ADVERTISEMENT

ADVERTISEMENT

കുവൈറ്റ് ദുരന്തത്തിന്‍റെ കണ്ണീരോര്‍മകള്‍ക്ക് ഒരു വയസ്

കോട്ടയം: കുവൈത്തിലെ മംഗഫില്‍ കമ്പനി ജീവനക്കാര്‍ താമസിച്ചിരുന്ന കെട്ടിടത്തിലുണ്ടായ അഗ്നിബാധ ദുരന്ത ഓര്‍മകള്‍ക്ക് ഒരു വയസ്. ജില്ലയിലെ മൂന്നു യുവാക്കള്‍ക്കാണ് കുവൈറ്റില്‍ ജീവന്‍ നഷ്ടമായത്.

ഇത്തിത്താനം കിഴക്കേടത്ത് പ്രദീപ്-ദീപ ദമ്പതികളുടെ മകന്‍ പി. ശ്രീഹരി (27), പായിപ്പാട് കടുങ്ങാട്ടായ പാലത്തിങ്കല്‍ പരേതരായ ബാബു വര്‍ഗീസിന്‍റെയും കുഞ്ഞേലിയാമ്മയുടെയും മകന്‍ ഷിബു വര്‍ഗീസ് (38), പാമ്പാടി ഇരുമാരിയേല്‍ സ്റ്റെഫിന്‍ ഏബ്രഹാം സാബു (27) എന്നിവര്‍ക്കാണ് ജീവന്‍ നഷ്ടപ്പെട്ടത്.

മെക്കാനിക്കല്‍ എന്‍ജിനിയറിംഗ് ബിരുദധാരിയായിരുന്ന ശ്രീഹരി കഴിഞ്ഞ വര്‍ഷം ജൂണ്‍ എട്ടിനാണ് കുവൈത്തിലെ എന്‍ബിടിസി സൂപ്പര്‍മാര്‍ക്കറ്റില്‍ സെയില്‍സ്മാന്‍ ജോലി തേടി നാട്ടില്‍നിന്നു തിരിച്ചത്.

കുവൈറ്റിലെ തീപിടിത്തത്തില്‍ 24 മലയാളികള്‍ക്കാണ് ജീവന്‍ നഷ്ടമായത്. പൊള്ളലേറ്റും പുക ശ്വസിച്ചുമാണ് ഏറെപ്പേരും മരിച്ചത്.

ADVERTISEMENT

മുന്‍ മുഖ്യമന്ത്രി ഉമ്മന്‍ ചാണ്ടിക്ക് ജന്മനാട്ടിൽ സ്മാരകം ഉയരുന്നു

പുതുപ്പള്ളി: മുന്‍മുഖ്യമന്ത്രി ഉമ്മന്‍ ചാണ്ടിയുടെ രണ്ടാം ചരമവാര്‍ഷികത്തില്‍ ജന്മനാട്ടില്‍ സ്മാരകം ഉയരുന്നു. ഏറെ വിവാദങ്ങള്‍ക്കൊടുവില്‍ നിര്‍ദിഷ്ട മിനി സിവില്‍ സ്റ്റേഷന്‍ കെട്ടിടത്തിന് ഉമ്മന്‍ ചാണ്ടിയുടെ പേരിടാന്‍ പഞ്ചായത്ത് ഭരണസമിതി യോഗം തീരുമാനിച്ചു. ഉമ്മന്‍ ചാണ്ടിയുടെ രണ്ടാം ചരമവാര്‍ഷികത്തോടനുബന്ധിച്ചാണ് മിനി സിവില്‍ സ്റ്റേഷന്‍ നിര്‍മിക്കുന്നതിനു തുടക്കംകുറിക്കുന്നത്. കഴിഞ്ഞവര്‍ഷം സെപ്റ്റംബർ 23ന് പഞ്ചായത്ത് നവീകരിച്ച കമ്യൂണിറ്റി ഹാള്‍ ഇഎംഎസ് സ്മാരകമായി നാമകരണം ചെയ്തിരുന്നു. ഈ സമയം ഉമ്മന്‍ ചാണ്ടിയെ മറന്നുവെന്ന് വ്യാപക പ്രചാരണമുണ്ടായി. കമ്യൂണിറ്റിഹാള്‍ ഉദ്ഘാടന വേളയില്‍ മന്ത്രി എം.ബി. രാജേഷ് മിനി സിവില്‍സ്റ്റേഷന്‍ പൂര്‍ത്തീകരിച്ച് മുന്‍ മുഖ്യമന്ത്രി ഉമ്മന്‍ ചാണ്ടിയുടെ സ്മാരകമാക്കുമെന്ന് പ്രഖ്യാപിച്ചിരുന്നു. സംസ്ഥാന സര്‍ക്കാരും പഞ്ചായത്തും ചേര്‍ന്ന് 1.25 കോടി രൂപ മുടക്കിയാണ് കെട്ടിടം പണി പൂര്‍ത്തിയാക്കുന്നത്. ഉമ്മന്‍ ചാണ്ടി എംഎല്‍എയായിരുന്ന അവസരത്തില്‍ 2017-ല്‍ പുതുപ്പള്ളി ജംഗ്ഷനു സമീപമുള്ള പഞ്ചായത്തിന്‍റെ 75 സെന്‍റ് സ്ഥലത്ത് മിനി സിവില്‍ സ്റ്റേഷന്‍ കെട്ടിടം പണിയുന്നതിനു പണം അനുവദിച്ചിരുന്നു. എംഎല്‍എയുടെ ആസ്തി വികസന ഫണ്ടില്‍നിന്ന് ഒരു കോടി രൂപയാണ് അനുവദിച്ചത്. മൂന്നുനില കെട്ടിടത്തിന്‍റെ തൂണുകള്‍ ഉള്‍പ്പെടെ അടിസ്ഥാന നിര്‍മാണങ്ങള്‍ അന്നു പൂര്‍ത്തിയാക്കിയിരുന്നു. ഇതിന്‍റെ രണ്ടാംഘട്ടം നിര്‍മിക്കാനാണ് ഇപ്പോള്‍ പഞ്ചായത്ത് തീരുമാനിച്ചിരിക്കുന്നത്. നിര്‍മാണത്തിനുള്ള പ്ലാനും എസ്റ്റിമേറ്റും തയാറാക്കി ഭരണാനുമതിക്കായി പൊതുമരാമത്ത് വകുപ്പിനു സമര്‍പ്പിച്ചതായി പഞ്ചായത്ത് അധികൃതര്‍ പറഞ്ഞു. പഞ്ചായത്തിന്‍റെ നിലവിലുള്ള ഓഫീസ് 50 വര്‍ഷം പഴക്കമുള്ളതും ജീര്‍ണാവസ്ഥയിലുമാണ്. പുതുപ്പള്ളിയിലെ മറ്റു സര്‍ക്കാര്‍ സ്ഥാപനങ്ങളായ സബ് രജിസ്ട്രാര്‍ ഓഫീസ്, വില്ലേജ് ഓഫീസ് തുടങ്ങി ഒട്ടേറെ ഓഫീസുകള്‍ ഇപ്പോള്‍ വാടകക്കെട്ടിടങ്ങളിലാണു പ്രവര്‍ത്തിക്കുന്നത്. മിനി സിവില്‍സ്റ്റേഷന്‍ പൂര്‍ത്തിയാകുന്നതോടെ സര്‍ക്കാര്‍ സ്ഥാപനങ്ങളെല്ലാം ഒരു കെട്ടിടത്തിലേക്കു മാറ്റി പ്രവര്‍ത്തിപ്പിക്കാന്‍ കഴിയുമെന്ന് അധികൃതര്‍ പറയുന്നു.

പഴയ മെഡിക്കൽ കോളജ് കെട്ടിടം കാടുകയറി നശിക്കുന്നു

ഗാന്ധിനഗർ: കോട്ടയം മെഡിക്കൽ കോളജിന്‍റെ പഴയ കോളജ് കെട്ടിടം കാടുകയറി നശിക്കുന്നു. ദന്തൽ കോളജിന് സമീപത്തായാണ് പഴയ മെഡിക്കൽ കോളജ് കെട്ടിടം. നിലവിൽ കോളജ് പ്രവർത്തിക്കുന്ന കെട്ടിടത്തിലേക്ക് കോളജിന്‍റെ പ്രവർത്തനം മാറ്റിയതോടെ വർഷങ്ങളായി പഴയ കോളജ് കെട്ടിടം കാടുകയറുകയാണ്. കോളജ് പ്രവർത്തിച്ചുകൊണ്ടിരുന്ന ഒരു കെട്ടിടത്തിൽ ലോക്കൽ ഒപി തുടങ്ങിയതിനാൽ പരിസരം വൃത്തിയായി കിടക്കുന്നുണ്ട്. ഇതിനടുത്തുള്ള കെട്ടിടമാണ് വർഷങ്ങളായി ഉപയോഗിക്കാതെ കാടുകയറി നശിക്കുന്നത്. മെഡക്സ് നടക്കുമ്പോൾ ഇവിടത്തെ കാടു വെട്ടിത്തെളിച്ച് കെട്ടിടത്തിലെ ക്ലാസ് മുറികൾ മെഡക്സിനായി ഉപയോഗിക്കും. മെഡക്സ് കഴിയുന്നതോടെ വീണ്ടും കാടുകയറാൻ തുടങ്ങും. ഉപയോഗിക്കാതെ കിടക്കുന്നതുകൊണ്ട് കോളജ് കെട്ടിടത്തിന്‍റെ വരാന്തകൾ തെരുവുനായ താവളമാക്കിയിരിക്കുകയാണ്. പ്രദേശമാകെ കാടുപിടിച്ചു കിടക്കുന്നതിനാൽ ഇഴജന്തുക്കളുടെ ശല്യവുമുണ്ട്. ദന്തൽ വിദ്യാർഥികളും ദന്തൽ കോളജിൽ ചികിത്സ തേടുന്നവരും ഇതിലേയുള്ള വഴി ഉപയോഗിക്കുന്നുണ്ട്. എന്നാൽ തെരുവുനായ്ക്കളെയും ഇഴജന്തുക്കളെയും ഭയന്നുവേണം സഞ്ചരിക്കാൻ. കെട്ടിടത്തിന്‍റെ പല ഭാഗവും പൊട്ടിപ്പൊളിഞ്ഞിട്ടുണ്ട്. മരച്ചില്ലകൾ വീണ് മുകൾഭാഗവും തകർന്നിട്ടുണ്ട്. കാട് വെട്ടിത്തെളിച്ച് കെട്ടിടത്തിന്‍റെ ശോച്യാവസ്ഥ പരിഹരിച്ചാൽ ആരോഗ്യ വകുപ്പിന്‍റെ വിവിധ ഓഫീസുകൾ ഇവിടെ പ്രവർത്തിപ്പിക്കാൻ സാധിക്കുമെന്ന് ആരോഗ്യമേഖലയിലുള്ളവർ ചൂണ്ടിക്കാട്ടുന്നു.

ജില്ലാ ആശുപത്രിയില്‍ അപകടഭീഷണിയായി വാട്ടര്‍ ടാങ്ക്

കോട്ടയം: ജില്ലാ ആശുപത്രിയില്‍ അപകടഭീഷണിയായി വാട്ടര്‍ ടാങ്ക്. ആറ്, മൂന്ന് വാര്‍ഡുകളോടു ചേര്‍ന്നാണ് ഏതു നിമിഷവും ഇടിഞ്ഞുവീഴുമെന്ന നിലയിലുള്ള വലിയ വാട്ടര്‍ ടാങ്ക് സ്ഥിതിചെയ്യുന്നത്. വര്‍ഷങ്ങള്‍ക്കു മുമ്പ് ജില്ലാ ആശുപത്രിയിലെ വിവിധ വാര്‍ഡുകളിലേക്കുള്ള വെള്ളം എത്തിക്കുന്നതിനായി നിര്‍മിച്ചതാണ് ടാങ്ക്. കാലപ്പഴക്കത്തില്‍ ടാങ്ക് അപകടാവസ്ഥയിലായതോടെ വെള്ളം സൂക്ഷിക്കുന്നത് ഉപേക്ഷിച്ചു. തൂണുകളും ഭിത്തിയുമെല്ലാം ദ്രവിച്ച് ഏതുനിമിഷവും താഴെ വീഴാവുന്ന രീതിയിലാണ് ഇപ്പോൾ ടാങ്ക്. ടാങ്കിനു സമീപത്തുകൂടിയാണ് രോഗികളും കൂട്ടിരിപ്പുകാരുമൊക്കെ ഏതുസമയവും നടക്കുന്നത്. കഴിഞ്ഞദിവസം ചേര്‍ന്ന ആശുപത്രി വികസനസമിതി യോഗത്തില്‍ അപകടാവസ്ഥയിലായ ടാങ്ക് എത്രയും വേഗം പൊളിച്ചുമാറ്റണമെന്ന് ആവശ്യപ്പെട്ടിരുന്നു. എന്നാല്‍, പൊളിക്കാന്‍ ഇതുവരെ അധികൃതര്‍ തയാറായിട്ടില്ല. കിഫ്ബി പദ്ധതി പ്രകാരം പണിയുന്ന പുതിയ ആശുപത്രി കോംപ്ലക്‌സ് ടാങ്കിനോടു ചേര്‍ന്നുള്ള ഭാഗത്താണ്. പുതിയ കെട്ടിടത്തിന്‍റെ നിര്‍മാണത്തിനും അപകടാവസ്ഥയിലായ ടാങ്ക് തടസമാണ്. അതേസമയം ആശങ്ക വേണ്ടെന്നും അപകടാവസ്ഥയിലായ ടാങ്ക് ഉടന്‍ പൊളിച്ചുനീക്കുമെന്നും ആശുപത്രി സൂപ്രണ്ട് പറഞ്ഞു.

വീടിന്‍റെ താക്കോല്‍ദാനം 18ന്

പുതുപ്പള്ളി: ഉമ്മന്‍ ചാണ്ടി ഫൗണ്ടേഷന്‍ ഡോണ്‍ ബോസ്‌കോ സ്‌കൂളുമായി സഹകരിച്ചു പുതുപ്പള്ളി പഞ്ചായത്തില്‍ നല്‍കുന്ന വീടിന്‍റെ താക്കോല്‍ദാനം 18നു നടക്കും. ഏഴാം വാര്‍ഡില്‍ ചെറിയാന്‍ കടുപ്പിലിനായി നിര്‍മിക്കുന്ന ഉമ്മന്‍ ചാണ്ടി വീടിന്‍റെ താക്കോല്‍ദാനം രാഹുല്‍ ഗാന്ധി നിര്‍വഹിക്കും. ഉച്ചകഴിഞ്ഞ് രണ്ടിനു 134 നമ്പര്‍ ബൂത്ത് കോണ്‍ഗ്രസ് കമ്മിറ്റിയുടെ നേതൃത്വത്തില്‍ പായസ വിതരണവും നടത്തുമെന്ന് വാര്‍ഡ് മെംബർ വര്‍ഗീസ് ചാക്കോ അറിയിച്ചു.

നേത്ര പരിശോധനാ ക്യാമ്പ്

പുതുപ്പള്ളി: പരിയാരം കൈതളാവ് റെസിഡന്‍റ്സ് അസോസിയേഷനും വാസന്‍ ഐ കെയര്‍ ഹോസ്പിറ്റലും ചേര്‍ന്ന് നടത്തിയ സൗജന്യ നേത്രപരിശോധനാ ക്യാമ്പ് പി.ആര്‍. അനിത ഉദ്ഘാടനം ചെയ്തു. പുതുപ്പള്ളി ബ്ലോക്ക് മെംബര്‍ സാബു പുതുപ്പറമ്പില്‍, മാടപ്പള്ളി ബ്ലോക്ക് മെംബര്‍ ബീന കുന്നത്ത്, അസോസിയേഷന്‍ പ്രസിഡന്‍റ് ഈശ്വര പ്രസാദ്, സെക്രട്ടറി അഖില്‍ ജി. നാഥ്, വൈസ് പ്രസിഡന്‍റ് അനീഷ് കുമാര്‍, ട്രഷറര്‍ ധനൂപ് വിജയ്, ജോയിന്‍റ് സെക്രട്ടറി മനു കെ. ബിനോയ്, ഇ.ജി. പ്രസന്നന്‍ തുടങ്ങിയവര്‍ പ്രസംഗിച്ചു.

പെരുവ മാര്‍ക്കറ്റിലെ ജൈവമാലിന്യ സംസ്‌കരണം: വൈദ്യുതി ഉത്പാദന പ്ലാന്‍റിന്‍റെ പ്രവര്‍ത്തനം നിലച്ചിട്ട് മാസങ്ങളായി

പെരുവ: പെരുവ മാര്‍ക്കറ്റിലെ ജൈവമാലിന്യ സംസ്‌കരണ വൈദ്യുതി ഉത്പാദന പ്ലാന്‍റിന്‍റെ പ്രവര്‍ത്തനം നിലച്ചിട്ട് മാസങ്ങളായി. ഇതോടെ ജൈവമാലിന്യങ്ങള്‍ സംസ്‌കരിക്കാന്‍ മാര്‍ഗമില്ലാത്ത അവസ്ഥയായിലാണ് പെരുവയിലെ വ്യാപാരികളും മത്സ്യവില്‍പ്പനക്കാരും. കടകളിലെ മാലിന്യം അവരവര്‍തന്നെ സ്വന്തം സ്ഥലത്ത് നിര്‍മാര്‍ജനം ചെയ്യുകയാണ്. പ്രവര്‍ത്തനം നിലച്ചതോടെ മാലിന്യപ്ലാന്‍റും ടൗണില്‍ വഴിവിളക്കുകള്‍ തെളിക്കാനായി ഉപയോഗിച്ചിരുന്ന വിളക്കുകാലുകളും അനാഥമായ അവസ്ഥയിലാണ്. മാലിന്യം സംസ്‌കരിച്ച് അതില്‍നിന്ന് വൈദ്യുതി ഉത്പാദിപ്പിച്ച് വഴിവിളക്കുകള്‍ തെളിക്കുന്ന പദ്ധതിയാണ് പ്രവര്‍ത്തനരഹിതമായത്. മുളക്കുളം പഞ്ചായത്തും ശുചിത്വ മിഷന്‍റെ സേവനദാതാക്കളായ ബയോടെക്കുമായി ചേര്‍ന്ന് 2008-ലാണ് പദ്ധതിയുടെ നിര്‍മാണം തുടങ്ങിയത്. 2010-ലാണ് പദ്ധതി പ്രവര്‍ത്തനസജ്ജമായത്. 12 ലക്ഷത്തോളം രൂപ ചെലവഴിച്ചാണ് പദ്ധതി തുടങ്ങിയത്. പെരുവ മാര്‍ക്കറ്റിനുള്ളിലാണ് പദ്ധതിയുടെ ഭാഗമായുള്ള പ്ലാന്‍റ് സ്ഥാപിച്ചിട്ടുള്ളത്. പെരുവ മാര്‍ക്കറ്റിലെയും ടൗണിലെയും വ്യാപാരസ്ഥാപനങ്ങളിലെയും ഇറച്ചി, മീന്‍, പച്ചക്കറി മാലിന്യങ്ങളുമാണ് ഇവിടെ സംസ്‌കരിച്ചിരുന്നത്. പ്ലാന്‍റിലെത്തിക്കുന്ന മാലിന്യങ്ങളില്‍നിന്ന് ഗ്യാസ് ഉത്പാദിപ്പിച്ച് അത് ജനറേറ്റര്‍ ഉപയോഗിച്ചു വൈദ്യുതിയാക്കി മാറ്റും. ഈ വൈദ്യുതി ഉപയോഗിച്ചു പെരുവ ടൗണിലെയും ചുറ്റുമുള്ള വഴികളിലും സ്ഥാപിച്ചിട്ടുള്ള വൈദ്യുതി വിളക്കുകള്‍ പ്രകാശിപ്പിക്കുന്ന രീതിയിലായിരുന്നു പദ്ധതി നടന്നുവന്നിരുന്നത്. 55 വൈദ്യുതി വിളക്കുകളാണ് ഇവിടെ ഉത്പാദിപ്പിക്കുന്ന വൈദ്യുതിയിലൂടെ പ്രകാശിപ്പിച്ചിരുന്നത്. ഏതു വര്‍ഷകാലത്തും പെരുവ ടൗണില്‍ വഴിവിളക്കുകള്‍ തെളിഞ്ഞിരുന്നു. ഒരു വര്‍ഷത്തിലധികമായി വഴിവിളക്കുകള്‍ പ്രകാശിക്കാതായിട്ടെന്ന് വ്യാപാരികള്‍ പറയുന്നു. പ്ലാന്‍റിലേക്ക് ലഭിക്കുന്ന മാലിന്യത്തിന്‍റെ അളവ് കുറഞ്ഞതാണ് പ്രവര്‍ത്തനം പ്രതിസന്ധിയിലാകാന്‍ കാരണമെന്നാണ് ബയോടെക് അധികൃതര്‍ പറയുന്നത്. ഒരു മാസം 21,860 രൂപ പഞ്ചായത്ത് ഇവിടത്തെ ജോലിക്കാരനും മേല്‍നോട്ടച്ചുമതലയുടെ ഇനത്തിലുമായി ബയോടെക്കിന് നല്‍കേണ്ടിയിരുന്നു. ഇത്രയും തുക ചെലവഴിക്കേണ്ടെന്നു പഞ്ചായത്ത് തീരുമാനിച്ചതിനെത്തുടര്‍ന്ന് കഴിഞ്ഞ മാര്‍ച്ചില്‍ കരാര്‍ പുതുക്കാതിരുന്നതാണ് പദ്ധതിയുടെ പ്രവര്‍ത്തനം പൂര്‍ണമായും നിലയ്ക്കാനിടയാക്കിയത്. തുമ്പോര്‍മുഴി പ്ലാന്‍റുകള്‍ ഉടന്‍ തുറക്കും ബയോടെക്കുമായുള്ള കരാർ പുതുക്കേണ്ടെന്ന് പഞ്ചായത്ത് കമ്മിറ്റി തീരുമാനിച്ചതാണ്. അറ്റകുറ്റപ്പണികള്‍ക്കായി വലിയ തുകയാണ് പഞ്ചായത്തിന് ചെലവാകുന്നത്. മാര്‍ക്കറ്റിലും ടാക്സി സ്റ്റാന്‍ഡിലുമായി തുമ്പോര്‍മൂഴി മോഡല്‍ മാലിന്യ സംസ്‌കരണ പ്ലാന്‍റ് സ്ഥാപിച്ചു. ഇതിന്‍റെ പ്രവര്‍ത്തനം ഉടന്‍തന്നെ ആരംഭിക്കും. ടൗണില്‍ പുതിയ വൈദ്യുതി ലൈറ്റുകള്‍ സ്ഥാപിച്ചു വെളിച്ചം ഉറപ്പാക്കിയിട്ടുണ്ട്. പുതിയ മാലിന്യ സംസ്‌കരണ പ്ലാന്‍റ് ബയോടെക്കിന്‍റെ പ്ലാന്‍റ് പൊളിച്ചുനീക്കി അവിടത്തന്നെ സ്ഥാപിക്കുന്ന കാര്യവും പരിഗണനയിലാണെന്നു മുളക്കുളം പഞ്ചായത്ത് പ്രസിഡന്‍റ് ടി.കെ. വാസുദേവന്‍ നായര്‍ പറഞ്ഞു.

മൊബൈൽ ഫോൺ അപഹരിച്ച സംഭവത്തിൽ ഒരാൾ പിടിയിൽ

തലയോലപ്പറമ്പ്: ബസ് ഇറങ്ങി വീട്ടിലേക്ക് പോകുന്നതിനിടയിൽ ബൈക്കിലെത്തിയ മോഷ്ടാക്കൾ യുവാവിന്‍റെ മൊബൈൽ ഫോൺ അപഹരിച്ച സംഭവത്തിൽ ഒരാൾ പിടിയിൽ. മോഷ്ടിച്ച ഫോണിൽ സിം കാർഡിട്ട് ഉപയോഗിച്ച ആളെയാണ് പോലീസ് പിടികൂടിയത്. ആലപ്പുഴ അരൂർ പുത്തനങ്ങാടി അരച്ചപ്പറമ്പിൽ സേതുരാജി (55)നെയാണ് തലയോലപ്പറമ്പ് പോലീസ് പിടികൂടിയത്. കഴിഞ്ഞ ഡിസംബർ പത്തിന് രാത്രി 10.30ന് തലപ്പാറ ബസ്‌സ്റ്റോപ്പിന് സമീപമായിരുന്നു സംഭവം. കാരിക്കോട് നരിക്കുഴിപ്പടിക്കൽ ജിഷ്ണുവിന്‍റെ മൊബൈൽ ഫോണാണ് ബൈക്കിലെത്തിയ രണ്ടംഗസംഘം അപഹരിച്ച് രക്ഷപ്പെട്ടത്. എറണാകുളത്ത് സ്വകാര്യ കമ്പനി ജീവനക്കാരനായ ജിഷ്ണു ജോലി കഴിഞ്ഞ് തലപ്പാറ ജംഗ്ഷനിൽ ബസ് ഇറങ്ങിയശേഷം ബൈക്ക് ഇരിക്കുന്നിടത്തേക്ക് നടന്നു പോകുന്നതിനിടെയായിരുന്നു മൊബൈൽ ഫോൺ അപഹരിക്കപ്പെട്ടത്. ബൈക്കിലെത്തിയ യുവാക്കൾ ആശുപത്രി ആവശ്യത്തിനായി ഫോൺ ചെയ്യുന്നതിനായി ജിഷ്ണുവിന്‍റെ മൊബൈൽ ഫോൺ ആവശ്യപ്പെടുകയായിരുന്നു. ഇവർ പറഞ്ഞ നമ്പർ ഫോണിൽ ഡയൽ ചെയ്യുന്നതിനിടെ ബൈക്കിന്‍റെ പിന്നിലിരുന്ന യുവാവ് ജിഷ്ണുവിന്‍റെ കൈയിൽനിന്നും ഫോൺ തട്ടിപ്പറിച്ച് വേഗത്തിൽ ഓടിച്ച് പോകുകയായിരുന്നു. തുടർന്ന് ജിഷ്ണു തലയോലപ്പറമ്പ് പോലീസിൽ പരാതി നൽകുകയായിരുന്നു. പ്രാഥമിക അന്വേഷണത്തിന്‍റെ ഭാഗമായി പോലീസ് സിസിടിവി ദൃശ്യങ്ങളും മറ്റും പരിശോധിച്ചശേഷം കേസ് രജിസ്റ്റർ ചെയ്തു. തുടർന്ന് നടത്തിയ അന്വേഷണത്തിലാണ് ആലപ്പുഴ സ്വദേശിയായ സേതുരാജിന്‍റെ സിം കാർഡ് മോഷണം പോയ ഫോണിലിട്ട് ഉപയോഗിച്ചതായി പോലിസ് കണ്ടെത്തി ഇയാളെ പിടികൂടിയത്. മോഷ്ടിച്ച ഫോണിൽ ആരാണ് തന്‍റെ സിം കാർഡ് ഇട്ടതെന്ന് പറയാതെ വന്നതോടെയാണ് മോഷ്ടാവിനെ സംരക്ഷിക്കുന്ന കുറ്റം ചുമത്തി ഇയാളെ അറസ്റ്റ് ചെയ്തത്. കോടതിയിൽ ഹാജരാക്കിയ പ്രതിയെ റിമൻഡ് ചെയ്തു.

മാലിന്യങ്ങള്‍ നിറഞ്ഞും കാടുമൂടിയും റോഡരികിലെ ഓടകള്‍

കടുത്തുരുത്തി: മണ്ണും എക്കലും ചെളിയും മാലിന്യങ്ങളും‍ നിറഞ്ഞും കാടുമൂടിയും റോഡരികിലെ ഓടകള്‍. സ്ലാബില്ലാതെ തുറന്നു കിടക്കുന്ന ഓടകള്‍ കാടുമൂടിയതോടെ റോഡരികിലൂടെ നടക്കുന്നവര്‍ അപകടത്തില്‍പ്പെടുന്നതു പതിവായി. വാഹനങ്ങള്‍ റോഡരിക് ചേര്‍ന്നു വരുമ്പോള്‍ വശങ്ങളിലേക്ക് മാറിനില്‍ക്കാന്‍ കാൽനടയാത്രക്കാർ ശ്രമിക്കുമ്പോഴാണ് ഓടയിലേക്കു വീണ് അപകടങ്ങള്‍ ഉണ്ടാകുന്നത്. കൂടാതെ വലിയ വാഹനങ്ങള്‍ക്ക് സൈഡ് കൊടുക്കാന്‍ ഒതുക്കുന്ന ചെറിയ വാഹനങ്ങളും ഇത്തരത്തില്‍ ഓടകളില്‍ വീണ് അപകടത്തില്‍പ്പെടുന്നുണ്ട്. ഓടകള്‍ തെളിക്കണമെന്നും കാടും പള്ളയും വെട്ടിനീക്കണമെന്നും സ്ലാബുകള്‍ സ്ഥാപിക്കണമെന്നും ജനപ്രതിനിധികള്‍ ഉള്‍പ്പെടെ പലതവണ പിഡബ്ള്യുഡിയോട് ആവശ്യപ്പെട്ടിട്ടുണ്ടെങ്കിലും ഇതുവരെ നടപടിയായില്ല. പിഡബ്ള്യുഡിയുടെ നേതൃത്വത്തില്‍ ഓടകള്‍ തെളിച്ചിട്ട് വര്‍ഷങ്ങള്‍ കഴിഞ്ഞു. ഇതൊന്നും തങ്ങളുടെ പണിയല്ലെന്നാണ് പിഡബ്ള്യുഡിയുടെ നിലപാടെന്ന് ജനപ്രതിനിധികള്‍ പറയുന്നു. വാഹനത്തിരക്കേറിയ ഏറ്റുമാനൂര്‍-വൈക്കം റോഡിന്‍റെ വശങ്ങളിലൂടെ കടന്നുപോകുന്ന ഓട പലയിടത്തും സമാനരീതിയില്‍ അപകടഭീഷിണി ഉയര്‍ത്തുകയാണ്. മുട്ടുചിറ ജംഗ്ഷനിലും പെട്രോള്‍ പമ്പിന് സമീപവും ഉള്‍പ്പെടെ പലയിടത്തും റോഡരികില്‍ ഓടകള്‍ വാപിളര്‍ത്തി അപകടഭീഷിണിയുമായി നില്‍ക്കുകയാണ്. എക്കല്‍ നിറഞ്ഞ ഓടകളില്‍ വലിയ പുല്ലുകള്‍ വളര്‍ന്നു മൂടിയതിനാല്‍ ഇവിടം ഓടയുണ്ടെന്ന് പരിചയമില്ലാത്തവര്‍ക്ക് മനസിലാവില്ല. കഴിഞ്ഞദിവസം റോഡരികില്‍ കാര്‍ പാര്‍ക്ക് ചെയ്യാന്‍ ശ്രമിച്ചപ്പോഴും കാറിന്‍റെ വീല്‍ ഓടയിലേക്കു വീണു മുട്ടുചിറയില്‍ അപകടമുണ്ടായിരുന്നു. ഇന്നലെ ബസിന് സൈഡ് കൊടുക്കാന്‍ മാറിനില്‍ക്കുമ്പോള്‍ മുട്ടുചിറയില്‍ ഓടയില്‍ വീഴാന്‍ പോയ ആളെ അടുത്തുണ്ടായിരുന്നവരാണ് പിടിച്ചുമാറ്റി രക്ഷപ്പെടുത്തിയത്. ഓടകള്‍ തെളിക്കണമെന്നും വാ തുറന്നു കിടക്കുന്ന ഓടകള്‍ക്ക് മുകളില്‍ സ്ലാബുകള്‍ സ്ഥാപിക്കണമെന്നും പലതവണ ആവശ്യപ്പെട്ടെങ്കിലും നടപടിയില്ലെന്ന് കടുത്തുരുത്തി പഞ്ചായത്ത് വൈസ് പ്രസിഡന്‍റ് ജിന്‍സി എലിസബത്ത് പറഞ്ഞു. ആളുകള്‍ പരാതിപ്പെടുമ്പോൾ‍ പലപ്പോഴും സ്വന്തം ചെലവിലാണ് ഓട വെട്ടിത്തെളിക്കുന്നത്. മുട്ടുചിറ പമ്പിന് സമീപത്തുനിന്നും എച്ച്ജിഎം ആശുപത്രി റോഡില്‍ തകര്‍ന്ന് കിടന്ന ഓടയുടെ സ്ലാബ് സമീപത്തെ വ്യാപാരിയുടെ നേതൃത്വത്തില്‍ പണം മുടക്കിയാണ് ശരിയാക്കിയത്. പിഡബ്ള്യുഡിയോട് പലതവണ പറഞ്ഞിട്ടും നടപടിയുണ്ടായില്ല. ഇതിനിടെ സ്ത്രീ ഉൾപ്പെടെ നിരവധിപേര്‍ ഇവിടെ അപകടത്തില്‍പ്പെട്ടു. ഇതോടെയാണ് വ്യാപാരി പണം മുടക്കി ഓടയും സ്ലാബും നന്നാക്കിയതെന്നും ജിന്‍സി പറഞ്ഞു. പ്ലാസ്റ്റിക്ക് ചാക്കുകളും ഫ്‌ളെക്‌സും മണ്ണും ചെളിയും മാലിന്യങ്ങളുമെല്ലാം നിറഞ്ഞ് ഓടകള്‍ അടഞ്ഞിരിക്കുകയാണ്. മഴ പെയ്താല്‍ ടൗണുകളില്‍ വെള്ളക്കെട്ട് പതിവായി. മാലിന്യങ്ങളും എക്കലും ചെളിയും നിറഞ്ഞ് റോഡരികിലെ ഓടകള്‍ പൂര്‍ണമായും മൂടിയ നിലയിലാണ്. ശക്തമായ മഴയില്‍ വെള്ളം ഒഴുകിപ്പോകാനുള്ള സൗകര്യങ്ങള്‍ പരിമിതപ്പെട്ടതോടെ വെള്ളം റോഡില്‍ കെട്ടിനില്‍ക്കുന്ന കാഴ്ചയാണ് പലയിടത്തും. ഓടയില്‍നിന്നുള്ള മലിനജലം കലരുന്നതിനാല്‍ ഗുരുതരമായ ആരോഗ്യ പ്രശ്നങ്ങളാണ് ഇതില്‍ ചവിട്ടിനടക്കുന്നവര്‍ നേരിടുന്നത്. ഓടകള്‍ നിറഞ്ഞു വെള്ളക്കെട്ട് വ്യാപകമായതോടെ റോഡിന്‍റെ വശങ്ങളിലെ കെട്ടിടങ്ങളില്‍ കച്ചവടം നടത്തുന്ന വ്യാപാരികളും വാഹനം പാര്‍ക്ക് ചെയ്യുന്നവരും കല്‍നടയാത്രക്കാരും വിദ്യാര്‍ഥികളുമെല്ലാം ദുരിതത്തിലാണ്. സാധാരണ മഴയ്ക്കു മുമ്പ് ഓടകള്‍ വൃത്തിയാക്കാറുണ്ടെങ്കിലും ഇക്കുറി പലയിടത്തും ഓടശുചീകരണം പ്രഖ്യാപനത്തിലൊതുങ്ങിയെന്നും ആക്ഷേപമുണ്ട്.

കൈത്തോട് നികന്നുപോയതായി പരാതി

കടുത്തുരുത്തി: സ്വകാര്യ വ്യക്തികളുടെ കൈവശമുണ്ടായിരുന്ന ഏക്കറുകണക്കിന് നെല്‍പ്പാടങ്ങള്‍ വര്‍ഷങ്ങള്‍ക്കു മുമ്പ് മണ്ണിട്ട് നികത്തി റബര്‍നട്ടതോടെ പാടത്തിനു സമീപത്തുകൂടി ഒഴുകിയിരുന്ന കൈത്തോട് നികന്നു പോയതായി പരാതി. ഞീഴൂര്‍ പഞ്ചായത്തിലെ 12-ാം വാര്‍ഡില്‍ പാഴുത്തുരുത്തിലാണ് കൈത്തോട് നികന്നു പോയതായി പറയുന്നത്. ഒന്നരക്കിലോമീറ്ററോളം നീളമുണ്ടായിരുന്ന കൈത്തോടിന്‍റെ തുടക്കം മുതലുള്ള മുക്കാല്‍ ഭാഗത്തോളം പൂര്‍ണമായും നികന്ന് സ്വകാര്യ വ്യക്തികളുടെ സ്ഥലത്തില്‍ ഉള്‍പ്പെട്ട നിലയിലാണെന്ന് പറയുന്നു. വലിയതോടിന്‍റെ കുടിലിപ്പറമ്പ് കടവ് ഭാഗത്തേക്കു വന്നുചേരുന്ന കൈത്തോട് അഞ്ഞൂറ് മീറ്ററോളം ദൂരത്തില്‍ പഴയനിലയില്‍ത്തന്നെ അവശേഷിക്കുന്നുണ്ട്. നേരത്തേ വെള്ളം ഒഴുകിയിരുന്ന ഈ കൈത്തോട് നികന്നു പോയതിനാല്‍ വെള്ളത്തിന്‍റെ ഒഴുക്ക് നിലച്ചു പാരിസ്ഥിതിക പ്രതിസന്ധികള്‍ ഉണ്ടായിരിക്കുകയാണെന്ന് പറയുന്നു. നികന്നുപോയ കൈത്തോട് പൂര്‍വസ്ഥിതിയിലാക്കണമെന്നാവശ്യപ്പെട്ട് പരിസ്ഥിതി പ്രവര്‍ത്തകനും ബിജെപി നേതാവുമായ പി.സി. രാജേഷ് നല്‍കിയ പരാതിയെത്തുടര്‍ന്ന് ഞീഴൂര്‍ വില്ലേജ് ഓഫീസറും ഉദ്യോഗസ്ഥരും സ്ഥലെത്തെത്തി പരിശോധനകള്‍ നടത്തി.

ബ്ലഡ് ഡോണേഴ്‌സ് കേരളയ്ക്ക് ജീവന്‍ പകര്‍ന്ന വിനോദ് ഭാസ്‌കരന്‍ വിട വാങ്ങി

ചങ്ങനാശേരി: കഴിഞ്ഞദിവസം വിടവാങ്ങിയ കെഎസ്ആര്‍ടിസി ജീവനക്കാരന്‍ വിനോദ് ഭാസ്‌കരന്‍ ബ്ലഡ് ഡോണേഴ്‌സ് കേരള എന്ന സംഘടനയുടെ സ്ഥാപകനാണ്. ചങ്ങനാശേരി ഡിപ്പോയിലെ കണ്ടക്ടറായ പുഴവാത് സ്വദേശിയായ വിനോദ് ഭാസ്‌കരന്‍ തന്‍റെ ജോലിയുടെ ഇടവേളകളിലാണ് ബ്ലഡ് ഡോണേഴ്‌സ് കേരളയുടെ പ്രവര്‍ത്തനത്തിനു ജീവന്‍ പകര്‍ന്ന്. 2011ല്‍ സാമൂഹ്യ സേവനമെന്ന ആശയം മുന്‍നിര്‍ത്തി തുടങ്ങിയ വീ ഹെല്‍പ് ഫേസ് ബുക്ക് പേജിനു പിന്നാലെയാണ് വിനോദ് ഭാസ്‌കരന്‍റെ നേതൃത്വത്തിലുള്ള കൂട്ടായ്മ ബ്ലഡ് ഡോണേഴ്‌സ് കേരള എന്ന സംഘടനയ്ക്ക് രൂപം നല്‍കിയത്. ആശുപത്രികളില്‍ രക്തദാനത്തിന്‍റെ ആവശ്യകത മനസിലാക്കി തുടങ്ങിയ ഈ സംഘടന സംസ്ഥാനമൊട്ടാകെ വലിയ കൂട്ടായ്മയായി വളരുകയായിരുന്നു. ലക്ഷക്കണക്കിനു രോഗികള്‍ക്ക് രക്തദാന സേവനം ചെയ്ത സംഘടനയെന്ന ഖ്യാതിയും ഈ കൂട്ടായ്മയ്ക്കുണ്ട്. ഇന്ത്യയിലും വിദേശങ്ങളിലുമായി ബ്ലഡ് ഡോണേഴ്‌സ് കേരളയുടെ നേതൃത്വത്തില്‍ ദിവസേന നിരവധിപ്പേര്‍ക്ക് രക്തദാനം നിര്‍വഹിക്കുന്നുണ്ട്. കരള്‍രോഗം ബാധിച്ച വിനോദിന് മകന്‍ ആദിത്യന്‍ കരള്‍ നല്‍കിയിരുന്നു. കുറച്ചുദിവസമായി എറണാകുളത്തെ സ്വകാര്യ ആശുപത്രിയില്‍ ചികിത്സയിലിരിക്കെ ഇന്നലെയാണ് നാല്പെത്തെട്ടുകാരനായ വിനോദ് ഭാസ്‌കരന്‍റെ അന്ത്യം. സംസ്‌കാരം നാളെ മൂന്നിന് വീട്ടുവളപ്പിൽ നടത്തും. മൃതദേഹം നാളെ രാവിലെ ഒന്പതിന് മുൻസിപ്പൽ ടൗൺഹാളിലും 10.30ന് കെഎസ്ആർടിസി ഡിപ്പോയിലും പൊതുദർശനത്തിനു വയ്ക്കും. പുഴവാത് മന്ദാരമംഗലം ഭാസ്‌കരന്‍-ഗോമതിയമ്മ ദമ്പതികളുടെ മകനാണ്. ഭാര്യ: ഉഷ. മക്കള്‍: അനഘ, ആദിത്യന്‍, ആദര്‍ശ്.

ചങ്ങനാശേരിയിലെ വെറ്ററിനറി മൊബൈല്‍ യൂണിറ്റ് സേവനം ഗുണകരമാകുന്നു

ചങ്ങനാശേരി: കേരള സര്‍ക്കാര്‍ മൃഗസംരക്ഷണ വകുപ്പ് റീബിൽഡ് കേരള ഇനിഷ്യേറ്റീവ് പദ്ധതിയില്‍ ഉള്‍പ്പെടുത്തി ചങ്ങനാശേരി ഗവൺമെന്‍റ് വെറ്ററിനറി പോളിക്ലിനിക് കേന്ദ്രീകരിച്ച് ആരംഭിച്ച മൊബൈല്‍ വെറ്ററിനറി യൂണിറ്റിന്‍റെ സേവനം മൃഗങ്ങളുടെ ഉടമകള്‍ക്കു ഗുണകരമാകുന്നു. കഴിഞ്ഞ മേയ് 30 മുതലാണ് ചങ്ങനാശേരിയിലെ മൊബൈല്‍ വെറ്ററിനറി യൂണിറ്റിന്‍റെ പ്രവര്‍ത്തനം മാടപ്പള്ളി, പാമ്പാടി ബ്ലോക്ക് പഞ്ചായത്തുകളില്‍ക്കൂടി ലഭ്യമാക്കിയത്. അതേസമയം, വൈകുന്നേരം ആറുമുതല്‍ പുലര്‍ച്ചെ അഞ്ചുവരെയായിരുന്ന യൂണിറ്റിന്‍റെ പ്രവര്‍ത്തനം ഇന്നലെ മുതല്‍ വൈകുന്നേരം നാലുമുതല്‍ രാത്രി 12 വരെയാക്കി വെട്ടിക്കുറച്ചിട്ടുണ്ട്. വെറ്ററിനറി ഡയറക്ടറേറ്റിന്‍റെ നിർദേശപ്രകാരം സംസ്ഥാനത്തെ മുഴുവന്‍ മൊബൈല്‍ യൂണിറ്റിന്‍റെയും പ്രവര്‍ത്തനസമയം വൈകുന്നേരം നാലുമുതല്‍ രാത്രി 12 വരെയാക്കിയിട്ടുണ്ട്. 1962 എന്ന ടോള്‍ഫ്രീ നമ്പറില്‍ വിളിച്ചാല്‍ മൊബൈല്‍ യൂണിറ്റിന്‍റെ സേവനം ലഭ്യമാകും. വാഹനത്തില്‍ സജ്ജമാക്കിയിരിക്കുന്ന ക്യുആര്‍ കോഡ് വഴി കര്‍ഷകര്‍ക്ക് നേരിട്ട് ഫീസ് അടയ്ക്കാവുന്നതാണ്. ഒരു ഡോക്ടറും ഡ്രൈവര്‍ കം അറ്റന്‍ഡറും ഉള്‍പ്പെടുന്നതാണ് യൂണിറ്റ്.

അസംപ്ഷന്‍ കോളജിന് പൗരാവലിയുടെ അഭിനന്ദനം

ചങ്ങനാശേരി: എംജി യൂണിവേഴ്‌സിറ്റിയിലെ മികച്ച രണ്ടാമത്തെ കായിക കലാലയം എന്ന ബഹുമതി കരസ്ഥമാക്കിയ അസംപ്ഷന്‍ കോളജിനെ പൗരാവലി യോഗം അനുമോദിച്ചു. കോളജ് ഓഡിറ്റോറിയത്തില്‍ ചേര്‍ന്ന യോഗത്തില്‍ ഡോ. റൂബിള്‍ രാജ് അധ്യക്ഷത വഹിച്ചു. ജോബ് മൈക്കിള്‍ എംഎല്‍എ ഉദ്ഘാടനം ചെയ്തു. പൗരാവലിയുടെ ഉപഹാരം എംഎല്‍എ പ്രിന്‍സിപ്പല്‍ ഡോ. റാണി മരിയ തോമസിനു സമ്മാനിച്ചു. കേരള കോണ്‍ഗ്രസ് സംസ്ഥാന വൈസ് ചെയര്‍മാന്‍ കെ.എഫ്. വര്‍ഗീസ്, ഫാ. എബി പുതുശേരി, ഫാ. റോജന്‍ പുരയ്ക്കല്‍, നെജിയ നൗഷാദ്, എല്‍സമ്മ ജോബ്, ലിസി ജോസ്, കുര്യന്‍ തൂമ്പുങ്കല്‍, റൗഫ് റഹീം, ഡോ. സുജ മേരി ജോര്‍ജ് എന്നിവര്‍ പ്രസംഗിച്ചു.

രാജീവ് വിചാര്‍ വേദി മെറിറ്റ് അവാര്‍ഡ് വിതരണം

ചങ്ങനാശേരി: വിദ്യാഭ്യാസ മേഖലയില്‍ ദീര്‍ഘവീക്ഷണത്തോടുകൂടി പദ്ധതികള്‍ ആവിഷ്‌കരിച്ചു നടപ്പിലാക്കിയ പ്രധാനമന്ത്രിയായിരുന്നു രാജീവ് ഗാന്ധിയെന്ന് തിരുവഞ്ചൂര്‍ രാധാകൃഷ്ണന്‍ എംഎല്‍എ. രാജീവ് വിചാര്‍ വേദി സംഘടിപ്പിച്ച വിദ്യാഭ്യാസ സെമിനാറും വി.എസ്. നന്ദഗോപാലിന്‍റെ സ്മരണാര്‍ഥമുള്ള രാജീവ് ഗാന്ധി മെറിറ്റ് അവാര്‍ഡുദാന ചടങ്ങും ഉദ്ഘാടനം ചെയ്യുകയായിരുന്നു അദ്ദേഹം. പ്രസിഡന്‍റ് ബാബു കുട്ടന്‍ചിറ അധ്യക്ഷത വഹിച്ചു. ജോബ് മൈക്കിള്‍ എംഎല്‍എ, ജോസി സെബാസ്റ്റ്യന്‍, വി.ജെ. ലാലി, ജസ്റ്റിന്‍ ബ്രൂസ്, രാജീവ് മേച്ചേരി, സൈനാ തോമസ്, മേരിക്കുട്ടി ജോസഫ്, ജിന്‍സണ്‍ മാത്യു, സണ്ണി എത്തയ്ക്കാട്ട്, അഡ്വ. ബിപിന്‍ വര്‍ഗീസ്, മനുകുമാര്‍, റോസ്‌ലിന്‍ ഫിലിപ്പ് എന്നിവര്‍ പ്രസംഗിച്ചു.

രാമായണ മാസാചരണം: മുന്നൊരുക്കങ്ങള്‍ നടത്തി

പെരുവ: രാമായണ മാസാചരണത്തിന്‍റെ ഭാഗമായി നടക്കുന്ന നാലമ്പല തീര്‍ഥാടനത്തിന്‍റെ മുന്നൊരുക്കങ്ങള്‍ മുളക്കുളം ശ്രീലക്ഷ്മണ സ്വാമീക്ഷേത്രത്തില്‍ പൂര്‍ത്തിയായി. തിരുവിതാംകൂര്‍ ദേവസ്വം ബോര്‍ഡും ക്ഷേത്രോപദേശക സമിതിയും എറണാകുളം ജില്ലാ നാലമ്പല തീര്‍ഥയാത്ര സമിതിയുമായി സഹകരിച്ചാണ് ദശരഥി ക്ഷേത്രങ്ങളിലൊന്നായ മുളക്കുളം ശ്രീലക്ഷ്മണസ്വാമീ ക്ഷേത്രത്തില്‍ ഇതിനുള്ള ഒരുക്കങ്ങള്‍ നടത്തുന്നത്. ക്ഷേത്രത്തില്‍ നാലമ്പല തീര്‍ഥാടന സമിതിയും രൂപവത്കരിച്ചിട്ടുണ്ട്. നാലമ്പല തീര്‍ഥാടനത്തിന്‍റെ ഉദ്ഘാടനം ഇന്നു രാമമംഗലം മാമലശേരി ശ്രീരാമസ്വാമീ ക്ഷേത്രത്തില്‍ നടക്കും. വൈകുന്നേരം ആറിന് നടക്കുന്ന സമ്മേളനം ശബരിമല അയ്യപ്പസേവാസമാജം പ്രസിഡന്‍റ് പുണര്‍തം തിരുനാള്‍ നാരായണവര്‍മ ഉദ്ഘാടനം ചെയ്യും. നാലമ്പലസമിതി പ്രസിഡന്‍റ് എന്‍. രഘുനാഥ് അധ്യക്ഷത വഹിക്കും. മുന്‍ ഡിജിപി അലക്സാണ്ടര്‍ ജേക്കബ്, വിവിധ ജനപ്രതിനിധികള്‍ തുടങ്ങിയവര്‍ പങ്കെടുക്കും. 17 മുതല്‍ ഓഗസ്റ്റ് 16 വരെയാണ് നാലമ്പലദര്‍ശനവും രാമായണമാസാചരണവും. തീര്‍ഥാടനകാലത്ത് രാവിലെ മുതല്‍ ക്ഷേത്രത്തിലെത്തുന്ന ഭക്തര്‍ക്ക് ക്ഷേത്രോപദേശക സമിതി അന്നദാനവും നല്‍കും. നാലമ്പല ദര്‍ശനത്തിനായി വിവിധ ഡിപ്പോകളില്‍നിന്ന് ഭക്തരുടെ ആവശ്യാനുസരണം സര്‍വീസുകള്‍ നടത്താനുള്ള ക്രമീകരണം കെഎസ്ആര്‍ടിസിയും ഒരുക്കിയിട്ടുണ്ടെന്ന് നാലമ്പല സമിതി ഭാരവാഹികള്‍ അറിയിച്ചു.

മാധ്യമപ്രവര്‍ത്തകര്‍ക്കായി കുടുംബശ്രീ ശില്പശാല സംഘടിപ്പിച്ചു

കോട്ടയം: കുടുംബശ്രീയുടെ 27-ാം വാര്‍ഷികവുമായി ബന്ധപ്പെട്ട് കുടുംബശ്രീയുടെ പ്രവര്‍ത്തനങ്ങള്‍ക്കു കൂടുതല്‍ പ്രചാരണം ലഭിക്കുകയെന്ന ലക്ഷ്യത്തോടെ ജില്ലയിലെ മാധ്യമപ്രവര്‍ത്തകര്‍ക്കായി ശില്പശാല സംഘടിപ്പിച്ചു. കുടുംബശ്രീ ജില്ലാ മിഷന്‍റെ നേതൃത്വത്തില്‍ കോട്ടയം ഓര്‍ക്കിഡ് റെസിഡന്‍റ്സിയില്‍ നടന്ന ശില്പശാല ജില്ലാ പഞ്ചായത്ത് പ്രസിഡന്‍റ് ഹേമലതാ പ്രേംസാഗര്‍ ഉദ്ഘാടനം ചെയ്തു. കുടുംബശ്രീ ജില്ലാ മിഷന്‍ കോ-ഓർഡിനേറ്റര്‍ അഭിലാഷ് കെ. ദിവാകര്‍, ഐപിആര്‍ഡി അസിസ്റ്റന്‍റ് എഡിറ്റര്‍ ഇ.വി. ഷിബു, കോട്ടയം പ്രസ് ക്ലബ് പ്രസിഡന്‍റ് അനീഷ് കുര്യന്‍, കുടുംബശ്രീ സിഡിഎസ് ചെയര്‍പേഴ്സണ്‍മാരായ നളിനി ബാലന്‍, പി.ജി. ജ്യോതിമോള്‍, കുടുംബശ്രീ പിആര്‍ ഇന്‍റേണ്‍ വി.വി. ശരണ്യ, കുടുംബശ്രീ പ്രോഗ്രാം മാനേജര്‍ അനൂപ് ചന്ദ്രന്‍ എന്നിവര്‍ പ്രസംഗിച്ചു. ജില്ലയിലെ മാധ്യമപ്രവര്‍ത്തകര്‍, കുടുംബശ്രീ ജില്ലാ മിഷന്‍ ഉദ്യോഗസ്ഥര്‍, കുടുംബശ്രീ, സിഡിഎസ് അംഗങ്ങള്‍, കുടുംബശ്രീ സംരംഭകര്‍ എന്നിവര്‍ പങ്കെടുത്തു.

അമിത പലിശയ്ക്ക് പണം കടം കൊടുക്കുന്നയാൾ പിടിയിൽ

കുമരകം: ലൈസൻസില്ലാതെ അനധികൃതമായി അമിത പലിശ വാങ്ങി പണം കടം കൊടുക്കുന്നയാളെ കുമരകം പോലീസ് പിടികൂടി. തിരുവാർപ്പ് പഞ്ചായത്തിലെ ചെങ്ങളം ഇടശേരിമന ഭാഗത്ത് കണ്ണന്തറ രാജേഷ് എന്നയാളാണ് കുമരകം പോലീസിന്‍റെ പിടിയിലായത്. നിയമാനുസരണമുള്ള ലൈസന്‍സോ അധികാരപത്രങ്ങളോ ഇല്ലാതെ അമിത പലിശയ്ക്ക് പണം കടം കൊടുക്കുന്നതായി കുമരകം എസ്എച്ച്ഒ കെ. ഷിജിക്ക് ലഭിച്ച രഹസ്യവിവരത്തിന്‍റെ അടിസ്ഥാനത്തിൽ ജില്ലാ പോലീസ് മേധാവിയുടെ നിർദേശപ്രകാരം നടത്തിയ അന്വേഷണത്തിലാണ് ഇയാൾ പിടിയിലായത്. കുമരകം എസ്ഐ ഹരിഹരകുമാറിന്‍റെ നേതൃത്വത്തിൽ നടത്തിയ റെയ്ഡിൽ വീട്ടിൽനിന്നും പണം കടം കൊടുത്തതിന്‍റെ രേഖകൾ, ചെക്കുകൾ, പ്രോമിസറി നോട്ടുകൾ, മുദ്രപത്രം, കടം കൊടുക്കുന്നതിനായി കൈവശം സൂക്ഷിച്ചിരുന്ന നാലു ലക്ഷത്തോളം രൂപ എന്നിവ പിടിച്ചെടുത്തു. പ്രതിയുടെ അറസ്റ്റ് രേഖപ്പെടുത്തി വിവിധ വകുപ്പുകൾ പ്രകാരം കേസ് രജിസ്റ്റർ ചെയ്തു.

കുടകളും മഴക്കോട്ടുകളും സൗജന്യമായി നൽകി

ഏറ്റുമാനൂർ: ഏറ്റുമാനൂർ സർവീസ് സഹകരണ ബാങ്ക് കുട്ടികൾക്ക് കുടകളും ഹരിതകർമസേനയ്ക്ക് മഴക്കോട്ടുകളും സൗജന്യമായി നൽകി. ഏറ്റുമാനൂർ നഗരസഭയിലെ വിവിധ സ്കൂളുകളിൽനിന്നുള്ള അർഹതപ്പെട്ട വിദ്യാർഥികൾക്കാണ് കുടകളും ഉച്ചഭക്ഷണത്തിനുള്ള ധനസഹായവും നൽകിയത്. ബാങ്ക് പ്രസിഡന്‍റ് ബിജു കുമ്പിക്കൻ അധ്യക്ഷത വഹിച്ച യോഗത്തിൽ ജില്ലാ കളക്ടർ ജോൺ വി. സാമുവൽ വിതരണോദ്ഘാടനം നിർവഹിച്ചു. നഗരസഭാ ചെയർപേഴ്സൺ ലൗലി ജോർജ്, ആരോഗ്യ സ്റ്റാൻഡിംഗ് കമ്മിറ്റി ചെയർപേഴ്സൺ ബീന ഷാജി, കൗൺസിലർ പ്രിയ സജീവ്, ബാങ്ക് വൈസ് പ്രസിഡന്‍റ് സുശീല ചന്ദ്രസേനൻ നായർ, ബോർഡ് മെംബർമാരായ ചിറയിൽ സിബി, രാജു തോമസ്, സജി വള്ളോംകുന്നേൽ, ആർ. രവികുമാർ, കെ.എൻ. രഞ്ജിത്കുമാർ, ലിയോൺ ജോസ്, മായാദേവി ഹരികുമാർ, ജെസി ജോയി എന്നിവർ സന്നിഹിതരായിരുന്നു.

കുളത്തൂര്‍മൂഴി-പുന്നവേലി-നെടുംകുന്നം റൂട്ടില്‍ കെഎസ്ആര്‍ടിസി സര്‍വീസ് തുടങ്ങി

കറുകച്ചാല്‍: കുളത്തൂര്‍മൂഴി-പുന്നവേലി -നെടുംകുന്നം റൂട്ടില്‍ കെഎസ്ആര്‍ടിസി ബസ് സര്‍വീസ് ആരംഭിച്ചത് നാട്ടുകാര്‍ക്ക് ആശ്വാസവും ഒപ്പം ആവേശവുമായി. പുതുതായി എത്തിയ ബസ് സര്‍വീസിന് കഴിഞ്ഞദിവസം നാട്ടുകാരുടെ നേതൃത്വത്തില്‍ സ്വീകരണം നല്‍കി. പി.കെ. കര്‍മസമിതി, പുന്നവേലി വികസനസമിതി എന്നിവരുടെ നിവേദനത്തെത്തുടര്‍ന്ന് ഗവൺമെന്‍റ് ചീഫ് വിപ്പ് ഡോ.എന്‍. ജയരാജിന്‍റെ ഇടപെടലില്‍ ഗതാഗത മന്ത്രി കെ.ബി. ഗണേഷ്‌കുമാർ നിര്‍ദേശിച്ചതോടെയാ ണ് മല്ലപ്പള്ളി ഡിപ്പോയില്‍നിന്നും ബസ് സര്‍വീസ് ആരംഭിച്ചത്. അരനൂറ്റോണ്ടോളം ഈ റൂട്ടില്‍ സര്‍വീസ് നടത്തിയിരുന്ന സ്വകാര്യ ബസ് നിര്‍ത്തലാക്കിയതിനെത്തുടര്‍ന്നാണ് പുതിയ സര്‍വീസ് വേണമെന്ന ആവശ്യവുമായി നാട്ടുകാരും വിവിധ സന്നദ്ധ സംഘടനകളും രംഗത്തെത്തിയത്. ബസ് നിര്‍ത്തിയത് പുന്നവേലി, കുളത്തൂര്‍മൂഴി റൂട്ടിലെ യാത്രക്കാരെ ദുരിതത്തിലാക്കിയിരുന്നു. കെഎസ്ആര്‍ടിസി ബസ് സര്‍വീസ് ആരംഭിച്ചതോടെ ഈ പ്രദേശങ്ങളിലെ യാത്രാക്ലേശത്തിന് ഒട്ടൊക്കെ പരിഹാരമായി.

ലഹരിവിരുദ്ധ ചങ്ങലയും പൊതുസമ്മേളനവും നാളെ

ചങ്ങനാശേരി: കേരള സ്റ്റേറ്റ് ഭാരത് സ്‌കൗട്‌സ് ആന്‍ഡ് ഗൈഡ്‌സ് ചങ്ങനാശേരി ലോക്കല്‍ അസോസിയേഷന്‍റെ നേതൃത്വത്തില്‍ ലഹരിവിരുദ്ധ റാലിയും ബോധവത്കരണ സെമിനാറും നാളെ രാവിലെ ഒമ്പതിന് നടക്കും. നഗരസഭാധ്യക്ഷ കൃഷ്ണകുമാരി രാജശേഖരന്‍ റാലി ഫ്‌ളാഗ് ഓഫ് ചെയ്യും. നൂറുകണക്കിന് സ്‌കൗട്ട് ഗൈഡ് അംഗങ്ങള്‍ മനുഷ്യച്ചങ്ങല സൃഷ്ടിക്കും. തുടര്‍ന്ന് സെന്‍റ് ജോസഫ് ഹയര്‍ സെക്കന്‍ഡറി സ്‌കൂള്‍ ഓഡിറ്റോറിയത്തില്‍ ചേരുന്ന സമ്മേളനത്തില്‍ എഇഒ കെ.എ. സുനിത അധ്യക്ഷത വഹിക്കും. ജോബ് മൈക്കിള്‍ എംഎല്‍എ ഉദ്ഘാടനം ചെയ്യും. എക്‌സൈസ് പ്രിവന്‍റിവ് ഓഫീസര്‍ രാജേഷ് "യുവജനങ്ങളിലെ ലഹരി ഉപയോഗം’ എന്ന വിഷയത്തില്‍ സെമിനാര്‍ നയിക്കും. മുന്‍സിപ്പല്‍ കൗണ്‍സിലര്‍ ബീനാ ജോബി, ഡിസ്ട്രിക് കമ്മീഷണര്‍ ആന്‍സി മേരി ജോണ്‍, സിസ്റ്റര്‍ ധന്യ തെരേസ്, സിസ്റ്റര്‍ ലിറ്റി തെരേസ്, അമ്പിളി വി., എസ്.എ. രാജീവ്, നന്ദകുമാര്‍ സി., സുധീര്‍ പി.ആര്‍., ജോസഫ് വര്‍ഗീസ് എന്നിവര്‍ പ്രസംഗിക്കും.

എംടി കൃതികളുടെ പുനർവായന നടത്തി

തലയോലപ്പറമ്പ്: എം.ടി. വാസുദേവൻ നായരുടെ 92-ാമത് ജന്മദിനത്തോടനുബന്ധിച്ച് വൈക്കം മുഹമ്മദ് ബഷീർ സ്മാരക സമിതി, ബഷീർ അമ്മ മലയാളം, എം.ടി. ഫൗണ്ടേഷൻ എന്നിവയുടെ സംയുക്താഭിമുഖ്യത്തിൽ എം.ടി. കൃതികളുടെ പുനർവായന നടത്തി. തലയോലപ്പറമ്പ് ഫെഡറൽ നിലയത്തിൽ വൈക്കം മുഹമ്മദ് ബഷീർ സ്മാരക സമിതി ജനറൽ സെക്രട്ടറി പി.ജി. ഷാജിമോന്‍റെ അധ്യക്ഷതയിൽ നടന്ന യോഗം ലിറ്റററി ഫോട്ടോഗ്രാഫർ മനോജ് ഡി. വൈക്കം ഉദ്ഘാടനം ചെയ്തു. ഫെഡറൽ ബാങ്ക് ബ്രാഞ്ച് മാനേജർ എം.എസ്. ഇന്ദു, ബഷീർ കഥാപാത്രം സെയ്തു മുഹമ്മദ്, ഡി. കുമാരികരുണാകരൻ, എം.ജെ. ജോർജ്, തുളസി മധുസുദനൻനായർ, അഞ്ജലി വി. നായർ, കെ.പി. ആരതി എന്നിവർ എം.ടി. കൃതികളുടെ പുനർവായന നടത്തി.

പൊതുമരാമത്ത്, ജലവിഭവ വകുപ്പ് സംയുക്ത യോഗം ഇന്ന് കടുത്തുരുത്തിയില്‍

കടുത്തുരുത്തി: പൊതുമരാമത്ത് വകുപ്പിന്‍റെ കീഴിലുള്ള വിവിധ റോഡുകളുടെ പുനരുദ്ധാരണവും അറ്റകുറ്റപ്പണികളും സംബന്ധിച്ചു പരിശോധിക്കുന്നതിനും വാട്ടര്‍ അഥോറിറ്റിയുടെ നേതൃത്വത്തില്‍ നടപ്പാക്കുന്ന കുടിവെള്ള പദ്ധതികളുടെ നിര്‍വഹണവും പൂര്‍ത്തീകരണവും സംബന്ധിച്ചു തീരുമാനിക്കുന്നതിനുമായി കടുത്തുരുത്തി നിയോജകമണ്ഡലം അടിസ്ഥാനത്തിലുള്ള പ്രധാന ഉദ്യോഗസ്ഥരുടെയും പ്രവൃ‍ത്തികള്‍ ഏറ്റെടുത്തിട്ടുള്ള കരാറുകാരുടെയും സാന്നിധ്യത്തില്‍ ഇന്നു രാവിലെ 11 ന് കടുത്തുരുത്തി പിഡബ്ല്യുഡി റസ്റ്റ് ഹൗസ് കോണ്‍ഫറന്‍സ് ഹാളില്‍ മോന്‍സ് ജോസഫ് എംഎല്‍എയുടെ അധ്യക്ഷതയില്‍ യോഗം ചേരും. കടുത്തുരുത്തി നിയോജകമണ്ഡലത്തിന്‍റെ കീഴില്‍ വരുന്ന പഞ്ചായത്തുകളുടെ പരിധിയിലുള്ള എല്ലാ റോഡുകളുമായി ബന്ധപ്പെട്ടും കുടിവെള്ള പദ്ധതികള്‍ സംബന്ധിച്ചും പ്രത്യേകമായി ചര്‍ച്ച ചെയ്ത് ആവശ്യമായ തീരുമാനങ്ങളെടുക്കും.

സ്വര്‍ഗീയ മധ്യസ്ഥ തിരുനാളും സ്ഥാനാരോഹണച്ചടങ്ങും

കടുത്തുരുത്തി: സെന്‍റ് കുര്യാക്കോസ് പബ്ലിക് സ്‌കൂളിലെ സ്വര്‍ഗീയ മധ്യസ്ഥ തിരുനാളും സ്‌കൂള്‍ പാര്‍ലമെന്‍റംഗങ്ങളുടെയും ക്ലബ്ബ് ഭാരവാഹികളുടെയും സ്ഥാനാരോഹണച്ചടങ്ങും സ്‌കൂള്‍ ഓഡിറ്റോറിയത്തില്‍ നടന്നു. സ്‌കൂളിന്‍റെ സ്വര്‍ഗീയ മധ്യസ്ഥനായ വിശുദ്ധ കുര്യാക്കോസിന്‍റെ തിരുനാള്‍ ദിനമായ 15നാണ് വിവിധ കലാപരിപാടികളോടെ ചടങ്ങ് നടന്നത്. ഇതോടൊപ്പം സ്‌കൂള്‍ പാര്‍ലമെന്‍റ് മത്സരത്തിലൂടെ തെരഞ്ഞെടുക്കപ്പെട്ടവരുടെയും വിവിധ ക്ലബ്ബ് ഭാരവാഹികളുടെയും സ്ഥാനാരോഹണച്ചടങ്ങും നടന്നു. ആനിക്കാട് സെന്‍റ് ഗ്രിഗോറിയോസ് സിറിയന്‍ ഓര്‍ത്തഡോക്‌സ് ദയറാ സുപ്പീരിയര്‍ ഫാ. സിവേറിയസ് തോമസ് സ്വര്‍ഗീയ മധ്യസ്ഥ തിരുനാളിനോടനുബന്ധിച്ചുള്ള സന്ദേശം നല്‍കി. ഉഴവൂര്‍ മോട്ടോര്‍ വെഹിക്കിള്‍ ഇന്‍സ്‌പെക്ടര്‍ ബി. ജയപ്രകാശ് വിവിധ ഭാരവാഹികളുടെ സ്ഥാനാരോഹണച്ചടങ്ങിനു നേതൃത്വം നല്‍കി. പ്രിന്‍സിപ്പൽ‍ ഫാ. അജീഷ് കുഞ്ചിറക്കാട്ട് പ്രതിജ്ഞ ചൊല്ലിക്കൊടുത്തു. സ്‌കൂള്‍ മാനേജര്‍ ഫാ. ബിനോ ചേരിയില്‍ അധ്യക്ഷത വഹിച്ചു. സ്‌കൂളില്‍ 30 വര്‍ഷത്തെ സേവനം അനുഷ്ഠിച്ചു വിരമിക്കുന്ന മേഴ്‌സി സിറിയക്കിന് യാത്രയയപ്പ് നല്‍കി. പത്താം ക്ലാസ് പരീക്ഷയില്‍ റീ വാലുവേഷനിലൂടെ എല്ലാ വിഷയങ്ങള്‍ക്കും എ പ്ലസ് നേടിയ ആദില്‍ മുഹമ്മദിനെ ആദരിച്ചു. സ്‌കൂള്‍ അസിസ്റ്റന്‍റ് മാനേജര്‍ ഫാ. ജിന്‍സ് അലക്‌സാണ്ടര്‍, വൈസ് പ്രിന്‍സിപ്പല്‍ രഞ്ജി വില്‍സണ്‍, പിടിഎ പ്രസിഡന്‍റ് ജെന്നി റോബിന്‍, സ്‌കൂള്‍ ലീഡര്‍മാരായ ഡെയ്‌സ് ജന്‍സന്‍, റോസ് റോബിന്‍ തുടങ്ങിയവര്‍ പ്രസംഗിച്ചു. കുട്ടികളുടെ വിവിധ കലാപരിപാടികളും നടന്നു.

ഒരു മാസത്തിനിടെ നട്ടത് ഒരു ലക്ഷം തൈകള്‍

കോട്ടയം: ആഗോള പരിസ്ഥിതി ദിനത്തില്‍ കേരള സര്‍ക്കാര്‍ ആരംഭിച്ച ഒരു തൈ നടാം ജനകീയ വൃക്ഷവത്കരണ കാമ്പയിന്‍ ഒരു മാസം പിന്നിടുമ്പോള്‍ ജില്ലയില്‍ ഇതുവരെ നട്ടുപിടിപ്പിച്ചത് 1,01,148 വൃക്ഷത്തൈകള്‍. നാലുമാസം നീണ്ടുനില്‍ക്കുന്ന കാമ്പയിനില്‍ സംസ്ഥാനത്ത് ഒരു കോടി വൃക്ഷത്തൈകളും ജില്ലയില്‍ ഏഴര ലക്ഷം തൈകളും വച്ചുപിടിപ്പിക്കുകയാണ് ലക്ഷ്യം. ഹരിതകേരളം മിഷന്‍റെ ഏകോപനത്തില്‍ സാമൂഹ്യ വനവത്കരണവകുപ്പ്, ദേശീയ തൊഴിലുറപ്പ് പദ്ധതി, കുടുംബശ്രീ, ഹരിതകര്‍മസേന തുടങ്ങിയവയുടെ സഹകരണത്തോടെ തദ്ദേശ സ്വയംഭരണ സ്ഥാപനങ്ങളാണ് പദ്ധതി നടപ്പാക്കുന്നത്. വിദ്യാഭ്യാസ വകുപ്പിന്‍റെ സഹകരണത്തോടെ നടപ്പാക്കിയ ചങ്ങാതിക്കൊരു മരം കാമ്പയിനിലൂടെ പൊതുവിദ്യാലയങ്ങളിൽ ഇതുവരെ 60,600 തൈകളാണ് കുട്ടികള്‍ പരസ്പരം കൈമാറിയത്. ഇവ വീട്ടുപരിസരങ്ങളില്‍ സൗഹൃദ മരങ്ങളായി വളരും. കുട്ടികള്‍ തൈകളുടെ വളര്‍ച്ചാഘട്ടങ്ങള്‍ ഡയറിയില്‍ എഴുതി ക്ലാസുകളില്‍ വായിച്ച് അവതരിപ്പിക്കും. അണ്‍-എയ്ഡഡ് സ്‌കൂളുകളില്‍ ആരംഭിച്ച കാമ്പയിനിന്‍റെ ഭാഗമായി നടുന്ന തൈകള്‍ ശാസ്ത്ര സാങ്കേതിക സര്‍വകലാശാലയുടെ സഹായത്തോടെ ജിയോ ടാഗ് ചെയ്യുന്ന പ്രവര്‍ത്തനവും ആരംഭിക്കും. ഇതിനായി തയാറാക്കിയ പോര്‍ട്ടലില്‍നിന്ന് ട്രീ സര്‍ട്ടിഫിക്കറ്റ് ഡൗണ്‍ലോഡ് ചെയ്യാം. ആറുമാസത്തിലൊരിക്കല്‍ എന്‍ജിനിയറിംഗ് കോളജുകളിലെ എന്‍എസ്എസ് വോളണ്ടിയര്‍മാര്‍ സസ്യത്തിന്‍റെ വളര്‍ച്ച പോര്‍ട്ടലില്‍ പുതുക്കും. ആദ്യഘട്ടത്തില്‍ 10 ശതമാനം വൃക്ഷത്തൈകളാണ് ജിയോ ടാഗ് ചെയ്യുക.

കാട്ടുപന്നിശല്യത്തിനെതിരേ തദ്ദേശസ്ഥാപനങ്ങള്‍ സര്‍ക്കാര്‍ ഉത്തരവ് നടപ്പാക്കണം: ഇന്‍ഫാം

പാറത്തോട് (കാഞ്ഞിരപ്പള്ളി): ജനവാസമേഖലകളിലിറങ്ങി മനുഷ്യജീവനും സ്വത്തിനും നാശനഷ്ടങ്ങളുണ്ടാക്കുന്ന കാട്ടുപന്നികളെ വെടിവച്ചോ അനുവദനീയമായ മറ്റു മാര്‍ഗങ്ങളിലൂടെയോ തടയുന്നതിന് തദ്ദേശ സ്ഥാപനങ്ങള്‍ക്ക് സര്‍ക്കാര്‍ നല്‍കിയ ഉത്തരവാദിത്വം ഫലപ്രദമായി നടപ്പിലാക്കുന്നതില്‍ പഞ്ചായത്തു ഭരണസമിതികള്‍ വീഴ്ച വരുത്താന്‍ പാടില്ലെന്ന് ഇന്‍ഫാം ദേശീയ ചെയര്‍മാന്‍ ഫാ. തോമസ് മറ്റമുണ്ടയില്‍. ഇന്‍ഫാം കാഞ്ഞിരപ്പള്ളി കാര്‍ഷികജില്ല എക്സിക്യൂട്ടീവ് യോഗം ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം. മനുഷ്യവാസ മേഖലയിലെ ആളുകളുടെ ജീവനും സ്വത്തിനും കൃഷിക്കും ഭീഷണിയായ കാട്ടുപന്നികളെ വെടിവച്ച് കൊല്ലുന്നതിനുവേണ്ടി ലൈസന്‍സുള്ള ഷൂട്ടര്‍മാരെ നിയോഗിക്കാന്‍ കേരള ഗവണ്‍മെന്‍റിന്‍റെ ഡിസാസ്റ്റര്‍ മാനേജ്‌മെന്‍റ് ഡിപ്പാര്‍ട്ട്‌മെന്‍റിന്‍റെ ജിഒ (ആർടി) നന്പർ 108/2025/ ഡിഎംഡി ഉത്തരവു പ്രകാരം തദ്ദേശ സ്വയംഭരണ സ്ഥാപനങ്ങളുടെ അധ്യക്ഷന്മാര്‍ക്ക് അധികാരം നല്‍കിയിട്ടുണ്ട്. മുഖ്യമന്ത്രിയും വനംമന്ത്രിയും ഇക്കാര്യത്തില്‍ കര്‍ഷക അനുകൂലമായ നിലപാടുകള്‍ സ്വീകരിച്ചിട്ടും നടപടികള്‍ കൈക്കൊള്ളാത്ത പഞ്ചായത്തുകള്‍ അക്ഷന്തവ്യമായ കൃത്യവിലോപമാണ് ഇക്കാര്യത്തില്‍ സ്വീകരിക്കുന്നത്. ഈ ഉത്തരവ് ഫലപ്രദമായി നടപ്പാക്കാന്‍ പല തദ്ദേശ സ്ഥാപനങ്ങളും വേണ്ടത്ര ജാഗ്രത കാണിക്കുന്നില്ലെന്ന് വനംമന്ത്രിപോലും പരിതപിക്കുന്നതായി മാധ്യമങ്ങള്‍ റിപ്പോര്‍ട്ട് ചെയ്തിട്ടുണ്ട്. കാട്ടുപന്നികള്‍ മൂലമുള്ള അപകടങ്ങളും കൃഷിനാശവും തുടര്‍ച്ചയായി സംഭവിക്കുകയാണ്. കാട്ടുപന്നിശല്യം നിയന്ത്രിക്കുന്നതില്‍ ഉത്തരവാദിത്വം ഏറ്റെടുക്കാത്ത തദ്ദേശ സ്വയംഭരണസ്ഥാപനങ്ങളിലെ ജനപ്രതിനിധികള്‍ക്കെതിരേ കക്ഷിരാഷ്‌ട്രീയ ഭേദമെന്യേ അടുത്ത തെരഞ്ഞെടുപ്പില്‍ കര്‍ഷകര്‍ നിലപാടെടുക്കണം. തദ്ദേശ സ്വയംഭരണ സ്ഥാപനങ്ങളിലെ തെരഞ്ഞെടുപ്പിന് മുമ്പുള്ള ഈ നാളുകള്‍ പഞ്ചായത്തുകളുടെ നിലപാടുകളും നടപടികളും പഠിക്കുന്നതിനും പരസ്യമാക്കുന്നതിനും അത് പൊതുജന മധ്യേ എത്തിക്കുന്നതിനും ഇന്‍ഫാം പഞ്ചായത്തുകള്‍ തോറും ജാഗ്രതാസമിതികള്‍ രൂപീകരിച്ച് നിരീക്ഷണം നടത്തും. ഇപ്രകാരം നിരീക്ഷണം നടത്തുന്നതിനുവേണ്ടി ഇന്‍ഫാം കാര്‍ഷിക താലൂക്ക് എക്‌സിക്യൂട്ടീവ് അംഗങ്ങളെയും ഗ്രാമസമിതി എക്‌സിക്യൂട്ടീവ് അംഗങ്ങളെയും ചേര്‍ത്ത് താലൂക്ക് അടിസ്ഥാനത്തില്‍ ജാഗ്രതാസമിതികള്‍ രൂപീകരിക്കും. താലൂക്ക് ഡയറക്ടര്‍മാര്‍ പ്രസ്തുത സമിതികളുടെ രക്ഷാധികാരികളുംഓരോ താലൂക്കില്‍ നിന്നുള്ള ജില്ലാ എക്‌സിക്യൂട്ടീവ് അംഗങ്ങള്‍ അധ്യക്ഷന്മാരുമായിരിക്കുമെന്നും ഫാ. തോമസ് മറ്റമുണ്ടയില്‍ കൂട്ടിച്ചേര്‍ത്തു.യോഗത്തില്‍ ഇന്‍ഫാം കാഞ്ഞിരപ്പള്ളി കാര്‍ഷികജില്ല പ്രസിഡന്‍റ് അഡ്വ. എബ്രഹാം മാത്യു പന്തിരുവേലില്‍, കേരള സംസ്ഥാന സെക്രട്ടറി ഡോ.പി.വി. മാത്യു, നാഷണല്‍ എക്‌സിക്യൂട്ടീവ് അംഗങ്ങളായ ജെയ്‌സണ്‍ ചെംബ്ലായില്‍, നെല്‍വിന്‍ സി. ജോയ്, സംസ്ഥാന ട്രഷറര്‍ തോമസ് തുപ്പലഞ്ഞിയില്‍, ജില്ലാ ജോയിന്‍റ് ഡയറക്ടര്‍മാരായ ഫാ. റോബിന്‍ പട്രകാലായില്‍, ഫാ. ആല്‍ബിന്‍ പുല്‍ത്തകിടിയേല്‍, ഫാ. ജിന്‍സ് കിഴക്കേല്‍, സെക്രട്ടറി തോമസുകുട്ടി വാരണത്ത്, ജോയിന്‍റ് സെക്രട്ടറി ബോബന്‍ ഈഴക്കുന്നേല്‍ തുടങ്ങിയവര്‍ പ്രസംഗിച്ചു.

സിഎസ്ആർ വിഭാഗത്തിൽ വെള്ളക്കെട്ട്

ഗാന്ധിനഗര്‍: മെഡിക്കല്‍ കോളജ് ആശുപത്രിയില്‍ പുതിയ സര്‍ജറി ബ്ലോക്കില്‍ പ്രവര്‍ത്തനം തുടങ്ങിയ ശസ്ത്രക്രിയ ഉപകരണങ്ങള്‍ അണുവിമുക്തമാക്കുന്ന വിഭാഗത്തില്‍ (സിഎസ്ആര്‍) വെള്ളക്കെട്ട്. പുതിയ സര്‍ജറി ബ്ലോക്കിന്‍റെ എ വണ്‍ എന്ന കെട്ടിടത്തിലാണ് സിഎസ്ആര്‍ വിഭാഗം പ്രവര്‍ത്തിക്കുന്നത്. ഈ മുറിയുടെ മുകളിലത്തെ നിലയിലെ വാര്‍ഡുകളിലേക്കുള്ള വെള്ളം കടന്നുപോകുന്ന പൈപ്പ് പൊട്ടിയതാണ് വെള്ളക്കെട്ടിന് കാരണം. പൈപ്പ് പൊട്ടി വെള്ളം ചീറ്റിയതിന്‍റെ ശക്തിയില്‍ സിഎസ്ആര്‍ മുറിയുടെ സീലിംഗ് ഇളകി മാറി വെള്ളം താഴേക്ക് പതിക്കുകയായിരുന്നു. ആദ്യം വെള്ളം പതിച്ചപ്പോള്‍ ജീവനക്കാര്‍ ബക്കറ്റില്‍ പിടിക്കാന്‍ ശ്രമിച്ചെങ്കിലും സീലിംഗ് ഇളകി തകര്‍ന്ന് നിയന്ത്രണാതീതമായി വെള്ളം വീണ് മുറിയില്‍ വെള്ളക്കെട്ട് രൂപപ്പെടുകയായിരുന്നു. പഴയ സര്‍ജറി ബ്ലോക്കിലാണ് 10 മുതല്‍ 15 വരെയുള്ള വാര്‍ഡുകളും പ്രധാന ശസ്ത്രക്രിയ തിയറ്ററും സിഎസ്ആര്‍ വിഭാഗവും പ്രവര്‍ത്തിച്ചിരുന്നത്. 14-ാം വാര്‍ഡിന്‍റെ ശുചിമുറി തകര്‍ന്നുവീണ് തലയോലപ്പറമ്പ് സ്വദേശിനി ബിന്ദു മരിക്കാനിടയായതിനെത്തുടര്‍ന്ന് 10, 11, 14 എന്നീ വാര്‍ഡുകളും സിഎസ്ആര്‍ വിഭാഗവും പുതിയ സര്‍ജറി ബ്ലോക്കിലേക്ക് മാറ്റുകയായിരുന്നു. എന്നാല്‍ തിയറ്റിന്‍റെ പ്രവര്‍ത്തനം പുതിയ ബ്ലോക്കില്‍ തുടങ്ങിയില്ല. അത്യാഹിത വിഭാഗം കെട്ടിടത്തിലെ തിയറ്ററിലാണ് നിലവില്‍ ശസ്ത്രക്രിയ നടക്കുന്നത്.

കൈക്കൂലി: ഈരാറ്റുപേട്ട നഗരസഭയിലെ തേർഡ് ഗ്രേഡ് ഓവർസിയർ പിടിയിൽ

ഈരാറ്റുപേട്ട: ഈരാറ്റുപേട്ട നഗരസഭയിൽ കൈക്കൂലി വാങ്ങിയ തേർഡ് ഗ്രേഡ് ഓവർസിയർ പിടിയിലായി. പി.ജി. ജയേഷ് ആണ് വിജിലൻസിന്‍റെ പിടിയിലായത്. കെട്ടിട നിർമാണവുമായി ബന്ധപ്പെട്ട അനുമതിക്കായി 3,000 രൂപ കൈക്കൂലി വാങ്ങുമ്പോഴായിരുന്നു വിജിലൻസിന്‍റെ പിടിവീണത്. വിജിലൻസ് എസ്പി ആർ. ബിനുവിന്‍റെ നിർദേശപ്രകാരം ഡിവൈഎസ്പി പി.വി. മനോജ് കുമാർ, സിഐ മനു വി. നായർ എന്നിവരുൾപ്പെട്ട സംഘമാണ് ജയേഷിനെ പിടികൂടിയത്. കെട്ടിട പെർമിറ്റിനായി ഒരു വ്യക്തിയോട് ഇയാൾ 3,000 രൂപ കൈക്കൂലി ആവശ്യപ്പെടുകയായിരുന്നു. ഈ തുക ജയേഷിന്‍റെ സുഹൃത്തായ ദിലീപിന്‍റെ അക്കൗണ്ടിലേക്ക് ഗൂഗിൾ പേ ചെയ്യാനും ആവശ്യപ്പെട്ടു. തുടർന്ന് വിവരം പരാതിക്കാരൻ കോട്ടയം വിജിലൻസ് വിഭാഗത്തെ അറിയിക്കുകയായിരുന്നു. വിജിലൻസ് സംഘം ഇന്നലെ ഉച്ചകഴിഞ്ഞ് എത്തി ജയേഷനെ പിടികൂടുകയായിരുന്നു.

പിഎംജിഎസ്‌വൈ മൂന്നാം ഘട്ടം; 300 കോടി രൂപ അനുവദിച്ചെന്ന് ഫ്രാന്‍സിസ് ജോര്‍ജ് എംപി

കോട്ടയം: കേന്ദ്രാവിഷ്‌കൃത പദ്ധതിയായ പിഎംജിഎസ്‌വൈ മൂന്നാം ഘട്ടം പൂര്‍ത്തിയാക്കുന്നതിനായി കേരളത്തിന് 300 കോടി രൂപകൂടി കേന്ദ്ര ഗ്രാമവികസന വകുപ്പില്‍നിന്ന് അനുവദിച്ചതായി ഫ്രാന്‍സിസ് ജോര്‍ജ് എംപി അറിയിച്ചു. മൂന്നാം ഘട്ടത്തില്‍ നിര്‍മാണത്തിലിരിക്കുന്ന റോഡുകളുടെയും പാലങ്ങളുടെയും പൂര്‍ത്തീകരണത്തിനാണ് അധികത്തുക അനുവദിച്ചത്. മൂന്നാംഘട്ട പദ്ധതി 2024-25 വര്‍ഷത്തില്‍ പൂര്‍ത്തിയാക്കേണ്ടതായിരുന്നു. ഇതില്‍ പൂര്‍ത്തിയാകാത്ത പദ്ധതികളുടെ കാലാവധി ഒരു വര്‍ഷംകൂടി കേന്ദ്രസര്‍ക്കാര്‍ നീട്ടിയിരിക്കുകയാണ്. ഇനി കാലാവധി നീട്ടില്ലെന്ന് ഉത്തരവില്‍ പറയുന്നെന്നും എംപി പറഞ്ഞു. കേന്ദ്ര സര്‍ക്കാര്‍ വിഹിതം 60 ശതമാനവും സംസ്ഥാന സര്‍ക്കാര്‍ വിഹിതം 40 ശതമാനവും എന്ന നിരക്കിലാണ് ഈ പദ്ധതിക്കു വേണ്ടി ചെലവഴിക്കുന്നത്. ഇപ്പോള്‍ കേന്ദ്രസര്‍ക്കാര്‍ അനുവദിച്ച തുകയ്ക്ക് ആനുപാതികമായിട്ടുള്ള തുക സംസ്ഥാന സര്‍ക്കാര്‍ എത്രയും വേഗം അനുവദിച്ച് മുടങ്ങിക്കിടക്കുന്ന പദ്ധതികള്‍ സമയബന്ധിതമായി പൂര്‍ത്തിയാക്കണമെന്നും ഫ്രാന്‍സിസ് ജോര്‍ജ് എംപി ആവശ്യപ്പെട്ടു.

ഉമ്മന്‍ ചാണ്ടി അനുസ്മരണം; 18ന് രാഹുല്‍ ഗാന്ധി എത്തും

കോട്ടയം: മുന്‍ മുഖ്യമന്ത്രി ഉമ്മന്‍ ചാണ്ടിയുടെ രണ്ടാം ചരമവാര്‍ഷികം 18ന് പുതുപ്പള്ളില്‍ ആചരിക്കും. സെന്‍റ് ജോര്‍ജ് ഓര്‍ത്തഡോക്‌സ് പള്ളിയില്‍ രാവിലെ 6.30ന് പ്രഭാതനമസ്‌കാരം, ഏഴിന് വിശുദ്ധ കുര്‍ബാന, 8.15ന് കബറിങ്കല്‍ പ്രാര്‍ഥന. ഒന്‍പതിന് പള്ളിമൈതാനത്ത് പ്രത്യേകം പന്തലില്‍ നടക്കുന്ന അനുസ്മരണസമ്മേളനത്തില്‍ ലോക്‌സഭ പ്രതിപക്ഷ നേതാവ് രാഹുല്‍ ഗാന്ധി പങ്കെടുക്കും. കെപിസിസി പ്രസിഡന്‍റ് സണ്ണി ജോസഫിന്‍റെ അധ്യക്ഷതയില്‍ പ്രതിപക്ഷ നേതാവ് വി.ഡി. സതീശന്‍, രമേശ് ചെന്നിത്തല, തിരുവഞ്ചൂര്‍ രാധാകൃഷ്ണന്‍, ബസേലിയോസ് മാര്‍ത്തോമാ മാത്യൂസ് തൃതീയന്‍ കാതോലിക്കാ ബാവ, കര്‍ദിനാള്‍ മാര്‍ ജോര്‍ജ് ആലഞ്ചേരി തുടങ്ങി ഒട്ടേറെ പ്രമുഖര്‍ പങ്കെടുക്കും. 17ന് നെടുമ്പാശേരിയില്‍ വിമാനമാര്‍ഗം എത്തുന്ന രാഹുല്‍ഗാന്ധി അന്നു രാത്രി കുമരകം താജ് ഹോട്ടലില്‍ താമസിക്കും. 18നു രാവിലെ പുതുപ്പള്ളിയിലെത്തുന്ന രാഹുല്‍ ഗാന്ധി ആദ്യം കബറിങ്കല്‍ പുഷ്പാര്‍ച്ചന നടത്തും. തുടര്‍ന്ന് നേതാക്കള്‍ പുഷ്പാര്‍ച്ചന നടത്തും. തുടര്‍ന്നായിരിക്കും സമ്മേളനം. കെപിസിസിയും കോട്ടയം ഡിസിസിയും സംയുക്തമായി നടത്തുന്ന അനുസ്മരണ പരിപാടിയില്‍ പതിനായിരത്തിലധികം കോണ്‍ഗ്രസ് പ്രവര്‍ത്തകര്‍ പങ്കെടുക്കും. വിശാലമായ പന്തലാണു പുതുപ്പള്ളി പള്ളി മൈതാനത്ത് ഒരുങ്ങുന്നത്.

പാല്‍വില കൂട്ടിയേക്കില്ല; ക്ഷീരകര്‍ഷകര്‍ക്കു തിരിച്ചടി

കോട്ടയം: കനത്ത പ്രതിന്ധിയില്‍ നട്ടംതിരിയുന്ന ക്ഷീരകര്‍ഷകര്‍ക്കു വീണ്ടും നിരാശയായി. പാല്‍വില കൂട്ടേണ്ടെന്ന് തീരുമാനം. പശുക്കളെ വളര്‍ത്തുന്നതിനുള്ള ചെലവും കാലിത്തീറ്റ ഉള്‍പ്പെടെയുള്ളവയുടെ വിലയും വര്‍ധിച്ചതോടെ ക്ഷീരമേഖലയില്‍നിന്ന് കര്‍ഷകര്‍ പിന്‍വാങ്ങുകയാണ്. ഇതിനെല്ലാം പുറമെ പശുക്കള്‍ക്ക് ആവശ്യമായ മരുന്നുകളുടെ വിലയും വര്‍ധിച്ചുവരുന്നതും കര്‍ഷകര്‍ക്കു തിരിച്ചടിയാണ്. ഈ സാഹചര്യത്തില്‍ ഇന്നലെ ചേര്‍ന്ന മില്‍മ ബോര്‍ഡ് യോഗത്തില്‍ പാല്‍വില വര്‍ധിപ്പിക്കാന്‍ തീരുമാനമുണ്ടാകുമെന്നാണ് കര്‍ഷകര്‍ പ്രതീക്ഷിച്ചിരുന്നത്. എന്നാല്‍ പാല്‍വില വര്‍ധിപ്പിക്കേണ്ടെന്നാണ് യോഗത്തില്‍ തീരുമാനിച്ചത്. വിവിധ മേഖല യൂണിയനുകളുടെ നിര്‍ദേശം ചര്‍ച്ച ചെയ്യാനാണ് മില്‍മ ഭരണസമിതി ഇന്നലെ യോഗം ചേര്‍ന്നത്. തിരുവനന്തപുരം, എറണാകുളം, മലബാര്‍ യൂണിയനുകള്‍ പാല്‍ വില കൂട്ടാന്‍ ശിപാര്‍ശ ചെയ്തിരുന്നു. പാല്‍വില 60 രൂപയാക്കണമെന്നായിരുന്നു ശിപാര്‍ശ. എന്നാല്‍ ഇപ്പോഴത്തെ സാഹചര്യത്തില്‍ വില വര്‍ധിപ്പിക്കണ്ടെന്ന തീരുമാനമാണ് ബോര്‍ഡ് യോഗം കൈക്കൊണ്ടത്. ഒടുവില്‍ 2022 ഡിസംബറിലാണ് സംസ്ഥാനത്ത് പാല്‍ വില കൂട്ടിയത്. ക്ഷീരമേഖലയില്‍നിന്ന് വലിയ തോതില്‍ കര്‍ഷകരുടെ കൊഴിഞ്ഞുപോക്ക് തുടരുമ്പോഴും ഇവരെ പിടിച്ചുനിര്‍ത്താന്‍ സര്‍ക്കാര്‍ ഭാഗത്തുനിന്നു യാതൊരു നടപടികളുമുണ്ടാകുന്നില്ല. ഈ സാഹചര്യത്തിലാണ് മില്‍മ എറണാകുളം, തിരുവനന്തപുരം യൂണിയനുകള്‍ പാല്‍വില വര്‍ധിപ്പിക്കണമെന്ന് ആവശ്യപ്പെട്ടത്. വില വര്‍ധിപ്പിക്കാന്‍ അടിയന്തര നടപടി സ്വീകരിക്കാതിരുന്നത് ക്ഷീരകര്‍ഷകരോട് കാണിച്ച കടുത്ത വഞ്ചനയാണെന്നാണ് കര്‍ഷകര്‍ ആരോപിക്കുന്നത്. വിലവര്‍ധനവ് പഠിക്കാന്‍ വിദഗ്ധ സമിതിയെ നിയോഗിക്കുക മാത്രമാണ് ബോര്‍ഡ് യോഗത്തിൽ തീരുമാനിച്ചത്. മൃഗസംരക്ഷണ വകുപ്പിന്‍റെ നിയന്ത്രണത്തിലുള്ള പശു വളര്‍ത്തല്‍ കേന്ദ്രങ്ങളില്‍ പാല്‍ വില്പന വില മാസങ്ങള്‍ക്ക് മുന്‍പുതന്നെ ലിറ്ററിന് 60 രൂപയാക്കിയിരുന്നു മില്‍മയുടെ നിയന്ത്രണത്തിലുള്ള ക്ഷീര സംഘങ്ങളില്‍നിന്നു നേരിട്ടുപാല്‍ വാങ്ങിയാല്‍ 60രൂപ കൊടുക്കണം. തദേശ സ്വയംഭരണ തെരഞ്ഞെടുപ്പ് മുന്നില്‍ കണ്ടാണ് വിലവര്‍ധിപ്പിക്കാതെന്നും ഇതു ക്ഷീരമേഖലയിലെ തകര്‍ക്കുമെന്നും കര്‍ഷകര്‍ പറയുന്നു.

മുണ്ടക്കയം പുത്തൻചന്തയിൽ 11 പേർക്ക് മഞ്ഞപ്പിത്തം

മുണ്ടക്കയം: പുഞ്ചവയലിന് പിന്നാലെ ആശങ്കയുയർത്തി മുണ്ടക്കയത്തും മഞ്ഞപ്പിത്തം പടരുന്നു. മുണ്ടക്കയം പുത്തൻചന്ത മേഖലയിലാണ് 11 പേർക്ക് മഞ്ഞപ്പിത്തം സ്ഥിരീകരിച്ചിരിക്കുന്നത്. പ്രദേശത്തെ നാല് കിണറുകളിൽനിന്നുള്ള വെള്ളം ഉപയോഗിച്ചവർക്കാണ് രോഗം ബാധിച്ചതെന്നാണു സംശയം. മുണ്ടക്കയം ടൗണിനോട് ചേർന്ന് നൂറുകണക്കിന് കുടുംബങ്ങൾ തിങ്ങിപ്പാർക്കുന്ന പുത്തൻചന്ത മേഖലയിൽ മഞ്ഞപ്പിത്തം പടരുന്നത് വലിയ ആശങ്കയ്ക്ക് ഇടയാക്കിയിരിക്കുകയാണ്. രോഗം പടരാതിരിക്കാൻ പ്രതിരോധ നടപടികൾ ആരംഭിച്ചതായി ആരോഗ്യവകുപ്പ് അറിയിച്ചു. മുണ്ടക്കയം, കോരുത്തോട് പഞ്ചായത്തുകളിൽപ്പെട്ട പുഞ്ചവയൽ, 504 മേഖലകളിൽ കഴിഞ്ഞ മൂന്നുമാസമായി മഞ്ഞപ്പിത്തം പടർന്നുപിടിക്കുകയാണ്. ഈ പ്രദേശത്ത് നിരവധി ആളുകൾക്കാണ് മഞ്ഞപ്പിത്തം പിടിപെട്ടത്. ഇതിൽ രണ്ടുപേരുടെ ആരോഗ്യനില ഇപ്പോഴും ഗുരുതരമായി തുടരുകയാണ്. ഇതിൽ ഒരാളുടെ കരൾ മാറ്റിവയ്ക്കുകയും ചെയ്തു. ആദ്യം പുഞ്ചവയൽ ടൗണിലാണ് മഞ്ഞപ്പിത്തം സ്ഥിരീകരിച്ചത്. പിന്നീട് കോരുത്തോട് പഞ്ചായത്തിലെ 504 മേഖലയിലേക്ക് വ്യാപിക്കുകയായിരുന്നു. ഇപ്പോഴും പുഞ്ചവയലിൽ ആളുകൾക്ക് മഞ്ഞപ്പിത്തം പിടിപെടുന്നുണ്ട്. ഇതിനു പിന്നാലെയാണ് ഇപ്പോൾ മുണ്ടക്കയം പുത്തൻചന്തയിലും മഞ്ഞപ്പിത്തബാധ സ്ഥിരീകരിച്ചിരിക്കുന്നത്. ഇതു മേഖലയെ കൂടുതൽ ആശങ്കയിലാഴ്ത്തുകയാണ്. ആരോഗ്യവകുപ്പിന്‍റെ നേതൃത്വത്തിൽ രോഗവ്യാപനം തടയുന്നതിന് കർശന നടപടി സ്വീകരിക്കണമെന്ന ആവശ്യവും ഉയരുന്നുണ്ട്.

"മികവ് 2025' ജേതാക്കൾക്ക് ആദരവ്

ഇളങ്ങോയി: കത്തോലിക്ക കോൺഗ്രസ്‌ ഇളങ്ങോയി യൂണിറ്റിന്‍റെ ആഭിമുഖ്യത്തിൽ നടത്തിയ "മികവ് 2025'ൽ പത്ത്, പ്ലസ് ടു പരീക്ഷകളിൽ ഉന്നത വിജയം കരസ്ഥമാക്കിയ വിദ്യാർഥികളെ മെമന്‍റോയും കാഷ് അവാർഡും നൽകി ആദരിച്ചു. വിശ്വാസപരിശീലന രംഗത്ത് 25 വർഷം പൂർത്തിയാക്കിയ മതാധ്യാപകരായ ബിജു ആലപ്പുരയ്ക്കൽ, വത്സമ്മ ആന്‍റണി പഴയവീട്ടിൽ, ത്രേസ്യാമ്മ സ്കറിയ മാമ്പുഴയ്ക്കൽ എന്നിവരെയും യോഗത്തിൽ ആദരിച്ചു. ഇളങ്ങോയി പാരിഷ് ഹാളിൽ ചേർന്ന സമ്മേളനം കത്തോലിക്ക കോൺഗ്രസ്‌ രൂപത ഡയറക്ടർ ഫാ. ജസ്റ്റിൻ മതിയത്ത് ഉദ്ഘാടനം ചെയ്തു. യൂണിറ്റ് പ്രസിഡന്‍റ് ടിന്‍റു വിറകൊടിയനാൽ അധ്യക്ഷത വഹിച്ചു. യൂണിറ്റ് ഡയറക്ടർ ഫാ. മാത്യു പുത്തൻപറമ്പിൽ അനുഗ്രഹപ്രഭാഷണം നടത്തി. ഇളങ്ങോയി ഹോളിഫാമിലി സ്കൂൾ പ്രിൻസിപ്പൽ ഫാ. ഡെന്നോ മരങ്ങാട്ട്, കത്തോലിക്ക കോൺഗ്രസ്‌ ഗ്ലോബൽ വൈസ് പ്രസിഡന്‍റ് ജോമി കൊച്ചുപറമ്പിൽ, രൂപത ജനറൽ സെക്രട്ടറി ജോസഫ് പണ്ടാരക്കളം, രൂപത സെക്രട്ടറി ബിജു ആലപ്പുരയ്ക്കൽ, യൂണിറ്റ് ഭാരവാഹികളായ ജേക്കബ് ചെരിപുറം, ജയ്മോൻ കുരിശുംമൂട്ടിൽ, ജോമി കുംബ്ലാനിക്കൽ, പ്രഭാത് കൈപ്പൻപ്ലാക്കൽ എന്നിവർ പ്രസംഗിച്ചു.

കാഞ്ഞിരപ്പള്ളി-മണിമല-കുളത്തൂര്‍മൂഴി കര്‍ഷക സൗഹൃദ ലിങ്ക് റോഡിന്‍റെ അവസാനവട്ട സർവേ ആരംഭിച്ചു

കാഞ്ഞിരപ്പള്ളി: കാഞ്ഞിരപ്പള്ളി-മണിമല-കളത്തൂര്‍മൂഴി കര്‍ഷക സൗഹൃദ ലിങ്ക് റോഡിന്‍റെ അവസാന വട്ട സർവേ ജോലികൾ ആരംഭിച്ചു. നിർമാണ പ്രവർത്തനങ്ങൾ ആരംഭിക്കും മുന്പുള്ള സർവേ ജോലികളാണ് നടത്തുന്നത്. കേരള റോഡ് ഫണ്ട് ബോർഡിന്‍റെ മേൽനോട്ടത്തിൽ പദ്ധതിയുടെ കരാർ ഏറ്റെടുത്ത റാന്നി കേന്ദ്രമായുള്ള ബഗോറ കമ്പനിയുടെ ജീവനക്കാരാണ് സർവേ ജോലികൾ നടത്തുന്നത്. മുന്പ് സ്ഥാപിച്ച സർവേ കല്ലുകളിൽ ചിലത് നഷ്ടപ്പെട്ട സ്ഥിതിയുണ്ട്. ചിലത് വാഹനങ്ങളിടിച്ചും മറ്റും സ്ഥാനംതെറ്റിയ നിലയിലാണ്. ഈ സ്ഥലങ്ങൾ വീണ്ടും കണ്ടെത്തി അടയാളപ്പെടുത്തുന്നതിന്‍റെ ഭാഗമായാണ് അവസാനവട്ട സർവേ നടത്തുന്നത്. കാഞ്ഞിരപ്പള്ളിയിൽ മണിമല റോഡ് ആരംഭിക്കുന്നിടത്തുനിന്നാണ് സർവേ നടപടികൾ ആരംഭിച്ചിരിക്കുന്നത്. ഇതിനൊപ്പം മണ്ണനാനി മുതൽ നിലവിലുള്ള കലുങ്കുകളുടെ വൃത്തിയാക്കലും ആരംഭിച്ചിട്ടുണ്ട്. സർവേ പൂർത്തിയായാലുടൻ നിർമാണ ജോലികൾ ആരംഭിക്കും. കാഞ്ഞിരപ്പള്ളി മുതൽ മണ്ണനാനിവരെയുള്ള 6.95 കിലോമീറ്റർ ദൂരം ആദ്യ ഘട്ടത്തിലും മണിമല മുതൽ കുളത്തൂർമൂഴി വരെയുള്ള 11.45 കിലോമീറ്റർ ദൂരം രണ്ടാം ഘട്ടത്തിലും പുനർനിർമിക്കും. കാഞ്ഞിരപ്പള്ളി-മണിമല-കുളത്തൂര്‍മൂഴിവരെയുള്ള നിലവിലെ റോഡിന്‍റെ സെന്‍റര്‍ലൈന്‍ നിലനിര്‍ത്തി പരമാവധി വളവുകള്‍ നിവര്‍ത്തി ആധുനിക നിലവാരത്തിലായിരിക്കും നിർമാണം. രണ്ടു വശങ്ങളിലും ഫുട്പാത്തിന് പുറമേ വാട്ടര്‍ അഥോറിറ്റി, കെഎസ്ഇബി, ടെലിഫോണ്‍ എന്നിവയുടെ യൂട്ടിലിറ്റി സൗകര്യവും മറ്റ് ആധുനിക റോഡ് സുരക്ഷാ സാമഗ്രികളും ഇതിനോടൊപ്പം ഉള്‍പ്പെടുത്തും. കേരള റോഡ് ഫണ്ട് ബോര്‍ഡിനാണ് പദ്ധതിയുടെ നിര്‍മാണച്ചുമതല. കിഫ്ബിയാണ് പദ്ധതിക്കാവശ്യമായ തുക അനുവദിച്ചത്. 85.81 കോടി രൂപയ്ക്കാണ് പദ്ധതി ടെൻഡർ നൽകിയിരിക്കുന്നത്. നിലവിലെ റോഡിന്‍റെ വീതി എട്ടു മീറ്റര്‍ എന്നത് പത്തു മീറ്ററാക്കി വർധിപ്പിച്ചാണ് നിർമാണം. ഇതിനാവശ്യമായ സ്ഥലം സങ്കീര്‍ണമായ സ്ഥലമേറ്റെടുക്കല്‍ നടപടികളിലേക്ക് പോകാതെ സൗജന്യമായി വിട്ടുതരാന്‍ വസ്തു ഉടമകള്‍ തയാറായിരുന്നു.

ബ്രോൺ പ്രിവിലേജ് കാർഡ് പദ്ധതി ഉദ്ഘാടനം

മണിമല: ചെത്തിപ്പുഴ സെന്‍റ് തോമസ് ആശുപത്രിയുടെ ബ്രോൺ പ്രിവിലേജ് കാർഡ് മണിമല ഹോളി മാഗി ഫൊറോന പള്ളി മാതൃ-പിതൃവേദി അംഗങ്ങൾക്ക് നൽകും. ഒപി മുതൽ എല്ലാ ചികിത്സകൾക്കും 25 ശതമാനം വരെ ഡിസ്കൗണ്ട് നൽകുന്ന പദ്ധതിയാണിത്. മാതൃ-പിതൃവേദി സംഘടനകളിലെ സജീവ അംഗങ്ങൾക്കും അവരുടെ കുടുംബങ്ങൾക്കും ഇതുകൊണ്ട് പ്രയോജനം ലഭിക്കും. ബ്രോൺ പ്രിവിലേജ് കാർഡ് പദ്ധതി ഉദ്ഘാടനം ചങ്ങനാശേരി അതിരൂപത വികാരി ജനറാൾ ഫാ. സ്‌കറിയ കന്യാകോണിൽ നിർവഹിച്ചു. വികാരി ഫാ. ഏബ്രഹാം തയ്യിൽ നെടുംപറമ്പിൽ അധ്യക്ഷത വഹിച്ചു. അസി. വികാരി ഫാ. ബിനു ചിറയിൽ, പിതൃവേദി പ്രസിഡന്‍റ് ജോസഫ് ആന്‍റണി ആലപ്പാട്ട്, മാതൃവേദി പ്രസിഡന്‍റ് കുസുമം അലക്സ്, പിതൃവേദി ഫൊറോന പ്രസിഡന്‍റ് ജോബി പുളിമൂട്ടിൽ, മാതൃവേദി ഫൊറോന പ്രസിഡന്‍റ് മിനിമോൾ ജോസഫ്, സെക്രട്ടറി സിമി അലോഷ്യസ്, പാലിയേറ്റീവ് കെയർ ലീഡർ ഷേർലി ലാലിച്ചൻ എന്നിവർ പ്രസംഗിച്ചു. ബ്രോൺ പ്രവിലേജ് കാർഡ് മണിമല സെന്‍റ് തോമസ് ഹെൽത്ത്‌ സെന്‍റർ പിആർഒ എബിൻ ജയിംസ് യൂണിറ്റ് ഡയറക്ടർ ഫാ. ഏബ്രഹാം തയ്യിൽ നെടുംപറമ്പിലിനു കൈമാറി. ഇടവകയുടെ അതിർത്തിവരെയുള്ള കുടുംബങ്ങളിൽ മാതൃ-പിതൃവേദി അംഗങ്ങൾ സന്ദർശനം നടത്തും. കിടപ്പുരോഗികൾക്ക് പ്രത്യേക പരിഗണന നൽകും. രോഗീപരിചരണത്തിനായി റിട്ടയേർഡ് നഴ്സുമാർ ഉൾപ്പെടെ വിവിധ സംഘങ്ങളെ ഉൾപ്പെടുത്തി ഇടവകയിലെ കുടുംബക്കൂട്ടായ്മ അടിസ്ഥാനത്തിൽ എട്ടു മേഖലകളായി തിരിച്ചുള്ള പ്രവർത്തനങ്ങൾക്കാണ് പദ്ധതി തയാറാക്കുന്നതെന്നു വികാരി ഫാ. ഏബ്രഹാം തയ്യിൽ നെടുംപറമ്പിൽ പറഞ്ഞു.

പൊന്തൻപുഴയിലും ഓലക്കുളത്തും പുലി സാന്നിധ്യമെന്ന്

എരുമേലി: മുക്കൂട്ടുതറയ്ക്ക് സമീപം പത്തനംതിട്ട ജില്ലയിലെ ഓലക്കുളം തലമുട്ടിയാനി ഭാഗത്തും പുനലൂർ-മൂവാറ്റുപുഴ ഹൈവേയിൽ മണിമലയ്ക്കടുത്ത് വലിയകാവ്-പൊന്തൻപുഴ റോഡിലും പുലിയെ കണ്ടെന്ന് നാട്ടുകാർ അറിയിച്ചതിനെത്തുടർന്ന് ആർആർടി ടീമെത്തി പരിശോധന നടത്തി. മഴ പെയ്തതുമൂലം വന്യജീവി ഏതാണെന്നു സ്ഥിരീകരിക്കാൻ കാൽപ്പാടുകൾ കണ്ടെത്താനായില്ല. നാട്ടുകാർ ജാഗ്രത പാലിക്കണമെന്ന് വനപാലകർ നിർദേശിച്ചു. വലിയകാവ്-പൊന്തൻപുഴ റോഡിൽ തെരുവുനായ്ക്കളുടെ എണ്ണം കുറഞ്ഞത് പുലിയുടെ സാന്നിധ്യത്തെ ബലപ്പെടുത്തുന്നതാണെന്നാണ് വനപാലകരുടെ നിഗമനം. വളർത്തുമൃഗങ്ങളെ കാണാതായാൽ ഉടൻ വിവരം അറിയിക്കണം. രാത്രികാലത്തുള്ള ഇരുചക്ര വാഹനയാത്ര പരമാവധി ഒഴിവാക്കണമെന്നും മുന്നറിയിപ്പ് നൽകുന്നുണ്ട്.

പുലിക്കെണി റെഡി: നിരീക്ഷണത്തിന് കാമറകളും 40 അംഗ സംഘവും

മുക്കൂട്ടുതറ: കാൽപ്പാടുകൾ പുലിയുടേതോ കടുവയുടേതോ എന്നതിൽ സ്ഥിരീകരണമായി ല്ലെങ്കിലും കൂട് വയ്ക്കുന്നതിനു നടപടിക്രമങ്ങൾ തടസം നിന്നില്ല. അതുകൊണ്ടുതന്നെ വന്യജീവിയുടെ കാൽപ്പാടുകൾ കണ്ട് 24 മണിക്കൂറിനുള്ളിൽ ചാത്തൻതറ താന്നിക്കാപുഴയിലെ നെല്ലിശേരിപ്പാറ എക്സ്-സർവീസ് മെൻ റബർത്തോട്ടത്തിൽ വനംവകുപ്പിൽനിന്നു കൂടെത്തി. ഒപ്പം നിരീക്ഷണ കാമറകളും സ്ഥാപിച്ചു. നാട്ടുകാരുടെ സഹായത്തോടെ ഇന്നലെ ഉച്ചയ്ക്കാണ് കൂട് സ്ഥാപിച്ചത്. വാഹന സഞ്ചാര യോഗ്യമല്ലാത്ത വഴിയായതിനാൽ ഇരുമ്പിന്‍റെ വലിയ കൂട് ചുമന്ന് എത്തിക്കേണ്ടി വന്നു. കൂടിനുള്ളിൽ വന്യ ജീവിയെ ആകർഷിച്ചെത്തിക്കാൻ ഒരു വളർത്തുനായയെ കെട്ടിയിട്ടുണ്ട്. പ്രമോദ് നാരായൺ എംഎൽഎ, വെച്ചൂച്ചിറ പഞ്ചായത്ത്‌ പ്രസിഡന്‍റ് ഇ.വി. വർക്കി, പഞ്ചായത്തംഗങ്ങൾ, വിവിധ രാഷ്‌ട്രീയകക്ഷി നേതാക്കൾ, നാട്ടുകാർ ഉൾപ്പെടെ നിരവധി പേരുടെ സാന്നിധ്യത്തിലാണ് കൂട് സ്ഥാപിച്ചത്. റാന്നി ഫോറസ്റ്റ് റേഞ്ച് ഓഫീസർ ബി.ആർ. ജയന്‍റെ നേതൃത്വത്തിൽ വനം വകുപ്പിലെ ദ്രുതകർമസേനാംഗങ്ങൾ ചേർന്നാണ് കൂട് വച്ചത്. കരികുളം, കണമല ഫോറസ്റ്റ് സ്റ്റേഷൻ ഉദ്യോഗസ്ഥർ, റാന്നി റാപ്പിഡ് റെസ്പോൺസ് ടീം എന്നിവർ പ്രവർത്തനങ്ങൾ ഏകോപിപ്പിച്ചു. വെച്ചൂച്ചിറ പഞ്ചായത്തിന്‍റെ വിവിധ സ്ഥലങ്ങളിൽ പുലിയെ കണ്ടെന്ന് നാട്ടുകാർ അറിയിച്ചതിനെ തുടർന്ന് നിരവ്, നൂറേക്കാട്, നെല്ലിശേരപ്പാറ ഭാഗങ്ങളിൽ ഫോറസ്റ്റ് ഉദ്യോഗസ്ഥ സംഘം ഇന്നലെ പരിശോധന നടത്തി. ഈ പ്രദേശങ്ങളിൽ പുലിയുടെ സാന്നിധ്യമുണ്ടെന്ന് വനം കുപ്പ് സ്ഥിരീകരിച്ചിട്ടുണ്ടെന്ന് റേഞ്ച് ഓഫീസർ ബി.ആർ. ജയൻ അറിയിച്ചു. കഴിഞ്ഞ ദിവസം രാവിലെ ആറോടെ ടാപ്പിംഗ് തൊഴിലാളി കക്കുടുമണ്ണ് സ്വദേശി രാജനാണ് ടാപ്പിംഗിനിടെ പുലിയെ കണ്ടത്. അതേസമയം, പരിശോധനയിൽ കണ്ടെത്തിയ കാൽപ്പാടുകൾ 12 സെന്‍റിമീറ്ററോളം ഉള്ളതാണ്. പുലിയുടെ കാൽപ്പാടുകൾ പത്തുമുതൽ 12 സെന്‍റിമീറ്റർ വരെയാണെന്നും 12 സെന്‍റിമീറ്റർ മുതലുള്ള കാൽപ്പാടുകൾ കടുവയുടെ ആകാമെന്നും വനംവകുപ്പിൽ സംശയമുണ്ട്. പുലി ആണെങ്കിലും അതല്ല കടുവ ആണെങ്കിലും പ്രദേശം വിട്ട് ദൂരത്തേക്ക് പോയിട്ടില്ലെന്നാണ് നിഗമനം. റബർത്തോട്ടത്തിനടുത്താണ് പെരുന്തേനരുവിയുടെ സമീപപ്രദേശങ്ങളും വനവും. പൊന്തക്കാടുകൾ തെളിക്കും മേഖലയിലെ പറമ്പുകളിലെയും തോട്ടങ്ങളിലെയും വളർന്നു നിൽക്കുന്ന പൊന്തക്കാടുകൾ അടിയന്തരമായി തെളിക്കാൻ ഇന്നലെ വെച്ചൂച്ചിറ പഞ്ചായത്ത്‌ ഹാളിൽ ചേർന്ന ജാഗ്രതാ സമിതി യോഗത്തിൽ തീരുമാനമായി. കാട് വെട്ടാൻ സാമ്പത്തിക പ്രയാസമുള്ളവർ വിവരം അറിയിച്ചാൽ ജനകീയ സമിതി എത്തി കാട് തെളിക്കാനും യോഗത്തിൽ തീരുമാനമായി. മേഖലയിൽ വനംവകുപ്പും ദ്രുതകർമസേനയും നിരീക്ഷണത്തിനുണ്ടാകുമെന്ന് ജാഗ്രതാസമിതി യോഗത്തിൽ പ്രമോദ് നാരായൺ എംഎൽഎ അറിയിച്ചു. വനംവകുപ്പിൽനിന്നുള്ള 40 അംഗ സംഘം നാല് ടീമുകളായി നിരീക്ഷണം നടത്തുമെന്ന് യോഗത്തിൽ പങ്കെടുത്ത റേഞ്ച് ഓഫീസർ ബി.ആർ. ജയൻ അറിയിച്ചു. ഓരോ ടീമിലും പത്ത് പേർ വീതമുണ്ടാകും. വനപാലകർക്ക് പുറമേ പരിശീലനം നേടിയ ആർആർടി അംഗങ്ങൾ ടീമിലുണ്ട്. രാത്രിയിൽ പട്രോളിംഗ് ഉണ്ടാകും. രാത്രിയിൽ പുറത്തിറങ്ങരുതെന്ന് ജനങ്ങൾക്ക് മുന്നറിയിപ്പ് നൽകാനും യോഗം തീരുമാനിച്ചു. സംശയകരമായ കാര്യങ്ങൾ ശ്രദ്ധയിൽപ്പെട്ടാൽ ജാഗ്രതാസമിതിയെ അപ്പോൾ തന്നെ അറിയിക്കണമെന്നും ഭയപ്പെടാതെ ജാഗ്രത പാലിക്കണമെന്നും യോഗത്തിൽ അധ്യക്ഷത വഹിച്ച പഞ്ചായത്ത്‌ പ്രസിഡന്‍റ് ഇ.വി. വർക്കി പറഞ്ഞു. ബ്ലോക്ക്‌ മെംബർ നിഷ അലക്സ്, മുൻ പഞ്ചായത്ത്‌ പ്രസിഡന്‍റ് കെ.ജെ. ജോസഫ്, സിപിഎം ലോക്കൽ സെക്രട്ടറി ജോജി തുടങ്ങിയവർ പ്രസംഗിച്ചു.

പൂഞ്ഞാർ ബസ് സ്റ്റാൻഡിന് സമീപം മാലിന്യക്കൂന്പാരം

പൂഞ്ഞാർ: തെക്കേക്കര ഗ്രാമപഞ്ചായത്ത് ബസ്‌ സ്റ്റാൻഡിനു സമീപം പെരിങ്ങുളം റോഡിലെ വെയിറ്റിംഗ്ഷെഡിനു പിന്നിൽ മാലിന്യക്കൂന്പാരം. പ്ലാസ്റ്റിക് ഉൾപ്പെടെ വിവിധ തരത്തിലുള്ള മാലിന്യങ്ങൾ ലോഡുകണക്കിന് നിക്ഷേപിച്ചിരിക്കുകയാണിവിടെ. മാലിന്യത്തിൽനിന്നുള്ള ദുർഗന്ധവും പുഴുക്കളും പടർന്ന് പൊതുജനാരോഗ്യത്തിനു ഗുരുതരമായ ഭീഷണിയാകുന്നു. പ്രദേശത്തെ യാത്രക്കാർക്കും സമീപവാസികൾക്കും ഈ അവസ്ഥ വലിയ അസൗകര്യമാണ് സൃഷ്ടിക്കുന്നത്. മഴക്കാലത്ത് മലിനജലം പുറത്തേക്കൊഴുകി മെയിൻ റോഡിലും സമീപത്തെ മീനച്ചിലാറിന്‍റെ കൈവഴിയായ തോട്ടിലുമെത്തുന്നു. പൊതുസ്ഥലങ്ങൾ ശുചിത്വമായി നിലനിർത്തേണ്ട ബാധ്യത തദ്ദേശസ്വയംഭരണ സ്ഥാപനങ്ങൾ ഏറ്റെടുത്ത് അടിയന്തരമായി ശുചീകരണ പ്രവർത്തനം നടത്തണമെന്ന് നാട്ടുകാർ ആവശ്യപ്പെട്ടു.

ബാഡ്മിന്‍റണില്‍ മെഡല്‍ നേട്ടവുമായി ശ്രേയ മരിയ മാത്യു

പാലാ: മുത്തോലി സെന്‍റ് ജോസഫ് സ്‌കൂളിലെ ഒമ്പതാം ക്ലാസ് വിദ്യാര്‍ഥിനിയായ ശ്രേയ മരിയ മാത്യു ബാഡ്മിന്‍റണ്‍ കോര്‍ട്ടില്‍ മെഡലുകള്‍ വാരിക്കൂട്ടുന്നു. സംസ്ഥാന ബാഡ്മിന്‍റണ്‍ അസോസിയേഷന്‍ കോഴിക്കോട്ട് നടത്തിയ സംസ്ഥാനതല മത്സരത്തില്‍ 15 വയസില്‍ താഴെയുള്ള പെണ്‍കുട്ടികളുടെ വിഭാഗത്തില്‍ ഡബിള്‍സില്‍ ഒന്നാം സ്ഥാനവും മിക്‌സഡ് ഡബിള്‍സില്‍ രണ്ടാം സ്ഥാനവും സിംഗിള്‍സില്‍ മൂന്നാം സ്ഥാനവും ഇന്ത്യന്‍ ബാഡ്മിന്‍റൺ അസോസിയേഷന്‍ ബംഗളൂരുവില്‍ നടത്തിയ സബ് ജൂണിയര്‍ ടൂര്‍ണമെന്‍റില്‍ 15 വയസില്‍ താഴെയുള്ള പെണ്‍കുട്ടികളുടെ വിഭാഗത്തില്‍ ഡബിള്‍സില്‍ വെങ്കലവും നേടി. ജില്ലയില്‍നിന്ന് ഈ നേട്ടം കൈവരിക്കുന്ന ആദ്യ പെണ്‍കുട്ടിയാണ് മുത്തോലി വലിയമംഗലം അവിനാഷ്-ആശ ദമ്പതികളുടെ മകളായ ശ്രേയ മരിയ മാത്യു. പാലാ സെന്‍റ് തോമസ് കോളജില്‍ പ്രവര്‍ത്തിക്കുന്ന ഷിബ്സ് ബാഡ്മിന്‍റണ്‍ അക്കാദമിയില്‍ ഷിബു ഗോപിദാസിന്‍റെ കീഴിലാണ് പരിശീലനം നടത്തിവരുന്നതെന്ന് ശ്രേയ മരിയ മാത്യു, പിതാവ് അവിനാഷ് മാത്യു, കോച്ച് ഷിബു ഗോപിദാസ്, അക്കാദമി ഡയറക്ടര്‍ ബിജോ ജോര്‍ജ്, ജോസുകുട്ടി പൂവേലില്‍, ജോര്‍ജുകുട്ടി ജേക്കബ് എന്നിവര്‍ പത്രസമ്മേളനത്തില്‍ പറഞ്ഞു.

മൂന്നാനി ലോയേഴ്സ് ചേംബര്‍ ഇനി ഹോസ്റ്റലായി മാറും

പാലാ: കോടതി സമുച്ചയത്തിന് സമീപം അഭിഭാഷകര്‍ക്കായി നഗരസഭ നിര്‍മിച്ച മൂന്നാനി ലോയേഴ്സ് ചേംബറിന്‍റെ അവശേഷിക്കുന്ന മുറികളെല്ലാം വലവൂര്‍ ഐഐഐടിക്ക് വാടകയ്ക്കു നല്‍കാന്‍ നഗരസഭ നടപടി തുടങ്ങി. എട്ടു വര്‍ഷം മുമ്പ് പണിതീര്‍ത്ത കെട്ടിടസമുച്ചയം വര്‍ഷങ്ങളായി ഉപയോഗരഹിതമായി കിടക്കുകയായിരുന്നു. കോടതി സമുച്ചയത്തോട് ചേര്‍ന്നു നിര്‍മിച്ച ലോയേഴ്സ് ചേംബര്‍ അഭിഭാഷകര്‍ക്ക് വാടകയ്ക്ക് നല്‍കാനാണ് ലക്ഷ്യമിട്ടിരുന്നത്. കെട്ടിടത്തിന്‍റെ നിര്‍മാണത്തിലെ അപര്യാപ്തത മൂലം മുറികള്‍ വാടകയ്ക്കെടുക്കാന്‍ അഭിഭാഷകര്‍ തയാറായില്ല. മലങ്കര പദ്ധതിക്കായി വാട്ടര്‍ അഥോറിറ്റി മുകള്‍നിലയിലെ അഞ്ചു മുറികള്‍ രണ്ടു വര്‍ഷം മുമ്പ് വാടകയ്ക്കെടുത്തിരുന്നതൊഴിച്ചാല്‍ ബാക്കി മുറികളൊക്കെ വെറുതെ കിടക്കുകയാണ്. ഈ മുറികളാണ് ഐഐഐടിക്ക് വാടകയ്ക്കു നല്‍കാന്‍ നടപടി‍ തുടങ്ങിയത്. കെട്ടിടത്തില്‍ മൂന്ന് നിലകളിലായി ശൗചാലയ സൗകര്യത്തോടെ 72 മുറികളാണുള്ളത്. 2022ല്‍ ലേലം ചെയ്തപ്പോള്‍ അഞ്ചു മുറികള്‍ മാത്രമാണ് ലേലത്തില്‍ പോയത്. വെള്ളവും മറ്റ് അടിസ്ഥാന സൗകര്യങ്ങളുമില്ലാത്തതിനാലായിരുന്നു മുറികള്‍ ലേലത്തില്‍ പോകാതിരുന്നത്. വിശദമായ പഠനവും ആവശ്യകത നിര്‍ണയിക്കാതെയുമാണ് രൂപരേഖ തയാറാക്കി നിര്‍മാണം നടത്തിയതെന്നു സംസ്ഥാന ഓഡിറ്റ് വകുപ്പ് തയാറാക്കിയ ഓഡിറ്റ് റിപ്പോര്‍ട്ട് കുറ്റപ്പെടുത്തിയിരുന്നു. എല്ലാ മുറികളും ഷട്ടറിട്ട മുറികളായതുകൊണ്ട് വെന്‍റിലേഷന്‍ സൗകര്യം, ശൗചാലയം എന്നിവയുടെ പരിമിതികള്‍ മൂലം മറ്റാവശ്യങ്ങള്‍ക്ക് വാടകയ്ക്ക് നല്‍കുന്നതിന് സാധിച്ചിരുന്നില്ല. കോടികള്‍ കടബാധ്യതയുണ്ടാക്കി നിര്‍മിച്ച കെട്ടിടം മറ്റൊരു ബാധ്യതയായി മാറിയെന്നു റിപ്പോര്‍ട്ട് വ്യക്തമാക്കിയിരുന്നു. കോടികള്‍ മുടക്കി നിര്‍മിച്ചിട്ടും മുറികൾ വാടകയ്ക്ക് നല്‍കാന്‍ സാധിക്കാത്തത് വരുമാനം വര്‍ധിപ്പിക്കാനുള്ള നഗരസഭയുടെ തീവ്രശ്രമങ്ങള്‍ക്ക് തടസമായിരുന്നു. ഐഐഐടി നിര്‍ദേശിച്ച മാറ്റങ്ങള്‍ വരുത്താന്‍ നഗരസഭ നടപടികള്‍ തുടങ്ങി. മാസം 4500 രൂപ നിരക്കില്‍ വാടക ഈടാക്കാനാണ് ധാരണയായത്.

പൈക കുടുംബാരോഗ്യകേന്ദ്രത്തിൽ നവീകരിച്ച ലാബും ബ്ലോക്ക് പബ്ലിക് ഹെൽത്ത് യൂണിറ്റും ഉദ്ഘാടനം ചെയ്തു

പൈക: പാമ്പാടി ബ്ലോക്ക് പഞ്ചായത്തിന്‍റെ ചുമതലയിലുള്ള പൈക സർക്കാർ കുടുംബാരോഗ്യകേന്ദ്രത്തിൽ നവീകരിച്ച ലാബും ബ്ലോക്ക് പബ്ലിക് ഹെൽത്ത് യൂണിറ്റും ഉദ്ഘാടനം ചെയ്തു. പതിനഞ്ചാം ധനകാര്യ കമ്മീഷന്‍റെ ഹെൽത്ത് ഗ്രാന്‍റ് ഫണ്ട് 27.57 ലക്ഷം രൂപ ഉപയോഗിച്ചാണ് നവീകരണവും നിർമാണവും നടത്തിയത്. പാമ്പാടി ബ്ലോക്ക് പഞ്ചായത്ത് പ്രസിഡന്‍റ് ബെറ്റി റോയി മണിയങ്ങാട്ട് ഉദ്ഘാടനം നിർവഹിച്ചു. എലിക്കുളം പഞ്ചായത്ത് പ്രസിഡന്‍റ് ജിമ്മി ജേക്കബ് ഈറ്റത്തോട്ട് അധ്യക്ഷത വഹിച്ചു. ബ്ലോക്ക് പഞ്ചായത്ത് വൈസ് പ്രസിഡന്‍റ് പ്രഫ. എം.കെ. രാധാകൃഷ്ണൻ മുഖ്യപ്രഭാഷണം നടത്തി. പഞ്ചായത്ത് വൈസ് പ്രസിഡന്‍റ് സൂര്യമോൾ, ബ്ലോക്ക് പഞ്ചായത്തംഗം പ്രേമ ബിജു, പഞ്ചായത്തംഗങ്ങളായ അഖിൽ അപ്പുക്കുട്ടൻ, ഷേർലി അന്ത്യാംകുളം, ജയിംസ് ജീരകത്ത്, കെ.എം. ചാക്കോ, ദീപ ശ്രീജേഷ്, സിനി ജോയ്, എച്ച്എംസി അംഗങ്ങളായ കെ.എം. ചാക്കോ കോക്കാട്ട്, ടോമി കപ്പിലുമാക്കൽ, രാജൻ ആരംപുളിക്കൽ, ബാബു വടക്കേമഗലം, ഗോപി, മെഡിക്കൽ ഓഫീസർ ഡോ. ജെയ്സി എം. കട്ടപ്പുറം, ഹെൽത്ത് ഇൻസ്പെക്ടർ പി.എൻ. തുടങ്ങിയവർ പ്രസംഗിച്ചു.

മാര്‍ സ്ലീവാ മെഡിസിറ്റിയില്‍ കണ്ടിന്യൂയിംഗ് മെഡിക്കല്‍ എഡ്യൂക്കേഷന്‍ സെമിനാര്‍

പാലാ: മാര്‍ സ്ലീവാ മെഡിസിറ്റിയില്‍ ജനറല്‍ മെഡിസിന്‍ വിഭാഗത്തിന്‍റെ നേതൃത്വത്തില്‍ ഇന്‍സുലിന്‍ തെറാപ്പി ആന്‍ഡ് ന്യൂവര്‍ ഇന്‍സുലിന്‍സ് എന്ന പേരില്‍ കണ്ടിന്യൂയിംഗ് മെഡിക്കല്‍ എഡ്യൂക്കേഷന്‍ സെമിനാര്‍ നടന്നു. ആശുപത്രി മാനേജിംഗ് ഡയറക്ടര്‍ മോണ്‍. ജോസഫ് കണിയോടിക്കല്‍ ഉദ്ഘാടനം ചെയ്തു. ജനറല്‍ മെഡിസിന്‍ വിഭാഗം മേധാവി ഡോ. വി. ഷീല കുര്യന്‍ , സീനിയര്‍ കണ്‍സള്‍ട്ടന്‍റ് ഡോ. ജൂബില്‍ ജോസ് കുര്യന്‍ എന്നിവര്‍ പ്രസംഗിച്ചു. ഇന്‍സുലിന്‍ തെറാപ്പി, ന്യൂവര്‍ ഇന്‍സുലിന്‍സ് തുടങ്ങിയ വിഷയങ്ങളില്‍ മാര്‍ സ്ലീവാ മെഡിസിറ്റിയിലെ എന്‍ഡോക്രൈനോളജിസ്റ്റുമാരായ ഡോ. എസ്. ആനന്ദ്, ഡോ. ജോണ്‍സ് ടി. ജോണ്‍സണ്‍ എന്നിവര്‍ പ്രബന്ധം അവതരിപ്പിച്ചു.

മാർ ആഗസ്തീനോസ് കോളജിൽ ബിബിഎ ഏവിയേഷന്‍ കോഴ്സ് ആരംഭിച്ചു

രാമപുരം: മാര്‍ ആഗസ്തിനോസ് കോളജില്‍ ബിബിഎ ഏവിയേഷന്‍ ആഡ് ഓണ്‍ പ്രോഗ്രാം ആരംഭിച്ചു. എയര്‍പോര്‍ട്ട് മാനേജ്‌മെന്‍റ്, ക്യാബിന്‍ ക്രൂ മാനേജ്‌മെന്‍റ്, ലോജിസ്റ്റിക്‌സ് മാനേജ്‌മെന്‍റ് എന്നീ വിഭാഗങ്ങള്‍ ഉള്‍പ്പെടുത്തിയാണ് ഏവിവേഷന്‍ പ്രോഗ്രാം ആരംഭിച്ചിരിക്കുന്നത്. പ്രോഗ്രാമിന്‍റെ ഔദ്യോഗിക ഉദ്ഘാടനം ഇന്‍ഡിഗോ എയര്‍ലൈന്‍സിന്‍റെ പൈലറ്റ് സീനിയര്‍ ക്യാപ്റ്റന്‍ ഹരീഷ് ഏബ്രഹാം നിര്‍വഹിച്ചു. ശങ്കരാ എവിയേഷന്‍ അക്കാദമി മാനേജിംഗ് പാര്‍ട്ണര്‍ ജിന്ത്യ ശിവദാസ് മുഖ്യപ്രഭാഷണം നടത്തി. കോളജ് മാനേജര്‍ ഫാ. ബെര്‍ക്കുമാന്‍സ് കുന്നുംപുറം അധ്യക്ഷത വഹിച്ചു. പ്രിന്‍സിപ്പല്‍ ഡോ. റെജി മേക്കാടന്‍, വൈസ് പ്രിന്‍സിപ്പല്‍മാരായ ഫാ. ജോസഫ് ആലഞ്ചേരി, സിജി ജേക്കബ്, ലിന്‍സി ആന്‍റണി, രാജീവ് കൊച്ചുപറമ്പില്‍, പ്രകാശ് ജോസഫ്, റോയി ജോര്‍ജ്, ധന്യ എസ്. നമ്പൂതിരി, ഫാ. ബോബി ജോണ്‍, അമലു പീയൂസ്, മീര എലിസബത്ത്, രമ്യ, ബിനു ജോര്‍ജ് എന്നിവര്‍ പ്രസംഗിച്ചു.

"ആരോഗ്യം ശുദ്ധജലത്തിലൂടെ'പദ്ധതി ആരംഭിച്ചു

പ്രവിത്താനം: സെന്‍റ് മൈക്കിള്‍സ് ഹയര്‍ സെക്കൻഡറി സ്‌കൂളിലെ ജൂണിയര്‍ റെഡ്ക്രോസ് യൂണിറ്റും എന്‍എസ്എസ് യൂണിറ്റും സംയുക്തമായി നടപ്പാക്കുന്ന "ആരോഗ്യം ശുദ്ധജലത്തിലൂടെ' പദ്ധതിക്ക് തുടക്കമായി. ജില്ലാ പഞ്ചായത്ത് മെംബര്‍ രാജേഷ് വാളിപ്ലാക്കല്‍ പദ്ധതി ഉദ്ഘാടനം ചെയ്തു. സ്‌കൂളിലെ മുഴുവന്‍ കുട്ടികളുടെയും വീടുകളില്‍നിന്ന് അവരുപയോഗിക്കുന്ന കുടിവെള്ളത്തിന്‍റെ സാമ്പിള്‍ ശേഖരിച്ച് ഉപയോഗയോഗ്യമാണോ യെന്ന് പരിശോധിച്ച് സംസ്ഥാന സര്‍ക്കാര്‍ സാക്ഷ്യപ്പെടുത്തിയ സര്‍ട്ടിഫിക്കറ്റ് നല്‍കുന്നതാണ് പദ്ധതി. ഹരിതകേരളം മിഷന്‍റെ സഹകരണത്തോടെ ഹയര്‍ സെക്കന്‍ൻഡറി സ്‌കൂള്‍ ലാബില്‍ നടത്തുന്ന ഈ പരിശോധന തികച്ചും സൗജന്യമാണ്. ഹെഡ്മാസ്റ്റര്‍ ജിനു ജെ. വല്ലനാട്ട് അധ്യക്ഷത വഹിച്ച യോഗത്തില്‍ ജോജിമോന്‍ ജോസ്, എംപിടിഎ പ്രസിഡന്‍റ് സോന ഷാജി അഞ്ചുകണ്ടത്തില്‍, ബിയ ബിനു എന്നിവര്‍ പ്രസംഗിച്ചു.

ദേവമാതാ കോളജിൽ ലോകയുവജന നൈപുണ്യദിനാഘോഷം

കുറവിലങ്ങാട്: ലോക യുവജന നൈപുണ്യ ദിനാഘോഷത്തിന്‍റെ ഭാഗമായി ദേവമാതാ കോളജിൽ വിദ്യാർഥികൾക്കായി നൈപുണ്യ വികസന പരിശീലനവും പ്രദർശന-വിപണനമേളയും നടത്തി. വിദ്യാർഥികൾക്കായി വിദഗ്ധ പരിശീലനം 28 മുതൽ ജൂലൈ 15 വരെ നൽകി. തുടർന്ന് വിദ്യാർഥികൾ സ്വയം തയാറാക്കിയ ഉത്പന്നങ്ങൾ തങ്ങളുടെ പഠനവകുപ്പുകൾക്ക് കീഴിൽ വിവിധ സ്റ്റാളുകളിൽ ക്രമീകരിച്ച് പ്രദർശനം നടത്തി. യുവജന നൈപുണ്യദിന സമ്മേളനം അസിസ്റ്റന്‍റ് ഡിസ്ട്രിക്‌ട് ഇൻഡസ്ട്രീസ് ഓഫീസർ സിനോ ജേക്കബ് മാത്യു ഉദ്ഘാടനം ചെയ്തു. പ്രിൻസിപ്പൽ ഡോ. സുനിൽ സി. മാത്യു, വൈസ് പ്രിൻസിപ്പൽ ഫാ. ഡിനോയ് മാത്യു കവളമ്മാക്കൽ, ബർസാർ ഫാ. ജോസഫ് മണിയഞ്ചിറ, പ്രോഗ്രാം കോ-ഓർഡിനേറ്റർ ഡോ. അനീഷ് തോമസ്, എൻഎസ്എസ് പ്രോഗ്രാം ഓഫീസർമാരായ വിദ്യാ ജോസ്, ജിതിൻ ജോയ്, ഡോ. ടീന സെബാസ്റ്റ്യൻ, ഡോ. മിനി സെബാസ്റ്റ്യൻ എന്നിവർ പ്രസംഗിച്ചു.

ആറ്റുകടവിൽ ഉപേക്ഷിക്കപ്പെട്ട നിലയിൽ ബാഗ് കണ്ടതു പരിഭ്രാന്തി പരത്തി

ഈരാറ്റുപേട്ട: ആറ്റുകടവിൽ ഉപേക്ഷിക്കപ്പെട്ട നിലയിൽ ബാഗ് കണ്ടെത്തിയതു പരിഭ്രാന്തി പരത്തി. ആരോ കുളിക്കാനിറങ്ങി ആറ്റിൽ മുങ്ങിപ്പോയെന്ന സംശയത്തിൽ നാട്ടുകാർ വിളിച്ചറിയച്ചതനുസരിച്ച് ടീം എമർജൻസി പ്രവർത്തകർ ഒരു മണിക്കൂറോളം ആറ്റിലിറങ്ങി മുങ്ങിത്തപ്പി. കൊണ്ടൂർ കാവുംകടവിൽ ഇന്നലെ രാവിലെ ഒമ്പതോടെയാണ് നാട്ടുകാർ ബാഗ് കണ്ടെത്തിയത്. സംഭവമറിഞ്ഞ് പോലീസും എത്തിയിരുന്നു. പിന്നീട് ബാഗ് പരിശോധിച്ചപ്പോൾ കിട്ടിയ നമ്പറിൽ ബന്ധപ്പെട്ടപ്പോൾ ബാഗിന്‍റെ ഉടമയായ ഇതര സംസ്ഥാന തൊഴിലാളി ഫോൺ എടുക്കുകയായിരുന്നു. ഇതോടെയാണ് രക്ഷാ പ്രവർത്തകർക്ക് സമാധാനമായത്. കടുവാമൂഴിയിലെ ഹോട്ടലിൽ ജോലി ചെയ്യുന്ന അസം സ്വദേശിയുടേതായിരുന്നു ബാഗ്. താമസിക്കുന്ന മുറിയിൽനിന്ന് ബാഗ് മോഷണം പോയ വിവരവും ഇയാൾ അറിഞ്ഞിരുന്നില്ല.

പാലാ ജനറല്‍ ആശുപത്രിയില്‍ കൃത്രിമ അവയവ നിര്‍മാണകേന്ദ്രം തുറന്നു

പാലാ: കെ.എം. മാണി സ്മാരക ഗവ. ജനറല്‍ ആശുപത്രിയില്‍ കൃത്രിമ അവയവ നിര്‍മാണകേന്ദ്രം തുറന്നു. ആശുപത്രിയില്‍ പ്രവര്‍ത്തിക്കുന്ന ഫിസിക്കല്‍ മെഡിസിന്‍ ആൻഡ് റീഹാബിലിറ്റേഷന്‍ ചികിത്സാ വിഭാഗത്തിന്‍റെ ഭാഗമായാണ് ആര്‍ട്ടിഫിഷ്യല്‍ ലിംമ്പ് ഫിറ്റിംഗ് യൂണിറ്റ് പ്രവര്‍ത്തനം ആരംഭിച്ചത്. നിലവില്‍ ഫിസിയോതെറാപ്പി വിഭാഗവും സ്പീച്ച് ആൻഡ് ഓഡിയോളജി വിഭാഗവും ഇതിനോടനുബന്ധിച്ച് ആശുപത്രിയില്‍ പ്രവര്‍ത്തിക്കുന്നുണ്ട്. 25 ലക്ഷം രൂപയുടെ ഉപകരണങ്ങളാണ് ഇവിടെ സജ്ജീകരിച്ചിരിക്കുന്നതെന്നും സംസ്ഥാനത്തെ പത്താമത് കൃത്രിമ അവയവ നിര്‍മാണകേന്ദ്രമാണ് ഇവിടെ പ്രവര്‍ത്തനം അംഭിച്ചിരിക്കുന്നതെന്നും ആശുപത്രി സൂപ്രണ്ടും ആരോഗ്യവകുപ്പ് അസിസ്റ്റന്‍റ് ഡയറക്ടറുമായ ഡോ. ടി.പി. അഭിലാഷ് പറഞ്ഞു. രണ്ട് ടെക്‌നീഷ്യന്മാരുടെ സേവനവും ഇവിടെ ക്രമീകരിച്ചിട്ടുണ്ട്. നഗരസഭാ ചെയര്‍മാന്‍ തോമസ് പീറ്റര്‍ ഉദ്ഘാടനം ചെയ്തു. സൂപ്രണ്ട് ഡോ. ടി.പി. അഭിലാഷ് അധ്യക്ഷത വഹിച്ചു. വൈസ് ചെയര്‍പേഴ്‌സണ്‍ ബിജി ജോജോ, കൗണ്‍സിലര്‍മാരായ സാവിയോ കാവുകാട്ട്, ആന്‍റോ പടിഞ്ഞാറെക്കര, ജോസിന്‍ ബിനോ, ഷാജു തുരുത്തന്‍, മായാ പ്രദീപ്, മാനേജിംഗ് കമ്മിറ്റി അംഗങ്ങളായ ബിജു പാലൂപ്പടവന്‍, ഷാര്‍ളി മാത്യു എന്നിവര്‍ പ്രസംഗിച്ചു. നഗരസഭാ പദ്ധതി വിഹിതത്തില്‍നിന്നു 14 ലക്ഷം രൂപ വകയിരുത്തിയാണ് ഈ കേന്ദ്രത്തിനായുള്ള അടിസ്ഥാന സൗകര്യങ്ങള്‍ ഒരുക്കിയത്.

മെഡിക്കൽ കോളജിലെ ഇടിഞ്ഞുവീണ കെട്ടിടം പൂർണമായി പൊളിക്കണം

ഗാന്ധിനഗർ: മെഡിക്കൽ കോളജ് ആശുപത്രിയിൽ ഇടിഞ്ഞുവീണ കെട്ടിടഭാഗത്തോട് ചേർന്ന കെട്ടിടങ്ങൾ പൊളിച്ചുനീക്കണമെന്ന ആവശ്യം ശക്തമാകുന്നു. 10, 11, 14 വാർഡുകൾ പ്രവർത്തിച്ചിരുന്ന കെട്ടിടമാണ് ഇടിഞ്ഞുവീണത്. 14-ാം വാർഡിന്‍റെ ശുചിമുറിഭാഗം തകർന്നുവീണ് തലയോലപ്പറമ്പ് സ്വദേശിയായ വീട്ടമ്മ ബിന്ദു മരിച്ചതോടെയാണ് രോഗികളുടെയും ജനങ്ങളുടെയും അധികാരികളുടെയും ശ്രദ്ധയിലേക്ക് ഈ കെട്ടിടത്തിന്‍റെ ശോച്യാവസ്ഥ എത്തുന്നത്. കാലപ്പഴക്കത്തെത്തുടർന്ന് ഈ കെട്ടിടം പ്രവർത്തനയോഗ്യമല്ലെന്നു മുമ്പ് കണ്ടെത്തിയിരുന്നതാണെങ്കിലും വേണ്ടത്ര ഗൗരവത്തോടെ കാണാതിരുന്നതാണ് ഒരാളുടെ മരണത്തിനിടയാക്കിയത്. കെട്ടിടം തകർന്നുവീണ് ബിന്ദു മരണപ്പെട്ടതോടെ ഈ കെട്ടിടത്തിന്‍റെ മറ്റു ഭാഗങ്ങൾകൂടി ഇടിഞ്ഞുവീഴുമോയെന്ന ഭീതിയിലാണ് അടുത്ത വാർഡുകളിൽ താമസിക്കുന്ന രോഗികൾ. കാറ്റും മഴയും വരുമ്പോൾ വലിയ ഭയത്തിലാണെന്ന് രോഗികളും കൂട്ടിരിപ്പുകാരും പറയുന്നു. നിലവിൽ ഇടിഞ്ഞുവീണ കെട്ടിടത്തിലുണ്ടായിരുന്ന രോഗികളെ പുതിയ സർജിക്കൽ ബ്ലോക്കിൽ പ്രവേശിപ്പിച്ചിക്കുകയാണ്. കാലപ്പഴം ചെന്ന ഈ കെട്ടിടം വലിയ അപകടങ്ങൾക്ക് വഴിവയ്ക്കുന്നതിന് മുമ്പേ പൊളിച്ചുനീക്കണമെന്ന് വിവിധ സാമൂഹ്യ സംഘടനകളും ആവശ്യപ്പെട്ടിട്ടുണ്ട്. അതേസമയം പിഡബ്ല്യുഡിയാണ് കെട്ടിടം പൊളിക്കുന്നത് സംബന്ധിച്ചു തീരുമാനമെടുക്കേണ്ടതെന്ന് അശുപത്രി അധികൃതർ പറയുന്നു.

കളഞ്ഞുകിട്ടിയ പണവും മൊബൈൽ ഫോണും പോലീസിലേല്പിച്ച് മാതൃകയായി വിദ്യാര്‍ഥികള്‍

പാമ്പാടി: പാമ്പാടി ബസ് സ്റ്റാന്‍ഡ് പരിസരസത്തുനിന്നു കളഞ്ഞുകിട്ടിയ പണവും മൊബൈല്‍ ഫോണും പാമ്പാടി പോലീസ് സ്റ്റേഷനില്‍ ഏല്‍പ്പിച്ച് പാന്പാടി വിമലാംബിക സ്‌കൂളിലെ കുട്ടികള്‍ മാതൃകയായി. 12-ാം ക്ലാസ് വിദ്യാര്‍ഥികളായ നിധിന്‍ നിഷാദ്, സച്ചു സന്തോഷ് എന്നിവരാണ് പണമടങ്ങിയ പഴ്‌സും മൊബൈല്‍ ഫോണും പോലീസ് സ്റ്റേഷനില്‍ ഏല്പിച്ചത്. പാമ്പാടി പോലീസ് സ്റ്റേഷനിലെ സബ് ഇന്‍സ്പെക്ടര്‍ പി.ബി. ഉദയകുമാറിന്‍റെ നേതൃത്വത്തില്‍ അന്വേഷിച്ച് ഉടമസ്ഥനായ പാമ്പാടി പൂതക്കുഴി സ്വദേശി രാധാകൃഷ്ണനെ കണ്ടെത്തി കുട്ടികളുടെ സാന്നിധ്യത്തില്‍ പണമടങ്ങിയ പഴ്‌സും മൊബൈല്‍ ഫോണും തിരികെ നല്കി. സമൂഹത്തിനു മാതൃകയാകത്തക്കവിധം സത്യസന്ധതയോടെ പ്രവര്‍ത്തിച്ച വിദ്യാര്‍ഥികളെ പോലീസ് ഉദ്യോഗസ്ഥരും സ്‌കൂള്‍ മാനേജ്‌മെന്‍റും അധ്യാപകരും പിടിഎയും അഭിനന്ദിച്ചു.

പ്രതിഷേധ മാര്‍ച്ച് നടത്തി

കോട്ടയം: കേരളത്തിന്‍റെ അരിവിഹിതം വെട്ടിക്കുറച്ചതില്‍ പ്രതിഷേധിച്ച് എഐവൈഎഫ് ജില്ലാ കമ്മിറ്റിയുടെ നേതൃത്വത്തില്‍ കോട്ടയം ഫുഡ് കോര്‍പറേഷന്‍ ഓഫ് ഇന്ത്യയിലേക്ക് സംഘടിപ്പിച്ച പ്രതിഷേധ മാര്‍ച്ച് സിപിഐ ജില്ലാ അസിസ്റ്റന്‍റ് സെക്രട്ടറി ജോണ്‍ വി. ജോസഫ് ഉദ്ഘാടനം ചെയ്തു. കേരളത്തിന് അര്‍ഹമായ അരിവിഹിതം നിഷേധിച്ച കേന്ദ്രസര്‍ക്കാര്‍ നടപടിയില്‍ പ്രതിഷേധിച്ചാണു ചിങ്ങവനം എഫ്സിഐ ഗോഡൗണിലേക്ക് പ്രതിഷേധ മാര്‍ച്ച് നടത്തിയത്. ജില്ലാ പ്രസിഡന്‍റ് കെ. രഞ്ജിത്ത് അധ്യക്ഷത വഹിച്ചു.

മൊബൈല്‍ ഫോണുകള്‍ കണ്ടെത്തി കോട്ടയം സൈബര്‍ പോലീസ്

കോട്ടയം: 75ലധികം മൊബൈല്‍ ഫോണുകള്‍ കണ്ടെത്തി തിരികെയെത്തിച്ച് കോട്ടയം സൈബര്‍ പോലീസ്. സൈബര്‍ പോലീസ്, സൈബര്‍ സെല്‍ ഉദ്യോഗസ്ഥര്‍ സംയുക്തമായി നടത്തിയ കാമ്പയിന്‍ വഴിയാണ് മൊബൈല്‍ ഫോണുകള്‍ കണ്ടെത്തി തിരികെനല്‍കിയത്. ഫോണുകളുടെ വിതരണം ജില്ലാ പോലീസ് ചീഫ് എ. ഷാഹുല്‍ ഹമീദ് ജില്ലാ പോലീസ് ആസ്ഥാനത്ത് നിര്‍വഹിച്ചു. ബംഗാള്‍, ആസാം, ബീഹാര്‍ തുടങ്ങി ഇതര സംസ്ഥാനങ്ങളില്‍നിന്നുവരെ മൊബൈല്‍ ഫോണുകള്‍ തിരികെ എത്തിക്കാന്‍ സാധിച്ചു. കോട്ടയം മെഡിക്കല്‍ കോളജില്‍നിന്നും ഫോണുകള്‍ നഷ്ടപ്പെട്ട പരാതികളില്‍ 14 ഫോണുകളും നാഗമ്പടം സെന്‍റ് ആന്‍റണീസ് ചര്‍ച്ച് ഭാഗത്തുനിന്നും നഷ്ടപ്പെട്ട മൊബൈലുകളില്‍ പത്തെണ്ണവും കണ്ടെത്തുവാന്‍ സാധിച്ചു.

ഉമ്മന്‍ ചാണ്ടിയുടെ രണ്ടാം ചരമവാര്‍ഷികവും സ്മരണിക പ്രകാശനവും

കോട്ടയം: കേരള സീനിയര്‍ ലീഡേഴ്സ് ഫോറത്തിന്‍റെ ആഭിമുഖ്യത്തില്‍ മുന്‍ മുഖ്യമന്ത്രി ഉമ്മന്‍ ചാണ്ടിയുടെ രണ്ടാം ചരമവാര്‍ഷിക ദിനാചരണവും സ്മരണികയുടെ പ്രകാശനവും 17ന് വൈകുന്നേരം 4.30ന് കോട്ടയം നാഗമ്പടം ഉമ്മന്‍ ചാണ്ടി സപ്തതി ഹാളില്‍ നടക്കും. അനുസ്മരണ സമ്മേളനം രമേശ് ചെന്നിത്തല എംഎല്‍എ ഉദ്ഘാടനം ചെയ്യും. ലീഡേഴ്സ് ഫോറം പ്രസിഡന്‍റ് ബി. രാജീവ് അധ്യക്ഷത വഹിക്കും. സ്മരണികയുടെ പ്രകാശനം തിരുവഞ്ചൂര്‍ രാധാകൃഷ്ണന്‍ എംഎല്‍എ കോപ്പി ചാണ്ടി ഉമ്മന്‍ എംഎല്‍എയ്ക്കു നല്‍കി നിര്‍വഹിക്കും. സണ്ണി കുലത്താക്കല്‍, ഡോ. ജോസഫ് മാര്‍ ബര്‍ണാബാസ് സഫ്രഗന്‍ മെത്രാപ്പോലീത്താ, ഫ്രാന്‍സിസ് ജോര്‍ജ് എംപി, ആന്‍റോ ആന്‍റണി എംപി, സുരേഷ് കുറുപ്പ്, തോമസ് ചാഴികാടന്‍, മോന്‍സ് ജോസഫ് എംഎല്‍എ, കെ.സി. ജോസഫ്, എം.എം. ഹസന്‍, ശോഭന ജോര്‍ജ്, ജോസഫ് എം. പുതുശേരി, പന്തളം സുധാകരന്‍, എം. മുരളി, എ.എ. ഷുക്കൂര്‍, ബിന്‍സി സെബാസ്റ്റ്യന്‍, വി.ബി. ബിനു തുടങ്ങിയവര്‍ പ്രസംഗിക്കും.

കാരുണ്യസംസ്‌കാരം വളരാന്‍ നാട് ഒന്നിക്കണം: മാര്‍ തോമസ് തറയില്‍

ചങ്ങനാശേരി: പരസ്പരം സഹായിക്കുകയും പങ്കുവയ്ക്കുകയും ചെയ്യുന്ന കാരുണ്യത്തിന്‍റെ സംസ്‌കാരം വളരാന്‍ നമ്മുടെ സമൂഹം ഒന്നിച്ച് പരിശ്രമിക്കണമെന്നും ഇക്കാര്യത്തില്‍ ചാരിറ്റി വേള്‍ഡ് പോലുള്ള പ്രസ്ഥാനങ്ങള്‍ വഹിക്കുന്ന പങ്ക് നിസ്തുലമാണന്നും ആര്‍ച്ച്ബിഷപ് മാര്‍ തോമസ് തറയില്‍. റേഡിയോ മീഡിയാ വില്ലേജിന്‍റെ ജീവകാരുണ്യ സംഘടനയായ ചാരിറ്റി വേള്‍ഡിന്‍റെ 10-ാം വാര്‍ഷികാഘോഷങ്ങള്‍ മീഡിയാ വില്ലേജ് തിയറ്ററില്‍ ഉദ്ഘാടനം ചെയ്യുകയായിരുന്നു ആര്‍ച്ച്ബിഷപ്. പുതിയ അഞ്ചിന കര്‍മപദ്ധതികളുടെ ലോഗോ പ്രകാശനം സണ്ണി തോമസ് ഇടിമണ്ണിക്കല്‍, ഡോ. ജോര്‍ജ് പടനിലം, ഫാ. ലിപിന്‍ തുണ്ടുകളം എന്നിവര്‍ക്ക് നല്‍കി മാര്‍ തോമസ് തറയില്‍ നിര്‍വഹിച്ചു. അതിരൂപത വികാരി ജനറാള്‍ മോണ്‍. ആന്‍റണി എത്തയ്ക്കാട്ട് അധ്യക്ഷത വഹിച്ചു. ചാരിറ്റി വേള്‍ഡ് ട്രസ്റ്റ് മെംബര്‍ ഫാ. സെബാസ്റ്റ്യന്‍ പുന്നശേരി മുഖ്യപ്രഭാഷണം നടത്തി. ജോബ് മൈക്കിള്‍ എംഎല്‍എ, ഹരികുമാര്‍ കോയിക്കല്‍, ഗിരീഷ് കോനാട്ട്, എച്ച്. മുസമ്മില്‍ ഹാജി, ഫാ. ജോഫി പുതുപ്പറമ്പ്, വിപിന്‍ രാജ് എന്നിവര്‍ പ്രസംഗിച്ചു. പുതുതായി പ്രഖ്യാപിച്ച അഞ്ചിന കര്‍മപദ്ധതി ‍ ഉള്‍പ്പെടെയുള്ള ജീവകാരുണ്യ പരിപാടികളോട് സഹകരിക്കാന്‍ താത്പര്യമുള്ളവര്‍ 9496935651 എന്ന നമ്പരില്‍ വിളിക്കണമെന്ന് ഡയറക്ടര്‍ ഫാ. ജോഫി പുതുപ്പറമ്പ് അറിയിച്ചു.

ജനറല്‍ ആശുപത്രിയിലെ പൊടിശല്യം ; നിര്‍മാണം നടക്കുന്ന ഭാഗം നെറ്റ്‌ കെട്ടി മറയ്ക്കും

ചങ്ങനാശേരി: ജനറല്‍ ആശുപത്രിയിലെ കെട്ടിടനിര്‍മാണം നടക്കുന്ന ഭാഗത്ത് രോഗികള്‍ക്കും ആശുപത്രി ജീവനക്കാര്‍ക്കും സന്ദര്‍ശകര്‍ക്കും ഉണ്ടാകുന്ന പൊടിശല്യം പരിഹരിക്കാന്‍ നെറ്റ് സ്ഥാപിക്കാന്‍ ആശുപത്രി മാനേജ്‌മെന്‍റ് കമ്മിറ്റി യോഗത്തില്‍ തീരുമാനം. അമ്മയും കുഞ്ഞും ബ്ലോക്ക്, ഐസൊലേഷന്‍ വാര്‍ഡ് എന്നിവിടങ്ങളിലാണ് പൊടിശല്യം രൂക്ഷമായിരിക്കുന്നത്. ആശുപത്രി വികസനസമിതിയംഗം കെ.എന്‍. മുഹമ്മദ് സിയയാണ് വിഷയം ഉന്നയിച്ചത്. ഇതുസംബന്ധിച്ച് നടപടിയെടുക്കാന്‍ ജോബ് മൈക്കിള്‍ എംഎല്‍എ ആശുപത്രി സൂപ്രണ്ടിനു നിര്‍ദേശം നല്‍കി. നിര്‍മാണം നടക്കുന്ന ഭാഗം പൂര്‍ണമായും അടച്ചിടാനും നെറ്റ്‌ കെട്ടി മറക്കാനും യോഗത്തില്‍ ധാരണയായി. എച്ച്എംസി നിയമിച്ച ആശുപത്രി ജീവനക്കാര്‍ ഡ്യൂട്ടിക്ക് എത്തുമ്പോള്‍ നിര്‍ബന്ധമായും യൂണിഫോം ധരിക്കണമെന്ന് ജോസുകുട്ടി നെടുമുടി ആവശ്യപ്പെട്ടു. ഈ ആവശ്യവും യോഗം അംഗീകരിച്ചു. ജനറല്‍ ആശുപത്രിയിലെ പുതിയ കെട്ടിടം നിര്‍മിക്കുന്നതിന്‍റെ ഭാഗമായി വെക്റ്റര്‍ കണ്‍ട്രോള്‍ യൂണിറ്റ് കെട്ടിടം പൊളിച്ചുമാറ്റാനും മെറ്റേണിറ്റി വാര്‍ഡിന്‍റെ മെയിന്‍റനന്‍സ് വര്‍ക്കുകള്‍ക്കുള്ള ടെന്‍ഡര്‍ നടപടികള്‍ പൂര്‍ത്തിയാക്കി നിര്‍മാണജോലികള്‍ ഉടനെ പൂര്‍ത്തിയാക്കാനും യോഗം തീരുമാനിച്ചു. ചര്‍ച്ചകള്‍ പൂര്‍ത്തിയാകുന്നതിനുമുമ്പ് യോഗം പിരിച്ചുവിടുന്നതായി അധ്യക്ഷത വഹിച്ച മുനിസിപ്പല്‍ ചെയര്‍പേഴ്‌സണ്‍ കൃഷ്ണകുമാരി രാജശേഖരന്‍ പറഞ്ഞതിനെ പി.എച്ച്. നാസര്‍ ചോദ്യംചെയ്തത് തര്‍ക്കത്തിനിടയാക്കി. വൈസ്‌ ചെയർമാന്‍ മാത്യൂസ് ജോര്‍ജ്, ആരോഗ്യ സ്റ്റാന്‍ഡിംഗ് കമ്മിറ്റി ചെയര്‍പേഴ്‌സണ്‍ എല്‍സമ്മ ജോബ്, ആശുപത്രി സൂപ്രണ്ട് ഡോ. പ്രസീദ, പി.എന്‍. നൗഷാദ്, കെ.ടി. തോമസ്, ലാലിച്ചന്‍ കുന്നിപ്പറമ്പില്‍, ജയിംസ് കാലാവടക്കന്‍, സാബു കോയിപ്പള്ളി, കെ.ടി. തോമസ് തുടങ്ങിയവര്‍ ചര്‍ച്ചകളില്‍ പങ്കെടുത്തു.

വായനയുടെ പുതുലോകം തുറന്ന് ക്രിസ്തുജ്യോതിയില്‍ പുസ്തകമേള

ചങ്ങനാശേരി: വായനയുടെ ലോകം തുറന്ന് ചെത്തിപ്പുഴ ക്രിസ്തുജ്യോതി ഗ്രൂപ്പ് ഓഫ് സ്‌കൂള്‍സിന്‍റെ നേതൃത്വത്തില്‍ പുസ്തകമേള ആരംഭിച്ചു. വായനയുടെ പ്രാധാന്യം കുട്ടികളിലേക്കും പൊതുജനങ്ങളിലേക്കും എത്തിക്കുക എന്ന ലക്ഷ്യത്തോടെയാണ് ഈ മേള സംഘടിപ്പിക്കുന്നത്. 16 വരെ ക്രിസ്തുജ്യോതി കാമ്പസിലെ കെ.ജെ. ഓഡിറ്റോറിയത്തിലാണ് പുസ്തകമേള നടക്കുന്നത്. കഥ, കവിത, നോവല്‍, ബാലസാഹിത്യം, ശാസ്ത്രം, ചരിത്രം തുടങ്ങിയ വിഷയങ്ങളിലുള്ള പുസ്തകങ്ങള്‍ മേളയില്‍ ലഭ്യമാകും. പ്രമുഖ പ്രസാധകരുടെ പുസ്തകങ്ങള്‍ മേളയുടെ പ്രധാന ആകര്‍ഷണമാണ്. വിദ്യാര്‍ഥികള്‍ക്കും രക്ഷിതാക്കള്‍ക്കും അധ്യാപകര്‍ക്കും പൊതുജനങ്ങള്‍ക്കും പുസ്തകമേളയില്‍ പങ്കെടുക്കാം. മേളയുടെ ഉദ്ഘാടനം പ്ലാസിഡ് വിദ്യാവിഹാര്‍ സീനിയര്‍ സെക്കന്‍ഡറി സ്‌കൂള്‍ പ്രിന്‍സിപ്പല്‍ ഫാ. സ്‌കറിയ എതിരേറ്റ് സിഎംഐ നിര്‍വഹിച്ചു. ക്രിസ്തുജ്യോതി ഗ്രൂപ്പ് ഓഫ് സ്‌കൂള്‍സ് ഡയറക്ടര്‍ ഫാ. ടോമി ഇലവുങ്കല്‍ മുഖ്യപ്രഭാഷണം നടത്തി.

ഡോ. ജോര്‍ജ് പടനിലത്തെ ആദരിച്ചു

വെരൂര്‍: ചീരഞ്ചിറ ജിമ്പയര്‍, മല്ലപ്പള്ളി -ആനിക്കാട് പീസ് വാലി എന്നിവയുടെ സ്ഥാപകനും ജീവകാരുണ്യ പ്രവര്‍ത്തകനുമായ ഡോ. ജോര്‍ജ് പടനിലത്തിനെ അദ്ദേഹത്തിന്‍റെ 86-ാം ജന്മദിനത്തില്‍ വെരൂര്‍ പബ്ലിക് ലൈബ്രറി ആദരിച്ചു. കെ.ജെ. ജോസഫ് അധ്യക്ഷത വഹിച്ചു. എസ്ബി കോളജ് മുന്‍ മലയാളം വിഭാഗം മേധാവി ഡോ. ജയിംസ് മണിമല മുഖ്യപ്രഭാഷണം നടത്തി. മാടപ്പള്ളി ബ്ലോക്ക് പഞ്ചായത്ത് മുന്‍ പ്രസിഡന്‍റ് വി.ജെ. ലാലി പൊന്നാടയണിയിച്ചു. കെ.ജെ. മാത്യു, ജെ. പുതുച്ചിറ, സി.ജെ. ജോസഫ്, ജോസുകുട്ടി കുട്ടമ്പേരൂര്‍, സിബിച്ചന്‍ പ്ലാമൂട്ടില്‍ എന്നിവര്‍ പ്രസംഗിച്ചു.

ഉമ്മന്‍ ചാണ്ടി ഛായാചിത്ര- പതാക പ്രയാണങ്ങള്‍ ആരംഭിച്ചു

കുമാരനല്ലൂര്‍: മുന്‍ മുഖ്യമന്ത്രി ഉമ്മന്‍ ചാണ്ടിയുടെ രണ്ടാം ചരമവാര്‍ഷികത്തോടനുബന്ധിച്ച് കോണ്‍ഗ്രസ് കുമാരനല്ലൂര്‍ മണ്ഡലം കമ്മിറ്റിയുടെ ആഭിമുഖ്യത്തില്‍ ഛായാചിത്ര-പതാക പ്രയാണങ്ങള്‍ ആരംഭിച്ചു. പുതുപ്പള്ളിയിലെ ഉമ്മന്‍ ചാണ്ടിയുടെ കല്ലറയില്‍ നിന്നാരംഭിച്ച ഛായാചിത്ര പ്രയാണം കെപിസിസി നിര്‍വാഹക സമിതിയംഗം ഡോ. പി.ആര്‍. സോനയും, പതാക പ്രയാണം ബ്ലോക്ക് പ്രസിഡന്‍റ് എന്‍. ജയചന്ദ്രനും ഉദ്ഘാടനം ചെയ്തു. മണ്ഡലം പ്രസിഡന്‍റ് സാബു മാത്യു അധ്യക്ഷത വഹിച്ചു. ടി.സി. റോയി, എം.എ. ഷാജി, കെ.ബി. രാജന്‍, ജിനേഷ് നാഗമ്പടം, അജിത്ത് കുരുവിള, ഷോബി ലൂക്കോസ് എന്നിവര്‍ പ്രസംഗിച്ചു.

തുരുത്തി ഫൊറോന പള്ളിയില്‍ അഭിഷേകാഗ്‌നി കണ്‍വന്‍ഷന്‍

തുരുത്തി: തുരുത്തി മര്‍ത്ത്മറിയം ഫൊറോന പള്ളിയില്‍ അട്ടപ്പാടി സെഹിയോന്‍ ധ്യാനകേന്ദ്രം ഡയറക്ടര്‍ ഫാ. സേവ്യര്‍ഖാന്‍ വട്ടായില്‍ നയിക്കുന്ന അഭിഷേകാഗ്‌നി ബൈബിള്‍ കണ്‍വന്‍ഷന്‍ ഓഗസ്റ്റ് 15 മുതല്‍ 19 വരെ തീയതികളില്‍ വൈകുന്നേരം മുതല്‍ രാത്രി ഒമ്പതുവരെ നടത്തും. 15ന് ഉച്ചകഴിഞ്ഞ് 3.30ന് ജപമാല, വിശുദ്ധ കുര്‍ബാന ഫാ. ജോസ് വരിക്കപ്പള്ളി. ആര്‍ച്ച്ബിഷപ് മാര്‍ ജോസഫ് പെരുന്തോട്ടം ഉദ്ഘാടനം ചെയ്യും. 16ന് ആര്‍ച്ച്ബിഷപ് മാര്‍ തോമസ് തറയില്‍ സന്ദേശം നല്‍കും. തുടര്‍ന്നുള്ള ദിവസങ്ങളില്‍ വികാരി ജനറാള്‍മാരായ മോണ്‍. ആന്‍റണി എത്തയ്ക്കാട്ട്, മോണ്‍. മാത്യു ചങ്ങങ്കരി, മോണ്‍. സ്‌കറിയ കന്യാകോണില്‍ എന്നിവര്‍ വിശുദ്ധ കുര്‍ബാനയര്‍പ്പിക്കും. കൺവൻഷൻ പ്രവർത്തനങ്ങൾക്കായി 136 അംഗ കമ്മിറ്റി രൂപീകരിച്ചു. വികാരി ഫാ. ജേക്കബ് ചീരംവേലില്‍, ഫാ. ജൂലിയസ് തീമ്പലങ്ങാട്ട്, ജനറല്‍ കണ്‍വീനര്‍മാരായ നെവിന്‍ ആലഞ്ചേരി, സോണി പാലാത്ര, കൈക്കാരന്മാരായ സാബി കല്ലുകളം, വിനോദ് കൊച്ചീത്ര, ജോബി അറയ്ക്കല്‍, പാരിഷ് കൗൺസിൽ സെക്രട്ടറി ജോളിച്ചൻ കുന്നേൽ എന്നിവർ നേതൃത്വം നൽകും.

കത്തോലിക്ക കോണ്‍ഗ്രസ് കാനാന്‍ മിഷന്‍ 2കെ25 സംഗമം 20ന്

ചങ്ങനാശേരി: കത്തോലിക്ക കോണ്‍ഗ്രസ് ചങ്ങനാശേരി അതിരൂപത സമിതിയുടെ നേതൃത്വത്തില്‍ സംഘടിപ്പിക്കുന്ന സമുദായ ശക്തീകരണ ശില്പശാല കാനാന്‍ മിഷന്‍ 2കെ25 20ന് രാവിലെ ഒമ്പതുമുതല്‍ വൈകുന്നേരം 4.30 വരെ സെന്‍റ് മേരീസ് കത്തീഡ്രല്‍ പാരിഷ് ഹാളില്‍ നടക്കും. കത്തോലിക്ക കോണ്‍ഗ്രസിന്‍റെ മുഴുവന്‍ യൂണിറ്റുകളിലെയും പ്രസിഡന്‍റുമാര്‍, സെക്രട്ടറിമാര്‍, ട്രഷറര്‍മാര്‍, അതിരൂപതാ പ്രതിനിധികള്‍, യൂത്ത്-വനിത-മീഡിയ കൗണ്‍സില്‍ പ്രതിനിധികള്‍, ഫൊറോനാ ഭാരവാഹികള്‍, അതിരൂപതാ സമിതിയംഗങ്ങള്‍ എന്നിവര്‍ പങ്കാളികളാകും. സമുദായ ശക്തീകരണ ചിന്തകള്‍, ആനുകാലിക രാഷ്‌ട്രീയ വിഷയങ്ങള്‍, മതസ്വാതന്ത്ര്യം, നസ്രാണി മുന്നേറ്റത്തിന്‍റെ തുടര്‍പ്രവര്‍ത്തന പരിപാടികള്‍, കുട്ടനാടും കാര്‍ഷിക മേഖലയുമായും ബന്ധപ്പെട്ടുള്ള പ്രവര്‍ത്തനങ്ങള്‍ തുടങ്ങിയവ സംബന്ധിച്ചിട്ടുള്ള ക്ലാസുകള്‍, ചര്‍ച്ചകള്‍, നയരൂപീകരണം എന്നിവ ശില്പശാലയുടെ ഭാഗമായി നടക്കും. പ്രസിഡന്‍റ് ബിജു സെബാസ്റ്റ്യന്‍ അധ്യക്ഷത വഹിക്കും. ആര്‍ച്ച്ബിഷപ് മാര്‍ തോമസ് തറയില്‍ ഉദ്ഘാടനം ചെയ്യും. ഗ്ലോബല്‍ പ്രസിഡന്‍റ് പ്രഫ. രാജീവ് കൊച്ചുപറമ്പില്‍, അതിരൂപത ഡയറക്ടര്‍ ഫാ. സെബാസ്റ്റ്യന്‍ ചാമക്കാല, ഗ്ലോബല്‍ ജനറല്‍ സെക്രട്ടറി ഡോ. ജോസുകുട്ടി ജെ. ഒഴുകയില്‍, വൈസ് പ്രസിഡന്‍റ് ബെന്നി ആന്‍റണി എന്നിവര്‍ വിവിധ സെഷനുകള്‍ നയിക്കും. അതിരൂപത ജനറല്‍ സെക്രട്ടറി ബിനു ഡൊമിനിക്, ഭാരവാഹികളായ ജോസ് വെങ്ങാന്തറ, സി.ടി. തോമസ്, ജോര്‍ജുകുട്ടി മുക്കത്ത്, ഷിജി ജോണ്‍സണ്‍, റോസ്‌ലിന്‍ കുരുവിള, രാജേഷ് ജോണ്‍, ടോമിച്ചന്‍ അയ്യരുകുളങ്ങര, ജേക്കബ് നിക്കോളാസ്, ചാക്കപ്പന്‍ ആന്‍റണി, ജോസി ഡൊമിനിക്, കെ.എസ്. ആന്‍റണി, പി.സി. കുഞ്ഞപ്പന്‍, ജോര്‍ജ് വര്‍ക്കി, ജെസി ആന്‍റണി, സിസി അമ്പാട്ട് എന്നിവര്‍ പ്രസംഗിക്കും.

ചങ്ങനാശേരി-കവിയൂര്‍ റോഡിന്‍റെ ശോചനീയാവസ്ഥയിൽ പ്രതിഷേധം

ചങ്ങനാശേരി: ചങ്ങനാശേരി-കവിയൂര്‍ റോഡിന്‍റെ ശോച്യാവസ്ഥ പരിഹരിക്കണമെന്നാവശ്യപ്പെട്ട് അസംഘടിത തൊഴിലാളി കോണ്‍ഗ്രസ് ചങ്ങനാശേരി നിയോജകമണ്ഡലം കമ്മിറ്റിയുടെ ആഭിമുഖ്യത്തില്‍ പ്രതിഷേധയോഗം നടത്തി. നിയോജക മണ്ഡലം പ്രസിഡന്‍റ് മനുകുമാര്‍ അധ്യക്ഷത വഹിച്ചു. അസംഘടിത തൊഴിലാളി കോണ്‍ഗ്രസ് ജില്ലാ പ്രസിഡന്‍റ് എസ്. രാജീവ് ഉദ്ഘാടനം ചെയ്തു. ജില്ലാ കോണ്‍ഗ്രസ് കമ്മിറ്റി ജനറല്‍ സെക്രട്ടറി രാജീവ് മേച്ചേരി, കേരള കോണ്‍ഗ്രസ് ഉന്നതാധികാര സമിതിയംഗം വി.ജെ. ലാലി, ജോമോന്‍ കുളങ്ങര, റെജി കേളമ്മാട്ട്, സിയാദ് അബ്ദുൾ‍ റഹ്‌മാന്‍, സച്ചിന്‍ സാജന്‍ ഫ്രാന്‍സിസ്, ബിലാല്‍, ടി.എ.എം. ഫൈസല്‍, സുരേഷ് കുമാര്‍, അനൂപ് വിജയന്‍, മജീദ്ഖാന്‍ എന്നിവര്‍ പ്രസംഗിച്ചു.

ചുവട് ദ്രവിച്ച പാഴ്മരങ്ങള്‍ ഭീഷണിയായി

കടുത്തുരുത്തി: പ്രധാന റോഡിന്‍റെ വശങ്ങളില്‍ ചുവട് ദ്രവിച്ചു നില്‍ക്കുന്ന പാഴ്മരങ്ങള്‍ അപകട ഭീഷണി ഉയര്‍ത്തുന്നതായി പരാതി. വാഹനത്തിരക്കേറിയ ഏറ്റുമാനൂര്‍-വൈക്കം റോഡ് കടന്നു പോകുന്ന കടുത്തുരുത്തി, മാഞ്ഞൂര്‍, കാണക്കാരി പഞ്ചായത്ത് പ്രദേശങ്ങളിലെല്ലാം ഇത്തരത്തില്‍ അപകടാവസ്ഥയിലുള്ള നിരവധി മരങ്ങള്‍ സ്ഥിതി ചെയ്യുന്നുണ്ട്. വിവിധ പഞ്ചായത്തുകളിലെ ജനപ്രതിനിധികള്‍ ഇക്കാര്യങ്ങള്‍ പലതവണ ചൂണ്ടിക്കാണിച്ചിട്ടുള്ളതാണ്. അപകടാവസ്ഥയിലുള്ള മരങ്ങള്‍ വെട്ടിനീക്കണമെന്ന ആവശ്യവുമായി കടുത്തുരുത്തി പഞ്ചായത്ത് പ്രമേയം പാസാക്കി സമര്‍പ്പിച്ചിട്ടുള്ളതാണെങ്കിലും ഇക്കാര്യത്തില്‍ യാതൊരു നടപടികളും ഉണ്ടായില്ലെന്ന് പഞ്ചായത്തംഗം നോബി മുണ്ടയ്ക്കന്‍ പറഞ്ഞു. ഏറ്റുമാനൂര്‍-വൈക്കം റോഡില്‍ കാണക്കാരി ഗവണ്‍മെന്‍റ് സ്‌കൂളിന് മുന്‍വശത്തായി നില്‍ക്കുന്ന പാഴ്മരം വൈദ്യുതി ലൈനില്‍ തട്ടിയാണ് സ്ഥിതി ചെയ്യുന്നത്. മരത്തിലൂടെ വൈദ്യുതി പ്രവഹിക്കാനുള്ള സാധ്യതയുള്ളത് വലിയ അപകടഭീഷണിയാണ് ഉയര്‍ത്തുന്നത്. നടപ്പാതയും മരം കവര്‍ന്നതോടെ പ്രദേശം ചെളിക്കുളമായി മാറിയിരിക്കുകയാണ്. കൊച്ചുകുട്ടികളടക്കം നിരവധി വിദ്യാര്‍ഥികള്‍ കടന്നു പോകുന്ന പ്രധാന റോഡിലെ ഈ ഭാഗം കാല്‍നടയാത്രക്കാര്‍ക്ക് ഉപയോഗിക്കാന്‍ കഴിയാത്ത വിധമാണ് ഏറെക്കാലമായി കിടക്കുന്നത്. എല്‍കെജി മുതല്‍ ഹയര്‍ സെക്കന്‍ഡറി, വിഎച്ച്എസ്ഇ വരെയുള്ള ക്ലാസുകളില്‍ പഠിക്കുന്ന നൂറുകണക്കിനു കുട്ടികളാണ് പതിവായി ഇതുവഴി കടന്നുപോകുന്നത്. അപകടസാധ്യത ഒഴിവാക്കുന്നതിനായി മരം വെട്ടിനീക്കണമെന്നാവശ്യപ്പെട്ട് പൊതുമരാമത്ത് വകുപ്പിന് പരാതി നല്‍കിയതായി പഞ്ചായത്തംഗം കാണക്കാരി അരവിന്ദാക്ഷന്‍ പറഞ്ഞു.

മാര്‍ക്കറ്റിനു സമീപം മാലിന്യം തള്ളുന്നത് പരിസരവാസികള്‍ക്കു ദുരിതമാകുന്നു

പെരുവ: മാലിന്യമുക്ത പഞ്ചായത്തെന്ന് പ്രഖ്യാപനം നടത്തിയ മാര്‍ക്കറ്റിന് സമീപം മാലിന്യം തള്ളുന്നത് പരിസരവാസികള്‍ക്ക് ദുരിതമാകുന്നു. മുളക്കുളം പഞ്ചായത്തിലെ പെരുവ മാര്‍ക്കറ്റിനു പുറകുവശത്താണ് മാലിന്യം കുന്നുകൂടുന്നത്. മാര്‍ക്കറ്റ് റോഡിന് സമീപത്തെ സ്വകാര്യ വ്യക്തിയുടെ പുരയിടത്തിലേക്കാണ് മാലിന്യം തള്ളിയിരിക്കുന്നത്. മാര്‍ക്കറ്റിലെയും സമീപത്തെയും കച്ചവട സ്ഥാപനങ്ങളില്‍നിന്നുള്ള പ്ലാസ്റ്റിക് ഉള്‍പ്പെടെയുള്ള സാധനങ്ങളാണ് ഇവിടെ നിക്ഷേപിച്ചിരിക്കുന്നത്. മാലിന്യം ചീഞ്ഞ് ദുര്‍ഗന്ധം വമിക്കുന്നത് സമീപത്തെ വീട്ടുകാര്‍ക്കും കച്ചവടക്കാര്‍ക്കും മാര്‍ക്കറ്റിലെത്തുന്നവര്‍ക്കുമെല്ലാം ദുരിതമായി മാറിയിരിക്കുകയാണ്. അടിയന്തരമായി മാലിന്യങ്ങള്‍ നീക്കം ചെയ്യാന്‍ അധികൃതര്‍ നടപടി സ്വീകരിക്കണമെന്നാണ് സമീപവാസികളുടെയും വ്യാപാരികളുടെയും ആവശ്യം.

ആശാനികേതനില്‍ സൗജന്യ മെഡിക്കല്‍ ക്യാമ്പ്

കടുത്തുരുത്തി: കോട്ടയം ജില്ലാ ലീഗല്‍ സര്‍വിസ് അഥോറിറ്റിയുടെയും വൈക്കം താലൂക്ക് ലീഗല്‍ സര്‍വീസ് കമ്മിറ്റിയുടെയും സംയുക്താഭിമുഖ്യത്തില്‍ വൈക്കം താലൂക്ക് ആശുപത്രിയുടെയും കടുത്തുരുത്തി ഫാമിലി ഹെല്‍ത്ത് സെന്‍ററിന്‍റെയും സഹകരണത്തോടെ ആയാംകുടി ആശാനികേതന്‍ സ്പെഷല്‍ സ്‌കൂളില്‍ ഓട്ടിസം ബാധിച്ച കുട്ടികള്‍ക്കായി സൗജന്യ മെഡിക്കല്‍ ക്യാമ്പും ദന്തല്‍ പരിശോധനയും നടത്തി. വൈക്കം താലൂക്ക് ലീഗല്‍ സര്‍വീസ് കമ്മിറ്റി ചെയര്‍പേഴ്‌സണും വൈക്കം ജുഡീഷല്‍ ഒന്നാം ക്ലാസ് മജിസ്ട്രേറ്റുമായ അര്‍ച്ചന കെ. ബാബു ഉദ്ഘാടനം ചെയ്തു. ആശാനികേതന്‍ പ്രിന്‍സിപ്പല്‍ സിസ്റ്റര്‍ അമല്‍ജോ അധ്യക്ഷത വഹിച്ച യോഗത്തില്‍ പി. ജയേഷ്‌കുമാര്‍, അഡ്വ. കെ.ജി. ധന്യ, അഡ്വ. കെ.വി. ഷീബ, വിജയമ്മ ബാബു, മിനി ജയിംസ്, അനു എന്നിവര്‍ പ്രസംഗിച്ചു. താലൂക്കാശുപത്രിയിലെ ഡെന്‍റല്‍ സിവില്‍ സര്‍ജന്‍ ഡോ. വി. സീബാമോളും കടുത്തുരുത്തി ഫാമിലി ഹെല്‍ത്ത് സെന്‍റര്‍ മെഡിക്കല്‍ ഓഫിസര്‍ ഡോ. പി.എസ്. സുഷാന്തും നേതൃത്വം നല്‍കി.

ഡിസിഎംഎസ് യുവജന സെമിനാര്‍ നടത്തി

കോട്ടയം: ദളിത് കത്തോലിക്ക മഹാജനസഭ (ഡിസിഎംഎസ്) സപ്തതി ആഘോഷങ്ങളുടെ ഭാഗമായി കോട്ടയത്ത് യുവജന സെമിനാര്‍ നടത്തി. ഡിസിഎംഎസ് സംസ്ഥാന പ്രസിഡന്‍റ് ജയിംസ് ഇലവുങ്കന്‍റെ അധ്യക്ഷതയില്‍ കൂടിയ യോഗം പരിവര്‍ത്തന ക്രൈസ്തവ ശുപാര്‍ശിത വിഭാഗ വികസന കോര്‍പറേഷന്‍ മാനേജിംഗ് ഡയറക്ടര്‍ ബാബുരാജ് ഉദ്ഘാടനം ചെയ്തു. ഡിസിഎംഎസ് സംസ്ഥാന ഡയറക്ടര്‍ ഫാ. ജോസുകുട്ടി ഇടത്തിനകം, സംസ്ഥാന ജനറല്‍ സെക്രട്ടറി ജസ്റ്റിന്‍ പി. സ്റ്റീഫന്‍, വിജയപുരം രൂപത ഇന്‍വോള്‍വിംഗ് ഡയറക്ടര്‍ ഫാ. ജോസഫ് തറയില്‍, ബിനോയ് ജോണ്‍, മാത്യു ജോസഫ്, ടോമി പൂവത്തോലി എന്നിവര്‍ പ്രസംഗിച്ചു. ക്രൈസ്തവ ശക്തീകരണത്തില്‍ യുവജന പങ്കാളിത്തം എന്ന വിഷയത്തെ ആസ്പദമാക്കി ഡോ. സിജോ ജേക്കബ്, പിഎസ്‌സിയെ അറിയുവാന്‍ എന്ന വിഷയത്തെ ആസ്പദമാക്കി തിരുവനന്തപുരം ജില്ലാ റിട്ട. ഓഫീസര്‍ സാംസണ്‍ സൈമണ്‍ ജോസഫ് എന്നിവര്‍ ക്ലാസുകള്‍ നയിച്ചു.

പൊതുജനാരോഗ്യ മേഖലയെ തകർക്കാനുള്ള ശ്രമങ്ങളെ പ്രതിരോധിക്കണം: മന്ത്രി വി.എൻ. വാസവൻ

തലയോലപ്പറമ്പ്: രാജ്യത്തെ പൊതുജനാരോഗ്യ സംവിധാനത്തിൽ പ്രഥമ സ്ഥാനത്ത് നിൽക്കുന്ന കേരളത്തിന്‍റെ ആരോഗ്യമേഖലയെ തകർക്കുന്നതിനുള്ള യുഡിഎഫിന്‍റെയും ബിജെപിയുടെയും ശ്രമങ്ങളെ ജനങ്ങൾ തിരിച്ചറിയണമെന്നു സഹകരണ വകുപ്പ് മന്ത്രി വി.എൻ. വാസവൻ. കേരളത്തിലെ പൊതുജനാരോഗ്യ മേഖലയെ തകർക്കുന്നതിനുള്ള ബോധപൂർവമായ ശ്രമങ്ങൾക്കെതിരേ ഇടതുപക്ഷ ജനാധിപത്യ മുന്നണി തലയോലപ്പറമ്പ് ഏരിയാ കമ്മിറ്റി സംഘടിപ്പിച്ച ജനകീയ പ്രതിരോധ സദസ് ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം. സിപിഐ തലയോലപ്പറമ്പ് മണ്ഡലം സെക്രട്ടറി സാബു പി. മണലൊടി അധ്യക്ഷത വഹിച്ചു. സി.കെ. ആശ എംഎൽഎ, ജില്ലാ പഞ്ചായത്ത് വൈസ് പ്രസിഡന്‍റ് ജോസ് പുത്തൻകാലാ, സിപിഎം ജില്ലാ കമ്മിറ്റിയംഗം കെ. ശെൽവരാജ്, ഏരിയാ സെക്രട്ടറി ഡോ. സി.എം. കുസുമൻ, സുഭാഷ് പുഞ്ചക്കോട്ടിൽ, ലൂക്ക് മാത്യു, അഡ്വ. ആന്‍റണി കളമ്പുകാടൻ, ടി.വി. ബേബി എന്നിവർ പ്രസംഗിച്ചു.

കെപിപിഎല്ലിനു മുന്നിൽ ഉപവാസസമരം നടത്തി

വെള്ളൂർ: കേരള സർക്കാർ സ്ഥാപനമായ കെപിപിഎല്ലിൽ ജോലി ചെയ്യുന്ന എച്ച്എൻഎല്ലിലെ മുൻ ജീവനക്കാർ ഉൾപ്പെടെയുള്ള തൊഴിലാളികളോടുള്ള അവഗണനയും മാനേജ്മെന്‍റെ തൊഴിലാളിവിരുദ്ധനിലപാടും അവസാനിപ്പിച്ചില്ലെങ്കിൽ കോൺഗ്രസും ഐഎൻടിയുസിയും തൊഴിലാളി സമരം ഏറ്റെടുക്കുമെന്ന് ഐഎൻടിയുസി സംസ്ഥാന പ്രസിഡന്‍റെ ആർ. ചന്ദ്രശേഖരൻ പറഞ്ഞു. സർക്കാരിന്‍റെ അവഗണനയ്ക്കെതിരേയും മാനേജ്മെന്‍റിന്‍റെ തൊഴിലാളിവിരുദ്ധ നിലപാടുകൾക്കെതിരേയും കെപിപിഎൽ ഐഎൻടിയുസി യൂണിയന്‍റെ നേതൃത്വത്തിൽ കെപിപിഎല്ലിനു മുന്നിൽ നടത്തിയ ഏകദിന ഉപവാസസമരം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. വർക്കേഴ്സ് അസോസിയേഷൻ ഐഎൻടിയുസി ജനറൽ സെക്രട്ടറി കെ.പി. ജോസ് അധ്യക്ഷത വഹിച്ചു. തലയോലപ്പറമ്പ് ബ്ലോക്ക് കോൺഗ്രസ് പ്രസിഡന്‍റ് എം.കെ. ഷിബു, ഐഎൻടിയുസി സംസ്ഥാന സെക്രട്ടറിമാരായ എം.വി. മനോജ്, പി.വി. പ്രസാദ്, ജില്ലാ സെക്രട്ടറി ഇടവട്ടം ജയകുമാർ, എം.എൻ. ദിവാകരൻനായർ, എസ്.എസ്. മുരളി, വി.ടി. ജയിംസ്, പി.എസ്. ബാബു, വി.സി. ജോഷി, സുജിത്ത് സുരേന്ദ്രൻ, അജിത് കുമാർ തുടങ്ങിയവർ പ്രസംഗിച്ചു.

ഇരുചക്രവാഹനം മോഷ്ടിച്ചതായി പരാതി

വൈക്കം: വഴിയോരക്കച്ചവട സ്ഥാപനത്തിനു സമീപത്തെ ഷെഡിനുള്ളിൽ സൂക്ഷിച്ചിരുന്ന ഇരുചക്ര വാഹനം മോഷണം പോയതായി പരാതി. വൈക്കം വൈപ്പിൻപടി കുര്യപ്പള്ളി മോഹനന്‍റെ ഇരുചക്ര വാഹനമാണ് കഴിഞ്ഞ രാത്രി മോഷണം പോയത്. വൈപ്പിൻപടിയിൽ വഴിയോരക്കച്ചവടം നടത്തുകയാണ് മോഹനൻ. വൈപ്പിൻപടി ഭാഗത്ത് മോഷണവും സാമൂഹ്യവിരുദ്ധശല്യവും വർധിച്ചു വരികയാണെന്ന് പ്രദേശവാസികൾ ആരോപിച്ചു. വൈക്കം പോലീസ് കേസെടുത്ത് അന്വേഷണം ആരംഭിച്ചു.

പൊതുജനാരോഗ്യ മേഖലയെ പ്രതിപക്ഷം ഇകഴ്ത്തിക്കാണിക്കുന്നു: ജോസ് കെ. മാണി

പാലാ: രാജ്യത്തിന് മാതൃകയായ കേരളത്തിന്‍റെ ആരോഗ്യ മേഖലയെ പ്രതിപക്ഷം ഇകഴ്ത്തിക്കാണിക്കുകയാണെന്ന് കേരള കോണ്‍ഗ്രസ്-എം ചെയര്‍മാന്‍ ജോസ് കെ. മാണി എംപി. പൊതുജനാരോഗ്യമേഖലയെ തകര്‍ക്കാന്‍ ബിജെപി-യുഡിഎഫ് ഗൂഢാലോചന നടക്കുന്നുവെന്നാരോപിച്ച് എല്‍ഡിഎഫിന്‍റെ ആഭിമുഖ്യത്തില്‍ ഇന്നലെ പാലായില്‍ നടത്തിയ ബഹുജന മാര്‍ച്ച് ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം. എല്‍ഡിഎഫ് കണ്‍വീനര്‍ ബാബു കെ. ജോര്‍ജ് അധ്യക്ഷത വഹിച്ചു. ജില്ലാ കണ്‍വീനര്‍ പ്രഫ. ലോപ്പസ് മാത്യു, സജേഷ് ശരി, ലാലിച്ചന്‍ ജോര്‍ജ്, നഗരസഭാ ചെയര്‍മാന്‍ തോമസ് പീറ്റര്‍, ടോബിന്‍ കെ. അലക്‌സ്, പി.കെ. ഷാജകുമാര്‍, ബെന്നി മൈലാടൂര്‍, ജോസ് ടോം, കെ.എസ്. രമേശ് ബാബു, ഷാജി കടമല, എസ്. സുനില്‍ കുമാര്‍, ബിജി മണ്ഡപം, ഫിലിപ്പ് കുഴികുളം തുടങ്ങിയവർ പ്രസംഗിച്ചു.

ഡിസിഎംഎസ് യുവജന സെമിനാര്‍ നടത്തി

കോട്ടയം: ദളിത് കത്തോലിക്ക മഹാജനസഭ (ഡിസിഎംഎസ്) സപ്തതി ആഘോഷങ്ങളുടെ ഭാഗമായി കോട്ടയത്ത് യുവജന സെമിനാര്‍ നടത്തി. ഡിസിഎംഎസ് സംസ്ഥാന പ്രസിഡന്‍റ് ജയിംസ് ഇലവുങ്കലിന്‍റെ അധ്യക്ഷതയില്‍ ചേർന്ന യോഗം പരിവര്‍ത്തിത ക്രൈസ്തവ ശിപാര്‍ശിത വിഭാഗ വികസന കോര്‍പറേഷന്‍ മാനേജിംഗ് ഡയറക്ടര്‍ ബാബുരാജ് ഉദ്ഘാടനം ചെയ്തു. ഡിസിഎംഎസ് സംസ്ഥാന ഡയറക്ടര്‍ ഫാ. ജോസുകുട്ടി ഇടത്തിനകം, സംസ്ഥാന ജനറല്‍ സെക്രട്ടറി ജസ്റ്റിന്‍ പി. സ്റ്റീഫന്‍, വിജയപുരം രൂപത ഇന്‍വോള്‍വിംഗ് ഡയറക്ടര്‍ ഫാ. ജോസഫ് തറയില്‍, ബിനോയി ജോണ്‍, മാത്യു ജോസഫ്, ടോമി പൂവത്തോലി എന്നിവര്‍ പ്രസംഗിച്ചു. ക്രൈസ്തവ ശക്തീകരണത്തില്‍ യുവജന പങ്കാളിത്തം എന്ന വിഷയത്തെ ആസ്പദമാക്കി ഡോ. സിജോ ജേക്കബ്, പിഎസ്‌‌സിയെ അറിയുവാന്‍ എന്ന വിഷയത്തെ ആസ്പദമാക്കി തിരുവനന്തപുരം ജില്ലാ റിട്ടയേർഡ് ഓഫീസര്‍ സാംസണ്‍ സൈമണ്‍ ജോസഫ് എന്നിവര്‍ ക്ലാസുകള്‍ നയിച്ചു.

പാലാ ജനറല്‍ ആശുപത്രി: ചോദ്യങ്ങളില്‍നിന്ന് മുനിസിപ്പല്‍ ഭരണസമിതി ഒളിച്ചോടുന്നതായി പ്രതിപക്ഷം

പാലാ: ജനറല്‍ ആശുപത്രിയിലെ കെട്ടിടങ്ങള്‍ക്ക് നമ്പരും അഗ്നിരക്ഷാസേനയുടെ എന്‍ഒസിയും ഉണ്ടോ എന്ന ചോദ്യത്തിന് തുടര്‍ച്ചയായ രണ്ടാം കൗണ്‍സില്‍ യോഗത്തിലും മറുപടി പറയാതെ ഭരണപക്ഷത്തിന്‍റെ ഒളിച്ചുകളി. കഴിഞ്ഞയാഴ്ച ചേര്‍ന്ന കൗണ്‍സില്‍ യോഗത്തില്‍ പ്രതിപക്ഷം ഇതുമായി ബന്ധപ്പെട്ട് ചോദ്യമുയര്‍ത്തിയപ്പോള്‍ അടുത്ത കൗണ്‍സില്‍ യോഗത്തില്‍ പരിശോധിച്ചു പറയാം എന്ന മറുപടിയാണ് സെക്രട്ടറി നല്‍കിയത്. തുടര്‍ന്ന് ഇന്നലെ നടന്ന കൗണ്‍സില്‍ യോഗത്തില്‍ പ്രതിപക്ഷ നേതാവ് പ്രഫ. സതീശ് ചൊള്ളാനി ഈ വിഷയം ഉന്നയിച്ചപ്പോള്‍ കൗണ്‍സിലില്‍ അജൻഡയ്ക്ക് പുറത്തുള്ള കാര്യങ്ങള്‍ ചര്‍ച്ച ചെയ്യേണ്ടതില്ല എന്ന സാങ്കേതികത്വം പറഞ്ഞ് അധികൃതരും ഭരണസമിതിയും ചെയര്‍മാനും ഒഴിഞ്ഞുമാറുകയായിരുന്നു. ‌വിവിധ സര്‍ക്കാര്‍ വകുപ്പുകള്‍ നടത്തിയ പരിശോധനയില്‍ ജനറല്‍ ആശുപത്രി കെട്ടിടങ്ങളുടെ സുരക്ഷാ വെല്ലുവിളികള്‍ ഉയര്‍ത്തിക്കാട്ടുന്ന റിപ്പോര്‍ട്ട് ചൂണ്ടിക്കാട്ടിയാണ് പ്രതിപക്ഷം ചോദ്യങ്ങള്‍ ഉയര്‍ത്തിയത്. സാങ്കേതികത്വത്തിന്‍റെ മറവില്‍ മൗനം പാലിക്കാതെ യാഥാര്‍ഥ്യം തുറന്നു പറയാനുള്ള ആര്‍ജവം ചെയര്‍മാനുണ്ടാവണമെന്നും അദ്ദേഹം ആവശ്യപ്പെട്ടു. പാലാ ജനറല്‍ ആശുപത്രിയിലെ കെട്ടിടങ്ങള്‍ക്ക് അഗ്നിരക്ഷാസേന എന്‍ഒസി ഇല്ല എന്നതടക്കമുള്ള വിഷയങ്ങള്‍ പുറത്തുവന്നിട്ട് ദിവസങ്ങളായിട്ടും അധികൃതരുടെ ഭാഗത്തുനിന്ന് ഒരു നടപടിയും പ്രതികരണവും ഉണ്ടായിട്ടില്ല. വിഷയത്തില്‍ ശക്തമായ തുടര്‍ സമരങ്ങള്‍ സംഘടിപ്പിക്കാനും പ്രതിപക്ഷം തീരുമാനിച്ചു. സുരക്ഷാ മാനദണ്ഡങ്ങള്‍ ഉറപ്പാക്കണം: കേരള കോണ്‍ഗ്രസ് പാലാ: കഴിഞ്ഞ ഏഴു വര്‍ഷമായി ഫയര്‍ സേഫ്റ്റി ഉറപ്പാക്കാതെ ജനറല്‍ ആശുപത്രി കെട്ടിടങ്ങള്‍ പ്രവര്‍ത്തിക്കാനിടയായ കാര്യം സമഗ്രമായി അന്വേഷിച്ച് അപാകതകള്‍ കണ്ടെത്തി പരിഹരിച്ച് രോഗികളുടെ സുരക്ഷ ഉറപ്പാക്കണമെന്ന് കേരള കോണ്‍ഗ്രസ് വര്‍ക്കിംഗ് ചെയര്‍മാന്‍ പി.സി. തോമസ് ആവശ്യപ്പെട്ടു. പാര്‍ട്ടി നിയോജകമണ്ഡലം കമ്മിറ്റി യോഗം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ആശുപത്രി നിര്‍മാണത്തിലും ഇലക്‌ട്രിക് വര്‍ക്കിലും കണ്ടെത്തിയിരിക്കുന്ന അപാകതകള്‍ ഉടന്‍ പരിഹരിക്കണമെന്നും ആശുപത്രിവക സ്ഥലം അളന്ന് അതിരുകള്‍ സ്ഥാപിച്ചു കൈയേറ്റം തടയണമെന്നും അദ്ദേഹം ആവശ്യപ്പെട്ടു. നിയോജകമണ്ഡലം പ്രസിഡന്‍റ് ജോര്‍ജ് പുളിങ്കാട് അധ്യക്ഷത വഹിച്ചു. സംസ്ഥാന സെക്രട്ടറി ജനറല്‍ ജോയി ഏബ്രഹാം, ജില്ലാ പ്രസിഡന്‍റ് ജെയ്‌സണ്‍ ജോസഫ്, തോമസ് ഉഴുന്നാലില്‍, ജയിംസ് മാത്യു തെക്കേല്‍, മൈക്കിള്‍ പുല്ലുമാക്കല്‍, തങ്കച്ചന്‍ മണ്ണൂശേരി, ഷിബു പൂവേലില്‍, മത്തച്ചന്‍ പുതിയിടത്തുചാലില്‍, ജോയി കോലത്ത്, ജോബി കുറ്റിക്കാട്ട്, ജോഷി വട്ടക്കുന്നേല്‍ തുടങ്ങിയവര്‍ പ്രസംഗിച്ചു.

മൂന്നര പതിറ്റാണ്ടിനുശേഷം ഒരുവട്ടംകൂടി ഒത്തുചേർന്നു

കുന്നോന്നി: സെന്‍റ് ജോസഫ് യുപി സ്കൂളിലെ 1991-92 ബാച്ചുകാർ ഓർമകൾ ഓടിക്കളിക്കുന്ന മാതൃവിദ്യാലയത്തിന്‍റെ തിരുമുറ്റത്ത് ഒത്തുകൂടി. പതിറ്റാണ്ടുകൾക്കു ശേഷമുള്ള കണ്ടുമുട്ടലിൽ വിശേഷങ്ങൾ പറഞ്ഞും പഴയകാല ഓർമകൾ അയവിറക്കിയും ബാല്യകാല സഹപാഠികൾ മണിക്കൂറുകൾ ചെലവഴിച്ചു. സ്കൂൾ മാനേജർ ഫാ. മാത്യു പീടികയിൽ സംഗമം ഉദ്ഘാടനം ചെയ്തു. അനീഷ് കീച്ചേരി അധ്യക്ഷത വഹിച്ചു. മുൻ സ്കൂൾ മാനേജർ ഫാ. ജോർജ് പുതിയാപറമ്പിൽ മുഖ്യപ്രഭാഷണം നടത്തി. ഹെഡ്മിസ്ട്രസ് ഷീനാമോൾ ജേക്കബ്, മാത്യു ഫിലിപ്പ് അറമത്ത്, ജോബി ഇളംതുരുത്തിയിൽ, മോഹൻദാസ് തുണ്ടത്തിൽ തുടങ്ങിയവർ പ്രസംഗിച്ചു. പൂർവ അധ്യാപകരായ സിസ്റ്റർ മേഴ്സിറ്റ, സിസ്റ്റർ അൽഫോൻസ്, സിസ്റ്റർ ആലീസ്, ഓമന സഖറിയാസ്, എ.എം. ജോസഫ് ആരംപുളിക്കൽ തുടങ്ങിവരെ ആദരിച്ചു.

ബഡ്സ് റീഹാബിലിറ്റേഷന്‍ സെന്‍റര്‍ ഉദ്ഘാടനം നാളെ

കിടങ്ങൂര്‍: പഞ്ചായത്തിന്‍റെ നേതൃത്വത്തില്‍ ജില്ലയിലെ അഞ്ചാമത്തേതും പമ്പാടി ബ്ലോക്ക് പഞ്ചായത്തിലെ ആദ്യത്തേതുമായ ബഡ്സ് റീഹാബിലിറ്റേഷന്‍ സെന്‍റര്‍ ഉദ്ഘാടനം നാളെ 2.30ന് നടക്കും. ജില്ലാ പഞ്ചായത്ത് പ്രസിഡന്‍റ് ഹേമലത പ്രേംസാഗര്‍ ഉദ്ഘാടനം നിര്‍വഹിക്കും. പഞ്ചായത്ത് പ്രസിഡന്‍റ് അഡ്വ. ഇ.എം. ബിനു അധ്യക്ഷത വഹിക്കും. ജില്ലാ പഞ്ചായത്ത് മെംബര്‍ ജോസ്മോന്‍ മുണ്ടയ്ക്കല്‍ താക്കോല്‍ദാനവും ഉപകരണങ്ങള്‍ കൈമാറലും നടത്തും. ബ്ലോക്ക് പഞ്ചായത്ത് പ്രസിഡന്‍റ് ബെറ്റി റോയി മുഖ്യപ്രഭാഷണം നടത്തും. ബ്ലോക്ക് പഞ്ചായത്ത് മെംബര്‍മാരായ ഡോ. മേഴ്സി ജോണ്‍, അശോക് കുമാര്‍ പൂതമന, വൈസ് പ്രസിഡന്‍റ് ടീന മാളിയേക്കല്‍ എന്നിവര്‍ പ്രസംഗിക്കും. ജില്ലാ പഞ്ചായത്തിന്‍റെ പദ്ധതിയില്‍ ഉള്‍പ്പെടുത്തി ജില്ലാ പഞ്ചായത്ത് മെംബര്‍ ജോസ്മോന്‍ മുണ്ടയ്ക്കല്‍ അനുവദിച്ച 20 ലക്ഷം രൂപയും പാമ്പാടി ബ്ലോക്ക് പഞ്ചായത്തിന്‍റെയും കിടങ്ങൂര്‍ പഞ്ചായത്തിന്‍റെയും അഞ്ചു ലക്ഷം രൂപ വീതവും ഉൾപ്പെടെ 30 ലക്ഷം രൂപ ഉപയോഗിച്ചാണ് റീഹാബിലിറ്റേഷന്‍ സെന്‍ററിന് ആവശ്യമായ കെട്ടിടം നിര്‍മിച്ചത്. കുടുംബശ്രീ ജില്ലാ മിഷന്‍ മുഖേന 12.5 ലക്ഷം രൂപയുടെ ഫര്‍ണിച്ചറുകളും ലഭ്യമായി. കുമ്മണ്ണൂര്‍ സാംസ്‌കാരിക നിലയത്തിനു സമീപമുള്ള പഞ്ചായത്തുവക സ്ഥലത്താണ് കെട്ടിടം നിര്‍മിച്ചിട്ടുള്ളത്. കിടങ്ങൂര്‍ പഞ്ചായത്ത് പ്രദേശത്തെയും സമീപപ്രദേശങ്ങളിലെയും ഭിന്നശേഷിക്കാരായ ആളുകളുടെ അഭയകേന്ദ്രം എന്ന നിലയിലേക്ക് ഈ സെന്‍റര്‍ മാറും. പ്രായവ്യത്യാസമില്ലാതെ ഭിന്നശേഷിക്കാരായ ആളുകള്‍ക്ക് ഈ സെന്‍ററിന്‍റെ ഗുണഭോക്താക്കളായി മാറുവാന്‍ സാധിക്കും. രാവിലെ പത്തുമുതല്‍ നാലുവരെയാണ് സെന്‍ററിന്‍റെ പ്രവര്‍ത്തനം.

മിനിമാസ്റ്റ് ലൈറ്റ് ഉദ്ഘാടനം ചെയ്തു

ചിറക്കടവ്: ആന്‍റോ ആന്‍റണി എംപിയുടെ പ്രദേശിക വികസന ഫണ്ടിൽനിന്ന് 2,19,500 രൂപ അനുവദിച്ച് മണ്ണംപ്ലാവ് പള്ളിപ്പടി ജംഗ്ഷനിൽ നിർമാണം പൂർത്തീകരിച്ച മിനിമാസ്റ്റ് ലൈറ്റിന്‍റെ ഉദ്ഘാടനം താമരക്കുന്ന് സെന്‍റ് ഇഫ്രേംസ് പള്ളി വികാരി ഫാ. റെജി മാത്യു നിർവഹിച്ചു. ചിറക്കടവ് പഞ്ചായത്ത് പ്രസിഡന്‍റ് സി.ആർ. ശ്രീകുമാർ അധ്യക്ഷത വഹിച്ചു. ജില്ലാ പഞ്ചായത്തംഗം ജെസി ഷാജൻ, എം.ജി. വിനോദ്, സേവ്യർ മൂലകുന്ന്, അഭിലാഷ് ചന്ദ്രൻ, ശ്യാം ബാബു, രാജു പാഴിയാങ്കൽ, റോബിൻ കുഴിമറ്റം, തോമസ് മണ്ണാത്ത്, ബിജു മുണ്ടുവേലിക്കുന്നേൽ, ഇന്ദുകല എസ്. നായർ എന്നിവർ പ്രസംഗിച്ചു.

കോഴിമാലിന്യങ്ങൾ സംസ്കരിക്കാനുള്ള റെൻഡറിംഗ് യൂണിറ്റ് പ്രവർത്തനമാരംഭിച്ചു

പാറത്തോട്: കോഴിമാലിന്യങ്ങൾ സംസ്കരിക്കാനുള്ള ജില്ലയിലെ ആദ്യത്തെ റെൻഡറിംഗ് യൂണിറ്റ് പാറത്തോട് അഞ്ചിലവിൽ പ്രവർത്തനമാരംഭിച്ചു. തദ്ദേശ സ്വയംഭരണ, എക്സൈസ് മന്ത്രി എം.ബി. രാജേഷ് ഉദ്ഘാടനം ചെയ്തു. റെൻഡറിംഗ് യൂണിറ്റുകൾ ആരംഭിച്ചതോടെ കേരളത്തിൽ കോഴിമാലിന്യങ്ങൾ മൂലം വഴി നടക്കാൻ കഴിയാതിരുന്ന സ്ഥിതിക്ക് മാറ്റം വന്നതായി അദ്ദേഹം പറഞ്ഞു. ടൺകണക്കിന് കോഴിമാലിന്യങ്ങൾ വഴിനീളെ നിക്ഷേപിക്കുന്ന സ്ഥിതിയുണ്ടായിരുന്നു. ഇതിന് പരിഹാരം കാണാനാണ് സർക്കാർ റെൻഡറിംഗ് പ്ലാന്‍റുകൾ പബ്ലിക്, പ്രൈവറ്റ് പാർട്ടിസിപ്പേഷൻ അടിസ്ഥാനത്തിൽ ആരംഭിക്കാൻ തീരുമാനിച്ചതെന്നും ഇന്ന് കേരളത്തിലാകെ 42 റെൻഡറിംഗ് പ്ലാന്‍റുകൾ ആരംഭിക്കാൻ കഴിഞ്ഞതായും മന്ത്രി കൂട്ടിച്ചേർത്തു. സമ്മേളനത്തിൽ സെബാസ്റ്റ്യൻ കുളത്തുങ്കൽ എംഎൽഎ അധ്യക്ഷത വഹിച്ചു. ചീഫ് വിപ്പ് ഡോ. എൻ. ജയരാജ് കുക്കർ സ്വിച്ച്ഓൺ കർമം നിർവഹിച്ചു. പാറത്തോട് പഞ്ചായത്ത് പ്രസിഡന്‍റ് കെ.കെ. ശശികുമാർ, എരുമേലി പഞ്ചായത്ത് പ്രസിഡന്‍റ് മറിയാമ്മ സണ്ണി, ബ്ലോക്ക് പഞ്ചായത്തംഗം സാജൻ കുന്നത്ത്, സിനിൽ വി. മാത്യു, ബോണി വി. സെബാസ്റ്റ്യൻ, മാർട്ടിൻ ഡേവിഡ് എന്നിവർ പ്രസംഗിച്ചു. സംസ്ഥാന സർക്കാരിന്‍റെ മാലിന്യമുക്ത നവകേരള പദ്ധതിയുടെ ഭാഗമായി സംസ്ഥാന ശുചിത്വമിഷന്‍റെ അംഗീകാരത്തോടെയാണ് യുണൈറ്റഡ് റെൻഡറിംഗ് യൂണിറ്റ് പ്രവർത്തനം ആരംഭിച്ചിരിക്കുന്നത്. കോഴിമാലിന്യങ്ങൾ സംസ്കരിച്ച് വളർത്തുമൃഗങ്ങൾക്കുള്ള ഭക്ഷണവും കൃഷിക്കുള്ള വളവുമാക്കി മാറ്റുകയാണ് ഇവിടെ ചെയ്യുന്നത്.

കോൺഗ്രസ് പ്രതിഷേധ മാർച്ച് നടത്തും

കാഞ്ഞിരപ്പള്ളി: മാസങ്ങളായി പൊളിച്ചിട്ടിരിക്കുന്ന വില്ലണി കോഴികൊത്തി പാലവും മഞ്ഞപ്പള്ളി പുളിമാക്കൽ പാലവും അടിയന്തരമായി പുനർനിർമിക്കണമെന്ന് ആവശ്യപ്പെട്ട് കോൺഗ്രസ് ആനക്കല്ല്, മഞ്ഞപ്പള്ളി വാർഡ് കമ്മിറ്റികളുടെ നേതൃത്വത്തിൽ നാളെ വില്ലണിയിൽനിന്നു മഞ്ഞപ്പള്ളിയിലേക്ക് പ്രതിഷേധ മാർച്ച് നടത്തുമെന്ന് ഭാരവാഹികൾ അറിയിച്ചു. തമ്പലക്കാട്, എറികാട്, തുമ്പമട പ്രദേശങ്ങളിൽനിന്നു നൂറുകണക്കിനാളുകൾ കാഞ്ഞിരപ്പള്ളി-ഈരാറ്റുപേട്ട റോഡിലേക്ക് എത്താൻ ഉപയോഗിച്ചിരുന്ന പാലങ്ങൾ പുനർനിർമിക്കാൻ എന്ന പേരിൽ മാസങ്ങളായി പൊളിച്ചിട്ടിരിക്കുകയാണ്. ഇതുമൂലം പൊതുജനങ്ങൾ വളരെയേറെ ബുദ്ധിമുട്ടുകയാണ്. അടിയന്തര ആവശ്യങ്ങൾക്കുപോലും കിലോമീറ്ററുകൾ ചുറ്റി യാത്ര ചെയ്യേണ്ട സാഹചര്യമാണ്. പാലങ്ങൾ പൊളിച്ചിട്ടതല്ലാതെ പുനർനിർമിക്കാൻ ഒരു നടപടിയും ബന്ധപ്പെട്ട ജനപ്രതിനിധികളുടെ ഭാഗത്തുനിന്ന് ഉണ്ടാകുന്നില്ല. പാലത്തിന് ഫണ്ട് അനുവദിച്ചെന്നു പ്രഖ്യാപിച്ച് ഫ്ലക്സ് ബോർഡുകൾ വച്ചതല്ലാതെ പുനർനിർമിക്കാൻ യാതൊരു നടപടിയും സ്വീകരിക്കാത്തത് പൊതുജനങ്ങളോടുള്ള വെല്ലുവിളിയാണെന്നും കോൺഗ്രസ് വാർഡ് കമ്മിറ്റികൾ ആരോപിച്ചു. നാളെ വൈകുന്നേരം നാലിന് വില്ലണിയിൽ പൊളിച്ചിട്ടിരിക്കുന്ന കോഴികൊത്തി പാലത്തിന് സമീപത്തുനിന്ന് പ്രതിഷേധ മാർച്ച് ആരംഭിക്കും.

വിശ്വാസജീവിത അധ്യാപക പരിശീലനം

കാഞ്ഞിരപ്പള്ളി: വിശ്വാസജീവിത പരിശീലകര്‍ക്കായി കാഞ്ഞിരപ്പള്ളി രൂപത വിശ്വാസജീവിത പരിശീലനകേന്ദ്രം ഒരുക്കിയ അധ്യാപക പരിശീലനം രൂപതാധ്യക്ഷന്‍ മാര്‍ ജോസ് പുളിക്കല്‍ ഉദ്ഘാടനം ചെയ്തു. സെന്‍റ് ഡൊമിനിക്‌സ് കത്തീഡ്രല്‍ വികാരി റവ.ഡോ. കുര്യന്‍ താമരശേരി, രൂപത വിശ്വാസജീവിത പരിശീലന ഡയറക്ടര്‍ ഫാ. തോമസ് വാളന്മനാല്‍ എന്നിവര്‍ പ്രസംഗിച്ചു. സഭാത്മക ജീവിതത്തില്‍ അടിത്തറ പാകി, അറിവിലൂടെ അനുഭവത്തിലേക്ക് കുട്ടികളെ നയിക്കുവാന്‍ നൂതന രീതിയിലുള്ള ബോധനരീതി പരിചയപ്പെടുത്തുകയാണ് പരിശീലന പരിപാടിയിലൂടെ ലക്ഷ്യമിടുന്നത്.

വനിതാ സ്വയംസംരംഭക വായ്പാമേളയും ബോധവത്കരണ പരിപാടിയും

വാഴൂര്‍: സംസ്ഥാന വനിതാ വികസന കോര്‍പറേഷന്‍ ദേശീയ ന്യൂനപക്ഷ കോര്‍പറേഷന്‍റെയും വാഴൂര്‍ പഞ്ചായത്തിന്‍റെയും സഹകരണത്തോടെ വനിതകള്‍ക്കായുള്ള വായ്പാമേളയും ബോധവത്കരണ പരിപാടിയും സംഘടിപ്പിച്ചു. വാഴൂര്‍ പഞ്ചായത്ത് ഹാളില്‍ നടന്ന പരിപാടിയില്‍ വാഴൂര്‍ സിഡിഎസിനുള്ള വായ്പാത്തുകയായ മൂന്നു കോടി രൂപയുടെ വിതരണവും വായ്പാമേളയുടെ ഉദ്ഘാടനവും ചീഫ് വിപ്പ് ഡോ. എന്‍. ജയരാജ് നിര്‍വഹിച്ചു. വാഴൂര്‍ പഞ്ചായത്ത് പ്രസിഡന്‍റ് തോമസ് വെട്ടുവേലില്‍ അധ്യക്ഷത വഹിച്ചു. വനിതാ വികസന കോര്‍പറേഷന്‍ മാനേജിംഗ് ഡയറക്ടര്‍ വി.സി. ബിന്ദു, വനിതാ വികസന കോര്‍പറേഷന്‍ ഡയറക്ടര്‍ പെണ്ണമ്മ തോമസ്, പഞ്ചായത്ത് വൈസ് പ്രസിഡന്‍റ് ഡി. സേതുലക്ഷ്മി, വാഴൂര്‍ ഫാര്‍മേഴ്‌സ് ബാങ്ക് പ്രസിഡന്‍റ് ബൈജു കെ. ചെറിയാന്‍, വാഴൂര്‍ പഞ്ചായത്തംഗങ്ങളായ ജിജി നെടുവത്താനി, പി.ജെ. ശോശാമ്മ , ശ്രീകാന്ത് പി. തങ്കച്ചന്‍, വാഴൂര്‍ സിഡിഎസ് ചെയര്‍പേഴ്‌സണ്‍ സ്മിത ബിജു, വനിതാ വികസന കോര്‍പറേഷന്‍ എറണാകുളം മേഖലാ മാനേജര്‍ എം.ആര്‍. രംഗന്‍ എന്നിവര്‍ പ്രസംഗിച്ചു.

വളര്‍ത്തുമൃഗങ്ങളുടെ വന്ധ്യംകരണം : സഞ്ചരിക്കുന്ന ഓപ്പറേഷന്‍ യൂണിറ്റുകള്‍ പ്രവര്‍ത്തനം തുടങ്ങി

കോട്ടയം: ജില്ലയിലെ വളര്‍ത്തുമൃഗങ്ങളുടെ വന്ധ്യംകരണത്തിന് ജില്ലാ വെറ്ററിനറി കേന്ദ്രത്തിന്‍റെ ആഭിമുഖ്യത്തില്‍ സഞ്ചരിക്കുന്ന ഓപ്പറേഷന്‍ യൂണിറ്റുകള്‍ പ്രവര്‍ത്തനം തുടങ്ങി. റീബില്‍ഡ് കേരള ഇനിഷേറ്റീവിന്‍റെ ഭാഗമായിട്ടാണ് ജില്ലയില്‍ ആറിടത്തു സേവനം ലഭ്യമാക്കുക. നിലവില്‍ കോടിമത ജില്ലാ വെറ്ററിനറി കേന്ദ്രത്തില്‍ വന്ധ്യംകരണത്തിനുള്ള സൗകര്യമുണ്ട്. ഇതിനു പുറമേ പാലാ, കാഞ്ഞിരപ്പള്ളി, ചങ്ങനാശേരി വെറ്ററിനറി കേന്ദ്രങ്ങളിലും വാഴൂര്‍, മരങ്ങാട്ടുപിള്ളി, മാഞ്ഞൂര്‍ എന്നീ മൃഗാശുപത്രികളിലുമാണു മൊബൈല്‍ യൂണിറ്റുകളുടെ സേവനം ലഭ്യമാക്കുന്നത്. വളര്‍ത്തുനായ്ക്കള്‍, പൂച്ച എന്നിവയുടെ വന്ധ്യംകരണമാണു പ്രധാനമായും നടത്തുന്നുത്. വളര്‍ത്തുമൃഗങ്ങളുടെ ഉടമസ്ഥര്‍ അതാതു കേന്ദ്രങ്ങളില്‍ എത്തി പേരു രജിസ്റ്റര്‍ ചെയ്തു കഴിയുമ്പോള്‍ ശസ്ത്രക്രിയയ്ക്കുള്ള തീയതി നിശ്ചയിച്ച് ഉടമസ്ഥരെ അറിയിക്കും. ഈ ദിവസം വളര്‍ത്തുമൃഗങ്ങളുമായി ഉടമസ്ഥര്‍ എത്തണം. മൊബൈല്‍ സര്‍ജറി യൂണിറ്റില്‍ ആംബുലന്‍സ്, രണ്ടു ഡോക്ടര്‍മാര്‍, സര്‍ജന്‍, ഡ്രൈവര്‍ കം അറ്റന്‍ഡര്‍ എന്നിവരാണുള്ളത്. വന്ധ്യംകരണത്തിനു പുറമേ സിസേറിയന്‍, മുഴകള്‍ നീക്കം ചെയ്യല്‍ തുടങ്ങിയ ശസ്ത്രക്രിയകളും നടത്തുമെന്നും സര്‍ക്കാര്‍ നിശ്ചയിച്ച ഫീസാണ് ഈടാക്കുന്നതെന്നും ജില്ലാ മൃഗസംരക്ഷണ ഓഫീസര്‍ ഡോ. പി.കെ. മനോജ് കുമാര്‍ പറഞ്ഞു. വന്ധ്യംകരണ ശസ്ത്രക്രിയയ്ക്ക് നായ്ക്കള്‍ക്ക് 2,500 രൂപയും പൂച്ചകള്‍ക്ക് 1,500 രൂപയുമാണ്.

പാറിപ്പറന്ന് വിത്തുവിതച്ച് ഡ്രോണ്‍

കോട്ടയം: കര്‍ഷകരും ഉദ്യോഗസ്ഥരും കാഴ്ചക്കാരായി നോക്കി നിൽക്കേ ഡ്രോണ്‍ പറന്നുനടന്ന് വിത്ത് വിതച്ചു. തിരുവാര്‍പ്പ് പഞ്ചായത്തിലെ മോര്‍കാട് പാടശേഖരത്തിലാണ് നബാര്‍ഡിന്‍റെ സാമ്പത്തിക സഹായത്തോടെ കൃഷിവിജ്ഞാന്‍ കേന്ദ്രത്തിന്‍റെ നേതൃത്വത്തില്‍ ഡ്രോണ്‍ ഉപയോഗിച്ചു നൂതനരീതിയില്‍ വിത്തു വിതച്ചത്. ഒരേക്കറില്‍ ഏകദേശം 30 കിലോഗ്രാം വിത്ത് മാത്രമാണ് ഉപയോഗിച്ചത്. കര്‍ഷകര്‍ ചെളിയില്‍ ഇറങ്ങി വിത്ത് വിതയ്ക്കുന്ന പരമ്പരാഗത രീതിക്കു പകരമാണ് ഡ്രോണ്‍ ഉപയോഗിച്ച് വിതയ്ക്കുന്നത്. ഇത്തരത്തില്‍ വിതയ്ക്കുമ്പോള്‍ പുളി ഇളകുന്നത് തടയാനും വിത്ത് ചെളിയില്‍ താഴ്ന്നു പോകാതിരിക്കാനും സഹായകരമാണ്. ഇതുവഴി വിത്തിന്‍റെ ഉപയോഗം കുറയ്ക്കാനും സമയം ലഭിക്കാനും തൊഴിലാളി ക്ഷാമം പരിഹരിക്കാനും ചെലവു കുറക്കാനും സാധിക്കും. കഴിഞ്ഞ വര്‍ഷത്തില്‍ പരീക്ഷണാടിസ്ഥാനത്തില്‍ കൃഷിവിജ്ഞാന്‍ കേന്ദ്രം ഡ്രോണ്‍ ഉപയോഗിച്ച് വിത്ത് വിതയ്ക്കല്‍ കോട്ടയം, ആലപ്പുഴ ജില്ലകളിലെ വിവിധ പാടശേഖരങ്ങളില്‍ നടപ്പിലാക്കിയിരുന്നു. സാധാരണ രീതിയില്‍ വിതച്ച പാടങ്ങളുമായി താരതമ്യം ചെയ്തപ്പോള്‍ ഡ്രോണിലൂടെ വിതച്ച പാടശേഖരത്തില്‍ ചിനപ്പുകളുടെ എണ്ണം കൂടുതലായും നെല്‍മണികളുടെ തൂക്കം ഉയര്‍ന്നതായും കണ്ടെത്താന്‍ സാധിച്ചിരുന്നു. ഇതിന്‍റെ ഫലമായി നെല്ലിന്‍റെ മൊത്തം വിളവ് ശരാശരി 20 ശതമാനം മുതല്‍ 30 ശതമാനം വരെ വര്‍ധിച്ചിരുന്നു. ഡ്രോണ്‍ ഉപയോഗിച്ചുള്ള വിതയും വളപ്രയോഗവും കര്‍ഷകരില്‍ കൂടുതല്‍ പ്രചരിപ്പിക്കുക എന്ന ലക്ഷ്യത്തോടെയാണ് നബാര്‍ഡിന്‍റെ സാമ്പത്തിക സഹായത്തോടെ പ്രത്യേക പദ്ധതി നടപ്പിലാക്കുന്നത്. തിരുവാര്‍പ്പ് പഞ്ചായത്തംഗം സി.ടി. രാജേഷിന്‍റെ അധ്യക്ഷതയില്‍ ചേര്‍ന്ന യോഗത്തില്‍ പഞ്ചായത്ത് പ്രസിഡന്‍റ് ഒ.എസ്. അനീഷ് കുമാര്‍ വിത ഉദ്ഘാടനം ചെയ്തു. നബാര്‍ഡ് ജില്ലാ മാനേജര്‍ റെജി വര്‍ഗീസ്, കൃഷിവിജ്ഞാന്‍ കേന്ദ്രം സീനിയര്‍ സയന്‍റിസ്റ്റ് ഡോ. ജി. ജയലക്ഷ്മി, കൃഷി ഓഫീസര്‍ നസിയ സത്താര്‍ എന്നിവര്‍ പ്രസംഗിച്ചു.

ശബരി എയര്‍പോര്‍ട്ട് സര്‍വേ ഒന്നാം ഘട്ടം പൂർത്തിയാകുന്നു

കോട്ടയം: എരുമേലിയില്‍ ശബരി എയര്‍പോര്‍ട്ട് നിര്‍മാണത്തിനു മുന്നോടിയായി മണിമല വില്ലേജിലെ സ്ഥലം സര്‍വേ അവസാനഘട്ടത്തില്‍. എരുമേലി തെക്ക് വില്ലേജ് പരിധിയിലെ സ്ഥലം സര്‍വേ വ്യാഴാഴ്ച ആരംഭിക്കും. സ്ഥലം അളക്കുന്നതിനൊപ്പം അവിടുള്ള കെട്ടിടം, മരങ്ങള്‍ എന്നിവയുടെ കണക്കെടുപ്പും നടത്തുന്നുണ്ട്. സ്ഥലം ഏറ്റെടുക്കുമ്പോള്‍ പൊന്നുംവില റവന്യു വകുപ്പും മരങ്ങളുടേത് വനംവകുപ്പും കെട്ടിടങ്ങളുടേത് പൊതുമാരാമത്തുമാണ് നിര്‍ണയിക്കുക. സ്വകാര്യവ്യക്തികളുടെ സ്ഥലം സര്‍വേയ്ക്ക് ശേഷമായിരിക്കും രണ്ടു വില്ലേജുകളിലുമായുള്ള ബിലീവേഴ്‌സ് ചര്‍ച്ചിനു കീഴില്‍ അയന ചാരിറ്റബിള്‍ ട്രസ്റ്റിനു കൈവശമുള്ള ചെറുവള്ളി എസ്റ്റേറ്റ് സര്‍വേ ആരംഭിക്കുക. എരുമേലി തെക്ക്, മണിമല വില്ലേജുകളില്‍നിന്ന് 1039.876 ഹെക്ടറാണ് വിമാനത്താവളത്തിന് ഏറ്റെടുക്കുന്നത്. എരുമേലി തെക്ക് വില്ലേജ് ബ്ലോക്ക് നമ്പര്‍ 23ല്‍ ഉള്‍പ്പെട്ട 366 പേരുടെയും മണിമല വില്ലേജ് ബ്ലോക്ക് നമ്പര്‍ 19ല്‍ ഉള്‍പ്പെട്ട 73 പേരുടെയും സ്ഥലങ്ങള്‍, ബ്ലോക്ക് നമ്പര്‍ 22ല്‍ ഉള്‍പ്പെട്ട ഗോസ്പല്‍ ഫോര്‍ ഏഷ്യയും സര്‍ക്കാരും തമ്മില്‍ ഉടമസ്ഥാവകാശത്തര്‍ക്കം കോടതിയില്‍ നിലനില്‍ക്കുന്ന 811.42 ഹെക്ടര്‍, 22-ാം നമ്പര്‍ ബ്ലോക്കില്‍ ഉള്‍പ്പെട്ട 42.58 ഹെക്ടര്‍, 22-ാം ബ്ലോക്കില്‍ ഉള്‍പ്പെട്ട മലയാളം പ്ലാന്‍റേഷനു സര്‍ക്കാരും തമ്മില്‍ കോടതിയില്‍ ഉടമസ്ഥാവകാശത്തര്‍ക്കം നിലനില്‍ക്കുന്ന 1.83 ഹെക്ടര്‍, മണിമല വില്ലേജില്‍ 21-ാം ബ്ലോക്കില്‍ ഉള്‍പ്പെട്ടതും ഗോസ്പല്‍ ഫോര്‍ ഏഷ്യയും സര്‍ക്കാരും തമ്മില്‍ ഉടമസ്ഥാവകാശത്തര്‍ക്കം കോടതിയില്‍ നിലനില്‍ക്കുന്നതുമായ 60.4375 ഹെക്ടർ എന്നിവയാണ് ഏറ്റെടുക്കുന്നത്. ആകെ 352 കുടുംബങ്ങള്‍ക്കാണ് സ്ഥലം നഷ്ടപ്പെടുന്നത്. നാലു മാസത്തിനുള്ളില്‍ സര്‍വേ നടപടികള്‍ പൂര്‍ത്തിയാകും.

ട്രെയിനില്‍ യുവതിക്കു നേരേ ലൈംഗികാതിക്രമം: യുവാവ് അറസ്റ്റില്‍

കോട്ടയം: ട്രെയിനില്‍ യുവതിയോടു ലൈംഗികാതിക്രമം കാട്ടിയ കേസില്‍ യുവാവ് അറസ്റ്റില്‍. തൃശൂര്‍ ചെറ്റുപുഴ വട്ടപ്പള്ളിയില്‍ വി.ജി. ഷനോജിനെയാണ് (45) കോട്ടയം റെയില്‍വേ പോലീസ് അറസ്റ്റ് ചെയ്തത്. ഇന്നലെ പുലര്‍ച്ചെ ഒന്നോടെ മംഗലാപുരം-തിരുവനന്തപുരം എക്സ്പ്രസിലായിരുന്നു കേസിനാസ്പദമായ സംഭവം നടന്നത്. യാത്രക്കാരിയായ യുവതിയുടെ പരാതിയെത്തുടര്‍ന്ന് ടിടിഇ നല്‍കിയ പരാതിയുടെ അടിസ്ഥാനത്തിലാണ് പ്രതിയെ പോലീസ് പിടികൂടിയത്. തുടര്‍ന്നു നടത്തിയ അന്വേഷണത്തില്‍ ട്രെയിന്‍ യാത്രക്കാരിയായ മറ്റൊരു പെണ്‍കുട്ടിയോടും പ്രതി ലൈംഗികാതിക്രമം നടത്തിയതായി കണ്ടെത്തി. ഇയാള്‍ക്കെതിരേ അയ്യന്തോള്‍, തൃശൂര്‍ ട്രാഫിക്, തൃശൂര്‍ വെസ്റ്റ്, തൃശൂര്‍ ആര്‍പിഎഫ്, തൃശൂര്‍ മെഡിക്കല്‍ കോളജ്, കണ്ണൂര്‍ ഇരിട്ടി സ്റ്റേഷനുകളിലും കേസുണ്ട്.

റബര്‍വില വീണ്ടും 210 രൂപയിലേക്ക്

കോട്ടയം: ആഭ്യന്തര ഉത്പാദനം നാമമാത്രമായതോടെ റബര്‍ ഷീറ്റ് വില വീണ്ടും മെച്ചപ്പെട്ടു. ആര്‍എസ്എസ് നാല് ഗ്രേഡിന് 207.50, ഗ്രേഡ് അഞ്ചിന് 203.50 രൂപയാണ് ഇന്നലെ റബര്‍ ബോര്‍ഡ് പ്രഖ്യാപിത നിരക്ക്. ഡീലര്‍മാര്‍ 206 രൂപയ്ക്കുവരെ കര്‍ഷകരില്‍നിന്ന് ചരക്ക് വാങ്ങി. ചില കമ്പനികള്‍ 210 രൂപയ്ക്ക് ഡീലര്‍മാരില്‍നിന്ന് ഷീറ്റ് വാങ്ങാന്‍ തയാറായി. കഴിഞ്ഞ വര്‍ഷം ജൂലൈ 14നും ഇതേ തോതിലായിരുന്നു വില. വരുംദിവസങ്ങളിലും ഷീറ്റ് വില ഉയരാനാണ് സാഹചര്യം. വ്യവസായികള്‍ക്ക് ചരക്ക് കിട്ടാനില്ലെന്നതാണ് വില കയറാനുള്ള കാരണം. ലാറ്റക്‌സ് വിലയിലും ഗണ്യമായ കയറ്റമുണ്ട്. ഫാക്ടറികളില്‍ ലാറ്റക്‌സ് സ്റ്റോക്ക് തീരെ കുറവാണ്. മുന്‍നിര കമ്പനികള്‍ തമിഴ്‌നാട്ടില്‍ നിന്നും ലാറ്റക്‌സ് എത്തിക്കാന്‍ തുടങ്ങി. ഒട്ടുപാല്‍ വില 137 രൂപയിലെത്തി. റബര്‍ ആഭ്യന്തര ഡിമാന്‍ഡ് അടുത്ത വര്‍ഷം 17 ലക്ഷം ടണ്ണിലേക്ക് ഉയരുമെന്നാണ് വ്യവസായികളുടെ കണക്കൂകൂട്ടല്‍.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]