മാനന്തവാടി: വയനാട് സോഷ്യൽ സർവീസ് സൊസൈറ്റി കാരിത്താസ് ഇന്ത്യയുടെ സാന്പത്തിക സഹായത്തോടെ നടപ്പിലാക്കിവരുന്ന സജീവം പദ്ധതിയുടെ ഭാഗമായി ആഗോള ലഹരി വിരുദ്ധ ദിനത്തോടനുബന്ധിച്ചു സെമിനാറുകൾ, തെരുവ് നാടകം, ലഹരി വിരുദ്ധ പ്രതിജ്ഞ, സന്നദ്ധ സേന രൂപീകരണം തുടങ്ങി വിവിധ പരിപാടികൾ സംഘടിപ്പിച്ചു.
തൃശിലേരി, പടമല, മംഗലശേരി, ഏലപ്പീടിക, പാടിച്ചിറ, മരകാവ്, ആടിക്കൊല്ലി, അമരക്കുനി, കാട്ടിമൂല, എടത്തന തറവാട്, പുതുശേരി, പുതുശേരിക്കടവ് തുടങ്ങിയ സ്ഥലങ്ങളിൽ ആണ് പരിപാടികൾ സംഘടിപ്പിച്ചത്.
ആധുനിക സമൂഹത്തെ കാർന്നു തിന്നുകൊണ്ടിരിക്കുന്ന ലഹരിയെന്ന വൻ വിപത്തിനെതിരെ ജനകീയ മുന്നേറ്റവും ബോധവത്കരണ പ്രവർത്തനങ്ങളും നടത്തുന്ന ഒരു പദ്ധതിയാണ് സജീവം. കേരളത്തിലെ എല്ലാ രൂപത സോഷ്യൽ സർവീസ് സൊസൈറ്റികളും ഈ പദ്ധിതി നടപ്പിലാക്കുന്നുണ്ട്.
കേരള സോഷ്യൽ സർവീസ് ഫോറം ആണ് സംസ്ഥാനത്ത് സജീവം പദ്ധതിക്ക് നേതൃത്വം നൽകുന്നത്. വയനാട് സോഷ്യൽ സർവീസ് സൊസൈറ്റി സ്കൂൾ, കോളജുകൾ, സോഷ്യൽ വെൽഫെയർ സൊസൈറ്റികൾ, സ്വാശ്രയ സംഘങ്ങൾ, ആദിവാസി കോളനികൾ എന്നിവ കേന്ദ്രീകരിച്ചാണ് സജീവം പദ്ധതി നടപ്പിലാക്കിവരുന്നത്.
ആഗോള ലഹരി വിരുദ്ധ ദിനാചരണതോടനുബന്ധിച്ച് നടത്തിയ പരിപാടികൾക്ക് വയനാട് സോഷ്യൽ സർവീസ് സൊസൈറ്റി എക്സിക്യൂട്ടീവ് ഡയറക്ടർ ഫാ. ജിനോജ് പാലത്തടത്തിൽ, പ്രോഗ്രാം ഓഫീസർ പി.എ. ജോസ്, പ്രോജക്റ്റ് കോ ഓർഡിനേറ്റർ ദീപു ജോസഫ്, റീജണൽ കോ ഓർഡിനേറ്റർമാരായ ബിൻസി വർഗീസ്, ആലിസ് സിസിൽ, ഷീന ആന്റണി, ഷില്ലി ജോസഫ്, ജിനി ഷിനു എന്നിവർ നേതൃത്വം നൽകി.