സന്തോഷ് ട്രോഫി: ഫൈനല്‍ റൗണ്ടിലേക്ക് ടിക്കറ്റെടുത്ത് കേരളം
സ്വന്തം ലേഖകന്‍
Monday, November 25, 2024 2:23 AM IST
കോഴിക്കോട്: എച്ച് ഗ്രൂപ്പിലെ അവസാന മത്സരത്തില്‍ പുതുച്ചേരിക്കെതിരേ എതിരില്ലാത്ത ഏഴു ഗോളുകള്‍ നേടി കേരളം സന്തോഷ് ട്രോഫി ഫൈനല്‍ യോഗ്യതാ റൗണ്ടില്‍ ഇടംപിടിച്ചു. മറ്റൊരു മത്സരത്തില്‍ എതിരില്ലാത്ത ഒരു ഗോളിന് റെയില്‍വേസ് ലക്ഷദ്വീപിനെയും പരാജയപ്പെടുത്തി. ഫൈനല്‍ യോഗ്യതാ റൗണ്ടിലെത്താന്‍ കേരളത്തിന് സമനില മതിയായിരുന്നുവെങ്കിലും പുതുച്ചേരിയുടെ ദുര്‍ബലമായ പ്രതിരോധം കേരളത്തിനു അവസരങ്ങള്‍ തുറന്നു നല്‍കി.
മൂന്നു മത്സരങ്ങളില്‍ തോല്‍വിയറിയാതെയാണ് കേരളം ഫൈനല്‍ യോഗ്യതാ റൗണ്ടിലെത്തിയത്. മൊത്തം 18 ഗോളുകള്‍ നേടി. കേരളത്തിന് ഒരു ഗോള്‍ പോലും വഴങ്ങേണ്ടിയും വന്നില്ല. ഒമ്പതു പോയിന്‍റ് നേടി ഗ്രൂപ്പില്‍ ഒന്നാംസ്ഥാനത്താണ് കേരളം. ഫൈനല്‍ യോഗ്യതാ റൗണ്ട് മത്സരങ്ങള്‍ അടുത്ത മാസം ഹൈദരാബാദില്‍ നടക്കും.