സർക്കാർ ഇടപെടണം: മാർ പാംപ്ലാനി : Deepika.com Kerala News |

Click here for detailed news of all items

സർക്കാർ ഇടപെടണം: മാർ പാംപ്ലാനി

Thursday, September 19, 2024 1:28 AM IST

തലശേരി: ഇഎസ്എ സംബന്ധിക്കുന്ന കേന്ദ്രസർക്കാരിന്‍റെ 2024 ജൂലൈ 31ലെ ഡ്രാഫ്റ്റ് നോട്ടിഫിക്കേഷന് മറുപടി നൽകാനുള്ള അന്തിമ തീയതി സെപ്റ്റംബർ 30 ആയിരുന്നിട്ടും ഈ വിഷയത്തിൽ സംസ്ഥാന സർക്കാർ പുലർത്തുന്ന നിസംഗത അവസാനിപ്പിച്ച് കർഷകരുടെ ആശങ്ക അകറ്റാൻ സർക്കാർ സത്വരമായി ഇടപെടണമെന്ന് ആർച്ച്ബിഷപ് മാർ ജോസഫ് പാംപ്ലാനി ആവശ്യപ്പെട്ടു.

കേരളത്തിലെ 131 വില്ലേജുകളിലെ സാധാരണക്കാരായ കർഷകർ ആശങ്കയിലാണ്. കേരള പരിസ്ഥിതി കാലാവസ്ഥ വ്യതിയാനവകുപ്പ് പ്രസിദ്ധീകരിച്ച ഇഎസ്എ അതിർത്തി മാപ്പും ഇഎസ്എ വില്ലേജ് മാപ്പും വസ്തുതകൾ വ്യക്തമാക്കുന്നതിനു പകരം സങ്കീർണമാക്കുകയാണെന്ന് ആർച്ച്ബിഷപ് ചൂണ്ടിക്കാട്ടി.

ഇതര സംസ്ഥാനങ്ങളിലെ സർക്കാരുകളെ മാതൃകയാക്കി ജിയോ കോർഡിനേറ്റ് പോയിന്‍റുകൾ വ്യക്തമായി രേഖപ്പെടുത്തി ജനങ്ങളുമായി ചർച്ച ചെയ്ത് അന്തിമരൂപത്തിലുള്ള മാപ്പ് സമർപ്പിക്കാൻ സർക്കാർ സംവിധാനങ്ങൾ യുദ്ധകാലാടിസ്ഥാനത്തിൽ പ്രവർത്തന സജ്ജമാകണം.

സംരക്ഷിത വനമേഖല, വേൾഡ് ഹെറിറ്റേജ് സംരക്ഷിത മേഖല എന്നിവ മാത്രമേ ഇഎസ്എ മാപ്പിൽ ഉൾപ്പെടുത്തുകയുള്ളൂ എന്ന് സർക്കാർ നൽകിയ ഉറപ്പ് നിർബന്ധമായും പാലിക്കപ്പെടണം.
കൃഷിഭൂമി മൂല്യരഹിതമാകുന്ന ഗതികേടിൽനിന്ന് കർഷകരെ രക്ഷിക്കാൻ സർക്കാർ സത്വരമായി ഇടപെടണമെന്ന് ആർച്ച്ബിഷപ് ആവശ്യപ്പെട്ടു.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.