ഇ-സിം അവതരിപ്പിക്കാനൊരുങ്ങി ബിഎസ്എൻഎൽ : Deepika.com Business News |

Click here for detailed news of all items

ഇ-സിം അവതരിപ്പിക്കാനൊരുങ്ങി ബിഎസ്എൻഎൽ

Sunday, December 22, 2024 11:57 PM IST

ന്യൂഡൽഹി: രാജ്യത്തെ പൊതുമേഖല ടെലികോം കന്പനിയായ ബിഎസ്എൻഎൽ ഇ-സിം സൗകര്യം പുറത്തിറക്കാനൊരുങ്ങുന്നു. 2025 മാർച്ചിലാണ് ഇ-സിം സംവിധാനം ഒൗദ്യോഗികമായി ബിഎസ്എൻഎൽ ലോഞ്ച് ചെയ്യാൻ ആലോചിക്കുന്നത്. 2025 മാർച്ചിൽ ബിഎസ്എൻഎലിന്‍റെ ഇ-സിം സൗകര്യം രാജ്യത്ത് ലോഞ്ച് ചെയ്യുമെന്ന് ബിഎസ്എൻഎൽ കണ്‍സ്യൂമർ മൊബിലിറ്റി ഡയറക്‌ടർ സന്ദീപ് ഗോവിൽ അറിയിച്ചു.

നിലവിൽ സ്വകാര്യ ടെലികോം പ്രൊവൈഡർമാരായ റിലയൻസ് ജിയോ, ഭാരതി എയർടെൽ, വോഡഫോണ്‍ ഐഡിയ (വിഐ) എന്നിവർ ഇന്ത്യയിൽ ഇ-സിം സൗകര്യം ഉപഭോക്താക്കൾക്ക് നൽകുന്നുണ്ട്. ഇ-സിം സൗകര്യം പിന്തുണയ്ക്കുന്ന ഫോണുകൾ വളരെ കുറവായതിനാൽ ഇന്ത്യയിലെ ഇ-സിം ഉപഭോക്താക്കൾ പരിമിതമാണ്. ഫിസിക്കൽ കാർഡുകളെക്കാൾ ഇ-സിമ്മുകൾ ആണ് കൂടുതൽ സുരക്ഷിതം. അതിനാൽ ഇപ്പോൾ ആളുകൾ ഇ-സിം ഉപയോഗിക്കാൻ താത്പര്യം പ്രകടിപ്പിച്ചു തുടങ്ങിയിട്ടുണ്ട്. ഫോൺ മോഷ്ടിക്കപ്പെട്ടാലും സ്മാർട്ട്ഫോണിൽനിന്ന് ഇ-സിം കാർഡുകൾ നീക്കംചെയ്യാൻ ആർക്കും കഴിയില്ല എന്നതാണ് ഇ-സിമ്മിന്‍റെ പ്രത്യേകത. പ്രീമിയം ഫോണുകൾ പലതും ഇപ്പോൾ ഇ-സിം പിന്തുണയോടെ എത്തുന്നുണ്ട്. ഇത് വാങ്ങുന്നവർ തങ്ങളുടെ പ്രധാന സിം ഇ-സിം ആക്കാൻ ആഗ്രഹിക്കുന്നു. ഈ സാഹചര്യത്തിലാണ് ബിഎസ്എൻഎലും മാറ്റത്തിനു തയാറെടുക്കുന്നത്.

2025 ജൂണ്‍ മാസത്തോടെ 4ജി വിന്യാസം പൂർത്തീകരിക്കാനും ബിഎസ്എൻഎൽ ലക്ഷ്യമിടുന്നു. ഒരു ലക്ഷം 4ജി ടവറുകൾ എന്ന ലക്ഷ്യത്തിലേക്ക് ബിഎസ്എൻഎൽ അടുത്തുകൊണ്ടിരിക്കുകയാണ്. ഇതിനകം 60,000ത്തിലധികം 4ജി ടവറുകൾ ബിഎസ്എൻഎൽ പൂർത്തീകരിച്ചു.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.