ADVERTISEMENT

ADVERTISEMENT

സംരംഭകത്വ പരിശീലന പരിപാടി

മാവേലിക്കര: തൃശൂര്‍ മൈക്രോ സ്മാള്‍ ആൻഡ് മീഡിയം എന്‍റര്‍പ്രൈസസ് ഡവലപ്‌മെന്‍റ് ആൻഡ് ഫെസിലിറ്റേഷന്‍ ഓഫീസിന്‍റെ ആഭിമുഖ്യത്തില്‍ മാവേലിക്കര ബ്ലോക്ക് പഞ്ചായത്തില്‍ ഓഫീസില്‍ സംരംഭകത്വ പരിശീലന പരിപാടി സംഘടിപ്പിച്ചു.

ബ്ലോക്ക് പഞ്ചായത്ത് പ്രസിഡന്‍റ് ഇന്ദിരാദാസ് ഉദ്ഘാടനം ചെയ്തു. ആതിര സാധു, കെ.എസ്.ശിവകുമാര്‍, കെ.ജെ.സെബാസ്റ്റ്യന്‍, ജോണ്‍ സാം തുടങ്ങിയവര്‍ പ്രസംഗിച്ചു. വിഷ്ണു നമ്പൂതിരി, എം.ഉണ്ണികൃഷ്ണന്‍, എ.പ്രമോദ്കുമാര്‍ എന്നിവര്‍ ക്ലാസുകള്‍ നയിച്ചു.

ADVERTISEMENT

നേഹയുടെ മരണം: അന്വേഷണം ശക്തമാക്കി

മാന്നാർ: ചെന്നിത്തല നവോദയ സ്കൂൾ പത്താം ക്ലാസ് വിദ്യാർഥിനി നേഹയുടെ മരണം സംബസിച്ച് പോലീസ് അന്വേഷണം ആരംഭിച്ചു. പോലീസിനു ലഭിച്ച പോസ്റ്റ്മോർട്ടം റിപ്പോർട്ടിലെ പ്രാഥമികവിവരങ്ങൾ പ്രകാരം ആത്മഹത്യയാണ്. എന്നാൽ, ഇതിന്‍റെ കാരണം എന്താണന്നതാണ് പോലീസിനെ കുഴക്കുന്നത്. നേഹയുടെ മുറിയിൽനിന്ന് ഒരു ഡയറി പോലീസിനു ലഭിച്ചിരുന്നു. അതിൽ ഒരു പേപ്പറിൽ പ്രത്യേകമായി ഒരു കുറിപ്പുമുണ്ടായിരുന്നു. അതിൽ തന്‍റെ സുഹൃത്തുക്കൾക്കുള്ള ഉപദേശങ്ങളാണ് ഉണ്ടായിരുന്നത്. എന്തെങ്കിലും പ്രശ്നങ്ങളുണ്ടെങ്കിൽ അത് പരിഹരിക്കപ്പെടുമെന്നും വിഷമിക്കരുതെന്നും ഡിപ്രഷനിലേക്കു പോകരുതെന്നും ഈ കുറിപ്പിൽ നേഹ സുഹൃത്തുക്കളോടു പറയുന്നുണ്ട്. എന്നാൽ,‌ അതിലേക്ക് നയിച്ച കാരണങ്ങളാണ് പോലീസ് ഇപ്പോൾ അന്വേഷിക്കുന്നത്. എല്ലാ കാര്യങ്ങളിലും സജീവ ഇടപെടൽ നടത്തിയിരുന്ന വിദ്യാർഥിനിയായിരുന്നുവെന്ന് അധ്യാപകർ പറയുന്നു. കഴിഞ്ഞദിവസം നടന്ന ബാസ്കറ്റ് ബോൾ സെലക്‌ഷൻ ക്യാന്പിലും നേഹ പങ്കെടുത്തിരുന്നു. അന്നത്തെ കലാപരിപാടികളിലും പങ്കെടുത്തു. പഠനത്തിൽ മിടുക്കിയായിരുന്നു. ഇതൊക്കെയായിട്ടും എന്താണ് സംഭവിച്ചതെന്ന കൂടുതൽ അന്വേഷണത്തിനുള്ള നീക്കത്തിലാണ് പോലീസ്. ആലപ്പുഴ ചെന്നിത്തല നവോദയ സ്കൂളിലെ പത്താം ക്ലാസ് വിദ്യാർഥിനി നേഹയെ കഴിഞ്ഞ ദിവസമാണ് സ്കൂൾ ഹോസ്റ്റലിൽ മരിച്ചനിലയിൽ കണ്ടെത്തിയത്. ആറാം ക്ലാസ് മുതൽ നേഹ നവോദയ വിദ്യാലയത്തിലാണ് പഠിക്കുന്നത്. ഇന്നലെ പുലർച്ചെ ഹോസ്റ്റലിന്‍റെ ശുചിമുറിയിലേക്കു പോകുന്ന ഇടനാഴിയിൽ നേഹയെ തൂങ്ങിമരിച്ച നിലയിൽ കണ്ടെത്തുകയായിരുന്നു.

നാരകത്തറ ജംഗ്ഷനിലെ അടിപ്പാത: റിപ്പോർട്ട് സമർപ്പിക്കാൻ ധാരണയായി

ഹരിപ്പാട്: നാഷണൽ ഹൈവേ നിർമാണവുമായി ബന്ധപ്പെട്ട് തിരുവനന്തപുരത്ത് എംഎൽഎ ക്വാർട്ടേഴ്സിൽ രമേശ് ചെന്നിത്തലയുടെ അധ്യക്ഷതയിൽ എൻഎച്ച് പ്രൊജക്ട് ഡയറക്ടർ, സമരസമിതി പ്രതിനിധികൾ, പഞ്ചായത്ത് പ്രതിനിധികൾ വ്യാപാരി വ്യവസായി പ്രതിനിധികൾ എന്നിവരുടെ യോഗം ചേർന്നു. കഴിഞ്ഞ ദിവസം രമേശ് ചെന്നിത്തല എംഎൽഎ കേന്ദ്രമന്ത്രി നിതിൻ ഗഡ്ഗരിയെ കണ്ടതിന്‍റെ അടിസ്ഥാനത്തിൽ കേന്ദ്ര ഉപരിതല മന്ത്രിയുടെ ഓഫീസിൽനിന്ന് ഇതു സംബന്ധിച്ച് അടിയന്തര റിപ്പോർട്ട് സമർപ്പിക്കാൻ നിർദേശം ലഭിച്ചതായി പ്രോജക്റ്റ് ഡയറക്ടർ യോഗത്തെ അറിയിച്ചു. തുടർന്ന് സമരസമിതി നേതാക്കൽ യോഗത്തിൽ ആവശ്യങ്ങൾ വിശദീകരിച്ചു.അടുത്ത മൂന്നാഴ്ചയ്ക്കുള്ളിൽ അടിപ്പാത എന്ന ആവശ്യം നടപ്പിലാക്കാനുള്ള നടപടികൾപൂർത്തിയാക്കാൻ കഴിയുമെന്ന് രമേശ് ചെന്നിത്തല പറഞ്ഞു. കരുവാറ്റ ഹൈസ്കൂൾ ജഗ്ഷനിൽ ഫൂട് ഓവർബ്രിഡ്ജ് വേണമെന്ന പൊതുജന ആവശ്യം യോഗത്തിൽ ചർച്ചയായി അതിനായി സ്ഥലപരിശോധന നടത്താൻ നിർദേശം നല്കി. രമേശ് ചെന്നിത്തല അധ്യക്ഷനായ യോഗത്തിൽ പ്രോജക്ട് ഡയറക്ടർ ബിബിൻ മധു, ജില്ലാ പഞ്ചായത്ത് മെമ്പർ ജോൺ തോമസ്, പഞ്ചായത്ത് പ്രസിഡന്‍റ് സൂസി, സമരസമിതി നേതാക്കളായ പ്രസാദ്, സുരേഷ് ഭവാനി, ദിലീപ് മൂലയിൽ, എം. നാസർ, റിയാസ് തയ്യിൽ, ഗോപിനാഥൻ, നിർവഹണ കമ്പനി പ്രതിനിധികളായി രാജലിംഗം, സുരേഷ്കുമാർ തുടങ്ങിയവർ യോഗത്തിൽ പ്രസംഗിച്ചു.

മാവേലിക്കര പൊതു ശ്മശാനം: കോറം ചെയര്‍മാന് കത്തു നല്‍കി

മാവേലിക്കര: മാവേലിക്കര നഗരസഭയുടെ കീഴിലുള്ള പൊതുശ്മശാനം അടിയന്തരമായി പ്രവര്‍ത്തിപ്പിക്കണമെന്നാവശ്യപ്പെട്ട് കോണ്‍ഫെഡറേഷന്‍ ഓഫ് റസിഡന്‍റ്സ് അസോസിയേഷന്‍ മാവേലിക്കരയുടെ നേതൃത്വത്തില്‍ മുന്‍സിപ്പല്‍ ചെയര്‍മാന്‍ നൈനാന്‍ സി. കുറ്റിശേരിലിന് കത്തു നല്‍കി. നിരവധി പ്രാവശ്യം കോറം പൊതുശ്മശാനം പ്രവര്‍ത്തിപ്പിക്കണമെന്ന ആവശ്യവുമായി മുന്‍സിപ്പാലിറ്റിയെ സമീപിച്ചെങ്കിലും നടപടി ഉണ്ടാകാത്തതിനെത്തുടര്‍ന്നാണ് സമരത്തിനു മുന്നോടിയായുള്ള കത്തെന്ന് കോറം പ്രസിഡന്‍റ് കെ.പി. വിദ്യാധരന്‍ ഉണ്ണിത്താന്‍ പറഞ്ഞു. നഗരത്തില്‍ രണ്ടും മൂന്നും സെന്‍റ് വസ്തുവുള്ളവരും സ്വന്തമായി സ്ഥലമില്ലാത്തവരും മരണപ്പെടുമ്പോള്‍ മൃതദേഹം മറവുചെയ്യാന്‍ കഴിയാതെ ബുദ്ധിമുട്ടുന്ന സാഹചര്യത്തെ കൗണ്‍സില്‍ ഗൗരവമായി കാണണമെന്നും അദ്ദേഹം ആവശ്യപ്പെട്ടു. സ്റ്റാന്‍ഡിംഗ് കമ്മിറ്റി ഈ വിഷയത്തില്‍ തീരുമാനം എടുത്തിട്ടുകൂടി അതു കൗണ്‍സിലില്‍വച്ച് വേണ്ട തീരുമാനം കൈക്കൊള്ളാതിരുന്നത് പ്രതിഷേധാര്‍ഹമാണ്. നഗരത്തിലെ സാധാരണക്കാരനുതകുന്ന പ്രസ്തുത വിഷയത്തെ മുന്‍ ചെയര്‍മാനും നിലവിലെ വൈസ് ചെയര്‍പേഴ്‌സണും ഫലത്തില്‍ എതിര്‍ക്കുന്ന നിലപാടാണ് ഉണ്ടായിട്ടുള്ളത്. വിഷയത്തില്‍ അടിയന്തര നടപടി ഉണ്ടാകണമെന്ന് കോറം ചെയര്‍മാന് നല്‍കിയ കത്തില്‍ ആവശ്യപ്പെടുന്നു. പ്രസിഡന്‍റ് കെ.പി. വിദ്യാധരന്‍ ഉണ്ണിത്താന്‍, സെക്രട്ടറി ശശികുമാര്‍ മാവേലിക്കര, ട്രഷറര്‍ വി. സുനില്‍കുമാര്‍ എന്നിവരുടെ നേതൃത്വത്തില്‍ കോറം പ്രവര്‍ത്തകര്‍ ചെയര്‍മാന്‍റെ ചേംബറില്‍ എത്തിയാണ് കത്തു കൈമാറിയത്. വിഷയം കൗണ്‍സിലില്‍ ചര്‍ച്ചചെയ്ത് ഉടന്‍ നടപടിക്കായി ശ്രമിക്കാമെന്ന് ചെയര്‍മാന്‍ പറഞ്ഞതായും കോറം ഭാരവാഹികള്‍ അറിയിച്ചു.

ഫാ. ജോര്‍ജ് വലിയവീട്ടില്‍ കാരുണ്യത്തിന്‍റെ മുഖം: ജോബ് മൈക്കിള്‍ എംഎൽഎ

ചങ്ങനാശേരി: പൗരോഹിത്യ ശുശ്രൂഷയില്‍ പൊതുസമൂഹത്തില്‍ നന്മകള്‍ വിതറിയ കാരുണ്യത്തിന്‍റെ മുഖമായിരുന്നു ഫാ. ജോര്‍ജ് വലിയവീട്ടിലെന്ന് അഡ്വ. ജോബ് മൈക്കിള്‍ എംഎല്‍എ. പാവപ്പെട്ടവരെയും രോഗികളെയും അഗതികളെയും ചേര്‍ത്തുപിടിച്ചുകൊണ്ട് സമൂഹത്തില്‍ പൗരോഹിത്യത്തിന്‍റെ മഹനീയ മാതൃക കാട്ടിയ ഫാ. ജോര്‍ജ് വലിയവീട്ടില്‍ എന്നും സ്മരിക്കപ്പെടുമെന്നും അദ്ദേഹം പറഞ്ഞു. ഫാ. ജോര്‍ജ് വലിയവീട്ടില്‍ സ്മരണാര്‍ഥം ഏര്‍പ്പെടുത്തിയ പ്രഥമ മനുഷ്യമിത്ര പുരസ്‌കാരം രണ്ടാം കായല്‍ രാജാവ് ജോസ് ജോണ്‍ വെങ്ങാന്തറയ്ക്ക് സമ്മാനിച്ചു പ്രസംഗിക്കുകയായിരുന്നു അദ്ദേഹം. ചങ്ങനാശേരി സെന്‍റ് വിന്‍സന്‍റ് പുവര്‍ ഹോമില്‍ നടത്തിയ ചടങ്ങില്‍ അനുസ്മരണ സമിതി പ്രസിഡന്‍റ് അലക്‌സ് മാത്യൂ അധ്യക്ഷത വഹിച്ചു. വി.ജെ. ലാലി, കുട്ടനാട് എസ്എന്‍ഡിപി യൂണിയന്‍ കണ്‍വീനര്‍ സന്തോഷ് ശാന്തികള്‍, കത്തോലിക്ക കോണ്‍ഗ്രസ് ഗ്ലോബല്‍ വൈസ് പ്രസിഡന്‍റ് രാജേഷ് ജോണ്‍, സെക്രട്ടറി ടോമിച്ചന്‍ അയ്യരുകുളങ്ങര, അതിരൂപത ജനറല്‍ സെക്രട്ടറി ബിനു ഡൊമനിക് നടുവിലേഴം, സെക്രട്ടറിമാരായ സൈബി അക്കര, കെ.എസ്. ആന്‍റണി കരിമറ്റം, അനില്‍ തൈവീടന്‍, ചങ്ങനാശേരി എക്യൂമെനിക്കല്‍ മുവ്‌മെന്‍റ് പ്രസിഡന്‍റ് ജെസ്റ്റിന്‍ ബ്രൂസ്, വര്‍ഗീസ് ആന്‍റണി, ഔസേപ്പച്ചന്‍ ചെറുകാട്, ബിജു വലിയവീടന്‍, അമ്പിളി ജോസ്, സാബു കോയിപ്പള്ളി, ലിസി ജോസ് പൗവ്വക്കര,റോസിലിന്‍ കുരുവിള, സിസി അമ്പാട്ട്, കെ.ജെ. ജയിംസ് കൊച്ചുകുന്നേല്‍, മത്തായിച്ചന്‍ കാഞ്ഞിക്കല്‍, ജോഷി കൊല്ലാപുരം, ബിജു പാണ്ടിശേരി, സിസ്റ്റര്‍ ആന്‍സ് തോമസ് എഫ്സിസി എന്നിവര്‍ പ്രസംഗിച്ചു.

ലോറിയിൽ സൂക്ഷിച്ച സിമന്‍റ് സാമൂഹ്യവിരുദ്ധർ നശിപ്പിച്ചു

പൂച്ചാക്കൽ: ലോറിയിൽ സൂക്ഷിച്ചിരുന്ന സിമന്‍റ് സാമൂഹ്യവിരുദ്ധർ ഉപയോഗശൂന്യമാക്കി. കഴിഞ്ഞ ദിവസം രാത്രിയിലായിരുന്നു സംഭവം. പള്ളിപ്പുറം ചിറ്റേഴത്ത് ട്രഡേഴ്സ് ഉടമ ഒ.സി. വക്കച്ചന്‍റെ ഉടമസ്ഥതയിലുള്ള ലോറിയിൽ കയറ്റിയിരുന്ന ഒരു ലോഡ് സിമന്‍റാണ് സാമൂഹ്യവിരുദ്ധർ നശിപ്പിച്ചതെന്നാരോപിച്ച് പോലീസിൽ പരാതി നൽകിയത്. പള്ളിപ്പുറം പഞ്ചായത്തിലെ വിവിധ പ്രദേശങ്ങളിൽ അനധികൃതമായി സിലിക്ക മണൽ കടത്തുന്നതുമായി ബന്ധപ്പെട്ട് നിരവധി പ്രക്ഷോഭങ്ങൾ ഒ.സി. വക്കച്ചന്‍റെ നേതൃത്വത്തിൽ നടത്തിയിരുന്നു. ഇതിന്‍റെ അടിസ്ഥാനത്തിൽ ഖനനം നിർത്തിവയ്പ്പിക്കാനുള്ള നടപടികൾ അധികാരികൾ ആരംഭിച്ചിരുന്നു. അതിന്‍റെ വൈരാഗ്യത്തിനായിരിക്കാം അക്രമം നടത്തിയതെന്ന് പരാതിയിൽ പറയുന്നു. ഒറ്റപ്പുന്നയിലെ ചിറ്റേഴത്തിന്‍റെ വണ്ടി പാർക്ക് ചെയ്യുന്ന പുരയിടത്തിൽ ടാർപ്പായകൊണ്ടു മറച്ചുകെട്ടി സൂക്ഷിച്ചിരുന്ന സിമിന്‍റാണ് അക്രമികൾ രാത്രി പുരയിടത്തിൽ അതിക്രമിച്ചു കയറി നശിപ്പിച്ചത്. സിമന്‍റ് പൊതിഞ്ഞുകെട്ടിയ ടാർപ്പായ കുത്തിക്കീറി നശിപ്പിച്ചുകളഞ്ഞു. രാത്രിയിൽ പെയ്ത ശക്തമായ മഴയിൽ സൂക്ഷിച്ചിരുന്ന 200 പാക്കറ്റ് സിമന്‍റിൽ 155 എണ്ണവും ഉപയോഗിക്കാൻ പറ്റാത്തവിധം വെള്ളം കയറി കട്ടയായി. രാവിലെ എത്തിയ ജീവനക്കാരാണ് ടാർപ്പായ കീറി നശിപ്പിച്ച നിലയിൽ കണ്ടത്. ഏകദേശം ഒരു ലക്ഷം രൂപയുടെ നഷ്ടം കണക്കാക്കുന്നു.

മനോനില തെറ്റി അലഞ്ഞുനടന്നയാളെ പോലീസ് ശാന്തിഭവനിൽ എത്തിച്ചു

അമ്പലപ്പുഴ: മനോനില തെറ്റി അലഞ്ഞുനടന്നയാളെ പോലീസ് ശാന്തി ഭവനിൽ എത്തിച്ചു.പുന്നപ്ര പടിഞ്ഞാറ് പനച്ചുവട് ഭാഗത്ത് മനോനില തെറ്റി നാട്ടുകാർക്ക് ശല്യമായി കണ്ട 30 വയസു തോന്നിക്കുന്ന പുരുഷനെയാണ് നാട്ടുകാർ അറിയിച്ചതിനെത്തുടർന്ന് പുന്നപ്ര പോലീസ് പുന്നപ്ര ശാന്തിഭവനിൽ എത്തിച്ചത്. പുതിയ അതിഥിയെ ശാന്തിഭവൻ മാനേജിംഗ് ട്രസ്റ്റി ബ്രദർ മാത്യു ആൽബിൻ സ്വീകരിച്ചു. ഇയാളെക്കുറിച്ച് എന്തെങ്കിലും വിവരം ലഭിക്കുന്നവർ ശാന്തിഭവനുമായി ബന്ധപ്പെടണമെന്ന് മാത്യു ആൽബിൻ അറിയിച്ചു. ഫോൺ: 9447403035, 0477 2287322.

പാഴ്‌സൽ വാനിൽനിന്നു ‌കോടികളുടെ കവർച്ച: രണ്ടുപേർ കൂടി പിടിയിൽ

കായംകുളം: ദേശീയപാതയിൽ രാമപുരത്ത് സിനിമാ സ്റ്റൈലിൽ പാഴ്‌സൽ കമ്പനിയുടെ വാഹനം തടഞ്ഞു നിർത്തി മൂന്നു കോടി 24 ലക്ഷം രൂപ കവർന്ന കേസിൽ രണ്ടു പേർ കൂടി പിടിയിലായി .തമിഴ്‌നാട് തിരുനല്ലൂർ മാരിയംനഗർ ഹരികൃഷ്ണൻ (26), തിരുനല്ലൂർ, മടപ്പുറം കീരളത്തൂർ മാരിയപ്പൻ (47) എന്നിവരാണ് പിടിയിലായത്. കേസിൽ ഇതോടെ അറസ്റ്റിലായവരുടെ എണ്ണം നാലായി. കേസിൽ നാലുപേർ കൂടി പിടിയിലാകാനുണ്ട്. തമിഴ്നാട് തിരുപ്പൂർ സ്വദേശികളായ തിരുകുമാർ (37), ചന്ദ്രബോസ് (32) എന്നിവരെ ആദ്യം പോലീസ് അറസ്റ്റ് ചെയ്തിരുന്നു. കേസിൽ ബാക്കിയുള്ളവരെക്കൂടി അറസ്റ്റ് ചെയ്ത് ചോദ്യം ചെയ്താൽ മാത്രമേ കേസിൽ കൂടുതൽ പേർ ഉൾപ്പെട്ടുട്ടുണ്ടോ എന്ന് അറിയാൻ കഴിയുകയുള്ളൂ എന്ന് പോലീസ് വ്യക്തമാക്കി. സതീഷ്, ദുരൈ അരസ് എന്നിവരാണ് പണം കവർച്ച ആസൂത്രണം ചെയ്തത്. ഇവരെ പിടികൂടാൻ പോലീസ് ശ്രമം തുടങ്ങിയിട്ടുണ്ട്. കൊല്ലത്ത് താമസിക്കുന്ന അപ്പാസ് പാട്ടീൽ എന്നയാൾക്ക് കോയമ്പത്തൂരിലുള്ള ബന്ധു നമ്പർവൺ പാഴ്‌സൽ സർവീസിന്‍റെ ലോറിയിൽ കൊടുത്തവിട്ട പണമാണ് കഴിഞ്ഞ മാസം 13ന് പുലർച്ചെ നാലരയ്ക്ക് കവർന്നത്. ഒരു സ്‌കോർപ്പിയോയിലും ഇന്നോവയിലുമായി എത്തിയ എട്ടംഗസംഘം സിനിമാ സ്റ്റൈലിൽ പാഴ്‌സൽ വാൻ തടഞ്ഞ് പണം തട്ടിയെടുക്കുകയായിരുന്നു. അതിനുശേഷം ഇവർ തിരുപ്പൂരിലേക്കു കടന്നു. സിസി ടിവി ദ്യശ്യങ്ങൾ കേന്ദ്രീകരിച്ച് നടത്തിയ അന്വേഷണത്തിലാണ് മോഷ്ടാക്കൾ വന്ന വാഹനത്തിന്‍റെ നമ്പർ കിട്ടിയത്. ഇവർ തമിഴ്‌നാട്ടിലേക്കു കടന്നയുടൻ വാഹനത്തിന്‍റെ നമ്പർ മാറ്റി. മോഷ്ടാക്കളെല്ലാം തിരുപ്പൂർ, കുംഭകോണം, തിരുവള്ളുർ പ്രദേശങ്ങളിലുള്ളവരാണ്. ഇവർ കോയമ്പത്തൂരിൽ എത്തിയാണ് മോഷണം ആസൂത്രണം ചെയ്തത്. കരീലക്കുളങ്ങര പോലീസാണ് കേസ് അന്വേഷിക്കുന്നത്

‘പൊൻതിളക്കം’ എംഎൽഎ മെറിറ്റ് അവാർഡ് വിതരണം നാളെ

അമ്പലപ്പുഴ: എച്ച്. സലാം എംഎൽഎയുടെ മണ്ഡലത്തിലെ സമഗ്ര വിദ്യാഭ്യാസ പദ്ധതിയായ പൊൻതിളക്കം എംഎൽഎ മെറിറ്റ് അവാർഡ് വിതരണം നാളെ നടക്കും. വണ്ടാനം ഗവ. ടിഡി മെഡിക്കൽ കോളജ് ഓഡിറ്റോറിയത്തിൽ പകൽ രണ്ടിന് നടക്കുന്ന അവാർഡ് വിതരണം ധനകാര്യ മന്ത്രി കെ.എൻ. ബാലഗോപാൽ ഉദ്ഘാടനം ചെയ്യും. എച്ച്. സലാം എംഎൽഎ അധ്യക്ഷനാകുന്ന പരിപാടിയിൽ എസ്എസ്എൽസി, പ്ലസ് ടു ഉന്നത വിജയികളെയും സർകലാശാല റാങ്ക് ജേതാക്കളെയും വിവിധ മേഖലകളിൽ വ്യക്തിമുദ്ര പതിപ്പിച്ചവരെയും അനുമോദിക്കും. കളക്ടർ അലക്സ് വർഗീസ്, ചലച്ചിത്രതാരങ്ങളായ നിഖില വിമൽ, പ്രമോദ് വെളിയനാട്, യുവസാഹിത്യകാരൻ അഖിൽ പി. ധർമജൻ, എറണാകുളം അസിസ്റ്റന്‍റ് കളക്ടർ പാർവതി ഗോപകുമാർ എന്നിവർ മുഖ്യാതിഥികളാകും. മെഡിക്കൽ കോളജ് പ്രിൻസിപ്പൽ ഡോ.ബി. പത്മകുമാർ, ത്രിതല പഞ്ചായത്ത്, നഗരസഭാ ഭാരവാഹികൾ, മറ്റു ജനപ്രതിനിധികൾ, ആശുപത്രി സൂപ്രണ്ട് ഡോ.എ. ഹരികുമാർ എന്നിവർ പങ്കെടുക്കും. ഗവ. മുഹമ്മദൻസ് ബോയ്സ് ഹയർ സെക്കൻഡറി സ്കൂൾ എൻഎസ്എസ് യൂണിറ്റിന്‍റെ ലഹരിവിരുദ്ധ സംഗീതശില്പം, ഡി. അജിത്ത് നയിക്കുന്ന ആർട്ടിഫിഷൽ ഇന്‍റലിജൻസ് ക്ലാസ് എന്നിവയും പരിപാടിയുടെ ഭാഗമായി നടത്തും.

പോലീസ് ജീപ്പിൽ ഇടിച്ച ഇന്നോവ കാറിൽ സഞ്ചരിച്ച യുവാക്കൾ മദ്യപിച്ചിരുന്നതായി അന്പലപ്പുഴ സിഐ

അമ്പലപ്പുഴ: പോലീസ് ജീപ്പ് ഉള്‍പ്പെടെ നിരവധി വാഹനങ്ങളില്‍ ഇടിച്ചശേഷം അമിതവേഗത്തിൽ പോയ ഇന്നോവ കാറിൽ സഞ്ചരിച്ചിരുന്ന യുവാക്കൾ മദ്യപിച്ചിരുന്നതായി അമ്പലപ്പുഴ സിഐ എം. പ്രതീഷ് കുമാർ. സംഭവത്തത്തെത്തുർന്ന് റിമാൻഡിലായ യുവാക്കളെ കസ്റ്റഡിയിൽ വാങ്ങി കൂടുതൽ അന്വഷണം നടത്തുമെന്നും സിഐ പറഞ്ഞു. സിഎച്ച് 01 എബി -7629 എന്ന രജിസ്റ്റർ നമ്പരിലുള്ള ഇന്നോവ കാറിൽ സഞ്ചരിച്ചെത്തിയ കൊല്ലം കരുനാഗപ്പള്ളി സ്വദേശികളായ ആലിൻകടവ് പുന്നമൂട്ടിൽ അഖിൽ (26), ദിലീപ് ഭവനത്തിൽ സഞ്ജയ് (25), പ്രവീൺ നിവാസിൽ പ്രവീൺ (25), ഓച്ചിറ ചങ്ങംകുളങ്ങര ഗൗരി ഭവനിൽ ആദർശ് (23), ഷിയാസ് മൻസിലിൽ നിയാസ് (22), കാട്ടിൽ കടവ് തറയിൽ വീട്ടിൽ സൂരജ് (21) എന്നിവരെയാണ് പോലീസ് കസ്റ്റഡിയിൽ വാങ്ങുക. ഇതിനായി അമ്പലപ്പുഴ കോടതിയിൽ കസ്റ്റഡി അപേക്ഷ അടുത്തദിവസം സമർപ്പിക്കും. രണ്ടു ദിവസം മുമ്പ് രാത്രി 12നാണ് ജോലിക്കു വിദേശത്തേക്കു പോകാൻ സഞ്ജയ് എന്ന സുഹൃത്തിനെ യാത്രയാക്കാൻ, നെടുമ്പാശേരിയിലേക്കു പുറപ്പെട്ട ഇവർ സഞ്ചരിച്ച കാർ വിവിധ വാഹനങ്ങളിലും പിന്നീട് അമ്പലപ്പുഴ പോലീസിന്‍റെ ജീപ്പിലും ഇടിച്ചത്. ചോദ്യം ചെയ്ത നാട്ടുകാരെ സംഘം അസഭ്യം പറയുകയും ഭീഷണിപ്പെടുത്തുകയും ചെയ്തു. കാക്കാഴം റയിൽവേ മേൽപ്പാലത്തിന്‍റെ ഫുട്പാത്തിലിടിച്ച് വലതുവശം പിൻഭാഗത്തെ ടയർ ഊരിത്തെറിച്ച കാറുമായി സംഘം പിന്നീട് ആറു കിലോമീറ്ററിലധികം സഞ്ചരിച്ചു. പുന്നപ്രയിൽ ദേശീയ പാതയ്ക്കു കിഴക്ക് ആളൊഴിഞ്ഞ പറമ്പിലെത്തിയ ആറംഗ സംഘത്തെ നാട്ടുകാരുടെ സഹായത്തോടെ പോലീസ് പിടികൂടുകയായിരുന്നു. പുന്നപ്ര പോലീസ് കസ്റ്റഡിയിലെടുത്ത കാർ പിന്നീട് അമ്പലപ്പുഴ സ്റ്റേഷനിലേക്കു മാറ്റിയിരുന്നു. യുവാക്കൾ മറ്റേതെങ്കിലും കേസിൽ ഉൾപ്പെട്ടവരാണോ എന്നതുൾപ്പടെയുള്ള കാര്യങ്ങൾ അന്വേഷിക്കുമെന്നും പോലീസ് പറഞ്ഞു.

പ്രവര്‍ത്തനസജ്ജമാകാതെ മാവേലിക്കര പൊതുശ്മശാനം

മാവേലിക്കര: ഭൂരഹിതരുടെയും പരിമിത ഭൂമിയുള്ളവരുടെയും പൊതുശ്മശാനം വേണമെന്ന പതിറ്റാണ്ടുകളുടെ ആവശ്യത്തെത്തുടര്‍ന്നാണ് രണ്ടു പതിറ്റാണ്ട് മുന്‍പ് മാവേലിക്കരയില്‍ വാതകശ്മശാനം സ്ഥാപിക്കുന്നത്. എന്നാല്‍, തുടക്കത്തില്‍ വിരലിലെണ്ണാവുന്ന മൃതദേഹങ്ങൾ സംസ്‌കരിച്ച ശേഷം പിന്നീട് അതിന്‍റെ സുഗമമായ പ്രവര്‍ത്തനം ഉണ്ടായിട്ടേയില്ല. ബജറ്റ് പുസ്തകത്തിലെ പാലിക്കാന്‍ സാധിക്കാത്ത ഒരു വാഗ്ദാനമായി അത് ഇന്നും തുടരുന്നു. 2005ല്‍ എംഎല്‍എയായിരുന്ന എം. മുരളിയുടെ പ്രദേശിക വികസനഫണ്ടും നഗരസഭയുടെ പദ്ധതി വിഹിതവും ചേര്‍ത്താണ് 14 ലക്ഷം രൂപ മുടക്കി കണ്ടിയൂര്‍ കാളച്ചന്തയില്‍ വാതകശ്മശാനം നിര്‍മിക്കാന്‍ ആരംഭിച്ചു. 2008ല്‍ ശ്മശാനം പൊതുജനങ്ങള്‍ക്കായി തുറന്നുകൊടുത്തു. എന്നാല്‍, എട്ടു മൃതദേഹങ്ങള്‍ മാത്രമാണ് ഇവിടെ സംസ്‌കരിക്കാനായത്. വൈദ്യുതിബന്ധം ഇടയ്ക്ക് മുടങ്ങുന്നതായിരുന്നു ശ്മശാനത്തിന്‍റെ പ്രവര്‍ത്തനത്തെ ബാധിച്ചത്. പ്രശ്‌നപരിഹാരം മൃതദേഹങ്ങള്‍ സംസ്‌കരിക്കുമ്പോള്‍ വൈദ്യുതി ലഭിക്കാതെയാകുകയും പകുതി കരിഞ്ഞവ പുറത്തേക്കെടുത്ത് കത്തിക്കേണ്ട അവസ്ഥവരെ ഉണ്ടായി. ഇങ്ങനെ പ്രവര്‍ത്തനം നിലച്ച ശ്മശാനം പിന്നീട് നഗരസഭ ജനറേറ്റര്‍ സ്ഥാപിച്ച് വീണ്ടും തുറന്നു. എന്നാല്‍, അധികകാലം പ്രവര്‍ത്തനം മുന്നോട്ടു പോയില്ല. പുകക്കുഴലായിരുന്നു അടുത്ത വില്ലന്‍. പുകക്കുഴലില്‍നിന്ന് പുക പുറത്തേക്കു പോകാതെ ചൂള പ്രവര്‍ത്തിക്കുന്ന മുറിയില്‍ തുങ്ങിനിറഞ്ഞു തുടങ്ങിയതോടെ വീണ്ടും പ്രവര്‍ത്തനം നിശ്ചലമായി. വര്‍ഷങ്ങള്‍ കഴിഞ്ഞ നഗരസഭാ ഭരണസമിതി പ്രശ്‌നം പരിഹരിക്കാനായി വകയിരുത്തി. എന്നാല്‍, നാളിതുവരെ പ്രശ്‌നപരിഹാരം ഉണ്ടായതേയില്ല. നിലവില്‍ നഗരസഭാ പ്രദേശത്ത് പൊതുശമശാനങ്ങളില്ലാത്തതിനാല്‍ ഭൂരഹിതരും പരിമിത ഭൂമിയുളളവരും വലിയ ദുരിതത്തിലാണ്. പരിമിത ഭൂമിയുള്ളവരില്‍ പലരും വീടിന്‍റെ ചില ഭാഗങ്ങള്‍ ഇളക്കിമാറ്റിയും വഴിയിലും മൃതസംസ്‌കാരങ്ങള്‍ നടത്തിയ നിരവധി സംഭവങ്ങള്‍ മാവേലിക്കരയില്‍ ഉണ്ടായിട്ടുണ്ട്. ഉറ്റവരുടെ മൃതദേഹം ഭൂരഹിതര്‍ തങ്ങളുടെ ഉറ്റവരുടെ മൃതദേഹം സംസ്‌കരിക്കാനായി അന്യനാടുകളിലേക്കു വരെ കൊണ്ടുപോകേണ്ട അവസ്ഥയാണ് മാവേലിക്കരയിലുള്ളത്. വാതകശ്മശാനത്തിന് തൊട്ടടുത്തുള്ള കാളച്ചന്തയിലെ ശ്മശാനത്തില്‍ കണ്ടിയൂര്‍ പ്രദേശത്തുള്ളവരുടെ മൃതദേഹം സംസ്‌കരിക്കാന്‍ മാത്രമാണ് അനുവാദവുമുള്ളത്. പതിവുപോലെ ബജറ്റില്‍ മാത്രം കാണുന്ന ഒരു വാഗ്ദാനമായി ശ്മശാനം മാറാന്‍ തുടങ്ങിയിട്ട് വര്‍ഷങ്ങളായി. എല്ലാ വര്‍ഷത്തെയും ബജറ്റ്പുസ്തകത്തില്‍ അധികൃതര്‍ ശ്മശാനത്തിനായി തുക നീക്കിവയ്ക്കാറുമുണ്ട്. ഈ വര്‍ഷത്തെ ബജറ്റിലും ശ്മശാനം പ്രവര്‍ത്തന സജ്ജമാക്കി നവീകരിക്കുവാന്‍ 20 ലക്ഷം രൂപ നീക്കിവച്ചിട്ടുണ്ട്. എന്നാല്‍, ഇനി ചുരുങ്ങിയ മാസങ്ങള്‍ മാത്രം കാലാവധിയുള്ള ഭരണസമിതി ഇതുസംബന്ധിച്ച് ചര്‍ച്ചകള്‍ പോലും നടത്തിയിട്ടില്ലെന്നാണ് പൊതുജനങ്ങളുടെ ആരോപണം. വിഷയം ഉന്നയിച്ച് വിവിധ സാംസ്‌കാരിക-സാമുദായിക സംഘടനകളും രംഗത്തെത്തിയിട്ടുണ്ട്. താത്കാലികമായി ഗ്യാസ് കൊണ്ട് പ്രവര്‍ത്തിപ്പാക്കാവുന്ന ശ്മശാനമെങ്കിലും ഉടന്‍ സജ്ജാകരിക്കണമെന്നാണ് ഇവരുടെ ആവശ്യം.

കാൽനടയാത്രക്കാർക്ക് അപകടഭീഷണി

കായംകുളം: കരിപ്പുഴ തോടിനു കുറുകെ ഏവുർ- മുട്ടം റോഡിൽ മത്സ്യമാർക്കറ്റിനു സമീപം മുട്ടം ബസാർ പാലം നവീകരണം കഴിഞ്ഞപ്പോൾ യാത്രക്കാർക്ക് അപകടഭീഷണി. പാലത്തിന്‍റെ ഇരുവശങ്ങളിലുമുള്ള നടപ്പാതകൾ ഉയർത്തിയതോടെ പാലത്തിന്‍റെ കൈവരിയും നടപ്പാതയും തമ്മിലുള്ള ഉയരം ഗണ്യമായി കുറഞ്ഞതാണ് അപകടഭീഷണി ഉയർത്തുന്നത്. കായംകുളം പട്ടണത്തിലൂടെ യാത്രചെയ്യുന്നവർ കരിപ്പുഴ തോട്ടിലേക്കു വീഴുമോ എന്ന ആശങ്കയിലാണ്. നട പ്പാതയിൽനിന്ന് ഏകദേശം ഒരടി ഉയരമാണ് കൈവരിക്കുള്ളത്. കാൽനടയാത്രക്കാരെയാണ് ഇതു ഗുരുതരമായി ബാധിക്കുന്നത്. നടപ്പാതയുടെ ഉയരം കൂട്ടിയതനുസരിച്ച് മുകളിലെ കൈവരിയുടെയും ഉയരം കൂട്ടേണ്ടതായിരുന്നു. അശാസ്ത്രീയമായ നിർമാണ പ്രവർത്തനമാണ് അപകടസാധ്യത വർധിപ്പിച്ചത്. വലിയ അഴീക്കൽ പൊഴിയുമായി ബന്ധിച്ചുകിടക്കുന്ന കരിപ്പുഴ തോടിനു കുറുകെയുള്ള നഗരത്തിലെ വളരെ പ്രധാനപ്പെട്ട പാലമാണിത്. പൊതുമരാമത്ത് വകുപ്പാണ്‌ പാലം നവീകരിച്ചത്. പാലത്തിന്‍റെ ഇരുവശങ്ങളിലും മുമ്പുണ്ടായിരുന്ന നടപ്പാത തകർന്ന് കാൽനട യാത്രപോലും ദുഷ്ക്കരമായതിനെത്തുടർന്നാണ് പൊതുമരാമത്ത് വകുപ്പ് ഇപ്പോൾ പാലം നവീകരിച്ചത്. നടപ്പാതയിൽ നിരത്തിയിരിക്കുന്ന സ്ലാബുകൾ നിരപ്പല്ലാത്തതു മൂലം യാത്രക്കാർ തട്ടിവീഴാനുള്ള സാധ്യതയും ഏറെയാണ്. പാലത്തിന്‍റെ കൈവരികൾ ഉയർത്തിയും നടപ്പാതയിലെ സ്ലാബുകൾ നിരപ്പാക്കിയും അപകടഭീഷണി ഒഴിവാക്കണമെന്നാണ് നാട്ടുകാരുടെ ആവശ്യം.

‘ശുചിത്വസാഗര സുന്ദരതീരം’ ജില്ലയില്‍ ഒന്നാംസ്ഥാനം ആലപ്പുഴ നഗരസഭയ്ക്ക്

ആലപ്പുഴ: കേരള സര്‍ക്കാര്‍ ഫിഷറീസ് വകുപ്പിന്‍റെ ആഭിമുഖ്യത്തില്‍ സംഘടിപ്പിച്ച ശുചിത്വസാഗരം സുന്ദരതീരം ഏകദിന പ്ലാസ്റ്റിക് നിര്‍മാര്‍ജനയജ്ഞത്തില്‍ ജില്ലയില്‍ ഒന്നാം സ്ഥാനം കരസ്ഥമാക്കി ആലപ്പുഴ നഗരസഭ. കൊല്ലം ജില്ലയിലെ കൊട്ടാരക്കര സൗപര്‍ണിക ഓഡിറ്റോറിയത്തില്‍ നടന്ന ചടങ്ങില്‍ ഫിഷറീസ് മന്ത്രി സജി ചെറിയാനില്‍നിന്നു നഗരസഭാധ്യക്ഷ കെ.കെ. ജയമ്മ പുരസ്‌കാരം ഏറ്റുവാങ്ങി. കേരളത്തിലെ കടലിനെയും കടലോരത്തെയും പ്ലാസ്റ്റിക് മുക്തമാക്കി ആവാസവ്യവസ്ഥ വീണ്ടെടുക്കുന്നതിനായി ഫിഷറീസ് വകുപ്പിന്‍റെ ആഭിമുഖ്യത്തില്‍ സംഘടിപ്പിച്ച കാമ്പയിന്‍റെ ഭാഗമായി ആലപ്പുഴ നഗരസഭാ പരിധിയില്‍ മംഗലം ബീച്ച്, കാഞ്ഞിരംചിറ, ബിഷപ് ഹൗസിനു സമീപം, ഹോമിയോ ഹോസ്പിറ്റലിനു സമീപം, ഇഎസ്‌ഐ, വാടയ്ക്കല്‍ എന്നീ ആറു കേന്ദ്രങ്ങളില്‍ ശുചീകരണപ്രവര്‍ത്തനങ്ങള്‍ സംഘടിപ്പിക്കുകയും 1680 കിലോഗ്രാം പ്ലാസ്റ്റിക് മാലിന്യങ്ങള്‍ നീക്കം ചെയ്യുകയും ചെയ്താണ് നഗരസഭ ഒന്നാം സ്ഥാനം കരസ്ഥമാക്കിയത്. നഗരസഭാ ആരോഗ്യ സ്ഥിരംസമിതി അധ്യക്ഷ എ.എസ്. കവിത, കൗണ്‍സിലര്‍മാരായ ഹെലന്‍ ഫെര്‍ണാണ്ടസ്, മേരിലീന, പ്രഭ ശശികുമാര്‍, ഫിഷറീസ് എക്സ്റ്റന്‍ഷന്‍ ഓഫീസര്‍ ബാലുശേഖര്‍, കോ-ഓര്‍ഡിനേറ്റര്‍ ഷീന സജി എന്നിവര്‍ പുരസ്‌കാരം ഏറ്റുവാങ്ങല്‍ ചടങ്ങില്‍ നഗരസഭാധ്യക്ഷക്കൊപ്പം പങ്കെടുത്തു. ജില്ലയില്‍ ചേര്‍ത്തല തെക്ക് ഗ്രാമപഞ്ചായത്താണ് രണ്ടാം സ്ഥാനം കരസ്ഥമാക്കിയത്. ആലപ്പുഴ നഗരസഭ ബഹുജന പങ്കാളിത്തോടെ നടത്തിയ കാമ്പയിനില്‍ ജനപ്രതിനിധികള്‍, എസ്ഡി കോളജ്, സെന്‍റ് ജോസഫ് കോളജ് എന്‍എസ്എസ് വോളണ്ടിയര്‍മാര്‍, സ്റ്റുഡന്‍റ്സ് പോലീസ്, കുടുംബശ്രീ അംഗങ്ങള്‍, കാന്‍ ആലപ്പി, ഹരിതകര്‍മസേനാംഗങ്ങള്‍, തൊഴിലുറപ്പു തൊഴിലാളികള്‍, ശുചീകരണ തൊഴിലാളികള്‍, സന്നദ്ധസംഘടനകള്‍, യുവജന സംഘടനകള്‍ തുടങ്ങിയവര്‍ കാമ്പയിന്‍റെ ഭാഗമായിരുന്നു.

കുമാരപുരത്ത് ജൂവലറിയിൽ മോഷണശ്രമം

ഹരിപ്പാട്: കുമാരപുരം പഞ്ചായത്ത് ഓഫീസിന് എതിർവശമുള്ള അറ്റ്‌ലസ് ജുവലറിയിലാണ് മോഷണശ്രമം നടന്നത്. കടയുടമ താമല്ലാക്കൽ സ്വദേശി സെയ്‌ഫുദീൻ ഇന്നലെ രാവിലെ കട തുറക്കാൻ എത്തിയപ്പോഴാണ് ഷട്ടറിന്‍റെ ഇരുവശവുമുള്ള പൂട്ടുകൾ അറുത്തുമാറ്റിയ നിലയിൽ കണ്ടെത്തിയത്. മോഷ്ടാക്കൾ ഷട്ടറിന്‍റെ മധ്യഭാഗത്തെ ലോക്ക് കുത്തിത്തുറക്കാനുള്ള ശ്രമം പരാജയപ്പെട്ടതാണ് മോഷണം നടക്കാതെ പോയത്. അറുത്തുമാറ്റിയ പൂട്ടുകൾ മോഷ്ടാക്കൾ കൊണ്ടുപോയി. പ്രകാശമേറിയ ഹൈമാസ്റ്റ് ലൈറ്റ് ഉൾപ്പെടെ തിരക്കുള്ള പഞ്ചായത്ത് ജംഗ്ഷനിൽ മോഷണശ്രമം നടന്നത് വ്യാപാരികളെയും നാട്ടുകാരെയും ഭീതിയിലാക്കിയിട്ടുണ്ട്. ഹരിപ്പാട് പോലീസ് അന്വേഷണം ആരംഭിച്ചു. കഴിഞ്ഞമാസം കുമാരപുരം കെവി ജെട്ടി ജംഗ്ഷനിൽ സൈനികന്‍റെ വീട് കുത്തിത്തുറന്ന് 15 പവൻ സ്വർണാഭരണങ്ങൾ മോഷ്ടിച്ചിരുന്നു. ഈ കേസിൽ ജയിൽമോചിതനായ കൊല്ലം കൊട്ടാരക്കര ചെമ്മങ്ങനാട് സ്വദേശി റഫീഖിനെ (സതീഷ് 45) പോലീസ് പിടികൂടിയിരുന്നു. കുമാരപുരത്ത് തുടർച്ചയായി ഉണ്ടാകുന്ന മോഷണങ്ങൾ തടയുന്നതിന് പോലീസ് ജാഗ്രത പാലിക്കണമെന്നും രാത്രികാല പരിശോധന ശക്തമാക്കണമെന്നും നാട്ടുകാർ ആവശ്യപ്പെട്ടു.

കോന്നിയിൽ ബൈക്കിൽ കാറിടിച്ച് അപകടം: രണ്ടു മാധ്യമപ്രവർത്തകർക്കു പരിക്ക്

ചെങ്ങന്നൂർ: കോന്നിയിലെ പാറമടയുടെ പ്രവർത്തനം നിർത്തണമെന്നാവശ്യപ്പെട്ട് പാറമടയ്ക്കു മുന്നിൽ നടന്ന ധർണയുടെ വാർത്ത ശേഖരിച്ച് ചെങ്ങന്നൂരിലേക്കു മടങ്ങുകയായിരുന്ന മാധ്യമപ്രവർത്തകർ സഞ്ചരിച്ച ബൈക്കിൽ അമിതവേഗത്തിലെത്തിയ കാറിടിച്ച് രണ്ടു പേർക്ക് ഗുരുതരമായി പരിക്കേറ്റു. എസിവി റിപ്പോർട്ടർ മഞ്ചീഷ് കുമാർ, കേരളവിഷൻ ചാനൽ റിപ്പോർട്ടർ ലിബിൻ എബ്രഹാം എന്നിവർക്കാണ് പരിക്കേറ്റത്. ഇടിയുടെ ആഘാതത്തിൽ ഇരുവരും റോഡരികിലെ കാനയിലേക്കു തെറിച്ചുവീഴുകയായിരുന്നു. വീഴ്ചയിൽ ലിബിനും മഞ്ചീഷിനും കൈക്കും കാലിനും പരിക്കേറ്റു. ലിബിന്‍റെ കാലിനാണ് ഗുരുതരമായ പരിക്ക്. അപകടമുണ്ടാക്കിയ കാർ നിർത്താതെ പോയെങ്കിലും നാട്ടുകാരുടെയും പോലീസിന്‍റെയും സമയോചിതമായ ഇടപെടൽ കാരണം പരിക്കേറ്റവരെ ഉടൻതന്നെ കോന്നി മെഡിക്കൽ കോളജിൽ എത്തിച്ചു. കോന്നി മെഡിക്കൽ കോളജിൽ പ്രാഥമികചികിത്സ നൽകിയ ശേഷം കൂടുതൽ വിദഗ്ധ ചികിത്സയ്ക്കായി ഇരുവരെയും കല്ലിശേരിയിലെ സ്വകാര്യ ആശുപത്രിയിലേക്കു മാറ്റി. സംഭവത്തിന് ശേഷം നിർത്താതെ പോയ കാർ പോലീസ് കസ്റ്റഡിയിലെടുത്തിട്ടുണ്ട്. കോന്നി പോലീസ് കല്ലിശേരിയിലെ ആശുപത്രിയിലെത്തി മാധ്യമപ്രവർത്തകരുടെ മൊഴികൾ രേഖപ്പെടുത്തി. അപകടത്തിനു പിന്നിൽ ഏതെങ്കിലും ഗൂഢാലോചന നടന്നിട്ടുണ്ടോ എന്നും പോലീസ് അന്വേഷിക്കുന്നുണ്ട്.

കൃപാസനം തീര്‍ഥാടനകേന്ദ്രത്തിന്‍റെ മുന്‍വശം മേല്‍പ്പാലവും ബസ്‌ബേയും നിര്‍മിക്കണമെന്ന്

ചേര്‍ത്തല: പതിനായിരക്കണക്കിന് തീര്‍ഥാടകര്‍ ദിവസേന എത്തുന്ന കലവൂര്‍ കൃപാസനം തീര്‍ഥാടന കേന്ദ്രത്തിന്‍റെ മുന്‍വശം ബസ്‌ബേയും ഫുട് ഓവര്‍ബ്രിഡ്ജും നിര്‍മിക്കണമെന്ന ആവശ്യം ശക്തമാകുന്നു. ഈ ആവശ്യമുന്നയിച്ചു ഹൈബി ഈഡന്‍ എംപി, കെ.ജെ. മാക്‌സി എംഎല്‍എ എന്നിവരുടെ സാന്നിധ്യത്തില്‍ കൃപാസനം ജനറല്‍ മാനേജര്‍ സണ്ണി പരുത്തിയില്‍, പിആര്‍ഒ അഡ്വ.എഡ്വേര്‍ഡ് തുറവൂര്‍, കെആര്‍എല്‍സിസി എക്‌സിക്യൂട്ടീവംഗം പി.ആര്‍. കുഞ്ഞച്ചന്‍, അഡ്വ. റോണി മായിത്തറ തുടങ്ങിയവര്‍ ചേര്‍ന്ന് കേന്ദ്രമന്ത്രി ജോര്‍ജ് കുര്യന് നിവേദനം നല്കി. കൃപാസനത്തില്‍ വരുന്ന ഭക്തജനങ്ങള്‍ക്ക് സുതാര്യമായി യാത്രചെയ്യുന്നതിനും കൃപാസനം പ്രത്യക്ഷീകരണ മാതാ സന്നിധിയില്‍ വരുന്നതിനും കൃപാസനം ഹെറിറ്റേജ് സ്റ്റഡി സെന്‍റര്‍ സന്ദര്‍ശിക്കുന്നതിനും ബസ്‌ബേയും ഡിപിആറില്‍ നിര്‍ദേശിക്കപ്പെട്ടിട്ടുള്ള ഫുട് ഓവര്‍ബ്രിഡ്ജും ദീര്‍ഘകാലമായി നിലകൊള്ളുന്ന ബസ് സ്‌റ്റോപ്പും ദേശീയപാതയുടെ പൂര്‍ത്തീകരണത്തോടനുബന്ധിച്ച് സ്ഥാപിക്കണമെന്ന് നിവേദനത്തില്‍ ആവശ്യപ്പെട്ടു.

വണ്ടാനം മെഡിക്കൽ കോളജാശുപത്രിയിൽ ഹൈഡ്രോളിക് സ്ട്രെക്ചറുകൾ കാഴ്ചവസ്തു

അമ്പലപ്പുഴ: വണ്ടാനം മെഡിക്കൽ കോളജ് ആശുപത്രിയിൽ ഹൈഡ്രോളിക് സ്ട്രെക്ചറുകൾ കാഴ്ച വസ്തുക്കളായി മാറുന്നു. അധികൃതർ തിരിഞ്ഞുനോക്കുന്നില്ല. പതിനായിരക്കണക്കിന് രൂപ വിലയുള്ള ഇത്തരം സ്ട്രെക്ച്ചറുകൾ നിസാര തകരാറ് സംഭവിക്കുമ്പോൾത്തന്നെ ആശുപത്രിയുടെ മൂലയിൽ തട്ടുകയാണ്. അത്യാസന്നനിലയിലായ രോഗികൾക്ക് ഡ്രിപ്പിടാനും ആവശ്യാനുസരണം ഉയർത്താനും താഴ്ത്താനും സൗകര്യമുള്ള ഹൈഡ്രോളിക് സ്ട്രെക്ചറുകൾ ആശുപത്രിയിൽ നിരവധിയുണ്ട്. എന്നാൽ, ആശുപത്രിയിലെത്തുന്ന സാധാരണ രോഗികൾക്ക് പ്രയോജനമാകുന്ന തരത്തിൽ ഉപയോഗപ്പെടുത്താൻ അധികൃതരും ജീവനക്കാരും തയാറായിട്ടില്ല. നിസാര തകരാറ് സംഭവിക്കുന്ന ഇത്തരം സ്ട്രെക്ചറുകളുടെ തകരാറ് പരിഹരിക്കുന്നതിനു പകരം ഇവ നീക്കംചെയ്ത് പുതിയത് വാങ്ങാനാണ് ആശുപത്രി അധികൃതർക്ക് താത്പര്യം. സൂപ്രണ്ട് ഉൾപ്പെടെയുള്ളവർ ഇതു പരിഹരിക്കാൻ ഇടപെടാറില്ല. പുതിയവ വാങ്ങുന്നതിലെ കമ്മീഷനിലാണ് അധികൃതരുടെ കണ്ണ്. തകരാറ് സംഭവിക്കുന്ന വില കൂടിയ ഇത്തരം സ്ട്രക്ചറുകൾ പിന്നീട് ആക്രിവിലയ്ക്ക് കൊടുക്കുകയാണ് പതിവ്.

വിദ്യാർഥിനിയുടെ മരണം: കളക്ടർ എത്തി

മാന്നാർ: ചെന്നിത്തല നവോദയ വിദ്യാലയത്തിലെ വിദ്യാർഥിനിയുടെ മരണവുമായി ബന്ധപ്പെട്ട് ചെയർമാൻ കൂടിയായ ജില്ലാ കളക്ടർ അലക്സ് വർഗീസ് സ്കൂളിൽ എത്തി. വിദ്യാർഥികൾ, രക്ഷകർത്താക്കൾ, അധ്യാപകർ എന്നിവരുടെ യോഗം പ്രത്യേകം ചേർന്ന് കാര്യങ്ങൾ ചോദിച്ചു മനസിലാക്കി. വിദ്യാർഥികളുടെയും രക്ഷാകർത്താക്കളുടെയും ആശങ്കകൾ കളക്ടറോടു പറഞ്ഞു. ഇവരുടെയെല്ലാം പ്രതിനിധികളുടെ പ്രത്യേക യോഗം ചേർന്നു. അനുശോചനത്തോടെ ആരംഭിച്ച യോഗത്തിൽ ചെങ്ങന്നൂർ ആർഡിഒ ഡി.സി. ദിലീപ് കുമാർ, നവോദയ വിദ്യാലയ സമിതി ഹൈദരാബാദ് റീജിയൻ അസിസ്റ്റന്‍റ് കമ്മീഷണർ സി. രാമകൃഷ്ണൻ, മാവേലിക്കര തഹസീൽദാർ അനീഷ് ഈപ്പൻ, ഡെപ്യൂട്ടി തഹസീൽദാർ കെ. സുരേഷ് ബാബു, എംപിയുടെ പ്രതിനിധി ബിനു സി. വർഗീസ് തുടങ്ങിയവർ യോഗത്തിൽ പങ്കെടുത്തു. സ്കൂളിൽ സ്ഥിരമായി കൗൺസിലർമാരെ നിയമിക്കാനും അധ്യാപകർക്കും മാതാപിതാക്കൾക്കും വിദ്യാർഥികൾക്കുമായി പ്രത്യേകം പ്രത്യേകമായി കൗൺസലിംഗ് ഏർപ്പെടുത്താനും മെഡിറ്റേഷൻ, യോഗ തുടങ്ങിയവ കുട്ടികൾക്കും ഉറപ്പാക്കാനും യോഗം തീരുമാനിച്ചു. വിദ്യാർഥികൾക്ക് മാതാപിതാക്കളുമായി കൂടുതൽ ദിവസം ഫോണിൽ സംസാരിക്കാൻ അവസരം നൽകണമെന്ന് കലക്ടർ നിർദേശിച്ചു. വിവിധ യോഗങ്ങളിൽ പങ്കെടുത്ത് നാലു മണിക്കൂറോളം കാന്പസിൽ ചെലവഴിച്ചാണ് കളക്ടർ മടങ്ങിയത്.

അഞ്ചുവയസുകാരനെ ഉപദ്രവിച്ചു പരിക്കേല്‍പ്പിച്ചതായി പരാതി

ചേര്‍ത്തല: അഞ്ചുവയസുകാരനെ അമ്മയും അമ്മൂ മ്മയും ചേര്‍ന്ന് ഉപദ്രവിച്ചു പരിക്കേല്‍പ്പിച്ചതായി പരാതി. നഗരസഭ 15ാം വാര്‍ഡിലാണ് സംഭവം. കുട്ടിയുടെ മൊഴിയുടെ അടിസ്ഥാനത്തില്‍ ചൈല്‍ഡ് ലൈന്‍ പ്രവര്‍ത്തകര്‍ ഇടപെടുകയും തുടര്‍ന്ന് പോലീസ് കേസെടുക്കുകയും ചെയ്തു. കുട്ടിയെ ശിശുക്ഷേമ സമിതി ഏറ്റെടുക്കാനും നടപടിയായി. നഗരത്തിലെ പ്രധാന സ്കൂളിലെ യുകെജി വിദ്യാർഥിയായ അഞ്ചുവയസുകാരനെ മുഖത്തും കഴുത്തിനും മുറിവേറ്റ നിലയിൽ കോടതിക്കവലയ്ക്കു സമീപമുള്ള ചായക്കടയിൽ കണ്ടെത്തിയത്. ഇതുവഴി വന്ന പിടിഎ പ്രസിഡന്‍റ് അഡ്വ. ദിനൂപിന്‍റെ ശ്രദ്ധയിൽപ്പെട്ടതോടെയാണ് സംഭവം പുറത്താകുന്നത്. മുഖത്തും കഴുത്തിലെയും മുറിവ് അമ്മ സ്കെയിലിന് അടിച്ചതാണെന്നും അമ്മൂമ്മയും തന്നെ ഉപദ്രവിക്കാറുണ്ടെന്നും കുട്ടി ദിനൂപിനോടു പറഞ്ഞു. കഴിഞ്ഞ മേയ് 24ന് അമ്മയുടെ ആൺസുഹൃത്ത് ഈ കുട്ടിയെ ഉപദ്രവിച്ച കേസിൽ അറസ്റ്റ് ചെയ്യപ്പെട്ടിരുന്നു. തുടർന്ന് റിമാൻഡിലിരിക്കേ ഇയാളെ ആശുപത്രിയിൽ മരിച്ചനിലയിൽ കണ്ടെത്തുകയും ചെയ്തു. പിന്നീട് പിടിഎ ഭാരവാഹികളുടെ നിരീക്ഷണം കുട്ടിക്കുണ്ടായിരുന്നു. ലോട്ടറിവിൽപ്പനയ്ക്കു പോകുമ്പോൾ കുട്ടിയെ ചായക്കടയിൽ ഇരുത്തിയശേഷമാണ് മാതാവ് സ്ഥിരമായി പോകുന്നത്. വ്യാഴാഴ്ച വൈകിട്ട് ദിനൂപാണ് കുട്ടി ചായക്കടയിൽ ഇരിക്കുന്നത് കണ്ടത്. തുടർന്നുള്ള അന്വഷണത്തിലാണ് ദിവസങ്ങളായി കുട്ടി ക്രൂരമർദനത്തിന് ഇരയായതെന്ന് കണ്ടെത്തിയത്. തുടർന്ന് ചേർത്തല പോലീസിലും ജില്ലാ ചൈൽഡ് പ്രൊട്ടക്‌ഷൻ യൂണിറ്റിലും പരാതി നൽകി. ഇതിന്‍റെ അടിസ്ഥാനത്തിൽ ജില്ലാ ചൈൽഡ് പ്രൊട്ടക്‌ഷൻ യൂണിറ്റ് സൂപ്പർ വൈസർ അലൻ വർഗീസ് കുട്ടിയെ ഏറ്റെടുക്കുകയും ചേർത്തല താലൂക്കാശുപത്രിയിൽ വൈദ്യ പരിശോധനയ്ക്കു വിധേയനാക്കുകയും ചെയ്തു. പരിശോധനയിൽ മർദനത്തിന്‍റെ പാടുകൾ കണ്ടെത്തിയതായി അലൻ വർഗീസ് പറഞ്ഞു. അലൻ വർഗീസ് ചേർത്തല പോലീസ് സ്റ്റേഷനിൽ എത്തി റിപ്പോർട്ട് നൽകിയതിന്‍റെ അടിസ്ഥാനത്തിൽ പോലീസ് കേസെടുത്തു. തുടർന്ന് കുട്ടിയെ ആലപ്പുഴ ശിശുസംരക്ഷണ കേന്ദ്രത്തിൽ ഏൽപ്പിച്ചു.

വയോധികയ്ക്കു നേരേ തെരുവുനായ ആക്രമണം

കായംകുളം: കരീലക്കുളങ്ങര ജംഗ്ഷനു പടിഞ്ഞാറുഭാഗത്ത് പാതയോരത്തുകൂടി നടന്നുപോയ വയോധികയ്ക്കു നേരേ തെരുവുനായ ആക്രമണം. കരീലക്കുളങ്ങര മലമേൽഭാഗം സിറിൽഭവനത്തിൽ ദേവകിയമ്മ(85)യെയാണ് തെരുവുനായ ക്രൂരമായി ആക്രമിച്ചത്. കടിയേറ്റ് റോഡിൽവീണ വയോധിക നിലവിളിച്ചതിനെത്തുടർന്നാണ് നാട്ടുകാർ ഓടിയെത്തിയത്. കഴിഞ്ഞ ദിവസം ഉച്ചയ്ക്ക് ഒരുമണിയോടെ മല്ലിക്കാട്ടുകടവ് റോഡിലാണ് സംഭവം. കടിയേറ്റ് റോഡിൽ വീണ ദേവകിയമ്മയെ തെരുവുനായ കടിച്ചുകീറി . കൈക്കും കാലിനും പരിക്കേറ്റ ദേവകിയമ്മയെ ആലപ്പുഴ വണ്ടാനം മെഡിക്കൽ കോളജിൽ പ്രവേശിപ്പിച്ചു ‌.

അരക്കിലോ കഞ്ചാവുമായി യുവാവ് പിടിയില്‍

ചേര്‍ത്തല: കഞ്ചാവു വില്‍പ്പന നടത്തുന്നുവെന്ന പരാതിയെത്തുടര്‍ന്ന് എക്‌സൈസ് സംഘം നടത്തിയ പരിശോധനയില്‍ 504 ഗ്രാം കഞ്ചാവുമായി യുവാവ് പിടിയില്‍. കഞ്ഞിക്കുഴി ഗ്രാമപഞ്ചായത്ത് 15ാം വാര്‍ഡ് കളത്തിവീട് വനസ്വര്‍ഗം മുത്തുവിലാസം വീട്ടില്‍ അജിത്കുമാറാണ് (30) പിടിയിലായത്. ചേര്‍ത്തല എക്‌സൈസ് റേഞ്ച് ഇന്‍സ്പക്ടര്‍ പി.എം. സുമേഷിന്‍റെ നേതൃത്വത്തിലായിരുന്നു പരിശോധന. കഞ്ഞിക്കുഴി, കളത്തിവീട്, വനസ്വര്‍ഗം ഭാഗത്ത് യുവാക്കള്‍ക്കു വ്യാപകമായി കഞ്ചാവു വില്‍പന നടത്തുന്നതായ പരാതിയുടെ അടിസ്ഥാനത്തിലായിരുന്നു പരിശോധന. അജിത്കുമാര്‍ ഇതിനുമുമ്പും കഞ്ചാവുകേസില്‍ പിടിയിലായിട്ടുണ്ടെന്ന് എക്‌സൈസ് അധികൃതര്‍ പറഞ്ഞു. ഇയാള്‍ക്കെതിരേ എന്‍ഡിപിഎസ് ആക്ട് പ്രകാരം കേസെടുത്തു. ഇയാളില്‍നിന്നു കഞ്ചാവു വാങ്ങിയവരുടെ വിവരങ്ങള്‍ ശേഖരിച്ചുവരികയാണ്.

ക്ഷേമ സ്ഥാപങ്ങളില്‍നിന്ന് വിജയികളായ കുട്ടികളുടെ തുടര്‍ പഠനം സര്‍ക്കാര്‍ ഏറ്റെടുക്കണം: ഫാ. ലിജോ ചിറ്റിലപ്പള്ളി

ആലപ്പുഴ: ജില്ലയിലെ കുട്ടികളുടെ ക്ഷേമസ്ഥാപനങ്ങളില്‍ കഴിഞ്ഞ പൊതു പരീക്ഷയില്‍ വിജയികളായ മുഴുവന്‍ കുട്ടികളുടെയും തുടര്‍ പഠനച്ചെലവ് സര്‍ക്കാര്‍ ഏറ്റെടുക്കണമെന്ന് ഓര്‍ഫനേജ് അസോസിയേഷന്‍ സംസ്ഥാന പ്രസിഡന്‍റ് ഫാ. ലിജോ ചിറ്റിലപ്പള്ളി ആവശ്യപ്പെട്ടു. ജില്ലാ ഓര്‍ഫനേജ് അസോസിയേഷന്‍റെ നേതൃത്വത്തില്‍ ജില്ലയിലെ കുട്ടികളുടെ ക്ഷേമ സ്ഥാപനങ്ങളില്‍നിന്ന് എസ്എസ്എല്‍സി, പ്ലസ് ടു വിജയികളായ കുട്ടികളെ അനുമോദിക്കുന്ന ചടങ്ങ് ഉദ്ഘാടനം ചെയ്യുകയായിരുന്നു അദ്ദേഹം. വിവിധ സെന്‍ററുകളില്‍നന്ന് അമ്പതോളം വിദ്യാര്‍ഥികൾ പങ്കെടുത്തു. വിദ്യാര്‍ഥികള്‍ക്ക് കാഷ് അവാര്‍ഡും മെമന്‍റോയും സമ്മാനിച്ചു. അസോസിയേഷന്‍ ജില്ലാ പ്രസിഡന്‍റ് ഫാ. മൈക്കിള്‍ കുന്നേല്‍ അധ്യക്ഷത വഹിച്ചു. ജനറല്‍ സെക്രട്ടറി മുഹമ്മദ് ഷമീര്‍ ഗാന്ധിഭവന്‍, വൈസ് പ്രസിഡന്‍റുമാരായ ഫാ. സാനു ജോര്‍ജ്, സിസ്റ്റര്‍ അനുപമ, ജോയിന്‍റ് സെക്രട്ടറിമാരായ ബിനോയി തങ്കച്ചന്‍, സിസ്റ്റര്‍ മോളി, ജോണിക്കുട്ടി തുരുത്തേല്‍, ജി. രവീന്ദ്രന്‍പിള്ള, നിധിന്‍ എ.എസ്., എ.കെ. ഗോപിക്കുട്ടന്‍, ട്രഷറര്‍ മധു പോള്‍ എന്നിവര്‍ പ്രസംഗിച്ചു.

റോഡരികിൽ മാലിന്യം തള്ളൽ; കാടിറങ്ങി കാട്ടുപന്നികള്‍

ചാരുംമൂട്: കെപി റോഡിന്‍റെ വശങ്ങള്‍ കാട്ടുപന്നികളുടെ വാസസ്ഥലമായി മാറുന്നു. കായംകുളം-പുനലൂര്‍ റോഡിന്‍റെ വശങ്ങളിലെ കൊടുംകാടുകളാണ് സാനിറ്റോറിയം വളപ്പിലെത്തുന്ന കാട്ടുപന്നികളുടെ വാസസ്ഥലം. കഴിഞ്ഞദിവസം രാത്രി റോഡരികിലെ കാടുകളില്‍നിന്ന് കാട്ടുപന്നികള്‍ നിരനിരയായി ഇറങ്ങി സാനിറ്റോറിയം വളപ്പില്‍ ചെന്നതായും കൃഷി നശിപ്പിച്ചതായും പറയുന്നു. മിക്ക ദിവസങ്ങളിലും രാത്രി 12നുശേഷം റോഡിലൂടെ കാട്ടുപന്നികള്‍ വരിവരിയായി നടക്കുന്നത് യാത്രക്കാര്‍ കാണാറുണ്ട്. പറയംകുളം ജംഗ്ഷന് കിഴക്കുവശം മുതല്‍ ഐടിബിപി ജംഗ്ഷന് ഇപ്പുറം വരെയും പരസ്പരം കാണാന്‍ കഴിയാത്ത രീതിയിലുള്ള കൊടുംകാടുകളാണ്. രാത്രി കെപി റോഡിലൂടെ പോകുന്നവര്‍ക്ക് ഈ ഭാഗത്ത് എത്തുമ്പോള്‍ ഭയമാണ്. പലപ്പോഴും കാട്ടുപന്നികള്‍ കാറുകളുടെയും ഇരുചക്രവാഹനങ്ങളുടെയും മുന്നില്‍ ചാടിയിട്ടുണ്ട്. ഇതരസ്ഥലങ്ങളില്‍നിന്നു രാത്രി വാഹനത്തില്‍ മാലിന്യങ്ങള്‍ കാട്ടില്‍കൊണ്ടുവന്ന് തള്ളാറുണ്ട്. കാട്ടുപന്നികള്‍ക്ക് ആഹാരമായി ഇത് ലഭിക്കുന്നുണ്ട്. താമരക്കുളം പഞ്ചായത്ത് പരിധിയിലാണ് റോഡിന്‍റെ വശങ്ങളില്‍ കാടുള്ളത്. പൊതുമരാമത്ത് വകുപ്പും ഇത് ശ്രദ്ധിക്കാറില്ല. എട്ടുവര്‍ഷം മുന്‍പ് സാനിറ്റോറിയത്തിന്‍റെ മുന്‍വശം കെപി റോഡിന്‍റെ വശത്ത് ജനങ്ങള്‍ക്ക് വിശ്രമിക്കാനായി പാര്‍ക്ക് നിര്‍മിക്കാന്‍ ഭരണിക്കാവ് ബ്ലോക്ക് പഞ്ചായത്ത് തീരുമാനിച്ചിരുന്നു. പാര്‍ക്ക് നിര്‍മാണത്തിനാവശ്യമായ തുക എംഎല്‍എ ഫണ്ടില്‍നിന്ന് നല്‍കാനായിരുന്നു തീരുമാനം. റോഡിന്‍റെ വശങ്ങള്‍ അളന്ന് തിട്ടപ്പെടുത്തിയെങ്കിലും പാര്‍ക്ക് നിര്‍മാണം നടന്നില്ല. മത്സ്യവ്യാപാരത്തിനുശേഷം ഉപയോഗ ശൂന്യമായ പെട്ടികളും റോഡിന്‍റെ വശങ്ങളില്‍ തള്ളിയിരിക്കുകയാണ്. സമീപ പ്രദേശം ഉള്‍പ്പെടെയുള്ളിടത്ത് എന്ത് മാലിന്യം ഉണ്ടെങ്കിലും ഏതുതരം മാലിന്യമായാലും എല്ലാം തള്ളുന്നത് കെപി റോഡിനു സമീപത്തെ കാടുകളിലും റോഡിന്‍റെ വശങ്ങളിലുമാണ്. പൊതുമരാമത്ത് വകുപ്പും പഞ്ചായത്തും ബ്ലോക്ക് പഞ്ചായത്തും മുന്‍കൈയെടുത്ത് കാടുകള്‍ തെളിക്കണം എന്നാണ് ജനങ്ങളുടെ ആവശ്യം. ചാരുംമൂട് മാലിന്യം തള്ളുന്നവരെ കണ്ടെത്താന്‍ സ്ഥാപിച്ച കെപി റോഡിലെ കാമറകള്‍ നോക്കുകുത്തികളായി. അഞ്ചു വര്‍ഷം മുന്‍പ് ഭരണിക്കാവ് ബ്ലോക്ക് പഞ്ചായത്ത് കെപി റോഡില്‍ സാനിറ്റോറിയത്തിന്‍റെ റോഡ് വശങ്ങളിലും ചാരുംമൂടിന്‍റെ വിവിധ ഭാഗങ്ങളിലും മാലിന്യം തള്ളുന്നവരെ കണ്ടെത്താന്‍ ഭരണിക്കാവ് ബ്ലോക്ക് പഞ്ചായത്ത് സ്ഥാപിച്ച സിസി കാമറകളാണ് നോക്കുകുത്തികളായത്. ഐടിബിപി ജംഗ്ഷന്‍ മുതല്‍ കെപി റോഡില്‍ പാലൂത്തറ വരെയും കൊല്ലം-തേനി ദേശീയപാതയില്‍ ഭരണിക്കാവ് ബ്ലോക്ക് പഞ്ചായത്ത് മുതല്‍ ഫെഡറല്‍ ബാങ്കിനു സമീപം വരെയുമാണ് മാലിന്യം തള്ളുന്നത് കണ്ടെത്താന്‍ കാമറാകള്‍ സ്ഥാപിച്ചത്. ഇതോടൊപ്പം തന്നെ ഇരു റോഡുകളിലും പ്ലാസ്റ്റിക് മാലിന്യക്കൂടകള്‍ സ്ഥാപിച്ചിരുന്നു. എന്നാല്‍, ഇത് കാണാത്ത രീതിയിലാണ് ഇറച്ചി മാലിന്യങ്ങള്‍ ഉള്‍പ്പെടെയുള്ളവ ചാക്കുകളില്‍ കെട്ടി രാത്രി അതിനു വെളിയില്‍ തള്ളിയത്. ഇത് നീക്കം ചെയ്യുന്നതിനായി പിന്നീട് പതിനായിരക്കണക്കിന് രൂപ ചെലവായി.

പരിശീലകൻ മാത്യു ഡിക്രൂസിന്‍റെ മൃതദേഹത്തോടൊപ്പം ബാസ്‌കറ്റ്ബോളും അടക്കം ചെയ്തു

ആലപ്പുഴ: അന്തരിച്ച പ്രമുഖ ബാസ്‌കറ്റ്ബോൾ പരിശീലകൻ മാത്യു ഡിക്രൂസിന്‍റെ മൃതദേഹത്തോടൊപ്പം അദ്ദേഹത്തിന്‍റെ ആഗ്രഹപ്രകാരം ഏറ്റവും പ്രിയപ്പെട്ട ബാസ്‌കറ്റ്ബോളും കല്ലറയിൽ അടക്കം ചെയ്തു. സഹപ്രവർത്തകരും പരിശീലിക്കപ്പെട്ട കുട്ടികളും ചേർന്നാണ് ആഗ്രഹം സഫലീകരിച്ചത്. സിഎസ്ഐ ചർച്ചിൽ മൃതദേഹം സംസ്കരിച്ചു. രാജ്യാന്തര താരങ്ങളെ വളർത്തിയെടുത്ത കഴിവുറ്റ പരിശീലകനായിരുന്നു മാത്യു ഡിക്രൂസ്. ബാസ്കറ്റ്ബോൾ പരിശീലകൻ മാത്യു ഡിക്രൂസിന്‍റെ നിര്യാണത്തിൽ ആലപ്പി ഡിസ്ട്രിക്റ്റ് ബാസ്കറ്റ്ബോൾ അസോസിയേഷൻ (എഡിബിഎ) അനുശോചിച്ചു. പ്രസിഡന്‍റ് റോണി മാത്യു അധ്യക്ഷത വഹിച്ചു. സെക്രട്ടറി ജോൺ ജോർജ് അനുശോചനപ്രമേയം അവതരിപ്പിച്ചു.

ശ്രീകൃഷ്ണസ്വാമി ക്ഷേത്രാങ്കണത്തിൽ അഞ്ചുകോടിയുടെ അമിനിറ്റി സെന്‍റർ

അന്പലപ്പുഴ: ശ്രീകൃഷ്ണസ്വമി ക്ഷേത്രാങ്കണത്തിൽ ഒരുങ്ങുന്ന അഞ്ചുകോടി രൂപ ചെലവിൽ അമിനിറ്റി സെന്‍റർ. രണ്ടു നിലകളിലായി 17,300-സ്ക്വയർ ഫീറ്റിൽ പൂർത്തിയാക്കുന്ന സെന്‍ററിന്‍റെ താഴത്തെ നിലയിൽ 9 ഡീലക്സ് മുറികളും ഒരു സ്യൂട്ട് മുറിയും മുകൾനിലയിൽ 11 ഡീലക്സ് മുറികളും ഒരു സ്യൂട്ട് മുറിയുമാണ് ഉണ്ടാകുക. വിശാലമായ പാർക്കിംഗ് സൗകര്യത്തിനു പുറമേ സ്ത്രീകൾക്കും പുരുഷന്മാർക്കുമായ പ്രത്യേക ഡോർമെറ്ററികളും സ്റ്റോറേജും ശുചിമുറി സംവിധാനവുമുണ്ടാകും. അമ്പലപ്പുഴ ക്ഷേത്രത്തിൽ ദർശനത്തിന് ദൂരദേശത്തുനിന്ന് എത്തുന്നവർക്കുൾപ്പെടെ മെച്ചപ്പെട്ട സുഖസൗകര്യങ്ങളോടെ താമസസൗകര്യമൊരുക്കുന്നതിന്‍റെ ഭാഗമായാണ് അമിനിറ്റി സെന്‍റർ ഒരുക്കുന്നത്. ക്ഷേത്രത്തിന്‍റെ തെക്ക് പടിഞ്ഞാറെ ഭാഗത്ത് നിലവിൽ സ്ഥിതിചെയ്യുന്ന ദേവസ്വം സത്രം പൊളിച്ചുനീക്കിയാകും സെന്‍റർ നിർമിക്കുക. 40 വർഷം പഴക്കമുള്ള സത്രം കാലപ്പഴക്കം കൊണ്ട് താമസയോഗ്യമല്ലാതായതോടെ കഴിഞ്ഞ രണ്ടുവർഷമായി ഇതു ഭാഗികമായാണ് പ്രവർത്തിക്കുന്നത്. ഇതിനാൽ മറ്റു നാടുകളിൽനിന്ന് ക്ഷേത്രദർശനത്തിനെത്തുന്നവർ സ്വകാര്യ ലോഡ്ജുകളെയാണ് ആശ്രയിക്കുന്നത്. വിഷയം ശ്രദ്ധയിൽപ്പെട്ടതിനെത്തുടർന്നാണ് എച്ച്. സലാം, പൊതുമരാമത്തു മന്ത്രി മുഹമ്മദ് റിയാസുമായി ബന്ധപ്പെട്ട് അമിനിറ്റി സെന്‍ററിന് പണം അനുവദിപ്പിച്ചത്. അമിനിറ്റി സെന്‍ററിനു പുറമേ ക്ഷേത്രത്തിലെ ഉത്സവാഘോഷങ്ങളുടെ ഭാഗമായുള്ള കലാപരിപാടികൾ അരങ്ങേറുന്ന സ്റ്റേജും ഇതിനോടനുബന്ധിച്ച് ഓപ്പൺ എയർ ഓഡിറ്റോറിയവും പുനർനിർമിക്കും. അഞ്ചു കോടിക്കു പുറമേ ബജറ്റ് ഫണ്ടിൽനിന്നും ഒരുകോടി രൂപയാണ് ഇതിനായി അനുവദിച്ചത്. പൊതുമരാമത്ത് വകുപ്പിൽനിന്നും അനുവദിച്ച അഞ്ചു കോടി രൂപ ഉപയോഗിച്ചുള്ള കെട്ടിടത്തിന്‍റെ നിർമാണച്ചുമതല കേരള ഇറിഗേഷൻ ഇൻഫ്രാസ്ട്രക്ചർ ഡെവലപ്മെന്‍റ് കോർപറേഷന് (കിഡ്ക്) ആണ്. ഇവയുടെ നിർമാണപ്രവർത്തനവുമായി ബന്ധപ്പെട്ട് ദേവസ്വം ബോർഡംഗം അഡ്വ. എ. അജിത് കുമാറിന്‍റെ അധ്യക്ഷതയിൽ എംഎൽഎ യോഗം വിളിച്ചുചേർത്തു. പഞ്ചായത്ത് പ്രസിഡന്‍റ് ശോഭ ബാലൻ, അംഗങ്ങളായ സുഷമ രാജീവ്, വവിത, ദേവസ്വം അസി. കമ്മീഷണർ എം. എം. നിഖിൽലാൽ, അഡ്മിനിസ്ട്രേറ്റീവ് ഓഫീസർ അജിത്ത് എന്നിവർ പങ്കെടുത്തു.

കൊല്ലം-തേനി ദേശീയപാത വികസനം; പാതയോര നിർമാണങ്ങൾക്ക് നിയന്ത്രണം

ചാരുംമൂട്: കൊല്ലം-തേനി ദേശീയപാത നാലുവരിപ്പാതയാക്കി മാറ്റുന്നതിനായി സ്ഥലം ഏറ്റെടുക്കൽ നടപടികളിലേക്കു കടക്കുന്നതിനാൽ പാതയോരത്തെ പുതിയ നിർമാണങ്ങൾക്ക് ഇനി അനുമതി നൽകരുതെന്ന് വില്ലേജ് ഓഫീസുകൾക്ക് രേഖാമൂലം നിർദേശം നൽകി. അതിനാൽ കൊല്ലം-തേനി ദേശീയപാതയ് ക്കരികിൽ പുതിയ നിർമാണ പ്രവർത്തനങ്ങൾക്ക് ഇനി പെർമിറ്റ് ലഭിക്കില്ല. തദ്ദേശ സ്വയംഭരണ സ്ഥാപനങ്ങൾക്കും ഇതുസംബന്ധമായ നിർദേശം നൽകിക്കഴിഞ്ഞു. ഏറ്റെടുക്കുന്ന സ്ഥലത്തിന്‍റെ വിശദാംശങ്ങൾ ഭൂരാശി പോർട്ടിലിൽ പ്രസിദ്ധീകരിച്ചിട്ട് മൂന്നുമാസമായിട്ടും സ്ഥലം ഏറ്റെടുക്കൽ നടപടികൾ വൈകുകയാണ്. വേണ്ടത്ര ഉദ്യോഗസ്ഥരെ നിയോഗിക്കാത്തതും നടപടികൾ വൈകാൻ കാരണമാകുന്നു. ആലപ്പുഴ ജില്ലയുടെ ചുമതല ദേശീയപാത വിഭാഗം ഹരിപ്പാട് സ്‌പെഷൽ ഡെപ്യൂട്ടി തഹീൽദാർക്കും കൊല്ലം ജില്ലയുടെ ചുമതല കൊല്ലം ദേശീയപാത വിഭാഗം ഡെപ്യൂട്ടി തഹസീൽദാർക്കുമാണ്. എന്നാൽ, ഇവർക്ക് ദേശീയപാത 66ന്‍റെ വികസനപ്രവർത്തനങ്ങൾക്കും ചുമതലകൾ വഹിക്കേണ്ടിവരുന്നതിനാൽ ഇതും മറ്റൊരു പ്രതിസന്ധിയാണ്. സ്ഥലം ഏറ്റെടുക്കൽ നടപടികൾ വേഗത്തിലാക്കണം എന്ന ആവശ്യവുമായി കേന്ദ്ര ഉപരിതല ഗതാഗതവകുപ്പ് മന്ത്രി നിധിൻ ഗഡ്കരിക്ക് കൊടിക്കുന്നിൽ സുരേഷ് എംപി നിവേദനം നൽകിയിരിക്കുകയാണ്. സ്ഥലം ഏറ്റെടുക്കൽ വേഗത്തിലാക്കാൻ റവന്യുവകുപ്പിന് നിർദേശം നൽകണമെന്ന് കാട്ടി മുഖ്യമന്ത്രിക്കും എംപി കത്ത് നൽകി. കൊല്ലം-തേനി ദേശീയപാതയുടെ വികസന പ്രവർത്തനങ്ങൾ വേഗത്തിലാക്കണമെന്ന ആവശ്യവുമായി സംസ്ഥാന സർക്കാരും കേന്ദ്രമന്ത്രിക്ക് കത്ത് നൽകിയിട്ടുണ്ട്. കൊല്ലം ബൈപ്പാസ് മുതൽ-ചെങ്ങന്നൂർ ആഞ്ഞിലിമൂട് വരെ 54 കിലോമീറ്റർ വികസനത്തിന് നിലവിൽ 1993.28 കോടി രൂപയാണ് നിർമാണച്ചെലവായി എസ്റ്റിമേറ്റിലുള്ളത്. എന്നാൽ, ഇത് 2200 കോടി ആയി ഉയർത്തുമെന്നാണ് സൂചന. പൊതുമരാമത്ത് പദ്ധതികളുടെ നിരക്ക് വർധിച്ചതാണ് കാരണം. സംസ്ഥാന റവന്യുവകുപ്പിന് നിർദേശം ലഭിച്ചാൽ കല്ലിടീൽ നടപടികൾ വേഗത്തിലാകും. ദേശീയപാത പൊതുമരാമത്ത് വിഭാഗവും സ്ഥലമേറ്റെടുക്കൽ സംഘവും നേരത്തെ പാത കടന്നുപോകുന്ന സ്ഥലങ്ങളിൽ സംയുക്ത പരിശോധന നടത്തിയിരുന്നു. 24 മീറ്റർ വീതിയിൽ കൊടുംവളവുകൾ നിവർത്തിയും ബ്ലാക്ക് സ്പോട്ടുകൾ ഒഴിവാക്കിയും ഗ്രേഡിംഗ് വർധിപ്പിച്ചുമാണ് ദേശീയപാത 183 യാഥാർഥ്യമാക്കുക. കൊല്ലം, ഭരണിക്കാവ്, വണ്ടിപ്പെരിയാർ, കുമളി, തേനി തുടങ്ങിയ ജംഗ്‌ഷനുകളിലൂടെയാണ് പാത കടന്നുപോവുക. കയറ്റിറക്കങ്ങൾ പരമാവധി ഒഴിവാക്കാൻ നിലവിലുള്ളതിനേക്കാൾ ഉയർത്തിയാകും റോഡ് നിർമിക്കുക. കൊല്ലം കടവൂർ-തേവള്ളി - തൃക്കടവൂർ - അഞ്ചാലുംമൂട്‌ - പെരിനാട് - ഈസ്റ്റ് കല്ലട - ഭരണിക്കാവ് -ചക്കുവള്ളി -ശൂരനാട് നോർത്ത് - ആനയടി - താമരക്കുളം-ചാരുംമൂട്‌ -ചുനക്കര - മാങ്കാംകുഴി -കൊല്ലക്കടവ് ആഞ്ഞിലിമൂട്‌-ചെങ്ങന്നൂർ-പൊൻകുന്നം -കാഞ്ഞിരപ്പള്ളി -മുണ്ടക്കയം -കുട്ടിക്കാനം -വണ്ടിപ്പെരിയാർ-കുമളി വഴിയാണ് റോഡ് തമിഴ്നാട്ടിലേക്ക് പ്രവേശിക്കുക. തുടർന്ന് കമ്പം ഉത്തമപാളയം വഴി തേനിയിൽ എത്തിച്ചേരും.

സമഗ്ര കുട്ടനാട് കുടിവെള്ള പദ്ധതിക്ക് മന്ത്രിസഭ അംഗീകാരം നല്‍കി

എടത്വ: സമഗ്ര കുട്ടനാട് കുടിവെള്ള പദ്ധതിയിലെ മൂന്നു പാക്കേജുകളുടെ പൂര്‍ത്തീകരണത്തിനായി അധികതുക അനുവദിക്കാന്‍ മന്ത്രിസഭാ യോഗം അംഗീകാരം നല്‍കിയതായി തോമസ് കെ. തോമസ് എംഎല്‍എ അറിയിച്ചു. കുടിവെള്ള പദ്ധതിയുടെ രണ്ടാം ഘട്ടത്തിലെ പാക്കേജ് അഞ്ചില്‍ ഉള്‍പ്പെടുന്ന മുട്ടാര്‍, വെളിയനാട്, നീലംപേരൂര്‍ എന്നീ പഞ്ചായത്തുകളില്‍ ഉന്നതതല ജലസംഭരണികളുടെ നിര്‍മാണം, വിതരണ ശൃംഖല സ്ഥാപിക്കല്‍, നിലവിലുള്ള ജലസംഭരണികളുടെ പുനരുദ്ധാരണ പ്രവൃത്തി എന്നിവയ്ക്ക് 52,92,84,964 രൂപയും പാക്കേജ് ഏഴില്‍ രാമങ്കരി, ചമ്പക്കുളം പഞ്ചായത്തിലെ ഓവര്‍ഹെഡ് ടാങ്കിന്‍റെയും വിതരണ ശൃംഖലയുടെയും നിര്‍മാണം, രാമങ്കരി ഓവര്‍ഹെഡ് ടാങ്ക് സൈറ്റില്‍ ഓണ്‍ലൈന്‍ ക്ലോറിന്‍ ബൂസ്റ്റര്‍, നിലവിലുള്ള ഓവര്‍ ഹെഡ് ടാങ്കിന്‍റെ പുനരുദ്ധാരണം, പൈപ്പ് ലൈന്‍ സ്ഥാപിക്കല്‍ എന്നീ പ്രവൃത്തികള്‍ക്ക് 39,33,24,091 രൂപയും കുട്ടനാട് സമഗ്ര കുടിവെള്ള പദ്ധതി രണ്ടാം ഘട്ടത്തില്‍ പാക്കേജ്-ഒന്‍പതില്‍ ഉള്‍പ്പെടുന്ന വീയപുരം പഞ്ചായത്തിലെ ഉന്നതതല ജലസംഭരണിയുടെ നിര്‍മാണം, സ്റ്റാഫ് ക്വാര്‍ട്ടേഴ്‌സ്, എടത്വ ജല അഥോറിറ്റി ഓഫീസ് കെട്ടിടം എന്നിവയുടെ നിര്‍മാണം, പൈപ്പ് ലൈന്‍ സ്ഥാപിക്കല്‍ എന്നീ പ്രവൃത്തിക്ക് 5,90,70,537 രൂപയുമാണ് അനുവദിച്ചത്. പദ്ധതിയുടെ ടെന്‍ഡര്‍ നടപടികള്‍ നേരത്തെ പൂര്‍ത്തിയായിരുന്നു. പുതുക്കിയ റേറ്റിന് അനുസരിച്ച് തുക അനുവദിക്കണമെന്നാവശ്യത്തിനാണ് അംഗീകാരം ലഭിച്ചത്. ഒന്‍പത് പാക്കേജുകളിലായി നടപ്പാക്കുന്ന കുടിവെള്ള പദ്ധതിയുടെ ആദ്യഘട്ടത്തിലുള്ള നിര്‍മാണ പ്രവര്‍ത്തനങ്ങള്‍ അതിവേഗം പുരോഗമിച്ചുവരുന്നതായും രണ്ടാം ഘട്ടത്തിന്‍റെ പ്രവൃത്തികള്‍ ഉടന്‍ ആരംഭിക്കാന്‍ കഴിയുമെന്നും എംഎല്‍എ അറിയിച്ചു.

മുട്ടം റോട്ടറി ക്ലബ്‌ ഭാരവാഹികൾ ചുമതലയേറ്റു

ഹരിപ്പാട്: 2025-26 വർഷത്തെ മുട്ടം റോട്ടറി ക്ലബ്‌ ഭാരവാഹികൾ ചുമതലയേറ്റു. റോട്ടറി ക്ലബ്‌ ഹാളിൽ നടന്ന ചടങ്ങ് റോട്ടറി ഡിസ്ട്രിക്ട് 3211 ഗവർണർ ഇലക്ട് കൃഷ്ണൻ.ജി.നായർ ഉദ്ഘാടനം ചെയ്തു. പ്രസിഡന്‍റായി ഇ.കെ. ചന്ദ്രൻ, സെക്രട്ടറിയായി ജോർജ് വർഗീസ് തരകൻ, ട്രഷററായി പ്രസന്നകുമാർ. വി. തയ്യിൽ എന്നിവരാണ് ചുമതലയേറ്റത്. കെ.പി. അനിൽകുമാർ അധ്യക്ഷത വഹിച്ചു. സോൺ 23 അസിസ്റ്റന്‍റ് ഗവർണർ എബി ജോൺ, ജേക്കബ് വർഗീസ്, സൈമൺ, അരുൺനാഥ്, ആർ.കെ. പ്രകാശ്, ബി. രവികുമാർ, ആർ. ഓമനക്കുട്ടൻ, എസ്. സലികുമാർ, ആർ. രജനീകാന്ത്, ഹരികുമാർ മാടയിൽ, അഡ്വ. ജി. ഷിമുരാജ്, ഗോപകുമാർ മാടയിൽ, ഗിരീഷ്സദാശിവൻ എന്നിവർ പ്രസംഗിച്ചു. പളളിപ്പാട്, ചേപ്പാട്, പത്തിയൂർ പഞ്ചായത്തുകളിലെ ഹരിതകർമ സേനാംഗങ്ങൾക്ക് ഓവർകോട്ട് വിതരണം, ശ്രവണസഹായി വിതരണം തുടങ്ങി നിരവധിപ്രവർത്തനങ്ങൾക്കു തുടക്കം കുറിച്ചു.

അക്ഷരത്തിന്‍റെയും അറിവിന്‍റെയും അങ്കത്തിനിറങ്ങി ഗോപിദാസ്

അന്പലപ്പുഴ: ഗോപിദാസ് വീണ്ടും അക്ഷരത്തിന്‍റെയും അറിവിന്‍റെയും അങ്കത്തിനിറങ്ങി. മധുരം നുണയുന്നതു പോലെ വാർധക്യകാലത്തും പരീക്ഷയെഴുതി, അമ്മയുടെ സ്വപ്നം സാക്ഷാത്കരിക്കാനായി. പുന്നപ്ര പറവൂർ താന്നിപ്പടിച്ചിറയിൽ 79 വയസുകാരൻ ഗോപിദാസാണ് പ്രായത്തിന്‍റെ പരിമിതികളെ വെല്ലുവിളിച്ച് ഹയർ സെക്കൻഡറി തുല്യതാ പരീക്ഷയെഴുതിയത്. സംസ്ഥാനത്തെ ഏറ്റവും മുതിർന്ന പഠിതാവാണ് ഈ മുത്തച്ഛൻ. മകൻ സർക്കാർ ജീവനക്കാരനാകണമെന്നും പത്താം ക്ലാസ് പരീക്ഷ പാസാകണമെന്നുമായിരുന്നു മാതാവ് ഭവാനിയുടെ ആഗ്രഹം. പല കാരണം കൊണ്ട് അമ്മയുടെ ഈ രണ്ട് ആഗ്രഹവും പൂവണിയിക്കാൻ കഴിഞ്ഞില്ല. കുടുംബം പുലർത്താനായി പിന്നീട് കയർത്തൊഴിലാളിയായി. ഇതിനിടയിൽ മാതാവും മരണപ്പെട്ടു. എങ്കിലും പ്രിയപ്പെട്ട അമ്മയുടെ സ്വപ്നം യാഥാർഥ്യമാക്കാൻ ഗോപിദാസ് ഏഴാം ക്ലാസ് തുല്യതാ പരീക്ഷയെഴുതി. ഇതിൽ മികച്ച വിജയം നേടിയപ്പോൾ തുടർന്ന് പത്താം ക്ലാസ് തുല്യതാ പരീക്ഷയുമെഴുതി. നാലു വിഷയത്തിന് എ പ്ലസും മറ്റ് വിഷയങ്ങൾക്ക് എയും ലഭിച്ചു. അതിനേക്കാൾ മികച്ച വിജയം നേടുമെന്ന ആത്മവിശ്വാസമാണ് ഇത്തവണയുള്ളത്. വിവിധ ദിവസങ്ങളിലായി ആറു പരീക്ഷയാണ് എഴുതുന്നത്. ആദ്യ ദിവസം മലയാളമായിരുന്നു. ഞായറാഴ്ച മാത്രമാണ് അമ്പലപ്പുഴ കെ.കെ. കുഞ്ചുപിള്ള മെമ്മോറിയൽ സ്കൂളിൽ ക്ലാസുള്ളത്. മുടങ്ങാതെ ഈ ക്ലാസുകളിലെത്തുമായിരുന്നു. കൊച്ചുമക്കൾക്കൊപ്പം വാർധക്യം വീട്ടിലിരുന്ന് ആസ്വദിക്കുമ്പോഴും പഠനത്തിനും ഏറെ സമയം കണ്ടെത്തും. ഹയർ സെക്കൻഡറി തുല്യതാ എട്ടാം ബാച്ച് പഠിതാവാണ് ഈ മുത്തച്ഛൻ. പഠിക്കുന്ന സ്കൂളിൽത്തന്നെയാണ് പരീക്ഷയും. പ്രായവും അവശതയുമൊന്നും തന്‍റെ പഠനത്തിന് തടസമല്ലെന്ന് വീണ്ടും തെളിയിച്ചിരിക്കുകയാണ് ഗോപി ദാസ് എന്ന പഠിതാവ്. ആദ്യ ദിവസം പരീക്ഷ കഴിഞ്ഞിറങ്ങിയ ഗോപി ദാസിനെ എച്ച്. സലാം എംഎൽഎ പൊന്നാടയണിയിച്ച് ആദരിച്ചു.

എസി റോഡില്‍ നാളെമുതല്‍ ഗതാഗതനിയന്ത്രണം

ആലപ്പുഴ: എസി റോഡില്‍ പുതിയ പള്ളാത്തുരുത്തി പാലത്തിന്‍റെ ആര്‍ച്ച് കോണ്‍ക്രീറ്റിംഗ് പ്രവൃത്തികള്‍ നടക്കുന്നതിനാല്‍ 12 ശനിയാഴ്ച രാവിലെ 10 മുതല്‍ 13 ഞായറാഴ്ച രാവിലെ ആറു വരെ എസി റോഡിലൂടെയുള്ള ഗതാഗതത്തിന് നിയന്ത്രണമേര്‍പ്പെടുത്താന്‍ തീരുമാനം. കളക്‌ടറേറ്റില്‍ ചേര്‍ന്ന എസി റോഡ് നിര്‍മാണവുമായി ബന്ധപ്പെട്ട ഉദ്യോഗസ്ഥരുടെ യോഗത്തിലാണ് തീരുമാനം എടുത്തത്. കോട്ടയം- ചങ്ങനാശേരിയില്‍നിന്ന് ആലപ്പുഴയിലേക്ക് വരുന്ന ഭാരവാഹനങ്ങള്‍ തിരുവല്ല വഴി തിരുവല്ല -അമ്പലപ്പുഴ റോഡിലൂടെ ദേശീയപാതയില്‍ എത്തിച്ചേരണം. കോട്ടയം- ചങ്ങനാശേരിയില്‍നിന്നു വരുന്ന ചെറുവാഹനങ്ങള്‍ എസി റോഡിലൂടെ സഞ്ചരിച്ച് മങ്കൊമ്പ് ജംഗ്ഷനില്‍നിന്ന് ചമ്പക്കുളം ഭാഗത്തേക്ക് തിരിഞ്ഞ് നെടുമുടി പഞ്ചായത്ത് ഓഫീസ് ജംഗ്ഷന്‍ വഴി ദേശീയപാതയിലെ കാക്കാഴം റെയില്‍വേ മേല്‍പ്പാലത്തിന് വടക്ക് വശത്തുള്ള എസ്എന്‍ കവലയില്‍വന്ന് ആലപ്പുഴയിലേക്ക് യാത്ര തുടരണം. ആലപ്പുഴയില്‍നിന്നു ചങ്ങനാശേരിക്കു പോകുന്ന ഭാരവാഹനങ്ങള്‍ അമ്പലപ്പുഴ-തിരുവല്ല റോഡിലൂടെ ചങ്ങനാശേരിക്ക് പോകണം. ആലപ്പുഴയില്‍നിന്നു ചങ്ങനാശേരിക്കു പോകുന്ന ചെറു വാഹനങ്ങള്‍ ദേശീയപാതയിലെ എസ്എന്‍ കവലയില്‍നിന്നും കഞ്ഞിപ്പാടം-ചമ്പക്കുളം വഴി എസി റോഡിലെ പൂപ്പള്ളിയില്‍ ചെന്ന് ചങ്ങനാശേരിക്ക് യാത്ര തുടരണം. പള്ളാത്തുരുത്തി പഴയപാലത്തിന് സമാന്തരമായി പണിയുന്ന പുതിയ പാലത്തിന്‍റെ നടുവിലുള്ള 72 മീ. നീളമുള്ള ആര്‍ച്ചിന്‍റെ ആദ്യഘട്ട കോണ്‍ക്രീറ്റിംഗ് പ്രവൃത്തികളാണ് ശനിയാഴ്ച നടക്കുക. യോഗത്തില്‍ ജില്ലാ കളക്ടര്‍ അലക്‌സ് വര്‍ഗീസ് അധ്യക്ഷത വഹിച്ചു. കെഎസ്ടിപി എക്‌സി. എന്‍ജിനിയര്‍ ജി.എസ്. ജ്യോതി, അമ്പലപ്പുഴ ഡിവൈഎസ്പി കെ.എന്‍. രാജേഷ് തുടങ്ങിയവര്‍ പങ്കെടുത്തു. കെഎസ്ആര്‍ടിസി ബസ് റൂട്ടികളിലും മാറ്റം ആലപ്പുഴ: പള്ളാത്തുരുത്തി പാലത്തിന്‍റെ ആര്‍ച്ച് കോണ്‍ക്രീറ്റിംഗ് പ്രവൃത്തികള്‍ നടക്കുന്നതിനാല്‍ എസി റോഡിലൂടെയുള്ള കെഎസ്ആര്‍ടിസി ബസ് റൂട്ടുകളിലും മാറ്റമുണ്ടായിരിക്കും. ആലപ്പുഴ ഭാഗത്തുനിന്ന് ചങ്ങനാശേരി, കൈനകരി കോലത്ത് ജെട്ടി, തട്ടാശേരി എന്നീ സ്ഥലങ്ങളിലേക്കു പോകുന്ന ബസുകള്‍ കൈതവന കളര്‍കോട് ജംഗ്ഷന്‍ വഴി വണ്ടാനം എസ് എന്‍ കവല, ചമ്പക്കുളം വഴി പൂപ്പള്ളി ജംഗ്ഷനില്‍ എത്തി ചങ്ങനാശേരിക്കും മറ്റുള്ള സ്ഥലങ്ങളിലേക്കും പോകും. ചങ്ങനാശേരി ഭാഗത്തുനിന്ന് ആലപ്പുഴയ്ക്ക് വരുന്ന ബസുകള്‍ എസി റോഡിലെ മങ്കൊമ്പ് ജംഗ്ഷനില്‍നിന്ന് ഇടത്തോട്ട് തിരിഞ്ഞ് ചമ്പക്കുളം, കഞ്ഞിപ്പാടം വഴി എസ്എന്‍ കവലയില്‍ എത്തി ആലപ്പുഴയ്ക്ക് സര്‍വീസ് നടത്തും.

ഉയരപ്പാത നിര്‍മാണം മുന്നോട്ട്, യാത്രക്കാരുടെ പ്രതീക്ഷയും

തുറവൂര്‍: ലക്ഷ്യമിട്ട രീതിയില്‍ ഉയരപ്പാത നിര്‍മാണം നീങ്ങുന്നു. അരൂര്‍-തുറവൂര്‍ ഉയരപ്പാത നിര്‍മാണത്തിന്‍റെ 68 ശതമാനം ജോലികള്‍ പൂര്‍ത്തിയായി. 2023 ഫെബ്രുവരിയിലാണ് നിര്‍മാണം തുടങ്ങിയത്. 2026 ഫെബ്രുവരി അവസാനം പൂര്‍ത്തിയാക്കുന്ന വിധമാണ് നിര്‍മാണം. 12.75 കിലോ മീറ്റര്‍ പാതയില്‍ റാംപ്, ടോള്‍ ഗേറ്റ് എന്നിവയടക്കം 403 തൂണുകളാണ് നിര്‍മിക്കുന്നത്. ഇതില്‍ 394 തൂണിന്‍റെ നിര്‍മാണം പൂര്‍ത്തിയായി. ഇനി 9 തൂണുകള്‍ മാത്രമാണ് നിര്‍മിക്കാനുള്ളത്. പാതയ്ക്കു മാത്രമായി 354 തൂണുകളാണുള്ളത്. 9 മീറ്റര്‍ ഉയരത്തിലുള്ള ചിറക് വിരിച്ചിരിക്കുന്ന തൂണുകള്‍ക്ക് മുകളില്‍ കോണ്‍ക്രീറ്റ് ഗര്‍ഡറുകള്‍ സ്ഥാപിച്ചതിനുശേഷം 24 മീറ്റര്‍ വീതിയിലാണ് പാത ഒരുങ്ങുന്നത്. തുറവൂര്‍- പാട്ടുകുളങ്ങര, കുത്തിയതോട്-ചമ്മനാട്, എരമല്ലൂര്‍- ചന്തിരൂര്‍, അരൂര്‍ ക്ഷേത്രം കവല-അരൂര്‍ ബൈപാസ് തുടങ്ങി അഞ്ചു റീച്ചുകളായാണു വര്‍ക്കുകള്‍ നടക്കുന്നത്. അഞ്ചു റീച്ചുകളിലായി തൂണുകള്‍ക്കു മുകളില്‍ ഏഴു കിലോമീറ്റര്‍ പാതയുടെ കോണ്‍ക്രീറ്റിംഗ് പൂര്‍ത്തിയായി. തുറവൂര്‍ ജംഗ്ഷന്‍, അരൂര്‍ ബൈപാസ് കവല എന്നിവിടങ്ങളിലെ അപ്രോച്ച് റോഡിലൂടെ മാത്രമാണ് ഉയരപ്പാതയിലേക്ക് കയറുന്നതിനും ഇറങ്ങാനുമുള്ള സൗകര്യം. കുത്തിയതോട്, ചന്തിരൂര്‍ എന്നിവിടങ്ങളിലെ റാംപുകളിലൂടെ മാത്രമാണ് ഉയരപ്പാതയില്‍നിന്നു താഴേക്കിറങ്ങാന്‍ സൗകര്യമുള്ളത്. റാംപുകളുടെ നിര്‍മാണം നടന്നുവരികയാണ്. ഇതുകൂടാതെ 28 മീറ്റര്‍ വീതിയില്‍ ഉയരപ്പാതയുടെ മുകളില്‍ തന്നെ വാഹനങ്ങളുടെ ടോള്‍ പിരിക്കാനുള്ള ടോള്‍ ബൂത്തിന്‍റെ നിര്‍മാണം നടക്കുന്നു. അരൂര്‍-തുറവൂര്‍ ഉയരപ്പാതയുടെ പ്രധാന വെല്ലുവിളിയാണ് കാന നിര്‍മാണം. കാന നിര്‍മാണം പൂര്‍ത്തിയാകാത്തതുമൂലം വെള്ളം കെട്ടിനിന്നു പാതയിലെ റോഡുകള്‍ തകരുകയാണ്. നിര്‍മാണം പൂര്‍ത്തിയാക്കിയ കാനയില്‍നിന്നു പാതയോരത്തുള്ള ഇടത്തോടുകളിലേക്ക് വെള്ളം ഒഴുക്കിവിടുന്നതിനുള്ള പഞ്ചായത്തുകളുടെ അനുമതിക്കായി കരാറുകാര്‍ സമീപിച്ചെങ്കിലും ആറു മാസം വൈകിയാണ് അനുമതി നല്‍കിയത്.

ഒപ്പിട്ടവരെ ജോലിസ്ഥലത്തിരുത്തി വ്യത്യസ്ത സമരം

മാവേലിക്കര: ദേശീയ പണിമുടക്ക് ദിവസം സിപിഎം പ്രവർത്തകരുടെ നേതൃത്വത്തിൽ വ്യത്യസ്‌തമായ സമരം. കുന്നം ഗവ. എച്ച്എസ്എസിലാണു രജിസ്റ്ററിൽ ഒപ്പ് രേഖപ്പെടുത്തിയാൽ സ്കൂൾ സമയം അവസാനിക്കുന്നതുവരെ ജോലി സ്‌ഥലത്തു കാണണം എന്നാവശ്യപ്പെട്ടു സിപിഎം പ്രവർത്തകർ ആറ് മണിക്കൂറോളം സമരം നടത്തിയത്. ഇന്നലെ രാവിലെ 11നാണു സംഭവങ്ങളുടെ തുടക്കം. തഴക്കരയിൽ പണിമുടക്കിനെ അനുകൂലിച്ചു നടന്ന പ്രകടനത്തിനു പിന്നാലെ കുന്നം ഗവ. എച്ച്എസ്എസ് തുറന്നു പ്രവർത്തിക്കുന്നു എന്നറിഞ്ഞ സിപിഎം പ്രവർത്തകർ സ്‌കൂളിലെത്തി. എത്ര പേർ ഒപ്പിട്ടു എന്നു സമരക്കാർ അന്വേഷിച്ചപ്പോൾ 13 എന്ന മറുപടി ലഭിച്ചു. എന്നാൽ എണ്ണിയപ്പോൾ 11 പേർ മാത്രമേ ഉണ്ടായിരുന്നുള്ളൂ. രണ്ടുപേർ എവിടെ എന്നു ചോദിച്ചപ്പോൾ ഗ്രൗണ്ടിൽ ഉണ്ട് എന്നു മറ്റ് അധ്യാപകർ പറഞ്ഞു. സമരക്കാർ വീണ്ടും എത്തിയപ്പോഴും 11 പേർ മാത്രമേ സ്‌കൂളിൽ ഉണ്ടായിരുന്നുള്ളൂ. അന്വേഷിച്ചപ്പോൾ രണ്ടു പേർ മെഡിക്കൽ സ്റ്റോറിൽ പോയി എന്നായി നിലപാട്. തുടർന്നു സിപിഎം ലോക്കൽ കമ്മിറ്റി സെക്രട്ടറി എസ്. ശ്രീകുമാറിന്‍റെ നേതൃത്വത്തിൽ ഉപരോധ സമരം ആരംഭിച്ചു. സ്ഥലത്തെത്തിയ സിപിഎം നേതാവ് കെ. രഘുപ്രസാദ് ഹാജർ ബുക്ക്, മൂവ്‌മെന്‍റ് രജിസ്റ്റർ എന്നിവ കാണിച്ചാൽ സമരം അവസാനിപ്പിക്കാമെന്ന് അറിയിച്ചു. പ്രിൻസിപ്പലിന്‍റെ അഭാവത്തിൽ സ്‌കൂൾ ചുമതല ഉണ്ടായിരുന്ന അധ്യാപിക അതിനു തയാറായില്ല. ഇതോടെയാണു സമരം ശക്‌തമാക്കിയത്‌. വൈകിട്ട് അഞ്ചരയോടെ സ്‌ഥലത്തെത്തിയ പോലീസ് ഉപരോധം നടത്തിയവരെ അറസ്റ്റ് ചെയ്തു‌ നീക്കി. മുരളി തഴക്കര, വേണുഗോപാൽ, മെറിൽ എം. ദാസ് തുടങ്ങിയവർ സമരത്തിനു നേതൃത്വത്തിനു നൽകി. സമരക്കാർ എത്തിയ ശേഷമാണു മൂവ്‌മെന്‍റ് രജിസ്റ്ററിൽ രേഖപ്പെടുത്തൽ ഉണ്ടായതെന്നും ഹാജർ ബുക്കിലെയും മൂവ്‌മെന്‍റ് രജിസ്റ്ററിലെയും ഒപ്പ് വ്യത്യസ്‌തമാണെന്നും സിപിഎം ആരോപിച്ചു. ഇക്കാര്യം ചൂണ്ടിക്കാട്ടി വിദ്യാഭ്യാസ മന്ത്രിക്കു പരാതി അയച്ചു. സ്കൂളിൽ ഉണ്ടായിരുന്ന വനിതാ അധ്യാപകർ കാറിൽ പോകാൻ തുടങ്ങിയപ്പോൾ തടഞ്ഞെന്നും രണ്ട് അധ്യാപകർ മരുന്നു വാങ്ങാനായി ബൈക്കിലാണ് പോയതെന്നും ഉച്ചയ്ക്കുശേഷം ഇരുവരും ഒപ്പിട്ടില്ലെന്നും സ്കൂളിലെ മറ്റ് അധ്യാപകർ പറഞ്ഞു.

ജില്ലയിൽ സർക്കാർ മന്ദിരങ്ങൾ പലതും അത്യാസന്ന നിലയിൽ

ആലപ്പുഴ: കെഎസ്ആര്‍ടിസി ആലപ്പുഴ ഡിപ്പോയുടെ പതിറ്റാണ്ടുകള്‍ പഴക്കമുള്ള കെട്ടിടത്തിന്‍റെ മേല്‍ക്കൂരയിലെ കോണ്‍ക്രീറ്റ് പലയിടങ്ങളിലും ഇളകി വീണു കമ്പി തെളിഞ്ഞു നില്‍ക്കുന്നു. ഒന്നാം നിലയില്‍ മുന്‍പ് ഓഫീസുകള്‍ പ്രവര്‍ത്തിച്ചിരുന്ന ഭാഗത്തേക്കുള്ള പടിക്കെട്ടിനു മുകളില്‍ കമ്പി തെളിഞ്ഞു. ഇവിടെ കോണ്‍ക്രീറ്റിലും ഭിത്തിയിലും ജലം ഊര്‍ന്നിറങ്ങി ചോര്‍ച്ചയുമായി. മേല്‍ക്കൂരയില്‍ ചെടികളും മരങ്ങളും പിടിച്ചു. ഡിപ്പോയുടെ പ്രധാന കെട്ടിടത്തിനു പുറത്താണു മിക്കവരും ബസ് കാത്തു നില്‍ക്കുന്നത്. ഇത് ഒരു ഓഫീസിലെ മാത്രം പ്രശ്‌നമല്ല, പല സര്‍ക്കാര്‍ സ്ഥാപനങ്ങളിലും എപ്പോള്‍ വേണമെങ്കിലും ഇടിഞ്ഞു വീഴാവുന്ന, ചോര്‍ന്നൊലിക്കുന്ന കെട്ടിടങ്ങളിലാണു ജീവനക്കാര്‍ ജോലി ചെയ്യുന്നത്. ചിലയിടങ്ങളില്‍ പലതവണ പരാതി ഉന്നയിച്ചിട്ടും ഫലമില്ലാതെ വരുന്നതോടെ എല്ലാം സഹിച്ചു കഴിയേണ്ട സ്ഥിതിയിലാണ് ഉദ്യോഗസ്ഥര്‍. കെട്ടിടത്തിന്‍റെ തെക്കുവശത്ത് യാത്രികര്‍ ബസ് കാത്തുനില്‍ക്കുന്ന ഭാഗത്തും മേല്‍ക്കൂര ഇളകിയിട്ടുണ്ട്. ഇവിടെ കെട്ടിടം ദ്രവിച്ച സ്ഥിതിയിലാണ്. ശക്തമായ മഴയും കാറ്റുമുണ്ടായാല്‍ നിലംപൊത്താമെന്നതാണ് അവസ്ഥ. കെട്ടിടത്തിന്‍റെ ശോചനീയാവസ്ഥ കാരണം ഓഫിസ് പ്രവര്‍ത്തനങ്ങള്‍ സമീപത്തെ കെട്ടിടത്തിലേക്കു മാറ്റിയെന്നതു ജീവനക്കാര്‍ക്ക് ആശ്വാസമാണ്. എന്നാല്‍ ഇതേ കെട്ടിടത്തിനു താഴെ നില്‍ക്കേണ്ടി വരുന്ന യാത്രികര്‍ ഇപ്പോഴും അപകടാവസ്ഥയില്‍തന്നെ. വിണ്ടുകീറി കായംകുളം താലൂക്ക് ആശുപത്രി കെട്ടിടത്തിനും ബലക്ഷയം. കെട്ടിടത്തിന്‍റെ വിവിധ ഭാഗങ്ങളില്‍ മരങ്ങളും കുറ്റിച്ചെടികളും വളര്‍ന്നു ഭിത്തി വിണ്ടുകീറി. ആശുപത്രി ശുചിത്വത്തിനും മികച്ച പരിചരണത്തിനുമുള്ള കായകല്‍പ ഉള്‍പ്പെടെയുള്ള അവാര്‍ഡുകള്‍ നേടുമ്പോഴാണു മറുവശത്തു രോഗികള്‍ക്കും ജീവനക്കാര്‍ക്കും ഭീതിയുണ്ടാകും വിധം ഭിത്തി വിണ്ടുകീറുന്നത്. 20 വര്‍ഷം മാത്രം പഴക്കമുള്ള കെട്ടിടത്തില്‍ നൂറു കിടക്കകളുള്ള വാര്‍ഡിന്‍റെ വശങ്ങളിലാണു മരത്തിന്‍റെ വേര് ഇറങ്ങി പൊട്ടിപ്പൊളിയുന്നത്. ഡോക്ടര്‍മാരും നഴ്‌സുമാരും രോഗികളും കൂട്ടിരിപ്പുകാരും ഉള്‍പ്പെടെ തിങ്ങിനിറഞ്ഞു നില്‍ക്കുന്ന കാഴ്ചയാണ് മിക്കപ്പോഴും. പുരസ്‌കാരങ്ങള്‍ നേടുന്നതിനുള്ള മത്സര ഓട്ടത്തില്‍ പുറംമിനുക്കല്‍ മാത്രമാണു നടക്കുന്നതെന്ന് ആക്ഷേപമുണ്ട്. മരത്തിന്‍റെ ശിഖരങ്ങള്‍ മാറ്റുന്നതല്ലാതെ വേരോടെ പിഴുതു മാറ്റാന്‍ നടപടികള്‍ സ്വീകരിക്കാത്തതിനാല്‍ പ്രശ്‌നത്തിനു ശാശ്വത പരിഹാരമകുന്നില്ല. പൊളിഞ്ഞ നില ഒരു സര്‍ക്കാര്‍ ഓഫീസിന്‍റെ നിര്‍മാണത്തിന്‍റെ പേരില്‍ മറ്റൊരു ഓഫീസ് അപകടാവസ്ഥയിലായ കഥയാണു മാവേലിക്കര സബ് റജിസ്ട്രാര്‍ ഓഫീസിന്‍റേത്. തമ്മില്‍ ബന്ധിപ്പിച്ച നിലയിലായിരുന്നു മാവേലിക്കര താലൂക്ക് ഓഫീസും സബ് റജിസ്ട്രാര്‍ ഓഫീസും. പുതിയ കെട്ടിടം പണിയാനായി താലൂക്ക് ഓഫിസ് പൊളിച്ചതോടെ, സബ് റജിസ്ട്രാര്‍ ഓഫീസ് കെട്ടിട ഭാഗത്തിന്‍റെ പകുതി പൊളിഞ്ഞ നിലയിലായി. കെട്ടിടത്തിന്‍റെ പല ഭാഗങ്ങളിലും മേല്‍ക്കൂര ഇടിഞ്ഞു തുടങ്ങി. ഭിത്തിയിലെ ടൈലുകള്‍ ഇളകി വീഴുന്ന അവസ്ഥയുമുണ്ട്. താലൂക്ക് ഓഫീസ് നിര്‍മാണത്തിനായി ഭൂമി വേര്‍തിരിച്ചതോടെ സബ് റജിസ്ട്രാര്‍ ഓഫിസിലേക്കുള്ള പ്രധാന വഴിയും അടഞ്ഞു. ഇതോടെ പടിഞ്ഞാറു വശത്തുള്ള വഴിയിലൂടെ മാത്രമേ ഓഫീസില്‍ എത്താനാകൂ. വണ്ടിയെത്തില്ലെന്നതിനാല്‍ പ്രായമായവര്‍ക്ക് എത്താനും ബുദ്ധിമുട്ടായി. ഇടിഞ്ഞു വീണു ചേര്‍ത്തല താലൂക്ക് ഓഫീസില്‍ കാലപ്പഴക്കംകൊണ്ട് ഇടിഞ്ഞു വീഴാറായ ഓഫീസ് കെട്ടിടത്തിനുള്ളില്‍ ജീവന്‍ പണയംവച്ചാണ് 70ലേറെ ജീവനക്കാര്‍ ജോലി ചെയ്യുന്നത്. മഴ പെയ്താല്‍ ചോര്‍ന്നൊലിക്കുന്ന കെട്ടിടത്തില്‍ ഫയലുകള്‍ സൂക്ഷിക്കാന്‍പോലും ജീവനക്കാര്‍ ബുദ്ധിമുട്ടുകയാണ്. വര്‍ഷങ്ങള്‍ പഴക്കമുള്ള കെട്ടിടം ഭിത്തികളില്‍ വിള്ളല്‍ വീണും ഓടുകള്‍ ഇളകിയും ഇടിഞ്ഞുവീണു തുടങ്ങി. കഴിഞ്ഞ വര്‍ഷം ഓഫീസിന്‍റെ വടക്കുഭാഗത്തുള്ള കെട്ടിടത്തിന്‍റെ ഒരു ഭാഗം ഇടിഞ്ഞു വീണിരുന്നു. വടക്കുഭാഗത്തുള്ള കെട്ടിടങ്ങളില്‍ ജോലി ചെയ്യാന്‍ കഴിയാത്തിനാല്‍ ഓഫീസ് പ്രവര്‍ത്തനം തെക്കു ഭാഗത്തുള്ള കെട്ടിടത്തിലേക്ക് മാറ്റിയിരുന്നു. ഓഫീസിന്‍റെ പല ഭാഗങ്ങളും ഇടിഞ്ഞു വീണതോടെ സബ് ട്രഷറി ഓഫീസ് ഇവിടെനിന്നു മാറ്റി. മരപ്പട്ടി ശല്യവും രൂക്ഷമാണ്. വര്‍ഷങ്ങള്‍ക്കു മുന്‍പു താലൂക്ക് ഓഫീസ് കോംപ്ലക്‌സ് നിര്‍മിക്കാന്‍ ഫണ്ട് അനുവദിച്ചെങ്കിലും താത്കാലികമായി പ്രവര്‍ത്തിക്കാന്‍ സൗകര്യം ഒരുക്കാന്‍ കഴിയാതെ വന്നതോടെ കോംപ്ലക്‌സ് നിര്‍മാണവും മുടങ്ങി. മറ്റൊരു സ്ഥലത്ത് ഓഫീസ് പ്രവര്‍ത്തിപ്പിക്കാന്‍ സൗകര്യം ഒരുക്കണമെന്നാണു ജീവനക്കാരുടെ ആവശ്യം.

ഇന്നോവകാറിൽ മരണപ്പാച്ചിലിൽ യുവാക്കളുടെ സംഘം; നാട്ടുകാരുടെ സഹായത്തോടെ പോലീസ് വലയിലാക്കി

അമ്പലപ്പുഴ: അമിത വേഗത്തിൽ യാത്ര ചെയ്ത് നിരവധി വാഹനങ്ങളിൽ തട്ടിയ ഇന്നോവ കാറിൽ സഞ്ചരിച്ച യുവാക്കളുടെ സംഘത്തെ നാട്ടുകാരുടെ സഹായത്തോടെ പോലീസ് പിടികൂടി. കെഎൽ 01 സി എച്ച്-7629 എന്ന രജിസ്റ്റർ നമ്പരിലുള്ള ഇന്നോവ കാറാണ് അമ്പലപ്പുഴ പോലീസ് പിടികൂടിയത്. കാറിലുണ്ടായിരുന്ന കൊല്ലം കരുനാഗപ്പള്ളി സ്വദേശികളായ ആലിൻകടവ് പുന്നമൂട്ടിൽ അഖിൽ (26), ദിലീപ് ഭവനത്തിൽ സഞ്ജയ് (25), പ്രവീൺ നിവാസിൽ പ്രവീൺ (25), ഓച്ചിറ ചങ്ങംകുളങ്ങര ഗൗരി ഭവനിൽ ആദർശ് (23), ഷിയാസ് മൻസിലിൽ നിയാസ് (22), കാട്ടിൽ കടവ് തറയിൽ വീട്ടിൽ സൂരജ് (21) എന്നിവരെയും പോലീസ് കസ്റ്റഡിയിലെടുത്തു. ഞായറാഴ്ച രാത്രി 11.30നായിരുന്നു സംഭവം. സുഹൃത്തുകളായ ഇവർ സഞ്ജയിയെ വിദേശത്തേക്ക് യാത്രയാക്കാൻ കൊച്ചിയിലേക്ക് പോകുകയായിരുന്നു. വലിയഴീക്കൽ പാലം കടന്ന് തീരദേശ റോഡുവഴി എത്തിയ ഇവർ സഞ്ചരിച്ച വാഹനം എതിരേ വന്ന മാരുതിക്കാറിൽ തട്ടി മാരുതിയുടെ ഒരു വശത്തെ കണ്ണാടി തകർന്നു. ഇതിനുള്ള നഷ്ടപരിഹാരം നൽകി യാത്ര തുടർന്നതായി പോലീസ് പറഞ്ഞു. വീണ്ടുമുള്ള യാത്രയ്ക്കിടെ സ്കൂട്ടറിൽ തട്ടിയെങ്കിലും ഇവർ നിർത്താതെ പോയതായി നാട്ടുകാർ പറയുന്നു. ഇതിനിടെ സമീപത്തെ കടയിൽ നിർത്തി കുടിവെള്ളം വാങ്ങുന്നതിനിടെ നാട്ടുകാരുമായി വാക്കേറ്റമുണ്ടായി. നാട്ടുകാരെ അസഭ്യം പറഞ്ഞശേഷം വേഗത്തിൽ വാഹനമോടിച്ചുപോയ ഇവരുടെ പിന്നാലെ പല്ലന സ്വദേശികളായ ഒരു സംഘം നാട്ടുകാർ കാറിലും ഇരുചക്ര വാഹനങ്ങളിലുമായി ഇവരെ പിൻതുടർന്നു. വിവരമറിഞ്ഞ് അമ്പലപ്പുഴയിൽ വാഹനം തടയാൻനിന്ന പോലീസിനെ വെട്ടിച്ച് ഇന്നോവ കാർ മുന്നോട്ടു പാഞ്ഞു. പോലീസ് ജീപ്പിന്‍റെ വശത്തെ കണ്ണാടി, ബംന്പർ എന്നിവ തകർത്ത് അമിത വേഗത്തിൽ മുമ്പോട്ടു പാഞ്ഞ കാർ കാക്കാഴം റയിൽവേ മേൽപ്പാലത്തിന്‍റെ വലത് ഫുട്പാത്തിൽ ഇടിച്ചു കയറി. വലതുവശം പിൻഭാഗത്തെ ടയർ പൊട്ടിത്തെറിച്ചു. പിന്നീട് അഞ്ച് കിലോമീറ്ററോളം മുന്നോട്ട് ഓടിയ കാർ പുന്നപ്ര പോലീസ് സ്റ്റേഷന് സമീപത്തുനിന്ന് കിഴക്കോട്ട് പോയി കളരി ക്ഷേത്രത്തിന് സമീപത്തെ ആളൊഴിഞ്ഞ പറമ്പിലാണ് നിർത്തിയത്. കാറിൽനിന്ന് ഓടി രക്ഷപ്പെടാൻ ശ്രമിച്ച മൂന്നു പേരെ നാട്ടുകാർ പിടികൂടി പുന്നപ്ര സ്റ്റേഷനിലെത്തിച്ചു. മറ്റു മൂന്നുപേരെ പിന്നാലെയെത്തിയ അമ്പലപ്പുഴ പോലീസും പിടികൂടി. അഖിലാണ് കാർ ഓടിച്ചതെന്ന് പോലീസ് പറഞ്ഞു. യുവാക്കൾക്കെതിരേ പൊതുമുതൽ നശിപ്പിച്ചതിനുൾപ്പടെ കേസെടുത്തു. അമ്പലപ്പുഴ കോടതിയിൽ ഹാജരാക്കിയ പ്രതികളെ റിമാൻഡു ചെയ്തു.

ധന്യൻ മാർ ഈവാനിയോസ് ഓർമപ്പെരുന്നാൾ: ജന്മഗൃഹത്തിൽനിന്നു തീർഥാടന പദയാത്ര ആരംഭിച്ചു

മാവേലിക്കര: മലങ്കര കത്തോലിക്കാ സഭയുടെ പ്രഥമ മെത്രാപ്പോലീത്തയും മലങ്കര പുനരൈക്യ പ്രസ്ഥാനത്തിന്‍റെ ശില്പിയുമായ ധന്യൻ ആർച്ച്ബിഷപ് മാർ ഈവാനിയോസ് തിരുമേനിയുടെ 72-ാം ഓർമപ്പെരുന്നാളിന് മുന്നോടിയായി ജന്മ ഗൃഹത്തിൽനിന്നുള്ള തീർഥാടന പദയാത്ര ആരംഭിച്ചു. മാർ ഈവാനിയോസ് തിരുമേനിയുടെ ജന്മഗൃഹമായ മാവേലിക്കര പുതിയകാവ് പണിക്കരുവീട്ടിൽനിന്നു തിരുവനന്തപുരം പട്ടത്തെ കബറിങ്കലിലേക്കുള്ള തീർഥാടന പദയാത്രയാണ് ഇന്നലെ രാവിലെ ആരംഭിച്ചത്. മാർ ഈവാനിയോസ് തിരുമേനിയുടെ മാതൃ ഇടവകയായ പുതിയകാവ് സെന്‍റ് ജോസഫ് മലങ്കര സുറിയാനി കത്തോലിക്കാ ദേവാലയത്തിൽ നടന്ന വിശുദ്ധ കുർബാനയ്ക്ക് മാവേലിക്കര രൂപതാധ്യക്ഷൻ ബിഷപ് ഡോ. മാത്യൂസ് മാർ പോളികാർപ്പോസ് മെത്രാപ്പോലീത്ത മുഖ്യ കാർമികത്വം വഹിച്ചു . തുടർന്ന് എംസിവൈഎം ഭദ്രാസന പ്രസിഡന്‍റ് റോഷൻ വർഗീസിന് മാത്യൂസ് മാർ പോളികാർപ്പോസ് മെത്രാപ്പോലീത്ത വെള്ളിക്കുരിശും എംസിവൈഎം ഭദ്രാസന ജനറൽ സെക്രട്ടറി ജോബിൻ ജി. ജോണിന് ഡോ. ജോഷ്വാ മാർ ഇഗ്നാത്തിയോസ് മെത്രാപ്പോലീത്ത പതാകയും കൈമാറിയതോടെ പദയാത്ര പ്രയാണം ആരംഭിച്ചു. മാവേലിക്കര നഗരസഭാ ചെയർമാൻ നൈനാൻ സി. കുറ്റിശേരി, ഭദ്രാസന വികാരി ജനറൽ ഫാ. ജോബ് കല്ലുവിളയിൽ, യൂഹാനോൻ പുത്തൻവീട്ടിൽ റമ്പാൻ, ഫാ. കാലേബ് ചെറുവള്ളി, ഫാജോൺ പേരുപറമ്പിൽ എന്നിവർ പങ്കെടുത്തു. എംസിവൈഎം മാവേലിക്കര ഭദ്രാസന സമിതിയുടെ നേതൃത്വത്തിലാണ് പദയാത്ര നടത്തുന്നത്. കറ്റാനം , കടമ്പനാട് വഴി കൊല്ലം വൈദിക ജില്ലയുടെ പദയാത്ര സംഘത്തോടൊപ്പം ചേർന്ന്, പുത്തൂർ കുണ്ടറ, കല്ലുവാതുക്കൽ, ആറ്റിങ്ങൽ വഴി ദേശീയ പാതയിലൂടെ വിവിധ ഇടവകകൾ സന്ദർശിച്ച് 14ന് വൈകുന്നേരം ആറിന് പദയാത്ര പട്ടം സെന്‍റ് മേരീസ് കത്തീഡ്രലിൽ എത്തിച്ചേരും.

ദേശീയ പണിമുടക്ക്: ജില്ല നിശ്ചലമായി

ആലപ്പുഴ: കേന്ദ്രസര്‍ക്കാരിന്‍റെ തൊഴിലാളിവിരുദ്ധ-ജനവിരുദ്ധ നയങ്ങള്‍ക്കെതിരേ രാജ്യത്തെ സംയുക്ത തൊഴിലാളി സംഘടനകള്‍ നടത്തുന്ന ദേശീയ പണിമുടക്കില്‍ ജില്ല നിശ്ചലമായി. ബിഎംഎസ് ഒഴികെയുള്ള രാജ്യത്തെ 10 തൊഴിലാളി സംഘടനകള്‍ ചേര്‍ന്നാണ് ദേശീയ പണിമുടക്ക് പ്രഖ്യാപിച്ചത്. തൊഴിലാളികളുടെ അവകാശങ്ങളെ ഹനിക്കുന്ന പുതിയ തൊഴില്‍ച്ചട്ടങ്ങള്‍ റദ്ദാക്കണമെന്നാണ് തൊഴിലാളികളുടെ പ്രധാന ആവശ്യം. തൊഴില്‍സാമൂഹ്യസുരക്ഷയും മെച്ചപ്പെട്ട വേതനവും ആനുകൂല്യങ്ങളും ഉറപ്പാക്കണമെന്ന ആവശ്യങ്ങള്‍ കേന്ദ്രസര്‍ക്കാര്‍ അവഗഗണിച്ചതിനെ തുടര്‍ന്നാണ് തൊഴിലാളി സംഘടനകളുടെ സംയുക്ത സമരസമിതി പണിമുടക്കിലേക്ക് നീങ്ങിയത്. സിഐടിയു, ഐഎന്‍ടിയുസി, എഐടിയുസി, എച്ച്എംഎസ്, എസ്ഇഡബ്ല്യുഎ, എല്‍പിഎഫ്, യുടിയുസി എന്നിവ അടക്കമുള്ള തൊഴിലാളി സംഘടനകളുടെ സംയുക്ത സമരസമിതിയാണ് ദേശീയ പണിമുടക്ക് പ്രഖ്യാപിച്ചിരിക്കുന്നത്. സംയുക്ത കിസാന്‍ മോര്‍ച്ച, റൂറല്‍ വര്‍ക്കര്‍ യൂണിയന്‍, റെയില്‍വേ, എന്‍എംഡിസി ലിമിറ്റഡ്, സ്റ്റീല്‍ വ്യവസായം തുടങ്ങിയ പൊതുമേഖലയിലെ തൊഴിലാളികള്‍ തുടങ്ങിയവര്‍ പണിമുടക്കിന് പിന്തുണ പ്രഖ്യാപിച്ചിട്ടുണ്ട്. പാര്‍ലമെന്‍റ് പാസാക്കിയ നാല് പുതിയ തൊഴില്‍ നിയമങ്ങളോടുള്ള തൊഴിലാളി സംഘടനകളുടെ എതിര്‍പ്പ് ഉന്നയിച്ചാണ് ദേശീയ പണിമുടക്ക് പ്രഖ്യാപിച്ചിരിക്കുന്നത്. തൊഴിലാളി സംഘടനകളെ ഇല്ലാതാക്കുകയും, ജോലി സമയം വര്‍ധിപ്പിക്കുകയും തൊഴില്‍ നിയമങ്ങള്‍ ലംഘിക്കുന്ന തൊഴിലുടമകളെ പിഴകളില്‍നിന്ന് സംരക്ഷിക്കുകയും തൊഴിലാളികളുടെ അവകാശങ്ങളെ ദുര്‍ബലപ്പെടുത്തുകയും ചെയ്യുന്നതാണ് നാല് പുതിയ തൊഴില്‍ നിയമങ്ങളെന്നാണ് ട്രേഡ് യൂണിയനുകള്‍ ചൂണ്ടിക്കാണിക്കുന്നത്. ഇതിന് പുറമേ പൊതുമേഖലാ സ്ഥാപനങ്ങളുടെ സ്വകാര്യവത്കരണം, ജോലികള്‍ക്ക് പുറംകരാര്‍ കൊടുക്കുന്നത്, കരാര്‍ തൊഴിലാളികളെ നിയമിക്കുന്നത് അടക്കമുള്ള വിഷയങ്ങളും പണിമുടക്കുന്ന തൊഴിലാളി സംഘടനകള്‍ ചൂണ്ടിക്കാണിക്കുന്നുണ്ട്. ഈ നീക്കം തൊഴില്‍ സുരക്ഷയ്ക്കും ന്യായമായ വേതനത്തിനും ഭീഷണിയാണെന്നാണ് തൊഴിലാളി സംഘടനകള്‍ പറയുന്നത്. ലോക്ക് ഡൗണിനു സമാനം ആലപ്പുഴ ജില്ലയില്‍ പണിമുടക്ക് പൂര്‍ണമായിരുന്നു. വിരലിലെണ്ണാവുന്ന സര്‍വീസുകള്‍ മാത്രമാണ് കെഎസ്ആര്‍ടിസി നടത്തിയത്. ആലപ്പുഴ കെഎസ്ആര്‍ടിസി ബസ് സ്റ്റാന്‍ഡ് ആളൊഴിഞ്ഞ നിലയിലായിരുന്നു. ഗതാഗതം, ഇന്‍ഷ്വറന്‍സ്, റെയില്‍വേ, തപാല്‍, ബാങ്കിംഗ്, വൈദ്യുതി, ഉരുക്ക്, ടെലികോം മേഖലകളിലെ തൊഴിലാളികള്‍,വിവിധ സര്‍ക്കാര്‍ ജീവനക്കാര്‍, ആശാ വര്‍ക്കര്‍മാര്‍, അങ്കണവാടി ജീവനക്കാര്‍, സ്കൂൾ ഉച്ചഭക്ഷണ പാചക തൊഴിലാളികള്‍, ചെറുകിട കച്ചവടക്കാര്‍, ഓട്ടോടാക്സി ഡ്രൈവര്‍മാര്‍, ബീഡി തൊഴിലാളികള്‍ എന്നിവരും പണിമുടക്കില്‍ അണിചേര്‍ന്നതോടെ ജില്ല കോവിഡ് കാലത്തെ ലോക്ക് ഡൗണിനു സമാനമായിരുന്നു. ആശുപത്രി, മെഡിക്കല്‍ സ്റ്റോര്‍, ആംബുലന്‍സ്, മാധ്യമസ്ഥാപനം, പാല്‍ വിതരണം അടക്കമുള്ള അവശ്യസര്‍വീസുകളെ ദേശീയ പണിമുടക്കില്‍നിന്ന് ഒഴിവാക്കിയിരുന്നു. കൂടാതെ ആശുപത്രി, റെയില്‍വേ സ്റ്റേഷന്‍, വിമാനത്താവളം എന്നിവിടങ്ങളിലേക്കുളള ഗതാഗതത്തെയും മുന്‍കൂട്ടി നിശ്ചയിച്ച വിവാഹം, ടൂറിസം എന്നിവയെയും പണിമുടക്കില്‍നിന്ന് ഒഴിവാക്കിയിരുന്നെങ്കിലും ബഹുഭൂരിപക്ഷം പരിപാടികളും ചടങ്ങുകളും മാറ്റി വയ്ക്കുകയോ റദ്ദാക്കുകയോ ചെയ്തു.

പണിമുടക്കിൽ തീരദേശ മേഖല പൂർണമായും സ്തംഭിച്ചു

അമ്പലപ്പുഴ: കേന്ദ്ര സർക്കാരിന്‍റെ തൊഴിലാളിവിരുദ്ധ നയങ്ങൾക്കെതിരെ പ്രതിപക്ഷ ട്രേഡ് യൂണിയനുകളുടെ നേതൃത്വത്തിൽ 24 മണിക്കൂർ ബന്ദിൽ തീരദേശ മേഖല പൂർണ്ണമായും സ്തംഭിച്ചു. ചാകര പ്രദേശമായ തോട്ടപ്പള്ളി ഹാർബറിൽ നിന്ന് ഭൂരിഭാഗം വള്ളങ്ങളും കടലിലിറക്കിയില്ല. ഏതാനും ചില വള്ളങ്ങൾ പോയെങ്കിലും മൽസ്യ മൊന്നും ലഭിക്കാതെ രാവിലെ തന്നെ കരയണഞ്ഞു . പുറക്കാട്, പുന്തല, വളഞ്ഞവഴി, പുന്നപ്ര , പറവൂർ, വാടക്കൽ തീരങ്ങളിലെ നൂറുകണക്കിനു പൊന്തുകളും കരയിൽ തന്നെ സ്ഥാനം പിടിച്ചു. ഇതോടെ മൽസ്യ ലേലം നടക്കുന്ന തോട്ടപ്പള്ളി ഹാർബറും, പുന്നാപ്ര ഫിഷ് ലാൻ്റ് സെൻ്ററും ശൂന്യമായി മൽസ്യ വാഹനങ്ങളും നിലത്തിറങ്ങിയില്ല. ഐ സ്ഫാക്റ്ററികളും പ്രവർത്തിച്ചില്ല. തൃക്കുന്നപ്പുഴക്കും പുന്നപ്രക്കുമിടയിൽ നിരവധി ചെമ്മീൻ പീലിംഗ് സംസ്ക്കരണശാലകൾ ഉണ്ടെങ്കിലും അടഞ്ഞുകിടന്നു ആയിരക്കണക്കിനു സ്ത്രീ തൊഴിലാളികളാണ് ഇവിടം കൊണ്ട് ഉപജീവനം നടത്തുന്നത്. ദേശിയ പാതയോരത്തെ മീൻ തട്ടുകളും പ്രവർത്തിച്ചില്ല. മൽസ്യബന്ധനം നിലച്ചതോടെ ഹാർബറുകളിലെ ചെറുകിട ചായക്കടകൾമുതൽ വെള്ളക്കടകൾവരെ അടഞ്ഞുകിടന്നു. ചിലയിടങ്ങളിൽ തുറന്ന കടകൾ പകൽ 11 ഓടെ സമരാനുകൂലികൾ അടപ്പിച്ചു.

ദേശീയ പണിമുടക്ക്: ചേര്‍ത്തലയില്‍ തൊഴിലാളി സംഘടനകള്‍ പ്രകടനവും സമ്മേളനവും നടത്തി

ചേര്‍ത്തല: ദേശീയപണമുടക്കിന്‍റെ ഭാഗമായി ചേര്‍ത്തലയില്‍ തൊഴിലാളി സംഘനടകള്‍ പ്രകടനവും സമ്മേളനവും നടത്തി. സംയുക്ത ട്രേഡ് യൂണിയന്‍ ചേര്‍ത്തല മേഖലാ സമിതി പ്രകടനത്തിനു ശേഷം ചേര്‍ത്തല ബിഎസ്എന്‍എല്‍ ഓഫീസിനു മുന്നില്‍ നടത്തിയ സമ്മേളനം എഐടിയുസി സംസ്ഥാന പ്രസിഡന്‍റ് ടി.ജെ. ആഞ്ചലോസ് ഉദ്ഘാടനം ചെയ്തു. ടിയുസിഐ ജില്ലാ സെക്രട്ടറി കെ.വി. ഉദയഭാനു അധ്യക്ഷനായി. നേതാക്കളായ കെ. പ്രസാദ്, എന്‍.എസ്. ശിവപ്രസാദ്, പി.എസ്. ഷാജി, പി. ഷാജിമോഹന്‍ തുടങ്ങിയവര്‍ സംസാരിച്ചു പ്രകടനത്തിന് നേതാക്കളായ എ.പി. പ്രകാശന്‍, കെ.പി. പ്രതാപന്‍, വര്‍ക്കി പുന്നക്കല്‍, കെ. ഉമയാക്ഷന്‍, എ.എസ്. സാബു, ഷേര്‍ളി ഭാര്‍ഗവന്‍, കെ.വി. ചന്ദ്രബാബു, ടി.എസ്. അജയകുമാര്‍, പി.ഐ. ഹാരിസ്, ടി.എം. ഷെരീഫ്, കെ.വി. സന്തോഷ് തുടങ്ങിയവര്‍ നേതൃത്വം നല്‍കി. യുഡിടിഎഫ് നേതൃത്വത്തില്‍ യുഡിടിഎഫ് നേതൃത്വത്തില്‍ പ്രകടനവും സമ്മേളനവും കെപിസിസി ജനറല്‍ സെക്രട്ടറി എഎ. ഷുക്കൂര്‍ ഉദ്ഘാടനം ചെയ്തു. ഐഎന്‍ടിയുസി മേഖലാ പ്രസിഡന്‍റ് ജി.സുരേഷ്ബാബു അധ്യക്ഷനായി. കെപിസിസി സെക്രട്ടറി എസ്. ശരത് മുഖ്യപ്രഭാഷണം നടത്തി. നേതാക്കളായ സിറിയക്ക് കാവില്‍, വിഎസ്. ജബ്ബാര്‍, പി. ജയകുമാര്‍, കെ.വി. സോളമന്‍, സുബ്രഹ്‌മണ്യദാസ്, സി.ഡി. ശങ്കര്‍, ജി. സോമകുമാര്‍, പി.ആര്‍. രാജീവ്, കെ.സി. ആന്‍റണി, ടി.എസ്. രഘുവരന്‍, സജികുര്യാക്കോസ്, എന്‍. ശ്രീകുമാര്‍, കല്ലാപുറം സാബു തുടങ്ങിയവര്‍ സംസാരിച്ചു. സമാപന സമ്മേളനം കെപിസിസി നിര്‍വാഹക സമിതി മുന്‍ അംഗം കെ.ആര്‍. രാജേന്ദ്ര പ്രസാദ് ഉദ്ഘാടനം ചെയ്തു. ജി. വിശ്വംഭരന്‍ നായര്‍ അധ്യക്ഷനായി.

പൊതുപണിമുടക്ക്: എടത്വയില്‍ ഹര്‍ത്താല്‍ പ്രതീതി

എടത്വ: കേന്ദ്ര സര്‍ക്കാരിന്‍റെ തൊഴിലാളി കര്‍ഷകദ്രോഹ നയങ്ങളില്‍ പ്രതിഷേധിച്ച് സംയുക്ത തൊഴിലാളി സംഘടനകള്‍ ആഹ്വാനം ചെയ്ത പൊതുപണിമുടക്ക് എടത്വയില്‍ ഹര്‍ത്താല്‍ പ്രതീതിയുണ്ടാക്കി. കെഎസ്ആര്‍ടിസി ബസ് സര്‍വീസ് നിലച്ചു. കടകമ്പോളങ്ങള്‍ അടഞ്ഞുകിടന്നു. വിദ്യാഭ്യാസ സ്ഥാപനങ്ങള്‍ പ്രവര്‍ത്തിച്ചില്ല. സര്‍ക്കര്‍- പൊതുമേഖലാ സ്ഥാപനങ്ങള്‍, ബാങ്കുകള്‍ എന്നിവയും തുറന്നില്ല. നിര്‍മാണ മേഖലയിലെ തൊഴില്‍ശാലകളും പ്രവര്‍ത്തിച്ചില്ല. കെഎസ്ആര്‍ടിസി എടത്വ ഡിപ്പോയില്‍നിന്ന് രാവിലെ രണ്ട് ട്രിപ്പുകള്‍ നടത്തിയെങ്കിലും പിന്നീട് സര്‍വീസുകള്‍ മുടങ്ങുന്ന കാഴ്ചയാണുണ്ടായത്. പ്രതിദിനം 22 ഷെഡ്യൂള്‍ഡുകളാണ് എടത്വ ഡിപ്പോയല്‍നിന്ന് നടന്നിരുന്നത്. പണിമുടക്ക് ചമ്പക്കുളം മൂലം വള്ളംകളിയെ ബാധിച്ചരുന്നു. അപ്പര്‍ കുട്ടനാട്ടില്‍നിന്നുള്ള വള്ളംകളി പ്രേമികള്‍ സര്‍വീസ് ഇല്ലാത്തതിനാല്‍ ഏറെ വലഞ്ഞു. സ്വകാര്യ വാഹനത്തിലും വള്ളത്തിലുമാണ് ചമ്പക്കുളം വള്ളംകളി കാണാന്‍ കാണികള്‍ എത്തിയത്. ഓട്ടോ, ടാക്‌സി, ലോറി ഡ്രൈവര്‍മാരും പണിമുടക്കില്‍ പങ്കെടുത്തു. എടത്വയിലും പരിസര പഞ്ചായത്തുകളിലും കടകമ്പോളങ്ങള്‍ പൂര്‍ണമായി അടഞ്ഞുകിടന്നു. ഏതാനും മെഡിക്കല്‍ സ്റ്റോര്‍ മാത്രമാണ് തുറന്ന് പ്രവര്‍ത്തിച്ചത്. സര്‍ക്കാര്‍-എയ്ഡഡ് സ്‌കൂളുകള്‍ക്ക് അവധി നല്‍കിയില്ലെങ്കിലും പഠനം നടന്നില്ല. ചില സ്‌കൂളുകളില്‍ ഏതാനും അധ്യാപകര്‍ എത്തിയെങ്കിലും ഒറ്റപ്പെട്ട വിദ്യാര്‍ഥികള്‍ മാത്രമാണ് എത്തിയത്. സ്വകാര്യ മാനേജ്‌മെന്‍റ് സ്‌കൂളിന് ചൊവ്വാഴ്ചതന്നെ അവധി നല്‍കിയിരുന്നു. പൊതുനിരത്തുകളില്‍ സ്വകാര്യ വാഹനങ്ങൾ കുറഞ്ഞതിനാല്‍ പൊതുജനങ്ങളും പുറത്തിറങ്ങാന്‍ മടിച്ചു. പൊതുപണിമുടക്കിന് ആഹ്വാനം ചെയ്‌തെങ്കിലും ഹര്‍ത്താലിന്‍റെ പ്രതീതിയാണ് എങ്ങും പ്രകടമായത്.

മൂലം വള്ളംകളി: ചെറുതന രാജപ്രമുഖൻ

മങ്കൊമ്പ്: ചമ്പക്കുളത്താറ്റിൽ ഇന്നലെ നടന്ന മൂലം ജലോത്സവത്തിൽ ന്യൂ ചെറുതന ബോട്ട് ക്ലബ്ബിന്‍റെ ചെറുതന പുത്തൻചുണ്ടൻ ജേതാവ്. വാശിയേറിയ ഫൈനൽ പോരാട്ടത്തിൽ ചമ്പക്കുളം ബോട്ട് ക്ലബ്ബിന്‍റെ ചമ്പക്കുളം ചുണ്ടനെ രണ്ടാം സ്ഥാനത്തേക്കു പിൻതള്ളിയാണ് ചെറുതന രാജപ്രമുഖൻ ട്രോഫി നേടിയത്. ഫൈനലിൽ അനായാസ വിജയമാണ് ചെറുതന ബോട്ട് ക്ലബ് തുഴഞ്ഞുനേടിയത്. എന്നാൽ ലൂസേഴ്‌സ് ഫൈനലിലാണ് ഇഞ്ചോടിഞ്ച് പോരാട്ടം നടന്നത്. നിരണം ബോട്ട് ക്ലബ്ബിന്‍റെ ആയാപറമ്പ് വലിയ ദിവാൻജിയാണ് മൂന്നാം സ്ഥാനം നേടിയത്. ചുണ്ടൻ വള്ളങ്ങളുടെ ലൂസേഴ്സ് ഫൈനലിലാണ് കാണികളെ ഏറ്റവുമധികം ആവേശഭരിതാരാക്കിയത്. കാണികളും തുഴക്കാരും ഒരേപോലെ ആകാംക്ഷയിലായ മത്സരത്തിൽ കൈനകരി യുബിസിയുടെ ആയാപറമ്പ് പാണ്ടി ഒന്നാം സ്ഥാനം നേടി. ആദ്യപാദ മൽസരങ്ങളിൽ രണ്ടാം സ്ഥാനത്തേക്ക് പിൻതള്ളപ്പെട്ടെങ്കിലും നടുഭാഗം ബോട്ട് ക്ലബ്ബിന്‍റെ നടുഭാഗം ചുണ്ടനും, യുബിസി കൈനകരിയുടെ നടുഭാഗവും ഇഞ്ചോടിഞ്ചു മത്സരമാണ് കാഴ്ചവച്ചത്. ആയാപറമ്പ് പാണ്ടി ഒന്നാമതും, നടുഭാഗം രണ്ടാമതായും ഫിനിഷ് ചെയ്തു. ചുണ്ടൻ വള്ളങ്ങളുടെ രണ്ടാം ഹീറ്റ്സ് മത്സരഫലം അസാധുവായതും കാണികളെ ആശങ്കയിലാക്കി. ആയാപറമ്പ് പാണ്ടിയും ചമ്പക്കുളം ചുണ്ടനും മത്സരത്തിനിടെ രണ്ടുതവണ ഒട്ടിച്ചേർന്നത് മൽസരത്തിന്‍റെ നിറംകെടുത്തി. തുടർന്ന് ജൂറി ഓഫ് അപ്പീൽ മത്സരം ഉപേക്ഷിക്കുകയും, വീണ്ടും നടത്താൻ തീരുമാനിക്കുകയും ചെയ്തു. എന്നാൽ ആയാപറമ്പ് പാണ്ടി ചുണ്ടൻ പിന്മാറിയതോടെ ഹീറ്റ്സിൽ ഒന്നാമതെത്തിയ ചമ്പക്കുളം ചുണ്ടൻ ഫൈനലിലേക്ക് യോഗ്യത നേടുകയായിരുന്നു. വെപ്പ് എ ഗ്രേഡ് വിഭാഗത്തിൽ കുമരകം ടൗൺ ബോട്ട് ക്ലബ്ബിന്‍റെ അമ്പലക്കടവൻ ഒന്നാം സ്ഥാനവും നടുവിലേപറമ്പിൽ കൾച്ചറൽ ഡെവലപ്മെന്‍റ് സെന്‍റർ ആൻഡ് സൊസൈറ്റിയുടെ നവജ്യോതി രണ്ടാം സ്ഥാനവും കാരിച്ചാൽ ചുണ്ടൻ ബോട്ട് ക്ലബ്ബിന്‍റെ മണലി മൂന്നാം സ്ഥാനവും കരസ്ഥമാക്കി. വെപ്പ് ബി ഗ്രേഡ് വിഭാഗത്തിൽ കൊണ്ടാക്കൽ ബ്ലോട്ട് ക്ലബ്ബിന്‍റെ പിജി കരിപ്പുഴ ജേതാക്കളായപ്പോൾ കൊടുപ്പുന്ന ബോട്ട് ക്ലബ്ബിന്‍റെ ചിറമേൽ തോട്ടുകടവൻ രണ്ടാം സ്ഥാനം നേടി. വൈശ്യംഭാഗം ബോട്ട് ക്ലബ്ബിന്‍റെ പുന്നത്രപുരയ്ക്കൽ മൂന്നാം സ്ഥാനത്തെത്തി. കൊടിക്കുന്നിൽ സുരേഷ് എംപി, തോമസ് കെ. തോമസ് എംഎൽഎ എന്നിവർ ചേർന്ന് സമ്മാനങ്ങൾ വിതരണം ചെയ്തു. പൊതുപണിമുടക്ക് വള്ളംകളിയെ ഒട്ടും ബാധിച്ചില്ല. ആയിരങ്ങളാണ് അവധി മുതലാക്കി മത്സരം കാണാനെത്തിയത്.

പാൽപ്പായസവുമായി അമ്പലപ്പുഴ സംഘം ചമ്പക്കുളം വള്ളംകളിക്കെത്തി

ആലപ്പുഴ: ഐതിഹ്യപ്പെരുമയുണർത്തി മധുരമൂറുന്ന അമ്പലപ്പുഴ പാൽപ്പായസവുമായി അമ്പലപ്പുഴ സംഘം ചമ്പക്കുളം വളളംകളിക്കെത്തി. ചരിത്രപ്രസിദ്ധമായ ചമ്പക്കുളം മൂലം ജലോത്സവം ഇന്നലെയാണ് ചമ്പക്കുളത്ത് പമ്പയാറ്റിൽ നടന്നത്. സംസ്ഥാനത്തെ ഏറ്റവും പാരമ്പര്യമേറിയ വള്ളംകളിയാണ് ചമ്പക്കുളത്താറ്റിലെ മൂലംവള്ളംകളി. ചങ്ങനാശേരി കുറിച്ചി കരിങ്കുളം ശ്രീപാർത്ഥസാരഥി ക്ഷേത്രത്തിൽനിന്ന് അമ്പലപ്പുഴ ശ്രീകൃഷ്ണ സ്വാമി ക്ഷേത്രത്തിലേക്കുള്ള പ്രതിഷ്ഠാ വിഗ്രഹം വഹിച്ചുകൊണ്ടുള്ള ഘോഷയാത്ര ചമ്പക്കുളത്ത് എത്തി. മഠത്തിൽ ക്ഷേത്രത്തിൽ പൂജകൾക്കു ശേഷം മാപ്പിളശേരി തറവാട്ടിൽ വിഗ്രഹം ഇറക്കിവച്ച് അവിടെനിന്ന് കളിവള്ളങ്ങളുടെ അകമ്പടിയോടും നാനാജാതി മതസ്ഥരുടെ സഹകരണത്തോടെയും ചെമ്പകശേരി രാജാവ് അമ്പലപ്പുഴയ്ക്ക് കൊണ്ടുപോയതിന്‍റെ ചരിത്രസ്മരണ നിലനിർത്തുവാൻവേണ്ടി ആരംഭിച്ച അമ്പലപ്പുഴ മൂലക്കാഴ്ചയുടെ തുടർച്ചയാണ് ചമ്പക്കുളം മൂലം വള്ളംകളി. ആണ്ടുതോറും മിഥുനമാസത്തിലെ മൂലം നക്ഷത്രത്തിൽ ആഘോഷിക്കുന്ന ഈ വള്ളംകളി കേരളത്തിലെ ജലോത്സവങ്ങളുടെ തുടക്കം കൂടിയാണ്. അമ്പലപ്പുഴ ക്ഷേത്രത്തിൽനിന്ന് നിവേദിച്ച പാൽപ്പായസം ചമ്പക്കുളം മഠം മഹാലക്ഷ്മി ക്ഷേത്രത്തിൽ എത്തിച്ചശേഷമാണ് വള്ളംകളി നടന്നത്. വള്ള സദ്യക്ക് ശേഷം വാദ്യമേളങ്ങളുടെ അകമ്പടിയോടെയാണ് അമ്പലപ്പുഴ ക്ഷേത്രത്തിൽനിന്ന് പാൽപ്പായസവുമായി സംഘം പുറപ്പെട്ടത്. കൃഷ്ണ സന്നിധിയിൽ നടന്ന ആവേശകരമായ വഞ്ചിപ്പാട്ടിന് ശേഷമാണ് സംഘം യാത്രയായത്. ദേവസ്വം അസിസ്റ്റന്‍റ് കമ്മീഷണർ കെ. വിമൽ കുമാർ, അഡ്മിനിസ്ട്രേറ്റീവ് ഓഫീസർ എൻ. അജിത് കുമാർ, ക്ഷേത്രം കോയ്മ സ്ഥാനി വി.ജെ. ശ്രീകുമാർ, നാരായണ ഭട്ടതിരിപ്പാട് തുടങ്ങിയവർ നേതൃത്വം നൽകി.

എംഡിഎംഎയുമായി യുവാവ് പിടിയില്‍

മാവേലിക്കര: എംഡിഎംഎയും കഞ്ചാവുമായി യുവാവ് എക്‌സൈസിന്‍റെ പിടിയിൽ. മാവേലിക്കര എക്‌സൈസ് സര്‍ക്കിള്‍ ഇന്‍സ്പെക്ടര്‍ പി.എ. സഹദുള്ളയുടെ നേതൃത്വത്തില്‍ നടന്ന പരിശോധനയിലാണ് പാലമേല്‍ എരുമക്കുഴി വിഷ്ണു ഭവനത്തില്‍ വിനീത് (24) പിടിയിലായത്. എക്‌സൈസ് ഷാഡോ സംഘത്തിന്‍റെ നിരീക്ഷണത്തിലായിരുന്ന ഇയാള്‍ പാറ ജംഗ്ഷന്‍ ഇടപ്പോണ്‍ റോഡില്‍ ചെമ്പകശേരി മുക്കില്‍കഴിഞ്ഞദിവസം രാത്രി 11.55 ഓടെയാണ് പിടിയിലായത്. ഇയാളില്‍ നിന്ന് 1.12 ഗ്രാം എംഡിഎംഎയും 6.979 ഗ്രാം കഞ്ചാവുമാണ് പിടിച്ചെടുത്തത്. അസി. എക്‌സൈസ്ഇന്‍സ്‌പെക്ടര്‍ ഗോപകുമാര്‍, പ്രിവന്‍റീവ് ഓഫീസര്‍മാരായ അനു, പ്രവീണ്‍, സിവില്‍ എക്‌സൈസ് ഓഫീസര്‍, താജുദ്ദീന്‍, സിവില്‍ എക്‌സൈസ് ഓഫീസര്‍ ഡ്രൈവര്‍ പ്രദീപ് എന്നിവരടങ്ങിയ സംഘമാണ് പരിശോധനയ്ക്കു നേതൃത്വം നല്‍കിയത്.

ധന്യൻ മാർ ഈവാനിയോസ് ഓർമപ്പെരുന്നാൾ: തീർഥാടന പദയാത്രയ്ക്ക് ഇന്നു തുടക്കം

മാവേലിക്കര: മലങ്കര കത്തോലിക്കാ സഭയുടെ പ്രഥമ മെത്രാപ്പോലീത്തയും മലങ്കര പുനരൈക്യ പ്രസ്ഥാനത്തിന്‍റെ ശില്പിയുമായ ധന്യൻ ആർച്ച്ബിഷപ് മാർ ഈവാനിയോസ് തിരുമേനിയുടെ 72-ാം ഓർമപ്പെരുന്നാളിന് മുന്നോടിയായി തിരുവനന്തപുരം പട്ടത്തെ കബറിങ്കലിലേക്കുള്ള തീർഥാടന പദയാത്ര ഇന്ന് പുറപ്പെടും. ഈവാനിയോസ് തിരുമേനിയുടെ ജന്മഗൃഹമായ മാവേലിക്കര പുതിയകാവ് പണിക്കരുവീട്ടിൽനിന്ന് ഇന്നു രാവിലെ 9ന് നടക്കുന്ന ധൂപപ്രാർഥനയ്ക്കും ദിവ്യബലിക്കും ശേഷം വള്ളിക്കുരിശ് കൈമാറി മാവേലിക്കര രൂപതാധ്യക്ഷൻ ബിഷപ് ഡോ. മാത്യൂസ് മാർ പോളികാർപ്പോസ് ഉദ്‌ഘാടനം ചെയ്യും. എംസിവൈഎം മാവേലിക്കര ഭദ്രാസനസമിതിയുടെ നേതൃത്വത്തിലാണ് പദയാത്ര നടത്തുന്നത്. കറ്റാനം, കടമ്പനാട് വഴി കൊല്ലം വൈദിക ജില്ലയുടെ പദയാത്ര സംഘത്തോടൊപ്പം ചേർന്ന് പുത്തൂർ കുണ്ടറ, കല്ലുവാതുക്കൽ, ആറ്റിങ്ങൽ വഴി ദേശീയപാതയിലൂടെ വിവിധ ഇടവകകൾ സന്ദർശിച്ച് 14ന് വൈകുന്നേരം ആറിന് പദയാത്ര പട്ടം സെന്‍റ് മേരീസ് കത്തീഡ്രലിൽ എത്തിച്ചേരും.

ഹൈവേ വികസനം: ജനങ്ങളുടെ പ്രതിസന്ധി പരിഹരിക്കണം

ഹരിപ്പാട്: അശാസ്ത്രീയമായ ഹൈവേ നിർമാണത്തെ ത്തുടർന്ന് ജനങ്ങൾ വലിയരീതിയിൽ പ്രതിസന്ധി നേരിടുകയാണെന്ന് രമേശ് ചെന്നിത്തല എംഎൽഎ പറഞ്ഞു. ക്യാമ്പ് ഓഫീസിൽ മാധ്യമപ്രവർത്തകരോട് സംസാരിക്കുകയായിരുന്നു അദ്ദേഹം. കുമാരപുരം പഞ്ചായത്തിലെ പ്രധാനപ്പെട്ട ജംഗ്ഷനായ നാരകത്തറ പൂർണമായും ബ്ലോക്ക് ചെയ്യുന്ന രീതീയിലാണ് നിലവിലുള്ള നിർമാണ പ്രവർത്തനം നടക്കുന്നത്. ഇത് പഞ്ചായത്തിലെ ജനങ്ങളെ നേരിട്ട് ബാധിക്കും. ഈ വിഷയം ചർച്ച ചെയ്യുന്നതിനായി ദേശീയപാതാ അഥോറിട്ടി ഉദ്യോഗസ്ഥരുടെ മീറ്റിംഗ് 11ന്്‌ തിരുവനന്തപുരത്ത് വിളിച്ചുചേർത്തിട്ടുണ്ട്. കേന്ദ്ര ഹൈവേ മന്ത്രി നിതിൻ ഗഡ്‌ഗരിയെ നേരിട്ടു കണ്ട് നിവേദനം കൈമാറുമെന്നും അദ്ദേഹം പറഞ്ഞു.

ശുദ്ധജലം വിതരണം ചെയ്യണമെന്നാവശ്യപ്പെട്ട് പ്രമേയം

ചേര്‍ത്തല: ജനങ്ങള്‍ക്ക് ശുദ്ധജലം വിതരണം ചെയ്യണമെന്നാവശ്യപ്പെട്ട് പള്ളിപ്പുറം സെന്‍റ് മേരീസ് ഫൊറോന പള്ളി കേന്ദ്രകമ്മിറ്റി പ്രമേയം പാസാക്കി. പഞ്ചായത്തിലെ വാട്ടർ അഥോറിറ്റിയുടെ ശുദ്ധജല ടാങ്കിൽ ചിലര്‍ ഇറങ്ങി കുളിച്ചിരുന്നു. ശുദ്ധജല വിതരണ സംവിധാനം കുറ്റമറ്റരീതിയിൽ ആക്കുന്നതിനും ജനങ്ങളുടെ ആശങ്കകള്‍ പരിഹരിക്കുന്നതിനും ആവശ്യമായ സുരക്ഷാ സംവിധാനങ്ങൾ ഏർപ്പെടുത്തി പൊതുസമൂഹത്തിന് ആപൽശങ്കയില്ലാതെ ജലവിനിയോഗത്തിനുള്ള സാഹചര്യം സൃഷ്ടിക്കണമെന്നാവശ്യപ്പെട്ടുകൊണ്ട് ജലവിഭവവകുപ്പ് മന്ത്രി റോഷി അഗസ്റ്റിന് നൽകുന്നതിനുവേണ്ടി പള്ളിപ്പുറം സെന്റ് മേരീസ് പള്ളി വികാരി റവ.ഡോ. പീറ്റർ കണ്ണമ്പുഴ ചെയർമാനും, റോണി ചെറിയാൻ കോയിപ്പറമ്പിൽ വൈസ് ചെയർമാനും ആയിട്ടുള്ള പള്ളിപ്പുറം സെന്‍റ് മേരീസ് ഫൊറോന പള്ളി കേന്ദ്രകമ്മിറ്റിയിൽ ജനറൽ സെക്രട്ടറി അനൂപ് ആന്‍റണി ഉപ്പുപുറം അവതരിപ്പിച്ച പ്രമേയം പാസാക്കി.

വളയം പിടിക്കുന്ന മാലാഖമാര്‍ക്ക് എ.ബി. വിലാസം എന്‍എസ്എസ് യൂണിറ്റിന്‍റെ ആദരം

ആലപ്പുഴ: പലപ്പോഴും ഡോക്ടര്‍ ആയും നഴ്‌സ് ആയും ജോലി നോക്കേണ്ടിവരുന്ന ആംബുലന്‍സ് ഡ്രൈവര്‍മാരെ ഓര്‍മിക്കുന്ന ദിനമാണ് ജൂലൈ എട്ട്. ജീവിതത്തിനും മരണത്തിനും ഇടയിലുള്ള നൂല്‍പ്പാലത്തെ ഒരു വളയം കൊണ്ട് ചേര്‍ത്തുനിര്‍ത്തുവാന്‍ പണിപ്പെടുന്ന ഒരു കൂട്ടം മനുഷ്യരെ ഓര്‍മിക്കുന്ന ദിനം. ആധുനിക ആംബുലന്‍സ് സേവനങ്ങളുടെ പിതാവ് എന്നറിയപ്പെടുന്ന ഡൊമിനിക് ജീന്‍ ലാറിയുടെ ജന്മദിനമാണ് ജൂലൈ എട്ട്. നെപ്പോളിയന്‍ ചക്രവര്‍ത്തിയുടെ ആര്‍മിയിലെ പ്രധാന സര്‍ജനായി മാറിയ ഫ്രഞ്ച് സൈനിക ഡോക്ടറായിരുന്നു അദ്ദേഹം. യുദ്ധമുഖത്ത് മുറിവേറ്റവരെ കൊണ്ടുപോകാനായി ഫളയിംഗ് ആംബുലന്‍സ് എന്ന ആശയവും കൊണ്ടുവന്നത് അദ്ദേഹമായിരുന്നു. ആംബുലന്‍സ് ഡ്രൈവര്‍മാരായ മുഹമ്മദ് അസ്‌ലം, മുഹമ്മദ് സാലിഹ് എന്നിവരെയാണ് എ.ബി വിലാസം ഹയര്‍ സെക്കന്‍ഡറി സ്‌കൂളിലെ എന്‍എസ്എസ് യൂണിറ്റ് ആദരിച്ചത്. പ്രിന്‍സിപ്പല്‍ ബിജോ കെ. കുഞ്ചെറിയ പൊന്നാട അണിയിച്ചു. സീനിയര്‍ അസിസ്റ്റന്‍റ് എസ്. പ്രവീണ്‍, അധ്യാപകരായ അന്നാ ചെറിയാന്‍, എം. വി. സാബുമോന്‍, നാഷണല്‍ സര്‍വീസ് സ്‌കീം വോളണ്ടിയേഴ്‌സ് ആയ എസ്. അനശ്വര, എം.ആര്‍. അമല്‍ തുടങ്ങിയവര്‍ ആശംസകള്‍ അര്‍പ്പിച്ചു. ഇന്നലത്തെ ദീപിക ദിനപത്രത്തിലെ മറക്കരുത് ജീവനുവേണ്ടി ഓടുന്ന ഇവരെ എന്ന ലേഖനമാണ് കുട്ടികളില്‍ ഈ ആശയത്തിനു വിത്തുപാകിയത്.

അനധികൃത മണല്‍കടത്ത്, നാലുപേര്‍ വള്ളങ്ങളുമായി പിടിയില്‍

ചേര്‍ത്തല: ചെങ്ങണ്ട കായലില്‍ രാത്രികാലത്തു നടക്കുന്ന അനധികൃത മണല്‍ കടത്തല്‍ നെടുമ്പ്രക്കാട് വിളക്കുമരം പാലത്തിനു ഭീഷണിയാകുന്നു. കഴിഞ്ഞ ദിവസം പോലീസ് നടത്തിയ പരിശോധനയില്‍ മണല്‍ കടത്താന്‍ ശ്രമിച്ച നാലുവള്ളങ്ങള്‍ പിടികൂടി. സംഭവവുമായി ബന്ധപ്പെട്ട് നാലുപേരെയും ചേര്‍ത്തല സ്‌റ്റേഷന്‍ ഓഫീസര്‍ ജി. അരുണിന്‍റെ നേതൃത്വത്തില്‍ നടന്ന പരിശോധനയില്‍ പിടികൂടിയിരുന്നു. നെടുമ്പ്രക്കാട് വിളക്കുമരം പാലത്തിനു സമീപത്തുനിന്നാണ് ഇവരെ പിടികൂടിയത്. പള്ളിപ്പുറം, നെടുമ്പ്രക്കാട് സ്വദേശികളായ പ്രസന്നന്‍, രജിമോന്‍, അശോകന്‍, ഉദയകുമാര്‍ എന്നിവരാണ് പിടിയിലായത്. ഇവര്‍ക്കെതിരെ പോലീസ് കേസെടുത്തു. പിടിച്ചെടുത്ത വള്ളങ്ങള്‍ കളക്ടര്‍ക്കു കൈമാറി. രാത്രികാലങ്ങളിലും പുലര്‍ച്ചെയുമാണ് വള്ളങ്ങളില്‍ സ്ഥിരമായി മണല്‍ കടത്തുന്നത്. കായലില്‍നിന്നും എടുക്കുന്ന മണല്‍ കരയിലെത്തിച്ച് ലോറികളില്‍ കടത്തുകയാണ് പതിവ്. വള്ളത്തിന് 4000 മുതല്‍ 7000 രൂപക്കുവരെ വില്‍ക്കുന്നു. നെടുമ്പ്രക്കാട് വിളക്കുമരം പാലം നിര്‍മാണം പൂര്‍ത്തിയായി ഗതാഗതത്തിനു തുറന്നുകൊടുക്കാന്‍ സജ്ജമായിരിക്കുകയാണ്. 20 കോടിയോളം മുടക്കിയാണ് പാലം പൂര്‍ത്തിയാക്കിയത്. ഏറെ അടിയൊഴുക്കുള്ള കായലിലെ പാലത്തിനുസമീപമുള്ള മണല്‍ വാരുന്നത് പാലത്തിന്‍റെ തൂണുകളുടെ ബലക്ഷയത്തിനു കാരണമാകുമെന്ന് കാണിച്ച് നിര്‍മാണഘട്ടത്തില്‍ തന്നെ അധികൃതര്‍ മുന്നറിയിപ്പു നല്‍കിയിരുന്നതാണ്.

ബാലികയെ വെട്ടി പരിക്കേല്പിച്ച കേസിൽ പ്രതിക്ക് ജീവപര്യന്തം

പത്തനംതിട്ട: 12വയുസുള്ള പെണ്‍കുട്ടിയുടെ കൈപ്പത്തിക്ക് വെട്ടി ഗുരുതരമായി പരിക്കേല്പിച്ച കേസില്‍ പ്രതിക്ക് ജീവപര്യന്തം കഠിന തടവും ലക്ഷം രൂപ പിഴയും. കൂടല്‍ അതിരുങ്കല്‍ അഞ്ചുമുക്ക് പറങ്കാം തോട്ടത്തില്‍ ഗീവര്‍ഗീസ് തോമസി (അനിയൻകുഞ്ഞ്, 42) നെയാണ് പത്തനംതിട്ട അഡീഷണല്‍ ഡിസ്ട്രിക്ട് ആന്‍ഡ് സെഷന്‍സ് കോടതി ഒന്ന് ജഡ്ജി ജി.പി. ജയകൃഷ്ണന്‍ കുറ്റക്കാരനെന്ന് കണ്ടെത്തി ശിക്ഷ വിധിച്ചത്. പട്ടികജാതി,വര്‍ഗവിഭാഗങ്ങള്‍ക്കെതിരായ അതിക്രമങ്ങള്‍ തടയല്‍ നിയമത്തിലെ വകുപ്പ് പ്രകാരമാണ് ജീവപര്യന്തം ശിക്ഷിച്ചത്. ഗുരുതരമായി പരിക്കുകള്‍ ഏല്പിച്ചതിനു അഞ്ച് വര്‍ഷം കഠിന തടവും 50,000 രൂപയും, വീട്ടില്‍ അതിക്രമിച്ചുകടന്നതിനു മൂന്നു വർഷം കഠിന തടവും 25,000 രൂപ പിഴയും ശിക്ഷിച്ചു. ശിക്ഷാകാലയളവ് ഒരുമിച്ചു അനുഭവിച്ചാല്‍ മതിയാകും. പിഴത്തുക കുട്ടിക്ക് നല്‍കാനും, ഒടുക്കിയില്ലെങ്കില്‍ വസ്തുക്കളില്‍ നിന്നും കണ്ടുകെട്ടി നല്‍കാനുള്ള നടപടി സ്വീകരിക്കാനും വിധിയില്‍ പറയുന്നു. 2016 മാര്‍ച്ച് 18നാണ് കേസിനാസ്പദമായ സംഭവം. സ്ഥലത്ത് സ്ഥിരമായി മദ്യപിച്ച് ബഹളമുണ്ടാക്കുന്ന ഇയാ‌ളെ സംബന്ധിച്ചു കൂടല്‍ പോലീസില്‍ വിളിച്ചറിയിക്കുമെന്ന് പറഞ്ഞ അയല്‍വാസി മേടക്കര വീട്ടില്‍ പ്രിയ ദിലീപിനെയാണ് വെട്ടുകത്തിയുമായി ആക്രമിച്ചത്. ഈസമയം വീട്ടില്‍ യുവതിക്കൊപ്പം ഉണ്ടായിരുന്ന 12 കാരിയായ മകള്‍ കൈകള്‍ കൊണ്ട് തടഞ്ഞു. കൈകള്‍ക്ക് വെട്ടേറ്റു, ഇടതുകൈപ്പത്തിക്ക് താഴെ റിസ്റ്റിന്‍റെ ഭാഗത്ത് പ്രധാന ഞരമ്പ് മുറിഞ്ഞു മാറി. അതിന് താഴെയുള്ള അസ്ഥിക്ക് മുറിവും സംഭവിച്ചു. വലതു കൈവെള്ളഭാഗത്ത് ആഴത്തില്‍ മുറിവേല്‍ക്കുകയും ചെയ്തു. കൂടാതെ, പ്രിയയും കുടുംബവും വീട് വിറ്റ് പോകാത്തതിലുള്ള മുന്‍വിരോധവും ആക്രമണകാരണമായി. ഗുരുതര പരിക്കുകളോടെ കോട്ടയം മെഡിക്കല്‍ കോളജ് ആശുപത്രിയില്‍ ചികില്‍സ തേടി. കൂടല്‍ അഡിഷണല്‍ എസ്ഐ ആയിരുന്ന വി.ടി.രാജു കേസ് അന്വേഷണം നടത്തി. കോടതിയില്‍ കുറ്റപത്രം സമര്‍പ്പിച്ചത് അന്നത്തെ അടൂര്‍ ഡിവൈഎസ്പി റഫീഖ് ആയിരുന്നു. പ്രോസിക്യൂട്ടര്‍മാരായ ടി ഹരികൃഷ്ണന്‍, ഹരി ശങ്കര്‍ പ്രസാദ് എന്നിവര്‍ കോടതിയില്‍ ഹാജരായായി.

ചെന്നിത്തല പാടശേഖരത്തിൽ കർഷകർ കൃഷി ഉപേക്ഷിക്കുന്നു

മാന്നാര്‍: ചെന്നിത്തല പത്താം ബ്ലോക്ക് പാടശേഖരത്തിലെ കൃഷി മുടങ്ങുമെന്ന് കര്‍ഷകര്‍. കൃഷിയിറക്കേണ്ട സമയത്താണ് തുടര്‍ച്ചയായ മഴ പെയ്തത്. തുടര്‍ന്ന് പാടശേഖരം വെള്ളത്തില്‍ മുങ്ങി. ഇപ്പോള്‍ മഴ കുറഞ്ഞെങ്കിലും വെള്ളം വറ്റിക്കാനുള്ള ബുദ്ധിമുട്ട് കാരണം ചെന്നിത്തല പത്താം ബ്ലോക്ക് പാടശേഖരത്തിലെ 65 ഏക്കര്‍ പുഞ്ച നിലത്ത് അടുത്തവര്‍ഷം കൃഷി ഇറക്കാന്‍ കഴിയുകയില്ലന്ന് നെല്ലുത്പാദക സമിതി അറിയിച്ചു. 45 കര്‍ഷകര്‍ സ്വന്തമായി കൃഷി ചെയ്യുന്ന പാടത്ത് ഒരേ തറയില്‍ പെട്ടിക്കും മോട്ടറും തിരിച്ചും മറിച്ചും വെച്ചാണ് വെള്ളം വറ്റിക്കുകയും വെള്ളം കയറ്റുകയും ചെയ്യുന്നത്. ചോവാലില്‍ തോട്ടിലെ ഏറ്റവും ഉയര്‍ന്ന ഭാഗത്താണ് ഇപ്പോഴത്തെ മോട്ടോര്‍ തറ. ഏറ്റവും താഴ്ച ഭാഗത്തെ വെള്ളം വറ്റിവരണമെങ്കില്‍ വളരെ ദിവസങ്ങള്‍ എടുക്കും. ആറ്റില്‍ ജലനിരപ്പുയര്‍ന്നാല്‍ വാര്യത്ത് തോട് വഴി പുത്തനാറ്റിലേക്ക് പാടത്തുനിന്ന് വെള്ളം ഇറങ്ങുകയുമില്ല. കാലാവസ്ഥാ വ്യതിയാനം മൂലം നവംബര്‍ പകുതിക്ക് കൃഷി ഇറക്കേണ്ടതായിട്ടുണ്ട്. പക്ഷേ ഇപ്പോഴത്തെ പമ്പിംഗ് സംവിധാനം ഇതിന് സഹായകരമല്ല. വാര്യത്ത് തോട്ടുമുഖത്ത് ഉയര്‍ന്ന ഹോഴ്‌സ് പവറിലുള്ള പമ്പ് സ്ഥാപിച്ച് പമ്പിംഗ് നടത്തിയാല്‍ മാത്രമേ സമയത്ത് കൃഷി ഇറക്കാന്‍ കഴിയുകയുള്ളൂ. ആയതിന് പാടശേഖരസമിതി മുട്ടാത്ത വാതിലുകളില്ല. വര്‍ഷങ്ങളായി കാലാവസ്ഥാ വ്യതിയാനം കാരണം കൃഷി നഷ്ടത്തിലാണ്. ഒപ്പം സര്‍ക്കാര്‍ സംഭരിച്ച നെല്ലിന്‍റെ വിലയും പൂര്‍ണമായി ലഭിച്ചിട്ടില്ല. കാലപ്പഴക്കത്താല്‍ ജീര്‍ണതയിലായ പെട്ടിയും പറയും മാറ്റുകയും വാര്യത്ത് തോട്ടുമുഖത്തും ചോവാലില്‍ തോട്ടുമുഖത്തും 20 എച്ച്പി വീതമുള്ള രണ്ടു വെര്‍ട്ടിക്കല്‍ പമ്പുകള്‍ സ്ഥാപിച്ച് ജലസേചന സൗകര്യം ഒരുക്കി കര്‍ഷകരുടെ കൃഷി പ്രതിസന്ധി പരിഹരിക്കാന്‍ അടിയന്തര നടപടി ഉണ്ടാകണമെന്ന് പാടശേഖരസമിതി ആവശ്യപ്പെട്ടു.

സോളാറിലെ കെഎസ്ഇബി നയം; സര്‍ക്കാരിനു തിരിച്ചടിയാവും

അമ്പലപ്പുഴ: സോളാറിലെ കെഎസ്ഇബിയുടെ പുതിയ നയം സര്‍ക്കാരിന്‍റെ പ്രതിച്ഛായയ്ക്കു കളങ്കം വരുത്തിയേക്കും. 2020ലെ സോളാര്‍ നയം 2025ല്‍ മറികടക്കാന്‍ റെഗുലേറ്ററി കമ്മീഷന്‍ കരട് പുറപ്പെടുവിച്ചു. ഒക്ടോബര്‍ ഒന്നുമുതല്‍ പ്രാബല്യത്തില്‍ വരുത്തുവാനുള്ള തിരക്കിട്ട നീക്കമാണ് കമ്മീഷന്‍ നടത്തുന്നത്. 2020ലെ സോളാര്‍ നിയമം അനുസരിച്ച് ഗാര്‍ഷിക ഉപഭോക്താക്കള്‍ക്ക് നെറ്റ് മീറ്ററിങ്ങാണ് നടപ്പിലാക്കിവന്നിരുന്നത്. പകല്‍സമയങ്ങളില്‍ ഉപഭോക്താക്കള്‍ പുരപ്പുറം സോളാറിലൂടെ ഉത്്പാദിപ്പിക്കുന്ന വൈദ്യുതി കെഎസ്ഇബിയുടെ ഗ്രിഡിലേക്ക് നല്‍കും. ഉപഭോക്താക്കള്‍ ആവശ്യമുള്ള വൈദ്യുതി ഗ്രിഡില്‍നിന്ന് ഇമ്പോര്‍ട്ട് ചെയ്ത് ഉപയോഗിക്കാം. മാസത്തില്‍ കണക്കെടുക്കുമ്പോള്‍ ഉത്പാതിപ്പിച്ച വൈദ്യുതിയും ഉപയോഗിച്ച വൈദ്യുതിയും തട്ടിക്കിഴിച്ച് മിച്ചമുള്ള വൈദ്യുതി ഉപഭോക്താവിന്‍റെ എനര്‍ജി ബാങ്കില്‍ ബാലന്‍സ് ആയി രേഖപ്പെടുത്തും. അടുത്തമാസം ഉത്പാദനം കുറഞ്ഞാലും എനര്‍ജി ബാങ്കില്‍നിന്നുള്ള വൈദ്യുതി എടുത്ത് ബില്ല് ബാലന്‍സ് ചെയ്യാന്‍ കഴിയും. ഇത് ഗാര്‍ഹിക സോളാര്‍ ഉപഭോക്താക്കള്‍ക്ക് ഏറെ പ്രയോജനകരമായിരുന്നു. മീറ്ററിങ്ങിലെ ആകര്‍ഷണമാണ് സോളാര്‍ കേരളത്തില്‍ ജനപ്രിയമാകാന്‍ കാരണം. കേന്ദ്രസര്‍ക്കാരിന്‍റെ സബ്‌സിഡിയും ഏഴു ശതമാനം നിരക്കില്‍ ലോണ്‍ സൗകര്യവും വന്നതോടെ സാധാരണക്കാരന്‍ പോലും സോളാറിലേക്കു മാറി ത്തുടങ്ങി. കേരളത്തിൽ ഏകദേശം രണ്ടു ലക്ഷം സോളാര്‍ ഉപഭോക്താക്കളാണുള്ളത്. സോളാര്‍ രജിസ്‌ട്രേഷന്‍ ദിനംപ്രതി വര്‍ധിക്കുകയാണ്. രണ്ടു ലക്ഷം രൂപ ഉണ്ടെങ്കില്‍ ഒരു സോളാര്‍ പ്ലാന്‍റ് സ്ഥാപിക്കാന്‍ കഴിയും. ഇതില്‍ 78,000 രൂപ സബ്‌സിഡിയും ലഭിക്കും സോളാര്‍ മേഖലയില്‍ ലക്ഷക്കണക്കിന് യുവതീ-യുവാക്കളാണ് ജോലി നോക്കുന്നത്. അഭ്യസ്തവിദ്യരായ ചെറുപ്പക്കാര്‍ക്ക് ചെറിയ മുതല്‍ മുടക്കില്‍ തുടങ്ങാവുന്ന ഒരു സ്റ്റാര്‍ട്ട് അപ്പ് പദ്ധതി കൂടിയാണ് സോളാര്‍ റിന്യൂവബിള്‍ എനര്‍ജി മേഖല. സോളാര്‍ പദ്ധതി കേരളത്തില്‍ വ്യാപകമായതോടെയാണ് കെഎസ്ഇബി തനിനിറം പുറത്തെടുത്തു തുടങ്ങിയത്. തുടക്കത്തില്‍ മീറ്ററുകള്‍ ഉപഭോക്താക്കള്‍ക്ക് നല്‍കാതെ പദ്ധതി മരവിപ്പിക്കാന്‍ ശ്രമിച്ചു. അത് നടക്കാതെ വന്നപ്പോള്‍ 2020ലെ നിയമം തന്നെ മാറ്റാന്‍ കെഎസ്ഇ ബി റെഗുലേറ്ററി കമ്മീഷന്‍ തീരുമാനിച്ചു. കമ്മീഷന്‍റെ കരട് നിയമം നടപ്പിലാക്കുന്നതോടെ കേരളത്തില്‍ സോളാര്‍ പദ്ധതിതന്നെ ഇല്ലാതാകും. പുതിയ നിയമത്തില്‍ നെറ്റ് മീറ്ററില്‍ മൂന്ന് കിലോ വരെ ആക്കി ചുരുക്കി. ഇതോടെ ഒരു സാധാരണ ഇടത്തരം കുടുംബത്തിന് അഞ്ചു കിലോവാട്ട് സോളാര്‍ പ്ലാന്‍റ് എങ്കിലും ആവശ്യമായി വരും. പുതിയ നിയമം അനുസരിച്ച് അഞ്ച് കിലോ വാട്ടിന് നെറ്റ് ബില്ലിംഗ് സമമ്പ്രദായമേ സാധ്യമാകൂ. ഉപഭോക്താക്കള്‍ നല്‍കുന്ന വൈദ്യുതിക്ക് കുറഞ്ഞ തുകയും ഉപയോഗിക്കുന്ന വൈദ്യുതിക്ക് കൂടുതല്‍ തുകയും ഈടാക്കുന്ന ബില്ലിംഗ് രീതി ലാഭകരമല്ലെന്നും കെഎസ്ഇബിക്ക് നഷ്ടമുണ്ടാകുന്നു എന്ന വാദം ഉയര്‍ത്തിയാണ് പുതിയ നിയമം കെഎസ്ഇബി നടപ്പിലാക്കുന്നത്. ഇത് കടുത്ത പ്രതിഷേധത്തിന് ഇടയാക്കിയിട്ടുണ്ട്. കഴിഞ്ഞദിവസം തിരുവനന്തപുരത്ത് റെഗുലേറ്ററി കമ്മീഷന്‍ ഓഫീസിനു മുന്നില്‍ നടന്ന സമരം പ്രതിഷേധത്തിന്‍റെ ആഴം വെളിവാക്കുന്നതായിരുന്നു. കോടിക്കണക്കിന് രൂപ നികുതിയായി ലഭിക്കുന്ന മേഖലയാണിത്. ലക്ഷക്കണക്കിന് ചെറുപ്പക്കാര്‍ ടെക്‌നിക്കല്‍ നോണ്‍ ടെക്‌നിക്കല്‍ എന്നിങ്ങനെ ഉള്ളവര്‍ മേഖലയില്‍ ജോലി നോക്കുന്നു. പുതിയ നിയമം ചെറുപ്പക്കാരുടെ തൊഴില്‍ നഷ്ടപ്പെടുത്തുവാന്‍ ഇടയാക്കും. 2030 ഓടെ 50 ശതമാനം ഹരിത വൈദ്യുതി എന്ന കേന്ദ്രസര്‍ക്കാരിന്‍റെ പ്രഖ്യാപിത നയം കേരളത്തില്‍ നടപ്പിലാക്കാന്‍ കെഎസ്ഇബിയുടെ പുതിയ നയം വിലങ്ങുതടിയാകും. ആശാവർക്കര്‍മാരുടെ സമരത്തേക്കാള്‍ ശക്തമായ പ്രതിഷേധം സര്‍ക്കാരിന് നേരിടേണ്ടി വരും. വരുന്ന പഞ്ചായത്ത് -നിയമസഭാ തെരഞ്ഞെടുപ്പുകളില്‍ സോളാര്‍ ഉപഭോക്താക്കളുടെ പ്രതിഷേധം സര്‍ക്കാരിന് തിരിച്ചടിയാകാന്‍ സാധ്യതയുണ്ട്. രാജ്യത്തിന്‍റെ ഊര്‍ജമേഖലയെ ശവപ്പറമ്പ് ആക്കി മാറ്റുന്ന കെഎസ്ഇബിയുടെ പുതിയ സോളാര്‍ നയം തിരുത്തണമെന്നാണ് ഉപഭോക്താക്കളുടെ ആവശ്യം.

എക്സൈസിന്‍റെ മാവേലിക്കര റേഞ്ച് ഓഫീസ് തകര്‍ച്ചയുടെ വക്കില്‍

മാവേലിക്കര: എക്സൈസ് മാവേലിക്കര റേഞ്ച് ഓഫീസിലെ ഉദ്യോഗസ്ഥര്‍ ഒരോ നിമിഷവും ജീവനില്‍ ഭയന്നാണ് ജോലിയില്‍ മുഴുകുന്നത്. പതിറ്റാണ്ടുകളുടെ പഴക്കമുള്ള ജീര്‍ണിച്ച കെട്ടിടത്തിലാണ് നിലവില്‍ എക്സൈസ് ഓഫീസ് പ്രവര്‍ത്തിക്കുന്നത്. മൂന്നു വനിതകള്‍ ഉൾപ്പെടെ 26 പേരാണ് ഇവിടെ ജീവന്‍ പണയംവച്ച് ജോലിചെയ്തുവരുന്നത്. ഒന്നാംനില പൂര്‍ത്തിയായ പുതിയ ഓഫീസ് കെട്ടിടത്തിലേക്ക് ഓഫീസ് മാറ്റണമെന്ന ആവശ്യത്തിന് വകുപ്പ് ഇതുവരെ പച്ചക്കൊടി കാണിച്ചിട്ടില്ല. നിലവിലെ എക്സൈസ് ഓഫീസ് പ്രവര്‍ത്തിക്കുന്നത് കൊറ്റാര്‍കാവ് 78-ാം നമ്പര്‍ എന്‍എസ്എസ് കരയോഗത്തിന്‍റെ 75 വര്‍ഷത്തിനു മുകളില്‍ പഴക്കമുള്ള ജീര്‍ണിച്ച കെട്ടിടത്തിലാണ്. കെട്ടിടത്തിന്‍റെ ഭിത്തികളും മറ്റും വിള്ളല്‍വന്ന് അപകടാവസ്ഥയിലും മഴ വന്നാല്‍ ചോരുന്ന നിലയിലുമാണ്. മേല്‍ക്കൂരയിലെ തടികളും ദ്രവിച്ച നിലയിലാണ്. എന്‍എസ്എസ് കരയോഗം കെട്ടിടം ഉപയോഗയോഗ്യമല്ലെന്നും ഓഫീസിന്‍റെ പ്രവര്‍ത്തനം നടത്തുന്നത് അപകടഭീഷണി ഉയര്‍ത്തുന്നതാണെന്നും ചൂണ്ടിക്കാട്ടി എക്സൈസ് വകുപ്പിന് കത്തു നല്‍കിയിട്ടുണ്ട്. കെട്ടിടത്തോട് ചേര്‍ന്ന തൊണ്ടിമുറിയുടെ ഒരു ഭാഗത്തെ ഭിത്തി പൂര്‍ണമായും തകര്‍ന്ന് മേല്‍ക്കൂര നിലം പതിക്കാറായി നില്‍ക്കുകയുമാണ്. കൂടാതെ കാടുപിടിച്ചു കിടക്കുന്ന ഓഫീസ് പരിസരത്ത് ഇഴജെന്തു ശല്യവും രൂക്ഷമാണ്. വിദ്യാഭ്യാസവകുപ്പില്‍നിന്നു കൈമാറി കിട്ടിയ അടച്ചുപൂട്ടിപോയ വഴുവാടി ഗവ. എല്‍പിജി സ്‌കൂളിന്‍റെ സ്ഥലത്ത് 2023ല്‍ എക്സൈസ് റേഞ്ച് ഓഫീസിനായുള്ള കെട്ടിടനിര്‍മാണ പ്രവര്‍ത്തനങ്ങള്‍ ആരംഭിച്ചിരുന്നു. നിലവില്‍ താഴത്തെ നിലയില്‍ എക്സൈസ് ഇന്‍സ്പെക്ടറുടെ ഓഫീസ്, തൊണ്ടി മുറി, കാത്തിരുപ്പ കേന്ദ്രം, ശൗചാലയങ്ങള്‍, ഡ്യൂട്ടി മുറി, സ്വീകരണ മുറി, ഉദ്യോഗസ്ഥരുടെ വിശ്രമമുറി, പാര്‍ക്കിംഗ് ഏരിയ എന്നിവ പൂര്‍ത്തിയായിട്ടുണ്ട്. ഭിത്തികളുടേയും മേല്‍ക്കൂരയുടെ പണി പൂര്‍ത്തിയായ ഒന്നാം നിലയിലെ അസിസ്റ്റന്റ് എക്സൈസ് ഓഫീസറുടെ മുറി, ഓഫീസ് ഏരിയ, സ്റ്റോര്‍ മുറി, സെല്‍, ശൗചാലയ സൗകര്യമുള്ള ഉദ്യോഗസ്ഥരുടെ വിശ്രമമുറി എന്നിവയാണ് പൂര്‍ത്തിയാക്കാനുള്ളത്. ഭാവിയില്‍ രണ്ടാംനില നിര്‍മിച്ച് തട്ടാരമ്പലത്തില്‍ വാടകകെട്ടിടത്തില്‍ പ്രവര്‍ത്തിക്കുന്ന എക്സൈസ് സര്‍ക്കിംള്‍ ഇന്‍സ്പെക്ടര്‍ ഓഫീസ് കൂടി ഇവിടേക്ക് കൊണ്ടുവരാനാണ് പദ്ധതി. ഒന്നാം പിണറായി സര്‍ക്കാരിന്‍റെ കാലഘട്ടത്തിലാണ് സ്വന്തമായി കെട്ടിടമില്ലാതിരുന്ന മാവേലിക്കര എകസൈസ് ഓഫീസിന് കെട്ടിടത്തിനായി അഞ്ചു കോടി രൂപ അനുവദിച്ചത്. ഇതിന്‍റെ ആദ്യഘട്ടമായി 2.47 കോടി രൂപ അനുവദിച്ചു. ഓന്നാം നിലയുടെ രൂപരേഖ തയാറാക്കി സമര്‍പ്പിച്ച ശേഷം രണ്ടാം ഘട്ടത്തിനായി കാത്തിരിക്കുകയാണിപ്പോള്‍. മഴ കനക്കുന്ന സാഹചര്യത്തില്‍ നിലവില്‍ എക്സൈസ് ഓഫീസ് പ്രവര്‍ത്തിക്കുന്ന കെട്ടിടത്തിന്‍റെ അവസ്ഥ മോശമായി തുടരുകയാണ്. റോഡ് നിരപ്പില്‍നിന്നും താഴെയായ സ്ഥലത്ത് മഴമൂലം ഉണ്ടാകുന്ന വെള്ളക്കെട്ടും കെട്ടിടത്തിനു ഭീഷണിയാണ്. ഏതു നിമിഷവും തകര്‍ന്നു വീഴാറായ വാടക കെട്ടിടത്തില്‍നിന്നും ഉടനടി ഓഫീസ് മാറിയില്ലെങ്കില്‍ വലിയ ദുരന്തം തന്നെ സംഭവിക്കാന്‍ സാധ്യതയുള്ളതായാണ് വിദഗ്ധര്‍ ചൂണ്ടിക്കാട്ടുന്നത്.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]