുണ്ട്. യോഗത്തിൽ പത്താം ക്ലാസ്, പ്ലസ്ടു, ഡിഗ്രി പരീക്ഷകളിൽ വിജയികളായ പൊടിമറ്റം ഇടവകയിലെ മുഴുവൻ കുട്ടികളെയും പൊടിമറ്റം സെന്‍റ് മേരീസ് പള്ളിയിൽ അക്കൗണ്ടന്‍റായി 44 വർഷത്തെ സേവനത്തിനുശേഷം വിരമിച്ച തോമസ് കെ. മാണി കിഴക്കേത്തലയ്ക്കലിനെയും ആദരിച്ചു. വികാരി ഫാ. മാർട്ടിൻ വെള്ളിയാംകുളം അനുഗ്രഹപ്രഭാഷണം നടത്തി. യൂണിറ്റ് പ്രസിഡന്‍റ് സെബാസ്റ്റ്യൻ കൊല്ലക്കൊമ്പിൽഅധ്യക്ഷത വഹിച്ചു. കത്തോലിക്ക കോൺഗ്രസ് ഗ്ലോബൽ വൈസ് പ്രസിഡന്‍റ് ജോമി കൊച്ചുപറമ്പിൽ, രൂപത ജനറൽ സെക്രട്ടറി ജോസഫ് പണ്ടാരക്കളം, രൂപത വൈസ് പ്രസിഡന്‍റ് ഡെയ്സി ജോർജുകുട്ടി, പിആർഒ ബോബി കെ. മാണി കിഴക്കേത്തലയ്ക്കൽ എന്നിവർ പ്രസംഗിച്ചു.

അനുസ്മരണവും എൻഡോവ്‌മെന്‍റ് വിതരണവും

എലിക്കുളം: പൈക കൈരളി ഗ്രന്ഥശാലയിൽ ദീർഘകാലം പ്രസിഡന്‍റായിരുന്ന ഒ.എൻ. വാസുദേവൻ നമ്പൂതിരിയെയും സെക്രട്ടറിയായിരുന്ന പി.ജെ. ജോസഫിനെയും അനുസ്മരിച്ച് സമ്മേളനം നടത്തി. വിവിധ എൻഡോവ്‌മെന്‍റുകൾ വിതരണം ചെയ്തു. മാണി സി. കാപ്പൻ എംഎൽഎ ഉദ്ഘാടനം ചെയ്തു. ഗ്രന്ഥശാലാ പ്രസിഡന്‍റ് ടോമി തെക്കേൽ അധ്യക്ഷത വഹിച്ചു. എലിക്കുളം പഞ്ചായത്ത് പ്രസിഡന്‍റ് ജിമ്മിച്ചൻ ഈറ്റത്തോട്ട് മുഖ്യപ്രഭാഷണം നടത്തി. പഞ്ചായത്തംഗങ്ങളായ മാത്യൂസ് പെരുമനങ്ങാട്, സിനി ജോയ്, ജയിംസ് ജീരകത്ത്, താലൂക്ക് ലൈബ്രറി കൗൺസിൽ സെക്രട്ടറി ജോർജ് സെബാസ്റ്റ്യൻ, കെ.ആർ. മന്മഥൻ, ജിമ്മിച്ചൻ പാംപ്ലാനി, എസ്. സന്ദീപ് ലാൽ, ജിം ജയിംസ്, റെജി ആയിലിക്കുന്നേൽ, ഷാജി പന്തലാനി എന്നിവർ പ്രസംഗിച്ചു.

ഫ്‌ളവര്‍ മിൽ തൊഴിലാളി കാറിടിച്ച് മരിച്ചു

പാലാ: റോഡ് മുറിച്ചുകടക്കുന്നതിനിടെ കാറിടിച്ച് ഫ്‌ളവര്‍ മിൽ തൊഴിലാളി മരിച്ചു. വെള്ളിയേപ്പള്ളി ഇടയാറ്റുകര കൊട്ടാരത്തില്‍ കെ.വി. ജോര്‍ജ് (56) ആണ് മരിച്ചത്. ഇന്നലെ രാവിലെ 8.30ഓടെ പാലാ-പൊന്‍കുന്നം റോഡില്‍ പന്ത്രണ്ടാംമൈലിലാണ് അപകടം. പന്ത്രണ്ടാംമൈല്‍ സെന്‍റ് മേരീസ് ഫ്‌ളവര്‍ മില്ലിലെ ജീവനക്കാരനായിരുന്നു. രാവിലെ മില്ല് തുറക്കാന്‍ എത്തുമ്പോള്‍ മില്ലിന് സമീപത്തുവച്ചാണ് പാലാ ഭാഗത്തേക്ക് വന്ന വാഹനം ഇടിച്ചത്. പാലാ ജനറല്‍ ആശുപത്രിയില്‍ പ്രവേശിപ്പിച്ചെങ്കിലും മരണം സംഭവിച്ചു. സംസ്‌കാരം ഇന്നു രാവിലെ 11ന് പാലാ കത്തീഡ്രലില്‍. ഭാര്യ അംബിക കൊണ്ടാട് കാഞ്ഞിരക്കാട്ട് കുടുംബാംഗം. മക്കള്‍: അപര്‍ണ, അരുണ്‍.

സ്വച്ഛതാ പഖ്വാദാ കാമ്പയിന്‍ പാലായില്‍

പാലാ: മാലിന്യ നിര്‍മാര്‍ജനവും ശുചിത്വവും പ്രോത്സാഹിപിക്കാനായി കേന്ദ്രസര്‍ക്കാര്‍ നടത്തുന്ന ബോധവത്കരണ പ്രവര്‍ത്തനമായ സ്വച്ഛതാ പഖ്വാദാ പദ്ധതികളുടെ പ്രചരണ കാമ്പയിന്‍ പാലാ ചാവറ സിഎംഐ പബ്ലിക് സ്‌കൂളില്‍ നാളെ രാവിലെ 9.30ന് നടത്തും. പൊതുമേഖലാ എണ്ണക്കമ്പനികളുടെ സഹകരണത്തോടെ രാജ്യവ്യാപകമായി നടത്തപ്പെടുന്ന സ്വച്ഛതാ പഖ്വാദ പദ്ധതിയുടെ ഈ വര്‍ഷത്തെ കാമ്പയിന്‍ 15 വരെയാണ് നടക്കുന്നത്. ചാവറ പബ്ലിക് സ്‌കൂള്‍ അങ്കണത്തില്‍ വൃക്ഷത്തൈ നട്ടും ശുചീകരണ സന്ദേശം നല്‍കിയും പരിപാടിയുടെ ഉദ്ഘാടനം കേന്ദ്ര സഹമന്ത്രി സുരേഷ് ഗോപി നിര്‍വഹിക്കും. വിദ്യാര്‍ഥികള്‍ക്ക് വൃക്ഷത്തൈകള്‍ സമ്മാനിക്കും. ഭാരത് പ്രെട്രോളിയം കോര്‍പറേഷന്‍ ലിമിറ്റഡ് ചീഫ് എക്‌സിക്യൂട്ടീവ് ഡയറക്ടര്‍ എം. ശങ്കര്‍ അധ്യക്ഷത വഹിക്കുന്ന യോഗത്തില്‍ സ്‌കൂള്‍ പ്രിന്‍സിപ്പല്‍ ഫാ. സാബു കൂടപ്പാട്ട്, ബിപിസിഎല്‍ കമ്പനി ചീഫ് ജനറല്‍ മാനേജര്‍ ജോര്‍ജ് തോമസ്, പാലാ ബ്രില്യന്‍റ് സ്റ്റഡി സെന്‍റർ ഡയറക്ടര്‍ ജോര്‍ജ് തോമസ്, വൈസ് പ്രിന്‍സിപ്പല്‍ ഫാ. പോള്‍സണ്‍ സിഎംഐ, വിദ്യാര്‍ഥി പ്രതിനിധി ദേവിക നായര്‍ തുടങ്ങിയവര്‍ പ്രസംഗിക്കും. സമ്മേളനത്തിൽ ചാവറ പബ്ലിക് സ്‌കൂളിലെ വിദ്യാര്‍ഥികളുടെ കലാവേദിയായ സര്‍ഗസംഗമത്തിനും സുരേഷ് ഗോപി തിരിതെളിക്കും.

ദമ്പതിമാരെ മരിച്ച നിലയില്‍ കണ്ടെത്തിയ സംഭവം: പിന്നില്‍ ബ്ലേഡ് മാഫിയ ഭീഷണിയെന്ന് സൂചന

രാമപുരം: രാമപുരം സ്വദേശികളായ ദമ്പതികളെ ഈരാറ്റുപേട്ടയ്ക്കു സമീപം പനയ്ക്കപ്പാലത്ത് വാടക വീടിനുള്ളില്‍ മരിച്ചനിലയില്‍ കണ്ടെത്തിയ സംഭവത്തിനു പിന്നില്‍ ബ്ലേഡ് മാഫിയ സംഘങ്ങളുടെ ഭീഷണിയെന്ന് സംശയം. കഴിഞ്ഞ ദിവസം ബ്ലേഡ് മാഫിയ സംഘാംഗങ്ങളായ ചില യുവാക്കള്‍ വീട്ടിലെത്തി ഭീഷണി മുഴക്കിയെന്നും വിഷ്ണുവിനെ മര്‍ദിച്ചുവെന്നും പോലീസിന് സൂചന ലഭിച്ചിട്ടുണ്ട്. ബന്ധക്കളുടെയും അടുത്ത സുഹൃത്തുക്കളുടെയും മൊഴി പോലീസ് ശേഖരിച്ചു വരികയാണ്. ജോലിയുടെ ആവശ്യവുമായി ബന്ധപ്പെട്ട് ഹോസ്റ്റലില്‍ താമസിച്ചിരുന്ന വിഷ്ണുവിന്‍റെ ഭാര്യയെ അവിടെയെത്തി അവഹേളിക്കുമെന്നും ഈ സംഘം ഭീഷണി മുഴക്കിയതായും കുടുംബാംഗങ്ങള്‍ വ്യക്തമാക്കുന്നുണ്ട്. വിഷ്ണുവിനൊപ്പം ജീവനൊടുക്കിയ ഭാര്യ രശ്മി ഈരാറ്റുപേട്ടയിലെ സ്വകാര്യ ആശുപത്രിയില്‍ നഴ്‌സിംഗ് സൂപ്രണ്ടാണ്. കെട്ടിട നിര്‍മാണ കരാറുകാരനായിരുന്ന വിഷ്ണു കോവിഡിന് ശേഷം സാമ്പത്തിക പ്രതിസന്ധി അനുഭവിച്ചിരുന്നതായും ബന്ധുക്കള്‍ പറഞ്ഞു. ബ്ലേഡ് മാഫിയ സംഘങ്ങളുടെ കെണിയില്‍പ്പെട്ട ഇയാള്‍ നിരന്തരമായ ഭീഷണിക്കും വിധേയനായിരുന്നു. ചെറുകിട കരാറുകള്‍ ഏറ്റെടുത്ത് തന്നാലാവും വിധം ബ്ലേഡ് മാഫിയ സംഘങ്ങള്‍ക്ക് പലിശ നല്‍കി മുന്‍പോട്ട് പോകവേയാണ് കടുത്തുരുത്തി കേന്ദ്രീകരിച്ച് പ്രവര്‍ത്തിക്കുന്ന ബ്ലേഡ് സംഘം സമ്മര്‍ദ്ദം ശക്തമാക്കിയതും ഭീഷണി മുഴക്കിയതും മര്‍ദിച്ചതെന്നുമാണ് ബന്ധുക്കളും അടുത്ത സുഹൃത്തുക്കളും പറയുന്നത്. രാമപുരം മണ്ഡലം യൂത്ത് കോണ്‍ഗ്രസ് കമ്മിറ്റി അധ്യക്ഷന്‍ എന്ന നിലയില്‍ വിഷ്ണു പൊതുപ്രവര്‍ത്തന രംഗത്ത് സജീവമായിരുന്നു. നിലവില്‍ യൂത്ത് കോണ്‍ഗ്രസ് നിയോജകമണ്ഡലം കമ്മിറ്റി ജനറല്‍ സെക്രട്ടറിയാണെങ്കിലും സാമ്പത്തിക പ്രതിസന്ധിയെത്തുടര്‍ന്ന് പൊതുപ്രവര്‍ത്തനങ്ങള്‍ക്ക് ഇടവേള നല്‍കി ബിസിനസ് തിരികെ പിടിക്കാനുള്ള ശ്രമത്തിലായിരുന്നു ഈ യുവാവ്. ഇരുവരുടെയും മൃതദേഹങ്ങള്‍ ഇന്നു രാവിലെ ഒന്‍പതിന് കൂടപ്പുലത്തുള്ള വീട്ടിലെത്തിക്കും. സംസ്‌കാരം ഉച്ചകഴിഞ്ഞ് രണ്ടിന് വീട്ടുവളപ്പില്‍.

പ്രളയഭീഷണിയില്‍നിന്നു മീനച്ചില്‍ നദീതീരം സംരക്ഷിക്കപ്പെടണം: സിന്പോസിയം

പാലാ: മീനച്ചിലാറ്റിലെ വെള്ളപ്പൊക്കം നിയന്ത്രിക്കുന്നതിന്‍റെ ഭാഗമായി ചെളിയും മണ്ണും നീക്കം ചെയ്യുന്ന പദ്ധതിയില്‍ കൂടുതല്‍ കടവുകളെ ഉള്‍പ്പെടുത്തണമെന്ന് ജോസ് കെ. മാണി എംപി ആവശ്യപ്പെട്ടു. വെള്ളപ്പൊക്ക നിയന്ത്രണത്തിന് പുതുവഴികള്‍ എന്ന വിഷയത്തില്‍ കേരളാ കോണ്‍ഗ്രസ്-എം ജില്ലാ കമ്മിറ്റിയുടെ നേതൃത്വത്തില്‍ നടന്ന മേഖലാതല സിമ്പോസിയം പാലായില്‍ ഉദ്ഘാടനം ചെയ്യുകയായിരുന്നു അദ്ദേഹം. അടിക്കടി ഉണ്ടാവുന്ന വെള്ളപ്പൊക്കം നിയന്ത്രിക്കുന്നതിന്‍റെ ഭാഗമായി മീനിച്ചിലാറ്റിലെ പതിനൊന്ന് കടവുകളിലെയും അഞ്ച് ചെക്ക് ഡാമുകളിലെയും ചെളിയും മണ്ണും നീക്കുന്നതിന് ഇതിനോടകം ടെന്‍ഡര്‍ ക്ഷണിച്ചു കഴിഞ്ഞു. ഈ പദ്ധതിയില്‍ കൂടുതല്‍ കടവുകളെയും ചെക്ക്ഡാമുകളെയും തോടുകളെയും ഉള്‍പ്പെടുത്തണമെന്നാണ് ആവശ്യം ഉയര്‍ന്നത്. മീനച്ചില്‍ നദീതടത്തില്‍ തുടര്‍ച്ചയായി ഉണ്ടാവുന്ന പ്രളയഭീഷണികളില്‍നിന്നു പാലാ നഗരപ്രദേശത്തെയും മീനച്ചില്‍ നദീതടത്തെയും സംരക്ഷിക്കാന്‍ മുന്‍ഗണനാ പദ്ധതി ഉണ്ടാവണമെന്ന് സിമ്പോസിയത്തില്‍ പങ്കെടുത്തവര്‍ ആവശ്യപ്പെട്ടു. നിയോജകമണ്ഡലം പ്രസിഡന്‍റ് ടോബിന്‍ കെ. അലക്‌സ് അധ്യക്ഷത വഹിച്ചു. ജലസേചന വകുപ്പ് എൻജിനിയര്‍ സാം പോള്‍ ഏബ്രഹാം, മുനിസിപ്പല്‍ ചെയര്‍മാന്‍ തോമസ് പീറ്റര്‍, സെന്‍റര്‍ ഫോര്‍ കണ്‍സ്യൂമര്‍ എഡ്യൂക്കേഷന്‍ ഡയറക്ടര്‍ ജയിംസ് വടക്കന്‍, വ്യാപാരി വ്യവസായി നേതാക്കന്മാരായ ഔസേപ്പച്ചന്‍ തകടിയേല്‍, അനൂപ് ജോര്‍ജ്, ബ്രില്യന്‍റ് സ്റ്റഡി സെന്‍റര്‍ ഡയറക്ടര്‍ സെബാസ്റ്റ്യന്‍ ജി. മാത്യു, സോണറ്റ് കട്ടിക്കാനാല്‍, ജയ്‌സണ്‍ മാന്തോട്ടം, സാജോ പൂവത്താനി, ബെന്നി തെരുവത്ത് തുടങ്ങിയവര്‍ പ്രസംഗിച്ചു. വിവിധ സംഘടനകളുടെ പ്രതിനിധികള്‍, വ്യാപാരികള്‍, ജനപ്രതിനിധികള്‍ തുടങ്ങിയവര്‍ പങ്കെടുത്തു. സിംബോസിയത്തില്‍ ഉയര്‍ന്നുവരുന്ന ആശയങ്ങള്‍ കൂടി ഉള്‍ക്കൊള്ളിച്ച് സമഗ്രമായ പദ്ധതിരേഖ മുഖ്യമന്ത്രിയുടെ അധ്യക്ഷതയില്‍ നദീതട സംരക്ഷണവും വെള്ളപ്പൊക്ക നിയന്ത്രണവും ഉറപ്പുവരുത്തുന്നതിനായി രൂപീകരിച്ചിട്ടുള്ള ഉന്നതാധികാര സമിതി മുമ്പാകെ സമര്‍പ്പിക്കും.

ഡോക്‌ടേഴ്സ് ഡേ ആഘോഷവും അവാര്‍ഡ് ദാനവും

പാലാ: ഇന്ത്യന്‍ മെഡിക്കല്‍ അസോസിയേഷന്‍ പാലാ ബ്രാഞ്ചിന്‍റെ നേതൃത്വത്തില്‍ ഡോക്‌ടേഴ്സ് ഡേ ആഘോഷവും അവാര്‍ഡ് ദാനവും ഇന്നു രാത്രി എട്ടിന് പാലാ ഐഎംഎ ഹാളില്‍ നടത്തുമെന്ന് പ്രസിഡന്‍റ് ഡോ. കുര്യന്‍ ജോസഫ് പത്രസമ്മേളനത്തില്‍ അറിയിച്ചു. ഡോക്‌ടേഴ്സ് ഡേ സ്പെഷല്‍ അംഗീകാര അവാര്‍ഡ് ജോസ് കെ. മാണി എംപിക്ക് സമ്മാനിക്കും. ഡോക്ടര്‍മാരുടെ ക്ഷേമത്തിന് അദ്ദേഹം നല്‍കിയ പിന്തുണയ്ക്കുള്ളതാണ് അവാര്‍ഡ്. ഡോ. പി.ജെ. ജോസിന് ബെസ്റ്റ് ഡോക്‌ടര്‍ അവാര്‍ഡ് സമ്മാനിക്കും. കോട്ടയം മെഡിക്കല്‍ കോളജിലെ മുന്‍ മെഡിസിന്‍ വകുപ്പ് മേധാവി ഡോ. ആര്‍.എന്‍. ശര്‍മ്മ സമ്മേളനം ഉദ്ഘാടനം ചെയ്ത് അവാര്‍ഡുകള്‍ സമ്മാനിക്കും. ഐഎംഎ പാലാ പ്രസിഡന്‍റ് ഡോ. കുര്യന്‍ ജോസഫ് അധ്യക്ഷത വഹിക്കും. പാലാ മേഖലയിലെ വിവിധ ആശുപത്രികളില്‍നിന്നുള്ള ഡോക്‌ടര്‍മാര്‍, സംഘടന അംഗങ്ങള്‍, സാമൂഹിക പ്രവര്‍ത്തകര്‍ എന്നിവര്‍ ചടങ്ങില്‍ പങ്കെടുക്കും.

പാലാ സ്റ്റേഡിയം നവീകരണം ആരംഭിച്ചു; ഒന്‍പതു മാസംകൊണ്ട് പൂര്‍ത്തിയാക്കും

പാലാ: പാലാ മുനിസിപ്പല്‍ സ്റ്റേഡിത്തിന്‍റെ നവീകരണ പ്രവര്‍ത്തനങ്ങള്‍ ആരംഭിച്ചു. കായികവകുപ്പ് മന്ത്രി വി. അബ്ദുറഹ്‌മാന്‍ ഉദ്ഘാടനം നിർവഹിച്ചു. കായികവകുപ്പ് എന്‍ജിനിയറിംഗ് വിഭാഗത്തിന്‍റെ നേതൃത്വത്തില്‍ നടപ്പാക്കുന്ന ട്രാക്ക് നവീകരണം ഒന്‍പത് മാസത്തിനകം പൂര്‍ത്തീകരിച്ച് തുറന്നുകൊടുക്കാനാണ് ലക്ഷ്യമിടുന്നതെന്ന് അദ്ദേഹം പറഞ്ഞു. കായികമേഖലയുമായി ബന്ധപ്പെട്ട് തൊഴിലവസരങ്ങള്‍ ഒരുക്കാന്‍ ലക്ഷ്യമിട്ട് സ്പോര്‍ട്സ് ഇക്കോണമി പദ്ധതി നടപ്പാക്കുമെന്ന് മന്ത്രി പറഞ്ഞു. വിദേശ രാജ്യങ്ങളുടെ സഹകരണത്തോടെ പുതിയ പരിശീലന പരിപാടികളും അടിസ്ഥാന സൗകര്യ വികസനവും ഒരുക്കിവരികയാണ്. ഇതിലൂടെ കായിക രംഗത്ത് കൂടുതല്‍ മുന്നേറാനാവും. സ്പോര്‍ട്സ് ഇക്കോണമി പ്രോജക്‌ടിലൂടെ 10,000 തൊഴിലവസരങ്ങള്‍ സൃഷ്ടിക്കുമെന്നും മന്ത്രി പറഞ്ഞു. കഴിഞ്ഞ ഒന്‍പത് വര്‍ഷത്തിനിടെ സംസ്ഥാനത്ത് കായികമേഖലയില്‍ 2000 കോടി രൂപയുടെ അടിസ്ഥാന സൗകര്യ വികസനം സര്‍ക്കാര്‍ നടപ്പാക്കി. കായിക പരിശീലനുള്ള അടിസ്ഥാന സൗകര്യ വികസനത്തിന്‍റെ ഭാഗമായി സംസ്ഥാനത്ത് പുതിയ 300 കളിക്കളങ്ങള്‍ ഇതിനകം നിര്‍മിച്ചു. 467 പഞ്ചായത്തുകളിലാണ് മൈതാനങ്ങള്‍ ഉണ്ടായിരുന്നത്. 200 പഞ്ചായത്തുകളില്‍കൂടി പദ്ധതി നടപ്പാക്കുന്നതോടെ സംസ്ഥാനത്തെ മുഴുവന്‍ പഞ്ചായത്തുകളിലും കായികപരിശീലനത്തിനുള്ള അടിസ്ഥാന സൗകര്യം ലഭ്യമാകുമെന്നും ജില്ലാ സ്റ്റേഡിയങ്ങളുടെ നിര്‍മാണം പൂര്‍ത്തീകരിച്ചു വരികയാണെന്നും മന്ത്രി കൂട്ടിച്ചേർത്തു സംസ്ഥാന സര്‍ക്കാര്‍ ഏഴു കോടി രൂപ ചെലവിലാണ് പാലാ മുനിസിപ്പല്‍ സ്റ്റേഡിയത്തിലെ സിന്തറ്റിക്ക് ട്രാക്ക് നവീകരണം നടത്തുന്നത്. മുനിസിപ്പല്‍ സ്റ്റേഡിയം കോംപ്ലക്‌സില്‍ ചേര്‍ന്ന സമ്മേളനത്തില്‍ മാണി സി. കാപ്പന്‍ എംഎല്‍എ അധ്യക്ഷത വഹിച്ചു. ജോസ് കെ. മാണി എംപി, സ്പോര്‍ട്സ് കേരള ഫൗണ്ടേഷന്‍ മേധാവി വി.കെ. അനില്‍കുമാര്‍, നഗരസഭാ ചെയര്‍മാന്‍ തോമസ് പീറ്റര്‍, ഒളിമ്പ്യന്‍ ഷൈനി വിത്സന്‍, വിത്സന്‍ ചെറിയാന്‍, ലാലിച്ചന്‍ ജോര്‍ജ്, സജേഷ് ശശി, പി.എം. ജോസഫ്, പി.കെ. ഷാജകുമാര്‍, ടോബിന്‍ കെ. അലക്സ്, ബെന്നി മൈലാടൂര്‍, ഔസേപ്പച്ചന്‍ തകടിയേല്‍, മായാദേവി, ബിജി ജോജോ, സാവിയോ കാവുകാട്ട്, ബിന്ദു മനു, ജോസ് ജെ. ചീരാംകുഴി, പ്രഫ. സതീഷ് ചൊള്ളാനി എന്നിവര്‍ പ്രസംഗിച്ചു.

ചെത്തിപ്പുഴ സര്‍ഗക്ഷേത്രയില്‍ ജര്‍മന്‍ ഫുഡ് ഫെസ്റ്റ്

ചങ്ങനാശേരി: കുട്ടികള്‍ക്ക് പഠനത്തോടൊപ്പം വിജ്ഞാനവും വിനോദവും പകരുന്നതിനായി സര്‍ഗക്ഷേത്ര അക്കാഡമി സംഘടിപ്പിച്ച ജര്‍മന്‍ ഫുഡ് ഫെസ്റ്റ് ശ്രദ്ധേയമായി. ജര്‍മന്‍ സംസ്‌കാരത്തെ അടിസ്ഥാനമാക്കി സംഘടിപ്പിച്ച ഫുഡ് ഫെസ്റ്റ് വിദ്യാര്‍ഥികള്‍ക്കും അധ്യാപകര്‍ക്കും രക്ഷിതാക്കള്‍ക്കും വേറിട്ടൊരു അനുഭവമായിരുന്നു. ആധുനികവും പരമ്പരാഗതവുമായ ഭക്ഷണവിഭവങ്ങളുടെ വിശദീകരണവും ജര്‍മന്‍ ഭാഷയില്‍ത്തന്നെയായിരുന്നു. പാചകത്തിന്‍റെയും ഭാഷയുടെയും ഒരുമയിലൂടെ ജര്‍മന്‍ സംസ്‌കാരത്തെക്കുറിച്ചും അതിന്‍റെ പാരമ്പര്യത്തെക്കുറിച്ചും പഠിക്കാനുള്ള അപൂര്‍വ അവസരം വിദ്യാര്‍ഥികള്‍ക്ക് സര്‍ഗക്ഷേത്ര ഒരുക്കുകയായിരുന്നു. ഫുഡ് ഫെസ്റ്റ് പൂര്‍ണമായും ജര്‍മന്‍ ഭാഷയില്‍ അവതരിപ്പിക്കാനും അതത് സ്റ്റാളുകള്‍ ജര്‍മന്‍-യൂറോപ്യന്‍ സ്റ്റൈലില്‍ ക്രമീകരിക്കാനും സാധിച്ചു. അക്കാഡമിയിലെ വിദ്യാര്‍ഥികള്‍, അധ്യാപകര്‍, രക്ഷിതാക്കള്‍, സര്‍ഗക്ഷേത്ര സ്റ്റാഫ്സ് എന്നിവര്‍ പങ്കെടുത്തു. ഫെസ്റ്റില്‍ ബ്രോട്ട് (റൊട്ടി), വുര്‍സ്റ്റ് (സോസേജ്), കാര്‍ട്ടോഫെല്‍ സലാറ്റ് (പൊട്ടറ്റോ സാലഡ്), സ്പാറ്റ്‌സല്‍ (ഒരുതരം നൂഡില്‍സ്), പ്രെറ്റ്‌സല്‍, ഷ്‌നിറ്റ്‌സെല്‍ എന്നിവയായിരുന്നു പ്രധാന ഭക്ഷണ വിഭവങ്ങള്‍. ജർമനിയിൽ പഠനത്തിനായും ജോലിക്കായും തയാറെടുക്കുന്ന കുട്ടികള്‍ക്ക് ഇതൊരു മുതല്‍ക്കൂട്ടാണെന്ന് സര്‍ഗക്ഷേത്ര ഡയറക്ടര്‍ ഫാ. അലക്‌സ് പ്രായിക്കളം സിഎംഐ അഭിപ്രായപ്പെട്ടു.

പുതുതായി നിർമിച്ച ഓടയ്ക്കു മുകളിൽ സ്ലാബുകൾ സ്ഥാപിക്കാത്തത് ഭീഷണിയായി

കറുകച്ചാൽ: പുതിയ ഓട നിർമിച്ചത് സ്ലാബിട്ട് മൂടാത്തതിനാൽ അപകടസാധ്യത. പത്തനാട്-കാനം റോഡിൽ പടനിലം സ്‌കൂളിനു സമീപത്താണ് പുതുതായി ഓട നിർമിച്ചത്. എന്നാൽ ഓടയ്ക്ക് മുകളിൽ സ്ലാബുകൾ നിരത്താത്തതിനാൽ വിദ്യാർഥികളടക്കം നൂറുകണക്കിന് ആൾക്കാർ സഞ്ചരിക്കുന്ന ഈ ഭാഗത്ത് അപകടസാധ്യതയേറിയെന്ന് നാട്ടുകാർ പറയുന്നു. റോഡിനോടു ചേർന്നു നിർമിച്ച ഓടയ്ക്കു മുകളിൽ സ്ലാബില്ലാത്തത് കാൽനടയാത്രികർക്കും ബുദ്ധിമുട്ടാണ്. വാഹനങ്ങൾ അപകടത്തിൽപ്പെടാനും സാധ്യതയുണ്ട്.

ചങ്ങനാശേരിയിൽ തഹസില്‍ദാറെ നിയമിച്ച് ഉത്തരവിറങ്ങി

ചങ്ങനാശേരി, തൃക്കൊടിത്താനം, കറുകച്ചാല്‍ വില്ലേജ് ഓഫീസര്‍മാരുടെ നിയമനം നീളുന്നു ചങ്ങനാശേരി: ചങ്ങനാശേരി തഹസില്‍ദാരെ നിയമിച്ച് ഉത്തരവിറങ്ങി. ചങ്ങനാശേരി, തൃക്കൊടിത്താനം, കറുകച്ചാൽ വില്ലേജ് ഓഫീസര്‍മാരുടെ നിയമനം നീളുന്നു. പീരുമേട് തഹസില്‍ദാറായിരുന്ന എസ്.കെ. ശ്രീകുമാറിനെയാണ് ചങ്ങനാശേരി തഹസില്‍ദാറായി നയമിച്ചത്. നിലവിലുണ്ടായിരുന്ന തഹസില്‍ദാര്‍ പി.ടി. സുരേഷ്‌കുമാര്‍ ജൂണ്‍ ഒന്നിന് വിരമിച്ചിരുന്നു. പകരം ആളെ നിയമിക്കാഞ്ഞതുമൂലം എല്‍എ ഡെപ്യൂട്ടി തഹസില്‍ദാര്‍ നിജു കുര്യനാണ് തഹസില്‍ദാറുടെ താത്കാലിക ചുമതല നിര്‍വഹിച്ചിരുന്നത്. പുതിയ തഹസില്‍ദാറായി നിയമിതനായ എസ്.കെ. ശ്രീകുമാര്‍ പീരുമേട് താലൂക്ക് ഓഫീസില്‍നിന്നു റിലീവ് ചെയ്ത് ചങ്ങനാശേരിയിലെത്തുമ്പോള്‍ ഒരാഴ്ച പിടിക്കുമെന്നാണ് സൂചന. ചങ്ങനാശേരി, തൃക്കൊടിത്താനം, കറുകച്ചാല്‍ വില്ലേജ് ഓഫീസുകളിൽ വില്ലേജ് ഓഫീസര്‍മാരെ ഇതുവരെ നിയമിച്ചിട്ടില്ല. ചങ്ങനാശേരി തഹസില്‍ദാറുടെയും താലൂക്കിലെ മൂന്നു വില്ലേജ് ഓഫീസര്‍മാരുടെയും നിയമനം വൈകുന്നതായി കഴിഞ്ഞയാഴ്ച ദീപിക റിപ്പോര്‍ട്ട് ചെയ്തിരുന്നു. വില്ലേജ് ഓഫീസര്‍മാരുടെ നിയമന ഉത്തരവ് പുറത്തിറങ്ങിയെങ്കിലും ഇതില്‍ ഏറെ അപാകതകള്‍ നിറഞ്ഞതിനാല്‍ ഇതു പരിഷ്‌കരിച്ച് ഇറങ്ങാന്‍ കാലതാമസം നേരിടുമെന്നാണ് സൂചന ലഭിക്കുന്നത്. ഡെപ്യൂട്ടി തഹസില്‍ദാറായി സ്ഥാനക്കയറ്റം ലഭിച്ചയാളെ ചങ്ങനാശേരി വില്ലേജ് ഓഫീസറായി നിയമിച്ചതുൾപ്പെടെയുള്ള അപാകതകളാണ് നിയമന ഉത്തരവില്‍ കടന്നുകൂടിയത്. മഴക്കാലമായതിനാല്‍ ദുരിതാശ്വാസ പ്രവര്‍ത്തനങ്ങള്‍ ഏകോപിപ്പിക്കേണ്ട വലിയ ചുമതല വില്ലേജ് ഓഫീസര്‍മാര്‍ക്കുണ്ട്. വാഴപ്പള്ളി കിഴക്ക്, ചെത്തിപ്പുഴ, നെടുംകുന്നം വില്ലേജ് ഓഫീസര്‍മാര്‍ക്കാണ് ചങ്ങനാശേരി, തൃക്കൊടിത്താനം, കറുകച്ചാല്‍ വില്ലേജ് ഓഫീസുകളുടെ അധികച്ചുമതല നല്‍കിയിരിക്കുന്നത്. സ്‌കൂള്‍, കോളജ് പ്രവേശനങ്ങള്‍ക്കായി വേണ്ടിവരുന്ന വരുമാനം, ജാതി, ഇഡബ്ല്യുഎസ്, നോണ്‍ക്രീമിലെയര്‍ സര്‍ട്ടിഫിക്കറ്റുകള്‍ ഉള്‍പ്പെടെ പല സര്‍ട്ടിഫിക്കറ്റുകളും വിദ്യാര്‍ഥികള്‍ക്ക് യഥാസമയം ലഭിക്കുന്നില്ലെന്ന പരാതിയും ഉയര്‍ന്നിട്ടുണ്ട്. സര്‍ക്കാര്‍ കാര്യം മുറപോലെ മാത്രം സര്‍ക്കാര്‍ കാര്യം മുറപോലെ മാത്രമേ നടക്കൂ എന്നു പറയുന്നത് സാധാരണമാണ്. മേയ് 31ന് ഓരോ വകുപ്പിലെയും ഉദ്യോഗസ്ഥര്‍ കൂട്ടത്തോടെ വിരമിക്കുമെന്ന് സര്‍ക്കാരിന്‍റെ വിവിധ മേധാവികള്‍ക്ക് അറിയാവുന്നതാണ്. വിരമിക്കുന്നവര്‍ക്കു പകരം ആളെ നിയമിക്കാത്തത് പ്രതിസന്ധികള്‍ക്കിടയാക്കുമെന്നും സര്‍ക്കാരിനറിയാം. എന്നാല്‍ പ്രമോഷന്‍ നല്‍കിയോ സ്ഥലംമാറ്റം നല്‍കിയോ വിരമിച്ച തസ്തികയില്‍ ഉദ്യോഗസ്ഥരെ നിയമിക്കാന്‍ ബന്ധപ്പെട്ട ഉദ്യോഗസ്ഥ മേധാവികള്‍ ശ്രദ്ധിക്കുകയോ വകുപ്പു മന്ത്രിമാര്‍ ഇതിൽ കര്‍ശന നിലപാടുകള്‍ സ്വീകരിക്കുകയോ ചെയ്യുന്നില്ലെന്ന പരാതി ഉണ്ട്.

കെഎസ്ആര്‍ടിസിയുടെ മണിമല സ്റ്റേ ബസ് പുനരാരംഭിക്കണം

ചങ്ങനാശേരി: ചങ്ങനാശേരി കെഎസ്ആര്‍ടിസി ഡിപ്പോയില്‍നിന്നും രാത്രി 9.40ന് സര്‍വീസ് നടത്തിയിരുന്ന മണിമല സ്റ്റേ ബസ് പുനരാരംഭിക്കണമെന്ന ആവശ്യം ശക്തമാകുന്നു. യാത്രക്കാരുടെ നിരന്തരമായ ആവശ്യത്തെത്തുടര്‍ന്ന് ജോബ് മൈക്കിള്‍ എംഎല്‍എ, ഗവൺമെന്‍റ് ചീഫ് വിപ്പ് ഡോ.എന്‍. ജയരാജ് എന്നിവര്‍ മന്ത്രി ഗണേഷ്‌കുമാറുമായി ബന്ധപ്പെട്ട് ഈ സര്‍വീസ് രണ്ടുമാസം മുമ്പ് പുനരാരംഭിച്ചിരുന്നു. മണിമലയില്‍ ജീവനക്കാര്‍ക്കുള്ള താമസസൗകര്യങ്ങളും ഏര്‍പ്പെടുത്തിയിരുന്നു. എന്നാല്‍, ഒരു മാസം സര്‍വീസ് നടത്തിയശേഷം ഈ ബസ് നിലയ്ക്കുകയായിരുന്നു. വരുമാനം കുറവാണെന്നും ഡ്രൈവര്‍മാരില്ലെന്നും ചൂണ്ടിക്കാട്ടിയാണ് ഡിപ്പോ അധികൃതര്‍ സര്‍വീസ് റദ്ദ് ചെയ്തത്. രാത്രി 9.40ന് ചങ്ങനാശേരിയില്‍നിന്നു പുറപ്പെടുന്ന ബസ് 11ന് മണിമലയില്‍ എത്തിച്ചേരും. പിറ്റേന്ന് പുലർച്ചെ 5.20ന് മണിമലയിൽനിന്ന് ആരംഭിച്ച് 6.30ന് ചങ്ങനാശേരിയില്‍ എത്തുന്ന ബസ് സര്‍വീസ് വ്യാപാരികള്‍, വ്യാപാര സ്ഥാപനങ്ങളിലെ ജീവനക്കാര്‍, ട്രെയിന്‍ യാത്രക്കാര്‍ തുടങ്ങിയവര്‍ക്ക് ഏറെ പ്രയോജനപ്പെട്ടിരുന്നു. ഈ ബസ് ഉച്ചകഴിഞ്ഞ് മൂന്നിന് മുണ്ടക്കയത്ത് പോയി മടങ്ങിയെത്തിയശേഷമാണ് മണിമല സ്റ്റേ സര്‍വീസ് നടത്തിയിരുന്നത്. ഇതിനുപകരം ഉച്ചകഴിഞ്ഞ് മൂന്നിന് ആലപ്പുഴ റൂട്ടിലും തുടര്‍ന്ന് നെടുമുടി, ചമ്പക്കുളം വരെ ഒരു ട്രിപ്പുകൂടി സര്‍വീസ് നടത്തിയശേഷം രാത്രി മണിമല സ്റ്റേ സര്‍വീസിന് അയയ്ക്കണം. മണിമലയില്‍നിന്നു രാവിലെയുള്ള സര്‍വീസ് ആലപ്പുഴ കൃപാസനത്തിലേക്ക് നീട്ടുകയും ചെയ്താല്‍ കണിച്ചുകുളങ്ങര ക്ഷേത്രം, കൃപാസനം ഉള്‍പ്പെടെ ആരാധനാലയങ്ങളിൽ പോകുന്ന വിശ്വാസികള്‍ക്ക് ഉപകരിക്കും. ഇതു ലാഭകരമാകുമെന്നും ഡിപ്പോ അധികൃതര്‍ക്ക് പരിശോധന നടത്താവുന്നതാണെന്നുമാണ് തൊഴിലാളികള്‍തന്നെ ചൂണ്ടിക്കാണിക്കുന്നത്.

തകർന്ന റോഡ് പുനർനിർമിക്കാത്തതിൽ പ്രതിഷേധിച്ച് വേറിട്ട സമരവുമായി യുഡിഎഫ്

മുണ്ടത്താനം: തകർന്ന റോഡ് പുനരുദ്ധരിക്കാത്തതിൽ പ്രതിഷേധിച്ച് യുഡിഎഫിന്‍റെ നേതൃത്വത്തിൽ വ്യത്യസ്ത സമരപാത. കോട്ടയം -പത്തനംതിട്ട ജില്ലകളെ ബന്ധിപ്പിക്കുന്ന പത്തനാട്-കുളത്തൂർമൂഴി റോഡ് തകർന്ന് പല ഭാഗങ്ങളിലും കുഴികൾ രൂപപ്പെട്ട് കാൽനടയാത്രപോലും ദുഷ്കരമായിട്ട് വർഷങ്ങൾ ഏറെയായെങ്കിലും അധികൃതർ റോഡിനോട് തുടരുന്ന അവഗണനയിൽ പ്രതിഷേധിച്ചാണ് യുഡിഎഫ് കങ്ങഴ മണ്ഡലം കമ്മിറ്റിയുടെ നേതൃത്വത്തിൽ സമരം നടത്തിയത്. യാത്ര ദുഷ്കരമായ റോഡിലൂടെ സഞ്ചരിക്കുന്നവർക്കും കാൽനടയാത്രികർക്കും വാഹനങ്ങൾക്കും സ്വീകരണം നൽകിയാണ് വ്യത്യസ്ത സമരരീതി യുഡിഎഫ് അവലംബിച്ചത്. യുഡിഎഫ് കാഞ്ഞിരപ്പള്ളി നിയോജകമണ്ഡലം ചെയർമാൻ സി.വി. തോമസുകുട്ടി ഉദ്ഘാടനം ചെയ്തു. കോൺഗ്രസ് മണ്ഡലം പ്രസിഡന്‍റ് ഷെറിൻ സലിം അധ്യക്ഷത വഹിച്ചു. കേരള കോൺഗ്രസ് മണ്ഡലം പ്രസിഡന്‍റ് ഒ.ജെ. വർഗീസ്, നാസർ കങ്ങഴ, ജമാലുദ്ദീൻ വാഴത്തറ, സണ്ണി മുക്കാട്ട് തുടങ്ങിയവർ പ്രസംഗിച്ചു.

നഗരത്തിലെ വഴിവിളക്കുകള്‍ തെളിഞ്ഞേക്കും, വിഷയം ഇന്ന് കൗണ്‍സിലില്‍

ചങ്ങനാശേരി: നഗരത്തിലെ വഴിവിളക്കുകള്‍ പ്രകാശിക്കുന്നില്ലെന്ന പരാതിക്കു പരിഹാരം കാണാന്‍ നഗരസഭാധികൃതര്‍. നഗരസഭാ സ്റ്റിയറിംഗ് കമ്മിറ്റി ചര്‍ച്ചചെയ്ത ഈ വിഷയം ഇന്നത്തെ നഗരസഭാ കൗണ്‍സില്‍ പരിഗണനയ്ക്കെടുക്കും. വഴിവിളക്കുകളുടെ അറ്റകുറ്റപ്പണികള്‍ നിലവിലുള്ള കരാറുകാരനെക്കൊണ്ട് ചെയ്യിച്ചു പ്രശ്‌നത്തിനു പരിഹാരം കാണാനാണ് നഗരസഭാധികൃതര്‍ ആലോചിക്കുന്നത്. 37 വാര്‍ഡുകളിലെ നൂറുകണക്കിനു വഴിവിളക്കുകള്‍ പ്രകാശിക്കുന്നില്ലെന്ന് നാളുകളായി പരാതി നിലനില്‍ക്കുകയാണ്. നഗരത്തിലെ ഗതാഗതപ്രശ്‌നങ്ങള്‍ പരിഹരിക്കുന്നതിനായി ട്രാഫിക് ഉപദേശക സമിതി വിളിച്ചുചേര്‍ക്കാനുള്ള സ്റ്റിയറിംഗ്കമ്മിറ്റിയുടെ തീരുമാനവും കൗണ്‍സില്‍ യോഗം ചര്‍ച്ചയ്‌ക്കെടുക്കും. മുനിസിപ്പല്‍ നമ്പരില്ലാതെ സര്‍വീസ് നടത്തുന്ന ഓട്ടോറിക്ഷകള്‍ക്കു നിയന്ത്രണം ഏര്‍പ്പെടുത്തണമെന്നും അനധികൃത പാര്‍ക്കിംഗുകള്‍ ഒഴിവാക്കണമെന്നും ടാറിംഗ് പൂര്‍ത്തിയാക്കിയ എന്‍എച്ച് 183(എംസി റോഡില്‍) ഡിവൈഡര്‍, സീബ്രാലൈനുകള്‍ ഉള്‍പ്പെടെ യാത്രക്കാര്‍ക്കുള്ള സുരക്ഷാ സംവിധാനങ്ങള്‍ സ്ഥാപിക്കണമെന്നതും ഉള്‍പ്പെടെയുള്ള ആവശ്യങ്ങൾ ശക്തമാണ്. മുനിസിപ്പല്‍ ടൗണ്‍ഹാളിന്‍റെ ചോര്‍ച്ച പരിഹരിക്കുന്നതിനുള്ള അറ്റകുറ്റപ്പണികള്‍ നടത്തുക, സിഎന്‍ജി പ്ലാന്‍റ് നിര്‍മാണം സംബന്ധിച്ച നടപടികള്‍ക്കു വേഗംകൂട്ടുക തുടങ്ങിയ നടപടികളും കൗണ്‍സില്‍ യോഗം പരിഗണിക്കും.

ദുക്റാന തിരുനാളിന് കൊടിയേറി

ചെമ്പ്: ചെന്പ് സെന്‍റ് തോമസ് കത്തോലിക്ക പള്ളിയിൽ വിശുദ്ധ തോമാശ്ലീഹായുടെ ദുക്റാന തിരുനാളിന് കൊടിയേറി. ഇന്നലെ വൈകുന്നേരം ഭക്തിനിർഭരമായ അന്തരീക്ഷത്തിൽ മാർ ആന്‍റണി കരിയിലിന്‍റെ മുഖ്യകാർമികത്വത്തിലാണ് കൊടിയേറ്റിയത്. വികാരി ഫാ. ഹോർമിസ് തോട്ടക്കര, സഹവികാരി ഫാ. ഷൈജു ആട്ടോക്കാരൻ സിഎംഐ, ഫാ. സെബാസ്റ്റ്യൻ കോനൂപ്പറമ്പൻ, ഫാ. ജെയ്സൺ കൊളുത്തുവള്ളി എന്നിവർ സഹകാർമികത്വം വഹിച്ചു. ജൂലൈ മൂന്നിനാണ് തിരുനാൾ.

അക്കരപ്പാടം ടര്‍ഫ് സ്റ്റേഡിയം ഉദ്ഘാടനം ഇന്ന്

വൈക്കം: സംസ്ഥാന സര്‍ക്കാരിന്‍റെ ഒരു പഞ്ചായത്തില്‍ ഒരു കളിക്കളം പദ്ധതിയില്‍പ്പെടുത്തി നിര്‍മാണം പൂര്‍ത്തീകരിച്ച ഉദയനാപുരം പഞ്ചായത്തിലെ അക്കരപ്പാടം ടര്‍ഫ് സ്റ്റേഡിയത്തിന്‍റെ ഉദ്ഘാടനം ഇന്ന് രണ്ടിന് മന്ത്രി വി. അബ്ദുറഹ്‌മാന്‍ നിര്‍വഹിക്കും. കായിക വകുപ്പിന്‍റെ 50 ലക്ഷം രൂപയും എംഎല്‍എയുടെ ആസ്തിവികസന ഫണ്ടില്‍നിന്നുള്ള 60 ലക്ഷം രൂപ അടക്കം 1.10 കോടി രൂപ വിനിയോഗിച്ചാണ് നിര്‍മാണം പൂര്‍ത്തീകരിച്ചത്. അക്കരപ്പാടം ഗവൺമെന്‍റ് യുപി സ്‌കൂള്‍ ഗ്രൗണ്ടില്‍ നടക്കുന്ന സമ്മേളനതിൽ സി.കെ. ആശ എംഎല്‍എ അധ്യക്ഷത വഹിക്കും. വൈക്കം ബ്ലോക്ക് പഞ്ചായത്ത് പ്രസിഡന്‍റ് എസ്. ബിജു, ജില്ലാ പഞ്ചായത്ത് അംഗം പി.എസ്. പുഷ്പമണി, ഉദയനാപുരം പഞ്ചായത്ത് പ്രസിഡന്‍റ് പി.കെ. ആനന്ദവല്ലി, ബ്ലോക്ക്-ഗ്രാമപഞ്ചായത്ത് അംഗങ്ങള്‍, വിവിധ രാഷ്ട്രീയ പാര്‍ട്ടി പ്രതിനിധികള്‍ എന്നിവര്‍ പങ്കെടുക്കും. വൈക്കം നിയോജക മണ്ഡലത്തില്‍ നിലവില്‍ നിര്‍മാണപ്രവർത്തനങ്ങൾ നടന്നുവരുന്ന സ്റ്റേഡിയങ്ങളില്‍ നിര്‍മാണം പൂര്‍ത്തീകരിച്ച് ഉദ്ഘാടനം ചെയ്യുന്ന ആദ്യ സ്റ്റേഡിയമാണ് അക്കരപ്പാടം ടര്‍ഫ് ഗ്രൗണ്ട്. വെള്ളൂര്‍ പഞ്ചായത്തിലെ ഇറുമ്പയം പെരുന്തട്ട് സ്റ്റേഡിയം നിര്‍മാണത്തിന്‍റെ അവസാനഘട്ടത്തിലാണ്.

ലോക ലഹരിവിരുദ്ധ ദിനം ആചരിച്ചു

കുറുപ്പന്തറ: സെന്‍റ് സേവ്യേഴ്‌സ് വൊക്കേഷണല്‍ ഹയര്‍ സെക്കണ്ടറി സ്‌കൂളില്‍ അഡാര്‍ട്ട്, ലിറ്റില്‍ കൈറ്റ്‌സ്, നാഷണല്‍ സര്‍വീസ് സ്‌കീം സംഘടനകളുടെ സംയുക്താഭിമുഖ്യത്തില്‍ ലഹരിവിരുദ്ധ ദിനാചരണം നടത്തി. കടുത്തുരുത്തി എക്‌സൈസ് ഇന്‍സ്‌പെക്ടര്‍ കെ.എസ്. അനില്‍കുമാര്‍ ഉദ്ഘാടനം ചെയ്തു. മുഖ്യമന്ത്രിയുടെ സന്ദേശവായന, ലഹരിവിരുദ്ധ പ്രതിജ്ഞ, പ്രസംഗം, ലഹരിവിരുദ്ധ ഗാനം, ലഹരി ഉപയോഗത്തിന്‍റെ ദോഷവശങ്ങള്‍ വ്യക്തമാക്കുന്ന സ്‌കിറ്റ്, ഫ്‌ളാഷ് മോബ്, കുട്ടികളുടെ ആരോഗ്യത്തിനും മാനസിക ഉല്ലാസത്തിനുമായി സുംബാ ഡാന്‍സ് തുടങ്ങിയ പ്രവര്‍ത്തനങ്ങളും പരിപാടിയുടെ ഭാഗമായി സംഘടിപ്പിച്ചു. യോഗത്തില്‍ ഹെഡ്മാസ്റ്റര്‍ ജോഷി ജോര്‍ജ്, പ്രിന്‍സിപ്പൽ അനൂപ് കെ. സെബാസ്റ്റ്യന്‍ എന്നിവര്‍ പ്രസംഗിച്ചു. അധ്യാപകരായ ഷിജിമോള്‍ എം.സി., ലിജോയി തോമസ്, ജെറിന്‍ ജോസ്, ധന്യ കെ. ബേബി, ജെയ്‌സി ജയിംസ് എന്നിവര്‍ പരിപാടികള്‍ക്കു നേതൃത്വം നല്‍കി.

യുഡിഎഫ്, ബിജെപി ആരോപണം അടിസ്ഥാനരഹിതം: എസ്. ദേവരാജൻ

തലയാഴം: തലയാഴം സിഡിഎസിനു കീഴിലുള്ള ഒരുമ പ്രൊഡ്യൂസേഴ്സ് ഗ്രൂപ്പ് സംരംഭം തുടങ്ങുന്നതിന് വായ്പ എടുത്തതുമായി ബന്ധപ്പെട്ട് ക്രമക്കേട് നടന്നുവെന്നതരത്തിലുള്ള യുഡിഎഫ്, ബിജെപി പ്രചാരണം വസ്തുതകൾക്കു നിരക്കാത്തതാണെന്ന് സിപിഎം തലയാഴം പഞ്ചായത്ത് പാർലമെന്‍ററി പാർട്ടി നേതാവ് എസ്. ദേവരാജൻ. 20 അംഗങ്ങളുള്ള പ്രൊഡ്യൂസേഴ്സ് ഗ്രൂപ്പിന് ഒരു ലക്ഷം രൂപയാണ് കുടുംബശ്രീ ജില്ലാ മിഷനിൽനിന്ന് അനുവദിച്ചത്. സംരംഭം തുടങ്ങുന്നതിനായി സെക്യൂരിറ്റി നൽകി വാടകയ്ക്ക് എടുത്ത മുറി നവീകരിക്കുന്നതിനും വൈദ്യുതികരിക്കുന്നതിനും 49,200 രൂപ ചെലവഴിച്ചു. 40, 800 രൂപ സാധന സാമഗ്രികൾ വാങ്ങുന്നതിനാണ് വിനിയോഗിക്കുന്നത്. ബാക്കി തുക അക്കൗണ്ടിൽത്തന്നെയുണ്ട്. കെട്ടിടത്തിന്‍റെ നവീകരണത്തിനും വൈദ്യുതി കണക്‌ഷൻ ലഭിക്കുന്നതിലും വന്ന കാലതാമസമാണ് പദ്ധതി ആരംഭിക്കുന്നത് വൈകാൻ ഇടയാക്കിയതെന്നും അദ്ദേഹം പറഞ്ഞു.

അങ്കണവാടി വർക്കർ നിയമനങ്ങൾ മാനദണ്ഡം പാലിച്ചാണെന്ന് എൽഡിഎഫ്

വെള്ളൂർ: വെള്ളൂർ പഞ്ചായത്തിലെ അങ്കണവാടി, വർക്കർ നിയമനങ്ങൾ നടന്നത് മാനദണ്ഡങ്ങൾ പാലിച്ചു സുതാര്യമായാണെന്ന് എൽഡിഎഫ് പഞ്ചായത്ത് കമ്മിറ്റി. ഉദ്യോഗാർഥികളുടെ സർട്ടിഫിക്കറ്റ് പരിശോധനയും അഭിമുഖ പരീക്ഷയും സാമൂഹിക ക്ഷേമ വകുപ്പിന്‍റെ നിയന്ത്രണത്തിൽ പൂർത്തിയാക്കി 2024 ഫെബ്രുവരിയിൽ 42 പേരുടെ ചുരുക്കപ്പട്ടിക പ്രസിദ്ധികരിച്ചു. തുടർന്ന് ഈ ലിസ്റ്റിൽനിന്ന് വിവിധ ഘട്ടങ്ങളിലായി വർക്കർ തസ്തികയിലേക്ക് മൂന്നു സ്ഥിരനിയമനവും രണ്ടു താത്കാലിക നിയമനവും ഹെൽപ്പർ തസ്തിയിലേക്ക് ഒരു സ്ഥിരനിയമനവും ഒരു താത്രാലിക നിയമനവുമാണ് കഴിഞ്ഞ ഒന്നര വർഷക്കാലത്തിനിടയിൽ നടന്നത്. മുഴുവൻ നിയമനങ്ങളും റാങ്ക് ലിസ്റ്റിൽനിന്ന് സംവരണ മാനദണ്ഡങ്ങൾ പാലിച്ചുകൊണ്ടാണ് നടന്നത്. 2027 ജനുവരി മാസം വരെ ഈ റാങ്ക് ലിസ്റ്റിന് കാലാവധിയുണ്ട്. തുടർന്ന് വരുന്ന ഒഴിവുകളിലേക്കും ഈ റാങ്ക് ലിസ്റ്റിൽനിന്നാണ് നിയമനം നടക്കേണ്ടത്. യാഥാർഥ്യം ഇതായിരിക്കേ ഒന്നര വർഷം മുമ്പ് പ്രസിദ്ധികരിച്ച റാങ്ക് ലിസ്റ്റിൽ നാളിതുവരെ യാതൊരു ആക്ഷേപവും ഉന്നയിക്കാത്ത യുഡിഎഫ് നേതൃത്വം ആരോപണവുമായി ഇപ്പോൾ രംഗത്തു വന്നത് തികച്ചും രാഷ്ട്രീയ പ്രേരിതമാണെന്ന് എൽഡിഎഫ് വെള്ളൂർ പഞ്ചായത്ത് കൺവീനർ ടി.വി. ബേബി ആരോപിച്ചു.

വാട്ടര്‍ പ്യൂരിഫയറിന്‍റെ ഉദ്ഘാടനം

തുരുത്തിപ്പള്ളി: സെന്‍റ് ജോര്‍ജ് എല്‍പി സ്‌കൂളിലേക്ക് പിഎസ്ഡബ്യൂഎസ് സ്നാപക സ്വാശ്രയ സംഘം സ്‌പോണ്‍സര്‍ ചെയ്ത വാട്ടര്‍ പ്യൂരിണ്ടഫയറിന്‍റെ ഉദ്ഘാടനം സ്‌കൂള്‍ മാനേജര്‍ ഫാ. അഗസ്റ്റിന്‍ പീടികമലയില്‍ നിര്‍വഹിച്ചു. ഇതോടൊപ്പം പഠനോപകരണങ്ങളും യൂണിറ്റിന്‍റെ നേതൃത്വത്തില്‍ വാങ്ങി നല്‍കി. പ്രധാനാധ്യാപകന്‍ ഷൈജു പി. വര്‍ഗീസ്, പിടിഎ പ്രസിഡന്‍റ് ജോണിച്ചന്‍ പൂമരത്തേല്‍, പിഎസ്ഡബ്യൂഎസ് യൂണിറ്റ് പ്രസിഡന്‍റ് പയസ് ജോര്‍ജ് കുര്യാസ്, ജിതിന്‍ ജയിംസ്, ജസ്റ്റിന്‍ ജോസഫ്, സജിമോന്‍ സിറിയക്, വര്‍ഗീസ് പുറമറ്റം, ജോസ് പൂമരം, ജോസുകുട്ടി മേലുകുന്നേല്‍ എന്നിവര്‍ പങ്കെടുത്തു.

മറവൻതുരുത്തിൽ നിരവധി വീടുകളിൽ വെള്ളം കയറി

മറവൻതുരുത്ത്: ഡാമുകൾ തുറന്നതിനെത്തുടർന്ന് കിഴക്കൻവെള്ളത്തിന്‍റെ വരവു ശക്തിപ്പെട്ടതോടെ മറവൻതുരുത്ത്, തലയോലപ്പറമ്പ് പഞ്ചായത്തുകളിലെ പുഴയോരമേഖലകളിലും ഉൾപ്രദേശങ്ങളിലും വെള്ളപ്പൊക്ക ദുരിതമേറുന്നു. മറവൻതുരുത്തിലെ ഇടവട്ടം,പഞ്ഞിപ്പാലം, കൊച്ചുതടം, അറുപതിൽ, ചുങ്കം തുടങ്ങിയ പ്രദേശങ്ങളിലെ നിരവധി വീടുകളും പരിസരപ്രദേശങ്ങളും വഴികളും വെള്ളത്തിൽ മുങ്ങിയിരിക്കുകയാണ്. മറവൻതുരുത്തിലെ മണലേൽ, കുളങ്ങര, കൊച്ചുപുരയ്ക്കൽ കോളനികളും വെള്ളത്തിൽ മുങ്ങി. മണലേൽ കോളനിയിൽ 22 കുടുംബങ്ങളും കുളങ്ങരയിൽ 28ഉം കൊച്ചുപുരയ്ക്കൽ കോളനിയിൽ16 കുടുംബങ്ങളുമാണ് വെള്ളപ്പൊക്കദുരിതം പേറുന്നത്.

പുല്ലും പായലും നിറഞ്ഞ് തോടുകള്‍ :പ്രതിസന്ധിയെ കരളുറപ്പോടെ നേരിട്ട് യുവസംരംഭകന്‍

കടുത്തുരുത്തി: പ്രതിസന്ധികളെ കരളുറപ്പോടെ നേരിട്ട് യുവസംരംഭകന്‍. പുല്ലും പായലും നിറഞ്ഞ് തോടുകള്‍. ശിക്കാര ബോട്ടിന് വെള്ളത്തിലൂടെ ഓടണം. സുരേഷ്‌കുമാര്‍ (43) പിന്നെ കാത്തുനിന്നില്ല, തനിച്ചു തോട് വൃത്തിയാക്കി. പുല്ലുവെട്ടാനോ, തോട് തെളിക്കാനോ പണിക്കിറങ്ങിയതല്ല ഇദ്ദേഹം. കല്ലറ പുത്തന്‍പുരയ്ക്കല്‍ പി.ടി. സുരേഷ്‌കുമാര്‍ ജീവിതം കരുപ്പിടിപ്പിക്കാനുള്ള ശ്രമത്തിന്‍റെ ഭാഗമായാണ് തോടും പുഴയും തെളിക്കുന്നത്. അധികാരികളോടു പറഞ്ഞിട്ട് ഫലമില്ലാതായതോടെ തന്‍റെ ജീവിതമാര്‍ഗം അടഞ്ഞുപോകാതിരിക്കാനുള്ള വഴിതുറക്കുന്നതിനുവേണ്ടി നടത്തുന്ന യുവസംരംഭകന്‍റെ പരിശ്രമമാണിത്. ഉള്‍നാടന്‍ തോടുകളിലിറങ്ങിയുള്ള മീന്‍പിടിത്തമായിരുന്നു സുരേഷ്‌കുമാറിന്‍റെ തൊഴില്‍. തോടുകളിലൂടെയും പുഴകളിലൂടെയും സഞ്ചരിച്ചപ്പോള്‍ കണ്ട ഗ്രാമീണഭംഗി മനസില്‍ പതിഞ്ഞതോടെ ഇതു എല്ലാവരെയും കാണിക്കാമെന്നായി സുരേഷിന്‍റെ ചിന്ത. നാടിന്‍റെ സൗന്ദര്യം പുറംലോകമറിയട്ടെ. ഇതിലൂടെ ടൂറിസത്തിനു സാധ്യതയുണ്ടല്ലോയെന്ന് കരുതിയാണ് ശിക്കാര ബോട്ട് വാങ്ങാന്‍ സുരേഷ് തീരുമാനിച്ചത്. പിഎംഇജിപി പദ്ധതിയിലൂടെ 10 ലക്ഷം രൂപ വായ്പയെടുത്തും സുഹൃത്തുക്കളില്‍നിന്നും ബന്ധുക്കളില്‍നിന്നും കടംവാങ്ങിയ 4.5 ലക്ഷം ഉള്‍പ്പെടെ 15 ലക്ഷം രൂപയുടെ ശിക്കാര ബോട്ട് 2024 മാര്‍ച്ചില്‍ വാങ്ങി. പത്തു പേര്‍ക്ക് സഞ്ചരിക്കാവുതാണ് ബോട്ട്. ആദ്യത്തെ എട്ടു മാസം പ്രതിദിനം 3,000 മുതല്‍ 4,000 രൂപ വരെ വരുമാനമുണ്ടായിരുന്നു. ബാങ്ക് വായ്പയും എല്ലാമാസവും കൃത്യമായി അടഞ്ഞുപോയിരുന്നു. ഇതിനിടെ ബോട്ട് യാത്ര നടത്തിയിരുന്ന തോടുകളിലും പുഴകളിലും പുല്ലും പായലും നിറയാന്‍ തുടങ്ങി. ക്രമേണ ബോട്ടിന് സഞ്ചരിക്കാനാവാതെ വന്നു. നാലു മാസമായി ബോട്ട് കല്ലറ-ഇടയാഴം റോഡിനു സമീപം വിളക്കുമരം ഭാഗത്ത് കെവി കനാലില്‍ കെട്ടിയിട്ടിരിക്കുകയാണ്. നാലു മാസമായി വായ്പ കുടിശിഖയായി. വായ്പാ തിരിച്ചടവ് മുടങ്ങിയതോടെ ബാങ്ക് നടപടികളിലേക്കു കടക്കുന്ന അവസ്ഥയാണ്. തോട് വൃത്തിയാക്കാനായി ഇറിഗേഷന്‍, പഞ്ചായത്ത് തുടങ്ങി നിരവധി സര്‍ക്കാര്‍ ഓഫീസുകളില്‍ സുരേഷ്‌കുമാര്‍ കയറിയിറങ്ങി. ഒരിടത്തുനിന്നും നടപടിയുണ്ടാകാതെ വന്നപ്പോഴാണ് ഇദ്ദേഹം ബോട്ടില്‍ തന്‍റെ സഹായിയായിരുന്ന എസ്. സനല്‍കുമാറിനെയും കൂട്ടി തോട് തെളിക്കാനിറങ്ങിയത്. ചിലയിടങ്ങളില്‍ പൂര്‍ണമായും തെളിക്കാനായെങ്കിലും അതിനു പറ്റാത്ത സ്ഥലങ്ങളില്‍ ബോട്ടുകള്‍ക്കും വള്ളങ്ങള്‍ക്കും പോകാവുന്ന വിധത്തില്‍ തോടുകളിലെ പുല്ലും പായലും നീക്കം ചെയ്തതായി സുരേഷ്‌കുമാര്‍ പറഞ്ഞു. കഴിഞ്ഞ 37 ദിവസം കൊണ്ട് സുരേഷും സഹായി ഉദയന്തറ സനല്‍കുമാറും ചേര്‍ന്ന് വൃത്തിയാക്കിയത് 14 കിലോമീറ്റര്‍ ദൂരം തോടാണ്. മണിയാപറമ്പ് മുതല്‍ കല്ലറ വിളക്കുമരം വരെ ഒമ്പതു കിലോമീറ്ററും കൈപ്പുഴയാറിനു സമീപത്തുനിന്നു (കുറുപ്പന്തറ കടവ്-മുടക്കാലി-മണിയാപറമ്പ് തോട്) മാഞ്ഞൂര്‍ പാണ്ഡന്‍കരി വരെയുള്ള അഞ്ചു കിലോമീറ്റര്‍ ദൂരവും ഇതിനോടകം തെളിച്ചു. വിളക്കുമരം മുതല്‍ പാലച്ചുവടു വരെയുള്ള ഒന്നര കിലോമീറ്റര്‍ ഇനിയും തെളിക്കാനുണ്ടെന്ന് സുരേഷ്‌കുമാര്‍ പറഞ്ഞു. അതുകൂടി തെളിച്ചെടുത്താല്‍ വീണ്ടും സഞ്ചാരികളുമായി കാഴ്ചകള്‍ കണാന്‍ പോകാമെന്നും അതിലൂടെ വരുമാനം നേടി ജീവിതപ്രതിസന്ധി പരിഹരിക്കാനാകുമെന്ന പ്രതീക്ഷയിലാണ് സുരേഷ്‌കുമാര്‍. തനിക്കു മാത്രമല്ല ഇതിലൂടെ പ്രയോജനമുണ്ടാകുന്നതെന്നും മറ്റ് തോണിയാത്രക്കാര്‍ക്കും കര്‍ഷകര്‍ക്കും മത്സ്യത്തൊഴിലാളികള്‍ക്കും തോടു തെളിഞ്ഞതിന്‍റെ നേട്ടമുണ്ടാകുമെുന്നം സുരേഷ് പറയുന്നു. ഷീനയാണ് സുരേഷിന്‍റെ ഭാര്യ.

എക്‌സലന്‍സ് അവാര്‍ഡ്

ഏറ്റുമാനൂര്‍: അമലഗിരി ബികെ കോളജ് എന്‍എസ്എസ് യൂണിറ്റിന്‍റെ നേതൃത്വത്തില്‍ നിര്‍മിക്കുന്ന 25-ാമത് സ്‌നേഹവീടിന്‍റെ തറക്കല്ലിടില്‍ നടത്തി. ഏറ്റുമാനൂര്‍ റോട്ടറി ക്ലബ്ബുമായി സഹകരിച്ചാണ് ഈ വര്‍ഷത്തെ ഭവനനിര്‍മാണ പദ്ധതി. തറക്കല്ലിടീല്‍ ചടങ്ങില്‍ ഏറ്റുമാനൂര്‍ മുന്‍സിപ്പല്‍ ചെയര്‍ പേഴ്‌സണ്‍ ലൗലി ജോര്‍ജ്, റോട്ടറി അസിസ്റ്റന്‍റ് ഡിസ്ട്രിക്റ്റ് ഗവര്‍ണര്‍ ഡോ. ടെസി കുര്യന്‍, ഏറ്റുമാനൂര്‍ ലയണ്‍സ് ക്ലബ് പ്രസിഡന്‍റ് അന്‍വര്‍ മുഹമ്മദ്, സെകട്ടറി ടോം, എന്‍എസ്എസ് പ്രോഗ്രാം ഓഫീസര്‍മാരായ മെല്‍ബി, ഡോ. സിസ്റ്റര്‍ പ്രിന്‍സി തുടങ്ങിയവര്‍ പങ്കെടുത്തു. എന്‍എസ്എസ് കഴിഞ്ഞ രണ്ടു വര്‍ഷമായി നടത്തുന്ന സേവനപ്രവര്‍ത്തനങ്ങളുടെ ഭാഗമായി റോട്ടറിയുടെ ഈ വര്‍ഷത്തെ വൊക്കേഷണല്‍ എക്‌സലന്‍സ് അവാര്‍ഡ് എന്‍എസ്എസ് പ്രോഗ്രാം ഓഫീസര്‍മാരായ മെല്‍ബി ജേക്കബ്, ഡോ. സിസ്റ്റര്‍ പ്രിന്‍സി എന്നിവര്‍ക്ക് ഏറ്റുമാനൂര്‍ മുന്‍സിപ്പല്‍ ചെയര്‍പേഴ്‌സണ്‍ ലൗലി ജോര്‍ജ് സമ്മാനിച്ചു.

കർഷകരുടെയും ടാപ്പിംഗ് തൊഴിലാളികളുടെയും കടങ്ങൾക്ക് സാവകാശം നൽകണമെന്ന്

പാമ്പാടി: തുടർച്ചയായ മഴ മൂലം റബർ വെട്ടും ഉത്പാദനവും മുടങ്ങി പ്രയാസപ്പെടുന്ന ചെറുകിട കർഷകരുടെയും ടാപ്പിംഗ് തൊഴിലാളികളുടെയും വിവിധ ബാങ്കുകളിലെ വായ്പാ തിരിച്ചടവിന് നാലു മാസമെങ്കിലും സാവകാശം നൽകണമെന്ന് എൻസിപി-എസ് സംസ്ഥാന ജനറൽ സെക്രട്ടറി കെ.ആർ. രാജൻ. എൻസിപി-എസ് പുതുപ്പളളി നിയോജക മണ്ഡലം നിർവാഹകസമിതി യോഗം പാമ്പാടിയിൽ ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം. നിയോജക മണ്ഡലം പ്രസിഡന്‍റ് മാത്യു അധ്യക്ഷത വഹിച്ചു. ബാബു കപ്പക്കാല, റെജി കൂരോപ്പട, രാധാകൃഷ്ണൻ ഓണമ്പിള്ളി, ബിജു തോമസ് എന്നിവർ പ്രസംഗിച്ചു.

നിരണം തീര്‍ഥാടനം ആറിന്; സ്വാഗതസംഘം ഓഫീസ് തുറന്നു

ചങ്ങനാശേരി: അതിരൂപതാ യുവദീപ്തി-എസ്എംവൈഎമ്മിന്‍റെ ആഭിമുഖ്യത്തില്‍ ജൂലൈ ആറിന് സംഘടിപ്പിക്കുന്ന നിരണം തീര്‍ഥാടനത്തിനുള്ള സ്വാഗതസംഘം ഓഫീസ് പാസ്റ്ററല്‍ സെന്‍ററില്‍ തുറന്നു. അതിരൂപത ഡയറക്ടര്‍ ഫാ. സാവിയോ മാനാട്ട് ഉദ്ഘാടനം ചെയ്തു. അതിരൂപത പ്രസിഡന്‍റ് അരുണ്‍ ടോം അധ്യക്ഷത വഹിച്ചു. അസിസ്റ്റന്‍റ് ഡയറക്ടര്‍ ഫാ. ടോണി പുതുവീട്ടില്‍ക്കളം, ഡെപ്യൂട്ടി പ്രസിഡന്‍റ് എലിസബത്ത് വര്‍ഗീസ്, ജനറല്‍ സെക്രട്ടറി ക്രിസ്റ്റി കെ. കുഞ്ഞുമോന്‍, ട്രഷറര്‍ സെബാസ്റ്റ്യ ൻ മഞ്ഞുമ്മേല്‍, കണ്‍വീനര്‍മാരായ ക്രിസ്റ്റിന്‍ സേവ്യര്‍, ലൂസി ഫിലിപ്പോസ്, ഡെന്നി, റിയ റ്റോജി എന്നിവര്‍ പ്രസംഗിച്ചു.

ജൈത്രയാത്ര തുടരുന്ന മാന്നാനം കെഇ സ്കൂൾ ചരിത്രം സൃഷ്ടിക്കുന്നു: മന്ത്രി വാസവൻ

മാന്നാനം: നിശ്ചയദാർഢ്യവും ലക്ഷ്യബോധവും കഠിനാധ്വാനവും കൈമുതലാക്കിയ കുര്യാക്കോസ് ഏലിയാസ് ഇംഗ്ലീഷ് മീഡിയം സ്കൂൾ വിദ്യാർഥികൾ ഓരോ വർഷവും ചരിത്രം സൃഷ്ടിക്കുന്നുവെന്ന് മന്ത്രി വി.എൻ. വാസവൻ. സ്കൂളിൽ നടന്ന എക്സലൻഷ്യ-2025 ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. കെഇ സ്കൂൾ പ്രിൻസിപ്പൽ റവ.ഡോ. ജയിംസ് മുല്ലശേരി സിഎംഐ അധ്യക്ഷത വഹിച്ചു. ചടങ്ങിൽ 2025ൽ അഖിലേന്ത്യാതല മത്സരപരീക്ഷകളിൽ ഉന്നത റാങ്കുകളും എസ്എസ്എൽസി, എച്ച്എസ്ഇ, ഐസിഎസ്‌സി, ഐഎസ്‌സി ബോർഡ് പരീക്ഷകളിൽ മികച്ചവിജയവും നേടിയ വിദ്യാർഥികളെ ആദരിച്ചു. ചലച്ചിത്ര സംവിധായകനും നടനുമായ ജോണി ആന്‍റണി വിശിഷ്ടാതിഥിയായിരുന്നു. മാന്നാനം സെന്‍റ് ജോസഫ്സ് ആശ്രമം പ്രിയോർ റവ.ഡോ. കുര്യൻ ചാലങ്ങാടി സിഎംഐ, കെഇ റെസിഡന്‍റ്സ് പ്രീഫെക്ട് ഫാ. ഷൈജു സേവ്യർ സിഎംഐ, ബർസാർ ഫാ. ബിബിൻ ഒറ്റത്തങ്കൽ സിഎംഐ, പാലാ ബ്രില്യന്‍റ് സ്റ്റഡി സെന്‍റർ ഡയറക്ടർ സെബാസ്റ്റ്യൻ ജി. മാത്യു, പിടിഎ പ്രസിഡന്‍റ് അഡ്വ. ജയ്സൺ ജോസഫ്, വൈസ് പ്രസിഡന്‍റ് ഇന്ദു പി. നായർ, വൈസ് പ്രിൻസിപ്പൽമാരായ ഷാജി ജോർജ്, റോയ് മൈക്കിൾ തുടങ്ങിയവർ സന്നിഹിതരായിരുന്നു. ഉന്നതവിജയം കരസ്ഥമാക്കിയ കുട്ടികളുടെ മാതാപിതാക്കളുടെ പ്രതിനിധിയായി ഡോ. നിഷ സി.കെ. പ്രസംഗിച്ചു. അഖിലേന്ത്യ പരീക്ഷയായ ജെഇഇ അഡ്വാൻസിൽ കേരളത്തിൽ ഒന്നാമതെത്തിയ അക്ഷയ് ബിജു, നീറ്റ് പരീക്ഷയിൽ ഒന്നാമതെത്തിയ ഷെഫിൻ മൻസൂർ കെ.പി., ഐഐഎസ്ഇആർ (ഐഎടി) അഖിലേന്ത്യാ തലത്തിൽ ഒന്നാമതെത്തിയ ജെസ്‌വിൻ കുര്യാക്കോസ് എന്നിവർ അവരുടെ സ്കൂൾദിന ഓർമകൾ പങ്കുവച്ചു. പ്ലസ് ടു പരീക്ഷയിൽ മുഴുവൻ മാർക്ക് നേടിയ അതിരമ്പുഴ സെന്‍റ് അലോഷ്യസ് എച്ച്എസ്എസ് വിദ്യാർഥിനി അനീഷ ജോഷിയേയും അനുമോദിച്ചു. അഖിലേന്ത്യാ തലത്തിൽ നടത്തുന്ന ജെഇഇ അഡ്വാൻസ്, നീറ്റ് പരീക്ഷകളിൽ ഉന്നതറാങ്കുകൾ കരസ്ഥമാക്കിയ വിദ്യാർഥികളെയും ബോർഡ് പരീക്ഷകളിൽ മികച്ച വിജയം കൈവരിച്ച 270 ൽ പരം വിദ്യാർഥികളെയും ചടങ്ങിൽ ആദരിച്ചു.

മെഡിക്കൽ കോളജ് ആശുപത്രിയിലെ ഡോക്ടർമാരുടെ ഒഴിവ് നികത്തണം

ഗാന്ധിനഗർ: മെഡിക്കൽ കോളജ് ആശുപത്രി സർജറി വിഭാഗം അടക്കമുള്ള വിഭാഗങ്ങളിലെ ഒഴിവുകളിൽ ഡോക്ടർമാരേയും നേഴ്‌സുമാരേയും നിയമിക്കാൻ സർക്കാർ സത്വരനടപടി സ്വീകരിക്കണമെന്ന് ജില്ലാ വികസനസമിതിയിൽ ടി.വി. സോണി അവതരിപ്പിച്ച പ്രമേയം സർക്കാരിനോടാവശ്യപ്പെട്ടു. ആർപ്പൂക്കര കരിപ്പുത്തട്ട് ഗവൺമെന്‍റ് ഹൈസ്കൂളിൽ അപകടാവസ്ഥയിൽ ഊട്ടുപുരയോടു ചേർന്നുനിൽക്കുന്ന മരം മുറിക്കാൻ അടിയന്തര നടപടി സ്വീകരിക്കണമെന്ന ആവശ്യത്തിന്മേൽ വികസനസമിതി യോഗം മരം മുറിക്കാനും തീരുമാനം കൈകൊണ്ടു. യോഗത്തിൽ കളക്‌ടർ ജോൺ സാമുവൽ അധ്യക്ഷത വഹിച്ചു.

ചെറുപുഷ്പ മിഷൻ ലീഗ് പ്രവർത്തനവർഷ ഉദ്ഘാടനവും എയ്ഞ്ചൽസ് മീറ്റും നടത്തി

കോട്ടയം: കോട്ടയം മേഖലയിലെ ചെറുപുഷ്പ മിഷൻ ലീഗിന്‍റെ പ്രവർത്തന വർഷ ഉദ്ഘാടനവും വിശുദ്ധ കുർബാന സ്വീകരണം നടത്തിയ കുട്ടികളുടെ സംഗമവും നടത്തി. കോട്ടയം ലൂർദ് ഫൊറോന പള്ളിയിൽ സംഘടിപ്പിച്ച പരിപാടിയിൽ എയ്ഞ്ചൽ സക്കറിയ അധ്യക്ഷത വഹിച്ചു. ലൂർദ് ഫൊറോന പള്ളി വികാരി ഫാ. ജേക്കബ് വട്ടക്കാട്ട് ഉദ്ഘാടനം നിർവഹിച്ചു. അതിരൂപത ഡയറക്ടർ ഫാ. വർഗീസ് പുത്തൻപുരയ്ക്കൽ മുഖ്യപ്രഭാഷണം നടത്തി. ഫാ. ജോസഫ് പാറയ്ക്കൽ, സിസ്റ്റർ സിനി തടത്തേൽ, ഫാ. സേവ്യർ ഇലവുംമൂട്ടിൽ, ഫാ. ഹെൻറി കോയിൽപ്പറമ്പിൽ, ജെറിൾ രാജേഷ്, രോഹൻ ബെന്നി, അമ്മനുവേൽ മാത്യു ജേക്കബ് എന്നിവർ പ്രസംഗിച്ചു.

തൃക്കോതമംഗലം സെന്‍റ് ജയിംസ് ഓര്‍ത്തഡോക്സ് പള്ളിയില്‍ മോഷണം

പുതുപ്പള്ളി: പുതുപ്പള്ളി തൃക്കോതമംഗലം സെന്‍റ് ജയിംസ് ഓര്‍ത്തഡോക്സ് പള്ളിയില്‍ മോഷണം. പള്ളിയിലെ ഓഫീസ് മുറിയും, വൈദികന്‍റെ മുറിയും കുത്തിത്തുറന്ന മോഷ്ടാവ് ഓഫിസ് മുറിയില്‍ സൂക്ഷിച്ചിരുന്ന 12 സ്വര്‍ണത്താലികള്‍ കവര്‍ന്നു. പള്ളിയില്‍ മൃതസംസ്‌കാരം നടത്തിയ സ്ത്രീകളുടെ സ്വര്‍ണത്താലികളാണ് ഓഫീസില്‍ സൂക്ഷിച്ചിരുന്നത്. പള്ളിയുടെ നിര്‍മാണപ്രവര്‍ത്തനങ്ങള്‍ നടന്നിരുന്ന സ്റ്റോര്‍ മുറിയില്‍നിന്നു തൊഴിലാളിയുടെ മുണ്ടും കാണാതായിട്ടുണ്ട്. ഈ മുണ്ട് പിന്നീട് പള്ളിയുടെ ശവക്കോട്ടയില്‍നിന്നു കണ്ടെത്തുകയും ചെയ്തു. ഇന്നലെ പുലര്‍ച്ചെ പള്ളി തുറക്കാന്‍ എത്തിയ കപ്യാരാണ് വൈദികന്‍റെ മുറി തുറന്നുകിടക്കുന്നതു കണ്ടത്. തുടര്‍ന്ന് പള്ളി സെക്രട്ടറിയെ ഫോണില്‍ വിളിച്ചു വിവരമറിയിച്ചു. ഇതിനു ശേഷം നടത്തിയ പരിശോധനയിലാണ് ഓഫീസ് മുറിയും സമാനരീതിയില്‍ കുത്തിത്തുറന്നതായി കണ്ടെത്തിയത്. തുടന്നു പോലീസില്‍ വിവരമറിയിച്ചു. കോട്ടയം ഈസ്റ്റ് എസ്എച്ച്ഒ യു. ശ്രീജിത്തിന്‍റെ നേതൃത്വത്തില്‍ അന്വേഷണം ആരംഭിച്ചു.

ഈ നഗരത്തില്‍ ഒരു ഭരണ സംവിധാനമുണ്ടോ ? തിരുനക്കര ബസ്‌സ്റ്റാന്‍ഡിലെ കുഴികൾ ‘കാണാതെ’ അധികൃതർ

കോട്ടയം: ഈ നഗരത്തില്‍ ഒരു ഭരണ സംവിധാനമുണ്ടോ, നഗരസഭയുടെ മൂക്കിനു താഴയുള്ള തിരുനക്കര ബസ്‌സ്റ്റാന്‍ഡില്‍ രൂപപ്പെട്ട മൂന്നു പാതാളക്കുഴികള്‍ മൂടാന്‍ ഇവിടെയാരുമില്ലേ... കഴിഞ്ഞ കുറേ ദിവസമായി നഗരസഭ ഭരണാധികാരികളോടും ഭരണ-പ്രതിപക്ഷ ഭേദമെന്യേ 52 കൗണ്‍സിലര്‍മാരോടും നഗരവാസികളും ബസ്‌സ്റ്റാന്‍ഡിലെത്തുന്ന യാത്രക്കാരും ചോദിക്കുന്ന ചോദ്യമാണിത്. ഒരു മാസമാകാന്‍ പോകുന്നു ആയിരക്കണക്കിനാളുകള്‍ ദിവസേനയെത്തുന്ന ബസ്‌സ്റ്റാന്‍ഡില്‍ കുഴികള്‍ രൂപപ്പെട്ടിട്ട്. നഗരസഭയുടെ നിയന്ത്രണത്തിലുള്ള ബസ്‌സ്റ്റാന്‍ഡിലെ ഈ കുഴികള്‍ നഗരസഭാധികാരികളുടെ ശ്രദ്ധയില്‍പ്പെട്ടിട്ടും ഒരു കുട്ടമെറ്റലോ മണ്ണോ ഇട്ടു മൂടാന്‍ ഇതുവരെ അധികൃതര്‍ക്കായിട്ടില്ല. ദീപിക ഉള്‍പ്പെടെ മാധ്യമങ്ങള്‍ ചിത്രസഹിതം പലതവണ വാര്‍ത്തകള്‍ കൊടുത്തു. അധികൃതര്‍ക്ക് ഒരനക്കവുമില്ല. മഴ പെയ്താല്‍ കുഴികളിൽ വെള്ളം നിറഞ്ഞ് ബസ്‌സ്റ്റാന്‍ഡ് ചെളിക്കുളം, വെയില്‍ തെളിഞ്ഞാലോ ചെളി ഉണങ്ങി “പൊടി പൂരം’’. ബസ്‌സ്റ്റാന്‍ഡിലേക്ക് ബസുകള്‍ കയറുന്ന ഭാഗത്താണ് ആദ്യ കുഴി. പിന്നെ മധ്യഭാഗത്തായി രണ്ടു കുഴികളും ബസുകള്‍ സ്റ്റാന്‍ഡിലേക്ക് കയറുമ്പോഴേ കുഴികളില്‍ ചാടാതെ വെട്ടിച്ച് പോകാന്‍ തുടങ്ങും. യാത്രക്കാര്‍ തലങ്ങും വിലങ്ങും നടക്കുന്നതിനിടയിലൂടെയാണ് ബസുകളുടെ ഈ പോക്ക്. പലപ്പോഴും യാത്രക്കാര്‍ തലനാരിഴയ്ക്കാണ് രക്ഷപ്പെടുന്നത്. രക്ഷപ്പെട്ടാലും ചെളിവെള്ളത്തിന്‍റെ/പൊടി അഭിഷേകം ഉറപ്പാണ്. ബസ്‌ സ്റ്റാന്‍ഡിലെ യാത്ര ഇത്രയും ദുരിതമായിട്ടും അധികൃതര്‍ ഒരു ചെറുവിരലനക്കാത്തതില്‍ നഗരവാസികള്‍ പ്രതിഷേധത്തിലാണ്. എന്തിനും ഏതിനും സമരത്തിനെത്തുന്ന ഭരണ-പ്രതിപക്ഷ സംഘടനകളും പൊതുപ്രവര്‍ത്തകരും ഇക്കാര്യത്തില്‍ നിസംഗതയാണ് പുലര്‍ത്തുന്നത്.

പുലിപ്പേടിയിൽ കൊങ്ങാട്; ഉറക്കം നഷ്ടപ്പെട്ട് നാട്ടുകാർ

പെരുവന്താനം: പെരുവന്താനം പഞ്ചായത്തിലെ കൊങ്ങാട് മേഖലയും പുലിപ്പേടിയിലേക്ക്. മേഖലയിൽ പുലി ഇറങ്ങിയതായി സംശയം. കഴിഞ്ഞ ദിവസം പ്രദേശവാസിയായ മുണ്ടത്താനം ഫിലിപ്പിന്‍റെ ആടിനെ അജ്ഞാത ജീവി കടിച്ചുകൊന്നനിലയിൽ കണ്ടെത്തി. രാത്രിയിൽ വീടിനോട് ചേർന്നു കെട്ടിയിരുന്ന ആടിനെ കടിച്ചുകൊന്ന് പാതി ഭക്ഷിച്ച നിലയിലാണ് കണ്ടെത്തിയത്. തുടർന്ന് നാട്ടുകാർ വനംവകുപ്പിനെ വിവരം അറിയിച്ചു. സംഭവസ്ഥലത്ത് എത്തിയ വനപാലകർ സ്ഥലം നിരീക്ഷിച്ച് കാമറകൾ സ്ഥാപിച്ചു. പുലിയോ പുലിക്ക് സമാനമായ മറ്റു മൃഗങ്ങളോ ആകാം ആടിനെ കടിച്ചുകൊന്നതെന്നാണ് വനം വകുപ്പിന്‍റെ വിലയിരുത്തൽ. സാധാരണക്കാരായ കർഷക കുടുംബങ്ങൾ മാത്രം അധിവസിക്കുന്ന മേഖലയാണ് കൊങ്ങാട്. പെരുവന്താനം പഞ്ചായത്തിലെ യാത്രാക്ലേശം ഏറ്റവും രൂക്ഷമായ സ്ഥലങ്ങളിൽ ഒന്നുമാണ്. റോഡിന്‍റെ ദുരവസ്ഥ മൂലം യാത്രാദുരിതം അനുഭവിക്കുന്ന പെരുവന്താനം ആനചാരി നിവാസികൾക്ക് യാതൊരു സഹായവും അധികാരികളുടെ ഭാഗത്തുനിന്നു ലഭിക്കുന്നില്ലെന്ന ആക്ഷേപം നിലനിൽക്കുമ്പോഴാണ് പുലിഭീതി കൂടി എത്തുന്നത്. ആടിനെയും പശുവിനെയും വളർത്തുന്ന നിരവധി കർഷകർ പ്രദേശത്തുണ്ട്. കൊങ്ങാട് പുലി ഇറങ്ങിയെന്ന പ്രചാരണത്തിനു പിന്നാലെ സമീപസ്ഥലങ്ങളായ ആനചാരി, അമലഗിരി, അഴങ്ങാട് പ്രദേശങ്ങളിലുള്ളവരും ഭീതിയിലാണ്. സമീപത്തെങ്ങും വനമേഖല ഇല്ലാത്ത ഇവിടെ പുലി എങ്ങനെ എത്തിയെന്ന ചോദ്യവും ബാക്കിയാവുകയാണ്. പെരിയാർ വന്യജീവി സങ്കേതത്തിൽനിന്നു കണയങ്കവയൽ അമലഗിരി പ്രദേശത്തുകൂടി എത്തിയതാണെന്ന നിഗമനവുമുണ്ട്. ഏതാനും മാസം മുമ്പ് അമലഗിരിയിൽ ജനവാസ മേഖലയിൽ കാട്ടാന എത്തിയിരുന്നു. പിന്നീട് വനംവകുപ്പ് തുരത്തി ഓടിക്കുകയായിരുന്നു. മേഖലയിൽ അജ്ഞാത ജീവിയുടെ ആക്രമണം ഉണ്ടായതോടെ ജനങ്ങൾ കടുത്ത ഭീതിയിലാണ്. വനം വകുപ്പിന്‍റെ നിരീക്ഷണം ശക്തമാക്കണമെന്ന ആവശ്യമാണ് ഉയരുന്നത്.

നദികളും തോടുകളും ശുചീകരിച്ചു ജലസംഭരണശേഷി വര്‍ധിപ്പിക്കും

കോട്ടയം: ജില്ലയിലെ നദികളിലും തോടുകളിലും കൈവഴികളിലും അടിഞ്ഞുകൂടിയിരിക്കുന്ന ചെളിയും മണ്ണും മണലും മറ്റ് മാലിന്യങ്ങളും നീക്കം ചെയ്ത് ജലസംഭരണ ശേഷി വര്‍ധിപ്പിക്കുന്നതിനുള്ള നടപടികള്‍ ജലസേചന വകുപ്പിന്‍റെ നേതൃത്വത്തില്‍ ആരംഭിച്ചു. 78 കിലോമീറ്റര്‍ ദൈര്‍ഘ്യം വരുന്ന മീനച്ചിലാറും 92 കിലോമീറ്റര്‍ ദൈര്‍ഘ്യം വരുന്ന മണിമലയാറും ജില്ലയിലെ ഏറ്റവും പ്രധാനപ്പെട്ട നദികളാണ്. മീനച്ചിലാറുമായി ബന്ധപ്പെട്ട് 4900 കിലോമീറ്ററോളം തോടുകളും കൈവഴികളും ഉണ്ടെന്നാണ് കണക്കാക്കിയിട്ടുള്ളത്. ഇതില്‍ മുന്നൂറ് കിലോമീറ്റര്‍ ഇതിനോടകം ശുചീകരിച്ചുകഴിഞ്ഞു. ആ പ്രദേശങ്ങളില്‍ ഇത്തവണ വെള്ളക്കയറ്റം മുന്‍ വര്‍ഷങ്ങളെ അപേക്ഷിച്ച് കുറവായിരുന്നു . തീക്കോയി ആലഞ്ഞിത്തുരുത്ത്, മീനച്ചിലാര്‍ ദീപ്തി ഭാഗം, ചിറ്റാര്‍ പള്ളി ചപ്പാത്ത്, കറുത്ത മണ്‍കടവ്, ആറ്റുവഞ്ചിക്കടവ്, ഭരണങ്ങാനം വിലങ്ങുപാറ, പട്ടറുമഠം, പൂവത്തുംമൂട്, ചെമ്പിളാവ്, പുന്നത്തുറ, ചേര്‍പ്പുങ്കല്‍ പാലം എന്നീ കടവുകളില്‍നിന്നും ചെളിയും മണ്ണും മണലും നീക്കംചെയ്ത് ആഴം വര്‍ധിപ്പിക്കാന്‍ ജലസേചന വകുപ്പ് ടെന്‍ഡര്‍ ക്ഷണിച്ചു. ഇതിനു പുറമേ ആറാം മൈല്‍ ചെക്ക് ഡാം, നടത്തനാല്‍ ചെക്ക് ഡാം, തിടനാട് ചെക്ക് ഡാം, പെരുന്നിലം ചെക്ക് ഡാം, പള്ളിവാതില്‍ ചെക്ക് ഡാം എന്നിവ ശുദ്ധീകരിക്കാനും ടെന്‍ഡര്‍ ക്ഷണിച്ചിട്ടുണ്ട്. എന്നാല്‍ നഷ്ടം സഹിച്ച് പണി ഏറ്റെടുക്കാന്‍ കരാറുകാര്‍ മുന്നോട്ടുവരുന്നില്ല എന്നതാണ് സ്ഥിതി. റോയല്‍റ്റി , ജിഎസ്ടി എന്നിവ ഒഴിവാക്കണമെന്ന ആവശ്യം ശക്തമായി. പേരൂര്‍ ഭാഗത്തുനിന്നും വലിയതോതില്‍ മീനച്ചിലാറ്റിലെ ചെളിയും എക്കലും നീക്കം ചെയ്ത് വെള്ളൂരില്‍ സ്ഥാപിതമാവുന്ന റബര്‍ പാര്‍ക്കിന്‍റെ ആവശ്യത്തിനായി ഉപയോഗയോഗ്യമാക്കിയിരുന്നു. വേമ്പനാട്ടുകായലിലെ ജലസംഭരണശേഷി 80 ശതമാനത്തിലേറെ കുറഞ്ഞു എന്ന സമീപകാല പഠനങ്ങള്‍ ആശങ്ക ഉയര്‍ത്തുന്നതാണ്. ഇതിനൊരു പരിഹാരം എന്നവണ്ണം പഴുക്കാനില കായലിലെ തുരുത്ത് മാറ്റി സംഭരണശേഷി വര്‍ധിപ്പിക്കാന്‍ ഇറിഗേഷന്‍ വകുപ്പ് പദ്ധതി ആരംഭിച്ചിട്ടുണ്ട്. കിഫ്ബി വഴി നടപ്പാക്കുവാന്‍ ഉദ്ദേശിക്കുന്ന പദ്ധതിക്കായി 108 കോടി രൂപയാണ് നീക്കി വച്ചിട്ടുള്ളത്. അടിക്കടി ഉണ്ടാകുന്ന വെള്ളപ്പൊക്കം നിയന്ത്രിക്കുവാന്‍ ഇതിനോകം മുഖ്യമന്ത്രിയുടെ അധ്യക്ഷതയില്‍ ഉന്നതാധികാരസമിതി രൂപീകരിക്കുകയും നദീതട സംരക്ഷണ ചട്ടക്കൂടിന് അംഗീകാരം നല്‍കുകയും ചെയ്തിട്ടുണ്ട്. ജലവിഭവം, റവന്യൂ, തദ്ദേശസ്വയംഭരണം, ധനം , കൃഷി, പരിസ്ഥിതി, നിയമം, പൊതുമരാമത്ത്, ടൂറിസം തുടങ്ങിയ വകുപ്പുകളുടെ മന്ത്രിമാരും ചീഫ് സെക്രട്ടറിയും അംഗങ്ങളായ ഈ സമിതിയുടെ കണ്‍വീനര്‍ ജലവിഭവ വകുപ്പ് അഡീഷണല്‍ ചീഫ് സെക്രട്ടറിയാണ്. വെള്ളപ്പൊക്ക നിയന്ത്രണം: നിര്‍ദേശങ്ങള്‍ 1. പുഴകളുടെ ഉറവിടംമുതല്‍ പതനംവരെ നീരൊഴുക്കിനുള്ള തടസങ്ങള്‍ മാറ്റണം 2. ജില്ലയിലുള്ള ആയിരത്തി അറുനൂറോളം തോടുകള്‍ പൂര്‍ണമായും വീണ്ടെടുക്കണം. അതിനുവേണ്ടി പഞ്ചായത്തുകളും റവന്യൂ വകുപ്പും അടിയന്തര നടപടികള്‍ സ്വീകരിക്കണം. 3. നിലവിലുള്ള നെല്‍കൃഷി ഇടങ്ങള്‍ പൂര്‍ണമായും കൃഷി ചെയ്യണം. കൃഷി മുടങ്ങിയാല്‍ തണ്ണീര്‍ത്തടങ്ങളും തോടുകളും ഇല്ലാതാവും. കൃഷി ചെയ്യുമ്പോള്‍ കൂടുതല്‍ വെള്ളം കൃഷിസ്ഥലങ്ങള്‍ക്ക് ഉള്‍ക്കൊള്ളാനും വെള്ളപ്പൊക്കം തടയാനും സാധിക്കും. 4. പുഴയോര സംരക്ഷണം നിയമാനുസൃതമായി ചെയ്യണം. പുഴയുടെ ഇരുവശങ്ങളിലും സര്‍വേ നടത്തി പുറമ്പോക്ക് തിട്ടപ്പെടുത്തണം. 5 . പുഴയുടെ ഇരുവശങ്ങളിലും കാടുവെട്ടിത്തെളിച്ചു നീരൊഴുക്കിനുള്ള തടസങ്ങള്‍ നീക്കണം. 6. പുഴയുടെ ആഴം പഴയ നിലയിലേക്ക് കൊണ്ടുവരണം. അതിന് മണല്‍ കൂടുതലുള്ള സ്ഥലങ്ങളില്‍ അത് ലേലം ചെയ്തു വാരുവാനുള്ള കടവുകള്‍ കണ്ടെത്തണം. 7. തോട്ടപ്പള്ളി സ്പില്‍വേയിലെ മുന്നൂറ് മീറ്റര്‍ ഭാഗത്തെ പതിനേഴ് പൊഴികള്‍ സമയബന്ധിതമായി മഴക്കാലത്ത് മുറിച്ചു കൊടുക്കണം. 8. തണ്ണീര്‍മുക്കം ബണ്ട് കൃത്യമായി അടയ്ക്കുകയും തുറക്കുകയും ചെയ്യണം. 9. കാലാകാലങ്ങളായി പുഴകളിലും, കായലിലും അടിഞ്ഞുകൂടിയിരിക്കുന്ന മണ്ണ് വ്യവസായ അടിസ്ഥാനത്തില്‍ മാറ്റി നാഷണല്‍ ഹൈവേ ഉള്‍പ്പെടെയുള്ള റോഡ് പണികള്‍ക്കും മറ്റ് നിര്‍മാണ പ്രവൃത്തികള്‍ക്കും ഉപയോഗിക്കണം. 10 . ജുഡീഷല്‍ അധികാരത്തോടെ റിവര്‍ മാനേജ്‌മെന്‍റ് അഥോറിറ്റി രൂപീകരിക്കുകയും റവന്യൂ ബൗണ്ടറി രേഖപ്പെടുത്തി പുഴകളെ സംരക്ഷിക്കുകയും ചെയ്യണം. 11. മീനച്ചിലാറിലെ തുടക്കഭാഗത്ത് അടുക്കം, അടിവാരം തുടങ്ങിയ കൈവഴി പുഴകളില്‍ നിര്‍ദേശിച്ചിരിക്കുന്ന ചെക്ക് ഡാമുകള്‍ നിര്‍മിക്കണം. 12. പുഴകളിലെയും തോടുകളിലെയും മുഴുവന്‍ ചെക്ക് ഡാമുകളും വര്‍ഷകാലത്ത് കൃത്യമായി തുറക്കുകയും വേനല്‍ക്കാലത്ത് അടയ്ക്കുകയും ചെയ്യുന്നതുള്‍പ്പെടെയുള്ള വാട്ടര്‍ പ്രോട്ടോകോള്‍ നടപ്പാക്കണം. 13. താഴ്ന്ന പ്രദേശങ്ങളിലെ റോഡുകള്‍ ഉയര്‍ത്തി നിര്‍മിച്ച് റോഡുകളില്‍ വെള്ളം കയറുന്നത് തടയണം. 14. മഴയുടെ തീവ്രതയും വെള്ളപ്പൊക്കത്തിന്‍റെ സാധ്യതകളും ആധുനിക സാങ്കേതികവിദ്യകളുടെ സഹായത്തോടെ മുന്‍കൂട്ടി കാണുകയും ആവശ്യമായ മുന്നറിയിപ്പുകള്‍ കൃത്യതയോടെ നല്‍കുകയും ചെയ്യണം. 15. 2018 ന് ശേഷമുള്ള നെതര്‍ലാന്‍ഡ് മോഡല്‍ റൂം ഫോര്‍ റിവര്‍ പദ്ധതിയുടെ പുരോഗതി വിലയിരുത്തണം. 16. വെള്ളപ്പൊക്ക സമയത്ത് ഒഴുകിയെത്തുന്ന അധിക ജലം വലിയ മോട്ടോറുകള്‍ ഉപയോഗിച്ച് കടലിലേക്ക് പമ്പ് ചെയ്യുവാനുള്ള നടപടികള്‍ സ്വീകരിക്കണം. വെള്ളപ്പൊക്ക നിയന്ത്രണം‍: നിര്‍ദേശങ്ങള്‍ സര്‍ക്കാരിനു സമര്‍പ്പിക്കുമെന്ന് കേരള കോണ്‍ഗ്രസ്-എം കോട്ടയം: വെള്ളപ്പൊക്ക നിയന്ത്രണത്തിന് പുതുവഴികള്‍ എന്ന വിഷയത്തില്‍ കേരള കോണ്‍ഗ്രസ്-എം നടത്തിയ സിമ്പോസിയത്തില്‍ ഉയര്‍ന്നുവന്ന നിര്‍ദേശങ്ങളും പദ്ധതികളും സര്‍ക്കാരിനു മുമ്പില്‍ സമര്‍പ്പിക്കുമെന്ന് കേരള കോണ്‍ഗ്രസ്-എം. സിമ്പോസിയത്തില്‍ ഉയര്‍ന്നുവന്ന നിര്‍ദേശങ്ങള്‍ വിവിധ മേഖലകളിലെ വിദഗ്ധരുമായി ചര്‍ച്ച ചെയ്യുകയും ഹ്രസ്വകാലാടിസ്ഥാനത്തിലും ദീര്‍ഘകാലാ ടിസ്ഥാനത്തിലും ആവിഷ്‌കരിക്കേണ്ട പദ്ധതികളായി അവയെ ഇതിനോടകം വേര്‍തിരിക്കുകയും ചെയ്തിട്ടുണ്ട്. പദ്ധതി നിര്‍ദേശങ്ങള്‍ ഗവണ്‍മെന്‍റിന് മുമ്പില്‍ സമര്‍പ്പിക്കുന്നതിനു മുന്നോടിയായി കൂടുതല്‍ ജനകീയ പങ്കാളിത്തത്തോടെ മേഖലാടിസ്ഥാനത്തില്‍ ചര്‍ച്ചകളും അഭിപ്രായ രൂപീകരണവും നടത്തുന്നു. ഇന്നു പാലായിലും ജൂലൈ ആദ്യവാരം ഈരാറ്റുപേട്ട കാഞ്ഞിരപ്പള്ളി തുടങ്ങിയ കേന്ദ്രങ്ങളിലുമാണ് സിന്പോസിയം. കൂടാതെ [email protected] എന്ന ഇമെയിലിലും അഭിപ്രായങ്ങളും നിര്‍ദേശങ്ങളും സമര്‍പ്പിക്കാം. ഇതിന്‍റെകൂടി അടിസ്ഥാനത്തിലാണ് പദ്ധതി നിര്‍ദേശങ്ങള്‍ സമര്‍പ്പിക്കുക. മുഖ്യമന്ത്രിയുടെ അധ്യക്ഷതയില്‍ രൂപീകരിച്ചിട്ടുള്ള ഉന്നതാധികാരസമിതി മുമ്പാകെ ജൂലൈ മാസത്തില്‍ നിര്‍ദേശങ്ങള്‍ സമര്‍പ്പിക്കുമെന്ന് കേരള കോണ്‍ഗ്രസ്-എം ജില്ലാ പ്രസിഡന്‍റ് പ്രഫ.ലോപ്പസ് മാത്യു അറിയിച്ചു.

കളിക്കാന്‍ ഒരുങ്ങിക്കോളൂ, കളിക്കളങ്ങള്‍ റെഡി

മണിമലയിലും അക്കരപ്പാടത്തും ആധുനിക ടര്‍ഫുകള്‍ സജ്ജം കോട്ടയം: സംസ്ഥാന കായികവകുപ്പിന്‍റെ ഒരു പഞ്ചായത്ത് ഒരു കളിക്കളം പദ്ധതിയുടെ ഭാഗമായി ജില്ലയില്‍ രണ്ട് കളിക്കളങ്ങള്‍ ഒരുങ്ങി. വൈക്കം അക്കരപ്പാടം ഗവ. യുപി സ്‌കൂളിലും കാഞ്ഞിരപ്പള്ളി മണിമല പഞ്ചായത്തിലുമാണ് ആധുനിക സൗകര്യങ്ങളോടുകൂടിയ മനോഹരമായ കളിക്കളങ്ങള്‍ ഒരുങ്ങിയിരിക്കുന്നത്. രണ്ടിടത്തും ഫുട്‌ബോള്‍ പ്രേമികള്‍ക്കായി ആധുനിക നിലവാരത്തിലുള്ള ടര്‍ഫാണ് ഒരുക്കിയിരിക്കുന്നത്. രാജ്യാന്തര ഫുട്‌ബോള്‍ ഫെഡറേഷന്‍റെ (ഫിഫ) മാനദണ്ഡപ്രകാരമുള്ള വസ്തുക്കള്‍ ഉപയോഗിച്ചാണ് നിര്‍മാണം. ഉദയനാപുരം പഞ്ചായത്ത് ഒന്നാം വാര്‍ഡിലെ അക്കരപ്പാടം ഗവ. യുപി സ്‌കൂള്‍ ഗ്രൗണ്ടിലാണ് ടര്‍ഫ് കോര്‍ട്ട്. 48 മീറ്റര്‍ നീളത്തിലും 20 മീറ്റര്‍ വീതിയിലുമാണ് നിര്‍മാണം. 65 സെന്‍റ് സ്ഥലത്ത് സംസ്ഥാന കായിക വകുപ്പിന്‍റെ 50 ലക്ഷം രൂപയും എംഎല്‍എ ഫണ്ടില്‍നിന്ന് 50 ലക്ഷം രൂപയും ചെലവഴിച്ചാണ് നിര്‍മാണം. കൂടാതെ ലൈറ്റുകള്‍ സജ്ജീകരിക്കാനായി സി.കെ. ആശയുടെ എംഎല്‍എ ഫണ്ടില്‍നിന്ന് 10 ലക്ഷം രൂപകൂടി അനുവദിച്ചാണ് നിര്‍മാണം പൂര്‍ത്തിയാക്കിയത്. മണിമല പഞ്ചായത്തില്‍ ഒന്നാം വാര്‍ഡില്‍ പഞ്ചായത്ത് സ്റ്റേഡിയത്തിലാണ് ടര്‍ഫ് കോര്‍ട്ട്. സംസ്ഥാന കായികവകുപ്പിന്‍റെ 50 ലക്ഷം രൂപയും ചീഫ് വിപ്പ് ഡോ. എന്‍. ജയരാജിന്‍റെ എംഎല്‍എ ഫണ്ടില്‍നിന്ന് 50 ലക്ഷം രൂപയും ചെലവിട്ടാണ് നിര്‍മാണം. 50 മീറ്റര്‍ നീളത്തിലും 30 മീറ്റര്‍ വീതിയിലുമാണു ടര്‍ഫ്. ഒരു പഞ്ചായത്ത് ഒരു കളിക്കളം പദ്ധതിപ്രകാരം ജില്ലയില്‍ ആറ് കളിക്കളങ്ങളാണ് ഒരുങ്ങുന്നത്. പൂഞ്ഞാര്‍, ചങ്ങനാശേരി നിയോജകമണ്ഡലങ്ങളിലെ നിര്‍മാണം നടന്നുവരുന്നു. ഏറ്റുമാനൂര്‍, കടുത്തുരുത്തി എന്നിവിടങ്ങളിലെ നിര്‍മാണം ഉടന്‍ തുടങ്ങും.

ഈ പോക്കു പോയാല്‍ തേങ്ങാവില നൂറു കടക്കും

കോട്ടയം: ഈ പോക്കു പോയാല്‍ ഓണത്തിന് മുന്പുതന്നെ തേങ്ങാവില നൂറു കടക്കും; ഒരു കിലോ വെളിച്ചെണ്ണയ്ക്ക് അഞ്ഞൂറു രൂപയും. തേങ്ങാ ചില്ലറ വില 75 രൂപയില്‍നിന്ന് ഒരാഴ്ചയ്ക്കുള്ളിലാണ് 80 കടന്ന് ഇന്നലെ 85ലെത്തിയത്. നാളികേരത്തിന് കടുത്ത ക്ഷാമം നേരിടുന്നതിനാല്‍ അടുത്തയാഴ്ച 90 രൂപയിലെത്തിയേക്കാമെന്നാണ് വ്യാപാരികള്‍ പറയുന്നത്. ഓണത്തിന് പായസവും ഉപ്പേരിയും ശര്‍ക്കരവരട്ടിയും അവിയലുമൊമൊക്കെ ഇക്കൊല്ലം കൈപൊള്ളിക്കുമെന്ന് വ്യക്തം. തമിഴ്‌നാട്, കര്‍ണാടക സംസ്ഥാനങ്ങളില്‍നിന്ന് തേങ്ങാവരവ് കുറഞ്ഞതാണ് നിലവിലെ പ്രധാന പ്രതിസന്ധി. ലക്ഷദ്വീപില്‍നിന്നും ശ്രീലങ്കയില്‍നിന്നും സര്‍ക്കാര്‍ സഹകരണ ഏജന്‍സികള്‍ നാളികേരം ഇറക്കുമതി ചെയ്യാതെ തേങ്ങാവില പിടിച്ചുനിറുത്താനാകില്ല. വിയറ്റ്‌നാം, ഇന്തോനേഷ്യ, തായ്‌ലന്‍ഡ് തുടങ്ങിയ രാജ്യങ്ങളില്‍നിന്ന് വ്യാവസായിക ആവശ്യങ്ങള്‍ക്ക് ചൈന തേങ്ങ ഇറക്കുമതി ചെയ്യുന്നുണ്ട്. ആന്ധ്ര, തെലുങ്കാന, ഗോവ സംസ്ഥാനങ്ങളില്‍നിന്ന് തേങ്ങായെത്തിച്ച് സപ്ലൈകോ വഴി വില്‍പന നടത്തുകയാണ് നിലവിലെ പോംവഴി. നാളികേരത്തിന് ഏറ്റവും ഡിമാന്‍ഡ് വര്‍ധിക്കുന്നത് സംസ്ഥാനത്ത് ഓണം സീസണിലാണ്. തേങ്ങാക്ഷാമം ഇന്നത്തെ നിലയില്‍ തുടര്‍ന്നാല്‍ ഓണത്തിന് വില 125 രൂപവരെയെത്താമെന്ന് വ്യാപാരികള്‍ പറയുന്നു.

വേമ്പനാട്ടു കായലിനും കുട്ടനാടിനും സംരക്ഷണ പദ്ധതി

കോട്ടയം: വേമ്പനാട്ടു കായല്‍ ശുചീകരണത്തിന്‍റെ ഭാഗമായി, കോട്ടയം ജില്ലയെ ആലപ്പുഴ ജില്ലയുമായി ജലമാര്‍ഗം ബന്ധിച്ചിരുന്ന ആലപ്പുഴ-ചങ്ങനാശേരി കനാലിലെ മാലിന്യവും പോളയും നീക്കാന്‍ വിപുലമായ പദ്ധതി. ഒന്നാംഘട്ടമായി രാമങ്കരി പഞ്ചായത്ത് പരിധിയില്‍ ഒരു കിലോമീറ്റര്‍ ദൂരം കനാലില്‍നിന്ന് യന്ത്രസഹായത്തോടെ പോള വാരാന്‍ തുടങ്ങി. ഇതിനായി പഞ്ചായത്ത് 1.12 ലക്ഷം രൂപ അനുവദിച്ചു. കായല്‍ ശുചീകരണം തുടങ്ങിയതിനുശേഷം ഒരു വര്‍ഷത്തിനുള്ളില്‍ രണ്ടു ഘട്ടമായി 28.72 ടണ്‍ പ്ലാസ്റ്റിക് കായലില്‍നിന്നു വാരിമാറ്റി. വേമ്പനാട്ടു കായല്‍ വിപുലമായ രീതിയില്‍ ശുചീകരിക്കാനുള്ള വലിയൊരു പദ്ധതി ആലപ്പുഴ ജില്ലാ ഭരണകൂടം സര്‍ക്കാരിന് സമര്‍പ്പിച്ചിട്ടുണ്ട്. 188.25 കോടിയുടെ പദ്ധതി വിദഗ്ധരുടെ സമിതിയാണു തയാറാക്കിയത്. ജൈവവേലി, മണ്‍ബണ്ട്, ജൈവസംരക്ഷണം, അധിനിവേശ സസ്യങ്ങളുടെ നിര്‍മാര്‍ജനം തുടങ്ങി ഒട്ടേറെ പദ്ധതികളാണു വിഭാവനം ചെയ്യുന്നത്. ഘട്ടംഘട്ടമായി കുട്ടനാടിനെ ജൈവകൃഷിയിലേക്ക് മാറ്റാനും പദ്ധതി നിര്‍ദേശിക്കുന്നു. നെല്ല്, മത്സ്യം, താറാവ്, പച്ചക്കറി, ഭക്ഷ്യവിളകള്‍ എന്നിങ്ങനെ ബഹുവിഭവകൃഷി ആരംഭിക്കാനും കാര്‍ഷിക കലണ്ടറിന് രൂപം നല്‍കാനും കാലാവസ്ഥാ വ്യതിയാനത്തെ ചെറുക്കുന്ന കൃഷിരീതി തുടങ്ങാനുമാണ് മറ്റൊരു നിര്‍ദേശം. ലവണാംശം കുറയ്ക്കാനും മലിനജലം കളയാനും വടയാറിനെ വഴിതിരിച്ച് വെള്ളം എത്തിക്കാനും നിര്‍ദേശിക്കുന്നു. കിഴക്കന്‍ പ്രളയത്തെ ചെറുക്കാനുള്ള സാധ്യതകളും ആരായുന്നു.

മരണത്തിലും മാതൃകയായി വി.കെ. ജോസഫ്

കൊച്ചി: മരണശേഷം തന്‍റെ മൃതദേഹം വൈദ്യപഠനത്തിന് വിട്ടുനല്‍കണമെന്നതായിരുന്നു വി.കെ. ജോസഫിന്‍റെ ആഗ്രഹം. മരണം അവശേഷിപ്പിച്ച തീരാവേദനയിലും ജോസഫിന്‍റെ അന്ത്യാഭിലാഷം നിറവേറ്റാനായതിന്‍റെ ചാരിതാര്‍ഥ്യത്തിലാണ് കുടുംബാംഗങ്ങള്‍. ഇന്ത്യന്‍ നേവിയില്‍ വര്‍ഷങ്ങളുടെ സേവനത്തിനുശേഷം സാമൂഹികസന്നദ്ധ പ്രവര്‍ത്തനങ്ങളിലേക്ക് വഴിമാറി നടന്ന വാഴക്കാല സ്വദേശി വി.കെ. ജോസഫ് (79) ആണ് മരണശേഷവും വേറിട്ട വഴിയിലൂടെ മാതൃകയായത്. വാഴക്കാല സെന്‍റ് കുര്യാക്കോസ് ക്‌നാനായ കത്തോലിക്കാ പള്ളിയില്‍ ഇന്നലെ വൈകുന്നേരം മൂന്നിനു നടന്ന സംസ്‌കാര ശുശ്രൂഷകള്‍ക്കുശേഷം ബന്ധുക്കള്‍ മൃതദേഹം അമൃത മെഡിക്കല്‍ കോളജിന് കൈമാറി. ഇങ്ങനെയൊരു ആഗ്രഹം മൂന്നുമാസം മുമ്പേ പിതാവ് അറിയിച്ചിരുന്നു. അച്ഛന്‍റെ മരണശേഷം ആ ആഗ്രഹം തങ്ങള്‍ സഫലമാക്കുകയായിരുന്നുവെന്ന് മകന്‍ ക്യാപ്റ്റന്‍ ജോര്‍ജ് സോണി പറഞ്ഞു. ഇന്നലെ രാവിലെ ഒമ്പതിന് വാഴക്കാലയിലെ വീട്ടില്‍ പൊതുദര്‍ശനത്തിനുവച്ച മൃതദേഹത്തില്‍ നിരവധിപേര്‍ അന്തിമോപചാരം അര്‍പ്പിച്ചു. ഇന്ത്യന്‍ നേവിയില്‍ ഏവിയേഷന്‍ സേഫ്റ്റി എക്യുപ്‌മെന്‍റ് വിഭാഗത്തില്‍ 15 വര്‍ഷം പ്രവര്‍ത്തിച്ച അദ്ദേഹം 1965, 1971 യുദ്ധങ്ങളില്‍ ഐഎന്‍എസ് വിക്രാന്ത് യുദ്ധക്കപ്പലില്‍ സേവനമനുഷ്ഠിച്ചു. രാജ്യസേവനത്തിന് സമര്‍ സേവാ സ്റ്റാര്‍, പൂര്‍വി സ്റ്റാര്‍, പശ്ചിമി സ്റ്റാര്‍ എന്നീ അംഗീകാരങ്ങള്‍ ലഭിച്ചിട്ടുണ്ട്. കെല്‍സയില്‍ അംഗമായിരുന്ന വി.കെ. ജോസഫ് കൗണ്‍സലിംഗ് സൈക്കോളജിസ്റ്റ്, സാമൂഹിക പ്രവര്‍ത്തകന്‍, സഭയുടെ ലിറ്റര്‍ജിക്കല്‍ കമ്മീഷന്‍ അംഗം എന്നീ നിലകളിലും പ്രവര്‍ത്തിച്ചു. ദീര്‍ഘനാള്‍ സണ്‍ഡേ സ്‌കൂള്‍ അധ്യാപകനുമായിരുന്നു. അറിവ് നേടുന്നതിനും പകര്‍ന്നു കൊടുക്കുന്നതിലും ഏറെ ഉത്സുകനായിരുന്ന അദ്ദേഹം സര്‍വീസില്‍ നിന്നു വിരമിച്ച ശേഷം കുട്ടികള്‍ക്ക് മോട്ടിവേഷൻ ക്ലാസുകളും കൗണ്‍സലിംഗും മറ്റും നല്‍കുന്നതിലും സജീവമായിരുന്നു. 70 വയസിനുശേഷം എംഫില്‍, എംഎസ്‌സി സൈക്കോളജി ബിരുദങ്ങള്‍ നേടിയ അദ്ദേഹത്തിന്‍റെ കഠിനാധ്വാനവും അറിവ് നേടാനും സേവനം ചെയ്യാനുമുള്ള താത്പര്യവും തലമുറകള്‍ക്ക് മാതൃകയാണ്. ഉഴവൂര്‍ സ്വദേശിനി മേരി ജോസഫാണ് ഭാര്യ. മറ്റു മക്കള്‍: സോയ ബാബു (ഫിസിയോതെറാപ്പിസ്റ്റ്, യുഎസ്എ), സോളി ജോസഫ് (അധ്യാപിക, യുഎഇ). മരുമക്കള്‍: ബാബു (യുഎസ്എ), അന്‍റു (യുഎഇ), ജിജി (ഇന്ത്യ പോസ്റ്റ്‌സ്).

കാഞ്ഞിരപ്പള്ളി-ടിബി റോഡിലെ മരങ്ങൾ അപകടഭീഷണിയാകുന്നു

കാഞ്ഞിരപ്പള്ളി: മഴയ്ക്കൊപ്പമെത്തുന്ന ശക്തമായ കാറ്റിൽ കാഞ്ഞിരപ്പള്ളി-ടിബി റോഡിലെ മരങ്ങൾ അപകടഭീഷണിയിൽ. കുന്നുംഭാഗം മുതൽ മണ്ണാറക്കയം വരെയുള്ള റോഡിൽ പല ഭാഗത്തും മരങ്ങൾ ശക്തമായ കാറ്റ് വീശിയാൽ താഴെ വീഴാവുന്ന അവസ്ഥയിലാണ്. സ്കൂൾ വാഹനങ്ങളടക്കം ഇടതടവില്ലാതെ കടന്നുപോകുന്ന റോഡിന്‍റെ വശങ്ങളിലാണ് ഈ മരങ്ങൾ അപകട ഭീഷണിയുയർത്തി നിൽക്കുന്നത്. ചുവടുകൾ വരെ ദ്രവിച്ച ഇവ ഏതു നിമിഷവും നിലംപൊത്തുന്ന സ്ഥിതിയിലാണ്. കഴിഞ്ഞ ദിവസമുണ്ടായ കാറ്റിൽ കുന്നുംഭാഗം-ടിബി റോഡിൽ രണ്ടിടങ്ങളിലാണ് മരത്തിന്‍റെ ശിഖരങ്ങൾ ഒടിഞ്ഞുവീണത്. ശിഖരങ്ങൾ വീണ് കേബിളുകൾക്കും വൈദ്യുതി ലൈനുകൾക്കും കേടുപാടുകൾ സംഭവിച്ചിരുന്നു. ഈ സമയം റോഡിൽ വാഹനങ്ങളോ കാൽനടയാത്രക്കാരോ ഇല്ലാതിരുന്നതിനാൽ വൻ അപകടമാണ് ഒഴിവാ യത്. പല മരങ്ങളുടെയും ശിഖരങ്ങൾ ഒടിഞ്ഞ് വൈദ്യുതിപോസ്റ്റിലടക്കം തങ്ങിനിൽക്കുകയാണ്. ശക്തമായ കാറ്റടിച്ചാൽ വൈദ്യുതിലൈനുകളടക്കം തകർത്ത് ഇത് റോഡിലേക്കാകും പതിക്കുക. അങ്ങനെ വന്നാൽ അതു വലിയ അപകടങ്ങൾക്കും കാരണമായേക്കാം. ടിബി റോഡിന്‍റെ പല ഭാഗങ്ങളിലും ഇത്തരത്തിൽ മരങ്ങൾ ഉണങ്ങി നിൽക്കുന്ന സ്ഥിതിയാണ്. ഇരുചക്ര വാഹനയാത്രക്കാർക്കാണ് ഇത് ഏറെ ഭീഷണി സൃഷ്ടിക്കുന്നത്. മഴ പെയ്യുമ്പോഴും പെയ്ത് ഉടനെയും ഇവ നിലംപൊത്താൻ സാധ്യത ഏറെയാണെങ്കിലും വെട്ടിമാറ്റാൻ അധികൃതർ ഇതുവരെ തയാറായിട്ടില്ല. ഇലഭാരം കൊണ്ടും കാറ്റു മൂലവും ഇവിടെ മരങ്ങൾ റോഡിൽ ഒടിഞ്ഞുവീഴുന്നതു പതിവാണ്. ഉണക്കമരങ്ങളുടെ കാര്യം പറയുകയേ വേണ്ട. അതുകൊണ്ടുതന്നെ അപകടഭീഷണി ഉയർത്തുന്ന ഉണങ്ങിയ മരങ്ങളെങ്കിലും എത്രയും വേഗം വെട്ടിമാറ്റണമെന്നതാണ് യാത്രക്കാരുടെ ആവശ്യം. ഇല്ലെങ്കിൽ തണലിനായി വച്ചുപിടിപ്പിച്ച മരങ്ങൾ യാത്രക്കാരുടെ ജീവനെടുക്കുന്ന സ്ഥിതിയുണ്ടാകും.

ബഷീർ, പൊൻകുന്നം വർക്കി അനുസ്മരണം

പൊൻകുന്നം: ജനകീയ വായനശാലയിൽ വൈക്കം മുഹമ്മദ് ബഷീർ, പൊൻകുന്നം വർക്കി എന്നിവരുടെ അനുസ്മരണം നടത്തി. താലൂക്ക് ലൈബ്രറി കൗൺസിൽ നിർവാഹക സമിതിയംഗം സുമി ഇസ്മയിൽ ഉദ്ഘാടനം ചെയ്തു. വായനശാലാ പ്രസിഡന്‍റ് ടി.എസ്. ബാബുരാജ് അധ്യക്ഷത വഹിച്ചു. കവയിത്രി അനഘ ജെ. കോലത്ത്, ബഷീർ-പൊൻകുന്നം വർക്കി അനുസ്മരണപ്രഭാഷണം നടത്തി. എ.ആർ. മീന, സെബാസ്റ്റ്യൻ കിളിരൂപ്പറമ്പിൽ, രാഹുൽ പ്രസാദ്, ഗോപിക സന്തോഷ് തുടങ്ങിയവർ പ്രസംഗിച്ചു.

എരുമേലി വനത്തിൽ 30,000 വിത്തുണ്ടകൾ എറിയുന്നു; പമ്പാവാലിയിൽ തുടക്കം

കണമല: എറിയുന്ന വിത്തുണ്ടകൾ വനത്തിൽ മുളച്ചുവളർന്ന് ഫലസമൃദ്ധിയിലായാൽ കാടുവിട്ട് മൃഗങ്ങൾ ഇനി നാട്ടിലേക്കെത്തില്ലെന്ന് പ്രതീക്ഷിക്കാം. ഒപ്പം മരക്കച്ചവടത്തിനല്ല വനമെന്നും ഉറപ്പിക്കാം. ഈ ലക്ഷ്യവുമായി എരുമേലി വനമേഖലയിൽ ഇതാദ്യമായി വിത്തുണ്ട പദ്ധതി തുടങ്ങിയിരിക്കുകയാണ്. വന്യജീവികൾക്ക് ഭക്ഷണം വർധിപ്പിക്കുക, പ്രകൃതിദത്ത ഫലവൃക്ഷങ്ങൾ വളർത്തുക എന്നീ ലക്ഷ്യങ്ങളോടെ വനംവകുപ്പ് നടത്തുന്ന വിത്തൂട്ട് പദ്ധതിയുടെ ഭാഗമായാണ് ഈ പദ്ധതി. തുടക്കം കഴിഞ്ഞ ദിവസം പമ്പാവാലി കാളകെട്ടിയിൽ നടത്തി. വിവിധ ഫലവൃക്ഷങ്ങളുടെ 500 വിത്തുകളാണ് കാളകെട്ടി വനമേഖലയ്ക്കുള്ളിൽ രണ്ട് ഭാഗങ്ങളിലായി എറിഞ്ഞത്. തേക്ക് പ്ലാന്‍റേഷനായി മാറിയിരുന്ന കാളകെട്ടി വനമേഖലയിൽ പ്ലാന്‍റേഷൻ മുറിച്ചുനീക്കിയ ഭാഗങ്ങളിലും പാരിസ്ഥിതിക പുനഃസ്ഥാപനം ആവശ്യമായ ക്ഷയോന്മുഖമായ പ്രദേശങ്ങളിലുമാണ് വിത്തുണ്ടകൾ നിക്ഷേപിക്കുന്നത്. 30,000 വിത്തുണ്ടകൾ ഈ കാലവർഷ സീസണിൽ മൊത്തം 30,000 വിത്തുണ്ടകളാണ് എരുമേലി ഫോറസ്റ്റ് റേഞ്ച് പരിധിയിൽ നിക്ഷേപമായി എറിയാൻ പദ്ധതി ആരംഭിച്ചതെന്ന് റേഞ്ച് ഓഫീസർ ഹരിലാൽ പറഞ്ഞു. അടുത്ത ഘട്ടത്തിൽ വീണ്ടും വിത്തുണ്ടകൾ എറിയും. അര ലക്ഷം വിത്തുണ്ടകൾ എറിയാനാണ് ആലോചിക്കുന്നത്. ഇതിനായി വിത്തുകളുടെ ശേഖരണവും വിത്തുണ്ട നിർമാണവും ആരംഭിച്ചുകഴിഞ്ഞു. വനസംരക്ഷണ സമിതികൾ മുഖേനയാണ് വിത്തുണ്ടകൾ വനമേഖലയിൽ ഏറിയുക. വിത്തുണ്ടകളുടെ നിർമാണവും വനപാലകരുടെ മേൽനോട്ടത്തിൽ സമിതികളാണ് നടത്തുക. വനത്തിനുള്ളിലെ ഭക്ഷണലഭ്യത വർധിപ്പിക്കുന്നതിലൂടെ മനുഷ്യ-വന്യജീവി സംഘർഷം കുറയ്ക്കുക, പരിസ്ഥിതി പുനഃസ്ഥാപിക്കുക, പാരിസ്ഥിതിക സേവനങ്ങളുടെ ഗുണനിലവാരം മെച്ചപ്പെടുത്തുക, പാരിസ്ഥിതിക സന്തുലിതാവസ്ഥ മെച്ചപ്പെടുത്തുക തുടങ്ങിയ ലക്ഷ്യങ്ങളോടെയാണ് പദ്ധതി നടപ്പിലാക്കുന്നത്. എന്താണ് വിത്തുണ്ട മണ്ണിന്‍റെയും ജൈവവളത്തിന്‍റെയും മിശ്രിതത്തിൽ പൊതിഞ്ഞ നാടൻ വിത്തുകളാണ് വിത്തുണ്ടയിൽ ഉള്ളത്. മണ്ണ്, ചാണകം, മഞ്ഞൾ തുടങ്ങിയവ ചേർത്തുള്ള ആവരണമുണ്ടാകും. ഒപ്പം വളർച്ചയ്ക്കാവശ്യമായ ധാതുലവണങ്ങളുമുണ്ടാകും. ധാന്യഭോജികൾ, ഷഡ്പദങ്ങൾ, കരണ്ടുതീനി ജീവികൾ എന്നിവ വിത്തുകൾ ഭക്ഷണമാക്കുന്നത് തടയാൻ വേണ്ടിയാണ് വിത്തുകൾ മണ്ണിന്‍റെയും ജൈവവളത്തിന്‍റെയും മിശ്രിതത്തിൽ പൊതിഞ്ഞ് ചാണകം, മഞ്ഞൾ എന്നിവ ചേർത്ത് നിർമിക്കുന്നത്. വിത്തുകൾ പൊട്ടി മുളച്ച് വളരാനുള്ള വളവും രോഗ പ്രതിരോധശേഷിക്ക് മഞ്ഞളും ഉള്ളതിനാൽ വളർച്ച പ്രതീക്ഷിക്കാം. സസ്യഭുക്കുകളായ വന്യജീവികൾ ഭക്ഷണമാക്കുന്ന ഞാവൽ, പ്ലാവ്, മാവ്, മുള, ചാമ്പ, വാളംപുളി, കൊടംപുളി, വെട്ടി തുടങ്ങി വിവിധയിനം ഫലവൃക്ഷങ്ങളുടെ വിത്തുകളാണ് വിത്തുണ്ടകളിൽ ഉള്ളത്. കാളകെട്ടി വനമേഖലയിൽ വിത്തുണ്ടകൾ വിതറുന്നതിന്‍റെ ഉദ്ഘാടനം ഡെപ്യൂട്ടി റേഞ്ച് ഓഫീസർ ബി. വിനോദ് കുമാർ നിർവഹിച്ചു. വന സംരക്ഷണസമിതി പ്രസിഡന്‍റും പഞ്ചായത്ത്‌ അംഗവുമായ എം.എസ്. സതീശ്, എം.എസ്. സന്തോഷ്, ഇന്ദിര, വി.പി. മോഹനൻ, എ.കെ. രാധാകൃഷ്ണൻ, രവീന്ദ്രൻ നായർ, പീതാംബരൻ, അനി അജി, കെ.കെ. രാജു, ഭാസ്കരൻ തുടങ്ങിയവർ പങ്കെടുത്തു.

അനുസ്മരണവും എൻഡോവ്‌മെന്‍റ് വിതരണവും

എലിക്കുളം: പൈക കൈരളി ഗ്രന്ഥശാലയിൽ ദീർഘകാലം പ്രസിഡന്‍റായിരുന്ന ഒ.എൻ. വാസുദേവൻനമ്പൂതിരിയെയും സെക്രട്ടറിയായിരുന്ന പി.ജെ. ജോസഫിനെയും അനുസ്മരിച്ച് സമ്മേളനം നടത്തി. വിവിധ എൻഡോവ്‌മെന്‍റുകൾ വിതരണം ചെയ്തു. മാണി സി. കാപ്പൻ എംഎൽഎ ഉദ്ഘാടനം ചെയ്തു. ഗ്രന്ഥശാലാ പ്രസിഡന്‍റ് ടോമി തെക്കേൽ അധ്യക്ഷത വഹിച്ചു. എലിക്കുളം പഞ്ചായത്ത് പ്രസിഡന്‍റ് ജിമ്മിച്ചൻ ഈറ്റത്തോട്ട് മുഖ്യപ്രഭാഷണം നടത്തി. പഞ്ചായത്തംഗങ്ങളായ മാത്യൂസ് പെരുമനങ്ങാട്, സിനി ജോയ്, ജയിംസ് ജീരകത്ത്, താലൂക്ക് ലൈബ്രറി കൗൺസിൽ സെക്രട്ടറി ജോർജ് സെബാസ്റ്റ്യൻ, കെ.ആർ. മന്മഥൻ, ജിമ്മിച്ചൻ പാംപ്ലാനി, എസ്. സന്ദീപ് ലാൽ, ജിം ജയിംസ്, റെജി ആയിലിക്കുന്നേൽ, ഷാജി പന്തലാനി എന്നിവർ പ്രസംഗിച്ചു.

സിറ്റിസൺ ഫെസിലിറ്റേഷൻ സെന്‍റർ പ്രവർത്തിക്കുന്നില്ല; അപേക്ഷകർ വലയുന്നു

എരുമേലി: പഞ്ചായത്ത്‌ ഓഫീസ് കെ-സ്മാർട്ട് ആകുമ്പോൾ എല്ലാം സ്മാർട്ട് ആകുമെന്നത് വെറുതെയായി. നേരിട്ട് അപേക്ഷകളുമായി വരുന്നവരോട് അക്ഷയ സെന്‍ററിലോ സിഎസ്‌‌സികളിലോ പോയി ഓൺലൈൻ വഴി അയയ്ക്കാൻ ഉദ്യോഗസ്ഥർ പറഞ്ഞുവിടുന്നു. ഓൺലൈനായി പഞ്ചായത്ത്‌ ഓഫീസിൽ തന്നെ ചെയ്യാൻ സിറ്റിസൺ ഫെസിലിറ്റേഷൻ സെന്‍റർ സംവിധാനം ഉണ്ടെന്നിരിക്കെയാണ് ഉദ്യോഗസ്ഥർ ജനങ്ങളെ പഞ്ചായത്ത്‌ ഓഫീസിൽനിന്ന് ഓൺലൈൻ കേന്ദ്രങ്ങളിലേക്ക് പറഞ്ഞുവിട്ടുകൊണ്ടിരിക്കുന്നത്. എരുമേലിയിൽ സിറ്റിസൺ ഫെസിലിറ്റേഷൻ സെന്‍റർ എന്ന ബോർഡ് മാത്രമാണുള്ളതെന്നും സേവനം ഇല്ലെന്നും ആക്ഷേപം ശക്തമാണ്. 2023 നവംബർ ഒന്നുമുതൽ എല്ലാ പഞ്ചായത്ത്‌ ഓഫീസിലും സിറ്റിസൺ ഫെസിലിറ്റേഷൻ സെന്‍റർ ആരംഭിക്കാൻ സർക്കാർ ഉത്തരവ് നൽകിയതാണ്. കെ-സ്മാർട്ട്‌ ആയതോടെ ഈ സെന്‍ററുകളെ കൂടുതൽ കാര്യക്ഷമതയോടെ പ്രവർത്തിപ്പിക്കാനാണ് നിർദേശിച്ചിട്ടുള്ളത്. പഞ്ചായത്ത്‌ ഓഫീസിലേക്ക് ഏതു സേവനം തേടിയെത്തുന്നവർക്കും സെന്‍ററിൽനിന്ന് സഹായം ഒരുക്കണമെന്നാണ് നിർദേശം. ഇതിനായി സെന്‍ററിൽ ലാപ്ടോപ് ഉൾപ്പെടെ ഇന്‍റർനെറ്റ് സംവിധാനങ്ങൾ സജ്ജമാക്കാനും ജീവനക്കാരെ നിയോഗിക്കാനും ഉത്തരവിൽ നിർദേശിച്ചിട്ടുണ്ട്. എന്നാൽ, എരുമേലി പഞ്ചായത്ത്‌ ഓഫീസിലെ സെന്‍ററിൽ ഒരു മേശയും കസേരയുമല്ലാതെ ജീവനക്കാരനോ ലാപ്ടോപ്പോ മറ്റു സൗകര്യങ്ങളോ ഇല്ല. ജീവനക്കാരുടെ അഭാവത്തിൽ പരിചയശേഷിയും യോഗ്യതയുമുള്ളവരെ ദിവസവേതന അടിസ്ഥാനത്തിൽ നിയോഗിക്കാനും അനുമതി നൽകിയിട്ടുണ്ട്. എന്നാൽ, ഈ മാർഗവും എരുമേലിയിൽ സ്വീകരിച്ചിട്ടില്ല. പാവപ്പെട്ടവർക്ക് ദാരിദ്ര്യ രേഖയിൽ ഉൾപ്പെടാനുള്ള അപേക്ഷയ്ക്കു പോലും ഓൺലൈൻ കേന്ദ്രങ്ങളിൽ 70 രൂപയാണ് ഫീസ്. ഇത് തികച്ചും സൗജന്യമായി പഞ്ചായത്ത്‌ ഓഫീസിൽനിന്നു ചെയ്തു നൽകേണ്ടതാണെന്നുള്ളത് വിസ്മരിക്കുകയാണ് പഞ്ചായത്ത്‌ ഉദ്യോഗസ്ഥർ. വിവാഹം, ജനന, മരണ രജിസ്ട്രേഷനുകൾ, കെട്ടിട നിർമാണ പെർമിറ്റ്, ലൈസൻസ്, വിവിധ സർട്ടിഫിക്കറ്റുകൾ തുടങ്ങിയവയ്‌ക്കെല്ലാം തോന്നുംപടി ഫീസാണ് ചില ഓൺലൈൻ കേന്ദ്രങ്ങളിൽ വാങ്ങുന്നത്. ചില അപേക്ഷകൾക്ക് ഫീസിനു പുറമേ സർവീസ് ചാർജായി 30 രൂപയും ഈടാക്കുന്നുണ്ട്. പഞ്ചായത്ത്‌ ഓഫീസിൽ സിറ്റിസൺ ഫെസിലിറ്റേഷൻ സെന്‍റർ പ്രവർത്തന സജ്ജമാക്കുകയും ഓൺലൈൻ കേന്ദ്രങ്ങളിൽ മിതമായ അംഗീകൃത ഫീസ് നിരക്ക് ഉറപ്പാക്കുകയും ചെയ്താൽ ചൂഷണം ഒഴിയുകയും ജനങ്ങൾക്ക് നീതിയും മികച്ച സേവനവും ലഭ്യമാവുകയും ചയ്യും. ഇതിന് ജനപ്രതിനിധികൾ ഇടപെടണമെന്ന ആവശ്യം ശക്തമാണ്. കെ-സ്മാർട്ട്‌ നടപ്പിലാക്കിയ ഇക്കഴിഞ്ഞ ഏപ്രിൽ പത്തിനുശേഷം എല്ലാ പഞ്ചായത്ത്‌ ഓഫീസുകളിലും ഫ്രണ്ട് ഓഫീസ് വഴി നേരിട്ട് അപേക്ഷകൾ സ്വീകരിക്കുന്നില്ല. ഓൺലൈനായാണ് സ്വീകരിക്കുന്നത്. ഓൺലൈൻ മുഖേന സ്വന്തമായി അപേക്ഷകൾ നൽകാൻ അറിവും പരിചയവുമില്ലാത്ത സാധാരണക്കാരും പാവപ്പെട്ടവരുമാണ് ഏറെയും. ഇവർക്ക് പ്രയോജനകരമായി സിറ്റിസൺ ഫെസിലിറ്റേഷൻ സെന്‍റർ മാറിയില്ലങ്കിൽ കെ-സ്മാർട്ടിന്‍റെ മറവിൽ ചൂഷണത്തിന് അവസരമൊരുങ്ങും.

ഭരണങ്ങാനം ഡിവിഷനില്‍ മുഴുവന്‍ അങ്കണവാടികളിലും ബയോ കമ്പോസ്റ്റര്‍ ബിന്നുകള്‍

ഭരണങ്ങാനം: ജില്ലാ പഞ്ചായത്ത് പദ്ധതിയില്‍ ഉള്‍പ്പെടുത്തി ഭരണങ്ങാനം ഡിവിഷനിലെ മുഴുവന്‍ അങ്കണവാടികളിലും ബയോ കമ്പോസ്റ്റര്‍ ബിൻ‌ വിതരണം ചെയ്തു. ജില്ലാ പഞ്ചായത്ത് മെംബര്‍ രാജേഷ് വാളിപ്ലാക്കല്‍ ഉദ്ഘാടനം ചെയ്തു. ബ്ലോക്ക് പഞ്ചായത്ത് പ്രസിഡന്‍റ് ജെസി ജോര്‍ജ് അധ്യക്ഷത വഹിച്ചു. പഞ്ചായത്ത് പ്രസിഡന്‍റുമാരായ ബീന ടോമി, അനസ്യ രാമന്‍, ജിജി തമ്പി, സോജന്‍ തൊടുക, ജില്ലാ വനിത ശിശു വികസന ഓഫീസര്‍ റ്റിജു റേച്ചല്‍ തോമസ്, ചൈല്‍ഡ് ഡെവലപ്‌മെന്‍റ് പ്രോഗ്രാം ഓഫീസര്‍ ജിനു മേരി ബെഞ്ചമിന്‍ തുടങ്ങിയവര്‍ പ്രസംഗിച്ചു.

ടൗൺ ബസ് സ്റ്റാൻഡിലെ വെയ്റ്റിംഗ് ഷെഡ് തകര്‍ന്ന നിലയില്‍

പാലാ: ടൗണ്‍ ബസ് സ്റ്റാൻഡിലെ വെയ്റ്റിംഗ് ഷെഡ് തകര്‍ന്ന നിലയില്‍. ഏതു സമയത്തും താഴെ വീഴറായായ അവസ്ഥയിലെത്തിയിട്ടും മുനിസിപ്പല്‍ അധികൃതർ കണ്ടില്ലെന്നു നടിക്കുകയാണെന്നാണ് ആക്ഷേപം. കൂത്താട്ടുകുളം, രാമപുരം, ഏഴാച്ചേരി, വലവൂര്‍, ഉഴവൂര്‍ ഭാഗങ്ങളിലേക്കുള്ള യാത്രക്കാര്‍ ബസ് കാത്തിരിക്കുന്നത് ഈ വെയ്റ്റിംഗ് ഷെഡിലാണ്. ഷെഡിന്‍റെ തൂണുകള്‍ എല്ലാംതന്നെ തുരുമ്പുപിടിച്ചു തകര്‍ന്ന നിലയിലാണ്. ഷീറ്റ് മേഞ്ഞ മേല്‍ക്കൂര തകര്‍ന്ന് ചോര്‍ച്ചയും ഉണ്ടാകുന്നുണ്ട്. മഴ പെയ്താല്‍ ബസ് കാത്തിരിക്കുന്നവര്‍ക്ക് കുട ചൂടി നില്‍ക്കേണ്ട അവസ്ഥയാണുള്ളത്. ദുരിതങ്ങള്‍ ഉണ്ടാകുന്നതു വരെ കാത്തിരിക്കാതെ വെയ്റ്റിംഗ് ഷെഡ് പുനര്‍നിര്‍മിക്കണമെന്നു പാലാ പൗരാവകാശസമിതി ആവശൃപ്പെട്ടു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]