കടുത്തുരുത്തി: വൈക്കം റോഡ് (ആപ്പാഞ്ചിറ) റെയില്‍വേ സ്റ്റേഷനില്‍ റെയില്‍വേ പാസഞ്ചര്‍ അമിനിറ്റി കമ്മിറ്റി ചെയര്‍മാന്‍ പി.കെ. കൃഷ്ണദാസ് സന്ദര്‍ശനം നടത്തി. റെയില്‍വേ സ്റ്റേഷനിലെ അടച്ചിട്ടിരിക്കുന്ന വിശ്രമമുറിയും ശുചിമുറികളും മുഴുവന്‍ സമയവും യാത്രക്കാര്‍ക്കായി തുറന്നു നല്‍കാന്‍ പി.കെ. കൃഷ്ണദാസ് നിര്‍ദേശം നല്‍കി. കൂടുതല്‍ ഇരിപ്പിടങ്ങള്‍, ഫാന്‍ മുതലായ അടിസ്ഥാന സൗകര്യങ്ങള്‍, സ്റ്റേഷന്‍ നാമം ഉള്‍പ്പെടുത്തിയ സൂചനാ ബോര്‍ഡുകള്‍, വിശ്രമമുറിയുടെ നവീകരണം എന്നിവ എത്രയുംവേഗം നടപ്പാക്കണമെന്ന് അദേഹം ഉദ്യോഗസ്ഥര്ക്ക് നിര്‍ദേശം നല്‍കി.
വൈക്കം റോഡ് സ്റ്റേഷനില്‍ ഇന്നലെ വൈകുന്നേരമാണ് അദേഹം സന്ദര്‍ശനം നടത്തിയത്. സ്റ്റേഷനിലെ സൗകര്യങ്ങള്‍ വിലയിരുത്തിയ അദേഹം യാത്രക്കാര്‍, നാട്ടുകാര്‍, വൈക്കം റോഡ് യൂസേഴ്സ് ഫോറം ഭാരവാഹികള്‍, ആപ്പാഞ്ചിറ പൗരസമിതിയംഗങ്ങള്‍ എന്നിവരുമായി ചര്‍ച്ച നടത്തി.
ദേവാലയങ്ങളും ക്ഷേത്രങ്ങളും ഉള്‍പ്പെടെ സമീപത്തുള്ള നിരവധി തീര്‍ഥാടന കേന്ദ്രങ്ങളുടെയും ടൂറിസം സാധ്യതകളും ഗാന്ധിജി പങ്കെടുത്ത വൈക്കം സത്യഗ്രഹത്തിന്‍റെയും പ്രാധാന്യം കണക്കിലെടുത്ത് വൈക്കം റോഡ് റെയില്‍വേ സ്റ്റേഷന്‍ അമൃത് ഭാരത് സ്റ്റേഷനായി ഉയര്‍ത്തണമെന്നും വേണാട്, വഞ്ചിനാട്, പരശുറാം അടക്കം കൂടുതല്‍ എക്സ്പ്രസ് ട്രെയിനുകള്‍ക്ക് സ്റ്റോപ്പ് അനുവദിക്കണമെന്നും ആവശ്യപ്പെട്ടുള്ള നിവേദനം വൈക്കം റോഡ് യൂസേഴ്സ് ഫോറം പ്രസിഡന്‍റ് വൈക്കം വിനോദ് കുമാര്‍ പി.കെ. കൃഷ്ണദാസിന് നല്‍കി.
വൈക്കം സ്റ്റേഷനിലെത്തിയ പി.കെ. കൃഷ്ണദാസിനെ വൈക്കം റോഡ് യൂസേഴ്സ് ഫോറം പ്രസിഡന്‍റ് വൈക്കം വിനോദ് കുമാറിന്‍റെ നേതൃത്വത്തില്‍ പ്രവര്‍ത്തകര്‍ പൊന്നാടയണിയിച്ചു സ്വീകരിച്ചു.
ബിജെപി ജില്ലാ പ്രസിഡന്‍റ് ലിജിന്‍ ലാല്‍, ജില്ലാ ജനറല്‍ സെക്രട്ടറി ബിജുകുമാര്‍, യുവമോര്‍ച്ച ജില്ലാ പ്രസിഡന്‍റ് അശ്വന്ത് മാമലശേരില്‍, ബിജെപി കടുത്തുരുത്തി മണ്ഡലം പ്രസിഡന്‍റ് ഗിരീഷ് കുമാര്‍, ആപ്പാഞ്ചിറ പൗരസമിതി പ്രസിഡന്‍റ് ആപ്പാഞ്ചിറ പൊന്നപ്പന്‍, വൈക്കം റോഡ് യൂസേഴ്സ് ഫോറം ഭാരവാഹികളായ അനില്‍കുമാര്‍, അഭിരാജ് സോമന്‍ തുടങ്ങിയവര്‍ പങ്കെടുത്തു.