ADVERTISEMENT

ADVERTISEMENT

രക്‌തദാനക്യാമ്പ് നടത്തി

ചിറ്റാരിക്കാൽ: വോയ്സ് ഓഫ് ചിറ്റാരിക്കാൽ വാട്സാപ് ഗ്രൂപ്പിന്‍റെയും തോമാപുരം സെന്‍റ് തോമസ് ഹയർ സെക്കൻഡറി സ്കൂൾ എൻഎസ്എസ് യൂണിറ്റിന്‍റെയും ബിഡികെ കാസർഗോഡിന്‍റെയും സംയുക്താഭിമുഖ്യത്തിൽ ചിറ്റാരിക്കാലിൽ രക്തദാനക്യാമ്പ് നടത്തി.

ചിറ്റാരിക്കാൽ ടൗൺ കുരിശുപള്ളിക്ക് എതിർവശത്തെ പുതിയ കണ്ടത്തിൻകര ബിൽഡിംഗിൽ നടന്ന പരിപാടി തോമാപുരം സെന്‍റ് തോമസ് ഫൊറോന പള്ളി വികാരി റവ.ഡോ.മാണി മേൽവെട്ടം ഉദ്ഘാടനം ചെയ്തു. വോയ്സ് ഓഫ് ചിറ്റാരിക്കാൽ വാട്സാപ് ഗ്രൂപ്പ് അഡ്മിൻ ഷിജിത്ത് കുഴുവേലിൽ അധ്യക്ഷത വഹിച്ചു.

സ്കൂൾ എൻഎസ്എസ് കോ-ഓർഡിനേറ്റർ അനുമോൾ ഫ്രാൻസിസ്, അധ്യാപകൻ അലക്സ്‌ ജോം, ബിഡികെ ജില്ലാ കൺവീനർ ഷോണി, റഷീദ്, മെഡിക്കൽ ഓഫീസർ ഡോ.അമിത തോമസ്, അമൽ സജി കോട്ടയിൽ, ഡയസ് വലിയപറമ്പിൽ, അരുൺ ചിലമ്പിട്ടശേരിൽ, സോണി പൊടിമറ്റത്തിൽ, എബിൻ നമ്പ്യാമഠത്തിൽ എന്നിവർ നേതൃത്വം നൽകി.

ADVERTISEMENT

കയ്‌റോസ് ലീഡേഴ്‌സ് മീറ്റ്

കാഞ്ഞങ്ങാട്: കയ്‌റോസ് കാഞ്ഞങ്ങാട് മേഖല ലീഡേഴ്‌സ് മീറ്റ് അപ്പോസ്തലറാണി ദേവാലയ ഹാളില്‍ കാഞ്ഞങ്ങാട് ഫെഡറേഷന് കിഴിലുള്ള 36 സ്വാശ്രയ സംഘങ്ങളുടെ ഭാരവാഹികള്‍ക്ക് പോസ്റ്റല്‍ ഹെല്‍ത്ത് ഇന്‍ഷുറന്‍സ്, ബുക്ക് കീപ്പിംഗ് തുടങ്ങിയ വിഷയത്തില്‍ ട്രെയിനിംഗ് നല്‍കി. കോള്‍പിംഗ് നാഷണല്‍ ബോര്‍ഡ് മെംബര്‍ മരിയ ഗൊരേത്തി ഉദ്ഘാടനം ചെയ്തു. കാഞ്ഞങ്ങാട് ഫെഡറേഷന്‍ പ്രസിഡന്‍റ് ജോര്‍ജ് ജേക്കബ് അധ്യക്ഷതവഹിച്ചു. കണ്ണൂര്‍ രൂപത കെഎല്‍എം പ്രസിഡന്‍റ് പീറ്റര്‍ കോളക്കാട്, കാഞ്ഞങ്ങാട് മേഖല കോഓര്‍ഡിനേറ്റര്‍ ബിന്‍സി ഷാജു എന്നിവര്‍ പ്രസംഗിച്ചു. പഴയങ്ങാടി മേഖല കോഓര്‍ഡിനേറ്റര്‍ എം.വി. ചന്ദ്രന്‍ ക്ലാസ് നയിച്ചു. ജോയ് ഫെര്‍ണാണ്ടസ് സ്വാഗതവും നിത ഗില്‍ബര്‍ട്ട് നന്ദിയും പറഞ്ഞു.

നിലയ്ക്കാത്ത മഴയിൽ കമുകിനും തെങ്ങിനും രോഗങ്ങൾ പടരുന്നു

പാലാവയൽ: പതിവിലും നേരത്തേ എത്തി നിലയ്ക്കാതെ പെയ്യുന്ന മഴയിൽ കമുകിനും തെങ്ങിനും രോഗങ്ങൾ പടരുന്നത് മലയോര കർഷകർക്ക് ദുരിതമാകുന്നു. കമുകിൻ തോട്ടങ്ങളിൽ മഹാളി രോഗവും മഞ്ഞളിപ്പും പൂർവാധികം ശക്തിയോടെ വ്യാപകമാവുകയാണ്. കായ്കളിലും പൂക്കളിലും ചൂടുവെള്ളം വീണ് പൊള്ളിയത് പോലെയുള്ള പാടുകൾ പ്രത്യക്ഷപ്പെടുന്നതാണ് രോഗബാധയുടെ ആദ്യ ലക്ഷണം. ദിവസങ്ങൾക്കകം തന്നെ പെൺപൂക്കളും പാകമാകാത്ത കായ്കളും അഴുകി കൊഴിഞ്ഞുവീഴുന്നത് നിസ്സഹായതയോടെ നോക്കിനിൽക്കേണ്ട അവസ്ഥയിലാണ് കർഷകർ. കാലവർഷം നേരത്തേ എത്തിയതുമൂലം മിക്ക തോട്ടങ്ങളിലും ഇത്തവണ പ്രതിരോധ മരുന്നുകൾ തളിക്കാൻ കഴിയാതെ വന്നതാണ് പ്രശ്നം രൂക്ഷമാക്കിയത്. വിട്ടുമാറാത്ത മഴയും തണുപ്പും ഫംഗസിന്‍റെ വളർച്ചയ്ക്ക് അനുകൂലമായ അന്തരീക്ഷമൊരുക്കുന്നു. ഒരു കമുകിൽ രോഗം പ്രത്യക്ഷപ്പെട്ട് ദിവസങ്ങൾക്കുള്ളിൽ തോട്ടത്തിലെ മറ്റ് കമുകുകളിലേക്കും അടുത്തുള്ള മറ്റ് തോട്ടങ്ങളിലേക്കും പടരുന്നു. കുറച്ചുദിവസമെങ്കിലും മഴ വിട്ടുമാറിയാൽ കമുകുകളിൽ ബോര്‍ഡോ മിശ്രിതം തളിച്ച് രോഗം പടരുന്നത് നിയന്ത്രിക്കാൻ കഴിയുമായിരുന്നുവെന്ന് കർഷകർ പറയുന്നു. മരുന്നു തളിക്കുന്നതിന് വേണ്ടിവരുന്ന ഭാരിച്ച ചെലവും കര്‍ഷകര്‍ക്ക് ബാധ്യതയാകുന്നുണ്ട്. മഴയും തണുപ്പും നിറഞ്ഞ കാലാവസ്ഥയിൽ തെങ്ങുകളിൽ മണ്ടചീയൽ രോഗവും വ്യാപകമായി. തെങ്ങിന്‍റെ നാമ്പോലയിലും ചുറ്റുമുള്ള ഒന്നോ രണ്ടോ ഓലകളിലും മഞ്ഞനിറത്തിലോ ഇളം കറുപ്പുനിറത്തിലോ ഉള്ള പാടുകള്‍ പ്രത്യക്ഷപ്പെടുമ്പോഴാണ് രോഗബാധ തിരിച്ചറിയുന്നത്. നാമ്പോല വലിച്ചാല്‍ എളുപ്പത്തില്‍ ഊരിപ്പോരുകയും ചെയ്യും. രോഗാരംഭത്തില്‍ തന്നെ ചികിത്സിച്ചാല്‍ തെങ്ങിനെ രക്ഷപ്പെടുത്താൻ കഴിയുമെന്നാണ് കൃഷി വകുപ്പ് ഉദ്യോഗസ്ഥർ പറയുന്നത്. നാമ്പോലയില്‍ കേടു ബാധിച്ചു കാണുന്ന ഭാഗം മുറിച്ചുമാറ്റിയ ശേഷം മുറിപ്പാടിനുചുറ്റും ബോര്‍ഡോ മിശ്രിതം പുരട്ടി പോളിത്തീന്‍ കവര്‍ കൊണ്ട് പൊതിഞ്ഞ് സൂക്ഷിക്കണമെന്നാണ് അവരുടെ നിർദേശം. എന്നാൽ രോഗം മൂർഛിച്ച് നാമ്പോല ചീഞ്ഞുവീഴുമ്പോൾ മാത്രമാണ് പലപ്പോഴും കർഷകർ തെങ്ങിന് രോഗം ബാധിച്ച വിവരം മനസ്സിലാക്കുന്നത്. തേങ്ങയിടാൻ തന്നെ തൊഴിലാളികളെ കിട്ടാത്ത കാലത്ത് തെങ്ങിന്‍റെ മണ്ട വൃത്തിയാക്കാൻ വഴിയൊന്നും കാണാത്ത നിലയാണെന്നും കർഷകർ പറയുന്നു.

അമ്പിലാടി തൂക്കുപാലം അപകടാവസ്ഥയില്‍

താന്നിയടി: നടപ്പാതയും പാര്‍ശ്വഭാഗവും തകര്‍ന്ന് ബേഡഡുക്കയിലെ അമ്പിലാടി തൂക്കുപാലം അപകടാവസ്ഥയില്‍. നിത്യവും ജീവന്‍ പണയംവച്ച് പാലം കടക്കുന്നത് സ്‌കൂള്‍ വിദ്യാര്‍ഥികളടക്കം ഒട്ടേറെപ്പേര്‍.ബേഡുക്ക പഞ്ചായത്തിലെ അമ്പിലാടി-താന്നിയടി പൂഴയ്ക്കു കുറുകെ നിര്‍മിച്ച തൂക്കുപാലമാണ് കാലപ്പഴക്കത്താല്‍ ദ്രവിച്ച് യാത്രക്കാരുടെ ജീവനുതന്നെ ഭീഷണിയായത്. യാത്രക്കാര്‍ നടന്നുപോകുന്ന കോണ്‍ക്രീറ്റ് പലകകള്‍ പൊളിഞ്ഞ് വലിയ ദ്വാരമുണ്ടായിട്ടുണ്ട്. യാത്രക്കാരുടെ സുരക്ഷയ്ക്കായി പാര്‍ശ്വഭാഗങ്ങളില്‍ പിടിപ്പിച്ച ഇരുമ്പ് കമ്പിവല തുരുമ്പെടുത്ത് പൂര്‍ണമായും മുറിഞ്ഞുപോയി. കാലു തെറ്റിയാല്‍ പുഴയിലേക്ക് പതിക്കും. ബേഡഡുക്ക പഞ്ചായത്ത് ജനകീയാസൂത്രണ പദ്ധതിയില്‍ ജില്ലാ പഞ്ചായത്ത്, കാഞ്ഞങ്ങാട് ബ്ലോക്ക് പഞ്ചായത്ത്, പുല്ലൂര്‍-പെരിയ പഞ്ചായത്തുകളുടെ ഫണ്ടുപയോഗിച്ച് ജനപങ്കാളിത്തത്തോടെ നിര്‍മിച്ച പാലം 2002ല്‍ ആണ് ഉദ്ഘാടനം ചെയ്തത്. നൂറോളം പട്ടികജാതി വിഭാഗക്കാരും മറ്റുള്ളവരും താമസിക്കുന്ന പ്രദേശമാണ് അമ്പിലാടി. പാലം കടന്നുവേണം അമ്പിലാടി നിവാസികള്‍ക്ക് കല്യോട്ട്, പെരിയ, കാഞ്ഞങ്ങാട് എന്നിവിടങ്ങളിലെത്താന്‍. തൂക്കുപാലത്തിലൂടെയല്ലാതെ ലക്ഷ്യസ്ഥാനത്തെത്താന്‍ കിലോമീറ്ററുകള്‍ സഞ്ചരിക്കണം. പാലത്തിന്‍റെ അറ്റകുറ്റപ്പണികള്‍ നടത്തണമെന്ന് പലതവണ ആവശ്യപ്പെട്ടെങ്കിലും നടപടിയായില്ലെന്ന് നാട്ടുകാര്‍ പറയുന്നു.

സഹകരണബാങ്ക് കമ്മീഷന്‍ ജീവനക്കാരുടെ ഇന്‍സെന്‍റീവ് വിതരണം ചെയ്യണം: കെസിഇയു

കാഞ്ഞങ്ങാട്: സഹകരണ മേഖലയെ തകര്‍ക്കാനുള്ള കേന്ദ്രസര്‍ക്കാര്‍ നീക്കം ഉപേക്ഷിക്കണമെന്നും സാമൂഹ്യക്ഷേമ പെന്‍ഷന്‍ വിതരണം ചെയ്യുന്ന സഹകരണബാങ്ക് കമ്മീഷന്‍ ജീവനക്കാരുടെ ഇന്‍സെന്‍റീവ് യഥാസമയം വിതരണം ചെയ്യണമെന്നും മത്സ്യ സഹകരണസംഘത്തിലെ ഉന്നമനത്തിനായി ആവശ്യമായ ഇടപെടലുകള്‍ നടത്തണമെന്നും കാഞ്ഞങ്ങാട് നടന്ന കേരള കോ-ഓപ്പറേറ്റീവ് എംപ്ലോയീസ് യൂണിയന്‍ (സിഐടിയു) കാഞ്ഞങ്ങാട് ഏരിയാ സമ്മേളനം ആവശ്യപ്പെട്ടു. മേലാങ്കോട്ട് ലയണ്‍സ് ഓഡിറ്റോറിയത്തില്‍ നടന്ന സമ്മേളനം മത്സ്യതൊഴിലാളിത യൂണിയന്‍ സംസ്ഥാന സെക്രട്ടറി പി. സന്തോഷ് ഉദ്ഘാടനം ചെയ്തു. പി. മനോജ്കുമാര്‍ അധ്യക്ഷതവഹിച്ചു. പി. ജാനകി, കെ.വി. രാഘവന്‍, കെ.വി. വിശ്വനാഥന്‍, കെ. പ്രഭാകരന്‍, കെ. രഘു, കെ.വി. തങ്കമണി, സുരേഷ് പായം, എം. ദീപുദാസ്, പി. കെ.ജയശ്രീ, പി. പവിത്രന്‍, കെ. രമ്യ, രാജന്‍ കുണിചേരി, എ.കെ. ലക്ഷ്മണന്‍ എന്നിവര്‍ സംസാരിച്ചു. ഭാരവാഹികള്‍: എ.വി. സഞ്ജയന്‍ (പ്രസിഡന്‍റ്), പി. മനോജ് കുമാര്‍(സെക്രട്ടറി), സി. വിജയന്‍(ട്രഷറര്‍).

കോടതി കേസുകള്‍ തീര്‍പ്പാക്കാന്‍ അനുരഞ്ജനയജ്ഞം

കാസര്‍ഗോഡ്: ദേശീയ നിയമസേവന അതോറിറ്റിയുടെയും സുപ്രീംകോടതി മീഡിയേഷന്‍ ആന്‍ഡ് കണ്‍സിലിയേഷന്‍ പ്രോജക്ട് കമ്മിറ്റിയുടെയും സംയുക്ത ആഭിമുഖ്യത്തില്‍ ദേശീയ തലത്തില്‍ 90 ദിവസം നീണ്ടുനില്‍ക്കുന്ന മീഡിയേന്‍ ഫോര്‍ ദ നേഷന്‍ എന്ന പേരില്‍ നടപ്പാക്കുന്ന അനുരഞ്ജനയജ്ഞം കാസര്‍ഗോഡ് കോടതികളില്‍ സമയബന്ധിതമായി സംഘടിപ്പിക്കും. സംസ്ഥാന മീഡിയേഷന്‍ ആന്‍ഡ് കണ്‍സിലിയേഷന്‍ സെന്‍ററിന്‍റെയും ഹൈക്കോടതിയുടെയും സംസ്ഥാന നിയമസേവന അതോറിറ്റിയുടെയും മേല്‍നോട്ടത്തിലാണ് പരിപാടി സംഘടിപ്പിക്കുന്നത്. കോടതിയില്‍ നിലവിലുള്ള വൈവാഹിക തര്‍ക്കങ്ങളും വാഹന അപകട നഷ്ടപരിഹാര തര്‍ക്കങ്ങളും സിവില്‍ വ്യവഹാരങ്ങളും വാണിജ്യ തര്‍ക്കങ്ങളും മധ്യസ്ഥത്തിന് ഉതകുന്ന തരത്തിലുള്ള ക്രിമിനല്‍ കേസുകളും ജുലൈ ഒന്ന് മുതല്‍ മുതല്‍ 90 ദിവസത്തിനുള്ളില്‍ അനുരഞ്ജനത്തിലൂടെ തീര്‍പ്പാക്കും. പരിപാടിയുടെ വിജയത്തിന് വേണ്ടി അഭിഭാഷകരും കക്ഷികളും സഹകരിക്കണമെന്ന് കാസര്‍ഗോഡ് പ്രിന്‍സിപ്പല്‍ ജില്ലാ സെഷന്‍സ് ജഡ്ജി കൂടിയായ ജില്ലാ കോഓര്‍ഡിനേറ്റര്‍ അഭ്യര്‍ഥിച്ചു. ഫോണ്‍: 04994265189.

വായനയുടെ മധുരാനുഭവങ്ങൾ പറഞ്ഞ് ബുക്ക്മേറ്റ്സ് സംഗമം

കമ്പല്ലൂർ: ഈസ്‌റ്റ് എളേരി പഞ്ചായത്തും ലൈബ്രറി കൗൺസിൽ പഞ്ചായത്ത് സമിതിയും ചേർന്ന് നടത്തിയ വായനാ ചാലഞ്ചിലെ വിജയികളുടെ സംഗമം ബുക്ക്മേറ്റ്സ് 2025 നാടിന് അവിസ്മരണീയമായ അനുഭവമായി. പഞ്ചായത്ത് പ്രസിഡന്‍റ് ജോസഫ് മുത്തോലി പരിപാടിയുടെ ഉദ്ഘാടനം നിർവഹിച്ചു. പഞ്ചായത്ത് അംഗം പി.വി. സതീദേവി അധ്യക്ഷയായി. ഏറ്റവും കൂടുതൽ കുട്ടികൾ ചാലഞ്ച് പൂർത്തിയാക്കിയ കമ്പല്ലൂർ ജിഎച്ച്എസ്എസിനും സിആർസി ഗ്രന്ഥശാലയ്ക്കും മാത്യു മാഞ്ഞൂർ സ്‌മാരക പുരസ്‌കാരവും 7500 വീതം രൂപയുടെ പുസ്‌തകങ്ങളും ജില്ലാ ലൈബ്രറി കൗൺസിൽ സെക്രട്ടറി ഡോ.പി. പ്രഭാകരൻ സമ്മാനിച്ചു. മികച്ച ലൈബ്രേറിയൻമാരായി തിരഞ്ഞെടുക്കപ്പെട്ട മിനി സുഭാഷ് (കമ്പല്ലൂർ സിആർസി ഗ്രന്ഥശാല), ആതിര സരിത്ത് (ആയന്നൂർ യുവശക്തി ഗ്രന്ഥശാല), മികച്ച വായന ഡയറികൾ തയ്യാറാക്കിയ ദേവനന്ദ ബിനോയ് (ആയന്നൂർ യുവശക്തി), ദർശിക് പി. ഗോവിന്ദ് (അരിമ്പ എകെജി ഗ്രന്ഥശാല) എന്നിവർക്ക് പഞ്ചായത്ത് പ്രസിഡന്‍റ് ജോസഫ് മുത്തോലി കാഷ് അവാർഡുകൾ വിതരണം ചെയ്തു. മികച്ച വായനാനുഭവങ്ങൾ തയ്യാറാക്കിയ വിദ്യാർഥികളെയും ഡയമണ്ട്, പ്ലാറ്റിനം ചാലഞ്ചുകൾ പൂർത്തിയാക്കിയവരെയും സർട്ടിഫിക്കറ്റുകളും ഉപഹാരങ്ങളും നല്കി ആദരിച്ചു. ബാലസാഹിത്യകാരൻ സുനിൽ കുന്നരു, ബിനോയ് മാത്യു, കെ.ആർ. ലതാഭായി, ജിതേഷ് കമ്പല്ലൂർ, ലിഷ ബിനോയ് എന്നിവർ വിവിധ സെഷനുകൾക്ക് നേതൃത്വം നല്കി. മെന്‍റർ സന്തോഷ് ചിറ്റടി വായന ചാലഞ്ച് അവലോകനം നടത്തി. പഞ്ചായത്ത് സ്ഥിരം സമിതി അധ്യക്ഷരായ പ്രശാന്ത് സെബാസ്റ്റ്യൻ, കെ.കെ. മോഹനൻ, മേഴ്‌സി മാണി, താലൂക്ക് ലൈബ്രറി കൗൺസിൽ പ്രസിഡന്‍റ് കെ.സി. അനിൽകുമാർ, ജില്ലാ ലൈബ്രറി കൗൺസിൽ എക്സിക്യുട്ടീവ് അംഗം പി.കെ. മോഹനൻ, ജില്ലാ കൗൺസിലർ കെ.കെ. ദിപിൻ, എം.എസ്. ഹരികുമാർ, പി. ജനാർദനൻ, പഞ്ചായത്ത് സമിതി കൺവീനർ പി.ഡി. വിനോദ്, സിആർസി ഗ്രന്ഥശാല സെക്രട്ടറി കെ.പി. ബൈജു എന്നിവർ പ്രസംഗിച്ചു.

ആരോഗ്യ കാമ്പയിനുകള്‍ ശക്തിപ്പെടുത്താന്‍ ജില്ലാ വണ്‍ ഹെല്‍ത്ത് കമ്മിറ്റി രൂപീകരിച്ചു

കാസര്‍ഗോഡ്: സംസ്ഥാന സര്‍ക്കാര്‍ നടപ്പിലാക്കുന്ന വിവിധ ആരോഗ്യ കാമ്പയിനുകളുടെ പ്രവര്‍ത്തനങ്ങള്‍ ശക്തിപ്പെടുത്തുന്നതിനായി ജില്ലാ ഇന്‍ഫര്‍മേഷന്‍ ഓഫീസ് പിആര്‍ ചേംബറില്‍ വിവിധ വകുപ്പുകളുടെ ഏകോപന സമിതി യോഗം ചേര്‍ന്നു. സംസ്ഥാന സര്‍ക്കാര്‍ ജൂണ്‍ 16 മുതല്‍ ജൂലൈ 31 വരെ നടത്തുന്ന സ്റ്റോപ്പ് ഡയേറിയ കാമ്പയിന്‍ 2025, ജന്തുജന്യരോഗനിയന്ത്രണ പ്രവര്‍ത്തനങ്ങള്‍, ലോക ജനസംഖ്യദിന പ്രവര്‍ത്തനങ്ങള്‍ എന്നിവയുടെ പുരോഗതിയും ഭാവി പരിപാടികളും യോഗം ചര്‍ച്ച ചെയ്തു. കാസര്‍ഗോഡ് അഡീഷണല്‍ ജില്ലാ മജിസ്‌ട്രേറ്റ് പി. അഖില്‍ അധ്യക്ഷതവഹിച്ചു. ഡോ. ബേസില്‍ വർഗീസ്, പി.പി. ഹസീബ് എന്നിവര്‍ കാമ്പയിന്‍ വിവരങ്ങള്‍ വിശദീകരിച്ചു. ജന്തുജന്യ രോഗങ്ങള്‍ വര്‍ധിച്ചു വരുന്ന സാഹചര്യത്തില്‍ ജില്ലയിലെ രോഗനിരീക്ഷണ, പ്രതിരോധ പ്രവര്‍ത്തങ്ങള്‍ ഏകോപിക്കുന്നതിനായി കാസറഗോഡ് ജില്ലാ ഏകാരോഗ്യ കമ്മിറ്റി രൂപീകരിച്ചു. ജില്ലാ കളക്ടര്‍ ചെയര്‍പേഴ്സണും നവകേരളം കര്‍മപദ്ധതി നോഡല്‍ ഓഫീസര്‍ കണ്‍വീനറുമായ ഈ കമ്മിറ്റിയില്‍ ജില്ലാ മെഡിക്കല്‍ ഓഫീസര്‍, പഞ്ചായത്ത് ഡെപ്യുട്ടി ഡയറക്ടര്‍, ജില്ലാ കൃഷി ഓഫീസര്‍, ജില്ലാ മൃഗസംരക്ഷണ ഓഫീസര്‍, ജില്ലാ ഫിഷറീസ് ഓഫീസര്‍, ജില്ലാ ഫോറസ്റ്റ് ഓഫീസര്‍, ജില്ലാ ഭക്ഷ്യ സുരക്ഷാ ഓഫീസര്‍, ജില്ലാ സര്‍വൈലന്‍സ് ഓഫീസര്‍, എന്നിവരുള്‍പ്പെടെ ബന്ധപ്പെട്ട വകുപ്പുകളിലെ ഉദ്യോഗസ്ഥരും പൊതു സമൂഹത്തിലെ ഒരു പ്രതിനിധിയും അംഗങ്ങളാണ്. ഏകാരോഗ്യം എന്ന ആശയം, കേരളത്തിലെ പ്രത്യേക സാഹചര്യത്തില്‍ ജന്തുജന്യ രോഗങ്ങള്‍ തടയുന്നതില്‍ അതിനുള്ള പ്രാധാന്യം എന്നിവയെക്കുറിച്ച് ഡോ. ബേസില്‍ വര്‍ഗീസ് വിശദീകരിച്ചു. രോഗവ്യാപന സാധ്യത കൂടുതലുള്ള സ്ഥലങ്ങില്‍ വിവിധ വകുപ്പുകളുടെ ഏകോപനത്തോടെ രോഗപ്രതിരോധ പ്രവര്‍ത്തങ്ങള്‍ ഊർജിതപ്പെടുത്താന്‍ യോഗം തീരുമാനിച്ചു. ഏകാരോഗ്യ സമിതി അംഗങ്ങള്‍ കൂടാതെ പട്ടികജാതി, പട്ടികവർഗ വികസന വകുപ്പ്, തൊഴില്‍വകുപ്പ്, പബ്ലിക് റിലേഷന്‍സ് തുടങ്ങിയ വകുപ്പുകളുടെ പ്രതിനിധികളും യോഗത്തില്‍ പങ്കെടുത്തു.

ആരോഗ്യമേഖലയിലെ പ്രശ്‌നങ്ങള്‍ക്ക് അടിയന്തരനടപടി വേണം: സിപിഐ

വെള്ളരിക്കുണ്ട്: ജില്ലയിലെ സാധാരണക്കാരായ ജനങ്ങള്‍ക്ക് വിദഗ്ധ ചികിത്സയടക്കം വേഗത്തില്‍ ലഭ്യമാക്കുന്ന കാര്യത്തില്‍ ജില്ലയിലെ ആരോഗ്യ മേഖലയില്‍ വലിയ കുറവുകള്‍ നിലനില്‍ക്കുകയാണ്. എല്‍ഡിഎഫ് സര്‍ക്കാര്‍ തുടര്‍ച്ചയായി ഒന്പതു വര്‍ഷം സംസ്ഥാനത്ത് അധികാരത്തില്‍ ഇരുന്നിട്ടും കാസർഗോഡ് മെഡിക്കല്‍ കോളജിന്‍റെ പ്രവര്‍ത്തനം പൂര്‍ണമായും ആരംഭിച്ചിട്ടില്ല. മെഡിക്കല്‍ കോളജ് എന്ന ബോര്‍ഡ് സ്ഥാപിച്ച് മറ്റു ഭാഗങ്ങളില്‍നിന്ന് കുറച്ച് ഡോക്ടര്‍മാരെയും ചുരുക്കം മറ്റു ജീവനക്കാരെയും മാറ്റി നിയമിച്ചു എന്നതൊഴിച്ചാല്‍ മറ്റു മാറ്റങ്ങളൊന്നും ഉണ്ടായിട്ടില്ല. ജില്ലാ ആശുപത്രിയോടനുബന്ധിച്ച് നിര്‍മിച്ച ബഹുനില കെട്ടിടം ഇപ്പോഴും ഉപയോഗിക്കുന്നില്ല. ആവശ്യത്തിന് തസ്തികകള്‍ അനുവദിക്കുകയോ അനുവദിച്ച തസ്തികകളില്‍ നിയമിക്കപ്പെട്ടവര്‍ അവധിയെടുത്തു പോകുന്നത് തടയുകയോ ചെയ്യുന്നില്ല. പുതിയ കെട്ടിടങ്ങള്‍ക്കും ഉപകരണങ്ങള്‍ക്കും സര്‍ക്കാർ‍ ഫണ്ട് അനുവദിച്ചാലും അവ നടപ്പില്‍ വരുത്താന്‍ വര്‍ഷങ്ങള്‍ എടുക്കുന്ന സ്ഥിതിയാണ്. ഇക്കാര്യത്തില്‍ ഒരു ജാഗ്രതയും അധികാരികളുടെ ഭാഗത്തുനിന്നും ഉണ്ടാകുന്നില്ല. കോവിഡ് കാലത്ത് ചട്ടഞ്ചാല്‍ ആരംഭിച്ച ടാറ്റ കോവിഡ് ആശുപത്രി സൂപ്പര്‍ സ്‌പെഷാലിറ്റി ആശുപത്രിയായി ഉയര്‍ത്തുമെന്ന് പ്രഖ്യാപിച്ചതല്ലാതെ പ്രവര്‍ത്തനം ആരംഭിച്ചിട്ടില്ല. ഇതിന്‍റെയൊക്കെ ഫലമായി ജനങ്ങള്‍ക്ക് വിദഗ്ധ ചികിത്സയ്ക്ക് വേണ്ടി തൊട്ടടുത്ത സംസ്ഥാനമായ കര്‍ണാടകയിലെ മംഗലാപുരത്തെ സ്വകാര്യ ആശുപത്രികളെ ആശ്രയിക്കേണ്ടി വരുന്നു. ഇത്തരം പ്രശ്‌നങ്ങള്‍ക്ക് പരിഹാരം എന്ന നിലയില്‍ ജില്ലയിലെ മെഡിക്കല്‍ കോളേജിന്‍റെ പ്രവര്‍ത്തനങ്ങള്‍ അടിയന്തരമായി പൂര്‍ത്തിയാക്കി പൂര്‍ണതോതില്‍ പ്രവര്‍ത്തനം ആരംഭിക്കണമെന്നും നിലവിലെ ഒഴിവുകള്‍ നികത്തി അധിക തസ്തികള്‍ സൃഷ്ടിച്ച ആരോഗ്യ മേഖലയിലെ സേവനങ്ങള്‍ മെച്ചപ്പെടുത്താന്‍ അടിയന്തര നടപടികള്‍ സ്വീകരിക്കണമെന്നും സമ്മേളനം ആവശ്യപ്പെട്ടു. സമ്മേളനം മൂന്ന് കാന്‍റിഡേറ്റ് അംഗങ്ങള്‍ ഉള്‍പ്പെടെ 38 അംഗ ജില്ലാ കൗണ്‍സിലിനെയും ഒന്പതംഗ സംസ്ഥാന സമ്മേളന പ്രതിനിധികളെയും തെരഞ്ഞെടുത്തു. ജില്ലാ കൗണ്‍സിലംഗങ്ങള്‍: സി.പി. ബാബു, ഗോവിന്ദന്‍ പള്ളിക്കാപ്പില്‍, ടി. കൃഷ്ണന്‍, കെ.വി. കൃഷ്ണന്‍, ബങ്കളം കുഞ്ഞികൃഷ്ണന്‍, വി. രാജന്‍, എം. അസിനാര്‍, കെ.എസ്. കുര്യാക്കോസ്, അഡ്വ.വി. സുരേഷ് ബാബു, എം. കുമാരന്‍ (മുന്‍ എംഎൽഎ), പി. ഭാര്‍ഗവി, രാമകൃഷ്ണകടമ്പാര്‍, ജയരാമബല്ലംകൂടല്‍, എസ്. രാമചന്ദ്ര, എം.സി. അജിത്, ബിജു ഉണ്ണിത്താന്‍, കെ. കുഞ്ഞിരാമന്‍, രേണുക ഭാസ്‌കരന്‍, തുളസീധരന്‍ ബളാനം, എം. കൃഷ്ണന്‍, കെ. ചന്ദ്രശേഖരഷെട്ടി, ബി. സുകുമാരന്‍, എന്‍. ബാലകൃഷ്ണന്‍, കരുണാകരന്‍ കുന്നത്ത്, എ. ദാമോദരന്‍, എം. ശ്രീജിത്ത്, സി.വി. വിജയരാജ്, പി. വിജയകുമാര്‍, മുകേഷ് ബാലകൃഷ്ണന്‍, എന്‍. പുഷ്പരാജ്, എ. രാഘവന്‍, രവീന്ദ്രന്‍ മാണിയാട്ട്, പി. മിനി, രാധാകൃഷ്ണന്‍ പെരുമ്പള, മേരി ജോര്‍ജ് എന്നിവരെയും കാൻഡിഡേറ്റ് മെംബര്‍മാരായി ടി.എം. അബ്ദുള്‍ റസാഖ് , കെ.ആര്‍. ഹരിഷ് , രേഖ ചിപ്പാര്‍ എന്നിവരെയും ജില്ലാ സമ്മേളനം തെരഞ്ഞെടുത്തു. സംസ്ഥാന സമ്മേളന പ്രതിനിധികള്‍: ഗോവിന്ദൻ പള്ളിക്കാപ്പില്‍, ടി. കൃഷ്ണന്‍, സി.പി. ബാബു, പി. ഭാര്‍ഗവി, എം. കുമാരന്‍ (മുന്‍ എംഎല്‍എ), കെ.വി. കൃഷ്ണന്‍, അഡ്വ.വി.സുരേഷ് ബാബു, രാമകൃഷ്ണ കടമ്പാര്‍ എന്നിവരെ സംസ്ഥാന സമ്മേളന പ്രതിനിധികളായും എം. ശ്രീജിത്തിനെ പകരം പ്രതിനിധിയായും സമ്മേളനം തെരഞ്ഞെടുത്തു.

ഉന്നതവിജയികള്‍ക്ക് അനുമോദനം

കാസര്‍ഗോഡ്: പൊതുപരീക്ഷകളില്‍ നേട്ടം കൈവരിച്ച വിദ്യാര്‍ഥികളെയും വിദ്യാലയങ്ങളെയും അനുമോദിക്കാന്‍ ജില്ലാ പഞ്ചായത്ത് സംഘടിപ്പിച്ച പരിപാടി മന്ത്രി എ.കെ. ശശീന്ദ്രന്‍ ഉദ്ഘാടനം ചെയ്തു. ജില്ലയില്‍ നിന്നും ഇന്ത്യന്‍ ഫുട്‌ബോള്‍ ടീമില്‍ അംഗമായ പി. മാളവികയെയും ഇന്ത്യ ബുക് ഓഫ് റെക്കോര്‍ഡ്സില്‍ ഇടം നേടിയ നിത ലക്ഷ്മിയെയും ചടങ്ങില്‍ മന്ത്രി അനുമോദിച്ചു. തുടര്‍ന്ന് എസ്എസ്എല്‍സി പരീക്ഷയില്‍ നൂറുശതമാനം വിജയം നേടിയ വിദ്യലയങ്ങളും ഹയര്‍സെക്കന്‍ഡറി പരീക്ഷയില്‍ 1195 നു മുകളില്‍ മാര്‍ക്ക് വാങ്ങിയ കുട്ടികളും വൊക്കേഷണല്‍ ഹയര്‍ സെക്കണ്ടറി വിഭാഗത്തില്‍ ഏറ്റവും കൂടുതല്‍ വിജയ ശതമാനമുള്ള ആദ്യ നാലു വിദ്യാലയങ്ങളും ഹയര്‍ സെക്കണ്ടറി പരീക്ഷയില്‍ഏറ്റവും കൂടുതല്‍ വിജയ ശതമാനം ഉള്ള ആദ്യ അഞ്ചു സര്‍ക്കാര്‍, എയ്ഡഡ് വിദ്യലയങ്ങളും മന്ത്രിയില്‍ നിന്ന് അനുമോദനങ്ങള്‍ ഏറ്റുവാങ്ങി. മുനിസിപ്പല്‍ കോണ്‍ഫറന്‍സ് ഹാളില്‍ സംഘടിപ്പിച്ച ചടങ്ങില്‍ ജില്ലാ പഞ്ചായത്ത് പ്രസിഡന്‍റ് ബേബി ബാലകൃഷ്ണന്‍ അധ്യക്ഷവഹിച്ചു. നഗരസഭ ചെയര്‍മാന്‍ അബ്ബാസ് ബീഗം, ജില്ല പഞ്ചായത്ത് വൈസ് പ്രസിഡന്‍റ് ഷാനവാസ് പാദൂര്‍, സ്ഥിരംസമിതി അധ്യക്ഷരായ കെ. ശകുന്തള, എം. മനു, ജില്ല പഞ്ചായത്തംഗങ്ങളായി സി.ജെ സജിത്, ജോമോന്‍ ജോസ്, ജാസ്മിന്‍ കബീര്‍, ഹയര്‍സെക്കന്‍ഡറി റീജിയണല്‍ ഡെപ്യൂട്ടി ഡയറക്ടര്‍ ബിയാട്രീസ് മരിയ, എഡിവിഎച്ച്‌സി ഇ.ആര്‍. ഉദയകുമാരി, എസ്എസ്‌കെ ജില്ല കോഓര്‍ഡിനേറ്റര്‍ വി.എസ്. ബിജുരാജ്, വിദ്യകിരണം ജില്ല പ്രൊജക്റ്റ് കോഓര്‍ഡിനേറ്റര്‍ ടി. പ്രകാശന്‍, ഹയര്‍സെക്കന്‍ഡറി ജില്ലാ കോര്‍ഡിനേറ്റര്‍ സി.വി. അരവിന്ദാക്ഷന്‍ എന്നിവര്‍ പങ്കെടുത്തു. ജില്ലാ വിദ്യാഭാസ ഉപ ഡയറക്ടര്‍ ടി.വി. മധുസൂദനന്‍ സ്വാഗതവും ജില്ല പഞ്ചായത്ത് സെക്രടറി എസ്. ശ്യാമലക്ഷ്മി നന്ദിയും പറഞ്ഞു.

സഹായം ചോദിച്ചെത്തി ഐഫോൺ തട്ടിയെടുത്തു

കാഞ്ഞങ്ങാട്: സുഖമില്ലാതെ ആശുപത്രിയിലുള്ള ഭാര്യയെ വിളിക്കാനാണെന്നുപറഞ്ഞ് വിദ്യാർഥിയുടെ ഐഫോൺ വാങ്ങിയ ആൾ ഫോൺ തട്ടിയെടുത്ത് കടന്നു. സ്വകാര്യ ഐടി സ്ഥാപനത്തിലെ വിദ്യാർഥി കാഞ്ഞങ്ങാട് സ്വദേശി ഋത്വിക്കിനാണ് ഫോൺ നഷ്ടമായത്. കഴിഞ്ഞ ദിവസം ഉച്ചയോടെ കാഞ്ഞങ്ങാട് ബസ് സ്റ്റാൻഡിലേക്ക് നടന്നുപോകുന്നതിനിടയിലാണ് അപരിചിതനായ ആൾ ഫോൺ ചോദിച്ചെത്തിയത്. ഫോണിൽ സംസാരിച്ചുകൊണ്ട് പതുക്കെ നടന്നുനീങ്ങിയ ആൾ പെട്ടെന്ന് ഓടിപ്പോകുകയായിരുന്നു. വിദ്യാർഥി പിന്തുടരാൻ ശ്രമിച്ചെങ്കിലും ഇയാൾ റെയിൽവ സ്റ്റേഷൻ ഭാഗത്തേക്ക് ഓടിമറഞ്ഞു. ഋത്വിക്കിന്‍റെ പരാതിയിൽ ഹോസ്ദുർഗ് പോലീസ് കേസെടുത്തു. ഇയാൾ നഗരത്തിലെ മൊബൈൽ ഫോൺ കടയിൽനിന്നും ഇതേ രീതിയിൽ ഫോൺ തട്ടിയെടുക്കാൻ ശ്രമിച്ചിരുന്നതായി വിവരം ലഭിച്ചിട്ടുണ്ട്.

രാജപുരത്തെ കള്ളത്തോക്ക് നിര്‍മാണം: രണ്ടുപേർ കൂടി അറസ്റ്റില്‍

രാജപുരം: രാജപുരത്തെ കള്ളത്തോക്ക് നിര്‍മാണവുമായി ബന്ധപ്പെട്ട് രണ്ടുപേർ കൂടി അറസ്റ്റിൽ. പാലംകല്ലിലെ സന്തോഷ് വിജയന്‍ (36), പരപ്പ മുണ്ടത്തടത്തെ പി.ജി.ഷാജി (55) എന്നിവരെയാണ് അറസ്റ്റ് ചെയ്തത്. ഇരുവരും കര്‍ണാടകയിലേക്ക് കടക്കാന്‍ ശ്രമിക്കുന്നതിനിടയിലാണ് പിടിയിലായതെന്ന് പോലീസ് പറഞ്ഞു. നേരത്തേ അറസ്റ്റിലായ കേസിലെ ഒന്നാം പ്രതി അജിത്കുമാറിനെ പോലീസ് കസ്റ്റഡിയില്‍ വാങ്ങിയിട്ടുണ്ട്. സന്തോഷിനും ഷാജിക്കും വേണ്ടിയാണ് ഇയാൾ തോക്ക് നിര്‍മിച്ചതെന്നും കേസില്‍ ഒരാള്‍ കൂടി ഉള്‍പ്പെട്ടിട്ടുണ്ടെന്നും സിഐ പി.രാജേഷ് പറഞ്ഞു. തോക്ക് നിര്‍മാണത്തിനായി വീട് വാടകയ്‌ക്കെടുത്തതും തോക്ക് നിര്‍മിക്കാനാവശ്യമായ സാധനങ്ങള്‍ വാങ്ങിയതും രണ്ടാം പ്രതി സന്തോഷാണ്. പ്രതികൾ വിവിധ നായാട്ടുസംഘങ്ങളിൽ ഉൾപ്പെട്ടവരാണ്. കേസിലെ നാലാമന് വേണ്ടിയുള്ള അന്വേഷണം തുടരുകയാണെന്നും പോലീസ് അറിയിച്ചു. ബേക്കല്‍ ഡിവൈഎസ്പി വി.വി.മനോജ് കുമാര്‍ രാജപുരം സ്റ്റേഷനിലെത്തി പ്രതികളെ ചോദ്യം ചെയ്തു. ഇന്നലെ അറസ്റ്റിലായ രണ്ട് പ്രതികളെയും കോടതിയില്‍ ഹാജരാക്കി റിമാന്‍ഡ് ചെയ്തു.

മിയാവാക്കി വനവും ശലഭോദ്യാനവും ഒരുക്കും: മന്ത്രി ശശീന്ദ്രന്‍

കാഞ്ഞങ്ങാട്: വനം വകുപ്പിന്‍റെ സഹകരണത്തോടെ അജാനൂരില്‍ മിയാവാക്കി വനവും തൃക്കരിപ്പൂര്‍ ഇളമ്പച്ചിയില്‍ ശലഭോദ്യാനവും ഒരുക്കുമെന്ന് വനംമന്ത്രി എ.കെ. ശശീന്ദ്രന്‍. അജാനൂര്‍ പഞ്ചായത്ത് ആനന്ദവനം വനവത്കരണപദ്ധതിയുടെ ഭാഗമായി സോഷ്യല്‍ ഫോറസ്ട്രിയുമായി സഹകരിച്ച് ആനന്ദാശ്രമത്തിന് സമീപം മൂന്നേക്കര്‍ പഞ്ചായത്ത് കൈവശ ഭൂമിയില്‍ വൃക്ഷത്തൈകള്‍ നട്ടുപിടിപ്പിക്കലിന്‍റെ ഉദ്ഘാടനം നിര്‍വ്വഹിച്ച് സംസാരിക്കുകയായിരുന്നു മന്ത്രി. ജില്ലയിലെ തന്നെ ഏറ്റവും വലിയ പച്ചതുരുത്തായ ആനന്ദവനം പദ്ധതിക്കുവേണ്ടി വര്‍ഷങ്ങളായി നടത്തിയ പരിശ്രമത്തിന്‍റെ ഭാഗമായിട്ടാണ് കുന്നിന്‍ ചെരിവില്‍ വനവത്കരണം സാധ്യമായത്. മുന്‍ പഞ്ചായത്ത് പ്രസിഡന്‍റ് ചെറാക്കോട്ട് കുഞ്ഞിക്കണ്ണന്‍റെ നേതൃത്വത്തിലുള്ള ഭരണസമിതിയാണ് വനവത്കരണം ആരംഭിച്ചത്. തൊഴിലുറപ്പ് പദ്ധതിയുടെ സഹായത്തോടെ ആയിരം വൃക്ഷത്തൈ വച്ചുപിടിപ്പിച്ചെങ്കിലും തുടര്‍ന്നുള്ള വര്‍ഷങ്ങളില്‍ ഉണ്ടായ തീപിടുത്തവും പ്രതികൂല കാലാവസ്ഥയും കാരണം പലതും നശിച്ചുപോയിരുന്നു. തുടര്‍ന്നുള്ള വര്‍ഷങ്ങളില്‍ നടത്തിയ വനവത്കരണത്തിന്‍റെ ഭാഗമായി നിലവില്‍ ആനന്ദവനത്തില്‍ കുമുദ്, നെല്ലി, വേങ്ങ, മരുത്, കാറ്റാടി, പതിമുഖം, താന്നി, കാഞ്ഞിരം, പുളി, കായല്, കൊന്ന, പുകില്, കശുമാവ്, മാവ് എന്നിങ്ങനെ ആയിരത്തിലധികം വൃക്ഷങ്ങള്‍ വളര്‍ന്നുവലുതായിട്ടുണ്ട്. 2025 - 26 വാര്‍ഷിക പദ്ധതിയുടെ ഭാഗമായാണ് സോഷ്യല്‍ ഫോറസ്ട്രിയുമായി കൈകോര്‍ത്ത് ആയിരം വൃക്ഷത്തൈകള്‍ പ്രദേശത്ത് നട്ടുപിടിപ്പിക്കുന്നത്.ഇ. ചന്ദ്രശേഖരന്‍ എംഎല്‍എ അധ്യക്ഷതവഹിച്ചു. ജില്ലാ പഞ്ചായത്ത് പ്രസിഡന്‍റ് ബേബി ബാലകൃഷ്ണന്‍ മുഖ്യാതിഥിയായി. പഞ്ചായത്ത് വൈസ് പ്രസിഡന്‍റ് കെ. സബീഷ്, കെ. മീന, കെ. കൃഷ്ണന്‍, ഷീബ ഉമ്മര്‍, എ.ജി. പുഷ്പ, ലക്ഷ്മി തമ്പാന്‍, കെ.ആര്‍. ശ്രീദേവി, കെ. ബാലകൃഷ്ണന്‍, മൂലക്കണ്ടം പ്രഭാകരന്‍, എ. തമ്പാന്‍, കരീം ചന്തേര, എക്കാല്‍ കുഞ്ഞിരാമന്‍, ബഷീര്‍ വെള്ളിക്കോത്ത്, പ്രസാദ് മിഥില, പി.പി. രാജു, കെ.സി. മുഹമ്മദ്കുഞ്ഞി എന്നിവര്‍ സംസാരിച്ചു. പഞ്ചായത്ത് പ്രസിഡന്‍റ് ടി. ശോഭ സ്വാഗതവും സെക്രട്ടറി കെ.എച്ച്. അനീഷ്‌കുമാര്‍ നന്ദിയും പറഞ്ഞു.

രാജ്യസ്നേഹമെന്നാല്‍ കേന്ദ്രസര്‍ക്കാരിനോടുള്ള അമിതവിധേയത്വമല്ല: പ്രകാശ് ബാബു

വെള്ളരിക്കുണ്ട്: രാജ്യസ്നേഹമെന്നത് കേന്ദ്രസര്‍ക്കാരിനോടുള്ള അമിത വിധേയത്വമല്ലെന്ന് സിപിഐ ദേശീയ നിര്‍വാഹകസമിതിയംഗം കെ. പ്രകാശ്ബാബു. സിപിഐ ജില്ലാ സമ്മേളനത്തിന്‍റെ പ്രതിനിധി സമ്മേളനം വെള്ളരിക്കുണ്ട് വീനസ് ഓഡിറ്റോറിയത്തില്‍ ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം. വിവിധ മേഖലകളില്‍ കേന്ദ്ര ഭരണാധികാരികള്‍ക്കെതിരെയുള്ള പരാമര്‍ശംപോലും രാജ്യസ്നേഹത്തിന് എതിരെന്ന നിലയിലാണ് മോദി സര്‍ക്കാര്‍ കാണുന്നത്. ഇന്ത്യയുടെ വിദേശ നയത്തില്‍ വന്ന മാറ്റങ്ങള്‍ അമേരിക്കന്‍ വിധേയത്വം മുറുകേ പിടിക്കുന്നതാണ്. ഈ മാറ്റങ്ങള്‍ 2014ന് മുമ്പേ കോണ്‍ഗ്രസ് തുടക്കം കുറിച്ചതാണെങ്കിലും അത് ഇപ്പോള്‍ തീവ്രമായി കൊണ്ടുപോകുകയാണ് മോദി സര്‍ക്കാര്‍. തൊഴിലുറപ്പ് ബജറ്റ് വിഹിതം ഓരോ വര്‍ഷവും വെട്ടിക്കുറക്കുകയാണ്. കര്‍ഷകരുടെ വരുമാനം ഇരട്ടിപ്പിക്കാനുള്ള പദ്ധതി പ്രഖ്യാപിച്ച പ്രധാനമന്ത്രി കാര്‍ഷികവിളകള്‍ക്ക് താങ്ങുവിലപോലും പ്രഖ്യാപിക്കുന്നില്ല. രാസവളത്തിന്‍റെ 80 ശതമാനവും ഇറക്കുമതി ചെയ്യുകയാണ്. ഇത്രയും വളര്‍ന്ന രാജ്യത്തിന് രാസവളം ഇറക്കുമതി ചെയ്യേണ്ടി വരുന്നത് ലജ്ജാകരമാണ്. ഇറക്കുമതി ചെയ്യുന്ന വളത്തിന്‍റെ പായ്ക്കറ്റിന്‍റെ പുറത്ത് നരേന്ദ്ര മോദിയുടെ ഫോട്ടോയും അകത്ത് ചൈനയുടെ ഉത്പന്നവുമാണ്. ഇന്ത്യയെ പരാശ്രയത്തിലേക്ക് കൊണ്ടുപോവുകയാണ് മോദി സര്‍ക്കാര്‍. ഫാസിസത്തിനെതിരായ പോരാട്ടമാണ് കമ്മ്യൂണിസ്റ്റുകാര്‍ ഈ കാലഘട്ടത്തില്‍ ഏറ്റവും പ്രധാനമായും ഏറ്റെടുക്കേണ്ടത്. ഇന്ത്യന്‍ ഭരണഘടനയും മതേതരത്വവും സംരക്ഷിക്കുന്നതിനുവേണ്ടിയുള്ള പോരാട്ടം നമ്മുടെ ഏറ്റവും പ്രധാനപ്പെട്ട കടമയായി മാറണമെന്നും അദ്ദേഹം പറഞ്ഞു. പി. സന്തോഷ് കുമാര്‍ എംപി, ഇ. ചന്ദ്രശേഖരന്‍ എംഎല്‍എ, മന്ത്രി ജി.ആര്‍. അനില്‍, സി.പി. മുരളി, പി. വസന്തം, കെ.കെ. അഷ്‌റഫ്, സി.പി. ബാബു, എം. അസിനാര്‍, വി. രാജന്‍, ഗോവിന്ദന്‍ പള്ളിക്കാപ്പില്‍, ബങ്കളം കുഞ്ഞികൃഷ്ണന്‍, കെ.വി. കൃഷ്ണന്‍, പി. ഭാര്‍ഗവി, വി. സുരേഷ് ബാബു എന്നിവര്‍ സംബന്ധിച്ചു. കെ.എസ്. കുര്യാക്കോസ് സ്വാഗതം പറഞ്ഞു. സിപിഐ മന്ത്രിമാര്‍ക്ക് രൂക്ഷവിമര്‍ശനം സിപിഐ ജില്ലാ സമ്മേളനത്തില്‍ പാര്‍ട്ടിയുടെ മന്ത്രിമാര്‍ക്ക് രൂക്ഷവിമര്‍ശനം. ഭക്ഷ്യ-സിവില്‍സപ്ലൈസ് മന്ത്രി ജി.ആര്‍. അനിലിന്‍റെ സാന്നിധ്യത്തില്‍ നടന്ന ചര്‍ച്ചയില്‍ അദ്ദേഹത്തിന്‍റെ വകുപ്പിനു തന്നെയാണ് ഏറ്റവുമധികം വിമര്‍ശനം ഏറ്റുവാങ്ങേണ്ടിവന്നത്. വിലക്കയറ്റം രൂക്ഷമായിക്കൊണ്ടിരിക്കുന്ന ഈ കാലഘട്ടത്തില്‍ സിവില്‍ സപ്ലൈസ് ഔട്ട്‌ലെറ്റുകള്‍ അവശ്യസാധനങ്ങളില്ലാതെ കാലിയടിച്ചുകിടക്കുന്നത് ജനങ്ങളില്‍ ഏറെ അവമതിപ്പുണ്ടാക്കിയെന്ന് വിമര്‍ശനമുയര്‍ന്നു. റവന്യു പോലെ പ്രധാനപ്പെട്ട വകുപ്പ് പാര്‍ട്ടിയുടെ കൈയിലുണ്ടായിട്ടും സിപിഎമ്മാണ് അവിടെ കാര്യങ്ങള്‍ നിയന്ത്രിക്കുന്നതെന്നും വിമര്‍ശനമുയര്‍ന്നു. ജനോപകാരപ്രദമായ പുതിയ പദ്ധതികള്‍ ആവിഷ്‌കരിക്കുന്നതില്‍ മന്ത്രിമാര്‍ പരാജയപ്പെട്ടെന്നും മുന്‍കാലങ്ങളില്‍ സിപിഐ മന്ത്രിമാര്‍ക്ക് ലഭിച്ചിരുന്ന സ്വീകാര്യത കുറഞ്ഞുവരികയാണെന്നും പ്രതിനിധികള്‍ ആരോപിച്ചു. സര്‍ക്കാര്‍ ഓഫീസുകളിലെ ഒഴിവുകള്‍ നികത്തണം: സിപിഐ ജില്ലയിലെ സര്‍ക്കാര്‍ ഓഫീസുകളിലെ 1500ലധികം ഒഴിവുകള്‍ നികത്തുന്നതിന് അടിയന്തരനപടി സ്വീകരിക്കണമെന്ന് സിപിഐ ജില്ലാ സമ്മേളനം ആവശ്യപ്പെട്ടു. ഇതുമൂലം സര്‍ക്കാരിന്‍റെ പദ്ധതികളും ദൈനംദിന പ്രവര്‍ത്തനങ്ങളും കാര്യക്ഷമമായി നടത്തുവാന്‍ കഴിയുന്നില്ല. വില്ലേജ് ഓഫീസുകളിലേതടക്കം പ്രധാനപ്പെട്ട നിരവധി തസ്തികളും ഒഴിഞ്ഞുകിടക്കുന്നു. മറ്റു ജില്ലകളില്‍ നിന്നു വരുന്നവര്‍ അവധി എടുക്കുകയോ ഏതെങ്കിലും വിധത്തില്‍ മറ്റു മേഖലയിലേക്ക് ഡെപ്യൂട്ടേഷന്‍ പോലെയുള്ള മാര്‍ഗങ്ങള്‍ ഉപയോഗിച്ച് സ്ഥലംമാറ്റം തരപ്പെടുത്തുകയോ ചെയ്യുന്നു. സര്‍വേ വകുപ്പില്‍ നിന്നും സ്ഥലംമാറിപോയ 30 ലധികം സര്‍വേയര്‍മാര്‍ക്ക് പകരം ആരെയും നിയമിച്ചിട്ടില്ല. മറ്റു ജില്ലകളില്‍ നിന്നു ശിക്ഷാനടപടികള്‍ക്ക് വിധേയരാകുന്നവരെ ശിക്ഷാനടപടികളുടെ ഭാഗമായി നിയമിക്കുന്നതും കാസര്‍ഗോഡ് ജില്ലയിലാണ്. ജില്ലയിലെ സര്‍വീസ് മേഖലയുടെ കാര്യക്ഷമതയെ ഇതു ദോഷകരമായി ബാധിക്കുന്നതായുംസമ്മേളനം കുറ്റപ്പെടുത്തി.

വെറുതേ ഈ നഗരസഭാ കെട്ടിടങ്ങൾ

കാസർഗോഡ്: ലക്ഷങ്ങൾ ചെലവഴിച്ച് കെട്ടിടങ്ങൾ നിർമിക്കാനും മോടിപിടിപ്പിക്കാനും കാണിക്കുന്ന താത്പര്യം അവ ഉപയുക്തമാക്കുന്ന കാര്യത്തിൽ കാസർഗോഡ് നഗരസഭയുടെ ഭാഗത്തുനിന്നുണ്ടാകുന്നില്ലെന്ന് പരാതി. 40 വർഷത്തിലേറെ പഴക്കമുള്ള പാലിക ഭവൻ നഗരസഭാ ലോഡ്ജ് മുതൽ വഴിയോര കച്ചവടക്കാരുടെ പുനരധിവാസത്തിനായി പുതിയ ബസ് സ്റ്റാൻഡിൽ നിർമിച്ച കടമുറികൾ വരെ ഇതിനുദാഹരണങ്ങളായി നിൽക്കുകയാണ്. 1982 ലാണ് കാസർഗോഡ് ബാങ്ക് റോഡിൽ ടൗൺ യുപി സ്കൂളിന് എതിർവശത്തായി നഗരസഭയുടെ ഉടമസ്ഥതയിൽ അഞ്ചുനില കെട്ടിടത്തിന്‍റെ നിർമാണം തുടങ്ങിയത്. നഗരസഭകൾക്ക് കൂടുതൽ അധികാരങ്ങൾ നല്കിയ നഗരപാലിക ബില്ലിന്‍റെ പേരുചേർത്താണ് കെട്ടിടസമുച്ചയത്തിന് പാലിക ഭവൻ എന്ന് പേരിട്ടത്. എന്നാൽ കെട്ടിടം തുറന്ന് കാലങ്ങളായിട്ടും ആദ്യ രണ്ട് നിലകളിലെ വാണിജ്യ ആവശ്യത്തിനുള്ള മുറികൾ മാത്രമാണ് കൃത്യമായി ഉപയോഗിക്കാൻ കഴിഞ്ഞിട്ടുള്ളത്. മുകളിലത്തെ മൂന്നു നിലകളിലായി ഒരുക്കിയ ലോഡ്ജ് മുറികൾ തുടക്കകാലം മുതൽ കാര്യമായി ആരും എടുക്കാനില്ലാതെ വെറുതേ കിടക്കുകയാണ്. 12 ഡബിൾ റൂമുകളും 10 സിംഗിൾ റൂമുകളുമൊക്കെ ഉണ്ടെങ്കിലും സർക്കാർ ജീവനക്കാർക്കോ വിദ്യാഭ്യാസ സ്ഥാപനങ്ങൾക്കോ വേണ്ടിയുള്ള ഹോസ്റ്റലായി പോലും ഇവ ഒരിക്കലും പ്രയോജനപ്പെടുത്തിയില്ല. എന്നിട്ടും എട്ടുവർഷം മുമ്പ് നഗരസഭ വീണ്ടും 30 ലക്ഷത്തോളം രൂപ ചെലവിട്ട് ഈ മുറികളിൽ പുതിയ ഫാനുകളും മറ്റും സ്ഥാപിക്കുകയും ശുചിമുറികൾ നവീകരിക്കുകയുമൊക്കെ ചെയ്തിരുന്നു. പക്ഷേ താമസിക്കാൻ ആരുമെത്തിയില്ലെന്നു മാത്രം. ഒടുവിൽ കോവിഡ് കാലത്ത് ഇവിടം ചികിത്സാകേന്ദ്രമാക്കാൻ ശ്രമിച്ചപ്പോഴേക്കും കാലങ്ങളായി അടഞ്ഞുകിടന്നതുമൂലം വൈദ്യുതിബന്ധം പോലും വിച്ഛേദിക്കപ്പെട്ട നിലയിലായിരുന്നു. ഇപ്പോൾ കാലപ്പഴക്കം മൂലം പല മുറികളിലും ചുവരിലും മേൽക്കൂരയിലും നിന്ന് സിമന്‍റ് പാളികൾ അടർന്നുവീഴുന്ന നിലയിലായി. ഇനി ഈ കെട്ടിടം അധികനാൾ നിലനിർത്താനാവുമെന്ന് നഗരസഭാ അധികൃതർ പോലും പ്രതീക്ഷിക്കുന്നില്ല. താഴെയുള്ള രണ്ട് നിലകളിലെ വ്യാപാരസ്ഥാപനങ്ങളിൽ നിന്ന് ഇത്രനാളും കിട്ടിയ വാടക മാത്രമാണ് ഈ കെട്ടിടം കൊണ്ട് നഗരസഭയ്ക്കുണ്ടായ പ്രയോജനം. നാല് പതിറ്റാണ്ട് മുമ്പ് നിർമിച്ച കെട്ടിടത്തിന്‍റെ കഥ ഇങ്ങനെയാണെങ്കി ഇപ്പോഴത്തെ ഭരണസമിതിയുടെ കാലത്തുതന്നെ രണ്ടുവർഷം മുമ്പ് പുതിയ ബസ് സ്റ്റാൻഡിൽ വഴിയോര കച്ചവടക്കാരുടെ പുനരധിവാസത്തിനായി 28 ലക്ഷം രൂപ ചെലവഴിച്ച് നിർമിച്ച കെട്ടിടം ഇതുവരെ തുറക്കാൻ കഴിഞ്ഞിട്ടില്ല. 33 കടമുറികളാണ് ഇതിലുള്ളത്. പഴയ ബസ് സ്റ്റാൻഡിലും ജനറൽ ആശുപത്രി പരിസരത്തും കാലങ്ങളായി വഴിയോര കച്ചവടവും ലോട്ടറി കച്ചവടവും നടത്തുന്ന 33 പേരെ ഇവിടേക്ക് പുനരധിവസിപ്പിക്കാനായിരുന്നു പദ്ധതി. പഴയ ബസ് സ്റ്റാൻഡിലെ വഴിയോര കച്ചവടം കാൽനടയാത്രക്കാർക്കും വാഹനങ്ങൾക്കും മറ്റു വ്യാപാരികൾക്കുമെല്ലാം ബുദ്ധിമുട്ട് സൃഷ്ടിക്കുന്നുണ്ടെന്ന പരാതിയെ തുടർന്നായിരുന്നു നഗരസഭ ഇങ്ങനെയൊരാശയം കൊണ്ടുവന്നത്. എന്നാൽ തിരക്കേറിയ പഴയ ബസ് സ്റ്റാൻഡ് പരിസരത്ത് കിട്ടുന്ന കച്ചവടം ഇവിടെ കിട്ടാനിടയില്ലെന്നു ചൂണ്ടിക്കാട്ടി വഴിയോര കച്ചവടക്കാർ ഇവിടേക്ക് വരാൻ മടിക്കുകയാണ്. അവരുടെ ആശങ്കകൾ ചർച്ചയിലൂടെ പരിഹരിക്കാനാണ് ഇപ്പോൾ നഗരസഭയുടെ ശ്രമം. അത് എന്നേക്ക് നടക്കുമെന്ന കാര്യത്തിൽ ഇപ്പോഴും വ്യക്തതയില്ല. വഴിയോര കച്ചവടക്കാർക്ക് ഇവിടേക്കുവരാൻ താത്പര്യമില്ലായിരുന്നെങ്കിൽ നഗരസഭ ലക്ഷങ്ങൾ ചെലവഴിച്ച് ഇത്രയും കടമുറികൾ നിർമിക്കേണ്ട ആവശ്യമെന്തായിരുന്നുവെന്ന ചോദ്യവും ബക്കിയാണ്.

രക്തദാന ക്യാമ്പ് നടത്തി

പാലാവയൽ: സെന്‍റ് ജോൺസ് ഹയർ സെക്കൻഡറി സ്കൂൾ എൻഎസ്എസ് യൂണിറ്റും പാലാവയൽ സ്പോർട്സ് ക്ലബും ചെറുപുഴ ലീഡർ & പൾസ് ഹോസ്പിറ്റലും ചേർന്ന് സ്പോർട്സ് ക്ലബ് ഓഡിറ്റോറിയത്തിൽ സംഘടിപ്പിച്ച രക്തദാന ക്യാമ്പ് സ്കൂൾ മാനേജർ ഫാ. ജോസ് മാണിക്കത്താഴെ ഉദ്ഘാടനം ചെയ്തു. പഞ്ചായത്ത് ആരോഗ്യ വിദ്യാഭ്യാസ സ്ഥിരം സമിതി ചെയർമാൻ പ്രശാന്ത് പാറേക്കുടിയിൽ അധ്യക്ഷത വഹിച്ചു. പ്രിൻസിപ്പൽ ഡോ. മെൻഡലിൻ മാത്യു, ഡോ. മുനിസ്വാമി, സജീവ് മലേപ്പറമ്പിൽ, പിടിഎ പ്രസിഡന്‍റ് സോമി അറക്കൽ, ക്ലബ് സെക്രട്ടറി പി.കെ. ജോസഫ് എന്നിവർ പ്രസംഗിച്ചു. 120 തവണയിലധികം രക്തദാനം നടത്തിയ ജോസഫ് വടക്കേപറമ്പിലിനെ പൊന്നാടയണിയിച്ച് ആദരിച്ചു.

കാത്തിരിപ്പിനൊടുവില്‍ ജനറല്‍ ആശുപത്രിയില്‍ ജനറേറ്റര്‍ പ്രവര്‍ത്തിച്ചു തുടങ്ങി

കാസര്‍ഗോഡ്: നഗരസഭ ചെയര്‍മാന്‍ അബ്ബാസ് ബീഗം വാക്കുപാലിച്ചതോടെ പ്രവര്‍ത്തനം നിലച്ച തെക്കില്‍ ടാറ്റ ആശുപത്രിയില്‍ ഉപയോഗിക്കാതെ കിടന്ന 400 കെവിഎ ജനറേറ്റര്‍ കാസര്‍ഗോഡ് ജനറല്‍ ആശുപത്രിയില്‍ എത്തിച്ച് സ്ഥാപിച്ചു. ജനറല്‍ ആശുപത്രിയില്‍ പ്രത്യേക ഫൗണ്ടേഷന്‍ ഒരുക്കിയാണ് ജനറേറ്റര്‍ സ്ഥാപിച്ചത്. ജനറേറ്ററിന്‍റെ പ്രവര്‍ത്തനോദ്‌ഘോടനം എന്‍.എ. നെല്ലിക്കുന്ന് എംഎല്‍എ നിര്‍വഹിച്ചു. വൈദ്യുതി മുടങ്ങിയാല്‍ സിടി സ്‌കാന്‍ ഉള്‍പ്പെടെ സൗകര്യം ലഭ്യമല്ലാത്ത അവസ്ഥയായിരുന്നു ജനറല്‍ ആശുപത്രിയില്‍ ഉണ്ടായിരുന്നത്. ഇതു പരിഹരിക്കാന്‍ കൂടുതല്‍ ശേഷിയുള്ള ജനറേറ്റര്‍ 11 കിലോമീറ്റര്‍ അപ്പുറത്തുള്ള ടാറ്റാ ആശുപത്രിയില്‍ നിന്നുകൊണ്ടു വരുന്നതിനു എട്ടു മാസം മുന്‍പ് കളക്‌ടർ അനുമതി നല്‍കിയിരുന്നു. എന്നാല്‍ ഇതുകൊണ്ടുവരുന്നതിനുള്ള ചെലവ് 10 ലക്ഷത്തോളം രൂപ അനുവദിക്കാത്തത് തടസമായി. ഇതിനെ തുടര്‍ന്ന് ആവശ്യമായ തുക നഗരസഭ അനുവദിക്കുമെന്ന് ചെയര്‍മാന്‍ അബ്ബാസ് ബീഗം വാക്കു നല്‍കുകയായിരുന്നു. നഗരസഭ ഈ തുക പ്രത്യേക പദ്ധതിയില്‍ ഉള്‍പ്പെടുത്തി അനുവദിച്ചതോടെ ക്രെയിന്‍ മുഖേന ജനറേറ്റര്‍ ജനറല്‍ ആശുപത്രിയില്‍ എത്തിക്കുകയായിരുന്നു. കൂടാതെ ജനറേറ്റര്‍ സ്ഥാപിക്കുന്നതിനുള്ള ഫൗണ്ടേഷന്‍ ഒരുക്കുന്നതിന് 75,000 രൂപ ആശുപത്രി വികസനസമിതിയുടെ ഫണ്ടില്‍ നിന്നും അനുവദിച്ചു. ഇതു കമ്മിഷന്‍ ചെയ്തതോടെ ജനറേറ്ററിനു വേണ്ടിയുള്ള മാസങ്ങളുടെ കാത്തിരിപ്പിന് വിരാമമായി.

വേതനം മുടങ്ങി; മേഘ കമ്പനി ഓഫീസിനു മുന്നിൽ തൊഴിലാളികളുടെ പ്രതിഷേധം

പൊയിനാച്ചി: വേതനം മുടങ്ങിയതിനെ തുടർന്ന് ദേശീയപാത നിർമാണ തൊഴിലാളികൾ കരാറുകാരായ മേഘ എൻജിനീയറിംഗിന്‍റെ മൈലാട്ടിയിലെ ക്യാമ്പ് ഓഫീസിനു മുന്നിൽ പ്രതിഷേധിച്ചു. പല വിഭാഗങ്ങളിലെയും തൊഴിലാളികൾക്ക് അഞ്ചുമാസത്തോളമായി വേതനം മുടങ്ങിയ നിലയിലാണെന്ന് തൊഴിലാളികൾ പറഞ്ഞു. മുടങ്ങിക്കിടക്കുന്ന വേതനം നാളെ നല്കാമെന്ന് കമ്പനി പ്രതിനിധികൾ ഉറപ്പുനല്കിയതിനെ തുടർന്ന് സമരം അവസാനിപ്പിച്ചു.

ഇടയിലെക്കാട്ടിലും മുന്തിരിസമൃദ്ധി

വലിയപറമ്പ്: തീരദേശ മേഖലയിൽ അധികം കായ്ക്കാറില്ലാത്ത കറുത്ത മുന്തിരി സമൃദ്ധി ഇടയിലെക്കാട്ടിൽ. കുഴൽകിണർ ഫിൽട്ടർ പോയിന്‍റ് തൊഴിലെടുക്കുന്ന കെ.ജെ. വിൻസെന്‍റിന്‍റെ വീട്ടുമുറ്റത്താണ് മധുരമൂറും മുന്തിരിക്കുലകൾ തൂങ്ങി നിൽക്കുന്നത്. വിൻസെന്‍റിന്‍റെ വീട്ടുവളപ്പിൽ അഞ്ച് വർഷം മുമ്പാണ് മുന്തിരി ചെടി നടുന്നത്. രണ്ടു വർഷമായി നന്നായി കായ്ക്കുന്നുണ്ട്. കാലിക്കടവിലെ സ്വകാര്യ ചെടി തോട്ടത്തിൽ നിന്നാണ് കറുത്ത മുന്തിരിയുടെ ചെടി കൊണ്ടുവന്നത്. പ്രത്യേക വളമൊന്നും നൽകുന്നില്ലെന്നും സാധാരണ ചെടികൾക്ക് നൽകി വരുന്ന കടലപിണ്ണാക്ക്, ചായപിണ്ടി എന്നിവ മാത്രമാണ് ഇട്ടു കൊടുക്കാറെന്നും വിൻസെന്‍റ് പറഞ്ഞു. കഴിഞ്ഞ വർഷം മൂന്ന് കിലോയില് അധികം മുന്തിരി ലഭിച്ചിരുന്നു. മഴ നേരത്തെ പെയ്ത് തുടങ്ങിയത് മൂലമാണോ എന്നറിയില്ല മുന്തിരി പഴുത്ത് കറുപ്പ് നിറം വന്നിട്ടില്ല. 20 ൽ അധികം കുലകൾ വീട്ടുമുറ്റത്തെ മുന്തിരി പന്തലിൽ കായ്ച്ചിട്ടുണ്ട്.

വിദ്യാർഥികളെക്കൊണ്ട് കാൽ കഴുകിച്ചത് പ്രതിഷേധാർഹമെന്ന് യൂത്ത് കോൺഗ്രസ്

കാസർഗോഡ്: ബന്തടുക്കയിൽ ഭാരതീയ വിദ്യാനികേതന് കീഴിൽ പ്രവർത്തിക്കുന്ന സ്കൂളിൽ വിദ്യാർഥികളെക്കൊണ്ട് അധ്യാപകരുടെ കാൽ കഴുകിച്ചത് പ്രതിഷേധാർഹമാണെന്ന് യൂത്ത് കോൺഗ്രസ് ജില്ലാ പ്രസിഡന്‍റ് കെ.ആർ. കാർത്തികേയൻ പറഞ്ഞു. ഇത്തരം പ്രവൃത്തികൾ നമ്മുടെ വിദ്യാഭ്യാസ സമ്പ്രദായത്തിന്‍റെ അടിസ്ഥാന ലക്ഷ്യങ്ങളെ തന്നെ ഇല്ലാതാക്കുന്നതാണ്. വിദ്യാഭ്യാസമെന്നത് കുട്ടികളിൽ ശാസ്ത്രബോധവും പുരോഗമന ചിന്തയും വളർത്താനുള്ളതാണ്. വിദ്യാർത്ഥികളിൽ അടിമത്ത മനോഭാവം വളർത്തുന്ന ആചാരങ്ങൾ ഒരു കാരണവശാലും അംഗീകരിക്കാനാവില്ല. ഇത്തരം അനാചാരങ്ങൾക്കെതിരായി പോരാടി നേടിയെടുത്ത അവകാശമാണ് വിദ്യാഭ്യാസം. വിദ്യാഭ്യാസ സ്ഥാപനങ്ങളിൽ ഇത്തരത്തിലുള്ള പ്രവർത്തനങ്ങൾ ആവർത്തിക്കാതിരിക്കാൻ ബന്ധപ്പെട്ടവർ കർശന നടപടികൾ സ്വീകരിക്കണമെന്നും അദ്ദേഹം ആവശ്യപ്പെട്ടു.

എം. ശശി അനുസ്മരണവും സൗജന്യ മെഡിക്കൽ ക്യാമ്പും നടത്തി

പെരിയ: കല്യോട്ടെ ഐഎൻടിയുസി പ്രവർത്തകനായിരുന്ന എം. ശശിയുടെ 18-ാം ചരമവാർഷിക ദിനത്തിൽ ഐഎൻടിയുസി കല്യോട്ട് യൂണിറ്റിന്‍റെ നേതൃത്വത്തിൽ പുഷ്പാർച്ചനയും അനുസ്മരണ യോഗവും നടത്തി. രാജീവ്ജി ആർട്സ് ആൻഡ് സ്പോർട്സ് ക്ലബിന്‍റെയും മെഡിഫ്ലെക്സ് മെഡിക്കൽ ലബോറട്ടറിയുടെയും നേതൃത്വത്തിൽ സൗജന്യ മെഡിക്കൽ ക്യാമ്പും സംഘടിപ്പിച്ചു. ഡിസിസി ജനറൽ സെക്രട്ടറി പി.വി. സുരേഷ് ഉദ്ഘാടനം ചെയതു ബ്ലോക്ക് പഞ്ചായത്ത് അംഗം എം.കെ. ബാബുരാജ് അധ്യക്ഷത വഹിച്ചു. മണ്ഡലം കോൺഗ്രസ്‌ പ്രസിഡന്‍റ് രാജൻ അരീക്കര, ഐഎൻടിയുസി ഡ്രൈവേഴ്സ് യൂണിയൻ പ്രസിഡന്‍റ് ദാമോദരൻ മൂവാരിമൂല, ക്ലബ് പ്രസിഡന്‍റ് ദീപു കല്യോട്ട്, എം.കെ. കൃഷ്ണൻ, കെ. സത്യനാരായണൻ, പി.വി. കൃഷ്ണൻ, പത്മകുമാർ മൂരിയാനം, ജനാർദനൻ കല്യോട്ട്, വിജിത്ത് കല്യോട്ട്, സുഭാഷ് കല്യോട്ട് എന്നിവർ പ്രസംഗിച്ചു.

സ്കൂൾ വികസനഫണ്ടിൽ നിന്ന് 35 ലക്ഷം രൂപ പിൻവലിച്ചു; മുൻ പ്രിൻസിപ്പൽ ഇൻ ചാർജിനെതിരെ പരാതി

മൊഗ്രാൽ: ഗവ. വൊക്കേഷണൽ ഹയർ സെക്കൻഡറി സ്കൂളിലെ വികസന ഫണ്ടിൽ നിന്ന് 35 ലക്ഷം രൂപ പിൻവലിച്ചതുമായി ബന്ധപ്പെട്ട് മുൻ പ്രിൻസിപ്പൽ ഇൻ ചാർജിനെതിരെ പരാതി. വിഎച്ച്എസ്ഇ പ്രിൻസിപ്പലിന്‍റെ ചുമതല വഹിച്ചിരുന്ന അധ്യാപകനെതിരെ എസ്എംസി ചെയർമാനായിരുന്ന സയ്യിദ് ഹാദി തങ്ങൾ മൊഗ്രാൽ, നിലവിലുള്ള എസ്എംസി ചെയർമാൻ ആരിഫ് എൻജിനീയർ എന്നിവരാണ് കുമ്പള പോലീസിൽ പരാതി നല്കിയത്. സ്കൂളിൽ നടന്ന സാമ്പത്തിക ക്രമക്കേട് അന്വേഷിക്കണമെന്നാവശ്യപ്പെട്ട് പിടിഎയുടെ നേതൃത്വത്തിൽ വിജിലൻസിനും ജില്ലാ വിദ്യാഭ്യാസ ഡെപ്യുട്ടി ഡയറക്ടർക്കും പോലീസിലും പരാതി നല്കിയിട്ടുണ്ട്. കഴിഞ്ഞ ദിവസം നടന്ന പിടിഎ യോഗത്തിലാണ് 2023-24, 2024-25 വർഷങ്ങളിൽ സ്കൂൾ വികസനഫണ്ടുമായി ബന്ധപ്പെട്ട് നടന്ന സാമ്പത്തിക ക്രമക്കേട് ചർച്ചയായത്. ഇത് പിടിഎ യോഗത്തിൽ വലിയ ബഹളത്തിനും വഴിവച്ചിരുന്നു. സ്കൂളിലെ വിവിധ വികസന പ്രവർത്തനങ്ങൾക്കായി ലഭിച്ച എസ്എസ്കെ ഫണ്ട് ഉൾപ്പെടെയുള്ള തുകയാണ് തിരിമറി നടത്തിയതെന്നാണ് ആക്ഷേപം. സ്കൂളിലെ ദൈനംദിന ആവശ്യങ്ങൾക്കായി ചെറിയ തുകകൾ എഴുതി തങ്ങൾ ഒപ്പിട്ടുനല്കിയ ചെക്കുകളിൽ പിന്നീട് വലിയ തുകകൾ എഴുതിച്ചേർക്കുകയായിരുന്നുവെന്നാണ് എസ്എംസി ചെയർമാൻമാർ പോലീസിൽ നല്കിയ പരാതിയിൽ പറയുന്നത്. വ്യാജ ഒപ്പിട്ടും പണം പിൻവലിച്ചിട്ടുണ്ടെന്നാണ് ആരോപണം. സ്കൂൾ കെട്ടിട നിർമാണം, ശുചിമുറി നിർമാണം, പഠനോപകരണങ്ങൾ വാങ്ങാനുള്ള ഫണ്ട്‌ തുടങ്ങിയവയുമായി ബന്ധപ്പെട്ട് 2023-24 വർഷം 13 ലക്ഷം രൂപയും 2024-25 വർഷം 22 ലക്ഷം രൂപയും പിൻവലിച്ചതായാണ് പരാതി. വിഷയത്തിൽ സമഗ്രമായ അന്വേഷണം ആവശ്യപ്പെട്ട് വിവിധ സംഘടനകളും രംഗത്തെത്തിയിട്ടുണ്ട്.

കായലോരത്ത് വേരുപിടിപ്പിച്ച കണ്ടൽതൈകൾ പിഴുതെറിഞ്ഞു

വലിയപറമ്പ്: ഇടയിലക്കാട് കവ്വായി കായലോരത്ത് കണ്ടൽ വനവത്കരണത്തിനായി വേരുപിടിപ്പിച്ച് വച്ചിരുന്ന അഞ്ഞൂറിലേറെ കണ്ടൽതൈകൾ പട്ടാപ്പകൽ പിഴുതെറിഞ്ഞു. ഇടയിലക്കാട്ടെ മത്സ്യത്തൊഴിലാളിയും കണ്ടൽ സംരക്ഷകനുമായ ഒ. രാജന്‍റെ നേതൃത്വത്തിൽ വേരുപിടിപ്പിച്ച് വച്ചിരുന്ന ഒരു മാസം പ്രായമായ കണ്ടൽ തൈകളാണ് സാമൂഹ്യവിരുദ്ധർ പിഴുതെടുത്ത് കരയിലിട്ട് നശിപ്പിച്ചത്. തെക്കെ മുനമ്പ് മുതൽ ബണ്ട് വരെയുള്ള ഭാഗത്ത് എട്ടായിരത്തിലധികം കണ്ടൽ ചെടികൾ നട്ടുവളർത്തിയിട്ടുള്ള രാജന്‍റെ കണ്ടൽ തൈകളുടെ നഴ്സറിയായിരുന്നു ഇവിടം. കഴിഞ്ഞ ദിവസവും കായലോരത്ത് നടുന്നതിനായി ഇവിടെനിന്ന് വേരു പിടിപ്പിച്ച കണ്ടൽ തൈകൾ കൊണ്ടുപോയിരുന്നു. അതിന് ശേഷമാണ് ബാക്കിയുണ്ടായിരുന്ന തൈകൾ സാമൂഹ്യവിരുദ്ധർ പറിച്ചെടുത്ത് കളഞ്ഞത്.

കുറ്റകൃത്യങ്ങൾ തടയാൻ സ്പെഷ്യൽ ഡ്രൈവുമായി ജില്ലാ പോലീസ്

കാസർഗോഡ്: ജില്ലാ പോലീസ് മേധാവി ബി.വി. വിജയ് ഭാരത് റെഡ്‌ഡിയുടെ നിർദേശപ്രകാരം ജില്ലയിൽ കുറ്റകൃത്യങ്ങൾ തടയുന്നതിനായി പോലീസിന്‍റെ സ്പെഷ്യൽ ഡ്രൈവ്. ഇതിന്‍റെ ഭാഗമായി 1646 വാഹനങ്ങൾ പരിശോധിച്ചു. 105 വാറന്‍റുകൾ നടപ്പാക്കി ഗുണ്ടാ ലിസ്റ്റിൽപ്പെട്ട 61 പേരെ പരിശോധിച്ചു. സംശയാസ്പദമായ സാഹചര്യത്തിൽ കണ്ട 67 പേരെ പിടികൂടി. മദ്യപിച്ച് വാഹനമോടിച്ചതിന് 31 കേസുകളും എൻഡിപിഎസ് ആക്ട് പ്രകാരം എട്ട് കേസുകളും എക്സ്പ്ലോസിവ് ആക്ട് പ്രകാരം അഞ്ച് കേസുകളും രജിസ്റ്റർ ചെയ്തു. അനധികൃതമായി പ്രവർത്തിക്കുന്ന അഞ്ച് ക്വാറികൾ കണ്ടെത്തി. മറ്റ് സ്പെഷ്യൽ ആക്ടുകൾ പ്രകാരം 45 കേസുകൾ രജിസ്റ്റർ ചെയ്തു. 45 ഹോട്ടലുകളിലും ലോഡ്ജുകളിലും പരിശോധന നടത്തി.

കാർഷിക സംസ്കൃതി പഠനകേന്ദ്രം മുഖ്യമന്ത്രി നാടിന് സമർപ്പിക്കും

പിലിക്കോട്: കേരള കാർഷിക സർവകലാശാലക്ക് കീഴിലെ പിലിക്കോട് ഉത്തരമേഖല കാർഷിക ഗവേഷണ കേന്ദ്രത്തിൽ കവി സുബ്രഹ്മണ്യൻ തിരുമുമ്പിന്‍റെ നാമധേയത്തിൽ ഒരുക്കിയ കാർഷിക സംസ്കൃതി പഠനകേന്ദ്രം ഓഗസ്റ്റ് 10നു മുഖ്യമന്ത്രി പിണറായി വിജയൻ നാടിന് സമർപ്പിക്കും.കാസർഗോഡ് വികസന പാക്കേജിൽ രണ്ടു കോടി രൂപയോളം ചെലവിട്ടാണ് ഈ അഗ്രിടൂറിസം സെന്‍റർ നിർമാണം പൂർത്തീകരിച്ചത്. ഓഡിറ്റോറിയം, വിവിധ ആധുനിക കാർഷിക യന്ത്രങ്ങളുടെ പ്രദർശനശാല, നെൽകൃഷി ഗവേഷണ പാഠങ്ങൾ, എക്സിബിഷൻ ഹാൾ എന്നീ നിർമിതികളും ഹരിതവനം, മിയാവാക്കി, നക്ഷത്രവൃക്ഷങ്ങൾ ഉള്ള ചിൽഡ്രൻസ് പാർക്ക്, സംസ്കൃതി പാർക്ക്, തുടങ്ങി വൈവിധ്യമാർന്ന വിശ്രമ കേന്ദ്രങ്ങളും തിരുമുമ്പ് ഭവനത്തിൽ താമസത്തിന് അത്യാവശ്യ സൗകര്യവും കാസർഗോഡ് കുള്ളൻ പശുക്കൾ, മലബാറി ആട്, മത്സ്യം, താറാവ് സംയോജിത കൃഷിപാഠശാല കൂടിയാണ് അഗ്രി ടൂറിസം സെന്‍ററിൽ ഒരുക്കിയിട്ടുള്ളത്. സംഘാടകസമിതി രൂപീകരണയോഗം ഡെപ്യൂട്ടി കളക്ടർ ലിപു എസ്. ലോറൻസ് ഉദ്ഘാടനം ചെയ്തു. വാർഡ് മെംബർ പി. അജിത അധ്യക്ഷതവഹിച്ചു. ഉത്തരമേഖലാ കാർഷിക ഗവേഷണ കേന്ദ്രം അസോസിയേറ്റ് ഡയറക്ടർ ഡോ.ടി. വനജ, അഡ്മിനിസ്ട്രേറ്റീവ് ഓഫീസർ സാബു ജോസഫ്, സ്റ്റാഫ് സെക്രട്ടറി സി.വി. രാജേഷ് എന്നിവർ സംസാരിച്ചു.

സ്കൂളിലെ പഴയ ശുചിമുറി കുടുംബശ്രീ സ്റ്റാളാക്കി; പരാതിയെത്തുടർന്ന് ആരോഗ്യവകുപ്പിന്‍റെ നടപടി

കാസർഗോഡ്: ദേലംപാടി പഞ്ചായത്തിലെ അഡൂർ ഗവ. ഹയർ സെക്കൻഡറി സ്കൂളിൽ കുടുംബശ്രീയുടെ മാ കെയർ സെന്‍റർ തുടങ്ങിയത് പഴയ ശുചിമുറിയിൽ. വൃത്തിഹീനമായ സാഹചര്യത്തിൽ ഭക്ഷണവിതരണം നടത്തുന്നുവെന്ന് ചൂണ്ടിക്കാട്ടി നാട്ടുകാർ പരാതി നല്കിയതോടെ ആരോഗ്യവകുപ്പ് ഇടപെട്ട് സെന്‍റർ അടച്ചുപൂട്ടി. മാ കെയർ സെന്‍റർ എന്ന പേരിൽ ജില്ലയിലെ എല്ലാ സ്കൂളുകളിലും കുടുംബശ്രീയുടെ വിവിധോദ്ദേശ വിപണന സ്റ്റാളുകൾ തുറക്കാനുള്ള പ്രവർത്തനങ്ങൾ നടന്നുവരികയാണ്. കുട്ടികൾക്കാവശ്യമായ ലഘുഭക്ഷണങ്ങള്‍, സ്റ്റേഷനറി സാധനങ്ങള്‍, പെണ്‍കുട്ടികള്‍ക്കുള്ള സാനിറ്ററി നാപ്കിന്‍ തുടങ്ങിയവയെല്ലാം ഇവിടെ ലഭ്യമാക്കാനാണ് പദ്ധതി. ഇതുവഴി കുട്ടികള്‍ സ്‌കൂളിന് പുറത്തുപോയി സാധനങ്ങൾ വാങ്ങുന്നതിനെ തടയുകയാണ് ലക്ഷ്യം. സ്കൂളിന് പുറത്തുപോകുമ്പോഴാണ് കുട്ടികൾ ലഹരിമാഫിയയുടെയും മറ്റും വലയിൽ അകപ്പെടുന്നതെന്ന വാദമുന്നയിച്ചാണ് കുടുംബശ്രീ ജില്ലാ മിഷന്‍റെ നേതൃത്വത്തിൽ പദ്ധതി ആവിഷ്കരിച്ചത്. ഓരോ സ്കൂളിലും ഒഴിഞ്ഞുകിടക്കുന്ന ക്ലാസ് മുറികളിൽ കുടുംബശ്രീ സ്റ്റാളുകൾ തുടങ്ങാനായിരുന്നു സർക്കാരിന്‍റെ നിർദേശം. ക്ലാസ് മുറികളൊന്നും ഒഴിവില്ലാത്ത സാഹചര്യത്തിലാണ് അഡൂർ സ്കൂളിൽ പഴയ ശുചിമുറിയെ മാ കെയർ സെന്‍ററാക്കിയത്. വർഷങ്ങളായി ഉപയോഗിക്കാതെ കിടന്ന ശുചിമുറിയെ നിർമാണസാമഗ്രികളും മറ്റും സൂക്ഷിക്കുന്നതിനുള്ള സ്റ്റോർ റൂമായി ഉപയോഗിച്ചുവരികയായിരുന്നുവെന്നും ഈ സാധനസാമഗ്രികൾ മാറ്റിയാണ് കുടുംബശ്രീക്ക് സ്റ്റാൾ തുടങ്ങാൻ വിട്ടുനല്കിയതെന്നുമാണ് സ്കൂൾ അധികൃതരുടെ വിശദീകരണം. സ്റ്റാൾ തുടങ്ങുന്നതിനുമുമ്പ് കെട്ടിടം നവീകരിക്കാൻ കുടുംബശ്രീ അധികൃതരോട് നിർദേശിച്ചിരുന്നതായും പറയുന്നു. എന്നാൽ ശുചിമുറി നവീകരിച്ച് അവിടെ ഭക്ഷണസാധനങ്ങളുടെ ഉത്പാദനവും വിതരണവും നടത്താൻ അനുമതി നല്കിയതിനെ ഒരു തരത്തിലും ന്യായീകരിക്കാനാവില്ലെന്ന് നാട്ടുകാർ ചൂണ്ടിക്കാട്ടുന്നു. ദേലംപാടി പഞ്ചായത്തിലെ കുടുംബശ്രീ സിഡിഎസിനു കീഴിലാണ് സ്റ്റാൾ തുറന്നതെന്നതിനാൽ ആരോഗ്യവകുപ്പിന് നേരിട്ടാണ് നാട്ടുകാർ പരാതി നല്കിയത്. ആരോഗ്യവകുപ്പ് കർശനമായി ഇടപെട്ടതോടെ ചൊവ്വാഴ്ച മുതൽ കേന്ദ്രം അടച്ചുപൂട്ടി. സ്കൂളുകൾക്ക് സമീപത്തെ ചെറുകി വ്യാപാരികളെ ലഹരിവസ്തുക്കളുടെ വിതരണക്കാരായി മുദ്രകുത്തി അടച്ചുപൂട്ടിക്കാനും സ്കൂളുകളിൽ കുടുംബശ്രീയുടെ കുത്തകവത്കരണം നടപ്പാക്കാനുമുള്ള നീക്കമാണെന്നാരോപിച്ച് വ്യാപാരി സംഘടനകൾ കുടുംബശ്രീ സ്റ്റാളുകളുടെ വരവിനെ എതിർത്തിരുന്നു. സ്കൂൾ കെട്ടിടങ്ങളിൽ വാണിജ്യ ആവശ്യത്തിനുള്ള കടകൾ തുറക്കുന്നതും തദ്ദേശസ്ഥാപനങ്ങളുടെയും ഭക്ഷ്യസുരക്ഷാ വിഭാഗത്തിന്‍റെയും മാനദണ്ഡങ്ങൾ പാലിക്കാതെ പ്രവർത്തിക്കുന്നതും നിയമവിരുദ്ധമാണെന്ന് വ്യാപാരികൾ ചൂണ്ടിക്കാട്ടിയിരുന്നു. ഇതു ശരിവയ്ക്കുന്ന തരത്തിലാണ് അഡൂരിൽ ആരോഗ്യവകുപ്പിന്‍റെ ഭാഗത്തുനിന്ന് നടപടിയുണ്ടായത്.

പാര്‍ട്ടി അനുകൂലികളെ കോര്‍ത്തിണക്കാനാകാത്തത് പോരായ്മ: പി. സന്തോഷ് കുമാര്‍

വെള്ളരിക്കുണ്ട്: സ്വാതന്ത്ര്യസമരത്തിന്‍റെ പൈതൃകം ഉള്‍ക്കൊള്ളുന്ന കമ്യൂണിസ്റ്റ് പാര്‍ട്ടി ശക്തിപ്പെട്ടേ മതിയാവുവെന്ന് ആഗ്രഹിക്കുന്ന ധാരാളം ആളുകള്‍ പാര്‍ട്ടിക്ക് പുറത്തുണ്ടെന്നും എന്നാല്‍ ഇവരെ കോര്‍ത്തിണക്കാന്‍ നമുക്കാവുന്നില്ല എന്ന കുറവ് നിലനില്‍ക്കുന്നുണ്ടെന്നും സിപിഐ ദേശീയ നിര്‍വാഹകസമിതിയംഗം പി. സന്തോഷ് കുമാര്‍ എംപി. സിപിഐ ജില്ലാസമ്മേളനത്തിന്‍റെ പൊതുസമ്മേളനം വെള്ളരിക്കുണ്ടില്‍ ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. കയ്യൂരും കാവുമ്പായി രക്തസാക്ഷിത്വത്തിന് ഒന്നര പതിറ്റാണ്ട് പൂര്‍ത്തിയാകും മുമ്പേ ദൗര്‍ഭാഗ്യവശാല്‍ കമ്യൂണിസ്റ്റ് പാര്‍ട്ടി പിളരുന്ന സാഹചര്യമുണ്ടായി. അതിന്‍റെ കാരണങ്ങള്‍ക്ക് ഇന്നു യാതൊരു പ്രസക്തിയില്ല. അന്നത്തെ മുദ്രാവാക്യങ്ങളൊക്കെ അപ്രസക്തമാവുന്ന കാലഘട്ടത്തിലാണ് നാം ജീവിക്കുന്നത്. രാജ്യത്തെ കമ്മ്യൂണിസ്റ്റ് പ്രസ്ഥാനത്തിന്‍റെ കരുത്തിനെ അതു നല്ലതുപോലെ ചോര്‍ത്തിക്കളഞ്ഞു എന്നത് എല്ലാവരും ഉള്‍ക്കൊള്ളേണ്ട സത്യസന്ധമായ ഒരു പാഠമാണ്. പല പ്രതിസന്ധികളെയും അവഗണിച്ച് കാസര്‍ഗോഡും കണ്ണൂരും വയനാടും നിര്‍ണായകമായ സ്വാധീനം ചെലുത്താവുന്ന പാര്‍ട്ടിയായി സിപിഐ മാറിയിട്ടുണ്ട്. രാജ്യത്തെ തെരഞ്ഞെടുപ്പ് വളരെ സങ്കീര്‍ണമായ രാഷ്ട്രീയ പ്രക്രിയായി മാറി. പണവും മതവും ജാതിയുമെല്ലാം അതിനകത്ത് നല്ലതുപോലെ സ്വാധീനം ചെലുത്തുന്നു. തെരഞ്ഞെടുപ്പ് പ്രക്രിയയില്‍ അതിന്‍റെ റിസല്‍ട്ടും പങ്കാളിത്തവും വച്ചുകൊണ്ട് കമ്യൂണിസ്റ്റ് പാര്‍ട്ടി രാജ്യത്തൊരു ചെറിയ ശക്തിയാണെന്ന് ആര്‍ക്കും പറയാന്‍ കഴിയില്ല. പാര്‍ട്ടി ഇനിയും കരുത്താര്‍ജിക്കേണ്ട രാഷ്ട്രീയ സാഹചര്യമാണ് നിലവിലുള്ളതെന്നും അതിനുള്ള പ്രവര്‍ത്തനം കൂടുതല്‍ ശക്തമാക്കണമെന്നും അദ്ദേഹം കൂട്ടിച്ചേര്‍ത്തു. ജില്ലാ സെക്രട്ടറി സി.പി. ബാബു അധ്യക്ഷത വഹിച്ചു. സംസ്ഥാന അസി. സെക്രട്ടറി ഇ. ചന്ദ്രശേഖരന്‍ എംഎല്‍എ, മന്ത്രിമാരായ ജി.ആര്‍. അനില്‍, പി. പ്രസാദ്, സംസ്ഥാന എക്സിക്യൂട്ടീവ് അംഗങ്ങളായ സി.പി. മുരളി, കെ.കെ. അഷറഫ്, സംസ്ഥാ കൗണ്‍സിലംഗങ്ങളായ ഗോവിന്ദന്‍ പള്ളിക്കാപ്പില്‍, ടി. കൃഷ്ണന്‍, ജില്ലാ അസി. സെക്രട്ടറിമാരായ വി. രാജന്‍, എം. അസിനാര്‍, കെ.എസ്. കുര്യാക്കോസ്, ബങ്കളം കുഞ്ഞികൃഷ്ണന്‍, കെ.വി. കൃഷ്ണന്‍, പി. ഭാര്‍ഗവി, വി. സുരേഷ് ബാബു, മുതിര്‍ന്ന നേതാവ് പി.എ.നായര്‍ എന്നിവര്‍ സംബന്ധിച്ചു. സംഘാടകസമിതി കണ്‍വീനര്‍ എം. കുമാരന്‍ സ്വാഗതം പറഞ്ഞു.

ഇരട്ടനേട്ടവുമായി തൃക്കരിപ്പൂർ താലൂക്ക് ആശുപത്രി

തൃക്കരിപ്പൂർ: സംസ്ഥാന തലത്തിൽ ഇരട്ട അംഗീകാരം നേടി തൃക്കരിപ്പൂർ ഗവ. താലൂക്ക് ആശുപത്രി. 92 ശതമാനം മാർക്ക് നേടി താലൂക്ക് ആശുപത്രികളിൽ ഒന്നാം സ്ഥാനം നേടിയാണ് 15 ലക്ഷം രൂപയുടെ കായകൽപ് അവാർഡ് സ്വന്തമാക്കിയത്. സംസ്ഥാനത്തെ മികച്ച താലൂക്ക് ഹെഡ്‌ക്വാർട്ടേഴ്സ് പരിസ്ഥിതി സൗഹൃദ അവാർഡുകളുടെ വിഭാഗത്തിൽ 96 ശതമാനം മാർക്ക് നേടി താലൂക്ക് ആശുപത്രി അഞ്ചു ലക്ഷം രൂപയുടെ പരിസ്ഥിതി സൗഹൃദ അവാർഡിനും അർഹത നേടി. നീലേശ്വരം ബ്ലോക്ക് പഞ്ചായത്തി കീഴിലുള്ള തൃക്കരിപ്പൂർ താലൂക്ക് ആശുപത്രി അസുഖ നിവാരണത്തിലും രോഗികളോട് സൗഹൃദപരമായ സമീപനത്തിലും മാലിന്യനിർമാർജനം ഉൾപ്പെടെയുള്ള ശുചിത്വ പ്രവർത്തനങ്ങളിലും തൃക്കരിപ്പൂർ താലൂക്ക് ആശുപത്രി പുലർത്തിയ മാതൃകാപരമായ പ്രവർത്തനം പരിഗണിച്ചാണ് പുരസ്‌കാരം തേടിയെത്തിയത്.

സ്കൂളുകളിൽ കുടുംബശ്രീയുടെ കച്ചവട സ്ഥാപനങ്ങൾ അനുവദിക്കില്ലെന്ന് വ്യാപാരി വ്യവസായി ഏകോപന സമിതി

കാസർഗോഡ്: സർക്കാർ സ്കൂളുകൾക്കകത്ത് യാതൊരുവിധ മാനദണ്ഡങ്ങളും പാലിക്കാതെ കുടുംബശ്രീയുടെ കച്ചവടസ്ഥാപനങ്ങൾ തുടങ്ങാനുള്ള പദ്ധതി ഒരു കാരണവശാലും അംഗീകരിക്കാനാവില്ലെന്ന് വ്യാപാരി വ്യവസായി ഏകോപനസമിതി ജില്ലാ പ്രസിഡന്‍റും സംസ്ഥാന വൈസ് പ്രസിഡന്‍റുമായ കെ. അഹമ്മദ് ഷെരീഫ് പറഞ്ഞു. സംസ്ഥാനത്ത് ചെറുകിട കച്ചവടം നടത്തി ഉപജീവനം തേടുന്ന ലക്ഷക്കണക്കിനാളുകളെ വഴിയാധാരമാക്കാനുള്ള നീക്കമാണ് ഇത്. ഒരു വ്യാപാര സ്ഥാപനം തുടങ്ങണമെങ്കിൽ നിരവധി ലൈസൻസുകൾ ആവശ്യമാണ്. ഫുഡ് & സേഫ്റ്റി ലൈസൻസെടുത്തും വെള്ളം പരിശോധിച്ചുമൊക്കെ നിരവധി കടമ്പകൾ കടന്നാണ് ഓരോ വ്യാപാരിയും സ്ഥാപനങ്ങൾ തുറക്കുന്നത്. ഇതൊന്നുമില്ലാതെ കുടുംബശ്രീ യുണിറ്റുകൾക്ക് സ്കൂളിന്‍റെ കെട്ടിടത്തിൽ തന്നെ വിദ്യാർഥികളെ ലക്ഷ്യമാക്കി സ്ഥാപനങ്ങൾ തുടങ്ങാമെന്നുവരുന്നത് കടുത്ത നിയമലംഘനമാണ്. ചെറുകിട വ്യാപാരികളെ മയക്കുമരുന്ന് വില്പനക്കാരാക്കി ചിത്രീകരിക്കാനുള്ള നീക്കവും അത്യധികം ഹീനമാണ്. പദ്ധതിക്കെതിരെ വ്യാപാരികൾ ശക്തമായ പ്രക്ഷോഭ പരിപാടികൾ ആരംഭിക്കുമെന്ന് അദ്ദേഹം പറഞ്ഞു.

15 വര്‍ഷമായി കളപ്പുരയില്‍ ഒറ്റയ്ക്ക് കാര്‍ത്യായനി: ഇടപെട്ട് മനുഷ്യാവകാശ കമ്മീഷന്‍

കാസര്‍ഗോഡ്: ചുറ്റുമതില്‍ ഇല്ലാതെ കാടുമൂടിയ ഒന്നര ഏക്കര്‍ പറമ്പില്‍ പഴകി ജീര്‍ണിച്ച് തകര്‍ന്ന വീടിനോട് ചേര്‍ന്ന കളപ്പുരയില്‍ 15 വര്‍ഷമായി ഒറ്റയ്ക്ക് താമസിക്കുന്ന കേള്‍വിക്കുറവുള്ള കെ.വി. കാര്‍ത്യായനിയുടെ (69) പരാതികള്‍ പരിശോധിച്ച് പരിഹാരനടപടികള്‍ ഉള്‍പ്പെടുത്തി ഏഴു ദിവസത്തിനകം റിപ്പോര്‍ട്ട് സമര്‍പ്പിക്കണമെന്ന് മനുഷ്യാവകാശ കമ്മീഷന്‍ ജുഡീഷല്‍ അംഗം കെ. ബൈജുനാഥ് ജില്ലാ കളക്ടര്‍ക്കും ജില്ലാ വിമന്‍ ആന്‍ഡ് ചൈല്‍ഡ് ഡെവലപ്‌മെന്‍റ് ഓഫീസര്‍ക്കും നിര്‍ദേശം നല്‍കി. കളപ്പുരയിലേക്കുള്ള വൈദ്യുതി കണക്ഷന്‍ കെഎസ്ഇബി വിച്ഛേദിച്ചു. തൊഴിലുറപ്പിന് പോയാണ് ഭക്ഷണത്തിനുള്ള വക കണ്ടെത്തുന്നത്. പറമ്പ് കാടുമൂടിയതു കാരണം കുറുനരിയും പാമ്പുകളും ധാരാളമുണ്ട്. കുടുംബത്തിന്‍റെ നല്ല കാലത്ത് തേങ്ങയും മറ്റും സൂക്ഷിക്കാന്‍ പണിത കളപ്പുരയിലാണ് വയോധിക താമസിക്കുന്നത്. ഭര്‍ത്താവ് രാമചന്ദ്രന്‍ 15 വര്‍ഷം മുമ്പ് മരിച്ചു. മക്കളില്ലാത്ത വയോധിക അതോടെ അനാഥയായി. വീടും പറമ്പും ഭര്‍തൃപിതാവിന്‍റെ പേരിലാണ്. ഭാഗം വച്ച് അവകാശം ലഭിക്കാത്തതിനാല്‍ വീടിന് വേണ്ടി അപേക്ഷ സമര്‍പ്പിക്കാന്‍ പോലും കഴിയാത്ത അവസ്ഥയിലാണ് കാര്‍ത്യായനി. കളപ്പുരക്ക് പ്രത്യേകം കണക്ഷന്‍ നല്‍കണമെന്ന് നാട്ടുകാര്‍ കെഎസ്ഇബിയോട് ആവശ്യപ്പെട്ടെങ്കിലും അംഗീകരിച്ചില്ല. 17നു കാസര്‍ഗോഡ് പിഡബ്ല്യുഡി റസ്റ്റ് ഹൗസില്‍ നടക്കുന്ന സിറ്റിംഗില്‍ കേസ് പരിഗണിക്കും.

കെ-സ്റ്റോറുകള്‍ സജീവമാക്കും: മന്ത്രി അനില്‍

കാഞ്ഞങ്ങാട്: കുറഞ്ഞ വിലയില്‍ ഗുണമേന്മയുള്ള ഉത്പന്നങ്ങളും ഡിജിറ്റല്‍ സേവനങ്ങളും ലഭ്യമാക്കുന്നതിന് കെ-സ്റ്റോര്‍ പ്രവര്‍ത്തനങ്ങള്‍ സജീവമാക്കുമെന്ന് ഭക്ഷ്യമന്ത്രി ജി.ആര്‍. അനില്‍. കാഞ്ഞങ്ങാട് ചേടിറോഡില്‍ ആരംഭിച്ച സപ്ലൈകോ മാവേലി സൂപ്പര്‍ സ്റ്റോറിന്‍റെ ഉദ്ഘാടനം നിര്‍വഹിച്ചു സംസാരിക്കുകയായിരുന്നു അദ്ദേഹം. പാചകവാതകവും മില്‍മ, ശബരി ഉത്പന്നങ്ങളുമടക്കം കെ-സ്റ്റോറുകള്‍ വഴി ലഭ്യമാകും. നിലവില്‍ സംസ്ഥാനത്തെ 390 റേഷന്‍ കടകളില്‍ 38 എണ്ണമാണ് റേഷന്‍ കടകളെ കെ-സ്റ്റോറുകള്‍ ആയി മാറിയിട്ടുള്ളത്. വരും ദിവസങ്ങളില്‍ കെ-സ്റ്റോറുകളുടെ സേവനങ്ങള്‍ കൂടുതല്‍ റേഷന്‍കടകളിലേക്ക് വ്യാപിപ്പിക്കാനാണ് സര്‍ക്കാന്‍ പദ്ധതിയിടുന്നതെന്നും അദ്ദേഹം കൂട്ടിച്ചേര്‍ത്തു. ഇ. ചന്ദ്രശേഖരന്‍ എംഎല്‍എ അധ്യക്ഷതവഹിച്ചു. നഗരസഭ ചെയര്‍പേഴ്സണ്‍ കെ.വി. സുജാത ആദ്യവില്‍പന നിര്‍വഹിച്ചു. വൈസ്‌ചെയര്‍മാന്‍ ബില്‍ടെക് അബ്ദുള്ള, സ്ഥിരംസമിതി അധ്യക്ഷരായ കെ. ലത, കെ.വി. സരസ്വതി, കെ. അനീശന്‍, കെ.വി. പ്രഭാവതി, കൗണ്‍സിലര്‍മാരായ എന്‍.വി. രാജന്‍, പള്ളിക്കൈ രാധാകൃഷ്ണന്‍, പി.വി. മോഹനന്‍, കെ. രവീന്ദ്രന്‍, രാഷ്ട്രീയപാര്‍ട്ടി പ്രതിനിധികളായ, ഉമേശന്‍ വേളൂര്‍, എന്‍. ബാലകൃഷ്ണന്‍, വി. വെങ്കിടേഷ്, സി.കെ. വത്സലന്‍, യു.കെ. ജയപ്രകാശ്, ആനന്ദന്‍ എന്നിവര്‍ സംസാരിച്ചു. സപ്ലൈകോ ജനറല്‍ മാനേജര്‍ വി.കെ. അബ്ദുള്‍ ഖാദര്‍ സ്വാഗതവും ജില്ലാ സപ്ലൈ ഓഫീസര്‍ കെ.എൻ. ബിന്ദു നന്ദിയും പറഞ്ഞു.

കൃഷി രീതികള്‍ സ്മാര്‍ട്ട് ആകണം: മന്ത്രി പ്രസാദ്

ചീമേനി: ആധുനിക സാങ്കേതികവിദ്യകളുടെ സഹായത്തോടെ ജലസേചനം, മണ്ണിന്‍റെ ഘടന, കാലാവസ്ഥ, ഭൂമിശാസ്ത്രപരമായ പ്രത്യേകതകള്‍, മഴയുടെ അളവ് തുടങ്ങിയ വിവരങ്ങള്‍ വിശദമായി മനസിലാക്കാന്‍ കഴിയുമെന്നും ഇതിന്‍റെ അടിസ്ഥാനത്തില്‍ കൃഷിയിലെ ഉത്പാദനക്ഷമത വര്‍ധിപ്പിക്കാനും കര്‍ഷകന്‍റെ വരുമാനം ഉയര്‍ത്താനും സാധിക്കുമെന്നും അതിനാല്‍ കൃഷിയില്‍ സാങ്കേതിക വിദ്യകള്‍ പരമാവധി ഉപയോഗിക്കാന്‍ കഴിയണമെന്നും കൃഷിമന്ത്രി പി. പ്രസാദ്. കയ്യൂര്‍-ചീമേനി പഞ്ചായത്ത് നവീകരിച്ച സ്മാര്‍ട്ട് കൃഷിഭവന്‍ നാടിന് സമര്‍പ്പിച്ചു സംസാരിക്കുകയായിരുന്നു മന്ത്രി. എം. രാജഗോപാലന്‍ എംഎല്‍എ അധ്യക്ഷതവഹിച്ചു. കൃഷിവകുപ്പ് അഡീഷണല്‍ ഡയറക്ടര്‍ എസ്. സപ്ന, ബ്ലോക്ക് പ്രസിഡന്‍റ് മാധവന്‍ മണിയറ, പഞ്ചായത്ത് വൈസ്പ്രസിഡന്‍റ് എം. ശാന്ത, പ്രിന്‍സിപ്പല്‍ കൃഷി ഓഫീസര്‍ പി. രാഘവേന്ദ്ര, കൃഷി ഡെപ്യൂട്ടി ഡയറക്ടര്‍ പി. മിനി മേനോന്‍, അസിസ്റ്റന്‍റ് ഡയറക്ടര്‍ കെ. ബിന്ദു, കുടുംബശ്രീ സിഡിഎസ് ചെയര്‍പേഴ്സണ്‍ ആര്‍. രജിത, പഞ്ചായത്ത് സെക്രട്ടറി കെ. രമേശന്‍, കെ.ടി. ലത, കെ. കരുണാകരന്‍, ടി. ശശിധരൻ, പി. കുഞ്ഞിക്കണ്ണന്‍, ടി.വി. രാഘവന്‍, കരിമ്പില്‍ കൃഷ്ണന്‍, എം.കെ. നളിനാക്ഷന്‍, സി.വി. വിജയരാജ്, ശ്രീവത്സന്‍, മുഹമ്മദ് കൂളിയാട്, പി.സി. ദേവസ്യ, പി.പി. രതീഷ്, കെ. മോഹനന്‍, അഗസ്റ്റിന്‍ എന്നിവര്‍ സംസാരിച്ചു. പഞ്ചായത്ത് പ്രസിഡന്‍റ് എ.ജി. അജിത്കുമാര്‍ സ്വാഗതവും കൃഷി ഓഫീസര്‍ ടി. അംബുജാക്ഷന്‍ നന്ദിയും പറഞ്ഞു.

കാട്ടുപന്നികളുടെ എണ്ണം നിയന്ത്രിക്കാന്‍ തദ്ദേശസ്ഥാപനങ്ങള്‍ നടപടി സ്വീകരിക്കണം: മന്ത്രി ശശീന്ദ്രന്‍

കാസര്‍ഗോഡ്: കാടിനു പുറത്ത് കൃഷിനാശവും മനുഷ്യര്‍ക്ക് അപകടമുണ്ടാക്കുന്നതും ഉള്‍പ്പെടെയുള്ള കാട്ടുപന്നികളുടെ എണ്ണം നിയന്ത്രിക്കാന്‍ തദ്ദേശസ്ഥാപനങ്ങള്‍ നടപടി സ്വീകരിക്കണമെന്ന് മന്ത്രി എ.കെ. ശശീന്ദ്രന്‍. ജില്ലയിലെ വന്യജീവി ആക്രമണം ലഘൂകരിക്കാന്‍ നടത്തിയ പ്രവര്‍ത്തനങ്ങള്‍ അവലോകനം ചെയ്തു സംസാരിക്കുകയായിരുന്നു മന്ത്രി. കാട്ടുപന്നികളെ ഉന്മൂലനം ചെയ്യുന്നതിനും സംസ്‌കരിക്കുന്നതിനുമുള്ള സാമ്പത്തികസഹായം സംസ്ഥാന ദുരന്തനിവാരണനിധിയില്‍ നിന്നു നല്‍കും. കാട്ടുപന്നിയെ കൊല്ലുന്നതിനായി ചുമതലപ്പെടുത്തിയ ലൈസന്‍സ് ഷൂട്ടര്‍ക്ക് പ്രതിഫലം നല്‍കുന്നതിനും കാട്ടുപന്നിയെ മറവുചെയ്യുന്നതിനും തദ്ദേശസ്ഥാപനങ്ങള്‍ക്ക് ഒരു സാമ്പത്തികവര്‍ഷം പരമാവധി ഒരു ലക്ഷം രൂപ വരെ അനുവദിക്കുന്നതിന് ഉത്തരവായിട്ടുണ്ട്. കാട്ടുപന്നികളെ വെടിവക്കുന്നതിനായി നിയോഗിക്കാവുന്ന അംഗീകൃത ഷൂട്ടര്‍മാരുടെ പുതുക്കിയ ലിസ്റ്റ് നിലവിലുണ്ട്. ഈ ലിസ്റ്റ് എല്ലാ പഞ്ചായത്തുകള്‍ക്കും നല്‍കിയിട്ടുണ്ടെന്നും മന്ത്രി പറഞ്ഞു. ഇതു വനംവകുപ്പിന്‍റെ ഔദ്യോഗിക വെബ്സൈറ്റില്‍ അപ്‌ലോഡ് ചെയ്തിട്ടുള്ളതുമാണ്. ജില്ലയില്‍ കൂടുതല്‍ മരണങ്ങള്‍ സംഭവിച്ചിട്ടുള്ളത് പാമ്പുകടിയേറ്റ് ആണ് ജില്ലയിലെ എല്ലാ ആശുപത്രികളിലും ആന്‍റിസ്നേക്ക് വെനത്തിന്‍റെ ലഭ്യത ഉറപ്പുവരുത്താന്‍ നിര്‍ദേശം നല്‍കിയെന്ന് മന്ത്രി പറഞ്ഞു. ജില്ലയില്‍ രണ്ടു റേഞ്ചുകളിലായി 122 ചതുരശ്ര കിലോമീറ്റര്‍ വനപ്രദേശമുണ്ട്. ഇതില്‍ 700 ഹെക്ടറോളം പ്ലാന്‍റേഷന്‍ ആണ്. ആള്‍ത്താമസമില്ലാത്ത സ്വകാര്യ ഉടമസ്ഥതയിലുള്ള പ്രദേശങ്ങള്‍ കാടുമുടി കിടക്കുന്നതിനാല്‍ ഇവിടെ പുലികള്‍, കാട്ടുപോത്ത്, കാട്ടുപന്നികള്‍ ഉള്‍പ്പെടെയുള്ള സസ്തനികള്‍ക്ക് ആവാസവ്യവസ്ഥയും ഒളിത്താവളവുമായി മാറുന്നുണ്ട്. ഈ പ്രദേശങ്ങള്‍ വൃത്തിയാക്കുന്നതിനുള്ള അടിയന്തര നടപടികള്‍ക്ക് തദ്ദേശസ്വയംഭരണ സ്ഥാപനങ്ങള്‍ക്ക് മന്ത്രി നിര്‍ദേശം നല്‍കി. വനങ്ങള്‍ പോലെ കാടുമുടി കിടക്കുന്ന സ്വകാര്യസ്ഥലങ്ങള്‍ ഉടന്‍ വൃത്തിയാക്കാന്‍ പഞ്ചായത്ത് സെക്രട്ടറിമാര്‍ സ്വകാര്യ വ്യക്തികള്‍ക്ക് അടിയന്തര നോട്ടീസ് നല്‍കാന്‍ മന്ത്രി നിര്‍ദേശം നല്‍കി.മുളിയാര്‍, കാറഡുക്ക വനമേഖലകളില്‍ വ്യാപകമായിട്ടുള്ളഅക്കേഷ്യ തൈകളും അടിക്കാടുകളും നിര്‍മാര്‍ജനം ചെയ്യുന്നതിനും ബളാല്‍, കള്ളാര്‍, പനത്തടി പഞ്ചായത്തുകളിലെ വനമേഖലകളില്‍ വ്യാപകമായി കാണുന്ന തോട്ടപ്പയര്‍ മറ്റ് അധിനിവേശ സസ്യങ്ങള്‍ എന്നിവ ഇല്ലായ്മ ചെയ്ത് അവിടങ്ങളില്‍ തദ്ദേശീയ സസ്യ ഇനങ്ങളും ഫലവൃക്ഷത്തൈകളും വെച്ചുപിടിപ്പിക്കുന്നതിനും യോഗത്തില്‍ നിര്‍ദേശിച്ചു. ജില്ലാ പഞ്ചായത്ത് പ്രസിഡന്‍റ് ബേബി ബാലകൃഷ്ണന്‍, ജില്ലാ കളക്ടര്‍ കെ. ഇമ്പശേഖര്‍, ജില്ലാ പോലീസ് മേധാവി വിജയ് ഭാരത് റെഡ്ഡി, കാസര്‍ഗോഡ് ടിഡിഒ കെ.കെ. മോഹന്‍ദാസ്, എല്‍എസ്ജിഡി ഡിഡി കെ.വി. ഹരിദാസ്, ജില്ലാ എസ്‌സി ഓഫീസര്‍ ഇന്‍ ചാര്‍ജ് പി. മിനി, കൃഷിവകുപ്പ് ഡിഡി മിനി മാമന്‍, മൃഗസംരക്ഷണ വകുപ്പ് ഡിഡി ഇന്‍ ചാര്‍ജ് ഡോ.പി. ഷൈജി, ഡിഎംഒ പ്രതിനിധി ഡോ. ബേസില്‍ വര്‍ഗീസ് എന്നിവര്‍ സംസാരിച്ചു. സമിതി കണ്‍വീനര്‍ ഡിവിഷണല്‍ ഫോറസ്റ്റ് ഓഫീസര്‍ കെ. അഷ്റഫ് റിപ്പോര്‍ട്ട് അവതരിപ്പിച്ചു. വന്യജീവി ആക്രമണത്തില്‍ കൊല്ലപ്പെട്ടത് 57 പേര്‍ കാസര്‍ഗോഡ് ഡിവിഷന്‍ രൂപീകരിച്ചത് മുതല്‍ 2024-25 വര്‍ഷം വരെ ജില്ലയില്‍ വന്യജീവി ആക്രമണത്തില്‍ 57 പേര്‍ക്ക് ജീവഹാനി സംഭവിച്ചു. കാട്ടാന ആക്രമത്തില്‍ ഒരാളും കാട്ടുപന്നി ആക്രമത്തില്‍ ഏഴുപേരും പാമ്പ് കടിച്ച് 39 പേരും തേനീച്ചയും കടന്നലും കുത്തി 10 പേരുമാണ് മരിച്ചത്. നിലവില്‍ നഷ്ടപരിഹാരത്തിന്‍റെ ഒന്നാം ഗഡു മഴുവന്‍ പേര്‍ക്കും നല്‍കി കഴിഞ്ഞു. കൃത്യമായ രേഖകള്‍ സമര്‍പ്പിച്ച മുഴുന്‍ ആളുകള്‍ക്കും രണ്ടാം ഗഡു നഷ്ടപരിഹാരവും നല്‍കി. അനന്തരാവകാശ സര്‍ട്ടിഫിക്കറ്റ് ഹാജരാക്കാത്ത മൂന്നുപേര്‍ക്ക് മാത്രമാണ് കുടിശിക നല്‍കാന്‍ ബാക്കിയുള്ളത്. 2024-25 വര്‍ഷം മാത്രം അപേക്ഷ നല്‍കിയ 333 പേര്‍ക്കായി 51 ലക്ഷം രൂപ നഷ്ടപരിഹാരം നല്‍കി. ജീവന്‍ നഷ്ടമായ ഏഴുപേര്‍ക്ക് 10 ലക്ഷം രൂപയും പരുക്കേറ്റ 46 പേര്‍ക്ക് 14.23 ലക്ഷം രൂപയും വളര്‍ത്തുമൃഗങ്ങളെ നഷ്ടമായ ഏഴ് അപേക്ഷകര്‍ക്ക് 80,000 രൂപയും വിളനാശം സംഭവിച്ച 273 അപേക്ഷകര്‍ക്ക് 25.96 ലക്ഷം രൂപയും നഷ്ട പരിഹാരമായി നല്‍കി.

കോണ്‍ക്രീറ്റ് മിക്സിംഗ് വാഹനം കുഴിയില്‍വീണു, ഗതാഗതം തടസപ്പെട്ടു

കാസര്‍ഗോഡ്: അണങ്കൂര്‍ ബെദിരയില്‍ കോണ്‍ക്രീറ്റ് മിക്സിംഗ് ലോറി കുഴിയില്‍ വീണതോടെ വീട്ടില്‍ പുറത്തിറങ്ങാനാകാതെ ജനങ്ങള്‍ വലഞ്ഞു. ഇന്നലെ രാവിലെ ഒന്‍പതോടെ ബെദിര-തുരുത്തി റോഡിലാണ് സംഭവം. വീതി കുറഞ്ഞ റോഡില്‍ വാഹനത്തിന്‍റെ ടയര്‍ റോഡിലെ കുഴിയില്‍ വീഴുകയായിരുന്നു. പിന്നീട് ഈ വാഹനത്തെ പൊക്കിയെടുക്കാന്‍ ഒരു ക്രെയിന്‍ എത്തിയപ്പോള്‍ അതും വഴിയില്‍ കുടുങ്ങി. ശേഷം മണ്ണുമാന്തിയന്ത്രമെത്തി റോഡിന്‍റെ ഭാഗം അല്‍പം മാന്തി വാഹനം കയറിപ്പോകാനുള്ള വഴിയൊരുക്കി. പിന്നീട് മറ്റൊരു ക്രെയിന്‍ എത്തി വൈകുന്നേരം അഞ്ചോടെയാണ് ഈ ഭാഗത്തെ ഗതാഗതം പുനഃസ്ഥാപിച്ചത്.

മണലാരണ്യത്തിൽ നിന്നും മത്സ്യകൃഷിയിലേക്ക്

പടന്ന: പ്രവാസജീവിതത്തിനൊപ്പം നാട്ടിൽ മത്സ്യകൃഷിയും നടത്തുന്ന പടന്ന വടക്കെപ്പുറത്തെ പി.പി. രവിക്ക് സംസ്ഥാന സർക്കാർ പുരസ്കാരം. പിന്നാമ്പുറ മത്സ്യകൃഷി വിത്തുത്പാദനത്തിന് സംസ്ഥാനതലത്തിൽ രണ്ടാംസ്ഥാനമാണ് രവിക്ക് ലഭിച്ചത്. ഇന്ന് കൊല്ലം കൊട്ടാരക്കരയിൽ നടക്കുന്ന ചടങ്ങിൽ അവാർഡ് ഏറ്റുവാങ്ങും. പടന്ന വടക്കെപ്പുറത്ത് വീടിന്‍റെ പരിസരത്ത് പരീക്ഷണാർത്ഥം നടത്തിയ കരിമീൻ കൃഷിയിലെ സാധ്യതകൾ മനസിലാക്കിയാണ് ദുബായിലെ ഒരു സ്വകാര്യ കമ്പനി ജീവനക്കാരനായ രവി ഈ സംരംഭം തുടങ്ങിയത്. ഇതിനായി പടന്ന ഓരി തോടിനടുത്ത് ഒരേക്കർ സ്ഥലം വാങ്ങി കുളം ഉണ്ടാക്കി ഫിഷറീസ് വകുപ്പിന്‍റെ സഹകരണത്തോടെ രണ്ടു വർഷം മുമ്പാണ് മത്സ്യകുഞ്ഞുങ്ങളെ വളർത്താനുള്ള കൃഷിക്ക് തുടക്കമിട്ടത്. പുഴയിൽ നിന്ന് വേലിയേറ്റ സമയത്ത് കയറി വരുന്ന മത്സ്യങ്ങളെ തടഞ്ഞു നിർത്തി വളർത്തിക്കൊണ്ടാണ് മത്സ്യകൃഷിക്ക് തുടക്കമിട്ടത്. ആ കൂട്ടത്തിൽ നിന്ന് വിത്തുത്പാദനം നടന്നപ്പോൾ അതു മികച്ച നിലവാരത്തിലുള്ളതാണെന്ന് ഫിഷറീസ് വകുപ്പ് പരിശോധിച്ച് തീർപ്പാക്കിയതോടെയാണ് വിത്തുത്പാദനം എന്ന ആശയം ഉടലെടുത്തത്. അധികം വൈകാതെ തന്നെ ജില്ലയുടെ വിവിധ ഭാഗങ്ങളിൽ നിന്ന് ഇവിടേക്ക് ആവശ്യക്കാർ എത്തിതുടങ്ങി. എട്ടു മുതൽ 10 സെന്‍റിമീറ്റർ വലുപ്പത്തിലുള്ള കുഞ്ഞുങ്ങളാണ് വിൽപനയ്ക്കുള്ളത്. ഒന്നിന് 10 രൂപ തോതിലാണ് വിൽപന നടത്തുന്നത്. മത്സ്യവിത്തിന് നിലവിൽ ആവശ്യക്കാർ കൂടിവരികയുമാണ്.

നല്ല ഭക്ഷണം നല്ല ആരോഗ്യം പദ്ധതി: പരപ്പ ബ്ലോക്ക് തല ഉദ്ഘാടനം നടത്തി

കരിന്തളം: പോഷകസമൃദ്ധവും സുരക്ഷിതവുമായ ഭക്ഷണത്തിന്‍റെ പ്രാധാന്യം പൊതുജനങ്ങളെ ബോധ്യപ്പെടുത്തുന്നതിനായി പരപ്പ ബ്ലോക്ക് പഞ്ചായത്തിന്‍റെ വാര്‍ഷിക പദ്ധതിയില്‍ ഉള്‍പ്പെടുത്തി നടപ്പിലാക്കുന്ന നല്ല ഭക്ഷണം നല്ല ആരോഗ്യം പദ്ധതിയുടെ ബ്ലോക്ക് തല ഉദ്ഘാടനം ബ്ലോക്ക് പഞ്ചായത്ത് പ്രസിഡന്‍റ് എം. ലക്ഷ്മി നിര്‍വഹിച്ചു. കിനാനൂര്‍-കരിന്തളം പഞ്ചായത്തിലെ അഗ്രോ സര്‍വീസ് സെന്‍ററില്‍ നടന്ന പരിപാടിക്ക് ബ്ലോക്ക് പഞ്ചായത്ത് വൈസ് പ്രസിഡന്‍റ് കെ. ഭൂപേഷ് അധ്യക്ഷതവഹിച്ചു. കൃഷി അസിസ്റ്റന്‍റ് ഡയറക്ടര്‍ ഇന്‍ചാര്‍ജ് നിഖില്‍ നാരായണന്‍ പദ്ധതി സംബന്ധിച്ച വിശദീകരിച്ചു. പച്ചക്കറി ഉദ്പാദനത്തില്‍ ജനപങ്കാളിത്തം വര്‍ധിപ്പിക്കുക, ഐ.സിഎം.ആര്‍ നിര്‍ദേശിക്കുന്ന അളവില്‍ പച്ചക്കറികള്‍ ജനങ്ങളുടെ ആഹാരക്രമത്തില്‍ ഉള്‍പ്പെടുത്തുക, സുരക്ഷിത ഭക്ഷണ ഉദ്പാദന രീതികളെ പ്രോത്സാഹിപ്പിക്കുക എന്നിവയാണ് പദ്ധതിയുടെ മുഖ്യലക്ഷ്യങ്ങള്‍. പദ്ധതിയുടെ ഭാഗമായി ജനങ്ങള്‍ക്ക് പരിശീലവം ബോധവത്കരണ ക്ലാസുകളും നടത്തും. ഇതിനായി ആരോഗ്യവകുപ്പും കൃഷിവകുപ്പും ഉള്‍പ്പെടെയുള്ള വിവിധ വകുപ്പുകള്‍ തമ്മില്‍ സംയോജിതമായി പ്രവര്‍ത്തിക്കും. യോഗത്തില്‍ ബ്ലോക്ക് പഞ്ചായത്ത് വികസന സ്ഥിരംസമിതി അധ്യക്ഷ രജനി കൃഷ്ണന്‍, ജോയിന്‍റ് ബിഡിഒ ബിജുകുമാര്‍, അഗ്രോ സര്‍വീസ് സെന്‍റര്‍ ഫെസിലിറ്റേറ്റര്‍ മോഹനൻ, വാര്‍ഡ് മെംബര്‍മാരായ കൈരളി, ധന്യ എന്നിവര്‍ സംസാരിച്ചു. കിനാനൂര്‍-കരിന്തളം കൃഷി ഓഫീസര്‍ ജെ. ജിജി സ്വാഗതവും അസി. അഗ്രികള്‍ച്ചര്‍ ഓഫീസര്‍ സദാനന്ദന്‍ നന്ദിയും പറഞ്ഞു.

ഒരുങ്ങുന്നു, സ്വന്തം ഭൂമിക്ക് ചുറ്റും ഡിജിറ്റല്‍ വേലി

കാസര്‍ഗോഡ്: എല്ലാവര്‍ക്കും ഭൂമി, എല്ലാ ഭൂമിക്കും രേഖ, എല്ലാ സേവനങ്ങളും സ്മാര്‍ട്ട് എന്ന ലക്ഷ്യത്തോടെ സര്‍വേ വകുപ്പിന് കീഴില്‍ ജില്ലയിലെ ഡിജിറ്റല്‍ സര്‍വേയുടെ പ്രവര്‍ത്തനങ്ങള്‍ പുരോഗമിക്കുന്നു. ഡിജിറ്റല്‍ സര്‍വേ നടത്തി അളന്നു തിരിച്ച് അതിര്‍ത്തി നിര്‍ണയിക്കപ്പെട്ട ഭൂമിക്കും ചുറ്റും ഒരു അദൃശ്യ ഡിജിറ്റല്‍ വേലി രൂപപ്പെടും. ഇത് ഭൂമി കയ്യേറ്റം, അതിര്‍ത്തി തര്‍ക്കം തുടങ്ങി ഭൂവുടമക്ക് ഉണ്ടാകാവുന്ന എല്ലാ തലവേദനകളും നിയമ കുരുക്കുകളും തടയുകയും നിയമ വ്യവഹാരങ്ങളലക്ക് പോകാതെ തന്നെ സര്‍ക്കാര്‍ ഭൂമിയും സ്വകാര്യ ഭൂമിയും കൃത്യമായി തിരിച്ചറിയാന്‍ സഹായിക്കുകയും ചെയ്യുന്നു. ചങ്ങല വലിച്ചും ടോട്ടല്‍ സ്റ്റേഷന്‍ പോലുള്ള പഴയ ഉപകരണങ്ങള്‍ ഉപയോഗിച്ചും നടന്നിരുന്ന സര്‍വ്വേ രീതികളില്‍ നിന്ന് മാറി ഉപഗ്രഹാധിഷ്ഠിതമായി പ്രവര്‍ത്തിക്കുന്ന ആര്‍റ്റികെ റോവര്‍, റോബോട്ടിക് ടോട്ടല്‍ സ്റ്റേഷന്‍ എന്നീ അത്യാധുനിക ഉപകരണങ്ങള്‍ ഉപയോഗപ്പെത്തിയാണ് ഡിജിറ്റല്‍ സര്‍വേ നടത്തുന്നത്. ഭൂപരിഷ്‌കരണം നടപ്പിലാക്കിയ കേരളം പോലുള്ള സംസ്ഥാനത്ത് അതിര്‍ത്തിനിര്‍ണയം ഉയര്‍ത്തുന്ന വെല്ലുവിളികളെ നേരിടുക എന്ന ലക്ഷ്യത്തോടെയാണ് ഡിജിറ്റല്‍ സര്‍വേയുടെ പ്രാരംഭഘട്ട ചര്‍ച്ചകള്‍ 2021ല്‍ ആരംഭിക്കുന്നത്. 2022 ആദ്യഘട്ടത്തില്‍ കാസര്‍ഗോഡ് ജില്ലയില്‍ 18 വില്ലേജുകളില്‍ ഡിജിറ്റല്‍ സര്‍വേ തുടങ്ങുകയും 2023 പകുതി ആയപ്പോഴേക്കും 18 വില്ലേജുകളില്‍ സര്‍വേ പൂര്‍ത്തീകരിക്കുകയും ചെയ്തു. 2024 ല്‍ ജില്ലയില്‍ വീണ്ടും 19 വില്ലേജുകളില്‍ ഡിജിറ്റല്‍ സര്‍വേ ആരംഭികുകയും ഇതില്‍ 12 വില്ലേജുകളിലും ഡിജിറ്റല്‍ സര്‍വേ പൂര്‍ത്തീകരിക്കുകയും ചെയ്തു. നെക്രാജെ, ബേള, ബളാല്‍, മാലോത്ത്, പുല്ലൂര്‍, പെരിയ, പെരുമ്ള,കുബനൂര്‍, മടിക്കൈ വില്ലജുകളില്‍ സര്‍വേ അന്തിമ ഘട്ടത്തിലാണ്. ഈ സാങ്കേതിക വിദ്യ ഉപയോഗിച്ച് കാസര്‍കോട് ജില്ലയിലെ മഞ്ചേശ്വരം താലൂക്കില്‍പ്പെട്ട ഉജ്ജാര്‍ ഉള്‍വാര്‍ വില്ലേജില്‍ ഡിജിറ്റല്‍ സര്‍വേ പൂര്‍ത്തീകരിച്ച് റവന്യൂ ഭരണത്തിന് കൈമാറി. ഉജ്ജാര്‍ ഉള്‍വാര്‍ വില്ലജിലെ ഭൂമി സംബന്ധിച്ച എല്ലാ സേവനങ്ങളും സ്‌കെച്ചുള്‍പ്പെടെ എന്‍റെ ഭൂമി എന്ന ഒറ്റ പോര്‍ട്ടലില്‍ ലഭ്യമാണ്. രാജ്യത്ത് ആദ്യമായി 850 കോടി രൂപ ചെലവിട്ട് കേരളത്തിലെ മുഴുവന്‍ വില്ലേജുകളിലും നാലു വര്‍ഷം കൊണ്ട് എട്ടു ഘട്ടങ്ങളിലായി ഡിജിറ്റല്‍ സര്‍വേ പൂര്‍ത്തീകരിക്കാനാണ് തീരുമാനം. ഓരോ ആറുമാസത്തിലും 200 വില്ലേജുകളില്‍ ഡിജിറ്റല്‍ സര്‍വേ പൂര്‍ത്തിയാക്കും. കാസര്‍ഗോഡ് ജില്ലയില്‍ മാത്രം 2,50,223 പേരുടെ 40560.85 ഏക്കര്‍ ഭൂമിയില്‍ ഡിജിറ്റല്‍ സര്‍വേ നടന്നു.

നഗരമധ്യത്തിൽ കുഴിച്ചുമറിച്ച റോഡ് ഒരുമാസം കഴിഞ്ഞിട്ടും നന്നാക്കിയില്ല

കാസർഗോഡ്: ദേശീയപാത നിർമാണവുമായി ബന്ധപ്പെട്ട് മാറ്റേണ്ടിവന്ന കുടിവെള്ള പൈപ്പ് ലൈൻ പുനഃസ്ഥാപിക്കുന്നതിനായി കുഴിച്ചുമറിച്ച റോഡ് ഒരു മാസം കഴിഞ്ഞിട്ടും ടാറിംഗ് നടത്താത്തത് വ്യാപാരികൾക്കും നാട്ടുകാർക്കും ദുരിതമാകുന്നു. പുതിയ ബസ് സ്റ്റാൻഡിന് സമീപം എംജി റോഡിൽ സുൽത്താൻ ജ്വല്ലറിക്ക് മുന്നിലുള്ള ഭാഗത്താണ് റോഡ് കുഴിച്ചുമറിച്ചത്. പ്രവൃത്തികളുമായി ബന്ധപ്പെട്ട് രണ്ടാഴ്ചയോളം ഇവിടെ വ്യാപാരസ്ഥാപനങ്ങൾ അടച്ചിടേണ്ടി വന്നിരുന്നു. പൈപ്പുകൾ പുനഃസ്ഥാപിച്ച് കുഴി മൂടിയതോടെ വ്യാപാരികൾ വീണ്ടും കട തുറന്നു. എന്നാൽ പിന്നീട് പലതവണ ദേശീയപാത നിർമാണ കരാറുകാരായ ഊരാളുങ്കൽ സൊസൈറ്റി അധികൃതരുടെയും നഗരസഭയുടെയും ശ്രദ്ധയിൽ പെടുത്തിയിട്ടും ഈ ഭാഗം ടാറിംഗ് നടത്തി പഴയപടിയാക്കുന്നതിനുള്ള നടപടികൾ ഉണ്ടായിട്ടില്ലെന്ന് വ്യാപാരികൾ പറയുന്നു. നഗരമധ്യത്തിൽ തന്നെയുള്ള ഭാഗമായിട്ടും പെരുമഴയത്ത് കുഴഞ്ഞുമറിഞ്ഞ് കിടക്കുന്ന അവസ്ഥയിലാണ്. പൈപ്പ് ലൈൻ സ്ഥാപിക്കുന്നതിനായി എടുത്ത കുഴികൾ പൂർണമായി മൂടിയതുതന്നെ വ്യാപാരികളുടെ മുൻകൈയിലാണ്. റോഡ് ഈ അവസ്ഥയിലായതുകാരണം സാധനങ്ങൾ വാങ്ങാൻ ആളുകളെത്തുന്നതും കുറഞ്ഞതായി അവർ പറയുന്നു. അടിയന്തിരമായി റോഡ് പഴയപടി റീ ടാറിംഗ് നടത്തി ഗതാഗതയോഗ്യമാക്കണമെന്നാണ് ഇവരുടെ ആവശ്യം.

സിപിഐ ജില്ലാ സമ്മേളനത്തിന് വെള്ളരിക്കുണ്ടിൽ ഇന്നുതുടക്കം

വെള്ളരിക്കുണ്ട്: സിപിഐ ജില്ലാസമ്മേളനത്തിന് ഇന്നു വെള്ളരിക്കുണ്ടില്‍ തുടക്കം. ഉച്ചകഴിഞ്ഞ് മൂന്നിന് വെള്ളരിക്കുണ്ട് ടൗണിലെ പൊതുസമ്മേളന നഗരിയിലേക്കുള്ള പതാക കയ്യൂരില്‍ നിന്നും എഐവൈഎഫ് ജില്ലാ സെക്രട്ടറി എം. ശ്രീജിത്, എഐഎസ്എഫ് ജില്ലാ സെക്രട്ടറി പ്രഭിജിത്ത് എന്നിവരുടെ നേതൃത്വത്തിലും പ്രതിനിധി സമ്മേളന നഗരിയിലേക്കുള്ള പതാക മടിക്കൈ കുഞ്ഞിക്കണ്ണന്‍റെ സ്മൃതി മണ്ഡപത്തില്‍ നിന്നും മഹിളാസംഘം ജില്ലാ സെക്രട്ടറി പി. ഭാര്‍ഗവിയുടെ നേതൃത്വത്തിലും കൊടിമരം ഏളേരിത്തട്ട് പൊടോര കുഞ്ഞിരാമന്‍ നായരുടെ സ്മൃതി മണ്ഡപത്തില്‍ കിസാന്‍സഭ ജില്ലാ സെക്രട്ടറി കെ. കുഞ്ഞിരാമന്‍റെ നേതൃത്വത്തിലും സമ്മേളന നഗരയില്‍ എത്തിക്കും. മൂന്നുജാഥകളും ഉച്ചകഴിഞ്ഞ് മൂന്നിനു വെള്ളരിക്കുണ്ടില്‍ സംഗമിച്ച് റെഡ് വോളണ്ടിയര്‍ മാര്‍ച്ചോട് കൂടി പൊതുസമ്മേളന നഗരിയില്‍ എത്തിക്കും. പൊതുസമ്മേളന നഗരയിലേക്കുള്ള പതാക എഐടിയുസി ജില്ലാ ജനറല്‍സെക്രട്ടറി ടി. കൃഷ്ണനും പ്രതിനിധി സമ്മേളന നഗരിയിലേക്കുള്ള പതാക സിപിഐ ജില്ലാ സെക്രട്ടറി സി.പി. ബാബുവും കൊടിമരം സംഘാടക സമിതി കണ്‍വീനര്‍ എം. കുമാരനും ഏറ്റുവാങ്ങും. തുടര്‍ന്ന് പൊതുസമ്മേളനം സിപിഐ ദേശീയ എക്‌സിക്യൂട്ടീവംഗം പി.സന്തോഷ് കുമാര്‍ എംപി ഉദ്ഘാടനംചെയ്യും. 12നു വെള്ളരിക്കുണ്ട് വീനസ് ഓഡിറ്റോറിയത്തില്‍ നടക്കുന്ന പ്രതിനിധിസമ്മേളനം രാവിലെ 10നു ദേശീയ എക്‌സിക്യൂട്ടീവംഗം കെ. പ്രകാശ് ബാബു ഉദ്ഘാടനം ചെയ്യും. സിപിഐ സംസ്ഥാന അസി.സെക്രട്ടറി ഇ. ചന്ദ്രശേഖരന്‍ എംഎല്‍എ, മന്ത്രിമാരായ ജി.ആര്‍. അനില്‍, പി. പ്രസാദ് എന്നിവര്‍ സംബന്ധിക്കും. സമ്മേളനം 13നു സമാപിക്കും.

തേങ്ങക്ക് വിലയേറിയപ്പോൾ തെങ്ങുകയറ്റ തൊഴിലാളികളെ കിട്ടാനില്ല

പാലാവയൽ: തേങ്ങയ്ക്ക് നല്ല വില കിട്ടിത്തുടങ്ങിയതോടെ കർഷകർ തെങ്ങിൻതോട്ടങ്ങളെ കാര്യമായി ശ്രദ്ധിച്ചുതുടങ്ങി. കാടുപിടിച്ച തെങ്ങിൻതോട്ടങ്ങളിൽ വീണുകിടക്കുന്ന തേങ്ങകൾ ആഴ്ചയിലോ മാസത്തിലോ ഒരിക്കൽ പെറുക്കിക്കൂട്ടിയിരുന്നതിനു പകരം തേങ്ങയിടാനും തെങ്ങുകൾക്ക് തടമെടുക്കാനും വളമിടാനുമൊക്കെ ആളെ അന്വേഷിക്കുകയാണ് മലയോരത്തെ മിക്ക കർഷകരും. തൊഴിലാളികളുടെ ക്ഷാമവും ഉയർന്ന കൂലിയും തേങ്ങയുടെ വിലയിടിവും മൂലം തെങ്ങിൽ കയറി തേങ്ങയിടീക്കുന്ന ശീലം പലരും വർഷങ്ങൾക്കുമുമ്പേ ഉപേക്ഷിച്ചതായിരുന്നു. ഇപ്പോൾ തോട്ടങ്ങളിൽ വീണുകിടക്കുന്ന തേങ്ങകൾ മോഷണം പോകുന്ന സാഹചര്യംപോലും ഉണ്ടായതോടെയാണ് പലരും വീണ്ടും തെങ്ങുകയറ്റ തൊഴിലാളികളെ അന്വേഷിച്ചുതുടങ്ങിയത്. മലയോരമേഖലയിൽ ഏതാനും വർഷങ്ങൾക്കുമുമ്പ് നൂറുകണക്കിന് തെങ്ങുകയറ്റ തൊഴിലാളികൾ ഉണ്ടായിരുന്നിടത്ത് ഇന്ന് വിരലിലെണ്ണാവുന്നവർ മാത്രമാണുള്ളത്. പരമ്പരാഗത രീതിയിലുള്ള തെങ്ങുകയറ്റം അറിയാവുന്നവർ പുതുതലമുറയിൽ തീരെ കുറവാണ്. ഈ തൊഴിലിന്‍റെ അപകടസാധ്യതയും ഇടക്കാലത്ത് തേങ്ങയുടെ ഉല്പാദനക്കുറവും വിലയിടിവും മൂലം പൊതുവേ ആരും വിളിക്കാതായതുമൊക്കെയാണ് പലരേയും ഈ മേഖലയിൽനിന്ന് പിന്തിരിപ്പിച്ചത്. തെങ്ങിൽ നിന്ന് വീണും മറ്റ് അപകടങ്ങൾ സംഭവിച്ചും ദുരിതത്തിലായവർ പഴയ തലമുറയിൽ ഏറെയുണ്ട്. തൊഴിൽ ചെയ്യാനാകാതെ കിടപ്പിലായാൽ സർക്കാരിൽനിന്നുപോലും കാര്യമായ ആനുകൂല്യങ്ങളൊന്നും കിട്ടില്ലെന്നാണ് പലരുടെയും അനുഭവമെന്ന് തെങ്ങുകയറ്റ തൊഴിലാളിയായ വിൽസൺ പേണ്ടാനത്ത് പറയുന്നു. മലയോരത്തെ തെങ്ങുകളുടെ ഉയരവും തൊട്ടടുത്തുകൂടി കടന്നുപോകുന്ന വൈദ്യുത ലൈനുകളുമെല്ലാം ചെറുതല്ലാത്ത വെല്ലുവിളികളാണ്. നേരിയൊരു കൈപ്പിഴ പോലും ജീവിതം ഇരുട്ടിലാക്കിയേക്കാം. ഒരു തെങ്ങിൽ കയറുന്നതിന് 45 രൂപയാണ് മലയോരമേഖലയിൽ ഇപ്പോഴത്തെ കൂലി. നഗരമേഖലകളിൽ അത് 60 രൂപ വരെയാണ്. 1926 ലെ അഗ്രിക്കൾച്ചർ ആക്ട്, 1976 ലെ ഇൻഡസ്ട്രിയൽ ആക്ട് എന്നിവ പ്രകാരം സർക്കാരിൽനിന്ന് തൊഴിലാളികൾക്ക് ലഭിക്കേണ്ട ആനുകൂല്യങ്ങളൊന്നും തെങ്ങുകയറ്റ തൊഴിലാളികൾക്ക് ലഭിക്കുന്നില്ല. പഞ്ചായത്തുകളിലോ കൃഷിവകുപ്പിലോ നിന്നുപോലും കാര്യമായ ആനുകൂല്യങ്ങളൊന്നും കിട്ടുന്നില്ല. കൃഷിഭവനുകൾ മുഖേന തെങ്ങുകയറ്റയന്ത്രങ്ങളും അതുപയോഗിച്ച് തെങ്ങുകയറാനുള്ള പരിശീലനവും നല്കുന്നതുമാണ് സർക്കാർ തലത്തിൽ ലഭിക്കുന്ന ഏക ആനുകൂല്യം. അതിനുതന്നെ ആവശ്യക്കാർ തീരെ കുറവാണെന്നതാണ് അനുഭവം. നിലവിലുള്ള തെങ്ങുകയറ്റ തൊഴിലാളികൾക്കും പുതുതയി ഈ മേഖലയിലേക്ക് കടന്നുവരുന്നവർക്കും തൊഴിൽ നിയമങ്ങൾ അനുസരിച്ചുള്ള സംരക്ഷണവും ആനുകൂല്യങ്ങളും ഉറപ്പാക്കാൻ സർക്കാർ തയ്യാറാകണമെന്നാണ് ഇവരുടെ ആവശ്യം.

ഓപ്പറേഷന്‍ ധൂമം: സ്‌കൂള്‍ പരിസരത്ത് നിന്ന് പുകയില ഉത്പന്നങ്ങള്‍ പിടികൂടി

നീലേശ്വരം: കേന്ദ്ര പുകയില നിയന്ത്രണ നിയമം ഫലപ്രദമായി നടപ്പിലാക്കുന്നതിന്‍റെ ഭാഗമായി ഓപ്പറേഷന്‍ ധൂമം എന്ന പേരില്‍ ജില്ലാ കളക്ടറുടെ നിര്‍ദേശപ്രകാരം നടന്ന സംയുക്ത പരിശോധനയില്‍ നീലേശ്വരം ബ്ലോക്ക് തല സ്‌ക്വാഡ് നീലേശ്വരം, ചായ്യോത്ത് മേഖലയില്‍ വിവിധ സ്ഥാപനങ്ങള്‍ പരിശോധിച്ചു. രാജാസ് ഹയര്‍ സെക്കന്‍ഡറി സ്‌കൂളിനു സമീപമുള്ള കടയില്‍ നിന്ന് പുകയില ഉത്പന്നങ്ങള്‍ പിടിച്ചെടുത്തു നശിപ്പിക്കുകയും 2000 രൂപ പിഴയിടുകയും ചെയ്തു. നിയമത്തിന്‍റെ ഭാഗമായ ബോര്‍ഡ് വെക്കാത്ത ചായ്യോത്ത് കടയുടമയ്ക്ക് പിഴ ഈടാക്കുകയും ചെയ്തു. കേന്ദ്ര പുകയില നിയന്ത്രണ നിയമപ്രകാരം വിദ്യാലയങ്ങള്‍ക്ക് നൂറുവാര ചുറ്റളവില്‍ പുകയില വില്‍പന നടത്താന്‍ പാടുള്ളതല്ല. പരിശോധനയില്‍ നീലേശ്വരം താലൂക്ക് ആശുപത്രി ഹെല്‍ത്ത് സൂപ്പര്‍വൈസര്‍ അജിത് സി. ഫിലിപ്പ്, നീലേശ്വരം എസ്‌ഐ എ.വി. ശ്രീകുമാര്‍, എക്‌സൈസ് ഇന്‍സ്‌പെക്ടര്‍ എന്‍. വൈശാഖ്, ഹെല്‍ത്ത് ഇന്‍സ്‌പെക്ടര്‍ കെ. ഗിരീഷ്‌കുമാര്‍, ജൂണിയര്‍ ഹെല്‍ത്ത് ഇന്‍സ്‌പെക്ടര്‍ ബി. ശ്രുതി, എക്‌സൈസ് പ്രിവന്‍റീവ് ഓഫീസര്‍മാരായ പ്രസാദ്, പ്രജിത്ത്, സിവില്‍ എക്‌സൈസ് ഓഫീസര്‍മാരായ നിസാമുദ്ദീന്‍, ശൈലേഷ്, രാജീവന്‍, സിവില്‍ പോലീസ് ഉദ്യോഗസ്ഥരായ രാജീവന്‍, സുരേന്ദ്രന്‍ എന്നിവര്‍ പങ്കെടുത്തു.

കോയിത്തട്ട കുന്നിനെ ജൈവവൈവിധ്യ പൈതൃകകേന്ദ്രമായി പ്രഖ്യാപിക്കാൻ പദ്ധതി

കരിന്തളം: കിനാനൂർ-കരിന്തളം പഞ്ചായത്തിലെ കോയിത്തട്ട കുന്നിനെ ജൈവവൈവിധ്യ പൈതൃകകേന്ദ്രമായി പ്രഖ്യാപിക്കാൻ ജില്ലാ പഞ്ചായത്തിന്‍റെ പദ്ധതി. ഇതിന്‍റെ ഭാഗമായി സംസ്ഥാന ജൈവവൈവിധ്യ ബോർഡ് മെമ്പർ സെക്രട്ടറി ഡോ.വി. ബാലകൃഷ്ണനും ജില്ലാ പഞ്ചായത്ത് അംഗങ്ങളും ജൈവവൈവിധ്യ പരിപാലനസമിതി അംഗങ്ങളും നാളെ സ്ഥലം സന്ദർശിക്കും. തുടർന്ന് നാട്ടുകാരുടെ യോഗം വിളിച്ച് പദ്ധതിയുടെ രൂപരേഖ തയ്യാറാക്കും. ജൈവവൈവിധ്യങ്ങളാൽ സമ്പന്നമായ ജില്ലയിലെ ഇടനാടൻ ചെങ്കൽകുന്നുകൾക്ക് സംരക്ഷണമൊരുക്കുന്നതിന്‍റെ ആദ്യപടിയായാണ് പദ്ധതി ആവിഷ്കരിച്ചത്. മൈസൂരിലെയും മലബാറിലെയും ഭൂപ്രകൃതിയും ജൈവവൈവിധ്യവുമായി ബന്ധപ്പെട്ട് 1807 ൽ ഫ്രാൻസിസ് ബുക്കാനൻ എഴുതിയ പുസ്തകത്തിൽ കോയിത്തട്ടയിലെ ചെങ്കൽക്കുന്നുകളെ കുറിച്ച് പരാമർശിക്കുന്നുണ്ട്. ചെങ്കൽപ്പാറകൾക്ക് മുകളിൽ വെള്ളം കെട്ടിനിൽക്കുന്ന ഇടങ്ങളിൽ വളരുന്ന ആമ്പലിനോട് സാദൃശ്യമുള്ള കൃഷ്ണകേസര എന്ന അപൂർവ ജലസസ്യം കോയിത്തട്ട കുന്നിലെ ജൈവവൈവിധ്യങ്ങളിലൊന്നാണ്. മറ്റനവധി അപൂർവ സസ്യജാലങ്ങളും ചെറുജീവികളും ഈ കുന്നിലെ ആവാസവ്യവസ്ഥയിൽ കണ്ടെത്തിയിട്ടുണ്ട്. അമിതമായ മണ്ണെടുപ്പ് മൂലം ജില്ലയിലെ ഇടനാടൻ ചെങ്കൽകുന്നുകളിൽ പലതും നാശത്തിന്‍റെ വക്കിലായ സാഹചര്യത്തിലാണ് ഇവയുടെ സംരക്ഷണത്തിനായി ജില്ലാ പഞ്ചായത്ത് മുന്നിട്ടിറങ്ങുന്നത്.

അരിവാള്‍കോശ രോഗനിര്‍ണയ പരിശോധന ആരംഭിച്ചു

എണ്ണപ്പാറ: അരിവാള്‍ കോശരോഗ നിര്‍ണയപരിശോധനയ്ക്ക് കോടോം-ബേളൂര്‍ പഞ്ചായത്തിലെ കോളിയാര്‍ പട്ടികവര്‍ഗ ഉന്നതിയില്‍ തുടക്കമായി. ക്ഷേമകാര്യ സ്ഥിരംസമിതി അധ്യക്ഷന്‍ പി. ഗോപാലകൃഷ്ണന്‍ ഉദ്ഘാടനം ചെയ്തു. എണ്ണപ്പാറ കുടുംബരോഗ്യകേന്ദ്രം മെഡിക്കല്‍ ഓഫീസര്‍ ഡോ.എം.വി. കൃപേഷ് അധ്യക്ഷതവഹിച്ചു. ജില്ലാ എംസിഎച്ച് ഓഫീസര്‍ സൂസന്‍ ഫിലിപ്പ്, ഡിപിഎച്ച്എന്‍ കെ. ശാന്ത എന്നിവര്‍ സംസാരിച്ചു. ജില്ലാ എഡ്യുക്കേഷന്‍ആൻഡ് മീഡിയ ഓഫീസര്‍ അബ്ദുള്‍ ലത്തീഫ് മഠത്തില്‍ സ്വാഗതവും കുടുംബാരോഗ്യകേന്ദ്രം ഹെല്‍ത്ത് ഇന്‍സ്‌പെക്ടര്‍ പി.കെ. ജിഷ നന്ദിയും പറഞ്ഞു.

മൊഗ്രാൽ ജിവിഎച്ച്എസ്എസിൽ പപ്പായത്തോട്ടം ഒരുങ്ങുന്നു

മൊഗ്രാൽ: ഗവ. വിഎച്ച്എസ്എസിലെ ഇക്കോ ക്ലബിന്‍റെ നേതൃത്വത്തിൽ സ്കൂളിൽ പപ്പായത്തോട്ടമൊരുക്കുന്നു. സിപിസിആർഐയിൽ നിന്നെത്തിച്ച മികച്ചയിനം തൈകളാണ് നട്ടുപിടിപ്പിച്ചത്. മുഖ്യാധ്യാപകൻ ജെ. ജയറാം, പിടിഎ പ്രസിഡന്‍റ് അഷറഫ് പെർവാഡ് എന്നിവർ ചേർന്ന് തൈകൾ നട്ട് ഉദ്ഘാടനം നിർവഹിച്ചു. ഇക്കോ ക്ലബിന്‍റെ നേതൃത്വത്തിൽ നേരത്തേ വാഴകൃഷി ചെയ്തുവരുന്നുണ്ട്. അധികം താമസിയാതെ പച്ചക്കറി കൃഷി കൂടി തുടങ്ങാനാണ് പദ്ധതി. ചടങ്ങിൽ സ്റ്റാഫ് സെക്രട്ടറി വിജു പയ്യാടക്കത്ത്, അധ്യാപകരായ രാജേഷ്, സൈനബ, റിവേഗ, രമ്യ എന്നിവർ പങ്കെടുത്തു.

ആനക്കുട്ടിയുടെ ജഡം മറവുചെയ്തു

പാലാവയൽ: ഇടവരമ്പിനും കോഴിച്ചാലിനുമിടയിൽ പുഴയ്ക്ക് നടുവിലെ തുരുത്തിൽ കണ്ടെത്തിയ ആനക്കുട്ടിയുടെ ജഡം വനംവകുപ്പിന്‍റെ നടപടിക്രമങ്ങളനുസരിച്ച് പോസ്റ്റ്മോർട്ടം നടത്തിയതിനു ശേഷം കാട്ടിൽ മറവുചെയ്തു. കണ്ണൂർ ഡിവിഷണൽ ഫോറസ്റ്റ് ഓഫീസർ എസ്. വൈശാഖിന്‍റെ നിർദ്ദേശാനുസരണം നോർത്തേൺ സർക്കിളിനു കീഴിലുള്ള വെറ്ററിനറി സർജൻ ഇല്യാസ് റാവുത്തറുടെ നേതൃത്വത്തിലാണ് പോസ്റ്റ്മോർട്ടം നടപടികൾ പൂർത്തിയാക്കിയത്. ചെറുപുഴ മൃഗാശുപത്രിയിലെ സർജൻ ഡോ. ജിബിൻ, പഞ്ചായത്ത് പ്രസിഡന്‍റ് കെ.എഫ്. അലക്സാണ്ടർ, എൻജിഒ പ്രതിനിധി വിമൽ ലക്ഷ്മണൻ, സയന്‍റിഫിക് എക്സ്പേർട്ട് മിനി വർഗീസ്, തളിപ്പറമ്പ് റെയ്ഞ്ച് ഫോറസ്റ്റ് ഓഫീസർ പി.വി.സനൂപ് കൃഷ്ണൻ, ഫ്ലയിംഗ് സ്ക്വാഡ് റെയ്ഞ്ച് ഓഫീസർ ജയപ്രകാശ് എന്നിവർ സ്ഥലത്തെത്തിയിരുന്നു.

ജ്യോതിഭവന്‍ ബധിരവിദ്യാലയത്തിന് ഇലക്‌ട്രിക് ഓട്ടോറിക്ഷ നല്‍കി മുത്തൂറ്റ് ഫിനാന്‍സ്

ചായ്യോത്ത്: മുത്തൂറ്റ് ഫിനാന്‍സിന്‍റെ സിഎസ്ആര്‍ പ്രവര്‍ത്തനങ്ങളുടെ ഭാഗമായി ചായ്യോത്ത് ജ്യോതിഭവന്‍ ബധിരവിദ്യാലയത്തിന് ഇലക്‌ട്രിക് ഓട്ടോറിക്ഷ കൈമാറി. കാസര്‍ഗോഡ്, കണ്ണൂര്‍ ജില്ലകളില്‍ നിന്നുള്ള കേള്‍വിശേഷിയില്ലാത്ത 57 കുട്ടികളാണ് ജ്യോതിഭവന്‍ സ്‌കൂളില്‍ പഠിക്കുന്നത്. ഇതില്‍ 30 പേര്‍ സ്‌കൂള്‍ ഹോസ്റ്റലില്‍ താമസിച്ചാണ് പഠിക്കുന്നത്. മറ്റ് 27 പേരും ഉള്‍പ്രദേശങ്ങളില്‍ നിന്ന് ദിവസവും യാത്ര ചെയ്താണ് എത്തുന്നത്. പലപ്പോഴും പൊതുഗതാഗത സംവിധാനങ്ങളാണ് ഇവര്‍ക്ക് ആശ്രയം. സ്‌കൂള്‍ സ്വന്തം നിലയിലാണ് കുട്ടികളുടെ യാത്രാസൗകര്യം ഒരുക്കുന്നത്. ഇതു സ്‌കൂളിന് പ്രതിമാസം വലിയ സാമ്പത്തികബാധ്യതയുണ്ടാക്കി. ഇതോടെയാണ് വിദ്യാര്‍ഥികള്‍ക്ക് സ്ഥിരവും സുരക്ഷിതവും പരിസ്ഥിതി സൗഹൃദവുമായ യാത്ര ഉറപ്പാക്കുന്നതിനായി ഒരു ഇലക്‌ട്രിക്് ഓട്ടോറിക്ഷ വാങ്ങുന്നതിനായി മുത്തൂറ്റ് ഫിനാന്‍സ് സാമ്പത്തിക പിന്തുണ നല്‍കിയത്. ഈ വാഹനം ദിവസവും ഏകദേശം 70 കിലോമീറ്റര്‍ ദൂരം മൂന്നു റൂട്ടുകളിലായി സഞ്ചരിക്കും. മുത്തൂറ്റ് ഫിനാന്‍സ് കോഴിക്കോട് റീജിയണല്‍ മാനേജര്‍ ദീപേന്ദ്രു ഹരീഷ് വാഹനം കൈമാറി. സിഎസ്ആര്‍ മാനേജര്‍ ജാന്‍സന്‍ വര്‍ഗീസ്, മുഖ്യാധ്യാപിക സിസ്റ്റര്‍ ഫിന്‍സി, കാഞ്ഞങ്ങാട് ബ്രാഞ്ച് മാനേജര്‍ കെ. രാജേഷ്, കോഴിക്കോട് റീജിയണല്‍ മാര്‍ക്കറ്റിംഗ് മാനേജര്‍ കെ. രാജേഷ് കുമാര്‍, കണ്ണൂര്‍ ഫോര്‍ട്ട് റോഡ് ബ്രാഞ്ച് മാനേജര്‍ സുധീഷ്, പിടിഎ പ്രസിഡന്‍റ് കെ.ജെ. രാജേഷ് എന്നിവര്‍ പങ്കെടുത്തു.

ജൈവവൈവിധ്യ പുരസ്‌കാരം: കാസര്‍ഗോഡിന് ഇരട്ടനേട്ടം

കാസര്‍ഗോഡ്: സംസ്ഥാന ജൈവവൈവിധ്യ ബോര്‍ഡിന്‍റെ 2023ലെ പ്രവര്‍ത്തനങ്ങള്‍ക്കുള്ള അവാര്‍ഡുകള്‍ പ്രഖ്യാപിച്ചപ്പോള്‍ ജില്ലയ്ക്ക് അഭിമാനമായി ഇരട്ട നേട്ടം. സംസ്ഥാനത്തെ ഏറ്റവും മികച്ച ബിഎംസിയായി കാസര്‍ഗോഡ് ജില്ലാ പഞ്ചായത്ത് ബിഎംസി തെരഞ്ഞെടുക്കപ്പെട്ടപ്പോള്‍ മികച്ച ഹരിതവിദ്യാലയമായി ബേക്കല്‍ ജിഎഫ്എച്ച്എസ്എസ് തെരഞ്ഞെടുക്കപ്പെട്ടു. രാജ്യത്താദ്യമായി ഔദ്യോഗിക വൃക്ഷവും പുഷ്പവും പക്ഷിയും ജീവിയുമുള്ള ജില്ലയായി 2023 ല്‍ കാസര്‍ഗോഡിനെ പ്രഖ്യാപിച്ചിരുന്നു. കാഞ്ഞിരമരം ജില്ലാ വൃക്ഷവുമായും പെരിയ പോളത്താളി ജില്ലാ പുഷ്പമായും വെള്ള വയറന്‍ കടല്‍പ്പരുന്ത് ജില്ല പക്ഷിയായും പാലപ്പൂവന്‍ ആമ ജില്ലാ ജീവിയായും പ്രഖ്യാപിക്കപ്പെട്ടു. .ഈ സ്പീഷീസുകളുടെ സംരക്ഷണ പ്രവര്‍ത്തനങ്ങളും നിലവില്‍ നടന്നു വരുന്നു. സ്റ്റുഡന്‍റ്സ് പോലീസ് കേഡറ്റിന്‍റെ സഹകരത്തോടെ ജില്ലാപഞ്ചായത്ത് സ്‌കൂളുകളില്‍ ഫലവൃക്ഷതോട്ടങ്ങള്‍ തയ്യാറാക്കുന്നതിലേക്ക് നടപ്പിലാക്കിയ മധുരവനം പദ്ധതിയും ശ്രദ്ധേയമായി. ജൈവവൈവിധ്യങ്ങളാല്‍ സമ്പന്നമായ ചെങ്കല്‍ കുന്നുകളുടെ ശോഷണം നാള്‍ക്കുനാള്‍ കൂടി വരുന്ന സാഹചര്യത്തില്‍ ലാറ്ററെറ്റ് റിസര്‍വ് ആയ ചെങ്കല്‍ കുന്നിനെ പൈതൃക കേന്ദ്രങ്ങളായി പ്രഖ്യാപിക്കാനുള്ള പ്രവര്‍ത്തനങ്ങളും ജില്ലാപഞ്ചായത്ത് ബിഎംസിയുടെ നേതൃത്വത്തില്‍ നടന്നുവരികയാണ്. ഒരു ലക്ഷം രൂപയും പ്രശസ്തിപത്രവും അടങ്ങുന്നതാണ് പുരസ്‌കാരം. ബേക്കല്‍ ജിഎഫ്എച്ച്എസ്എസിന്‍റെ ജൈവവൈവിധ്യ ക്ലബിന്‍റെ മികവാര്‍ന്ന പ്രവര്‍ത്തനങ്ങള്‍ക്കാണ് അംഗീകാരം ലഭിച്ചത്. പൈതൃക വാഴ സംരക്ഷണ കേന്ദ്രം എന്ന നിലയില്‍ ഇന്ത്യയിലെ മറ്റു സംസ്ഥാനങ്ങളിലെ അപൂര്‍വ്വ ഇനങ്ങള്‍ ഉള്‍പ്പെടെ നാല്‍പതോളം വാഴയീനങ്ങളെ സ്‌കൂള്‍ വളപ്പില്‍ സംരക്ഷിക്കുകയും ചെയ്യുന്നതിനു പുറമേ അപൂര്‍വ വൃക്ഷ ഇനങ്ങളെ സംരക്ഷിക്കുന്നതിനും വ്യാപിപ്പിക്കുന്നതിനും ആയി തുടങ്ങിയ നഴ്‌സറിയിലൂടെ 2500 വൃക്ഷത്തൈകള്‍ വലിയ കൂടകളില്‍ നിര്‍മ്മിച്ച സ്ഥാപനങ്ങള്‍ക്കും സ്‌കൂളുകള്‍ക്ക് നല്‍കി. ബേക്കല്‍ പുഴയുടെ തീരത്ത് നാലേക്കറോളം വരുന്ന സ്ഥലത്ത് നടത്തിയ കണ്ടല്‍ത്തുരുത്തുക്കളുടെ സംരക്ഷണവുമായി ബന്ധപ്പെട്ട പ്രവര്‍ത്തനങ്ങളും സ്‌കൂളിന്‍റെ അവാര്‍ഡിന് മാറ്റുകൂട്ടി.നക്ഷത്ര വനത്തിലെ മരങ്ങള്‍ അടക്കം സ്‌കൂളില്‍ അപൂര്‍വ്വയിനം മരത്തൈകള്‍ നട്ട് പരിപാലിക്കുന്നുണ്ട്. 25,000 രൂപയും പ്രശസ്തി പത്രവും അടങ്ങുന്നതാണ് പുരസ്‌കാരം.

എക്‌സൈസ് ഉദ്യോഗസ്ഥരെ പട്ടിയെ വിട്ട് കടിപ്പിച്ച കേസിലെ പ്രതി മദ്യവുമായി അറസ്റ്റില്‍

കാസര്‍ഗോഡ്: സ്‌കൂട്ടറില്‍ കടത്തുകയായിരുന്ന 5.4 ലീറ്റര്‍ മദ്യവുമായി യുവാവ് അറസ്റ്റില്‍. കളനാട് കൈനോത്തെ ഡി. ഉദയനെയാണ് (42) മേല്‍പറമ്പ് നടക്കാനില്‍ നിന്നും എക്‌സൈസ് എന്‍ഫോഴ്‌സ്‌മെന്‍റ് ആന്‍ഡ് ആന്‍റി നാര്‍ക്കോട്ടിക് സ്‌പെഷല്‍ സ്‌ക്വാഡ് ഇന്‍സ്‌പെക്ടര്‍ പ്രമോദ്കുമാറും സംഘവും അറസ്റ്റ് ചെയ്തത്. 180 മില്ലിലീറ്ററിന്‍റെ 28 കുപ്പി മദ്യമാണ് ഇയാളുടെ കൈയില്‍ നിന്നും പിടികൂടിയത്. മുമ്പ് തന്‍റെ വീട്ടില്‍ റെയ്ഡിനു വന്ന എക്‌സൈസ് സംഘത്തെ ഉദയന്‍ പട്ടിയെ അഴിച്ചുവിട്ട് കടിപ്പിച്ചിരുന്നു. കേസില്‍ പ്രതിയെ മൂന്നുവര്‍ഷവും ഒരുമാസവും തടവും 35,800 രൂപ പിഴയടക്കാനും കാസര്‍ഗോഡ് കോടതി ശിക്ഷിച്ചിരുന്നു.

അധ്യാപികയെ പൂട്ടിയിട്ടത് പ്രതിഷേധാർഹം: കെപിഎസ്ടിഎ

വെള്ളരിക്കുണ്ട്: പരപ്പ ജിഎച്ച്എസ്എസ് അധ്യാപികയും കെപിഎസ്ടിഎ ചിറ്റാരിക്കാൽ ഉപജില്ല സെക്രട്ടറിയുമായ ടിജി ദേവസ്യ സ്റ്റാഫ് റൂമിൽ പൂട്ടിയിട്ട സിപിഎം നേതാക്കളുടെ നടപടിക്കെതിരെ കെപിഎസ്ടിഎ ചിറ്റാരിക്കാൽ ഉപജില്ല കമ്മിറ്റി ശക്തമായ പ്രതിഷേധം രേഖപ്പെടുത്തി. കെപിഎസ്ടിഎ ഉൾപ്പെടുന്ന സെറ്റോ സംഘടന പൊതുപണിമുടക്കിൽ പങ്കെടുക്കുന്നില്ല. ഇതു പ്രകാരം തലേദിവസം തന്നെ മുഖ്യാധ്യാപികയോട് സമരത്തിൽ പങ്കെടുക്കാത്തവരുടെ വിവരങ്ങൾ കെപിഎസ്ടിഎ പരപ്പ യൂണിറ്റ് കമ്മിറ്റി രേഖാമൂലം അറിയിച്ചിരുന്നു. അതുപ്രകാരം സമരത്തിൽ പങ്കെടുക്കാത്ത കെപിഎസ്ടിഎ അംഗങ്ങളും കുട്ടികളും സ്കൂളിൽ ഹാജരായി. ഈ സമയം പരപ്പ ലോക്കൽ കമ്മിറ്റിയുടെ നേതൃത്വത്തിൽ സർക്കാർ സർവീസിൽ നിന്ന് വിരമിച്ച ജീവനക്കാരൻ ഉൾപ്പെടെ സ്കൂളിലെത്തുകയും അധ്യാപികയോട് വളരെ പരുഷമായ രീതിയിൽ സംസാരിക്കുകയും സ്റ്റാഫ് റൂമിന് പുറത്തുനിന്ന് കുറ്റിയിടുകയും ചെയ്തു. സ്കൂളിൽ ഹാജരായ വിദ്യാർഥികളെ ഈ നേതാക്കൾ വീട്ടിലേയ്ക്ക് പറഞ്ഞു വിട്ടു. ഇത് വളരെ ഗുരുതരമായ കുറ്റമാണെന്ന് കെപിഎസ്ടിഎ ഭാരവാഹികൾ പറഞ്ഞു. പ്രതിഷേധ യോഗത്തിൽ ഉപജില്ലാ പ്രസിഡന്‍റ് ജിജോ പി. ജോസഫ് അധ്യക്ഷത വഹിച്ചു. സി.എം. വർഗീസ് അലോഷ്യസ് ജോർജ്, പി. ശ്രീജ, വി.കെ. പ്രഭാവതി, മാർട്ടിൻ ജോർജ്, സോജിൻ ജോർജ്, ബിജു അഗസ്റ്റിൻ, ജയിംസ് ചെറിയാൻ, കെ.റ്റി.റോയ്, ബാലചന്ദ്രൻ, ജയൻ മണ്ഡപം എന്നിവർ സംസാരിച്ചു.

ആറുമാസത്തിനിടെ തെരുവുനായയുടെ കടിയേറ്റത് മൂവായിരത്തിലേറെ പേർക്ക്

കാസർഗോഡ്: കഴിഞ്ഞ ആറുമാസത്തിനിടെ ജില്ലയിൽ തെരുവുനായയുടെ കടിയേറ്റത് മൂവായിരത്തിലേറെ പേർക്ക്. ഈ വർഷം ഇതുവരെ ജില്ലയിൽ മൃഗങ്ങളുടെ കടിയേറ്റ് ചികിത്സ തേടി വിവിധ ആശുപത്രികളിലെത്തിയത് 3931 പേരാണ്. ഇതിൽ 95 ശതമാനവും തെരുവുനായ്ക്കളുടെ കടിയേറ്റവരാണ്. നാമമാത്രമായ എണ്ണം ആളുകൾ വളർത്തുനായ്ക്കളുടെയും പൂച്ചകളുടെയും കടിയേറ്റ് ചികിത്സ തേടിയവരാണ്. ജനുവരി- 630, ഫെബ്രുവരി- 638, മാർച്ച്- 718, ഏപ്രിൽ- 634, മേയ്- 696, ജൂൺ- 540 എന്നിങ്ങനെയാണ് ചികിത്സ തേടിയെത്തിയവരുടെ എണ്ണം. ജൂലൈയിൽ ഇതുവരെയുള്ള 10 ദിവസത്തിനകം 75 പേർക്ക് നായയുടെ കടിയേറ്റു. കഴിഞ്ഞ വർഷം ജില്ലയിൽ 6324 പേർക്കും 2023 ൽ 6975 പേർക്കുമാണ് തെരുവുനായ്ക്കളുടെ കടിയേറ്റത്. നിലവിലുള്ള സ്ഥിതി വച്ചുനോക്കിയാൽ ഈ വർഷം ഇതിലും കൂടാനാണ് സാധ്യത. മുറിവേറ്റ ഭാഗം എത്രയും പെട്ടെന്ന് സോപ്പ് ഉപയോഗിച്ച് വൃത്തിയാക്കി 15 മിനിറ്റ് നേരമെങ്കിലും തുടർച്ചയായി പൈപ്പുവെള്ളം പിടിച്ച് നന്നായി കഴുകണമെന്നാണ് ഡോക്ടർമാരുടെ നിർദേശം. ഇതിനു ശേഷമാണ് ആശുപത്രിയിൽ പോകേണ്ടത്. നഖം കൊണ്ടുള്ള മാന്തലും രക്തം വരാത്ത ചെറിയ പോറലുകളും ഏൽക്കുന്നവർക്ക് താരതമ്യേന ശക്തികുറഞ്ഞ ഐഡിആർവി വാക്സിനാണ് നല്കുന്നത്. ഇത് നാലു തവണയായി നല്കണം. പ്രാഥമികാരോഗ്യ കേന്ദ്രങ്ങളുൾപ്പെടെ ജില്ലയിലെ എല്ലാ സർക്കാർ ആരോഗ്യകേന്ദ്രങ്ങളിലും സാധാരണഗതിയിൽ ഈ വാക്സിൻ ഉണ്ടായിരിക്കും. ആഴമേറിയ കടികൾക്ക് നല്കുന്ന ആന്‍റി റാബീസ് ഇമ്യൂണോഗ്ലോബുലിൻ കാഞ്ഞങ്ങാട് ജില്ലാ ആശുപത്രിയിലും കാസർഗോഡ് ജനറൽ ആശുപത്രിയിലും ലഭ്യമാക്കിയിട്ടുണ്ട്.

കെട്ടിടോദ്ഘാടനം നടത്തി

കളനാട്: കുടുംബാരോഗ്യകേന്ദ്രത്തിനായി നിര്‍മിച്ച പുതിയ കെട്ടിടം സി.എച്ച്. കുഞ്ഞമ്പു എംഎല്‍എ ഉദ്ഘാടനം ചെയ്തു. പഞ്ചായത്ത് പ്രസിഡന്‍റ് സുഫൈജ അബൂബക്കര്‍ അധ്യക്ഷതവഹിച്ചു. ഷാനവാസ് പാദൂര്‍, മന്‍സൂര്‍ കുരിക്കള്‍, ആയിഷ അബുബക്കര്‍, ഷംസുദ്ദീന്‍ തെക്കില്‍, അബ്ദുള്‍ ക ലാം സഹദുള്ള, വി. ചന്ദ്രന്‍, ഡോ.പി. സന്തോഷ്, അഹമ്മദ് കല്ലട്ര, ചന്ദ്രശേഖരന്‍ കുളങ്ങര, ഇ. മനോജ്കുമാര്‍, സുജാത രാമകൃഷ്ണന്‍, മൈമൂന അബ്ദുള്‍ റഹ്‌മാന്‍, കല്ലട്ര മാഹിന്‍ ഹാജി, ദിവാകരന്‍, അബ്ദുള്‍ ഖാദര്‍ കളനാട്, ചന്ദ്രന്‍ കൊക്കാല്‍, തുളസീധരന്‍ ബളാനം, കെ. കൃഷ്ണന്‍, തമ്പാന്‍ നായര്‍ എന്നിവര്‍ സംസാരിച്ചു. രമ ഗംഗാധരന്‍ സ്വാഗതവും ഡോ. രമ്യ മോഹന്‍ നന്ദിയും പറഞ്ഞു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]