ലക്ഷദ്വീപിനെ ഗോള്‍മഴയില്‍ മുക്കി കേരളം
Saturday, November 23, 2024 12:32 AM IST
ബിനു ജോർജ്
കോഴിക്കോട്: സന്തോഷ്ട്രോഫി ഫുട്‌ബോള്‍ യോഗ്യതാറൗണ്ടില്‍ കേരളം തീര്‍ത്ത ഗോള്‍ മഴയില്‍ മുങ്ങി ലക്ഷദ്വീപ്. മറുപടിയില്ലാത്ത 10 ഗോളുകള്‍ക്കു ലക്ഷദ്വീപിനെ നിലംതൊടീക്കാതെ രണ്ടു ജയവുമായി കേരളം ഫൈനല്‍ റൗണ്ട് സാധ്യതയിലേക്കു വഴി തുറന്നു.
ലക്ഷദ്വീപിനെതിരേ സജീഷിന്‍റെ ഹാട്രിക്കിനുപുറമേ കേരളത്തിനു വേണ്ടി മുഹമ്മദ് അജ്‌സല്‍ (രണ്ട് ഗോള്‍), ഗനി അഹമ്മദ് നിഗാം (2), നസീബ് റഹ്‌മാന്‍ (1), വി. അര്‍ജുന്‍ (1), മുഹമ്മദ് അഷറഫ്(1) എന്നിവരും ഗോള്‍ നേടി.
നാളെ വൈകുന്നേരം 3.30ന് പുതുച്ചേരിയുമായുള്ള മത്സരത്തില്‍ തോല്‍ക്കാതിരുന്നാല്‍ കേരളത്തിനു ഫൈനല്‍ റൗണ്ടിലേക്കു കടക്കാം.
അതേസമയം, എച്ച് ഗ്രൂപ്പിലെ കരുത്തരായ റെയില്‍വേസ് ഇന്നലെ രാവിലെ നടന്ന മത്സരത്തില്‍ ഒന്നിനെതിരേ പത്തു ഗോളുകള്‍ക്കു പുതുച്ചേരിയെ കീഴടക്കി. രണ്ടു ജയവുമായി ആറു പോയിന്‍റുകള്‍ നേടിയ കേരളമാണ് ഗ്രൂപ്പില്‍ ഒന്നാം സ്ഥാനത്ത്. റെയില്‍വേസാണ് രണ്ടാം സ്ഥാനത്ത്.