ADVERTISEMENT

ADVERTISEMENT

കെപിഎസ്ടിഎ സ്വദേശ് മെഗാക്വിസ് ജില്ലാതല മത്സരങ്ങൾ സമാപിച്ചു

പത്തനംതിട്ട: കേരള പ്രദേശ് സ്കൂൾ ടീച്ചേഴ്സ് അസോസിയേഷൻ സംഘടിപ്പിച്ചിരിക്കുന്ന സ്വദേശ് മെഗാക്വിസ് 2025 ജില്ലാതല മത്സരങ്ങൾ സമാപിച്ചു.

സമാപന സമ്മേളനം മാധ്യമ പ്രവർത്തകൻ വർഗീസ് സി. തോമസ് ഉദ്ഘാടനം ചെയ്തു.
ജില്ല പ്രസിഡന്‍റ് ഫിലിപ്പ് ജോർജ് അധ്യക്ഷത വഹിച്ചു.സെക്രട്ടറി വി.ജി കിഷോർ, ജോയ് ആലുക്കസ് മാനേജർ ഷെബിൻ പോൾ, ഗ്രന്ഥകാരൻ എം.എം. ജോസഫ് മേക്കൊഴൂർ, സംസ്ഥാന സമിതി അംഗങ്ങളായ എസ്.പ്രേം, ബിറ്റി അന്നമ്മ തോമസ്,അക്കാഡമിക് സെൽ കൺവീനർ ജോസ് മത്തായി, ട്രഷറർ പി. അജിത്ത് ഏബ്രഹാം ഫ്രെഡി ഉമ്മൻ എന്നിവർ പ്രസംഗിച്ചു.

വിജയികൾ: എൽപി- സന ഫാത്തിമ(ഗവ.എൽപി എസ് വരവൂർ) അർപ്പിത് കൃഷ്ണ(ജിഎൽപിജിഎസ്,റാന്നി) യുപി -ശ്രദ്ധ സന്തോഷ് (യുപിഎസ് തെങ്ങമം) ആർദ്ര ലക്ഷ്മി(ജിവിഎച്ച് എസ്എസ്, ആറൻമുള)
എച്ച് എസ് - അയന മേരി ഏബ്രഹാം (എസ്എൻവി എച്ച്എസ്, തിരുമൂലപുരം), അലീന ഖാദർ (ജിവി എച്ച്എസ്എസ്, പത്തനംതിട്ട), എച്ച് എസ് എസ് - വി. നിരജ്ഞൻ,അർജുൻ എസ്. കുമാർ(ഇരുവരും ഗവ.മോഡൽ എച്ച്എസ്എസ്, കലഞ്ഞൂർ). ‌

ADVERTISEMENT

ബോധവത്കരണ സൈക്കിൾ റാലിയുമായി ബിലീവേഴ്സ് ആശുപത്രി

തിരുവല്ല : ബിലീവേഴ്സ് ചർച്ച് മെഡിക്കൽ കോളജ് ആശുപത്രി ഹെമറ്റോളജി വിഭാഗത്തിന്‍റെ നേതൃത്വത്തിൽ 50 കിലോമീറ്റർ സൈക്കിൾ റാലി സംഘടിപ്പിച്ചു. ബിലീവേഴ്സ് ആശുപത്രിയിലെ ഹെമറ്റോളജി വിഭാഗമായ റീജിയണൽ അഡ്വാൻസ്ഡ് സെന്‍റർ ഫോർ ട്രാൻസ്പ്ലാന്‍റേഷൻ, ഹെമറ്റോ ലിംഫോയിഡ് ഓങ്കോളജി ആൻഡ് മാരോ ഡിസീസസ് (രക്തം) ആഭിമുഖ്യത്തിൽ ബോൺ മാരോ ട്രാൻസ്പ്ലാന്‍റേഷനെക്കുറിച്ച് സമൂഹത്തെ ബോധവത്കരിക്കുകയെന്ന ലക്ഷ്യത്തോടെ സൈക്കിൾ റാലി സംഘടിപ്പിച്ചു. ബോൺ മാരോ ട്രാൻസ്പ്ലാന്‍റേഷനും കാർ - ടി തെറാപ്പിയും അടക്കമുള്ള ആധുനിക ചികിത്സാ സൗകര്യങ്ങൾ ആവശ്യമുള്ളവർക്ക് തൊട്ടരികിൽത്തന്നെയുണ്ടെന്ന സന്ദേശം നൽകുവാനുമാണ് സൈക്കിൾ റാലി സംഘടിപ്പിച്ചത്. സൈക്കിൾ റാലി ബിലീവേഴ്സ് ആശുപത്രി അസോസിയേറ്റ് ഡയറക്ടറും ഹൃദ്രോഗ വിഭാഗം മേധാവിയുമായ ഡോ. ജോൺ വല്യത്ത് ഫ്ലാഗ് ഓഫ് ചെയ്തു. ബിലീവേഴ്സ് ചർച്ച് മെഡിക്കൽ കോളജ് ആശുപത്രിയിൽ നിന്ന് ആരംഭിച്ച റാലി സമീപ ശുപത്രികളായ പരുമല, കല്ലിശേരി, പുഷ്പഗിരി മെഡിക്കൽ കോളേജ്, തിരുവല്ല മെഡിക്കൽ മിഷൻ തുടങ്ങിയ ആശുപത്രികളെ ബന്ധിപ്പിച്ച് തിരികെ എത്തി. മേൽപ്പാടം മർത്തോമ്മാ ഇടവക വികാരി റവ. റോയ് വർഗീസിന്‍റെ നേതൃത്വത്തിൽ സ്വീകരണം നൽകി. ഹെമറ്റോളജി വിഭാഗം മേധാവിയും രക്തം പ്രോഗ്രാം ഡയറക്ടറുമായ ഡോ. ചെപ്സി സി. ഫിലിപ്പ് ബോൺ മാരോ ട്രാൻസ്പ്ലാന്‍റേഷനെക്കുറിച്ച് ബോധവത്കരണപ്രഭാഷണം നടത്തി. സൂപ്പർ സ്പെഷാലിറ്റി ഡോക്ടർമാർ, ആശുപത്രി അഡ്മിനിസ്ട്രേഷൻ ജീവനക്കാർ, മെഡിക്കൽ കോളജ് വിദ്യാർഥികൾ, പൊതുജനങ്ങൾ ഉൾപ്പെടെ 12 മുതൽ 65 വയസുവരെയുള്ള 150 ഓളം പേർ സൈക്കിൾ റാലിയിൽ പങ്കെടുത്തു. പങ്കെടുത്ത സൈക്ലിസ്റ്റുകൾക്ക് സർട്ടിഫിക്കറ്റുകളും മെഡലുകളും വിതരണം ചെയ്തു.

ബനഡിക്ട് മാർ ഗ്രിഗോറിയോസ് അനുസ്മരണം

കല്ലൂപ്പാറ: ദൈവത്തിനും മനുഷ്യർക്കും സ്വീകാര്യമായ ജീവിതം നയിച്ച ആളായിരുന്നു ആർച്ച്ബിഷപ് ബനഡിക്ട് മാർ ഗ്രിഗോറിയോസെന്ന് മലങ്കര കത്തോലിക്കാ സഭയുടെ നിയുക്ത യുറോപ്പ് അപ്പസ്തോലിക് വിസിറ്റേറ്റർ ബിഷപ് മോൺ. ഡോ. കുര്യാക്കോസ് തടത്തിൽ. കോട്ടൂർ ബനഡിക്ട് മാർ ഗ്രിഗോറിയോസ് സ്മാരക ദിവ്യകാരുണ്യാലയത്തിൽ 31-ാമത് ആർച്ച്ബിഷപ് മാർ ഗ്രിഗോറിയോസ് അനുസ്മരണ പ്രഭാഷണം നിർവഹിച്ചു പ്രസംഗിക്കുകയായിരുന്നു അദ്ദേഹം. ആർച്ച്ബിഷപ് ബനഡിക്ട് മാർ ഗ്രിഗോറിയോസ് ഫൗണ്ടേഷന്‍റെ ആഭിമുഖ്യത്തിൽ നടത്തിയ സമ്മേളനത്തിൽ ഫാ. ഡോ. ഇഗ്‌നേഷ്യസ് തങ്ങളത്തിൽ, മിഷണറീസ് ഓഫ് സെന്‍റ് ജോൺസ് ദി ബാപ്റ്റിസ്റ്റ് സന്യാസസമൂഹം ഇൻഡ്യൻ സുപ്പീരിയർ ജനറൽ ഫാ.സജിൻ തളിയത്ത്, ദിവ്യകാരുണ്യാലയം ഡയറക്ടർ ഫാ. സുബിൻ കൂവക്കാട്ട്, പ്രഫ.ജേക്കബ് എം. ഏബ്രഹാം എന്നിവർ പ്രസംഗിച്ചു. നിയുക്ത ബിഷപ്പിനെ മാർ ഗ്രിഗോറിയോസ് ഫൗണ്ടേഷൻ പ്രസിഡന്‍റ് അലക്സ് കുര്യാക്കോസ് പൊന്നാടയണിയിച്ചു. അനുസ്മരണ ബലിയ്ക്ക് മോൺ. ഡോ. കുര്യാക്കോസ് തടത്തിൽ കാർമികത്വം വഹിച്ചു.

ഓമല്ലൂരിൽ കർഷകരെ മറന്നുള്ള പോരാട്ടമില്ല

പത്തനംതിട്ട: വയൽ വാണിഭത്തിന്‍റെ നാടാണ് ഓമല്ലൂർ. കാർഷിക സംസ്കൃതിയുടെ സ്മരണകളുയരുന്ന നാട്ടിൽ വികസന മേഖലയിലും അതിൽ ഊന്നിയ സംസ്കാരം നിലനിൽക്കണമെന്ന് ആഗ്രഹിക്കുന്നവരാണേറെയും. ജില്ലാ ആസ്ഥാനമായ പത്തനംതിട്ട നഗരവുമായി അതിർത്തി പങ്കിടുന്ന പഞ്ചായത്താണ് ഓമല്ലൂർ. പത്തനംതിട്ടയ്ക്കായി വരുന്ന പല പദ്ധതികളുടെയും പ്രയോജനം ഓമല്ലൂരിനു കൂടി അവകാശപ്പെടേണ്ടതാണ്. നിർദിഷ്ട 183 എ ദേശീയ പാതയടക്കം ഓമല്ലൂരിന്‍റെ വികസന സാധ്യതകൾ വർധിപ്പിക്കുന്നു. ഓമല്ലൂർ ടൗൺ വികസനം അടക്കമുള്ള പദ്ധതികൾ ഇതിന്‍റെ ഭാഗമാകേണ്ടതുണ്ട്. തീർഥാടന കേന്ദ്രമായ മഞ്ഞനിക്കരയും ഓമല്ലൂർ ക്ഷേത്രവുമൊക്കെ ഈ നാടിന്‍റെ ഭാഗമാകുന്പോൾ അടിസ്ഥാന സൗകര്യ വികസനരംഗത്താണ് കുതിച്ചു ചാട്ടം വേണ്ടത്. നേട്ടങ്ങൾ

•ശബരിമല തീർഥാടനകാലത്ത് സർക്കാർ ഗ്രാന്‍റ് ഓമല്ലൂർ പഞ്ചായത്തിനു കൂടി ലഭ്യമാക്കി. •വയൽവാണിഭം ജനകീയവത്കരിച്ചു. ജില്ലയിലെ എല്ലാ ഗ്രാമപഞ്ചായത്തുകളിൽ നിന്നും ഓമല്ലൂരിനു സംഭാവന നൽകാമെന്ന ഉത്തരവ് സർക്കാർ പുറപ്പെടുവിച്ചു. •രണ്ടു പതിറ്റാണ്ടായി തരിശുകിടന്നതുൾപ്പെടെ പഞ്ചായത്ത് പരിധിയിലെ 90 ശതമാനം പാടശേഖരങ്ങളും കൃഷിയോഗ്യമാക്കി. നെല്ല് ഉത്പാദനം വർധിപ്പിച്ചു. കരിന്പ് കൃഷിയും പുനരുജ്ജീവിപ്പിച്ചു. വാഴമുട്ടം ശർക്കരയ്ക്ക് വിപണിയിൽ സ്വീകാര്യത ലഭിച്ചു. ‌ •പഞ്ചായത്തിലെ എല്ലാ വാർഡുകളിലും പുതിയ റോഡുകൾക്കും അറ്റകുറ്റപ്പണികൾക്കുമായി എട്ടുകോടിയിൽപരം രൂപ ചെലവഴിച്ചു. സ്കൂളുകൾ, അങ്കണവാടി, ആശുപത്രി കെട്ടിടങ്ങൾ തുടങ്ങിയവയ്ക്ക് രണ്ടു കോടിയിൽപരം രൂപയും ചെലവഴിച്ചു. •എല്ലാ വാർഡുകളിലും തെരുവുവിളക്കുകൾ. കുടിവെള്ള വിതരണ പദ്ധതികൾ കാര്യക്ഷമമാക്കി. •വെയ്റ്റിംഗ് ഷെഡ്, എഇ ഓഫീസ്, വിഇ ഓഫീസ് എന്നിവ നവീകരിച്ചു. ഫ്രണ്ട് ഓഫീസ് പണികളിൽ 90 ശതമാനവും പൂർത്തീകരിച്ചു. •ഓമല്ലൂരിൽ ആധുനിക രീതിയിൽ വോളിബോൾ കോർട്ട്. എംപി ഫണ്ടിൽ നിന്ന് 20 ലക്ഷം വിനിയോഗിച്ചു. •എല്ലാ വാർഡുകളിലും മിനി എംസിഎഫുകൾ സ്ഥാപിച്ചു. തുന്പൂർ മോഡൽ മാലിന്യ സംസ്കരണം, പൂന്തോട്ടം നിർമാണം തുടങ്ങിയവയിലൂടെ ശുചിത്വ പദ്ധതികൾ നടപ്പാക്കി. •ലൈഫ് പദ്ധതിയിൽ 134 വീടുകൾ നിർമിച്ചു. അഞ്ചു കോടി രൂപ പദ്ധതിയിൽ ചെലവഴിച്ചു. • കോഴിമുട്ട ഉത്പാദനത്തിൽ സ്വയംപര്യാപ്തത. 3000 കുടുംബങ്ങൾക്ക് പത്തു കോഴി വീതം നൽകി. •സിഡിഎസിനെ ജില്ലയിലെ മാതൃകാ യൂണിറ്റാക്കി. എട്ടു കോടിയോളം രൂപ ബാങ്ക് ലിങ്കേജ് വായ്പ നൽകുന്നതിനും 3.35 കോടി രൂപ ബൾക്ക് വായ്പയായി നൽകുന്നതിനുമായി. •ഓമല്ലൂർ മാർക്കറ്റിൽ അഗ്രി വെജിറ്റബിൾ കിയോസ്ക് സ്ഥാപിച്ചു. •ആരോഗ്യമേഖലയിലെ പ്രവർത്തനത്തിന് പഞ്ചായത്തിന് ആർദ്ര പുരസ്കാരം. തൊഴിലുറപ്പ് പദ്ധതി പ്രവർത്തനങ്ങളുമായി ബന്ധപ്പെട്ട് മഹാത്മാ പുരസ്കാരവും ലഭിച്ചു. കോട്ടങ്ങൾ

• തനതു പ്രവർത്തനങ്ങൾ ഒന്നും നടന്നിട്ടില്ല. സംസ്ഥാന സർക്കാരിന്‍റെ പദ്ധതികൾ ഏറ്റെടുത്തു നടപ്പാക്കുക മാത്രമാണ് ചെയ്തത്. ഇതാകട്ടെ ഉദ്യോഗസ്ഥ മികവിലാണ് പൂർത്തീകരിച്ചത്. • പുതിയ പദ്ധതികൾ സ്വന്തം നിലയിൽ ഏറ്റെടുക്കുന്നതിന് അനുകൂലമായ സാധ്യതകളുണ്ടായിരുന്നെങ്കിലും പ്രയോജനപ്പെടുത്തിയില്ല. • ഗ്രാമപഞ്ചായത്തിനു പുതിയ ഓഫീസ് കെട്ടിടം വേണമെന്നാവശ്യം അംഗീകരിച്ചില്ല. കിഫ്ബി, നബാർഡ് പദ്ധതികളിൽ നിന്നും സാധ്യതകളുണ്ടായിട്ടും ഓഫീസ് കെട്ടിട നിർമാണത്തിനു ശ്രമമുണ്ടായില്ല. •പഞ്ചായത്ത് റോഡുകളുടെ ശോച്യാവസ്ഥ പരിഹരിക്കപ്പെട്ടിട്ടില്ല. ഓടകൾ അടഞ്ഞതും റോഡുകളിലെ വെള്ളക്കെട്ടും മാലിന്യങ്ങളും നാടിനു ശാപമാണ്. •കാർഷിക ഗ്രാമമായ ഓമല്ലൂരിൽ സ്ഥിരമായ കാർഷിക വിപണി വേണമെന്നാവശ്യം അംഗീകരിക്കപ്പെട്ടില്ല. ഇക്കാര്യം കർഷക സമിതി മുന്നോട്ടു വച്ചതാണെങ്കിലും ഭരണസമിതി താത്പര്യം കാട്ടിയില്ല. കർഷകർക്കു വേണ്ട പിന്തുണ ഭരണസമിതി നൽകിയിട്ടില്ല. തരിശുപാടത്ത് കൃഷി ചെയ്തവർ പിന്നീട് ഇത് ഉപേക്ഷിക്കേണ്ട സാഹചര്യമുണ്ടായി. •കാട്ടുപന്നി ശല്യം അതിരൂക്ഷമായിട്ടും നടപടികളുണ്ടായില്ല. ഷൂട്ടർമാരെ നിയോഗിച്ച് പന്നികളെ അമർച്ച ചെയ്യാനാകുമായിരുന്നു. ഇതിനാവശ്യമായ നടപടി ഉണ്ടായില്ല. കിഴങ്ങുവർഗ കൃഷിയിൽ മുന്നിട്ടു നിന്ന ഗ്രാമത്തിൽ ഇന്നിപ്പോൾ കൃഷിയിടങ്ങൾ തരിശിടേണ്ട സാഹചര്യമാണ്. •പ്രകൃതി രമണീയമായ പഞ്ചായത്തിന്‍റെ പലഭാഗങ്ങളിലും ടൂറിസം പദ്ധതിക്കു സാധ്യതകളേറെയാണ്. കുറിഞ്ചാൽ പുഞ്ചയിലേതടക്കമുള്ള പദ്ധതികൾ വെളിച്ചം കണ്ടില്ല. പ്രോജക്ടുകൾ തയാറാക്കി സാധ്യതകൾ പ്രയോജനപ്പെടുത്താൻ ശ്രമമുണ്ടാകുന്നില്ല. ഒറ്റനോട്ടത്തിൽ ഒരിടവേളയ്ക്കുശേഷം യുഡിഎഫ് ഭരണത്തിലായിരുന്നു ഓമല്ലൂർ ഗ്രാമപഞ്ചായത്ത്. വ്യക്തമായ ഭൂരിപക്ഷമുണ്ടായിരുന്നതിനാൽ അഞ്ചു വർഷവും ഡിസിസി ജനറൽ സെക്രട്ടറി ജോൺസൺ വിളവിനാൽ ഗ്രാമപഞ്ചായത്ത് അധ്യക്ഷ സ്ഥാനത്തു തുടർന്നു. തനതായ വീക്ഷണത്തോടെ പദ്ധതികൾ ആസൂത്രണം ചെയ്താണ് ഭരണസമിതി മുന്നോട്ടു പോയതെന്ന് ജോൺസൺ പറയുന്നു. ഇതിൽ അടിസ്ഥാന സൗകര്യ വികസനത്തിനാണ് പ്രാധാന്യം നൽകിയത്. എന്നാൽ പഞ്ചായത്തിന്‍റെ സാധ്യതകളെ അട്ടിമറിച്ചുള്ള ഭരണമാണ് യുഡിഎഫിന്‍റേതെന്നാണ് എൽഡിഎഫ് ആരോപണം. കാർഷിക രംഗത്ത് ഉത്പാദന വർധന അവകാശപ്പെടുന്പോഴും ഉത്പന്നങ്ങൾ വിറ്റഴിക്കാനോ സംസ്കരിക്കാനോ പദ്ധതികളുണ്ടായില്ലെന്നും പ്രതിപക്ഷം ചൂണ്ടിക്കാട്ടി. കക്ഷിനില: ആകെ സീറ്റുകൾ - 14, യുഡിഎഫ് - 7, എൽഡിഎഫ് - 5, ബിജെപി - 2.

പമ്പാനദിയിൽ കാണാതായ യുവാവിന്‍റെ മൃതദേഹം കണ്ടെത്തി

കോഴഞ്ചേരി: പമ്പാ നദിയിൽ കുളിക്കാനിറങ്ങി കാണാതായ യുവാവിന്‍റെ മൃതദേഹം കണ്ടെത്തി. ഞായർ വൈകുന്നേരം 5.30ഓടെ ആറന്മുള മാലക്കര ചക്കിട്ടപ്പടി വള്ളക്കടവിൽ കൂട്ടുകാരനൊപ്പം കുളിക്കാനിറങ്ങിയ മാലക്കര കൊല്ലരിക്കൽ പുതുവാൻകോട്ട മാത്യുവിന്‍റെ (34) മൃതദേഹമാണ് ഇന്നലെ ഉച്ചകഴിഞ്ഞ് 3. 30 ഓടെ വള്ളക്കടവിന് സമീപത്തുനിന്ന് കണ്ടെത്തിയത്. കാണാതായ മാത്യുവിനായി പോലീസും പത്തനംതിട്ടയിൽ നിന്നെത്തിയ അഗ്‌നിരക്ഷാ സേനയുടെ സ്കൂബാ ടീമും നടത്തിയ തെരച്ചിലിലാണ് മൃതദേഹം കണ്ടെത്തിയത്. കുളിക്കാനിറങ്ങിയപ്പോൾ ഇവർ രണ്ടുപേരും ഒഴുക്കിൽപ്പെട്ടാണ് അപകടം ഉണ്ടായത്. വെള്ളത്തിൽ മുങ്ങിയ മാത്യുവിനെയും കൂട്ടുകാരൻ വിനു രാജിനെയും ഓടിക്കൂടിയവർ രക്ഷപ്പെടുത്താൻ ശ്രമിച്ചെങ്കിലും മാത്യു മുങ്ങിത്താഴുകയായിരുന്നു.

മെഡിക്കൽ ക്യാമ്പ്

മല്ലപ്പള്ളി:ആവണി കലാകായിക വേദിയും അഹല്യ ഫൌണ്ടേഷൻ ഐ ഹോസ്പിറ്റലും ഡിഎംസി ഹോസ്പിറ്റലും സംയുക്തമായി നടത്തിയ മെഡിക്കൽ ക്യാമ്പ് എഴുമറ്റൂർ ഗ്രാമ പഞ്ചായത്ത്‌ മെംബർ ടി. മറിയാമ്മ ഉദ്ഘാടനം ചെയ്തു. ക്ലബ്‌ പ്രസിഡന്‍റ് മനോജ്‌ കുമാരസ്വാമി അധ്യക്ഷത വഹിച്ചു. ഡോ. ആര്യ, ഡോ. ലിഡിയ, ക്ലബ്‌ സെക്രട്ടറി സഞ്ജീവ് പുളിക്കൽ, ക്ലബ്‌ ഖജാൻജി ജീവൻ ജോൺ ഷാജി എന്നിവർ പ്രസംഗിച്ചു.

ആർ. ദേവനാഥ് കുട്ടികളുടെ പ്രധാനമന്ത്രി, പാർവതി വിനീത് പ്രസിഡന്‍റ്

പത്തനംതിട്ട: ജില്ലാ ശിശുക്ഷേമസമിതിയുടെ നേതൃത്വത്തിൽ 14നു പത്തനംതിട്ടയിൽ നടക്കുന്ന ശിശുദിന റാലിയിൽ ആർ. ദേവനാഥ് കുട്ടികളുടെ പ്രധാനമന്ത്രിയും പാർവതി വിനീത് പ്രസിഡന്‍റുമാകും. സിയാ സുമനാണ് സ്പീക്കർ. കഴിഞ്ഞദിവസം നടന്ന ജില്ലാതല പ്രസംഗം മത്സര വിജയികളെയാണ് ഈ സ്ഥാനങ്ങളിലേക്ക് തെരഞ്ഞെടുത്തത്. ആർ. ദേവനാഥ് പഴകുളം ഗവൺമെന്‍റ് എൽപി സ്കൂൾ വിദ്യാർഥിയാണ്. പാർവതി വിനീത് തിരുവല്ല ഡിബിഎച്ച്എസ്എസിലും സിയാ സുമൻ പത്തനംതിട്ട മാർത്തോമ്മ എച്ച്എസ്എസിലും വിദ്യാർഥികളാണ്. ശിശുദിനാഘോഷ സമ്മേളന വേദിയിൽ എ. ദേവാനന്ദ (തോട്ടുവ ഗവ.എൽപിഎസ്), സായ് കൃഷ്ണ (സെന്‍റ് പീറ്റേഴ്സ് യുപിഎസ്, കൊടുമൺ) എന്നിവർ ആശംസകൾ നേരും. അദിതി അരുൺ (പൂഴിക്കാട് ഗവൺമെന്‍റ് യുപിഎസ്) സ്വാഗതവും ഹൈഫ അരാഫത്ത് (മാങ്കോട് ഗവ. എച്ച്എസ്എസ്) നന്ദിയും പറയും. നവംബർ 14ന് രാവിലെ 7.30ന് പത്തനംതിട്ട കളക്ടറേറ്റ് അങ്കണത്തിൽ നിന്നരാംഭിക്കുന്ന ശിശുദിനറാലി പത്തനംതിട്ട ടൗൺ ചുറ്റി പത്തനംതിട്ട മാർത്തോമ്മാ ഹയർ സെക്കൻഡറി സ്കൂളിൽ സമാപിക്കും. തുടർന്ന് പൊതുസമ്മേളനവും സമ്മാനദാനവും നടക്കും.

പത്തനംതിട്ടയ്ക്കു വേണം പുതിയ ഒരു വികസനസംസ്കാരം

പത്തനംതിട്ട: സാധ്യതകൾ പരമാവധി പ്രയോജനപ്പെടുത്തുകയെന്നതാണ് നിലവിൽ പത്തനംതിട്ടയുടെ വികസന മേഖലയ്ക്ക് അഭികാമ്യമായിട്ടുള്ളതെന്ന് ആന്‍റോ ആന്‍റണി എംപി. കേരള പത്ര പ്രവർത്തക യൂണിയൻ സംസ്ഥാന സമ്മേളനത്തിന്‍റെ ഭാഗമായി പത്തനംതിട്ടയിൽ സംഘടിപ്പിച്ച മുന്നേറാം പത്തനംതിട്ടയ്ക്കൊപ്പം വികസന സംവാദം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. വികസന സംസ്കാരം പത്തനംതിട്ടയ്ക്കു നഷ്ടമായി. പുതിയ ഒരു പദ്ധതി വന്നാൽ അതിനെ എതിർക്കുന്നവരുടെ എണ്ണമാണ് ജില്ലയിൽ കൂടുതലായുള്ളത്. അതിനൊരു മാറ്റം വരണമെന്ന് എംപി അഭിപ്രായപ്പെട്ടു. ലോകത്തു തന്നെ ഏറ്റവും കൂടുതൽ അടച്ചിട്ട വീടുകളുള്ള ജില്ല പത്തനംതിട്ടയാണെന്നാണ് അന്താരാഷ്ട്ര മാധ്യമങ്ങൾ സമീപകാലത്തു റിപ്പോർട്ട് ചെയ്തത്. പണ്ടു മുതൽക്കേ ഇതര രാഷ്‌ട്രങ്ങളിലേക്ക് കുടിയേറുന്ന സംസ്കാരം പത്തനംതിട്ടയ്ക്കുണ്ടെങ്കിലും അവരൊക്കെ തിരിച്ചുവരുമായിരുന്നു. ഇന്നിപ്പോൾ ഇവിടേക്ക് മടങ്ങാൻ പോലും താത്പര്യമില്ലാതെയാണ് യുവജനത നാടു വിടുന്നത്. രാഷ്‌ട്രീയ അതിപ്രസരമാണ് നമ്മുടെ പിന്നാക്കാവസ്ഥയ്ക്ക് ഒരു കാരണമെന്ന് എംപി പറഞ്ഞു. തൊട്ടടുത്ത തമിഴ്നാട് വികസന കാര്യത്തിൽ ഏറെ മുന്നിട്ടുനിൽക്കുന്നു. സാമ്പത്തിക മുന്നേറ്റം അവർ ഉണ്ടാക്കി. അവിടെ രാഷ്‌ട്രീയ പോരാട്ടം ഉണ്ടായാലും വികസനകാര്യത്തിൽ വിട്ടുവീഴ്ച ഇല്ല. ഇന്ത്യയിലെ പ്രധാന വകുപ്പുകളുടെ സെക്രട്ടറിമാർ മലയാളികൾ ആയിട്ടും വേണ്ടത്ര നേട്ടം നമുക്ക് ഉണ്ടായിട്ടില്ല. എരുമേലിയിൽ വിമാനത്താവളത്തെ ആദ്യം സ്വാഗതം ചെയ്തയാളാണ് താൻ. വിമാനത്താവളം, റെയിൽവേ, ദേശീയപാത, ഗ്രീൻഫീൽഡ് ഹൈവേ ഇതെല്ലം ജില്ലയിൽ സാധ്യമായെങ്കിലേ വികസനം സാധ്യമാകൂ. അങ്കമാലി - ശബരിപാതയ്ക്ക് വർഷങ്ങളായി കാത്തിരിക്കുകയാണ്. പാത എരുമേലിയിൽ നിന്ന് പുനലൂർ വഴി വിഴിഞ്ഞം വരെ ദീർഘിപ്പിച്ചാൽ കേരളത്തിന്‍റെ മൂന്നാം പാതയായി ഇതു മാറും. റബർ വില തകർച്ച നമ്മുടെ കാർഷികമേഖലയുടെ നടുവൊടിച്ചു. റബർ ബോർഡിന്‍റെ അധികാരം എടുത്തുകളഞ്ഞതോടെ തകർച്ച പൂർണമായി. സർക്കാർ ഭൂമി ഏറ്റെടുത്താലെ പല വികസനങ്ങളും നടപ്പാക്കാൻ കഴിയൂ. ആറന്മുള ക്ഷേത്രത്തിലെ പ്രാധാന്യം മനസിലാക്കി അവിടെയും വികസനം ഉണ്ടാകണം. ആറൻമുളയിൽ കെഎസ് ആർടിസി ഓപ്പറേറ്റീവ് സെന്‍റർ അത്യാവശ്യമാണ്. ശബരിമല ദേശീയ തീർഥാടന കേന്ദ്രമായി മാറണം. അവിടെയെത്തുന്ന തീർഥാടകർ ജില്ലയുടെ മറ്റു സ്ഥലങ്ങൾ കൂടി സന്ദർശിക്കുന്നതരത്തലേക്ക് ക്രമീകരണമുണ്ടാകണമെന്നും എംപി അഭിപ്രായപ്പെട്ടു. റബറധിഷ്ഠിത വ്യവസായങ്ങൾ ഉണ്ടാകണം: ചിറ്റയം റബർ അധിഷ്ഠിത വ്യവസായങ്ങൾ പത്തനംതിട്ട ജില്ലയിലുണ്ടാകണമെന്ന് ഡെപ്യൂട്ടി സ്പീക്കർ ചിറ്റയം ഗോപകുമാർ. കാർഷികമേഖലയുടെ അഭിവൃദ്ധി ജില്ലയിൽ കുറഞ്ഞു. നിലവിലെ ഭൂമി സംരക്ഷിക്കാൻ കഴിയണം. ടൂറിസത്തിന് അനുയോജ്യമായ നിരവധി ഘടകങ്ങൾ ജില്ലയിലുണ്ട്. പിൽഗ്രിം ടൂറിസത്തിനും ഏറെ സാധ്യതയുണ്ട്. റോഡ്, റെയിൽവേ കണക്ടിവിറ്റി പ്രധാന ഘടകമാണ്. ഇതിന് ജനങ്ങളുടെ സഹകരണവും ആവശ്യമാണ്. ശബരിമല വികസനത്തിന് വനംവകുപ്പ് സ്ഥലംവിട്ടുകിട്ടണം. തിരുപ്പതി മോഡൽ വികസനം നടപ്പാകണം. കേന്ദ്ര വനം വകുപ്പ് ഇതിന് സഹായിക്കണം. ടൂറിസം കേന്ദ്രങ്ങൾ ടൂറിസം ഹബ്ബാക്കാൻ പദ്ധതി രൂപപ്പെടണം. സർക്കാരിന് സാമ്പത്തിക പരിമിതികളുണ്ട് . പത്തനംതിട്ട ടൗൺ രാത്രി ആയാൽ വിജനമാകും. ടൗൺ സ്ക്വയർ കേന്ദ്രീകരിച്ച് സാംസ്കാരിക ഇടമാക്കി മാറ്റിയാൽ ഒരുപാട് മാറ്റങ്ങൾ ഉണ്ടാകും. ജില്ലയിലെ മറ്റു കേന്ദ്രങ്ങളും സാംസ്കാരിക സമുച്ചയങ്ങൾ ഉണ്ടാകണം. ഒരു ആർട്ട് ഗാലറിയും നിർമിക്കണമെന്ന് അദ്ദേഹം പറഞ്ഞു . വികസന ഫോറം ഉണ്ടാകണം: സക്കീർ ഹുസൈൻ ജില്ലയിലെ എല്ലാ ജനപ്രതിനിധികളും ചേർന്ന് എംപിയുടെ നേത്യത്വത്തിൽ ഒരു ഫോറം രൂപീകരിക്കണമെന്ന് നഗരസഭ ചെയർമാൻ ടി. സക്കീർ ഹുസൈൻ. എംഎൽഎമാർ, നഗരസഭ അധ്യക്ഷർ, ജില്ലാ പഞ്ചായത്ത് പ്രസിഡന്‍റ് എന്നിവർ ഇതിൽ ഉൾപ്പെടണം. ഓരോ പ്രദേശത്തിന്‍റെയും വികസന രേഖ തയാറാക്കുകയും ആവശ്യമായ പദ്ധതികൾക്ക് രൂപം നൽകുകയം വേണം. നഗരസഭ പരിധിയിലാണെങ്കിലും പല റോഡുകളുടെയും ഉടമസ്ഥാവകാശം മറ്റു പല ഏജൻസികൾക്കാണ്. ഇവയൊക്കെ നന്നാക്കണമെന്നു പോലും ആവശ്യപ്പെടാനാകാത്ത സ്ഥിതിയുണ്ടെന്ന് ചെയർമാൻ അഭിപ്രായപ്പെട്ടു. ഡോ. സജി ചാക്കോ (ജില്ലാ പഞ്ചായത്ത് മുൻ പ്രസിഡന്‍റ്) ലോകത്ത് വ്യത്യസ്തമായ ഭക്ഷ്യ വിഭവങ്ങൾ ലഭിക്കുന്ന സ്ഥലമാണ് പത്തനംതിട്ട. നിരവധി ആളുകൾ വ്യത്യസ്ത കൃഷികൾ ചെയ്യുന്നുണ്ട്. അടഞ്ഞു കിടക്കുന്ന വീടുകൾ ടൂറിസ്റ്റുകൾക്ക് വേണ്ടി പ്രയോജനപ്പെടുത്താൻ കഴിയുന്ന പദ്ധതികൾക്ക് രൂപം നൽകണം. വിദ്യാഭ്യാസ നിലവാരം മെച്ചപ്പെടുത്താനും കഴിയണം. നഗരസഭ മുൻ ചെയർമാൻമാരായ എ. സരേഷ് കുമാർ, പി. മോഹൻരാജ്, രജനി പ്രദീപ്, ജില്ലാ പഞ്ചായത്ത് മുൻ പ്രസിഡന്‍റുമാരായ ഓമല്ലൂർ ശങ്കരൻ, കെ.കെ. റോയ്സൺ, യുഡിഎഫ് ജില്ലാ ചെയർമാൻ വർഗീസ് മാമ്മൻ, കേരള കോൺഗ്രസ് -എം ജില്ലാ പ്രസിഡന്‍റ് സജി അലക്സ്, ഡിടിപിസി മുൻ സെക്രട്ടറി വർഗീസ് പുന്നൻ, ജെറി മാത്യു സാം, ജോർജ് വർഗീസ്, മാത്തൂർ സുരേഷ്, അജയകുമാർ വല്ല്യുഴത്തിൽ, ഡോ. എം. എസ്. സുനിൽ, പി. കെ. ജേക്കബ്, വ്യാപാരി വ്യ‌വസായി സംഘടനാ നേതാക്കളായ പ്രസാദ് ജോൺ മാന്പ്ര, ടി.ടി. അഹമ്മദ്, അഷ്റഫ് അലങ്കാർ, തിരുവല്ല നഗരസഭ കൗൺസിലർ ഡോ. റെജിനോൾഡ് വർഗീസ്, എസ്. വി. പ്രസന്നകുമാർ, രഘുനാഥൻ ഉണ്ണിത്താൻ, ജി. രാജേഷ് കുമാർ, സാം ചെമ്പകത്തിൽ ,സലിം പി ചാക്കോ, ബി. ഹരിദാസ്, ഉഷാകുമാരി മാടമൺ തുടങ്ങിയവർ ചർച്ചകളിൽ പങ്കെടുത്തു. മാധ്യമ പ്രവർത്തകൻ വർഗീസ് സി. തോമസ് മോഡറേറ്ററായിരുന്നു. പ്രസ് ക്ലബ് പ്രസിഡന്‍റ് ബിജു കുര്യൻ സ്വാഗതവും സെക്രട്ടറി ജി. വിശാഖൻ നന്ദിയും പറഞ്ഞു. നഷ്ടപ്പെട്ട വിമാനത്താവളം പദ്ധതി തിരികെ ലഭിക്കുമോ: സമരം ചെയ്തവരും ചോദിച്ചുതുടങ്ങി പത്തനംതിട്ട ജില്ലയുടെ വികസന സംസ്കാരം തന്നെ മാറ്റിമറിക്കാമായിരുന്ന ആറന്മുള വിമാനത്താവളം പദ്ധതിക്കെതിരേ സമരം ചെയ്തവർ ഇന്നിപ്പോൾ നാടിനുണ്ടായ നഷ്ടമോർത്ത് വിലപിക്കുന്നുണ്ടെന്ന് ആന്‍റോ ആന്‍റണി എംപി. പദ്ധതി തിരികെ കൊണ്ടുവരാനാകുമോയെന്ന് ചോദിക്കുന്നവരുമുണ്ട്. ആറന്മുള വിമാനത്താവളം എന്ന പേരുതന്നെ പറയാൻ പേടിയാണെന്ന് മുൻ എംഎൽഎ കെ. ശിവദാസൻ നായർ. പദ്ധതി വരുന്നുവെന്ന പേരിൽ എന്തെല്ലാം കോപ്രായങ്ങളാണ് ഈ നാട്ടിലുണ്ടായത്. മാധ്യമങ്ങളും അതിനു കുടപിടിച്ചു. ആറന്മുള വിമാനത്താവളം പദ്ധതിയെ താൻ ഒരിക്കലും എതിർത്തിട്ടില്ലെന്ന് മുൻ എംഎൽഎയും സിപിഎം നേതാവുമായ കെ.സി. രാജഗോപാൽ പറഞ്ഞു. പദ്ധതിക്കുള്ള ആദ്യ അനുമതി നേടിയെടുത്തത് താൻ എംഎൽഎ ആയിരിക്കുന്പോഴാണ്. പദ്ധതിക്ക് ജനവികാരം എതിരാണെന്നു പറഞ്ഞാണ് മുഖ്യമന്ത്രിയായിരുന്ന വി.എസ്. അച്യുതാനന്ദനെ പിന്നീട് ഇതിന് എതിരാക്കിയതെന്ന് കെസിആർ ചൂണ്ടിക്കാട്ടി. ആറന്മുള വിമാനത്താവളം നഷ്ടപ്പെടുത്തിയതിനെ ഓർത്തു സമരരംഗത്തുണ്ടായിരുന്നവർ വിലപിക്കുന്ന കാലം എത്തിപ്പോയെന്ന അഭിപ്രായം കേരള കോൺഗ്രസ് എം സജി അലക്സും അഭിപ്രായപ്പെട്ടു. വികസനപദ്ധതികളെ കണ്ണടച്ച് എതിർക്കുകയെന്ന സമീപനം മാറണം: ശിവദാസൻ നായർ വികസന പദ്ധതികളെ അതിന്‍റെ പോസിറ്റീവ് തലത്തിൽ കാണാതെ കണ്ണടച്ച് എതിർക്കുന്ന സമീപനത്തിൽ മാറ്റമുണ്ടാകണമെന്ന് മുൻ എംഎൽഎ കെ. ശിവദാസൻ നായർ. മാധ്യമങ്ങൾ ഇക്കാര്യത്തിൽ ജാഗ്രത കാട്ടണമെന്നും അദ്ദേഹം അഭിപ്രായപ്പെട്ടു. തീർഥാടകർ പന്പ വരെയും ട്രെയിനിൽ വരുന്നതിനോടു യോജിപ്പില്ല. ശബരിമലയ്ക്കു പോകുന്നവർ ചെങ്ങന്നൂരിൽ ട്രെയിൻ ഇറങ്ങി പന്തളം, ആറന്മുള ക്ഷേത്രം വഴി പമ്പയിൽ എത്തുന്നതിനോടാണ് യോജിപ്പ് . നമ്മുടെ നദികൾ മുഴുവൻ മാലിന്യ വാഹിനികളായി മാറിയിരിക്കുകയാണ്. എന്നാൽ ഇക്കാര്യത്തിൽ ഒരു ആശങ്കയും നമുക്ക് ഇല്ലാത്തതിൽ വിഷമമുണ്ട്. നദികൾ വൃത്തി ഉള്ളതായി മാറ്റാൻ കഴിയണം. മലകൾ മുഴുവൻ ഇടിച്ചു നിരപ്പാക്കുകയാണ്. പരിസ്ഥിതി സംരക്ഷിച്ചുകൊണ്ടുള്ള വികസനത്തിനു യോജിച്ച നിലപാടുണ്ടാകണമെന്നും ശിവദാസൻ നായർ പറഞ്ഞു. ഐടി മേഖലയുടെ സാധ്യത ഉപയോഗപ്പെടുത്തണം: കെ.സി. രാജഗോപാൽ വികസന പദ്ധതികൾ ആ നാടിന്‍റെ സർവോന്മുഖമായ വളർച്ചയ്ക്കാണ് അടിസ്ഥാനമിടുന്നതെന്ന് മുൻ എംഎൽഎ കെ.സി. രാജഗോപാൽ. ആറന്മുള വിമാനത്താവളത്തിനു ശ്രമിക്കുന്പോൾ ഐടി മേഖലയുടേതടക്കം വികസനം ലക്ഷ്യമിട്ടിരുന്നു. ജില്ലയ്ക്കാകമാനം പ്രയോജനപ്പെടുന്ന തരത്തിലേക്ക് തീർഥാടനങ്ങളും മാറണം. പന്പയിൽ ട്രെയിനിൽ കൊണ്ടുപോയി ശബരിമല തീർഥാടകരെ ഇറക്കിയതു കൊണ്ട് നാടിന് അവരുടെ പ്രയോജനം ലഭിക്കില്ലെന്ന് രാജഗോപാലും അഭിപ്രായപ്പെട്ടു.

ക്രൈസ്തവ സമൂഹത്തിന്‍റെ ന്യൂനപക്ഷാവകാശം ആരുടെയും ഔദാര്യമല്ല: കെ.സി. വേണുഗോപാൽ

കുന്പളന്താനം: ക്രൈസ്തവ സമൂഹം അനുഭവിച്ചുവരുന്ന ന്യൂനപക്ഷാവകാശം ആരുടെയും ഔദാര്യമല്ലെന്നും ഭരണഘടനാ പരമായ അവകാശമാണെന്നും എഐസിസി ജനറൽ സെക്രട്ടറി കെ.സി. വേണുഗോപാൽ. കുന്പളന്താനം സെന്‍റ് മേരീസ് സ്കൂൾ അങ്കണത്തിൽ ശ്രേഷ്ഠ കാതോലിക്ക ബസേലിയോസ് ജോസഫ് ബാവയ്ക്കു സ്വീകരണവും എ.ജെ. ജോസ് തടിയിൽ അനുസ്മരണവും ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. മതസ്വാതന്ത്ര്യവും വിശ്വാസവും ഈ നാട്ടിൽ എല്ലാവർക്കുമുണ്ട്. ഇത് ആർക്കും എതിരായിട്ടുള്ളതല്ല. ഇതിനെ തെറ്റായി വ്യാഖ്യാനിച്ച് ഒറ്റതിരിഞ്ഞ് ആക്രമിക്കുന്ന പ്രവണതയും അംഗീകരിക്കാനാകില്ല. രാജ്യത്തെ ഒന്നായി കണ്ടുകൊണ്ടു മുന്നോട്ടു പോകാൻ കഴിയുന്ന ഒരു ഭരണഘടന നമുക്കുണ്ട്. ഏതെങ്കിലും ഒരു വിഭാഗത്തെ പ്രീണിപ്പിക്കാനോ സന്തോഷിപ്പിക്കാനോ ഉള്ളതല്ല ഭരണഘടനയെന്ന് വേണുഗോപാൽ ചൂണ്ടിക്കാട്ടി. വിദ്യാഭ്യാസ മേഖലയിൽ തങ്ങൾക്കവകാശപ്പെട്ടത് ലഭിക്കുന്നില്ലെന്ന ബോധ്യം ഒരു സമൂഹത്തിനുണ്ടാകുന്നെങ്കിൽ അത് അപലപനീയമാണ്. ഭരണഘടനയിൽ എഴുതിവച്ചിട്ടുള്ള അവകാശങ്ങൾക്കുവേണ്ടി പോരാട്ടം നടത്തേണ്ടിവരുന്നത് സങ്കടകരമാണ്. എത്ര സങ്കടമായാലും ആ പോരാട്ടത്തിലേക്ക് നമ്മൾ പോയേ മതിയാകുവെന്ന് വേണുഗോപാൽ പറഞ്ഞു. നാടിന്‍റെ സാമൂഹ്യ വ്യവസ്ഥിതി മനസിലാക്കി എഴുതിവച്ചതാണ് നമ്മുടെ ഭരണഘടന. ഭരണഘടന എഴുതിവച്ച ആനുകൂല്യങ്ങൾക്കുവേണ്ടി പോരാടുന്നവരെ ഒറ്റതിരിഞ്ഞ് ആക്രമിക്കുന്നത് നാടിന്‍റെ പുരോഗതിയെ ബാധിക്കും. നാം വിശ്വസിക്കുന്ന ഭരണഘടനയിൽ വെള്ളം ചേർക്കാനുള്ള പ്രവണതയ്ക്കെതിരേ നാം പോരാടേണ്ടിയിരിക്കുന്നുവെന്നും അദ്ദേഹം അഭിപ്രായപ്പെട്ടു. ഡോ.ജോസഫ് മാർ ബർണബ‌ാസ് സഫ്രഗൻ മെത്രാപ്പോലീത്തയുടെ അധ്യക്ഷതയിൽ രാജ്യസഭ മുൻ ഉപാധ്യക്ഷൻ പ്രഫ.പി.ജെ. കുര്യൻ അനുസ്മരണ പ്രഭാഷണം നടത്തി. ബിഷപ്പുമാരായ യൂഹാനോൻ മാർ മിലിത്തിയോസ്, സാമുവേൽ മാർ തെയോഫിലോസ്, കുര്യാക്കോസ് മാർ ഈവാനിയോസ്, കുര്യാക്കോസ് മാർ ഗ്രീഗോറിയോസ്, ബിഷപ് തോമസ് സാമുവേൽ എന്നിവർ അനുഗ്രഹപ്രഭാഷണം നടത്തി. ആന്‍റോ ആന്‍റണി എംപി, പ്രമോദ് നാരായൺ എംഎൽഎ, മുൻ എംഎൽഎ രാജു ഏബ്രഹാം, പഴകുളം മധു, റവ.ഐസക് പി. ജോൺസൺ, എ.ജെ. ജോസ് ട്രസ്റ്റ് ചെയർമാൻ സുനീഷ് ജോസ് തുടങ്ങിയവർ പ്രസംഗിച്ചു.

ജില്ലാ കരാട്ടെ ചാമ്പ്യന്‍ഷിപ്പില്‍ പങ്കെടുത്ത് 600ല്‍പരം താരങ്ങള്‍

പത്തനംതിട്ട: ജില്ലാ കരാട്ടെ ചാമ്പ്യന്‍ഷിപ്പില്‍ അറുനൂറില്‍പരം താരങ്ങള്‍ പങ്കെടുത്തു. ചാമ്പ്യന്‍ഷിപ്പിന്‍റെ ഉദ്ഘാടനം ജില്ലാ കളക്ടര്‍ എസ്. പ്രേംകൃഷ്ണന്‍ നിര്‍വഹിച്ചു. പത്തനംതിട്ട ജില്ലാ കരാട്ടെ അസോസിയേഷന്‍ ജില്ലാ പ്രസിഡന്‍റ് പ്രസാദ് ജോണ്‍ മാമ്പ്ര അധ്യക്ഷത വഹിച്ചു. കരാട്ടെ കേരള അസോസിയേഷന്‍ പ്രസിഡന്‍റ് പി.രാംദയാല്‍ മുഖ്യ പ്രഭാഷണം നടത്തി. വിജയികള്‍ക്ക് ജില്ലാ സ്‌പോര്‍ട്‌സ് കൗണ്‍സില്‍ പ്രസിഡന്‍റ് കെ. അനില്‍കുമാര്‍ മെഡല്‍ വിതരണോദ്ഘാടനം നിര്‍വ്വഹിച്ചു. മുത്തൂറ്റ് ആശുപത്രി സൂപ്രണ്ട് ഡോ. ജിനു കുര്യൻ, ന്യുറോളജിസ്റ്റ് ഡോ. ജിബു ജോ, പത്തനംതിട്ട ജില്ലാ കരാട്ടെ അസോസിയേഷന്‍ ജില്ലാ ജനറല്‍ സെക്രട്ടറി പി.കെ. സുനില്‍കുമാര്‍, ട്രഷറാര്‍ ജോസ് ജോണ്‍ എന്നിവര്‍ പ്രസംഗിച്ചു.

ഗാന്ധിസ്മൃതി മൈതാനം നവീകരണം

അടൂർ: അടൂർ ഗാന്ധിസ്മൃതി മൈതാനത്തിന്‍റെ നവീകരണം 25ന് തുടങ്ങും. 2023 ജനുവരിയിൽ നവീകരണോദ്ഘാടനം കഴിഞ്ഞിരുന്നുവെങ്കിലും തുടർ പ്രവർത്തനങ്ങൾ തടസപ്പെട്ടിരുന്നു മുൻ നഗരസഭ ചെയർമാൻ ഡി. സജിയാണ് മൈതാനത്തിന്‍റെ നവീകരണത്തിനുള്ള പദ്ധതി കൊണ്ടുവന്നത്. തുടർന്ന് ഡെപ്യൂട്ടി സ്പീക്കർ ചിറ്റയം ഗോപകുമാറിന്‍റെ സഹായത്തോടെ പദ്ധതി സർക്കാരിനു മുന്നിൽ എത്തിച്ചു. എന്നാൽ പദ്ധതി നീണ്ടുപോയെങ്കിലും ഇപ്പോൾ എല്ലാ തടസങ്ങളും നീങ്ങിയതായി ഡി. സജി പറഞ്ഞു. നിലവിൽ മൈതാനത്തിന്‍റെ ചുറ്റുമതിൽ മിക്കതും നിലം പൊത്തിയ അവസ്ഥയാണ്. കവാടങ്ങളുടെ മേൽക്കൂരയുമെല്ലാം പായൽ കയറി ഏതു നിമിഷവും വീഴാവുന്ന സാഹചര്യത്തിലാണ്. പ്രകൃതിസൗഹൃദ നവീകരണമാണ് ലക്ഷ്യമിടുന്നത്. തറ ടൈൽ പാകി മനോഹരമാക്കുന്നതിനും പ്രത്യേക രീതിയിലുള്ള മേൽക്കൂര സ്ഥാപിക്കുന്നതും കുട്ടികൾക്ക് കളിക്കാനായി പാർക്ക്, ഇരിപ്പിടങ്ങൾ എന്നിവ നിർമിക്കുന്നതും ആർട്ട് വോൾ ഉണ്ടാക്കാനും പൂന്തോട്ടം നിർമിക്കുന്നതും രൂപരേഖയിൽ ഉണ്ട്. ഒപ്പം പരിപാടികൾക്കായി നിലവിലുള്ള ഓപ്പൺ സ്റ്റേജ് നവീകരിക്കാനും പദ്ധതിയുണ്ട്. മഹാത്മാഗാന്ധി നടത്തിയ അടൂർ സന്ദർനത്തിന്‍റെ സ്മരണയ്ക്കായാണ് സെൻട്രൽ ജംഗ്ഷനിൽ പഴയ മൈതാനം ഗാന്ധിസ്മൃതി മൈതാനമാക്കിയത്. കെ.വി. മോഹൻ കുമാർ ആർഡിഒ ആയിരുന്ന കാലത്താണ് ആദ്യം നവീകരണം നടന്നത്. മനോഹരമായ കവാടവും ചുറ്റുമതിലും നിർമിച്ചു. പ്രധാന കവാടത്തിന് മുന്നിൽ പിന്നീട് നഗരസഭ മഹാത്മാഗാന്ധിയുടെ പ്രതിമയും സ്ഥാപിച്ചു.

ജോൺസൺ കീപ്പള്ളിലിനെ അനുമോദിച്ചു

പത്തനംതിട്ട: പത്തംതിട്ട വൈഎംസിഎയിൽ ഗാന്ധി സ്മൃതി സംഗമവും മഹാത്മ ഗാന്ധി ദേശസേവ പുരസ്കാരത്തിനർഹനായ ജോൺസൺ കീപ്പള്ളിലിന് അനുമോദനവും ഡെപ്യൂട്ടി സ്പീക്കർ ചിറ്റയം ഗോപകുമാർ ഉദ്ഘാടനം ചെയ്തു. കെസിസി പ്രസിഡന്‍റ് അലക്സിയോസ് മാർ യൗസേബിയോസ് മെത്രാപ്പോലിത്ത അധ്യക്ഷത വഹിച്ചു. ഡോ. ജോസ് പാറക്കടവിൽ മുഖ്യപ്രഭാഷണം നടത്തി.ലെബി ഫിലിപ്പ് മാത്യു, ഫാ. ഡാനിയേൽ പുല്ലേലിൽ, ഡോ. ജോൺ പനക്കൽ സാമുവൽ പ്രക്കാനം, ഡോ.ജോർജ് വർഗീസ് കൊപ്പാറ, റഷീദ്, പ്രീത് ചന്ദനപ്പള്ളി എന്നിവർ പ്രസംഗിച്ചു.

ഭിന്നശേഷി കലോത്സവം

പന്തളം: പന്തളം തെക്കേക്കര ഗ്രാമപഞ്ചായത്ത് ഭിന്നശേഷി കലോത്സവം സമഭാവന-2025 നടത്തി. ഗ്രാമപഞ്ചായത്തിലെ ഭിന്നശേഷി കുട്ടികളുടെ കലാപരമായ കഴിവിനെ പ്രോത്സാഹിപ്പിക്കുന്നതിനാണ് പഞ്ചായത്ത് ജനകീയാസൂത്രണ പദ്ധതിയിൽ ഉൾപ്പെടുത്തി തട്ട ഗവൺമെന്‍റ് എൽപി സ്കൂളിൽ നടത്തിയ കലോത്സവം ഗ്രാമപഞ്ചായത്ത് പ്രസിഡന്‍റ് എസ്. രാജേന്ദ്രപ്രസാദ് ഉദ്ഘാടനം ചെയ്തു. കലാപരിപാടികളുടെ ഉദ്ഘാടനം ഭിന്നശേഷിക്കാരനായ സിനിമാ സംവിധായകൻ രാഗേഷ് കൃഷ്ണൻ നിർവഹിച്ചു. വൈസ് പ്രസിഡന്‍റ് റാഹേൽ, സ്റ്റാൻഡിംഗ് കമ്മറ്റി ചെയർമാൻമാരായ പ്രിയാ ജ്യോതികുമാർ, എൻ. കെ. ശ്രീകുമാർ അംഗങ്ങളായ ശ്രീവിദ്യ, പൊന്നമ്മ വർഗീസ്,ഐസിഡിഎസ്, സി ഡി എസ് സൂപ്പർവൈസർ സബിത, അങ്കണവാടി വർക്കർമാർ , കുട്ടികൾ രക്ഷകർത്താക്കൾ എന്നിവർ പങ്കെടുത്തു.150തിൽ പരം ഭിന്നശേഷികുട്ടികൾ പങ്കെടുത്തു. പരിമിതികളെ മറികടന്നുള്ള കലാപരിപാടികളാണ് അവതരിപ്പിച്ചത്.

‘ജീവിതോത്സവം’ സമാപിച്ചു

റാന്നി: നാഷണൽ സർവീസ് സ്കീം റാന്നി എംഎസ് ഹയർ സെക്കൻഡറി സ്കൂൾ വിദ്യാർഥികൾ നടത്തിവന്ന 21 ദിവസത്തെ ജീവിതോത്സവം പദ്ധതിയുടെ സമാപനത്തോടനുബന്ധിച്ച് റാന്നി പെരുമ്പുഴ ബസ് സ്റ്റാൻഡിൽ ലഹരിവിരുദ്ധ പൊതുസമ്മേളനവും കലാസദസും നടത്തി. റാന്നി ഗ്രാമപഞ്ചായത്ത് പ്രസിഡന്‍റ് കെ. ആർ. പ്രകാശ് സമാപന സമ്മേളനം ഉദ്ഘാടനം ചെയ്തു. സ്കൂൾ പ്രിൻസിപ്പൽ സ്മിജു ജേക്കബ് അധ്യക്ഷത വഹിച്ചു. സ്കൂൾ മാനേജർ കെ.സി. ജേക്കബ് മുഖ്യസന്ദേശം നൽകി. ഗ്രാമപഞ്ചായത്ത് മെംബർ സന്ധ്യാദേവി, പ്രോഗ്രാം ഓഫീസർ സ്മിതാ സ്കറിയ, സ്കൂൾ പ്രൊട്ടക്ഷൻ ഗ്രൂപ്പ് അംഗം രവി കുന്നക്കാട്ട്, ഡോ. ജെബു ജോസഫ് എന്നിവർ പ്രസംഗിച്ചു. സമാപന സമ്മേളനത്തിന്‍റെ ഭാഗമായി വിദ്യാർഥികളുടെ നേതൃത്വത്തിൽ ലഹരിവിരുദ്ധ സന്ദേശം നൃത്തശില്പം, തുടി, ഫ്ലാഷ് മോബ്, കവിതാലാപനം, കലാസദസ് തുടങ്ങിയവ നടത്തി. കൗമാരക്കാരായ ഹയർസെക്കൻഡറി വിദ്യാർഥികൾക്ക് ഏറ്റെടുത്ത് നടപ്പാക്കാൻ കഴിയുന്ന തുടർച്ചയായ 21 ദിവസത്തെ ചലഞ്ചുകൾ നൽകി അവരുടെ സർഗശേഷിയും ഊർജവും ആധുനിക ജനാധിപത്യ സമൂഹങ്ങൾക്ക് അനുഗുണമാം വിധം വ്യക്തിത്വത്തെ സ്ഫുടം ചെയ്തെടുക്കുക എന്നതു ലക്ഷ്യമിട്ടാണ് 21 ദിവസം നീണ്ടുനിന്ന ജീവിതോത്സവം പദ്ധതി നടപ്പാക്കിയത്.

ആശാ പ്രവര്‍ത്തകയുടെ വീട് കേരള കോണ്‍ഗ്രസ് നേതാക്കള്‍ സന്ദര്‍ശിച്ചു

മല്ലപ്പള്ളി: വീട്ടില്‍ കയറി പോലീസുകാരന്‍റെ ഭാര്യ നടത്തിയ കവര്‍ച്ചാശ്രമത്തിനിടെ പൊള്ളലേറ്റു മരിച്ച ആശാപ്രവര്‍ത്തക പി.കെ. ലതാകുമാരിയുടെ ഭവനം കേരള കോണ്‍ഗ്രസ് നേതാക്കള്‍ സന്ദര്‍ശിച്ചു. വൈസ് ചെയര്‍മാന്‍ ജോസഫ് എം. പുതുശേരി, സീനിയര്‍ ജനറല്‍ സെകട്ടറി കുഞ്ഞുകോശി പോൾ, ഉന്നതാധികാര സമിതി അംഗം ജോണ്‍സണ്‍ കുര്യൻ, മണ്ഡലം പ്രസിഡന്‍റ് ടി.എസ്. ചന്ദ്രശേഖരന്‍ നായര്‍, ട്രഷറര്‍ ജോണ്‍സണ്‍ ജേക്കബ് കല്ലുറുമ്പിൽ, വാര്‍ഡ് പ്രസിഡന്‍റ് അനീഷ് ടി.ജേക്കബ് എന്നിവരാണ് ഭവനത്തിലെത്തി ഭര്‍ത്താവ് പുളിമല രാമന്‍ കുട്ടിയെയും മകള്‍ താരയെയും സന്ദര്‍ശിച്ചത്. കത്തിക്കരിഞ്ഞ മുറിയും ചുറ്റുപാടുകളും അവര്‍ കാണിച്ചു കൊടുത്തു. മനസാക്ഷി തൊട്ടുതീണ്ടിയിട്ടില്ലാത്ത നിഷ്ഠൂരയായ പ്രതിക്ക് പരമാവധിശിക്ഷ ഉറപ്പാക്കണമെന്ന് നേതാക്കള്‍ ആവശ്യപ്പെട്ടു.

ഇരവിപേരൂര്‍ വികസന സദസ്; ഉദ്ഘാടനത്തിനു മന്ത്രി വന്നില്ല, മുതിര്‍ന്ന തൊഴിലുറപ്പ് അംഗം ഉദ്ഘാടകയായി

ഇരവിപേരൂർ: ഗ്രാമപഞ്ചായത്തിന്‍റെ വികസന സദസില്‍ മന്ത്രി വീണാ ജോര്‍ജ് എത്താതിരുന്നതിനേതുടര്‍ന്ന് ഗ്രാമപഞ്ചായത്തിലെ മുതിര്‍ന്ന തൊഴിലുറപ്പ് അംഗമായ ചിന്നമ്മ കേശവന്‍ ഉദ്ഘാടകയായി. വള്ളംകുളം യാഹിര്‍ ഓഡിറ്റോറിയത്തില്‍ ഗ്രാമപഞ്ചായത്ത് പ്രസിഡന്‍റ് കെ.ബി. ശശിധരന്‍ പിള്ളയുടെ അധ്യക്ഷതയില്‍ നടന്ന വികസന സദസാണ് തൊഴിലുറപ്പ് പദ്ധതിയിലെ പഞ്ചായത്തിലെ ആദ്യത്തേതും മുതിര്‍ന്ന അംഗവുമായ ചിന്നമ്മ കേശവന്‍ ഉദ്ഘാടനം ചെയ്തത്. മന്ത്രി വീണാ ജോര്‍ജിനെയാണ് ഉദ്ഘാടകയായി നിശ്ചയിച്ചിരുന്നത്. എന്നാല്‍ മന്ത്രി പരിപാടിക്ക് എത്തിയില്ല. ഇതോടെയാണ് സിപിഎം ഭരണത്തിലുള്ള പഞ്ചായത്ത് ഭരണസമിതി തൊഴിലുറപ്പ് അംഗത്തെ വേദിയിലേക്ക് ക്ഷണിച്ചത്. ഇരവിപേരൂര്‍ ഗ്രാമപഞ്ചായത്തില്‍ കഴിഞ്ഞ അഞ്ചു വര്‍ഷം നടത്തിയ വികസന പ്രവര്‍ത്തന റിപ്പോര്‍ട്ട് പഞ്ചായത്ത് പ്രസിഡന്‍റ് അവതരിപ്പിച്ചു. പഞ്ചായത്തിന്‍റെ ഭാവി വികസനത്തിന് നടപ്പാക്കേണ്ട പദ്ധതികളെക്കുറിച്ച് നിര്‍ദേശങ്ങളും അഭിപ്രായങ്ങളും യോഗത്തില്‍ ഉയര്‍ന്നു. വിവിധ മേഖലകളില്‍ പ്രാവീണ്യം നേടിയ വ്യക്തികളെ ആദരിച്ചു. സംസ്ഥാന ആസൂത്രണ സമിതി അംഗം ഡോ. വര്‍ഗീസ് ജോര്‍ജ്, ജില്ലാ പഞ്ചായത്ത് ക്ഷേമകാര്യ സ്ഥിരം സമിതി അധ്യക്ഷന്‍ ജിജി മാത്യു, ഗ്രാമ പഞ്ചായത്ത് വൈസ് പ്രസിഡന്‍റ് സാലി ജേക്കബ്,അംഗങ്ങളായ പ്രിയ വര്‍ഗീസ്, അമ്മിണി ചാക്കോ, കെ കെ വിജയമ്മ, അമിത രാജേഷ്, ആര്‍ ജയശ്രീ, ത്യേസമ്മ കുരുവിള, സെക്രട്ടറി എസ്.എ മനീഷ്, ഉദ്യോഗസ്ഥർ, കുടുംബശ്രീ, ഹരിതകര്‍മ സേനാംഗങ്ങള്‍ തുടങ്ങിയവര്‍ പങ്കെടുത്തു.

ഫിറ്റ്നസ് സെന്‍ററിന്‍റെ മറവിൽ മയക്കുമരുന്ന് കച്ചവടം: ഉടമ അറസ്റ്റിൽ

ചാരുംമൂട്: ഫിറ്റ്നസ് സെന്‍ററിന്‍റെ മറവിൽ മയക്കുമരുന്ന് കച്ചവടം നടത്തിവന്ന ഉടമ അറസ്റ്റിൽ. നൂറനാട് പാലമേൽ കൈലാസം വീട്ടിൽ അഖിൽ ജി. നാഥ് (31) ആണ് പിടിയിലായത്. ഇയാളുടെ വീട്ടിലെ കിടപ്പുമുറിയിൽനിന്ന് 48 ഗ്രാം എംഡിഎംഎ ജില്ലാ ലഹരിവിരുദ്ധ സ്ക്വാഡും നുറനാട് പോലീസും ചേർന്ന് കണ്ടെടുത്തു. നൂറനാട് പടനിലത്ത് ഫിറ്റ്നസ് സെന്‍റർ നടത്തുകയാണ് അഖിൽ നാഥ്. രണ്ടുമാസം മുമ്പ് ഇയാളുടെ ഫിറ്റ്നസ് സെന്‍റർ ട്രെയിനറായിരുന്ന കിരണിനെ ജില്ലാ ലഹരി വിരുദ്ധ സ്ക്വാഡും നുറനാട് പോലീസും ചേർന്ന് പിടികുടിയിരുന്നു. ഇതേതുടർന്ന് ജില്ലാ ലഹരിവിരുദ്ധ സ്ക്വാഡിന്‍റെ നിരീക്ഷണത്തിലായിരുന്നു അഖിൽ ജി. നാഥ്. ബംഗളൂരുവിൽനിന്നു എംഡിഎംഐ വാങ്ങി നൽകുന്ന നൂറനാട് പടനിലം പറ്റൂർ സ്വദേശി ബിനുരാജിനെയും നൂറനാട് പോലീസ് കസ്റ്റഡിയിലെടുത്തിട്ടുണ്ട്. ഫിറ്റ്നസ് സെന്‍ററിൽ എത്തുന്ന യുവാക്കളെയും യുവതികളെയും രാസലഹരി പോലുള്ള മയക്കുമരുന്ന് കൊടുത്ത് ഫിറ്റ്നസിന് ഇത് ആവശ്യമാണെന്ന് വരുത്തി വൻതോതിൽ രാസലഹരി കച്ചവടമാണ് ഇയാൾ സെന്‍ററിന്‍റെ മറവിൽ നടത്തി വന്നിരുന്നതെന്ന് പോലീസ് കണ്ടെത്തി. ഫിറ്റ്നസ് സെന്‍ററിൽ സ്ഥിരം പോയിരുന്ന ചില യുവാക്കൾ മയക്കുമരുന്ന് ഉപയോഗിച്ച് നുറനാട്ടുള്ള ലഹരിവിമുക്ത കേന്ദ്രത്തിൽ ചികിത്സതേടിയതായും പോലീസിന് വിവരം ലഭിച്ചു. ലഹരി ഉപയോഗിക്കുന്നതിന് പ്രത്യേകം പാർട്ടി ഇയാൾ നടത്തിയിരുന്നതായി പോലീസ് പറയുന്നു. ഓപ്പറേഷൻ ഡി ഹണ്ടിന്‍റെ ഭാഗമായി ജില്ലാ പോലീസ് മേധവി എം.പി. മോഹനചന്ദ്രന്‍റെ മേൽനോട്ടത്തിൽ നർക്കോട്ടിക് സെൽ ഡിവൈഎസ്പി ബി. പങ്കജാക്ഷന്‍റെ നേതൃത്യത്തിലുള്ള ജില്ലാ ലഹരിവിരുദ്ധ സ്ക്വാഡും ചെങ്ങന്നൂർ ഡിവൈഎസ് പി എം.കെ. ബിനുകുമാറിന്‍റെ നേതൃത്വത്തിൽ നൂറനാട് സിഐ ശശികുമാർ, എസ് ഐ ശ്രീജിത്ത്, ഗ്രേഡ് എഎസ്ഐ സിനു വർഗീസ്, സിപിഒ കലേഷ്, വിഷ്ണു, രജനി, ജഗദിഷ് എന്നിവരുടെ സംഘമാണ് പ്രതിയെ പിടികൂടിയത്.

പുല്ലാട് ഉപജില്ലാ സ്‌കൂള്‍ ശാസ്ത്രമേള

കോഴഞ്ചേരി: പുല്ലാട് ഉപജില്ലാ സ്‌കൂള്‍ ശാസ്ത്രമേള കുമ്പനാട് നോയല്‍ മെമ്മോറിയല്‍ ഹൈസ്കൂൾ, ബ്രദറണ്‍ ഇംഗ്ലീഷ് മീഡിയം ഹൈ സ്‌കൂള്‍, കുമ്പനാട് ഗവ. യുപി സ്‌കൂള്‍ എന്നിവിടങ്ങളിലായി നടന്നു. നോയല്‍ മെമ്മോറിയല്‍ ഹൈസ്‌കൂളില്‍ നടന്ന സമ്മേളനത്തില്‍ കോയിപ്രം ഗ്രാമപഞ്ചായത്ത് പ്രസിഡന്‍റ് കെ. സുജാത അധ്യക്ഷത വഹിച്ചു. കോയിപ്രം ബ്ലോക്ക് പഞ്ചായത്ത് പ്രസിഡന്‍റ് സൂസന്‍ ഫിലിപ്പ് ഉദ്ഘാടനം ചെയ്തു. ബ്ലോക്ക് പഞ്ചായത്ത് അംഗം എല്‍സ തോമസ്, പുല്ലാട് ഉപജില്ലാ വിദ്യാഭ്യാസ ഓഫീസര്‍ എം.എസ്. രാജശ്രീ, ജനറല്‍ കണ്‍വീനര്‍ ഗ്ലോസി പി. ജോയ്, എച്ച്എം ഫോറം കണ്‍വീനര്‍ തോമസ് മാത്യു, സി. കെ. ചന്ദ്രന്‍ എന്നിവര്‍ പ്രസംഗിച്ചു.

സ്‌കൂള്‍ കെട്ടിടങ്ങളുടെ പുനരുദ്ധാരണത്തിന് രണ്ടു കോടി

റാന്നി: നിയോജകമണ്ഡലത്തിലെ മൂന്ന് സ്‌കൂളുകള്‍ പുനരുദ്ധരിക്കുന്നതിനായി രണ്ടു കോടി രൂപ അനുവദിച്ചതായി പ്രമോദ് നാരായണ്‍ എംഎല്‍എ അറിയിച്ചു. കുടമുരുട്ടി ഗവ യുപി സ്‌കൂള്‍ ഒരു കോടി, കുന്നം ഗവ എല്‍പി സ്‌കൂള്‍ 50 ലക്ഷം, കീക്കൊഴൂര്‍ ഗവ എല്‍പി സ്‌കൂള്‍ 50 ലക്ഷം എന്നിങ്ങനെയാണ് ഫണ്ട് അനുവദിച്ചിരിക്കുന്നത്. തുടര്‍ നടപടികള്‍ പൂര്‍ത്തീകരിച്ച് കെട്ടിടങ്ങളുടെ നിര്‍മാണം പഞ്ചായത്ത് തെരഞ്ഞെടുപ്പിന് മുമ്പ് ടെന്‍ഡര്‍ ചെയ്യാന്‍ നടപടി സ്വീകരിച്ചതായി എംഎല്‍എ പറഞ്ഞു.

നൂറ്റെട്ടിലെത്തിയ തേയിലച്ചെടി; ബ്രിട്ടീഷ് കാലഘട്ടത്തിന്‍റെ സ്മരണ

ജഗീഷ് ബാബു ‌കോന്നി: ബ്രിട്ടീഷ് വാഴ്ചയുടെ കാലത്തെ സ്മരണകളില്‍ നൂറ്റാണ്ടിന്‍റെ കഥകള്‍ കേട്ടറിഞ്ഞ തേയിലച്ചെടി. മലയാലപ്പുഴ പഞ്ചായത്ത് പരിധിയില്‍ കുമ്പഴ എസ്റ്റേറ്റിലെ ഹാരിസണ്‍ മലയാളം പ്ലാന്‍റേഷന്‍സ് ഓഫീസിന് മുന്നില്‍ നില്‍ക്കുന്ന തേയിലച്ചെടിക്കാണ് 108 വര്‍ഷത്തെ കഥകളുള്ളത്. 1917-ല്‍ ബ്രിട്ടീഷുകാരായ എസ്റ്റേറ്റ് മാനേജര്‍മാര്‍ തേയിലത്തോട്ടങ്ങള്‍ സ്ഥാപിച്ചപ്പോൾ, ഔദ്യോഗികമായ തുടക്കം ചാര്‍ത്തിയത് ഈ തേയിലച്ചെടിയിലൂടെയായിരുന്നുവെന്നാണ് ചരിത്ര രേഖ. വര്‍ഷങ്ങള്‍ക്കു മുമ്പ് മഞ്ഞും തണുപ്പും നിറഞ്ഞ കിഴക്കന്‍ മലഞ്ചെരിവുകളെ തേയില കൃഷിക്ക് അനുയോജ്യമായതാക്കിയ കാലത്ത് ആയിരക്കണക്കിന് ചെടികള്‍ ഇവിടെ നട്ടുപിടിപ്പിച്ചിരുന്നു. എന്നാല്‍ ഇതില്‍ ഇന്നിപ്പോള്‍ നിലനില്‍ക്കുന്നത് ഈ ഒറ്റ ചെടി മാത്രമാണ്. തേയിലത്തോട്ടം ഇല്ലാതായെങ്കിലും ഓഫീസിനു മുമ്പിലെ ഒരു ചെടി സംരക്ഷിച്ചുവരികയാണ് തോട്ടം കമ്പനി. കുമ്പഴ മുതല്‍ ലണ്ടന്‍ വരെ 150 വര്‍ഷങ്ങള്‍ക്കു മുമ്പ്, ചെങ്ങന്നൂര്‍ ആസ്ഥാനമായ വഞ്ചിപ്പുഴ മഠത്തിന്‍റെ ഉടമസ്ഥതയിലായിരുന്ന 1100 ഹെക്ടര്‍ സ്ഥലമാണ് പിന്നീട് ബ്രിട്ടീഷുകാരുടെ കൈവശം എത്തിയത്. കണ്ടത്തില്‍ വര്‍ഗീസ് മാപ്പിളയും മറ്റ് മൂന്നുപേരും ഈ ഭൂമി 30,000 രൂപ പാട്ടത്തിനു വാങ്ങി കൃഷിയാരംഭിച്ചു. 1919 ല്‍ ഇത് വര്‍ഷം 1.30 ലക്ഷം രൂപയ്ക്ക് ലണ്ടന്‍ ആസ്ഥാനമായ റബര്‍ പ്രൊഡ്യൂസിംഗ് കമ്പനിയിലേക്ക് മേല്‍പാട്ടമായി.1923-ഓടെ ഇവിടത്തെ എല്ലാ ബ്രിട്ടീഷ് ഉടമസ്ഥതകളും ഹാരിസണ്‍ മലയാളം യുകെ ഹോള്‍ഡിംഗ്‌സ് ലിമിറ്റഡിന്‍റെ ഭാഗമാക്കുകയും ചെയ്തു. ബ്രിട്ടീഷുകാരായ മാനേജര്‍മാരുടെ നേതൃത്വത്തില്‍ തേയില ഉത്പാദനം ഭംഗിയായി നടന്നു. തേയില റബറിന് വഴിമാറി ശൈത്യം നിറഞ്ഞ കാലാവസ്ഥയുള്ളതിനാലാണ് തേയിലക്കൃഷിക്ക് കുമ്പഴ എസ്റ്റേറ്റില്‍ അനുകൂല സാഹചര്യമുണ്ടായിരുന്നത്. തണുപ്പ് കുറയുകയും കാലാവസ്ഥാവ്യതിയാനങ്ങള്‍ പ്രത്യക്ഷപ്പെടുകയും ചെയ്തതോടെ 1980കളില്‍ കുമ്പഴയിലെ തേയിലക്കൃഷി പൂര്‍ണമായി റബര്‍ കൃഷിയിലേക്ക് വഴിമാറി. ഒരു കാലത്ത് ഇന്ത്യയുടെ വിവിധ ഭാഗങ്ങളില്‍ നിന്നുമുള്ള തൊഴിലാളികള്‍ തമിഴ്നാട്, കര്‍ണാടക ഉള്‍പ്പെടെ ഇവിടെ എത്തി തേയില തോട്ടങ്ങളിൽ‍ പണി ചെയ്തു. തേയില സംസ്‌കരണത്തിനു ഫാക്ടറികളുമുണ്ടായി. ഇംഗ്ലണ്ടില്‍നിന്ന് ഇറക്കുമതി ചെയ്ത യന്ത്രങ്ങളിലൂടെയായിരുന്നു സംസ്‌കരണം. കപ്പല്‍ മാർഗം തേയില ലണ്ടനിലേക്കും കയറ്റുമതി ചെയ്തിരുന്നു. ഗുണമേന്മ ഏറിയ തേയിലയാണ് കുമ്പഴയില്‍ ഉത്പാദനം നടത്തിയിരുന്നതെന്ന് പഴമക്കാര്‍ അനുസ്മരിക്കുന്നു. കുമ്പഴ എസ്റ്റേറ്റിലും പരിസരങ്ങളിലും വിവിധ ദേശങ്ങളില്‍ നിന്നുള്ളവരുടെ താമസസ്ഥലങ്ങളൊരുങ്ങി. തമിഴ് മീഡിയം സ്‌കൂള്‍ അടക്കം ഇവര്‍ക്കായി ആരംഭിച്ചു. സ്വകാര്യ മേഖലയിലും ഇത്തരം ധാരാളം തേയില കൃഷി തോട്ടങ്ങളും ഫാക്ടറികളും കോന്നിയില്‍ പ്രവര്‍ത്തിച്ചിരുന്നതായി തേയിലശേരിയില്‍ ജോര്‍ജ് വര്‍ഗീസ് പറഞ്ഞു. ഉട്ടുപ്പാറ, കല്ലേലി ഉള്‍പ്പെടെ പല ഭാഗങ്ങളില്‍ ഇന്നും അവയുടെ ശേഷിപ്പുകള്‍ കാണാം. പോയ കാലത്തിന്‍റെ അവശേഷിപ്പുകളായ ഇത്തരം പച്ചക്കിരണങ്ങള്‍ സംരക്ഷിക്കപ്പെടേണ്ടതാണെങ്കിലും കുമ്പഴ എസ്റ്റേറ്റിലെ ഏക തേയിലച്ചെടി മാത്രമാണ് ഇന്നും ചരിത്രം ഓര്‍മപ്പെടുത്തിയുള്ളത്.

മാസ്റ്റേഴ്സ് അക്വാട്ടിക് മീറ്റ്: തൃശൂരിന് ഓവറോള്‍ കിരീടം

തിരുവല്ല: പത്തനംതിട്ട ജില്ലാ അക്വാട്ടിക് അസോസിയേഷന്‍റെ ആഭിമുഖ്യത്തില്‍ തിരുവല്ലയിലെ ബിലീവേഴ്സ് റസിഡന്‍ഷല്‍ സ്‌കൂള്‍ നീന്തല്‍ക്കുളത്തില്‍ നടന്ന പതിനാലാമത് ഓള്‍ കേരള മാസ്റ്റേഴ്സ് അക്വാട്ടിക് ചാമ്പ്യന്‍ഷിപ്പില്‍ 1580 പോയിന്‍റുമായി തൃശൂര്‍ ഓവറോള്‍ കിരീടം നേടി. കോട്ടയം 801 പോയിന്‍റുമായി രണ്ടാം സ്ഥാനവും ആലപ്പുഴ 424 പോയിന്‍റുമായി മൂന്നാം സ്ഥാനത്തും തിരുവനന്തപുരം നാലാം സ്ഥാനവും നേടി. നവംബറില്‍ ഹൈദരാബാദില്‍ നടക്കുന്ന നാഷണല്‍ മാസ്റ്റേഴ്‌സ് നീന്തല്‍ ചാമ്പ്യന്‍ഷിപ്പിനു മുന്നോടിയായാണ് കേരള അക്വാട്ടിക് അസോസിയേഷന്‍റെ ആഭിമുഖ്യത്തില്‍ ചാമ്പ്യന്‍ഷിപ്പ് സംഘടിപ്പിച്ചത്. വ്യക്തിഗതമായി നാല് സ്വര്‍ണം നേടിയ പതിനെട്ട് മത്സരാര്‍ഥികളില്‍ ഏറ്റവും പ്രായമുള്ളത് തൃശൂര്‍ സ്വദേശിയായ പ്രഫ. മാത്യുവാണ്, പുരുഷന്മാരില്‍ 50 മീറ്റര്‍ ബ്രെസ്റ്റ് സ്ട്രോക്ക്, ബട്ടര്‍ഫ്‌ളൈ സ്ട്രോക്ക്, ബാക്ക് സ്ട്രോക്ക്, ഫ്രീ സ്‌റ്റൈല്‍ എന്നിവയില്‍ വിജയിച്ച 92 വയസുള്ള പ്രഫ മാത്യു, തുടര്‍ന്ന് 90 വയസില്‍ താഴെയുള്ള വിഭാഗത്തില്‍ വി. ജി. സുബ്രഹ്‌മണ്യന്‍ (തൃശൂർ), 85 വയസില്‍ താഴെയുള്ള വിഭാഗത്തില്‍ കോട്ടയത്ത് നിന്നുള്ള പ്രഫ. കെ. സി. സെബാസ്റ്റ്യൻ, ടോമി മാത്യു, 80 വയസില്‍ താഴെയുള്ള വിഭാഗത്തില്‍ എൻ. കുട്ടപ്പന്‍ നായര്‍ (തിരുവന്തപുരം), 70 വയസില്‍ താഴെയുള്ള വിഭാഗത്തില്‍ ജഗജീവ് ഗോപിനാഥന്‍ (കോട്ടയം). മണികണ്ഠന്‍ (തൃശൂര്‍ ) 40 വയസിനു താഴെ മനീഷ് ടി മോഹന്‍ (തിരുവന്തപുരം), 35 വയസിനു താഴെ എം.ദിരന്‍ (തൃശൂർ), 30 വയസിനു താഴെ ഡി. ദിജീഷ് (തൃശൂർ) എന്നിവരാണ് വ്യക്തിഗത ചാമ്പ്യന്‍ഷിപ്പിന് അര്‍ഹരായത്. വനിതകളില്‍ നാലു സ്വര്‍ണം നേടിയവര്‍ , 75 വയസില്‍ താഴെയുള്ളവരില്‍ കോട്ടയത്തിന്‍റെ ഉമ ശ്രീധര്‍, 60 വയസില്‍ താഴെ പി.എം. സുശീല, 50 വയസില്‍ താഴെ ഐ.വി. ഷിജിനി (കൊല്ലം), സരിത പ്രസാദ് (തൃശൂർ), 55 ല്‍ താഴെ എം. സുധീഷ്ന (കോട്ടയം) , പ്രേമകുമാരി (തൃശൂർ) 50 ല്‍ താഴെ ഷിജിനി (കൊല്ലം), 40ല്‍ താഴെ പ്രേമകുമാരി (തൃശൂർ) 35ല്‍ താഴെ സി. രാജേശ്വരി (തൃശൂർ), 30ല്‍ താഴെ കെ. അശ്വതി (ആലപ്പുഴ). കേരള അക്വാട്ടിക് അസോസിയേഷന്‍ പ്രസിഡന്‍റ് എസ് രാജീവ് അധ്യക്ഷത വഹിച്ച ചടങ്ങില്‍ മാത്യു ടി. തോമസ് എംഎല്‍എ ട്രോഫികളും മെമന്‍റെോകളും വിതരണം ചെയ്തു. പത്തനംതിട്ട ഒളിമ്പിക് അസോസിയേഷന്‍ പ്രസിഡന്‍റ് പ്രകാശ് ബാബു സ്വാഗതവും അക്വാട്ടിക് അസോസിയേഷന്‍ സെക്രടടറി നിഖില്‍ നന്ദിയും പറഞ്ഞു. പത്തനംതിട്ട ഒളിമ്പിക് അസോസിയേഷന്‍ പ്രസിഡന്‍റ് കോശി തോമസ്, പ്രിന്‍സിപ്പല്‍ ബിലീവേഴ്‌സ് റെസിഡന്‍ഷല്‍ സ്‌കൂൾ,പ്രിന്‍സിപ്പല്‍ ഷേര്‍ലി, ഫുട്‌ബോള്‍ അസോസിയേഷന്‍ പ്രസിഡന്‍റ് റെജിനോള്‍ഡ് വര്‍ഗീസ്, കേരള അക്വാട്ടിക് അസോസിയേഷന്‍ സെക്രട്ടറി ടി.എസ്. മുരളീധരന്‍, പത്തനംതിട്ട അക്വാട്ടിക് അസോസിയേഷന്‍ വൈസ് പ്രെസിഡന്‍റുമാരായ കെ. സി. ജേക്കബ്, ജെറി, കോശി കുര്യൻ, മോഹന്‍ വർഗീസ് തുടങ്ങിയവര്‍ പ്രസംഗിച്ചു.

അമൃത് 2.ഒ കുടിവെള്ള പദ്ധതി: നാലാംഘട്ടത്തിനു കരാറായി

പത്തനംതിട്ട: ജില്ലാ ആസ്ഥാനത്തെ ആദ്യ സമ്പൂര്‍ണ കുടിവെള്ള പദ്ധതിയായ അമൃത് 2.ഒയുടെ നാലാം ഘട്ടമായ ഉയര്‍ന്ന പ്രദേശങ്ങളില്‍ കുടിവെള്ളം എത്തിക്കുന്ന പദ്ധതിക്കു കരാറായി. നഗരത്തിലെ എല്ലാ വീടുകളിലും ശുദ്ധജലം എത്തിക്കുന്ന പദ്ധതിയാണ് അമൃത്. കേന്ദ്ര സംസ്ഥാന സര്‍ക്കാരുകളുടെ സഹായത്തോടെ നഗരസഭ ഫണ്ട് കൂടി വിനിയോഗിച്ചാണ് നടപ്പാക്കുന്നത്. നഗരത്തിലെ പരുവപ്ലാക്കല്‍, ‌പൂവമ്പാറ, വഞ്ചികപൊയ്ക എന്നീ ഉയര്‍ന്ന പ്രദേശങ്ങളില്‍ ജലസംഭരണികള്‍ നിര്‍മിച്ചു ബൂസ്റ്റര്‍ സംവിധാനം ഒരുക്കുന്ന 8.70 കോടി രൂപയുടെ ടെന്‍ഡറിന് കഴിഞ്ഞ 15ന് ജലഅഥോറിറ്റി സതേണ്‍ മേഖല ചീഫ് എന്‍ജിനിയര്‍ അംഗീകാരം നല്‍കി. ആദ്യ രണ്ടുഘട്ടങ്ങളിലായി ഇന്‍ ടേക്ക് കിണറിന്‍റെ നവീകരണവും കളക്‌ഷന്‍ ചേമ്പര്‍ നിര്‍മാണവും പൂര്‍ത്തിയായി. 3.5 കോടി രൂപ വിനിയോഗിച്ച് പൈപ്പ് ലൈനുകള്‍ സ്ഥാപിക്കുന്ന ജോലിയും പൂര്‍ത്തിയായി. ജില്ലാ ആസ്ഥാനത്തെ ആദ്യ സമ്പൂര്‍ണ കുടിവെള്ള പദ്ധതി പ്രതിദിനം 10 ദശലക്ഷം ലിറ്റര്‍ വെള്ളം ശുദ്ധീകരിച്ചു വിതരണം ചെയ്യാന്‍ കഴിയുന്ന പ്ലാന്‍റിന്‍റെ നിര്‍മാണ പ്രവര്‍ത്തനങ്ങള്‍ക്കും തുടക്കം കുറിച്ചു. അമൃത് പദ്ധതി പൂര്‍ത്തിയാകുന്നതോടെ നഗരത്തിലെ കുടിവെള്ള പ്രശ്നത്തിനു ശാശ്വത പരിഹാരമാകും. സമയബന്ധിതമായി പ്രവര്‍ത്തനം പൂര്‍ത്തീകരിക്കാന്‍ കരാര്‍ എടുത്ത സ്ഥാപനവുമായി ചര്‍ച്ച നടത്തിയതായും നിര്‍മാണോദ്ഘാടനം 27ന് നടത്തുമെന്നും നഗരസഭാ ചെയര്‍മാന്‍ ടി.സക്കീര്‍ ഹുസൈന്‍ പറഞ്ഞു. പ്രധാന ജലസ്രോതസായ അച്ചന്‍കോവിലാറ്റില്‍ ഭാവിയില്‍ ഉണ്ടാകാന്‍ ഇടയുള്ള ജലദൗര്‍ലഭ്യംകൂടി കണക്കിലെടുത്ത് മണിയാര്‍ ഡാമില്‍നിന്നു വെള്ളം എത്തിക്കാനുള്ള പദ്ധതിയും നഗരസഭ സംസ്ഥാന സര്‍ക്കാരിനു സമര്‍പ്പിച്ചിട്ടുണ്ടെന്നു ചെയര്‍മാന്‍ പറഞ്ഞു.

വയലാര്‍ അനുസ്മരണം

പത്തനംതിട്ട: നന്മ സാംസ്‌കാരിക സമന്വയം ഒരുക്കിയ വയലാര്‍ അനുസ്മരണവും കവിത - ചലച്ചിത്ര ഗാനാലാപന മത്സരവും കവി ശ്രീകൃഷ്ണദാസ് മാത്തൂര്‍ ഉദ്ഘാടനം ചെയ്തു. ഡയറക്ടര്‍ മിനി മറിയം സഖറിയ അധ്യക്ഷത വഹിച്ചു. ഫാ. ലിജോ ടി.ജോസഫ്, എം.വി. ബീന, ജയ പ്രദീപ്, ഷേബ ഡേന സൈമൺ, റെജി മലയാലപ്പുഴ. ഫ്രെഡി ഉമ്മൻ, സുനില്‍കുമാര്‍, ജി. ബെറ്റിന ഗ്രേസ്, ജി.എസ്. വൈഷ്ണവി ജി.എസ്. എന്നിവര്‍ പ്രസംഗിച്ചു. ഡോ.ശ്രീകാന്ത് കടിയക്കോലിന്‍റെ അധ്യക്ഷതയില്‍ ചേര്‍ന്ന സമാപന സമ്മേളനത്തില്‍ ബിനി സാം, റിജോ ജോണ്‍ ശങ്കരത്തിൽ, എം.എം. ജോസഫ് എന്നിവര്‍ സമ്മാനങ്ങള്‍ വിതരണം ചെയ്തു.

പന്തളം ഉപജില്ലാ സ്‌കൂള്‍ ശാസ്‌ത്രോത്സവം

പന്തളം: ഉപജില്ലാ സ്‌കൂള്‍ ശാസ്‌ത്രോത്സവം തോട്ടക്കോണം ഗവ.ഹയര്‍ സെക്കൻഡറി സ്‌കൂള്‍, തോട്ടക്കോണം ഗവ.എല്‍പി സ്‌കൂള്‍ എന്നിവിടങ്ങളിലായി നടന്നു. പന്തളം ഉപജില്ലയിലെ 39 സ്‌കൂളുകളിലെ വിദ്യാര്‍ഥി പ്രതിഭകളാണ് ശാസ്‌ത്രോത്സവത്തില്‍ പങ്കെടുത്തത്. ശാസ്‌ത്രോത്സവത്തിന്‍റെ ഉദ്ഘാടനം പന്തളം ബ്ലോക്ക് പഞ്ചായത്ത് പ്രസിഡന്‍റ് ബി എസ് അനീഷ് മോന്‍ നിര്‍വഹിച്ചു.തുമ്പമണ്‍ ഗ്രാമ പഞ്ചായത്ത് പ്രസിഡന്‍റ് റോണി സഖറിയ അധ്യക്ഷത വഹിച്ചു. പന്തളം തെക്കേക്കര ഗ്രാമ പഞ്ചായത്ത് പ്രസിഡന്‍റ് എസ് രാജേന്ദ്രപ്രസാദ് മുഖ്യാതിഥി ആയിരുന്നു. പന്തളം നഗരസഭ വിദ്യാഭ്യാസ സ്ഥിരം സമിതി അധ്യക്ഷ സൗമ്യ സന്തോഷ് ശാസ്‌ത്രോത്സവ ലോഗോ പ്രകാശനം ചെയ്തു. ലോഗോ തയാറാക്കിയ പന്തളം എന്‍എസഎസ് ഗേള്‍സ് ഹൈസ്‌കൂള്‍ വിദ്യാര്‍ഥിനി എച്ച് ഗൗരികൃഷ്ണക്ക് പന്തളം നഗരസഭ വികസനകാര്യ സ്ഥിരം സമിതി അധ്യക്ഷന്‍ ബെന്നി മാത്യൂ ഉപഹാരം നല്കി . പന്തളം നഗരസഭ കൗണ്‍സിലര്‍ കെ. ആർ. വിജയകുമാര്‍, പന്തളം എഇഒ സി. വി. സജീവ്, തോട്ടക്കോണം ജിഎച്ച്എസ്എസ് പിടിഎ പ്രസിഡന്‍റ് കെ. എച്ച്. ഷിജു, എസഎം.സി ചെയര്‍മാന്‍ ജി. അനൂപ് കുമാര്‍ ,സ്‌കൂള്‍ പ്രന്‍സിപ്പല്‍ എന്‍. ഗിരിജ ,പ്രഥമാധ്യാപകന്‍ പി. ഉദയന്‍, എച്ചഎം ഫോറം സെക്രട്ടറി സി. സുദര്‍ശനപിള്ള, ജിഎല്‍പിഎസ് പ്രഥമാധയാപിക ജി. അശ്വത, പിടിഎ പ്രസിഡന്‍റ് ശ്രീജാ ശ്യം എന്നിവര്‍ പ്രസംഗിച്ചു.

ജില്ലാ ശിശുക്ഷേമസമിതിയുടെ പ്രസംഗമത്സരങ്ങള്‍ പൂര്‍ത്തിയായി

പത്തനംതിട്ട: ശിശുദിനാഘോഷത്തിന്‍റെ മുന്നോടിയായി ജില്ലാ ശിശുക്ഷേമസമിതിയുടെ നേതൃത്വത്തിലുള്ള പ്രസംഗമല്‍സരങ്ങള്‍ പൂര്‍ത്തിയായി. പത്തനംതിട്ട കാതോലിക്കേറ്റ് ഹയര്‍ സെക്കന്‍ഡറി സ്‌കൂള്‍ ഹെഡ്മിസ്ട്രസ് പി.എം. ജയമോള്‍ മത്സരം ഉദ്ഘാടനം ചെയ്തു. ജില്ല ശിശുക്ഷേമസമിതി വൈസ് പ്രസിഡന്‍റ് ആര്‍. അജിത്കുമാര്‍ അധ്യക്ഷത വഹിച്ചു. സെക്രട്ടറി ജി. പൊന്നമ്മ, ജോയിന്‍റ് സെക്രട്ടറി സലിം പി. ചാക്കോ, ട്രഷറാര്‍ എ.ജി ദീപു, എസ്. മീരാസാഹിബ്, സി. ആർ. കൃഷ്ണക്കുറുപ്പ്, കലാനിലയം രാമചന്ദ്രന്‍നായർ, രാജന്‍ പടിയറ, ഡോ.കെ.വി. സുരേഷ് തുടങ്ങിയവര്‍ പ്രസംഗിച്ചു. മല്‍സര വിജയികൾ: ഒന്ന്, രണ്ട്, മൂന്ന് സ്ഥാനക്കാര്‍ മലയാളം എല്‍പി: ആർ. ദേവനാഥ് ( പഴകുളം ഗവ യുപി.എസ്), അദിതി അരുണ്‍ ( പൂഴിക്കാട് ഗവ. യുപിഎസ്), ഹൈഫ അരാഫത്ത് (മാങ്കോട് ഗവ. എച്ച്എസ്എസ്). ഇംഗ്ലീഷ് - എല്‍പി: ആർ. വേദരൂപ ( തോട്ടുവ ഗവ. എല്‍.പി.എസ്) , റോണിയ സാറാ റഞ്ചി (കാരംവേലി ഗവ. യു.പി.എസ്), റിഥു റെന്‍ഞ്ചി ( പത്തനംതിട്ട ഭവന്‍സ് വിദ്യാമന്ദിർ). നഴ്‌സറി ( ഇംഗ്ലീഷ് ) പവിത്ര മേഴ്‌സിമാത്യൂ ( റാന്നി കോര്‍ണര്‍ സ്റ്റോണ്‍ - ഒന്നാം സ്ഥാനം ), യുപി - മലയാളം : പാര്‍വതി വിനീത് ( തിരുവല്ല ഡിബിഎച്ച്എസഎസ്), സിയാസുമന്‍ ( പത്തനംതിട്ട എംടിഎച്ച്എസ്എസ്), സായ്കൃഷ്ണാ ( പത്തനംതിട്ട - എംടി എച്ച്എസ് എസ്) . യുപി - ഇഗ്ലീഷ് അഥിന്‍ സൈമണ്‍ സാം ( പത്തനംതിട്ട എംടി എച്ച്എസ്എസ്) , എയിഡ സെറാ ജ്യോതിഷ് ( പത്തനംതിട്ട എംടി എച്ച്എസ്എസ്), എച്ച്. ശീമാധവ് ( പന്തളം എന്‍എസഎസ് ഇംഗ്ലീഷ് മീഡിയം സ്‌കൂൾ) എച്ച്എസ് മലയാളം ജെര്‍മയിന്‍ ബെന്നി ( ഇരുവള്ളിപ്ര സെന്‍റ് തോമസ് എച്ച്എസ്എസ്) , അല്‍ക്ക മേരി ബിജു ( കൊടുമണ്‍ ഹൈസ്‌കൂൾ) , ഗോഡ്‌സ്ണ്‍ ഷിജു ( വെണ്ണിക്കുളം സെന്‍റ് ബഹനാന്‍സ് എച്ച്എസ്എസ്) .

തലയ്ക്ക് അടിച്ചു കൊലപ്പെടുത്താന്‍ ശ്രമിച്ച കേസില്‍ മൂന്നുപേര്‍ അറസ്റ്റില്‍

അടൂർ: ഓട്ടോറിക്ഷ അപകടത്തില്‍പെട്ടത് നന്നാക്കി നല്കാത്തതു ചോദ്യം ചെയ്ത ഉടമയെ കമ്പിവടി കൊണ്ട് തലയ്ക്കടിച്ചു കൊലപ്പെടുത്താന്‍ ശ്രമിച്ച കേസില്‍ രണ്ടുപേര്‍ പിടിയിൽ. ഏനാത്ത് പുതുശേരിഭാഗം പ്രകാശ് ഭവനില്‍ പ്രകാശ് (42) നെയാണ് ആക്രമിച്ചത്. ഏറത്ത് വയല പുതുശേരിഭാഗം അരുണ്‍ നിവാസ് വീട്ടില്‍ അഖില്‍ (28), പുത്തന്‍ചന്ത വിജയ ഭവനം വീട്ടില്‍ സൂരജ് സോമന്‍ (26), അടൂര്‍ മംഗലത്ത് പുത്തന്‍ വീട്ടില്‍ തങ്കപ്പന്‍ മകന്‍ ഉണ്ണിക്കുട്ടന്‍ ( 25) എന്നിവരെ ഏനാത്ത് പോലീസ് അറസ്റ്റ് ചെയ്തത്. പ്രകാശ് തലയ്ക്കു പരിക്കേറ്റ് കോട്ടയം മെഡിക്കല്‍ കോളജില്‍ ചികിത്സയിലാണ്. പ്രകാശിന്‍റെ ഉടമസ്ഥതയില്‍ ഉള്ള ഓട്ടോറിക്ഷയില്‍ ഉത്രാടനാളില്‍ ബന്ധുവും ഓട്ടോറിക്ഷ നന്നാക്കി കൊടുക്കുന്ന വിഷയത്തില്‍ ഇരുവരും തമ്മില്‍ പിണക്കത്തിലായിരുന്നുന്നതിനേ തുടര്‍ന്ന് അഖിലിനെതിരേ വക്കീല്‍ നോട്ടീസ് അയച്ചിരിന്നു. മൂന്നംഗ സംഘം ഒത്തുകൂടി പ്രകാശിന്റെ വീട്ടുമുറ്റത്തെത്തി ചീത്തവിളിച്ച് കൊണ്ട് ഇരുമ്പ് പൈപ്പ് കൊണ്ട് തലയ്ക്ക് അടിച്ച് പരിക്കേല്പിക്കുകയായിരുന്നു.

ഇന്‍റര്‍വെന്‍ഷണല്‍ പെയ്ന്‍ ക്ലിനിക് ബിലീവേഴ്‌സ് ആശുപത്രിയില്‍

തിരുവല്ല: ബിലീവേഴ്‌സ് ചര്‍ച്ച് മെഡിക്കല്‍ കോളജ് ആശുപത്രി അനസ്‌തേഷ്യ വിഭാഗത്തിന്‍റെ നേതൃത്വത്തില്‍ ഇന്‍റര്‍വെന്‍ഷണല്‍ പെയ്ന്‍ ക്ലിനിക് ആരംഭിച്ചു. കേരളാ ആരോഗ്യ സര്‍വകലാശാല സെനറ്റ് അംഗവും ബിലീവേഴ്‌സ് ആശുപത്രി മാനേജരുമായ ഫാ. സിജോ പന്തപ്പള്ളില്‍ അധ്യക്ഷത വഹിച്ചു. അനസ്‌തേഷ്യ വിഭാഗം സീനിയര്‍ കണ്‍സള്‍ട്ടന്‍റ് ഡോ ജിതിന്‍ മാത്യു ഏബ്രഹാം ക്ലിനിക്കിന്‍റെ ഉദ്ഘാടനം നിര്‍വഹിച്ചു. ഡയറക്ടറും സിഇഒയുമായ ഡോ. ജോര്‍ജ് ചാണ്ടി മറ്റീത്ര, അനസ്‌തേഷ്യ വിഭാഗം മേധാവി ഡോ. ആഷു സാറാ മത്തായി, സീനിയര്‍ കണ്‍സള്‍ട്ടന്‍റ് ഡോ. എബി മാത്യു എന്നിവര്‍ സന്നിഹിതരായിരുന്നു. യാഥാസ്ഥിതിക ചികിത്സകളിലൂടെ മതിയായ ആശ്വാസം ലഭിക്കാത്തവരും വിട്ടുമാറാത്ത വേദന അനുഭവിക്കുന്നവരുമായ രോഗികള്‍ക്കുള്ള പ്രത്യേക യൂണിറ്റായി ആയിരിക്കും ഇന്‍റര്‍വെന്‍ഷണല്‍ പെയ്ന്‍ ക്ലിനിക് പ്രവര്‍ത്തിക്കുക.

മാര്‍ ഒസ്താത്തിയോസ് ഡയാലിസിസ് സെന്‍റര്‍ ഉദ്ഘാടനം ഇന്ന്

തിരുവല്ല: ലൈഫ് കെയര്‍ ഫൗണ്ടേഷന്‍റെ പ്രഥമ സംരംഭമായി ചെന്നിത്തല കോട്ടമുറിയില്‍ സ്ഥാപിച്ചിരിക്കുന്ന മാര്‍ ഒസ്താത്തിയോസ് ഗുരുകുലം ഡയാലിസിസ് സെന്‍റര്‍ ഇന്ന് ഉച്ചകഴിഞ്ഞ് 3 30ന് ബസേലിയോസ് മാര്‍ത്തോമ്മാ മാത്യുസ് തൃതീയന്‍ കാതോലിക്കാ ബാവ ഉദ്ഘാടനം ചെയ്യും. ആലംബഹീനരുമായ വൃക്ക രോഗികള്‍ക്ക് സൗജന്യ ഡയാലിസിസ് സേവനം നല്‍കുക എന്നതാണ് തിരുവല്ല ലൈഫ് കെയര്‍ ഫൗണ്ടേഷന്‍റെ ലക്ഷ്യം. തുടക്കത്തില്‍ മൂന്ന് ഡയാലിസിസ് യന്ത്രങ്ങളിലൂടെയും പടിപടിയായി ഒമ്പത് യന്ത്രങ്ങളായി വര്‍ധിപ്പിക്കുന്നതിലൂടെ ഒരു ദിവസം 16 രോഗികള്‍ക്ക് ഇതിന്റെ പ്രയോജനം ലഭിക്കും. നിരണം ഭദ്രാസനാധിപന്‍ ഡോ.യുഹാനോന്‍ മാര്‍ ക്രിസോസ്റ്റമോസ് മെത്രാപ്പോലീത്ത അധ്യക്ഷത വഹിക്കും. മാര്‍ത്തോമ്മാ സുറിയാനി സഭയുടെ ചെങ്ങന്നൂര്‍ - മാവേലിക്കര ഭദ്രാസനാധിപന്‍ ഡോ. യൂയാക്കിം മാര്‍ കൂറിലോസ് സഫ്രഗന്‍ മെത്രാപ്പോലിത്ത അനുഗ്രഹ പ്രഭാഷണം നടത്തും. സ്വിച്ച് ഓണ്‍ കര്‍മം രാജ്യസഭാ മുന്‍ ഉപാധ്യക്ഷന്‍ പ്രഫ.പി ജെ കുര്യന്‍ നിര്‍വഹിക്കും. കൊടിക്കുന്നില്‍ സുരേഷ് എംപി മുഖ്യപ്രഭാഷണം നടത്തും. ഫാ.എം. സി. പൗലോസ്, ഡോ.മുഹമ്മദ് ജാമിര്‍ അക്‌സനി, സാമി വേദാനന്ദൻ, തോംസണ്‍ പി.വര്‍ഗീസ്, വിജയമമ്മ ഫിലേന്ദ്രന്‍, ജി. ആതിര, അഭിലാഷ് തുമ്പിനത്ത്, ഗോപന്‍ ചെന്നിത്തല, മാത്യൂസ് കെ. ജേക്കബ് , ജോസഫ് ചാക്കോ, പി .ഡി. ജോര്‍ജ്, ജോണ്‍സണ്‍ മണലൂർ, പി.എച്ച്. ഷാജി, സുരേഷ് കുമാർ, വിനോദ് ഫിലിപ്പ് എന്നിവര്‍ പ്രസംഗിക്കും.

മോൺ.ഡോ. കുര്യാക്കോസ് തടത്തിലിന്‍റെ റമ്പാന്‍പട്ടം സ്വീകരണം നവംബര്‍ ഒന്നിന് തിരുവല്ലയില്‍

തിരുവല്ല: മലങ്കര കത്തോലിക്കാ സഭയുടെ യൂറോപ്പിലെ അപ്പോസ്‌തോലിക് വിസിറ്റേറ്ററായി നിയമിതനായ മോണ്‍. ഡോ. കുര്യാക്കോസ് തടത്തിലിന്‍റെ റമ്പാന്‍ പട്ടം നവംബര്‍ ഒന്നിനു രാവിലെ 8.30ന് തിരുവല്ല സെന്‍റ് ജോണ്‍സ് മെത്രാപ്പോലീത്തന്‍ കത്തീഡ്രലില്‍ നടക്കും. രാവിലെ 8.30ന് പ്രഭാത പ്രാര്‍ഥനയ്ക്കു ശേഷം കുര്‍ബാന മധ്യേയാണ് റമ്പാന്‍ പട്ടം സ്വീകരിക്കുന്നത്. സഭാധ്യക്ഷന്‍ കര്‍ദിനാള്‍ മാര്‍ ബസേലിയോസ് ക്ലീമിസ് കാതോലിക്കാ ബാവ ശുശ്രൂഷകളില്‍ മുഖ്യകാര്‍മികത്വം വഹിക്കും. സഭയിലെ മറ്റു ബിഷപ്പുമാര്‍ സഹകാര്‍മികത്വം വഹിക്കും. ആര്‍ച്ച് ബിഷപ് ഡോ. തോമസ് മാര്‍ കൂറിലോസ് മെത്രാപ്പോലീത്ത സുവിശേഷ സന്ദേശം നല്‍കും. നവംബര്‍ 22ന് തിരുവനന്തപുരം പട്ടം സെന്‍റ് മേരീസ് ബസലിക്കാ ദേവാലയത്തില്‍ മെത്രാഭിഷേക ശുശ്രൂഷകള്‍ നടക്കും. മോൺ. ഡോ. കുര്യാക്കോസ് തടത്തില്‍ കഴിഞ്ഞ നാലുവര്‍ഷമായി മലങ്കര കത്തോലിക്കാ സഭയുടെ യുകെ റീജണിന്‍റെ സഭാതല കോഓര്‍ഡിനേറ്ററായി പ്രവര്‍ത്തിച്ചു വരികയായിരുന്നു. നാലാഞ്ചിറ സെന്‍റ്മേരീസ് മേജര്‍ സെമിനാരി റെക്ടറായും തിരുവല്ല അതിരൂപതാ ചാന്‍സലറായും സെമിനാരി പ്രഫസറായും, വിവിധ ഇടവകകളുടെ വികാരിയായും ശുശ്രൂഷ ചെയ്തിട്ടുണ്ട്. റമ്പാന്‍ പട്ട ശുശ്രൂഷകളുടെ ക്രമീകരണത്തിനായി 51 അംഗ കമ്മിറ്റിയെ തെരഞ്ഞെടുത്തു. ജനറല്‍ കണ്‍വീനറായി തിരുവല്ല അതിരൂപത മുഖ്യ വികാരി ജനറാള്‍ റവ.ഡോ. ഐസക്ക് പറപ്പള്ളിലും ഫാ. വര്‍ഗീസ് മരുതൂര്‍, ഫാ. ജോസ് മണ്ണൂര്‍കിഴക്കേതിൽ, ഫാ. മാത്യു പുനക്കുളം, ഫാ.സന്തോഷ് അഴകത്ത്, ഫാ. ഡോ. തോമസ് പാറയ്ക്കൽ, ഫാ. ഡോ. സിജോ കാഞ്ഞിരത്താമണ്ണിൽ, ഫാ. ഫിലിപ്പ് മഞ്ചാടിയിൽ, ഫാ. വര്‍ഗീസ് ചാമക്കാലയില്‍, ഫാ. ബിനീഷ് കാഞ്ഞിരത്തിങ്കല്‍ തുടങ്ങിയവര്‍ വിവിധ കമ്മിറ്റികളുടെ ചെയര്‍മാന്‍മാരായും പ്രവര്‍ത്തിക്കുന്നു.

അടൂര്‍ ലൈഫ് ലൈനില്‍ ഇവിഎആര്‍ ചികിത്സ വിജയകരം

അടൂർ: ഹൃദയത്തിന്‍റെ പ്രധാന രക്തധമനിയായ അയോര്‍ട്ടയിലെ വീക്കമായ അയോര്‍ട്ടിക് അന്യൂറിസം ബാധിച്ച 73 വയസുള്ള രോഗിക്ക് സങ്കീര്‍ണമായ എന്‍ഡോവാസ്‌ക്യൂലര്‍ അന്യൂറിസം റിപ്പയര്‍ എന്ന സ്റ്റെന്‍റ് ഗ്രാഫ്ട് ചികിത്സ വിജയകരമായി നടപ്പിലാക്കി അടൂര്‍ ലൈഫ് ലൈന്‍ ഹാര്‍ട്ട് ഇന്‍സ്റ്റിറ്റ്യൂട്ടിലെ കാര്‍ഡിയോളജി - കാര്‍ഡിയാക് സര്‍ജറി വിഭാഗങ്ങൾ. വീങ്ങിയ ഭാഗത്തു വിള്ളലോ പൊട്ടലോ ഉണ്ടായാല്‍ മരണസാധ്യത കൂടുതലായതിനാലാണ് തുറന്ന ശസ്ത്രക്രിയ ഒഴിവാക്കിയുള്ള ഈ ചികിത്സാ ചെയ്തതെന്ന് കാര്‍ഡിയോളോജിസ്റ്റ് ഡോ. കൃഷ്ണമോഹന്‍. അമിത രക്തസമ്മര്‍ദം, 65 വയസിനു മുകളില്‍ പ്രായം, പുകവലി, രോഗ പാരമ്പര്യം എന്നിവയുള്ളവര്‍ ലളിതമായ അള്‍ട്രാസൗണ്ട് സ്‌ക്രീനിംഗിലൂടെ അന്യൂറിസം ഇല്ലായെന്നുറപ്പാക്കണമെന്ന് കാര്‍ഡിയോളജി വിഭാഗം മേധാവി ഡോ. സാജന്‍ അഹമ്മദ് പറഞ്ഞു. മുന്പ് ബൈപാസ് സര്‍ജറി കഴിഞ്ഞതും വൃക്കകളിലേക്കുള്ള രക്തക്കുഴലിനരികില്‍ വീക്കം ഉണ്ടായതും രണ്ടു കാലുകളിലേക്കും ഇത് വ്യാപിച്ചതും കാല്‍സ്യം അടിഞ്ഞുകൂടിയതും രോഗിയുടെ സങ്കീര്‍ണതകള്‍ വര്‍ധിപ്പിക്കുന്നതിനു ഇടയാക്കിയെന്നു കാര്‍ഡിയാക് സര്‍ജറി വിഭാഗം മേധാവി ഡോ. രാജഗോപാല്‍ വിശദീകരിച്ചു . സീനിയര്‍ കാര്‍ഡിയോളോജിസ്റ്റുകളായ ഡോ. ആശിഷ് കുമാര്‍ , ഡോ. വിനോദ് മണികണ്ഠന്‍, ഡോ. സന്ദീപ് ജോര്‍ജ് , ഡോ. ചെറിയാന്‍ ജോര്‍ജ് , ഡോ. ചെറിയാന്‍ കോശി , കാര്‍ഡിയാക് അനസ്‌തേഷ്യ വിഭാഗം മേധാവി ഡോ. അജിത് സണ്ണി , ഡോ. ശ്രുതി മത്തായി , റേഡിയോളോജിസ്‌റ് ഡോ. അബ്ദുല്‍ ഫൈസല്‍ എന്നിവര്‍ കൂടി അടങ്ങുന്ന സംഘമാണ് ചികിത്സ നടത്തിയത്.

പമ്പാനദിയില്‍ കുളിക്കാനിറങ്ങിയ യുവാവിനെ കാണാതായി

ആറന്മുള: പമ്പാനദിയില്‍ ആറുട്ടുപുഴ ഭാഗത്ത് കുളിക്കാനിറങ്ങിയ യുവാവിനെ കാണാതായി. ആറന്മുള മാലക്കര, പുതുവാന്‍കോട്ട, മാത്യു(34) വിനെയാണ് നദിയില്‍ കാണാതായത്. ഇന്നലെ വൈകുന്നേരം 5.30 ഓടെ ചക്കിട്ടയില്‍പടി വള്ളക്കടവു ഭാഗത്തു കൂട്ടുകാരനൊപ്പം കുളിക്കാനിറങ്ങിയപ്പോള്‍ ഇവര്‍ രണ്ടുപേരും ഒഴുക്കിൽപ്പെടുകയായിരുന്നു. വെള്ളത്തില്‍ മുങ്ങിയ മാത്യുവിനെയും കൂട്ടുകാരനെയും ഓടിക്കൂടിയവര്‍ രക്ഷപ്പെടുത്താന്‍ ശ്രമിച്ചെങ്കിലും മാത്യു മുങ്ങിത്താഴുകയായിരുന്നു. കൂട്ടുകാരനെ നാട്ടുകാര്‍ രക്ഷപ്പെടുത്തി. വിവരം അറിഞ്ഞ് പത്തനംതിട്ട നിന്ന് ഫയര്‍ഫോഴ്‌സ് സ്‌കൂബാ ടീം സ്ഥലത്ത് തെരച്ചില്‍ ആരംഭിച്ചു. രാത്രിയോടെ തെരച്ചില്‍ ദുഷ്‌കരമായതിനാല്‍ നിര്‍്ത്തിവച്ചു. ഇന്നു രാവിലെ തെരച്ചില്‍ തുടരും.

മെഡിക്കൽ കോളജിന്‍റെ സ്വന്തം പഞ്ചായത്ത്

അരുവാപ്പുലം ഗ്രാമപഞ്ചായത്ത് കോന്നി, അച്ചന്‍കോവില്‍ വനമേഖലകള്‍ അതിര്‍ത്തി പങ്കിടുന്ന പത്തനംതിട്ട ജില്ലയിലെ ഗ്രാമപഞ്ചായത്താണ് അരുവാപ്പുലം. വനവും അതിനുള്ളിലെ ജനവാസ മേഖലയുമെല്ലാം പഞ്ചായത്തിന്‍റെ ഭാഗം. വനവും വന്യമൃങ്ങളും ആദിവാസി ജനസമൂഹവുമെല്ലാം ചേരുന്ന പഞ്ചായത്തിന്‍റെ വികസന സാധ്യതകള്‍ ഏറെ. പത്തനംതിട്ട ജില്ലയിലെ സര്‍ക്കാര്‍ മെഡിക്കല്‍ കോളജ് അരുവാപ്പുലം പഞ്ചായത്തിലാണ്. റോഡുകളുടെ വികസനവും തുടങ്ങിയിട്ടുണ്ട്. നാലു ബാച്ചുകളിലായി നിലവില്‍ എംബിബിഎസ് വിദ്യാർഥികളുണ്ട്. മെഡിക്കല്‍ കോളജ് അനുബന്ധമായ വികസനം പുരോഗമിക്കുമ്പോഴും വന്യമൃഗശല്യം മൂലം വീടൊഴിയാന്‍ താത്പര്യം കാട്ടുന്ന ആളുകളുള്ള പ്രദേശംകൂടിയാണ്. ഒറ്റനോട്ടത്തില്‍ 2020ലെ തദ്ദേശ തെരഞ്ഞെടുപ്പിനു ശേഷം സംസ്ഥാനത്തുതന്നെ ഏറ്റവും പ്രായംകുറഞ്ഞ പ്രസിഡന്‍റ് ചുമതലയേറ്റത് അരുവാപ്പുലത്താണ്. സിപിഎമ്മിലെ യുവനേതാവ് രേഷ്മ മറിയം റോയ് ഭരണരംഗത്തു പുതുമുഖമായിരുന്നെങ്കിലും പുതിയ ആശയങ്ങള്‍ നല്‍കി പഞ്ചായത്തിനെ ഏറെ മുന്നിലെത്തിച്ചതായി എല്‍ഡിഎഫ് അവകാശപ്പെടുന്നു. സ്വരാജ് ട്രോഫി അടക്കം നേടി. ഇടയ്ക്കു പ്രസിഡന്‍റ് അവധിയില്‍ പോയപ്പോള്‍ വൈസ് പ്രസിഡന്‍റിനു ചുമതല നല്‍കിയതൊഴിച്ചാല്‍ ഭരണനേതൃത്വത്തില്‍ അഞ്ചു വര്‍ഷവും മാറ്റമുണ്ടായില്ല. സര്‍ക്കാര്‍ പദ്ധതികള്‍ ഉണ്ടായിട്ടും അവയുടെ പ്രയോജനം ഗ്രാമപഞ്ചായത്തിനുണ്ടായിട്ടില്ലെന്നാണ് പ്രതിപക്ഷ ആരോപണം. വികസന സാധ്യതകള്‍ പ്രയോജനപ്പെടുത്തുന്നതില്‍ ഭരണസമിതി പരാജയപ്പെട്ടതായും യുഡിഎഫ് കുറ്റപ്പെടുത്തുന്നു. കക്ഷിനില: ആകെ സീറ്റ് - 15. എല്‍ഡിഎഫ് - 9, യുഡിഎഫ്- 5, സ്വതന്ത്രന്‍ -1. നേട്ടങ്ങൾ ഉന്നത നിലവാരത്തിലുള്ള ടര്‍ഫ് കോര്‍ട്ട്. നിത്യ ചൈതന്യയതിക്കു സ്മാരകം പണിയാൻ ഒരേക്കർ വാങ്ങാൻ തീരുമാനം. അരുവാപ്പുലം - ഐരവണ്‍ പാലം നിര്‍മാണം തുടങ്ങി. കേരളത്തിലെ ആദ്യത്തെ സ്മാര്‍ട്ട് കൃഷിഭവന്‍. കര്‍ഷക കഫെ, വിപണന ഔട്ട്‌ലെറ്റ് എന്നിവ യഥാര്‍ഥ്യമായി. സ്വന്തം ബ്രാന്‍ഡില്‍ തനതായ ഭക്ഷ്യ ഉത്പന്നങ്ങള്‍. തരിശ് പാടങ്ങളിൽ നെൽകൃഷി. മായമില്ലാത്ത ഭക്ഷ്യോത്പന്നങ്ങൾ‌ക്കായി തുടങ്ങിയ അരുവാപ്പുലം ചില്ലീസും വിജയം. വന്യമൃഗ ശല്യം ചെറുക്കാൻ സംരക്ഷണവേലി. കാട്ടുപന്നികളെ ഉന്മൂലനം ചെയ്തുവരുന്നു. കുട്ടികളിലെ സംസാര വൈകല്യം പരിഹരിക്കാൻ ബി ദ സൗണ്ട് സ്പീച്ച് തെറാപ്പി. ഭിന്നശേഷിക്കാർക്കു സ്‌കോളര്‍ഷിപ്, ഇലക്‌ട്രോണിക് വീല്‍ചെയര്‍. വിഭിന്നശേഷിക്കാരെയും മാതാപിതാക്കളെയും ഉള്‍പ്പെടുത്തി ഉല്ലാസയാത്ര. വനിതാ ജിംനേഷ്യം, സ്ത്രീകൾക്കു കരാട്ടെ പരിശീലനം. ട്രൈബല്‍ മേഖലയിലെ കുട്ടികള്‍ക്ക് ന്യൂട്രി ട്രൈബ് പോഷകാഹാര പദ്ധതി. വയോജന ക്ലബുകള്‍, മെഡിക്കല്‍ ക്യാമ്പുകള്‍, വിനോദയാത്രകള്‍. ജില്ലയിലെ ആദ്യത്തെ ചൈല്‍ഡ് റിസോഴ്‌സ് സെന്‍റര്‍. ബാലസൗഹൃദ ഗ്രാമപഞ്ചായത്ത് എന്നതു ലക്ഷ്യം ഏഴ് കുടിവെള്ള പദ്ധതികള്‍ 3.41 കോടി ചെലവഴിച്ചു പൂര്‍ത്തിയാകുന്നു. വിഷന്‍ 2030 എന്ന പേരില്‍ കുട്ടികള്‍ക്കു സൗജന്യ ഫുട്‌ബോള്‍ പരിശീലനം. ജില്ലയിലെ മികച്ച ഗ്രാമപഞ്ചായത്തിനുള്ള സ്വരാജ് ട്രോഫി പുരസ്‌കാരവും 40 ലക്ഷം രൂപ പ്രൈസ് മണിയും തുടര്‍ച്ചയായി രണ്ടു തവണ. മികച്ച ജാഗ്രതാ സമിതിക്കുള്ള പുരസ്‌കാരം, മാലിന്യനിര്‍മാര്‍ജനത്തിലെ മികച്ച മാതൃകകള്‍ക്ക് നാല് അവാര്‍ഡുകള്‍. മികച്ച സ്ത്രീ സൗഹൃദ പ്രവര്‍ത്തന അംഗീകാരമായി ഗ്രാമപഞ്ചായത്ത് പ്രസിഡന്‍റിനു ഡല്‍ഹിയില്‍ നടന്ന ദേശീയ വനിതാ ദിനത്തില്‍ പങ്കെടുക്കാനായി. കോട്ടങ്ങൾ അടിസ്ഥാന സൗകര്യ വികസനത്തില്‍ പിന്നാക്കാവസ്ഥ. കൊക്കാത്തോട് മേഖലയില്‍ കുടിവെള്ള പദ്ധതികള്‍ തുടങ്ങിയിട്ടില്ല. പല പദ്ധതികളിലും ജലവിതരണം കാര്യക്ഷമല്ല. പദ്ധതികള്‍ പലതും കടലാസിൽ, പാതിവഴിയില്‍ പലതും ഉപേക്ഷിച്ചു പട്ടികജാതി ഉന്നതികളുടെ ക്ഷേമത്തിന് ഒന്നും ചെയ്തില്ല. പൊതുശ്മശാനത്തിന്‍റെ നിര്‍മാണം എങ്ങുമെത്തിയില്ല ലക്ഷംവീട് കോളനികളുടെ നവീകരണം നടന്നില്ല. ആദിവാസി ഉന്നതികളുടെ നവീകരണം ഏറ്റെടുത്തില്ല. സാധാരണക്കാരുടെ ആശ്രയമായിരുന്ന ജനകീയ ഹോട്ടല്‍ തുടരാനായില്ല. മഹാത്മാഗാന്ധി തൊഴിലുറപ്പ് പദ്ധതിയില്‍ തൊഴില്‍ അവസരങ്ങളില്ല. സ്വന്തം ബ്രാന്‍ഡില്‍ തുടങ്ങിയ അരുവാപ്പുലം റൈസ്, അരുവാപ്പുലം ചില്ലീസ്, ബന്ദിപ്പൂ കൃഷി പദ്ധതികള്‍ ഒരു വര്‍ഷം കൊണ്ട് അവസാനിപ്പിച്ചു. കാട്ടുമൃഗങ്ങളുടെ ശല്യം നേരിടാനുള്ള പദ്ധതിയില്ല. അരുവാപ്പുലം കേന്ദ്രമാക്കി കര്‍ഷക വിപണി നടപ്പാക്കിയില്ല. വസ്തുവും കെട്ടിടവും ഇല്ലാതെ പല അങ്കണവാടികളും. ബഡ്‌സ് സ്‌കൂള്‍ തീരുമാനവും നടപ്പായില്ല. പുരസ്‌കാരങ്ങള്‍ ലക്ഷ്യമിട്ടു നടത്തിയ പല പ്രവര്‍ത്തനങ്ങളും പഞ്ചായത്തിനു സാമ്പത്തിക ബാധ്യത. സ്പീച്ച് തെറാപ്പി, കായിക പരിശീലനം, യോഗ സെന്‍ററുകളുടെ പ്രവര്‍ത്തനങ്ങളും പാതിവഴിയില്‍ നിലച്ചു. സര്‍ക്കാര്‍ മെഡിക്കല്‍ കോളജ് പ്രവര്‍ത്തന സജ്ജമായെങ്കിലും ഗ്രാമപഞ്ചായത്തിന്‍റെ ഇടപെടലുകള്‍ പല രംഗത്തുമുണ്ടായില്ല.

പോത്തിനെ കശാപ്പു ചെയ്തു കടത്തിക്കൊണ്ടുപോയ കേസില്‍ രണ്ടു പേര്‍ അറസ്റ്റില്‍

ചിറ്റാര്‍: റബര്‍ത്തോട്ടത്തില്‍ മേയാന്‍ വിട്ട പോത്തിനെ കശാപ്പു ചെയ്തു പിക്കപ്പ് വാനില്‍ കടത്തിക്കൊണ്ടു പോയ കേസില്‍ രണ്ടു പേര്‍ അറസ്റ്റില്‍. ചിറ്റാര്‍ പാമ്പിനി കൃഷ്ണമംഗലത്ത് വീട്ടില്‍ ജിതിന്‍കുമാര്‍ (27), ആങ്ങമൂഴി ഇടുപ്പുകല്ലില്‍ പുത്തന്‍വീട്ടില്‍ പ്രമോദ് (27) എന്നിവരാണ് അറസ്റ്റിലായത്. റാന്നി - പെരുനാട് ബിമ്മരം ഈട്ടിമൂട്ടില്‍ വീട്ടില്‍ ത്രിദീപിന്‍റെ പോത്തിനെയാണ് നഷ്ടപ്പെട്ടത്. ക്ഷീരകര്‍ഷകനായ ത്രിദീപിന് ഏഴു പശുക്കളും രണ്ടു പോത്തുകളുമാണുള്ളത്. മേയാന്‍വിട്ട പോത്തുകളില്‍ 200 കിലോഗ്രാം തൂക്കം വരുന്നതും ഉദ്ദേശം 60,000 രൂപ മതിപ്പുവിലയുള്ളതുമായ പോത്തിനെയാണ് കൊണ്ടുപോയത്. പോത്തിനെ കാണാതായതിനെത്തുടര്‍ന്ന് ത്രിദീപ് നടത്തിയ തെരച്ചിലില്‍ വനഭാഗത്ത് റോഡിനോടു ചേര്‍ന്ന കാട്ടുപ്രദേശത്ത് പോത്തിന്‍റെ ശരീരാവശിഷ്ടങ്ങളും കുടലും കാണപ്പെട്ടതിനെത്തുടര്‍ന്ന് പെരുനാട് പോലീസ് സ്‌റ്റേഷനില്‍ പരാതിയുമായി എത്തുകയായിരുന്നു. പെരുനാട് പോലീസ് സ്റ്റേഷന്‍ ഇന്‍സ്‌പെക്ടര്‍ വിഷ്ണു, സബ് ഇന്‍സ്‌പെക്ടര്‍ എ.ആർ. രവീന്ദ്രന്‍, സിപിഒ ബിനു എന്നിവർ അന്വേഷണത്തിനു നേതൃത്വം നല്‍കി.

കടമുറികൾക്കും പട്ടയം നൽകുമെന്ന സർക്കാർ പ്രഖ്യാപനം നടപ്പാക്കാൻ ബുദ്ധിമുട്ടേറും

പത്തനംതിട്ട: കെട്ടിടങ്ങളുടെ വിസ്തൃതി പരിഗണിക്കാതെ വനഭൂമിയിൽ പട്ടയം അനുവദിക്കുമെന്ന മന്ത്രിസഭ തീരുമാനം നടപ്പിലാക്കാൻ ബുദ്ധിമുട്ടേറുമെന്ന് ആശങ്ക. 1977നു മുന്പ് വനഭൂമി കൈവശം വച്ചവർക്കാണ് ഇളവ് അനുവദിച്ചത്. ഇത്തരത്തിൽ ഭൂമി കൈവശമുള്ളവർക്ക് അതു പതിച്ചു നൽകാൻ കേന്ദ്ര സർക്കാർ അനുമതി നൽകിയിട്ടുണ്ട്. ഇതിൽ കടമുറികൾ നിർമിച്ചിട്ടുണ്ടെങ്കിൽ വിസ്തൃതി പരിഗണിക്കാതെ പട്ടയം നൽകാനാണ് തീരുമാനം. എന്നാൽ, 1993 ലെ ചട്ട പ്രകാരം പട്ടയം നൽകേണ്ട സിഎച്ച്ആർ മേഖലയിൽ പട്ടയം നൽകുന്നതും വ്യാപാര സ്ഥാപനങ്ങൾ നിർമിക്കുന്നതിന് അനുമതി നൽകുന്നതും സുപ്രീംകോടതി 2024 ഒക്ടോബർ 24ന് സ്റ്റേ ചെയ്തിട്ടുള്ളതാണ്. വിധി വന്ന് ഒന്നര വർഷം ആയിട്ടും വ്യക്തമായ ഒരു സത്യവാങ്മൂലം കോടതിക്ക് നൽകി ഈ വിഷയം പരിഹരിക്കാൻ സർക്കാർ തയാറായിട്ടില്ല. ഭൂപതിവ് നിയമമനുസരിച്ച് കൃഷി ചെയ്യുന്നതിനായി ഭൂ ഉടമയ്ക്ക് നൽകുന്ന പട്ടയത്തിൽ താമസിക്കുന്നതിനുള്ള വീടും ആവശ്യമെങ്കിൽ ഉപജീവനത്തിനായി ഒരു കടമുറിയും മാത്രമാണ് അനുവദിച്ചിരിക്കുന്നത്. ഈ നിയമപ്രശ്നം ചൂണ്ടിയാണ് ഇതേ പട്ടയ ഭൂമിയിൽ 2024 വരെ നിർമിക്കപ്പെട്ടതെല്ലാം 2025 ൽ കൊണ്ടുവന്ന ചട്ടത്തിലൂടെ സർക്കാർ നിയമവിരുദ്ധമാക്കി മാറ്റിയത്. ഇതു പരിഹരിക്കുന്നതിനാണ് പിഴത്തുകയോടു കൂടിയ ക്രമവത്കരണ നിയമം സർക്കാർ കൊണ്ടുവന്നത്. നിയമ പ്രകാരം 2023 വരെ ലഭിച്ച പട്ടയങ്ങൾക്ക് മാത്രമാണ് ക്രമവത്കരണം ബാധകമാകു മെന്ന് ആ നിയമത്തിൽത്തന്നെ വ്യക്തമാക്കിയിട്ടുമുണ്ട്. സർക്കാരിന്‍റെ ഇപ്പോഴത്തെ തീരുമാനം തെരഞ്ഞെടുപ്പുകൾ മുന്നിൽകണ്ടുള്ള രാഷ്‌ട്രീയ തട്ടിപ്പ് മാത്രമെന്ന് ജില്ലാ ജനകീയ കർഷക സമിതി ചെയർമാൻ ജോൺ മാത്യു ചക്കിട്ടയിൽ കുറ്റപ്പെടുത്തി.

പരുമല പള്ളി പെരുന്നാള്‍ : തിരുവല്ല കെഎസ്ആര്‍ടിസി ഡിപ്പോയില്‍ ഹെല്‍പ് ഡെസ്‌ക്

പരുമല: 26 മുതല്‍ നവംബര്‍ മൂന്നു വരെ നടക്കുന്ന പരുമല പള്ളി പെരുന്നാളിനോടനുബന്ധിച്ച് കെഎസ്ആര്‍ടിസി തിരുവല്ല ഡിപ്പോയില്‍ 24 മണിക്കൂറും ഹെല്‍പ് ഡെസ്‌ക് പ്രവര്‍ത്തിക്കും. ഫോൺ: 91889 33746. തീർഥാടകര്‍ക്കായി രാത്രിയിലടക്കം വിവിധ പ്രദേശങ്ങളിലേക്ക് ബസ് സര്‍വീസ് ഉണ്ടാകും. പെരുന്നാളിന്‍റെ ഒരുക്കം മന്ത്രി വീണാ ജോര്‍ജിന്‍റെ അധ്യക്ഷതയില്‍ പരുമല പള്ളി സെമിനാരി ഹാളില്‍ വിലയിരുത്തി. തീര്‍ഥാടകര്‍ക്ക് ആവശ്യമായ സൗകര്യം ഉറപ്പാക്കാന്‍ എല്ലാ വകുപ്പുകളും ജാഗ്രത പുലര്‍ത്തണമെന്ന് മന്ത്രി നിര്‍ദേശിച്ചു. തീര്‍ഥാടകരുടെ സുരക്ഷ ഉറപ്പാക്കാനും ഗതാഗതം സുഗമമാക്കാനും തിരുവല്ല, ചെങ്ങന്നൂര്‍ ഡിവൈഎസ്പിമാരോട് മന്ത്രി ആവശ്യപ്പെട്ടു. 10 സെക്ടറായി തിരിച്ച് സുരക്ഷയ്ക്കായി വിശദമായ പദ്ധതി പോലീസിന്‍റെ നേതൃത്വത്തില്‍ തയാറാക്കിയിട്ടുണ്ട്. 24 മണിക്കൂറും പോലിസ് സേവനം ഉണ്ടാകും. 25 കേന്ദ്രങ്ങളില്‍ പോലീസ് ട്രാഫിക് നിയന്ത്രിക്കും. വാഹനങ്ങള്‍ക്കായി വിപുലമായ പാര്‍ക്കിംഗ് സൗകര്യം ഒരുക്കും. നവംബര്‍ ഒന്ന്, രണ്ട്, മൂന്ന് തീയതികളില്‍ പ്രത്യേക സുരക്ഷ ഏര്‍പ്പെടുത്തും. അനധികൃത കച്ചവടം ഒഴിപ്പിക്കും. യാചകനിരോധന മേഖലയായി പ്രഖ്യാപിക്കുന്നത് പരിഗണിക്കും. ഹോട്ടലില്‍ ഭക്ഷണം വിളമ്പുന്നവര്‍ക്കും പാചകം ചെയ്യുന്നവര്‍ക്കും ഹെല്‍ത്ത് കാര്‍ഡ് നിര്‍ബന്ധമാണെന്ന് മന്ത്രി പറഞ്ഞു. പദയാത്രയ്ക്കിടെ 24 മണിക്കൂറും ആംബുലന്‍സ് സര്‍വീസുണ്ടാകും. മോട്ടോര്‍ വാഹന വകുപ്പിന്‍റെ കീഴില്‍ എന്‍ഫോഴ്സ്മെന്‍റ് സ്‌ക്വാഡ് പ്രവര്‍ത്തിക്കും. ആവശ്യമെങ്കില്‍ സ്വകാര്യ ബസുകള്‍ക്ക് താത്കാലിക പെര്‍മിറ്റ് നല്‍കുന്നത് പരിശോധിക്കും. ഹരിതചട്ടം കൃത്യമായി പാലിക്കും. ശുദ്ധജലം പരമാവധി സ്റ്റീല്‍ ഗ്ലാസുകളില്‍ നല്‍കും. ഹരിതകര്‍മ സേനയുടെ സേവനം ഉപയോഗിക്കും. വഴിയോരങ്ങളില്‍ തെരുവുവിളക്കുകള്‍ പ്രവര്‍ത്തിക്കുന്നുണ്ടെന്ന് ഉറപ്പാക്കും. ടേക്ക് എ ബ്രേക്ക് സംവിധാനം കാര്യക്ഷമമാക്കാന്‍ കടപ്ര, മാന്നാര്‍, പാണ്ടനാട് ഗ്രാമപഞ്ചായത്തുകള്‍ക്ക് നിര്‍ദേശം നല്‍കി. ഫയര്‍ ഫോഴ്സിന്റെ കീഴില്‍ സ്‌കൂബ ടീമുണ്ടാകും. ആയുര്‍വേദ, ഹോമിയോ സ്റ്റാളുകള്‍ പ്രവര്‍ത്തിക്കും. ഭക്ഷ്യസുരക്ഷാ വകുപ്പിന്‍റെ സ്‌ക്വാഡ് ടീമുകള്‍ സജീവമായി രംഗത്തിറങ്ങും. മൊബൈല്‍ ലാബിന്‍റെ സേവനമുണ്ടാകും. തടസമില്ലാതെ വൈദ്യുതി കെഎസ്ഇബിയുടെ നേതൃത്വത്തില്‍ ഉറപ്പാക്കും. മുടക്കമില്ലാതെ കുടിവെള്ളം വിതരണം ചെയ്യും. താത്കാലിക ടാപ്പുകള്‍ സ്ഥാപിക്കും. കുടിെള്ളത്തിന്‍റെ ശുദ്ധത പരിശോധിക്കാന്‍ സൗകര്യമുണ്ട്. എക്സൈസിന്‍റെ നേതൃത്വത്തില്‍ പരിശോധന ശക്തമാക്കും. സ്പെഷല്‍ സ്‌ക്വാഡും പ്രവര്‍ത്തിക്കും. സിപിആര്‍ പരിശീലനം ലഭിച്ചവരുടെ സേവനം ലഭ്യമാക്കണമെന്ന് ആരോഗ്യവകുപ്പിന് മന്ത്രി നിര്‍ദേശം നല്‍കി. മാത്യു ടി. തോമസ് എംഎല്‍എ, ജില്ലാ കളക്ടര്‍ എസ്. പ്രേംകൃഷ്ണന്‍, കടപ്ര, പാണ്ടനാട് ഗ്രാമപഞ്ചായത്ത് പ്രസിഡന്‍റുമാരായ നിഷ അശോകന്‍, അമ്മാളുക്കുട്ടി സണ്ണി, ഡെപ്യൂട്ടി കളക്ടര്‍ ആര്‍. രാജലക്ഷ്മി, ഓർത്തഡോക്സ് സഭ വൈദിക ട്രസ്റ്റി ഫാ. തോമസ് വര്‍ഗീസ് അമയില്‍, അല്മായ ട്രസ്റ്റി റോണി വര്‍ഗീസ് ഏബ്രഹാം, അസോസിയേഷന്‍ സെക്രട്ടറി ബിജു ഉമ്മന്‍, പരുമല സെമിനാരി മാനേജര്‍ ഫാ. എല്‍ദോസ് ഏലിയാസ് എന്നിവര്‍ പ്രസംഗിച്ചു.

മലമുകളിൽനിന്നു വീണു മരിച്ച വിദ്യാർഥിനിയുടെ മൃതദേഹം പരിശോധിച്ചു

അടൂർ: വിനോദസഞ്ചാരകേന്ദ്രമായ ഓയൂർ മുട്ടറ മരുതി മലയുടെ മുകളിൽനിന്ന് താഴേക്കു വീണു മരിച്ചനിലയിൽ കണ്ടെത്തിയ വിദ്യാർഥിനിയുടെ മൃതദേഹ പരിശോധന നടന്നു. അടൂർ കടമ്പനാട് മേപ്പറത്ത് ഇടപ്പുര വിനു - ദീപ ദമ്പതികളുടെ മകൾ മീനു (13) വിന്‍റെ മൃതദേഹമാണ് കഴിഞ്ഞദിവസം ലഭിച്ചത്. മൃതദേഹം ബന്ധുക്കൾക്കു വിട്ടുനൽകി. ഒപ്പമുണ്ടായിരുന്ന മുണ്ടപ്പള്ളി പെരിങ്ങനാട് സുവർണഭവനിൽ സുകുവിന്‍റെ മകൾ സുവർണ(14) ഗുരുതര പരിക്കുകളോടെ തിരുവനന്തപുരം മെഡിക്കൽ കോളജിൽ അതിതീവ്രപരിചരണ വിഭാഗത്തിലാണ്. കുട്ടികളുടെ സ്കൂൾ ബാഗുകൾ പെരിങ്ങനാട് സ്കൂളിനു സമീപത്തുള്ള കടയിൽനിന്നു വെള്ളിയാഴ്ച ലഭിച്ചിരുന്നു. സ്കൂൾ ബാഗിലുണ്ടായിരുന്ന ബുക്കിൽ കുട്ടികൾ പോകുന്നതുമായി ബന്ധപ്പെട്ടുള്ള ചില സൂചനകൾ നൽകിയിട്ടുണ്ടായിരുന്നുവെന്ന് പോലീസ് പറഞ്ഞു.

വനിതാ ജില്ലാ പഞ്ചായത്തംഗത്തിന്‍റെ പരാതിയിൽ യുട്യൂബർക്കെതിരേ കേസ്

അടൂർ: സാമൂഹിക മാധ്യമങ്ങളിലൂടെ അപമാനിക്കാൻ ശ്രമിച്ചുവെന്ന പത്തനംതിട്ട ജില്ലാ പഞ്ചായത്തംഗം ശ്രീനാദേവി കുഞ്ഞമ്മയുടെ പരാതിയിൽ യു ട്യൂബർക്കെതിരേ അടൂർ പോലീസ് കേസെടുത്തു. യുട്യൂബർ രാജൻ ജോസഫിനെതിരേയാണ് കേസ്. 2025 സെപ്റ്റംബർ 22ന് രാജൻ ജോസഫ് യുട്യൂബ് ചാനലിൽ സംപ്രേക്ഷണം ചെയ്ത വീഡിയോയെ ആസ്പദമാക്കിയാണ് കേസ്. സ്ത്രീത്വത്തെ അപമാനിച്ചെന്നും മാനഹാനി വരുത്തണമെന്ന ലക്ഷ്യത്തോടെയുള്ള വീഡിയോയാണിതെന്നും ആരോപിച്ചാണ് ശ്രീനാദേവി പരാതി നൽകിയത്.

റാന്നിയിലെ റോഡുകൾക്ക് 1.10 കോടി

റാന്നി: നിയോജകമണ്ഡലത്തിലെ വിവിധ റോഡുകൾ എൻസിഎഫ് ആറിൽ ഉൾപ്പെടുത്തി പുനരുദ്ധരിക്കുന്നതിന് 1.1 0 കോടി രൂപ അനുവദിച്ചതായി പ്രമോദ് നാരായൺ എംഎൽഎ അറിയിച്ചു. ഇടത്തിക്കാവ് - അമ്പലം റോഡ് (വെച്ചൂച്ചിറ ), തേവർതുണ്ടി - പട്ടയിൽമല (അങ്ങാടി), ഓലിക്കൽപ്പടി - തടത്തിൽമല (അങ്ങാടി) എന്നീ റോഡുകൾക്ക് പത്തുലക്ഷം രൂപയുടെയും പ്ലാച്ചേരി - ചെറുകര കൊടക്കാട് റോഡ് (പെരുനാട്), ഇടക്കുളം - അമ്പലംപടി വയലാപ്പടി റോഡ് (വടശേരിക്കര ), തുമ്പുങ്കൽപ്പടി - അതമ്പനാംകുഴി റോഡ് (വടശേരിക്കര ), കൊച്ചുകാല - അയ്യങ്കാവിൽ റോഡ് (എഴുമറ്റൂർ ) , വെങ്ങള -ചെങ്ങാറുമല റോഡ് (എഴുമറ്റൂർ ), ചെറുകത്രപ്പടി - ഇലവുങ്കൽ റോഡ് (അങ്ങാടി), ചുങ്കപ്പാറ സ്റ്റാൻഡ് -കടമ്പാട്ടുപടി റോഡ് (കോട്ടാങ്ങൽ), മന്ദിരം - തോണിക്കടവ് വള്ളക്കടവ് - കൊടുമ്പുഴ റോഡ് (നാറാണംമൂഴ ), മഠത്തിലെത്തുപടി -കൊച്ചെത്തുപടി (ചെറുകോൽ), കൊച്ചുപറമ്പിൽ - ഊളകാവ് റോഡ് (അയിരൂർ) എന്നീ റോഡുകൾക്ക് എട്ടു ലക്ഷം രൂപ വീതവുമാണ് അനുവദിച്ചത്.

പെരുനാട് സെന്‍റ് ജൂഡ് പള്ളിയിൽ ഇന്നു കൊടിയേറ്റ്

റാന്നി: പെരുനാട് സെന്‍റ് ജൂഡ് പള്ളിയിൽ വിശുദ്ധ യൂദാതദേവൂസിന്‍റെ തിരുനാളും ജപമാല മാസാചരണവും ഇന്നു മുതൽ 28 വരെ നടക്കും. ഇന്നു രാവിലെ 8.30ന് ജപമാല. ഒന്പതിന് വികാരി ഫാ. ജേക്കബ് കൈപ്പൻപ്ലാക്കൽ കൊടിയേറ്റും. തുടർന്ന് വിശുദ്ധ കുർബാന, നൊവേന. നാളെ മുതൽ 25 വരെ എല്ലാ ദിവസവും വൈകുന്നേരം അഞ്ചിന് ജപമാല. 5.30ന് വിശുദ്ധ കുർബാന, നൊവേന. 26നു രാവിലെ 8.30ന് ജപമാല. ഒന്പതിന് വിശുദ്ധ കുർബാന നൊവേന. വിവിധ ദിവസങ്ങളിലായി ഫാ. തോമസ് നെടുമാൻകുഴി , ഫാ. മാത്യു നടയ്ക്കൽ, ഫാ. ജോസഫ് പന്നലക്കുന്നേൽ, ഫാ. തോമസ് മുണ്ടിയാനിക്കൽ, ഫാ. ജോസഫ് മരുതോലിൽ, ഫാ. സെബാസ്റ്റ്യൻ മാടപ്പള്ളി, ഫാ. മാത്യു നരിപ്പാറ, ഫാ തോമസ് കാരുവള്ളിൽ എന്നിവർ വിശുദ്ധ കുർബാനയർപ്പിച്ച് തിരുകർമങ്ങൾക്ക് നേതൃത്വം നൽകുമെന്ന് വികാരി ഫാ. ജേക്കബ് കൈപ്പൻപ്ലാക്കൽ അറിയിച്ചു.

‘ദക്ഷിണ 2025’: മാക്ഫാസ്റ്റിൽ ബിരുദദാനച്ചടങ്ങ്

തിരുവല്ല: മാർ അത്തനാസിയോസ് കോളജ് ഫോർ അഡ്വൻസ്ഡ് സ്റ്റഡീസിൽ (മാക്ഫാസ്റ്റ്) ബിരുദദാനച്ചടങ്ങ് (ദക്ഷിണ-2025) നടന്നു. തിരുമൂലപുരം എംഡിഎം ജൂബിലി ഹാളിൽ നടന്ന ചടങ്ങിൽ എംബിഎ, എംസിഎ, എംഎസ്‌സി ബയോ സയൻസ്, എംഎസ്‌സി ഫുഡ് ടെക്നോളജി ആൻഡ് ക്വാളിറ്റി അഷ്വറൻസ് വിഭാഗങ്ങളിലെ 329 വിദ്യാർഥികൾക്ക് ബിരുദദാനം നടത്തി. തിരുവല്ല ആർച്ച്ബിഷപ് ഡോ. തോമസ് മാർ കൂറിലോസ് മെത്രാപ്പോലീത്ത അധ്യക്ഷത വഹിച്ചു. ഗോവ, മിസോറം മുൻ സംസ്ഥാന ഗവർണർ പി.എസ്. ശ്രീധരൻപിള്ള മുഖ്യാതിഥിയായിരുന്നു. മാക്ഫാസ്റ്റ് കോളജ് പ്രിൻസിപ്പൽ ഡോ. വർഗീസ് കെ. ചെറിയാൻ, മാനേജർ ഫാ.ഈപ്പൻ പുത്തൻപറന്പിൽ, കോ-ഓർഡിനേറ്റർ ഡോ. അരുൺ പ്രേം എന്നിവർ പ്രസംഗിച്ചു. ഉന്നതവിജയം നേടിയ വിദ്യാർഥികളും അവരുടെ രക്ഷിതാക്കളും ചടങ്ങിൽ പങ്കെടുത്തു.

പോറ്റിയെ അറിയില്ലെന്നു കടകംപള്ളിക്ക് പറയാനാകുമോയെന്ന് സതീശൻ

പന്തളം: ഉണ്ണിക്കൃഷ്ണൻ പോറ്റിയെ അറിയില്ലെന്ന് മുൻ ദേവസ്വം മന്ത്രി കടകംപള്ളി സുരേന്ദ്രനു പറയാനാകുമോയെന്ന് പ്രതിപക്ഷ നേതാവ് വി.ഡി. സതീശൻ. കെപിസിസി നേതൃത്വത്തിൽ സംസ്ഥാനത്തിന്‍റെ വിവിധ ഭാഗങ്ങളിൽനിന്നെത്തിയ വിശ്വാസ സംരക്ഷണ യാത്രകളുടെ സമാപന സംഗമം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. തിരുവനന്തപുരത്ത് ഉണ്ണിക്കൃഷ്ണൻ പോറ്റിയും കടകംപള്ളി സുരേന്ദരനും ചേർന്നു വീടുവച്ചു നൽകിയത് ഉൾപ്പെടെയുള്ള കാര്യങ്ങൾ അറിയാമെന്നും വെല്ലുവിളി സ്വീകരിക്കാൻ മുൻ മന്ത്രി തയാറുണ്ടോയെന്നും സതീശൻ ആരാഞ്ഞു. കള്ളന്മാർക്ക് ഒരു കുഴപ്പമുണ്ട്, കളവ് ആരും അറിഞ്ഞില്ലെങ്കിൽ അവർ വീണ്ടും കക്കാൻ പോകും. അയ്യപ്പന്‍റെ സ്വർണം ആരാണ് മോഷ്ടിച്ചതെന്നു പിണറായി വിജയന് അറിയാമെന്നും പ്രതിപക്ഷ നേതാവ് പറഞ്ഞു. കമിഴ്ന്നുവീണാൻ കാൽപ്പണം കൊണ്ടുപോകുന്നവരാണ് കേരളം ഭരിക്കുന്നത്. ഈ കപടഭക്തരെ നിയമത്തിന്‍റെ മുന്നിൽ കൊണ്ടുവരുന്നതു വരെ യുഡിഎഫും കോൺഗ്രസും പോരാടും. നാമജപഘോഷയാത്രയുമായി ബന്ധപ്പെട്ട കേസുകൾ യുഡിഎഫ് അധികാരത്തിൽ വരുമ്പോൾ പിൻവലിക്കും. 2026 ഏപ്രിൽ നടക്കുന്ന തെരഞ്ഞെടുപ്പിൽ 100 സീറ്റുമായി യുഡിഎഫ് അധികാരത്തിൽ വരുമെന്നും വി.ഡി. സതീശൻ പറഞ്ഞു. കെപിസിസി പ്രസിഡന്‍റ് സണ്ണി ജോസഫ് അധ്യക്ഷത വഹിച്ചു. ജാഥാ ക്യാപ്റ്റൻമാരായ കെ. മുരളീധരൻ, അടൂർ പ്രകാശ് എംപി, ബെന്നി ബഹന്നാൻ എംപി, കൊടിക്കുന്നിൽ സുരേഷ് എംപി എന്നിവരുടെ നേതൃത്വത്തിൽ വെള്ളിയാഴ്ച ചെങ്ങന്നൂരിൽ സംഗമിച്ച യാത്രകൾ ഇന്നലെ ഉച്ചകഴിഞ്ഞ് കാരയ്ക്കാട്ടുനിന്നും കാൽനടയായാണ് എംസി റോഡിലൂടെ പന്തളത്തേക്ക് നീങ്ങിയത്. പന്തളത്തെ സമാപന യോഗത്തിൽ യുഡിഎഫ് നേതാക്കളായ പി.ജെ. ജോസഫ് എംഎൽഎ, എം.എം. ഹസൻ, സി.പി. ജോൺ, എൻ.കെ. പ്രേമചന്ദ്രൻ എംപി, ഷിബു ബേബി ജോൺ, അനൂപ് ജേക്കബ് എംഎൽഎ, എൻ. ഷംസുദീൻ എംഎൽഎ, കോൺഗ്രസ് നേതാക്കളായ ആന്‍റോ ആന്‍റണി എംപി, എഐസിസി ജനറൽ സെകട്ടറി അറി അഴകൻ, എംഎൽഎ മാരായ രമേശ് ചെന്നിത്തല, എ.പി അനിൽകുമാർ, പി.സി. വിഷ്ണുനാഥ്, മാത്യു കുഴൽനാടൻ, ചാണ്ടി ഉമ്മൻ, മുൻ മന്ത്രിമാരായ പന്തളം സുധാകരൻ, വി.എസ്. ശിവകുമാർ, ഡിസിസി പ്രസിഡന്‍റ് സതീഷ് കൊച്ചുപറമ്പിൽ, രമ്യ ഹരിദാസ്, ബിന്ദു കൃഷ്ണ, ഷാനിമോൾ ഉസ്മാൻ, പഴകുളം മധു , അജയ് തറയിൽ, അബിൻ വർക്കി എന്നിവർ പ്രസംഗിച്ചു.

സ്വർണപ്പാളി വിവാദത്തിൽ ഗൂഢാലോചന ആവർത്തിച്ച് മന്ത്രി വി.എൻ. വാസവൻ

പത്തനംതിട്ട: പന്പയിൽ നടന്ന ആഗോള അയ്യപ്പസംഗമം വൻവിജയമായതിനു പിന്നാലെ നടന്ന ഗൂഢാലോചനയാണ് സ്വർണപ്പാളി വിവാദത്തിനു പിന്നിലെന്ന് മന്ത്രി വി.എൻ. വാസവൻ. പത്തനംതിട്ടയിലെ ദേവസ്വം ബോർഡ് ഓഫീസിനു നേരേയുണ്ടായ യൂത്ത് കോൺഗ്രസ് ആക്രമണങ്ങളിൽ പ്രതിഷേധിച്ച് എൽഡിഎഫ് ജില്ലാ കമ്മിറ്റി സംഘടിപ്പിച്ച പ്രതിഷേധയോഗം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. സ്വർണപ്പാളി നഷ്ടപ്പെട്ട വിവരം അതുവരെ മിണ്ടാതിരുന്ന ഉണ്ണിക്കൃഷ്ണൻ പോറ്റി സംഗമത്തിനു പിന്നാലെ വെളിപ്പെടുത്തയതിന്‍റെ ഉദ്ദേശ്യം ഇതോടെ വ്യക്തമായി. ഒടുവിൽ ഉണ്ണിക്കൃഷ്ണൻ പോറ്റിയും അയാളെ സഹായിച്ചവരും പ്രതികളായി. അയ്യപ്പന്‍റെ ഒരുതരി പൊന്ന് നഷ്ടപ്പെടാൻ ഗവൺമെന്‍റ് അനുവദിക്കില്ല. പൊന്ന് കട്ടവരെ കൽതുറുങ്കലിൽ അടയ്ക്കുകതന്നെ ചെയ്യുമെന്നും മന്ത്രി പറഞ്ഞു. അടുത്തവർഷം നടക്കുന്ന നിയമസഭ തെരഞ്ഞെടുപ്പിൽ അധികാരത്തിലെത്താൻ കഴിയില്ലായെന്ന പരിഭ്രമം കാരണമാണ് ശബരിമല വിഷയത്തിൽ കോൺഗ്രസ് അതിക്രമങ്ങളിലേക്കു കടക്കുന്നതെന്ന് മന്ത്രി പറഞ്ഞു. സ്വർണപ്പാളി നഷ്ടപ്പെട്ട വിഷയം നിയമസഭയിൽ എത്തിയപ്പോൾ രമേശ് ചെന്നിത്തല ആവശ്യപ്പെട്ടത് ഹൈക്കോടതി ജഡ്ജിയുടെ മേൽനോട്ടത്തിൽ അന്വേഷണം നടത്തണെന്നായിരുന്നു. ഈ ആവശ്യം ഗവൺമെന്‍റ് അംഗീകരിച്ചതാണ്. ഗവൺമെന്‍റും ദേവസ്വം ബോർഡും ഇക്കാര്യം ഹൈക്കോടതിയെ അറിയിക്കുകയും കോടതിയുടെ നിർദ്ദേശ പ്രകാരം സ്പെഷൽ ടീമിനെ നിയോഗിച്ച് അന്വേഷണം നടത്തി മുഖ്യപ്രതിയെ അറസ്റ്റ് ചെയ്യുകയുമുണ്ടായി. കോൺഗ്രസ് നടത്തുന്ന സമരങ്ങൾ ജനങ്ങളുടെ കണ്ണിൽ പൊടിയിടാൻ മാത്രമാണെന്നും വാസവൻ പറഞ്ഞു.സിപിഐ ജില്ലാ സെക്രട്ടറി ചിറ്റയം ഗോപകുമാർ അധ്യക്ഷത വഹിച്ചു. സിപിഎം ജില്ലാ സെക്രട്ടറി രാജു ഏബ്രഹാം, കെ.പി. ഉദയഭാനു, കെ.ജി. രതീഷ് കുമാർ, അലക്സ് കണ്ണമല, കെ.യു. ജനീഷ് കുമാർ എംഎൽഎ, ജില്ലാ പഞ്ചായത്ത് പ്രസിഡന്‍റ് ജോർജ് ഏബ്രഹാം, സജി അലക്സ്, മാത്യൂസ് ജോർജ്, പി. പി. ജോർജ് കുട്ടി, അരുണ്‍ കെ. എസ്. മണ്ണടി, മനു വാസുദേവ്, മനോജ് മാധവശേരി, രാജു നെടുവംപുറം, നൂർ മുഹമ്മദ്, ബിജി ജോസഫ്, സുമേഷ് ഐശ്വര്യ, എം.വി. സഞ്ജു, ബി. ഹരിദാസ് തുടങ്ങിയവര്‍ പ്രസംഗിച്ചു.

പത്തനംതിട്ട സർക്കാർ നഴ്സിംഗ് കോളജിന് അംഗീകാരം

പത്തനംതിട്ട: സര്‍ക്കാര്‍ നഴ്‌സിംഗ് കോളജിന് ഇന്ത്യന്‍ നഴ്‌സിംഗ് കൗണ്‍സിലിന്‍റെ അംഗീകാരം ലഭിച്ചതായി മന്ത്രി വീണാ ജോര്‍ജ്. ഇതോടെ പുതുതായി ആരംഭിച്ച എല്ലാ സര്‍ക്കാര്‍, സര്‍ക്കാര്‍ അനുബന്ധ നഴ്‌സിംഗ് കോളജുകള്‍ക്കും അനുമതി ലഭ്യമായി. ഈ സര്‍ക്കാരിന്‍റെ കാലത്ത് 22 സര്‍ക്കാര്‍, സര്‍ക്കാര്‍ അനുബന്ധ നഴ്‌സിംഗ് കോളജുകളാണ് ആരംഭിച്ചതെന്നും നാലു മെഡിക്കല്‍ കോളജുകള്‍ക്കും അനുമതി ലഭിച്ചതായും മന്ത്രി പറഞ്ഞു. അംഗീകാരം രണ്ടുവർഷത്തെ ശ്രമങ്ങൾക്കു ശേഷം സര്‍ക്കാര്‍ നഴ്‌സിംഗ് കോളജിന് ഇന്ത്യന്‍ നഴ്‌സിംഗ് കൗണ്‍സില്‍ അംഗീകാരം ലഭിച്ചത് രണ്ടുവർഷത്തെ ശ്രമങ്ങൾക്കുശേഷമാണ്. നിലവിൽ രണ്ടു ബാച്ച് നഴ്സിംഗ് വിദ്യാർഥികൾ കോളജിലുണ്ട്. മൂന്നാമത്തെ ബാച്ചാണ് ഇക്കൊല്ലം പ്രവേശനം നേടുന്നത്. 2023, 2024 ബാച്ചുകളുടെ അംഗീകാരം സംബന്ധിച്ച അവ്യക്തതയുണ്ട്. 2023ലാണ് കോളജ് ആരംഭിച്ചത്. പത്തനംതിട്ട കോളജ് റോഡിലെ വാടകക്കെട്ടിടത്തിലാണ് കോളജ് പ്രവർത്തിക്കുന്നത്. അടിസ്ഥാന സൗകര്യങ്ങളുടെ കുറവു കാരണമാണ് അംഗീകാരം ലഭിക്കാതെ പോയത്. അടിസ്ഥാനസൗകര്യംഒരുക്കണമെന്ന് ആവശ്യപ്പെട്ട് നിരവധിസമരങ്ങളും കോളജിലും പുറത്തുമായി നടന്നു. കോളജിന് സൗകര്യങ്ങൾ ഉറപ്പാക്കുമെന്നു പരിശോധനയ്ക്കെത്തിയ ഐഎൻസി സംഘത്തിന് അധികൃതർ ഉറപ്പുനൽകിയിരുന്നു. ക്ലാസ് മുറികളടക്കം പ്രവർത്തിക്കുന്നത് അസൗകര്യങ്ങളുടെ നടുവിലാണ്. ശൗചാലയങ്ങളുമില്ല. വിദ്യാർഥികൾക്ക് ക്ലിനിക്കൽ സൗകര്യം നൽകുന്നത് കോന്നി സർക്കാർ മെഡിക്കൽ കോളജിലേക്കാണ്. സ്വന്തമായി ബസ് ലഭിച്ചതോടെ കുട്ടികൾക്ക് യാത്രാസൗകര്യമായിട്ടുണ്ട്. കൂടുതൽ സൗകര്യമുള്ള കെട്ടിടത്തിലേക്കു കോളജ് മാറ്റുന്നതിനുള്ള ആലോചനയിലാണ്. ഓരോബാച്ചിലും 60 കുട്ടികൾ വീതമാണുള്ളത്.

ശബരിമല സ്വർണക്കൊള്ള : കുടുക്കിയതെന്ന് പോറ്റി; ഉത്തരം തേടി അന്വേഷണസംഘം

പത്തനംതിട്ട: ശബരിമല സ്വര്‍ണക്കൊള്ളയുമായി ബന്ധപ്പെട്ട കേസില്‍ തന്നെ കുടുക്കിയതാണെന്ന ഉണ്ണിക്കൃഷ്ണന്‍ പോറ്റിയുടെ വെളിപ്പെടുത്തൽ സംബന്ധിച്ച കൂടുതല്‍ അന്വേഷണത്തിന് എസ്‌ഐടി. സ്വര്‍ണക്കൊള്ളയുമായി ബന്ധപ്പെട്ട കേസില്‍ പ്രധാന പ്രതിസ്ഥാനത്തെത്തിയശേഷം പോറ്റി നടത്തിയ ചില നീക്കങ്ങള്‍ അന്വേഷണസംഘം നിരീക്ഷിച്ചുവരികയായിരുന്നു. പോറ്റി ഒളിവില്‍ പോയേക്കുമെന്ന സൂചനകളുടെ അടിസ്ഥാനത്തിലാണ് അറസ്റ്റുണ്ടായതെന്നും റിമാന്‍ഡ് റിപ്പോര്‍ട്ടിൽതന്നെ അന്വേഷണ ഉദ്യോഗസ്ഥൻ വ്യക്തമാക്കിയിട്ടുണ്ട്. ശ്രീകോവിലിനു മുമ്പിലെ ദ്വാരപാലക ശില്പങ്ങളിലെ സ്വര്‍ണപ്പാളികള്‍ 2019ല്‍ പുറത്തുകൊണ്ടുപോകുകയും അതില്‍ സ്വര്‍ണം നഷ്ടപ്പെടുകയും ചെയ്തതിനു പിന്നില്‍ പ്രവര്‍ത്തിച്ചവരെത്തേടിയാണ് എസ്‌ഐടി പോറ്റിയെ കസ്റ്റഡിയില്‍ വാങ്ങിയിരിക്കുന്നത്. ഇതിനു പിന്നിലെ ഗൂഢാലോചന വിശദമാക്കുന്ന റിപ്പോർട്ട് കോടതിക്കു നൽകിയതിനു പിന്നാലെയാണ് 14 ദിവസത്തേക്ക് പോറ്റിയെ അന്വേഷണസംഘത്തിന്‍റെ കസ്റ്റഡിയിൽ വിട്ടുനൽകിയത്. ദ്വാരപാലക ശില്പങ്ങള്‍ക്കു പിന്നാലെ സ്വര്‍ണം പൂശിയ കട്ടിളപ്പടികളും പുറത്തുകൊണ്ടുപോയതും സമാനമായ സാഹചര്യത്തില്‍ വീണ്ടും ദ്വാരപാലക ശില്പങ്ങള്‍ പുറത്തുകൊണ്ടുപോയതും ശബരിമലയിൽ നടന്നുവന്ന സ്വർണക്കൊള്ളയുടെ ആഴം വ്യക്തമാക്കുന്നതാണ്. ഇക്കാര്യത്തില്‍ പോറ്റിക്കു സഹായം ചെയ്തവര്‍ ആരെല്ലാമെന്നതു സംബന്ധിച്ച് റിമാന്‍ഡ് റിപ്പോര്‍ട്ടില്‍ ചില സൂചനകളുണ്ട്. ഉന്നതരുമായി പ്രധാന പ്രതിക്കുള്ള ബന്ധവും ഇതു വ്യക്തമാക്കുന്നു. സ്വര്‍ണക്കൊള്ളയില്‍ ചെന്നൈ കമ്പനിയായ സ്മാര്‍ട് ക്രിയേഷന്‍റെയും ദേവസ്വം ബോര്‍ഡിന്‍റെയും പങ്ക് വ്യക്തമാക്കിയിട്ടുള്ള റിമാന്‍ഡ് റിപ്പോര്‍ട്ടില്‍ സ്വര്‍ണക്കൊള്ളയ്ക്കു പിന്നിലെ വിവരങ്ങള്‍തേടി ഉണ്ണിക്കൃഷ്ണന്‍ പോറ്റിയുമായി ബംഗളൂരു, ഹൈദരാബാദ്, ചെന്നൈ എന്നിവിടങ്ങളില്‍ തെളിവെടുപ്പ് നടത്തും. രാഷ്‌ട്രപതിയുടെ സന്ദര്‍ശനത്തിനുശേഷം ശബരിമലയിലും പോറ്റിയുമായി അന്വേഷണസംഘം എത്തും. 30 വരെയാണ് പോറ്റിയെ എസ്‌ഐടിയുടെ കസ്റ്റഡിയില്‍ വിട്ടിരിക്കുന്നത്. കേസിലെ രണ്ടാം പ്രതി കല്പേഷിനെ ചോദ്യം ചെയ്യലിനായി ഹാജരാകാൻ നോട്ടീസ് നൽകിയിട്ടുണ്ട്. ശബരിമലയിൽ സ്പോൺസറായി എത്തിയതു മുതൽ പോറ്റിക്ക് ദേവസ്വം ഉദ്യോഗസ്ഥരുമായുള്ള ബന്ധത്തിന്‍റെ ചുരുൾ നിവരുന്നതിലേക്കാണ് അന്വേഷണ സംഘം നീങ്ങുന്നതെന്നാണ സൂചന. ദേവസ്വം ഉന്നതരുടെ സഹായത്തോടെ ശബരിമലയിലെ ദ്വാരപാലക ശില്പങ്ങളില്‍നിന്ന് അഴിച്ചെടുത്ത സ്വര്‍ണ കവചിതമായ പാളികള്‍ ബംഗുളൂരു, ഹൈദരാബാദുവഴി ചെന്നൈയിലെ അമ്പത്തൂരിലുള്ള സ്മാര്‍ട്ട് ക്രിയേഷന്‍സില്‍ എത്തിച്ച ശേഷം പുറത്തുനിന്നും ആളെ വരുത്തി ചെമ്പുപാളികളില്‍ പൊതിഞ്ഞ സ്വര്‍ണം പൂര്‍ണമായി വേര്‍തിരിച്ചെടുക്കുകയായിരുന്നു. ഈ സ്വര്‍ണം പോറ്റി എടുത്തതായാണ് വിവരം. ‌ശില്പത്തില്‍ പൊതിഞ്ഞ സ്വര്‍ണത്തില്‍ ഒരു തരിപോലും പൂശാന്‍ ഉപയോഗിച്ചില്ലെന്നാണ് കണ്ടെത്തല്‍. പകരം സ്‌പോണ്‍സര്‍മാരില്‍നിന്നു ലഭിച്ച 394 ഗ്രാം സ്വര്‍ണമാണ് ഇതിനായി ഉപയോഗിച്ചത്. ഇത്തരത്തില്‍ നടന്ന സ്വര്‍ണക്കൊള്ളയ്ക്കു ദേവസ്വം ബോര്‍ഡും ഉദ്യോഗസ്ഥരും സ്മാര്‍ട്ട് ക്രിയേഷൻസും ഗൂഢാലോചനയില്‍ പങ്കാളികളായതായി റിമാൻഡ് റിപ്പോര്‍ട്ട് വ്യക്തമാക്കുന്നു. ശബരിമല ശ്രീകോവില്‍ സ്വര്‍ണം പൂശുന്നതായി പറഞ്ഞു നിരവധി പേരില്‍നിന്നു പോറ്റി പണം തട്ടി. സ്വർണപ്പാളികൾ എത്തിച്ച് പൂജ നടത്തിയ പ്രമുഖരുടെ വസതികളിലും തെളിവെടുപ്പ് നടത്തും. ബന്ധപ്പെട്ട എല്ലാവരെയും ചോദ്യം ചെയ്യും. പോറ്റിയുടെ നേതൃത്വത്തില്‍ ശബരിമലയില്‍ ആചാരലംഘനം നടത്തി അയ്യപ്പഭക്തരുടെ വിശ്വാസത്തെ വൃണപ്പെടുത്തിയതായി റിപ്പോര്‍ട്ടില്‍ പറയുന്നു. കേസില്‍ കൂടുതല്‍ പേര്‍ പ്രതികളായി വരുമെന്ന് ഒമ്പതു പേജുള്ള റിപ്പോര്‍ട്ടില്‍ സൂചനയുണ്ട്.

കീഴ്‌‌വായ്പൂരിൽ വീട്ടമ്മ പൊള്ളലേല്പിച്ച ആശാ പ്രവർത്തക മരിച്ചു

മല്ലപ്പള്ളി: പെള്ളലേറ്റു ചികിത്സയിലായിരുന്ന കീഴ്വായ്പൂരിലെ ആശാ പ്രവർത്തക മരിച്ചു. കീഴ്വായ്പൂര് പോലീസ് സ്റ്റേഷനു സമീപം താമസിച്ചിരുന്ന മല്ലപ്പള്ളി പഞ്ചായത്ത് പതിനൊന്നാം വാര്‍ഡ് ആശാപ്രവര്‍ത്തക ലതാകുമാരിയാണ് (61) മരിച്ചത്. സമീപവാസിയായ പോലീസ് ഉദ്യോഗസ്ഥന്‍റെ ഭാര്യ സുമയ്യ സുബൈർ സംഭവവുമായി ബന്ധപ്പെട്ട് റിമാന്‍ഡിലാണ്. വീട്ടില്‍ അതിക്രമിച്ചുകയറി തീവച്ചുവെന്നാണ് കേസ്. കഴിഞ്ഞ ഒമ്പതിനു വൈകുന്നേരം 4.30നാണ് ലതയ്ക്കു ഗുരുതരമായി പൊള്ളലേറ്റത്. വീടിനു സമീപമുള്ള പോലീസ് ക്വാര്‍ട്ടേഴ്‌സില്‍ താമസിക്കുന്ന കോയിപ്രം പോലീസ് സ്റ്റേഷനിലെ സിവില്‍ പോലീസ് ഓഫീസര്‍ ഇര്‍ഷാദിന്‍റെ ഭാര്യ കൃഷ്ണപുരം സ്വദേശിനി സുമയ്യ സുബൈര്‍ വീട്ടില്‍ അതിക്രമിച്ചു കയറി സ്വര്‍ണാഭരണങ്ങള്‍ ആവശ്യപ്പെട്ടെന്നും വിസമ്മതിച്ചപ്പോള്‍ കട്ടിലില്‍നിന്ന് പിടിച്ച് എഴുന്നേല്പിച്ച് കസേരയില്‍ ഇരുത്തി കഴുത്തില്‍ തുണിചുറ്റി കൊല്ലാന്‍ ശ്രമിച്ചതായും ആഭരണങ്ങൾ കവര്‍ന്നശേഷം കത്തികൊണ്ട് മുഖത്തു കുത്തി മുറിവേല്‍പിച്ചതായും തുടര്‍ന്ന് കട്ടിലില്‍ ബന്ധിച്ച ശേഷം മെത്തയ്ക്ക് തീയിട്ടതായും എസഐ കെ. രാജേഷിന് നല്‍കിയ മൊഴിയില്‍ ലതാകുമാരി പറഞ്ഞിരുന്നു. പൊള്ളലേറ്റും മുറിവുകളേറ്റും ഗുരുതരാവസ്ഥയിലാണ് ലതാകുമാരിയെ ആശുപത്രിയിലെത്തിച്ചത്. പരാതിയെത്തുടര്‍ന്ന് പോലീസ് ഉദ്യോഗസ്ഥന്‍റെ ഭാര്യ സുമയ്യയെ അറസ്റ്റ് ചെയ്തു. പോലീസ് ഉദ്യോഗസ്ഥന്‍റെ ക്വാര്‍ട്ടേഴ്‌സ് പൂട്ടി സീല്‍വയ്ക്കുകയും ചെയ്തു. കീഴ്‌വായ്പൂര് പോലീസ് എസ്എച്ച്ഒ വിപിന്‍ ഗോപിനാഥിന്‍റെ നേതൃത്വത്തില്‍ നടത്തിയ പരിശോധനയില്‍, കോയിപ്രം സ്റ്റേഷനിലെ സിവില്‍ പോലീസ് ഓഫീസര്‍ ഇര്‍ഷാദും കുടുംബവും താമസിക്കുന്ന ക്വാര്‍ട്ടേഴ്‌സിന്‍റെ ശൗചാലയത്തിലെ ഫ്‌ളഷ് ടാങ്കില്‍നിന്ന് സ്വര്‍ണം കണ്ടെത്തി. വിരലടയാള വിദഗ്ധരും ഫോറന്‍സിക് ഉദ്യോഗസ്ഥരും സംഭവസ്ഥലം പരിശോധിച്ചു തെളിവുകള്‍ ശേഖരിച്ചു. തിരുവല്ല ഡി വൈഎസ്പി എസ്. നന്ദകുമാറിന്‍റെ നേതൃത്വത്തില്‍ പോലീസും വിരലടയാള വിദഗ്ധരടങ്ങുന്ന സംഘവുമാണ് അന്വേഷണം നടത്തിയത്. കീഴ വായപൂര് ഇന്‍സ്‌പെക്ടര്‍ വിപിന്‍ ഗോപിനാഥാണ് സുമയ്യയെ അറസ്റ്റ് ചെയ്തത്. പൊള്ളലേറ്റ ലതാകുമാരി കോട്ടയം മെഡിക്കല്‍ കോളജ് ആശുപത്രിയില്‍ ഗുരുതരാവസ്ഥയില്‍ ചികിത്സയിലായിരുന്നു. വെള്ളിയാഴ്ച രാത്രി 11 ഓടെയാണ് ഇവര്‍ മരിച്ചത്. മൃതദേഹം മല്ലപ്പള്ളിയിലെ സ്വകാര്യ ആശുപത്രി മോര്‍ച്ചറിയിലേക്കു മാറ്റി. സംസ്കാരം നാള 12ന് വീട്ടുവളപ്പിൽ. മകൾ: താര ദ്രൗപദി (യുകെ). മരുമകൻ: കൊട്ടാരക്കര സുജിത്‌ഭവനിൽ സുജിത് (യുകെ). സംഭവത്തിനു പിന്നിൽ സുമയ്യയുടെ കടബാധ്യത മല്ലപ്പള്ളി: ആശാപ്രവർത്തക ലതാകുമാരിയെ തീകൊളുത്തി കൊലപ്പെടുത്തിയ സുമയ്യ ഓണ്‍ലൈന്‍ വായ്പാ ആപ് ഇടപാടുകളിലും ഓൺലൈൻ ഓഹരി വ്യാപാരത്തിലുടെയും ലക്ഷക്കണക്കിനു രൂപയുടെ ബാധ്യത വരുത്തിയിരുന്നതായി പോലീസ്. കോയിപ്രം പോലീസ് സ്റ്റേഷനിലെ സിപിഒ ആയ ഭർത്താവ് ഇർഷാദ് അറിയാതെയായിരുന്നു സുമയ്യയുടെ ഓണ്‍ലൈന്‍ ഇടപാടുകളെന്നും പോലീസ് കണ്ടെത്തി. ലക്ഷക്കണക്കിന് രൂപയുടെ നഷ്ടം വന്നതോടെ കടംവീട്ടാന്‍ പല മാർഗങ്ങളും തേടിയ സുമയ്യ അവസാനം കണ്ടെത്തിയ മാർഗമാണ് ലതാകുമാരിയുടെ സ്വർണാഭരണങ്ങൾ തട്ടിയെടുക്കുകയെന്നത്. അടുത്ത സുഹൃത്തു കൂടിയായ ലതാകുമാരിയോട് ഒരുലക്ഷം രൂപ വായ്പ ആവശ്യപ്പെട്ടെങ്കിലും ഇവർ നൽകിയില്ല. ഇതേത്തുടർന്ന് സ്വര്‍ണാഭരണങ്ങള്‍ ആവശ്യപ്പെട്ടെങ്കിലും ലതാകുമാരി നൽകിയില്ല. ഇതോടെയാണ് സുമയ്യ കവര്‍ച്ചയ്ക്കു പദ്ധതി തയാറാക്കിയത്. ലതാകുമാരിക്കു മുമ്പുണ്ടായ പക്ഷാഘാതത്തിന്‍റെ ഫലമായി ആരോഗ്യപ്രശ്നങ്ങൾ ഉണ്ടായിരുന്നു. ഏഴുമാസം പ്രായമുള്ള ഇളയ കുട്ടിയുമായാണ് കൃത്യം നിറവേറ്റുന്നതിനായി സുമയ്യ പുളമലയിലെ ലതാകുമാരിയുടെ വീട്ടിലെത്തിയത്. ആരോഗ്യക്കുറവ് ഉണ്ടായിരുന്ന ലതയെ വേഗത്തിൽ കീഴ്പ്പെടുത്താനാകുമെന്ന് ഇവർ കരുതിയിരുന്നു. ലതയുടെ ഭര്‍ത്താവ് കീഴ്‌വായ്പൂരില്‍ ജനസേവാകേന്ദ്രം നടത്തുന്ന രാമന്‍കുട്ടി വീട്ടിൽ ഇല്ലാതിരുന്ന സമയത്തായിരുന്നു സംഭവം. കുട്ടിയെ അടുത്ത മുറിയില്‍ കിടത്തിയ ശേഷം ലതയെ കത്തി കാണിച്ചു ഭീഷണിപ്പെടുത്തിയാണ് കീഴ്പ്പെടുത്തിയത്. പിന്നീട് കെട്ടിയിട്ട് സ്വർണാഭരണങ്ങൾ കവർന്നു. രണ്ടരപവന്‍റെ മാലയും ഓരോ പവൻ വീതമുള്ള മൂന്നു വളകളും എടുത്തശേഷം മണ്ണെണ്ണ ഒഴിച്ച് തീ കൊളുത്തി.

ശ്രേഷ്ഠ കാതോലിക്കാ ബാവയ്ക്കു നാളെ സ്വീകരണം

അയിരൂർ: യാക്കോബായ സുറിയാനി സഭയുടെ പ്രാദേശിക തലവൻ ശ്രേഷ്ഠ കാതോലിക്ക ബസേലിയോസ് ജോസഫ് ബാവയ്ക്ക് നാളെ അയിരൂർ മുട്ടുമൺ സെന്‍റ് മേരീസ് യാക്കോബായ സുറിയാനി പള്ളിയിൽ സ്വീകരണം നൽകും. വൈകുന്നേരം 4.30ന് പള്ളിയിലെത്തുന്ന കതോലിക്കാ ബാവയെ തുന്പമൺ ഭദ്രാസനാധിപൻ യൂഹാനോൻ മാർ മിലിത്തിയോസ് മെത്രാപ്പോലീത്തയുടെയും വൈദികരുടെയും നേതൃത്വത്തിൽ സ്വീകരിക്കും. തുടർന്ന് സ്വീകരണഘോഷയാത്രയായി തീയാടിക്കൽ വഴി കുന്പളന്താനം സെന്‍റ് മേരീസ് സ്കൂൾ അങ്കണത്തിൽ എ.ജെ. ജോസ് തടിയിൽ അനുസ്മരണ സമ്മേളന നഗറിലെത്തിക്കുമെന്ന് ഇടവക വികാരി ഫാ. ടോം മാത്യു, കൺവീനർ മാത്യൂസ് മോഹൻ എന്നിവർ അറിയിച്ചു.

92ന്‍റെ നിറവിലും നീന്തൽക്കുളത്തിൽ അവർ താരങ്ങൾ

തിരുവല്ല: പതിനാലാമത് കേരള സ്റ്റേറ്റ് മാസ്റ്റേഴ്‌സ് നീന്തൽ ചാമ്പ്യൻഷിപ്പിൽ വെള്ളത്തെ അതിജീവിച്ച് തരംഗങ്ങൾ സൃഷ്ടിച്ച് വയോധിക താരങ്ങൾ. തൃശൂരിൽനിന്നുള്ള പ്രഫ. സി.പി. മാത്യു, കോട്ടയം മെഡിക്കൽ കോളജ് മുൻ പ്രിൻസിപ്പൽ കൂടിയായ തിരുവനന്തപുരം സ്വദേശി ഡോ. സാറാ വർഗീസ് (92) എന്നിവരാണ് ശ്രദ്ധേയരായത്. 90 പ്ലസ് ബാക്ക്‌സ്ട്രോക്ക് മത്സരത്തിൽ പങ്കെടുത്ത രണ്ടു വെറ്ററൻമാരും സ്വർണം നേടി. സായത്തമാക്കിയ നീന്തൽ കഴിവുകളിലൂടെ കായികരംഗത്തോടു വാർധക്യത്തിലും അവർ കാട്ടിയ അചഞ്ചലമായ സമർപ്പണം കാണികളുടെ കൈയടി നേടി.

സംസ്ഥാന മാസ്റ്റേഴ്സ് നീന്തൽ ചാന്പ്യൻഷിപ്പിനു തുടക്കം

തിരുവല്ല: നവംബറിൽ ഹൈദരാബാദിൽ നടക്കുന്ന നാഷണൽ മാസ്റ്റേഴ്സ് നീന്തൽ ചാമ്പ്യൻഷിപ്പിനു മുന്നോടിയായി കേരള അക്വാട്ടിക് അസോസിയേഷന്‍റെ ആഭിമുഖ്യത്തിൽ പത്തനംതിട്ട ജില്ലാ അക്വാട്ടിക് അസോസിയേഷൻ സംഘടിപ്പിക്കുന്ന 14-ാമത് സംസ്ഥാന മാസ്റ്റേഴ്സ് നീന്തൽ ചാമ്പ്യൻഷിപ്പ് തിരുവല്ല ബിലീവേർസ് ചർച്ച് സ്‌കൂൾ സ്വിമ്മിംഗ് പൂളിൽ ആരംഭിച്ചു. ജില്ലാ അക്വാട്ടിക് അസോസിയേഷൻ പ്രസിഡന്‍റ് കോശി തോമസിന്‍റെ അധ്യക്ഷതയിൽ ആന്‍റോ ആന്‍റണി എംപി ചാന്പ്യൻഷിപ്പ് ഉദ്ഘാടനം ചെയ്തു. റെജിനോൾഡ് വര്ഗീസ് സ്വാഗതവും വൈസ് പ്രസിഡന്‍റ് ജെറി നന്ദിയും പറഞ്ഞു. കോന്പറ്റീഷൻ പൂളിന്‍റെ ഉദ്ഘാടനം വേൾഡ് സ്വിമ്മിംഗ് ഫെഡറേഷന്‍റെ ടെക്‌നികൽ കമ്മിറ്റി മെംബർ എസ്. രാജീവും ആദ്യമത്സരം ബിലീവേഴ്സ് സ്കൂൾ മാനേജർ ഫാ. സാമുവേൽ മാത്യുവും നിർവഹിച്ചു . വിവിധ ജില്ലകളെ പ്രതിനിധീകരിച്ച് 25 വയസിനു മുകളിലുള്ള 350 പുരുഷ - വനിതാ താരങ്ങൾ രണ്ടു റിലേ ഉൾപ്പടെ 14 നീന്തൽ ഇനങ്ങളിലായി മത്സരിക്കും. 2013ൽ പത്തനംതിട്ട ജില്ലാ അക്വാട്ടിക് അസോസിയേഷന്‍റെ ആഭിമുഖ്യത്തിൽ പമ്പാ നദിയിൽ നടത്തിയ സംസ്ഥാന ദീർഘദൂര നീന്തൽ മത്സരത്തിനു ശേഷം ആദ്യമായിട്ടാണ് ഒരു സംസ്ഥാന നീന്തൽ മത്സരം പത്തനംതിട്ട ജില്ലയിൽ നടക്കുന്നത്.

സമൂഹത്തിനു വേണ്ടത് നല്ല സമരിയക്കാരെ: വി.ഡി. സതീശൻ

അയിരൂർ: ആവശ്യത്തിലിരിക്കുന്നവരെ സഹായിക്കുന്ന നല്ല സമരിയാക്കാരെയാണ് സമൂഹം ആവശ്യപ്പെടുന്നതെന്നും ക്രിസ്തുവചനം ഇതാണ് പഠിപ്പിക്കുന്നതെന്നും പ്രതിപക്ഷ നേതാവ് വി.ഡി. സതീശൻ. അയിരൂർ ചെറുകോൽപ്പുഴയിൽ യൂഹാനോൻ മാർത്തോമ്മാ ഫൗണ്ടേഷൻ ഉദ്ഘാടനവും കർദിനാൾ ക്ലീമിസ് കാതോലിക്കാ ബാവയ്ക്കു പ്രഥമ പുരസ്കാരം സമ്മാനിച്ചും പ്രസംഗിക്കുകയായിരുന്നു അദ്ദേഹം. സമൂഹത്തിലെ നിരാംലബരെ ചേർത്തുപിടിച്ച യൂഹാനോൻ മാർത്തോമ്മ കാട്ടിത്തന്നത് ക്രിസ്തുവിന്‍റെ സ്നേഹവും അനുകന്പയും ആയിരുന്നു. ക്രിസ്തു മാതൃകയിൽ ജീവിക്കുകയെന്നത് ആധ്യാത്മികതയുടെ അടയാളമാണെന്നും സതീശൻ പറഞ്ഞു. പ്രശ്നങ്ങളിൽ സമചിത്തതയോടെ ഇടപെടാനും അതിനു പരിഹാരം കാണാനും കർദിനാൾ ക്ലീമിസ് ബാവ പ്രകടിപ്പിക്കുന്ന താത്പര്യം മാതൃകാപരമാണ്. സഭയ്ക്കാകമാനം അദ്ദേഹത്തിന്‍റെ നേതൃപാടവം ഗുണകരമാണെന്നും സതീശൻ പറഞ്ഞു. ഫൗണ്ടേഷൻ ചെയർമാൻ റെജി താഴമൺ അധ്യക്ഷത വഹിച്ചു. ഡോ. ജോസഫ് മാർ ബർണബാസ് സഫ്രഗൻ മെത്രാപ്പോലീത്ത, പത്തനംതിട്ട രൂപതാധ്യക്ഷൻ സാമുവേൽ മാർ ഐറേനിയോസ്, ബിലീവേഴ്സ് ചർച്ച് അധ്യക്ഷൻ സാമുവേൽ മാർ തെയോഫിലോസ്, ആന്‍റോ ആന്‍റണി എംപി, പ്രഫ. പി.ജെ. കുര്യൻ, രാജു ഏബ്രഹാം, ടി.കെ.എ. നായർ, ഗ്രാമപഞ്ചായത്ത് പ്രസിഡന്‍റ് അന്പിളി പ്രഭാകരൻ നായർ, ജില്ലാ പഞ്ചായത്തംഗം സാറാ തോമസ്, കെ.എം. വർഗീസ്, ഫാ. ചെറിയാൻ താഴമൺ, ഫാ. കെ.എ. ചെറിയാൻ, ജോബി ജെ. തോമസ് തുടങ്ങിയവർ പ്രസംഗിച്ചു. പുരസ്കാരമായി ലഭിച്ച ഒരു ലക്ഷം രൂപ കർദിനാൾ മാർ ബസേലിയോസ് ക്ലീമിസ് കാതോലിക്കാ ബാവ അയിരൂർ പ്രൊവിഡൻസ് ഹോമിന് കൈമാറി. ഓട്ടിസം ബാധിതരായ 50 കുട്ടികളെ പരിപാലിക്കുന്ന സ്ഥാപനത്തിനുവേണ്ടി ഹോം അധികൃതർ തുക ഏറ്റുവാങ്ങി.

ബ്ലോക്ക് പഞ്ചായത്ത് സംവരണവാര്‍ഡുകളുടെ നറുക്കെടുപ്പ് പൂര്‍ത്തിയായി

പത്തനംതിട്ട: ജില്ലയിലെ മല്ലപ്പള്ളി, പുളിക്കീഴ്, കോയിപ്രം, ഇലന്തൂര്‍, റാന്നി, കോന്നി, പന്തളം, പറക്കോട് ബ്ലോക്ക് പഞ്ചായത്ത് വാര്‍ഡുകളുടെ സംവരണ നറുക്കെടുപ്പ് പൂര്‍ത്തിയായി. കളക്ടറേറ്റ് കോണ്‍ഫറന്‍സ് ഹാളില്‍ ജില്ലാ കളക്ടര്‍ എസ്. പ്രേം കൃഷ്ണന്‍ സംവരണ വാര്‍ഡുകളുടെ നറുക്കെടുത്തു. ജില്ലാ പഞ്ചായത്ത് വാര്‍ഡുകളുടെ സംവരണ നറുക്കെടുപ്പ് 21ന് രാവിലെ 10ന് കളക്ടറേറ്റ് കോൺഫറൻസ് ഹാളിൽ നടക്കും. പുളിക്കീഴ് സ്ത്രീ സംവരണം: 4 - പൊടിയാടി, 5 - കുറ്റൂര്‍, 7 - ഓതറ, 10 - നിരണം, 1 1- കൊമ്പന്‍കേരി, 14 - നെടുമ്പ്രം. പട്ടികജാതി വനിത: 9 - കടപ്ര. പട്ടികജാതി: 1 - ആലംതുരുത്തി. റാന്നി സ്ത്രീ സംവരണം: 3 - നാറാണംമൂഴി, 4 - വെച്ചൂച്ചിറ, 5 - കൊല്ലമുള, 10 - മാമ്പാറ, 11 - വടശേരിക്കര, 12 - വലിയകുളം, 14 - അങ്ങാടി. പട്ടികജാതി: 7 - ആങ്ങമൂഴി മല്ലപ്പള്ളി സ്ത്രീ സംവരണ വാര്‍ഡുകള്‍: 2 - ആനിക്കാട്, 5 - കൊറ്റനാട്, 6 - ചാലാപ്പള്ളി, 12 - കോട്ടൂര്‍, 13 - ആഞ്ഞിലിത്താനം, 14 - കുന്നന്താനം. പട്ടികജാതി സ്ത്രീ സംവരണം: 1 - മുക്കൂര്‍. പട്ടികജാതി സംവരണം: 8 - മല്ലപ്പളളി. കോയിപ്രം സ്ത്രീ സംവരണം: 4 - തെള്ളിയൂര്‍, 6 - പ്ലാങ്കമണ്‍, 7 - അയിരൂര്‍, 10 - പുല്ലാട്, 12 - തട്ടക്കാട്, 14 - നന്നൂര്.‍ പട്ടികജാതി സ്ത്രീ: 3 - വെണ്ണിക്കുളം. പട്ടികജാതി: 11 - കുമ്പനാട്. ഇലന്തൂര്‍ സ്ത്രീ സംവരണം: 3 - കീക്കൊഴൂര്‍, 4 - കടമ്മനിട്ട, 10 - ചെന്നീര്‍ക്കര, 11 - മുട്ടത്തുകോണം, 12 - ഇലന്തൂര്‍, 13 - കുഴിക്കാല. പട്ടികജാതി സ്ത്രീ: 14 - മല്ലപ്പുഴശേരി. പട്ടികജാതി: 1 - കോഴഞ്ചേരി. പറക്കോട് സ്ത്രീ സംവരണം: 2 - പഴകുളം, 7 - അങ്ങാടിക്കല്‍ ഹൈസ്‌ക്കൂള്‍, 11 - ഇളമണ്ണൂര്‍, 12 - കുന്നിട, 13- കൈതപ്പറമ്പ്, 15- വേലുത്തമ്പി ദളവ. പട്ടികജാതി സ്ത്രീ: 4 - വടക്കടത്തുകാവ്, 9 - കൂടല്‍. പട്ടികജാതി: 1 - തെങ്ങമം. കോന്നി സ്ത്രീ സംവരണം: 5 - അതുമ്പുംകുളം, 6 - മെഡിക്കല്‍ കോളജ്, 7- അരുവാപ്പുലം, 8 - വകയാര്‍, 11 - വി-കോട്ടയം, 12 - കൈപ്പട്ടൂര്‍. പട്ടികജാതി സ്ത്രീ: 9 - കോന്നി ടൗണ്‍. പട്ടികജാതി: 1 - മൈലപ്ര. പന്തളം സ്ത്രീ സംവരണം: 4 - തുമ്പമണ്‍താഴം, 9 - കുളനട, 10 - മെഴുവേലി, 11 - ഉള്ളന്നൂര്‍, 12 - മാന്തുക. പട്ടികജാതി സ്ത്രീ: 7 - പൊങ്ങലടി, 13 - വല്ലന. പട്ടികജാതി: 14- നീര്‍വിളാകം

പഴവങ്ങാടിയിൽ പഴുതില്ലാത്ത പോരാട്ടം

പഴവങ്ങാടി ഗ്രാമപഞ്ചായത്ത് റാന്നിയിലെ പ്രധാന മേഖലകൾ ഉൾപ്പെടുന്ന പഴവങ്ങാടി ഗ്രാമപഞ്ചായത്ത്. പുനലൂർ - മൂവാറ്റുപുഴ സംസ്ഥാനപാതയോടു ചേർന്ന പ്രദേശങ്ങൾക്കൊപ്പം പട്ടികജാതി ഉന്നതികളും പ്രദേശങ്ങളും പഞ്ചായത്തിന്‍റെ ഭാഗമാണ്. തിരക്കേറെയുള്ള ഇട്ടിയപ്പാറയിലെ ബസ് സ്റ്റാൻഡ്, അടിസ്ഥാന സൗകര്യ വികസനം, റോഡുകൾ, പാർക്കിംഗ്, മാലിന്യം തുടങ്ങിയവയെല്ലാം വിഷയങ്ങൾ. യുഡിഎഫിനു ഭൂരിപക്ഷമുണ്ടായിരുന്ന പഞ്ചായത്ത് ഭരണസമിതിയുടെ ആദ്യ കാലയളവിൽ അനിത അനിൽ കുമാറായിരുന്നു പ്രസിഡന്‍റ്. പിന്നീടാണ് റൂബി കോശി പ്രസിഡന്‍റായത്. നേട്ടങ്ങൾ ബാധ്യതകളും ജപ്തി ഭീഷണിയുമായി നിലനിന്നിരുന്ന പഞ്ചായത്താണ് പഴവങ്ങാടി. ഗ്രാമപഞ്ചായത്തിനു പുതിയ ആസ്ഥാനമന്ദിരം നിർമിക്കാൻ മൂന്നുലക്ഷം രൂപ വകയിരുത്തി. മത്സ്യഫെഡിന്‍റെ കട തടസംനീക്കി തുടങ്ങി. 2017ൽ പണിത അമിനിറ്റി സെന്‍ററിന് നമ്പർ ഇട്ടു. കോടതി വ്യവഹാരങ്ങൾ മൂലമുള്ള ജപ്തികൾ ഒഴിവാക്കി. പ്രൈവറ്റ് ബസ് സ്റ്റാൻഡ് ഭൂമി 27 ലക്ഷം നൽകി കേസിൽനിന്ന് ഒഴിവാക്കി. ബസ് ടെർമിനൽ നവീകരണം. കൃഷിഭവൻ, മൃഗാശുപത്രി, ആയുർവേദ ആശുപത്രി, ഹോമിയോ ആശുപത്രി എന്നിവ പൂർത്തീകരിച്ചു. ഭൂരിപക്ഷം വീടുകളിലും ജൽജീവൻ കണക്‌ഷൻ. വാട്ടർ ടാങ്കിന് ഒന്പതാം വാർഡിൽ സ്ഥലം. കുഴൽക്കിണറുകൾ. ജണ്ടായിക്കൽ, കണ്ണങ്കര പഞ്ചായത്ത്‌ ഗ്രൗണ്ടുകൾ നവീകരിച്ചു. വാതക ശ്മശാനം പ്രവർത്തന സജ്ജമാക്കി. എയ്ഡഡ് സ്കൂളുകളിൽ പ്രഭാത ഭക്ഷണം. മൂന്ന് അങ്കണവാടി കെട്ടിടം. ഒരെണ്ണം നിർമാണത്തിൽ. രണ്ട് അങ്കണവാടികൾക്കു സ്ഥലം. പെൺകുട്ടികൾക്കു കരാട്ടെ, യോഗ പരിശീലനം . ഇട്ടിയപ്പാറ മാർക്കറ്റ് നവീകരിച്ചു, എംസിഎഫ് നവീകരിച്ചു. സോളാർ ലൈറ്റുകൾ, പട്ടികജാതി വിഭാഗങ്ങൾക്കു സോളാർ റാന്തൽ. വാട്ടർ എടിഎം, പ്രധാന കേന്ദ്രങ്ങളിൽ ബോട്ടിൽ ബൂത്തുകൾ. ഹരിത കർമസേനയ്ക്ക് ഇലക്‌ട്രിക് ഓട്ടോ. എല്ലായിടത്തും തെരുവു വിളക്കുകൾ. കോട്ടങ്ങൾ എംഎൽഎ അനുവദിച്ച മൂന്നു കോടിയുടെ റാന്നി ബസ് ടെർമിനൽ പദ്ധതി സ്ഥലം വിട്ടുനൽകാതെ അട്ടിമറിച്ചു. ഇട്ടിയപ്പാറ സ്വകാര്യ ബസ് സ്റ്റാൻഡിന്‍റെ വികസനം നടപ്പിലാക്കിയില്ല. സ്റ്റാൻഡ് പൊട്ടിപ്പൊളിഞ്ഞ് കുഴിയായി. സ്റ്റാൻഡിലെ പൊട്ടിപ്പൊളിഞ്ഞ കംഫർട്ട് സ്റ്റേഷൻ നവീകരിച്ചില്ല. യാത്രക്കാർ കൂടിയെങ്കിലും അടിസ്ഥാന സൗകര്യങ്ങളൊന്നും ബസ് സ്റ്റാൻഡിൽ ഇല്ല. ഇട്ടിയപ്പാറ ടൗണിലും പരിസരങ്ങളിലുമായി നിർമിച്ച മൂന്നു വഴിയിട വിശ്രമ കേന്ദ്രങ്ങൾ, ടോയ്‌ലറ്റുകൾ എന്നിവ നോക്കുകുത്തികളായി. മാലിന്യ സംസ്‌കരണത്തിനു ശാസ്ത്രീയ പദ്ധതി ഇല്ല. കഴിഞ്ഞ എൽഡിഎഫ് ഭരണ സമിതി നടപ്പിലാക്കിയ തുമ്പൂർമുഴി മോഡൽ മാലിന്യ സംസ്‌കരണ പദ്ധതിയും നിലച്ചു. തുമ്പൂർമൂഴി ജൈവവള നിർമാണ യൂണിറ്റ്, പ്ലാസ്റ്റിക് ഷ്രെഡിംഗ് യൂണിറ്റ് എന്നിവ നിലച്ചു. മാലിന്യങ്ങൾ ഇട്ടിയപ്പാറ ടൗണിൽ കൂട്ടിയിട്ടു കത്തിക്കുന്നു. ഇട്ടിയപ്പാറ ചന്തയുടെ പ്രവർത്തനം നിലച്ചു. കഴിഞ്ഞ സമിതി നിർമിച്ച ജണ്ടായിക്കൽ വാതക ശ്മശാനത്തോടു കടുത്ത അവഗണന. ശബരിമല തീർഥാടന ക്ഷേമത്തിനായി ലഭിക്കുന്ന ഫണ്ടുകൾ ചെലവഴിക്കുന്നതിൽ വീഴ്ച. തെരുവു വിളക്ക്, ശുചീകരണം എന്നിവയുടെ ഫണ്ട് ചെലവഴിക്കുന്നതിൽ വീഴ്ച. സംസ്ഥാന പാതയോരത്തും ഇട്ടിയപ്പാറ ടൗണിലും വഴിവിളക്കുകൾ കത്തുന്നില്ല. ഒറ്റനോട്ടത്തിൽ മുന്നണികൾ മാറി മാറി ഭരിക്കുന്നു. കഴിഞ്ഞ തവണ എൽഡിഎഫ്. ഇത്തവണ യുഎഡിഎഫ്. എന്നാൽ, യുഡിഎഫ് ഭരണത്തിലുള്ള പഞ്ചായത്തിനെ വികസന രംഗത്ത് എംഎൽഎയും സംസ്ഥാന സർക്കാരും ഞെരുക്കിയെന്ന ആക്ഷേപം ഭരണസമിതിക്ക്. എന്നാൽ, എംഎൽഎ ഫണ്ട് അനുവദിച്ച കാര്യങ്ങൾ പോലും പഞ്ചായത്ത് അവഗണിച്ചെന്ന് മറുപക്ഷം. ബസ് സ്റ്റാൻഡ് വികസനവുമായി ബന്ധപ്പെട്ട തർക്കങ്ങളും ഇതിന്‍റെ ഭാഗമായി. വികസനത്തിന്‍റെ ഭാഗമാകേണ്ട ശബരിമല ഇടത്താവളം അടക്കമുള്ള പ്രവർത്തനം മുന്നോട്ടുപോകേണ്ടതുണ്ട്. കെഎസ്ആർടിസി ബസ് സ്റ്റേഷനും വികസനം കൊതിക്കുന്നു. കക്ഷിനില: ആകെ വാർഡുകൾ: 17. യുഡിഎഫ് : 10, എൽഡിഎഫ് : 5, സ്വതന്ത്രർ : 2.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]