ADVERTISEMENT

ADVERTISEMENT

ജീവിത രംഗങ്ങളിലും എ പ്ലസ് നേടണം: ഐ.സി. ബാലകൃഷ്ണൻ

സുൽത്താൻ ബത്തേരി: എസ്എസ്എൽസി, പ്ലസ് ടു ക്ലാസുകളിൽ എ പ്ലസ് നേടുന്നത് പോലെ ജീവിത രംഗങ്ങളിലും എ പ്ലസ് നേടണമെന്ന് ഐ.സി. ബാലകൃഷ്ണൻ എംഎൽഎ പറഞ്ഞു. ബത്തേരി സെന്‍റ് ജോസഫ്സ് ഹയർ സെക്കൻഡറി സ്കൂളിൽ 100ശതമാനം വിജയവും എല്ലാ വിഷയങ്ങൾക്ക് എ പ്ലസും നേടിയ എസ്എസ്എൽസി പ്ലസ് ടു വിദ്യാർഥികളെ അനുമോദിക്കുന്ന സമ്മേളനം ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം.

ബത്തേരി ബിഷപ് ഡോ. ജോസഫ് മാർ തോമസ് അധ്യക്ഷത വഹിച്ചു. സ്കൂൾ പ്രിൻസിപ്പൽ ഫാ. ജോർജ് കോടാനൂർ, സ്കൂൾ ബർസാർ ഫാ. ജെയിംസ് മുളയ്ക്കവിളയിൽ, കൗണ്‍സിലർ രാധ രവീന്ദ്രൻ, പിടിഎ പ്രസിഡന്‍റുമാരായ ജെറോം എഡിസണ്‍, ഗീത രംഗനാഥ്, അധ്യാപക പ്രതിനിധികളായ എം.എം. ശോശാമ്മ, സതീഷ്, സ്കൂൾ വൈസ് പ്രിൻസിപ്പൽ സാബു എം. ജോസഫ് എന്നിവർ പ്രസംഗിച്ചു.

ADVERTISEMENT

കാട്ടാന ആക്രമണം ; ഭീതിയൊഴിയാതെ നടവയൽ മേഖലയിൽ കാട്ടാനശല്യം രൂക്ഷം

നടവയൽ: പനമരം, പൂതാടി, കണിയാന്പറ്റ പഞ്ചായത്തുകളിലായി കിടക്കുന്ന നടവയൽ മേഖലയിൽ കാട്ടാനശല്യം രൂക്ഷമാകുന്നു. പാതിരി സൗത്ത് സ്റ്റേഷനിൽ നിന്നുള്ള കാട്ടാനയാണ് നെയ്ക്കുപ്പ, വേലിയന്പം ഭാഗങ്ങളിലെ ജനവാസ കേന്ദ്രത്തിൽ വിലസുന്നത്. കഴിഞ്ഞദിവസംരാത്രി കാടിറങ്ങിയ ആന നെയ്ക്കുപ്പ പന്നിക്കോട് ബേബി, കാരിക്കോട് ബൈജു, താഴത്തെവീട്ടിൽ ബേബി എന്നിവരുടെ വാട്ടർ ടാങ്ക്, ഇരുചക്രവാഹനം, കോഴിക്കൂട് തുടങ്ങിയവ നശിപ്പിച്ചിരുന്നു. ഈ പ്രദേശത്തെ കൃഷികളും വാഷിംഗ് മെഷീനും ആനപോയ വഴിയിലുള്ള മറ്റ് വസ്തുക്കളും ആന നശിപ്പിച്ചു. പൊക്കം കുറഞ്ഞ ചെറിയ ആനയാണ് ശല്യക്കാരനായി ജനവാസ കേന്ദ്രത്തിലെത്തുന്നത്. കഴിഞ്ഞദിവസം എത്തിയ ആനയ്ക്ക് നേരെ ടോർച്ചടിച്ചപ്പോൾ ആന വീടിന് നേരെ എത്തുകയും വാതിൽ കുത്തിത്തുറക്കാൻ ശ്രമിക്കുകയും ചെയ്തിരുന്നു. കൃഷിയിടങ്ങളിൽ നിന്നും നേരം പുലർന്ന ശേഷം മാത്രമാണ് കാട്ടാന വനത്തിലേക്ക് മടങ്ങുന്നത്. രാത്രികാലങ്ങളിൽ വൈദ്യുതവേലി ഓണാക്കുന്നതിനു മുൻപേ കാട്ടാന കൃഷിയിടത്തിൽ തന്പടിക്കുകയാണ്. കഴിഞ്ഞദിവസം ഉച്ചയോടെ ഈ പ്രദേശത്ത് തൊഴിലുറപ്പ്ജോലി ചെയ്യുന്ന തൊഴിലാളികളുടെ അടുത്തും ആന എത്തി. വനപാലകരുടെ ഭാഗത്തുനിന്നും വൻ അനാസ്ഥയാണ് ഉണ്ടാകുന്നതെന്ന് പ്രദേശവാസികൾ ആരോപിച്ചു.

തുടർച്ചയായ മഴ: ഇഞ്ചി കർഷകർ പ്രതിസന്ധിയിൽ

സുൽത്താൻ ബത്തേരി: തുടർച്ചയായി പെയ്യുന്ന മഴ കാരണം ജില്ലയിലെ ഇഞ്ചികർഷകർ പ്രതിസന്ധിയിലായി. വയലുകളിൽ ഇടവിളയായി നട്ട ഇഞ്ചിചീഞ്ഞ് നശിക്കുകയാണ്. വന്യമൃഗങ്ങളിൽ നിന്ന് സംരക്ഷിച്ചുനിറുത്തിയ ഇഞ്ചി ചീഞ്ഞ് നശിക്കുന്നത് കാരണം വലിയ സാന്പത്തിക പ്രതിസന്ധിയിലേക്കാണ് കർഷകർ കടക്കുന്നത്. വനഗ്രാമമായ നൂൽപ്പുഴ മാറോട് പ്രദേശത്ത് ഇഞ്ചികൃഷിയിറക്കിയ ഭൂരിപക്ഷം കർഷകരുടെയും ഇഞ്ചി തണ്ടുകൾ ചീഞ്ഞ് നശിക്കുകയാണ്. വയലുകളിൽ നട്ട ഇഞ്ചിയാണ് ഇത്തരത്തിൽ ചീഞ്ഞ് നശിക്കുന്നത്. തുടർച്ചയായി മഴപെയ്യുന്നതുകാരണം ചാലുകളിൽ വെള്ളം കെട്ടിനിൽക്കുന്നതാണ് നിലവിലെ പ്രശ്നത്തിന് കാരണം. മിക്കകർഷകരും കേട് കാണുന്പോഴേക്കും മരുന്നുകൾ പ്രയോഗിക്കുന്നെണ്ടിലും ഫലമപ്രദമാകുന്നില്ല. വനമേഖലയായതിനാൽ കുരങ്ങ്, മാൻ, പന്നി, കാട്ടാന അടക്കമുള്ള വന്യമൃഗങ്ങളെ പ്രതിരോധിച്ചാണ് കൃഷിയിറക്കാറ്. അതും തുടർമഴ കാരണം നശിക്കുന്ന കാഴ്ചയാണ് ജില്ലയിൽ വിവിധയിടങ്ങളിൽ.

കോൺഗ്രസ് ഫോറസ്റ്റ് ഓഫീസ് മാർച്ച് നടത്തി

പുൽപ്പള്ളി: വാകേരി മണ്ഡലം കോണ്‍ഗ്രസ് കമ്മിറ്റിയുടെ നേതൃത്വത്തിൽ വാകേരി മൂടക്കൊല്ലി പ്രദേശങ്ങളിൽ വർധിച്ചുവരുന്ന വന്യമൃഗ അക്രമങ്ങൾക്കെതിരേ ഇരുളം ഫോറസ്റ്റ് സ്റ്റേഷൻ ഉപരോധിച്ചു. ഉപരോധ സമരം ജില്ലാ കോണ്‍ഗ്രസ് ജില്ലാകമ്മിറ്റി പ്രസിഡന്‍റ് എൻ.ഡി. അപ്പച്ചൻ ഉദ്ഘാടനം ചെയ്തു. മണ്ഡലം കോണ്‍ഗ്രസ് കമ്മിറ്റി പ്രസിഡന്‍റ് സണ്ണി സെബാസ്റ്റ്യൻ അധ്യക്ഷത വഹിച്ചു. ഐ.സി. ബാലകൃഷ്ണൻ എംഎൽഎ മുഖ്യപ്രഭാഷണം നടത്തി. കെപിസിസി എക്സിക്യുട്ടീവ് അംഗം കെ.എൽ. പൗലോസ്, കെ.കെ. വിശ്വനാഥൻ, വർഗീസ് മുരിയൻകാവിൽ, കോണ്‍ഗ്രസ് പഞ്ചായത്ത് പ്രസിഡന്‍റ് മിനി പ്രകാശൻ, പി.ഡി. സജി, സ്റ്റാൻഡിൽ കമ്മിറ്റി ചെയർമാൻ കെ.ജെ. സണ്ണി, പഞ്ചായത്ത് വൈസ് പ്രസിഡന്‍റ് പ്രഭാകരൻ, കെ.പി. മധു, പി.ജെ. സിജോ, കെ.ആർ. ബാലൻ, വത്സ വിജയൻ, സി.പി. ഷമീർ, സാബു നീറാകുളം തുടങ്ങിയവർ പ്രസംഗിച്ചു.

പാടിച്ചിറ ക്വാറിയിലേക്ക് ജനകീയ മാർച്ച് നടത്തി

പുൽപ്പള്ളി: മുള്ളൻകൊല്ലി ഗ്രാമപഞ്ചായത്തിലെ പാടിച്ചിറ ഗവണ്‍മെന്‍റ് ആശുപത്രിക്ക് സമീപം കൃഷിയിടത്തിൽ പ്രവർത്തിക്കുന്ന കരിങ്കൽ ക്വാറിയിലേക്ക് പ്രദേശവാസികൾ ജനകീയ മാർച്ച് സംഘടിപ്പിച്ചു. കിഴക്കേഭാഗത്ത് ഷിജു, കിഴക്കേഭാഗത്ത് ടോമി എന്നിവരുടെ കൃഷിയിടത്തിൽ മുക്കം സ്വദേശി സുകുമാരന്‍റെ ലൈസൻസിയിൽ പ്രവർത്തിക്കുന്ന ക്വാറി ജനജീവിതം പ്രതിസന്ധിയിലാക്കുന്നതായും വലിയ സ്ഫോടനത്തിന്‍റെ ഭാഗമായി ചിതറുന്ന കരിങ്കൽ ചീളുകൾ സമീപത്തെ വീടുകളിൽ പതിക്കുന്നു പ്രദേശത്തെ വീടുകൾ വിണ്ടുകീറുകയും ചെയ്യുന്നതായി പ്രദേശവാസികൾ ആരോപിച്ചു. സമീപത്തെ ബോറുകളിൽ കുടിവെള്ളത്തിന്‍റെ ലഭ്യത കുറയുകയും ജീവഹാനി ഭയന്ന് കൃഷിയിടത്തിൽ ധൈര്യമായി പണിയെടുക്കാൻ സാധിക്കുന്നുമില്ല. ക്വാറിയുടെ സമീപ പ്രദേശത്ത് കൃഷിപ്പണിക്ക് ആളെ കിട്ടുന്നില്ല. സ്വന്തം വീടിന്‍റെ മുറ്റത്ത് ധൈര്യമായി നടക്കാനോ കുട്ടികൾക്ക് വീട്ടിൽ ഇരുന്ന് പഠിക്കാൻ പോലും പറ്റാത്ത അവസ്ഥയാണ്. ക്ഷീരമേഖലയെ ആശ്രമിച്ച് മാത്രം ജീവിക്കുന്ന സമീപത്തെ ആളുകൾക്ക് പശുവിന് തീറ്റപ്പുല്ല് ശേഖരിക്കാൻ പോലും കൃഷിയിടത്തിൽ ഇറങ്ങാൻ പറ്റാത്ത അവസ്ഥയാണ്. നിയമങ്ങൾ കാറ്റിൽപറത്തി ഉദ്യോഗസ്ഥ രാഷ്ട്രീയ കൂട്ടുകെട്ടിൽ ക്വാറി പ്രവർത്തിപ്പിക്കുന്നത് അവസാനിപ്പിക്കണമെന്ന് മാർച്ച് നടത്തിയ പ്രദേശവാസികൾ ആവശ്യപ്പെട്ടു.

കൃഷിയും കർഷകനും സംരക്ഷിക്കപ്പെടണം: കെസിവൈഎം

മാനന്തവാടി: കെസിവൈഎം മാനന്തവാടി രൂപതയുടെ 31-ാമത് അർധവാർഷിക സെനറ്റ് സമ്മേളനം തരിയോട് മേഖലയുടെ നേതൃത്വത്തിൽ കുറന്പാല യൂണിറ്റിൽ നടത്തി. കെസിവൈഎം രൂപത മുൻ പ്രസിഡന്‍റ് മാത്യു തറയിൽ സെനറ്റ് സമ്മേളനം ഉദ്ഘാടനം ചെയ്തു. രൂപത പ്രസിഡന്‍റ് ബിബിൻ പിലാപ്പിള്ളിൽ അധ്യക്ഷത വഹിച്ചു. സംസ്ഥാന അംഗം റ്റിജിൻ ജോസഫ് വെള്ളപ്ലാക്കിൽ പ്രമേയം അവതരിപ്പിച്ചു. വയനാട് പോലുള്ള മലയോര മേഖലയിലെ കാർഷിക ജീവിതം നിലനിർത്തുന്നതിന് സർക്കാർ നയപരമായി ഇടപെടേണ്ടതിന്‍റെ അത്യാവശ്യത പ്രമേയത്തിലൂടെ ഉന്നയിച്ചു. വിള ഇൻഷ്വറൻസ്, കർഷക സംരക്ഷണ ബോർഡ്, വന്യമൃഗശല്യത്തിനുള്ള നഷ്ടപരിഹാര സംവിധാനം തുടങ്ങിയവ കൃത്യമായി പ്രാവർത്തികമാക്കണമെന്നും പ്രമേയം ആവശ്യപ്പെട്ടു. മേഖല, രൂപത റിപ്പോർട്ട് അവതരണവും സംഘടനാതല ചർച്ചകളും നടന്നു. എന്‍റെ ഗ്രാമം, ഗ്രീൻ ഫ്യൂച്ചർ, പ്രവർത്തനമാസാചരണം തുടങ്ങിയ പദ്ധതികളിൽ മികച്ച പ്രവർത്തനം നടത്തിയ മേഖലയെയും യൂണിറ്റുകളെയും ചടങ്ങിൽ ആദരിച്ചു. രൂപതാ ഡയറക്ടർ ഫാ. സാന്േ‍റാ അന്പലത്തറ, വൈസ് പ്രസിഡന്‍റ് ആഷ്ന പാലാരിക്കുന്നേൽ, ജനറൽ സെക്രട്ടറി വിമൽ കൊച്ചുപുരയ്ക്കൽ, സെക്രട്ടറി ഡ്യൂണ മരിയ കിഴക്കേമണ്ണൂർ, ട്രഷറർ നവീൻ പുലകുടിയിൽ, ആനിമേറ്റർ സിസ്റ്റർ റോസ് ടോം എസ്എബിഎസ് രൂപത സിൻഡിക്കേറ്റ് അംഗങ്ങൾ നേതൃത്വം നൽകി.

നടവയൽ സെന്‍റ് തോമസ് എൽപി സ്കൂൾ ലഹരിവിരുദ്ധ വാരാചരണം സംഘടിപ്പിച്ചു

നടവയൽ: സെന്‍റ് തോമസ് എൽപി സ്കൂളിലെ വിദ്യാർഥികൾ വ്യത്യസ്ത രീതിയിൽ ലഹരി വിരുദ്ധ വാരാചരണം സംഘടിപ്പിച്ചു. ലഹരി വിരുദ്ധ വാചകങ്ങൾ എഴുതിയും ലഹരിക്കെരെയുള്ള സന്ദേശങ്ങൾ പതിച്ചും ചുമരിൽ ഒട്ടിച്ച വെള്ളത്തുണിയിൽ ഒപ്പുകളും പതിപ്പിച്ചുമാണ് ലഹരി വിരുദ്ധ വാരാചരണം സംഘടിപ്പിച്ചത്. ലഹരി വിരുദ്ധ പ്രവർത്തനത്തിൽ സ്കൂൾ അസിസ്റ്റന്‍റ് മാനേജർ ഫാ. ക്രിസ്റ്റി പൂതക്കുഴിയിൽ പ്രവർത്തനത്തിൽ പങ്കെടുത്ത് ലഹരി വിരുദ്ധ സന്ദേശം നൽകി. ഒന്നു മുതൽ നാലു വരെയുള്ള ക്ലാസിലെ എല്ലാ കുട്ടികളും തങ്ങളുടെ ഒപ്പുകൾ തുണിയിൽ പതിപ്പിച്ച് ഈ പ്രവർത്തനത്തിൽ പങ്കാളികളായി. ഹെഡ്മാസ്റ്റർ ബെന്നി, സീനിയർ അസിസ്റ്റന്‍റ് മോളി, മേഴ്സി എന്നിവർ പ്രസംഗിച്ചു. അധ്യാപകർ, പിടിഎ പ്രസിഡന്‍റ് ബിജേഷ് കോയിക്കാട്ടിൽ, മദർ പിടിഎ പ്രസിഡന്‍റ് സോണിയ പതിക്കൽ, പിടിഎ അംഗങ്ങൾ രക്ഷാകർത്താക്കൾ എന്നിവർ പങ്കെടുത്തു.

നൂൽപ്പുഴ മാറോട് കർഷകൻ കാട്ടാന ആക്രമണത്തിൽ കൊല്ലപ്പെട്ടിട്ട് ഒരു വർഷം: വാഗ്ദാനം പാലിക്കാതെ സർക്കാർ

സുൽത്താൻ ബത്തേരി: കാട്ടനയുടെ ആക്രമണത്തിൽ കർഷകൻ കൊല്ലപ്പെട്ട് ഒരുവർഷമാകുന്പോഴും നൂൽപ്പുഴ മാറോട് ഗ്രാമത്തിൽ ഇതുവരേ പൂർണമായ രീതിയിൽ വാഗ്ദാനങ്ങൽ പാലിക്കപ്പെട്ടിട്ടില്ല. ഈ ഭാഗത്തേക്കുള്ള റോഡ് കോണ്‍ക്രീറ്റ്, തെരുവുവിളക്കുകൾ സ്ഥാപിക്കൽ, വനാതിർത്തിയിലെ തൂക്ക് വേലിയടക്കമുള്ള കാര്യങ്ങൾ പൂർണമാകാത്തതാണ് ദുരിതമാകുന്നത്. കഴിഞ്ഞവർഷം ജൂലൈ പകുതിയോടെയാണ് കല്ലുമുക്ക് മാറോട് കുറുമ ഉന്നതിയിലെ രാജുവിനെ കാട്ടാന കൃഷിയിടത്തിൽ് ആക്രമിച്ചത്. കൃഷിയിടത്തിൽ ആനയിറങ്ങിയിട്ടുണ്ടോ എന്ന് നോക്കാനായി വീടിനോട് ചേർന്ന് വയലിലേക്ക് എത്തിയതാണ്. ഈ സമയം കാട്ടാന പാഞ്ഞെത്തി ആക്രമിക്കുകയായിരുന്നു. മാറോട് കാട്ടാനശല്യത്തിന് പരിഹാരം കാണണമെന്ന് ആവശ്യപ്പെട്ട് രാജുവിന്‍റെ മൃതദേഹവുമായി പ്രദേശവാസികൾ പ്രതിഷേധിച്ചു. കല്ലൂരിൽ ദേശീയപാത 766 ഉപരോധിക്കുകയും ചെയ്തു. തുടർന്ന് പട്ടികവർഗ-പിന്നാക്ക ക്ഷേമ മന്ത്രി ഒ.ആർ. കേളു, വനം മന്ത്രി എ.കെ. ശശീന്ദ്രൻ എന്നിവർ പ്രദേശവാസികളുമായി ചർച്ച നടത്തി നിരവധി വാഗ്ദാനങ്ങൾ നൽകിയതല്ലാതെ രാജു കൊല്ലപ്പെട്ട് ഒരുവർഷമാകുന്പോഴും ഇതുവരെയും പാലിച്ചില്ല. ഇവിടങ്ങളിൽ കാൽനടപോലും ദുരിതമാണ്. വാഹനങ്ങൾ പോകാൻപറ്റാത്ത അവസ്ഥയിലാണ്. ഇതുകാരണം സ്കൂൾ ബസുകളും ഇവിടേക്ക് എത്തുന്നില്ലെന്നാണ് നാട്ടുകാരുടെ ആരോപണം. അന്പതോളം കുടുംബങ്ങളാണ് ഇവിടെ താമസിക്കുന്നത്. രണ്ടാഴ്ചമുന്പ് ഇവിടെ വളർത്തുനായയെ കടുവ പിടികൂടി. പ്രതിരോധ സംവിധാനങ്ങൾ കാര്യക്ഷമമാക്കി കാട്ടാനകൾ കൃഷിയിടത്തിൽ ഇറങ്ങുന്നത് തടയണമെന്നാണ് കർഷകർ ആവശ്യപ്പെടുന്നത്.

ലഹരിക്കെതിരെ മാരത്തോണ്‍

പുൽപ്പള്ളി: ലഹരിക്കെതിരെയുള്ള കാന്പയിനിന്‍റെ ഭാഗമായി കബനിഗിരി നിർമല ഹൈസ്കൂളിലെ വിദ്യാർഥികൾ പാടിച്ചിറ ടൗണിൽ മാരത്തോണ്‍ സംഘടിപ്പിച്ചു. മുള്ളൻകൊല്ലി ഗ്രാമപ്പഞ്ചായത്ത് വികസനകാര്യ സ്റ്റാൻഡിംഗ് കമ്മിറ്റി ചെയർമാനും സ്കൂൾ പിടിഎ പ്രസിഡന്‍റുമായ ഷിനു കച്ചിറയിൽ മാരത്തോണ്‍ ഉദ്ഘാടനം ചെയ്തു. സ്കൂൾ വിദ്യാർഥികളുടെ ഫ്ളാഷ് മോബും ഉണ്ടായിരുന്നു. സ്കൂൾ ഹെഡ്മാസ്റ്റർ എ.ടി. ഷാജി അധ്യക്ഷത വഹിച്ചു. എം.ടി. ബിനു, ജോമറ്റ് മാത്യു, ഷിനി ജോണ്‍സണ്‍, എം.ടി. ബിനു ബിഗ് എന്നിവർ നേതൃത്വം നൽകി.

ലഹരിക്കെതിരേ കുടുംബശ്രീയും എക്സൈസും

കൽപ്പറ്റ: ലഹരിക്കെതിരേ എക്സൈസ് വകുപ്പുമായി കൈകോർത്ത് കുടുംബശ്രീ ജില്ലാ മിഷൻ സംഘടിപ്പിച്ച ലഹരി മുക്ത കാന്പയിനിന്‍റെ ജില്ലാതല പരിശീലനം ജില്ലാ എക്സൈസ് ഡെപ്യൂട്ടി കമ്മീഷണർ എ.ജെ. ഷാജി ഉദ്ഘാടനം ചെയ്തു. കുടുംബശ്രീ ജില്ലാ മിഷൻ കോഓർഡിനേറ്റർ പി.കെ. ബാലസുബ്രഹ്മണ്യൻ അധ്യക്ഷത വഹിച്ചു. ദിനംപ്രതി അധികരിച്ചു വരുന്ന ലഹരി ഉപയോഗം തടയുന്നതിന്‍റെ ആദ്യഘട്ടം കുടുംബങ്ങളിൽ നിന്ന് തുടങ്ങണമെന്നതിനെ മുൻനിർത്തിയാണ് കുടുംബശ്രീ ലഹരി മുക്ത കാന്പയിനിന്‍റെ ഭാഗമാകുന്നത്. കൽപ്പറ്റ ഹരിതഗിരി ഓഡിറ്റോറിയത്തിൽ സംഘടിപ്പിച്ച പരിപാടിയിൽ ജില്ലയിലെ സിഡിഎസ് ചെയർപേഴ്സണ്‍മാർക്കും കമ്മ്യൂണിറ്റി കൗണ്‍സിലർമാർക്കും റിസോഴ്സ് പേഴ്സണ്‍മാർക്കുമാണ് ആദ്യഘട്ട പരിശീലനം നൽകിയത്. ജില്ലാ എക്സൈസ് വകുപ്പ് പ്രിവന്‍റീവ് ഓഫീസർ ജോഷി തുന്പാനം, വിമുക്തി മിഷൻ ജില്ലാ കോഓർഡിനേറ്റർ എൻ.സി. സജിത്ത്കുമാർ അച്ചൂരാനം, ജില്ലാ മിഷൻ അസിസ്റ്റന്‍റ് കോഓർഡിനേറ്റർമാരായ വി.കെ. റെജിന, കെ.എം. സലീന, ജില്ലാ പ്രോഗ്രാം മാനേജർമാരായ പി.കെ. സുഹൈൽ, ആശ പോൾ എന്നിവർ പ്രസംഗിച്ചു.

വയനാട് മഡ് ഫെസ്റ്റ് സമാപന പരിപാടി ഇന്ന് മന്ത്രി ഒ.ആർ. കേളു ഉദ്ഘാടനം ചെയ്യും

കൽപ്പറ്റ: മണ്‍സൂണ്‍കാല വിനോദസഞ്ചാരം പ്രോത്സാഹിപ്പിക്കുന്നതിന്‍റെ ഭാഗമായി ജില്ലാ ടൂറിസം പ്രമോഷൻ കൗണ്‍സിലിന്‍റെ നേതൃത്വത്തിൽ സംഘടിപ്പിച്ച വയനാട് മഡ് ഫെസ്റ്റ്സീസണ്‍ 3 സമാപന സമ്മേളനം ഇന്ന് വൈകുന്നേരം നാലിന് വള്ളിയൂർക്കാവ് കണ്ണിവയലിൽ പട്ടികജാതി-വർഗ-പിന്നാക്ക ക്ഷേമ മന്ത്രി ഒ.ആർ. കേളു ഉദ്ഘാടനം ചെയ്യും. വിനോദസഞ്ചാര വകുപ്പ്, വിവിധ ടൂറിസം സംഘടനകൾ എന്നിവരുടെ സഹകരണത്തോടെ സംഘടിപ്പിക്കുന്ന പരിപാടിയുടെ അവസാന ദിനമായ 17ന് 50 പേർക്കായി ചീങ്ങേരിയിലേക്ക് നടത്തുന്ന മണ്‍സൂണ്‍ ട്രക്കിംഗ് ഓടെയാണ് അവസാനിക്കുക.

കുടിവെള്ള കിണറും പന്പ് ഹൗസും നടപ്പാതയും കാടുമൂടിയ നിലയിൽ

ഗൂഡല്ലൂർ: നെല്ലാക്കോട്ട പഞ്ചായത്തിലെ താഴെ കൈവട്ടയിൽ പഞ്ചായത്തിന്‍റെ കുടിവെള്ള കിണറും പന്പ് ഹൗസും നടപ്പാതയും കാടുമൂടിയ നിലയിൽ. കിണറിന് ചുറ്റും കാടുമൂടി കിടക്കുകയാണ്. പന്പ് ഹൗസും കാടുകൾക്കുള്ളിലായി. മെയിൻ റോഡിൽ നിന്ന് കിണറിലേക്കുള്ള സിമന്‍റ് റോഡും കാടുമൂടി കിടക്കുകയാണ്. സ്വിച്ച് ഓണ്‍ ചെയ്യാൻ പോലും പന്പ് സെറ്റ് ഓപ്പറേറ്റർക്ക് പന്പ് ഹൗസിലേക്ക് പോകാൻ പറ്റാത്ത അവസ്ഥയാണ്. വർഷങ്ങൾക്ക് മുന്പാണ് കാടുകൾ വെട്ടിമാറ്റിയത്. ഈ മേഖലകാട്ടാനകളുടെ താവളവുമാണ്. 25 കുടുംബങ്ങൾക്കാണ് ഈ കുടിവെള്ള പദ്ധതിയിൽ നിന്ന് കുടിവെള്ളം വിതരണം ചെയ്യുന്നത്. കിണർ ശുചീകരിച്ചിട്ട് നാല് വർഷമായി. കിണറിൽ ചേറും ചെളിയും നിറഞ്ഞിരിക്കുകയാണ്. കിണർ ശുചീകരിക്കുകയും കാടുകൾ വെട്ടിമാറ്റുകയും ചെയ്യണമെന്ന് നാട്ടുകാർ ആവശ്യപ്പെട്ടു.

കേസിൽ പ്രതിയാക്കിയതിനെതിരേ പരാതി നൽകി

പുൽപ്പള്ളി: മുള്ളൻകൊല്ലിയിൽ നടന്ന കോണ്‍ഗ്രസ് വികസനസമിതി യോഗത്തിനിടെയുണ്ടായ കയ്യേറ്റവുമായി ബന്ധപ്പെട്ട് തനിക്കെതിരേ വ്യാജമായി കേസെടുക്കുകയും അപവാദ പ്രചാരണം നടത്തുകയും ചെയ്തതായി പി.ഡി. സജി ബത്തേരി ഡിവൈഎസ്പി ക്ക് നൽകിയ പരാതിയിൽ പറഞ്ഞു. വികസന സെമിനാർ കഴിഞ്ഞയുടൻ താൻ വീട്ടിലേക്ക് പോയെന്നും ഇതിനുള്ള തെളിവുകൾ തന്‍റെ കൈവശമുണ്ടെന്നും പരാതിക്കാരനെ തടഞ്ഞുവച്ച് മർദിച്ചെന്നുള്ള കേസ് വ്യാജമാണെന്നും സജി പരാതിയിൽ പറഞ്ഞു. തന്നെ അപമാനിക്കാൻ പരാതി നൽകിയ ശേഷം സോഷ്യൽമീഡിയ ഗ്രൂപ്പുകളിൽ പരസ്യമായി അപവാദ പ്രചാരണം നടത്തി മാനഹാനി വരുത്തിവച്ചു. ഇതിനെതിരേ നടപടി സ്വീകരിക്കണമെന്നും വ്യാജ പരാതിയുടെ അടിസ്ഥാനത്തിൽ കേസിൽ നിന്ന് തന്നെ ഒഴിവാക്കണമെന്നും പി.ഡി. സജി ആവശ്യപ്പെട്ടു.

തകർന്ന റോഡുകൾ നന്നാക്കാൻ ഫണ്ട് അനുവദിക്കണമെന്ന്

കോട്ടത്തറ: കാലവർഷത്തിലും കാലപ്പഴക്കത്തിലും തകർന്ന പഞ്ചായത്തിലെ റോഡുകൾ നന്നാക്കാൻ സർക്കാർ പ്രത്യേക ഫണ്ട് അനുവദിക്കണമെന്ന് പഞ്ചായത്ത് യുഡിഎഫ് എക്സിക്ക്യുട്ടീവ് യോഗം സർക്കാരിനോട് ആവശ്യപ്പെട്ടു. ജില്ലയിൽ കാലവർഷത്തിലും വെള്ളപ്പൊക്കത്തിലും ഏറ്റവും കൂടുതൽ റോഡ് തകരാറിലാകുന്നത് വെള്ളപ്പൊക്കകെടുതി നേരിടുന്ന കോട്ടത്തറ പഞ്ചായത്തിലാണെന്ന് യോഗം ചൂണ്ടിക്കാട്ടി. ടി. സിദ്ദിഖ് എംഎൽഎ യോഗം ഉദ്ഘാടനം ചെയ്തു. വി. അബ്ദുള്ള വൈപ്പടി അധ്യക്ഷത വഹിച്ചു. നിയോജക മണ്ഡലം ചെയർമാൻ ടി. ഹംസ മുഖ്യ പ്രഭാഷണം നടത്തി. പഞ്ചായത്ത് കണ്‍വീനർ സുരേഷ് ബാബു വാളൽ, സി.സി. തങ്കച്ചൻ, പോൾസണ്‍ കൂവക്കൽ, മാണി ഫ്രാൻസിസ്, വി.സി. അബൂബക്കർ, ജീവോദി മമ്മുട്ടി, സി.കെ. ഇബ്രാഹിം, പി.ഇ. വിനോജ്, കെ.കെ. മുഹമ്മദലി, എം.സി. മോയിൻ, കെ.കെ. നാസർ, പി.എ. നസീമ, പുഷ്പ സുന്ദരൻ, ഇ.കെ. വസന്ത, ബിന്ദു മാധവൻ എന്നിവർ പ്രസംഗിച്ചു.

കുംകികൾ കാട്ടുകൊന്പൻമാരെ തുരത്തി അതിർത്തിയിൽ നിലയുറപ്പിച്ചു

സുൽത്താൻ ബത്തേരി: വാകേരി കൂടല്ലൂർ മേഖലയിലെ ജനവാസകേന്ദ്രത്തിലിറങ്ങി ജനങ്ങളുടെ ജീവനും സ്വത്തിനും ഭീഷണിയായി മാറിയ കാട്ടുകൊന്പൻമാരെ കുംകിയാനകൾ ഉൾവനത്തിലേക്ക് തുരത്തി. മുത്തങ്ങ ആന ക്യാന്പിൽ നിന്ന് കൊണ്ടുവന്ന ഭരത്, പ്രമുഖ എന്നി കുംകികളുടെ സഹായത്തോടെയാണ് ആർആർടി വനപാലക സംഘം കാട്ടാനക്കൂട്ടത്തെ വനാതിർത്തിയിൽ നിന്ന് ഉൾവനത്തിലേയ്ക്ക് ഓടിച്ചത്. കഴിഞ്ഞ നാല് ദിവസമായി തുടരുന്ന ദൗത്യം ഇന്നലെയാണ് ഫലം കണ്ടത്. വനത്തിൽ നിന്ന് സ്ഥിരമായി ജനവാസമേഖലയിലേക്ക് ഇറങ്ങുന്ന വഴികളിൽ രണ്ട് കുംകികളും നിലകൊണ്ടതോടെയാണ് കൊന്പൻമാർക്ക് ജനവാസമേഖലയിലിറങ്ങാൻ പറ്റാതായത്. രണ്ട് ദിവസം കൂടി അതിർത്തിയിൽ കുംകിയാനകളെ ഉപയോഗിച്ച് നിരീക്ഷണം നടത്താനാണ് വനംവകുപ്പ് തീരുമാനം. സ്ഥിരമായി കർഷകരുടെ കൃഷിയിടങ്ങളിലിറങ്ങി കൃഷി നശിപ്പിക്കുന്ന കാട്ടാനകൾ വീണ്ടും എത്തുമെന്നാണ് കർഷകർ പറയുന്നത്. റെയിൽപാളവേലിയും കിടങ്ങുമില്ലാത്ത മൂടക്കൊല്ലി മുതൽ വാകേരി വരെയുള്ള 2.8 കിലോമീറ്റർ ദൂരത്തിൽ ആന പ്രതിരോധ വേലി അടിയന്തരമായി നിർമിക്കുകയും വേലി തകർന്ന് കിടക്കുന്നയിടങ്ങൾ യുദ്ധകാലാടിസ്ഥാനത്തിൽ നന്നാക്കാൻ നടപടിസ്വീകരിക്കണമെന്നാണ് പ്രദേശവാസികളുടെ ആവശ്യം.

വയനാട് ടൂറിസം കേരള ടൂറിസത്തിന് അനിവാര്യം: മന്ത്രി പി.എ. മുഹമ്മദ് റിയാസ്

മാനന്തവാടി: വയനാട് ടൂറിസം കേരള ടൂറിസത്തിന് അനിവാര്യമാണെന്ന് പൊതുമരാമത്ത്-ടൂറിസം മന്ത്രി പി.എ. മുഹമ്മദ് റിയാസ്. വയനാട് പാക്കേജിൽ ഉൾപ്പെടുത്തി പഴശി പാർക്കിൽ 1.20 കോടി രൂപ ചെലവിൽ പൂർത്തിയാക്കിയ പ്രവൃത്തികൾ ഉദ്ഘാടനം ചെയ്യുകയായിരുന്നു അദ്ദേഹം. ജില്ലയിലെ വിനോദസഞ്ചാര മേഖലയുടെ വികസനത്തിന് സർക്കാർ വലിയ ഇടപെടലാണ് നടത്തിയത്. ജില്ലയിലെത്തുന്ന സഞ്ചാരികളുടെ എണ്ണം വർധിച്ചിട്ടുണ്ട്. രാജ്യത്തെ പ്രധാന വിനോദസഞ്ചാരകേന്ദ്രമായി വയനാട് മാറിയെന്നും മന്ത്രി പറഞ്ഞു. പട്ടികജാതി-വർഗ-പിന്നാക്ക ക്ഷേമ മന്ത്രി ഒ.ആർ. കേളു അധ്യക്ഷത വഹിച്ചു. അസിസ്റ്റന്‍റ് കളക്ടർ പി.പി. അർച്ചന, നഗരസഭാ ചെയർപേഴ്സണ്‍ സി.കെ. രത്നവല്ലി, ബ്ലോക്ക് പഞ്ചായത്ത് പ്രസിഡന്‍റ് ജസ്റ്റിൻ ബേബി, നഗരസഭാ കൗണ്‍സിലർ അരുണ്‍കുമാർ, ജില്ലാ ടൂറിസം ഡെപ്യൂട്ടി ഡയറക്ടർ ഡി.വി. പ്രഭാത്, ഡിടിപിസി സെക്രട്ടറി ബിനോഷ് കുഞ്ഞപ്പൻ, എക്സിക്യുട്ടീവ് കമ്മിറ്റി അംഗം പി.വി. സഹദേവൻ, ടൂറിസം വികസന ഉപസമിതി അംഗം അലി ബ്രാൻ, നഗരസഭാ സിഡിഎസ് ചെയർപേഴ്സണ്‍ ഡോളി രഞ്ജിത്ത് തുടങ്ങിയവർ പങ്കെടുത്തു. പാർക്കിൽ സോർബിംഗ് ബോൾ, മൾട്ടി സീറ്റർ സീസോ, മൾട്ടി പ്ലേ ഫണ്‍ സിസ്റ്റം, മെറി ഗോ റൗണ്ട്, ബഞ്ച്, വാട്ടർ കിയോസ്ക് എന്നിവ പുതുതായി ഒരുക്കിയിട്ടുണ്ട്.

സുഗമ ഗതാഗതം സർക്കാർ ഉത്തരവാദിത്തം: മന്ത്രി മുഹമ്മദ് റിയാസ്

കൽപ്പറ്റ: ജില്ലയിലെ സുഗമ ഗതാഗതം സർക്കാരിന്‍റെ ഉത്തരവാദിത്തമാണെന്ന് പൊതുമരാമത്ത്-ടൂറിസം മന്ത്രി പി.എ. മുഹമ്മദ് റിയാസ്. കോട്ടത്തറ പഞ്ചായത്തിലെ കല്ലട്ടിയിൽ പാലം പ്രവൃത്തി ഉദ്ഘാടനം ചെയ്യുകയായിരുന്നു അദ്ദേഹം. വെണ്ണിയോട് വലിയപുഴയ്ക്കു കുറുകെ 8.12 കോടി രൂപ ചെലവിലാണ് പാലം നിർമിക്കുന്നത്. 78.5 മീറ്റർ നീളത്തിലും ഇരു ഭാഗങ്ങളിലും നടപ്പാതയോടുകൂടി 11 മീറ്റർ വീതിയിലുമാണ് പ്രവൃത്തി പൂർത്തിയാക്കുക. പാലങ്ങൾ ഒരു നാടിന്‍റെ വികാരമാണ്. കല്ലട്ടി പാലം പണി സമയബന്ധിതമായി പൂർത്തിയാക്കാൻ പ്രത്യേക സംവിധാനം ഒരുക്കും. സംസ്ഥാനത്ത് നാല് വർഷത്തിനിടെ 150 പാലം നിർമിച്ചു. നിയോജകമണ്ഡലത്തിൽ 257 കിലോമീറ്റർ റോഡ് ബിഎം ആൻഡ് ബിസി പാതകളായി മെച്ചപ്പെടുത്തുമെന്നും മന്ത്രി പറഞ്ഞു. ടി. സിദ്ദിഖ് എംഎൽഎ അധ്യക്ഷത വഹിച്ചു. ബ്ലോക്ക് പഞ്ചായത്ത് പ്രസിഡന്‍റ് ചന്ദ്രിക കൃഷ്ണൻ, കോട്ടത്തറ പഞ്ചായത്ത് പ്രസിഡന്‍റ് പി.പി. റെനീഷ്, ബ്ലോക്ക് പഞ്ചായത്ത് അംഗം പി.കെ. അബ്ദുറഹ്മാൻ, പൊതുമരാമത്ത് സൂപ്രണ്ടിംഗ് എൻജിനിയർ ഇ.ജെ. വിശ്വപ്രകാശ്, എക്സിക്യുട്ടീവ് എൻജിനിയർ സി.എസ്. അജിത്ത്, അസിസ്റ്റന്‍റ് എക്സിക്യുട്ടീവ് എൻജിനിയർ കെ.ബി. നിത തുടങ്ങിയവർ പങ്കെടുത്തു.

എന്‍.ഡി. അപ്പച്ചനെ കൈയേറ്റം ചെയ്യാന്‍ ശ്രമിച്ചവര്‍ക്കെതിരേ നടപടി സ്വീകരിക്കണം: വ്യാപാരി കോണ്‍ഗ്രസ്

കല്‍പ്പറ്റ: പാടിച്ചിറയില്‍ കോണ്‍ഗ്രസ് മുള്ളന്‍കൊല്ലി മണ്ഡലം വികസന സെമിനാറിനിടെ ഡിസിസി പ്രസിഡന്‍റ് എന്‍.ഡി. അപ്പച്ചനോട് മോശമായി പെരുമാറുകയും കൈയേറ്റത്തിനു മുതിരുകയും ചെയ്തവര്‍ക്കെതിരേ പാര്‍ട്ടി നേതൃത്വം കര്‍ശന അച്ചടക്ക നടപടി സ്വീകരിക്കണമെന്ന് വ്യാപാരി വ്യവസായി കോണ്‍ഗ്രസ് ജില്ലാ കമ്മിറ്റി ആവശ്യപ്പെട്ടു. ജില്ലയില്‍ അഞ്ച് പതിറ്റാണ്ടിലധികമായി കോണ്‍ഗ്രസിനുവേണ്ടി അധ്വാനിക്കുന്ന നേതാവാണ് അപ്പച്ചന്‍. ഇദ്ദേഹത്തിനെതിരായ നീക്കത്തിനു പിന്നില്‍ പ്രവര്‍ത്തിച്ചവരെ പാര്‍ട്ടി നേതൃത്വം തിരിച്ചറിയണമെന്നും യോഗം ആവശ്യപ്പെട്ടു. സംസ്ഥാന ജനറല്‍ സെക്രട്ടറി വേണുഗോപാല്‍ കിഴിശേരി ഉദ്ഘാടനം ചെയ്തു. ജില്ലാ പ്രസിഡന്റ് ഫൈസല്‍ പാപ്പിന അധ്യക്ഷത വഹിച്ചു. ജനറല്‍ സെക്രട്ടറി ഷിജു ഗോപാല്‍, ട്രഷറര്‍ രാമകൃഷ്ണന്‍ മൂത്തൊടി, ഷാഫി കമ്പളക്കാട്, ജിതേഷ് ചീരാല്‍, സി. സുനി, എം. ശിഹാബ്, പി.ജെ. നെല്‍ത്സണ്‍, പി. ഷാജഹാന്‍, കെ. ഫറാസ് എന്നിവര്‍ പ്രസംഗിച്ചു.

എൻഎഫ്പിഒ കിസാൻ രത്ന പദ്ധതി ഉദ്ഘാടനം നാളെ

സുൽത്താൻ ബത്തേരി: മറുനാടൻ കർഷക സംഘടനയായ നാഷണൽ ഫാർമേഴ്സ് പ്രൊഡ്യൂസേഴ്സ് ഓർഗനൈസേഷന്‍റെ(എൻഎഫ്പിഒ) കിസാൻ രത്ന പദ്ധതി ഉദ്ഘാടനം നാളെ രാവിലെ 10ന് മീനങ്ങാടി ചോളയിൽ ഓഡിറ്റോറിയത്തിൽ ഐ.സി. ബാലകൃഷ്ണൻ എംഎൽഎ നിർവഹിക്കും. ഓർഗനൈസേഷൻ ചെയർമാൻ ഫിലിപ്പ് ജോർജ്, കണ്‍വീനർ കെ.വി. ശങ്കരനാരായണൻ, എക്സിക്യുട്ടീവ് ഡയറക്ടർമാരായ തോമസ് മിറർ, ഉദയൻ എന്നിവർ വാർത്താസമ്മേളനത്തിൽ അറിയിച്ചതാണ് വിവരം. അംഗം മരണപ്പെട്ടാൽ കുടുംബത്തിന് അഞ്ച് ലക്ഷം രൂപ സഹായം നൽകുന്നതാണ് പദ്ധതി. സംഘടനയിൽ സജീവ അംഗത്വമുള്ളവർക്ക് 2,000 രൂപ അടച്ച് പദ്ധതിയിൽ ചേരാം. ചടങ്ങിൽ എൻഎഫ്പിഒ ചെയർമാൻ ഫിലിപ്പ് ജോർജ് അധ്യക്ഷത വഹിക്കും. ടി. സിദ്ദിഖ് എംഎൽഎ കുടുംബസഹായനിധി കൈമാറും. മലബാർ ഭദ്രാസനാധിപൻ ഡോ.ഗീവർഗീസ് മോർ സ്തേഫാനോസ് മുഖ്യപ്രഭാഷണം നടത്തും. ബ്ലോക്ക് പഞ്ചായത്ത് പ്രസിഡന്‍റ് സി. അസൈനാർ അംഗത്വവിതരണവും മീനങ്ങാടി പഞ്ചായയത്ത് പ്രസിഡന്‍റ് കെ.ഇ. വിനയൻ അപേക്ഷ സ്വീകരണവും ഉദ്ഘാടനം ചെയ്യും. എൻഎഫ്പിഒ കന്പനി ചെയർമാൻ വി.എൽ. അജയകുമാർ, ബോബി ഏബ്രഹാം, മാത്യു അഗസ്റ്റിൻ, ഇ.വി. സെബാസ്റ്റ്യൻ എന്നിവർ പ്രസംഗിക്കും. അഡ്വ.ജോസ് വി. തണ്ണിക്കോട് സ്വാഗതവും ശങ്കരനാരായണൻ നന്ദിയും പറയും.

ഗൂഡല്ലൂരിൽ കാട്ടാന വീടുകൾ തകർത്തു

ഗൂഡല്ലൂർ: നെല്ലാക്കോട്ട പഞ്ചായത്തിലെ മേഫീൽഡിൽ കാട്ടാനക്കൂട്ടം രണ്ട് എസ്റ്റേറ്റ് പാടികൾ തകർത്തു. നാലാം നന്പർ പാടികളിലെ രണ്ട് വീടുകളാണ് തകർത്തത്. കഴിഞ്ഞ ദിവസം രാത്രിയിലാണ് സംഭവം. ആനക്കുട്ടിയാണ് ആദ്യം വീട്ടിനുള്ളിൽ കയറിയത്. പിന്നീട് മറ്റ് ആനകളും ഉള്ളിലേക്ക് കയറുകയായിരുന്നു. വീടുകളിൽ ആളില്ലാത്തതിനാൽ വലിയ അപകടം ഒഴിവായി. കൈവട്ടയിൽ കാട്ടാനയുടെ മുന്പിൽ നിന്ന് വയോധികൻ രക്ഷപ്പെട്ടത് തലനാരിഴക്ക്. ഇന്നലെ പുലർച്ചെ 5.30ന് ഗൂഡല്ലൂർ-സുൽത്താൻ ബത്തേരി അന്തർ സംസ്ഥാന പാതയിലെ കൈവട്ടയിൽ പ്രഭാത സവാരിക്കെത്തിയ അച്ചുവിനെ (64) കാട്ടാന ആക്രമിക്കാൻ ശ്രമിച്ചത്. ഭാഗ്യം കൊണ്ടാണ് ഇയാൾ രക്ഷപ്പെട്ടത്. ആന ആക്രമിക്കാൻ ശ്രമിക്കുന്നതിനിടെ നിർത്തിയിട്ട കാറിന് അടിയിൽ ഒളിക്കുകയായിരുന്നു ഇദ്ദേഹം. കലി പൂണ്ട ആന കാർ ആക്രമിച്ചു. പ്രദേശവാസിയായ സുമന്‍റെ കാറാണ് അക്രമിക്കപ്പെട്ടത്. വിവരമറിഞ്ഞ് വനംവകുപ്പ് ജീവനക്കാരും നാട്ടുകാരും സ്ഥലത്തെത്തിയാണ് അച്ചുവിനെ രക്ഷപ്പെടുത്തിയത്. ആനകൾ സ്ഥിരമായി ഈ മേഖലയിലേക്ക് ഇറങ്ങി വ്യാപക കൃഷിനാശവും വരുത്തുന്നുണ്ട്. ആന ശല്യത്തിന് പരിഹാരം കാണണമെന്ന് നാട്ടുകാർ നിരന്തരം ആവശ്യപ്പെട്ടുവരികയാണ്.

മഹിളാ കോണ്‍ഗ്രസ് പഠനക്യാന്പ് നടത്തി

സുൽത്താൻ ബത്തേരി: മഹിളാ കോണ്‍ഗ്രസ് ജില്ലാ കമ്മിറ്റി അധ്യാപക ഭവനിൽ ദ്വിദിന പഠന ക്യാന്പ് നടത്തി. ഡിസിസി പ്രസിഡന്‍റ് എൻ.ഡി. അപ്പച്ചൻ ഉദ്ഘാടനം ചെയ്തു. മഹിളാ കോണ്‍ഗ്രസ് ജില്ലാ പ്രസിഡന്‍റ് ജിനി തോമസ് അധ്യക്ഷത വഹിച്ചു. ഐ.സി. ബാലകൃഷ്ണൻ എംഎൽഎ മുഖ്യപ്രഭാഷണം നടത്തി. കെപിസിസി നിർവാഹകസമിതിയംഗം കെ.എൽ. പൗലോസ്, നേതാക്കളായ ഡി.പി. രാജശേഖരൻ, മേഴ്സി സാബു, കെ.ഇ. വിനയൻ, സംഷാദ് മരക്കാർ, നിസി അഹമ്മദ് എന്നിവർ പ്രസംഗിച്ചു.

മഡ് ഫെസ്റ്റ് സീസണ്‍ മൂന്നിനു തുടക്കമായി

സുൽത്താൻ ബത്തേരി: മഴക്കാല വിനോദസഞ്ചാരം പ്രോത്സാഹിപ്പിക്കുന്നതിന് ജില്ലാ ടൂറിസം പ്രമോഷൻ കൗണ്‍സിൽസംഘടിപ്പിച്ച മഡ് ഫെസ്റ്റ് സീസണ്‍ മൂന്നിന് തുടക്കമായി. സപ്ത റിസോർട്ടിനു സമീപം പുളവയലിൽ പൊതുമരാമത്ത്-ടൂറിസം മന്ത്രി പി.എ. മുഹമ്മദ് റിയാസ് ഉദ്ഘാടനം ചെയ്തു. എംഎൽഎമാരായ ഐ. സി. ബാലകൃഷ്ണൻ, ടി. സിദ്ദീഖ്, ജില്ലാ കളക്ടർ ഡി.ആർ. മേഘശ്രീ, ഡിടിപിസി സെക്രട്ടറി ബിനോഷ് കുഞ്ഞപ്പൻ തുടങ്ങിയവർ പങ്കെടുത്തു. ഇന്നലെ മഡ് ഫുട്ബോൾ മത്സരത്തിൽ 14 ടീം പങ്കെടുത്തു. ഇതിൽ എട്ട് ടീമുകളെ 15ന് മാനന്തവാടി വള്ളിയൂർക്കാവിൽ നടക്കുന്ന ഫൈനൽ റൗണ്ടിലേക്ക് തെരഞ്ഞെടുത്തു. 17 വരെയാണ് മഡ് ഫെസ്റ്റ് സീസണ്‍ മൂന്ന്.

പി.എം. റിൻഷാദ് എംഎസ്എഫ് ജില്ലാ പ്രസിഡന്‍റ്

കൽപ്പറ്റ: എംഎസ്എഫ് ജില്ലാ പ്രസിഡന്‍റായി പി.എം. റിൻഷാദിനെ തെരഞ്ഞെടുത്തു. മറ്റു ഭാരവാഹികൾ: ശുഹൈബ് മാനന്തവാടി, അമീൻ നായ്ക്കെട്ടി, മുബഷീർ കൽപ്പറ്റ, മുത്തലിബ് ദ്വാരക, ഫസൽ കന്പളക്കാട്, അസീന മാടക്കര(വൈസ് പ്രസിഡന്‍റുമാർ), ഫായിസ് തലയ്ക്കൽ(ജനറൽ സെക്രട്ടറി), റയീസ് വേങ്ങൂർ, റുമൈസ് വെള്ളമുണ്ട, നിഹാൽ വാളത്തൂർ, നാസർ അഞ്ചുകുന്ന്, ഷെഫിൻ ചെതലയം, ജിൻഷാദ് എടവക, ഇഹ്സാന മേപ്പാടി(ജോയിന്‍റ് സെക്രട്ടറിമാർ), അജിനാസ് വെള്ളമുണ്ട(ട്രഷറർ),ഹഫീസ് ജവാദ്, റാഷിദ് പീച്ചങ്ങോട്, ഷിബിലി പടിഞ്ഞാറത്തറ(വിംഗ് കണ്‍വീനർമാർ). ജില്ലാ ലീഗ് ഓഫീസിൽ എംഎസ്എഫ് ജില്ലാ കൗണ്‍സിൽ യോഗത്തിലായിരുന്നു തെരഞ്ഞെടുപ്പ്. മുസ്ലിംലീഗ് സംസ്ഥാന സെക്രട്ടറി അബ്ദുറഹ്മാൻ രണ്ടത്താണി ഉദ്ഘാടനം ചെയ്തു. എംഎസ്എഫ് സംസ്ഥാന പ്രസിഡന്‍റ് പി.കെ. നവാസ് അധ്യക്ഷത വഹിച്ചു. സംസ്ഥാന ട്രഷറർ അസ്ഹർ പെരുമുക്ക്, മുസ്ലിംലീഗ് ജില്ലാ ജനറൽ സെക്രട്ടറി ടി. മുഹമ്മദ്, സെക്രട്ടറി കെ. ഹാരിസ്, എംഎസ്എഫ് സംസ്ഥാന സെക്രട്ടറിമാരായ അഡ്വ.മുനവറലി സാദത്ത്, അൽ റസീൻ എന്നിവർ പങ്കെടുത്തു.

സിവിൽ സ്റ്റേഷൻ പരിസരത്ത് പൊതുശൗചാലയം നിർമിക്കണമെന്ന്

കൽപ്പറ്റ: സിവിൽ സ്റ്റേഷൻ പരിസരത്ത് പൊതുശൗചാലയം നിർമിക്കണമെന്ന് ദേശീയ മനുഷ്യാവകാശ സംരക്ഷണ സമിതി വൈത്തിരി താലൂക്ക് കമ്മിറ്റി ആവശ്യപ്പെട്ടു. സിവിൽ സ്റ്റേഷനു സമീപം പൊതുശൗചാലയം ഇല്ലാത്തത് ജനങ്ങൾക്ക് വലിയ പ്രയാസമാണ് സൃഷ്ടിക്കുന്നതെന്ന് യോഗം ചൂണ്ടിക്കാട്ടി. നഗരത്തിലെ തെരുവുനായ ശല്യം പരിഹരിക്കണമെന്ന ആവശ്യവും ഉന്നയിച്ചു. ജില്ലാ പ്രസിഡന്‍റ് അനിൽ എസ്. നായർ ഉദ്ഘാടനം ചെയ്തു. വന്ദന ഷാജു അധ്യക്ഷത വഹിച്ചു. കെ.ആർ. രാധാകൃഷ്ണൻ, എം.വി. രാജൻ, കെ. ശശികുമാർ, കെ. ബാബു, ആർ. രജിത്ത്, വിനു വയനാട്, വിപിൻ ജോസ്, ബെന്നി വട്ടപ്പറന്പിൽ, ആർ. ഗോപാലകൃഷ്ണൻ, ദിലീപ്കുമാർ, വി. ഹംസ, പ്രതീഷ് ചീരാൽ, കെ.എൻ. ബിന്ദു, ടി.കെ. ഗിരിജ, അനുപമ വിനോദ് എന്നിവർ പ്രസംഗിച്ചു. താലൂക്ക് കമ്മിറ്റി ഭാരവാഹികളായി എം.വി. രാജൻ(പ്രസിഡന്‍റ്), ആർ. രഞ്ജിത്ത്(സെക്രട്ടറി), വിപിൻ ജോസ്(ട്രഷറർ), വിനു വയനാട്(മീഡിയ കണ്‍വീനർ) എന്നിവരെ തെരഞ്ഞെടുത്തു.

ഒരു നൂറ്റാണ്ട് മുന്പുള്ള ഹാർമോണിയം ജീവിതത്തിന്‍റെ ഭാഗമാക്കി ഡൊമിനിക്

പുൽപ്പള്ളി: ഒരു നൂറ്റാണ്ടു മുന്പുള്ള ഹാർമോണിയത്തെ ഇന്നും ജീവിതത്തിന്‍റെ ഭാഗമാക്കി വച്ചിരിക്കുകയാണ് പുൽപ്പള്ളി സീതാമൗണ്ട് എഴുത്തുപള്ളിയ്ക്കൽ വീട്ടിൽ ഇ.ജെ. ഡൊമിനിക്. പാട്ടിനോട് എന്നും പ്രിയമായിരുന്നു. അങ്ങനെയാണ് ഈ ഹാർമോണിയത്തിലേക്ക് എത്തുന്നത്. പേരാവൂർ കോളയാടുള്ള സുഹൃത്തിന്‍റെ കൈയ്യിലായിരുന്നു ആദ്യം ഈ ഹാർമോണിയം ഉണ്ടായിരുന്നത്. അത് കൊടുക്കുന്നതറിഞ്ഞാണ് അങ്ങോട്ടേക്ക് പോയത്. ഇറ്റലിയിൽ നിന്നും വന്ന ഒരു പുരോഹിതന്‍റെ കൈയ്യിൽ നിന്നാണ് അദ്ദേഹത്തിന് ഈ ഹാർമോണിയം ലഭിക്കുന്നത്. അന്നതിന് 65 വർഷം പഴക്കമുണ്ടായിരുന്നു. അക്കാലത്ത് 500 രൂപ നൽകി ഹാർമോണിയം വാങ്ങി വയനാട്ടിലേക്ക് വന്നു. ഇപ്പോൾ അഞ്ച് പതിറ്റാണ്ടിലേറെയായി ജീവിതത്തിനൊപ്പം ഈ ഹാർമോണിയവുമുണ്ട്. ഹാർമോണിയത്തിന് ഇപ്പോൾ 120 വർഷത്തെ പഴക്കമുണ്ടെന്ന് ഡൊമിനിക് പറഞ്ഞു. ചെറുപ്പത്തിലെ മാതാപിതാക്കൾ മരിച്ചു. ആ ദുഖം മറക്കാനുള്ള ശ്രമത്തിന്‍റെ ഭാഗമായാണ് സംഗീതത്തിലേക്ക് അടുക്കുന്നത്. പാട്ടിനോടായിരുന്നു പ്രിയം. അങ്ങനെ സ്വന്തം നിലയിലും അല്ലാതെയും പാട്ടുകൾ പഠിച്ചു. പിന്നെ പള്ളികളിലെ ക്വയറുകളിലെ സ്ഥിരം പാട്ടുകാരനായി. ഹാർമോണിയം വായിച്ച് പാടുന്നതിനാൽ സംഗീതപ്രേമികൾക്കെല്ലാം എന്നും പ്രിയപ്പെട്ടവനായിരുന്നു ഡൊമിനിക്. ഒരുകാലത്ത് നാടകത്തിന്‍റെ പിന്നണിയിലും അദ്ദേഹം പ്രവർത്തിച്ചിരുന്നു. ഒരുപാട് ഓർമ്മകൾ സമ്മാനിക്കുന്ന ഹാർമോണിയത്തിൽ വിരൽ മീട്ടി പാട്ടുപാടാൻ ഇപ്പോഴും സമയം കണ്ടെത്താറുണ്ടെന്നും അദ്ദേഹം കൂട്ടിച്ചേർക്കുന്നു. ഒഴിവുസമയങ്ങളിൽ എഴുത്തുപള്ളിയ്ക്കൽ വീട്ടിൽ നിന്നും ഡൊമിനികിന്‍റെ പാട്ടും ഹാർമോണിയത്തിന്‍റെ ശബ്ദവും കേൾക്കാം. അന്നും ഇന്നും പ്രോത്സാഹനങ്ങളുമായി കുടുംബവും അദ്ദേഹത്തിന് ഒപ്പമുണ്ട്. ഇനിയും പാട്ടും സംഗീതവും തുടരുമെന്നും അദ്ദേഹം കൂട്ടിച്ചേർത്തു. ചിന്നമ്മയാണ് ഡൊമിനികിന്‍റെ ഭാര്യ. ജയിംസ്, വിൻസെന്‍റ് എന്നിവരാണ് മക്കൾ.

പുഞ്ചിരിമട്ടം ദുരന്തം: പരിക്കേറ്റ 33 പേർ കിടപ്പിൽ

കൽപ്പറ്റ: പുഞ്ചിരിമട്ടം ഉരുൾദുരന്തത്തിൽ ഗുരുതര പരിക്കേറ്റ 37 ആളുകളിൽ 33 പേർ കിടപ്പിൽ. ജില്ലാ ദുരന്ത നിവാരണ അഥോറിറ്റി സംസ്ഥാന സർക്കാരിന് നൽകിയ റിപ്പോർട്ടിലാണ് ഈ വിവരം. ദുരന്തത്തിൽ 298 പേരാണ് മരിച്ചത്. 32 പേരെ കണ്ടെത്താനുണ്ട്. 231 പൂർണ മൃതദേഹങ്ങളാണ് കണ്ടെത്തിയത്. 223 ശരീരഭാഗങ്ങളും ലഭിച്ചു. ഡിഎൻഎ പരിശോധനയിലൂടെയാണ് കുറെയാളുകളെ തിരിച്ചറിഞ്ഞത്. 59 കുടുംബങ്ങൾ ദുരന്തത്തിൽ പൂർണമായും ഇല്ലാതായി. 765 കുടുംബങ്ങൾക്ക് എല്ലാ മാസവും സർക്കാർ വാടക നൽകുന്നുണ്ട്. എൽസ്റ്റണ്‍ എസ്റ്റേറ്റിൽ ടൗണ്‍ഷിപ്പ് നിർമാണം നടന്നുവരികയാണ്. ദുരന്തബാധിതരുടെ എൻറോൾമെന്‍റ് നടത്തുന്നുണ്ട്. മേപ്പാടി പഞ്ചായത്തിലെ 10, 11, 12 വാർഡുകളിലെ 1,036 കുടുംബങ്ങളെയാണ് ഉരുൾ ദുരന്തം നേരിട്ട് ബാധിച്ചതെന്നും റിപ്പോർട്ടിൽ പറയുന്നു.

കാട്ടാനകളെ ഉൾവനത്തിലേക്ക് തുരത്തി

കേണിച്ചിറ: ചെതലയത്ത് റേഞ്ച് വനം പരിധിയിലെ മൂടക്കൊല്ലി, മണ്ണുണ്ടി, വാകേരി ഭാഗങ്ങളിൽ കൃഷിനാശം വരുത്തിയ കാട്ടാനകളെ ഉൾവനത്തിലേക്ക് തുരത്തി. പ്രമുഖ, ഭരത് എന്നീ കുംകിയാനകളുടെ സഹായത്തോടെയാണ് കാട്ടാനകളെ വനത്തിലേക്ക് പായിച്ചത്. സെക്ഷൻ ഫോറസ്റ്റ് ഓഫീസർ ടി. കണ്ണന്‍റെ നേതൃത്വത്തിൽ ഇരുളം, കുപ്പാടി ഫോറസ്റ്റ് സ്റ്റേഷനുകളിൽനിന്നുള്ള 14 ജീവനക്കാർ ദൗത്യത്തിൽ പങ്കെടുത്തു.

മുള്ളൻകൊല്ലിയിലെ കോൺഗ്രസ് പോര് : പ്രതിസന്ധി പരിഹരിക്കുന്നതിന് കെപിസിസി ഇടപെടുന്നു

പുൽപ്പള്ളി: മുള്ളൻകൊല്ലിയിലെ കോണ്‍ഗ്രസിലെ പോര് പരിഹരിക്കാൻ കെപിസിസി 15ന് ചർച്ച നടത്തുമെന്ന് സൂചന. പഞ്ചായത്ത് തെരഞ്ഞെടുപ്പ് ആസന്നമായ ഘട്ടത്തിൽ മുള്ളൻകൊല്ലിയിലെ മണ്ഡലം കോണ്‍ഗ്രസ് കമ്മിറ്റിയിലെ തർക്കം പാർട്ടി നേതൃത്വത്തിന് തലവേദനയാകുന്നതിനിടയിലാണ് പ്രശ്നപരിഹാരത്തിന് ഇടപെടൽ. കഴിഞ്ഞ കുറച്ച് മാസങ്ങളായി മുള്ളൻകൊല്ലി പഞ്ചായത്തിലെ കോണ്‍ഗ്രസിൽ പ്രവർത്തകർ തമ്മിലുള്ള തർക്കങ്ങൾ രൂക്ഷമായിരുന്നു. കഴിഞ്ഞ മാസം കെപിസിസി ഭാരവാഹികളായ പി.എം. നിയാസ്, ജമീല ആലിപ്പറ്റ എന്നിവരുടെ നേതൃത്വത്തിൽ മുള്ളൻകൊല്ലിയിലെ നേതാക്കളെയും ജനപ്രതിനിധികളെയും വിളിച്ച് ചർച്ച നടത്തിയെങ്കിലും അതിലും പ്രശ്നം പരിഹരിക്കാൻ സാധിച്ചിരുന്നില്ല. കഴിഞ്ഞ ദിവസം ഡിസിസി പ്രസിഡന്‍റിന്‍റെ നേതൃത്വത്തിൽ നടന്ന യോഗത്തിൽ പ്രവർത്തകർ തമ്മിൽ വാക്കേറ്റവും നേതാക്കളെ ഉൾപ്പെടെ കയ്യേറ്റം ചെയ്യാൻ ശ്രമിച്ചതും പാർട്ടിയെ പ്രതിരോധത്തിലാക്കിയിരിക്കുകയാണ്. പ്രശ്നം ഏതുവിധേനയും പരിഹരിക്കുകയെന്ന ലക്ഷ്യത്തിന്‍റെ ഭാഗമായി ഞായറാഴ്ച ഡിസിസി യോഗം തീരുമാനിച്ചിരുന്നെങ്കിലും നടന്നില്ല. 15ന് കെപിസിസി പ്രസിഡന്‍റ് ജില്ലയിലെത്തുന്പോൾ മുള്ളൻകൊല്ലിയിലെ വിഷയം അദ്ദേഹത്തിന്‍റെ നേതൃത്വത്തിൽ ചർച്ച ചെയ്ത് പരിഹരിക്കാനുള്ള ശ്രമമാണ് നടക്കുന്നത്. ജില്ലയിൽ പാർട്ടിയുടെ ശക്തികേന്ദ്രത്തിൽ തന്നെ നേതാക്കളും പ്രവർത്തകർക്കുമിടയിൽ തർക്കവും കയ്യേറ്റവും ഉണ്ടായതോടെ ഉടൻതന്നെ പ്രശ്നം പരിഹരിക്കാനാണ് നേതൃത്വത്തിന്‍റെ ശ്രമം. ഡിസിസി പ്രസിഡന്‍റ് ഉൾപ്പെടെയുണ്ടായിരുന്ന യോഗത്തിൽ അനാവശ്യമായി പ്രശ്നമുണ്ടാക്കിയവർക്കെതിരെ നടപടിയെടുക്കണമെന്നാണ് ഒരു വിഭാഗം ആവശ്യപ്പെടുന്നത്. പ്രശ്നം പരിഹരിക്കാതെ യോഗം ചേർന്നതാണ് പാടിച്ചിറയിലെ യോഗത്തിലുണ്ടായ സംഘർഷമെന്നാണ് മറുഭാഗം ആരോപിക്കുന്നത്. മൂന്ന് ഡിസിസി ഭാരവാഹികളും ഒരു ബ്ലോക്ക് പ്രസിഡന്‍റും മുള്ളൻകൊല്ലി പഞ്ചായത്തിൽ നിന്നാണ്. പ്രശ്നം പരിഹരിക്കേണ്ട നേതാക്കൾ ഇരുചേരികളിലും ചേർന്നതോടെ കെപിസിസി ഇടപെട്ട് നിലവിലെ തർക്കങ്ങൾക്ക് പരിഹാരം കാണണം എന്ന വിലയിരുത്തലിലാണ് ജില്ലാനേതൃത്വം.

ജീനിയസ് ലോഞ്ച് പ്രോഗ്രാമിനു തുടക്കമായി

സുൽത്താൻ ബത്തേരി: മൂന്നാനക്കുഴി ജീനിയസ് ഇന്‍റർ നാഷണൽ സ്കൂൾ പട്ടികവർഗ വികസന വകുപ്പിന്‍റെ സഹകരണത്തോടെ കണിയാന്പറ്റ ഗവ.മോഡൽ റസിഡൻഷൽ സ്കൂളിലെ കുട്ടികൾക്ക് നടപ്പാക്കുന്ന ജീനിയസ് ലോഞ്ച് പ്രോഗ്രാമിനു തുടക്കമായി. ജീനിയസ് ഇന്‍റർനാഷണൽ സ്കൂളിൽ സബ് കളക്ടർ മിസാൽ സാഗർ ഭരത് ഉദ്ഘാടനം ചെയ്തു. സ്കൂൾ ചെയർമാനാൻ ദിനേശ് രംഗൻ അധ്യക്ഷത വഹിച്ചു. അസിസ്റ്റന്‍റ് കളക്ടർ അർച്ചന മുഖ്യാതിഥിയായി. പ്രിൻസിപ്പൽ കെ.ജി. ശ്രീജേഷും ഗവ.മോഡൽ റസിഡൻഷ്യൽ സ്കൂൾ സൂപ്രണ്ട് എം. ധനലക്ഷ്മിയും ധാരണാപത്രത്തിൽ ഒപ്പുവച്ചു. പട്ടികവർഗ വികസന പ്രോജക്ട് ഓഫീസർ പ്രമോദ്, മോഡൽ റെസിഡൻഷ്യൽ സ്കൂൾ പ്രധാനാധ്യാപിക ജസീല കെ. കൈനാടൻ, ജീനിയസ് സ്കൂൾ സിഇഒ സലീന രംഗൻ എന്നിവർ പ്രസംഗിച്ചു. വിമർശനാത്മക ചിന്ത, ആശയ വിനിമയം, സഹകരണം, റോബോട്ടിക് ഇന്‍റലിജൻസ്, ഡ്രോണ്‍ സാങ്കേതികവിദ്യ എന്നിവയിൽ പരിശീലനം പ്രോഗ്രാമിന്‍റെ ഭാഗമാണ്. മോഡൽ റസിഡൻഷൽ സ്കൂളിലെ 35 കുട്ടികളാണ് പ്രോഗ്രാമിൽ പങ്കെടുക്കുന്നത്. ശനിയാഴ്ചകളിൽ രാവിലെ 10 മുതൽ ഉച്ചകഴിഞ്ഞ് മൂന്നു വരെ ജീനിയസ് സ്കൂളിലാണ് പരിശീലനം.

കാട്ടാനകൾ കൃഷി നശിപ്പിച്ചു

സുൽത്താൻ ബത്തേരി: വാകേരി മൂടക്കൊല്ലിയിൽ രണ്ട് കുംകിയാനകളെ തളച്ചതിന് കുറച്ചകലെ കൂടല്ലൂരിൽ കാട്ടാനകൾ കൃഷി നശിപ്പിച്ചു. മൂടക്കൊല്ലിയിൽ രണ്ട് കാട്ടാനകൾ നിരന്തരം ശല്യം ചെയ്യുന്നുണ്ട്. ഇവയെ ഉൾക്കാട്ടിലേക്ക് തുരത്താൻ മുത്തങ്ങയിൽനിന്നു എത്തിച്ച പ്രമുഖ്, ഭാരത് എന്നീ കുംകികളെ തളച്ചതിനടുത്താണ് വെള്ളിയാഴ്ച രാത്രി കൃഷി നാശം ഉണ്ടായത്. നിരവധിയാളുകളുടെ കൃഷിയിടങ്ങളിൽ നാശം ഉണ്ടായി. ഇന്നലെ രാവിലെ മൂടക്കൊല്ലിയിൽ വനപാലകരും പ്രദേശവാസികളും തമ്മിൽ വാക്കേറ്റം ഉണ്ടായി. കുംകിയാനകൾ ഉണ്ടായിരുന്നതിന് സമീപം കാട്ടാനകൾ ഇറങ്ങി കൃഷി നശിപ്പിച്ചതിലുള്ള രോഷത്തിലാണ് നാട്ടുകാർ. കാട്ടാനകളെ ഉൾവനത്തിലേക്ക് തുരത്തുന്നതിൽ വനസേന മതിയായ ശുഷ്കാന്തി കാട്ടുന്നില്ലെന്ന ആക്ഷേപം തദ്ദേശീയർക്കുണ്ട്. ജനങ്ങളുടെ പ്രതിഷേധത്തിനിടെ ആനകളെ ഉൾക്കാട്ടിലേക്കു തുരത്താൻ വനപാലകർ ശ്രമിച്ചുവരികയാണ്.

അടിസ്ഥാന, പശ്ചാത്തല മേഖലകളിൽ വികസനം സർക്കാർ ലക്ഷ്യം: മന്ത്രി പി.എ. മുഹമ്മദ് റിയാസ്

കാട്ടിക്കുളം: അടിസ്ഥാന, പശ്ചാത്തല മേഖലകളിൽ വികസനം സർക്കാർ ലക്ഷ്യമാണെന്ന് പൊതുമരാമത്ത്-ടൂറിസം മന്ത്രി പി.എ. മുഹമ്മദ് റിയാസ്. കിഫ്ബിയിൽ ഉൾപ്പെടുത്തി തിരുനെല്ലി കാളിന്ദി പുഴയ്ക്കു കുറുകെ 12.74 കോടി ചെലവിൽ നിർമിച്ച നെട്ടറ പാലം ഉദ്ഘാടനം ചെയ്യുകയായിരുന്നു അദ്ദേഹം. നെട്ടറ ഉന്നതി നിവാസികളുടെ യാത്രാക്ലേശം പരിഹരിക്കുന്നതിനും പ്രദേശത്തിന്‍റെ സാന്പത്തിക, സാമൂഹിക ഉന്നമനത്തിനും ഉതകുന്നതാണ് പാലമെന്ന് മന്ത്രി പറഞ്ഞു. പട്ടികജാതി-വർഗ-പിന്നാക്ക ക്ഷേമ മന്ത്രി ഒ.ആർ. കേളു അധ്യക്ഷത വഹിച്ചു. മാനന്തവാടി ബ്ലോക്ക് പഞ്ചായത്ത് പ്രസിഡന്‍റ് ജസ്റ്റിൻ ബേബി, വൈസ് പ്രസിഡന്‍റ് എ.കെ. ജയഭാരതി, തിരുനെല്ലി പഞ്ചായത്ത് പ്രസിഡന്‍റ് പി.വി. ബാലകൃഷ്ണൻ, ജില്ലാ പഞ്ചായത്ത് അംഗം എ.എൻ. സുശീല, ജനപ്രതിനിധികളായവി.എം വിമല, പി.എൻ. ഹരീന്ദ്രൻ, കേരള റോഡ് ഫണ്ട് ബോർഡ് പ്രോജക്ട് മാനേജ്മെന്‍റ് യൂണിറ്റ് ടീം ലീഡർ ആർ. സിന്ധു, എക്സിക്യുട്ടീവ് എൻജിനിയർ പി.ബി. ബൈജു, അസിസ്റ്റന്‍റ് എൻജിനിയർ വി.പി. വിജയകൃഷ്ണൻ തുടങ്ങിയവർ പങ്കെടുത്തു. 25 മീറ്റർ നീളത്തിൽ രണ്ട് സ്പാനുകൾ അടങ്ങിയ ആർസിസിടി ബീം സ്ലാബ് തരം പാലമാണ് നിർമിച്ചത്.56.7 മീറ്റർ നീളമുള്ള പാലത്തിന്‍റെ ആകെ വീതി 11 മീറ്ററാണ്. എട്ട് മീറ്റർ വിതിയിൽ ബിസി സർഫേസിംഗ് പൂർത്തിയാക്കി. ഇരുഭാഗത്തും നടപ്പാത, 1.5 കിലോമീറ്റർ ദൂരത്തിൽ ഏഴ് മീറ്റർ വീതിയിൽ സംരക്ഷണ ഭിത്തി. ഡ്രൈനേജ് എന്നിവയും നിർമിച്ചിട്ടുണ്ട്. തിരുനെല്ലി അന്പലത്തിൽനിന്നു 1.5 കിലോ മീറ്റർ മാറിയാണ് നെട്ടറ പാലം.

റോസല്ലോസ് സ്കൂളിന് അനുവദിച്ച ഉപകരണങ്ങളുടെ ഉദ്ഘാടനം നടത്തി

സുൽത്താൻ ബത്തേരി: പൂമല സെന്‍റ് റോസല്ലോസ് സ്കൂൾ ഫോർ സ്പീച്ച് ആൻഡ് ഹിയറിംഗിനു എംഎൽഎ എസ്ഡി ഫണ്ട് മുഖേന ലഭിച്ച ലാപ്ടോപ്, പ്രൊജക്ടർ, അനുബന്ധ ഉപകരണങ്ങൾ എന്നിവയുടെ ഉദ്ഘാടനം ഐ.സി. ബാലകൃഷ്ണൻ എംഎൽഎ നിർവഹിച്ചു. പിടിഎ പ്രസിഡന്‍റ് ടി. നവാസ് അധ്യക്ഷത വഹിച്ചു. സ്കൂൾ ലോക്കൽ മാനേജർ സിസ്റ്റർ ആഗ്നസ്, ഹെഡ്മിസ്ട്രസ് സിസ്റ്റർ സിമി ജോസഫ്, സ്റ്റാഫ് സെക്രട്ടറി നീതു പി. ജോയ് പ്രസംഗിച്ചു. പിടിഎ ഭാരവാഹികളായ ജിന്നി ഡേവിഡ്, സി.ജെ. ഷിജി, ശ്രുതി മാത്യു തുടങ്ങിയവർ സന്നിഹിതരായിരുന്നു.

ശിൽപ്പശാല നടത്തി

മീനങ്ങാടി: അന്താരാഷ്ട്ര സഹകരണ വർഷാഘോഷത്തിന്‍റെ ഭാഗമായി നബാർഡും സ്റ്റെർക്കും(സയൻസ്, ടെക്നോളജി, എഡ്യുക്കേഷൻ ആൻഡ് റിസർച്ച് സെന്‍റർ വയനാട്) സംയുക്തമായി ജില്ലയിലെ ക്ഷീരസംഘം ഭാരവാഹികൾക്ക് "സഹകരണമേഖലയിലൂടെ സുസ്ഥിരലോകം' എന്ന വിഷയത്തിൽ ശിൽപശാല നടത്തി. നബാർഡ് ജില്ലാ ഡവലപ്മെന്‍റ് മാനേജർ ആർ. ആനന്ദ് ഉദ്ഘാടനം ചെയ്തു. റിട്ട.ക്ഷീര വികസന ജോയിന്‍റ് ഡയറക്ടർ എം. പ്രകാശ്, സ്റ്റെർക്ക് ചെയർമാൻ പ്രഫ.കെ. ബാലഗോപാലൻ എന്നിവർ യഥാക്രമം "സുസ്ഥിര വികസനം', "ഹരിതഭവനം' എന്നീ വിഷയങ്ങളിൽ ക്ലാസെടുത്തു. സ്റ്റെർക്ക് വൈസ് ചെയർമാൻ പി.ആർ. മധുസൂദനൻ സ്വാഗതവും സിഇഒ എം.എം. ടോമി നന്ദിയും പറഞ്ഞു. വിവിധ ക്ഷീര സംഘങ്ങളിൽനിന്നായി 40 പ്രതിനിധികൾ പങ്കെടുത്തു.

ബഷീർ അനുസ്മരണം നടത്തി

വെള്ളമുണ്ട: പബ്ലിക് ലൈബ്രറിയിൽ വൈക്കം മുഹമ്മദ് ബഷീർ അനുസ്മരണം നടത്തി. സാഹിത്യകാരൻ ഷാജി പുൽപ്പള്ളി ഉദ്ഘാടനം ചെയ്തു. ലൈബ്രറി പ്രസിഡന്‍റ് എം. സുധാകരൻ അധ്യക്ഷത വഹിച്ചു. പി.ടി. സുരേഷ് ബാബു, എൻ.വി. സുജാത, എം. മുരളീധരൻ, ഖമർ ലൈല, ടി.എം. നിവേദ്യ, എം. മണികണ്ഠൻ, മിഥുൻ മുണ്ടയ്ക്കൽ എന്നിവർ പ്രസംഗിച്ചു. സുൽത്താൻ ബത്തേരി: ചുള്ളിയോട് പബ്ലിക് ലൈബ്രറിയുടെ ആഭിമുഖ്യത്തിൽ വൈക്കം മുഹമ്മദ് ബഷീർ അനുസ്മരണവും സംസ്ഥാന സാഹിത്യ അക്കാദമിയുടെ ചെറുകഥയ്ക്കുള്ള ഗീതാ ഹിരണ്യൻ അവാർഡ് നേടിയ സലിം ഷെരീഫിനുസ്വീകരണവും സംഘടിപ്പിച്ചു. താലൂക്ക് ലൈബ്രറി കൗണ്‍സിൽ മുൻ സെക്രട്ടറി പി.കെ. സത്താർ ഉദ്ഘാടനം ചെയ്തു. എം. കുഞ്ഞുകുട്ടൻ അധ്യക്ഷത വഹിച്ചു. ഷാജി കോട്ടയിൽ, എം.എ. ഷൈനി, സലിം, ഷെരീഫ്, സുരേന്ദ്രൻ കുഴിമാളം എന്നിവർ പ്രസംഗിച്ചു.

ലോക ജനസംഖ്യാ ദിനാചരണം: ബോധവത്കരണ സെമിനാർ നടത്തി

സുൽത്താൻ ബത്തേരി: ആരോഗ്യ വകുപ്പും ആരോഗ്യ കേരളവും സംയുക്തമായി ലോക ജനസംഖ്യാ ദിനം ആചരിച്ചു. ജില്ലാതല ഉദ്ഘാടനവും ബോധവത്കരണ സെമിനാറും സെന്‍റ് മേരീസ് കോളജിൽ നഗരസഭാ ചെയർമാൻ ടി.കെ. രമേശ് ഉദ്ഘാടനം ചെയ്തു. ആരോഗ്യ-സ്റ്റാൻഡിംഗ് കമ്മിറ്റി ചെയർപേഴ്സണ്‍ ഷാമില ജുനൈസ് അധ്യക്ഷത വഹിച്ചു. വികസനകാര്യ സ്റ്റാൻഡിംഗ് കമ്മിറ്റി ചെയർപേഴ്സണ്‍ ലിഷ, ജില്ലാ റീപ്രൊഡക്ടീവ് ആൻഡ് ചൈൽഡ് ഹെൽത്ത് ഓഫീസർ ഡോ.ജെറിൻ എസ്. ജെറോഡ്, പ്രിൻസിപ്പൽ ഡോ.എ.ആർ. വിജയകുമാർ, ചെതലയം കുടുംബാരോഗ്യകേന്ദ്രം മെഡിക്കൽ ഓഫീസർ ഡോ.ഷൈനി, നാഷണൽ സർവീസ് സ്കീം പ്രോഗ്രാം കോ ഓർഡിനേറ്റർ പി.ആർ. അശ്വതി, ജില്ലാ എഡ്യുക്കേഷൻ ആൻഡ് മീഡിയ ഓഫീസർ കെ.എം. മുസ്തഫ, ഡെപ്യൂട്ടി ജില്ലാ എഡ്യുക്കേഷൻ ആൻഡ് മീഡിയ ഓഫീസർ പി.എം. ഫസൽ, ജില്ലാ പബ്ലിക് ഹെൽത്ത് നഴ്സ് മജോ ജോസഫ്, കൗണ്‍സലർ സി.പി. അർഷ, ജൂണിയർ ഹെൽത്ത് ഇൻസ്പെക്ടർ കെ. അബ്ദു, എൻഎസ്എസ് വോളണ്ടിയർ ഇ.എ. അഷ്മി താര എന്നിവർ പ്രസംഗിച്ചു.

കയറ്റിറക്ക് തൊഴിലാളികളുടെ അനിശ്ചിതകാല സമരം: റേഷൻ വിതരണം പ്രതിസന്ധിയിലാകുമെന്ന് ആശങ്ക

മാനന്തവാടി: ജില്ലയിലെ എൻഎഫ്എസ്എ കയറ്റിറക്ക് തൊഴിലാളികൾ അനിശ്ചിതകാല സമരം തുടരുന്നു. സർക്കാർ പ്രഖ്യാപിച്ച കൂലിവർധന നടപ്പാക്കാത്തതിൽ പ്രതിഷേധിച്ചാണ് സമരം. ഇത് റേഷൻ വിതരണം പ്രതിസന്ധിയിലാകുമെന്ന ആശങ്കയ്ക്കു കാരണമായി. ജില്ലയിലെ റേഷൻ കടകളിലേക്കുള്ള സാധനങ്ങൾ മീനങ്ങാടിയിലെ എഫ്സിഐ ഗോഡൗണിൽ ഇറക്കിയ ശേഷമാണ് താലൂക്ക് ആസ്ഥാനങ്ങളിലെ സപ്ലൈകോ എൻഎഫ്എസ്എ ഗോഡൗണുകളിൽ എത്തിക്കുന്നത്. ഇവിടങ്ങളിൽനിന്നാണ് സാധനങ്ങൾ വിതരണത്തിന് റേഷൻ കടകളിൽ ഇറക്കുന്നത്. സാധനങ്ങൾ യഥാസ്ഥാനങ്ങളിൽ എത്തിക്കുന്നതിൽ നിർണായക പങ്കുവഹിക്കുന്നത് തൊഴിലാളികളാണ്. ഇവരുടെ കൂലി കരാർ 2023ൽ അവസാനിച്ചിരുന്നു. കൂലി വർധിപ്പിക്കണമെന്ന് തൊഴിലാളി സംഘടനകൾ നിരന്തരം ആവശ്യപ്പെട്ടതിനെത്തുടർന്ന് ഭക്ഷ്യ-പൊതുവിതരണ-ഉപഭോക്തൃ മന്ത്രിയുടെ അധ്യക്ഷതയിൽ ചേർന്ന യോഗത്തിൽ 13 ശതമാനം വർധനവിൽ കൂലി എകീകരിക്കാൻ തീരുമാനമായി. തൊഴിലാളി സംഘടനാ പ്രതിനിധികളും കരാറുകാരും യോഗത്തിൽ പങ്കെടുത്തിരുന്നു. ഇതിനു പിന്നാലെ ഭക്ഷ്യ-പൊതുവിതരണ ജോയിന്‍റ് സെക്രട്ടറി ജൂണ്‍ 19ന് ഉത്തരവ് ഇറക്കിയെങ്കിലും കൂലി വർധന ഇതുവരെ നടപ്പായില്ല. കൽപ്പറ്റ, ബത്തേരി, മാനന്തവാടി എന്നിവിടങ്ങളിൽ നാഷണൽ ഫുഡ് സെക്യൂരിറ്റി ആക്ടിന് കീഴിൽ വരുന്ന പിഡിഎസ് ഗോഡൗണുകളിൽ 50 ഓളം തൊഴിലാളികളാണ് ജോലി ചെയ്യുന്നത്. നിലവിൽ റേഷൻ കടകളിൽ ഭക്ഷൃവസ്തുക്കൾ സ്റ്റോക്കുണ്ടെങ്കിലും സമരം തുടരുന്നത് ജില്ലയിലെ 314 റേഷൻ കടകളുടെ പ്രവർത്തനത്തെ ബാധിക്കുമെന്നു കരുതുന്നവർ നിരവധിയാണ്. മാനന്തവാടിയിൽ സലാം തൈക്കണ്ടി, ടി.കെ. രവീന്ദ്രൻ, സി. കുഞ്ഞബ്ദുള്ള എന്നിവരുടെ നേതൃത്വത്തിലാണ് സമരം.

മുത്തങ്ങയിൽ വിത്തൂട്ടും ശിൽപ്പശാലയും നടത്തി

സുൽത്താൻ ബത്തേരി: വനമഹോത്സവത്തിന്‍റെ ഭാഗമായി സാമൂഹിക വനവത്കരണ വിഭാഗം മീനങ്ങാടി ഗവ. ഹയർ സെക്കൻഡറി സ്കൂൾ സ്റ്റുഡന്‍റ് പോലീസ് കേഡറ്റ് യൂണിറ്റ്, ഒയിസ്ക കൽപ്പറ്റ ചാപ്റ്റർ, മേപ്പാടി ഡോ. മൂപ്പൻസ് നഴ്സിംഗ് കോളജ് എൻഎസ്എസ് യൂണിറ്റ് എന്നിവയുടെ സഹകരണത്തോടെ വന്യജീവി സങ്കേതത്തിൽ മുത്തങ്ങയിൽ വിത്തൂട്ടും സർപ്പ ബോധവത്കരണ ശിൽപ്പശാലയും നടത്തി. ഐ.സി. ബാലകൃഷ്ണൻ ഉദ്ഘാടനം ചെയ്തു.നൂൽപ്പുഴ പഞ്ചായത്ത് പ്രസിഡന്‍റ് ഷീജ സതീഷ് അധ്യക്ഷത വഹിച്ചു. വന്യജീവിശല്യം ലഘൂകരിക്കുന്നതിന് ആവിഷ്കരിച്ച പത്തിന പരിപാടികളുടെ ഭാഗമായ വിത്തൂട്ടിന്‍റെ ഉദ്ഘാടനം സോഷ്യൽ ഫോറസ്ട്രി നോർത്തേണ്‍ റീജിയൻ കണ്‍സർവേറ്റർ ആർ. കീർത്തി നിർവഹിച്ചു. അസി.ഫോറസ്റ്റ് കണ്‍സർവേറ്റർ എം.ടി. ഹരിലാൽ, ഒ. വിഷ്ണു, പി. സുനിൽ, എം.പി. സജീവ്, എം. ജോഷിൽ, റജീന ബക്കർ, ലൗലി എന്നിവർ പ്രസംഗിച്ചു.

എസ്പി കേഡറ്റുകൾക്ക് പരിശീലനം നൽകി

മീനങ്ങാടി: ഗവ.ഹയർ സെക്കൻഡറി സ്കൂളിലെ സ്റ്റുഡന്‍റ് പോലീസ് കേഡറ്റുകൾക്ക് ലഹരിവിരുദ്ധ പ്രവർത്തനങ്ങളിൽ പരിശീലനം നൽകി. പോലീസ് സ്റ്റേഷൻ ഹൗസ് ഓഫീസർ കെ. സന്തോഷ്കുമാർ ക്ലാസെടുത്തു. കമ്മ്യൂണിറ്റി പോലീസ് ഓഫീസർമാരായ റജീന ബക്കർ, അലി അക്ബർ, ഡ്രിൽ ഇൻസ്പെക്ടർ കെ. അഫ്സൽ, എം.കെ. അനുമോൾ എന്നിവർ നേതൃത്വം നൽകി.

റവന്യു പട്ടയ ഭൂമിയിലെ ഈട്ടി മുറി : വനം വകുപ്പിന്‍റെ വീഴ്ചയ്ക്കെതിരായ പ്രമേയത്തിന് സിപിഐ ജില്ലാ സമ്മേളനത്തിൽ അംഗീകാരം

കൽപ്പറ്റ: മുട്ടിൽ സൗത്ത് വില്ലേജിലെ റവന്യു പട്ടയഭൂമികളിൽനിന്നു അനധികൃതമായി മുറിച്ചതിനെത്തുടർന്നു പിടിച്ചെടുത്ത ഈട്ടിത്തടികളുടെ സംരക്ഷണത്തിൽ വനം വകുപ്പ് വരുത്തുന്ന വീഴ്ചയ്ക്കെതിരേ അവതരിപ്പിച്ച പ്രമേയത്തിന് സിപിഐ ജില്ലാ സമ്മേളനത്തിൽ അംഗീകാരം. കൽപ്പറ്റയിൽനിന്നുള്ള പ്രതിനിധികളിൽ ഒരാൾ അവതരിപ്പിച്ച പ്രമേയമാണ് ബത്തേരി ചീരാൽ നടന്ന സമ്മേളനം ചർച്ച ചെയ്ത് അംഗീകരിച്ചത്. റവന്യു വകുപ്പിന്‍റെ 2020 മാർച്ചിലെ പരിപത്രവും ഒക്ടോബറിലെ ഉത്തരവും മറയാക്കിയാണ് മുട്ടിൽ സൗത്ത് വില്ലേജിൽ ഈട്ടമുറി നടന്നത്. പരിപത്രവും ഉത്തരവും സർക്കാർ പിന്നീട് അസാധുവാക്കിയിരുന്നു.15 കോടി രൂപ വിലമതിക്കുന്ന ഈട്ടികളാണ് മുട്ടിൽ സൗത്ത് വില്ലേജിൽ മുറിച്ചത്. തൃക്കൈപ്പറ്റ വില്ലേജിലും അനധികൃത ഈട്ടിമുറി നടന്നു. തടികൾ 2021 ജൂണിലാണ് വനം വകുപ്പ് കസ്റ്റഡിയിലെടുത്ത് കുപ്പാടിയിലെ ഡിപ്പോയിലേക്ക് മാറ്റിയത്. അഞ്ച് മഴക്കാലം നേരിട്ട ഈട്ടിത്തടികൾ നിയമക്കുരുക്കുകളിൽപ്പെട്ട് അവിടെത്തന്നെ കിടന്നു നശിക്കുകയാണ്. വനം അധികാരികളുടെ അനാസ്ഥയാണ് പൊതുമുതൽ നശിക്കുന്നതിന് കാരണം. വനം വകുപ്പിന്‍റെ കസ്റ്റഡിയിലുള്ള തടികൾ വിട്ടുകിട്ടുന്നതിന് മരംമുറിക്കേസിലെ പ്രതികളിൽ ചിലർ കോടതിയെ സമീപിച്ചിട്ട് മൂന്നു വർഷം കഴിഞ്ഞു. ഹർജിയിൽ ഉടൻ തീരുമാനമെടുക്കാൻ കഴിയുന്നില്ലെങ്കിൽ തടികൾ നശിക്കാതെ സൂക്ഷിക്കുന്നതിന് ഡിവിഷണൽ ഫോറസ്റ്റ് ഓഫീസർക്ക് നിർദേശം നൽകണമെന്ന് പ്രതികൾ കോടതിയോട് അപേക്ഷിച്ചിരുന്നു. ഇതിന്‍റെ അടിസ്ഥാനത്തിൽ തടികൾക്ക് മതിയായ സംരക്ഷണം ഒരുക്കി വിവരം ഒരു മാസത്തിനകം അറിയിക്കണമെന്ന് 2023 ജനുവരി ആറിന് കോടതി ഉത്തരവായി. എന്നാൽ രണ്ടര വർഷം കഴിഞ്ഞിട്ടും വനം വകുപ്പ് കോടതി ഉത്തരവ് നടപ്പാക്കിയില്ല. ലേലം ചെയ്യുകയും തുക പൊതുഖജനാവിൽ സൂക്ഷിക്കുകയും ചെയ്താൽ തടികൾ നശിക്കുന്നതുമൂലം ഉണ്ടാകുന്ന നഷ്ടം കുറയ്ക്കാം. എന്നാൽ വനം വകുപ്പ് ഇക്കാര്യത്തിൽ ജാഗ്രത കാണിക്കുന്നില്ല. അനധികൃതമായി മുറിച്ച മുഴുവൻ ഈട്ടിയും കസ്റ്റഡിയിലെടുക്കാൻ വനം വകുപ്പിന് കഴിഞ്ഞിട്ടില്ല. ഇക്കാര്യങ്ങൾ വിശദീകരിച്ച് വനം ചീഫ് കണ്‍സർവേറ്റർക്ക് പരാതി അയച്ചെങ്കിലും നടപടി ഉണ്ടാകുന്നില്ലെന്നും ചൂണ്ടിക്കാട്ടുന്നതാണ് സമ്മേളനം അംഗീകരിച്ച പ്രമേയം.

മന്ത്രി മുഹമ്മദ് റിയാസ് ഇന്ന് ജില്ലയിൽ

കൽപ്പറ്റ: പൊതുമരാമത്ത് -ടൂറിസം മന്ത്രി പി.എ. മുഹമ്മദ് റിയാസ് ഇന്ന് ജില്ലയിൽ വിവിധ പരിപാടികളിൽ പങ്കെടുക്കും. രാവിലെ 10.30ന് ബത്തേരി സപ്ത റിസോട്ടിൽ വയനാട് മഴ മഹോത്സവത്തിന്‍റെ ഭാഗമായ ബിസിനസ് ടു ബിസിനസ് മീറ്റും 11ന് സപ്ത റിസോർട്ടിനു സമീപം വയലിൽ ഡിടിപിസി നടത്തുന്ന വയനാട് മഡ് ഫെസ്റ്റ് സീസണ്‍ മൂന്നും ഉച്ചയ്ക്ക് 12ന് കോട്ടത്തറ പഞ്ചായത്തിലെ കല്ലട്ടി പാലം പ്രവൃത്തിയും ഉദ്ഘാടനം ചെയ്യും. വൈകുന്നേരം 4.30ന് തിരുനെല്ലി പഞ്ചായത്തിലെ നെട്ടറ പാലം ഉദ്ഘാടനം, അഞ്ചിന് മാനന്തവാടി പഴശി പാർക്ക് നവീകരണം ഉദ്ഘാടനം എന്നിവ നിർവഹിക്കും.

ഇഞ്ചി കൃഷിയുടെ വ്യാപകനാശം: കൃഷിവകുപ്പ് അനാസ്ഥ വെടിയണമെന്ന്

പുൽപ്പള്ളി: കർണാടകയിലെ കുടകിൽ കഴിഞ്ഞവർഷം റിപ്പോർട്ട് ചെയ്ത ഇഞ്ചിയുടെ കേടു ബാധയായ ഫയ്റിക്കൂലാരിയാ ഫംഗസ് രോഗം മുള്ളൻകൊല്ലിയിലെ കൃഷിയിടങ്ങളിൽ പടർന്നു ഇഞ്ചി വ്യാപകമായി നശിക്കുന്പോഴും കൃഷി വകുപ്പ് അനാസ്ഥ തുടരുകയാണെന്ന് ബിജെപി മുള്ളൻകൊല്ലി പഞ്ചായത്ത് കമ്മിറ്റി കുറ്റപ്പെടുത്തി. രോഗം വന്ന് രണ്ട് ദിവസത്തിനുള്ളിൽ തന്നെ ഇഞ്ചി പഴുത്തു തണ്ട് അഴുകി വീണു അപ്പാടെ നശിക്കുകയാണ്. കൃഷിവകുപ്പ് നിസംഗത വെടിഞ്ഞ് കർഷകരെ സഹായിക്കാൻ അടിയന്തരമായി ഇടപെടണമെന്നും ബിജെപി ആവശ്യപ്പെട്ടു. രാജൻ പാറയ്ക്കൽ അധ്യക്ഷത വഹിച്ചു. ഐക്കരശ്ശേരി ഗോപാലകൃഷ്ണൻ നായർ, സദാശിവൻ കളത്തിൽ, കെ.എസ്. അനിൽ എന്നിവർ പ്രസംഗിച്ചു.

വയനാട് മഡ്ഫെസ്റ്റ് സീസണ്‍ മൂന്നിന് ഇന്ന് തുടക്കം

സുൽത്താൻ ബത്തേരി: മഴക്കാല വിനോദസഞ്ചാരം പ്രോത്സാഹിപ്പിക്കുന്നതിന്‍റെ ഭാഗമായി ജില്ലാ ടൂറിസം പ്രമോഷൻ കൗണ്‍സിലിന്‍റെ നേതൃത്വത്തിൽ സംഘടിപ്പിക്കുന്ന വയനാട് മഡ്ഫെസ്റ്റ് സീസണ്‍ മൂന്ന് ഇന്നു രാവിലെ 11ന് സപ്ത റിസോർട്ടിന് സമീപം വയലിൽ പൊതുമരാമത്ത്-ടൂറിസം മന്ത്രി പി.എ. മുഹമ്മദ് റിയാസ് ഉദ്ഘാടനം ചെയ്യും. ഐ.സി. ബാലകൃഷ്ണൻ എംഎൽഎ, ജില്ലാ കളക്ടർ ഡി.ആർ. മേഘശ്രീ, ജില്ലാ ടൂറിസം പ്രമോഷൻ കൗണ്‍സിൽ സെക്രട്ടറി ബിനോഷ് കുഞ്ഞപ്പൻ തുടങ്ങിയവർ പങ്കെടുക്കും. ടൂറിസം രംഗത്തെ സംഘടനകളുടെ സഹകരണത്തോടെയാണ് 17 വരെ നീളുന്ന മഡ്ഫെസ്റ്റ് സംഘടിപ്പിച്ചത്. മഡ് ഫുട്ബോൾ, മഡ് വടംവലി, മഡ് കബഡി, കയാക്കിംഗ് മത്സരങ്ങളും മണ്‍സൂണ്‍ ട്രക്കിംഗും പരിപാടിയുടെ ഭാഗമാണ്. ഇന്ന് നടത്തുന്ന മഡ് ഫുട്ബോൾ മത്സരത്തിൽ 16 ടീം പങ്കെടുക്കും. ആദ്യ നാല് സ്ഥാനങ്ങളിലെത്തുന്നവർക്ക് കാഷ് പ്രൈസ് നൽകും. നാളെ ടൂറിസം സംഘടനകൾ, മാധ്യമപ്രവർത്തകർ, ടൂർ ഓപ്പറേറ്റർമാർ, ട്രാവൽ ഏജന്‍റുമാർ എന്നിവർക്കായി മഡ് ഫുട്ബോൾ, മഡ് വടംവലി മത്സരം നടത്തും. 14ന് ഡബിൾ കാറ്റഗറി 100 മീറ്റർ വിഭാഗത്തിൽ കർലാട് തടകത്തിൽ കയാക്കിംഗ് മത്സരം ഉണ്ടാകും. 15ന് മാനന്തവാടി വള്ളിയൂർകാവിൽ മഡ് കബഡി മത്സരവും 17ന് ചീങ്ങേരിയിലേക്ക് മണ്‍സൂണ്‍ ട്രക്കിംഗും നടത്തും.

നുണ ആവർത്തിച്ച് ഫലിപ്പിക്കാനുള്ള സിപിഎം നീക്കം പരിഹാസ്യം: യുഡിഎഫ്

കൽപ്പറ്റ: വാഹനാപകടത്തിൽ പരിക്കേറ്റയാളുടെ കൈവശം മയക്കുമരുന്ന് കണ്ടെത്തിയ സംഭവത്തിൽ കേസ് ഒതുക്കാൻ ടി. സിദ്ദിഖ് എംഎൽഎയുടെ ഓഫീസ് ഇടപെട്ടുവെന്ന ദുരാരോപണം ആവർത്തിച്ച് ഫലിപ്പിക്കാനുള്ള സിപിഎം നീക്കത്തെ യുഡിഎഫ് നിയോജകമണ്ഡലം കമ്മിറ്റി അപലപിച്ചു. ഗീബൽസിയൻ തന്ത്രം ജനങ്ങൾക്കിടയിൽ വിലപ്പോകില്ലെന്ന് അഭിപ്രായപ്പെട്ടു. മയക്കുമരുന്ന് മാഫിയയ്ക്കെതിരേ നിയമസഭയിലും പുറത്തും നിലപാട് സ്വീകരിച്ച ടി. സിദ്ദിഖ് എംഎൽഎയെയും അദ്ദേഹത്തിന്‍റെ ഓഫീസിനെയുംകുറിച്ച് ജനങ്ങൾക്ക് വ്യക്തമായ ബോധ്യമുണ്ട്. സിപിഎം ജില്ലാഘടകത്തിൽ ആഭ്യന്തര കലഹം രൂക്ഷമാണ്. ഇതിൽനിന്നു ജനശ്രദ്ധ തിരിക്കുന്നതിനാണ് പാർട്ടി നേതൃത്വം നുണപ്രചാരണം നടത്തുന്നതെന്നു ആരോപിച്ചു. ചെയർമാൻ ടി. ഹംസ അധ്യക്ഷത വഹിച്ചു. കണ്‍വീനർ പി.പി. ആലി, ബി. സുരേഷ് ബാബു, സലിം മേമന, പോൾസണ്‍ കൂവയ്ക്കൽ എന്നിവർ പ്രസംഗിച്ചു.

വയനാട് മഴ മഹോത്സവം: തൃക്കൈപ്പറ്റ ബാംബു വില്ലേജ് സ്റ്റാൾ ഒരുക്കും

കൽപ്പറ്റ: വയനാട് ടൂറിസം ഓർഗനൈസേഷൻ ഇന്നും നാളെയും ബത്തേരി സപ്ത റിസോർട്ടിൽ നടത്തുന്ന 12-ാമത് മഴ മഹോത്സവത്തിൽ തൃക്കൈപ്പറ്റ ബാംബു വില്ലേജിന്‍റെ സ്റ്റാൾ പ്രവർത്തിക്കും. മേപ്പാടി പഞ്ചായത്തിലെ തൃക്കൈപ്പറ, ഏഴാംചിറ(ഒന്ന്, രണ്ട് വാർഡുകൾ)പ്രദേശങ്ങൾ ഉൾപ്പെടുന്ന ബാംബു വില്ലേജിൽ പ്രവർത്തിക്കുന്ന ഭവം, സുഷി ആർട് ആൻഡ് ക്രാഫ്റ്റ്, പച്ച ലൈഫ്, ഉറവ് ഇക്കോ ലിങ്ക്സ്, പ്രസീതം ആർട് ആൻഡ് ക്രാഫ്റ്റ്, പൈതൃകഗ്രാമം ഹാൻഡി ക്രാഫ്റ്റ്സ്, വയനാട് ആർട് ക്ലൗഡ്, വയനാട് ബീ കീപ്പേഴ്സ് തുടങ്ങി 20ൽ അധികം സ്വയം സഹായ സംഘങ്ങളുടെ ഉത്പന്നങ്ങൾ സ്റ്റാളിൽ ഉണ്ടാകും. രാജ്യത്തിന്‍റെ വിവിധ ഭാഗങ്ങളിൽനിന്നുള്ള 576 ബയേഴ്സ് പങ്കെടുക്കുന്നതാണ് മഴ മഹോത്സവത്തിന്‍റെ ഭാഗമായ ബിസിനസ് ടു ബിസിനസ് മീറ്റ്. ബയേഴ്സിന്‍റെ ശ്രദ്ധയിൽ കൊണ്ടുവരുന്നതിന് ബാംബു വില്ലേജിൽ തയാറാക്കിയ ഫർണിച്ചർ, പെയിന്‍റിംഗുകൾ, പേന, ലാംപ്ഷേഡ്, മ്യൂറൽ പെയിന്‍റിംഗുകൾ തുടങ്ങിയവ സ്റ്റാളിൽ പ്രദർശിപ്പിക്കും. തേനീച്ച വളർത്തൽ, ബാംബു ടൂറിസം എന്നിവയുമായി ബന്ധപ്പെട്ട പ്രദർശന വസ്തുക്കളും സ്റ്റാളിൽ ഉണ്ടാകുമെന്ന് ബാംബു വില്ലേജ് പ്രവർത്തകരായ ടി. ശിവരാജ്, എം. ബാബുരാജ്, കെ.പി. ദീപ, കെ. കോറിൻ എന്നിവർ വാർത്താസമ്മേളനത്തിൽ പറഞ്ഞു. ബാംബു വില്ലേജിലെ വിവിധ യൂണിറ്റുകളിൽ കരകൗശല വിദഗ്ധരടക്കം 200ൽപരം ആളുകളാണ് സുസ്ഥിര വികസനം മുൻനിർത്തി പ്രവർത്തിക്കുന്നത്. സുസ്ഥിര ടൂറിസം വികസനവും ബാംബു വില്ലേജിന്‍റെ കർമ പദ്ധതിയുടെ ഭാഗമാണ്. 14 വർഷമായി തൃക്കൈപ്പറ്റയിൽ കഴിയുന്ന സ്വിറ്റ്സർലൻഡിലിൽനിന്നുള്ള വനിത കെ. കോറിനാണ് സുസ്ഥിര ടൂറിസം വികസന പ്രവർത്തനങ്ങളുടെ ചുമതല. പ്രകൃതി സൗഹൃദ ടൂറിസം പരിപാടികളാണ് ബാംബു വില്ലേജിൽ നടപ്പാക്കുന്നത്. മുള അധിഷ്ഠിത ഉത്പന്ന നിർമാണത്തിൽ പ്രസിദ്ധമാണ് ബാംബു വില്ലേജിലെ ഉറവും ഉറവ് ഇക്കോ ലിങ്ക്സും. വില്ലേജിന്‍റെ ഭാഗമായ വേൾഡ് ഓഫ് ബാംബു 100ൽപരം ഇനം മുളകൾ പരിപാലിക്കുന്നുണ്ട്. 17 ഇനം മുളകളുടെ വ്യാവസായികാടിസ്ഥാനത്തിലുള്ള ഉത്പാദനവും വിവിധ പ്രദേശങ്ങളിൽ നടത്തുന്നുണ്ട്. 2024ലെ പുഞ്ചിരിമട്ടം ഉരുൾ ദുരന്ത ബാധിതരിൽ 250 ഓളം കുടുംബങ്ങൾക്ക് വിവിധ പ്രസ്ഥാനങ്ങളുടെ നേതൃത്വത്തിൽ തൃക്കൈപ്പറ്റയിലും സമീപങ്ങളിലും ഭവന നിർമാണം നടന്നുവരിയാണ്. ഉരുൾ ദുരന്തബാധിത പ്രദേശങ്ങളിൽനിന്നു പുതിയ പ്രതീക്ഷകളുമായി തൃക്കൈപ്പറ്റയിൽ എത്തുന്ന കുടുംബങ്ങൾക്ക് തൊഴിലും വരുമാനവും ലഭ്യമാക്കുന്നതിനുള്ള പരിപാടികൾ ബാംബു വില്ലേജിന് നേതൃത്വം നൽകുന്നവർ ആസൂത്രണം ചെയ്തു വരികയാണ്. തൃക്കൈപ്പറ്റയിലും പരിസരങ്ങളിലും പുനരധിവസിപ്പിക്കുന്നതിൽ താത്പര്യമുള്ള കുടുംബങ്ങളെ ബാംബു വില്ലേജിന്‍റെ ഭാഗമാക്കും.

വൃക്ഷത്തൈകൾ നട്ടുവളർത്താൻ ട്രീ ബാങ്കിംഗ് പദ്ധതി: കർഷകർക്ക് സാന്പത്തിക സഹായവുമായി വനം വകുപ്പ്

കൽപ്പറ്റ: പരന്പരാഗത വനമേഖലയ്ക്ക് പുറമേ വൃക്ഷവത്കരണ വ്യാപനത്തിന് വനം വകുപ്പ് ട്രീ ബാങ്കിംഗ് പദ്ധതി നടപ്പാക്കുന്നു. സ്വകാര്യ ഭൂമിയിലെ വൃക്ഷാവരണം വർധിപ്പിച്ച് വൃക്ഷത്തൈകൾ നട്ടുവളർത്തൽ പ്രോത്സാഹിപ്പിക്കാൻ കർഷകർക്ക് സാന്പത്തിക പ്രോത്സാഹനം, വാർഷിക ധനസഹായം, കാർബണ്‍ ക്രെഡിറ്റ് വരുമാനം തുടങ്ങിയ ആനുകൂല്യങ്ങൾ പദ്ധതിയിലൂടെ ഉറപ്പാക്കും. ആദ്യഘട്ടത്തിൽ ചന്ദന ത്തൈകൾ വച്ചു പിടിപ്പിക്കുന്നതിനാണ് പരിഗണന നൽകുക. സ്വന്തമായി ഭൂമിയുള്ളവർക്കും കുറഞ്ഞത് 15 വർഷത്തെ ലീസിന് ഭൂമി കൈവശമുള്ളവർക്കും പദ്ധതിയിൽ അംഗങ്ങളാവാം. തൈകൾ നട്ടു വളർത്തുന്നതതിനുള്ള പ്രോത്സാഹന ധനസഹായം മൂന്നാം വർഷം മുതലാണ് നൽകുക. സർക്കാർ നിശ്ചയിച്ചിട്ടുള്ള വൃക്ഷത്തൈകൾ നട്ടുവളർത്തി പരിപാലിക്കുന്നവർക്ക് 15 വർഷം വരെ ധനസഹായം ലഭിക്കും. 15 വർഷത്തിന് ശേഷം ഉടമകൾക്ക് സോഷ്യൽ ഫോറസ്ട്രി ഡിവിഷൻ ഓഫീസിന്‍റെ അനുമതിയോടെ മരങ്ങൾ സ്വന്തം ആവശ്യത്തിന് മുറിച്ച് ഉപയോഗിക്കുകയോ വിൽപന നടത്തുകയോ ചെയ്യാം. വനം വകുപ്പിന്‍റെ സോഷ്യൽ ഫോറസ്ട്രി വിഭാഗം മുഖേന നടപ്പാക്കുന്ന പദ്ധതിയിൽ തേക്ക്, റോസ് വുഡ്, ചന്ദനം, പ്ലാവ്, കാട്ടുപ്ലാവ്, തന്പകം, കരിമരുത്, കുന്പിൾ, വെന്തേക്ക്, മഹാഗണി, ആഞ്ഞിലി, തുടങ്ങിയ തദ്ദേശീയ ഇനങ്ങളാണ് തെരഞ്ഞെടുത്തിട്ടുള്ളത്. തൈകളുടെ വലിപ്പമനുസരിച്ച് 55 രൂപയും 23 രൂപയും വിലയുള്ള തൈകൾ വനം വകുപ്പ് സൗജന്യമായി നൽകും. നട്ടുപിടിപ്പിച്ച മരങ്ങളുടെ എണ്ണം കണക്കാക്കി ഓരോ വർഷവും ഒരു മരത്തിന് 10 രൂപ മുതൽ 30 രൂപ വരെ പ്രോത്സാഹനം ലഭിക്കുന്നതാണ് പദ്ധതിയുടെ നേട്ടം.

ലഹരിവിരുദ്ധ റീൽസ്, പോസ്റ്റർ മത്സരം: വിജയികൾക്ക് സമ്മാനം നൽകി

കൽപ്പറ്റ: ലഹരിവിരുദ്ധ ബോധവത്കരണത്തിന് ജില്ലാ പോലീസ് നടത്തിയ റീൽസ്, പോസ്റ്റർ മത്സരങ്ങളിലെ വിജയികൾക്ക് കാഷ് അവാർഡും സർട്ടിഫിക്കറ്റും സമ്മാനവും വിതരണം ചെയ്തു. ’ലഹരിയും സമൂഹവും’ എന്ന വിഷയത്തിൽ നടത്തിയ ഇൻസ്റ്റഗ്രാം റീൽസ് മത്സരത്തിൽ കുഞ്ഞോം ജിഎച്ച്എസ്എസിലെ ഷഹനാജിനും സംഘത്തിനുമാണ് ഒന്നാം സമ്മാനം. തൃശൂർ സെന്‍റ് തോമസ് കോളജിലെ അന്ന തോമസും സംഘവും രണ്ടാം സ്ഥാനം കരസ്ഥമാക്കി. വൈത്തിരിലെ ദേവതീർഥ ആർ. നായർ ആൻഡ് അച്യുത് ആർ. നായർ ടീമിനാണ് മൂന്നാം സ്ഥാനം. ടീം ബിഗിൻ വേഴ്സ് പുത്തുമല, ടീം പീകോക്ക് മീഡിയ കോഴിക്കോട് എന്നിവ പ്രോത്സാഹന സമ്മാനത്തിന് അർഹരായി. സ്റ്റുഡന്‍റ് പോലീസ് കേഡറ്റുകൾക്കു നടത്തിയ പോസ്റ്റർ രചനാമത്സരത്തിൽ എൻ.എ. പാർവണ (ജിഎച്ച്എസ്എസ്, തരിയോട്) ഒന്നാം സ്ഥാനം കരസ്ഥമാക്കി. തരിയോട് നിർമല എച്ച്എസിലെ ആയിഷ് മിസ്ന രണ്ടാം സ്ഥാനവും തിരുനെല്ലി ജിഎഎച്ച്എസിലെ എസ്. ധനുഷ് മൂന്നാം സ്ഥാനവും നേടി. ജില്ലാ പോലീസ് മേധാവി തപോഷ് ബസുമതാരി സമ്മാന വിതരണം നിർവഹിച്ചു. ജില്ലാ അഡീഷണൽ എസ്പി ഇൻ ചാർജ് കെ.ജെ. ജോണ്‍സണ്‍, ഡിവൈഎസ്പിമാരായ എം.എം. അബ്ദുൾകരീം, എം.കെ. ഭരതൻ, പി.എൽ. ഷൈജു, കെ.കെ. അബ്ദുൾ ഷെരീഫ്, വി.കെ. വിശ്വംഭരൻ തുടങ്ങിയവർ പങ്കെടുത്തു.

അതിഥി തൊഴിലാളികളിൽ 23 പേരിൽ മന്ത് കണ്ടെത്തി

കൽപ്പറ്റ: ജില്ലയിലെ ഇതര സംസ്ഥാന തൊഴിലാളികളിൽ 23 പേരിൽ മന്ത് കണ്ടെത്തി. 2024 ജനുവരി ഒന്നു മുതൽ 2025 ജൂലൈ 10 വരെ നടത്തിയ സ്ക്രീനിംഗിലാണ് ഇത്രയും പേരിൽ മന്ത് കണ്ടെത്തിയത്. മലേറിയ, മന്ത് എന്നിവ കണ്ടെത്തുന്നതിനാണ് ആരോഗ്യവകുപ്പിന്‍റെ നേതൃത്വത്തിൽ സ്ക്രീനിംഗ് ക്യാന്പുകൾ സംഘടിപ്പിച്ചത്. ക്യാന്പുകളിൽ മലേറിയ ബാധിതരെ കാണാനായില്ല. തൊഴിൽ വകുപ്പിന്‍റെ കണക്കനുസരിച്ച് ജില്ലയിൽ 3,557 അതിഥി തൊഴിലാളികളാണുള്ളത്. 2024ൽ 271 സ്ക്രീനിംഗ് ക്യാന്പുകളാണ് സംഘടിപ്പിച്ചത്. 6,236 പേരെ മന്ത്, മലേറിയ പരിശോധനയ്ക്ക് വിധേയമാക്കി. 22 പേരിൽ മന്ത് കണ്ടെത്തി. 2025 ജനുവരി ഒന്നു മുതൽ ജൂലൈ 10 വരെ 43 ക്യാന്പുകൾ നടത്തി. 1275 പേരെ മന്ത്, 889 പേരെ മലേറിയ പരിശോധനയ്ക്കു വിധേയമാക്കി. ഒരാളിൽ മന്ത് സ്ഥിരീകരിച്ചു. മലേറിയ, മന്ത് എന്നിവ കണ്ടുപിടിക്കാൻ ആരോഗ്യ വകുപ്പ് ’മിസ്റ്റ്’ എന്ന പേരിൽ രാത്രികാല ഫീൽഡ് പരിശോധന നടത്തിയിരുന്നു. ഡോക്ടറും രണ്ട് ജൂണിയർ ഹെൽത്ത് ഇൻസ്പെക്ടർമാരും അടങ്ങുന്നതായിരുന്നു പരിശോധനാസംഘം. അതത് പ്രദേശത്തെ മെഡിക്കൽ ഓഫീസർ, ഹെൽത്ത് ഇൻസ്പെക്ടർ, ജൂണിയർ ഹെൽത്ത് ഇൻസ്പെക്ടർ എന്നിവരാണ് സംഘത്തിനു സഹായം നൽകിയത്.

കാട്ടുകൊന്പനെ തുരത്താൻ രണ്ടാമത്തെ കുംകിയും എത്തി

സുൽത്താൻ ബത്തേരി: വാകേരി മൂടകൊല്ലി ജനവാസ മേഖലയിലിറങ്ങുന്ന കാട്ടുകൊന്പൻമാരെ തുരത്താൻ ഒരു കുംകിയാനയെ കൂടി സ്ഥലത്തെത്തിച്ച് ശ്രമങ്ങൾ ആരംഭിച്ചു. മുത്തങ്ങ ആനക്യാന്പിലെ ഭരത് എന്ന കുംകിയെയാണ് ഇന്നലെ സ്ഥലത്തെത്തിച്ചത്. ബുധനാഴ്ച പ്രമുഖയെന്ന കുംകിയാനയെ സ്ഥലത്തെത്തിച്ചിരുന്നു. ചൊവ്വാഴ്ച രാത്രി ജോലി കഴിഞ്ഞ് വീട്ടിലേയ്ക്ക് പോകുകയായിരുന്ന മൂടക്കൊല്ലി മുക്തിമല അഭിലാഷ് എന്ന യുവാവിനെ കാട്ടാന ആക്രമിച്ചു. തുടർന്നാണ് സ്ഥിരമായ ജനവാസ മേഖലയിൽ ഭീഷണി സൃഷ്ടിക്കുന്ന കാട്ടാനകളെ ഉൾവനത്തിലേയ്ക്ക് തുരത്തുന്നതിനായി കുംകിയാനകളുടെ സേവനം പ്രയോജനപ്പെടുത്താൻ തീരുമാനിച്ചത്. കൊന്പൻചേരി ഭാഗത്ത് ഇന്നലെ കാട്ടുകൊന്പനായി തെരച്ചിൽ നടത്തിയെങ്കിലും കണ്ടെത്തിയില്ല. ഇന്ന് വനം വകുപ്പ് പൂർണ രീതിയിൽ അതിർത്തി മേഖലകളിൽ കാട്ടാനയെ തുരത്താനുള്ള നടപടികൾ ശക്തമാക്കും. മൂടക്കൊല്ലി മുതൽ വാകേരി വരെയുള്ള 2.8 കിലോമീറ്റർ ദൈർഘ്യം വരുന്ന ഭാഗത്ത് രണ്ട് ഭാഗങ്ങളിലായി കുംകികൾ നിലയുറപ്പിക്കുകയും വനാതിർത്തി മേഖലകളിലൂടെ തെരച്ചിൽ നടത്തുകയും ചെയ്തു. ജനവാസ മേഖലയോട് ചേർന്ന വനാതിർത്തികളിൽ ആനയുടെ സാന്നിധ്യം കണ്ടാൽ ഉൾകാട്ടിലേയ്ക്ക് കയറ്റാനുള്ള സർവ്വസന്നാഹവുമായാണ് വനാതിർത്തികളിൽ ആർആർടി ഉൾപ്പെടെയുള്ള വനപാലക സേന നിലയുറപ്പിച്ചിരിക്കുന്നത്.

വനിതാ സൗഹൃദ വിശ്രമകേന്ദ്രം ഉദ്ഘാടനം ചെയ്തു

പുൽപ്പള്ളി: പനമരം ബ്ലോക്ക് പഞ്ചായത്ത് 2021-2022 വാർഷിക പദ്ധതിയിൽ ഉൾപ്പെടുത്തി നടപ്പാക്കിയ പെരിക്കല്ലൂർ ബസ് ഓപ്പറേറ്റിംഗ് സെന്‍റർ വനിതാ സൗഹൃദ വിശ്രമകേന്ദ്രത്തിന്േ‍റയും കുടിവെള്ള പദ്ധതിയുടേയും ഉദ്ഘാടനം ബ്ലോക്ക് പഞ്ചായത്ത് പ്രസിഡന്‍റ് ഗിരിജ കൃഷ്ണൻ നിർവഹിച്ചു. ബ്ലോക്ക് പഞ്ചായത്ത് വൈസ് പ്രസിഡന്‍റ് അബ്ദുൾ ഗഫൂർ കാട്ടി അധ്യക്ഷത വഹിച്ചു. ഗ്രാമപ്പഞ്ചായത്ത് പ്രസിഡന്‍റ് പി.കെ. വിജയൻ, ബ്ലോക്ക് പഞ്ചായത്ത് സ്ഥിരംസമിതി അധ്യക്ഷരായ മേഴ്സി ബെന്നി, പി.ഡി. സജി, ഗ്രാമപ്പഞ്ചായത്ത് സ്ഥിരംസമിതി അധ്യക്ഷരായ ഷിനു കച്ചിറയിൽ, ജിസ്റ മുനീർ, ഷൈജു പഞ്ഞിത്തോപ്പിൽ, ഗ്രാമപ്പഞ്ചായത്തംഗങ്ങളായ പി.എസ്. കലേഷ്, ജോസ് നെല്ലേടം, ഫാ. ജോർജ് കപ്പുകാലായിൽ, ബ്ലോക്ക് പഞ്ചായത്ത് സെക്രട്ടറി പി.പി. ഷിജി എന്നിവർ പ്രസംഗിച്ചു.

വന്യമൃഗ ആക്രമണം: ഇരുളം ഫോറസ്റ്റ് സ്റ്റേഷൻ ഉപരോധം 14ന്

വാകേരി: വാകേരി, മൂടക്കൊല്ലി, രണ്ടാം നന്പർ, ഗാന്ധിനഗർ പ്രദേശങ്ങളിൽ വർധിക്കുന്ന വന്യജീവി ആക്രമണങ്ങളിൽ പ്രതിഷേധിച്ച് 14ന് രാവിലെ 10ന് ഇരുളം ഫോറസ്റ്റ് സ്റ്റേഷൻ ഉപരോധിക്കാൻ മണ്ഡലം കോണ്‍ഗ്രസ് കമ്മിറ്റി സംഘടിപ്പിച്ച കർഷക കണ്‍വൻഷൻ തീരുമാനിച്ചു. വന്യജീവി പ്രതിരോധത്തിന് ശാസ്ത്രീയ പദ്ധതികൾ നടപ്പാക്കണമെന്ന് ആവശ്യപ്പെട്ടു. ഐ.സി. ബാലകൃഷ്ണൻ എംഎൽഎ ഉദ്ഘാടനം ചെയ്തു. മണ്ഡലം പ്രസിഡന്‍റ് സണ്ണി സെബാസ്റ്റ്യൻ അധ്യക്ഷത വഹിച്ചു. മീനങ്ങാടി ബ്ലോക്ക് കമ്മിറ്റി പ്രസിഡന്‍റ് വർഗീസ് മുരിയൻകാവിൽ, പൂതാടി പഞ്ചായത്ത് പ്രസിഡന്‍റ് മിനി പ്രകാശൻ, വൈസ് പ്രസിഡന്‍റ് എം.എസ്. പ്രഭാകരൻ, മേഴ്സി സാബു, കെ.ജെ. സണ്ണി, കെ.പി. മധു, പി.ജെ. സിജോ, കെ.എം. സിബി, സുരേഷ് ബാബു, കെ.എം. ജോസ്, സാബു നിറാക്കുളം, റസാഖ് കക്കടം, വിശ്വാമിത്രൻ എന്നിവർ പ്രസംഗിച്ചു.

കേന്ദ്ര, സംസ്ഥാന സർക്കാരുകളുടെ ജനവിരുദ്ധ നയങ്ങൾക്കെതിരെ കോണ്‍ഗ്രസ് സമരസംഗമം 15ന്

കൽപ്പറ്റ: കേന്ദ്ര, സംസ്ഥാന സർക്കാരുകളുടെ ജനവിരുദ്ധ നയങ്ങൾക്കെതിരെ ജില്ലാ കോണ്‍ഗ്രസ് കമ്മിറ്റിയുടെ നേതൃത്വത്തിൽ 15ന് രാവിലെ 10ന് കൽപ്പറ്റയിൽ സമരസംഗമം സംഘടിപ്പിക്കാൻ ജില്ലാ ജനറൽ ബോഡി യോഗത്തിൽ തീരുമാനിച്ചു. കൽപ്പറ്റ ചന്ദ്രഗിരി ഓഡിറ്റോറിയത്തിൽ നടക്കുന്ന പരിപാടിയിൽ കെപിസിസി പ്രസിഡന്‍റ് അഡ്വ. സണ്ണി ജോസഫ് എംഎൽഎ, എഐസിസി ജനറൽ സെക്രട്ടറി ദീപാ ദാസ് മുൻഷി, യുഡിഎഫ് കണ്‍വീനർ അടൂർ പ്രകാശ്, കെപിസിസി വർക്കിംഗ് പ്രസിഡന്‍റുമാരായ എ.പി. അനിൽകുമാർ എംഎൽഎ, ഷാഫി പറന്പിൽ എംപി, പി.സി. വിഷ്ണുനാഥ് എംഎൽഎ, എഐസിസി സെക്രട്ടറി മൻസൂർ അലി ഖാൻ തുടങ്ങിയവർ സംഗമത്തിൽ പങ്കെടുക്കും. രൂക്ഷമായ വിലക്കയറ്റം, തൊഴിലില്ലായ്മ പിൻവാതിൽ നിയമനം, കാർഷിക മേഖലയിലെ വിഷയങ്ങൾ, വന്യമൃഗശല്യം, പട്ടികജാതി പട്ടികവർഗ വിഭാഗങ്ങൾ നേരിടുന്ന വിഷയങ്ങൾ, ആശാവർക്കർമാരുടെ സമരം, ആരോഗ്യ മേഖലയിലെ പ്രതിസന്ധി, മയക്കുമരുന്ന് മാഫിയയുടെ വിളയാട്ടം, ക്രമസമാധാന തകർച്ച, അഴിമതി, ധൂർത്ത് തുടങ്ങിയ വിഷയങ്ങൾ സമരസംഗമത്തിൽ ചർച്ച ചെയ്യും. ജില്ലയിലെ വാർഡ് കോണ്‍ഗ്രസ് കമ്മിറ്റി പ്രസിഡന്‍റുമാർക്കുള്ള ഐഡന്‍റിറ്റി കാർഡിന്‍റെ വിതരണവും പരിപാടിയിൽ നടക്കും. യോഗത്തിൽ ഡിസിസി പ്രസിഡന്‍റ് എൻ.ഡി. അപ്പച്ചൻ അധ്യക്ഷത വഹിച്ചു. ഐ.സി. ബാലകൃഷ്ണൻ എംഎൽഎ, പി.കെ. ജയലക്ഷ്മി, കെ.എൽ. പൗലോസ്, പി.ടി. ഗോപാലക്കുറുപ്പ്, കെ.കെ. വിശ്വനാഥൻ, ടി.ജെ. ഐസക്, എൻ.കെ. വർഗീസ്, വി.എ. മജീദ്, കെ.വി. പോക്കർ ഹാജി, എ. പ്രഭാകരൻ, ഒ.വി. അപ്പച്ചൻ, എം.എ. ജോസഫ്, സംഷാദ് മരക്കാർ തുടങ്ങിയവർ പ്രസംഗിച്ചു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]