വെൽനെസ് & സ്പോർട്സ് ഡേ കാമ്പയിനു തുടക്കം

അമ്പലപ്പുഴ: ജൂണിയർ ചേംബർ ഇന്‍റർനാഷണൽ (ജെസി ഐ) പുന്നപ്രയുടെ ആഭിമുഖ്യത്തിൽ നടക്കുന്ന പ്രിസം 110 വാരാചരണത്തിന്‍റെ മൂന്നാം ദിനമായ വെൽനെസ് & സ്പോർട്സ് ഡേ കാമ്പയിൻ ആലപ്പുഴ മെഡിക്കൽ കോളജ് പ്രിൻസിപ്പൽ ഡോ. ബി. പദ്മകുമാർ ഉദ്ഘാടനം ചെയ്തു.

ജീവിതശൈലീരോഗങ്ങൾ ഒഴിവാക്കാൻ ആരോഗ്യകരമായ ഭക്ഷണശീലം, കായികാധ്വാനം, വായനയും വ്യായാമവും ദിനചര്യയായി ഉൾപ്പെടുത്തേണ്ടത് അത്യന്താപേക്ഷിതമാണെന്ന് ഡോ. പദ്മകുമാർ പറഞ്ഞു. ജെസിഐ പുന്നപ്ര പ്രസിഡന്‍റ് ടി.എൻ. തുളസിദാസ് അധ്യക്ഷത വഹിച്ചു.

ജെസി ഐ സോൺ ഡയറക്ടർ (പിആർ) റിസാൻ എ. നസീർ, പ്രദീപ് കൂട്ടാല, കേണൽ വിജയകുമാർ, മാത്യു തോമസ്, പി. അശോകൻ, കണ്ണൻ കൃഷ്ണനുണ്ണി എന്നിവർ പ്രസംഗിച്ചു.

ADVERTISEMENT

അഷ്ടമിരോഹിണിയിലെ ഉറിയടിക്ക് ഏവൂര്‍ അണിഞ്ഞൊരുങ്ങി

കായംകുളം: അഷ്ടമിരോഹിണിയിലെ ഉറിയടിക്ക് ഏവൂര്‍ ശ്രീകൃഷ്ണസ്വാമി ക്ഷേത്രം അണിഞ്ഞൊരുങ്ങി. പിറന്നാളിന് ഉണ്ണിക്കണ്ണന് അടിച്ചുടയ്ക്കാനുള്ള ഉറികള്‍ ഒരുക്കുന്ന അവസാന ഘട്ടത്തിലാണ് കരക്കാര്‍. അഷ്ടമിരോഹിണി നാളായ നാളെ ഏവൂര്‍ കണ്ണന്‍ എഴുന്നള്ളുമ്പോള്‍ വീഥികളിലെല്ലാം ഉറികളുയരും. പാട്ടും നൃത്തവുമായി ഗോപസ്ത്രീകള്‍ കണ്ണനെ വരവേല്‍ക്കും. ആയിരക്കണക്കിന് ഉറികളാണ് ഏവൂര്‍ ക്ഷേത്രകരകളിലെ വിവിധ കേന്ദ്രങ്ങളില്‍ തയാറാക്കിയിരിക്കുന്നത്. ഉണ്ണിയപ്പം, പാല്‍, വെണ്ണ, തൈര്, അവല്‍ തുടങ്ങിയ ദ്രവ്യങ്ങള്‍ ഉറികളില്‍ നിറയ്ക്കും. വര്‍ണക്കടലാസ് ഒട്ടിച്ച് അലങ്കരിച്ച്, പലതട്ടുകളായിട്ടാണ് ഉറികള്‍ ഒരുക്കിയിരിക്കുന്നത്. ഏവൂര്‍ തെക്ക്, ഏവൂര്‍ വടക്ക്, ഏവൂര്‍ വടക്കുപടിഞ്ഞാറ് കരകളാണ് ഏവൂര്‍ ക്ഷേത്രത്തിലുള്ളത്. വിവിധ കരകളിലെ ഘോഷയാത്ര കടന്നുവരുമ്പോള്‍ റോഡില്‍ ഉയര്‍ത്തുന്ന ഉറികള്‍ ഉണ്ണിക്കണ്ണന്‍റെ വേഷമിടുന്ന കുരുന്നുകളാണ് അടിച്ചുടയ്ക്കുന്നത്. സംഘനൃത്തം, മയിലാട്ടം, അമ്മന്‍കുടം തുടങ്ങിയ കലാരൂപങ്ങള്‍ ഉറിയടി ഘോഷയാത്രയെ ആകര്‍ഷകമാക്കും. വൈകുന്നേരത്തോടെ മൂന്നു കരകളില്‍നിന്നുള്ള ഘോഷയാത്രകള്‍ ക്ഷേത്രനടയിലെത്തും. തുടര്‍ന്ന് ഒന്നിച്ച് ക്ഷേത്രത്തിലേക്ക് എഴുന്നള്ളും. വര്‍ണ്ണവൈവിധ്യം വിതറുന്ന വ്യത്യസ്തമാര്‍ന്ന ഉറികള്‍ ഏവൂര്‍ ഉറിയടി മഹോത്സവത്തിന്‍റെ സവിശേഷതയാണ്.

നീലംപേരൂര്‍ പടയണി പാറാവളയം എത്തി; ഇന്ന് കുടനിര്‍ത്തോടെ രണ്ടാം ഘട്ടം അവസാനിക്കും

നീലംപേരൂര്‍: പള്ളിബ് ഭഗവതി ക്ഷേത്രത്തിലെ പടയണി മഹോത്സവത്തോടനുബന്ധിച്ച് പടയണി കളത്തില്‍ പാറാവളയം എത്തി. ഇന്ന് കുടനിര്‍ത്തോടെ രണ്ടാം ഘട്ടം അവസാനിക്കും. മൂന്നാം ഘട്ടത്തില്‍ നാളെ മുതല്‍ പ്ലാവിലക്കോലങ്ങള്‍ എഴുന്നള്ളും. ചിങ്ങമാസത്തിലെ അവിട്ടം നാളില്‍ രാത്രി പത്തിന് ശ്രീകോവിലില്‍നിന്ന് മേല്‍ശാന്തി പകര്‍ന്നുതരുന്ന അഗ്‌നി പടയണി ആചാര്യന്‍ പടയണി ക്കളത്തിലേക്ക് ആവാഹിച്ചു പ്രദേശത്തെ വീടുകളില്‍നിന്ന് ഗൃഹനാഥന്‍മാര്‍ തെറുത്തു കൊണ്ടുവരുന്ന ചൂട്ടു കറ്റകളിലേക്ക് പകരുകയും ഇവ കൈയിലേന്തി ക്ഷേത്ര മതില്‍ക്കെട്ടിനു പുറത്തു പടിഞ്ഞാറു ഭാഗത്തുള്ള ചേരമാന്‍ പെരുമാള്‍ സ്മാരകത്തില്‍ച്ചെന്ന് അനുവാദം ചോദിച്ചു മടങ്ങുന്നതോടുകൂടിയാണ് പടയണിക്കാലത്തിന് തുടക്കമായത്. ഈ ചടങ്ങ് തുടര്‍ന്നുള്ള നാല് ദിവസങ്ങളില്‍ ഇതേ സമയത്ത് നടത്തും. പിന്നീടുള്ള നാല് ദിവസങ്ങളില്‍ കുട പടയണിയാണ്. തെങ്ങോലയുടെ ഈറളില്‍നിന്ന് ഉണ്ടാക്കുന്ന വാരിയില്‍ ചെത്തിപ്പൂകൊണ്ട് അലങ്കരിച്ചു കുടയുടെ രൂപത്തിലാക്കും. എട്ടാംദിവസം കുടംപൂജ കളിയോടുകൂടി കുടനിര്‍ത്തും ഉണ്ടാകും. അടുത്ത നാല് ദിവസങ്ങളില്‍ പ്ലാവിലക്കോലങ്ങള്‍ ആണ്. പന്ത്രണ്ടാം ദിവസം ഭീമന്‍, ഹനുമാന്‍, തപസ്വി, തുടങ്ങിയ പ്ലാവിലക്കോലങ്ങള്‍ എല്ലാം എഴുന്നെള്ളിച്ചു ദേവിയുടെ തിരുമുമ്പില്‍ കൊണ്ടുവന്ന് കുടംപൂജ കളി, തോത്താ കളി എന്നിവയോടെ പ്ലാവില നിര്‍ത്ത് ആഘോഷിക്കുന്നു. പിന്നീടുള്ള രണ്ടു ദിവസങ്ങളില്‍ പിണ്ടിയും കുരുത്തോലയും ആണ്. അവസാന രണ്ടു ദിവസങ്ങളില്‍ കലാവിരുതിന്‍റെ മാസ്മരികതയോടെ അന്നങ്ങള്‍ നിര്‍മിക്കുന്നു. ആന, ഭീമന്‍, യക്ഷി, രാവണന്‍, അമ്പലക്കൊട്ട, സിംഹം തുടങ്ങിയവയും ത്രിമാന രൂപത്തില്‍ ഉണ്ടാക്കുന്നു. പൂരം നാളില്‍ രാത്രി പത്തിന് തുടങ്ങുന്ന പടയണിയില്‍ കാണികളെ ആവേശഭരിതരാക്കി ചൂട്ട് വെളിച്ചത്തിന്‍റെ പൊന്‍പ്രഭയില്‍ ചെറിയന്നങ്ങളും, കോലങ്ങളും, തുടര്‍ന്ന് ഇടത്തരം അന്നങ്ങളും, വലിയന്നവും എഴുന്നെള്ളുന്നതോടെ പൂരം പരിസമാപ്തിയിലേക്കെത്തും. പതിനാറു ദിവസം വ്രതം അനുഷ്ഠിക്കുന്ന പടയണി ആചാര്യന്‍ ഗുരുസി എന്ന കര്‍മം നിര്‍വഹിക്കുകയും ചെയ്യുന്നതോടെ ആ വര്‍ഷത്തെ പടയണിക്ക് സമാപനം കുറിക്കും.

സ്‌നേഹ സതീര്‍ഥ്യ സംഗമവുമായി പൂര്‍വവിദ്യാര്‍ഥികള്‍

എടത്വ: നാല്പത്തിയെട്ടു വര്‍ഷങ്ങള്‍ക്കുശേഷം മുട്ടാര്‍ സെന്‍റ് ജോര്‍ജ് ഹൈസ്‌കൂള്‍ 1977 എസ്എസ്എല്‍സി ബാച്ചിലെ വിദ്യാര്‍ഥികള്‍ വീണ്ടും ഒത്തുകൂടി. ചങ്ങനാശേരി കോണ്‍ടൂര്‍ റിസോര്‍ട്ട് കണ്‍വന്‍ഷന്‍ സെന്‍ററില്‍ മൂന്ന് അധ്യാപകരും അറുപത് പൂര്‍വവിദ്യാര്‍ഥികളും പങ്കെടുത്ത വിപുലമായ ചടങ്ങ് അധ്യാപകന്‍ ടി.ടി. ജോര്‍ജ് ഉദ്ഘാടനം ചെയ്തു. അധ്യാപകന്‍ ജോര്‍ജ് ജോസഫ് അധ്യക്ഷത വഹിച്ചു. അധ്യാപകന്‍ എ.സഡ്. സക്കറിയ, ഫാ. സോജന്‍ മഠത്തില്‍ എന്നിവര്‍ പ്രസംഗിച്ചു. സ്റ്റാന്‍ലി തോമസിന്‍റെ നേതൃത്വത്തില്‍ സീനിയര്‍ സിറ്റിസണ്‍ മോട്ടിവേഷന്‍ ക്ലാസും നടന്നു. കേന്ദ്ര സര്‍ക്കാരില്‍നിന്ന് മില്ലേനിയം അവാര്‍ഡ് കരസ്ഥമാക്കിയ പി.എ. തോമസ് സ്രാമ്പിക്കലിനെ ആദരിച്ചു. അത്തപ്പൂക്കളം, ഓണപ്പാട്ട്, വഞ്ചിപ്പാട്ട്, ഗാനമേള തുടങ്ങിയ വിവിധയിനം കലാപരിപാടികളും തുടര്‍ന്ന് വിഭവസമൃദ്ധമായ ഉച്ചയൂണിനും ശേഷം 2027ല്‍ അന്‍പതാം വാര്‍ഷികത്തില്‍ വീണ്ടും സംഗമിക്കാം എന്ന തീരുമാനത്തിലാണ് പൂര്‍വവിദ്യാര്‍ഥികള്‍ പിരിഞ്ഞത്. മാത്യു സക്കറിയ മാടക്കശേരില്‍, മേഴ്സി ചീരംവേലില്‍ എന്നിവര്‍ നേതൃത്വം നല്‍കി.

പാണാവള്ളി കൃഷിഭവൻ കെട്ടിടനിർമാണം നാല് മാസത്തിനുള്ളില്‍ പൂര്‍ത്തിയാക്കും

ആലപ്പുഴ: കൃഷിഭവന് സ്വന്തമായി കെട്ടിടം വേണമെന്ന പാണാവള്ളിയിലെ കർഷകരുടെ ദീർഘകാല ആവശ്യം യാഥാർഥ്യത്തിലേക്ക്. പഞ്ചായത്തിൽ പുതുതായി നിർമിക്കുന്ന കൃഷിഭവന്‍റെ നിർമാണം ദ്രുതഗതിയിൽ പുരോഗമിക്കുകയാണ്. കൃഷിഭവൻ നേരത്തെ പ്രവർത്തിച്ചിരുന്ന കെട്ടിടം ജീർണിച്ചതിനെത്തുടർന്ന് മൂന്നുവർഷം മുമ്പ് പൊളിച്ചുനീക്കിയിരുന്നു. നിലവിൽ തൈക്കാട്ടുശേരി ബ്ലോക്ക് പഞ്ചായത്ത് ഓഫീസിനുസമീപത്തെ താത്കാലിക കെട്ടിടത്തിലാണ് കൃഷിഭവൻ പ്രവർത്തിച്ചുവരുന്നത്. സ്വന്തമായി കെട്ടിടമില്ലാത്തതിനാൽ ഉദ്യോഗസ്ഥരും കർഷകരും നേരിടുന്ന പ്രതിസന്ധികൾ ബോധ്യപ്പെട്ടതിന്‍റെ അടിസ്ഥാനത്തിൽ ദലീമ ജോജോ എംഎൽഎയുടെ ആസ്തി വികസന ഫണ്ടിൽനിന്ന് അനുവദിച്ച 33.5 ലക്ഷം രൂപ വിനിയോഗിച്ചാണ് നിർമാണം. 1000 ചതുരശ്ര അടി വിസ്തീർണത്തിൽ ഭിന്നശേഷി സൗഹൃദമായി നിർമിക്കുന്ന കെട്ടിടത്തിൽ ഓഫീസ്, സ്റ്റോർ മുറി, ഹാൾ, ശുചിമുറി തുടങ്ങിയവ ഒരുക്കും. വേഗത്തിൽ നിർമാണം പൂർത്തിയാക്കി നാല് മാസത്തിനുള്ളിൽ കൃഷിഭവൻ നാടിന് സമർപ്പിക്കാനാണ് അധികൃതർ ലക്ഷ്യമിടുന്നത്.

ചാസ് യൂണിറ്റ് കുടുംബസംഗമം

ആലപ്പുഴ: ലഹരിക്കടിമയായവരെയും ബൗദ്ധിക വെല്ലുവിളികള്‍ നേരിടുന്ന കുട്ടികളെയും ചാസ് ഏറ്റെടുക്കുകയും സംരക്ഷിക്കുകയും ചെയ്യുന്നത് ഒരു ദൗത്യമായി കരുതുന്നുവെന്ന് അതിരൂപത ചാസ് ഡയറക്ടര്‍ ഫാ. ജോര്‍ജ് പനക്കേഴം. ചങ്ങനാശേരി അതിരൂപതയുടെ കീഴില്‍ 60 വര്‍ഷമായി സജീവമാണ് ചാസ്. തത്തംപള്ളി യൂണിറ്റിന്‍റെ ആഭിമുഖ്യത്തില്‍ ഓണാഘോഷ പരിപാടിയും കുടുംബ സംഗമവും ഉദ്ഘാടനം ചെയ്യുകയായിരുന്നു അദ്ദേഹം. യോഗത്തില്‍ ഡയറക്ടര്‍ തത്തംപള്ളി വികാരി ഫാ. ജോസ് മുകളേല്‍ അധ്യക്ഷത വഹിച്ചു. ഫാ. നവീന്‍ മമ്മൂട്ടില്‍ തിരുവോണ സന്ദേശം നല്‍കി. സെക്രട്ടറി കെ.ജെ. ജോസഫ് കളത്തില്‍, ജോഷി വര്‍ഗീസ് നെടിയാപറമ്പ്, ഡി. ജോസഫ് കൈനകരി, തൊമ്മി ജോസഫ് തട്ടുങ്കല്‍, ലൈസാമ്മ മൈക്കിള്‍, ജോര്‍ജ് മുളക്കല്‍, ലാലിച്ചന്‍ ജോസഫ് തുടങ്ങിയവര്‍ പ്രസംഗിച്ചു.

അമിത വെളിച്ചമടിച്ച് മീൻപിടിത്തം; പ്രതിഷേധം

അമ്പലപ്പുഴ: കൂറ്റൻ ജനറേറ്ററിന്‍റെ സഹായത്തോടെ കടലിൽ നിയമവിരുദ്ധമായി അമിതവെളിച്ചമടിച്ച് മീൻപിടിത്തം നടത്തുന്നവർക്കെതിരേ പ്രതിഷേധം കനക്കുന്നു. ഇത്തരം അനധികൃത മീൻപിടിത്തം മൂലം പരമ്പരാഗത മത്സ്യബന്ധന വള്ളങ്ങള്‍ക്ക് മീൻ കിട്ടുന്നില്ലെന്നാണ് പരാതി. ജില്ലയുടെ തീരക്കടലില്‍ അനധികൃത മത്സ്യബന്ധനം വ്യാപകമാകുന്ന സാഹചര്യത്തിലാണ് പരാതി ശക്തമായിരിക്കുന്നത്. തിരുവനന്തപുരം കുളച്ചല്‍, കൊല്ലം വാടി ഭാഗങ്ങളില്‍നിന്നെത്തുന്ന വള്ളങ്ങളാണ് നിരോധന മത്സ്യബന്ധനത്തിലേര്‍പ്പെടുന്നതെന്നു പറയുന്നു. രണ്ടു വള്ളങ്ങൾ പിടിയിൽ ഇന്നലെ തോട്ടപ്പള്ളി ഭാഗത്തുനിന്നു രണ്ട് വള്ളങ്ങള്‍ പിടികൂടി. ഫിഷറീസ് ഉദ്യോഗസ്ഥരും തീരദേശ പോലീസും നടത്തിയ പരിശോധനയിലാണ് കേരള സമുദ്ര മത്സ്യബന്ധന നിയമത്തിനു വിരുദ്ധമായി മീന്‍പിടിച്ച വള്ളവും മത്സ്യവും പിടികൂടി പിഴ ഈടാക്കിയത്. വഞ്ചിയിലുണ്ടായിരുന്ന മീന്‍ ലേലം ചെയ്തു പിഴത്തുകയിലേക്കു വരവുവച്ചു. രണ്ടാഴ്ച മുമ്പ് തോട്ടപ്പള്ളിയില്‍ അനധികൃത മത്സ്യബന്ധനവുമായി ബന്ധപ്പെട്ടു സംഘര്‍ഷം ഉടലെടുത്തിരുന്നു. മീൻ കിട്ടുന്നില്ല പ്രകാശ വലയത്തില്‍ കണവ പിടിച്ച ഇതരസംസ്ഥാനവള്ളങ്ങളെ തോട്ടപ്പള്ളിയില്‍നിന്നുപോയ വള്ളങ്ങളിലെ തദ്ദേശിയരായ മത്സ്യത്തൊഴിലാളികള്‍ തടഞ്ഞിരുന്നു. തുടര്‍ന്നു കടലിലും കരയിലുമായി മണിക്കൂറോളം സംഘര്‍ഷാവസ്ഥ ഉടലെടുത്തിരുന്നു. അമിത വൈദ്യുതി വെളിച്ചം പ്രവഹിക്കുമ്പോള്‍ കണവ ഒഴിച്ചുള്ള മറ്റു മത്സ്യങ്ങള്‍ കടലിന്‍റെ കൂടുതല്‍ ആഴങ്ങളിലേക്കു പോകും. ഇതോടെ തങ്ങളുടെ വലയില്‍ ഇവ കിട്ടാതെ വരുമെന്നാണ് ചെറുകിട വള്ളക്കാരുടെ പരാതി. നിരോധിത മത്സ്യബന്ധനത്തിനു ചില കമ്മീഷന്‍ ഏജന്‍റുമാരും ഉദ്യോഗസ്ഥരും കൂട്ടുനില്‍ക്കുന്നതായും മത്സ്യത്തൊഴിലാളികള്‍ ആരോപിച്ചു. നൈറ്റ് ട്രോളിംഗ്, വളര്‍ച്ചയെത്താത്ത മീന്‍പിടിത്തം തുടങ്ങിയവയും നിരോധിച്ചിട്ടുണ്ട്.

വിശുദ്ധ കുരിശിന്‍റെ തിരുശേഷിപ്പ് വണക്കം ഇന്നും നാളെയും

ആലപ്പുഴ: ആലപ്പുഴ മാർ സ്ലീവാ ഫൊറോന തീർഥാടന പള്ളിയിൽ മാർസ്ലീവായുടെ പുകഴ്ചയുടെ തിരുനാളിനോട് അനുബന്ധിച്ച് ഇന്നും നാളെയും വിശുദ്ധ കുരിശിന്‍റെ തിരുശേഷിപ്പിന്‍റെ പരസ്യ വണക്കം ഉണ്ടായിരിക്കും. ആലപ്പുഴയിലെ വിശുദ്ധ കുരിശിന്‍റെ നാമത്തിലുള്ള ഏക ദേവാലയമാണ് ആലപ്പുഴ മാർ സ്ലീവാ ഫൊറോന തീർഥാടന പള്ളി. 2022 ഡിസംബർ പതിനേഴാം തീയതി ചങ്ങനാശേരി അതിരൂപത അധ്യക്ഷൻ മാർ ജോസഫ് പെരുന്തോട്ടം മെത്രാപ്പോലീത്ത ഈ പള്ളിയെ ചങ്ങനാശേരി അതിരൂപതയിലെ വിശുദ്ധ കുരിശിന്‍റെ തീർഥാടന കേന്ദ്രമായി പ്രഖ്യാപിച്ചു. ഈശോമിശിഹായുടെ വിശുദ്ധ കുരിശിന്‍റെ തിരുശേഷിപ്പ് പരസ്യ വണക്കത്തിനായി പ്രതിഷ്ഠിക്കുമ്പോൾ ധാരാളം തീർഥാടകർ ഈ തിരുശേഷിപ്പ് വണങ്ങുവാൻ എത്തുന്നുണ്ട്. രാവിലെ എട്ടു മുതൽ വൈകുന്നേരം അഞ്ചു വരെയാണ് തിരുശേഷിപ്പിന്‍റെ വണക്കം. തുടർന്ന് ആലപ്പുഴ ഫൊറോനയിലെ എല്ലാ വൈദികരും ചേർന്ന് തിരുനാൾ സമൂഹബലി അർപ്പിക്കും. തുടർന്ന് തിരുശേഷിപ്പ് വഹിച്ചുള്ള പ്രദക്ഷിണം. പ്രദക്ഷിണത്തിന് ആലപ്പുഴ മൗണ്ട് കാർമൽ കത്തീഡ്രൽ വികാരി ഫാ. ഫ്രാൻസിസ് കൊടിയനാട് കാർമികത്വം വഹിക്കും. 14ന് തിരുനാൾ ദിനമായി ആചരിക്കും. രാവിലെ 6.30ന് വികാരി ഫാ. മാത്യു നടമുഖത്ത് പരിശുദ്ധ കുർബാന അർപ്പിക്കും. തുടർന്ന് തിരുശേഷിപ്പിന്‍റെ പരസ്യ വണക്കം ആരംഭിക്കും. 10ന് വിശുദ്ധ കുർബാന ഫാ. ഷിബിൻ ചൂരവടി. വൈകുന്നേരം അഞ്ചിന് ആഘോഷമായ തിരുനാൾ കുർബാന ഫാ. ജോണിക്കുട്ടി തറക്കുന്നേൽ. തുടർന്ന് തിരുനാൾ പ്രദക്ഷിണം കാർമികൻ ഫാ. രഞ്ജിത്ത് മഠത്തിപ്പറമ്പിൽ തുടർന്ന് കൊടിയിറക്ക്. തിരുശേഷി പ്പു ചുംബനം, നേർച്ച ഭക്ഷണം.

ഫാർമസിസ്റ്റ് നിയമനം നടക്കുന്നില്ല; ഉദ്യോഗാർഥികളുടെ കാത്തിരിപ്പ് നീളുന്നു

പൂച്ചാക്കൽ: പ്രാഥമികാരോഗ്യ കേന്ദ്രങ്ങളിലടക്കം ഫാർമസിസ്റ്റ് നിയമനം നടക്കാത്തതിനെത്തുടർന്ന് റാങ്ക് ലിസ്റ്റിലുള്ള ഉദ്യോഗാർഥികളുടെ കാത്തിരിപ്പ് നീളുന്നു സർക്കാർ ആശുപത്രികളിൽ ആവശ്യത്തിന് ഫാർമസിസ്റ്റുകൾ ഇല്ലാതിരുന്നിട്ടും നിയമനം നടത്താത്തതാണ് പ്രതിന്ധിക്ക് കാരണം. റാങ്ക് ലിസ്റ്റ് പ്രസിദ്ധീകരിച്ച് വർഷങ്ങൾ കഴിഞ്ഞിട്ടും കാര്യമായ നിയമനങ്ങൾ നടക്കുന്നില്ല എന്നാണ് ലിസ്റ്റിലുള്ളവരുടെ ആരോപണം. നിയമപരമായി നടപ്പിലാക്കേണ്ട പുതിയ തസ്തികകളും കടലാസിൽ ഒതുങ്ങുകയാണ്. നിരവധി ഉദ്യോഗാർഥികളാണ് നിയമനം കാത്തിരിക്കുന്നത്. റാങ്ക് ലിസ്റ്റിന് മുന്ന് വർഷമാണ് കാലാവധി. ഇതിനുള്ളിൽ നിയമനം ലഭിച്ചില്ലെങ്കിൽ ലിസ്റ്റിൽ ഉൾപ്പെട്ടവർക്ക് ജോലി ലഭിക്കാതെ പോകുന്ന സ്ഥിതിയാണുണ്ടാകുന്നത്. പ്രധാന ലിസ്റ്റിലും സപ്ലിമെന്‍ററി ലിസ്റ്റിലുമായി നിരവധിപേരുണ്ട്. ജില്ല, താലൂക്ക് ആശുപത്രികൾ തുടങ്ങിയവയിലാണ് നിയമനം നടക്കേണ്ടത്. ചേർത്തല യുടെ വടക്കൻ മേഖലകളിൽനിന്ന് ഏതാനും പേർക്ക് മാത്രമാണ് ഇത്തരം ആരോഗ്യകേന്ദ്രങ്ങളിൽ നിയമനം ലഭിച്ചിട്ടുള്ളത്. റാങ്ക് ലിസ്റ്റിൽ അർഹരായ ഉദ്യോഗാർഥികൾ ഉള്ളപ്പോഴും പല കേന്ദ്രങ്ങളിലും താത്കാലിക അടിസ്ഥാനത്തിലാണ് ഫാർമസിസ്റ്റുകളെ നിയമിക്കുന്നതെന്നും ആക്ഷേ പമുണ്ട്. ഒരു കുടുംബാരോഗ്യ കേന്ദ്രത്തിൽ ചുരുങ്ങിയത് രണ്ട് ഫാർമസിസ്റ്റുകൾ വേണം. എന്നാൽ ഇതുപോലുള്ള കേന്ദ്ര ങ്ങളിൽ പിഎസ്‌സി വഴിയുള്ള ഒരു ഫാർമസിസ്റ്റ് മാത്രമാണുള്ളത്. പ്രാഥമികാരോഗ്യകേന്ദ്രങ്ങൾ കുടുംബാരോഗ്യകേന്ദ്രങ്ങളായി ഉയരുമ്പോൾ ഇവിടെ ആവശ്യമായ ഡോക്ടർമാരേയും നഴ്‌സുമാരേയും ലാബ് ടെക്നീഷ്യന്മാരേയും നിയമിക്കും. എന്നാൽ ഫാർമസിസ്റ്റുകളെ മാത്രം നിയമിക്കാറില്ല. ദിവസേന നൂറുകണക്കിന് രോഗികൾ വന്നുപോകുന്ന ബ്ലോക്ക് പഞ്ചായത്തുതലത്തിൽ പ്രവൃത്തിക്കുന്ന സാമൂഹികാരോഗ്യ കേന്ദ്രങ്ങളിൽ പലയിടത്തും ഫാർമസിസ്റ്റിന്‍റെ ഒഴിവുകളുണ്ടെങ്കിലും ലിസ്റ്റിലുള്ളവരെ പരിഗണിക്കാറില്ല. 24 മണിക്കൂറും പ്രവൃത്തിക്കുന്ന താലൂക്ക് ആശുപത്രികളിൽ ഫാർമസിസ്റ്റുകളുടെ കുറവുമൂലം മിക്കപ്പോഴും രാത്രി സമയങ്ങളിൽ മരുന്നുകൾ വിതരണം ചെയ്യാറില്ല എന്ന ആക്ഷേപമുണ്ട്. ആശുപത്രികളിൽ എത്തുന്ന മരുന്നുകൾ തരംതിരിച്ചു സൂ ക്ഷിച്ച് രോഗികൾക്ക് വിതരണം ചെയ്യേണ്ടത് ഫാർമസിസ്റ്റുക ളാണ്. എന്നാൽ ആശുപത്രികളിൽ ആവശ്യത്തിന് ഫാർമസിസ്റ്റുകൾ ഇല്ലാത്തതിനാൽ മറ്റ് ജീവനക്കാരാണ് നിയമവിരുദ്ധമായി മരുന്നുകൾ വിതരണം ചെയ്യുന്നതെന്ന ആരോപണവും ഉയരുന്നുണ്ട്.

വൈദ്യുതി പോസ്റ്റ് ഒടിഞ്ഞ് വീണിട്ട് രണ്ടുമാസം; പരാതിപ്പെട്ടിട്ടും പരിഹാരമില്ല

ഹരിപ്പാട്: വൈദ്യുതി പോസ്റ്റ് ഒടിഞ്ഞ് രണ്ടുമാസമായി റോഡില്‍ കിടന്നിട്ടും തിരിഞ്ഞുനോക്കാതെ അധികൃതര്‍. വീയപുരം രണ്ടാം വാര്‍ഡില്‍ പാളയത്തില്‍ കോളനിക്കു കിഴക്കുവശത്തായുള്ള മുറിഞ്ഞപുഴഭാഗത്ത് നടുവഴിയുടെ മധ്യഭാഗത്താണ് പരിസരവാസികള്‍ക്ക് നടക്കാന്‍പോലും കഴിയാത്തവിധം വൈദ്യുതി പോസ്റ്റ് വീണുകിടക്കുന്നത്. കടപ്ര സെക്‌ഷന്‍ ഓഫീസില്‍ നേരിട്ടും എഇയെ നേരില്‍ക്കണ്ടും പരാതിപ്പെട്ടിട്ടും ഫലമില്ല. വെള്ളപ്പൊക്ക സമയത്ത് വാര്‍ഡിന്‍റെ പലഭാഗങ്ങളിലും ആഴ്ചകളോളം വൈദ്യുതി ഇല്ലായിരുന്നു. വാര്‍ഡ് മെംബറിന്‍റെ നേതൃത്വത്തില്‍ സെക്‌ഷന്‍ ഓഫീസില്‍ പ്രതിഷേധം നടത്തിയതിന്‍റെ അടിസ്ഥാനത്തില്‍ ജീവക്കാരുമായി എത്തിയായിരുന്നു വൈദ്യുതി പുനഃസ്ഥാപിച്ചത്. ഈ പോസ്റ്റില്‍നിന്നു നാലു വീടുകള്‍ക്കാണ് കണക്‌ഷന്‍ നല്‍കിയിരുന്നത്. പോസ്റ്റ് ഒടിഞ്ഞതിനാല്‍ മറ്റൊരുപോസ്റ്റില്‍നിന്നുമാണ് ഇപ്പോള്‍ കണക്‌ഷന്‍ നല്‍കിയത്. പ്രകൃതിക്ഷോഭത്താല്‍ സെക്‌ഷന്‍ പരിധിയില്‍ 40 പോസ്റ്റുകള്‍ ഒടിഞ്ഞിരുന്നെന്നും അത് മാറ്റിയിടാന്‍ പുതിയ പോസ്റ്റുകള്‍ വേണ്ടിവന്നെന്നും പോസ്റ്റിന്‍റെ എണ്ണം കുറവായതുകൊണ്ടാണ് മാറ്റിയിടാന്‍ കഴിയാത്തതെന്നും പോസ്റ്റ് എത്തുന്ന മുറയ്ക്ക് പോസ്റ്റ് മാറ്റിയിടുമെന്നും സെക്‌ഷന്‍ ഓഫീസില്‍നിന്ന് അറിയിച്ചു.

അപരന്‍റെ വിശപ്പകറ്റുക നമ്മുടെ ആത്മീയ ഉത്തരവാദിത്തം: ഡോ. തോമസ് മാർ തീത്തോസ്

മാന്നാർ: സഹോദരന്‍റെ വിശപ്പകറ്റുക നമ്മുടെ ആത്മീയ ഉത്തരവാദിത്തമാണെന്നും അപരന്‍റെ ദുഃഖങ്ങൾ മനസിലാക്കുമ്പോഴെ നാം മനുഷ്യരാകൂ എന്നും ഡോ. തോമസ് മാർ തീത്തോസ് എപ്പിസ്കോപ്പാ പറഞ്ഞു. അന്നവും അക്ഷരവും ആദരവോടെ പങ്കുവയ്ക്കുന്ന അഞ്ചപ്പത്തിന്‍റെ പുതിയ ശാഖ മാന്നാറിൽ ഉദ്ഘാടനം ചെയ്ത് പ്രസംഗിക്കുകയായിരുന്നു അദേഹം. ഫാ. ബോബി ജോസ് കട്ടികാട് അധ്യക്ഷത വഹിച്ചു. മാന്നാർ പഞ്ചായത്ത് പ്രസിഡന്‍റ് ടി.വി. രത്നകുമാരി, ജോസഫ് സി. മാത്യു, അനിൽ ചെറിയാൻ എന്നിവർ പ്രസംഗിച്ചു. 2016-ല്‍ കോഴഞ്ചേരിയിൽ ആരംഭിച്ച അഞ്ചപ്പത്തിന്‍റെ ഏഴാമത്തെ ശാഖയാണ് മാന്നാറിൽ ആരംഭിച്ചത്. വ്യത്യസ്ത മേഖലകളിൽ പ്രവർത്തിക്കുന്ന സമാനഹൃദയരുടെ കൂട്ടായ്മയായ അഞ്ചപ്പം അന്നവും അക്ഷരവും ആദരവോടെ പങ്കുവയ്ക്കുന്നതാണ് പദ്ധതി. അവഗണിക്കപ്പെടുന്നവരെ ചേർത്തു നിർത്തുന്നതിനും ക്ഷമയോടെ കേൾക്കുന്നതിനും സദാ ശ്രദ്ധയർപ്പിക്കുന്ന ഒരു കൂട്ടം സന്നദ്ധപ്രവർത്തകർ അഞ്ചപ്പത്തിലുണ്ട്. പുസ്തകങ്ങൾ വായിക്കുന്നതിനും ചർച്ച ചെയ്യുന്നതിനും ഇവിടെ ഇടമൊരുക്കിയിട്ടുണ്ട്. മാന്നാർ സ്റ്റോർ ജംഗ്ഷനു തെക്ക് യുഐടിക്ക് എതിർവശത്ത് ചോവലിൽ കൃപാഭവനത്തിൽ സാം ചെറിയാന്‍റെ ഭവനാങ്കണത്തിലാണ് അഞ്ചപ്പം തുടങ്ങിയത്.

ലില്ലി ലയൺസ് സ്പെഷൽ സ്‌കൂളിൽ അധ്യാപക ദിനാഘോഷം

ചെങ്ങന്നൂര്‍: ഓണാവധിക്കുശേഷം സ്‌കൂള്‍ വീണ്ടും തുറന്നപ്പോള്‍, ലില്ലി ലയണ്‍സ് സ്‌പെഷല്‍ സ്‌കൂളിലെ കുട്ടികളും രക്ഷിതാക്കളും ചേര്‍ന്ന് അധ്യാപകര്‍ക്കായി ഒരുക്കിയ ചടങ്ങ് വേറിട്ടൊരു അനുഭവമായി. അഞ്ചിന് അധ്യാപക ദിനമായിരുന്നെങ്കിലും അവധിയായതിനാല്‍ ആഘോഷങ്ങള്‍ പിന്നീട് നടത്തുകയായിരുന്നു. സ്‌കൂളിലെ 15 അധ്യാപകരെയും ട്രസ്റ്റിമാരുടെയും പിന്തുണക്കാരുടെയും കുടുംബത്തിലെ ഏഴ് അധ്യാപകരെയും ചടങ്ങില്‍ ആദരിച്ചു. അവരുടെ നിസ്വാർഥമായ സേവനത്തിന് സമൂഹം നല്‍കിയ അംഗീകാരമായി ഓരോരുത്തര്‍ക്കും ഫലകവും സമ്മാനങ്ങളും നല്‍കി. ലയണ്‍സ് ഇന്‍റര്‍നാഷണല്‍ ഏരിയ ലീഡര്‍ അഡ്വ. എ.വി. വാമന്‍കുമാര്‍ മുഖ്യാതിഥിയായി പങ്കെടുത്തു. അധ്യാപകര്‍ വിദ്യാര്‍ഥികളുടെ ജീവിതം രൂപപ്പെടുത്തുന്നവരാണെന്നും അവരുടെ പ്രയത്‌നം സമൂഹത്തിന്‍റെ ഭാവിയെത്തന്നെ നിര്‍ണയിക്കുന്നുവെന്നും അദ്ദേഹം അധ്യാപക ദിന സന്ദേശത്തില്‍ പറഞ്ഞു. അധ്യാപക ദിനാഘോഷത്തിനു ശേഷം വാമന്‍കുമാര്‍ അധ്യാപകര്‍ക്കായി ടീം ബില്‍ഡിംഗ്, റിലേഷന്‍ഷിപ്പ് ബില്‍ഡിംഗ്, കൊളാബറേറ്റീവ് അപ്രോച്ച് എന്നീ വിഷയങ്ങളെക്കുറിച്ച് ക്ലാസുമെടുത്തു.

കൊടുപ്പുന്ന ഗവ. ഹൈസ്‌കൂളില്‍ ശാസ്ത്ര ലാബ് പ്രവര്‍ത്തനം ആരംഭിച്ചു

എടത്വ: കൊടുപ്പുന്ന ഗവ. ഹൈസ്‌കൂളില്‍ സമഗ്ര ശിക്ഷാ കേരള പദ്ധതിയുടെ ഭാഗമായി സംയോജിത ശാസ്ത്രലാബ് പ്രവര്‍ത്തനം ആരംഭിച്ചു. ജില്ലാ പഞ്ചായത്ത് വികസന സ്ഥിരംസമിതി അധ്യക്ഷ ബിനു ഐസക് രാജു ഉദ്ഘാടനം നിര്‍വഹിച്ചു. തലവടി ഉപജില്ലാ വിദ്യാഭ്യാസ ഓഫീസര്‍ എസ്. അശോകന്‍ അധ്യക്ഷത വഹിച്ചു. പ്രധാനാധ്യാപിക എം. ഷെമീറ, തലവടി ബിപിസി ജി. ഗോപാല്‍, പിടിഎ പ്രസിഡന്‍റ് സാജിത ബിനോകുമാര്‍, ബിആര്‍സി കോ ഓര്‍ഡിനേറ്റര്‍ ജി. മായാലക്ഷ്മിയമ്മ, വി. അജിത, ബ്ലസ് കെ. കുര്യന്‍, അധ്യാപിക പ്രസീത സി. രാജ് എന്നിവര്‍ പ്രസംഗിച്ചു. യുപി ക്ലാസുകള്‍ മുതലുള്ള കുട്ടികളില്‍ ശാസ്ത്രാവബോധം വളര്‍ത്തുന്നതിനും പരീക്ഷണനിരീക്ഷണ പാടവം ആര്‍ജിക്കുന്നതിനും ലക്ഷ്യമിട്ടാണ് സമഗ്രശിക്ഷ കേരള സ്റ്റാര്‍സ് പദ്ധതി നടത്തുന്നത്. ശാസ്ത്ര വിഷയങ്ങളില്‍ പരീക്ഷണങ്ങള്‍ നടത്തുന്നതിനുള്ള വിവിധ ഉപകരണങ്ങള്‍ സംയോജിത ശാസ്ത്ര ലാബുകളില്‍ സജ്ജീകരിച്ചു. മൈക്രോസ്‌കോപ്പുകള്‍, രാസവസ്തുക്കള്‍, മോഡലുകള്‍, ഇലക്ട്രിക്കല്‍ സര്‍ക്യൂട്ടുകള്‍, പരിസ്ഥിതി നിരീക്ഷണ ഉപകരണങ്ങള്‍ മുതലായവ ഇതില്‍ ഉള്‍പ്പെടുന്നു. ആധുനിക ഉപകരണങ്ങളുടെ ലഭ്യത വിദ്യാര്‍ഥികളെ സമകാലിക ശാസ്ത്രീയ രീതികളില്‍ ഏര്‍പ്പെടാന്‍ പ്രാപ്തരാക്കുന്നുണ്ട്.

പൊതുസ്ഥലത്ത് മദ്യപാനം തടഞ്ഞു; നാലംഗ സംഘം പോലീസിനെ ആക്രമിച്ചു

ചേര്‍ത്തല: പൊതുസ്ഥലത്തു മദ്യപിച്ച സംഭവത്തില്‍ കസ്റ്റഡിയിലെടുത്ത പ്രതികള്‍ പോലീസിനെ ആക്രമിച്ചു. സംഭവത്തില്‍ എസ്‌ഐ ഉള്‍പ്പെടെ മൂന്നു പോലീസുകാര്‍ക്കു പരിക്കേറ്റു. ചേര്‍ത്തല പട്ടണക്കാട് പോലീസ് സ്റ്റേഷനിലെ എസ്‌ഐ രാജേന്ദ്രന്‍ (53), എസ്‌സിപിഒമാരായ ശ്രീകുമാര്‍ (40), ഷൈന്‍ (40) എന്നിവര്‍ക്കാണ് പരിക്കേറ്റത്. ശ്രീകുമാര്‍ ഓടിച്ചുവന്ന ബൈക്ക് തടഞ്ഞുനിര്‍ത്തി താക്കോല്‍ ഊരിമാറ്റുകയും എസ്‌ഐ രാജേന്ദ്രനെ ഉള്‍പ്പെടെ മര്‍ദിക്കുകയും ചെയ്തു. മര്‍ദനത്തില്‍ പരിക്കേറ്റ പോലീസുകാരെ ആശുപത്രിയില്‍ പ്രവേശിപ്പിച്ചു. പൊതുസ്ഥലത്തു മദ്യപാനം നടത്തിയത് പോലീസ് ചോദ്യം ചെയ്തതാണ് സംഘര്‍ഷത്തില്‍ കലാശിച്ചത്. പട്ടണക്കാട് പോലീസിന്‍റെ പട്രോളിംഗിനിടയില്‍ അന്ധകാരനഴി ബീച്ചില്‍ പൊതുസ്ഥലത്തു മദ്യപിക്കുകയായിരുന്ന പട്ടണക്കാട് പഞ്ചായത്ത് 19-ാം വാര്‍ഡ് കൊച്ചുപറമ്പ് സെബാസ്റ്റ്യന്‍ ജോസഫ് (58), പട്ടണക്കാട് പഞ്ചായത്ത് 19-ാം വാര്‍ഡ് ചെറിയശേരില്‍ സെബാസ്റ്റ്യന്‍ (41), പട്ടണക്കാട് പഞ്ചായത്ത് 19-ാം വാര്‍ഡ് പുന്നക്കര സോജന്‍ (45), പട്ടണക്കാട് പഞ്ചായത്ത് ഒന്നാം വാര്‍ഡ് കൊച്ചുപറമ്പില്‍ ബിജു (40) എന്നിവരെ കസ്റ്റഡിയിലെടുത്ത സംഭവത്തിലാണ് പോലീസും നാലംഗ സംഘവും തമ്മില്‍ സംഘര്‍ഷം ഉണ്ടായത്. ഇവര്‍ക്കെതിരെ പൊതുസ്ഥലത്തു മദ്യപിച്ച സംഭവത്തിലും പോലീസിനെ ആക്രമിക്കുകയും ഡ്യൂട്ടി തടസപ്പെടുത്തുകയും ചെയ്ത സംഭവത്തിലുമായി രണ്ടു കേസ് രജിസ്റ്റര്‍ ചെയ്തിട്ടുണ്ട്.

നിരവധി മോഷണക്കേസുകളിലെ പ്രതി പിടിയില്‍

ചേർത്തല: നിരവധി മോഷണക്കേസുകളിലെ പ്രതിയെ പോലീസ് ഒളിസങ്കേതത്തിൽനിന്നും പിടികൂടി. മുണ്ടൻവേലിയിൽ പാലംപള്ളിപ്പറമ്പിൽ അഭിലാഷ് ആന്‍റണിയെയാണ് കുത്തിയതോട് സിഐ എം. അജയമോഹന്‍റെ നേതൃത്വത്തിലുള്ള സംഘം എരമല്ലൂർ എൻവൈസി ബാറിന് കിഴക്കുവശമുള്ള ഒളിസങ്കേതത്തിൽനിന്നു പിടികൂടിയത്. അടിപിടി കേസിൽ അറസ്റ്റിലായ പ്രതികളിൽ നിന്നുമാണ് അഭിലാഷിനെക്കുറിച്ചുള്ള നിർണായക വിവരങ്ങൾ പോലീസിന് ലഭിച്ചത്. അഭിലാഷിന് എറണാകുളം സെന്‍ട്രൽ, ഹിൽപാലസ്, കൊടുങ്ങല്ലൂർ എന്നിവിടങ്ങളിൽ ബൈക്ക് മോഷണക്കേസും കൂടാതെ സംസ്ഥാനത്ത് പലയിടങ്ങളിലായി പത്തോളം മോഷണക്കേസുകളിലെ പ്രതിയുമാണെന്ന് പോലീസ് പറഞ്ഞു.

വഴിത്തര്‍ക്കം: ഇരുചക്ര വാഹനവും വീടും തല്ലിത്തകര്‍ത്ത് അയല്‍വാസി

എടത്വ: വഴിത്തര്‍ക്കത്തെ തുടര്‍ന്ന് അയല്‍വാസി ഇരുചക്ര വാഹനവും വീടും തല്ലിത്തകര്‍ത്തതായി പരാതി. വീടിന് മുറ്റത്തിരുന്ന ഇരുചക്ര വാഹനവും വീടിന്‍റെ ജനല്‍ച്ചില്ലും മുറ്റത്തിരുന്ന പൂച്ചട്ടികളുമാണ് തല്ലിത്തകര്‍ത്തത്. തകഴി പഞ്ചായത്ത് ഒന്‍പതാം വാര്‍ഡില്‍ മെതിക്കളത്തില്‍ചിറ ബിനുവിന്‍റെ വീട്ടിലാണ് ആക്രമണം നടന്നത്. വ്യാഴാഴ്ച ഉച്ചയോടുകൂടിയാണ് സംഭവം. സമീപവാസിയായ കോയിക്കളം സാബുവുമായി വഴിത്തര്‍ക്കം നിലനിന്നിരുന്നു. നിലവില്‍ നടവഴി ഉണ്ടെങ്കിലും ബിനുവിന്‍റെ വീടിന് സമീപത്തുകൂടി വഴി നല്‍കണമെന്ന് സമീപവാസി സാബു ആവശ്യപ്പെട്ടിരുന്നു. ഇതേത്തുടര്‍ന്ന് ബിനു കോടതിയില്‍നിന്ന് ഇന്‍ജക്ഷന്‍ ഓര്‍ഡര്‍ വാങ്ങി. ഓര്‍ഡറുമായി വീട്ടിലെത്തിയ കോടതി ജീവനക്കാര്‍ക്ക് മുന്‍പില്‍വച്ചാണ് സാബു ആക്രമണം അഴിച്ചു വിട്ടതെന്ന് വീട്ടുകാര്‍ പറയുന്നു. വീടിന്‍റെ മുറ്റത്തിരുന്ന ബൈക്കും ചെടിച്ചട്ടികളും തല്ലിത്തകര്‍ത്ത ശേഷം ബിയര്‍ കുപ്പി ഉപയോഗിച്ച് ജനല്‍ ചില്ല് എറിഞ്ഞു തകര്‍ക്കുകയുമായിരുന്നെന്നാണ് വീട്ടുകാരുടെ പരാതി. ബിനുവിന്‍റെ പരാതിയെ തുടര്‍ന്ന് എടത്വ പോലീസ് സാബുവിനെതിരെ കേസ് എടുത്തു.

നൂറുമേനി വിജയികളുടെ മഹാസംഗമം ഇന്ന്

ചങ്ങനാശേരി: ചങ്ങനാശേരി അതിരൂപത ബൈബിള്‍ അപ്പൊസ്തലേറ്റ്, കുടുംബ കൂട്ടായ്മ എന്നിവയുടെ സംയുക്താഭിമുഖ്യത്തില്‍ അതിരൂപതയിലെ 250 ഇടവകകളില്‍ നിന്നായി ഒരു ലക്ഷത്തോളം ആളുകള്‍ പങ്കെടുത്ത നൂറുമേനി വചനപഠന മത്സരവിജയികളുടെ മഹാസംഗമവും എന്‍റെ സ്വന്തം ബൈബിള്‍ പദ്ധതിയുടെ ഉദ്ഘാടനവും ഇന്ന് എസ്ബി കോളജ് കാവുകാട്ട് ഹാളില്‍ നടക്കും. രാവിലെ 10ന് ആര്‍ച്ച്ബിഷപ് മാര്‍ തോമസ് തറയിലിന്‍റെ അധ്യക്ഷതയില്‍ ചേരുന്ന സമ്മേളനം മലങ്കരസഭാ മേജര്‍ ആര്‍ച്ച്ബിഷപ് ബസേലിയോസ് മാര്‍ ക്ലീമിസ് കാതോലിക്ക ബാവ ഉദ്ഘാടനം ചെയ്യും. ആര്‍ച്ച്ബിഷപ് എമിരിറ്റസ് മാര്‍ ജോസഫ് പെരുന്തോട്ടം അനുഗ്രഹ പ്രഭാഷണവും വികാരി ജനറാള്‍ മോണ്‍. ആന്‍റണി എത്തക്കാട്ട് മുഖ്യപ്രഭാഷണവും നടത്തും. ചലച്ചിത്ര നടന്‍ സിജോയ് വര്‍ഗീസ് വചന സാക്ഷ്യം നല്‍കും. ചലച്ചിത്ര നിര്‍മാതാവും ഗാനരചയിതാവുമായ ലിസി ഫെര്‍ണാണ്ടസ്, അതിരൂപത ബൈബിള്‍ അപ്പൊസ്തലേറ്റ് ഡയറക്ടര്‍ ഫാ. ജോര്‍ജ് മാന്തുരുത്തില്‍, മീഡിയ വില്ലേജ് കോ ഓര്‍ഡിനേറ്റര്‍ ഫാ. ജോജിന്‍ ഇലഞ്ഞിക്കല്‍, നൂറുമേനി വചന പഠനപദ്ധതി ചെയര്‍മാന്‍ സണ്ണി ഇടിമണ്ണിക്കല്‍, ബൈബിള്‍ അപ്പൊസ്തലേറ്റ് അതിരൂപത പ്രസിഡന്‍റ് ഡോ. റൂബിള്‍ രാജ്, ഡോ.പി.സി. അനിയന്‍കുഞ്ഞ്, ജനറല്‍ കണ്‍വീനര്‍ ഡോ. ജോബിന്‍ എസ്. കൊട്ടാരം, പ്രഫ. ജോസഫ് ടിറ്റോ, സിസ്റ്റര്‍ ചെറുപുഷ്പം, ജോസി കടന്തോട്, മറിയം ജോര്‍ജ് എന്നിവര്‍ പ്രസംഗിക്കും. അയ്യായിരത്തിലേറെ പേര്‍ മഹാസംഗമത്തില്‍ പങ്കെടുക്കും. ഒന്നും രണ്ടും സ്ഥാനങ്ങള്‍ ഡോക്ടര്‍ ദമ്പതിമാര്‍ക്ക് ചങ്ങനാശേരി: ഒരുലക്ഷത്തോളം ആളുകള്‍ പങ്കെടുത്ത ബൈബിള്‍ വചന മനഃപാഠ പദ്ധതിയായ നൂറുമേനി സീസണ്‍ 3 മത്സരത്തിന്‍റെ ഗ്രാന്‍ഡ് ഫിനാലെയില്‍ 148 പോയിന്‍റ് നേടി തിരുവനന്തപുരം റീജണിലെ ഡോ. അഭിലാഷ് കെ. തോമസ്, ഡോ. റോണാ ജോസഫ് പി, സെബാസ്റ്റ്യന്‍ തോമസ് കുഴികാട്ടില്‍ എന്നിവരടങ്ങിയ കുടുംബം ജേതാക്കളായി. 147 പോയിന്‍റ് നേടി കോട്ടയം റീജണിലെ ഡോ. സുജിത് ജോ മാത്യു, ഡോ. അനു വര്‍ഗീസ്, മരിയ റോസ് ജോ മണിയങ്ങാട്ട് എന്നിവരുടെ കുടുംബം രണ്ടാം സ്ഥാനവും 140 പോയിന്‍റ് നേടി കുട്ടനാട് റീജണിലെ മാത്യു തോമസ്, മേരിക്കുട്ടി തോമസ്, മെര്‍ലി ആന്‍ മാത്യു തറയില്‍ കാനാച്ചേരി എന്നിവരുടെ കുടുംബം മൂന്നാം സ്ഥാനവും 120 പോയിന്‍റ് നേടി ചങ്ങനാശേരി റീജണിലെ ജയിംസ് കെ. ജേക്കബ്, ഷൈനി സെബാസ്റ്റ്യന്‍ കോലോത്ത്, മരിയ ജോസഫ് എന്നിവരുടെ കുടുംബം നാലാം സ്ഥാനവും 101 പോയിന്‍റ് നേടി നെടുംകുന്നം റീജണിലെ സോജി ചാക്കോ, മരിയ മാത്യു കൂനാനിക്കല്‍ എന്നിവരുടെ കുടുംബം അഞ്ചാം സ്ഥാനവും നേടി. ആദ്യ രണ്ടു സ്ഥാനങ്ങള്‍ നേടിയ ടീമുകള്‍ തമ്മില്‍ ഒരു പോയിന്‍റിന്‍റെ വ്യത്യാസമേയുള്ളൂ. ജീസസ് യൂത്തില്‍ മെഡിക്കല്‍ കോളജ് പഠന കാലഘട്ടംമുതല്‍ത്തന്നെ സജീവമാണ് ഒന്നും രണ്ടും സമ്മാനങ്ങള്‍ നേടിയ ഡോക്ടര്‍ ദമ്പതികള്‍. ആര്‍ച്ച്ബിഷപ് എമിരിറ്റസ് മാര്‍ ജോസഫ് പെരുന്തോട്ടം വിജയികളെ പ്രഖ്യാപിച്ചു. നൂറുമേനി വചനപഠനം വചനം ലോകമെമ്പാടും എത്തിക്കുന്നതില്‍ വലിയ പങ്കാണ് വഹിക്കുന്നതെന്ന് മാര്‍ ജോസഫ് പെരുന്തോട്ടം അഭിപ്രായപ്പെട്ടു. ഡോ. റൂബിള്‍ രാജാണ് ഫിനാലെ ക്വിസ് നയിച്ചത്. ബൈബിള്‍ അപ്പൊസ്തലേറ്റ് ഡയറക്ടര്‍ ഫാ. ജോര്‍ജ് മാന്തുരുത്തില്‍, നൂറുമേനി ചെയര്‍മാന്‍ സണ്ണി തോമസ് ഇടിമണ്ണിക്കല്‍, ഫാ. ജോജിന്‍ ഇലഞ്ഞിക്കല്‍, ജനറല്‍ കണ്‍വീനര്‍ ഡോ. ജോബിന്‍ എസ്. കൊട്ടാരം, പ്രഫ. ജോസഫ് ടിറ്റോ എന്നിവര്‍ പ്രസംഗിച്ചു.

അന്തിമ വോട്ടര്‍പ്പട്ടികയില്‍ പിഴവെന്ന്

എടത്വ: അന്തിമ വോട്ടര്‍പ്പട്ടിക ലിസ്റ്റ് പുറത്തുവന്നതോടെ പുതുതായി ലിസ്റ്റില്‍ പേര് ചേര്‍ത്ത പലരുടെയും പേരുകള്‍ ഉള്‍പ്പെട്ടിട്ടില്ലെന്ന് ആരോപണം. അന്തിമ വോട്ടര്‍പ്പട്ടിക പ്രഖ്യാപനം വന്നതോടുകൂടി അപേക്ഷ നല്‍കിയിട്ടും ഉള്‍പ്പെടാത്തവര്‍ ഇനിയും ലിസ്റ്റില്‍ കയറിപ്പറ്റാനാവില്ലെന്ന് ആശങ്കയിലാണ്. തദ്ദേശ തെരഞ്ഞെടുപ്പ് പ്രഖ്യാപനത്തിന് ആഴ്ചകള്‍ മാത്രം ബാക്കി നില്‍ക്കേ സംസ്ഥാന തെരഞ്ഞെടുപ്പ് കമ്മീഷന്‍റെ വെബ്‌സെറ്റ് മുഖേന തയാറാക്കി തദ്ദേശ സ്ഥാപനങ്ങള്‍ പ്രസിദ്ധീകരിച്ച അന്തിമ വോട്ടര്‍ പട്ടിക ലിസ്റ്റിലാണ് വീണ്ടും പിഴവ് സംഭവിച്ചത്. ജീവിച്ചിരിക്കുന്ന പല വോട്ടര്‍മാരും ലിസ്റ്റില്‍നിന്ന് പുറംതള്ളിയെന്നും വോട്ടിരട്ടിപ്പ് ഉണ്ടായെന്നുമാണ് പഞ്ചായത്ത് അംഗങ്ങളുടെയും വിവിധ രാഷ്ട്രീയ പാര്‍ട്ടികളുടെയും ആരോപണം. പഞ്ചായത്ത് ഇലക്ട്രല്‍ ഓഫീസര്‍മാര്‍ പ്രസീദ്ധീകരിച്ചിരുന്ന ലിസ്റ്റിന്‍റെ പകര്‍പ്പ് ജനപ്രതിനിധികളും രാഷ്ട്രീയപാര്‍ട്ടികളും വാങ്ങി പരിശോധിച്ചപ്പോഴാണ് പുതിയതായി അപേക്ഷിച്ച പല വോട്ടര്‍മാരും ലിസ്റ്റില്‍ ഇല്ലെന്ന് കണ്ടെത്തിയത്. ആദ്യ ലിസ്റ്റില്‍ ഉള്‍പ്പെട്ടിട്ടില്ലാത്ത വോട്ടര്‍മാരും 18 വയസ് പൂര്‍ത്തിയായ പുതിയ വോട്ടര്‍മാരും വോട്ടര്‍പ്പട്ടികയില്‍ പേര് ഉള്‍പ്പെടുത്തുന്നതിന് അപേക്ഷ നല്‍കിയിരുന്ന വോട്ടര്‍മാരെ പഞ്ചായത്ത് അധികൃതര്‍ ഹിയറിംഗിന് വിളിപ്പിച്ചിരുന്നു. ഹിയറിംഗിനുശേഷം ഇറക്കിയ അന്തിയ വോട്ടര്‍ പട്ടിക ലിസ്റ്റിലാണ് വീണ്ടും പിഴവ് സംഭവിച്ചത്. ജീവിച്ചിരിക്കുന്ന വോട്ടര്‍മാരെ മരണപ്പെട്ട ലിസ്റ്റില്‍ ഉള്‍പ്പെടുത്തിയും വോട്ടിരട്ടിപ്പ് നടത്തിയുമാണ് മെമ്പര്‍മാര്‍ ചൂണ്ടിക്കാട്ടുന്നത്. അന്തിമ ലിസ്റ്റില്‍നിന്ന് പുറംതള്ളിയ വോട്ടര്‍മാരെ വീണ്ടും ലിസ്റ്റില്‍ ഉള്‍പ്പെടുത്താനുള്ള സാധ്യതയും കുറവായതിനാല്‍ വോട്ടര്‍മാരും ആശങ്കയിലാണ്. നിരവധി വോട്ടര്‍മാരാണ് ഇതിനോടകം പരാതിയുമായി രംഗത്ത് വന്നത്. വരും ദിവസങ്ങളില്‍ തെരഞ്ഞെടുപ്പ് നടപടി ക്രമങ്ങളുടെ ഭാഗമായി സംവരണ സീറ്റുകള്‍ നിശ്ചയിച്ച് നല്‍കണം. അന്തിമ ലിസ്റ്റില്‍ വീണ്ടും കടന്നുകൂടിയ പിഴവ് ഇലക്ട്രല്‍ ഓഫീസര്‍മാര്‍ക്കും തലവേദന സൃഷ്ടിക്കുന്നുണ്ട്. അതേസമയം വെബ്‌സൈറ്റില്‍ അപ്പ്‌ലോഡാകുന്ന പിഴവാണ് ക്രമക്കേടിന് കാരണമായി ഉദ്ദ്യോഗസ്ഥര്‍ ചൂണ്ടിക്കാട്ടുന്നത്.

ആറന്മുളയിൽ അഷ്ടമിരോഹിണി വള്ളസദ്യ 14ന്

ആറന്മുള: ആറന്മുള അഷ്ടമിരോഹിണി വള്ളസദ്യ 14ന്. രാവിലെ 10.30ന് മന്ത്രി വി.എൻ. വാസവൻ വള്ളസദ്യയും സമൂഹസദ്യയും ഉദ്ഘാടനം ചെയ്യും. 52 പള്ളിയോടങ്ങളിലായി എത്തുന്ന കരക്കാരെ സ്വീകരിച്ച് 11.30ന് സദ്യയ്ക്കു തുടക്കമാകും. അന്നേദിവസം ക്ഷേത്രത്തിലെത്തുന്ന എല്ലാ ഭക്തജനങ്ങൾക്കും വിഭവ സമൃദ്ധമായ സദ്യ നൽകുന്നതിനാണ് ഒരുക്കങ്ങൾ നടക്കുന്നത്. ഇതിനായി ഇന്ന് രാവിലെ ഒന്പതിനും 9.45നും മധ്യേ ക്ഷേത്രത്തിലെ ഊട്ടുപുരയിലെ അടുപ്പിൽ അഗ്നിപകരും . അമ്പലപ്പുഴ പാൽപ്പായസം ഉൾപ്പെടെ വള്ളസദ്യക്കുള്ള വിഭവങ്ങൾ ചേർത്താണ് സദ്യ ഒരുക്കുന്നത്. 51 പറ അരിയുടെ ചോറാണ് തയാറാക്കുന്നത്. ക്ഷേത്രത്തിന്‍റെ വടക്കും പടിഞ്ഞാറും ഭാഗത്ത് പള്ളിയോടങ്ങൾക്കും തെക്ക് ഭാഗത്ത് മറ്റ് ഭക്തജനങ്ങൾക്കുമാണ് സദ്യ വിളമ്പുന്നത്. ഏതാണ്ട് 500 ഓളം പേരാണ് ഇതുമായി ബന്ധപ്പെട്ട ജോലികളിൽ ഏർപ്പെട്ടിട്ടുള്ളത്. ഇടശേരിമല തിരുവന്പാടി കിഴക്കേമലയിൽ സന്തോഷ് നായർ എന്ന ഭക്തനാണ് 501 പറ അരി സംഭാവനയായി നൽകിയത്. ഭക്തജനങ്ങൾക്ക് സംഭാവന നൽകുന്നതിന് ദേവസ്വം ബോർഡും പള്ളിയോട സേവാ സംഘവും ചേർന്നു തയാറാക്കിയിട്ടുള്ള ടിക്കറ്റുകൾ ലഭ്യമാണ്. 10,000, 5,000, 2,000, 1,000 എന്നീ ക്രമത്തിലുള്ള ടിക്കറ്റുകളാണ് തയാറാക്കിയിട്ടുള്ളത്. ആറന്മുള ദേവസ്വം ഓഫീസിലും ആനക്കൊട്ടിൽ പ്രത്യേക കൗണ്ടറിലും പള്ളിയോട സേവാസംഘം ഓഫീസിലും ടിക്കറ്റുകൾ ലഭ്യമാണ്. സംഭാവന നൽകുന്നവർക്ക് പാഞ്ചജന്യം ഓഡിറ്റോറിയത്തിലാണ് സദ്യ ക്രമീകരിച്ചിട്ടുള്ളത്. കരയിലെ വിശിഷ്ട വ്യക്തികൾക്ക് വിനായക ഓഡിറ്റോറിയത്തിൽ അഷ്ടമിരോഹിണി സദ്യ നൽകും. ന്നത്. 25 ലക്ഷം രൂപ ചെലവിട്ടാണ് ഇക്കുറി അഷ്ടമിരോഹിണി സദ്യ ഒരുക്കുന്നത്. അഷ്ടമിരോഹിണി നാളിൽ ക്ഷേത്രത്തിൽ പ്രത്യേക വഴിപാടുകളും അലങ്കാരങ്ങളും ഉണ്ടാകും. ഒരു സ്ഥലത്ത് ഇത്രയധികം ആളുകൾ ഒരുമിച്ചിരുന്ന് സദ്യ വിഭവങ്ങൾ ആസ്വദിക്കുന്നത് ലോകത്തിൽ ആറന്മുള മാത്രമാണ്. അഷ്ടമിരോഹിണി വള്ളസദ്യക്ക് ഹൈക്കോടതി നിർദ്ദേശപ്രകാരം രൂപീകരിച്ചിട്ടുള്ള നിർവഹണസമിതിയാണ് മേൽനോട്ടം വഹിക്കുന്നത്. അമ്പലപ്പുഴ അരവിന്ദാക്ഷൻ നായരുടെ നേതൃത്വത്തിലുള്ള സംഘമാണ് അമ്പലപ്പുഴ പാൽപ്പായസം ഉണ്ടാക്കുന്നത്.

ബിന്ദുവിനെ കൊലപ്പെടുത്തിയതും സെബാസ്റ്റ്യന്‍? ക്രൈം ബ്രാഞ്ചിന് നിര്‍ണായക തെളിവുകൾ ലഭിച്ചു; ഇന്നു കസ്റ്റഡിയിലെടുക്കും

കോട്ടയം: അതിരമ്പുഴ സ്വദേശിനി ജെയ്‌നമ്മയെ കൊലപ്പെടുത്തി ആഭരണങ്ങള്‍ കവര്‍ന്ന കേസിലെ പ്രതി സെബാസ്റ്റ്യന്‍ മറ്റൊരു കൊലക്കേസില്‍കൂടി പ്രതിയായി. ചേര്‍ത്തല കടക്കരപ്പള്ളി സ്വദേശിനി ബിന്ദു പത്മനാഭനെ കൊല ചെയ്തതില്‍ സെബാസ്റ്റ്യന്‍റെ പങ്കും നിര്‍ണായക തെളിവുകളും ആലപ്പുഴ ക്രൈം ബ്രാഞ്ചിന് ലഭിച്ചു. വിയ്യൂര്‍ സെന്‍ട്രല്‍ ജയിലില്‍ കഴിയുന്ന ചേര്‍ത്തല പള്ളിപ്പുറം സ്വദേശി സി.എം. സെബാസ്റ്റ്യനെ ഇന്ന് കസ്റ്റഡിയില്‍ വാങ്ങും. കോടികളുടെ ആസ്തിയുണ്ടായിരുന്ന ബിന്ദു പത്മനാഭനെ സെബാസ്റ്റ്യനും കൂട്ടാളിയും ചേര്‍ന്നു കൊലപ്പെടുത്തി മൃതദേഹം മറവുചെയ്തു എന്നാണ് സൂചന. വീട്ടുകാരുമായി അകന്നുകഴിഞ്ഞിരുന്ന അവിവാഹിതയായ ബിന്ദു സെബാസ്റ്റ്യനുമായി അടുപ്പത്തിലായിരുന്നു. ചേര്‍ത്തലയില്‍ സെബാസ്റ്റ്യന്‍റെ വീട്ടില്‍ ബിന്ദു സന്ദര്‍ശകയുമായിരുന്നു. അക്കാലത്ത് സെബാസ്റ്റ്യനുമായി ബ്രോക്കര്‍ പണിയില്‍ അടുപ്പമുണ്ടായിരുന്നവരെയും സ്വത്ത് അപഹരണത്തിന് സഹായിച്ചവരെയും തുടരെ ചോദ്യം ചെയ്തതോടെയാണ് ബിന്ദു കൊല ചെയ്യപ്പെട്ടു എന്നു സ്ഥിരീകരണമായത്. ബിന്ദു കൊലക്കേസില്‍ മറ്റു ചിലര്‍കൂടി അറസ്റ്റിലാകും. 2006 ലാണ് ചേര്‍ത്തല സ്വദേശി ബിന്ദു പത്മനാഭനെ കാണാതായത്. പത്ത് വര്‍ഷങ്ങള്‍ക്കുശേഷം 2017 ലാണ് ബിന്ദുവിന്‍റെ സഹോദരന്‍ പത്മനിവാസില്‍ പി. പ്രവീണ്‍കുമാര്‍ സഹോദരിയെ കാണാനില്ലെന്ന് പരാതി നല്‍കുന്നത്. പോലീസും ക്രൈംബ്രാഞ്ചും ബിന്ദുവിന്‍റെ തിരോധാനക്കേസ് അന്വേഷിച്ചെങ്കിലും ഒന്നും കണ്ടെത്താനായില്ല. ബിന്ദുവിന്‍റെ സ്ഥലവും ബാങ്ക് നിക്ഷേപവും വ്യാജരേഖകള്‍ ചമച്ച് സെബാസ്റ്റ്യന്‍ കവര്‍ന്നതായി സ്ഥിരീകരിച്ചിരുന്നു. ഇതിനു പുറമെ പട്ടണക്കാട്, ചേര്‍ത്തല, അമ്പലപ്പുഴ, ഇടപ്പള്ളി സബ് രജിസ്ട്രാര്‍ ഓഫീസുകളില്‍ രജിസ്റ്റര്‍ ചെയ്ത കോടിക്കണക്കിനു രൂപ വിലയുള്ള വസ്തുക്കള്‍ പലര്‍ക്കായി വിറ്റതായും കണ്ടെത്തിയിരുന്നു. ബിന്ദുവിന്‍റെ തിരോധാനം സംബന്ധിച്ച അന്വേഷണം വഴിമുട്ടി നില്‍ക്കുമ്പോഴാണ് കോട്ടയം ഏറ്റുമാനൂര്‍ സ്വദേശി ജെയ്നമ്മയുടെ തിരോധാനക്കേസ് അന്വേഷണം വീണ്ടും സെബാസ്റ്റ്യനിലേക്ക് എത്തുന്നത്. കോട്ടയം ക്രൈംബ്രാഞ്ച് നടത്തിയ പരിശോധനയില്‍ ഇയാളുടെ പള്ളിപ്പുറത്തെ വീട്ടുപരിസരത്തുനിന്ന് അസ്ഥികൂട അവശിഷ്ടങ്ങള്‍ കണ്ടെത്തി. ഇതോടെ കാണാതായ ജെയ്നമ്മ കൊല്ലപ്പെട്ടെന്ന് സ്ഥിരീകരിച്ച സംഘം സെബാസ്റ്റ്യനെ അറസ്റ്റ് ചെയ്തു. പിന്നാലെയാണ് സെബാസ്റ്റ്യന്‍ സംശയമുനയിലുള്ള ചേര്‍ത്തല സ്വദേശികളായ ബിന്ദുവിന്‍റെയും ഐഷയുടെയും തിരോധാനത്തില്‍ അന്വേഷണം വീണ്ടും സജീവമായത്. ഐഷയെയും സെബാസ്റ്റ്യന്‍ സമാനമായ രീതിയില്‍ വക വരുത്തിയെന്നാണ് സൂചന. ചേര്‍ത്തല പോലീസാണ് ഐഷയുടെ തിരോധാനം അന്വേഷിച്ചുവരുന്നത്. 2018ല്‍ ബിന്ദു പത്മനാഭന്‍റെ തിരോധാനം അന്വേഷിച്ച ഘട്ടത്തില്‍ സെബാസ്റ്റ്യന്‍റെ വിശ്വസ്തനായിരുന്ന പള്ളിപ്പുറം തൈക്കൂട്ടത്തില്‍ മനോജ് ജീവനൊടുക്കിയിരുന്നു. കൊല്ലപ്പെട്ട ബിന്ദു സ്ഥിരമായി വിളിച്ചിരുന്ന ഓട്ടോക്കാരനായിരുന്നു മനോജ്. ബിന്ദുവിന്‍റെ മരണത്തില്‍ ഇയാള്‍ക്കും പങ്കുള്ളതായി സംശയിക്കുന്നു.

യൂറിയ കിട്ടാനില്ല; പകരം മൂന്നിരട്ടി വിലയ്ക്ക് മിശ്രിത വളം

കടുത്തുരുത്തി: യൂറിയ കിട്ടാനില്ല. നെല്‍കര്‍ഷകര്‍ കടുത്ത പ്രതിസന്ധിയില്‍. അപ്പര്‍ കുട്ടനാടന്‍ മേഖലയിൽ അടക്കം നെൽകർഷകർ വലയുകയാണ്. നെല്‍കര്‍ഷകര്‍ പ്രധാനമായും ഉപയോഗിക്കുന്ന വളങ്ങളിലൊന്നാണ് യൂറിയ. മാസങ്ങളായി യൂറിയ കിട്ടാനില്ലെന്നാണ് കര്‍ഷകര്‍ പറയുന്നത്. തങ്ങൾക്കു കിട്ടുന്നില്ലെങ്കിലും വൻകിട കന്പനികൾ അത് ആവശ്യം പോലെ വാങ്ങിയെടുക്കുന്നുണ്ടെന്ന് കർഷകർ ആരോപിക്കുന്നു. യൂറിയ കിട്ടാത്തതുമൂലം മിശ്രിത വളങ്ങളാണ് കര്‍ഷകര്‍ ഇപ്പോള്‍ കൂടുതലായി ഉപയോഗിക്കേണ്ടി വരുന്നത്. ഇതിനു മൂന്നിരിട്ടിയോളം വില നല്‍കണം. എന്നാൽ, യൂറിയ ഉപയോഗിക്കുന്നതിന്‍റെ പ്രയോജനം കിട്ടുന്നില്ലെന്നും കര്‍ഷകര്‍ പറയുന്നു. കൃഷിച്ചെലവ് കുതിക്കും നടീല്‍ കഴിഞ്ഞ് ഒരു മാസത്തിനകവും കതിര്‍ വരുന്നതിനു മുമ്പായിട്ടും നല്‍കേണ്ട വളങ്ങളില്‍ പ്രധാനമാണ് യൂറിയ. യഥാസമയത്തുള്ള വളപ്രയോഗമാണ് നെല്‍കൃഷിക്കു പ്രധാനം. 50 കിലോ യൂറിയക്ക് ശരാശരി 300 രൂപ വരെയാണ് വില. അതേസമയം, മിശ്രിത വളത്തിന് 1500 രൂപയോളം ചെലവ് വരും. ഒരേക്കര്‍ സ്ഥലത്ത് കൃഷിയിറക്കാന്‍ ഏതാണ്ട് 20,000 ത്തോളം രൂപ ചെലവുണ്ട്. യൂറിയ കിട്ടാതായതോടെ കൃഷിച്ചെലവ് കുതിച്ചുയരുന്ന സ്ഥിതിയാണ്. കാരണം പാകപ്പിഴ ഓരോ സീസണിലെയും കൃഷിയുടെ അടിസ്ഥാനത്തിലാണ് കേന്ദ്രകൃഷി മന്ത്രാലയും സംസ്ഥാനങ്ങള്‍ക്കു വളങ്ങള്‍ അനുവദിക്കുന്നത്. കേന്ദ്രസര്‍ക്കാര്‍ അനുവദിക്കുന്ന സബ്‌സിഡി നിരക്കിലാണ് വളം കര്‍ഷകര്‍ക്കു നല്‍കുന്നത്. കാര്‍ഷികാവശ്യത്തിനു നല്‍കുന്ന വളങ്ങള്‍ കാര്‍ഷികേതര ആവശ്യങ്ങള്‍ക്ക് ഉപയോഗിക്കുന്നതു തടയാൻ പോസ്റ്റ് ഓഫ് സെയില്‍ (പിഒഎസ്) യന്ത്രത്തില്‍ രേഖപ്പെടുത്തിയാണ് വിതരണം. ഇക്കാര്യത്തിലുണ്ടായ പാകപ്പിഴകളാണ് യൂറിയ ക്ഷാമത്തിനു കാരണമെന്നാണ് ഔദ്യോഗിക വിശദീകരണം. ഐപിഎല്‍, എംഎഫ്എല്‍, സ്പിക്ക്, ഇഫ്‌കോ തുടങ്ങിയ കമ്പനികളാണ് യൂറിയ പ്രധാനമായും ഉത്പാദിപ്പിക്കുന്നത്.

വിദ്യാഭ്യാസരംഗത്ത് ക്രൈസ്തവ സംഭാവനകൾ നിസ്തുലം: റവ.ഡോ. മാത്യു ചങ്ങങ്കരി

എടത്വ: വിദ്യാഭ്യാസരംഗത്ത് ക്രൈസ്തവ സംഭാവനകൾ നിസ്തുലമെന്ന് ചങ്ങനാശേരി അതിരൂപത വികാരി ജനറാൾ ഡോ. മാത്യു ചങ്ങങ്കരി പറഞ്ഞു. സെന്‍റ് അലോഷ്യസ് ഹയര്‍ സെക്കന്‍ഡറി സ്‌കൂള്‍ സില്‍വര്‍ ജൂബിലി ഓഡിറ്റോറിയത്തിന്‍റെ ഉദ്ഘാടനം നിർവഹിച്ച് പ്രസംഗി ക്കുകയായിരുന്നു അദ്ദേഹം. ഫൊറോന വികാരി ഫാ. ഫിലിപ്പ് വൈക്കത്തുകാരന്‍ വെഞ്ചരിപ്പ് കര്‍മം നിര്‍വഹിച്ചു. ചങ്ങനാശേരി അതിരൂപത കോര്‍പറേറ്റ് മാനേജര്‍ റവ.ഡോ. ആന്‍റണി മൂലയില്‍ ജൂബിലി സന്ദേശം നല്‍കി. പ്രിന്‍സിപ്പല്‍ പി.സി. ജോബി, മുന്‍ പ്രിന്‍സിപ്പല്‍മാരായ ജോസഫ് കെ. നെല്ലുവേലി, ആന്‍റണി മാത്യു, മാത്തുക്കുട്ടി വര്‍ഗീസ്, ഹെഡ്മാസ്റ്റര്‍ ജിനോ ജോസഫ്, ജോർജ് ഫിലിപ്പ്, മെറിൻ നീലങ്കാവിൽ, പിടിഎ പ്രസിഡന്‍റ് ബൈജു തങ്കച്ചന്‍ എന്നിവര്‍ പ്രസംഗിച്ചു.

വർഗീയ രാഷ്‌ട്രീയം അഴിമതിയേക്കാൾ അപകടം: പ്രകാശ് രാജ്

ആലപ്പുഴ: മതത്തിന്‍റെയും ചിന്താഗതിയുടെയും നിലപാടിന്‍റെയും പേരിൽ ജനങ്ങളെ ഭിന്നിപ്പിച്ച് ഭരണം നിലനിർത്താനുള്ള ബിജെപിയുടെ ശ്രമം ജനാധിപത്യ സമൂഹത്തിന് ആശാസ്യമല്ലെന്നു നടൻ പ്രകാശ് രാജ്. സിപിഐ സംസ്ഥാന സമ്മേളനത്തിന്‍റെ ഭാഗമായി മതനിരപേക്ഷതയുടെയും ഫെഡറലിസത്തിന്‍റെയും ഭാവി എന്ന വിഷയത്തിൽ നടന്ന സെമിനാറിൽ പ്രഭാഷണം നടത്തുകയായിരുന്നു അദ്ദേഹം. അഴിമതിയെക്കാൾ അപകടമാണ് വർഗീയരാഷ്‌ട്രീയം. ഓണവും ദസറയും പോലുള്ള മതേതര ആഘോഷങ്ങൾ ഹിന്ദുത്വവത്കരിക്കാനാണ് സംഘപരിവാർ ശ്രമം. അതിനെ പരാജയപ്പെടുത്താൻ പോരാട്ടം തുടരണം. മൗനമായിരുന്നാലും ശരീരത്തിനേറ്റ മുറിവ് സുഖപ്പെടും. എന്നാൽ, സമൂഹത്തിനേറ്റ മുറിവ് മൗനമായിരുന്നാൽ കൂടുതൽ വ്രണപ്പെടും - അദ്ദേഹം പറഞ്ഞു.

സിപിഐ സംസ്ഥാന സമ്മേളനം : ബിനോയി വിശ്വം തുടർന്നേക്കും

ആലപ്പുഴ: സിപിഐ സംസ്ഥാന സമ്മേളനം മുന്നേറുമ്പോൾ ബിനോയ് വിശ്വം സെക്രട്ടറി സ്ഥാനത്തു തുടരാനാണ് എല്ലാ സാധ്യതയും. നിലവിൽ സെക്രട്ടറി സ്ഥാനം ഉന്നമിട്ടുകൊണ്ടുള്ള നീക്കം പാർട്ടിയിൽ ഇല്ല. എന്നാൽ, പാർട്ടിയുടെ നിയന്ത്രണം കൈയാളാനുള്ള അണിയറ നീക്കം ശക്തമാണു താനും. സംസ്ഥാന കൗൺസിലിൽ ആധിപത്യം ഉറപ്പിക്കാനാണ് ഈ കരുനീക്കങ്ങൾ. കൗ‍ൺസിലിൽ ഭൂരിപക്ഷം നേടിയാൽ പിന്നീടു നടക്കുന്ന നിർവാഹക സമിതിയുടെയും അസി.സെക്രട്ടറിമാരുടെയും തെരഞ്ഞെടുപ്പിൽ അതു പ്രതിഫലിക്കും. പാർട്ടിയുടെ നിയന്ത്രണം ചൊൽപ്പടിയിലാകും. താൻ ഐക്യത്തിന്‍റെ പതാകാവാഹകനാകുമെന്ന സൂചന ബിനോയ് പാർട്ടിക്കു നൽകിക്കഴിഞ്ഞു. ബിനോയിക്കൊപ്പം നിൽക്കുന്ന ദേശീയ നിർവാഹകസമിതി അംഗം പി. സന്തോഷ് കുമാർ, മന്ത്രിമാരായ കെ.രാജൻ, പി.പ്രസാദ്, സംസ്ഥാന അസി. സെക്രട്ടറി പി.പി.സുനീർ എന്നിവർ കാനം പക്ഷത്തിനു വേണ്ടിയും ദേശീയ നിർവാഹകസമിതി അംഗം കെ.പ്രകാശ്ബാബു, അസി.സെക്രട്ടറി ഇ. ചന്ദ്രശേഖരൻ, കൊല്ലം ജില്ലാ സെക്രട്ടറി പി.എസ്. സുപാൽ, മുൻമന്ത്രി വി.എസ്. സുനിൽകുമാർ തുടങ്ങിയവർ അപ്പുറത്തുംനിന്നു കൊണ്ടുള്ള പടനീക്കങ്ങൾ അണിയറയിൽ ശക്തം. കെ.ഇ. ഇസ്മായിലിന്‍റെ ഇന്നലത്തെ സമൂഹമാധ്യമക്കുറിപ്പ് കാനം വിരുദ്ധർക്കുള്ള ആഹ്വാനം കൂടിയാണ്. വിഭാഗീയതയുമായി ആലപ്പുഴയ്ക്കു വണ്ടി കയറാൻ ഒരുങ്ങേണ്ട എന്ന താക്കീതാണ് അദ്ദേഹം പാർട്ടി യോഗങ്ങളിൽ ആവർത്തിച്ചു നൽകുന്നത്. മുൻ സംസ്ഥാന സെക്രട്ടറി കാനം രാജേന്ദ്രനെ അനുകൂലിക്കുന്നവരുടെ പിന്തുണയോടെയാണു സംസ്ഥാന സെക്രട്ടറി ആയതെങ്കിലും ശേഷം മറുവിഭാഗവുമായും അനുനയത്തിൽ പോകാനാണ് അദ്ദേഹം ശ്രമിച്ചത്. എന്നാൽ കാനം പക്ഷവും കാനം വിരുദ്ധ പക്ഷവും പഴയതു പോലെ പാർട്ടിക്കകത്തു സജീവമാണ്. ബിനോയിക്കു പകരം കെ.പ്രകാശ് ബാബു സെക്രട്ടറി സ്ഥാനത്തേക്കു വരണമെന്ന അഭിപ്രായം അടുപ്പക്കാരോട് ഇസ്മായിൽ പങ്കുവച്ചിട്ടുണ്ടെങ്കിലും മത്സരം സംഘടിപ്പിച്ചു സമ്മേളനം പ്രതിസന്ധിയിലാക്കാൻ ഇല്ലെന്നാണ് പ്രകാശ് ബാബുവിന്‍റെ നിലപാട്.

കളഞ്ഞുകിട്ടിയ പണം ഉടമയ്ക്കു തിരികെ നൽകി യുവതി മാതൃകയായി

ചാരുംമൂട്: കളഞ്ഞുകിട്ടിയ പണം ഉടമയ്ക്കു തിരികെ നൽകി യുവതി മാതൃകയായി. നൂറനാട് പുതിയവിള പറങ്കാംമൂട്ടിൽ പടീറ്റതിൽ സുബിയുടെ കൈയിൽനിന്നും ഇന്നലെ ഉച്ചയ്ക്കാണ് 37,000 രൂപ അടങ്ങിയ പഴ്‌സ് റോഡിൽ നഷ്ടപ്പെട്ടത്. തുടർന്ന് ഇതുവഴിവന്ന താമരക്കുളം പൈറ്റുംവിള താജിനയ്ക്ക് ലഭിക്കുന്നത്. തുടർന്ന് ഇവർ പഴ്‌സ് വള്ളികുന്നം പോലീസിനെ ഏൽപ്പിക്കുകയായിരുന്നു. കായംകുളത്ത് ഇന്‍റർവ്യൂ കഴിഞ്ഞുമടങ്ങുകയായിരുന്നു താജിന.

പൈപ്പു പൊട്ടി ശുദ്ധജലം പാഴാകുന്നു

അമ്പലപ്പുഴ: ദേശീയപാത കച്ചേരിമുക്കിൽ പൈപ്പുപൊട്ടി ശുദ്ധജലം പാഴാകുന്നു. റോഡ് നിർമാണത്തിന്‍റെ ഭാഗമായി ജെസിബി ഉപയോഗച്ച് പണി നടക്കുന്ന ഭാഗത്താണ് പൈപ്പ് പൊട്ടിയത്. ദിവസങ്ങളായി വെള്ളം റോഡിലേക്ക് ഒഴുകിയെത്തുകയാണ്. അധികൃതർ തിരിഞ്ഞുനോക്കുന്നിമില്ല. നൂറുകണക്കിനു വാഹനങ്ങൾ പോകുന്ന ഏറെ തിരക്കുള്ള ഭാഗമാണിത്. റോഡിൽ രൂപപ്പെട്ട വൻകുഴികളിലാണ് പൈപ്പ് പൊട്ടിയ വെള്ളം കെട്ടിക്കിടക്കുന്നത്. ഇരുചക്രവാഹനങ്ങൾ അടക്കം കുഴിയിൽ തെന്നിമറിയുന്നതും നിത്യസംഭവമാണ്. ഇതിനു സമീപത്താണ് ഓട്ടോ സ്റ്റാൻഡും പ്രവർത്തിക്കുന്നത്.

എലിവേറ്റഡ് കാറ്റിൽ ഷെഡ് പൂർത്തിയായിട്ടും പൂട്ടിത്തന്നെ

ചമ്പക്കുളം: ചമ്പക്കുളം പഞ്ചായത്തിൽ ക്ഷീര വികസനവകുപ്പ് നിർമിക്കുന്ന എലിവേറ്റഡ് കാറ്റിൽ ഷെഡ് കെട്ടിടനിർമാണം പൂർത്തിയായി മാസങ്ങളായിട്ടും കെട്ടിടനമ്പർ, വൈദ്യുതി കണക‌്ഷൻ എന്നിവ ലഭിക്കാത്തതുകൊണ്ട് പൂർണ തോതിൽ തുറന്നുപ്രവർത്തിപ്പിക്കാൻ ആവുന്നില്ല. ചമ്പക്കുളം മങ്കൊമ്പ് റോഡിനു സമീപമാണ് കെട്ടിടം പണി കഴിപ്പിച്ചിരിക്കുന്നത്. 2018ലെ പ്രളയത്തിനുശേഷം വെള്ളപ്പൊക്കക്കാലത്ത് കന്നുകാലികളുടെ സുരക്ഷയെക്കരുതി ക്ഷീരവികസനവകുപ്പിന്‍റെ നേതൃത്വത്തിലാണ് ചമ്പക്കുളം പഞ്ചായത്തിലെ 10-ാം വാർഡിൽ നാല് നിലയിലായി കെട്ടിടം നിർമിച്ചത്. കോടികൾ മുടക്കി നിർമിച്ച കെട്ടിടത്തിൽ കഴിഞ്ഞ വെള്ളപ്പൊക്കത്തിൽ ചുരുക്കും ചില കന്നുകാലികളെ കൊണ്ടുവന്ന് സംരക്ഷിച്ചു എന്നല്ലാതെ മറ്റൊരു നടപടിയും ഉണ്ടായിട്ടില്ല. ചമ്പക്കുളം ക്ഷീരോത്പാദക സൊസൈറ്റി കെട്ടിടത്തിന്‍റെ താഴത്തെ നിലയിൽ പ്രവർത്തിച്ചുവരുന്നുണ്ട്. അടിയന്തരമായി കെട്ടിടം പൂർണമായും ഉപയോഗത്തിലാക്കണമെന്നാണ് നാട്ടുകാരുടെ ആവശ്യം. കോടികൾ മുടക്കി നിർമിച്ചിരിക്കുന്ന കെട്ടിടം കാറ്റിൽ ഷെഡ് മാത്രമായി പരിമിതപ്പെടുത്താതെ ഈ നാട്ടിലെ നെൽകർഷകർക്കു കൂടി പ്രയോജനപ്രദമാകും വിധം വിത്ത്, നെല്ല് മുതലായവ സംഭരിക്കുന്നതിനു കൂടി സൗകര്യം ഒരുക്കണമെന്ന ആവശ്യവും വിവിധ കോണുകളിൽനിന്ന് ഉയരുന്നുണ്ട്. ചുരുക്കം ചില കന്നുകാലികളെ സംരക്ഷിക്കുന്നതിനുവേണ്ടി മാത്രമായി ഇത്രവലിയ കെട്ടിടം നിലനിർത്തുന്നത് സർക്കാർ പണം ധൂർത്തടിക്കുന്നതിനു തുല്യമാണെന്ന് നാട്ടു കാർ ആരോപിക്കുന്നു. ക്ഷീരവികസന, കൃഷിവകുപ്പുകളുടെ ഏകോപിപ്പിച്ചുള്ള പ്രവർത്തനം ഉണ്ടായാൽ കോടികൾ മുതൽമുടക്കുള്ള ഈ കെട്ടിടം ജനങ്ങൾക്ക് കൂടുതൽ ഉപകാരപ്രദമാകും.

ചെങ്ങന്നൂർ കെഎസ്ആർടിസി സ്റ്റാൻഡിൽ യാത്രക്കാർ ദുരിതത്തിൽ

ചെങ്ങന്നൂർ: പുതിയ കെട്ടിടത്തിനായി പഴയ കെട്ടിടം പൊളിച്ചുമാറ്റിയതോടെ ചെങ്ങന്നൂർ കെഎസ്ആർടിസി സ്റ്റാൻഡിൽ ദുരിതത്തിലായി യാത്രക്കാർ. വെയിലും മഴയും ഏൽക്കാതെ ബസ് കാത്തുനിൽക്കാൻ ഒരിടമില്ലാതെ വലയുകയാണ് യാത്രക്കാർ. താത്കാലിക കാത്തിരിപ്പ് കേന്ദ്രം നിർമിക്കാമെന്ന അധികൃതരുടെ വാഗ്ദാനം പാലിക്കപ്പെടാതെ പോയതാണ് ദുരിതങ്ങൾക്കു കാരണം. 11.5 കോടി രൂപ മുടക്കി 32,000 ചതുരശ്ര അടി വിസ്തീർണത്തിൽ പുതിയ കെട്ടിടസമുച്ചയം നിർമിക്കാനാണ് പദ്ധതി. ഇതിന്‍റെ ഭാഗമായി പഴയ കെട്ടിടം പൊളിച്ചുനീക്കിയിരുന്നു. എന്നാൽ, പുതിയ കെട്ടിടത്തിന്‍റെ നിർമാണം തുടങ്ങുന്നതിന് മുമ്പ് ഒരു താത്കാലിക ഷെഡ് സ്ഥാപിക്കുമെന്ന അധികൃതരുടെ ഉറപ്പ് പാഴ്‌വാക്കായിരുന്നു. ഇതോടെയാണ് യാത്രക്കാർ വെട്ടിലായത്. വെയിലിൽനിന്നും മഴയിൽനിന്നും രക്ഷനേടാൻ യാത്രക്കാർ അടുത്തുള്ള കടത്തിണ്ണകളിലും കെഎസ്ആർടിസി ഗാരേജിലുമാണ് അഭയം തേടുന്നത്. കൈക്കുഞ്ഞുങ്ങളുമായി യാത്ര ചെയ്യുന്ന അമ്മമാരാണ് ഇതിൽ ഏറ്റവും ദുരിതമനുഭവിക്കുന്നത്. കൂടാതെ, ബസ് വരുമ്പോൾ പെട്ടെന്ന് ഓടേണ്ടിവരുന്നത് പലപ്പോഴും അപകടങ്ങൾക്കു കാരണമാകുന്നുമുണ്ട്. യാത്രക്കാർക്ക് ആകെയുള്ള ആശ്വാസം ഏതുനിമിഷവും നിലംപതിച്ചേക്കാവുന്ന ഒരു തണൽമരം മാത്രമാണ്. മുമ്പ് ഉപയോഗിച്ചിരുന്ന ഇരിപ്പിടങ്ങൾ പൊട്ടിപ്പൊളിഞ്ഞ അവസ്ഥയിൽ വെളിയിൽ കിടക്കുന്നു. താത്കാലിക കാത്തിരിപ്പ് കേന്ദ്രം നിർമിക്കണമെന്നാവശ്യപ്പെട്ട് പല സംഘടനകളും പ്രതിഷേധ പരിപാടികൾ നടത്തിയിട്ടും യാതൊരു നടപടിയും ഉണ്ടായിട്ടില്ല. 43 ബസുകളും രണ്ടു സ്വിഫ്റ്റ് ബസുകളുമായി ദിവസവും 42 ഷെഡ്യൂളുകൾ ഓപ്പറേറ്റ് ചെയ്യുന്ന ഈ സ്റ്റേഷനിൽ ദിവസേന നൂറുകണക്കിന് യാത്രക്കാർ എത്തിച്ചേരുന്നുണ്ട്. താത്കാലിക കാത്തിരിപ്പുകേന്ദ്രത്തിനായി എത്രനാൾ കാത്തുനിൽക്കേണ്ടിവരുമെന്നാണ് യാത്രക്കാരുടെ പ്രധാന ചോദ്യം. ചെങ്ങന്നൂർ കെഎസ്ആർടിസി ബസ് സ്റ്റാൻഡിൽ കാത്തിരിപ്പു കേന്ദ്രം നിർമിക്കുന്നതിന് എംഎൽഎയുടെ പ്രത്യേക വികസന ഫണ്ടിൽനിന്നും 4.40 ലക്ഷം രൂപ അനുവദിച്ചിട്ടുണ്ട്. ടെൻഡർ നടപടികൾ പൂർത്തിയാക്കി ഒരുമാസത്തിനകം പണികൾ ആരംഭിക്കും. 11.5 കോടി രൂപ ചെലവഴിച്ച് 32,000 ചതുരശ്ര അടി വിസ്തീർണത്തിൽ സബ് വേയും കടമുറികളും ഉൾപ്പെടുന്ന അന്താരാഷ്ട്ര നിലവാരത്തിലുള്ള പുതിയ ബസ് സ്റ്റാൻഡ് നിർമാണം ഉടൻ ആരംഭിക്കും. ഇതിനായി ബസ് സ്റ്റാൻഡിലെ 60 വർഷത്തിലേറെ പഴക്കമുണ്ടായിരുന്നു പഴയ കെട്ടിടം പൊളിച്ചുനീക്കിയിരുന്നു. പുതിയ കെട്ടിടനിർമാണം ആരംഭിക്കുന്നതിന് മുന്നോടിയായാണ് യാത്രക്കാരുടെ ബുദ്ധിമുട്ട് പരിഹരിക്കുന്നതിനുവേണ്ടി താത്കാലിക കാത്തിരിപ്പുകേന്ദ്രം നിർമിക്കുന്നത്. പുതിയ കെട്ടിടനിർമാണത്തിന് തടസം ഉണ്ടാകാത്ത വിധത്തിലാകും കാത്തിരിപ്പു കേന്ദ്രം നിർമിക്കുക. സജി ചെറിയാന്‍ (മന്ത്രി )

ഈ തോടുകളെ ആരു രക്ഷിക്കും?

ചമ്പക്കുളം: വെള്ളമൊഴുക്കിനുള്ള നാടിന്‍റെ ഞരന്പുകളും ഗതാഗത മാർഗങ്ങളുമായിരുന്ന നാട്ടുതോടുകൾ നാശത്തിന്‍റെ വക്കിൽ. ആലപ്പുഴ, കോട്ടയം ജില്ലകളിൽ ഇവ ഏറെ സജീവമായിരുന്നു. വെള്ളപ്പൊക്കത്തിന്‍റെ ആഘാതം കുറയ്ക്കാനും ഇവയ്ക്കു കഴിഞ്ഞിരുന്നു. എന്നാൽ, ജലഗതാഗതം നിലച്ചതോടെ ഉപയോഗശൂന്യമായ നാട്ടുതോടുകൾ മിക്കവയും ഇന്നു നാശത്തിന്‍റെ വക്കിലാണ്. ഇവയെ പരിരക്ഷിക്കാനോ സംരക്ഷിക്കാനോ അധികാരികൾ മനസു വയ്ക്കാതായതോടെ ഇവ ദുരിതം വിതയ്ക്കുകയും നശിക്കുകയുമാണ്. നീരൊഴുക്കു നിലച്ചും പായൽ തിങ്ങിയും നാട്ടുകാർക്ക് ദുരിതം സമ്മാനിക്കുന്ന മാലിന്യവാഹികളായി ഇവ മാറിക്കഴിഞ്ഞു. അവയുടെ ആഴം കൂട്ടാനോ സംരക്ഷിക്കാനോ ഇനിയും അധികാരികൾ വേണ്ടത്ര താത്പര്യമെടുക്കുന്നില്ല. രാജഭരണകാലത്ത് രാജാവിനു കാര്യവിചാരിപ്പിന് ജലവാഹനങ്ങളിൽ എത്താൻ ഇന്നു റോഡുകൾ നിർമിക്കുന്നതു പോലെയായിരുന്നു 18ഉം 19ഉം നൂറ്റാണ്ടുകളിൽ തോടുകൾ നിർമിച്ചിരുന്നത്. പമ്പ, മണിമല, അച്ചൻകോവിൽ തുടങ്ങിയ നദികളെ തമ്മിൽ ബന്ധിപ്പിക്കുന്ന പല പ്രധാന തോടുകളും നാട്ടുരാജാക്കൻമാരുടെ കാലത്തു നിർമിച്ചവയായിരുന്നു. ഒരേസമയം രണ്ടും മൂന്നും വലിയ യാത്രാബോട്ടുകൾ സഞ്ചരിച്ചിരുന്ന പതിനഞ്ചും ഇരുപതും മീറ്റർ വീതിയുണ്ടായിരുന്ന തോടുകൾക്ക് ഇന്നു കഷ്ടിച്ച് മൂന്നോ നാലോ മീറ്റർ വീതി. പലതും ചെറുവള്ളത്തിനു പോലും യാത്ര ചെയ്യാനാവാത്ത വിധം കാട് കയറി. എസി കനാലിന് മരണമണി കുട്ടനാട്ടിലെ ഏറ്റവും പ്രധാന മനുഷ്യനിർമിത തോടാണ് എസി കനാൽ. മൂന്നു പതിറ്റാണ്ട് മുന്പുവരെ കുട്ടനാടിന്‍റെ വിവിധ പ്രദേശങ്ങളിൽനിന്നു ചങ്ങനാശേരി മനയ്ക്കച്ചിറയിൽ നിരവധി മോട്ടോർ ബോട്ടുകൾ യാത്രക്കാരുമായി എത്തിയിരുന്നു. എന്നാൽ, ഇന്ന് ഒരു ചെറുവള്ളത്തിനു പോലും എസി കനാലിൽ ചങ്ങനാശേരി മനയ്ക്കച്ചിറ മുതൽ ഒന്നാം കര വരെ യാത്ര ചെയ്യാൻ പറ്റില്ല. ബോട്ട് യാത്ര ഇനി ഒരു സ്വപ്നം മാത്രം. അന്പലപ്പുഴത്തോട് ജലഗതാഗത വകുപ്പിന്‍റെ ഒരു പ്രധാന കേന്ദ്രമായിരുന്നു അമ്പലപ്പുഴ ക്ഷേത്രത്തിനു കിഴക്കുള്ള അമ്പലപ്പുഴ ബോട്ട് ജെട്ടി. രണ്ടും മൂന്നും വലിയ ബോട്ടുകൾ വന്നുപോയിരുന്ന അമ്പലപ്പുഴ ബോട്ട് ജെട്ടിയും അമ്പലപ്പുഴത്തോടും ഇന്നു കാടു മൂടി പാമ്പിന്‍റെയും മറ്റ് ക്ഷുദ്രജീവികളുടേയും ആവാസ കേന്ദ്രമായി. പമ്പാനദിയുടെ കൈവഴിയായ പൂക്കൈത ആറ്റിൽനിന്ന് അമ്പലപ്പുഴയ്ക്കുള്ള തോട് വീതി കുറഞ്ഞ് തോട് എന്ന പേരിനു പോലും യോഗ്യമല്ലാതായി. പൂക്കൈതയാറ്റിൽനിന്നു ചമ്പക്കുളത്തു പമ്പയാറ്റിലേക്ക് എത്തുന്ന നെടുമുടി പഞ്ചായത്തിലെ ചെമ്പകശേരി തോടിന്‍റെ സ്ഥിതി മറ്റൊന്നല്ല. പമ്പാനദിയിൽനിന്നു നിരവധി തോടുകൾ മണിമല ആറ്റിലേയ്ക്ക് ഉണ്ടായിരുന്നു. മിക്കതിലുംജലഗതാഗതവകുപ്പിന്‍റെ ബോട്ടുകൾ ഒാടിയിരുന്നു. എന്നാൽ, എടത്വാ, രാമങ്കരി, ചമ്പക്കുളം, മുട്ടാർ എന്നി പഞ്ചായത്തുകളിലെ ബോട്ട് ഗതാഗതം ഉണ്ടായിരുന്ന തോടുകളിലൂടെ ഇന്നു ചെറുവള്ളത്തിനു പോലും യാത്ര ചെയ്യാനാവില്ല. കാവാലം, പുളിങ്കുന്ന്, കൈനകരി, ചമ്പക്കുളം തുടങ്ങിയ പ്രദേശങ്ങളിൽനിന്നു ചങ്ങനാശേരി ചന്തയിലേക്ക് നാട്ടു തോടുകളിലൂടെയുള്ള യാത്ര മുതിർന്ന തലമുറയുടെ ഒാർമച്ചിത്രം മാത്രം. നാട്ടു തോടുകൾക്ക് സംഭവിച്ചത് റോഡും പാലവും മാത്രാണ് വികസനം എന്ന തെറ്റായ ചിന്ത തോടുകളുടെ നാശത്തിനു വഴിതെളിച്ചു. തോടുകളുടെ വീതി കുറച്ച് തീരങ്ങളിൽ വഴികളും റോഡുകളും നിർമിച്ചു. താഴ്ന്ന പാലങ്ങളുടെ നിർമാണവും തോട്ടിൽ തൂണുകൾ സ്ഥാപിച്ചതും തോട്ടിലെ ഗതാഗതം തടഞ്ഞു. അതോടൊപ്പം നീരൊഴുക്കും കുറഞ്ഞു. പായൽ അടിഞ്ഞ് തോടുകളുടെ ആഴം കുറഞ്ഞു. മലിനജലസംഭരണികളാണ് നാട്ടുതോടുകൾ എന്ന തെറ്റിദ്ധാരണയിലായി പലരും. വെള്ളം ഒഴുകി മാറാത്തതിനാൽ മഴക്കാലത്ത് ഒഴുകിയെത്തിയ മാലിന്യങ്ങൾ സംഭരിക്കപ്പെട്ടു. അങ്ങനെ തോടുകളുടെ ആഴം വീണ്ടും കുറഞ്ഞു. മഴ വെള്ളം പണ്ട് ഒഴുകിമാറിയിരുന്ന തോടുകൾ അപ്രത്യക്ഷമായി. ഇതോടെ വെള്ളക്കെട്ട് രൂക്ഷമായി. അടിയന്തരമായി ചെയ്യേണ്ടത് തോടുകളെ വീണ്ടെടുക്കണം. അവയുടെ ആഴവും വീതിയും പുനഃസ്ഥാപിക്കണം. നീരൊഴുക്കിനു തടസമായ പാലങ്ങളും നിർമിതികളും ഒഴിവാക്കണം, പായലും പോളയും സംഭരിക്കാനുള്ള ഇടമല്ല തോടുകൾ എന്ന് അധികാരികൾ തിരിച്ചറിയണം. നാട്ടു തോടുകളിൽ ഗതാഗത സൗകര്യം പുനഃസ്ഥാപിക്കാൻ കഴിയുംവിധം നവീകരിക്കണം. ഇതു വിനോദസഞ്ചാരത്തിനു പ്രയോജനപ്പെടുത്തണം. നിശ്ചിത ഇടവേളകളിൽ ചുണ്ടൻവള്ളങ്ങളെയും ചെറുവള്ളങ്ങളെയും പങ്കെടുപ്പിച്ച് കനാലുകളിൽ വള്ളംകളിയും മറ്റു ജലവിനോദങ്ങളും സംഘടിപ്പിക്കണം. തോടുകളുടെ പ്രാധാന്യത്തെക്കുറിച്ച് ബോധവത്കരണ പരിപാടികൾ നടത്തണം. തോടുകൾ പ്രയോജനപ്പെടുത്താൻ ടൂറിസംവകുപ്പ് മുൻകൈയെടുക്കണം.

എസി റോഡിൽ കാർ കടയിലേക്കു പാഞ്ഞുകയറി

മങ്കൊമ്പ്: എസി റോഡിൽ നിയന്ത്രണം വിട്ട കാർ നടപ്പാതയിൽ ഇടിച്ചുകയറിയതിനെത്തുടർന്ന് റോഡരികിലുണ്ടായിരുന്ന കട പൂർണമായും തകർന്നു. ചൊവ്വാഴ്ച രാത്രി 11ന് മാമ്പുഴക്കരി ബ്ലോക്ക് ജംഗ്ഷനിലായിരുന്നു സംഭവം. ആലപ്പുഴ ഭാഗത്തുനിന്നു വരികയായിരുന്ന കാർ നിയന്ത്രണംവിട്ടു സമീപത്തെ ഇന്‍റർലോക്ക് പാകിയ നടപ്പാതയിലേക്കു പാഞ്ഞുകയറുകയായിരുന്നു. നടപ്പാതയിലൂടെ ഓടിനീങ്ങിയ കാർ പിന്നീട് കടയും തകർക്കുകയായിരുന്നു. മാമ്പുഴക്കരി വെമ്പഴശേരി രാജേന്ദ്രന്‍റെ ഉടമസ്ഥതയിലുള്ള മാടക്കട പൂർണമായും തകർന്നു. മുട്ടാർ സ്വദേശികളായ രണ്ടു യാത്രക്കാരാണ് കാറിലുണ്ടായിരുന്നത്. ഇതിൽ ഒരാൾക്കു മുഖത്ത് പരിക്കേറ്റു. ശബ്ദം കേട്ട് ഓടിയെത്തിയ സമീപവാസിയായ ബൈജുവും പിന്നാലെയെത്തിയ വാഹനങ്ങളിലുണ്ടായിരുന്നവരും ചേർന്നാണ് ഇരുവരെയും കാറിൽനിന്നു പുറത്തെടുത്തത്. പിന്നീട് ചങ്ങനാശേരി ജനറൽ ആശുപത്രിയിലെത്തിച്ച് ചികിത്സ നൽകി.

പുളിങ്കുന്ന് കായല്‍പ്പുറത്ത് തെരുവുനായ്ക്കള്‍ നാല് ആടുകളെ കടിച്ചുകൊന്നു

പുളിങ്കുന്ന്: കായല്‍പ്പുറത്ത് കൂട്ടില്‍കയറി നാല് ആടുകളെ തെരുവുനായ്ക്കള്‍ കടിച്ചുകീറിക്കൊന്നു. ഒറ്റപ്പുരയ്ക്കല്‍ വിന്‍സപ്പന്‍-ജോളിമ്മ ദമ്പതികള്‍ വളര്‍ത്തിയ രണ്ട് തള്ളയാടുകളെയും രണ്ട് കുട്ടികളെയുമാണ് നായ്ക്കള്‍ കൊന്നത്. ഇന്നലെ പുലര്‍ച്ചെ മൂന്നരയ്ക്കാണ് സംഭവം. സംഘമായെത്തിയ നായക്കൂട്ടം ആടുകളെ കടിച്ചു കീറി. ആടിന്‍റെ കരച്ചില്‍കേട്ട് വീട്ടുകാര്‍ പുറത്തിറങ്ങി ബഹളം വച്ചപ്പോള്‍ നായക്കൂട്ടം ഓടിരക്ഷപ്പെട്ടു. നിര്‍ധന കുടുംബത്തിന്‍റെ വരുമാനമാര്‍ഗമാണ് നായയുടെ ആക്രമണത്തില്‍ നിലച്ചത്. നാല്പതിനായിരത്തോളം രൂപയുടെ നഷ്ടമാണ് സംഭവിച്ചത്. ജോളിമ്മ പുളിങ്കുന്ന് മൃഗാശുപത്രിയില്‍ പരാതി നല്‍കി. മൃഗഡോക്ടറുടെ നേതൃത്വത്തില്‍ ആടുകളെ പോസ്റ്റ്മോര്‍ട്ടം നടത്തി മറവുചെയ്തു. കഴിഞ്ഞവര്‍ഷവും ഇതേ സമയത്ത് രണ്ട് ആടുകളെ നായക്കൂട്ടം കടിച്ചുകൊന്നിരുന്നു. രണ്ടു കൊല്ലം മുമ്പ് ഇവരുടെ ഒമ്പത് ആടുകള്‍ പനി ബാധിച്ച് ചത്തിരുന്നു. ഇതുവരെ മൃഗസംരക്ഷണവകുപ്പില്‍നിന്ന് ഒരു സഹായവും ലഭിച്ചിട്ടില്ലെന്ന് ജോളിമ്മ പറഞ്ഞു.

മത്സ്യത്തൊഴിലാളി കുഴഞ്ഞുവീണ് മരിച്ചു

തുറവൂർ: മത്സ്യത്തൊഴിലാളി കുഴഞ്ഞുവീണു മരിച്ചു. തുറവൂർ പഞ്ചായത്ത് ഒന്നാംവാർഡിൽ പള്ളിത്തോടു പുത്തേഴത്ത് വീട്ടിൽ തോമസ് (റോയിക്കുട്ടൻ-44) ആണ് മരിച്ചത്. ചൊവ്വാഴ്ച മത്സ്യബന്ധനത്തിനു ശേഷം വീട്ടിലെത്തിയ ഇദ്ദേഹം കുഴഞ്ഞുവീണതിനെത്തുടർന്നു ബന്ധുക്കൾ ചേർന്ന് തുറവൂർ താലൂക്ക് ആശുപത്രിയിലും തുടർന്ന് കോട്ടയം മെഡിക്കൽ കോളജ് ആശുപത്രിയിലും എത്തിച്ചെങ്കിലും രക്ഷിക്കാനായില്ല. സംസ്കാരം നടത്തി. ഭാര്യ മെറ്റിൽഡ. മക്കൾ റിയ, റോഷൻ.

വെട്ടിയാർ പാറക്കുളങ്ങര ഗുരുമന്ദിരം ജംഗ്‌ഷനിൽ വീണ്ടും വാഹനാപകടം

മാങ്കാംകുഴി: കൊല്ലം-തേനി ദേശീയ പാതയിലെ സ്ഥിരം അപകടമേഖലയായ വെട്ടിയാർ പാറക്കുളങ്ങര ഗുരുമന്ദിരം ജംഗ്ഷനിലെ കൊടുംവളവിൽ വീണ്ടും വാഹനാപകടം അപകടം. സ്‌കൂട്ടറിൽ ഇടിച്ച വാൻ വെട്ടിച്ചുമാറ്റുന്നതിനിടയിൽ റോഡരികിലേക്ക് മറിഞ്ഞു. സമീപത്തെ വൈദ്യുതി പോസ്റ്റ് തകർത്താണ് വാൻ മറിഞ്ഞത്. ഇന്നലെ രാവിലെയായിരുന്നു അപകടം. സ്‌കൂട്ടർ യാത്രികൻ റിട്ട. കെഎസ്ഇബി ഉദ്യോഗസ്ഥനായ മാങ്കാംകുഴി തടത്തിൽ മുഹമ്മദ് ഹസന് കൈക്കു പരിക്കേറ്റു. ഇദ്ദേഹത്തെ കൊല്ലക്കടവിലെ സ്വകാര്യ ആശുപത്രിയിൽ പ്രവേശിപ്പിച്ചു. വാൻ ഡ്രൈവർക്കും നിസാര പരിക്കേറ്റു. സ്ഥിരം അപകടമേഖലയായ പാറക്കുളങ്ങരയിൽ കഴിഞ്ഞ ഒരു വർഷത്തിനിടെ നിരവധി വാഹനങ്ങളാണ് സമാനരീതിയിൽ അപകടത്തിപ്പെട്ടിട്ടുള്ളത്. റോഡിന് വീതിയില്ലാത്തതും കുത്തനെയുള്ള ഇറക്കത്തിലെ കൊടുവളവുമാണ് അപകടങ്ങൾക്കു കാരണം. ഇറക്കം ഇറങ്ങിവരുമ്പോൾ വാഹനം നിയന്ത്രണംവിട്ട് തെന്നിമാറി താഴ്ചയിലേക്കു മറിയുന്നതും പതിവാണ്. അപകടം നിയന്ത്രിക്കാൻ റോഡിനു സമീപം സംരക്ഷണവേലി നിർമിക്കുകയും അപകട മുന്നറിയിപ്പ് സിഗ്നൽ സ്ഥാപിക്കുകയും ചെയ്‌തെങ്കിലും അപകടം തുടരുകയാണ്. കൊല്ലം-തേനി ദേശീയപാത 24 മീറ്റർ വീതിയിൽ വികസിക്കുമ്പോൾ ഇവിടുത്തെ അപകടവളവ് ഒഴിവാക്കി നിർമാണം നടത്തുമെന്നാണ് അധികൃതരുടെ പ്രഖ്യാപനം.

പോലീസ് രാഷ്‌ട്രീയ നേതൃത്വത്തിന്‍റെ കളിപ്പാവയാകുന്നു: എസ്. ശരത്

മുഹമ്മ: പോലീസ് അതിക്രമത്തിനെതിരേ കോൺഗ്രസ് മുഹമ്മ, തണ്ണീർമുക്കം മണ്ഡലം കമ്മിറ്റികളുടെ നേതൃത്വത്തിൽ മുഹമ്മ പോലീസ് സ്റ്റേഷന് സമീപം ജനകീയ പ്രതിഷേധസമരം നടത്തി. കെപിസിസി സെക്രട്ടറി എസ്. ശരത് ഉദ്ഘാടനം ചെയ്തു. കുപ്രസിദ്ധ ക്രിമിനലുകൾ പോലും കാണിക്കാത്തമർദനമുറകളാണ് കേരളത്തിലെ പോലീസുകാർ പുറത്തെടുക്കുന്നത്. മുൻപ് കേരള പോലീസ് അഭിമാനം ആയിരിന്നെങ്കിൽ ഇന്ന് രാജ്യത്തിനാകെ അപമാനമാണ്. പോലീസ് മർദനം വേരോടെ പിഴുതെറിയുന്നതുവരെ കോൺഗ്രസ് സമര രംഗത്ത് ഉണ്ടാകുമെന്നും ശരത് പറഞ്ഞു. മണ്ഡലം പ്രസിഡന്‍റ് പി. അനീഷ് അധ്യക്ഷത വഹിച്ചു. ഡിസിസി സെക്രട്ടറിമാരായ ആർ. ശശിധരൻ, സജി കുര്യാക്കോസ്, മുഹമ്മ പഞ്ചായത്തംഗം എസ്.ടി. റെജി, കോൺഗ്രസ് തണ്ണീർമുക്കം മണ്ഡലം പ്രസിഡന്‍റ് ടി.ടി. സാജു, വനിതാ കോൺഗ്രസ് ബ്ലോക്ക് പ്രസിഡന്‍റ് ജയാമണി, വി.എം. സുഗന്ധി എന്നിവർ പ്രസംഗിച്ചു.

ചങ്ങനാശേരി അതിരൂപത നൂറുമേനി വചനപഠന മത്സരം ഗ്രാൻഡ് ഫിനാലെ നാളെ; മഹാസംഗമം 13ന്

ചങ്ങനാശേരി: ചങ്ങനാശേരി അതിരൂപത ബൈബിള്‍ അപ്പൊസ്തലേറ്റ്, കുടുംബ കൂട്ടായ്മ എന്നിവയുടെ സംയുക്താഭിമുഖ്യത്തില്‍ അതിരൂപതയിലെ 250 ഇടവകകളില്‍നിന്നായി ഒരു ലക്ഷത്തോളം ആളുകള്‍ പങ്കെടുത്ത നൂറുമേനി വചനപഠന മത്സരങ്ങളുടെ ഗ്രാൻഡ് ഫിനാലെ നാളെയും മഹാസംഗമവും എന്‍റെ സ്വന്തം ബൈബിള്‍ പദ്ധതിയുടെ ഉദ്ഘാടനവും 13നും എസ്ബി കോളജ് കാവുകാട്ട് ഹാളില്‍ നടക്കും. പരിപാടിക്കുള്ള ഒരുക്കങ്ങള്‍ പൂര്‍ത്തിയായതായി ബൈബിള്‍ അപ്പൊസ്തലേറ്റ് ഡയറക്ടര്‍ ഫാ. ജോര്‍ജ് മാന്തുരുത്തില്‍, നൂറുമേനി ചെയര്‍മാന്‍ സണ്ണി ഇടിമണ്ണിക്കല്‍, ബൈബിള്‍ അപ്പൊസ്തലേറ്റ് അതിരൂപത പ്രസിഡന്‍റ് ഡോ. റൂബിള്‍ രാജ് എന്നിവര്‍ പത്രസമ്മേളനത്തില്‍ പറഞ്ഞു. നാളെ രാവിലെ 11ന് നടക്കുന്ന ഗ്രാൻഡ് ഫിനാലെ മത്സരത്തില്‍ വിവിധ റീജണുകളില്‍നിന്ന് മാത്യു തോമസ്, മേരിക്കുട്ടി തോമസ്, മെര്‍ലി ആന്‍ മാത്യു (കുട്ടനാട്), ജയിംസ് കെ. ജേക്കബ്, ഷൈനി സെബാസ്റ്റ്യന്‍ (ചങ്ങനാശേരി), സോജി ചാക്കോ, മരിയ മാത്യു (നെടുംകുന്നം), ഡോ. സുജിത്ത് ജോ മാത്യു, ഡോ. അനു വര്‍ഗീസ്, മരിയ റോസ് ജോ (കോട്ടയം), ഡോ. അഭിലാഷ് കെ. തോമസ് (തിരുവനന്തപുരം) എന്നീ കുടുംബങ്ങള്‍ പങ്കെടുക്കും. മത്സരത്തിലൂടെ ഒന്ന്, രണ്ട്, മൂന്ന് സ്ഥാനങ്ങള്‍ നേടുന്നവരെ കണ്ടെത്തും. 13ന് രാവിലെ 10ന് ആര്‍ച്ച്ബിഷപ് മാര്‍ തോമസ് തറയിലിന്‍റെ അധ്യക്ഷതയില്‍ ചേരുന്ന മഹാ സമ്മേളനം മലങ്കരസഭാ മേജര്‍ ആര്‍ച്ച്ബിഷപ് ബസേലിയോസ് മാര്‍ ക്ലീമിസ് കാതോലിക്ക ബാവ ഉദ്ഘാടനം ചെയ്യും. ആര്‍ച്ച്ബിഷപ് എമിരിറ്റസ് മാര്‍ ജോസഫ് പെരുന്തോട്ടം അനുഗ്രഹ പ്രഭാഷണവും വികാരി ജനറാള്‍ മോണ്‍. ആന്‍റണി എത്തക്കാട്ട് മുഖ്യപ്രഭാഷണവും നടത്തും. ചലച്ചിത്രനടന്‍ സിജോയ് വര്‍ഗീസ് വചന സാക്ഷ്യം നല്‍കും. ഫാ. ജോര്‍ജ് മാന്തുരുത്തില്‍, സണ്ണി ഇടിമണ്ണിക്കല്‍, ഡോ. റൂബിള്‍ രാജ്, ചലച്ചിത്ര നിര്‍മാതാവും ഗാനരചയിതാവുമായ ലിസി ഫെര്‍ണാണ്ടസ്, മീഡിയ വില്ലേജ് മീഡിയ കോ ഓര്‍ഡിനേറ്റര്‍ ഫാ. ജോജിന്‍ ഇലഞ്ഞിക്കല്‍, ഡോ.പി.സി അനിയന്‍കുഞ്ഞ്, ജനറല്‍ കണ്‍വീനര്‍ ഡോ. ജോബിന്‍ എസ്. കൊട്ടാരം, പ്രഫ. ജോസഫ് ടിറ്റോ, സിസ്റ്റര്‍ ചെറുപുഷ്പം, ജോസി കടന്തോട്, മറിയം ജോര്‍ജ് എന്നിവര്‍ പ്രസംഗിക്കും. അയ്യായിരത്തോളം പേര്‍ മഹാ സംഗമത്തില്‍ പങ്കെടുക്കും. ജനറല്‍ കണ്‍വീനര്‍ ഡോ. ജോബിന്‍ എസ്. കൊട്ടാരം, പബ്ലിസിറ്റി കമ്മിറ്റി ചെയര്‍മാന്‍ ആന്‍റണി മലയില്‍, പ്രഫ.ജോസഫ് ടിറ്റോ, ജോസുകുട്ടി കുട്ടംപേരൂര്‍, സൈബി അക്കര, ജിക്കു ജോസഫ് എന്നിവരും പത്രസമ്മേളനത്തില്‍ പങ്കെടുത്തു. അതിരൂപതയിലെ മുഴുവന്‍ അംഗങ്ങള്‍ക്കും സ്വന്തമായി ബൈബിള്‍ ചങ്ങനാശേരി അതിരൂപതയിലെ എല്ലാ കുടുംബങ്ങളിലെയും മുഴുവന്‍ അംഗങ്ങള്‍ക്കും സ്വന്തമായി ബൈബിള്‍ ലഭ്യമാക്കുന്ന എന്‍റെ സ്വന്തം ബൈബിള്‍ പദ്ധതിക്ക് തുടക്കമാകുന്നു. പുതിയ നിയമവും 150 സങ്കീര്‍ത്തനങ്ങളും ഉള്‍പ്പെടുത്തി ആകര്‍ഷകമായി തയാറാക്കുന്ന പ്രത്യേക എഡിഷന്‍ ബൈബിളാണ് വിതരണം ചെയ്യുന്നത്. എന്‍റെ സ്വന്തം ബൈബിള്‍ പദ്ധതിയുടെയും നൂറുമേനി സീസണ്‍ നാലിന്‍റെയും ഉദ്ഘാടനം മാര്‍ തോമസ് തറയില്‍ 119-ാം സങ്കീര്‍ത്തനം മനഃപാഠമാക്കിയ രണ്ടാം ക്ലാസ് വിദ്യാര്‍ഥികളായ ലൂക്കാ രാകേഷ്, ഇവാന്‍ വി. ബിജോയ് എന്നിവര്‍ക്ക് പേഴ്സണല്‍ ബൈബിള്‍ നല്‍കി ഉദ്ഘാടനം ചെയ്യും.

ഉണ്ണിക്കണ്ണന് പാൽപ്പായസം തയാറാക്കാൻ ഭീമൻ വാർപ്പ് എത്തി

അമ്പലപ്പുഴ: ഉണ്ണിക്കണ്ണന് മധുരമേറിയ പാൽപ്പായസം തയാറാക്കാൻ ഭീമൻ വാർപ്പ് എത്തി. അമ്പലപ്പുഴ ശ്രീകൃഷ്ണസ്വാമി ക്ഷേത്രത്തിലാണ് 1500 ലിറ്റർ ശേഷിയുള്ള കൂറ്റൻ വാർപ്പ് എത്തിച്ചത്. നൂറുകണക്കിന് ഭക്തരാണ് ക്ഷേത്രസന്നിധിയിൽ വാർപ്പ് കാണാനും ചിത്രം പകർത്താനുമെത്തിയത്. മാന്നാർ സ്വദേശി അനന്തൻ ആചാരിയുടെ നേതൃത്വത്തിലാണ് വെള്ളോട് കൊണ്ട് വാർപ്പ് നിർമിച്ചത്. 28, 96,000 രൂപയാണ് ഇതിന്‍റെ ചെലവ്. 1810 കിലോ ഗ്രാം ഭാരമുള്ള ഭീമൻ വാർപ്പ് വാഹനത്തിലെത്തിച്ച ശേഷം ക്രെയിനുപയോഗിച്ചാണ് പാൽപ്പായസം ഉണ്ടാക്കുന്ന തിടപ്പള്ളിയിലേക്കു മാറ്റിയത്. വാർപ്പ് സ്ഥാപിക്കാനായി ഒരുമാസം മുൻപുതന്നെ തിടപ്പള്ളിയുടെ അറ്റകുറ്റപ്പണി ആരംഭിച്ചിരുന്നു. ഇപ്പോൾ 800 ലിറ്റർ ശേഷിയുള്ള വാർപ്പിലാണ് ക്ഷേത്രത്തിൽ പാൽപ്പായസം തയാറാക്കുന്നത്. നിലവിൽ 225 ലിറ്റർ പാൽപ്പായസമാണ് പ്രതിദിനം തയാറാക്കുന്നത്. ഇത് 300 ഉം വ്യാഴം, ഞായർ, മറ്റ് വിശേഷ ദിവസങ്ങളിൽ 350 ഉം ലിറ്ററാക്കാൻ തന്ത്രിയുടെ നിർദേശത്തെത്തുടർന്ന് ബോർഡ് അംഗീകാരം നൽകിയിരുന്നു. പാൽപ്പായസത്തിന്‍റെ വില വർധിപ്പിച്ച് ഗുണനിലവാരം ഉറപ്പാക്കണമെന്നാവശ്യപ്പെട്ട് അമ്പലപ്പുഴ സ്വദേശി സുരേഷ് ഭക്തവൽസലൻ ദേവസ്വം ബോർഡ് ഓംബുഡ്സ്മാൻ, ഹൈക്കോടതി, ദേവസ്വം ബോർഡ് എന്നിവർക്ക് പരാതി നൽകിയിരുന്നു. ഇതിന്‍റെ അടിസ്ഥാനത്തിലാണ് പാൽപ്പായസത്തിന്‍റെ അളവ് വർധിപ്പിക്കാൻ ദേവസ്വം ബോർഡ് തീരുമാനമെടുത്തത്. നിലവിൽ 1 ലിറ്റർ പാൽപ്പായസത്തിന് 160 രൂപയാണ് വില. ഇത് 260 രൂപയാക്കി വർധിപ്പിക്കാനും ബോർഡ് തീരുമാനമെടുത്തിരുന്നു. പുതിയ അളവിൽ പാൽപ്പായസം നിർമിക്കണമെങ്കിൽ പുതിയ വാർപ്പ് ആവശ്യമായിരുന്നു. തുടർന്ന് ദേവസ്വം ബോർഡ് നൽകിയ ക്വട്ടേഷൻ പ്രകാരമാണ് മാന്നാർ സ്വദേശി അനന്തൻ ആചാരി വാർപ്പ് നിർമിച്ച് ക്ഷേത്രത്തിലെത്തിച്ചത്. ഉച്ചയോടെ പിക്ക് അപ് വാനിലെത്തിച്ച വാർപ്പ് മണിക്കൂറുകൾ നീണ്ട ശ്രമത്തിനൊടുവിൽ നിരവധി തൊഴിലാളികളുടെ ശ്രമഫലമായാണ് ക്രെയിനുപയോഗിച്ച് തിടപ്പള്ളിയിലെ അടുപ്പിലേക്കു മാറ്റിയത്. ചിങ്ങം ഒന്നുമുതൽ പാൽപ്പായസ വില വർധന നടപ്പാക്കാനായിരുന്നു നേരത്തേ ബോർഡ് തീരുമാനിച്ചിരുന്നത്. എന്നാൽ, തിടപ്പള്ളിയുടെ അറ്റകുറ്റപ്പണി വൈകിയതുമൂലം വാർപ്പ് എത്തിക്കാൻ കഴിയാതെ വന്നതോടെ വിലവർധന മാറ്റിവയ്ക്കുകയായിരുന്നു. ഡെപ്യൂട്ടി ദേവസ്വം കമ്മീ ഷണർ ബി. മുരാരി ബാബു, അസി. കമ്മീഷണർ വി. ഈശ്വരൻ നമ്പൂതിരി അഡ്മിനിസ്ട്രേറ്റീവ് ഓഫീസർ എൻ. അജിത് എന്നിവരുടെ നേതൃത്വത്തിലാണ് വാർപ്പ് എത്തിച്ചത്.

കായംകുളം കന്നീസ കടവ്പാലം പുനർനിർമാണം: സ്ഥലം ഏറ്റെടുക്കൽ നടപടി വൈകും

കായംകുളം: കെഎസ്ആർടിസി ബസ് സ്റ്റാൻഡിനു സമീപത്തുനിന്ന് കരിപ്പുഴത്തോടിന് കുറുകെ പ്രതാംഗ്‌മൂട് ജംഗ്‌ഷനിലേക്കുള്ള കന്നീസ കടവ്പാലം പുനർനിർമാണത്തിനായുള്ള സ്ഥലം ഏറ്റെടുക്കൽ നടപടി കാലതാമസം നേരിടും. പുതുക്കിയ എസ്റ്റിമേറ്റ് പ്രകാരമുള്ള തുകയ്ക്ക് ഭരണാനുമതി ലഭിച്ച ശേഷമേ നഷ്ടപരിഹാരം നൽകി ഭൂമി ഏറ്റെടുക്കാനാകൂ. റവന്യുവകുപ്പ് തയാറാക്കിയ നഷ്ടപരിഹാരത്തുക എസ്റ്റിമേറ്റിൽ ഉൾപ്പെടുത്തിയതിനെക്കാൾ കൂടുതലായതിനാൽ നിരക്ക് പുതുക്കി. ഇതിന്‍റെ ഭാഗമായി 16.32 കോടി രൂപയുടെ പുതുക്കിയ എസ്റ്റിമേറ്റ് ചീഫ് എൻജിനിയറുടെ ഓഫീസിൽനിന്ന് സർക്കാരിനു സമർപ്പിച്ചു. പാലം നിർമിക്കുന്നതിനായി ബസ് സ്റ്റാൻഡ് വശത്ത് 25 സെന്‍റും മറുകരയിൽ 40 സെന്‍റും സ്ഥലമാണ് ഏറ്റെടുക്കുന്നത്. സ്ഥലത്തുള്ള കെട്ടിടങ്ങൾക്കും വ്യാപാര സ്ഥാപനങ്ങൾക്കും ഉചിതമായ നഷ്ടപരിഹാരം നൽകാനാണ് പുതുക്കിയ ഭരണാനുമതിക്കായി സർക്കാർ നടപടിയെടുക്കുന്നത്. കരിപ്പുഴ തോടിനു കുറുകെ 30 മീറ്റർ നീളത്തിൽ ഇരുവശങ്ങളിലും നടപ്പാതയോടുകൂടി ബോ സ്ട്രിംഗ് ആർച്ച് മാതൃകയിലാണ് പാലം നിർമിക്കാൻ പദ്ധതിയിട്ടിരിക്കുന്നത്. കോസ്റ്റൽ ഷിപ്പിംഗ് ആൻഡ് ഇൻലാൻഡ് നാവിഗേഷൻ വകുപ്പിന്‍റെ നിരാക്ഷേപപത്രം ഇതിനകം ലഭിച്ചു. ഒരു സ്പാനിലായിരിക്കും പാലം നിർമിക്കുക. നിർമാണം പൂർത്തിയായാൽ കോടതി റോഡിൽനിന്ന് നേരിട്ട് പ്രതാംഗ് മൂട് ജംഗ്‌ഷനിലേക്ക് യാത്ര ചെയ്യാനുള്ള സൗകര്യം ഇതിലൂടെ ലഭ്യമാകും.

പട്ടാപ്പകൽ കാണിക്കവഞ്ചി തകർത്ത് മോഷണം

അന്പലപ്പുഴ: മസ്ജിദിൽ പട്ടാപ്പകൽ മോഷണം. കാണിക്കവഞ്ചി തകർത്ത് പണം കവർന്നു. നീർക്കുന്നം കിഴക്കേ മഹൽ ജമാ അത്തിലാണ് മോഷണം നടന്നത്. ചങ്ങലയിൽ പൂട്ടിട്ട നിലയിലായിരുന്നു കാണിക്കവഞ്ചി. ഇത് തകർക്കുകയായിരുന്നു. ഉച്ചയോടെയാണ് കാണിക്കവഞ്ചി നഷ്ടപ്പെട്ടത് മസ്ജിദ് ഭാരവാഹികളുടെ ശ്രദ്ധയിൽപ്പെടുന്നത്. തുടർന്ന് സിസിടിവി പരിശോധിച്ചപ്പോഴാണ് മോഷണദൃശ്യം കണ്ടത്. മുഖംമൂടി ധരിച്ച ഒരാളാണ് മോഷണം നടത്തിയതെന്ന് മസ്ജിദിലെ സിസിടിവി ദൃശ്യത്തിൽ കണ്ടെത്തിയിട്ടുണ്ട്. രാവിലെ 9.47 നാണ് മോഷണം നടന്നിരിക്കുന്നത്. മുഖം മറച്ച ഒരാൾ മസ്ജിദിലൂടെ നടന്നുപോകുന്നത് ദൃശ്യത്തിലുണ്ട്. തൊട്ടടുത്ത വീട്ടിലെ സിസിടിവി ദൃശ്യത്തിൽ ഇയാൾ റോഡിലൂടെ ബൈക്കിൽ വന്നിറങ്ങുന്നതും കാണാം. ഇതിനുശേഷം ഏകദേശം 2 കി. മീറ്ററിനു സമീപമുള്ള ആഞ്ഞിലിപ്പുറം തൈക്കാവ് മസ്ജിദിലും രാവിലെ 10. 10ന് എത്തിയതായി സിസിടിവി ദൃശ്യത്തിൽ വ്യക്തമാണ്. മസ്ജിദിലെ ജീവനക്കാരൻ ചോദിച്ചപ്പോൾ ടോയ്‌ലറ്റിൽ വന്നതാണെന്ന മറുപടിയാണ് പറഞ്ഞത്. അമ്പലപ്പുഴ പോലീസ് സ്ഥലത്തെത്തി പരിശോധന നടത്തി അന്വേഷണം ആരംഭിച്ചു. ഏതാനും ആഴ്ച മുൻപ് അമ്പലപ്പുഴ അടിമന ക്ഷേത്രത്തിലും കാണിക്കവഞ്ചികൾ തകർത്ത് പണം കവർന്നിരുന്നു. ഇതിലെ പ്രതിക്കായി അന്വേഷണം നടത്തുന്നതിനിടെയിലാണ് മസ്ജിദിൽ മോഷണം നടക്കുന്നത്.

അമര്‍ ജവാന്‍ ട്രോഫി ജലോത്സവ വിളംബരജാഥ 13ന്

എടത്വ: പച്ച-ചെക്കിടിക്കാട് പിസിബിസിയുടെ നേതൃത്വത്തില്‍ 21നു നടക്കുന്ന അമര്‍ ജവാന്‍ ട്രോഫി ജലോത്സവത്തിന്‍റെ വിളംബരജാഥ 13ന് വൈകിട്ട് നാലിന് നടക്കും. വീരമൃത്യുവരിച്ച ലാന്‍സ് നായിക് ഡി. വേണുഗോപാല്‍ ചേമ്പിലക്കാടിന്‍റെ കരുമാടിയിലെ സ്മൃതിമണ്ഡപത്തില്‍നിന്നും വിളംബര ജാഥ ആരംഭിക്കും. അമ്പലപ്പുഴ ബ്ലോക്ക് പഞ്ചായത്ത് സ്റ്റാൻഡിംഗ് കമ്മിറ്റി ചെയര്‍മാന്‍ ആര്‍. ജയരാജ് വിളംബര ജാഥ ഉദ്ഘാടനം ചെയ്യും. കരുമാടി ഫ്‌ളാഷ് സാംസ്‌കാരിക സംഘടന പ്രസിഡന്‍റ് എസ്. രാഹുല്‍ അധ്യക്ഷത വഹിക്കും. റിട്ട. ഹവീല്‍ദാര്‍ തങ്കച്ചന്‍ ജോസഫ് ഫ്‌ളാഗ് ഓഫ് ചെയ്യും. അജയന്‍ കൊല്ലവന, ഡോണി സഖറിയ, സിനു പന്ത്രണ്ടില്‍ എന്നിവര്‍ പ്രസംഗിക്കും. വൈകിട്ട് 5ന് സമാപനസമ്മേളനം പച്ച-ചെക്കിടിക്കാട് പിസിബിസി ഓഫീസിനു സമീപം നടക്കും. വര്‍ഡ് മെംബര്‍ മോന്‍സി ജോര്‍ജ് കരിക്കംപള്ളില്‍ ഉദ്ഘാടനം ചെയ്യും. സംഘാടകസമിതി ചെയര്‍മാന്‍ മാത്യു സഖറിയ കരിക്കംപള്ളില്‍ അധ്യക്ഷത വഹിക്കും. വി. വിന്‍സന്‍റ്, കെ. രാജേന്ദ്രന്‍, എം.വി. സുരേഷ്, ജോസഫ് ആന്‍റണി, സതീഷ് ബാലകൃഷ്ണന്‍ എന്നിവര്‍ പ്രസംഗിക്കും. പിസിബിസി എക്‌സിക്യുട്ടിവ് അംഗങ്ങളെ സോള്‍ജിയേഴ്‌സ് ഓഫ് പച്ച-ചെക്കിടിക്കാട് ആദരിക്കും. തെലുങ്കാനയില്‍ നടന്ന നവോദയ ഹൈദരാബാദ് റീജണല്‍ മത്സരത്തില്‍ വോളീബോള്‍ കേരള ടീം അംഗമായ എന്‍. അയന, നെഹ്റുട്രോഫി വിജയിച്ച ടീം അംഗമായ സമിന്‍ സുഗതന്‍ എന്നിവരെ ആദരിക്കും.

ജനകീയ പ്രതിഷേധ സദസ്

മാന്നാർ: നിരപരാധികളെ അന്യായമായി വേട്ടയാടുന്ന പോലീസിലെ ഇടിവീരന്മാർക്ക് പൂർണസംരക്ഷണമാണ് പിണറായി സർക്കാർ നൽകുന്നതെന്ന് കെപിസിസി മുൻ സെക്രട്ടറി മാന്നാർ അബ്ദുൽ ലത്തീഫ് പറഞ്ഞു. സ്തുത്യർഹമായ സേവനം നൽകി വന്നിരുന്ന കേരള പോലീസിൽ ക്രിമിനലുകളുടെ വിളയാട്ടമാണ് ഇപ്പോൾ നടക്കുന്നതെന്നും അദ്ദേഹം കുറ്റപ്പെടുത്തി. വി.എസ്. സുജിത്തിനെ അകാരണമായി മർദിച്ച പോലീസ് ഉദ്യോഗസ്ഥർക്കെതിരേ നടപടിയെടുക്കണമെന്ന് ആവശ്യപ്പെട്ടു കോൺഗ്രസ് മാന്നാർ ബ്ലോക്കിലെ മണ്ഡലം കമ്മിറ്റികളുടെ നേതൃത്വത്തിൽ മാന്നാർ പോലീസ് സ്റ്റേഷനു മുന്നിൽ നടത്തിയ ജനകീയ പ്രതിഷേധ സദസ് ഉദ്ഘാടനം ചെയ്യുകയായിരുന്നു മാന്നാർ അബ്ദുൾ ലത്തീഫ്. അനിൽ മാന്തറ അധ്യക്ഷനായി. കെപിസിസി അംഗം രാധേഷ് കണ്ണന്നൂർ, ഡിസിസി ജനറൽ സെക്രട്ടറിമാരായ തോമസ് ചാക്കോ, സണ്ണി കോവിലകം, കോൺഗ്രസ് മാന്നാർ ബ്ലോക്ക് പ്രസിഡന്‍റ് സുജിത്ത് ശ്രീരംഗം, ജോജി ചെറിയാൻ, സുജ ജോഷ്വ, തമ്പി കൗണടിയിൽ, ടി.കെ. ഷാജഹാൻ, ടി.എസ്. ഷെഫീക്ക്, മിഥുൻ മയൂരം, മധു പുഴയോരം, സണ്ണി പുഞ്ചമണ്ണിൽ തുടങ്ങിയവർ പ്രസംഗിച്ചു. പരുമല ജംഗ്ഷനിൽനിന്ന് പ്രകടനമായി എത്തിയ കോൺഗ്രസ് പ്രവർത്തകരെ പോസ്റ്റ് ഓഫീസ് ജംഗ്ഷനിൽ പോലീസ് തടഞ്ഞു. പോലീസും കോൺഗ്രസ് പ്രവർത്തകരും തമ്മിൽ ഉന്തുംതള്ളും ഉണ്ടായി. യൂത്ത് കോൺഗ്രസ് സംസ്ഥാന സെക്രട്ടറി മിഥുൻ മയൂരത്തിന് സാരമായ പരിക്കു പറ്റി.

കുമ്പളങ്ങി-കെൽട്രോൺ പാലം നിർമാണത്തിനു തുടക്കം

തുറവൂർ: കുമ്പളങ്ങി-അരൂർ കരകളെ ബന്ധിപ്പിക്കുന്ന കുമ്പളങ്ങി-കെൽട്രോൺ പാലത്തിന്‍റെ നിർമാണ പ്രവൃത്തികൾക്കു തുടക്കം. 290.6 മീറ്റർ നീളവും 11 മീറ്റർ വീതിയുമുള്ള പാലം 36.2 മീറ്റർ നീളത്തിലുള്ള എട്ടു സ്പാനുകളിലാണ് നിർമിക്കുന്നത്. കിഫ്‌ബി പദ്ധതിയിൽ ഉൾപ്പെടുത്തി 43.7 കോടി രൂപയാണ് നിർമാണത്തിനായി സംസ്ഥാന സര്‍ക്കാര്‍ അനുവദിച്ചത്. കേരള റോഡ്ഫഡ്ബോർഡിനാണ് നിർമാണച്ചുമതല. ഇരുകരകളിലും സമീപനപാതകളും നിർമിക്കും. കുമ്പളങ്ങി ഭാഗത്ത് 110 മീറ്ററും അരൂർ ഭാഗത്ത് 140 മീറ്റർ നീളത്തിലുമാണ് റോഡുകൾ നിർമിക്കുക. എംഎൽഎമാരായ ദലീമ ജോജോ, കെ.ജെ. മാക്സി എന്നിവരുടെ സാന്നിധ്യത്തിൽ കുമ്പളങ്ങിയിൽ നടന്ന ചടങ്ങിൽ നിർമാണ പ്രവൃത്തികൾക്കു തുടക്കമായി.

അപകടം പതിയിരിക്കുന്ന പടഹാരം-തകഴി റോഡ്

ചമ്പക്കുളം: മുന്നറിയിപ്പ് ബോർഡുകളോ മറ്റ് അടയാളങ്ങളോ ഇല്ലാതെ അപകടക്കെണിയൊരുക്കി പടഹാരം-തകഴി റോഡ്. റോഡിന്‍റെ മിക്ക ഭാഗങ്ങളിലും നിർമാണപ്രവർത്തനങ്ങൾ നടക്കുന്നുണ്ടെങ്കിലും സൂചനാ ബോർഡുകളോ മുന്നറിയിപ്പുകളോ ഇല്ലാത്തത് അപകടസാധ്യത വർധിപ്പിക്കുന്നു. കൈനകരി കരുവാറ്റ റോഡിന്‍റെ ഭാഗമായ റോഡിൽ പടഹാരം സെന്‍റ് ജോസഫ് പള്ളി മുതൽ തെക്കോട്ട്‌ തകഴി ജംഗ്ഷൻ വരെയുളള ഭാഗത്താണ് അപകടം പതിയിരിക്കുന്നത്. റോഡിന്‍റെ ടാറിംഗ് ജോലികൾ പൂർത്തിയാക്കിയെങ്കിലും വശങ്ങളിലെ പണി പൂർത്തിയാകാത്തതാണ് അപകടകാരണം. വശങ്ങളിലെ ബാരിക്കേഡ് നിർമാണവും സൈഡ് വാൾ നിർമാണവും നടന്നുവരുന്നെങ്കിലും രാത്രി യാത്രക്കാർക്ക് ദൃശ്യമാകുന്ന രീതിയിൽ മുന്നറിയിപ്പ് ബോർഡുകൾ ഇവിടെ സ്ഥാപിച്ചിട്ടില്ല. സൈഡ് വാൾ പൂർത്തിയാവാനുള്ള ഇടങ്ങളിൽ പുല്ലുകയറി കിടക്കുന്നതും വളവുകൾ കുഴിയായി കിടക്കുന്നതും യാത്രക്കാർക്ക് ഭീഷണി ഉയർത്തുന്നു. നെടുമുടി തകഴി പഞ്ചായത്തുകളെ തമ്മിൽ ബന്ധിപ്പിക്കുന്ന പടഹാരം പാലം ഗതാഗതയോഗ്യമായതോടെ റോഡിൽ വലിയ വാഹനത്തിരക്ക് അനുഭവപ്പെടുന്നുണ്ട്. എസി റോഡിലെ പള്ളാത്തുരുത്തി പാലത്തിന്‍റെ നിർമാണവുമായി ബന്ധപ്പെട്ട് ഗതാഗതം തിരിച്ചുവിടുമ്പോൾ വലിയ വാഹനത്തിരക്കാണ് റോഡിൽ അനുഭവപ്പെടുന്നത്. ഭാഗ്യം കൊണ്ടു മാത്രമാണ് വാഹനങ്ങൾ അപകടത്തിൽപ്പെടാതെ കടന്നുപോകുന്നത്. കഴിഞ്ഞ മൂന്നുമാസത്തിനിടയിൽ നാലു വാഹനങ്ങൾ വശത്തെ തോട്ടിലേക്കും വയലിലേക്കും മറിഞ്ഞ് അപകടത്തിൽപ്പെട്ടിട്ടുണ്ട്. ടോറസ് പോലെയുളള വലിയ ഭാരവാഹനങ്ങൾ കടന്നുപോകുമ്പോൾ റോഡിന്‍റെ വളവുകളിൽ ചെറിയ വാഹനങ്ങൾക്കക്ക് അപകട ഭീഷണി ഉയരുന്നു. അടിയന്തരമായി വഴിവിളക്കുകൾ സ്ഥാപിക്കുകയും രാത്രിയിലും ദൃശ്യമാകുന്ന തരത്തിൽ മുന്നറിയിപ്പ് ബോർഡുകൾ ആവശ്യമായ ഇടങ്ങളിലെല്ലാം സ്ഥാപിക്കണമെന്നും അതോടൊപ്പം വലിയ ഭാരവാഹനങ്ങൾ റോഡ് പണി പൂർത്തിയാകും വരെ നിരോധിക്കണമെന്നുമാണ് നാട്ടുകാരുടെ ആവശ്യം.

മൾച്ചിംഗ് ഷീറ്റിൽ വിത, പ്ലാസ്റ്റിക് കോട്ടിംഗ് വളം...

ആന്‍റണി ആറിൽചിറ ചമ്പക്കുളം: നെൽകൃഷിയിൽ പുതിയ പരീക്ഷണങ്ങൾ നടത്തുന്ന കാവാലം വടക്കേയറ്റം സോജൻ കടൽ താണ്ടി ജപ്പാനിൽ പോയത് നെൽകൃഷിയോടുള്ള താത്പര്യം ഒന്നു കൊണ്ടു മാത്രം. ജപ്പാനിലെ നൂതന കൃഷിരീതികളും വളപ്രയോഗവും നെല്ലിൽനിന്നുള്ള മൂല്യവർധിത ഉത്പന്ന നിർമാണ രീതികളും ഈ യാത്രയിൽ മനസിലാക്കി. ഇതു കേരളത്തിലും നടപ്പാക്കാൻ കഴിയുമെന്നാണ് സോജന്‍റെ അഭിപ്രായം. പക്ഷേ, സർക്കാർ കനിയണം. വിതയും വളപ്രയോഗം മൾച്ചിംഗ് ഷീറ്റിലെ വിതയും പ്ലാസ്റ്റിക് കോട്ടിംഗ് ഉള്ള വളപ്രയോഗവുമാണ് ജപ്പാൻ കൃഷിയിൽ ഏറ്റവും ആകർഷകം. കൃഷിയിടത്തിൽ മൾച്ചിംഗ് ഷീറ്റ് നിരത്തി വിത്ത് വിതയ്ക്കുന്നതു മൂലം കളകൾ വളരില്ല. ഷീറ്റ് 28 ദിവസംകൊണ്ട് മണ്ണിലേക്കു ലയിച്ചുചേരും. നെൽച്ചെടികൾ ആരോഗ്യത്തോടെ വളരും. പ്ലാസ്റ്റിക് കോട്ടിംഗ് ഉള്ള വളം കൊണ്ട് മണ്ണിന് ആവശ്യമുളള മൂലകങ്ങൾ മാത്രമാണ് മണ്ണിലേക്ക് ഇറങ്ങുക. മണ്ണിനെയോ വെള്ളത്തെയോ വായുവിനെയോ ഇതു മലിനപ്പെടുത്തില്ല. കൃഷിയിടത്തിൽ വെള്ളം ഇല്ലാത്ത അവസരത്തിൽ വളത്തിന്‍റെ പ്രത്യേകതകൊണ്ട് രൂപപ്പെടുന്ന പുക കീടങ്ങളെ പാടത്തുനിന്ന് അകറ്റുകയും ചെയ്യും. കൃത്യമായ കൃഷിരീതി ആയതുകൊണ്ട് നിശ്ചിത വിളവും ഉറപ്പാണ്. ഒരു വർഷത്തിൽ രണ്ടു കൃഷിയാണ് ജപ്പാനിലെ രീതി. അരിയും ബിയറും തവിട് നഷ്ടപ്പെടാത്ത അരിയാക്കിയാണ് ഉത്പന്നം മാർക്കറ്റിൽ എത്തിക്കുന്നത്. ബാക്കി മൂല്യവർധിത ഉത്പന്നങ്ങളും നിർമിക്കും. നെല്ല് വാറ്റിയുണ്ടാക്കുന്ന ബിയർ പ്രധാന ഇനമാണ്. 22 ഹെക്ടർ ഭൂമിയാണ് ഒരാൾക്കു കൈവശം വയ്ക്കാവുന്ന പരിധി. എന്നാൽ, അരയേക്കർ മുതൽ കൃഷി ചെയ്യുന്നവരുമുണ്ട്. ഭൂരിപക്ഷം കർഷകർക്കും സ്വന്തമായി റൈസ് മില്ലുണ്ട് എന്നതാണ് മറ്റൊരു പ്രത്യേകത. വൈക്കോൽ കൃഷി കഴിഞ്ഞാലുടൻ കെട്ടുകളാക്കി പ്ലാസ്റ്റിക്കിൽ പൊതിഞ്ഞു സൂക്ഷിക്കും. ഇതു ഫാമുകൾക്കു നൽകും. കുട്ടനാട് കാവാലം സ്വദേശിയായ സോജൻ വടക്കേയറ്റം സ്വന്തം പണം മുടക്കിയാണ് ജപ്പാനിലെത്തിയത്. തന്‍റെ കൃഷിയിടം സന്ദർശിച്ച മൂന്നു ജപ്പാൻകാരുടെ ക്ഷണവും ഇദ്ദേഹത്തിനു പ്രോത്സാഹനമായി. 2025 ഒാഗസ്റ്റ് 20 മുതൽ സെപ്റ്റംബർ നാലു വരെ ആയിരുന്നു ജപ്പാൻ യാത്ര. സോജന്‍റെ കൃഷി 1997ൽ പിതാവിന്‍റെ വേർപാടോടെ 17-ാം വയസിൽ കുടുംബത്തിന്‍റെ 16 ഏക്കറിൽ നെൽകൃഷി ചെയ്താണ് സോജന്‍റെ തുടക്കം. 2010ൽ ഡ്രംസീഡർ ഉപയോഗിച്ചു പാടത്തു വിത്ത് വിതച്ചു. ഏക്കറിന്‌ 55- 60 കിലോ നെൽവിത്ത് വിതയ്ക്കുന്നതിനു പകരം 12 കിലോ വിത്ത് ഉപയോഗിച്ച് ഒരു ഏക്കർ വിതച്ചു. മറ്റു കർഷകർ ഇരുപതും ഇരുപത്തഞ്ചും ക്വിന്‍റൽ കൊയ്തപ്പോൾ ഇദ്ദേഹം മുപ്പത്തിരണ്ട് ക്വിന്‍റെൽ വരെ കൊയ്തു. കുട്ടനാട്ടിൽ ഡ്രോൺ വിത്ത് വിത, കളനാശിനി തളിക്കൽ തുടങ്ങിയവയും ആദ്യം പരീക്ഷിച്ചവരിൽ സോജനുണ്ടായിരുന്നു. ഇപ്പോൾ അൻപത് ഏക്കർ കൃഷിയുണ്ട്. ജപ്പാൻ മാതൃകയിൽ ചിലതെങ്കിലും നടപ്പിലാക്കാൻ സാധിച്ചാൽ വലിയ മാറ്റമായിരിക്കുമെന്നാണ് സോജന്‍റെ പ്രതീക്ഷ. ജപ്പാനിലെ മണ്ണിന്‍റെയും കുട്ടനാട്ടിലെ മണ്ണിന്‍റെയും സവിശേഷതകൾ തിരിച്ചറിയാൻ ജപ്പാനിൽനിന്നു കൊണ്ടുവന്ന മണ്ണ് പരിശോധനയ്ക്കായി മങ്കൊമ്പ് നെല്ല് ഗവേഷണകേന്ദ്രത്തിൽ നൽകിയിരിക്കുകയാണ് ഈ കർഷകൻ. ജപ്പാനിലെ നെൽകൃഷി ഏക്കറിന് 2,500 കിലോഗ്രാമാണ് ജപ്പാനിലെ നെൽ ഉത്പാദനം. ഒരു ഏക്കർ കൃഷി ചെയ്യാൻ 4 ലക്ഷം യെൻ (ഒരു യെൻ 60 പൈസ) വേണം. അതായത് 2.4 ലക്ഷം ഇന്ത്യൻ രൂപ. 2500 കിലോ നെല്ലിന് കിട്ടുന്ന വില 9.6 ലക്ഷം യെൻ. അതായത് 5.6 ലക്ഷം യെൻ ലാഭം. രൂപ കണക്കിൽ 3.36 ലക്ഷം രൂപയാണ് ഒരു ഏക്കറിൽനിന്നുള്ള ഏകദേശ ലാഭം. ഒരു കിലോ അരിക്ക് 600 യെൻ (360രൂപ) ആണ് കർഷകർക്ക് ലഭിക്കുന്നത്. വേനലും മഞ്ഞുകാലവുമാണ് രണ്ട് പ്രധാന കാലങ്ങൾ. തോന്നുംപോലെ പെയ്യുന്ന മഴ അവിടെ ഇല്ല. 22 ഹെക്ടർ കൃഷി ചെയ്യുന്ന കർഷകനൊപ്പം സഹായികളായി കൂടെയുള്ളത് വിരലിലെണ്ണാവുന്നവർ മാത്രം. ബാക്കി മുഴുവൻ കാര്യങ്ങളും യന്ത്രം ചെയ്യും. വിത, വളപ്രയോഗം, കൊയ്ത്ത് തുടങ്ങി എല്ലാത്തിനും യന്ത്രസഹായം. അതും കർഷകർ നേരിട്ടു പ്രവർത്തിപ്പിക്കുന്ന യന്ത്രങ്ങൾ.

അധ്യാപക അവാർഡുകൾ വിതരണം ചെയ്തു

മാന്നാർ: ഇന്നർവീൽ ക്ലബ് ഓഫ് ഗോൾഡൻ മാന്നാറിന്‍റെ നേതൃത്വത്തിൽ അധ്യാപക അവാർഡുകൾ നൽകി. അസോസിയേഷൻ ഓഫ് ഇന്നർ വീൽ ക്ലബ്സ് ഏർപ്പെടുത്തിയിട്ടുള്ള അധ്യാപക അവാർഡുകൾ ഇന്നർവീൽ ക്ലബ് ഓഫ് ഗോൾഡൻ മാന്നാറിൻെ നേതൃത്വത്തിൽ അധ്യാപകദിനത്തിൽ മാന്നാറിലെ ശ്രദ്ധേയരായ അധ്യാപകർക്ക് നൽകി. പരിചയസമ്പന്നതയും നേതൃപാടവവും നിസ്വാർഥതയും സംഘാടക മികവും മാതൃകാപരമായ അധ്യാപനവും കൈമുതലായുള്ള പ്രശസ്തരായ രണ്ടു വനിതാ അധ്യാപകർക്കാണ് അവാർഡുകൾ നൽകിയത്. മാന്നാർ ശ്രീ ഭുവനേശ്വരി ഹയർസെക്കൻഡറി സ്കൂളിലെ പ്രിൻസിപ്പൽ ബിനു ഉപേന്ദ്ര, മാന്നാർ നായർ സമാജം ബോയ്സ് ഹയർ സെക്കൻഡറി സ്കൂളിലെ എൻഎസ്എസ് യൂണിറ്റിന്‍റെയും എസ്പിസി യൂണിറ്റിന്‍റെയും ചുമതലക്കാരിയും ഗ്രന്ഥകാരിയുമായ സരിത ഭാസ്കർ എന്നിവരാണ് അധ്യാപക അവാർഡുകൾ നൽകിയത്. ക്ലബ് പ്രസിഡന്‍റ് രശ്മി ശ്രീകുമാർ അവാർഡുകൾ നൽകി. ചാർട്ടർ പ്രസിഡന്‍റ് ഡോ. എം.കെ. ബീന, സെക്രട്ടറി സ്മിതാരാജ്, എ. എം. ശ്രീകല, വി. വിജയലക്ഷ്മി, ജയശ്രീ എസ്. നായർ, രമ്യാ വിജയൻ എന്നിവർ പ്രസംഗിച്ചു.

ലോക ഫസ്റ്റ് എയ്ഡ് ബോധവത്കരണ ദിനാചരണം

എടത്വ: സെന്‍റ് മേരീസ് ഗേള്‍സ് ഹൈസ്‌കൂളില്‍ ലോക ഫസ്റ്റ് എയ്ഡ് ബോധവത്കരണ ദിനാചരണം നടന്നു. ജൂണിയര്‍ റെഡ് ക്രോസ് പ്രതിനിധികളുടെ നേതൃത്വത്തില്‍ വിദ്യാര്‍ഥികള്‍ക്കായി ഫസ്റ്റ് എയ്ഡ് സംബന്ധമായ ക്ലാസുകളും പ്രായോഗിക പ്രകടനങ്ങളും അടിയന്തര സാഹചര്യങ്ങളില്‍ സ്വീകരിക്കേണ്ട പ്രാഥമിക ചികിത്സാരീതികളെക്കുറിച്ച് വിശദീകരിക്കുകയും മാതൃകാപരമായി കാണിക്കുകയും ചെയ്തു. മുങ്ങിമരണം, തീപിടിത്തം, വൈദ്യുതാഘാതം തുടങ്ങിയ അപകട സാഹചര്യങ്ങളില്‍ ജീവന്‍ രക്ഷിക്കാന്‍ സഹായിക്കുന്ന പ്രാഥമിക ശുശ്രൂഷ രീതികളെക്കുറിച്ചും തുടര്‍ന്ന് നല്‍കേണ്ട സിപിആര്‍ ചെയ്യുന്ന വിധവും വിദ്യാര്‍ഥികള്‍ക്ക് വിശദീകരിച്ചു. തീപിടിത്തങ്ങളില്‍ സുരക്ഷിതമായി പ്രവര്‍ത്തിക്കാന്‍ ഫയര്‍ എക്സ്റ്റിംഗ്വിഷര്‍ പ്രദര്‍ശനവും പ്രവര്‍ത്തനരീതി അവതരണവും ഫസ്റ്റ് എയ്ഡ് കിറ്റ് പരിചയപ്പെടുത്തലും നേരിട്ടുള്ള പരിശീലനവും നല്‍കി. അന്നമ്മ തോമസ്, ജാസ്മിന്‍ മാത്യു, സിസ്റ്റര്‍ റോസ് മരിയ മാളിയേക്കല്‍ എന്നിവരുടെ മാര്‍ഗനിര്‍ദേശത്തോടെ വിദ്യാര്‍ഥികളായ മന്ന കെ. ബിനു, അലോന അന്ന ജേക്കബ് എന്നിവരാണ് ക്ലാസുകള്‍ക്ക് നേതൃത്വം നല്‍കിയത്.

ചെങ്ങന്നൂർ സെൻട്രൽ ഹാച്ചറി വീണ്ടും 18ന് പ്രവർത്തനം തുടങ്ങും

ചെങ്ങന്നൂർ: പക്ഷിപ്പനി കാരണം ഒരുവർഷം അടച്ചിട്ടിരുന്ന ചെങ്ങന്നൂരിലെ സെൻട്രൽ ഹാച്ചറി ഈ മാസം 18ന് വീണ്ടും തുറന്നുപ്രവർത്തിക്കും. സംസ്ഥാനം പക്ഷിപ്പനി മുക്തമായതായി കേന്ദ്ര മൃഗസംരക്ഷണവകുപ്പ് പ്രഖ്യാപിച്ചതിനെത്തുടർന്നാണ് ഹാച്ചറി വീണ്ടും തുറക്കാൻ തീരുമാനിച്ചത്. ഇതിനുള്ള നടപടികൾ മൂന്നു മാസം മുൻപ് ആരംഭിച്ചു. ആദ്യഘട്ടത്തിൽ മണ്ണുത്തി വെറ്ററിനറി യൂണിവേഴ്‌സിറ്റിയിൽനിന്ന് 1000 ഗ്രാമശ്രീ കോഴിക്കുഞ്ഞുങ്ങളെ ഹാച്ചറിയിൽ എത്തിക്കും. ബയോസെക്യൂരിറ്റി മാനദണ്ഡങ്ങൾ കർശനമായി പാലിച്ചാകും ഇവയെ വളർത്തുകയെന്ന് പ്രൊഡക്ഷൻ മാനേജർ ഇൻചാർജ് നീന സോമൻ അറിയിച്ചു. പക്ഷിപ്പനി പൊട്ടിപ്പുറപ്പെട്ടതിനെത്തുടർന്ന് കഴിഞ്ഞവർഷം ജൂലൈയിലാണ് ഹാച്ചറിയിലെ കോഴി, കാടക്കുഞ്ഞുങ്ങളുടെ വളർത്തൽ നിർത്തിവച്ചത്. അടച്ചുപൂട്ടുന്ന സമയത്ത് മുട്ട, ഇറച്ചി, ഫാൻസി കോഴികൾ, കാടപ്പക്ഷികൾ എന്നിവയുൾപ്പെടെ ഏകദേശം 13,000 പക്ഷികൾ ഇവിടെയുണ്ടായിരുന്നു. പുതിയ കോഴിക്കുഞ്ഞുങ്ങളെ സ്വീകരിക്കാനായി ഷെഡുകളുടെ പെയിന്‍റിംഗ്, കുമ്മായം പൂശൽ, വലകൾ ബലപ്പെടുത്തൽ തുടങ്ങിയ ജോലികൾ പൂർത്തിയാക്കി. 10,000 കോഴിക്കുഞ്ഞുങ്ങളെയും 5000 കാടക്കുഞ്ഞുങ്ങളെയും വളർത്താനുള്ള ശേഷി ഈ ഹാച്ചറിക്കുണ്ട്. തുടക്കത്തിൽ പുറത്തുനിന്നുള്ള തീറ്റയാകും കോഴിക്കുഞ്ഞുങ്ങൾക്ക് നൽകുക. പിന്നീട്, ഹാച്ചറിയിലെ തന്നെ ഫീഡ് ഫാക്ടറിയിൽ തീറ്റ ഉത്പാദനം പുനരാരംഭിക്കുമെന്ന് അധികൃതർ വ്യക്തമാക്കി. ആലപ്പുഴ, പത്തനംതിട്ട, കോട്ടയം ജില്ലകളിലെ കർഷകർക്ക് ഒരു ദിവസം പ്രായമായ കോഴിക്കുഞ്ഞുങ്ങളെ നൽകിയിരുന്നത് ഈ ഹാച്ചറിയിൽനിന്നാണ്. ഹാച്ചറി വീണ്ടും തുറക്കുന്നത് കർഷകർക്ക് ഏറെ ആശ്വാസമാകും.

രാത്രിയുടെ മറവിൽ പിഐപി കനാൽ ഇടിച്ചുതകർത്തു

കായംകുളം: പമ്പാജലസേചന പദ്ധതിയുടെ കനാൽ ഇടിച്ചുതകർത്തു. ഏകദേശം 27.6 ലക്ഷം രൂപയുടെ നഷ്ടമുണ്ടായതായി ചൂണ്ടിക്കാട്ടി ജല അഥോറിറ്റി അസിസ്റ്റന്‍റ് എൻജിനിയർ നൽകിയ പരാതിയിൽ പോലീസ് അന്വേഷണം ആരംഭിച്ചു. കായംകുളം നഗരസഭ ആറാം വാർഡിൽ മാവിലേത്ത് എൽപി സ്‌കൂളിന് പടിഞ്ഞാറ് ഭാഗത്ത് എരുവ കീരിക്കാട് റോഡിനു സമീപമാണ് കനാൽ തകർത്തത്. പമ്പജലസേചന പദ്ധതിയുടെ ഭാഗമായിട്ടുള്ള എരുവ ബ്രാഞ്ച് കനാലിന്‍റെ 165 മീറ്ററാണ് തകർത്തത്. സർക്കാർ ഭൂമിയിൽ അതിക്രമിച്ചു കയറി ജലസേചനത്തിനായി നിർമിച്ച കനാൽ പൂർണമായും തകർക്കുകയായിരുന്നു. കഴിഞ്ഞദിവസം രാത്രി അതിഥി തൊഴിലാളികളെ ഉപയോഗിച്ച് സ്ഥലത്തെ ഒരുസംഘമാണ് കനാൽ ഇടിച്ചുതകർത്തതെന്നാണ് പരാതി. കനാലിന് ഇരുവശത്തുകൂടിയും ചെറിയ റോഡുണ്ട്. ഭുമി നിരപ്പിൽനിന്ന് ഉയർന്നാണ് കനാൽ പോകുന്നത്. കനാലിന്‍റെ രണ്ടു വശത്തും കോൺക്രീറ്റിൽ തീർത്ത സംരക്ഷണഭിത്തികളുണ്ടായിരുന്നു. കോൺക്രീറ്റിൽ തീർത്ത സംരക്ഷണഭിത്തികൾ കൂടം ഉപയോഗിച്ച് അടിച്ചു തകർക്കുകയായിരുന്നു. അതിഥിതൊഴിലാളികൾ ഉൾപ്പെടെ എട്ടു പേരോളം ഉണ്ടായിരുന്നതായി പ്രദേശവാസികൾ പോലീസിനു മൊഴി നൽകി. പമ്പജലസേചന പദ്ധതിയുടെ ഉദ്യോഗസ്ഥർ സ്ഥലത്തെത്തി പരിശോധന നടത്തി. തുടർന്നാണ് പോലീസിൽ പരാതി നൽകിയത്.

ഗൃഹനാഥൻ കാൽവഴുതി വെള്ളത്തിൽ വീണു മരിച്ചു

അമ്പലപ്പുഴ: കുളിക്കാനിറങ്ങിയ ഗൃഹനാഥൻ കാൽവഴുതി വെള്ളത്തിൽ വീണു മരിച്ചു. കരുവാറ്റ ശ്രീശങ്കരം വീട്ടിൽ സജീവ് കുമാർ (ശ്രീകുമാർ- 54) ആണ് മരിച്ചത്. കോസ്റ്റൽ പോലീസ് സബ് ഇൻസ്പെക്ടറായിരുന്ന ഇദ്ദേഹം വിആർഎസ് എടുത്തിരുന്നു. തോട്ടപ്പള്ളി ചീപ്പ് പാലത്തിനു സമീപം ലീഡിംഗ് ചാനലിൽ ഇന്നലെ വൈകിട്ട് 3.30 ഓടെയായിരുന്നു അപകടം. സംഭവം ശ്രദ്ധയിൽപ്പെട്ട നാട്ടുകാർ വിവരം കോസ്റ്റൽ പോലീസിനെ അറിയിച്ചു. തുടർന്ന് നാട്ടുകാരുടെ സഹായത്തോടെ കരയിലെത്തിച്ച മൃതദേഹം ആലപ്പുഴ മെഡിക്കൽ കോളജ് ആശുപത്രി മോർച്ചറിയിലേക്കു മാറ്റി. പോസ്റ്റുമോർട്ടത്തിനുശേഷം ഇന്ന് വീട്ടുവളപ്പിൽ സംസ്കരിക്കും. ഭാര്യ: ജി. സുമംഗലി (പ്രധാനാധ്യാപിക തോട്ടപ്പള്ളി നാലുചിറ ഹൈസ്കൂൾ).

വില്ലേജ് ഓഫീസ് ജീവനക്കാരൻ കുഴഞ്ഞു‌വീണ് മരിച്ചു

ചേർത്തല: വില്ലേജ് ഓഫീസ് ജീവനക്കാരൻ കുഴഞ്ഞുവീണ് മരിച്ചു. കോടംതുരുത്ത് അയ്യപ്പാസിൽ കെ. സജീവൻ (54) ആണ് മരിച്ചത്. പാണാവള്ളി വില്ലേജ് ഓഫീസിലെ വില്ലേജ് ഫീൽഡ് ഓഫീസർ ആണ്. തിങ്കളാഴ്ച വൈകിട്ട് പാതിരപ്പള്ളി ഗുരുപുരത്ത് ഒരു ചടങ്ങിൽ പങ്കെടുക്കുന്നതിനിടെ കുഴഞ്ഞു വീഴുകയായിരുന്നു. ഉടൻതന്നെ സമീപമുള്ള സ്വകാര്യ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. സംസ്കാരം നടത്തി. ഭാര്യ: ഗീത (ഗവ. ആയുർവേദ ആശുപത്രി, ചേർത്തല). മക്കൾ: സാനിയ, സാഗർ.

ഒമാനിലുണ്ടായ വാഹനാപകടത്തിൽ യുവതി മരിച്ചു

അമ്പലപ്പുഴ: ഒമാനിലുണ്ടായ വാഹനാപകടത്തിൽ യുവതി മരിച്ചു. അമ്പലപ്പുഴ വടക്ക് പഞ്ചായത്ത് രണ്ടാം വാർഡ് വണ്ടാനം വൃക്ഷവിലാസം തോപ്പിൽ രഹന (42)യാണ് മരിച്ചത്. ഒരാഴ്ച മുമ്പ് ഭർത്താവ് അബ്ദുൾ മനാഫു (ജലീൽ)മൊന്നിച്ച് കാറിൽ സഞ്ചരിക്കുമ്പോൾ നിയന്ത്രണം തെറ്റി മറിഞ്ഞായിരുന്നു അപകടം. ഇവരുടെ മകൻ മുഹമ്മദ് സ്വാലിഹിനും ജലീലിനും നിസാര പരിക്കേറ്റിരുന്നു. ഗുരുതരമായി പരിക്കേറ്റ രഹന ഒമാനിലെ ആശുപത്രിയിൽ ചികിത്സയിൽ കഴിയവേ കഴിഞ്ഞദിവസമാണ് മരിച്ചത്. നെടുമ്പാശേരിയിൽ എത്തിച്ച മൃതദേഹം പുന്നപ്ര വണ്ടാനം ഷെറഫുൽ ഇസ്‌ലാം പള്ളി ഖബർസ്ഥാനിൽ സംസ്കരിച്ചു. മൂന്ന് വർഷം മുമ്പാണ് രഹന നാട്ടിൽനിന്ന് ജലീലിനൊപ്പം ദമാമിലേക്ക് പോയത്. മകൾ: തസ്നീമ. മരുമകൻ: മുഹമ്മദ് ഫാസിൽ.

സിപിഐ സംസ്ഥാന സമ്മേളനം: ദീപശിഖാ പ്രയാണം

ചേര്‍ത്തല: സിപിഐ സംസ്ഥാന സമ്മേളന നഗരിയില്‍ സ്ഥാപിക്കാനുള്ള ദീപശിഖാ പ്രയാണത്തിന് വിപ്ലവ സ്മരണകളിരമ്പുന്ന വയലാറില്‍ ആവേശകരമായ തുടക്കം. വയലാര്‍ രക്തസാക്ഷി മണ്ഡപത്തില്‍നിന്നു നിരവധി അത്‌ലറ്റുകളുടെ അകമ്പടിയിലാണ് ദീപശിഖ വയലാര്‍ രക്തസാക്ഷിമണ്ഡപത്തില്‍ നിന്ന് ആലപ്പുഴ വലിയ ചുടുകാട് രക്തസാക്ഷിമണ്ഡപത്തിലെത്തിച്ചത്. വിവിധയിടങ്ങളില്‍ ദീപശിഖാ പ്രയാണത്തിന് പ്രവര്‍ത്തകര്‍ സ്വീകരണം നല്‍കി. വയലാര്‍ രക്തസാക്ഷി മണ്ഡപത്തില്‍ എഐവൈഎഫ് സംസ്ഥാന പ്രസിഡന്‍റ് എന്‍. അരുണിനു ദീപശിഖ കൈമാറി സിപിഐ സംസ്ഥാന അസിസ്റ്റന്‍റ് സെക്രട്ടറി ഇ. ചന്ദ്രശേഖരന്‍ പ്രയാണം ഉദ്ഘാടനം ചെയ്തു. മന്ത്രി പി. പ്രസാദ് അധ്യക്ഷനായി. ജാഥാ ക്യാപ്റ്റന്‍ എന്‍. അരുണ്‍, വൈസ് ക്യാപ്റ്റന്‍ ബിനിത വിന്‍സെന്‍റ്, ഡയറക്ടര്‍ വിപിന്‍ ഏബ്രഹാം, അംഗങ്ങളായ കെ. ഷാജഹാന്‍, പി. ദര്‍ശിത്, നേതാക്കളായ ടി.ജെ. ആഞ്ചലോസ്, പി.വി. സത്യനേശന്‍, ടി.ടി. ജിസ്‌മോന്‍, ദീപ്തി അജയകുമാര്‍, ഡി. സുരേഷ് ബാബു, എന്‍.എസ്. ശിവപ്രസാദ്, എം.കെ. ഉത്തമന്‍, എം.സി. സിദ്ധാര്‍ഥന്‍, ബി. ബിമല്‍റോയി തുടങ്ങിയവര്‍ പങ്കെടുത്തു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]