ആലപ്പുഴ: ജില്ലാ ശിശുക്ഷേമസമിതി ശിശുദിനത്തിന്‍റെ ഭാഗമായി സംഘടിപ്പിച്ച മത്സരങ്ങളിൽ അങ്കണവാടി, എൽകെജി, യുകെജി വിദ്യാർഥികൾ അണിനിരന്ന മത്സരങ്ങൾ ഏറെ ശ്രദ്ധേയമായി. സംഘാടകർ നൽകിയ ചിത്രത്തിനു വിവിധ വർണങ്ങളാൽ വരച്ച ചിത്രങ്ങളും എൽപി, യുപി, ഹൈസ്കൂൾ വിദ്യാഥികൾ പങ്കെടുത്ത ചിത്രരചന മത്സരങ്ങളുമായിരുന്നു ഏറ്റവും കൂടുതൽ വിദ്യാർഥികളുടെ പങ്കാളിത്തത്താൽ വേറിട്ടുനിന്നത്.
കൊച്ചുകുട്ടികളുടെ ഇംഗ്ലീഷിലും മലയാളത്തിലുമുള്ള കഥ പറച്ചിലും ആക്ഷൻ സോംഗും ശ്രദ്ധേയമായി. എൽപി, യുപി, ഹൈസ്കൂൾ, ഹയർ സെക്കൻഡറി വിദ്യാഥികൾക്കാണ് മത്സരം സംഘടിപ്പിച്ചത്.
കഥാരചന, കവിതാരചന, ഉപന്യാസം, ചിത്രരചന, ലളിതഗാനം, ദേശഭക്തി ഗാനം, ക്വിസ് തുടങ്ങിയ മത്സരങ്ങളാണ് സംഘടിപ്പിച്ചത്.
മത്സരങ്ങൾ ആലപ്പുഴ അഡീഷണൽ ജില്ലാ മജിസ്ട്രേട്ട് ആശ സി. ഏബ്രഹാം ഉദ്ഘാടനം ചെയ്തു. ജില്ലാ ട്രഷറർ കെ.പി. പ്രതാപൻ അധ്യക്ഷത വഹിച്ചു. ജില്ലാ സെക്രട്ടറി കെ.ഡി. ഉദയപ്പൻ, ജോ. സെക്രട്ടറി കെ. നാസർ, അംഗങ്ങളായ ടി.എ. നവാസ്, ആർ. ഭാസ്കരൻ മാലൂർ ശ്രീധരൻ എന്നിവർ പ്രസംഗിച്ചു.