കട്ടപ്പന: ഇടുക്കി ജില്ലാ ടീച്ചേഴ്സ് ഹൗസിംഗ് സൊസൈറ്റിയുടെ വാർഷിക പൊതുയോഗവും വിരമിച്ച അധ്യാപകരെ ആദരിക്കലും എസ് എസ്എൽസി, പ്ലസ്ടു വിഭാഗങ്ങളിൽ എ പ്ലസ് നേടിയ കുട്ടികളെ ആദരിക്കലും നടന്നു. ബാങ്കിന്‍റെ സമീപമുള്ള ഓഡിറ്റോറിയത്തിൽ നടന്ന പൊതുയോഗത്തിൽ സൊസൈറ്റി പ്രസിഡന്‍റ് ജോർജ് ജേക്കബ് അധ്യക്ഷത വഹിച്ചു.
കട്ടപ്പന നഗരസഭാ ചെയർപേഴ്സണ്‍ ബീന ടോമി പൊതുയോഗം ഉദ്ഘാടനം ചെയ്തു. നഗരസഭാ കൗണ്‍സിലർ ജോയി ആനിത്തോട്ടം മുഖ്യപ്രഭാഷണം നടത്തി. യോഗത്തിൽ റിട്ടയർ ചെയ്ത 21 സഹകാരികളെ ആദരിച്ചു. എസ്എസ്എൽസി, പ്ലസ് ടു വിഭാഗങ്ങളിൽ എ പ്ലസ് നേടിയ കുട്ടികൾക്ക് കാഷ് അവാർഡും മെമന്‍റോയും സമ്മാനിച്ചു.
യോഗത്തിൽ വൈസ് പ്രസിഡന്‍റ് ജോബിൻ കെ. കളത്തിക്കാട്ടിൽ, സിബി ജോസ്, ഡെയിസണ്‍ മാത്യു, സജി ടി. ജോസ്, ലാലു തോമസ്, കെ.സി. ജോർജ്, സൂസമ്മ ജോസഫ്, ജോജോ സെബാസ്റ്റ്യൻ, മാത്യു തോമസ്, കെ.വി. സിജോ, വിൻസി സെബാസ്റ്റ്യൻ, ജിന്റുമോൾ വർഗീസ്, വി.പി. അഞ്ജലി, കെ.പി. ശ്രീകല, ലിജോ മാത്യു എന്നിവർ പ്രസംഗിച്ചു.