ഡിസംബർ 31 വരെ അവസരം
തൊടുപുഴ: കേന്ദ്ര-സംസ്ഥാന സർക്കാരുകൾ യോജിച്ച് നടപ്പാക്കുന്ന കാലാവസ്ഥാധിഷ്ഠിത വിള ഇൻഷ്വറൻസ് പദ്ധതികളിൽ ഡിസംബർ 31 വരെ അംഗമാകാൻ കർഷകർക്ക് അവസരം. തെങ്ങ്, കാപ്പി, റബർ, നെല്ല്, വാഴ, കമുക്, കുരുമുളക്, മഞ്ഞൾ, ജാതി, കൊക്കോ, വെറ്റില, ഏലം, ഗ്രാന്പൂ, ഇഞ്ചി, മാവ്, പൈനാപ്പിൾ, കശുമാവ്, മരച്ചീനി, കിഴങ്ങുവർഗങ്ങൾ, പയർവർഗങ്ങൾ, പച്ചക്കറി എന്നീ വിളകൾക്കാണ് ഇൻഷ്വറൻസ് പരിരക്ഷ ലഭിക്കുന്നത്.
കാലാവസ്ഥാധിഷ്ഠിത വിള ഇൻഷ്വറൻസിൽ ഓരോ വിളയ്ക്കും വെവ്വേറെ പ്രതികൂല കാലാവസ്ഥാഘടകങ്ങളും അതു രേഖപ്പെടുത്തുന്ന കാലാവധിയും വിളയനുസരിച്ചുള്ള കാലാവസ്ഥയുടെ നിർണായക തോതും ടേം ഷീറ്റ് പ്രകാരം സംസ്ഥാന സർക്കാർ വിജ്ഞാപനം ചെയ്തിട്ടുണ്ട്. വിളകൾ ഇൻഷ്വറൻസ് ചെയ്യുന്പോൾ ഓരോ വിളകൾക്കും വേണ്ട മുൻകരുതൽ നടപടികൾ കർഷകർ നിർബന്ധമായും പാലിച്ചിരിക്കണം.
നഷ്ടം സംഭവിച്ച് 72 മണിക്കൂറിനകം കർഷകർ കൃഷിഭവൻ അല്ലെങ്കിൽ ഇൻഷ്വറൻസ് കന്പനിയെ നേരിട്ടോ രേഖാമൂലമോ അറിയിക്കണം. ടോൾ ഫ്രീ നന്പർ - 18004257064.
സിഎസ്‌സി ഡിജിറ്റൽ സേവാകേന്ദ്രങ്ങൾ വഴി കർഷകർക്ക് ഓണ്‍ലൈനായും അംഗീകൃത ബ്രോക്കിംഗ് സ്ഥാപനങ്ങൾ വഴിയും രജിസ്റ്റർ ചെയ്യാം. വിളകൾക്ക് വായ്പ എടുത്ത കർഷകരാണെങ്കിൽ അവരെ അതതു ബാങ്കുകൾക്കും പദ്ധതിയിൽ ചേർക്കാം. അപേക്ഷ പൂരിപ്പിച്ച ശേഷം നിശ്ചിത പ്രീമിയം തുക, ആധാറിന്‍റെ പകർപ്പ്, നികുതി രസീതിന്‍റെ പകർപ്പ്, ബാങ്ക് പാസ്ബുക്കിന്‍റെ പകർപ്പ്, പാട്ടത്തിനു കൃഷി ചെയ്യുന്നവരാണെങ്കിൽ പാട്ടക്കരാറിന്‍റെ പകർപ്പ് എന്നിവ കൂടി സമർപ്പിക്കണം.
ഏലം ഇൻഷ്വറൻസ് ഫെബ്രുവരി 28 വരെ
സ്പൈസസ് ബോർഡ് 75 ശതമാനം സബ്സിഡിയോടെ അഗ്രികൾച്ചർ ഇൻഷ്വറൻസ് കന്പനി മുഖാന്തരം നടപ്പാക്കുന്ന ഏലം കാലാവസ്ഥാധിഷ്ഠിത വിള ഇൻഷ്വറൻസ് പദ്ധതിക്ക് 18 മുതൽ ഫെബ്രുവരി 28 വരെ രജിസ്റ്റർ ചെയ്യാം. കാർഡമം രജിസ്ട്രേഷൻ സർട്ടിഫിക്കറ്റ് ഉള്ളവർക്കേ രജിസ്ട്രേഷൻ സാധ്യമാകൂ. അല്ലാത്തവർക്ക് കാലാവസ്ഥാ വിള ഇൻഷ്വറൻസിൽ ചേരാം.
25 സെന്‍റ് മുതൽ 10 ഏക്കർ വരെ ഉള്ള ചെറുകിട കർഷകർക്കാണ് പദ്ധതി. സബ്സിഡി കിഴിച്ചുള്ള 25 ശതമാനം തുക കർഷകൻ പ്രീമിയം അടയ്ക്കണം. പരമാവധി 11 മുതൽ 20 ഏക്കർ വരെയുള്ളവർക്ക് സബ്സിഡി ഇല്ലാതെ പദ്ധതിയിൽ ചേരാം. കായ്ഫലമുള്ള രണ്ടുവർഷം പ്രായമായ ചെടികൾക്ക് മുതലാണ് പദ്ധതിയിൽ പരിരക്ഷ ലഭിക്കുന്നത്.
വ്യക്തിഗത നാശനഷ്ടം സംഭവിച്ച് 72 മണിക്കൂറിനകം കർഷകർ അടുത്തുള്ള സ്പൈസസ് ബോർഡ് ഫീൽഡ് ഓഫീസിലും അഗ്രികൾച്ചർ ഇൻഷുറൻസ് ഓഫീസിലും അറിയിക്കണം. ഹെക്ടറിന് 5310, ഏക്കറിന് 2124, സെന്‍റിന് 21.24 എന്നിങ്ങനെയാണ് പ്രീമിയം തുക. ഹെക്ടറിന് 1,20,000 രൂപയാണ് ഇൻഷ്വറൻസ് തുക.
പ്രീമിയം-ഹെക്ടർ, ഏക്കർ, സെന്‍റ് എന്ന കണക്കിൽ
നെല്ല്-ഹെക്ടറിന് 1200, ഏക്കറിന് 480, സെന്‍റിന് 4.80.
ഇൻഷുറൻസ് തുക ലഭിക്കുന്നത് ഹെക്ടറിന് - 80,000.
വാഴ-8750, 3500, 5. ഇൻഷുറൻസ് തുക-17,5000.
കുരുമുളക്- 2500, 1000, 10. ഇൻഷുറൻസ് തുക - 50,000.
കമുക്- 5000, സെന്‍റ് -20. ഇൻഷുറൻസ് തുക - 1,00,000
കാപ്പി അറബിക്ക- 2250, 900, 9. ഇൻഷുറൻസ് തുക - 45,000.
കാപ്പി റോബസ്റ്റ- 1650, 660, 7. ഇൻഷുറൻസ് തുക - 33,000.
കൊക്കോ-3000, സെന്‍റിന് 12. ഇൻഷുറൻസ് തുക - 60,000.
പച്ചക്കറി-ഹെക്ടറിന് 2000 സെന്‍റിന് 8. ഇൻഷുറൻസ് തുക- 40,000.
കിഴങ്ങുവർഗങ്ങൾ-2000, സെന്‍റിന് 8. ഇൻഷുറൻസ് തുക - 40,000.
പയർവർഗങ്ങൾ- 800, സെന്‍റിന് 3. ഇൻഷുറൻസ് തുക- 40,000
തെങ്ങ് -5000, 20. ഇൻഷുറൻസ് തുക : 1,00,000.
റബർ-5000, സെന്‍റിന് 20, ഇൻഷുറൻസ് തുക - 1,00,000.
മരച്ചീനി- 6,250, സെന്‍റിന് 25. ഇൻഷുറൻസ് തുക - 1,25,000.