പാറശാല : കളത്തൂര് ഹൈസ്കൂളില് എട്ടാം ക്ലാസിലെ തെരഞ്ഞെടുത്ത 30 കുട്ടികളെ ഉള്പ്പെടുത്തി കേരളാ പൊതുവിദ്യാഭ്യാസ ഡയറക്ടറേറ്റ് പുതുതായി ആരംഭിച്ച സ്കൂള് സോഷ്യല് സര്വീസ് സ്കീം കെ. ആന്സലന് എംഎല്എ ഉദ്ഘാടനം ചെയ്തു. പൊഴിയൂര് ഓഖി പാര്ക്കില് ശുചീകരണ പ്രവര്ത്തനം നടത്തിക്കൊണ്ടു നടത്തിയ ഉദ്ഘാടന സമ്മേളനത്തില് കുളത്തൂര് പഞ്ചായത്ത് പ്രസിഡന്റ് ജി. സുധ അര്ജുനന്, ജില്ലാ പഞ്ചായത്ത് അംഗം സൂര്യ എസ്. പ്രേം, ബ്ലോക്ക് പഞ്ചായത്തംഗം സോണിയ ആന്റണി സേവ്യര്, പ്രസിഡന്റ് ആര്. മോഹന്ദാസ്, വൈസ് പ്രസിഡന്റ് പി.കെ. സന്തോഷ് കുമാര് എന്നിവര് പങ്കെടുത്തു.
തുടര്ന്ന് പൊഴിയൂര് പോലീസ് സ്റ്റേഷനിലെ എസ്ഐമാരായ ശ്രീകുമാരന് നായര്, സജിത്കുമാര്, സുകേശന് എന്നിവരുടെ നേതൃത്വത്തില് സ്കൂളിലെ എസ്പിസി, എന്സിസി കുട്ടികളെ ഉള്പ്പെടുത്തി ലഹരിക്കെതിരെ ലഘുലേഖ വിതരണം, പ്രതിജ്ഞ, ക്വിസ് എന്നിവ നടത്തുകയും വിജയികള്ക്ക് സമ്മാനം നല്കുകയും ചെയ്തു. പ്രിന്സിപ്പൽ ജെ.വി. അനിത, അധ്യാപകരായ വി.വി. ചിത്ര, അനില്കുമാര്, അജികുമാര്, സുബ്രഹ്മണ്യന്, സുധ എന്നിവര് പ്രവര്ത്തനങ്ങള്ക്ക് നേതൃത്വം നല്കി.