ADVERTISEMENT

ADVERTISEMENT

കാപ്പ ചുമത്തി

വൈക്കം: നിരവധി കേസുകളില്‍ പ്രതിയായ യുവാവിനെ കാപ്പ ചുമത്തി ജില്ലയില്‍നിന്നു നാടുകടത്തി. വൈക്കം ഇടയാഴം സ്വദേശി അഖില്‍ നിവാസില്‍ അഖില്‍ പ്രസാദിനെ (30)യാണ് നാടുകടത്തിയത്. ജില്ലാ പോലീസ് ചീഫ് എ. ഷാഹുല്‍ ഹമീദിന്‍റെ റിപ്പോര്‍ട്ട് പ്രകാരമാണ് നടപടി.

അടിയന്തര സാഹചര്യങ്ങളില്‍ ഇയാള്‍ക്ക് ജില്ലാ പോലീസ് ചീഫിന്‍റെ അനുവാദത്തോടെ ജില്ലയില്‍ പ്രവേശിക്കാം. കൊലപാതക ശ്രമം, പൊതുമുതല്‍ നശിപ്പിക്കല്‍, സംഘം ചേര്‍ന്നുള്ള ആക്രമണം ഉള്‍പ്പെടെ ഒന്‍പതു ക്രിമിനല്‍ കേസുകളില്‍ പ്രതിയായ ഇയാള്‍ വിട്ടുനില്‍ക്കാന്‍ ആവശ്യപ്പെട്ടിരിക്കുന്ന കാലയളവില്‍ താമസിക്കുന്ന സ്ഥലത്തെ മേല്‍വിലാസവും താമസിക്കുന്നത് ഏതു പോലീസ് സ്റ്റേഷന്‍ പരിധിയിലാണെന്ന വിവരവും മൊബൈല്‍ ഫോണ്‍ നമ്പരും എറണാകുളം റേഞ്ച് ഡിഐജി ഓഫീസിലും ജില്ലാ പോലീസ് ചീഫിന്‍റെ ഓഫീസിലും രേഖാമൂലം അറിയിക്കണം.

ADVERTISEMENT

തീർഥാടകബസുകൾ കൂട്ടിയിടിച്ചു; അപകടപാതയായി വീണ്ടും കണമല

കണമല: കണമല ഇറക്കത്തിൽ മിനി ബസ് നിയന്ത്രണം തെറ്റി എതിരേ കയറ്റം കയറിവന്ന ബസിൽ ഇടിച്ച് അപകടം. മിനി ബസിന്‍റെ ഡ്രൈവർക്ക് ഗുരുതരമായി പരിക്കേറ്റു. ഈ ബസിലെ മൂന്നു പേർക്കും പരിക്കുണ്ട്. എതിരേ വന്ന ബസിലുണ്ടായിരുന്ന ആർക്കും പരിക്കില്ല. ഇന്നലെ ഉച്ചകഴിഞ്ഞ് മൂന്നോടെ എരുമേലി - പമ്പ ശബരിമല പാതയിൽ കണമല ഇറക്കത്തിലെ അട്ടിവളവിലാണ് അപകടം. മിനി ബസിന്‍റെ ഡ്രൈവർ തമിഴ്നാട് മധുര സ്വദേശി രാജ്‌കുമാറിനാണ് (32) ഗുരുതരമായ നിലയിൽ പരിക്കേറ്റത്. ഇയാളുടെ കാൽ ഡ്രൈവിംഗ് സീറ്റിനിടയിൽ കുടുങ്ങിയ നിലയിലായിരുന്നു. നാട്ടുകാരും ശബരിമല ഡ്യൂട്ടിയിലുണ്ടായിരുന്ന പോലീസുകാരും ചേർന്ന് ഡ്രൈവിംഗ് സീറ്റിലെ വാതിലും മുൻവശത്തെ ഭാഗങ്ങളും പൊളിച്ച്ഇളക്കിമാറ്റിയാണ് ഡ്രൈവറെ പുറത്തെടുത്തത്. ഈ ബസിലുണ്ടായിരുന്ന തമിഴ്നാട് സ്വദേശികളായ മുനിയാണ്ടി (62), അംബിക (53), കരുമലൈ (64) എന്നിവർക്ക് പരിക്കേറ്റിരുന്നു. ഡ്രൈവർ ഉൾപ്പെടെ പരിക്കേറ്റവരെ എരുമേലി സർക്കാർ ആശുപത്രിയിൽ എത്തിച്ച് പ്രാഥമിക ചികിത്സ നൽകി. ഡ്രൈവറെ വിദഗ്ധ ചികിത്സയ്ക്കായി കോട്ടയം മെഡിക്കൽ കോളജ് ആശുപത്രിയിലേക്ക് പിന്നീട് മാറ്റി. അപകടത്തിന് കാരണം മിനി ബസ് അമിത വേഗത്തിൽ സഞ്ചരിച്ച് നിയന്ത്രണം തെറ്റിയതു മൂലമാണെന്ന് നാട്ടുകാർ പറയുന്നു. മിനി ബസുകൾ പരമാവധി വേഗം കുറച്ച് സഞ്ചരിക്കേണ്ട ഇറക്കം ആണ് കണമലയിലേത്. ശബരിമല തീർഥാടകരായ തമിഴ്നാട് സ്വദേശികളാണ് രണ്ട് ബസിലും ഉണ്ടായിരുന്നത്. മിനി ബസിൽ 17 പേരും എതിരെ വന്ന് അപകടത്തിൽപ്പെട്ട ബസിൽ 38 പേരുമാണ് ഉണ്ടായിരുന്നത്. ശബരിമല ദർശനത്തിന് പോവുകയായിരുന്നു മിനി ബസിലെ തീർഥാടകർ. ശബരിമല ദർശനം കഴിഞ്ഞു മടങ്ങുന്ന തീർഥാടകരാണ് എതിരേ കയറ്റത്തിൽ വന്ന ബസിലുണ്ടായിരുന്നത്. അപകടം സംബന്ധിച്ച് അന്വേഷണം ആരംഭിച്ചെന്ന് എരുമേലി പോലീസും മോട്ടോർ വാഹന വകുപ്പും അറിയിച്ചു. ശബരിമല സീസണുകളിലും മലയാള മാസാദ്യ പൂജാസമയത്തെ തീർഥാടന ദിവസങ്ങളിലും ശബരിമല തീർഥാടകരുടെ തിരക്കേറുന്ന കണമല പാതയിൽ ഇതിനോടകം നിരവധി അപകടങ്ങളും മരണങ്ങളുമാണ് സംഭവിച്ചിട്ടുള്ളത്. വാഹനങ്ങളുടെ വേഗതയാണ് അപകടകാരണം.

പൊൻകുന്നം ടൗണിലും പരിസരത്തും തെരുവുനായശല്യം രൂക്ഷം

പൊൻകുന്നം: ടൗണിലും പരിസരങ്ങളിലുമായി നൂറോളം നായ്ക്കൾ നാട്ടുകാർക്ക് ശല്യമാകുന്നതായി പരാതി. തെരുവ്നായ്ക്കൾ മൂലം ഇരു ചക്രവാഹന യാത്രക്കാരും നാട്ടുകാരും ഭീതിയിലാണ്. പോസ്റ്റ് ഓഫീസ് ജംഗ്ഷനിൽ മാത്രം പത്തോളം നായ്ക്കളാണുള്ളത്. പ്രൈവറ്റ് ബസ് സ്റ്റാൻഡ്, രാജേന്ദ്ര മൈതാനം, പാലാ റോഡ്, കെഎസ്ആർടിസി ജംഗ്ഷൻ, അട്ടിക്കൽ, ചിറക്കടവ് റോഡ് തുടങ്ങിയ സ്ഥലങ്ങളിലും ഇടവഴികളിലും ഇടറോഡുകളിലുമാണ് തെരുവുനായശല്യം രൂക്ഷമായിരിക്കുന്നത്. സംഘം ചേർന്ന് നടക്കുന്ന തെരുവ് നായ്ക്കൾ പുലർച്ചയും രാത്രി കാലങ്ങളിലും കാൽനടയാത്രക്കാർക്ക് ഭീഷണിയാണ്. തെരുവിൽ അലയുന്ന നായ്ക്കൾക്ക് ചില സ്ഥലങ്ങളിൽ കുറച്ചുപേർ ഇറച്ചിയും മീനും എല്ലുകക്ഷണങ്ങളും ഇട്ടു കൊടുത്ത് വളർത്തുന്നുണ്ടെന്നും ഇവരെ ചുറ്റിപ്പറ്റിയാണ് നായ്ക്കൾ വിലസുന്നതെന്നും നാട്ടുകാർ ആരോപിച്ചു. ഇതു മൂലം മറ്റുള്ളവർക്ക് റോഡിലൂടെയും ഇടവഴിയിലൂടെയും നടക്കാൻ സാധിക്കാത്ത അവസ്ഥയാണ്. സ്കൂളിൽ പോകുന്ന കൊച്ചുകുട്ടികൾ പലപ്പോഴും നായ്ക്കളുടെ ശല്യം പേടിച്ച് മുതിർന്നവരുടെ സഹായത്തോടെയാണ് പോകുന്നത്. രാത്രിയിലും പകൽ സമയത്തും നായകൾ കൂട്ടത്തോടെ ഓടിയെത്തുമെന്ന് നാട്ടുകാർ പരാതിപ്പെടുന്നു. കാൽനട യാത്രക്കാർക്ക് ഭീഷണിയായി മാറിയിരിക്കുന്ന തെരുവ് നായകൾക്കെതിരേ അധികൃതർ നടപടി സ്വീകരിക്കണമെന്ന ആവശ്യം ശക്തമായിരിക്കുകയാണ്.

പാതിവഴിയിൽ സർവീസ് നിർത്തിയ ബസിനെതിരേ നടപടിയെടുത്ത് മോട്ടോർ വാഹന വകുപ്പ്

മുണ്ടക്കയം: സർവീസ് പൂർത്തിയാക്കാതെ ഓട്ടം നിർത്തിയ സ്വകാര്യ ബസ് അധികൃതർക്കെതിരേ നടപടി സ്വീകരിച്ച് മോട്ടോർ വാഹന വകുപ്പ്. ചങ്ങനാശേരി -മുണ്ടക്കയം-പുഞ്ചവയല്‍ റൂട്ടില്‍ സര്‍വീസ് നടത്തിവന്നിരുന്ന സ്വകാര്യ ബസാണ് മുണ്ടക്കയത്തുവച്ച് സർവീസ് നിർത്തുന്നതായി നാട്ടുകാർ പരാതി നൽകിയത്. തുടര്‍ന്ന് ഇന്നലെ ഉച്ചയ്ക്ക് മുണ്ടക്കയം സ്റ്റാൻഡില്‍ സര്‍വീസ് നിര്‍ത്തി ബസ് പാര്‍ക്ക് ചെയ്യുന്ന സമയം കാഞ്ഞിരപ്പളളി മോട്ടോര്‍ വെഹിക്കിള്‍ ഇന്‍സ്‌പെക്ടര്‍ എം.കെ. മനോജ് കുമാറിന്‍റെ നേതൃത്വത്തില്‍ പിടികൂടുകയായിരുന്നു. പുഞ്ചവയലിലേക്ക് സര്‍വീസ് ഇല്ലെന്നു ജീവനക്കാര്‍ അറിയിച്ചതോടെ വാഹനത്തിനെതിരേ കേസെടുക്കാനും 7500 രൂപ പിഴ അടയ്ക്കാനും നിര്‍ദേശം നല്‍കി. എഎംവിമാരായ എം.എസ്. രാജേഷ്, ദീപു ആര്‍. നായര്‍ എന്നിവരുടെ നേതൃത്വത്തിലായിരുന്നു മിന്നല്‍ പരിശോധന. അതേസമയം മുണ്ടക്കയം - പുഞ്ചവയൽ റൂട്ടിൽ സർവീസിനെ ചൊല്ലി ബസ് ജീവനക്കാരും ഓട്ടോറിക്ഷ ഡ്രൈവർമാരും തമ്മിൽ തർക്കവും പതിവാണ്. ബസ് സർവീസിന് മുൻപായി ഓട്ടോറിക്ഷകൾ ട്രിപ്പടിക്കുന്നത് തങ്ങളുടെ സർവീസിനെ ബാധിക്കുന്നതായി ബസ് ജീവനക്കാർ പറയുന്നു. ഇതു പലപ്പോഴും മേഖലയിലേക്കുള്ള സർവീസ് നഷ്ടത്തിലാക്കാൻ ഇടയാക്കുന്നതായും ഇവർ പറയുന്നു. അതേസമയം ബസുകൾ സർവീസ് നടത്താത്ത സമയങ്ങളിലാണ് തങ്ങൾ ട്രിപ്പടിക്കുന്നതെന്നാണ് ഓട്ടോറിക്ഷ ഡ്രൈവർമാരുടെ വാദം. മുണ്ടക്കയത്തിന്‍റ പല മലയോര മേഖലകളിലേക്കുമുള്ള ബസ് സർവീസുകൾ ഇത്തരത്തിൽ മുടങ്ങുന്നുണ്ടെന്നു നാട്ടുകാർ പറയുന്നു.

കോഴികൊത്തി, പുളിമാക്കൽ പാലങ്ങൾ പുനർനിർമിക്കണമെന്ന് കോൺഗ്രസ്

ആനക്കല്ല്: മാസങ്ങളായി പൊളിച്ചിട്ടിരിക്കുന്ന വില്ലണി കോഴികൊത്തി പാലവും മഞ്ഞപ്പള്ളി പുളിമാക്കൽ പാലവും അടിയന്തരമായി പുനർനിർമിക്കണമെന്നാവശ്യപ്പെട്ട് കോൺഗ്രസ് ആനക്കല്ല്, മഞ്ഞപ്പള്ളി വാർഡ് കമ്മിറ്റികളുടെ നേതൃത്വത്തിൽ വില്ലണിയിൽനിന്നു മഞ്ഞപ്പള്ളിയിലേക്ക് പ്രതിഷേധ മാർച്ചും ധർണയും നടത്തി. തമ്പലക്കാട്, എറികാട്, തുമ്പമട പ്രദേശങ്ങളിലെ നൂറുകണക്കിന് ആളുകൾ കാഞ്ഞിരപ്പള്ളി ഈരാറ്റുപേട്ട റോഡിലേക്കെത്താൻ ഉപയോഗിച്ചിരുന്ന പാലങ്ങൾ പുനർനിർമിക്കാനെന്ന പേരിൽ മാസങ്ങളായി പൊളിച്ചിട്ടിരിക്കുകയാണ്. ഇതു മൂലം പൊതുജനങ്ങൾ വളരെയേറെ ബുദ്ധിമുട്ടുകയാണ്. പാലങ്ങൾ അടിയന്തരമായി പുനർനിർമിച്ച് ജനങ്ങളുടെ ബുദ്ധിമുട്ടിന് ശാശ്വത പരിഹാരം കാണണമെന്ന് യോഗം ആവശ്യപ്പെട്ടു. വില്ലണിയിൽനിന്നാരംഭിച്ച പ്രതിഷേധ മാർച്ച് ഡിസിസി ജനറൽ സെക്രട്ടറി റോണി കെ. ബേബി ഫ്ലാഗ് ഓഫ് ചെയ്തു. കോൺഗ്രസ് ആനക്കല്ല് വാർഡ് പ്രസിഡന്‍റ് ഷാജി പെരുന്നേപ്പറമ്പിൽ അധ്യക്ഷത വഹിച്ചു. മഞ്ഞപ്പള്ളിയിൽ നടന്ന പ്രതിഷേധ ധർണ ഡിസിസി ജനറൽ സെക്രട്ടറി പി.എ. ഷെമീർ ഉദ്ഘാടനം ചെയ്തു. കോൺഗ്രസ് മഞ്ഞപ്പള്ളി വാർഡ് പ്രസിഡന്‍റ് റോബിൻ വെങ്ങാലൂരിന്‍റെ അധ്യക്ഷതയിൽ ബ്ലോക്ക് പഞ്ചായത്ത് അംഗം ഡാനി ജോസ് മുഖ്യപ്രഭാഷണം നടത്തി. കോൺഗ്രസ് മണ്ഡലം പ്രസിഡന്‍റ് ബിജു പത്യാല, ബ്ലോക്ക് ഭാരവാഹികളായ സിബു ദേവസ്യ, മാത്യു കുളങ്ങര, നായിഫ് ഫൈസി , അബ്ദുൾ ഫത്താക്ക്, രാജു തേക്കുംതോട്ടം, ദിലീപ് ചന്ദ്രൻ, അജ്മൽ പാറക്കൽ, ടി. കെ. ജയപ്രകാശ് , യൂത്ത് കോൺഗ്രസ് നിയോജകമണ്ഡലം പ്രസിഡന്‍റ് കെ.എസ്. ഷിനാസ്, വൈസ് പ്രസിഡന്‍റ് നെൽസൺ ജോസഫ്, കർഷക കോൺഗ്രസ് ബ്ലോക്ക് സെക്രട്ടറി പി . അശോക് ദാസ് തുടങ്ങിയവർ പ്രസംഗിച്ചു.

കൂൺകൃഷിയിൽ വിജയഗാഥ രചിച്ച് സുധീഷും അമലും

മുണ്ടക്കയം: സ്വന്തമായി ഒരു സംരംഭമെന്ന ആഗ്രഹം കഠിനാധ്വാനത്തിലൂടെ സാക്ഷാത്കരിച്ചിക്കുകയാണ് രണ്ടു യുവാക്കൾ. വ്യാവസായിക അടിസ്ഥാനത്തിൽ കൂൺകൃഷി ആരംഭിച്ച് മികച്ച വരുമാനം നേടുകയാണിവർ. മുണ്ടക്കയം ചെളിക്കുഴി പൗരസമിതിയിൽ സുഹൃത്തുക്കളായ പുതുപ്പറമ്പിൽ പി.സി. സുധീഷും പൂതക്കുഴിയിൽ അമൽ പി. അനുജനും ചേർന്നാണ് ഫാൻ ആൻഡ് പാഡ് സിസ്റ്റം കൂൺ എന്ന പേരിൽ വ്യത്യസ്തമായ സംരംഭത്തിന് തുടക്കം കുറിച്ചിരിക്കുന്നത്. അമൽ നോട്ടിക്കൽ സയൻസിലും സുധീഷ് ബിഎ ഇക്കണോമിക്സിലും ഡിഗ്രിയുള്ളവരാണ്. സ്വന്തമായൊരു സംരംഭം തുടങ്ങണമെന്ന ആഗ്രഹമാണ് ഇരുവരെയും പുതിയ ആശയത്തിലേക്ക് എത്തിച്ചത്. ആദ്യം കൂൺ കൃഷിയെപ്പറ്റിയും അതിന്‍റെ വരുമാന സാധ്യതകളെക്കുറിച്ചും വിശദമായ പഠനം നടത്തി. അതോടൊപ്പം മുണ്ടക്കയം പഞ്ചായത്തിന്‍റെ സംരംഭക ലോണായി നാലുലക്ഷം രൂപയും ഉറപ്പാക്കി. പിന്നീട് മലപ്പുറം സ്വദേശിയായ വ്യക്തിയുടെ കമ്പനിയുമായി ചേർന്ന് കൂൺകൃഷി ആരംഭിക്കുകയായിരുന്നു. ഇവരുടെ സഹായത്തോടെ വീടിന്‍റെ ടെറസിൽ പ്രത്യേകം തയാറാക്കിയിരിക്കുന്ന മുറിയിൽ ഇതിനുള്ള സജ്ജീകരണം ഒരുക്കി. പ്രത്യേകം ഊഷ്മാവ് ക്രമീകരിച്ചിരിക്കുന്ന മുറിയിൽ 200 സ്ക്വയർഫീറ്റിലാണ് ഇപ്പോൾ കൂൺ കൃഷി നടത്തുന്നത്. വിത്ത് പാകി 20 മുതൽ 25 ദിവസത്തിനിടയിൽ വിളവെടുപ്പ് ആരംഭിക്കാം. നാല് മാസം വരെ ഓരോ ബെഡിൽ നിന്നും വിളവ് ലഭിക്കും. ഇത്തരത്തിൽ 900 ബെഡുകളാണ് ഇവർ 200 സ്ക്വയർ ഫീറ്റുള്ള മുറിയിൽ ക്രമീകരിച്ചിരിക്കുന്നത്. ഇതിലൂടെ മികച്ച വരുമാനം നേടുവാൻ കഴിയുന്നുണ്ടെന്ന് സുധീഷും അമലും പറയുന്നു. ചിപ്പിക്കൂൺ എന്ന ഇനമാണ് ഇവർ കൃഷി ചെയ്യുന്നത്. ഓരോ ദിവസവും നാലു മുതൽ അഞ്ചു കിലോവരെ കൂൺ ലഭിക്കും. ഓർഡർ അനുസരിച്ച് വ്യാപാര സ്ഥാപനങ്ങളിലും വീടുകളിലും എത്തിച്ചാണ് വിൽപ്പന നടത്തുന്നത്. കൂടാതെ ഇവരുടെ അടുക്കൽ നേരിട്ടെത്തി വാങ്ങുന്നവരുമുണ്ട്. കൊളസ്ട്രോളും ഷുഗറും നിയന്ത്രിക്കുന്നതിന് ഉത്തമമായ ചിപ്പിക്കൂണിൽ ധാരാളം നാരും അടങ്ങിയിരിക്കുന്നതിനാൽ മാർക്കറ്റിൽ ഇതിന് നല്ല ഡിമാന്‍ഡാണ്. കൂൺകൃഷിയിൽ അമലിനെയും സുധീഷിനെയും സഹായിക്കാൻ മാതാപിതാക്കളും ഒപ്പമുണ്ട്. തങ്ങളുടെ സംരംഭം കൂടുതൽ മേഖലയിലേക്ക് വ്യാപിപ്പിക്കാനാണ് ഇരുവരുടെയും പരിശ്രമം.

വിശുദ്ധ അല്‍ഫോന്‍സാമ്മയുടെ തിരുനാളിനു നാളെ കൊടിയേറും

ഭരണങ്ങാനം: സഹനങ്ങളെ ആത്മബലിയായി അര്‍പ്പിച്ച വിശുദ്ധ അല്‍ഫോന്‍സാമ്മയുടെ തിരുനാളിന് നാളെ കൊടിയേറും. ഭരണങ്ങാനം ക്ലാരമഠത്തില്‍ വേദനകളുടെ കിടക്കയില്‍നിന്ന് സ്വര്‍ഗീയ പറുദീസയിലേക്കു വിളിക്കപ്പെട്ട വിശുദ്ധയുടെ എഴുപത്തിയൊന്‍പതാം ചരമവാര്‍ഷികത്തിന് മുന്നോടിയായി നാളെമുതല്‍ കബറിട ദേവാലയം തീര്‍ഥാടകരാല്‍ നിറയും. വിവിധ ദേശങ്ങളില്‍നിന്ന് നാനാജാതിമതസ്ഥരായ പതിനായിരങ്ങള്‍ അനുഗ്രഹവും ആശ്വാസവും ചൊരിയുന്ന വിശുദ്ധയുടെ മാധ്യസ്ഥ്യം തേടി ഭരണങ്ങാനത്തെത്തും. രാവിലെ 11.15ന് മാര്‍ ജോസഫ് കല്ലറങ്ങാട്ട് തിരുനാളിന് കൊടിയേറ്റും. പ്രധാന തിരുനാളായ ജൂലൈ 28 വരെ കബറിട ദേവാലയത്തില്‍ രാപകല്‍ പ്രാര്‍ഥനകള്‍ക്ക് സൗകര്യമുണ്ടാകും. തിരുനാൾ ദിനങ്ങളിൽ രാവിലെ 5.30 മുതല്‍ വൈകുന്നേരം ഏഴുവരെ തുടര്‍ച്ചയായി വിശുദ്ധ കുര്‍ബാന അര്‍പ്പിക്കപ്പെടും. വൈകുന്നേരം 6.15ന് ജപമാലപ്രദക്ഷിണമുണ്ടായിരിക്കും. ക്രമീകരണങ്ങളൊരുക്കി തീര്‍ഥാടന കേന്ദ്രം വിശുദ്ധ അല്‍ഫോന്‍സാ തീര്‍ഥാടന കേന്ദ്രത്തില്‍ വിപുലമായ ക്രമീകരണങ്ങളാണ് ഭക്തജനങ്ങളുടെ സൗകര്യാര്‍ഥം ഒരുക്കിയിട്ടുള്ളത്. ദൂരസ്ഥലങ്ങളില്‍നിന്നു വരുന്നവര്‍ക്ക് തീര്‍ഥാടന കേന്ദ്രത്തിന്‍റെ വിവിധ ബ്ലോക്കുകളിലായി താമസസൗകര്യം ഒരുക്കിയിട്ടുണ്ട്. ആവശ്യമുള്ളവര്‍ തീര്‍ഥാടന കേന്ദ്രം ഓഫീസുമായി ബന്ധപ്പെടണം. തീര്‍ഥാടകര്‍ക്ക് വേണ്ട എല്ലാ സഹായസഹകരണങ്ങളും നല്‍കുന്നതിനായി 101 വോളണ്ടിയർമാർ പ്രവര്‍ത്തിക്കും. ട്രാഫിക് നിയന്ത്രണത്തിന് പോലീസിനോട് ചേര്‍ന്നും ഇവരുടെ സഹായമുണ്ടായിരിക്കും. വിവിധ ഭാഷകളില്‍ വിശുദ്ധ കുര്‍ബാന വിശുദ്ധ അല്‍ഫോന്‍സാമ്മയുടെ തിരുനാളില്‍ പങ്കെടുക്കാന്‍ വിവിധ സംസ്ഥാനങ്ങളില്‍നിന്നു ഭക്തജനങ്ങള്‍ എത്തിച്ചേരുന്നുണ്ട്. ഇവരുടെ സൗകര്യാര്‍ഥം വിവിധ ഭാഷകളില്‍ വിശുദ്ധ കുര്‍ബാന ക്രമീകരിച്ചിട്ടുണ്ട്. 20ന് ഉച്ചയ്ക്ക് ഒന്നിന് ഫാ. ബാബു കാക്കാനിയില്‍ ഹിന്ദിയിലും 2.30ന് ഫാ. ജോര്‍ജ് ചീരാംകുഴിയില്‍ ഇംഗ്ലീഷിലും വിശുദ്ധ കുര്‍ബാന അര്‍പ്പിക്കും. 27ന് ഉച്ചകഴിഞ്ഞ് 3.30ന് ഫാ. കെവിന്‍ മുണ്ടക്കല്‍ ഇംഗ്ലീഷിൽ വിശുദ്ധ കുര്‍ബാന അര്‍പ്പിക്കും. 26 രാവിലെ 8.30ന് ഫാ. ജിനോയ് തൊട്ടിയില്‍ തമിഴ് ഭാഷയില്‍ വിശുദ്ധ കുര്‍ബാന അര്‍പ്പിക്കും. ഉച്ചകഴിഞ്ഞ് 2.30 ന് ശ്രവണ പരിമിതര്‍ക്കുവേണ്ടി ഫാ. ബിജു മൂലക്കര വിശുദ്ധകുര്‍ബാന അര്‍പ്പിക്കും. കബറിട ദേവാലയം 24 മണിക്കൂറും തുറന്നിടും പാലാ രൂപതയുടെ പ്ലാറ്റിനം ജൂബിലി വര്‍ഷമായതിനാല്‍ തിരുനാളിന്‍റെ 10 ദിവസങ്ങളിലും കബറിട ദേവാലയം 24 മണിക്കൂറും തുറന്നിടും. ഭക്തജനങ്ങള്‍ക്ക് രാത്രിയെന്നോ പകലെന്നോ വ്യത്യാസമില്ലാതെ ഏതു സമയത്തും കബറിട ദേവാലയത്തിലെത്തി പ്രാര്‍ഥിക്കുന്നതിനും നേര്‍ച്ചകാഴ്ചകള്‍ സമര്‍പ്പിക്കുന്നതിനും സൗകര്യമുണ്ട്. പ്രഥമശുശ്രൂഷാ സൗകര്യം പ്രഥമശുശ്രൂഷ നല്‍കുന്നതിനായി പാലാ ഫയര്‍ഫോഴ്സ് ഓഫീസർമാർ പരിശീലനം നല്‍കിയ 30 അംഗ ടീം സജ്ജമായിരിക്കും. കൂടാതെ നാല് ആംബുലന്‍സുകളും തയാറായി നില്‍ക്കും. പാലാ മെഡിസിറ്റി, ഭരണങ്ങാനം മേരിഗിരി, ഉള്ളനാട് ഹെല്‍ത്ത് സെന്‍റര്‍ എന്നിവിടങ്ങളില്‍ നിന്നുള്ള മെഡിക്കല്‍ ടീം തിരുനാള്‍ ദിവസങ്ങളില്‍ ക്യാമ്പ് ചെയ്യും. ഒരുക്കങ്ങള്‍ പൂര്‍ത്തീകരിച്ചതായി തീര്‍ഥാടന കേന്ദ്രം റെക്ടര്‍ റവ.ഡോ.അഗസ്റ്റിന്‍ പാലയ്ക്കപ്പറമ്പില്‍, ഫൊറോന വികാരി ഫാ. സഖറിയാസ് ആട്ടപ്പാട്ട്, അഡ്മിനിസ്ട്രേറ്റര്‍ ഫാ. മാത്യു കുറ്റിയാനിക്കല്‍, വൈസ് റെക്ടര്‍മാരായ ഫാ.ജോസഫ് അമ്പാട്ട്, ഫാ.ആന്‍റണി തോണക്കര എന്നിവര്‍ അറിയിച്ചു. പാര്‍ക്കിംഗ് ക്രമീകരണം തീര്‍ഥാടകര്‍ക്ക് വാഹനങ്ങള്‍ സുരക്ഷിതമായും സൗകര്യപ്രദമായും പാര്‍ക്കു ചെയ്യുന്നതിന് എല്ലാവിധ ക്രമീകരണങ്ങളും ഏര്‍പ്പെടുത്തിയിട്ടുണ്ട്. ഫൊറോനപള്ളിയുടെ പാരിഷ് ഹാളിനോട് ചേര്‍ന്നുള്ള പാര്‍ക്കിംഗ് ഗ്രൗണ്ടിലും തീര്‍ഥാടനകേന്ദ്രത്തിന്‍റെ പാര്‍ക്കിംഗ് ഗ്രൗണ്ടിലും കാന്‍റീനിന്‍റെ മുന്‍ഭാഗത്തും ഗേള്‍സ് ഹൈസ്‌കൂളിന്‍റെ ഗ്രൗണ്ടിലും വാഹനങ്ങള്‍ പാര്‍ക്ക് ചെയ്യാം. കൂടാതെ അരുവിത്തുറ ഭാഗത്തുനിന്നും വരുന്ന വാഹനങ്ങള്‍ക്ക് വട്ടോളിക്കടവ് പാലത്തിന്‍റെ ഭാഗത്തും പാര്‍ക്ക് ചെയ്യാം. സ്പിരിച്വാലിറ്റി സെന്‍ററിന്‍റെ മുന്‍വശത്തും കോട്ടവഴിയുടെ വശങ്ങളിലും പാര്‍ക്കിംഗ് സൗകര്യമുണ്ട്.

രാഹുല്‍ ഗാന്ധിയുടെ സന്ദര്‍ശനം: ഗതാഗത ക്രമീകരണം ഏര്‍പ്പെടുത്തി

കോട്ടയം: മുന്‍ മുഖ്യമന്ത്രി ഉമ്മന്‍ ചാണ്ടിയുടെ രണ്ടാം ചരമ വാര്‍ഷിക ചടങ്ങുകളിൽ പങ്കെടു ക്കാൻ ലോക്‌സഭാ പ്രതിപക്ഷ നേതാവ് രാഹുല്‍ ഗാന്ധി എത്തുന്നതോടനുബന്ധിച്ച് ഇന്നു രാവിലെ 8.30 മുതല്‍ 12 വരെ ഗതാഗത ക്രമീകരണം ഏര്‍പ്പെടുത്തി. കോട്ടയത്തുനിന്നു പുതുപ്പള്ളി, കറുകച്ചാല്‍, തെങ്ങണ ഭാഗത്തേക്ക് പോകേണ്ട വാഹനങ്ങള്‍ ലോഗോസ് ജംഗ്ഷന്‍, പോലീസ് ക്ലബ്, റബര്‍ ബോര്‍ഡ്, കഞ്ഞിക്കുഴി, മണര്‍കാട് വഴി കാഞ്ഞിരത്തുംമൂട്ടില്‍നിന്നും ഇടത്തേക്ക് തിരിഞ്ഞ് ആറാട്ടുചിറ, നാരകത്തോട്, വെട്ടത്തുകവല, കൈതേപ്പാലം വഴി പോകണം. കോട്ടയം ഭാഗത്തുനിന്നും കാഞ്ഞിരപ്പള്ളി, മുണ്ടക്കയം ഭാഗത്തേക്ക് പോകേണ്ട വാഹനങ്ങള്‍ ലോഗോസ് ജംഗ്ഷന്‍, പോലീസ് ക്ലബ്, റബര്‍ ബോര്‍ഡ് വഴി കഞ്ഞിക്കുഴിയില്‍ എത്തി കെകെ റോഡ് വഴി പോകണം. അയര്‍ക്കുന്നം, കിടങ്ങൂര്‍ ഭാഗത്തേക്ക് പോകേണ്ട വാഹനങ്ങള്‍ ലോഗോസ് ജംഗ്ഷന്‍, പോലീസ് ക്ലബ് വഴി, ഇറഞ്ഞാല്‍ ജംഗ്ഷനില്‍നിന്നും ഇടത്തേക്ക് തിരിഞ്ഞ് കൊശമറ്റം കവലവഴി പോകണം. കൊശമറ്റം കവല ഭാഗത്തുനിന്നും കളക്ടറേറ്റ് ഭാഗത്തേക്ക് പോകേണ്ട വാഹനങ്ങള്‍ കൊശമറ്റം കവലയില്‍നിന്നു തിരിഞ്ഞ് വട്ടമൂട് റോഡ് വഴി മംഗളം ജംഗ്ഷനില്‍ എത്തി പോകണം. തെങ്ങണ ഭാഗത്തുനിന്നു കോട്ടയം ഭാഗത്തേക്ക് വരുന്ന വാഹനങ്ങള്‍ ഞാലിയാകുഴി ജംഗ്ഷനില്‍നിന്ന് ഇടത്തേക്ക് തിരിഞ്ഞ് പരുത്തുംപാറ, ചിങ്ങവനം വഴി പോകണം. തെങ്ങണ ഭാഗത്തുനിന്നു മണര്‍കാട്, അയര്‍ക്കുന്നം ഭാഗത്തേക്ക് പോകേണ്ട വാഹനങ്ങള്‍ ഞാലിയാകുഴി ജംഗ്ഷനില്‍നിന്നു നേരേ ബൈറോഡില്‍ കൂടി കൈതേപ്പാലം ജംഗ്ഷനില്‍ എത്തി പുതുപ്പള്ളി, കാഞ്ഞിരത്തുംമൂട് വഴി പോകണം. പാറക്കല്‍കടവ്, നാല്‍ക്കവല, ദിവാന്‍കവല, മൂലേടം ഭാഗത്തുനിന്നും കോട്ടയം ടൗണില്‍ എത്തേണ്ട വാഹനങ്ങള്‍ ദിവാന്‍കവല, റെയില്‍വേ ഓവര്‍ബ്രിഡ്ജ് വഴി മണിപ്പുഴയിലെത്തി കോട്ടയം ഭാഗത്തേക്ക് പോകണം. പാര്‍ക്കിംഗ് ക്രമീകരണം പുതുപ്പള്ളി പള്ളിയില്‍ സമ്മേളനത്തില്‍ പങ്കെടുക്കാന്‍ തെങ്ങണ ഭാഗത്തുനിന്നും എത്തിച്ചേരുന്ന വാഹനങ്ങള്‍ എരമല്ലൂര്‍ കലുങ്കിന് സമീപമുള്ള ഗ്രൗണ്ടിലും ഗ്രീന്‍വാലി ക്ലബ് ഗ്രൗണ്ടിലും പാര്‍ക്ക് ചെയ്യണം. കോട്ടയം, മണര്‍കാട്, കറുകച്ചാല്‍ ഭാഗത്തുനിന്നും എത്തുന്ന വാഹനങ്ങള്‍ നിലയ്ക്കല്‍ പള്ളി ഗ്രൗണ്ട്, ഡോണ്‍ ബോസ്‌കോ സ്‌കൂള്‍ ഗ്രൗണ്ട്, ഗവണ്‍മെന്‍റ് വിഎച്ച്എസ്എസ് സ്‌കൂള്‍ ഗ്രൗണ്ട്, ജോര്‍ജിയന്‍ പബ്ലിക് സ്‌കൂള്‍ ഗ്രൗണ്ട് എന്നിവിടങ്ങളില്‍ പാര്‍ക്ക് ചെയ്യണം. പാലൂര്‍പടി - പുതുപ്പള്ളി റോഡില്‍ ആംബുലന്‍സ്, ഫയര്‍ഫോഴ്‌സ് തുടങ്ങിയ അവശ്യ സര്‍വീസ് വാഹനങ്ങൾക്ക് മാത്രമായി നിയന്ത്രണം ഏര്‍പ്പെടുത്തി. ഈ റോഡില്‍ പാര്‍ക്കിംഗ് നിരോധിച്ചു. പുതുപ്പള്ളി ജംഗ്ഷന്‍-എരമല്ലൂര്‍ കലുങ്ക് റോഡിലും അങ്ങാടി-കൊട്ടാരത്തുംകടവ് റോഡിലും പാര്‍ക്കിംഗ് നിരോധിച്ചു.

ഉമ്മന്‍ ചാണ്ടിയുടെ രണ്ടാം ചരമ വാര്‍ഷികം: വിവിധ കാരുണ്യപദ്ധതികളുമായി മന്ന ചാരിറ്റബിള്‍ ട്രസ്റ്റ്

കോട്ടയം: മുന്‍ മുഖ്യമന്ത്രി ഉമ്മന്‍ ചാണ്ടിയുടെ രണ്ടാം ചരമ വാര്‍ഷികത്തോടനുബന്ധിച്ചു തിരുവനന്തപുരം ആസ്ഥാനമായ മന്ന ചാരിറ്റബിള്‍ ട്രസ്റ്റിന്‍റെ നേതൃത്വത്തില്‍ ജൂലൈ, ഓഗസ്റ്റ് മാസങ്ങളിലായി വിവിധ പരിപാടികള്‍ നടത്തുമെന്ന് മന്ന ചാരിറ്റബിള്‍ ട്രസ്റ്റ് മാനേജിംഗ് ട്രസ്റ്റി ഡോ. മറിയം ഉമ്മന്‍. ഇന്നു വൈകുന്നേരം ആറിനു കോട്ടയം മെഡിക്കല്‍ കോളജിലും നാളെ ഉച്ചയ്ക്ക് 12.30ന് കോട്ടയം ജനറല്‍ ആശുപത്രിയിലും സൗജന്യ ഭക്ഷണവിതരണം നടത്തും. നാളെ ഉച്ചകഴിഞ്ഞ് മൂന്നിന് നവജീവന്‍ ട്രസ്റ്റ് സന്ദര്‍ശനവും അനുസ്മരണ സമ്മേളനവും ഉണ്ടായിരിക്കും. 20ന് കുറുമ്പനാടം സെന്‍റ് ആന്‍റണീസ് പള്ളിയില്‍ സൗജന്യ മെഗാ മെഡിക്കല്‍ ക്യാമ്പും 26ന് തിരുവനന്തപുരത്ത് സൗജന്യ തയ്യല്‍ മെഷീന്‍ വിതരണവും നടക്കും. 27ന് തിരുവനന്തപുരം ബാലരാമപുരത്ത് ഉമ്മന്‍ചാണ്ടി ഭവനത്തിന്‍റെ തറക്കല്ലിടീല്‍ നടക്കും. ഓഗസ്റ്റ് രണ്ടിന് പത്തനംതിട്ടയില്‍ സൗജന്യ വീല്‍ചെയര്‍ വിതരണവും ഉണ്ടായിരിക്കും. 2012ല്‍ ഉമ്മന്‍ ചാണ്ടിയുടെ പ്രത്യേക താത്പര്യ പ്രകാരം തിരുവനന്തപുരത്ത് ആരംഭിക്കുകയും 14 ജില്ലകളിലും വിവിധ സേവന സന്നദ്ധ - ചാരിറ്റി പ്രവര്‍ത്തനങ്ങള്‍ നടത്തിവരികയും ചെയ്യുന്ന സംഘടനയാണ് മന്ന ചാരിറ്റബിള്‍ ട്രസ്റ്റ്. ഉമ്മന്‍ ചാണ്ടിയുടെ വേര്‍പാടിനെ തുടര്‍ന്ന് അദ്ദേഹത്തിന്‍റെ സ്മരണ നിലനിര്‍ത്തുന്നതിനു ഭാര്യ മറിയാമ്മ ഉമ്മനും മകള്‍ ഡോ. മറിയം ഉമ്മനും ചേര്‍ന്ന് ട്രസ്റ്റിന്‍റെ പ്രവര്‍ത്തങ്ങള്‍ വിപുലപ്പെടുത്തി ഉമ്മന്‍ ചാണ്ടി സ്‌നേഹസ്പര്‍ശം എന്ന പേരില്‍ സംസ്ഥാനത്തുടനീളം വിവിധ ജീവകാരുണ്യ പ്രവര്‍ത്തനങ്ങളാണ് കഴിഞ്ഞ രണ്ടു വര്‍ഷക്കാലമായി നടത്തിവരുന്നത്. 14 ജില്ലകളിലും മെഡിക്കല്‍ ക്യാമ്പ് എന്ന ലക്ഷ്യവുമായിട്ടാണ് മന്ന മുന്നോട്ടുപോകുന്നത്. ഇതിനോടകം ഒമ്പതു ജില്ലകളില്‍ ക്യാമ്പ് നടന്നുകഴിഞ്ഞു. സ്‌നേഹസ്പര്‍ശത്തിന് പുറമേ കൈത്താങ്ങ്, കരുതല്‍ എന്നീ പേരുകളില്‍ കൂടിയാണു വിവിധ പ്രവര്‍ത്തനങ്ങള്‍ ഏകോപിപ്പിച്ച് നടത്തിവരുന്നത്. പത്രസമ്മേളനത്തില്‍ ഡോ. മറിയം ഉമ്മന്‍, സോബിച്ചന്‍ കണ്ണമ്പള്ളി, അമല്‍ ജി. പോള്‍, റോണി കുരുവിള, ഡാനി രാജു എന്നിവര്‍ പങ്കെടുത്തു.

ഉമ്മന്‍ ചാണ്ടി അനുസ്മരണം

മുണ്ടക്കയം: പകരക്കാരനില്ലാത്ത നീതിമാനായ ഭരണാധികാരിയായിരുന്നു ഉമ്മന്‍ ചാണ്ടിയെന്ന് എഐസിസി അംഗം റോയ് കെ.പൗലോസ് പറഞ്ഞു. പെരുവന്താനം ഐഎന്‍ടിയുസി മണ്ഡലം കമ്മിറ്റിയുടെ നേതൃത്വത്തില്‍ മുണ്ടക്കയം മുപ്പത്തഞ്ചാംമൈലില്‍ സംഘടിപ്പിച്ച ഉമ്മന്‍ചാണ്ടി അനുസ്മരണ സമ്മേളനം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. മണ്ഡലം പ്രസിഡന്‍റ് കെ.ആര്‍. ജയന്‍ അധ്യക്ഷത വഹിച്ചു. ഐഎന്‍ടിയുസി ജില്ലാ പ്രസിഡന്‍റ് രാജു മാട്ടുക്കാരന്‍ മുഖ്യപ്രഭാഷണം നടത്തി. സംസ്ഥാന സെക്രട്ടറിമാരായ സിറിയക് തോമസ്, പി.ആര്‍. അയ്യപ്പന്‍ എന്നിവര്‍ കിറ്റുകൾ വിതരണം നടത്തി. മികച്ച ആരോഗ്യ പ്രവര്‍ത്തന അവാര്‍ഡ് ജേതാക്കളായ പെരുവന്താനം പ്രഥമികാരോഗ്യ കേന്ദ്രത്തിലെ ജീവനക്കാര്‍, നേതൃത്വം നല്‍കിയ പഞ്ചായത്ത് ഭരണ സമിതി എന്നിവര്‍ക്ക് ഉമ്മന്‍ ചാണ്ടി സ്മാരക അവാര്‍ഡുകള്‍ വിതരണം ചെയ്തു. നീറ്റ് പരീക്ഷയില്‍ കേരളത്തില്‍നിന്ന് അഞ്ചാം റാങ്കു നേടിയ ചെല്‍സി എസ്. തെരേസ, കോണ്‍ഗ്രസ് മുന്‍ മണ്ഡലം പ്രസിഡന്‍റുമാര്‍, മുന്‍ പഞ്ചായത്തു പ്രസിഡന്‍റുമാര്‍ എന്നിവരെ സമ്മേളനത്തില്‍ ആദരിച്ചു. ജോര്‍ജ് കൂറുമ്പുറം, ഷാജഹാന്‍ മഠത്തില്‍, വി.സി. ജോസഫ് വെട്ടിക്കാട്ടിൽ, ടി.എന്‍. മധുസുദനന്‍, സണ്ണി തട്ടുങ്കല്‍, ജോണ്‍പി. തോമസ്, നിജിനി ഷംസുദീന്‍, ടോണി തോമസ്, കെ.എ. സിദ്ദിഖ്, സണ്ണി തുരുത്തിപ്പളളി, ഡൊമിന സജി, സി.ടി.മാത്യു, ശരത് ഒറ്റപ്ലാക്കല്‍, കെ.എന്‍.രാമദാസ് എന്നിവര്‍ പ്രസംഗിച്ചു.

സെന്‍റ് ഡൊമിനിക്സ് കത്തീഡ്രലിൽ കാർഷിക സെമിനാർ

കാഞ്ഞിരപ്പള്ളി: സെന്‍റ് ഡൊമിനിക്സ് കത്തീഡ്രൽ ഇടവകയുടെ ദ്വിശതാബ്ദി ആഘോഷങ്ങളുടെ ഭാഗമായി 20ന് ഉച്ചകഴിഞ്ഞ് മൂന്നിന് മഹാ ജൂബിലി ഹാളിൽ കാർഷിക സെമിനാർ നടക്കും. വികാരി റവ. ഡോ. കുര്യൻ താമരശേരി ഉദ്ഘാടനം ചെയ്യും. ഇൻഫാം ദേശീയ ചെയർമാൻ ഫാ. തോമസ് മറ്റമുണ്ടയിൽ, കെ.എസ്. തോമസ് എന്നിവർ ക്ലാസുകൾ നയിക്കും. അന്നേദിവസം ദേശീയ കർഷക സംഘടനയായ ഇൻഫാമിന്‍റെ പ്രവർത്തനങ്ങൾക്ക് കത്തീഡ്രൽ ഇടവകയിൽ തുടക്കം കുറിക്കും. ഫാ. തോമസുകുട്ടി ആലപ്പാട്ട്, ഫാ. ടോണി മുളങ്ങാശേരി, റെജി കൈപ്പൻപ്ലാക്കൽ, ജയിംസ്കുട്ടി ആശാരിപറമ്പിൽ, സെബാസ്റ്റ്യൻ കുരിശുകുന്നേൽ, മാത്യുച്ചൻ മാളിയേക്കൽ, ജിജി പുതിയിടം, സുനു മുത്തിയപ്പാറ, ജോസഫ് പണ്ടാരക്കളം, പയസ് കിഴക്കേനെടുംങ്ങട്ടിൽ എന്നിവർ നേതൃത്വം നൽകുമെന്ന് പബ്ലിസിറ്റി കൺവീനർ ഫിലിപ്പ് നിക്കോളാസ് പള്ളിവാതുക്കൽ അറിയിച്ചു.

പരിമിതികൾ മറന്ന് കൃത്രിമ അവയവ നിര്‍മാണവുമായി റെനി പോള്‌

പാലാ: മുട്ടിനു താഴെ മുറിച്ച ഇടതുകാലിന്‍റെ വേദന ശരീരത്തിലും മനസിലും നിറഞ്ഞപ്പോള്‍ കൈകാലുകള്‍ നഷ്ടപ്പെടുന്നവരെ ഏതുവിധേനയും സഹായിക്കുക എന്നത് വിമുക്ത ഭടനായ റെനി പോളിന്‍റെ ജീവിതാഭിലാഷമായി. പാലാ കെ.എം. മാണി സ്മാരക ഗവണ്‍മെന്‍റ് ആശുപത്രിയിലെ കൃത്രിമ അവയവ നിര്‍മാണ കേന്ദ്രത്തിലേക്ക് കടന്നുചെല്ലുന്നവര്‍ക്ക് ഓടിനടക്കുന്ന റെനി പോളിനെ കണ്ടാല്‍ അംഗപരിമിതനാണെന്ന് തോന്നുകയേയില്ല. എന്നാല്‍, മുട്ടിനു താഴെ മുറിച്ച ഇടതുകാലിനു പകരം സ്വന്തമായി കൃത്രിമ കാലുണ്ടാക്കി ധരിച്ച് നടക്കുന്നയാളാണ് ഇദ്ദേഹം. മകന്‍ എല്‍ദോ റെനി എയ്ഞ്ചലും കൃത്രിമ അവയവ നിര്‍മാണ മേഖലയില്‍ എന്‍ജിനിയറിംഗ് പാസായശേഷം അച്ഛനെ സഹായിക്കുകയാണ്. അപകടത്തിലോ അല്ലാതെയോ കൈകാലുകള്‍ നഷ്ടപ്പെട്ടവരുടെ വേദന നന്നായി അറിയാവുന്ന റെനി പോള്‍ അതുകൊണ്ടുതന്നെ അവര്‍ക്കുവേണ്ടി എന്തെങ്കിലും ചെയ്യണമെന്ന് തീരുമാനിക്കുകയും കൃത്രിമ അവയവ നിര്‍മാണ രംഗത്തേക്ക് കടന്നു വരികയുമായിരുന്നു. കൂത്താട്ടുകുളം കരിമ്പന വല്യാനപറമ്പില്‍ റെനി പോളിന് ബോര്‍ഡര്‍ സെക്യൂരിറ്റി ഫോഴ്സിലായിരുന്നു ജോലി. 1993ല്‍ ശ്രീനഗറില്‍ മറ്റു സൈനികര്‍ക്കൊപ്പം പതിവു പട്രോളിംഗ് നടത്തവേ മൈന്‍ സ്ഫോടനമുണ്ടായി. റെനിയുടെ ഇടതുകാലിന്‍റെ മുട്ടിനു താഴെ മുറിഞ്ഞുപോയി. ആറു മാസത്തോളം നീണ്ട ചികിത്സയ്ക്കു ശേഷം ജയ്പൂരിലെ കൃത്രിമ അവയവ നിര്‍മാണ കേന്ദ്രത്തില്‍നിന്നാണ് കൃത്രിമ കാലുവച്ചത്. 2000ല്‍ സര്‍വീസില്‍നിന്നു പിരിഞ്ഞു. തുടര്‍ന്ന് ഇങ്ങനെ കൈകാലുകള്‍ നഷ്ടപ്പെട്ടവരെ സഹായിക്കുക എന്ന ലക്ഷ്യത്തോടെ ഇതിനായുള്ള പി ആൻഡ് ഒ കോഴ്സ് പഠിക്കുകയും 2008ല്‍ കോട്ടയം മെഡിക്കല്‍ കോളജിലെ കൃത്രിമ അവയവനിര്‍മാണ കേന്ദ്രത്തില്‍ ജോലിയില്‍ പ്രവേശിക്കുകയും ചെയ്തു. വിരമിച്ചശേഷം സ്വന്തമായൊരു കേന്ദ്രം കോട്ടയത്ത് തുടങ്ങി. പാലാ കെ.എം. മാണി സ്മാരക ജനറല്‍ ആശുപത്രിയില്‍ കൃത്രിമ അവയവ നിര്‍മാണ കേന്ദ്രത്തിനായി എത്തിച്ച കാല്‍ കോടിയുടെ ഉപകരണങ്ങള്‍ പൊടിപിടിച്ചു നശിക്കുന്ന സാഹചര്യം ഒഴിവാക്കാന്‍ സൂപ്രണ്ട് ഡോ. ടി.പി. അഭിലാഷാണ് മുന്‍പരിചയമുള്ള റെനി പോളിനെ പാലായിലേക്കു ക്ഷണിച്ചത്. കഴിഞ്ഞ ജനുവരി മുതല്‍ ഇവിടെ റെനി പ്രവര്‍ത്തനം ആരംഭിച്ചു. ഇതിനോടകം നിരവധി പേര്‍ക്കു കൃത്രിമകൈകാലുകള്‍ നിര്‍മിച്ചു നല്‍കി. അതോടൊപ്പം പോളിയോ ബാധിതര്‍ക്കും മുട്ടുവേദന, നട്ടെല്ലിന് ക്ഷതമേറ്റവര്‍, കഴുത്തുവേദനക്കാര്‍ എന്നിവര്‍ക്കും ആവശ്യമായ ഉപകരണങ്ങള്‍ ഇവിടെനിന്നു വിതരണം ചെയ്തു തുടങ്ങി. അവയവങ്ങള്‍ നഷ്ടപ്പെട്ടവരുടെ വേദന എനിക്കറിയാം. അതുകൊണ്ടുതന്നെ ഈ രംഗത്ത് സജീവമായി പ്രവര്‍ത്തിക്കണമെന്നാണ് എനിക്കാഗ്രഹം. 58കാരനായ റെനി പോള്‍ ഇപ്പോള്‍ അതിരമ്പുഴയിലാണ് താമസം. ഷൈജിയാണ് ഭാര്യ. മക്കൾ: എല്‍ദോ, എയ്ഞ്ചല്‍ മേരി റെനി.

പൊതുമരാമത്ത് റോഡുകളോടു ചേർന്നുള്ള ഭൂമിയുടെ പട്ടയപ്രശ്നത്തിന് പരിഹാരം

മുണ്ടക്കയം: കർഷകർ കൈവശ ഭൂമിക്ക് പട്ടയ അപേക്ഷകൾ നൽകുമ്പോൾ ഭൂമിയുടെ ഏതെങ്കിലും അതിര് ചേർന്ന് പൊതുമരാമത്ത് വകുപ്പ് റോഡുകൾ കടന്നു പോകുന്നുണ്ടെങ്കിൽ അത്തരം ഭൂമികൾക്ക് പട്ടയം നൽകുന്നതിനുണ്ടായിരുന്ന തടസ്സം പരിഹരിച്ചതായി അഡ്വ. സെബാസ്റ്റ്യൻ കുളത്തുങ്കൽ എംഎൽഎ അറിയിച്ചു. പൊതുമരാമത്ത് വകുപ്പിന്‍റെ 2009- ലെ ഉത്തരവ് പ്രകാരം പൊതുമരാമത്ത് വകുപ്പ് റോഡിനോട് ചേർന്നുള്ള കൈവശ ഭൂമികൾക്ക് പട്ടയം നൽകുന്നതിന് പൊതുമരാമത്ത് വകുപ്പ് തടസ്സം ഉന്നയിച്ചിരുന്നു. ആയതിനാൽ റോഡിനോട് ചേർന്നുള്ള ഭൂമിക്ക് പട്ടയം നൽകിയിരുന്നില്ല. ഇതുമൂലം നിരവധി ചെറുകിട-നാമമാത്ര കർഷകർക്ക് തങ്ങളുടെ കൈവശ ഭൂമിക്ക് പട്ടയം ലഭിക്കാതെ പ്രതിസന്ധി നേരിട്ടിരുന്നു. പലരുടെയും ഭവന നിർമ്മാണം അടക്കമുള്ള ജീവിതാവശ്യങ്ങളും തടസ്സം നേരിട്ടിരുന്നു. പൂഞ്ഞാർ നിയോജകമണ്ഡലത്തിൽ ഇപ്രകാരം നിരവധി ആളുകൾക്ക് തങ്ങളുടെ കൈവശ ഭൂമിക്ക് പട്ടയം ലഭിക്കുന്നതിന് കഴിയാതെ വന്നിരുന്നു. ഗൗരവമായ ഈ പ്രശ്നം അഡ്വ. സെബാസ്റ്റ്യൻ കുളത്തുങ്കൽ എംഎൽഎ നിയമസഭയിൽ സബ്മിഷനായി ഉന്നയിക്കുകയും അതേ തുടർന്ന് ഈ പ്രശ്നം പരിഹരിക്കുന്നതിന് നടപടികൾ സ്വീകരിക്കുമെന്ന് റവന്യൂ മന്ത്രി കെ.രാജൻ നിയമസഭയിൽ മറുപടി നൽകിയിരുന്നു. തുടർന്ന് പ്രശ്ന പരിഹാരത്തിനായി റവന്യൂ മന്ത്രി കെ. രാജന്‍റെ അധ്യക്ഷതയിൽ അഡ്വ. സെബാസ്റ്റ്യൻ കുളത്തുങ്കൽ എംഎൽയുടെ സാന്നിധ്യത്തിൽ റവന്യൂ, പൊതുമരാമത്ത് വകുപ്പുകളുടെ ഉന്നത ഉദ്യോഗസ്ഥരുടെ യോഗം ചേർന്നു. യോഗത്തിൽ വിഷയം ചർച്ച ചെയ്ത് പൊതുമരാമത്ത് വകുപ്പിന്റെ റോഡ് പുറമ്പോക്കുകളിൽ പെടാത്ത റവന്യൂഭൂമികൾക്ക് കൈവശക്കാർക്ക് പട്ടയം നൽകുന്നതിന് നടപടികൾ സ്വീകരിക്കുന്നതിന് നിശ്ചയിച്ചു. ഇതുസംബന്ധിച്ച് സർക്കാർ ഉത്തരവ് പുറപ്പെടുവിക്കുന്നതിനും തീരുമാനമെടുത്തു. യോഗത്തിൽ മന്ത്രിയെയും, എംഎൽഎയും കൂടാതെ ലാൻഡ് റവന്യൂ ജോയിന്റ് കമ്മീഷണർ എ.ഗീത ഐഎഎസ്, റവന്യൂ വകുപ്പ് ഡെപ്യൂട്ടി സെക്രട്ടറി അനു എസ്. നായർ ഐഎഎസ്, പൊതുമരാമത്ത് വകുപ്പ് ചീഫ് എൻജിനീയർ അജിത്ത് രാമചന്ദ്രൻ തുടങ്ങിയവർ ഉൾപ്പെടെയുള്ള ഉദ്യോഗസ്ഥരും പങ്കെടുത്തു.

പത്രവിതരണത്തിനിടയിൽ ബൈക്കിടിച്ച് ദീപിക ഏജന്‍റിന് പരിക്ക്

ചേന്നാട്: ബൈക്കിടിച്ച് ദീപിക ഏജന്‍റിന് പരിക്കേറ്റു. ചേന്നാട് മുണ്ടിയത്ത് എം.സി. ജോസഫിനാണ് (ഔസേപ്പച്ചൻ) ഇന്നലെ രാവിലെ ഏഴിന് പത്രവിതരണത്തിനിടയിൽ പനച്ചികപ്പാറ - വാഴേക്കാട് റോഡിലുണ്ടായ അപകടത്തിൽ പരിക്കേറ്റത്. ദിശതെറ്റി വന്ന ബൈക്ക് ഏജന്‍റിന്‍റെ ബൈക്കുമായി കൂട്ടിയിടിച്ചാണ് അപകടം. അപകടത്തിൽ കാലിന് ഗുരുതര പരിക്കേറ്റ ഔസേപ്പച്ചനെ പാലായിലെ സ്വകാര്യ ആശുപത്രിയിൽ പ്രവേശിപ്പിച്ചു.

പുഷ്പചക്രം സമര്‍പ്പിച്ചു

കോട്ടയം: തൃണമൂല്‍ കോണ്‍ഗ്രസ് ജില്ലാ കമ്മിറ്റിയുടെ നേതൃത്വത്തില്‍ ഉമ്മന്‍ ചാണ്ടിയുടെ കബറിടത്തില്‍ തൃണമൂല്‍ കോണ്‍ഗ്രസ് സംസ്ഥാന കോ -ഓര്‍ഡിനേറ്റര്‍ സജി മഞ്ഞക്കടമ്പില്‍ പുഷ്പചക്രം സമര്‍പ്പിച്ചു. ജില്ലാ കോ-ഓര്‍ഡിനേറ്റര്‍ ഗണേഷ് ഏറ്റുമാനൂര്‍ അധ്യക്ഷത വഹിച്ചു. ബിബിന്‍ ശൂരനാടന്‍, ബിജു തെക്കേടം, സുനി സുബിച്ചന്‍, സന്തോഷ് മൂക്കിലിക്കാട്ട്, ബിജു കണിയാമല, ജി. ജഗദീഷ് സ്വാമിആശാന്‍, സുബിച്ചന്‍ പുതുപ്പള്ളി, കെ.എം. കുര്യന്‍, സുരേഷ് ബാബു, ശ്രീലക്ഷ്മി, മണി കിടങ്ങൂര്‍, ഷാജി താഴത്തുകുന്നേല്‍ തുടങ്ങിയവര്‍ പ്രസംഗിച്ചു.

ദേശീയതലത്തില്‍ ശുചിത്വ റാങ്കിംഗ് തിളക്കത്തില്‍ ജില്ലയിലെ നഗരസഭകള്‍

കോട്ടയം: ദേശീയതലത്തില്‍ നഗരസഭകള്‍ക്കുള്ള ശുചിത്വ സര്‍വേയായ സ്വച്ഛ് സര്‍വേഷനില്‍ ജില്ലയില്‍നിന്ന് ആദ്യമായി സിംഗിള്‍ സ്റ്റാര്‍ പദവി നേടി ഏറ്റുമാനൂര്‍, ഈരാറ്റുപേട്ട നഗരസഭകള്‍. തുറസായ മലമൂത്ര വിസര്‍ജന രഹിത പ്രദേശങ്ങളാക്കി നിലനിര്‍ത്തിയതിലൂടെ ജില്ലയിലെ അഞ്ചു നഗരസഭകള്‍ ഒഡിഎഫ് പ്ലസ് പദവിയും കരസ്ഥമാക്കി. ശുചിത്വമിഷനും നഗരസഭകളും സംയുക്തമായി പ്രവര്‍ത്തിച്ചതില്‍ ഹരിതകര്‍മസേന, ശുചീകരണ തൊഴിലാളികള്‍ എന്നിവരുടെ സജീവമായ പ്രവര്‍ത്തനവും ചങ്ങനാശേരി നഗരസഭയിലും കുമരകത്തുമുള്ള മൊബൈല്‍ സെപ്‌റ്റേജ് ട്രീറ്റ്‌മെന്‍റ്് യൂണിറ്റി‌ന്‍റെ പ്രവര്‍ത്തനവും റാങ്കിംഗ് മുന്‍ വര്‍ഷത്തേക്കാള്‍ മെച്ചപ്പെടാന്‍ കാരണമായി. ഉറവിട മാലിന്യസംസ്‌കരണ സംവിധാനങ്ങള്‍, എംസിഎഫ്, മിനി എംസിഎഫുകള്‍, ബോട്ടില്‍ ബൂത്തുകള്‍, പൊതുശൗചാലയങ്ങള്‍, ഹരിതടൗണ്‍, ഹരിതസ്ഥാപനങ്ങള്‍, ഇ-മാലിന്യ ശേഖരണം എന്നിവയും റാങ്കിംഗ് ഉയര്‍ത്തി. ചങ്ങനാശേരി നഗരസഭയില്‍ ജൈവമാലിന്യ സംസ്‌കരണത്തിനായി പ്രതിദിനം 30 ടണ്‍ ശേഷിയുള്ള സിഎന്‍ജി പ്ലാന്‍റ് സ്ഥാപിക്കല്‍, സാനിറ്ററി മാലിന്യങ്ങള്‍ ശാസ്ത്രീയമായി സംസ്‌കരിക്കുന്നതിനുള്ള ഡബിള്‍ ചേമ്പര്‍ ഇന്‍സിനറേറ്ററുകള്‍, സെപ്‌റ്റേജ് മാലിന്യങ്ങള്‍ സംസ്‌കരിക്കുന്നതിനുള്ള എഫ്എസ്ടിപി പദ്ധതി, ഹരിതകര്‍മസേന വഴി നഗരസഭാതലത്തില്‍ ഇ-മാലിന്യം ശേഖരണം മുതലായവയാണ് തുടര്‍ന്നുവരുന്ന പ്രവര്‍ത്തനങ്ങള്‍.

ദേവമാതാ കോളജ് ലൈബ്രറിയിൽ ഡിജിറ്റൽ തരംഗം

കുറവിലങ്ങാട്: നൂതന ശാസ്ത്ര സാങ്കേതിക രംഗത്തെ പുത്തൻ ആശയങ്ങളും വിവരസാങ്കേതിക വിദ്യകളും പ്രയോജനപ്പെടുത്തി ദേവമാതാ കോളജ് ലൈബ്രറി. ലൈബ്രറിയിൽ ഡിജിറ്റലൈസേഷൻ പ്രവർത്തനങ്ങളുടെ ആദ്യഘട്ടം പൂർത്തീകരിച്ച് വിദ്യാർഥികൾക്ക് കൈമാറി. മോൻസ് ജോസഫ് എംഎൽഎ പ്രാദേശിക വികസന ഫണ്ടിൽനിന്ന് 27 കമ്പ്യൂട്ടറുകൾ ലൈബ്രറിക്കായി അനുവദിച്ചു നൽകി. ഇതിന്‍റെ സ്വിച്ച് ഓൺ എംഎൽഎ നിർവഹിച്ചു. മാനേജർ ആർച്ച്പ്രീസ്റ്റ് റവ.ഡോ. തോമസ് മേനാച്ചേരി അധ്യക്ഷത വഹിച്ചു. പ്രിൻസിപ്പൽ ഡോ. സുനിൽ സി. മാത്യു, വൈസ് പ്രിൻസിപ്പൽ ഫാ. ഡിനോയ് മാത്യു കവളമ്മാക്കൽ, ബർസാർ ഫാ. ജോസഫ് മണിയൻചിറ, പഞ്ചായത്തംഗം ജോയിസ് അലക്‌സ് എന്നിവർ പ്രസംഗിച്ചു.

രാമപുരത്ത് നാലമ്പല ദര്‍ശനത്തിന് തുടക്കം

രാമപുരം: രാമപുരം നാലമ്പലദര്‍ശന തീർഥാടനത്തിന് തുടക്കമായി. ഇന്നലെ രാവിലെ വിവിധ ജില്ലകളില്‍നിന്ന് രാമപുരത്തെത്തിയ തീര്‍ഥാടകര്‍ക്ക് ജോസ് കെ. മാണി എംപിയുടെ നേതൃത്വത്തില്‍ വരവേല്‍പ്പ് നല്‍കി. വിവിധ ജില്ലകളില്‍നിന്നെത്തിയ കെഎസ്ആര്‍ടിസി ഡ്രൈവര്‍മാരെ മാലയിട്ട് അദ്ദേഹം സ്വീകരിച്ചു. തന്‍റെ പിതാവ് കെ.എം. മാണിയുടെ സ്വപ്നപദ്ധതിയായിരുന്നു രാമപുരം നാലമ്പല സര്‍ക്യൂട്ട് എന്ന് ജോസ് കെ. മാണി പറഞ്ഞു. രാമപുരത്ത് കൂടുതല്‍ വികസന പ്രവര്‍ത്തനങ്ങള്‍ക്കു നേതൃത്വം നല്‍കുമെന്നും അദ്ദേഹം പറഞ്ഞു. ശ്രീ ഭരതസ്വാമി ക്ഷേത്രത്തിനു പുതിയ ഹൈമാസ്റ്റ് ലൈറ്റും അദ്ദേഹം അനുവദിച്ചു. രാമപുരത്ത് 65 കോടി രൂപയുടെ വികസന പ്രവര്‍ത്തനങ്ങള്‍ക്ക് കെ.എം. മാണിസാറിന്‍റെ ഭരണകാലത്ത് നേതൃത്വം നല്‍കിയതായി ക്ഷേത്രം ഭാരവാഹികള്‍ പറഞ്ഞു. രാമപുരത്ത് ശ്രീരാമസ്വാമി ക്ഷേത്രത്തിലും കൂടപ്പുലം ശ്രീലക്ഷ്മണ സ്വാമി ക്ഷേത്രത്തിലും അമനകര ശ്രീ ഭരതസ്വാമി ക്ഷേത്രത്തിലും മേതിരി ശ്രീ ശത്രുഖന സ്വാമി ക്ഷേത്രത്തിലും രാവിലെ മുതല്‍ തീർഥാടകരുടെ തിരക്ക് അനുഭവപ്പെട്ടിരുന്നു. നാലമ്പലദര്‍ശനം ഒരുക്കങ്ങളില്‍ പൂര്‍ണ തൃപ്തി രേഖപ്പെടുത്തി മാണി സി. കാപ്പന്‍. രാമപുരം കര്‍ക്കടകം ഒന്നുമുതല്‍ ഒരു മാസക്കാലം നീണ്ടുനില്‍ക്കുന്ന രാമായണ മാസത്തോടനുബന്ധിച്ച് രാമപുരത്തെ നാലമ്പല ദര്‍ശനമായി ഭക്തജനങ്ങള്‍ക്ക് എല്ലാ സൗകര്യങ്ങളും ഒരുക്കുന്നതിനായി ബന്ധപ്പെട്ട ഉദ്യോഗന്ഥരുടെയും ജനപ്രതിനിധികളുടെയും ക്ഷേത്ര കമ്മിറ്റി ഭാരവാഹികളുടെയും യോഗം വിളിച്ചു ചേര്‍ത്ത് ആവശ്യമായ നിര്‍ദേശങ്ങള്‍ നല്കിയിരുന്നു. ക്ഷേത്ര പരിസരത്ത് വെളിച്ചം ഉറപ്പാക്കുന്നതിന് എംഎല്‍എയുടെ ആസ്തി വികസന ഫണ്ടില്‍നിന്ന് തുക വകയിരിത്തിയിരിന്നതായും അദ്ദേഹം പറഞ്ഞു.

പൈക്കാട് ജംഗ്ഷനിൽ പുത്തൻ ട്രാൻസ്‌ഫോർമർ

മണ്ണയ്ക്കനാട്: മരങ്ങാട്ടുപിള്ളി പഞ്ചായത്ത് പത്താം വാർഡിലെ നെടുമ്പാറ, വട്ടപ്പാറ, പടിക്കുഴ പ്രദേശത്തെ വോൾട്ടേജ് ക്ഷാമത്തിന് പരിഹാരമായി. 150 ഓളം കുടുംബാംഗങ്ങൾക്ക് ആശ്വാസമേകി പൈക്കാട് ജംഗ്ഷനിൽ പുതിയ ട്രാൻസ്‌ഫോർമർ പ്രവർത്തനം ആരംഭിച്ചു. പഞ്ചായത്ത് പ്രസിഡന്‍റ് ബെൽജി ഇമ്മാനുവൽ ഉദ്ഘാടനം നിർവഹിച്ചു. പഞ്ചായത്തംഗം ബെനറ്റ് പി. മാത്യു അധ്യക്ഷത വഹിച്ചു. ജോസഫ് ജോസഫ്, സലിമോൾ ബെന്നി, ഗംഗാധരൻ തുടങ്ങിയവർ പ്രസംഗിച്ചു.

വീട്ടമ്മമാർക്ക് ഭക്ഷ്യസുരക്ഷാ പരിശീലനം

അരുവിത്തുറ: മാതൃവേദി അരുവിത്തുറ യൂണിറ്റിന്‍റെ ആഭിമുഖ്യത്തിൽ അരുവിത്തുറ സെന്‍റ് ജോർജ് കോളജ് ഫുഡ് സയൻസ് വിഭാഗത്തിലെ അധ്യാപകരും വിദ്യാർഥികളും ചേർന്ന് അടുക്കളയും ഭക്ഷ്യസുരക്ഷയും എന്ന വിഷയത്തിൽ ഏകദിന സെമിനാർ സംഘടിപ്പിച്ചു. സെമിനാറിന്‍റെ ഉദ്ഘാടനം അരുവിത്തുറ ഫൊറോന പള്ളി വികാരി ഫാ. സെബാസ്റ്റ്യൻ വെട്ടുകല്ലേൽ നിർവഹിച്ചു. അടുക്കളയിലെ ഭക്ഷ്യസുരക്ഷ മാർഗങ്ങൾ സംബന്ധിച്ച പ്രായോഗിക പരിശീലനമാണ് വീട്ടമ്മമാർക്ക് നൽകയത്. മാതൃജ്യോതി യൂണിറ്റ് ഡയറക്ടർ ഫാ. ലിബിൻ പാലയ്ക്കത്തടത്തിൽ, ഫുഡ് സയൻസ് വിഭാഗം അധ്യാപകൻ ബിൻസ് കെ. തോമസ്, ഷോണി കിഴക്കേത്തോട്ടം, എന്നിവരും ഒ.ബി. ആരതി, കെ. ഫാത്തിമ എന്നീ വിദ്യാർഥിനികളുംപരിശീലനപരിപാടിയിൽ ക്ലാസുകൾ നയിച്ചു.

സെന്‍റ് തോമസ് കോളജില്‍ സ്റ്റുഡന്‍റ്സ് ക്വാളിറ്റി അഷ്വറന്‍സ് സെല്‍

പാലാ: സെന്‍റ് തോമസ് കോളജ് ഓട്ടോണമസില്‍ വിദ്യാര്‍ഥികളുടെ വിവിധ തലങ്ങളിലുള്ള അക്കാദമിക് പ്രവര്‍ത്തനങ്ങളുടെയും നേട്ടങ്ങളുടെയും വിവരശേഖരണവും ക്രോഡീകരിക്കലും ഏകോപിപ്പിക്കുക എന്ന ലക്ഷ്യത്തോടെ സ്റ്റുഡന്‍റ്സ് ക്വാളിറ്റി അഷ്വറന്‍സ് സെല്‍ രൂപീകരിച്ചു. പഠനപ്രവര്‍ത്തനങ്ങള്‍, ഗവേഷണങ്ങള്‍, പാഠ്യേതര വിഷയങ്ങളിലെ പങ്കാളിത്തം, കലാ-കായിക നേട്ടങ്ങള്‍ എന്നിവയുള്‍പ്പെടെയുള്ള വിവരങ്ങള്‍ ശേഖരിക്കുകയും ക്രോഡീകരിക്കുകയും ഏകോപിപ്പിക്കുകയും ചെയ്യുക എന്നതാണ് ഈ സെല്ലിന്‍റെ പ്രധാന ലക്ഷ്യം. ഓരോ ക്ലാസില്‍ നിന്നും തെരഞ്ഞെടുക്കപ്പെടുന്ന വിദ്യാര്‍ഥികളെ ഉള്‍പ്പെടുത്തി ഡിപ്പാര്‍ട്ടുമെന്‍റ് തലത്തിലും വിവിധ ഡിപ്പാര്‍ട്ടുമെന്‍റുകളില്‍നിന്ന് തെരഞ്ഞെടുക്കപ്പെടുന്ന ഓരോ വിദ്യാര്‍ഥിയെയും ഉള്‍പ്പെടുത്തി കോളജ് തലത്തിലുമായാണ് സെല്‍ പ്രവര്‍ത്തിക്കുന്നത്. പ്രിന്‍സിപ്പല്‍ ഡോ. സിബി ജയിംസ് ഉദ്ഘാടനം നിര്‍വഹിച്ചു. വൈസ് പ്രിന്‍സിപ്പല്‍ റവ.ഡോ. സാല്‍വിന്‍ തോമസ് കാപ്പിലിപ്പറമ്പില്‍ അധ്യക്ഷത വഹിച്ച സമ്മേളനത്തില്‍ ബര്‍സാര്‍ ഫാ. മാത്യു ആലപ്പാട്ടുമേടയില്‍, ഐക്യുഎസി കോ-ഓര്‍ഡിനേറ്റര്‍ ഡോ. തോമസ് വി. മാത്യു, കോ-ഓര്‍ഡിനേറ്റര്‍ ഡോ. ജയേഷ് ആന്‍റണി, പ്രഫ. ജെ. അഗസ്റ്റിന്‍ . എടക്കര, ഡോണ്‍ സിജു തുടങ്ങിയവര്‍ പ്രസംഗിച്ചു.

പാലാ രൂപത ആഗോള പ്രവാസിസംഗമം "കൊയ്നോനിയ-2025' നാളെ ചൂണ്ടച്ചേരി സെന്‍റ് ജോസഫ് കോളജില്‍

പാലാ: പാലാ രൂപത പ്രവാസി അപ്പൊസ്തലേറ്റിന്‍റെ നേതൃത്വത്തിലുള്ള ആഗോള പ്രവാസി സംഗമം "കൊയ്നോനിയ-2025' നാളെ ചൂണ്ടച്ചേരി സെന്‍റ് ജോസഫ് എൻജിനിയറിംഗ് കോളജില്‍ നടക്കും. വിവിധ രാജ്യങ്ങളില്‍നിന്നുള്ള പാലാ രൂപതാംഗങ്ങളായ പ്രവാസികളുടെ നാലാമത് ആഗോളസംഗമത്തിനുള്ള ഒരുക്കങ്ങള്‍ പൂര്‍ത്തീകരിച്ചു. നാളെ രാവിലെ ഒന്പതിന് സംഗമത്തിനെത്തുന്നവരുടെ രജിസ്ട്രേഷന്‍ ആരംഭിക്കും. 9.30ന് വിശുദ്ധ കുര്‍ബാന. 10.30ന് സമ്മേളനം ആരംഭിക്കും. സംഗമം പാലാ ബിഷപ് മാര്‍ ജോസഫ് കല്ലറങ്ങാട്ട് ഉദ്ഘാടനം ചെയ്യും. രൂപത മുഖ്യ വികാരി ജനറാള്‍ മോണ്‍. ഡോ. ജോസഫ് തടത്തില്‍ അധ്യക്ഷത വഹിക്കും. പാലാ രൂപത പ്രവാസി അപ്പൊസ്തലേറ്റ് ഡയറക്ടര്‍ ഫാ. കുര്യാക്കോസ് വെള്ളച്ചാലില്‍ ആമുഖപ്രഭാഷണം നടത്തും. രൂപത വികാരി ജനറാള്‍ മോണ്‍. ഡോ. ജോസഫ് കണിയോടിക്കല്‍ സന്ദേശം നല്‍കും. പ്രവാസി ഹെല്‍ത്ത് കെയര്‍ പദ്ധതി മിഡില്‍ ഈസ്റ്റ് കോ-ഓര്‍ഡിനേറ്റര്‍ സിവി പോള്‍ സംഗമത്തില്‍ അവതരിപ്പിക്കും. മിഡില്‍ ഈസ്റ്റ് സെക്രട്ടറി രജിത് മാത്യു സംവിധാനം ചെയ്ത ഡോക്യുമെന്‍ററി സംഗമത്തില്‍ പ്രദര്‍ശിപ്പിക്കും. വിവിധ മേഖലകളിലെ പ്രതിഭകളെ സംഗമത്തില്‍ ആദരിക്കും. കലാപരിപാടികളും നടത്തും. പാലാ രൂപത പ്രവാസി അപ്പൊസ്തലേറ്റ് അസിസ്റ്റന്‍റ് ഡയറക്ടര്‍മാരായ ഫാ. ജോര്‍ജ് നെല്ലിക്കല്‍, ഫാ. മാണി കൊഴുപ്പന്‍കുറ്റി, ഗ്ലോബല്‍ കോ-ഓര്‍ഡിനേറ്റര്‍ ഷാജിമോന്‍ മങ്കുഴിക്കരി, ജനറല്‍ കണ്‍വീനര്‍ മനോജ് പി. മാത്യു, സെന്‍ട്രല്‍ കോ-ഓര്‍ഡിനേറ്റര്‍ ജോഷി മാത്യു എന്നിവരുടെ നേതൃത്വത്തിലുള്ള കമ്മിറ്റികളാണ് സംഗമത്തിനുള്ള ക്രമീകരണങ്ങള്‍ പൂര്‍ത്തീകരിച്ചിട്ടുള്ളത്. പാലാ രൂപതയുടെ പ്ലാറ്റിനം ജൂബിലി വര്‍ഷത്തിലെ സംഗമമെന്നത് ഇക്കുറി ഇരട്ടി മധുരം സമ്മാനിച്ചിട്ടുണ്ട്. വിവിധ രാജ്യങ്ങളില്‍ ചെറിയ സമ്മേളനങ്ങള്‍ പൂര്‍ത്തീകരിച്ചാണ് രൂപതാതലസംഗമത്തിലേക്ക് പ്രവേശിക്കുന്നത്. കഴിഞ്ഞവര്‍ഷം ഒട്ടേറെ വേറിട്ട കര്‍മപരിപാടികള്‍ പൂര്‍ത്തീകരിച്ചാണ് വാര്‍ഷിക സംഗമത്തിന് ആതിഥ്യമരുളുന്നതെന്നതും ശ്രദ്ധേയം. പ്രഗത്ഭരായ അധ്യാപകര്‍ നേതൃത്വം നല്‍കുന്ന ട്രെയിനിംഗ് ആൻഡ് ഓറിയന്‍റേഷന്‍ പ്രോഗ്രാം (ടോപ്പ് ) ഫോര്‍ പ്രവാസി സ്റ്റുഡന്‍റ്സ്, പാലാ മെഡിസിറ്റിയുമായി ചേര്‍ന്ന് പ്രവാസി മെഡിക്കെയര്‍ പ്രോഗ്രാം, ഓണ്‍ലൈന്‍ മെഡി ടോക്ക്സ്, 100 നിര്‍ധനര്‍ക്ക് വീല്‍ചെയര്‍, രൂപത ഭവന നിര്‍മാണ പദ്ധതിയായ ഹോം പാലായുമായി ചേര്‍ന്നുള്ള ഭവനനിര്‍മാണം എന്നിവ കഴിഞ്ഞ വര്‍ഷം നടപ്പിലാക്കാൻ കഴിഞ്ഞതായി രൂപത ഡയറക്ടര്‍ ഫാ. കുര്യാക്കോസ് വെള്ളച്ചാലില്‍ അറിയിച്ചു.

മെഡിക്കല്‍ സ്‌പെഷാലിറ്റി ക്യാമ്പ്

പാലാ : ഇലവനാല്‍ ഹെല്‍ത്ത് സെന്‍റർ, റോട്ടറി ക്ലബ് എന്നിവയുടെ ആഭിമുഖ്യത്തില്‍ 20ന് രാവിലെ 8.30 മുതല്‍ ഒന്നുവരെ പാലാ ഗവണ്‍മെന്‍റ് ആശുപത്രി ജംഗ്ഷനിലുള്ള ഇലവനാല്‍ ഹെല്‍ത്ത് സെന്‍ററില്‍ സൗജന്യ മെഡിക്കല്‍ സ്‌പെഷാലിറ്റി ക്യാമ്പ് നടത്തും. പ്രമേഹം, രക്തസമ്മര്‍ദം, തൈറോയ്ഡ്, ലിപിഡ് പ്രൊഫൈല്‍, കാല്പാദത്തിന്‍റെ ന്യൂറോപ്പതി, അസ്ഥിബലക്ഷയം, യൂറിക് ആസിഡ്, വൃക്കരോഗം നേരത്തേ മനസിലാക്കുവാനുള്ള മൈക്രോ ആല്‍ബുമിന്‍ തുടങ്ങിയവയുടെ പരിശോധന സൗജന്യമായി നടത്തുന്നതാണ്. പ്രമേഹരോഗികള്‍ പിന്തുടരേണ്ട ആഹാര ക്രമീകരണങ്ങളുടെ പ്രദര്‍ശനവും ബോധവത്കരണ സെമിനാറും ഉണ്ടായിരിക്കും. ഡോ. ജോര്‍ജ് ആന്‍റണി, ഡോ. ഹരീഷ്‌കുമാര്‍, ഡോ. ജയിംസ് ജോസഫ്, ഡോ. സാം സ്‌കറിയ, ഡോ ദീപക് മോഹന്‍, ഡോ. വി.എന്‍. സുകുമാരന്‍, റോട്ടറി പ്രസിഡന്‍റ് ജോഷി വെട്ടുകാട്ടില്‍ തുടങ്ങിയവര്‍ നേതൃത്വം നല്‍കും. പേര് രജിസ്റ്റര്‍ ചെയ്യാന്‍ നിരപ്പേല്‍ മെഡിക്കല്‍സ് - 7559927020 , ഡിവൈന്‍ മെഡിക്കല്‍സ് - 9446983048, ഇലവനാല്‍ ഹെല്‍ത്ത് സെന്‍റര്‍ - 8848903821.

രാമപുരത്ത് നാലമ്പല ദർശനത്തിന് തുടക്കം; തീർഥാടകരെ വരവേറ്റ് ജോസ് കെ. മാണി

രാമപുരം: കർക്കടകം ഒന്നിന് രാമപുരം നാലമ്പല തീർഥാടനത്തിന് തുടക്കമായി. രാവിലെ വിവിധ ജില്ലകളിൽനിന്ന് രാമപുരത്തെത്തിയ തീർഥാടകർക്ക് ജോസ് കെ. മാണി എംപിയുടെ നേതൃത്വത്തിൽ വരവേൽപ്പ് നൽകി. വിവിധ ജില്ലകളിൽ നിന്നെത്തിയ കെഎസ്ആർടിസി ഡ്രൈവർമാരെ അദ്ദേഹം മാലയണിയിച്ച് സ്വീകരിച്ചു. രാമപുരത്തെ നാലമ്പലങ്ങളെ ഹൃദയത്തോട് ചേർത്തുവച്ച തന്‍റെ പിതാവ് കെ.എം. മാണിയുടെ സ്വപ്ന പദ്ധതിയായിരുന്നു രാമപുരം നാലമ്പല സർക്യൂട്ട് എന്ന് ജോസ് കെ. മാണി പറഞ്ഞു. രാമപുരത്ത് കൂടുതൽ വികസന പ്രവർത്തനങ്ങൾക്ക് നേതൃത്വം നൽകുമെന്നും അദ്ദേഹം കൂട്ടിച്ചേർത്തു. ശ്രീ ഭരതസ്വാമി ക്ഷേത്രത്തിന് പുതിയ ഹൈമാസ്റ്റ് ലൈറ്റും അദ്ദേഹം അനുവദിച്ചു. രാമപുരത്ത് 65 കോടി രൂപയുടെ വികസന പ്രവർത്തനങ്ങൾ കെ.എം. മാണിയു‌‌ടെ ഭരണകാലത്ത് ന‌ടന്നിരുന്നതായി ക്ഷേത്രം ഭാരവാഹികൾ പറഞ്ഞു. രാമപുരം ശ്രീരാമസ്വാമി ക്ഷേത്രത്തിലും കൂടപ്പിലം ശ്രീലക്ഷ്മണ സ്വാമി ക്ഷേത്രത്തിലും അമനകര ശ്രീഭരത സ്വാമി ക്ഷേത്രത്തിലും മേതിരി ശ്രീശത്രുഖന സ്വാമി ക്ഷേത്രത്തിലും രാവിലെ മുതൽ തന്നെ തീർഥാ‌ടക തിരക്ക് അനുഭവപ്പെട്ടിരുന്നു. രാമപുരത്തെ നാലമ്പലങ്ങളിൽ തീർഥാടകർക്ക് വിപുലമായ സൗകര്യങ്ങളാണ് ഏർപ്പെടുത്തിയിരിക്കുന്നത്.

മെഡിക്കൽ കോളജിലെ ചോർച്ച: വലിയ അഴിമതി നടന്നെന്ന് തെളിഞ്ഞതായി യുഡിഎഫ് നേതൃയോഗം

കോട്ടയം: മെഡിക്കല്‍ കോളജിലെ പുതിയ മന്ദിരത്തില്‍ വ്യാപകമായി ചോര്‍ച്ച കാണപ്പെട്ടതോടെ നിര്‍മാണത്തില്‍ വലിയ അഴിമതി നടന്നെന്ന് തെളിഞ്ഞിരിക്കുകയാണെന്ന് യുഡിഎഫ് ജില്ലാ നേതൃയോഗം. തിരുവഞ്ചൂര്‍ രാധാകൃഷ്ണന്‍ എംഎല്‍എ ഉദ്ഘാടനം ചെയ്തു. യുഡിഎഫ് ജില്ലാ ചെയര്‍മാന്‍ ഇ.ജെ. അഗസ്തി അധ്യക്ഷതവഹിച്ചു. ഫ്രാന്‍സിസ് ജോര്‍ജ് എംപി, യുഡിഎഫ് ജില്ലാ കണ്‍വീനര്‍ ഫില്‍സണ്‍ മാത്യൂസ്, ജോയി ഏബ്രഹാം, കുര്യന്‍ ജോയി, അസീസ് ബസായില്‍, ജയ്‌സണ്‍ ജോസഫ്, കുഞ്ഞ് ഇല്ലംപള്ളി, സലിം പി. മാത്യു, ടി.സി. അരുണ്‍, തമ്പി ചന്ദ്രന്‍, വി.ജെ. ലാലി, മദന്‍ലാല്‍, നിബു ഏബ്രഹാം, ടോമി വേദഗിരി, സാജു എം. ഫിലിപ്പ്, ഷാനവാസ് പാഴൂര്‍, അജ്മല്‍ ഖാന്‍ തുടങ്ങിയവര്‍ പ്രസംഗിച്ചു.

നഗ്നതാ പ്രദർശനം: യുവാവ് അറസ്റ്റിൽ

പാമ്പാടി: പ്രായപൂര്‍ത്തിയാകാത്ത പെണ്‍കുട്ടിയോട് ലൈംഗികാതിക്രമം. യുവാവ് പിടിയിൽ. ആലപ്പുഴ തെക്കേക്കര കൈപ്പള്ളിമുക്ക് കുറത്തിക്കാട് കളക്കാട്ട് ദേവദത്തനാ (കണ്ണന്‍, 21) ണു മാവേലിക്കരയില്‍നിന്ന് പാമ്പാടി പോലീസിന്‍റെ പിടിയിലായത്. കഴിഞ്ഞ രണ്ടിന് രാവിലെ ഏഴാം ക്ലാസില്‍ പഠിക്കുന്ന അതിജീവിത സ്‌കൂള്‍ ബസ് കാത്തുനില്‍ക്കുകയായിരുന്ന പാമ്പാടി പള്ളിക്കുന്ന് ഭാഗത്ത് റോഡില്‍ ബൈക്കിലെത്തിയ പ്രതി ബൈക്കില്‍ ഇരുന്നു നഗ്‌നത പ്രദര്‍ശിപ്പിച്ച് അതിജീവിതയോട് ലൈംഗിക അതിക്രമം കാണിക്കുകയായിരുന്നു. പിന്നീട് സ്ഥലത്തുനിന്നു രക്ഷപ്പെട്ട പ്രതിയെ കാഞ്ഞിരപ്പള്ളി ഡിവൈഎസ്പിയുടെ നിര്‍ദേശാനുസരണം പാമ്പാടി എസ്എച്ച്ഒ റിചാര്‍ഡ് വര്‍ഗീസ്, എസ്‌ഐ ഉദയകുമാര്‍ എന്നിവരുടെ നേതൃത്വത്തിലുള്ള അന്വേഷണസംഘം സിസിടിവി ദൃശ്യങ്ങളും സാക്ഷിമൊഴികളും ശേഖരിച്ചു മാവേലിക്കരയില്‍നിന്ന് കസ്റ്റഡിയിലെടുക്കുകയായിരുന്നു.

ഗൃഹാതുര സ്മരണയിൽ സംക്രാന്തി സംക്രമണ വാണിഭം

സംക്രാന്ത്രി: പഴമയുടെ ഓർമത്താളുകൾ നിവർത്തി സംക്രാന്തി സംക്രമണ വാണിഭത്തിന് തുടക്കമായി. പതിറ്റാണ്ടുകളുടെ പഴക്കമുണ്ട് സംക്രാന്തി സംക്രമണ വാണിഭത്തിന്. താഴപ്പായ, വള്ളിക്കൊട്ട, മുറം, മുളം പുട്ടുകുറ്റി, മൺകലം, മൺകുടം, ചട്ടി, ചിരട്ടത്തവി തുടങ്ങിയവ സംക്രമണ വാണിഭത്തിന്‍റെ പ്രത്യേകതയാണ്. ഇന്നലെ വൈക്കത്തിന്‍റെ വിവിധ പ്രദേശത്തുനിന്നു തഴയിലും ഇറ്റയിലും കളിമണ്ണിലും തീർത്ത വീട്ടുസാധനങ്ങളുമായി സ്ത്രീകൾ അടക്കമുള്ള കച്ചവടക്കാർ എത്തിയിരുന്നു. ഇതിനു പുറമെ പിച്ചാത്തി, വാക്കത്തി, പല തരത്തിലുള്ള കത്തികൾ, അത്തർ, കളിപ്പാട്ടങ്ങൾ, പച്ചക്കറി തൈകൾ, പട്ടുസാരികൾ, ചാമ, തെന അരി, കമ്പ് ചോളം, മണിച്ചോളം, നാടൻ മുതിര തുടങ്ങിയ വിവിധയിനം വിത്തുകളുമായും കച്ചവടക്കാർ എത്തിയിരുന്നു. പാലക്കാട് നെന്മാറ സ്വദേശി പ്രസാദാണ് വിവിധയിനം അരികളുടെ വിത്തുമായി എത്തിയത്. എല്ലാ വർഷവും സംക്രമണ വാണിഭത്തിൽ കച്ചവടത്തിന് എത്തിയതിന് ആദരിക്കപ്പെട്ടിട്ടുള്ള മുണ്ടക്കയം സ്വദേശി ഒ.ജെ. കുഞ്ഞുമോൻ ഇത്തവണയും പച്ചക്കറികളുടെയും പൂച്ചെടികളുടെയും തൈകളുമായി എത്തിയിരുന്നു. ഇന്നലെ രാവിലെ മുതൽ വിവിധ സ്ഥലങ്ങളിൽനിന്നു കുടുംബാഗങ്ങൾ ഒന്നിച്ച് വീട്ടുസാധനങ്ങൾ വാങ്ങാനെത്തി. പഴയ കാലത്ത് വീട്ടുസാധനങ്ങളും കാർഷികോത്‌പന്നങ്ങളുമായി സംസ്ഥാനത്തിന്‍റെ വിവിധ ഭാഗങ്ങളിൽനിന്ന് നിരവധി കച്ചവടക്കാരാണ് സംക്രമണത്തിൽ പങ്കെടുക്കാൻ എത്തിയിരുന്നത്. കാളവണ്ടിയിലാണ് സാധനങ്ങളുമായി കച്ചവടക്കാർ വന്നിരുന്നത്. ഒരു മാസത്തിനടുത്ത് വാണിഭം നീണ്ടു പോകും. അതുവരെ കച്ചവടക്കാർ ഇവിടെ താമസിക്കും. നിലവിൽ മൂന്നോ നാലോ ദിവസം മാത്രമേ കച്ചവടക്കാർ ഇവിടെ ഉണ്ടാവുകയുള്ളൂ. സംക്രമത്തോടനുബന്ധിച്ച് ഇന്നലെ വൈകുന്നേരം സാംസ്കാരിക ഘോഷയാത്രയും സമ്മേളനവും നടന്നു. ഇന്ന് പാക്കിൽ സംക്രമണ വാണിഭത്തിന് തുടക്കമാകും.

ക്ലബ്ബുകളുടെ പ്രവര്‍ത്തനം ആരംഭിച്ചു

ചങ്ങനാശേരി: വാഴപ്പള്ളി സെന്‍റ് തെരേസാസ് ഹൈസ്‌കൂളില്‍ വിവിധ ക്ലബ്ബുകളുടെ പ്രവര്‍ത്തനങ്ങള്‍ ഡിഎഫ്‌സി അതിരൂപത ഡയറക്ടര്‍ ഫാ. ജോര്‍ജ് ഉദ്ഘാടനം ചെയ്തു. സ്‌കൂള്‍ മാനേജര്‍ സിസ്റ്റര്‍ ലിന്‍സി വലിയപ്ലാക്കല്‍ അധ്യക്ഷത വഹിച്ചു. ജോഷി കൊല്ലാപുരം, ജീന്‍ വി. സോജന്‍, സെല്‍വി റീന തോമസ്, ലക്‌സി മാത്യു, എന്‍. സജിന്‍, സിസ്റ്റര്‍ എല്‍സീന, ജോമ എന്‍. തോമസ്, തോംസണ്‍ ടോം എന്നിവര്‍ പ്രസംഗിച്ചു.

പാലാക്കുന്നേല്‍ ജോസഫ് സക്കറിയയുടെ കരുതലില്‍ കുറുമ്പനാടം സ്‌കൂളിലെ 50 വിദ്യാര്‍ഥികള്‍ക്ക് സ്‌കോളര്‍ഷിപ്പ്

കുറുമ്പനാടം: സെന്‍റ് പീറ്റേഴ്‌സ് ഹയര്‍ സെക്കന്‍ഡറി സ്‌കൂളിലെ 50 പ്ലസ് വണ്‍, പ്ലസ്ടു വിദ്യാര്‍ഥികള്‍ക്കായി പൂര്‍വ വിദ്യാര്‍ഥിയായ പാലാക്കുന്നേല്‍ ജോസഫ് സക്കറിയ ഏര്‍പ്പെടുത്തിയ 5000 രൂപ വീതമുള്ള സ്‌കോളര്‍ഷിപ്പ് സമ്മാനിച്ചു. സ്‌കൂള്‍ ഓഡിറ്റോറിയത്തില്‍ ചേര്‍ന്ന സമ്മേളനത്തില്‍ സ്‌കൂള്‍ മാനേജര്‍ റവ. ഡോ. ജോബി കറുകപ്പറമ്പില്‍ സ്‌കോളര്‍ഷിപ്പുകള്‍ വിതരണം ചെയ്തു. പാലാക്കുന്നേല്‍ ജോസഫ് സക്കറിയയുടെ സ്‌കൂള്‍ അധ്യാപികയായിരുന്ന സിസ്റ്റര്‍ നെസ്‌തോര്‍ എഫ്‌സിസിയുടെ കാരുണ്യ പ്രവര്‍ത്തനങ്ങളുടെ സ്മരണാര്‍ഥമാണ് ഇദ്ദേഹം കഴിഞ്ഞ 22 വര്‍ഷമായി 50 കുട്ടികള്‍ക്ക് വീതം പഠനസഹായമായി സ്‌കോളര്‍ഷിപ്പ് നല്‍കുന്നത്. സാമ്പത്തിക പിന്നാക്കാവസ്ഥയും പഠനമികവും സല്‍സ്വഭാവവുമുള്ള വിദ്യാര്‍ഥികളെയാണ് സ്‌കോളര്‍ഷിപ്പിനായി പരിഗണിക്കുന്നത്. ഇദ്ദേഹത്തിന്‍റെ മകൻ സൗദിയില്‍ അരാംകോ കമ്പനി മാനേജരായ ജോര്‍ജ് ജോസഫിനെയും തന്‍റെ കാരുണ്യ പ്രവര്‍ത്തനത്തിന്‍റെ പാത പിന്തുടരുന്നതിനായി വര്‍ഷംതോറും നടത്തുന്ന ഈ പരിപാടിയില്‍ പങ്കെടുപ്പിക്കാറുണ്ട്. സ്‌കൂള്‍ പ്രിന്‍സിപ്പല്‍ ജയിംസ് കെ. മാളിയേക്കല്‍, സീനിയര്‍ അസി. മഞ്ജു ഗ്ലാഡി, പ്രോഗ്രാം കണ്‍വീനര്‍ അഞ്ജു സോജന്‍ എന്നിവര്‍ പ്രസംഗിച്ചു.

സ്‌കൂട്ടറുകളില്‍ ബൈക്കിടിച്ച് അപകടം: യുവാവിനു പരിക്കേറ്റു

ചങ്ങനാശേരി: തട്ടുകടക്കു മുമ്പില്‍ റോഡിലേക്കിറക്കിവച്ച സ്‌കൂട്ടറുകളില്‍ ബൈക്കിടിച്ചുമറിഞ്ഞു. റോഡിലേക്കു തെറിച്ചുവീണ ബൈക്ക് യാത്രക്കാരനായ യുവാവിനു ഗുരുതരമായി പരിക്കേറ്റു. ഇന്നലെ രാത്രി ഒമ്പതിന് മോര്‍ക്കുളങ്ങരയ്ക്കും പാലാത്രച്ചിറക്കുമിടയിലാണ് അപകടം. വാര്‍ഡ് കൗണ്‍സിലര്‍ എത്സമ്മ ജോബ് ചങ്ങനാശേരി പോലീസില്‍ അറിയിച്ചതിനെത്തുടര്‍ന്ന് പോലീസ് എത്തിയാണ് യുവാവിനെ ചങ്ങനാശേരി ജനറല്‍ ആശുപത്രിയില്‍ പ്രവേശിപ്പിച്ചത്. ചങ്ങനാശേരി ബൈപാസിന്‍റെ പാലാത്രച്ചിറ ഭാഗത്ത് റോഡരുകില്‍ വര്‍ധിച്ചുവരുന്ന തട്ടുകടകള്‍ അപകടങ്ങള്‍ക്ക് കാരണമാകുന്നതായി പരാതിയുണ്ട്. തട്ടുകടകള്‍ക്കുമുമ്പില്‍ അലക്ഷ്യമായി പാര്‍ക്ക് ചെയ്യുന്ന വാഹനങ്ങളും വട്ടംകൂടിനില്‍ക്കുന്ന ആളുകളുമാണ് വേഗതയില്‍ റോഡിലൂടെ എത്തുന്ന വാഹനങ്ങള്‍ക്ക് അപകടഭീഷണിയാകുന്നത്. വാഹനങ്ങള്‍ക്കും കാല്‍നട സഞ്ചാരികള്‍ക്കും ബുദ്ധിമുട്ടുണ്ടാകുന്ന തരത്തിലുള്ള വഴിവാണിഭങ്ങള്‍ക്കും തട്ടുകടകള്‍ക്കുമെതിരേ പോലീസും തദ്ദേശസ്ഥാപനങ്ങളും കര്‍ശന നടപടി സ്വീകരിക്കണമെന്ന ആവശ്യം ശക്തമാണ്.

പെരുന്ന ബസ് സ്റ്റാന്‍ഡിലെ ടേക്ക് എ ബ്രേക്ക് പൂട്ടിയിട്ട് മാസങ്ങള്‍: മാര്‍ക്കറ്റിലെ കടമുറികള്‍ നാശോന്മുഖം

ചങ്ങനാശേരി: പെരുന്ന ബസ് സ്റ്റാന്‍ഡിലെ ടേക്ക് എ ബ്രേക്ക് പൂട്ടിയിട്ട് മാസങ്ങള്‍ പിന്നിടുന്നു. ബസ് സ്റ്റാന്‍ഡിലെത്തുന്ന സ്ത്രീകളടക്കം യാത്രക്കാര്‍ ദുരിതത്തിലാണ്. അറ്റകുറ്റപ്പണികള്‍ ആരംഭിച്ചെങ്കിലും അനിശ്ചിതമായി നീളുകയാണ്. ഒന്നാംനമ്പര്‍ ബസ് സ്റ്റാന്‍ഡിലും സൗകര്യങ്ങള്‍ ദുര്‍ല്ലഭമാണ്. മുനിസിപ്പല്‍ റസ്റ്റ്ഹൗസ് പൊളിച്ചുനീക്കിയിട്ട് വര്‍ഷങ്ങള്‍ പിന്നിട്ടെങ്കിലും നിര്‍മാണം ആരംഭിച്ചിട്ടില്ല. 37 വാര്‍ഡുകളിലായി നൂറുകണക്കിന് വഴിവിളക്കുകള്‍ പ്രകാശിക്കുന്നില്ല. ഒരുകോടിയോളം രൂപ മുടക്കി ഫാത്തിമാപുരത്ത് നിര്‍മിച്ച ക്രിമിറ്റോറിയം ഉപയോഗയോഗ്യമല്ല. ഒന്നരക്കോടി രൂപ മുടക്കി പെരുന്ന ബസ് സ്റ്റാന്‍ഡില്‍ നിര്‍മിച്ച ഇഎംഎസ് ഹാള്‍ നാശോന്മുഖമാണ്. ചങ്ങനാശേരി മാര്‍ക്കറ്റിലെ നഗരസഭവക കടമുറികള്‍ തകര്‍ച്ചയുടെ വക്കിലാണ്. ഇത് സംരക്ഷിക്കാന്‍ നടപടിയില്ല. മുനിസിപ്പല്‍ ടൗണ്‍ഹാളില്‍ അടിസ്ഥാന സൗകര്യങ്ങളില്ല. നഗരത്തിലെ നിരവധി റോഡുകള്‍ തകര്‍ന്നടിഞ്ഞ് സഞ്ചാരം ദുരിതമായ അവസ്ഥയിലാണ്. നഗരത്തില്‍ തെരുവ് നായ്ക്കളുടെ നിയന്ത്രണത്തിനു കാര്യക്ഷമമായ നടപടികളില്ല. നഗരസഭയുടെ അധീനതയിലുള്ള കടമുറികള്‍ ലേലംകൊണ്ടവര്‍ മറിച്ചുവിറ്റ് ലാഭം നേടുന്നതിലും ആക്ഷേപം ഉയര്‍ന്നിട്ടുണ്ട്. ഈ വിഷയങ്ങള്‍ ഉന്നയിച്ചാണ് ഇന്ന് ബിജെപിയുടെ നേതൃത്വത്തില്‍ പ്രതിഷേധം സംഘടിപ്പിച്ചിരിക്കുന്നത്.

ചങ്ങനാശേരി-ഹൈറേഞ്ച് സര്‍വീസുകള്‍ നിര്‍ത്തലാക്കുന്നു

ചങ്ങനാശേരി: ചങ്ങനാശേരി ഡിപ്പോയില്‍നിന്നു ഹൈറേഞ്ച് സെക്ടറിലേക്കുള്ള സര്‍വീസുകള്‍ റദ്ദുചെയ്യുന്നു. കഴിഞ്ഞ ഏതാനും വര്‍ഷങ്ങള്‍ക്കിടയിലാണ് അര ഡസനോളം സര്‍വീസുകള്‍ വെട്ടിക്കുറച്ചത്. രാവിലെ 9.20ന് ചങ്ങനാശേരിയില്‍നിന്നു പുറപ്പെട്ടിരുന്ന കുമളി-നെടുങ്കണ്ടം, ഉച്ചകഴിഞ്ഞ് 3.10നുള്ള മുരിക്കാശേരി ഫാസ്റ്റ് പാസഞ്ചര്‍ സര്‍വീസുകളാണ് അകാരണമായി ഏറ്റവും ഒടുവില്‍ നിര്‍ത്തലാക്കിയ സര്‍വീസുകള്‍. രാവിലെ 9.20നുള്ള സര്‍വീസ് കുമളിയിലെത്തി അവിടെനിന്നു നെടുങ്കണ്ടത്തിനു പോയിരുന്നു. കുമളിയില്‍നിന്നും ബസ് സര്‍വീസുകള്‍ കുറവുള്ള കമ്പംമെട്ട്, കരുണാപുരം, ബാലന്‍പിള്ളസിറ്റി, തൂക്കുപാലംവഴി നെടുങ്കണ്ടത്തിനു സര്‍വീസ് നടത്തിയിരുന്ന ഈ ബസിനു നല്ല കളക്‌ഷന്‍ ലഭിച്ചിരുന്നു. വിവിധ സ്‌കൂളുകളിലെ അധ്യാപകര്‍ ഉള്‍പ്പെടെ യാത്രക്കാര്‍ക്ക് ഈ സര്‍വീസ് ഉപകാരപ്പെട്ടിരുന്നു. ഈ സര്‍വീസിനു പകരം ചങ്ങനാശേരിയില്‍നിന്ന് ഉച്ചയ്ക്ക് 12.50ന് കുമളിക്കു മാത്രമായി സര്‍വീസ് ഇപ്പോള്‍ അയയ്ക്കുന്നുണ്ട്. എന്നാല്‍ ഈ സര്‍വീസിനു പറയത്തക്ക കളക്‌ഷന്‍ ലഭിക്കുന്നില്ലെന്നും ചൂണ്ടിക്കാണിക്കപ്പെടുന്നു. 3.10നുള്ള മുരിക്കാശേരി സര്‍വീസ് എന്തിനാണ് നിര്‍ത്തലാക്കിയതെന്ന് അധികൃതര്‍ക്ക് ഉത്തരമില്ല. കോവിഡ്: സര്‍വീസുകള്‍ പുനരാരംഭിച്ചില്ല കോവിഡ്കാലത്ത് നിര്‍ത്തലാക്കിയ രാവിലെ 6.10നുള്ള മുണ്ടക്കയം, 6.20നുള്ള കട്ടപ്പന, 7.30നുള്ള മുണ്ടക്കയം സര്‍വീസുകളും പുനരാരംഭിക്കുന്ന കാര്യത്തില്‍ ഡിപ്പോ അധികൃതര്‍ നിസംഗനിലപാടാണ് സ്വീകരിച്ചിരിക്കുന്നത്. രാവിലെ 8.40ന് നടത്തിയിരുന്ന കുമളി സര്‍വീസ് ആറുമാസംമുമ്പും 8.10നുള്ള മുണ്ടക്കയം സര്‍വീസ് ഒന്നരമാസം മുമ്പും നിര്‍ത്തിയിരുന്നു. കളക്‌ഷന്‍ കുറവായതിന്‍റെ പേരിലാണ് ഹൈറേഞ്ച് സര്‍വീസുകള്‍ വെട്ടിക്കുറയ്ക്കുന്നതെന്നാണ് ഡിപ്പോ അധികൃതര്‍ ചൂണ്ടിക്കാട്ടുന്നതെങ്കിലും ചില സ്വകാര്യ ബസ് സര്‍വീസുകളെ സഹായിക്കാനാണിതെന്നകാര്യം തെളിവുസഹിതം പുറത്തകൊണ്ടുവരുമെന്ന് പാസഞ്ചേഴ്‌സ് അസോസിയേഷനും യാത്രക്കാരും പറഞ്ഞു.

ഭാര്യാമാതാവിനെ യുവാവ് തലയ്ക്കടിച്ച് കൊലപ്പെടുത്തി

മുക്കൂട്ടുതറ: വെച്ചൂച്ചിറയിൽ ഭാര്യാമാതാവിനെ യുവാവ് തലയ്ക്കടിച്ച് കൊലപ്പെടുത്തി. അഴുതാ കോളനിയിലെ താമസക്കാരി ഉഷാമണി (54) യാണ് കൊല്ലപ്പെട്ടത്. സംഭവവുമായി ബന്ധപ്പെട്ട് ഉഷയുടെ മരുമകൻ സുനിലിനെ വെച്ചൂച്ചിറ പോലീസ് കസ്റ്റഡിയിലെടുത്തു. കുടുംബപ്രശ്നമാണ് തർക്കത്തിലേക്കും കൊലപാതകത്തിലേക്കും നയിച്ചതെന്നാണ് പ്രാഥമികവിവരം. മൺവെട്ടി ഉപയോഗിച്ചാണ് കൊലപാതകം നടത്തിയത്. ഇന്നലെ ഉച്ചകഴിഞ്ഞ് മൂന്നോടെയാണ് സംഭവം. എരുമേലി എലിവാലിക്കര സ്വദേശിയാണ് സുനിൽ. ഭാര്യയുമായി സുനിൽ അകന്നു കഴിയുകയായിരുന്നു. ഇരുവരും തമ്മിലുള്ള പ്രശ്നങ്ങളാണ് ഭാര്യാമാതാവിന്‍റെ കൊലപാതകത്തിലേക്ക് നയിച്ചതെന്ന് പോലീസ് പറയുന്നു. കുടുംബപ്രശ്നങ്ങളെ തുടർന്ന് സുനിലും ഭാര്യയും കഴിഞ്ഞ നാലുവർഷത്തോളമായി പിരിഞ്ഞുതാമസിക്കുകയായിരുന്നു. അമ്മ ഉഷയോടൊപ്പമാണ് ഭാര്യയും രണ്ടുമക്കളും കഴിഞ്ഞിരുന്നത്. ഇന്നലെ ഉച്ചയോടെ, കുട്ടികളെ കാണണമെന്ന ആവശ്യവുമായാണ് സുനിൽ ഉഷയുടെ വീട്ടിലെത്തിയത്. വൈകാതെ ഇരുവരും വഴക്കായി. പിന്നാലെ സുനിൽ മൺവെട്ടി ഉപയോഗിച്ച് ഉഷയുടെ തലയ്ക്കടിച്ച് കൊലപ്പെടുത്തുകയായിരുന്നു. തലയ്ക്ക് മാരകമായി മുറിവേറ്റ് രക്തം വാർന്ന് മരിച്ച നിലയിൽ വീടിന്‍റെ പരിസരത്തുതന്നെയാണ് ഉഷയുടെ മൃതദേഹം കിടന്നത്. ഇവിടെനിന്നു മാറാൻ സുനിൽ തയാറായിരുന്നില്ലെന്ന് പരിസരവാസികൾ പറയുന്നു. സ്ഥലത്തെത്തിയ പഞ്ചായത്ത് വൈസ് പ്രസിഡന്‍റ് അടക്കമുള്ള ആളുകളോട് സുനിൽ കൊലപാതകത്തെക്കുറിച്ച് ഏറ്റുപറഞ്ഞതായാണ് വിവരം. തന്‍റെ സ്വത്തുക്കൾ ഉഷാമണി കൈക്കലാക്കിയെന്നും ഇവർ മരിക്കുന്നതാണ് നല്ലതെന്നും സുനിൽ പറഞ്ഞതായി നാട്ടുകാർ പറയുന്നു. പോലീസ് എത്തിയാണ് സുനിലിനെ സംഭവസ്ഥലത്തുനിന്നു കസ്റ്റഡിയിൽ എടുത്തത്. സംഭവം നടക്കുന്ന സമയത്ത് സുനിലിന്‍റെ ഭാര്യ ജോലിക്ക് പോയിരിക്കുകയായിരുന്നു. ഇവരുടെ മക്കൾ സ്കൂളിൽ ആയിരുന്നുവെന്നും പരിസരവാസികൾ പറയുന്നു. സംഭവത്തിൽ കേസെടുത്ത് അന്വേഷണം ആരംഭിച്ചതായി വെച്ചൂച്ചിറ പോലീസ് അറിയിച്ചു.

മണര്‍കാട് ഫാമില്‍ കോഴിക്കുഞ്ഞുങ്ങളുടെ പ്രവേശനോത്സവം

കോട്ടയം: കോഴിക്കുഞ്ഞുങ്ങള്‍ക്ക് പ്രവേശനോത്സവം. പോഷകസമൃദ്ധമായ തീറ്റയും തണുപ്പില്‍ നിന്നും രക്ഷിക്കാന്‍ ചൂടും തിളപ്പിച്ചാറിയ വെള്ളവുമൊക്കെ നല്‍കി പ്രവേശന ദിവസംതന്നെ കോഴിക്കുഞ്ഞുങ്ങള്‍ ഹാപ്പി. ജില്ലാ പഞ്ചായത്തിന്‍റെ കീഴിലുള്ള മണര്‍കാട് കോഴിവളര്‍ത്തല്‍ കേന്ദ്രത്തിലെ കവാടത്തില്‍ ഇന്നലെ സ്ഥാപിച്ച ഫ്‌ളക്‌സ് ബോര്‍ഡ് ഇങ്ങനെയായിരുന്നു. പക്ഷിപ്പനി ബാധയെത്തുടര്‍ന്ന് കഴിഞ്ഞ ഒരു വര്‍ഷമായി അടച്ചിട്ട ഫാം ഇന്നലെ തുറന്നു. പ്രവേശനോത്സവ ദിവസത്തില്‍ തൊടുപുഴ കോലാനി ഫാമില്‍നിന്നും ഒരുദിവസം പ്രായമായ ഗ്രാമശ്രീ ഇനത്തില്‍പെട്ട 1372 കോഴിക്കുഞ്ഞുങ്ങളെയാണ് എത്തിച്ചത്. ബ്രൂഡിംഗ് നഴ്‌സറിയിലാണ് ഇപ്പോള്‍ കോഴിക്കുഞ്ഞുങ്ങളെ സംരക്ഷിക്കുന്നത്. 150 കോഴിക്കുഞ്ഞുങ്ങളെ ഒരു ബ്രൂഡറിലാക്കി 150 വാട്ട് കൃത്രിമ ചൂടു നല്‍കിയാണ് സംരക്ഷണം. ഇതിനൊപ്പം തീറ്റയും തിളപ്പിച്ചാറിയ വെള്ളവും നല്‍കും. ഒരു മാസം വരെ കുഞ്ഞുങ്ങളെ ഇങ്ങനെ സംരക്ഷിക്കും. 46-ാം ദിവസം ഒരു കോഴിക്ക് 130 രൂപ നിരക്കില്‍ വില്‍ക്കാന്‍ തുടങ്ങും. അടുത്ത മാസം മാതൃപിതൃ ശേഖരത്തിനായി മണ്ണുത്തി യൂണിവേഴ്സിറ്റി പൗള്‍ട്രിഫാമില്‍നിന്ന് ഒരു ദിവസം പ്രായമായ 1800 കോഴിക്കുഞ്ഞുങ്ങളെയും കൊണ്ടുവരുന്നുണ്ട്. ഫാമിന്‍റെ പ്രവര്‍ത്തനം പൂര്‍ണതോതില്‍ ആരംഭിച്ചുകഴിഞ്ഞാല്‍ സെന്‍ട്രല്‍ പൗള്‍ട്രി ഡെവലപ്മെന്‍റ് ഓര്‍ഗനൈസേഷനില്‍നിന്ന് കാവേരിയിനത്തില്‍പെട്ട കോഴികളുടെ 4000 മുട്ടകള്‍ വിരിയിക്കാനായി എത്തിക്കും. പക്ഷിപ്പനി തടയാന്‍ കൂടുതല്‍ സുരക്ഷാക്രമീകരണങ്ങളോടെയാണ് ഫാം തുറന്നിരിക്കുന്നത്.

പാരമ്പര്യം കൈവിടാതെ സംക്രാന്തി വാണിഭം

ഗാന്ധിനഗര്‍: സംക്രാന്തി ഗ്രാമത്തിന്‍റെ പാരമ്പര്യവും പഴമയും വിളിച്ചറിയിച്ച സംക്രമവാണിഭത്തില്‍ തലമുറകള്‍ സംഗമിച്ചു. ഒപ്പം സംക്രാന്തി വിളക്കമ്പലത്തില്‍ കര്‍ക്കിടക സംക്രമ ഉത്സവവും ഇന്നലെ നടന്നു. കുമാരനല്ലൂര്‍ ഊരാണ്മ ദേവസ്വത്തിന്‍റെയും സാമൂഹിക സാംസ്‌കാരിക സംഘടനകളുടെയും സഹകരണത്തോടെ നഗരസഭയുടെ നേതൃത്വത്തിലായിരുന്നു വാണിഭം. കാര്‍ഷിക പണിയായുധങ്ങള്‍, ഫര്‍ണിച്ചര്‍, മണ്‍ചട്ടികള്‍, ഇരുമ്പ് സാധനങ്ങള്‍ തുടങ്ങി കാലം മറന്നുകൊണ്ടിരിക്കുന്ന ഒട്ടേറെ സാമഗ്രികള്‍ ഇന്നലെ വില്‍ക്കാനുണ്ടായിരുന്നു. ഈറ്റകൊണ്ടുള്ള മീന്‍കൂട, വാലന്‍ കുട്ട, വട്ടക്കുട്ട, ചോറ്റുകുട്ട, മുറം, ഭരണി, തഴപ്പായ, കുട്ട, വട്ടി, തവി, കോടാലിക്കൈ, പായ തുടങ്ങിയവയുമായി വിവിധ പ്രദേശങ്ങളില്‍ നിന്നുള്ള കച്ചവടക്കാരും കുലത്തൊഴിലാളികളും അണിനിരന്നു. കാര്‍ഷിക ഉപകരണങ്ങളായ തൂമ്പ, വാക്കത്തി, അരിവാള്‍, ഇരുമ്പ് ഉപകരണങ്ങള്‍, കോടാലിക്കൈ തുടങ്ങിയവയും വഴിയോര വാണിഭത്തില്‍ നിരന്നു.

പാക്കില്‍ വാണിഭത്തിന് ഇന്നു തുടക്കം

പഴമയുടെയും ഗൃഹാതുരത്വത്തിന്‍റെയും ഓര്‍മകളുണര്‍ത്തി പാക്കില്‍ വാണിഭത്തിന് ഇന്നു തുടക്കം. കര്‍ക്കിടകം ഒന്നു മുതല്‍ ചിങ്ങം വരെ നീളുന്ന പാക്കില്‍ വാണിഭമേള കാര്‍ഷികപ്പെരുമയുടെ ഉത്സവംകൂടിയാണ്. ചിങ്ങവനത്തിനു സമീപം പാക്കില്‍ ധര്‍മശാസ്താ ക്ഷേത്ര മൈതാനത്താണ് നാട്ടുചന്ത പഴമ തെറ്റാതെ നടക്കുന്നത്. ഈ വാണിഭത്തിനു പിന്നില്‍ ഒരു ഐതിഹ്യം നിലനില്ക്കുന്നതായി പഴമക്കാര്‍ പറയുന്നു. പാക്കില്‍ ക്ഷേത്രത്തില്‍ പരശുരാമന്‍ വിഗ്രഹം പ്രതിഷ്ഠിക്കാന്‍ ശ്രമിച്ചിട്ടും ഉറപ്പിക്കാനായില്ലെന്നും അപ്പോള്‍ അതുവഴി മുറം വില്‍ക്കാനെത്തിയ പാക്കനാര്‍ വിഗ്രഹം പിടിച്ചുറപ്പിച്ചുവെന്നുമാണ് ഐതിഹ്യം. ഇവിടെ പാര്‍ക്ക് എന്നു പറഞ്ഞാണ് പാക്കനാര്‍ വിഗ്രഹമുറപ്പിച്ചതത്രെ. എല്ലാ വര്‍ഷവും കര്‍ക്കിടകം ഒന്ന് മുതല്‍ ഇവിടെ മുറം വില്‍ക്കാന്‍ പരശുരാമന്‍ പാക്കനാര്‍ക്ക് അനുമതിയും നല്‍കിയത്രെ. അങ്ങനെ അവിടം പാക്കിലായി പരിണമിച്ചു. പാക്കനാരുടെ പിന്‍മുറക്കാര്‍ എത്തി തിരിതെളിച്ചാണ് പാക്കില്‍ വാണിഭം എല്ലാ വര്‍ഷവും ആരംഭിക്കുക. ഈറ്റ ഉത്പന്നങ്ങള്‍ ക്ഷേത്രത്തില്‍ സമര്‍പ്പിച്ച ശേഷമാണ് വാണിഭത്തിന് തുടക്കമാവുക. മുന്‍കാലങ്ങളില്‍ മധ്യതിരുവിതാംകൂറിലെ ഏറ്റവും വലിയ തുറന്ന വിപണിയായിരുന്നു പാക്കില്‍ സംക്രമ വാണിഭം. എല്ലാത്തരം വീട്ടുപകരണങ്ങളും സ്റ്റാളുകളില്‍ വാങ്ങാനുണ്ടാവും. ഉരല്‍, ഉലക്ക, അമ്മിക്കല്ല്, അരകല്ല്, ആട്ടുകല്ല്, കല്‍ചട്ടി, മണ്‍ചട്ടി, തൈര് കടഞ്ഞ് വെണ്ണയെടുക്കുന്ന മത്ത്, ചോറ് വാര്‍ക്കുന്ന തടിപ്പലക, നാഴി, ഇടങ്ങഴി, പറ, നെല്ല് ഉണക്കുന്ന ചിക്കുപായ, കിടക്കപ്പായ, വിശറി, ചാരുകസേര, അരകല്ല് തുടങ്ങിവയ്ക്കു പുറമെ ഫര്‍ണിച്ചറുകളും ഇവിടെയുണ്ടാകും. ഇവിടെ ലഭിക്കുന്ന നാടന്‍ കുടംപുളിക്ക് ആവശ്യക്കാര്‍ ഏറെയാണ്. അവില്‍, മലര്, നാടന്‍കുത്തരി, പച്ചരി, കരിപ്പട്ടി, ശര്‍ക്കര, പഞ്ഞപ്പുല്ല്, കൂവപ്പൊടി എന്നിവയും വാങ്ങാം. നാടന്‍ വിത്തിനങ്ങളും കാര്‍ഷികോപകരണങ്ങളും സ്റ്റാളുകളില്‍ ലഭ്യമാണ്. കാലം മാറിയതോടെ വസ്ത്രം മുതല്‍ മൊബൈല്‍ വരെ വിറ്റഴിയുന്നു. കുടുംബശ്രീ, കൃഷിഭവന്‍, തൊഴിലുറപ്പ് വിഭാഗങ്ങളുടെയും സ്റ്റാളുകളുമുണ്ടാകും.

പരിക്കേറ്റ വീട്ടമ്മയെ ആംബുലൻസിൽനിന്ന് ഇറക്കിവിട്ടതായി പരാതി

എരുമേലി: പുല്ലരിവാൾ കൈയിൽ കൊണ്ട് ഞരമ്പ് മുറിഞ്ഞ വീട്ടമ്മയെ 108 ആംബുലൻസിൽ കയറ്റാതെ ഇറക്കിവിട്ടെന്ന് പരാതി. വെച്ചൂച്ചിറയിലെ സ്വകാര്യ ആശുപത്രിയിൽ പ്രാഥമിക ചികിത്സയ്ക്കുശേഷം കോട്ടയം മെഡിക്കൽ കോളജിൽ എത്തിക്കുന്നതിന് ആംബുലൻസ് എത്തിച്ചപ്പോഴാണ് വീട്ടമ്മയെ കൊണ്ടുപോകാതെ ആംബുലൻസ് മടങ്ങിപ്പോയത്. വീട്ടമ്മയെ ആംബുലൻസിൽനിന്നിറക്കി വിടുന്നതിന്‍റെ ദൃശ്യങ്ങൾ സമൂഹ മാധ്യമങ്ങളിൽ പ്രചരിച്ചതോടെ പ്രതിഷേധം വ്യാപകമായി. ഒടുവിൽ ബൈക്കിൽ ഒരാളുടെ പിന്നിലിരുന്ന് മെഡിക്കൽ കോളജിലെത്തിയ വീട്ടമ്മയ്ക്ക് അടിയന്തര പ്ലാസ്റ്റിക് സർജറി വേണ്ടിവന്നു. സംഭവത്തിൽ ആരോഗ്യ മന്ത്രി ഇടപെട്ട് അന്വേഷണം നടത്തി നടപടി സ്വീകരിക്കണമെന്ന് ആവശ്യമുയർന്നു. കഴിഞ്ഞ ദിവസം വെച്ചൂച്ചിറ ബിഎംസി ആശുപത്രിയിലാണ് സംഭവം. പ്രാഥമിക ചികിത്സ നൽകിയ ശേഷം ഓപ്പറേഷൻ വേണ്ടിവരുമെന്നതിനാൽ കോട്ടയം മെഡിക്കൽ കോളജിൽ എത്തിക്കാൻ 108 ആംബുലൻസിൽ രോഗിയെ കയറ്റിയെങ്കിലും കൊണ്ടുപോകാൻ ഡ്രൈവറും മെയിൽ നഴ്‌സും വിസമ്മതിച്ചെന്ന് ഡോ. മനു പറയുന്നു. ഡ്യൂട്ടി ഷിഫ്റ്റ്‌ ചെയ്ഞ്ച് ചെയ്യുന്നതുമൂലം രോഗിയെ കൊണ്ടുപോകാനാവില്ലെന്ന് പറഞ്ഞ് നിർധനയായ വീട്ടമ്മയെ ഇവർ ഇറക്കി വിടുകയായിരുന്നുവെന്നാണ് പരാതി. ഒടുവിൽ ഭർത്താവ് തന്‍റെ ബൈക്കിൽ വീട്ടമ്മയെ കയറ്റി കോട്ടയം മെഡിക്കൽ കോളജിൽ എത്തിക്കുകയായിരുന്നു. സംഭവം സബന്ധിച്ച് ആരോഗ്യ മന്ത്രിക്ക് നാട്ടുകാർ പരാതി നൽകിയിട്ടുണ്ട്.

കോട്ടയത്തെ പഠന നഗരമാക്കാന്‍ യുനെസ്‌കോയ്ക്ക് അപേക്ഷ സമര്‍പ്പിച്ചു

കോട്ടയം: ഐക്യരാഷ്‌ട്ര വിദ്യാഭ്യാസ ശാസ്ത്രീയ സാംസ്‌കാരിക സംഘടനയായ യുനെസ്‌കോയുടെ ലോക പഠന നഗര ശൃംഖലയില്‍ കോട്ടയം നഗരത്തെ ഉള്‍പ്പെടുത്താന്‍ കേന്ദ്ര മാനവ വിഭവശേഷി വികസന മന്ത്രാലയം അപേക്ഷ സമര്‍പ്പിച്ചതായി ഫ്രാന്‍സിസ് ജോര്‍ജ് എംപി അറിയിച്ചു. കോട്ടയം നഗരസഭയാണ് കേന്ദ്ര മാനവ വിഭവശേഷി മന്ത്രാലയത്തിന് ഇത് സംബന്ധിച്ച അപേക്ഷ നല്‍കിയത്. ആജീവനാന്ത പഠനത്തെ പ്രോത്സാഹിപ്പിക്കുന്ന പ്രവര്‍ത്തനങ്ങള്‍, വിദ്യാഭ്യാസ, സാമൂഹ്യ സാംസ്‌കാരിക രംഗത്തെ നേട്ടങ്ങള്‍, പ്രസിദ്ധീകരണങ്ങള്‍ എന്നിവയെല്ലാം വിലയിരുത്തിയാണ് പഠന നഗരമെന്ന ശ്രേണിയില്‍ യുനെസ്‌കോ നഗരങ്ങള്‍ക്ക് പ്രത്യേക പദവി നല്‍കി ഉള്‍പ്പെടുത്തുന്നത്. 100 ശതമാനം സാക്ഷരത നേടിയ ഇന്ത്യയിലെ ആദ്യത്തെ നഗരമായ കോട്ടയം അക്ഷരനഗരി എന്ന പേരില്‍ അറിയപ്പെടുന്നു. മലയാളത്തിലെ ആദ്യ പത്രമായ ദീപികയ്ക്കു തുടക്കം കുറിച്ച നഗരം, ആദ്യത്തെ ഇംഗ്ലീഷ് സ്‌കൂള്‍, എഴുത്തുകാരെ പ്രോത്സാഹിപ്പിക്കുന്നതിനായി രൂപീകരിച്ച സാഹിത്യ പ്രവര്‍ത്തക സഹകരണ സംഘം, അക്ഷര മ്യൂസിയം എന്നിവയെ സംബന്ധിച്ചുള്ള വിവരങ്ങള്‍ അപേക്ഷയില്‍ ചേര്‍ത്തിട്ടുണ്ട്. കോട്ടയത്തെ പുരാതന ദേവാലയങ്ങള്‍, നവോത്ഥാന നായകന്മാര്‍, യൂണിവേഴ്‌സിറ്റി, കോളജുകള്‍, സ്‌കൂളുകള്‍ എന്നിവയെക്കുറിച്ചും അപേക്ഷയില്‍ ഉള്‍ക്കൊള്ളിച്ചിട്ടുണ്ട്. യുനെസ്‌കോ അംഗീകരിച്ച കൂടിയാട്ടം, മുടിയാട്ടം എന്നീ അനുഷ്ഠാനകലകളെക്കുറിച്ചുള്ള വിവരങ്ങളും ചേര്‍ത്തിട്ടുണ്ട്. അപേക്ഷ വിലയിരുത്തിയതിനുശേഷം യുനെസ്‌കോ തീരുമാനം കൈക്കൊള്ളുമെന്ന് ഫ്രാന്‍സിസ് ജോര്‍ജ് എംപി അറിയിച്ചു.

പോളിസി നിരസിച്ചിട്ടും പണം മടക്കിനല്‍കിയില്ല; ഇന്‍ഷ്വറന്‍സ് കന്പനിക്ക് പിഴ

കോട്ടയം: പ്രീമിയം അടച്ച് ആരോഗ്യ ഇന്‍ഷ്വറന്‍സ് എടുത്തയാളുടെ പോളിസി നിരസിച്ചിട്ടും പണം മടക്കിനല്‍കുന്നതില്‍ വീഴ്ച വരുത്തിയ ഇന്‍ഷ്വറന്‍സ് കന്പനിയോടു പ്രീമിയം തുക പലിശ സഹിതം തിരിച്ചുനല്‍കാനും നഷ്ടപരിഹാരത്തിനും ഉത്തരവിട്ട് ജില്ലാ ഉപഭോക്തൃ തര്‍ക്കപരിഹാര കമ്മീഷന്‍. മുട്ടമ്പലം സ്വദേശി എസ്.പി. മത്തായി സ്റ്റാര്‍ ഹെല്‍ത്ത് ആന്‍ഡ് അലൈഡ് ഇന്‍ഷ്വറന്‍സ് കമ്പനിയില്‍നിന്ന് 1,26,381 രൂപ പ്രീമിയം അടച്ച് 2024 സെപ്റ്റംബര്‍ രണ്ടിനാണ് ആരോഗ്യ ഇന്‍ഷ്വറന്‍സ് പോളിസി വാങ്ങിയത്. പ്രൊപ്പോസല്‍ ഫോം നിരസിച്ചതിനെത്തുടര്‍ന്ന് 15 ദിവസത്തിനകം തുക ബാങ്ക് അക്കൗണ്ടിലേക്ക് മടക്കിനല്‍കുമെന്ന് പറഞ്ഞെങ്കിലും ലഭിച്ചില്ല. തുക അക്കൗണ്ടിലേക്ക് ഇട്ടുകൊടുത്തതായാണ് ഇന്‍ഷ്വറന്‍സ് കമ്പനി അറിയിച്ചത്. തുക ലഭിക്കാതെ വന്നതോടെ മത്തായി കോട്ടയം ഉപഭോക്തൃ തര്‍ക്കപരിഹാര കമ്മിഷനെ സമീപിക്കുകയായിരുന്നു. അക്കൗണ്ടിലേക്ക് തുക വന്നിട്ടുണ്ടോ എന്നു പരിശോധിക്കാന്‍ പരാതിക്കാരന്‍റെ ബാങ്ക് സ്റ്റേറ്റ്‌മെന്‍റ് വേണമെന്ന് ഇന്‍ഷ്വറന്‍സ് കമ്പനി ആവശ്യപ്പെട്ടിരുന്നു. ഇടപാടുരേഖകള്‍ സൂക്ഷിക്കേണ്ടത് ഇന്‍ഷ്വറന്‍സ് കമ്പനിയുടെ ഉത്തരവാദിത്വമാണെന്നും പരാതിക്കാരന്‍റെ ബാങ്ക് സ്റ്റേറ്റ്‌മെന്‍റ് ആവശ്യപ്പെടുന്നത് ഇന്‍ഷ്വറന്‍സ് കമ്പനിയുടെ ഭാഗത്തുനിന്നുള്ള അശ്രദ്ധയുടെ ഉദാഹരണമാണെന്നും കമ്മീഷന്‍ അഭിപ്രായപ്പെട്ടു. ഇന്‍ഷ്വറന്‍സ് പ്രീമിയവും 2024 സെപ്റ്റംബര്‍ രണ്ടുമുതല്‍ 2025 ജനുവരി 30 വരെ 9 ശതമാനം നിരക്കില്‍ പലിശയും നല്‍കാനാണ് അഡ്വ. വി.എസ്. മനുലാല്‍ പ്രസിഡന്‍റായും അഡ്വ. ആര്‍. ബിന്ദു, കെ.എം. ആന്‍റോ എന്നിവര്‍ അംഗങ്ങളുമായുള്ള ഉപഭോക്തൃ തര്‍ക്കപരിഹാര കമ്മീഷന്‍ വിധിച്ചത്. സേവന ന്യൂനതയ്ക്ക് നഷ്ടപരിഹാരമായി 35,000 രൂപയും നല്‍കണം.

ഷോൺ ജോർജിന് സ്വീകരണം നൽകി

പൂഞ്ഞാർ: ബിജെപി സംസ്ഥാന വൈസ് പ്രസിഡന്‍റായി നിയോഗിക്കപ്പെട്ട ഷോൺ ജോർജിനു പൂഞ്ഞാറിൽ ഉജ്വല വരവേൽപ്പ്. വൈസ് പ്രസിഡന്‍റായി ചുമതലയേറ്റശേഷം ആദ്യമായി പൂഞ്ഞാറിലെത്തിയ ഷോൺ ജോർജിനെ പനച്ചിപ്പാറ ടൗണിൽ നൂറുകണക്കിന് പ്രവർത്തകർ ചേർന്ന് ഹാരാർപ്പണം ചെയ്തു സ്വീകരിച്ചു. തുടർന്ന് പുതിയ പഞ്ചായത്ത്‌ കമ്മിറ്റി ഓഫീസിലേക്ക് ആനയിച്ചു. പഞ്ചായത്ത്‌ കമ്മിറ്റി ഓഫീസിന്‍റെ ഉദ്ഘാടനം ബിജെപി ദേശീയ നിർവാഹക സമിതിയംഗം പി.സി. ജോർജ് നിർവഹിച്ചു. പഞ്ചായത്ത്‌ കമ്മിറ്റി പ്രസിഡന്‍റ് ജി. ഗോപകുമാർ അധ്യക്ഷത വഹിച്ചു. മണ്ഡലം പ്രസിഡന്‍റ് ജോ ജിയോ ജോസഫ്, ജനറൽ സെക്രട്ടറി എം.എസ്. ശ്രീകാന്ത്, ടോമി ഈറ്റത്തോട്, മധു കാലായിൽ, അനിയമ്മ സണ്ണി, ലെൽസ് ജേക്കബ്, ബേബിച്ചൻ ആലക്കപ്പറമ്പിൽ, ജിനോയ് കടപ്ലാക്കൽ തുടങ്ങിയവർ നേതൃത്വം നൽകി.

പ്രതിപക്ഷ കൗൺസിലർമാരുടെ വാര്‍ഡുകളോട് വിവേചനം; യുഡിഎഫ് പ്രതിഷേധ ധര്‍ണ നടത്തി

പാലാ: പാലാ നഗരസഭാ ഭരണസമിതിയുടെ കെടുകാര്യസ്ഥതയ്ക്കും പ്രതിപക്ഷ കൗണ്‍സിലര്‍മാരുടെ വാര്‍ഡുകളോടുള്ള വിവേചനത്തിനുമെതിരേ നഗരസഭാ യുഡിഎഫ് പാര്‍ലമെന്‍ററി പാര്‍ട്ടി നഗരസഭാ ഓഫീസ് പടിക്കല്‍ പ്രതിഷേധ ധര്‍ണ സംഘടിപ്പിച്ചു. പാലാ നഗരസഭയിലെ ദുര്‍ഭരണം 2025ലെ തെരഞ്ഞെടുപ്പോടെ അവസാനിക്കുമെന്ന് ധര്‍ണ ഉദ്ഘാടനം ചെയ്ത കെപിസിസി നിര്‍വാഹക സമിതി അംഗം അഡ്വ. ടോമി കല്ലാനി പറഞ്ഞു. പ്രതിപക്ഷ കൗണ്‍സിലറായ ആനി ബിജോയ് പ്രതിനിധീകരിക്കുന്ന 16-ാം വാര്‍ഡില്‍ അങ്കണവാടിക്ക് അനുയോജ്യമായ മൂന്ന് സെന്‍റ് സ്ഥലം സൗജന്യമായി വിട്ടുകിട്ടിയിട്ടും അവിടെ നിര്‍മാണത്തിന് ആവശ്യമായ ഫണ്ട് അനുവദിച്ചില്ല. എന്നാല്‍ ഭരണക്ഷി കൗണ്‍സിലറുടെ 24-ാം വാര്‍ഡില്‍ സ്ഥലം പോലുമില്ലാത്ത അങ്കണവാടി കെട്ടിടനിര്‍മാണത്തിന് 20 ലക്ഷം രൂപ അനുവദിച്ചു.വിവിധ സര്‍ക്കാര്‍ വകുപ്പുകള്‍ ആശുപത്രി കെട്ടിടത്തിന്‍റെ അപകടാവസ്ഥ കാണിച്ചു പുറത്തുവിട്ട റിപ്പോര്‍ട്ട് പൂഴ്ത്തി വച്ചിരിക്കുന്ന നഗരസഭ ജനങ്ങളുടെ ജീവനും സ്വത്തിനും വെല്ലുവിളി ഉയര്‍ത്തുകയാണെന്നും നേതാക്കള്‍ പറഞ്ഞു. യോഗത്തില്‍ യുഡിഎഫ് പാര്‍ലമെന്‍ററി പാര്‍ട്ടി നേതാവും പ്രതിപക്ഷ നേതാവുമായ പ്രഫ. സതീശ് ചൊള്ളാനി അധ്യക്ഷത വഹിച്ചു. എന്‍. സുരേഷ്, ജോര്‍ജ് പുളിങ്കാട്, ചാക്കോ തോമസ്, സന്തോഷ് മണര്‍കാട്ട്, സാബു ഏബ്രഹാം, ജോഷി വട്ടക്കുന്നേല്‍, തോമസുകുട്ടി നെച്ചിക്കാട്ട്, ആനി ബിജോയി, വി.സി. പ്രിന്‍സ്, മായ രാഹുല്‍, ഷോജി ഗോപി, ടോം നല്ലനിരപ്പേല്‍, ലിജി ബിജു, പി.എന്‍.ആര്‍. രാഹുല്‍, ജിമ്മി ജോസഫ്, ജോസഫ് പുളിക്കന്‍, ടോണി തൈപ്പറമ്പില്‍ തുടങ്ങിയവര്‍ പ്രസംഗിച്ചു.

ഭരണസ്വാധീനം ഉപയോഗിച്ച് വികസനത്തെ തടസപ്പെടുത്തുന്നു: മാണി സി. കാപ്പന്‍ എംഎൽഎ

പാലാ: കളരിയാമ്മാക്കല്‍ പാലവും അമിനിറ്റി സെന്‍ററും കെഎസ്ആര്‍ടിസി കെട്ടിടവും നെല്ലിയാനിയിലെ മിനി സിവില്‍ സ്റ്റേഷനും മുത്തോലിയിലെ കാറ്ററിംഗ് കോളജും ഉള്‍പ്പെടെയുള്ളവ പൂര്‍ത്തീകരിക്കാനുള്ള തന്‍റെ ശ്രമങ്ങളെ അട്ടിമറിച്ചത് ഭരണസ്വാധീനം ഉപയോഗിച്ചാണെന്ന് മാണി സി. കാപ്പന്‍ എംഎല്‍എ ആരോപിച്ചു. പരാജയപ്പെട്ടതിന് വികസന പ്രവര്‍ത്തനങ്ങളെ അട്ടിമറിക്കുന്ന സമീപനം ജോസ് കെ. മാണി ഉപേക്ഷിക്കണം. മുനിസിപ്പല്‍ സ്റ്റേഡിയം നവീകരണത്തിന് എംഎല്‍എയുടെ ബജറ്റ് നിര്‍ദേശാനുസരണം പണം അനുവദിച്ചതറിയാതെ നവകേരള സദസിന് പാലായിലെത്തിയ മുഖ്യമന്ത്രിക്ക് നിവേദനം സമര്‍പ്പിച്ച് അപഹാസ്യരായവര്‍ താൻ കൊടുത്ത കത്തിലൂടെയാണ് മുനിസിപ്പല്‍ സ്റ്റേഡിയം യാഥാര്‍ഥ്യമായതെന്ന വാദം ഉയര്‍ത്തുന്നത് ബാലിശമാണ്. തനിക്കെതിരേയും താന്‍ കൊണ്ടുവരുന്ന പദ്ധതികള്‍ക്കെതിരേയും തടസങ്ങള്‍ സൃഷ്ടിക്കുകയും കോടതിയില്‍ കേസ് കൊടുപ്പിക്കുകയും തനിക്കെതിരേ പരസ്യ ബോര്‍ഡുകളും സോഷ്യല്‍ മീഡിയ പ്രചാരണങ്ങളും നടത്തുകയും ചെയ്യുന്ന രീതി ഇനിയെങ്കിലും അവസാനിപ്പിച്ച് നാടിന്‍റെ വികസനത്തിന് സഹകരിക്കുകയാണ് വേണ്ടതെന്നും മാണി സി. കാപ്പന്‍ പറഞ്ഞു.

വാളികുളത്തെ പന്നിഫാമിനെതിരേ നടപടി സ്വീകരിക്കാന്‍ നിര്‍ദേശം

കടനാട്: നാട്ടുകാരുടെ പരാതിയെത്തുടര്‍ന്ന് കടനാട് പഞ്ചായത്തിലെ വാളികുളത്ത് പ്രവര്‍ത്തിച്ചുകൊണ്ടിരുന്ന അനധികൃത പന്നിഫാം പാലാ ആര്‍ഡിഒ ദീപ സന്ദര്‍ശിച്ചു. നിര്‍ദേശങ്ങള്‍ പാലിക്കാതെയും ലൈസന്‍സില്ലാതെയും പ്രവര്‍ത്തിക്കുന്ന പന്നിഫാമിനെതിരേ നടപടിയെടുക്കുവാന്‍ പഞ്ചായത്ത് പ്രസിഡന്‍റിനെയും സെക്രട്ടറിയെയും ചുമതലപ്പെടുത്തി. ബിജെപിയുടെ നേതൃത്വത്തില്‍ അനധികൃത ഫാമിനെതിരായി മാസങ്ങളായി സമരം നടന്നുകൊണ്ടിരിക്കുകയായിരുന്നു. ആര്‍ഡിഒ എത്തിയപ്പോള്‍ ഉടമ ഗേറ്റ് താഴിട്ടു പൂട്ടിയിരുന്നു. അര മണിക്കൂറോളം കാത്തിരുന്നതിന് ശേഷമാണ് ഗേറ്റ് തുറന്ന് അകത്തു കടക്കാനായത്. ‌നാട്ടുകാരായ നൂറുകണക്കിനാളുകള്‍ പരാതികളുമായി ആര്‍ഡിഒയ്ക്ക് അടുത്തെത്തി. ദുര്‍ഗന്ധം മൂലം സമീപവാസികള്‍ക്ക് ഇവിടെ ജീവിക്കുവാനോ ഭക്ഷണം കഴിക്കാനോ കഴിയാത്ത സാഹചര്യമാണ് നിലവിലുള്ളത്. ഫാമിലെ വെള്ളം ഒഴുകി സമീപത്തെ കിണറുകളിലും എത്തുന്നുണ്ട്. ഇതിനാല്‍ വെള്ളത്തിനും ദുര്‍ഗന്ധമാണ്. പന്നിഫാം പ്രവര്‍ത്തിക്കണമെങ്കില്‍ ബയോഗ്യാസ് പ്ലാന്‍റ് നിര്‍മിക്കണം എന്ന കര്‍ശന മാനദണ്ഡമാണുള്ളത്. ഫാമില്‍നിന്നു മലിനജലം ഒഴുകുന്നതിന് ചുടുകട്ടകള്‍ ഉപയോഗിച്ച് കാനകള്‍ തീര്‍ക്കണം. കാനകള്‍ക്ക് മുകളില്‍ ചെറിയ സ്ലാബുകളിട്ട് മൂടുകയും വേണം. ഗ്യാസ് പ്ലാന്‍റില്‍നിന്ന് ഓവര്‍ഫ്ളോ വരുന്ന സ്ലറി മറ്റൊരു ടാങ്കിലേക്ക് എത്തിക്കുകയും ചെയ്യണം. ബയോഗ്യാസ് പ്ലാന്‍റ് ഉപയോഗ യോഗ്യവുമാക്കണം. ഫുഡ് വേസ്റ്റ് സൂക്ഷിക്കുന്ന ടാങ്കിനും മൂടികള്‍ വേണം എന്നിങ്ങനെയുള്ള മാനദണ്ഡങ്ങള്‍ പാലിക്കാതെയാണ് പന്നിഫാം പ്രവര്‍ത്തിക്കുന്നതെന്ന് ആര്‍ഡിഒ കണ്ടെത്തി. നൂറോളം പന്നികള്‍ ഉണ്ടായിരുന്ന ഫാമില്‍നിന്നു രാത്രി പന്നികളെ ഉടമ മാറ്റിയിരുന്നെന്നും നാട്ടുകാര്‍ പറയുന്നു. ആര്‍ഡിഒ എത്തിയപ്പോള്‍ പത്തു പന്നികള്‍ മാത്രമേ ഫാമില്‍ ഉണ്ടായിരുന്നുള്ളൂ. ലൈസന്‍സില്ലാതെ പ്രവര്‍ത്തിക്കുന്ന ഫാം നിര്‍ത്തലാക്കാന്‍ പഞ്ചായത്ത് കമ്മിറ്റി ഐകകണ്ഠ്യേന തീരുമാനമെടുത്തിരുന്നു. അതിന്‍റെ അടിസ്ഥാനത്തില്‍ രണ്ടു തവണ സ്റ്റോപ്പ് മെമ്മോയും കൊടുത്തിരുന്നു. പഞ്ചായത്ത് കമ്മിറ്റിയിലെടുത്ത തീരുമാനത്തിന്‍റെ ഭാഗമായാണ് ആര്‍ഡിഒ സ്ഥലത്തെത്തിയതെന്ന് പഞ്ചായത്ത് പ്രസിഡന്‍റ് ജിജി തമ്പി പറഞ്ഞു.

കിടങ്ങൂരിൽ‍ ബഡ്സ് റീഹാബിലിറ്റേഷന്‍ സെന്‍റര്‍ ഉദ്ഘാടനം ചെയ്തു

കിടങ്ങൂര്‍: കിടങ്ങൂർ പഞ്ചായത്തിലെ കുമ്മണ്ണൂരില്‍ ബഡ്സ് റീഹാബിലിറ്റേഷന്‍ സെന്‍റര്‍ ആരംഭിച്ചു. ജില്ലയിലെ ആറാമത്തെയും പാമ്പാടി ബ്ലോക്ക് പഞ്ചായത്തിലെ ആദ്യത്തേതുമായ ബഡ്സ് റീഹാബിലിറ്റേഷന്‍ സെന്‍ററാണ് കിടങ്ങൂരില്‍ പ്രവര്‍ത്തനം ആരംഭിച്ചത്. കുമ്മണ്ണൂര്‍ അപ്പാരല്‍ പാര്‍ക്കിനു സമീപം പഞ്ചായത്തിന്‍റെ സ്ഥലത്ത് നിര്‍മിച്ച സെന്‍ററിന്‍റെ നടത്തിപ്പിനായി ഒരു ട്രെയിനറെയും സഹായിയെയും നിയമിച്ചിട്ടുണ്ട്. രാവിലെ പത്തുമുതല്‍ വൈകുന്നേരം നാലുവരെയാണ് സെന്‍ററിന്‍റെ പ്രവര്‍ത്തനം. കുട്ടികളുടെ യാത്രാസൗകര്യത്തിനായി പഞ്ചായത്തിന്‍റെ നേതൃത്വത്തില്‍ വാഹനസൗകര്യവും ഒരുക്കും. ജില്ലാ പഞ്ചായത്ത് പ്രസിഡന്‍റ് ഹേമലത പ്രേംസാഗര്‍ ബഡ്സ് റീഹാബിലിറ്റേഷന്‍ സെന്‍റര്‍ ഉദ്ഘാടനം ചെയ്തു. പഞ്ചായത്ത് പ്രസിഡന്‍റ് ഇ.എം. ബിനു അധ്യക്ഷത വഹിച്ചു. പാമ്പാടി ബ്ലോക്ക് പഞ്ചായത്ത് പ്രസിഡന്‍റ് ബെറ്റി റോയി മണിയങ്ങാട്ട് മുഖ്യപ്രഭാഷണം നടത്തി. ജില്ലാ പഞ്ചായത്തംഗം ജോസ്‌മോന്‍ മുണ്ടയ്ക്കല്‍ താക്കോല്‍ദാനവും ഉപകരണങ്ങള്‍ കൈമാറലും നടത്തി. ജില്ലാ പഞ്ചായത്തിന്‍റെ 2021-22 വര്‍ഷത്തെ പദ്ധതിവിഹിതം 20 ലക്ഷം രൂപയും പഞ്ചായത്ത് വിഹിതം അഞ്ചു ലക്ഷം രൂപയും 2023-24 വര്‍ഷത്തെ ബ്ലോക്ക് പഞ്ചായത്ത് വിഹിതം അഞ്ചു ലക്ഷം രൂപയും കുടുംബശ്രീ ജില്ലാ മിഷന്‍റെ ആദ്യഗഡു തുകയും ഉപയോഗിച്ചാണ് സെന്‍ററിന്‍റെ നിര്‍മാണം പൂര്‍ത്തീകരിച്ചത്. ഫര്‍ണിച്ചറും പ്രവര്‍ത്തനത്തിന് ആവശ്യമായ സാധനങ്ങളും വാങ്ങാനാണ് കുടുംബശ്രീ ജില്ലാ മിഷന്‍ വഴി അനുവദിച്ച ആദ്യ ഗഡുവായ 12.50 ലക്ഷം രൂപ വിനിയോഗിക്കുന്നത്.

കുഴിയില്‍ വീണ ഓട്ടോയില്‍നിന്നു ഡ്രൈവര്‍ റോഡില്‍ വീണു; നിയന്ത്രണംവിട്ട ഓട്ടോ മതിലും ഗേറ്റും തകര്‍ത്തു

കൊല്ലപ്പള്ളി: റോഡിലെ കുഴിയില്‍ വീണ ഓട്ടോയില്‍നിന്നു തെറിച്ച് ഡ്രൈവര്‍ റോഡില്‍ വീണു. നിയന്ത്രണം വിട്ട് 20 മീറ്ററോളം തനിയെ ഓടിയ ഓട്ടോറിക്ഷ വീടിന്‍റെ മതിലും ഗേറ്റും തകര്‍ത്തു. കൊല്ലപ്പള്ളി-മേലുകാവ് റോഡില്‍ കടനാട് പുളിഞ്ചുവട് കവലയ്ക്കു സമീപം ചൊവ്വാഴ്ച രാത്രി ഒന്‍പതിനായിരുന്നു അപകടം. പാലാ സ്വദേശികള്‍ സഞ്ചരിച്ച ഓട്ടോറിക്ഷയാണ് അപകടത്തില്‍പ്പെട്ടത്. ഇരുവരും നിസാര പരിക്കുകളോടെ രക്ഷപ്പെട്ടു. കൊരട്ടിയില്‍ ബേബിയുടെ വീടിന്‍റെ ഗേറ്റാണ് തകര്‍ന്നത്. ഈ റോഡില്‍ ഇത്തരം ചതിക്കുഴികള്‍ ഏറെയാണ്. ഈ കുഴിയില്‍ വീണ് മറ്റൊരു കാര്‍ ഏതാനും ദിവസം മുമ്പ് അപകടത്തില്‍പ്പെട്ടിരുന്നു. വാളികുളം, താബോര്‍ ജംഗ്ഷന്‍, എലിവാലി പള്ളിഭാഗം, കുറുമണ്ണ് തുടങ്ങിയ സ്ഥലങ്ങളിലെല്ലാം ഇത്തരം ചതിക്കുഴികള്‍ രൂപപ്പെട്ടിട്ടുണ്ട്. വളരെ ആഴമുള്ള ഈ കുഴികളില്‍ മഴക്കാലമായതിനാല്‍ വെള്ളം കെട്ടിക്കിടക്കും. ഓരോ ദിവസവും കുഴികളുടെ ആഴം കൂടിക്കൊണ്ടിരിക്കുകയാണ്. വാഹനങ്ങള്‍ കുഴികളില്‍ വീണുകഴിഞ്ഞുമാത്രമേ കുഴിയുടെ ആഴവും വ്യാപ്തിയും ഡ്രൈവര്‍മാര്‍ക്കു വ്യക്തമാകുകയുള്ളൂ. പലപ്പോഴും രാത്രികാലങ്ങളിലാണ് വാഹനങ്ങള്‍ അപകടത്തില്‍പ്പെടുന്നത്. അടിയന്തരമായി റോഡ് നന്നാക്കി അപകടം ഒഴിവാക്കണമെന്നാണ് നാട്ടുകാരുടെ ആവശ്യം.

സെന്‍റ് തോമസ് ഓട്ടോണോമസ് കോളജില്‍ ഇഡി മാര്‍ട്ട്; പഠനത്തോടൊപ്പം വിദ്യാര്‍ഥികള്‍ക്ക് വരുമാനമാര്‍ഗവും

പാലാ: സെന്‍റ് തോമസ് കോളജില്‍ വിദ്യാര്‍ഥികളുടെയും അധ്യാപകരുടെയും അനധ്യാപകരുടെയും ഹോം മെയ്ഡ്, ഹോം ഗ്രോണ്‍ ഉത്പന്നങ്ങള്‍ക്ക് വിപണനമാര്‍ഗം ഒരുക്കുന്ന ഇഡി മാര്‍ട്ട് പ്രവര്‍ത്തനം ആരംഭിച്ചു. വിദ്യാര്‍ഥികള്‍ക്ക് പഠനത്തിനൊപ്പം സംരംഭകത്വ മേഖലയില്‍ പരിശീലനം നല്‍കുകയും സ്വന്തം ഉത്പന്നങ്ങള്‍ക്ക് വിപണിമൂല്യം ഉറപ്പാക്കുകയും ചെയ്യുക എന്നതാണ് ഇഡി മാര്‍ട്ടിന്‍റെ ലക്ഷ്യം. വീടുകളില്‍ നിര്‍മിക്കുന്ന ഭക്ഷ്യോത്പന്നങ്ങള്‍, ഹാന്‍ഡ്ക്രാഫ്റ്റ് ഇനങ്ങള്‍, കാര്‍ഷിക വിഭവങ്ങള്‍, വീടുകളില്‍ ഉണ്ടാക്കുന്ന മധുരപലഹാരങ്ങള്‍, അച്ചാറുകള്‍, വിവിധതരം ഫലങ്ങള്‍, ഏലക്ക, ഗ്രാമ്പൂ തുടങ്ങിയവ ഇവിടെ വിറ്റഴിക്കാനാകും. സംരംഭകത്വ വികസന ക്ലബ്ബിലെ വിദ്യാര്‍ഥികളുടെ നേതൃത്വത്തിലാണ് ഉത്പന്നങ്ങളുടെ ശേഖരണവും വിതരണവും ധനശേഖരണവും നടത്തുന്നത്. വാട്ട്സാപ്പ് വഴി അതതു ദിവസങ്ങളില്‍ ലഭ്യമാകുന്ന ഉത്പന്നങ്ങളുടെ വിവരണവും വിദ്യാര്‍ഥികളില്‍ എത്തിക്കുന്നുണ്ട്. നിലവില്‍ എല്ലാ ബുധനാഴ്ചയുമാണ് ഇഡി മാര്‍ട്ട് പ്രവര്‍ത്തിക്കുക. കോളജ് പ്രിന്‍സിപ്പല്‍ ഡോ. സിബി ജയിംസ് ഉദ്ഘാടനം ചെയ്തു. വൈസ് പ്രിന്‍സിപ്പല്‍ ഡോ. സാല്‍വിന്‍ തോമസ് കാപ്പിലിപ്പറമ്പില്‍, ബര്‍സാര്‍ ഫാ. മാത്യു ആലപ്പാട്ടുമേടയില്‍, സംരംഭകത്വ വികസന ക്ലബ് കോ-ഓര്‍ഡിനേറ്റര്‍ ജിനു മാത്യു എന്നിവര്‍ നേതൃത്വം നല്‍കി.

കായകല്പ പുരസ്‌കാരത്തിൽ തിളങ്ങി മരങ്ങാട്ടുപിള്ളി ഗവ. ആയുർവേദ ആശുപത്രി

കുറവിലങ്ങാട്: പ്രവർത്തനമികവിൽ തിളങ്ങുന്ന മരങ്ങാട്ടുപിള്ളി ഗവ. ആയുർവേദ ആശുപത്രിക്ക് കായകല്പ അവാർഡും. ജില്ലയിൽ ഒന്നാംസ്ഥാനം നേടിയാണ് ആശുപത്രിയുടെ തിളക്കം. ശുചിത്വം, മാലിന്യനിർമാർജനം, അണുബാധ നിർമാർജനം എന്നിവ വിലയിരുത്തിയാണ് പ്രഥമ കായകല്പ പുരസ്‌കാരം ആശുപത്രിക്കു ലഭിച്ചത്. 97.08 ശതമാനം മാർക്കോടെയാണ് ജില്ലാതലത്തിലെ ഒന്നാംസ്ഥാനം. ആയുഷ് സ്ഥാപനങ്ങളുടെ ഗുണനിലവാരം ഉറപ്പാക്കുന്നതിനാണ് മൂല്യനിർണയം നടത്തിയത്. ആശുപത്രിയുടെ നിയന്ത്രണാധികാരികളായ പഞ്ചായത്ത് ഭരണസമിതി, ആശുപത്രി മാനേജ്‌മെന്‍റ് കമ്മിറ്റി, ജീവനക്കാർ എന്നിവരുടെ കൂട്ടായ മുന്നേറ്റത്തിലാണ് അവാർഡ് ലഭിച്ചതെന്ന് പ്രസിഡന്‍റ് ബെൽജി ഇമ്മാനുവൽ പറഞ്ഞു.

"ഓണത്തിനൊരു കൂട' പച്ചക്കറി പദ്ധതിക്കു തുടക്കം

എലിക്കുളം: സംസ്ഥാന കൃഷിവകുപ്പിന്‍റെ സമഗ്ര പച്ചക്കറി വികസന പദ്ധതിയുമായി സഹകരിച്ച് കുരുവിക്കൂട് തളിർ നാട്ടുചന്ത സംഘടിപ്പിക്കുന്ന "ഓണത്തിനൊരു കൂട' പച്ചക്കറി പദ്ധതിക്കു തുടക്കമായി. പഞ്ചായത്ത് പ്രസിഡന്‍റ് ജിമ്മിച്ചൻ ഈറ്റത്തോട്ട് ഉദ്ഘാടനം ചെയ്തു. നാട്ടുചന്ത വൈസ് പ്രസിഡന്‍റ് ഔസേപ്പച്ചൻ ഞാറയ്ക്കൽ അധ്യക്ഷത വഹിച്ചു. അസിസ്റ്റന്‍റ് കൃഷി ഓഫീസർ എ.ജെ. അലക്സ് റോയ് പദ്ധതി വിശദീകരണം നടത്തി. രാജു അമ്പലത്തറ, വിത്സൻ പാമ്പൂരിക്കൽ, മോഹനകുമാർ കുന്നപ്പള്ളിക്കരോട്ട്, പി.കെ. ശശിധരൻ പാമ്പാടിയാത്ത്, ഗ്രേസ് ജോർജ് പാമ്പാടിയാത്ത് തുടങ്ങിയവർ പ്രസംഗിച്ചു. പച്ചക്കറിത്തൈകൾ, നടീൽ വസ്തുക്കൾ എന്നിവയുടെ വിതരണം, തുടർപഠന പരിപാടികൾ, അടുക്കളത്തോട്ട മത്സരം തുടങ്ങിയവയുണ്ടായിരിക്കും.

പിഎൻപി റോഡിന്‍റെ ഇരുവശവും കാടുവളർന്ന് മൂടി

പൊൻകുന്നം: ചിറക്കടവ് പഞ്ചായത്തിലെ പ്രധാന റോഡുകളിലൊന്നായ പിഎൻപി റോഡിന്‍റെ ഇരുവശവും കാടുവളർന്ന് മൂടി. വീതി കുറവായ റോഡിൽ നടന്നുപോകണമെങ്കിൽ ടാറിംഗിലൂടെ തന്നെ വേണം. ഇരുവശത്തേക്കും വാഹനങ്ങൾ വന്നാൽ കുറ്റിക്കാട്ടിനുള്ളിലേക്ക് വഴിയാത്രക്കാർ കയറേണ്ടി വരും. ഇഴജന്തുക്കളെ പേടിക്കാതെ ഇതുവഴി സഞ്ചരിക്കാനാവില്ലെന്ന് പ്രദേശവാസികൾ പരാതിപ്പെട്ടു.ശ്രേയസ് പബ്ലിക് സ്‌കൂളിലേക്കുള്ള വഴി കൂടിയായതിനാൽ രാവിലെയും വൈകുന്നേരവും കുട്ടികൾ സംഘമായി സഞ്ചരിക്കുന്നത് ഇതുവഴിയാണ്. ഈ സമയം വാഹനങ്ങൾ എത്തിയാൽ കുട്ടികൾ അരികിലെ കാട്ടിലേക്ക് കയറുകയേ മാർഗമുള്ളൂ. മുൻകാലങ്ങളിൽ പഞ്ചായത്ത് തൊഴിലുറപ്പ് പദ്ധതിയിൽപ്പെടുത്തി കാടുതെളിക്കൽ നടത്തുമായിരുന്നു. എന്നാൽ, ഇപ്പോൾ അത് അനുവദനീയമല്ല. നിരവധി കുടുംബങ്ങളുടെ വഴിയായ പിഎൻപി റോഡ് തെളിച്ചില്ലെങ്കിൽ ഇഴജന്തുക്കളെയും തെരുവുനായകളെയും പേടിച്ച് നടക്കാനാവാത്ത സ്ഥിതിയാകും.

"ലഹരിക്കെതിരേ ഞാനും' പദ്ധതിയുമായി മണിമല സെന്‍റ് ജോർജ് ഹൈസ്കൂൾ

മണിമല: ജൂണിയർ റെഡ്ക്രോസിന്‍റെ നേതൃത്വത്തിലെ മണിമല സെന്‍റ് ജോർജ് ഹൈസ്കൂളിൽ ലഹരിവിരുദ്ധ പ്രവർത്തനം "ലഹരിക്കെതിരേ ഞാനും' ജില്ലാ കളക്ടർ ജോൺ വി. സാമുവൽ ഒപ്പ് രേഖപ്പെടുത്തി ഉദ്ഘാടനം ചെയ്തു. സ്കൂൾ അസിസ്റ്റന്‍റ് മാനേജർ ഫാ. വർഗീസ് ചിറയിൽ, ഹെഡ്മിസ്ട്രസ് പി.എസ്. മിനിമോൾ, ഡോ. ബിനു കണ്ണന്താനം, പ്രഫ. ഗംഗാദത്തൻ നായർ, പിടിഎ പ്രസിഡന്‍റ് കെ.എ. ബിനോയ്, റെഡ്ക്രോസ് ടീച്ചേഴ്സ് കൗൺസിലർ ദിവ്യമോൾ വർഗീസ്, അനീഷ്‌ കെ. തോമസ് എന്നിവർ പ്രസംഗിച്ചു. കുട്ടികളും അധ്യാപകരും ലഹരിക്കെതിരേ ഒപ്പ് രേഖപ്പെടുത്തി.

ഏഞ്ചൽസ് മീറ്റും മിഷൻലീഗ് പ്രവർത്തനവർഷ ഉദ്ഘാടനവും

മണിമല: ഹോളി മാഗി ഫൊറോന പള്ളിയിൽ ഈ വർഷം വിശുദ്ധ കുർബാന സ്വീകരിച്ച കുട്ടികളുടെ എയ്ഞ്ചൽസ് മീറ്റും ചെറുപുഷ്പ മിഷൻലീഗിന്‍റെ പ്രവർത്തനവർഷ ഉദ്ഘാടാനവും വികാരി ഫാ. ഏബ്രഹാം തയ്യിൽ നെടുംപറമ്പിൽ നിർവഹിച്ചു. മേഖലാ പ്രസിഡന്‍റ് മാത്യൂസ് ടോം അധ്യക്ഷത വഹിച്ചു. മിഷൻലീഗ് മണിമല ഫൊറോന ഡയറക്ടർ ഫാ. ടോണി മണിയഞ്ചിറ വിശുദ്ധ കുർബാന അർപ്പിച്ച് വചനസന്ദേശം നൽകി. മേഖലാ സെക്രട്ടറി ബാബു മേലണ്ണൂർ, അസി. വികാരി ഫാ. വർഗീസ് ചിറയിൽ, ഫാ. ജിസൺ പോൾ വേങ്ങശേരി, സൺഡേ സ്കൂൾ ഹെഡ്മിസ്ട്രസ് ഡൈസമ്മ ചാക്കോ വലിയവീട്ടിൽ, മാർഷൽ മനോജ് എന്നിവർ പ്രസംഗിച്ചു. വിവിധ ഇടവകളിൽനിന്നുള്ള കുട്ടികളുടെ കലാപരിപാടികൾ നടത്തി. എസ്എസ്എൽസി, സിബിഎസ്ഇ, ഐസിഎസ്ഇ വിഭാഗങ്ങളിൽ ഫുൾ എ പ്ലസ് നേടിയ പ്രവർത്തകരായ കുട്ടികളെ യോഗത്തിൽ ആദരിച്ചു.

മൃഗസംരക്ഷണവകുപ്പ് ജില്ലാ മൊബൈൽ സർജറി യൂണിറ്റ് വാഴൂരിൽ

വാഴൂർ: മൃഗസംരക്ഷണവകുപ്പ് കോട്ടയം ജില്ലാ മൊബൈൽ സർജറി യൂണിറ്റിന്‍റെ ഉപകേന്ദ്രം വാഴൂർ മൃഗാശുപത്രിയിൽ ആരംഭിച്ചു. വാഴൂർ പഞ്ചായത്ത് പ്രസിഡന്‍റ് തോമസ് വെട്ടുവേലിൽ ഉദ്ഘാടനം നിർവഹിച്ചു. ചീഫ് വെറ്ററിനറി ഓഫീസർ ഡോ. വി. സുജ പദ്ധതി വിശദീകരണം നടത്തി. വൈസ് പ്രസിഡന്‍റ് ഡി. സേതുലക്ഷ്മി, വി.പി. റെജി, ജിജി നടുവത്താനിയിൽ, നിഷ രാജേഷ് എന്നിവർ പ്രസംഗിച്ചു. വളർത്തുമൃഗങ്ങൾക്ക് ടോൾ ഫ്രീ നമ്പറായ 1962ൽ മുൻകൂട്ടി ബുക്ക് ചെയ്ത് ഈ സേവനം ഉപയോഗിക്കാം. വന്ധ്യംകരണ ശാസ്ത്രക്രിയകൾക്ക് നായ്ക്കൾക്ക് 2500 രൂപയും പൂച്ചകൾക്ക് 1500 രൂപയും വീതമാണ് ഈടാക്കുന്നത്. മറ്റു മൃഗങ്ങൾക്കുള്ള ശാസ്ത്രക്രിയ സർക്കാർ നിശ്ചയിച്ച ഫീസ് ഈടാക്കി ചെയ്തു നൽകും. കന്നുകാലികൾക്കുള്ള ശസ്ത്രക്രിയകൾ ആവശ്യമുള്ളപക്ഷം കർഷകഭവനത്തിലെത്തി ചെയ്തു നൽകും.

പുലി വന്നില്ല; ചാത്തൻതറയിൽ നിരീക്ഷണം തുടരുന്നു

മുക്കൂട്ടുതറ: വനംവകുപ്പ് സ്ഥാപിച്ച കെണിയിൽ പുലി വീണില്ല. പ്രദേശത്ത് പട്രോളിംഗും നിരീക്ഷണവും തുടരുന്നു. കഴിഞ്ഞ ദിവസം കൂട് സ്ഥാപിച്ചപ്പോൾ ജനക്കൂട്ടം ഉണ്ടായിരുന്നതിനെത്തുടർന്ന് മനുഷ്യ ഗന്ധം മൂലമാകാം സ്ഥലത്തേക്ക് പുലി എത്താഞ്ഞതെന്നാണ് വനംവകുപ്പിന്‍റെ നിഗമനം. ഇന്നും നാളെയും പുലിയുടെ സാന്നിധ്യം ഉണ്ടാകുമെന്നാണ് വനം വകുപ്പ് പ്രതീക്ഷിക്കുന്നത്. പ്രദേശത്തേക്കുള്ള വഴി അടച്ച് കാവൽ ഏർപ്പെടുത്തിയിരിക്കുകയാണ്. കൂട് സ്ഥാപിച്ച ഭാഗത്ത്‌ നിരീക്ഷണ കാമറകൾ വച്ചിട്ടുണ്ട്. കാമറകളിലെ ദൃശ്യങ്ങൾ അടുത്ത ദിവസം പരിശോധിക്കുമെന്നും വന്യജീവി സാന്നിധ്യം ഉണ്ടായിട്ടുണ്ടോ എന്ന് ദൃശ്യങ്ങൾ പരിശോധിച്ച് ഉറപ്പാക്കുമെന്നും റാന്നി ഫോറസ്റ്റ് റേഞ്ച് ഓഫീസർ ബി.ആർ. ജയൻ പറഞ്ഞു. വനംവകുപ്പിന്‍റെ 40 അംഗ സംഘമാണ് പട്രോളിംഗ് നടത്തുന്നത്. കഴിഞ്ഞ ദിവസം ചാത്തൻതറ താന്നിക്കാപുഴയിലെ നെല്ലിശേരിപ്പാറ എക്സ്-സർവീസ്മെന്‍റെ റബർത്തോട്ടത്തിലാണ് ടാപ്പിംഗ് തൊഴിലാളി പുലിയെ കണ്ടത്. ഇതേത്തുടർന്ന് പുലിയെ പിടികൂടാൻ കൂട് വയ്ക്കുകയായിരുന്നു. വെച്ചൂച്ചിറ പഞ്ചായത്ത്‌ പരിധിയിൽ പറമ്പുകളിലെ കാട് തെളിക്കൽ ആരംഭിച്ചു. റബർത്തോട്ടങ്ങളിൽ കാടുകൾ വളർന്നത് വന്യജീവികൾക്ക് താവളമാക്കാൻ അവസരമായ നിലയിലായിരുന്നു.

കാഞ്ഞിരപ്പള്ളി ബൈപാസ് വീണ്ടും സ്വപ്നലോകത്തേക്ക്

കാഞ്ഞിരപ്പള്ളി: കാഞ്ഞിരപ്പള്ളിക്കാരുടെ സ്വപ്നപദ്ധതിയായ ബൈപാസ് വീണ്ടും സ്വപ്നലോകത്തേക്ക്. 2025ൽ ഗതാഗതക്കുരുക്കില്ലാതെ ബൈപാസിലൂടെ യാത്ര ചെയ്യാമെന്ന കാഞ്ഞിരപ്പള്ളിക്കാരുടെ പ്രതീക്ഷയാണ് വീണ്ടും അസ്ഥാനത്തായിരിക്കുന്നത്. മാർച്ചിൽ നിർമാണം പൂർത്തീകരിക്കേണ്ട ബൈപാസാണ് ഇപ്പോൾ പാതിവഴിയിൽ കിടക്കുന്നത്. നിർമാണ പ്രവർത്തനങ്ങൾ യഥാസമയം പൂർത്തീകരിക്കാത്ത കരാറുകാരനെ നിർമാണ പ്രവർത്തനങ്ങളിൽനിന്ന് മാറ്റിക്കൊണ്ടുള്ള നോട്ടീസ് കിഫ്ബി നൽകി. നിർമാണ പ്രവർത്തനങ്ങളിൽ കാലതാമസമെടുക്കുന്നതിനാൽ നിലവിലെ കരാറുകാരനെ മാറ്റി പുതിയ കരാർ നൽകുന്നതിന് മൂന്നുമാസം സമയമെടുക്കുമെന്നാണ് ചീഫ് വിപ്പ് ഡോ. എൻ. ജയരാജ് അറിയിച്ചിരിക്കുന്നത്. ശബരിമല തീർഥാടന പാത, കിഴക്കൻ മലയോര വിനോദ സഞ്ചാരപാത എന്നിവ കടന്നുപോകുന്ന കാഞ്ഞിരപ്പള്ളി ടൗണിലെ ഗതാഗതക്കുരുക്കിന് പരിഹാരം എന്ന ലക്ഷ്യത്തോടെയാണ് ബൈപാസ് കൊണ്ടുവന്നത്. നാൾവഴികൾ 2004ലാണ് കാഞ്ഞിരപ്പള്ളി ബൈപാസ് എന്ന ആശയം മുന്നോട്ടുവന്നത്. 2006-08ൽ അൽഫോൻസ് കണ്ണന്താനം എംഎൽഎ പദ്ധതിക്കായി ശ്രമങ്ങൾ ആരംഭിച്ചു. 2007ൽ പൊതുമരാമത്തുവകുപ്പ് 81.45 കോടിയുടെ റഫ് കോസ്റ്റ് എസ്റ്റിമേറ്റ് തയാറാക്കി. 2010ൽ ജില്ലാ കളക്ടർ സംസ്ഥാന ലാൻഡ് റവന്യു കമ്മീഷണർക്ക് സ്ഥലം ഏറ്റെടുക്കുന്നതിന് അപേക്ഷ സമർപ്പിച്ചു. 2012ൽ നടപടിക്രമങ്ങൾ പാലിച്ച് ഭൂമി ഏറ്റെടുക്കുന്നതിന് ഹൈക്കോടതി അനുവാദം നൽകി. കേന്ദ്രനിയമം 2013ൽ പ്രാബല്യത്തിൽ വന്നതോടെ ഭൂമി ഏറ്റെടുക്കുന്നത് മൂന്നു വർഷത്തോളം വൈകി. 2016-17ൽ സർക്കാർ ഇടക്കാല ബജറ്റിൽ ബൈപാസിന് 20 കോടി രൂപ എംഎൽഎയുടെ അഭ്യർഥനപ്രകാരം അനുവദിച്ചു. 2016-17 ലെ റിവൈസ്ഡ് ബജറ്റിൽ കിഫ്ബി ധനസഹായത്തോടെ ബൈപാസ് നിർമാണം പൂർത്തിയാക്കാൻ കേരള റോഡ്സ് ആൻഡ് ബ്രിഡ്‌ജസ് കോർപറേഷനെ ചുമതലപ്പെടുത്തി. 2018ൽ കിഫ്ബിയിൽനിന്ന് സ്ഥലം ഏറ്റെടുക്കലിന് ഉൾപ്പെടെ 78.69 കോടി രൂപ അനുവദിച്ചു. 2019ൽ ബൈപാസിന്‍റെ ആവശ്യത്തിനായി സ്ഥലം ഏറ്റെടുക്കുന്നതിനുള്ള അനുമതി ലഭിച്ചു. 2022 മേയിൽ ചട്ടപ്രകാരമുള്ള അറിയിപ്പുകൾ നൽകി സ്ഥലം ഏറ്റെടുക്കൽ നടപടികൾ പൂർത്തിയാക്കി. 2023 ഡിസംബറിൽ ബൈപാസിന്‍റെ പ്രാരംഭ നിർമാണ പ്രവർത്തനങ്ങൾ ആരംഭിച്ചു. 2024 ഫെബ്രുവരിയിൽ ആരംഭിച്ച് 2025 മാർച്ചിൽ പൂർത്തിയാക്കുക എന്ന ലക്ഷ്യത്തോടെ ബൈപാസിന്‍റെ നിർമാണം ആരംഭിച്ചു. എന്നാൽ, ഇപ്പോൾ നിലച്ചിരിക്കുന്ന ബൈപ്പാസ് 2025ൽ പൂർത്തീകരിക്കുമോ എന്ന ആശങ്കയിലാണ് കാഞ്ഞിരപ്പള്ളിക്കാർ. നിർമാണം പാതിവഴിയിൽ ദേശീയപാത 183ല്‍ പഞ്ചായത്ത് പടിക്കല്‍നിന്ന് ആരംഭിച്ച് ചിറ്റാര്‍ പുഴയ്ക്കും മണിമല റോഡിനും കുറുകെ നിര്‍മിക്കുന്ന പാലത്തിന്‍റെ ദേശീയപാതയ്ക്ക് സമീപമുള്ള ആദ്യത്തെ തൂണിന്‍റെ കോണ്‍ക്രീറ്റിംഗ് ആരംഭിച്ചിരുന്നു. നാല് പില്ലറുകളിലായാണ് മേല്‍പ്പാലം നിര്‍മിക്കുന്നത്. ഇതില്‍ രണ്ടെണ്ണത്തിന്‍റെ നിര്‍മാണ പ്രവര്‍ത്തനങ്ങളാണ് നടന്നുകൊണ്ടിരുന്നത്. നിര്‍ദിഷ്ട പദ്ധതി പ്രദേശത്തെ ഉയര്‍ന്ന ഭാഗം ഇടിച്ചുനിരത്തിയും താഴ്ന്ന ഭാഗങ്ങളില്‍ മണ്ണിട്ടു നികത്തിയും റോഡ് വെട്ടിയിരുന്നു. ദേശീയപാതയിൽ നിന്നു ബൈപാസിലേക്കു തിരിയുന്ന പഞ്ചായത്ത് ഓഫീസിനു മുന്പിൽ റൗണ്ടാന നിർമിക്കാനായി മണ്ണും മാറ്റിയിരുന്നു. ഇവിടെനിന്നാണ് മണിമല റോഡിനും ചിറ്റാർപുഴയ്ക്കും മീതെയുള്ള മേൽപ്പാലം നിർമിക്കുന്നത്. ബൈ പാസ് അവസാനിക്കുന്ന ഫാബീസ് ഓഡിറ്റോറിയത്തിനു സമീപം ടാറിംഗ് ജോലികളുടെ ഭാഗമായി മെറ്റൽ നിരത്തുന്ന പ്രവർത്തനങ്ങളും തുടങ്ങിയിരുന്നു. കാഞ്ഞിരപ്പള്ളിയിലെ ഗതാഗതക്കുരുക്കിന് ശാശ്വതപരിഹാരമാകുന്ന ബൈപ്പാസ് എത്രയും വേഗം പൂർത്തീകരിക്കണമെന്നാണ് നാട്ടുകാരുടെ ആവശ്യം. യുഡിഎഫ് പ്രക്ഷോഭത്തിലേക്ക് കാഞ്ഞിരപ്പള്ളി: കാഞ്ഞിരപ്പള്ളി ബൈപാസിന്‍റെ നിർമാണം പാതിവഴിയിൽ നിലച്ചതിനു പിന്നിൽ സ്ഥലം എംഎൽഎയുടെ അനാസ്ഥയാണെന്ന് യുഡിഎഫ് നേതാക്കൾ പത്രസമ്മേളനത്തിൽ ആരോപിച്ചു. സ്വന്തം വീഴ്ചകൾ മറച്ചുവയ്ക്കുന്നതിന് കരാർ കമ്പനിക്കെതിരേ എംഎൽഎ ഉൾപ്പെടെയുള്ളവർ ബാലിശമായ ആരോപണങ്ങൾ ഉന്നയിക്കുന്നത് ജനങ്ങളുടെ കണ്ണിൽ പൊടിയിടുന്നതിനു വേണ്ടിയാണ്. ആവശ്യത്തിന് ഫണ്ടില്ലാത്തതിനാൽ നിർമാണം മുന്നോട്ടുകൊണ്ടുപോകാൻ കഴിയുന്നില്ലെന്ന കരാർ കമ്പനിയുടെ പരാതികൾ വസ്തുതാപരമായി പരിശോധിക്കുന്നതിനു പകരം കമ്പനിയെ കരിമ്പട്ടികയിൽ ഉൾപ്പെടുത്തുമെന്ന എംഎൽഎയുടെ പ്രസ്താവന നിർമാണം അട്ടിമറിക്കാൻ വേണ്ടിയാണെന്ന് സംശയിക്കേണ്ടിയിരിക്കുന്നു. നിർമാണ കരാർ എടുത്ത കമ്പനി ക്രമക്കേടുകൾ കാണിച്ചതിനാൽ അവരെ പറഞ്ഞുവിട്ടുവെന്ന എംഎൽഎയുടെ വാദം വാസ്തവവിരുദ്ധമാണ്. കമ്പനി തന്നെ നിർമാണം പാതിവഴിയിൽ ഉപേഷിച്ച് നാടുവിട്ടതിന് കാഞ്ഞിരപ്പള്ളിയിലെ ജനങ്ങൾ സാക്ഷികളാണ്. നാലു മാസം മുന്പുതന്നെ ക്രമക്കേടുകൾ കണ്ടുപിടിച്ച് കമ്പനിയെ പാറ പൊട്ടിക്കുന്നതിൽനിന്നു വിലക്കിയെന്നു പറയുന്ന എംഎൽഎ ഇത്രയും നാൾ എന്തുകൊണ്ട് ക്രമക്കേട് മൂടിവച്ചുവെന്ന് വ്യക്തമാക്കണം. ബൈപാസ് നിർമാണം അട്ടിമറിക്കുന്നതിനെതിരേ യുഡിഎഫ് പ്രക്ഷോഭം ആരംഭിക്കുകയാണെന്നും ആദ്യഘട്ടമായി നാളെ വൈകുന്നേരം നാലിന് കരാറുകാരൻ നിർമാണം നിർത്തിയ പഞ്ചായത്ത് ഓഫീസ് പടിക്കലെ പില്ലറുകളിൽ റീത്ത് വച്ച് പ്രതിഷേധിക്കുമെന്നും യുഡിഎഫ് നേതാക്കൾ പറഞ്ഞു. പത്രസമ്മേളനത്തിൽ പ്രഫ. റോണി കെ. ബേബി, വി.എസ്. അജ്മൽ ഖാൻ, ബിജു പത്യാല, ജോയി മുണ്ടാംപള്ളി എന്നിവർ പങ്കെടുത്തു.

വീട്ടമ്മമാർക്ക് ഭക്ഷ്യസുരക്ഷാ പരിശീലനവുമായി അരുവിത്തുറ കോളജ്

അരുവിത്തുറ: മാതൃവേദി അരുവിത്തുറ യൂണിറ്റിന്‍റെ ആഭിമുഖ്യത്തിൽ അരുവിത്തുറ സെന്‍റ് ജോർജ് കോളജ് ഫുഡ് സയൻസ് വിഭാഗത്തിലെ അധ്യാപകരും വിദ്യാർഥികളും ചേർന്ന് അടുക്കളയും ഭക്ഷ്യസുരക്ഷയും എന്ന വിഷയത്തിൽ ഏകദിന സെമിനാർ സംഘടിപ്പിച്ചു. സെമിനാറിന്‍റെ ഉദ്ഘാടനം അരുവിത്തുറ ഫൊറോന പള്ളി വികാരി വെരി. റവ. ഫാ. സെബാസ്റ്റ്യൻ വെട്ടുകല്ലേൽ നിർവഹിച്ചു. അടുക്കളയിലെ ഭക്ഷ്യസുരക്ഷ മാർഗങ്ങൾ സംബന്ധിച്ച പ്രായോഗിക പരിശീലനമാണ് വീട്ടമ്മമാർക്ക് നൽകയത്. മാതൃജ്യോതി യൂണിറ്റ് ഡയറക്‌ടർ റവ.ഫാ. ലിബിൻ പാലയ്ക്കാതടത്തിൽ, ഫുഡ് സയൻസ് വിഭാഗം അധ്യാപകൻ ബിൻസ് കെ. തോമസ്, ഷോണി കിഴക്കേത്തോട്ടം എന്നിവരും ഒ.ബി. ആരതി, കെ. ഫാത്തിമ എന്നീ വിദ്യാർഥിനികളും പരിശീലന പരിപാടിയിൽ ക്ലാസുകൾ നയിച്ചു.

മുന്‍ മുഖ്യമന്ത്രി ഉമ്മന്‍ ചാണ്ടിക്ക് ജന്മനാട്ടിൽ സ്മാരകം ഉയരുന്നു

പുതുപ്പള്ളി: മുന്‍മുഖ്യമന്ത്രി ഉമ്മന്‍ ചാണ്ടിയുടെ രണ്ടാം ചരമവാര്‍ഷികത്തില്‍ ജന്മനാട്ടില്‍ സ്മാരകം ഉയരുന്നു. ഏറെ വിവാദങ്ങള്‍ക്കൊടുവില്‍ നിര്‍ദിഷ്ട മിനി സിവില്‍ സ്റ്റേഷന്‍ കെട്ടിടത്തിന് ഉമ്മന്‍ ചാണ്ടിയുടെ പേരിടാന്‍ പഞ്ചായത്ത് ഭരണസമിതി യോഗം തീരുമാനിച്ചു. ഉമ്മന്‍ ചാണ്ടിയുടെ രണ്ടാം ചരമവാര്‍ഷികത്തോടനുബന്ധിച്ചാണ് മിനി സിവില്‍ സ്റ്റേഷന്‍ നിര്‍മിക്കുന്നതിനു തുടക്കംകുറിക്കുന്നത്. കഴിഞ്ഞവര്‍ഷം സെപ്റ്റംബർ 23ന് പഞ്ചായത്ത് നവീകരിച്ച കമ്യൂണിറ്റി ഹാള്‍ ഇഎംഎസ് സ്മാരകമായി നാമകരണം ചെയ്തിരുന്നു. ഈ സമയം ഉമ്മന്‍ ചാണ്ടിയെ മറന്നുവെന്ന് വ്യാപക പ്രചാരണമുണ്ടായി. കമ്യൂണിറ്റിഹാള്‍ ഉദ്ഘാടന വേളയില്‍ മന്ത്രി എം.ബി. രാജേഷ് മിനി സിവില്‍സ്റ്റേഷന്‍ പൂര്‍ത്തീകരിച്ച് മുന്‍ മുഖ്യമന്ത്രി ഉമ്മന്‍ ചാണ്ടിയുടെ സ്മാരകമാക്കുമെന്ന് പ്രഖ്യാപിച്ചിരുന്നു. സംസ്ഥാന സര്‍ക്കാരും പഞ്ചായത്തും ചേര്‍ന്ന് 1.25 കോടി രൂപ മുടക്കിയാണ് കെട്ടിടം പണി പൂര്‍ത്തിയാക്കുന്നത്. ഉമ്മന്‍ ചാണ്ടി എംഎല്‍എയായിരുന്ന അവസരത്തില്‍ 2017-ല്‍ പുതുപ്പള്ളി ജംഗ്ഷനു സമീപമുള്ള പഞ്ചായത്തിന്‍റെ 75 സെന്‍റ് സ്ഥലത്ത് മിനി സിവില്‍ സ്റ്റേഷന്‍ കെട്ടിടം പണിയുന്നതിനു പണം അനുവദിച്ചിരുന്നു. എംഎല്‍എയുടെ ആസ്തി വികസന ഫണ്ടില്‍നിന്ന് ഒരു കോടി രൂപയാണ് അനുവദിച്ചത്. മൂന്നുനില കെട്ടിടത്തിന്‍റെ തൂണുകള്‍ ഉള്‍പ്പെടെ അടിസ്ഥാന നിര്‍മാണങ്ങള്‍ അന്നു പൂര്‍ത്തിയാക്കിയിരുന്നു. ഇതിന്‍റെ രണ്ടാംഘട്ടം നിര്‍മിക്കാനാണ് ഇപ്പോള്‍ പഞ്ചായത്ത് തീരുമാനിച്ചിരിക്കുന്നത്. നിര്‍മാണത്തിനുള്ള പ്ലാനും എസ്റ്റിമേറ്റും തയാറാക്കി ഭരണാനുമതിക്കായി പൊതുമരാമത്ത് വകുപ്പിനു സമര്‍പ്പിച്ചതായി പഞ്ചായത്ത് അധികൃതര്‍ പറഞ്ഞു. പഞ്ചായത്തിന്‍റെ നിലവിലുള്ള ഓഫീസ് 50 വര്‍ഷം പഴക്കമുള്ളതും ജീര്‍ണാവസ്ഥയിലുമാണ്. പുതുപ്പള്ളിയിലെ മറ്റു സര്‍ക്കാര്‍ സ്ഥാപനങ്ങളായ സബ് രജിസ്ട്രാര്‍ ഓഫീസ്, വില്ലേജ് ഓഫീസ് തുടങ്ങി ഒട്ടേറെ ഓഫീസുകള്‍ ഇപ്പോള്‍ വാടകക്കെട്ടിടങ്ങളിലാണു പ്രവര്‍ത്തിക്കുന്നത്. മിനി സിവില്‍സ്റ്റേഷന്‍ പൂര്‍ത്തിയാകുന്നതോടെ സര്‍ക്കാര്‍ സ്ഥാപനങ്ങളെല്ലാം ഒരു കെട്ടിടത്തിലേക്കു മാറ്റി പ്രവര്‍ത്തിപ്പിക്കാന്‍ കഴിയുമെന്ന് അധികൃതര്‍ പറയുന്നു.

പഴയ മെഡിക്കൽ കോളജ് കെട്ടിടം കാടുകയറി നശിക്കുന്നു

ഗാന്ധിനഗർ: കോട്ടയം മെഡിക്കൽ കോളജിന്‍റെ പഴയ കോളജ് കെട്ടിടം കാടുകയറി നശിക്കുന്നു. ദന്തൽ കോളജിന് സമീപത്തായാണ് പഴയ മെഡിക്കൽ കോളജ് കെട്ടിടം. നിലവിൽ കോളജ് പ്രവർത്തിക്കുന്ന കെട്ടിടത്തിലേക്ക് കോളജിന്‍റെ പ്രവർത്തനം മാറ്റിയതോടെ വർഷങ്ങളായി പഴയ കോളജ് കെട്ടിടം കാടുകയറുകയാണ്. കോളജ് പ്രവർത്തിച്ചുകൊണ്ടിരുന്ന ഒരു കെട്ടിടത്തിൽ ലോക്കൽ ഒപി തുടങ്ങിയതിനാൽ പരിസരം വൃത്തിയായി കിടക്കുന്നുണ്ട്. ഇതിനടുത്തുള്ള കെട്ടിടമാണ് വർഷങ്ങളായി ഉപയോഗിക്കാതെ കാടുകയറി നശിക്കുന്നത്. മെഡക്സ് നടക്കുമ്പോൾ ഇവിടത്തെ കാടു വെട്ടിത്തെളിച്ച് കെട്ടിടത്തിലെ ക്ലാസ് മുറികൾ മെഡക്സിനായി ഉപയോഗിക്കും. മെഡക്സ് കഴിയുന്നതോടെ വീണ്ടും കാടുകയറാൻ തുടങ്ങും. ഉപയോഗിക്കാതെ കിടക്കുന്നതുകൊണ്ട് കോളജ് കെട്ടിടത്തിന്‍റെ വരാന്തകൾ തെരുവുനായ താവളമാക്കിയിരിക്കുകയാണ്. പ്രദേശമാകെ കാടുപിടിച്ചു കിടക്കുന്നതിനാൽ ഇഴജന്തുക്കളുടെ ശല്യവുമുണ്ട്. ദന്തൽ വിദ്യാർഥികളും ദന്തൽ കോളജിൽ ചികിത്സ തേടുന്നവരും ഇതിലേയുള്ള വഴി ഉപയോഗിക്കുന്നുണ്ട്. എന്നാൽ തെരുവുനായ്ക്കളെയും ഇഴജന്തുക്കളെയും ഭയന്നുവേണം സഞ്ചരിക്കാൻ. കെട്ടിടത്തിന്‍റെ പല ഭാഗവും പൊട്ടിപ്പൊളിഞ്ഞിട്ടുണ്ട്. മരച്ചില്ലകൾ വീണ് മുകൾഭാഗവും തകർന്നിട്ടുണ്ട്. കാട് വെട്ടിത്തെളിച്ച് കെട്ടിടത്തിന്‍റെ ശോച്യാവസ്ഥ പരിഹരിച്ചാൽ ആരോഗ്യ വകുപ്പിന്‍റെ വിവിധ ഓഫീസുകൾ ഇവിടെ പ്രവർത്തിപ്പിക്കാൻ സാധിക്കുമെന്ന് ആരോഗ്യമേഖലയിലുള്ളവർ ചൂണ്ടിക്കാട്ടുന്നു.

ജില്ലാ ആശുപത്രിയില്‍ അപകടഭീഷണിയായി വാട്ടര്‍ ടാങ്ക്

കോട്ടയം: ജില്ലാ ആശുപത്രിയില്‍ അപകടഭീഷണിയായി വാട്ടര്‍ ടാങ്ക്. ആറ്, മൂന്ന് വാര്‍ഡുകളോടു ചേര്‍ന്നാണ് ഏതു നിമിഷവും ഇടിഞ്ഞുവീഴുമെന്ന നിലയിലുള്ള വലിയ വാട്ടര്‍ ടാങ്ക് സ്ഥിതിചെയ്യുന്നത്. വര്‍ഷങ്ങള്‍ക്കു മുമ്പ് ജില്ലാ ആശുപത്രിയിലെ വിവിധ വാര്‍ഡുകളിലേക്കുള്ള വെള്ളം എത്തിക്കുന്നതിനായി നിര്‍മിച്ചതാണ് ടാങ്ക്. കാലപ്പഴക്കത്തില്‍ ടാങ്ക് അപകടാവസ്ഥയിലായതോടെ വെള്ളം സൂക്ഷിക്കുന്നത് ഉപേക്ഷിച്ചു. തൂണുകളും ഭിത്തിയുമെല്ലാം ദ്രവിച്ച് ഏതുനിമിഷവും താഴെ വീഴാവുന്ന രീതിയിലാണ് ഇപ്പോൾ ടാങ്ക്. ടാങ്കിനു സമീപത്തുകൂടിയാണ് രോഗികളും കൂട്ടിരിപ്പുകാരുമൊക്കെ ഏതുസമയവും നടക്കുന്നത്. കഴിഞ്ഞദിവസം ചേര്‍ന്ന ആശുപത്രി വികസനസമിതി യോഗത്തില്‍ അപകടാവസ്ഥയിലായ ടാങ്ക് എത്രയും വേഗം പൊളിച്ചുമാറ്റണമെന്ന് ആവശ്യപ്പെട്ടിരുന്നു. എന്നാല്‍, പൊളിക്കാന്‍ ഇതുവരെ അധികൃതര്‍ തയാറായിട്ടില്ല. കിഫ്ബി പദ്ധതി പ്രകാരം പണിയുന്ന പുതിയ ആശുപത്രി കോംപ്ലക്‌സ് ടാങ്കിനോടു ചേര്‍ന്നുള്ള ഭാഗത്താണ്. പുതിയ കെട്ടിടത്തിന്‍റെ നിര്‍മാണത്തിനും അപകടാവസ്ഥയിലായ ടാങ്ക് തടസമാണ്. അതേസമയം ആശങ്ക വേണ്ടെന്നും അപകടാവസ്ഥയിലായ ടാങ്ക് ഉടന്‍ പൊളിച്ചുനീക്കുമെന്നും ആശുപത്രി സൂപ്രണ്ട് പറഞ്ഞു.

വീടിന്‍റെ താക്കോല്‍ദാനം 18ന്

പുതുപ്പള്ളി: ഉമ്മന്‍ ചാണ്ടി ഫൗണ്ടേഷന്‍ ഡോണ്‍ ബോസ്‌കോ സ്‌കൂളുമായി സഹകരിച്ചു പുതുപ്പള്ളി പഞ്ചായത്തില്‍ നല്‍കുന്ന വീടിന്‍റെ താക്കോല്‍ദാനം 18നു നടക്കും. ഏഴാം വാര്‍ഡില്‍ ചെറിയാന്‍ കടുപ്പിലിനായി നിര്‍മിക്കുന്ന ഉമ്മന്‍ ചാണ്ടി വീടിന്‍റെ താക്കോല്‍ദാനം രാഹുല്‍ ഗാന്ധി നിര്‍വഹിക്കും. ഉച്ചകഴിഞ്ഞ് രണ്ടിനു 134 നമ്പര്‍ ബൂത്ത് കോണ്‍ഗ്രസ് കമ്മിറ്റിയുടെ നേതൃത്വത്തില്‍ പായസ വിതരണവും നടത്തുമെന്ന് വാര്‍ഡ് മെംബർ വര്‍ഗീസ് ചാക്കോ അറിയിച്ചു.

നേത്ര പരിശോധനാ ക്യാമ്പ്

പുതുപ്പള്ളി: പരിയാരം കൈതളാവ് റെസിഡന്‍റ്സ് അസോസിയേഷനും വാസന്‍ ഐ കെയര്‍ ഹോസ്പിറ്റലും ചേര്‍ന്ന് നടത്തിയ സൗജന്യ നേത്രപരിശോധനാ ക്യാമ്പ് പി.ആര്‍. അനിത ഉദ്ഘാടനം ചെയ്തു. പുതുപ്പള്ളി ബ്ലോക്ക് മെംബര്‍ സാബു പുതുപ്പറമ്പില്‍, മാടപ്പള്ളി ബ്ലോക്ക് മെംബര്‍ ബീന കുന്നത്ത്, അസോസിയേഷന്‍ പ്രസിഡന്‍റ് ഈശ്വര പ്രസാദ്, സെക്രട്ടറി അഖില്‍ ജി. നാഥ്, വൈസ് പ്രസിഡന്‍റ് അനീഷ് കുമാര്‍, ട്രഷറര്‍ ധനൂപ് വിജയ്, ജോയിന്‍റ് സെക്രട്ടറി മനു കെ. ബിനോയ്, ഇ.ജി. പ്രസന്നന്‍ തുടങ്ങിയവര്‍ പ്രസംഗിച്ചു.

പെരുവ മാര്‍ക്കറ്റിലെ ജൈവമാലിന്യ സംസ്‌കരണം: വൈദ്യുതി ഉത്പാദന പ്ലാന്‍റിന്‍റെ പ്രവര്‍ത്തനം നിലച്ചിട്ട് മാസങ്ങളായി

പെരുവ: പെരുവ മാര്‍ക്കറ്റിലെ ജൈവമാലിന്യ സംസ്‌കരണ വൈദ്യുതി ഉത്പാദന പ്ലാന്‍റിന്‍റെ പ്രവര്‍ത്തനം നിലച്ചിട്ട് മാസങ്ങളായി. ഇതോടെ ജൈവമാലിന്യങ്ങള്‍ സംസ്‌കരിക്കാന്‍ മാര്‍ഗമില്ലാത്ത അവസ്ഥയായിലാണ് പെരുവയിലെ വ്യാപാരികളും മത്സ്യവില്‍പ്പനക്കാരും. കടകളിലെ മാലിന്യം അവരവര്‍തന്നെ സ്വന്തം സ്ഥലത്ത് നിര്‍മാര്‍ജനം ചെയ്യുകയാണ്. പ്രവര്‍ത്തനം നിലച്ചതോടെ മാലിന്യപ്ലാന്‍റും ടൗണില്‍ വഴിവിളക്കുകള്‍ തെളിക്കാനായി ഉപയോഗിച്ചിരുന്ന വിളക്കുകാലുകളും അനാഥമായ അവസ്ഥയിലാണ്. മാലിന്യം സംസ്‌കരിച്ച് അതില്‍നിന്ന് വൈദ്യുതി ഉത്പാദിപ്പിച്ച് വഴിവിളക്കുകള്‍ തെളിക്കുന്ന പദ്ധതിയാണ് പ്രവര്‍ത്തനരഹിതമായത്. മുളക്കുളം പഞ്ചായത്തും ശുചിത്വ മിഷന്‍റെ സേവനദാതാക്കളായ ബയോടെക്കുമായി ചേര്‍ന്ന് 2008-ലാണ് പദ്ധതിയുടെ നിര്‍മാണം തുടങ്ങിയത്. 2010-ലാണ് പദ്ധതി പ്രവര്‍ത്തനസജ്ജമായത്. 12 ലക്ഷത്തോളം രൂപ ചെലവഴിച്ചാണ് പദ്ധതി തുടങ്ങിയത്. പെരുവ മാര്‍ക്കറ്റിനുള്ളിലാണ് പദ്ധതിയുടെ ഭാഗമായുള്ള പ്ലാന്‍റ് സ്ഥാപിച്ചിട്ടുള്ളത്. പെരുവ മാര്‍ക്കറ്റിലെയും ടൗണിലെയും വ്യാപാരസ്ഥാപനങ്ങളിലെയും ഇറച്ചി, മീന്‍, പച്ചക്കറി മാലിന്യങ്ങളുമാണ് ഇവിടെ സംസ്‌കരിച്ചിരുന്നത്. പ്ലാന്‍റിലെത്തിക്കുന്ന മാലിന്യങ്ങളില്‍നിന്ന് ഗ്യാസ് ഉത്പാദിപ്പിച്ച് അത് ജനറേറ്റര്‍ ഉപയോഗിച്ചു വൈദ്യുതിയാക്കി മാറ്റും. ഈ വൈദ്യുതി ഉപയോഗിച്ചു പെരുവ ടൗണിലെയും ചുറ്റുമുള്ള വഴികളിലും സ്ഥാപിച്ചിട്ടുള്ള വൈദ്യുതി വിളക്കുകള്‍ പ്രകാശിപ്പിക്കുന്ന രീതിയിലായിരുന്നു പദ്ധതി നടന്നുവന്നിരുന്നത്. 55 വൈദ്യുതി വിളക്കുകളാണ് ഇവിടെ ഉത്പാദിപ്പിക്കുന്ന വൈദ്യുതിയിലൂടെ പ്രകാശിപ്പിച്ചിരുന്നത്. ഏതു വര്‍ഷകാലത്തും പെരുവ ടൗണില്‍ വഴിവിളക്കുകള്‍ തെളിഞ്ഞിരുന്നു. ഒരു വര്‍ഷത്തിലധികമായി വഴിവിളക്കുകള്‍ പ്രകാശിക്കാതായിട്ടെന്ന് വ്യാപാരികള്‍ പറയുന്നു. പ്ലാന്‍റിലേക്ക് ലഭിക്കുന്ന മാലിന്യത്തിന്‍റെ അളവ് കുറഞ്ഞതാണ് പ്രവര്‍ത്തനം പ്രതിസന്ധിയിലാകാന്‍ കാരണമെന്നാണ് ബയോടെക് അധികൃതര്‍ പറയുന്നത്. ഒരു മാസം 21,860 രൂപ പഞ്ചായത്ത് ഇവിടത്തെ ജോലിക്കാരനും മേല്‍നോട്ടച്ചുമതലയുടെ ഇനത്തിലുമായി ബയോടെക്കിന് നല്‍കേണ്ടിയിരുന്നു. ഇത്രയും തുക ചെലവഴിക്കേണ്ടെന്നു പഞ്ചായത്ത് തീരുമാനിച്ചതിനെത്തുടര്‍ന്ന് കഴിഞ്ഞ മാര്‍ച്ചില്‍ കരാര്‍ പുതുക്കാതിരുന്നതാണ് പദ്ധതിയുടെ പ്രവര്‍ത്തനം പൂര്‍ണമായും നിലയ്ക്കാനിടയാക്കിയത്. തുമ്പോര്‍മുഴി പ്ലാന്‍റുകള്‍ ഉടന്‍ തുറക്കും ബയോടെക്കുമായുള്ള കരാർ പുതുക്കേണ്ടെന്ന് പഞ്ചായത്ത് കമ്മിറ്റി തീരുമാനിച്ചതാണ്. അറ്റകുറ്റപ്പണികള്‍ക്കായി വലിയ തുകയാണ് പഞ്ചായത്തിന് ചെലവാകുന്നത്. മാര്‍ക്കറ്റിലും ടാക്സി സ്റ്റാന്‍ഡിലുമായി തുമ്പോര്‍മൂഴി മോഡല്‍ മാലിന്യ സംസ്‌കരണ പ്ലാന്‍റ് സ്ഥാപിച്ചു. ഇതിന്‍റെ പ്രവര്‍ത്തനം ഉടന്‍തന്നെ ആരംഭിക്കും. ടൗണില്‍ പുതിയ വൈദ്യുതി ലൈറ്റുകള്‍ സ്ഥാപിച്ചു വെളിച്ചം ഉറപ്പാക്കിയിട്ടുണ്ട്. പുതിയ മാലിന്യ സംസ്‌കരണ പ്ലാന്‍റ് ബയോടെക്കിന്‍റെ പ്ലാന്‍റ് പൊളിച്ചുനീക്കി അവിടത്തന്നെ സ്ഥാപിക്കുന്ന കാര്യവും പരിഗണനയിലാണെന്നു മുളക്കുളം പഞ്ചായത്ത് പ്രസിഡന്‍റ് ടി.കെ. വാസുദേവന്‍ നായര്‍ പറഞ്ഞു.

മൊബൈൽ ഫോൺ അപഹരിച്ച സംഭവത്തിൽ ഒരാൾ പിടിയിൽ

തലയോലപ്പറമ്പ്: ബസ് ഇറങ്ങി വീട്ടിലേക്ക് പോകുന്നതിനിടയിൽ ബൈക്കിലെത്തിയ മോഷ്ടാക്കൾ യുവാവിന്‍റെ മൊബൈൽ ഫോൺ അപഹരിച്ച സംഭവത്തിൽ ഒരാൾ പിടിയിൽ. മോഷ്ടിച്ച ഫോണിൽ സിം കാർഡിട്ട് ഉപയോഗിച്ച ആളെയാണ് പോലീസ് പിടികൂടിയത്. ആലപ്പുഴ അരൂർ പുത്തനങ്ങാടി അരച്ചപ്പറമ്പിൽ സേതുരാജി (55)നെയാണ് തലയോലപ്പറമ്പ് പോലീസ് പിടികൂടിയത്. കഴിഞ്ഞ ഡിസംബർ പത്തിന് രാത്രി 10.30ന് തലപ്പാറ ബസ്‌സ്റ്റോപ്പിന് സമീപമായിരുന്നു സംഭവം. കാരിക്കോട് നരിക്കുഴിപ്പടിക്കൽ ജിഷ്ണുവിന്‍റെ മൊബൈൽ ഫോണാണ് ബൈക്കിലെത്തിയ രണ്ടംഗസംഘം അപഹരിച്ച് രക്ഷപ്പെട്ടത്. എറണാകുളത്ത് സ്വകാര്യ കമ്പനി ജീവനക്കാരനായ ജിഷ്ണു ജോലി കഴിഞ്ഞ് തലപ്പാറ ജംഗ്ഷനിൽ ബസ് ഇറങ്ങിയശേഷം ബൈക്ക് ഇരിക്കുന്നിടത്തേക്ക് നടന്നു പോകുന്നതിനിടെയായിരുന്നു മൊബൈൽ ഫോൺ അപഹരിക്കപ്പെട്ടത്. ബൈക്കിലെത്തിയ യുവാക്കൾ ആശുപത്രി ആവശ്യത്തിനായി ഫോൺ ചെയ്യുന്നതിനായി ജിഷ്ണുവിന്‍റെ മൊബൈൽ ഫോൺ ആവശ്യപ്പെടുകയായിരുന്നു. ഇവർ പറഞ്ഞ നമ്പർ ഫോണിൽ ഡയൽ ചെയ്യുന്നതിനിടെ ബൈക്കിന്‍റെ പിന്നിലിരുന്ന യുവാവ് ജിഷ്ണുവിന്‍റെ കൈയിൽനിന്നും ഫോൺ തട്ടിപ്പറിച്ച് വേഗത്തിൽ ഓടിച്ച് പോകുകയായിരുന്നു. തുടർന്ന് ജിഷ്ണു തലയോലപ്പറമ്പ് പോലീസിൽ പരാതി നൽകുകയായിരുന്നു. പ്രാഥമിക അന്വേഷണത്തിന്‍റെ ഭാഗമായി പോലീസ് സിസിടിവി ദൃശ്യങ്ങളും മറ്റും പരിശോധിച്ചശേഷം കേസ് രജിസ്റ്റർ ചെയ്തു. തുടർന്ന് നടത്തിയ അന്വേഷണത്തിലാണ് ആലപ്പുഴ സ്വദേശിയായ സേതുരാജിന്‍റെ സിം കാർഡ് മോഷണം പോയ ഫോണിലിട്ട് ഉപയോഗിച്ചതായി പോലിസ് കണ്ടെത്തി ഇയാളെ പിടികൂടിയത്. മോഷ്ടിച്ച ഫോണിൽ ആരാണ് തന്‍റെ സിം കാർഡ് ഇട്ടതെന്ന് പറയാതെ വന്നതോടെയാണ് മോഷ്ടാവിനെ സംരക്ഷിക്കുന്ന കുറ്റം ചുമത്തി ഇയാളെ അറസ്റ്റ് ചെയ്തത്. കോടതിയിൽ ഹാജരാക്കിയ പ്രതിയെ റിമൻഡ് ചെയ്തു.

മാലിന്യങ്ങള്‍ നിറഞ്ഞും കാടുമൂടിയും റോഡരികിലെ ഓടകള്‍

കടുത്തുരുത്തി: മണ്ണും എക്കലും ചെളിയും മാലിന്യങ്ങളും‍ നിറഞ്ഞും കാടുമൂടിയും റോഡരികിലെ ഓടകള്‍. സ്ലാബില്ലാതെ തുറന്നു കിടക്കുന്ന ഓടകള്‍ കാടുമൂടിയതോടെ റോഡരികിലൂടെ നടക്കുന്നവര്‍ അപകടത്തില്‍പ്പെടുന്നതു പതിവായി. വാഹനങ്ങള്‍ റോഡരിക് ചേര്‍ന്നു വരുമ്പോള്‍ വശങ്ങളിലേക്ക് മാറിനില്‍ക്കാന്‍ കാൽനടയാത്രക്കാർ ശ്രമിക്കുമ്പോഴാണ് ഓടയിലേക്കു വീണ് അപകടങ്ങള്‍ ഉണ്ടാകുന്നത്. കൂടാതെ വലിയ വാഹനങ്ങള്‍ക്ക് സൈഡ് കൊടുക്കാന്‍ ഒതുക്കുന്ന ചെറിയ വാഹനങ്ങളും ഇത്തരത്തില്‍ ഓടകളില്‍ വീണ് അപകടത്തില്‍പ്പെടുന്നുണ്ട്. ഓടകള്‍ തെളിക്കണമെന്നും കാടും പള്ളയും വെട്ടിനീക്കണമെന്നും സ്ലാബുകള്‍ സ്ഥാപിക്കണമെന്നും ജനപ്രതിനിധികള്‍ ഉള്‍പ്പെടെ പലതവണ പിഡബ്ള്യുഡിയോട് ആവശ്യപ്പെട്ടിട്ടുണ്ടെങ്കിലും ഇതുവരെ നടപടിയായില്ല. പിഡബ്ള്യുഡിയുടെ നേതൃത്വത്തില്‍ ഓടകള്‍ തെളിച്ചിട്ട് വര്‍ഷങ്ങള്‍ കഴിഞ്ഞു. ഇതൊന്നും തങ്ങളുടെ പണിയല്ലെന്നാണ് പിഡബ്ള്യുഡിയുടെ നിലപാടെന്ന് ജനപ്രതിനിധികള്‍ പറയുന്നു. വാഹനത്തിരക്കേറിയ ഏറ്റുമാനൂര്‍-വൈക്കം റോഡിന്‍റെ വശങ്ങളിലൂടെ കടന്നുപോകുന്ന ഓട പലയിടത്തും സമാനരീതിയില്‍ അപകടഭീഷിണി ഉയര്‍ത്തുകയാണ്. മുട്ടുചിറ ജംഗ്ഷനിലും പെട്രോള്‍ പമ്പിന് സമീപവും ഉള്‍പ്പെടെ പലയിടത്തും റോഡരികില്‍ ഓടകള്‍ വാപിളര്‍ത്തി അപകടഭീഷിണിയുമായി നില്‍ക്കുകയാണ്. എക്കല്‍ നിറഞ്ഞ ഓടകളില്‍ വലിയ പുല്ലുകള്‍ വളര്‍ന്നു മൂടിയതിനാല്‍ ഇവിടം ഓടയുണ്ടെന്ന് പരിചയമില്ലാത്തവര്‍ക്ക് മനസിലാവില്ല. കഴിഞ്ഞദിവസം റോഡരികില്‍ കാര്‍ പാര്‍ക്ക് ചെയ്യാന്‍ ശ്രമിച്ചപ്പോഴും കാറിന്‍റെ വീല്‍ ഓടയിലേക്കു വീണു മുട്ടുചിറയില്‍ അപകടമുണ്ടായിരുന്നു. ഇന്നലെ ബസിന് സൈഡ് കൊടുക്കാന്‍ മാറിനില്‍ക്കുമ്പോള്‍ മുട്ടുചിറയില്‍ ഓടയില്‍ വീഴാന്‍ പോയ ആളെ അടുത്തുണ്ടായിരുന്നവരാണ് പിടിച്ചുമാറ്റി രക്ഷപ്പെടുത്തിയത്. ഓടകള്‍ തെളിക്കണമെന്നും വാ തുറന്നു കിടക്കുന്ന ഓടകള്‍ക്ക് മുകളില്‍ സ്ലാബുകള്‍ സ്ഥാപിക്കണമെന്നും പലതവണ ആവശ്യപ്പെട്ടെങ്കിലും നടപടിയില്ലെന്ന് കടുത്തുരുത്തി പഞ്ചായത്ത് വൈസ് പ്രസിഡന്‍റ് ജിന്‍സി എലിസബത്ത് പറഞ്ഞു. ആളുകള്‍ പരാതിപ്പെടുമ്പോൾ‍ പലപ്പോഴും സ്വന്തം ചെലവിലാണ് ഓട വെട്ടിത്തെളിക്കുന്നത്. മുട്ടുചിറ പമ്പിന് സമീപത്തുനിന്നും എച്ച്ജിഎം ആശുപത്രി റോഡില്‍ തകര്‍ന്ന് കിടന്ന ഓടയുടെ സ്ലാബ് സമീപത്തെ വ്യാപാരിയുടെ നേതൃത്വത്തില്‍ പണം മുടക്കിയാണ് ശരിയാക്കിയത്. പിഡബ്ള്യുഡിയോട് പലതവണ പറഞ്ഞിട്ടും നടപടിയുണ്ടായില്ല. ഇതിനിടെ സ്ത്രീ ഉൾപ്പെടെ നിരവധിപേര്‍ ഇവിടെ അപകടത്തില്‍പ്പെട്ടു. ഇതോടെയാണ് വ്യാപാരി പണം മുടക്കി ഓടയും സ്ലാബും നന്നാക്കിയതെന്നും ജിന്‍സി പറഞ്ഞു. പ്ലാസ്റ്റിക്ക് ചാക്കുകളും ഫ്‌ളെക്‌സും മണ്ണും ചെളിയും മാലിന്യങ്ങളുമെല്ലാം നിറഞ്ഞ് ഓടകള്‍ അടഞ്ഞിരിക്കുകയാണ്. മഴ പെയ്താല്‍ ടൗണുകളില്‍ വെള്ളക്കെട്ട് പതിവായി. മാലിന്യങ്ങളും എക്കലും ചെളിയും നിറഞ്ഞ് റോഡരികിലെ ഓടകള്‍ പൂര്‍ണമായും മൂടിയ നിലയിലാണ്. ശക്തമായ മഴയില്‍ വെള്ളം ഒഴുകിപ്പോകാനുള്ള സൗകര്യങ്ങള്‍ പരിമിതപ്പെട്ടതോടെ വെള്ളം റോഡില്‍ കെട്ടിനില്‍ക്കുന്ന കാഴ്ചയാണ് പലയിടത്തും. ഓടയില്‍നിന്നുള്ള മലിനജലം കലരുന്നതിനാല്‍ ഗുരുതരമായ ആരോഗ്യ പ്രശ്നങ്ങളാണ് ഇതില്‍ ചവിട്ടിനടക്കുന്നവര്‍ നേരിടുന്നത്. ഓടകള്‍ നിറഞ്ഞു വെള്ളക്കെട്ട് വ്യാപകമായതോടെ റോഡിന്‍റെ വശങ്ങളിലെ കെട്ടിടങ്ങളില്‍ കച്ചവടം നടത്തുന്ന വ്യാപാരികളും വാഹനം പാര്‍ക്ക് ചെയ്യുന്നവരും കല്‍നടയാത്രക്കാരും വിദ്യാര്‍ഥികളുമെല്ലാം ദുരിതത്തിലാണ്. സാധാരണ മഴയ്ക്കു മുമ്പ് ഓടകള്‍ വൃത്തിയാക്കാറുണ്ടെങ്കിലും ഇക്കുറി പലയിടത്തും ഓടശുചീകരണം പ്രഖ്യാപനത്തിലൊതുങ്ങിയെന്നും ആക്ഷേപമുണ്ട്.

കൈത്തോട് നികന്നുപോയതായി പരാതി

കടുത്തുരുത്തി: സ്വകാര്യ വ്യക്തികളുടെ കൈവശമുണ്ടായിരുന്ന ഏക്കറുകണക്കിന് നെല്‍പ്പാടങ്ങള്‍ വര്‍ഷങ്ങള്‍ക്കു മുമ്പ് മണ്ണിട്ട് നികത്തി റബര്‍നട്ടതോടെ പാടത്തിനു സമീപത്തുകൂടി ഒഴുകിയിരുന്ന കൈത്തോട് നികന്നു പോയതായി പരാതി. ഞീഴൂര്‍ പഞ്ചായത്തിലെ 12-ാം വാര്‍ഡില്‍ പാഴുത്തുരുത്തിലാണ് കൈത്തോട് നികന്നു പോയതായി പറയുന്നത്. ഒന്നരക്കിലോമീറ്ററോളം നീളമുണ്ടായിരുന്ന കൈത്തോടിന്‍റെ തുടക്കം മുതലുള്ള മുക്കാല്‍ ഭാഗത്തോളം പൂര്‍ണമായും നികന്ന് സ്വകാര്യ വ്യക്തികളുടെ സ്ഥലത്തില്‍ ഉള്‍പ്പെട്ട നിലയിലാണെന്ന് പറയുന്നു. വലിയതോടിന്‍റെ കുടിലിപ്പറമ്പ് കടവ് ഭാഗത്തേക്കു വന്നുചേരുന്ന കൈത്തോട് അഞ്ഞൂറ് മീറ്ററോളം ദൂരത്തില്‍ പഴയനിലയില്‍ത്തന്നെ അവശേഷിക്കുന്നുണ്ട്. നേരത്തേ വെള്ളം ഒഴുകിയിരുന്ന ഈ കൈത്തോട് നികന്നു പോയതിനാല്‍ വെള്ളത്തിന്‍റെ ഒഴുക്ക് നിലച്ചു പാരിസ്ഥിതിക പ്രതിസന്ധികള്‍ ഉണ്ടായിരിക്കുകയാണെന്ന് പറയുന്നു. നികന്നുപോയ കൈത്തോട് പൂര്‍വസ്ഥിതിയിലാക്കണമെന്നാവശ്യപ്പെട്ട് പരിസ്ഥിതി പ്രവര്‍ത്തകനും ബിജെപി നേതാവുമായ പി.സി. രാജേഷ് നല്‍കിയ പരാതിയെത്തുടര്‍ന്ന് ഞീഴൂര്‍ വില്ലേജ് ഓഫീസറും ഉദ്യോഗസ്ഥരും സ്ഥലെത്തെത്തി പരിശോധനകള്‍ നടത്തി.

ബ്ലഡ് ഡോണേഴ്‌സ് കേരളയ്ക്ക് ജീവന്‍ പകര്‍ന്ന വിനോദ് ഭാസ്‌കരന്‍ വിട വാങ്ങി

ചങ്ങനാശേരി: കഴിഞ്ഞദിവസം വിടവാങ്ങിയ കെഎസ്ആര്‍ടിസി ജീവനക്കാരന്‍ വിനോദ് ഭാസ്‌കരന്‍ ബ്ലഡ് ഡോണേഴ്‌സ് കേരള എന്ന സംഘടനയുടെ സ്ഥാപകനാണ്. ചങ്ങനാശേരി ഡിപ്പോയിലെ കണ്ടക്ടറായ പുഴവാത് സ്വദേശിയായ വിനോദ് ഭാസ്‌കരന്‍ തന്‍റെ ജോലിയുടെ ഇടവേളകളിലാണ് ബ്ലഡ് ഡോണേഴ്‌സ് കേരളയുടെ പ്രവര്‍ത്തനത്തിനു ജീവന്‍ പകര്‍ന്ന്. 2011ല്‍ സാമൂഹ്യ സേവനമെന്ന ആശയം മുന്‍നിര്‍ത്തി തുടങ്ങിയ വീ ഹെല്‍പ് ഫേസ് ബുക്ക് പേജിനു പിന്നാലെയാണ് വിനോദ് ഭാസ്‌കരന്‍റെ നേതൃത്വത്തിലുള്ള കൂട്ടായ്മ ബ്ലഡ് ഡോണേഴ്‌സ് കേരള എന്ന സംഘടനയ്ക്ക് രൂപം നല്‍കിയത്. ആശുപത്രികളില്‍ രക്തദാനത്തിന്‍റെ ആവശ്യകത മനസിലാക്കി തുടങ്ങിയ ഈ സംഘടന സംസ്ഥാനമൊട്ടാകെ വലിയ കൂട്ടായ്മയായി വളരുകയായിരുന്നു. ലക്ഷക്കണക്കിനു രോഗികള്‍ക്ക് രക്തദാന സേവനം ചെയ്ത സംഘടനയെന്ന ഖ്യാതിയും ഈ കൂട്ടായ്മയ്ക്കുണ്ട്. ഇന്ത്യയിലും വിദേശങ്ങളിലുമായി ബ്ലഡ് ഡോണേഴ്‌സ് കേരളയുടെ നേതൃത്വത്തില്‍ ദിവസേന നിരവധിപ്പേര്‍ക്ക് രക്തദാനം നിര്‍വഹിക്കുന്നുണ്ട്. കരള്‍രോഗം ബാധിച്ച വിനോദിന് മകന്‍ ആദിത്യന്‍ കരള്‍ നല്‍കിയിരുന്നു. കുറച്ചുദിവസമായി എറണാകുളത്തെ സ്വകാര്യ ആശുപത്രിയില്‍ ചികിത്സയിലിരിക്കെ ഇന്നലെയാണ് നാല്പെത്തെട്ടുകാരനായ വിനോദ് ഭാസ്‌കരന്‍റെ അന്ത്യം. സംസ്‌കാരം നാളെ മൂന്നിന് വീട്ടുവളപ്പിൽ നടത്തും. മൃതദേഹം നാളെ രാവിലെ ഒന്പതിന് മുൻസിപ്പൽ ടൗൺഹാളിലും 10.30ന് കെഎസ്ആർടിസി ഡിപ്പോയിലും പൊതുദർശനത്തിനു വയ്ക്കും. പുഴവാത് മന്ദാരമംഗലം ഭാസ്‌കരന്‍-ഗോമതിയമ്മ ദമ്പതികളുടെ മകനാണ്. ഭാര്യ: ഉഷ. മക്കള്‍: അനഘ, ആദിത്യന്‍, ആദര്‍ശ്.

ചങ്ങനാശേരിയിലെ വെറ്ററിനറി മൊബൈല്‍ യൂണിറ്റ് സേവനം ഗുണകരമാകുന്നു

ചങ്ങനാശേരി: കേരള സര്‍ക്കാര്‍ മൃഗസംരക്ഷണ വകുപ്പ് റീബിൽഡ് കേരള ഇനിഷ്യേറ്റീവ് പദ്ധതിയില്‍ ഉള്‍പ്പെടുത്തി ചങ്ങനാശേരി ഗവൺമെന്‍റ് വെറ്ററിനറി പോളിക്ലിനിക് കേന്ദ്രീകരിച്ച് ആരംഭിച്ച മൊബൈല്‍ വെറ്ററിനറി യൂണിറ്റിന്‍റെ സേവനം മൃഗങ്ങളുടെ ഉടമകള്‍ക്കു ഗുണകരമാകുന്നു. കഴിഞ്ഞ മേയ് 30 മുതലാണ് ചങ്ങനാശേരിയിലെ മൊബൈല്‍ വെറ്ററിനറി യൂണിറ്റിന്‍റെ പ്രവര്‍ത്തനം മാടപ്പള്ളി, പാമ്പാടി ബ്ലോക്ക് പഞ്ചായത്തുകളില്‍ക്കൂടി ലഭ്യമാക്കിയത്. അതേസമയം, വൈകുന്നേരം ആറുമുതല്‍ പുലര്‍ച്ചെ അഞ്ചുവരെയായിരുന്ന യൂണിറ്റിന്‍റെ പ്രവര്‍ത്തനം ഇന്നലെ മുതല്‍ വൈകുന്നേരം നാലുമുതല്‍ രാത്രി 12 വരെയാക്കി വെട്ടിക്കുറച്ചിട്ടുണ്ട്. വെറ്ററിനറി ഡയറക്ടറേറ്റിന്‍റെ നിർദേശപ്രകാരം സംസ്ഥാനത്തെ മുഴുവന്‍ മൊബൈല്‍ യൂണിറ്റിന്‍റെയും പ്രവര്‍ത്തനസമയം വൈകുന്നേരം നാലുമുതല്‍ രാത്രി 12 വരെയാക്കിയിട്ടുണ്ട്. 1962 എന്ന ടോള്‍ഫ്രീ നമ്പറില്‍ വിളിച്ചാല്‍ മൊബൈല്‍ യൂണിറ്റിന്‍റെ സേവനം ലഭ്യമാകും. വാഹനത്തില്‍ സജ്ജമാക്കിയിരിക്കുന്ന ക്യുആര്‍ കോഡ് വഴി കര്‍ഷകര്‍ക്ക് നേരിട്ട് ഫീസ് അടയ്ക്കാവുന്നതാണ്. ഒരു ഡോക്ടറും ഡ്രൈവര്‍ കം അറ്റന്‍ഡറും ഉള്‍പ്പെടുന്നതാണ് യൂണിറ്റ്.

അസംപ്ഷന്‍ കോളജിന് പൗരാവലിയുടെ അഭിനന്ദനം

ചങ്ങനാശേരി: എംജി യൂണിവേഴ്‌സിറ്റിയിലെ മികച്ച രണ്ടാമത്തെ കായിക കലാലയം എന്ന ബഹുമതി കരസ്ഥമാക്കിയ അസംപ്ഷന്‍ കോളജിനെ പൗരാവലി യോഗം അനുമോദിച്ചു. കോളജ് ഓഡിറ്റോറിയത്തില്‍ ചേര്‍ന്ന യോഗത്തില്‍ ഡോ. റൂബിള്‍ രാജ് അധ്യക്ഷത വഹിച്ചു. ജോബ് മൈക്കിള്‍ എംഎല്‍എ ഉദ്ഘാടനം ചെയ്തു. പൗരാവലിയുടെ ഉപഹാരം എംഎല്‍എ പ്രിന്‍സിപ്പല്‍ ഡോ. റാണി മരിയ തോമസിനു സമ്മാനിച്ചു. കേരള കോണ്‍ഗ്രസ് സംസ്ഥാന വൈസ് ചെയര്‍മാന്‍ കെ.എഫ്. വര്‍ഗീസ്, ഫാ. എബി പുതുശേരി, ഫാ. റോജന്‍ പുരയ്ക്കല്‍, നെജിയ നൗഷാദ്, എല്‍സമ്മ ജോബ്, ലിസി ജോസ്, കുര്യന്‍ തൂമ്പുങ്കല്‍, റൗഫ് റഹീം, ഡോ. സുജ മേരി ജോര്‍ജ് എന്നിവര്‍ പ്രസംഗിച്ചു.

രാജീവ് വിചാര്‍ വേദി മെറിറ്റ് അവാര്‍ഡ് വിതരണം

ചങ്ങനാശേരി: വിദ്യാഭ്യാസ മേഖലയില്‍ ദീര്‍ഘവീക്ഷണത്തോടുകൂടി പദ്ധതികള്‍ ആവിഷ്‌കരിച്ചു നടപ്പിലാക്കിയ പ്രധാനമന്ത്രിയായിരുന്നു രാജീവ് ഗാന്ധിയെന്ന് തിരുവഞ്ചൂര്‍ രാധാകൃഷ്ണന്‍ എംഎല്‍എ. രാജീവ് വിചാര്‍ വേദി സംഘടിപ്പിച്ച വിദ്യാഭ്യാസ സെമിനാറും വി.എസ്. നന്ദഗോപാലിന്‍റെ സ്മരണാര്‍ഥമുള്ള രാജീവ് ഗാന്ധി മെറിറ്റ് അവാര്‍ഡുദാന ചടങ്ങും ഉദ്ഘാടനം ചെയ്യുകയായിരുന്നു അദ്ദേഹം. പ്രസിഡന്‍റ് ബാബു കുട്ടന്‍ചിറ അധ്യക്ഷത വഹിച്ചു. ജോബ് മൈക്കിള്‍ എംഎല്‍എ, ജോസി സെബാസ്റ്റ്യന്‍, വി.ജെ. ലാലി, ജസ്റ്റിന്‍ ബ്രൂസ്, രാജീവ് മേച്ചേരി, സൈനാ തോമസ്, മേരിക്കുട്ടി ജോസഫ്, ജിന്‍സണ്‍ മാത്യു, സണ്ണി എത്തയ്ക്കാട്ട്, അഡ്വ. ബിപിന്‍ വര്‍ഗീസ്, മനുകുമാര്‍, റോസ്‌ലിന്‍ ഫിലിപ്പ് എന്നിവര്‍ പ്രസംഗിച്ചു.

രാമായണ മാസാചരണം: മുന്നൊരുക്കങ്ങള്‍ നടത്തി

പെരുവ: രാമായണ മാസാചരണത്തിന്‍റെ ഭാഗമായി നടക്കുന്ന നാലമ്പല തീര്‍ഥാടനത്തിന്‍റെ മുന്നൊരുക്കങ്ങള്‍ മുളക്കുളം ശ്രീലക്ഷ്മണ സ്വാമീക്ഷേത്രത്തില്‍ പൂര്‍ത്തിയായി. തിരുവിതാംകൂര്‍ ദേവസ്വം ബോര്‍ഡും ക്ഷേത്രോപദേശക സമിതിയും എറണാകുളം ജില്ലാ നാലമ്പല തീര്‍ഥയാത്ര സമിതിയുമായി സഹകരിച്ചാണ് ദശരഥി ക്ഷേത്രങ്ങളിലൊന്നായ മുളക്കുളം ശ്രീലക്ഷ്മണസ്വാമീ ക്ഷേത്രത്തില്‍ ഇതിനുള്ള ഒരുക്കങ്ങള്‍ നടത്തുന്നത്. ക്ഷേത്രത്തില്‍ നാലമ്പല തീര്‍ഥാടന സമിതിയും രൂപവത്കരിച്ചിട്ടുണ്ട്. നാലമ്പല തീര്‍ഥാടനത്തിന്‍റെ ഉദ്ഘാടനം ഇന്നു രാമമംഗലം മാമലശേരി ശ്രീരാമസ്വാമീ ക്ഷേത്രത്തില്‍ നടക്കും. വൈകുന്നേരം ആറിന് നടക്കുന്ന സമ്മേളനം ശബരിമല അയ്യപ്പസേവാസമാജം പ്രസിഡന്‍റ് പുണര്‍തം തിരുനാള്‍ നാരായണവര്‍മ ഉദ്ഘാടനം ചെയ്യും. നാലമ്പലസമിതി പ്രസിഡന്‍റ് എന്‍. രഘുനാഥ് അധ്യക്ഷത വഹിക്കും. മുന്‍ ഡിജിപി അലക്സാണ്ടര്‍ ജേക്കബ്, വിവിധ ജനപ്രതിനിധികള്‍ തുടങ്ങിയവര്‍ പങ്കെടുക്കും. 17 മുതല്‍ ഓഗസ്റ്റ് 16 വരെയാണ് നാലമ്പലദര്‍ശനവും രാമായണമാസാചരണവും. തീര്‍ഥാടനകാലത്ത് രാവിലെ മുതല്‍ ക്ഷേത്രത്തിലെത്തുന്ന ഭക്തര്‍ക്ക് ക്ഷേത്രോപദേശക സമിതി അന്നദാനവും നല്‍കും. നാലമ്പല ദര്‍ശനത്തിനായി വിവിധ ഡിപ്പോകളില്‍നിന്ന് ഭക്തരുടെ ആവശ്യാനുസരണം സര്‍വീസുകള്‍ നടത്താനുള്ള ക്രമീകരണം കെഎസ്ആര്‍ടിസിയും ഒരുക്കിയിട്ടുണ്ടെന്ന് നാലമ്പല സമിതി ഭാരവാഹികള്‍ അറിയിച്ചു.

മാധ്യമപ്രവര്‍ത്തകര്‍ക്കായി കുടുംബശ്രീ ശില്പശാല സംഘടിപ്പിച്ചു

കോട്ടയം: കുടുംബശ്രീയുടെ 27-ാം വാര്‍ഷികവുമായി ബന്ധപ്പെട്ട് കുടുംബശ്രീയുടെ പ്രവര്‍ത്തനങ്ങള്‍ക്കു കൂടുതല്‍ പ്രചാരണം ലഭിക്കുകയെന്ന ലക്ഷ്യത്തോടെ ജില്ലയിലെ മാധ്യമപ്രവര്‍ത്തകര്‍ക്കായി ശില്പശാല സംഘടിപ്പിച്ചു. കുടുംബശ്രീ ജില്ലാ മിഷന്‍റെ നേതൃത്വത്തില്‍ കോട്ടയം ഓര്‍ക്കിഡ് റെസിഡന്‍റ്സിയില്‍ നടന്ന ശില്പശാല ജില്ലാ പഞ്ചായത്ത് പ്രസിഡന്‍റ് ഹേമലതാ പ്രേംസാഗര്‍ ഉദ്ഘാടനം ചെയ്തു. കുടുംബശ്രീ ജില്ലാ മിഷന്‍ കോ-ഓർഡിനേറ്റര്‍ അഭിലാഷ് കെ. ദിവാകര്‍, ഐപിആര്‍ഡി അസിസ്റ്റന്‍റ് എഡിറ്റര്‍ ഇ.വി. ഷിബു, കോട്ടയം പ്രസ് ക്ലബ് പ്രസിഡന്‍റ് അനീഷ് കുര്യന്‍, കുടുംബശ്രീ സിഡിഎസ് ചെയര്‍പേഴ്സണ്‍മാരായ നളിനി ബാലന്‍, പി.ജി. ജ്യോതിമോള്‍, കുടുംബശ്രീ പിആര്‍ ഇന്‍റേണ്‍ വി.വി. ശരണ്യ, കുടുംബശ്രീ പ്രോഗ്രാം മാനേജര്‍ അനൂപ് ചന്ദ്രന്‍ എന്നിവര്‍ പ്രസംഗിച്ചു. ജില്ലയിലെ മാധ്യമപ്രവര്‍ത്തകര്‍, കുടുംബശ്രീ ജില്ലാ മിഷന്‍ ഉദ്യോഗസ്ഥര്‍, കുടുംബശ്രീ, സിഡിഎസ് അംഗങ്ങള്‍, കുടുംബശ്രീ സംരംഭകര്‍ എന്നിവര്‍ പങ്കെടുത്തു.

അമിത പലിശയ്ക്ക് പണം കടം കൊടുക്കുന്നയാൾ പിടിയിൽ

കുമരകം: ലൈസൻസില്ലാതെ അനധികൃതമായി അമിത പലിശ വാങ്ങി പണം കടം കൊടുക്കുന്നയാളെ കുമരകം പോലീസ് പിടികൂടി. തിരുവാർപ്പ് പഞ്ചായത്തിലെ ചെങ്ങളം ഇടശേരിമന ഭാഗത്ത് കണ്ണന്തറ രാജേഷ് എന്നയാളാണ് കുമരകം പോലീസിന്‍റെ പിടിയിലായത്. നിയമാനുസരണമുള്ള ലൈസന്‍സോ അധികാരപത്രങ്ങളോ ഇല്ലാതെ അമിത പലിശയ്ക്ക് പണം കടം കൊടുക്കുന്നതായി കുമരകം എസ്എച്ച്ഒ കെ. ഷിജിക്ക് ലഭിച്ച രഹസ്യവിവരത്തിന്‍റെ അടിസ്ഥാനത്തിൽ ജില്ലാ പോലീസ് മേധാവിയുടെ നിർദേശപ്രകാരം നടത്തിയ അന്വേഷണത്തിലാണ് ഇയാൾ പിടിയിലായത്. കുമരകം എസ്ഐ ഹരിഹരകുമാറിന്‍റെ നേതൃത്വത്തിൽ നടത്തിയ റെയ്ഡിൽ വീട്ടിൽനിന്നും പണം കടം കൊടുത്തതിന്‍റെ രേഖകൾ, ചെക്കുകൾ, പ്രോമിസറി നോട്ടുകൾ, മുദ്രപത്രം, കടം കൊടുക്കുന്നതിനായി കൈവശം സൂക്ഷിച്ചിരുന്ന നാലു ലക്ഷത്തോളം രൂപ എന്നിവ പിടിച്ചെടുത്തു. പ്രതിയുടെ അറസ്റ്റ് രേഖപ്പെടുത്തി വിവിധ വകുപ്പുകൾ പ്രകാരം കേസ് രജിസ്റ്റർ ചെയ്തു.

കുടകളും മഴക്കോട്ടുകളും സൗജന്യമായി നൽകി

ഏറ്റുമാനൂർ: ഏറ്റുമാനൂർ സർവീസ് സഹകരണ ബാങ്ക് കുട്ടികൾക്ക് കുടകളും ഹരിതകർമസേനയ്ക്ക് മഴക്കോട്ടുകളും സൗജന്യമായി നൽകി. ഏറ്റുമാനൂർ നഗരസഭയിലെ വിവിധ സ്കൂളുകളിൽനിന്നുള്ള അർഹതപ്പെട്ട വിദ്യാർഥികൾക്കാണ് കുടകളും ഉച്ചഭക്ഷണത്തിനുള്ള ധനസഹായവും നൽകിയത്. ബാങ്ക് പ്രസിഡന്‍റ് ബിജു കുമ്പിക്കൻ അധ്യക്ഷത വഹിച്ച യോഗത്തിൽ ജില്ലാ കളക്ടർ ജോൺ വി. സാമുവൽ വിതരണോദ്ഘാടനം നിർവഹിച്ചു. നഗരസഭാ ചെയർപേഴ്സൺ ലൗലി ജോർജ്, ആരോഗ്യ സ്റ്റാൻഡിംഗ് കമ്മിറ്റി ചെയർപേഴ്സൺ ബീന ഷാജി, കൗൺസിലർ പ്രിയ സജീവ്, ബാങ്ക് വൈസ് പ്രസിഡന്‍റ് സുശീല ചന്ദ്രസേനൻ നായർ, ബോർഡ് മെംബർമാരായ ചിറയിൽ സിബി, രാജു തോമസ്, സജി വള്ളോംകുന്നേൽ, ആർ. രവികുമാർ, കെ.എൻ. രഞ്ജിത്കുമാർ, ലിയോൺ ജോസ്, മായാദേവി ഹരികുമാർ, ജെസി ജോയി എന്നിവർ സന്നിഹിതരായിരുന്നു.

കുളത്തൂര്‍മൂഴി-പുന്നവേലി-നെടുംകുന്നം റൂട്ടില്‍ കെഎസ്ആര്‍ടിസി സര്‍വീസ് തുടങ്ങി

കറുകച്ചാല്‍: കുളത്തൂര്‍മൂഴി-പുന്നവേലി -നെടുംകുന്നം റൂട്ടില്‍ കെഎസ്ആര്‍ടിസി ബസ് സര്‍വീസ് ആരംഭിച്ചത് നാട്ടുകാര്‍ക്ക് ആശ്വാസവും ഒപ്പം ആവേശവുമായി. പുതുതായി എത്തിയ ബസ് സര്‍വീസിന് കഴിഞ്ഞദിവസം നാട്ടുകാരുടെ നേതൃത്വത്തില്‍ സ്വീകരണം നല്‍കി. പി.കെ. കര്‍മസമിതി, പുന്നവേലി വികസനസമിതി എന്നിവരുടെ നിവേദനത്തെത്തുടര്‍ന്ന് ഗവൺമെന്‍റ് ചീഫ് വിപ്പ് ഡോ.എന്‍. ജയരാജിന്‍റെ ഇടപെടലില്‍ ഗതാഗത മന്ത്രി കെ.ബി. ഗണേഷ്‌കുമാർ നിര്‍ദേശിച്ചതോടെയാ ണ് മല്ലപ്പള്ളി ഡിപ്പോയില്‍നിന്നും ബസ് സര്‍വീസ് ആരംഭിച്ചത്. അരനൂറ്റോണ്ടോളം ഈ റൂട്ടില്‍ സര്‍വീസ് നടത്തിയിരുന്ന സ്വകാര്യ ബസ് നിര്‍ത്തലാക്കിയതിനെത്തുടര്‍ന്നാണ് പുതിയ സര്‍വീസ് വേണമെന്ന ആവശ്യവുമായി നാട്ടുകാരും വിവിധ സന്നദ്ധ സംഘടനകളും രംഗത്തെത്തിയത്. ബസ് നിര്‍ത്തിയത് പുന്നവേലി, കുളത്തൂര്‍മൂഴി റൂട്ടിലെ യാത്രക്കാരെ ദുരിതത്തിലാക്കിയിരുന്നു. കെഎസ്ആര്‍ടിസി ബസ് സര്‍വീസ് ആരംഭിച്ചതോടെ ഈ പ്രദേശങ്ങളിലെ യാത്രാക്ലേശത്തിന് ഒട്ടൊക്കെ പരിഹാരമായി.

ലഹരിവിരുദ്ധ ചങ്ങലയും പൊതുസമ്മേളനവും നാളെ

ചങ്ങനാശേരി: കേരള സ്റ്റേറ്റ് ഭാരത് സ്‌കൗട്‌സ് ആന്‍ഡ് ഗൈഡ്‌സ് ചങ്ങനാശേരി ലോക്കല്‍ അസോസിയേഷന്‍റെ നേതൃത്വത്തില്‍ ലഹരിവിരുദ്ധ റാലിയും ബോധവത്കരണ സെമിനാറും നാളെ രാവിലെ ഒമ്പതിന് നടക്കും. നഗരസഭാധ്യക്ഷ കൃഷ്ണകുമാരി രാജശേഖരന്‍ റാലി ഫ്‌ളാഗ് ഓഫ് ചെയ്യും. നൂറുകണക്കിന് സ്‌കൗട്ട് ഗൈഡ് അംഗങ്ങള്‍ മനുഷ്യച്ചങ്ങല സൃഷ്ടിക്കും. തുടര്‍ന്ന് സെന്‍റ് ജോസഫ് ഹയര്‍ സെക്കന്‍ഡറി സ്‌കൂള്‍ ഓഡിറ്റോറിയത്തില്‍ ചേരുന്ന സമ്മേളനത്തില്‍ എഇഒ കെ.എ. സുനിത അധ്യക്ഷത വഹിക്കും. ജോബ് മൈക്കിള്‍ എംഎല്‍എ ഉദ്ഘാടനം ചെയ്യും. എക്‌സൈസ് പ്രിവന്‍റിവ് ഓഫീസര്‍ രാജേഷ് "യുവജനങ്ങളിലെ ലഹരി ഉപയോഗം’ എന്ന വിഷയത്തില്‍ സെമിനാര്‍ നയിക്കും. മുന്‍സിപ്പല്‍ കൗണ്‍സിലര്‍ ബീനാ ജോബി, ഡിസ്ട്രിക് കമ്മീഷണര്‍ ആന്‍സി മേരി ജോണ്‍, സിസ്റ്റര്‍ ധന്യ തെരേസ്, സിസ്റ്റര്‍ ലിറ്റി തെരേസ്, അമ്പിളി വി., എസ്.എ. രാജീവ്, നന്ദകുമാര്‍ സി., സുധീര്‍ പി.ആര്‍., ജോസഫ് വര്‍ഗീസ് എന്നിവര്‍ പ്രസംഗിക്കും.

എംടി കൃതികളുടെ പുനർവായന നടത്തി

തലയോലപ്പറമ്പ്: എം.ടി. വാസുദേവൻ നായരുടെ 92-ാമത് ജന്മദിനത്തോടനുബന്ധിച്ച് വൈക്കം മുഹമ്മദ് ബഷീർ സ്മാരക സമിതി, ബഷീർ അമ്മ മലയാളം, എം.ടി. ഫൗണ്ടേഷൻ എന്നിവയുടെ സംയുക്താഭിമുഖ്യത്തിൽ എം.ടി. കൃതികളുടെ പുനർവായന നടത്തി. തലയോലപ്പറമ്പ് ഫെഡറൽ നിലയത്തിൽ വൈക്കം മുഹമ്മദ് ബഷീർ സ്മാരക സമിതി ജനറൽ സെക്രട്ടറി പി.ജി. ഷാജിമോന്‍റെ അധ്യക്ഷതയിൽ നടന്ന യോഗം ലിറ്റററി ഫോട്ടോഗ്രാഫർ മനോജ് ഡി. വൈക്കം ഉദ്ഘാടനം ചെയ്തു. ഫെഡറൽ ബാങ്ക് ബ്രാഞ്ച് മാനേജർ എം.എസ്. ഇന്ദു, ബഷീർ കഥാപാത്രം സെയ്തു മുഹമ്മദ്, ഡി. കുമാരികരുണാകരൻ, എം.ജെ. ജോർജ്, തുളസി മധുസുദനൻനായർ, അഞ്ജലി വി. നായർ, കെ.പി. ആരതി എന്നിവർ എം.ടി. കൃതികളുടെ പുനർവായന നടത്തി.

പൊതുമരാമത്ത്, ജലവിഭവ വകുപ്പ് സംയുക്ത യോഗം ഇന്ന് കടുത്തുരുത്തിയില്‍

കടുത്തുരുത്തി: പൊതുമരാമത്ത് വകുപ്പിന്‍റെ കീഴിലുള്ള വിവിധ റോഡുകളുടെ പുനരുദ്ധാരണവും അറ്റകുറ്റപ്പണികളും സംബന്ധിച്ചു പരിശോധിക്കുന്നതിനും വാട്ടര്‍ അഥോറിറ്റിയുടെ നേതൃത്വത്തില്‍ നടപ്പാക്കുന്ന കുടിവെള്ള പദ്ധതികളുടെ നിര്‍വഹണവും പൂര്‍ത്തീകരണവും സംബന്ധിച്ചു തീരുമാനിക്കുന്നതിനുമായി കടുത്തുരുത്തി നിയോജകമണ്ഡലം അടിസ്ഥാനത്തിലുള്ള പ്രധാന ഉദ്യോഗസ്ഥരുടെയും പ്രവൃ‍ത്തികള്‍ ഏറ്റെടുത്തിട്ടുള്ള കരാറുകാരുടെയും സാന്നിധ്യത്തില്‍ ഇന്നു രാവിലെ 11 ന് കടുത്തുരുത്തി പിഡബ്ല്യുഡി റസ്റ്റ് ഹൗസ് കോണ്‍ഫറന്‍സ് ഹാളില്‍ മോന്‍സ് ജോസഫ് എംഎല്‍എയുടെ അധ്യക്ഷതയില്‍ യോഗം ചേരും. കടുത്തുരുത്തി നിയോജകമണ്ഡലത്തിന്‍റെ കീഴില്‍ വരുന്ന പഞ്ചായത്തുകളുടെ പരിധിയിലുള്ള എല്ലാ റോഡുകളുമായി ബന്ധപ്പെട്ടും കുടിവെള്ള പദ്ധതികള്‍ സംബന്ധിച്ചും പ്രത്യേകമായി ചര്‍ച്ച ചെയ്ത് ആവശ്യമായ തീരുമാനങ്ങളെടുക്കും.

സ്വര്‍ഗീയ മധ്യസ്ഥ തിരുനാളും സ്ഥാനാരോഹണച്ചടങ്ങും

കടുത്തുരുത്തി: സെന്‍റ് കുര്യാക്കോസ് പബ്ലിക് സ്‌കൂളിലെ സ്വര്‍ഗീയ മധ്യസ്ഥ തിരുനാളും സ്‌കൂള്‍ പാര്‍ലമെന്‍റംഗങ്ങളുടെയും ക്ലബ്ബ് ഭാരവാഹികളുടെയും സ്ഥാനാരോഹണച്ചടങ്ങും സ്‌കൂള്‍ ഓഡിറ്റോറിയത്തില്‍ നടന്നു. സ്‌കൂളിന്‍റെ സ്വര്‍ഗീയ മധ്യസ്ഥനായ വിശുദ്ധ കുര്യാക്കോസിന്‍റെ തിരുനാള്‍ ദിനമായ 15നാണ് വിവിധ കലാപരിപാടികളോടെ ചടങ്ങ് നടന്നത്. ഇതോടൊപ്പം സ്‌കൂള്‍ പാര്‍ലമെന്‍റ് മത്സരത്തിലൂടെ തെരഞ്ഞെടുക്കപ്പെട്ടവരുടെയും വിവിധ ക്ലബ്ബ് ഭാരവാഹികളുടെയും സ്ഥാനാരോഹണച്ചടങ്ങും നടന്നു. ആനിക്കാട് സെന്‍റ് ഗ്രിഗോറിയോസ് സിറിയന്‍ ഓര്‍ത്തഡോക്‌സ് ദയറാ സുപ്പീരിയര്‍ ഫാ. സിവേറിയസ് തോമസ് സ്വര്‍ഗീയ മധ്യസ്ഥ തിരുനാളിനോടനുബന്ധിച്ചുള്ള സന്ദേശം നല്‍കി. ഉഴവൂര്‍ മോട്ടോര്‍ വെഹിക്കിള്‍ ഇന്‍സ്‌പെക്ടര്‍ ബി. ജയപ്രകാശ് വിവിധ ഭാരവാഹികളുടെ സ്ഥാനാരോഹണച്ചടങ്ങിനു നേതൃത്വം നല്‍കി. പ്രിന്‍സിപ്പൽ‍ ഫാ. അജീഷ് കുഞ്ചിറക്കാട്ട് പ്രതിജ്ഞ ചൊല്ലിക്കൊടുത്തു. സ്‌കൂള്‍ മാനേജര്‍ ഫാ. ബിനോ ചേരിയില്‍ അധ്യക്ഷത വഹിച്ചു. സ്‌കൂളില്‍ 30 വര്‍ഷത്തെ സേവനം അനുഷ്ഠിച്ചു വിരമിക്കുന്ന മേഴ്‌സി സിറിയക്കിന് യാത്രയയപ്പ് നല്‍കി. പത്താം ക്ലാസ് പരീക്ഷയില്‍ റീ വാലുവേഷനിലൂടെ എല്ലാ വിഷയങ്ങള്‍ക്കും എ പ്ലസ് നേടിയ ആദില്‍ മുഹമ്മദിനെ ആദരിച്ചു. സ്‌കൂള്‍ അസിസ്റ്റന്‍റ് മാനേജര്‍ ഫാ. ജിന്‍സ് അലക്‌സാണ്ടര്‍, വൈസ് പ്രിന്‍സിപ്പല്‍ രഞ്ജി വില്‍സണ്‍, പിടിഎ പ്രസിഡന്‍റ് ജെന്നി റോബിന്‍, സ്‌കൂള്‍ ലീഡര്‍മാരായ ഡെയ്‌സ് ജന്‍സന്‍, റോസ് റോബിന്‍ തുടങ്ങിയവര്‍ പ്രസംഗിച്ചു. കുട്ടികളുടെ വിവിധ കലാപരിപാടികളും നടന്നു.

ഒരു മാസത്തിനിടെ നട്ടത് ഒരു ലക്ഷം തൈകള്‍

കോട്ടയം: ആഗോള പരിസ്ഥിതി ദിനത്തില്‍ കേരള സര്‍ക്കാര്‍ ആരംഭിച്ച ഒരു തൈ നടാം ജനകീയ വൃക്ഷവത്കരണ കാമ്പയിന്‍ ഒരു മാസം പിന്നിടുമ്പോള്‍ ജില്ലയില്‍ ഇതുവരെ നട്ടുപിടിപ്പിച്ചത് 1,01,148 വൃക്ഷത്തൈകള്‍. നാലുമാസം നീണ്ടുനില്‍ക്കുന്ന കാമ്പയിനില്‍ സംസ്ഥാനത്ത് ഒരു കോടി വൃക്ഷത്തൈകളും ജില്ലയില്‍ ഏഴര ലക്ഷം തൈകളും വച്ചുപിടിപ്പിക്കുകയാണ് ലക്ഷ്യം. ഹരിതകേരളം മിഷന്‍റെ ഏകോപനത്തില്‍ സാമൂഹ്യ വനവത്കരണവകുപ്പ്, ദേശീയ തൊഴിലുറപ്പ് പദ്ധതി, കുടുംബശ്രീ, ഹരിതകര്‍മസേന തുടങ്ങിയവയുടെ സഹകരണത്തോടെ തദ്ദേശ സ്വയംഭരണ സ്ഥാപനങ്ങളാണ് പദ്ധതി നടപ്പാക്കുന്നത്. വിദ്യാഭ്യാസ വകുപ്പിന്‍റെ സഹകരണത്തോടെ നടപ്പാക്കിയ ചങ്ങാതിക്കൊരു മരം കാമ്പയിനിലൂടെ പൊതുവിദ്യാലയങ്ങളിൽ ഇതുവരെ 60,600 തൈകളാണ് കുട്ടികള്‍ പരസ്പരം കൈമാറിയത്. ഇവ വീട്ടുപരിസരങ്ങളില്‍ സൗഹൃദ മരങ്ങളായി വളരും. കുട്ടികള്‍ തൈകളുടെ വളര്‍ച്ചാഘട്ടങ്ങള്‍ ഡയറിയില്‍ എഴുതി ക്ലാസുകളില്‍ വായിച്ച് അവതരിപ്പിക്കും. അണ്‍-എയ്ഡഡ് സ്‌കൂളുകളില്‍ ആരംഭിച്ച കാമ്പയിനിന്‍റെ ഭാഗമായി നടുന്ന തൈകള്‍ ശാസ്ത്ര സാങ്കേതിക സര്‍വകലാശാലയുടെ സഹായത്തോടെ ജിയോ ടാഗ് ചെയ്യുന്ന പ്രവര്‍ത്തനവും ആരംഭിക്കും. ഇതിനായി തയാറാക്കിയ പോര്‍ട്ടലില്‍നിന്ന് ട്രീ സര്‍ട്ടിഫിക്കറ്റ് ഡൗണ്‍ലോഡ് ചെയ്യാം. ആറുമാസത്തിലൊരിക്കല്‍ എന്‍ജിനിയറിംഗ് കോളജുകളിലെ എന്‍എസ്എസ് വോളണ്ടിയര്‍മാര്‍ സസ്യത്തിന്‍റെ വളര്‍ച്ച പോര്‍ട്ടലില്‍ പുതുക്കും. ആദ്യഘട്ടത്തില്‍ 10 ശതമാനം വൃക്ഷത്തൈകളാണ് ജിയോ ടാഗ് ചെയ്യുക.

കാട്ടുപന്നിശല്യത്തിനെതിരേ തദ്ദേശസ്ഥാപനങ്ങള്‍ സര്‍ക്കാര്‍ ഉത്തരവ് നടപ്പാക്കണം: ഇന്‍ഫാം

പാറത്തോട് (കാഞ്ഞിരപ്പള്ളി): ജനവാസമേഖലകളിലിറങ്ങി മനുഷ്യജീവനും സ്വത്തിനും നാശനഷ്ടങ്ങളുണ്ടാക്കുന്ന കാട്ടുപന്നികളെ വെടിവച്ചോ അനുവദനീയമായ മറ്റു മാര്‍ഗങ്ങളിലൂടെയോ തടയുന്നതിന് തദ്ദേശ സ്ഥാപനങ്ങള്‍ക്ക് സര്‍ക്കാര്‍ നല്‍കിയ ഉത്തരവാദിത്വം ഫലപ്രദമായി നടപ്പിലാക്കുന്നതില്‍ പഞ്ചായത്തു ഭരണസമിതികള്‍ വീഴ്ച വരുത്താന്‍ പാടില്ലെന്ന് ഇന്‍ഫാം ദേശീയ ചെയര്‍മാന്‍ ഫാ. തോമസ് മറ്റമുണ്ടയില്‍. ഇന്‍ഫാം കാഞ്ഞിരപ്പള്ളി കാര്‍ഷികജില്ല എക്സിക്യൂട്ടീവ് യോഗം ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം. മനുഷ്യവാസ മേഖലയിലെ ആളുകളുടെ ജീവനും സ്വത്തിനും കൃഷിക്കും ഭീഷണിയായ കാട്ടുപന്നികളെ വെടിവച്ച് കൊല്ലുന്നതിനുവേണ്ടി ലൈസന്‍സുള്ള ഷൂട്ടര്‍മാരെ നിയോഗിക്കാന്‍ കേരള ഗവണ്‍മെന്‍റിന്‍റെ ഡിസാസ്റ്റര്‍ മാനേജ്‌മെന്‍റ് ഡിപ്പാര്‍ട്ട്‌മെന്‍റിന്‍റെ ജിഒ (ആർടി) നന്പർ 108/2025/ ഡിഎംഡി ഉത്തരവു പ്രകാരം തദ്ദേശ സ്വയംഭരണ സ്ഥാപനങ്ങളുടെ അധ്യക്ഷന്മാര്‍ക്ക് അധികാരം നല്‍കിയിട്ടുണ്ട്. മുഖ്യമന്ത്രിയും വനംമന്ത്രിയും ഇക്കാര്യത്തില്‍ കര്‍ഷക അനുകൂലമായ നിലപാടുകള്‍ സ്വീകരിച്ചിട്ടും നടപടികള്‍ കൈക്കൊള്ളാത്ത പഞ്ചായത്തുകള്‍ അക്ഷന്തവ്യമായ കൃത്യവിലോപമാണ് ഇക്കാര്യത്തില്‍ സ്വീകരിക്കുന്നത്. ഈ ഉത്തരവ് ഫലപ്രദമായി നടപ്പാക്കാന്‍ പല തദ്ദേശ സ്ഥാപനങ്ങളും വേണ്ടത്ര ജാഗ്രത കാണിക്കുന്നില്ലെന്ന് വനംമന്ത്രിപോലും പരിതപിക്കുന്നതായി മാധ്യമങ്ങള്‍ റിപ്പോര്‍ട്ട് ചെയ്തിട്ടുണ്ട്. കാട്ടുപന്നികള്‍ മൂലമുള്ള അപകടങ്ങളും കൃഷിനാശവും തുടര്‍ച്ചയായി സംഭവിക്കുകയാണ്. കാട്ടുപന്നിശല്യം നിയന്ത്രിക്കുന്നതില്‍ ഉത്തരവാദിത്വം ഏറ്റെടുക്കാത്ത തദ്ദേശ സ്വയംഭരണസ്ഥാപനങ്ങളിലെ ജനപ്രതിനിധികള്‍ക്കെതിരേ കക്ഷിരാഷ്‌ട്രീയ ഭേദമെന്യേ അടുത്ത തെരഞ്ഞെടുപ്പില്‍ കര്‍ഷകര്‍ നിലപാടെടുക്കണം. തദ്ദേശ സ്വയംഭരണ സ്ഥാപനങ്ങളിലെ തെരഞ്ഞെടുപ്പിന് മുമ്പുള്ള ഈ നാളുകള്‍ പഞ്ചായത്തുകളുടെ നിലപാടുകളും നടപടികളും പഠിക്കുന്നതിനും പരസ്യമാക്കുന്നതിനും അത് പൊതുജന മധ്യേ എത്തിക്കുന്നതിനും ഇന്‍ഫാം പഞ്ചായത്തുകള്‍ തോറും ജാഗ്രതാസമിതികള്‍ രൂപീകരിച്ച് നിരീക്ഷണം നടത്തും. ഇപ്രകാരം നിരീക്ഷണം നടത്തുന്നതിനുവേണ്ടി ഇന്‍ഫാം കാര്‍ഷിക താലൂക്ക് എക്‌സിക്യൂട്ടീവ് അംഗങ്ങളെയും ഗ്രാമസമിതി എക്‌സിക്യൂട്ടീവ് അംഗങ്ങളെയും ചേര്‍ത്ത് താലൂക്ക് അടിസ്ഥാനത്തില്‍ ജാഗ്രതാസമിതികള്‍ രൂപീകരിക്കും. താലൂക്ക് ഡയറക്ടര്‍മാര്‍ പ്രസ്തുത സമിതികളുടെ രക്ഷാധികാരികളുംഓരോ താലൂക്കില്‍ നിന്നുള്ള ജില്ലാ എക്‌സിക്യൂട്ടീവ് അംഗങ്ങള്‍ അധ്യക്ഷന്മാരുമായിരിക്കുമെന്നും ഫാ. തോമസ് മറ്റമുണ്ടയില്‍ കൂട്ടിച്ചേര്‍ത്തു.യോഗത്തില്‍ ഇന്‍ഫാം കാഞ്ഞിരപ്പള്ളി കാര്‍ഷികജില്ല പ്രസിഡന്‍റ് അഡ്വ. എബ്രഹാം മാത്യു പന്തിരുവേലില്‍, കേരള സംസ്ഥാന സെക്രട്ടറി ഡോ.പി.വി. മാത്യു, നാഷണല്‍ എക്‌സിക്യൂട്ടീവ് അംഗങ്ങളായ ജെയ്‌സണ്‍ ചെംബ്ലായില്‍, നെല്‍വിന്‍ സി. ജോയ്, സംസ്ഥാന ട്രഷറര്‍ തോമസ് തുപ്പലഞ്ഞിയില്‍, ജില്ലാ ജോയിന്‍റ് ഡയറക്ടര്‍മാരായ ഫാ. റോബിന്‍ പട്രകാലായില്‍, ഫാ. ആല്‍ബിന്‍ പുല്‍ത്തകിടിയേല്‍, ഫാ. ജിന്‍സ് കിഴക്കേല്‍, സെക്രട്ടറി തോമസുകുട്ടി വാരണത്ത്, ജോയിന്‍റ് സെക്രട്ടറി ബോബന്‍ ഈഴക്കുന്നേല്‍ തുടങ്ങിയവര്‍ പ്രസംഗിച്ചു.

സിഎസ്ആർ വിഭാഗത്തിൽ വെള്ളക്കെട്ട്

ഗാന്ധിനഗര്‍: മെഡിക്കല്‍ കോളജ് ആശുപത്രിയില്‍ പുതിയ സര്‍ജറി ബ്ലോക്കില്‍ പ്രവര്‍ത്തനം തുടങ്ങിയ ശസ്ത്രക്രിയ ഉപകരണങ്ങള്‍ അണുവിമുക്തമാക്കുന്ന വിഭാഗത്തില്‍ (സിഎസ്ആര്‍) വെള്ളക്കെട്ട്. പുതിയ സര്‍ജറി ബ്ലോക്കിന്‍റെ എ വണ്‍ എന്ന കെട്ടിടത്തിലാണ് സിഎസ്ആര്‍ വിഭാഗം പ്രവര്‍ത്തിക്കുന്നത്. ഈ മുറിയുടെ മുകളിലത്തെ നിലയിലെ വാര്‍ഡുകളിലേക്കുള്ള വെള്ളം കടന്നുപോകുന്ന പൈപ്പ് പൊട്ടിയതാണ് വെള്ളക്കെട്ടിന് കാരണം. പൈപ്പ് പൊട്ടി വെള്ളം ചീറ്റിയതിന്‍റെ ശക്തിയില്‍ സിഎസ്ആര്‍ മുറിയുടെ സീലിംഗ് ഇളകി മാറി വെള്ളം താഴേക്ക് പതിക്കുകയായിരുന്നു. ആദ്യം വെള്ളം പതിച്ചപ്പോള്‍ ജീവനക്കാര്‍ ബക്കറ്റില്‍ പിടിക്കാന്‍ ശ്രമിച്ചെങ്കിലും സീലിംഗ് ഇളകി തകര്‍ന്ന് നിയന്ത്രണാതീതമായി വെള്ളം വീണ് മുറിയില്‍ വെള്ളക്കെട്ട് രൂപപ്പെടുകയായിരുന്നു. പഴയ സര്‍ജറി ബ്ലോക്കിലാണ് 10 മുതല്‍ 15 വരെയുള്ള വാര്‍ഡുകളും പ്രധാന ശസ്ത്രക്രിയ തിയറ്ററും സിഎസ്ആര്‍ വിഭാഗവും പ്രവര്‍ത്തിച്ചിരുന്നത്. 14-ാം വാര്‍ഡിന്‍റെ ശുചിമുറി തകര്‍ന്നുവീണ് തലയോലപ്പറമ്പ് സ്വദേശിനി ബിന്ദു മരിക്കാനിടയായതിനെത്തുടര്‍ന്ന് 10, 11, 14 എന്നീ വാര്‍ഡുകളും സിഎസ്ആര്‍ വിഭാഗവും പുതിയ സര്‍ജറി ബ്ലോക്കിലേക്ക് മാറ്റുകയായിരുന്നു. എന്നാല്‍ തിയറ്റിന്‍റെ പ്രവര്‍ത്തനം പുതിയ ബ്ലോക്കില്‍ തുടങ്ങിയില്ല. അത്യാഹിത വിഭാഗം കെട്ടിടത്തിലെ തിയറ്ററിലാണ് നിലവില്‍ ശസ്ത്രക്രിയ നടക്കുന്നത്.

കൈക്കൂലി: ഈരാറ്റുപേട്ട നഗരസഭയിലെ തേർഡ് ഗ്രേഡ് ഓവർസിയർ പിടിയിൽ

ഈരാറ്റുപേട്ട: ഈരാറ്റുപേട്ട നഗരസഭയിൽ കൈക്കൂലി വാങ്ങിയ തേർഡ് ഗ്രേഡ് ഓവർസിയർ പിടിയിലായി. പി.ജി. ജയേഷ് ആണ് വിജിലൻസിന്‍റെ പിടിയിലായത്. കെട്ടിട നിർമാണവുമായി ബന്ധപ്പെട്ട അനുമതിക്കായി 3,000 രൂപ കൈക്കൂലി വാങ്ങുമ്പോഴായിരുന്നു വിജിലൻസിന്‍റെ പിടിവീണത്. വിജിലൻസ് എസ്പി ആർ. ബിനുവിന്‍റെ നിർദേശപ്രകാരം ഡിവൈഎസ്പി പി.വി. മനോജ് കുമാർ, സിഐ മനു വി. നായർ എന്നിവരുൾപ്പെട്ട സംഘമാണ് ജയേഷിനെ പിടികൂടിയത്. കെട്ടിട പെർമിറ്റിനായി ഒരു വ്യക്തിയോട് ഇയാൾ 3,000 രൂപ കൈക്കൂലി ആവശ്യപ്പെടുകയായിരുന്നു. ഈ തുക ജയേഷിന്‍റെ സുഹൃത്തായ ദിലീപിന്‍റെ അക്കൗണ്ടിലേക്ക് ഗൂഗിൾ പേ ചെയ്യാനും ആവശ്യപ്പെട്ടു. തുടർന്ന് വിവരം പരാതിക്കാരൻ കോട്ടയം വിജിലൻസ് വിഭാഗത്തെ അറിയിക്കുകയായിരുന്നു. വിജിലൻസ് സംഘം ഇന്നലെ ഉച്ചകഴിഞ്ഞ് എത്തി ജയേഷനെ പിടികൂടുകയായിരുന്നു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]