പത്തനംതിട്ട: കേരളത്തെ ജനപക്ഷ വൈജ്ഞാനിക സമൂഹമായി പരിവർത്തനാം ചെയ്യാനും അന്താരാഷ്ട്ര നിലവാരത്തിൽ ഉന്നത വിദ്യാഭ്യാസ മേഖലയെ മാറ്റുന്നതിനും വിഭാവനം ചെയ്തു നടപ്പിലാക്കുന്ന നാലു വർഷ ബിരുദ പാഠ്യ പദ്ധതിക്ക് ജില്ലയിലെ കലാലയങ്ങളിലും തുടക്കമായി. ആർട്സ് ആൻഡ് സയൻസ് കോളജുകളിൽ വിവിധ സാംസ്കാരിക പരിപാടികളും ബോധവത്കരണ ക്ലാസുകളും ആദ്യദിനത്തിൽ നടന്നു. തിരുവനന്തപുരം വിമൻസ് കോളജിൽ നടന്ന സംസ്ഥാനതല ഉദ്ഘാടന പരിപാടി സംപ്രേഷണം ചെയ്യുകയുമുണ്ടായി.
സ്കൂൾ അന്തരീക്ഷം വിട്ട് കോളജിലേക്ക് കാലുകുത്തിയവരെ സ്വീകരിക്കാൻ വിദ്യാർഥി സംഘടനകൾ മത്സരിക്കുന്നതിനിടെയാണ് ഇക്കുറി വിജ്ഞാനോത്സവം എന്ന പേരിൽ ബിരുദ വിദ്യാർഥികളെ സ്ഥാപനങ്ങളും സ്വാഗതം ചെയ്തത്.
സാംസ്കാരിക പരിപാടികൾക്കൊപ്പം പുതുതായി പ്രവേശനം നേടിയ ബിരുദ വിദ്യാർഥികൾക്കുള്ള മാർഗനിർദേശക പരിപാടിയോടെയാണ് പത്തനംതിട്ട കാതോലിക്കറ്റ് കോളജിൽ ഇന്നലെ ക്ലാസുകൾക്ക് തുടക്കമായത്.
കാതോലിക്കറ്റ് കോളജിലെ നാലുവർഷ ബിരുദ പ്രോഗ്രാമുകളുടെ ഉദ്ഘാടനം പത്തനംതിട്ട മുൻസിപ്പൽ ചെയര്മാന് ടി. സക്കീർ ഹുസൈൻ നിർവഹിച്ചു. കോളജ് പ്രിൻസിപ്പൽ ഡോ.സിന്ധു ജോൺസ് അധ്യക്ഷത വഹിച്ചു. നഗരസഭ വികസനകാര്യ സ്റ്റാൻഡിംഗ് കമ്മറ്റി ചെയർമാൻ കെ. ആർ. അജിത്കുമാർ, ഓർത്തഡോക്സ് സഭ തുമ്പമൺ ഭദ്രാസന സെക്രട്ടറി ഫാ.ജോൺസൺ കല്ലിട്ടതിൽ കോർ എപ്പിസ്കോപ്പ, കാതോലിക്കേറ്റ് സ്കൂൾ പ്രിൻസിപ്പൽ ജേക്കബ് ജോർജ് കുറ്റിയിൽ, ഗവേണിംഗ് ബോർഡ് അംഗങ്ങളായ ഡോ. ജോർജ് വർഗീസ് കൊപ്പാറ, പ്രഫ.ജി. ജോൺ , വൈസ് പ്രിൻസിപ്പൽ ഡോ. സ്മിത സാറ പടിയറ, വിവേക് ജേക്കബ് ഏബ്രഹാം , സൂസൻ ഏബ്രഹാം, ഡോ. ജോർജ് തോമസ്, ബിജി കുഞ്ചാക്കോ, ഡോ.ആർ. അൻസു എന്നിവർ പ്രസംഗിച്ചു. കോളേജ് വിദ്യാർഥികളുടെ കലാപരിപാടികളും ചടങ്ങിന്റെ ഭാഗമായി നടന്നു.
പരയ്ക്കത്താനം സെന്റ് തോമസ് കോളജിൽ
മല്ലപ്പള്ളി: പരയ്ക്കത്താനം സെന്റ് തോമസ് കോളജ് ഓഫ് അഡ്വാൻസ്ഡ് സ്റ്റഡീസിലെ ഈ വർഷത്തെ ഒന്നാംവർഷ ബിരുദ ഓണേഴ്സ് ക്ലാസുകളുടെ ഉദ്ഘാടനം മല്ലപ്പള്ളി ഗ്രാമപഞ്ചായത്ത് അംഗം ബിജു പുറത്തൂടൻ നിർവഹിച്ചു.
പ്രിൻസിപ്പൽ ഡോ. ബിജു ടി. ജോർജ് അധ്യക്ഷത വഹിച്ച യോഗത്തിൽ ജേക്കബ് കുരുവിള, ആൻസി ഏബ്രഹാം, ഷാലു വർഗീസ്, ഗ്ലാഡീസ് അനു ജേക്കബ്, ഫെബിൻ ജോൺ, സോജു കുര്യൻ സോമൻ എന്നിവർ പ്രസംഗിച്ചു. ഉദ്ഘാടനത്തോടനുബന്ധിച്ച് നാലുവർഷ ബിരുദ കോഴ്സുകളുടെ സംസ്ഥാനതല പരിപാടിയായ "വിജ്ഞാനോത്സവം" മുഖ്യമന്ത്രി പിണറായി വിജയൻ നിർവഹിക്കുന്ന ചടങ്ങ് തൽസമയമായി വിദ്യാർഥികളും രക്ഷാകർത്താക്കളും അടങ്ങുന്ന സദസിൽ സംപ്രേഷണം ചെയ്തു.